الحقــــــــــــــــــــــــوا علي ترااني .......؟؟؟؟؟؟

سلام على اعزائي .. سلام على متابعين هدرتي. :bigsmile: . بدون مقدمات قرقريه نخش في الموضوع...

ـــ امااااااااااااااااااااااااااااااااااااااااااااااه. ..
ــ امي بعد ابوي...
ــ الحقي على عمرررري..
ــ سمت على عمرك الزهرا ام الحسن وحسين.. ويش فيك ..؟؟.
ــ حسدوووني .. رسبت !!! <<<<< اساسا كان ما يذااكر... :weird: .
ــ ويي .. على عمري .. حسبي الله على من حسدك يا عساه ما يربح .. تعال اشببك
ويبتدي مشوار الدخاان
ــ كححححح كح كح اماااه فطست
ــ اسسسسسكت هذا هي طلعت العيوووون .... يااا علي.. ويلي عليك يا ولدي كبيرره خلني افقعها بس << أي كبيره ليش هو صايدتنه عين اساسا ؟؟
ــ أي والله اماااه " ويتميرض بس هروبا من واقع رسوبه" .. صدق صدق حسدوووووني .. اااه .. اااه ... :sad2:

حاله اخرى
ــ ويلي يا ابو فلان... بنتك ما جاها نصيب للحين بنت خالتها اصغر منها بـ 5 سنوات تسهلت وبنتك للحين بتعنس..
ــ هذا نصيبها يا ام فلان و يش بتسوي بعد
ــ أي نصيب أي بطيخ .. بنيتي محسوووده <<< محسوده على ويش ياااحسره... نصيب وما جا ...؟؟؟ :huh:
يبغى لي اوديها لفلانه تدرع ليها وتكشف ليها ويش صار ....
يروحوا لفلانه تدرع

ــ جيبي غطا بنتش .. وبلوزه <<<<والا أي صاقعه من عندها خخخ
ويقوم الهف .. وحاله .. بعدين...
قرقر بربر قرقر بربر .... بسم الله الرحمن... هدرة اغلبها فاضيه .. وللي يصدق راح يمرض من الهدره على خرطي
الزبده ...
ــ اخذي بيضه وكيس طحين وملعقتين خميره >>>>خخخخخخخخ طبخه :wink:
امزح..
اخذي بيضه واكسريها هناك
وماي رشيه هنا...
وهذا خلها تلبسه ..
وبكره الرجال بيتحذفوا على بتنش << كر كر كر ياااويلي والله حااااااله.....!!!!



ويا كثر الحالات.... اكيد مرت عليكم انوااع اخرى

الزبده ..,,, <<< ياكثر الزبده في مواضيعي .. بفتح مصنع.. وامحق من زبده..خخخ تتبعها هدره كح
المهم
اغلب الناااس ... الأوادم .. خلق الله... اذا القدر ما جا على المزاج.. صرخوا محسودين
اذا فشلوا في شي وهم السبب .. صرخوا محسودين...
الحسد ومااا ادراهم مالحسد...قال الرب جل جلاله" ومن شر حاسد اذا حسد"
الحاسد شره يصيب .. اصناف... مثلا انسان طول عمره ناجح فجأه انتكس... ولازم قبل لا نقول محسود نرجع لأسباب هالنكسه ممكن يكون شي خارجي صابه... اما اذا كان عامل نفسي ... انسدت نفسه عن الدراسه مثلا .. وكل ما يبغى يفتح كتاب كنه عزرائيل يادافع مخيم عليه ...خخخ صابتني هالحاله هالسنه .. المرجع لله .. ماعلينا ..
يقول حزتها محسود.. ويقروا عليه قرآن ... الشبه بعد زينه وليها فوايد بس مو بكل حاله نسوي حرايق ونقوم الدخان ...
اما اللي تدرع احسها استغفر الله سيم سيم مشعوذ...
طيب ناس تقول : تدرع بالقرآن ... طيب بالقران وبالنهايه اكسري واخلطي ... بدل لا تقول ليها اقري وصلي مثلا ؟؟؟!!!
شرايكم بهالحالات في مجتمعنا .. حالات من يظنوا نفسهم محسودين دوم... من العلاج بالشبه ..والتدريع ...
هل مررتم بكذا حاله .. وويش كان الحل ..؟؟؟
اتمنى القى تفاعلكم وبعض المواقف مما سمعتم او مر عليكم

وسلملم... :cool:
دمتم بحفظ الرحمن

كلامك صح حسبي الله ونعم الوكيل

ناس يقولون محسودين خخخخخخخخخخخخخخ بس على ويش

ولاكن هناك ناس لايفهمون ويقولو حنا محسودين

مشكورة أختي

الموضوع رائــع وطريقة الطرح احلى

وكلامك كله صحيح والله

وفيه ناس كذا وبكثــرة بـعد

الله يــهديهم احسهم متخلفيـن ..

يعيطك الـعافية على الطرح


دمــب بكل خير ..

تحياتي
حور العين

يعطيكم العافيه
علي امامي
حور العين
على التواجد الجميل
لا عدمته
دمتم بحفظ الرحمن

اي والله امورة صادقه ناس واجد امرو بهلحالات
الله يكفينا الشر
اخوي الصغير من صغره للحين فيه حساسيه في رجايله حتي بالعلاج مو رايح اروح يوم يومين وعود اليه جاراتنا اقولو محسود علي ويش محسود عشان رجايله تشونه لو ويش
يسلمو امورة علطرح الرئع

يسلمش حبابه
بس للحين ما احد جاوب على اسئلتي
ولا عطانا مواقف مر فيها الا زهووره
يللا
جاري الإنتظار
دمتم بحفظ الرحمن

ولا يهمك امورة انا هنا

وجايية من طريق ومنتفخ رأسي وبنفخ رأسك مواقف خخخ


شوفي ياطويلة العمر الحسد والعين هذول شيء واقعي طبعا يالغلا ...<<ماجبت شيء جديد ..


ومواقف حصلت لي مع ولدي مسكين كله سكات عين تجيه ..

بس اللي عمري ماانساه موقف حرق قلبي وقطعه تقطيع ....

هو والله مايستاهل حسد عليه بس ويش تقولي للناس ...

المهم شوفي ياامورة ...

مرة من المرات احنا رايحين نقضي اغراض البيت تونا جايين من اجازة والبيت مصفر ...


شرينا انواع عصاير كثيرة ...عبود كان لسى عمره سنة ونصف تقريبا ...


صفيتها بالثلاجة طبعا ...


في اليوم الثاني دقت واحدة من قرايبنا <<<الله يستر بس لايكون معا نا بالمنتدى ولا ادري عنها واتوهق

بس يلا بقولها واللي فيها فيها ....


قالت انها بتجي عندي ..فقلت لها تعالي حياك ..

وجات ...عاد ياجماعه الضيف احيانا يستحي وما يدخل المطبخ ولا يدخل الغرف ..الصالة وبس ..

بس هي دخلت المطبخ <<ينقال عنها تساعدني وانا افترضت حسن النية مع وجهي ...

وتفتح في الثلاجة وتحوس ومدري ويش ...

المهم انه عبود من بعد ذاك اليوم ظل شهر واشوي دوم تكرمي اسهال وتطريش ...

وحتى المستشفيات مو عارفين له ......

وانا ابد والله ماجاء على بالي حسد او شيء دوم افكر فيروسات الجو ...


بعد فترة رحت عندها انا في البيت عاد انا احم احم ماشاء الله علي عاقلة ولا اروح احوس ..

اذا بساعد تغسيل صحون واجد عليها خخخخ<<عين قوية ..

المهم واحنا جالسين قالت الي كلمة هزتني من جد وربي ...














كان جبتي لنا عصيرات من العصاير اللي معبيه ثلاجتكم منها




واصلا ماصار موضوع علشان اقول انه تذكرت او شيء الكلمة طلعت منها لحالها ..


اول ماقالتها لي كح كح كح ..تذكرت العبابيدووو ومعاناته قلت والله زين ماراح فيها


اذا مانست ثلاجتنا وعصيراتها <<< مااقول الا الله يسامحها بس عورت قلبي والله ...


وخلاص خذتها عادة من تدق تقول بتجي عندي ..تقولي ثلاجتنا مهجورة واشيل كل اللي فيها


او اني اقفلها واخش عنها المفتاح مثل اليهالوه ....


وعلى فكرة ولدي نفس سالفة اخو زهرة البنفسج ترى رجوله دوم مراهم وهذا لي ثلاث سنين


وانا من مرهم لمرهم ...بس هالمرة مااكتشفت منو حاسده ولا كان وريتها شغل الله <<لايكون انت امور ها اعترفي

الله يعينا بس من عيو ن الناس اللي ماترحم ...

والحين قامت تحاربنا بعد العيون مو علشان ضعف او سمنه حتى الملابس والكلام والمشية ووووو

وييه ماصارت ...


بس الحمد لله على كل حال ولو اقول من اليوم لبكرة عن قصص الحسادين اللي اسمعها كان ماانتهينا ...


لا لا لا لا لا



بس بقول لكم عن هذه من جد قطعت قلبي تقطيع ...


هذا الله يسلمكم بنوته صغيرة من قرايبنا قاعده تخطي ياحليلاتها واختها الكبيرة كانت والد ..

جات حرمة تزورها وتتحمد لها السلامة ...


شافت البنت الصغيرة وبنت االا خت قالت للأم ويييه هذا انت وبنتك تجيبون مع بعض ...

ياادوب طلعت والبنت تغيرت احوالها واصيبت بالشلل ...

وبعد فترة توفت ....


وييه كل ماتذكرت موقف والله يقشعر شعر بدني ..والمشكلة الحسد مايجيك الا من القرايب ...


الحمد لله على كل حال ...


بس على اللي يصير واذا حسيت بعين حارة صوبتني حدي شبة ....


وبعد مو كل شيء اقول عنه عين يعني بعضهم الله يهداهم مثل ماقلتي اي حاجة قالوا حسد ..

مثل مسألة الزواج والرسوب يتروالي بعضهم حتى الانفلونزا يقولوا عين ...


خافيين من قاموسهم مسألة فايروس او مرض ,,,


ربك يعين بس ...





امورتنا تسلمي يالغلا على الهذرة الحلوة والعسولة ....

سلمت يداك

كلامك صحيح خيتو يجب الاخذ بالاسباب ولا نقول كل شيء حسد أو عين ولكن في نفس الوقت لا ندعي أن هذه الامور غير موجودة وأن من يؤمن بها عايش في الخرافة فأنت ذكرت آية من القرآن تتكلم عن الحسد فالعين حق وعلينا أن نحذرها وهذه أمثلة:
- عوذة للعين مروية عن النبي ص اللهم يا ذا السلطان العظيم و المن القديم و الوجه الكريم ذا الكلمات التامات و الدعوات المستجابات عاف الحسن و الحسين من أنفس الجن و أعين الإنس .
- قال الرسول (ص)..( كل ذي نعمة محسود)
- وهذا باحث يتحدث عن الشبة قائلا" عندما بحثت في الروايات والكتب المعتبرة لم أجد إسم الشبة صراحة بالاسم ولكني وجدت شيئاً تقريبياً وهو روايات عن حبة (الشب) وهي المكون الرئيسي لـ(الشبة) والتي منها أشتق اسمها على ما يبدو لي .

وعندما سألت أكثر من (حواج) وهو بائع الأدوية الشعبية والعشبية عن المكونات الرئيسيه لها أجابوني بوضوح وكادوا يتفقون تماماً مع جداتنا وأمهاتنا حين أجابوا سؤالي :

من ماذا تصنع (الشبة) أو ما هي العناصر الأساسية لصنعها؟

أن العناصر هي :

1. الحرمل 2. اللبان 3- الشب 4 . الحبة السوداء (البركة)

مع بعض الاختلافات هنا وهناك بسبب عدم معرفة الأمهات أسماء العناصر بالضبط وقد زودني (الحواج) بهذه الأسماء.

بصراحة ، لدي حدس أن كل شئ ينصهر في نسيج المجتمعات لا بد أن تكون له أسس ولو ضعيفة وهذا ما دعاني للبحث والتنقيب إلى أن وجدت ضالتي في بعض راويات الأئمة التي أعتبرها سبب توارث هذه الطريقة لطرد عين الحاسد وإطفائها.

وقد وجدت هذه الروايات التي تتكلم عن عنصرين لهما خواص طرد الشياطين والحساد والشر هما الحرمل واللبان وهما المكونان الأساسيان للشبة.

وإليكم الروايات :

الحرمل : وفوائده الصحية كثيرة ولكن ما يفيد البحث هو هذه الرواية..

{ سُئل الصادق (ع) عن الحرمل واللبان ؟ فقال : أما الحرمل فإنه ما تغلغل له عرق في الأرض ولا ارتفع له فرع في السما إلا وكل الله عز وجل به ملكاً حتى يصير حطاماً أو يصير إلى ماصار إليه، فإن الشيطان ليتنكب سبعين داراً دون الدار التي فيها الحرمل ، وهو شفاء من سبعين داء.} المصدر/ مكارم الأخلاق صـ 186

إذاً الإمام يصرح أن الحرمل طارداً للشياطين أي شياطين الجن والأنس ، وشياطين الأنس هم من يريدون الشر للإنسان والحسد هو شر بدليل ( من شر حاسد إذا حسد).

اللبان : فوائده الطبية لا تحصة ولكن ما يفيد بحثنا..

{ قال الصادق(ع) وإما اللبان فهو مختار الأنبياء (ع) من قبلي ، وبه كانت تستعين مريم(ع) . وليس دخان يصعد إلى السماء أسرع منه وهي مطردة الشياطين ومدفعة للعاهة فلا يفوتنكم.} المصدر/ مكارم الأخلاق صـ 187.

لطقوس الشبة طرق كثيرة ، أحلاها عندما تدور الأم حول الأبناء وتجعل المبخر فوق رؤوسهم للتشبيب وتقرأ الآيات والأدعية والصلاة على محمد وآل محمد."
وفي الختام في زمننا هذا الحسد والعين زايدة بكثرة وهذا من قلة الايمان بالله غير السحر وهذا موضوع ثاني.

.. أميرة المرح ..
ألف شكر لك عالموضوع الجميل ..
وانا عندي مواقف بعد راح اطرحها لكم ..

الموقف الاول ..
كان زمان عندنا فى بيتنا مزرعة حلووه .. وما شاء الله فيها اشجار فواكه كثير ومنها كان عندنا شجرة موز .. عاد الله راد وثمرت عندنا هذه الشجره وعندنا جيران الله يحفظهم عندهم زراعة تقريباً مثلنا فيها انواع كثيره من الفواكه
عادت جارتنا جت بيتنا وكنا حنا بالزراعه وشافت شجرة الموز اثمرت عندنا ما شفناها الا شهقت وتقول اثمرت شجرتكم؟؟ امي قالت لها اي << كان هذا العصر ..
عاد يوم ثاني ما قعدنا الصبح ورحنا الزارعة الا شجرة الموز مايته واغصانها طايحه بالارض ..



الموقف الثاني ..
عندي اخو ما شاء الله عليه متفوق .. مره وحده اعتفس بس احنا دوم نقوله انت مهمل واخرتها اكتشفنا ان عين صابته وان اكو ناس له بالمرصاد لدرجه ان هالناس أخذوا كتبه بالمدرسه ومزقوهم وبالبيت ما يطلع يبي نعاله " الله يعزكم " الا ماكو شيء مو مرة ولا مرتين .. واغراضه دوم مفقوده << القهر ان هالناس بالوجه بعد يعطونا اياها يقولوا لامي انت وابوهم مو دارسين اشلون عيالكم شطار؟؟

هذا ما لدي من مواقف ..
يعطيك العافيه خيوه ..

تحياتي
دمعه حزن

موضوع جدا قيم ..
مشكورة اميرة على طرح الموضوع
ومشكور عماد علي على المعلومات القيمة ..

الحسد ماله علاج إلا بذكر الله ..
من ذكر الله وأكثر من قراءة القران والادعية والاحراز لا يصاب
بسوء ابدا ..
اما عن المواقف فحدث ولا حرج ..
بس اذكر موقف صعب ينسى ..
عروس جديدة اتعرفت عليها واحنا رايحين المدينه قبل كم سنه
كانت جميلة بس كانوا اصابعها مشوهيين
فسألتها من ويش هذا ؟؟
قالت الله يسلمك : اني اصغر خواتي وتزوجت وكنت يوم عرسي مررة جميلة
في يوم من بعد العرس كانوا جاينهم ضيوف يباركوا ليها
ما خلوا كلمة ما قالوها في جمالها وصغرها ومن هذا القبيل
بعدين قامت العروس ركبت غرفتها توها موصلة للغرفه شان يسمعوا الفزعه
والصراخ والضجة هي تقول ما تدري ويش صااار بس ما اوتعت
إلا ايديها كلها دم وملفوفة وقالوا ليها ان الباب تسكر عليها
وشعرها كله تساقط وضعف وبشرتها راحت فيها
هذا كله في اول فترة زواجها وهي تقول ادري ان هذا من عيون الناس
طول ما اني قاعده احس العواين تحوم حوالي بس ويش اسوي
هذا حظي ..! أذيتي من اقرب الناس ليي
ومواقف كثيرة بس الواحد ما يحب يذكر ويقول
والحمد لله على كل حال ..

قوة اميرووووووووووووووة

موضوع حلو مثلج خيتو

عاد عن المواقف عندي واجد بس اخاف يحذفوني من المنتدى بالمرة اذا قلتهم لك كلهم

ههههههههههههههههههههههه

اولا الحسد موجود وصدق في ناس حسودين ما يحبون الخير لغيرهم وعيونهم على طول رادار على الي عايشين في وسطهم

ساعات يكون الامر ما يسوى بالمرة ويكون جدا عادي لكن الحسود ينظر اليهم وكأنهم ملكوا الدنيا كلها

الله يعينهم على مرضهم

وعلى الي قال فيه اخي عماد عن الحرمل والشب واللبان حتى انا كنت اول على طول اقول لهم خرفات

وكانت جدتي الله يرحمها دائما تقول لي هذا من الائمة عليهم السلام مو من كلامنا

وطبعا كنت اقول شدراكم انتوا بالائمة ومن علمكم وانتون حتى مدرسة ما رحتوا

بس بحثت وقمت احوس مني ومناك وفعلا طلع كلامهم سليم 100%

وطلعت انا الي ما افهم

واخذتها عبرة اني ما اهزء باي عقيدة لاي من كان الا لما اتاكد منها

هذا عن الحسد

عاد تعالي على سالفة الكشف واكسري بيضة وما ادري شو

هذي كلها خرابيط والمريض يتمسك باي امل امامه على امل الشفاء

حتى بقول لك ان جد زوجي ( حج احمد ) يكسر بيض للناس الي يطلبونه

سألته الحين انت ليش تكسر البيض وهل فيها فايدة وهي صحيحة

قال لا بس الناس تتعلق باي امل وما احب اكسر بخاطرهم

(0حج احمد )عاد مشهور بمعرفته بتكسير البيض في الفريج

والحين بقول لك عن الحسد

موقف صار الى ابوي
ابوي ماشاء الله عليه ختم القرآن وهو توه صغير وصوته احليوا في القراءة

وكانت في وحدة حسودة دائما تسأل امه ختم القرآن او للحين وكانت على طول تقول لها انه للحين ما ختمه

عاد مرة كان يقرْ القرآن وبصوت مرتب واحليو وكانت هذ الحسودة مارة صوب بيت ابوي وسمعت الصوت اخذها الفضول تبي تعرف هذا منو

طلت من الباب خبرك الاول ما كانوا يقفلون بيبان ولا شي على طول الباب مفتوح ومن شافت ابوي هو الي يدرس شهقت شهقة وحدة طاحت عين ابوي في ايده في نفس اللحضة
واخذت تقول يقولون ما ختم القرآن اخر شي يطلع هو الي يدرس كل يوم
شفتي مدى قوة العين !!!!!!!

وللحين ابوي عنده عين وحدة بس

هذا على الخفيف ما ابي اطول عليك اكثر تالي تنامين وانتين تقرين الرد

هههههههههههههههههههه

تسلمين يالغالية على الطرح

تحياتي لك

اختك ام محمد

غلاي اموول
ويلي عورتي قلبي بسالفه اخوي عبوودي
ويلي عليه .. حسبي الله على عيونها هذي .. يبغى ليها براد بكبره كان تفككم من شرها
وهههههه عجبتيني بسالفه القفل وتصفيه الثلاجه من جد على قولة القايل.. " داري على شمعتك تضوي لك " خخخ
وياهلا غناتي وتواجد على قلبي عسسسسسسل




تسلم خيي عماد على
هالمعلومات بالمره روعه
ولا عاد الحرمل يعجبني عدل احبه اكثر من الشبه خخخ

وتواجدك خيي تشكر عليه تواجد دوم يعود بالفوايد والنصايح
لا عدمته يارب



خيتووو دمعه
ههههه صدق هذي حسودة المووز مهي طبيبعيه خخخ محسوود الفقير بموتته الجمعه
الحين يالله قامت هالشجره مهي مصدقه ... كان قلتوا ليها بيتنا بأفريقيا عن الحسد
صدق ناس بلاوي....
اما على الشطاره والحسد في هالنااحيه .. اوووه هذي عاد اعاني منها شخصيا والله يعين وهذا احنا هالحزه متنييلين بستين نيله خخخ
توتصل روعه غاليتي
لا عدمته

تاج...
ياهلا .خيتوو. ومرحبا.. وتعليق بالمره مؤثر .. عورني قلبي على هالعروس .. الجمال نعمه من الله وينحسد الواحد عليها
وربي تضيع الصحه والجمال ولا يسوى على الواحد...
بس ويش نقول .. ناس ضعيفة نفوس وحارة عين ياكافي يارب


ام محمد
غناتي .. بالله ويش سويتي فيني
خليتيني اقرا الموقف تبعش مره ومرتين وثلاث ماني مستوعبه,... اللي صار لأبوش الله يحفظه
ويش هذاا.. هالحسد يادافع البلا من العيار الثقيل بلللللللل عليها << خخ راح احسدها ..
خساره بس عيوني بارده خخخ
من جد ويش ذي الله يكافيكم شرها .. الحمدللله جت بالعين بس.. مع انه الموقف قوي .. بس سلامته اهم
ويلي يا الغلا ماني عارفه ويش اقول من جد موقف .. رهيب
الله يساعدكم بس ... ويكفيكم شرها وكااايد امرها



ومنوورين جميعا
ودمتم بحفظ الرحمن

الله يعطيك الف عافيه
وشكرا على الكلمات الجميله

هلا خيتي اميره وهالغبات طولت ياعيوني
والمنتدي واللي في المنتدي مفتقدين وجودك
المهم قريتين قصة الوالد ويش صار ليه من الحسد
والحسد خيتو قايم فينا قومه
هاذي زوجة اخو زوجي مسويه ليها مشروع صغير
اتدخل على روحها كم فلس
انزين ماشاء الله المشروع نجح وذاع الخبر في الفريق
شهر شهرين الا شافت الربح قام يتراجع والبيزات كلما ليها واتخلص ومن تحط بيزات يختفون
كل مره على هالحاله مره 100 دينار ومره 70 دينار
قلت اكيد هذا حرامي
ابروح اكشف عند الفوال وابشوف ويش السالفه
راحت واذا الفوال ايقول ليها
هذا اللي يبوكم ماهو انسي هذا جني ومسلطته وحده من معارفكم ما تحب ليكم الخير ومربطه بناتكم علشان لايتزوجون
والسحر اللي سوته مدفون في شجرة الكنار
وصحيح بنات عائلة زوجي مو متزوجين بالرغم من انهم مخلصين دراسه وعندهم شهادات كبيره ماجستير وبكالريوس
وحلوين ماشاء الله عليهم
بس ماادري ليش ما يتزوجون
ويجون ناس يتقدمون ليهم ويتفقون على كل شيئ بس بعدين ينجف المعرس ويروح ولا يرحع
وسووا اشياء واجد وراحو حق فاولين الدنيا وكلهم قالوا نفس الكلام بناتكم محسودين ومربطين من وحده معارفكم

يلا الله كريم
والله يجزي كل واحد على عمله
طولت عليش خيتي في الهدره
تحياتي لك
اختك همسات وله

بصراحه العين موجوده صحيح والحسد واقع

بس طبعا ً موفي كل شي

رح اعطيكم موقف حصل لي شخصيا ً

كنت في حسينيه بعد ما انتهت القراءة واقفه مع بعض الصديقات

جت وحده دائما من تشوفنا تستظرف وتحاول تقرب

المهم انصضمت لمجموعتنا وصارت تسولف شوي الا تطالع فيني وتقول

وااااااااااااااااااااال بشرتك صافيه مافيها ولااا حاجه

ابتسمت لها واني ساكته .. رجعت تقول حسرة عليي مافي مكان في وجهي مافيه حب اقسم بالله ماوصلت بيتنا الا ووجهي فيه حكه عجيبه
وماجايوم ثاني الا بشرتي ملتهبه بشكل ملحوظ للعين

ومن طبيب الى طبيب في النهايه صرت اقرأ المعوذات على ماي اضيف له ذرة من تربة الحسين عليه السلام

واروح عند حوض شجره بالبيت واغسل وجهي حتى ينزل فاضل الماي بالحوض (احترام للتربه الممزوجه بالماي)هذا موقف

وصحيح في كثير ناس ترمي اخطائها على شماعة الحسد ..

ويضيعو الوقت والجهد والمال في الجري ورا كذبه هم اللي خلقوها
والمصيبه يصدقوها مع انهم لوبذلو بعض الجهد وكانو أكثر واقعيه
تغيرت امورهم الى الافضل

دوووم مواضيعك متميزه خيوووه وروح المرح تعطيها طابع خاااص
موفقه دوووم

خيي الفتى الحزين
الله يعافيك ومشكور على التواجد لا عدمته ويسلموو
يسلمووو خياتي
همسات وله
ياويلي من جد انتي وخيتي ام محمد جايبين قصص بسم الله الرحمن
تشيب الراااس
عجيبه
يااساتر استر من شر هالحساد
يسلموو غاليتي ولا هدره ولا شي بالعكس تونسوا قلبي اذا خذيتوا واعطيتو وياي



غلاي شمووعه
ياهلا وغلا
اجل بشرتش راحت فيها << ابصم بالعشره جت لش حاله مممم عجيبه
الزم ما على البنوته بشرتها وتجيها كذا ومن عيييييين مو من اهمال
اي بالله الله يساعدش ان شالله الحين احسن والله يستر عليش من عين كل حااسد
دنيااا بلاويها متلتله يااكافي

من ذوقش حبيبتي اهم شي تعجبكم هدرتي

ودمتم جميعا بحفظ الرحمن