ليــــــــــ؟؟؟؟؟؟؟ـــــــــــــــــــــ؟؟؟؟؟؟؟ـــ ــــــــــــــــــــــــــــــش

:bigsmile: سلااااام عليكم اعزائي .. اخباركم.. ان شالله تمام... رجعت ليكم اميره وهدرتها... واليوم تبغاكم تشاركوها الهدره وتنتظر رايكم في هالموضوع.. راح اقص عليكم قصه.. وبسألكم في نهايتها...

. يللا اميره.. بدينا.. يللا...... :bigsmile:

بسم الله ..

السالفه وما فيها ..شاب سني .. عمره 25 سنه.. متفتح ومحب على الإطلاع.. ويوم من الأيام.. قرر بعد تفكير وبحث طويل انه يتشيع.. اللهم صلي على محمد وال محمد وزود عددهم يارب.. وفعلا.. تشيع الأخ.. والحمدلله.. اهله من النوع اللي مهم متشددين فما تبروا منه ولا صارت بينه وبينهم مشاكل وعلى قولتهم هو رجال كبير وعقله في راسه ويسوي اللي بغاه .. اهم شي انه مسلم ..وتاركين له حرية التعبير عن رايه ويقدر يمارس قدامهم العبادات بعد التشيع بصوره مريحه. بدون ضغوط ولا تعصب. والحمد لله..
مرت سنه ونص وهو على هالحال.. صار يدرس عن الشيعه ويشتري كتب ويجلس مع الشيوخ.. لين فهم امور دينه شوي زين..
اخونا في الله قرر انه وييطلق العزوبيه .. ويتزوج .. طبعا ماراح يطلب من اهله انهم يزوجوه .. لأن مذهبهم غير ومن وين يدوروا له بنت الحلال...
صار يسأل اصحابه من الشيعه.. والشيوخ.. وصار يطق باب باب .. طامع في القرب بالحلال...
وللأسف كان يطلع في كل مره مصدوم بالرفض الشديد له.. وجملة ظل صداها يتردد في مسمعه
: اصلك سني شلون نزوجك بنتنا؟؟؟.. فرضا حنيت لأصلك !!!
اخونا كان متمسك بشده بالتشيع.. وما دخل فيه الا بعد تعمق واقتناع... وخاطره انه يلاقي بنت الحلال اللي تمسك بيده وتكمل معه باقي المشوار وتكون له المدرسه الصالحه قبل الزوجه.. صحيح الكتب والشيوخ ما قصروا وياه وكثر الله خيرهم.. بس ما بيلجأ ليهم على كل وقت وبكل صغيره وكبيره.. يبغى يلاقي له السكن والراحه.. بس افا.. ماحصل الا الأبواب قامت تتسكر في طريقه..و لا احد يقترح عليه ياخذ وحده من برى هو ما يبغى الا من بلده.. وتكون صالحه وفاهمه امور دينها .... اخونا تعب من هالحال. لين وصل 27 سنه والساتر الله يمكن يعنس وهو على هالحال..خخخ والله ما ادري ويش يكون مصطلح متأخر عن الزواج لللشباب... بس تعب من جد وهو يلاقي الرفض...
وكان يسأل اصحابه دووم..

ليـــــــــــــــــــــــش... ؟؟؟

مو انتوا تدعوا للتشيع وتفرحوا اذا انتسب ليكم واحد.. ليـــــــــــــــــش ترفضوني اللحين.. ؟؟؟؟!!!

ادعوا لأخوكم بالتوافيق والثبات.. وانه يلاقي بنت الحلال اللي تسعده وتسر خاطره وتاخذ بيده...
وسؤالي...
خيوو ايها القارئ لو تقدم متشيع لبنتك او اختك ويش موقفك منه وبكل امااااانه.. مع ذكر الأسباب في كلتا الحالتين رفضا او قبولا؟؟
ونفس الشي خيتي ايتها القاارئه لو تقد لش متشيع ويش ردش عليه... والسبب في كلتا الحالتين رفضا وقبولا؟

منتظره تفاعلكم.. وارائكم

وبالنهايه... اسأل الله زيادة اعداد شيعة محمد وال محمد... وان يجعلنا واياكم من انصار حجته

ودمتم بحفظ الرحمن :amuse:

ونفس الشي خيتي ايتها القاارئه لو تقد لش متشيع ويش ردش عليه... والسبب في كلتا الحالتين رفضا وقبولا؟....

..حتى لو البت وافقت ..اهلهاا مابيوافقوا..
..يختلف من شخص الى اخر ..
..واذا شافوه زين ..وصار يتردد عليهم..
بيوافقوا....
..بالنسبا اليي الي يقلوه اهلي اكييد لمصلحتي..


..:.يسلموو اميره ..:..
..مااقلتي انتي شوو رايك...؟؟

..

أنا ما أشوف فيها إشكال ليش ماتوافق البنت ؟
إذا كان متشيع وأخلاق وسمعه طيبه
ليش التحجر ؟
لو تسأل أي عالم ومرجع كبير أو حتى شيخ ماراح يرضى بها الشيء ( رفض المتشيع )
ماعتقد اصلا يحن لمذهبه الأولي أكيد ماتشيع إلا عن أقتناع
ليش مانستقبله بحسن نية وتفاؤل
بدل كلمة لو لو
شكرا أختي أميرة المرح على طرح الموضوع القيم
وأكيد أنتي تأيدي هالشيء
بما إنك كاتبة وصاحبة الموضوع

تحياتي لك
أختك
عيون لاتنام

أنا رأئي من رأي أخوي عيون لا تنام...

وئيدة أخوي...


الله يعطيش العافية..

اختي..

أختش..
منحوسة..

إذا كان شاب طيب وسمعة وأخلاق ليش لا
مشكورة أميرة على الموضوع الرائع

يسلموو جميعا خياتي وجميل تواجدكم وردودكم ... مثل ردي تماما

مدام انه داخل لمذهبنا بإقتناع
ومدام انه متمسك به
ليش ما اكون له السند والعون
واخذ بيده واكسب اجر وثواب

هذا رايي
ودمتم بحفظ الرحمن

اموووورة غلاتي

عاد أنا رأيي غير مع إحترامي لأراء الجميع


صحيح انا تزوجت وماعندي بنوتات ..

بس لورزقني بنوته ويتقدم لها متشيع ..أمممــ يمكن أرفض يمكن ها ..

شوفي أمووووررر ة

تراني أعرف أمرأة متشيعه مع زوجها وتجي تجمع معانا هناك باللي خبرك ...

بس دوم تخالفنا ...

مثلا اذا كنا نقرأ الوفيات تحتج تقول ليه كذا ولا تلعنوا ولاتسبوا ووووو

إذا نقرأ الفاتحه أو قرآن للمتوفين أو البركة ترفض ....ترى حتى البكاء ترفضه تقول ليه ابكوا بهدوء

استغفر الله ما أبي احطها بذمتي استغفر الله ياربي ..

كنا بحديقة صلينا ..شفناها صلت المغرب بس ....

يعني( ويش )تشيع بالأسم بس ....يعني بإختصار تحن لمذهبها بس ماتبي ترجع له ..وسط

صحيح هاذي يمكن واحده من مية تشيعوا وصاروا اوكي وماشاء الله عليهم

تلقيهم متدينين أكثر من بعض الشيعه

بس بظل خايفه واوسوس ...ووووو

بالنسبة لأهله صحيح مو متشددين بس كمان بظل خايفه على هالبنت منهم واخاف على مذهبها أنهم يبدلوه ..

<<<هذا مابعد توصل هالبنت ودلال وخوف ودلع الله يعين لو وصلت >>>

طيب يروح يأخذ من جماعته يكون عندها ميل ويشيعها معاه بالعكس هو له اجر كمان <<<مأخذه الأمر ببساطه ...

ولو قبلت بنتي فيه يمكن تكون لي شروط بالمتقدم المتشيع ...


بس عاد امووور تعبتي من هذرتي ....صح


مشكورة حبيبتي مروحه على الطر ح

ربي يعطيك العافية

لاتحرمينا من جديدك الشيق دوما

(((اذا جائكم من ترضون دينه وخلقه فزوجوه الا تفعلو تكن فتنه في الا رض وفساد كبير)))

خيوو ايها القارئ لو تقدم متشيع لبنتك او اختك ويش موقفك منه وبكل امااااانه.. مع ذكر الأسباب في كلتا الحالتين رفضا او قبولا؟؟
قال رسول صلى الله عليه واله وسلم"إذا جائكم من ترضونه دينه وخلقه فزوجوه"
واظن ان الرجال بعد ماتشيع بظل متعلق في تشيعه والبعض لا
ولاندري ماتخبئه الظروف لو كانت حزتها فانا لا اعطي الموافقه او او عدم الموافقه فكل الامر يعود للبنت
بل اعطي رايي بانه ان كان صاحب ذو اخلاق ومن مذهبنا فلا خلاف فيه
تحياتي لك بالتوفيق..

شكرا خية اميرة ع الموضوع الحلووووووووو (بس من وين تجيبي هالافكار وهالمواضيع مادري..... حاسدنك هاااااااااااااااااااا
المهم ...الموضوع هذا فيه فيه حساسية بجد وما ياخذ بالعاطفة ولا التساهل..
ولكن يبقى سؤال ... هل انه لن يثبت على مذهبه الا اذا تزوج من شيعية ... اقصد اذا لم يزوجه الشيعة هل سيحيد عن مذهبه...
اذا كان انسان استقبل التشيع وبقتناع وعرف معنى كلمة الحب الي هي اصلا جائت من حب الامام علي واهل البيت فابدا لن يتجه الى ماكان قبلا..
ولكن اذا كان ضعيف ولبما انتسب للتشيع لظروف مصلحية فهذا من سيغير منهجه..
طبعا الكلام ذا ابدا مو فلسفة بل حقيقة اما عن موضوع تزويجة وان وافقتها انا فلن يوفقها غيري لظروف وقناعات خاصة..

آسف ع الاطالة..تحياتي ...
ياسر..

بسم الله الرحمن الرحيم

أنا ابصراحة ما أعطيه بنتي لأن مثل ماهو يبغى يتزوج وحدة طاهرة أنا بعد أبغا أزوج بنتي لواحد أصله طاهر من نطفه حلال ومهما كان لازم الولد يتأثر بعماته وعموميته وجده وجدته فهذا الشخص لأن هذا الشخص ما بيقطع رحمه لازم يزورهم
ليـــــــــــــــــــــــش... ؟؟؟

مو انتوا تدعوا للتشيع وتفرحوا اذا انتسب ليكم واحد.. ليـــــــــــــــــش ترفضوني اللحين..
ليش ماهو يطبق الكلام اللي يقوله ويتزوج وحده من قرايبه ويهديها إلى التشيع
والتشيع ماهو كلام أنا شيعي أو أنا قعدت مع عالم أو أنا صليت في المسجد التشيع قول وفعل
فهذا الشخص زي ما كتب في الموضوه ان عمرة خمس وعشرين وقام يبحث عن التشيع وعمره خمس وعشرين وتشيع وصار يطلب العلم ويقرأ وغير انه تعب روحة في البحث أن امرأة صالحة ( كل هذا في ثلاث اسنين فقط !!! ) تغيير العقيدة اللي اتربى عليها الشخص مو شي سهل وتغيير العقيدة ما يبغى ليه يوم وليله ففي ثلاث سنين استطاع ان يبحث عن التشيع ويتشيع ويتبحر في التشيع ويبحث مدة طويلة عن زوة صالحة كل هذا في ثلاث سنين فقط !؟

وصلى اللهم على محمد وآله الطيبين الطاهرين

(((اذا جائكم من ترضون دينه وخلقه فزوجوه الا تفعلو تكن فتنه في الا رض وفساد كبير)))


كلنا مسلمين ودام الله هداه ان شاء الله بنتي بتكون في أمان معاه

وبرد على الاخ حامي الشريعة (أنا ابصراحة ما أعطيه بنتي لأن مثل ماهو يبغى يتزوج وحدة طاهرة أنا بعد أبغا أزوج بنتي لواحد أصله طاهر من نطفه حلال ومهما كان لازم الولد يتأثر بعماته وعموميته وجده وجدته فهذا الشخص لأن هذا الشخص ما بيقطع رحمه لازم يزورهم )

واهله دام انهم مسلمين وان اختلفنا هم مسلمين بالعكس هذا الي ما برضاه انه يقطع رحمه


وبعد برد عليه في شي ثاني ( ( كل هذا في ثلاث اسنين فقط !!! ) تغيير العقيدة اللي اتربى عليها الشخص مو شي سهل وتغيير العقيدة ما يبغى ليه يوم وليله ففي ثلاث سنين استطاع ان يبحث عن التشيع ويتشيع ويتبحر في التشيع ويبحث مدة طويلة عن زوة صالحة كل هذا في ثلاث سنين فقط !؟

صح مو شي سهل ان يتغير الانسان على الي تربى عليه

لكن لما يكتشف انه خطأ وحب يصححه وفعلا صححه هل بيرجع الى الخطأ من جديد وهو يعلم انه خطأ؟

خلنا من الاخ السني عندنا خير من الله شباب على المذهب الشيعي لكن تسأله عن مذهبه وحتى دينه ما يعرف عنه اي شي

ويعيش عمر على هالحال مضيع طريق ربه وبعدين الله يهديه ويتوب

ترفض تعطيه بنتك بعد؟؟؟؟؟

هم هذا نفس الشي عاش عمره على لا شي ومرة وحدة الله هداه وانتبه الى نفسه


الله سبحانه وتعالى انعم عليه بالهداية وتاب عليه واحنا نقلب وجهنا عنه ؟

اليس الله باحق منا بالحكم على هذا الانسان ؟ وليش ما نعطيه فرصة للحياة حاله حال غيره ؟


وكلنا مسلمين

وشلون بننشر مذهب اهل البيت عليهم السلام اذا ظلينا متعصبين جدية ؟


هذا راي واذ ظليت اهدر ما بخلص

اسمح الي خيتو اميررررررة

تسلمين على مواضيعش الساخنة

تحياتي لك

اختك ام محمد

مراحب اخواني اخواتي وكل الشكر على التفاعل وراح ارد عليكم كلكم بتعقيب واحد يعني راح اسولف وياكم واحدا واحد
يللا
بسم الله

اقتباس:

---

تراني أعرف أمرأة متشيعه مع زوجها وتجي تجمع معانا هناك باللي خبرك ...

بس دوم تخالفنا ...

مثلا اذا كنا نقرأ الوفيات تحتج تقول ليه كذا ولا تلعنوا ولاتسبوا ووووو

إذا نقرأ الفاتحه أو قرآن للمتوفين أو البركة ترفض ....ترى حتى البكاء ترفضه تقول ليه ابكوا بهدوء

استغفر الله ما أبي احطها بذمتي استغفر الله ياربي ..

كنا بحديقة صلينا ..شفناها صلت المغرب بس ....

يعني( ويش )تشيع بالأسم بس ....يعني بإختصار تحن لمذهبها بس ماتبي ترجع له ..وسط

---

اقتباس:

---

طيب يروح يأخذ من جماعته يكون عندها ميل ويشيعها معاه بالعكس هو له اجر كمان <<<مأخذه الأمر ببساطه ...

---

اموول يالغلا... تحن ليش ؟؟ لأنها متزوجه مستشيع زيها.. الحال من بعضه.. بس برايي لو ما خذها واحد شيعي اصل يكون لها
سند.. وعون.. وراح ياخذ بيدها.. يفهم ويش امور دنياه ودينه.. مو زيها توه.. يعني بالمختصر .. الإثنين كانوا سنه
والإثنين صاروا شيعه .. حلو بس ما احس بيكون اقوى واحسن تشيعا لة كان احد الطرفين شيعي اصل.. اتمنى فهمتي هلوستي خخ
... وبالعكس هذرتك على قلبي عسل.. تسلمي يالغلا على الرد..

************************************************** ***********

اقتباس:

---

(((اذا جائكم من ترضون دينه وخلقه فزوجوه الا تفعلو تكن فتنه في الا رض وفساد كبير)))

---

هلا بخيتي الليل الأليل .. افهم من الحديث الشريف انش ترضي به..؟؟
هذا اللي فهمته... ويعطيش مليون عافيه
************************************************** *********

اقتباس:

---

واظن ان الرجال بعد ماتشيع بظل متعلق في تشيعه والبعض لا
ولاندري ماتخبئه الظروف لو كانت حزتها فانا لا اعطي الموافقه او او عدم الموافقه فكل الامر يعود للبنت
بل اعطي رايي بانه ان كان صاحب ذو اخلاق ومن مذهبنا فلا خلاف فيه

---

يسلموو خيي القلب المرح.. ونعم الرأي والله.. اهم شي الأخلاق ودامه تشيع.. فلا خلاف فيه
حلو .. وتسلم
************************************************** *******

اقتباس:

---

(بس من وين تجيبي هالافكار وهالمواضيع مادري..... حاسدنك هاااااااااااااااااااا

---

صلـــــــــي على محمد وال محمد اخوي ياسر.. :evil: بسم الله علي من الحسد ماني ناقصه حسد زود.. خخخ حتى بالمنتدى قول لا اله الا الله ...

اقتباس:

---

هل انه لن يثبت على مذهبه الا اذا تزوج من شيعية ... اقصد اذا لم يزوجه الشيعة هل سيحيد عن مذهبه...

---

كوجه نظر... ممكن انه ما يحيد اذا دخل بإقتناع .. وتمسك بالتشيع.. وراح يكون قوي ضد الظروف المحيطه به من الطرف الأخر
اذا اخذ سنيه مثلا.. بس ما راح يكون متفاهم معها .. وراح يزود الطين بله اذا جابوا اولاد.. ويش راح يكونوا سنشيعه
والاويش مذهبها ..هاا... من جد راح يتعب... ..!!!
ولو مثل ما قلت راح يغير منهجه فما لداعي يتعب نفسه ويتشيع وياخذ له سنيه بطرفة عين ترجعه الى حاله السابق
وتشكر اخي على الرد
************************************************** ********************************

اقتباس:

---

أنا ابصراحة ما أعطيه بنتي لأن مثل ماهو يبغى يتزوج وحدة طاهرة أنا بعد أبغا أزوج بنتي لواحد أصله طاهر من نطفه حلال ومهما كان لازم الولد يتأثر بعماته وعموميته وجده وجدته فهذا الشخص لأن هذا الشخص ما بيقطع رحمه لازم يزورهم

---

اخوي حامي الشريعه .. .. الرجال ولد حلال.. ولكنا اولاد ادم وحوا.. وهو دخل للتشيع باقتناع.. ومتمسك برايه..
وما خاض هالمغامره الا لأنه عارف نفسه انه راح يقدر يواصل .. وما طرح مشكلته الا بعد ما عانى.. بإمكانه بعد هالصد
والرفض .. ير جع وببساطه لمذهبه اللي راح يرحب برجوعه وبكل رحابة صدر.. فبالهم ان مذهبهم انتصر
بس هو .. لا تمسك .. وزياره الرحم واااجبه وحرام قطعها .. ولو كانوا كفار بعد .. ما بالك مسلمين وسنه

اقتباس:

---

ليش ماهو يطبق الكلام اللي يقوله ويتزوج وحده من قرايبه ويهديها إلى التشيع

---

ناقشت هالنقطه بردي على خيتي امل الظهور

اقتباس:

---

( كل هذا في ثلاث اسنين فقط !!! )

---

ايه نعم اخوي.. 3 سنين.. كان فيهم متمسك ومقتنع ومتعمق ويدرس وما خلى شي فباله واستفسار الا سأل عنه
غير النت والمواقع الشيعيه.. ما ذكرتهم في موضوعي .. والواحد اذا كان حاس نفسه تايه.. ولقى بر الأمان لقى الدليل
راح يسعى له ولو بظرف سنه بعد.. ممكن اذا كانت ارداته وهمته عاليه.. اصلا اصفق له بالعشره..
رجال بهالعمر 25 يعني مو قليل تربى اكثر عمره في بيئه سنيه .. الله نور قلبه وهداه لنا.. وكافح قد ما يقدر
ليثبت خطاه على مذهبنا.. وبمدة زمنيه قصيره قدر يتكيف دليل على ويش..
على سعه روحه ومدى اصالة الحب فيه.. ومثل ما قلت اخوي مو سهل هالشي بظرف 3 سنين بس
لا اله الا الله.. هالرجال جتني قصته واستغربت منها .. بس لا شي اقوى من قدرة الله .. الله يثبته ويطمن باله
والله يعطيك اخوي مليون عافيه . واسفه على الهذره ..

************************************************** ***************
خيتي ام محمد
ياااااعيني عليش
بااارده والله عيني
اللهم صلي على محمد
وربي
المنتدى يووم خلووش مشرفه المنتدى الإسلالامي حطوش في المكان الصح.. ياعمري
كلامش درر.. ومن جد عجبتيني
:clap:

اقتباس:

---

خلنا من الاخ السني عندنا خير من الله شباب على المذهب الشيعي لكن تسأله عن مذهبه وحتى دينه ما يعرف عنه اي شي

ويعيش عمر على هالحال مضيع طريق ربه وبعدين الله يهديه ويتوب

ترفض تعطيه بنتك بعد؟؟؟؟؟

هم هذا نفس الشي عاش عمره على لا شي ومرة وحدة الله هداه وانتبه الى نفسه

---

والله صدقتي .. وهذا هو اللي يتزوج واحيانا الله ما يهديه زي ماهوو ما يعرف كوعه من بوعه ..
ويش نقول الله المعين.. يعني بالذمه.. مو المستشيع اللي دخل باقتناع وتمسك والحب نور قلبه احسن منه
.. من جد ام حمود .. عجبني ردش . وياليتش هدرتي وهدرتي وماا خلصتي


وبالنهايه اخواني اخواتي.. اختلاف الرأي لا يفسد بالود قضيه
ودمتم بحفظ الرحمن

اني بصراحه لو كان أخلاق وإنسان عارف ربه بوافق ليش لا

وصحيح كلامك اموووووره غحنا نبغى السنه تتشيع

اوكى تشيعوا وبعدين إذا جو وخطبوا بنت من بناتنا بنرفض

وش هالحاله؟؟

خخخخخخخخخخخخخخخخخ

ومشكوووووووره اموووووووره على الموضوع الرائع

ما بعد كلام أم محمد أي كلام كفت ووفت ... والشيعي اللي جاء بعد بحث عن الدين أفضل من الشيعي إللي أخذها وراثة ولا عارف عن أمور دينه إلا الاسم.

خيتو اسيره الأحلام يسلموو يالغلا على التواجد الجميل
ويعطيش الف عافيه
***********************************
اخوي عماد من جد خيتو ام حمود ما قصرت كفت ووفت وربي عجبتني وعجبك كلامها صح
درر والله يا ام حمود تسلمي لأحبابش والله
ويعطيك العافيه اخوي وما تقصر...
********************************
ودمتم بحفظ الرحمن