غربة الأوطــــــــــــــــــان...

وفي بيت ابو يوسف .. ازدهار قاعده قبال وداد اللي كانت ولأول مره تشكي بدموع..
ازدهار : ــ عاد ياخيه.. كم مره قلت لش .. ديلا يتامى.. لا تقسي عليهم لا تجيش حوبه.. ها.. اكيه صابتش .. من ولدش ..
وداد : ــ اني مخلتنش تجي حق افضفض لش لو حق تلوميني وتزيديني
ازدهار : ــ الحق حق ياخيه ماينزعل منه...
ــ ماعلينا .. جوعانه اني ..
ــ هههههههه فهمت عليش .. و افادش في ورق عنب ادري دري
ــ ههههههه وما في احلى من ورقش اخ منش بس .. مافي غيرش احد يفهمني
ــ ويلي منش .. الكل بيفهمش بس لو تعطيهم فرصه قومي وياي المطبخ .. شيلي عباتش ماحد هنا مابجي حسن الا الفجر ..
ازدهار مخلتنها على كتفها :
ــ لا خليها كذا اني مرتاحه
ــ كيفش بتصير ريحتها بصل .. صبري باجيب لش مشمر
وجابت ليها المشمر
ازدهار : ــ اني ويش عرفني كيف يلبسوه دا
وداد وهي تحطه على راسها وتسخر منها : ــ ايه .. ويش عرفها بت الكعكي ..
ــ ههههههه صدق نحيسه.. رحمة الله عليك يابوي ..
وراحو يحوسو في المطبخ..

ماريا تطفي الأستشوار..
ــ لا تقولي رقم اخوش ظل مخزن عندها.,.
شهربان تطالع في ماريا من المرايا و ترقص حواجبها:
ــ لووويه تسألي..
ماريا: ــ شدعوه ماتعرفي هالريماس وحركاتها القرعه.. استغفر الله ما استبعد تسويها وتتصل فيه..
شهربان ترقص حواجبها اكثر وتجاكر في ماريا :
ــ واتصلت يعني ..؟؟
ماريا تضرب راس شهربان بالأستشوار : ــ وجهــــــــــــــــش
شهربان : ــ آآآآه.. ههههههه ويش قاهرنش ..!!
وتطالع في ماريا على جنب : ــ اخوي مؤدب لو سوتها مابيدق ليها خبر...
وبأبتسامه خبيثه : ــ اساسا ماعطيتها فرصه ومسحت الرقم من جوالها..
ماريا تسحب شعر شهربان : ــ دااام انش مسحتيه ماتقولي من لول وتفكينا لويه ؟؟؟
هاااا يا ام حركات قرعه ...
شهربان ميته ضحك وفي بالها : ــ مايندرى ياماريا بويش تفكري وويش عبدالإله بالنسبه لش بالضبط..!!

في امريكا.. تقريبا الساعه 10 الصبح.. سام وجويل وهم بالطريق ...
سام : ــ اوهاايو...
جويل تطالع فيه مستغربه ..
سام : ــ يعني صباح الخير بالياباني.. اول ماتشوفيه انحني شوي وأولي اوهايو .. من شان ينبسط ويعرف إنك بتعرفي شوي ياباني ومانك غشيمه..
جويل وهي شالقه البوز : ــ اوووكي.. اوهااايووو...
سام : ــ وازا عطاكِ أي شي .. او مدحك في أي اشي .. اشكريه وأولي .. اريقاتوو..
جويل : ــ ولك شو راح تعطيني حصة ياباني ونحنا بالطريأ ..
ــ سهل احفظي معي بس ..
ــ وكيف بعرف انو مدحني ..
ــ راح اجلس جنبك و اديك اشارة.. وانتي بس أولي .. اريقاتو...
ــ طيب.. اوهايو .. صباح الخير.. و اريقاتو.. بتشكرك.. .. شو كمان؟؟
ــ ممممم .. اتركي الباقي علي...هدول من شان ما تأعدي هيك ساكته...
ــ طيب بعتمد عليك

اول ماوصلو المكان المتفق عليه .. والتقو يوكي الياباني..
جويل بأبتسامه عريضه ومثل ماوصاها سام : ــ اوهايو..
يوكي بأبتسامه هو الآخر.. : ــ اوهايو
ويأشر على الكراسي : ــ دوزو...
جويل من الحركه فهمت عليه انه يدعوهم للجلوس.. قعدت وهي تهمس لسام..:
ــ يعني نأعد ماهيك..؟؟
سام ابتسم : ــ ايه يعني تفضلو..
جويل ترجع تهمس لسام : ــ دخلك.. انت متأكد ان هيدا رِجال..!!
سام يضحك بهدوء : ــ أيه... لشوو. عم بتسألي؟؟!..
جويل : ــ يخزي العين..
سام : ــ حلو يعني..؟؟
ــ أيه نعووم كتير ومهضووم ... كأنو صبية..
سام يسوي روحه منقهر : ــ أيه .. شو عليه..
جويل بأبتسامه وتغمز له على جنب : ــ ولك مو احلى منك.. انت اكتر رجوله منو
سام في باله : ــ بل .. لا صدقت نفسها دي واجد ...و مفكره روحها تمون بالمره
ويرد عليها : ــ انا بعرف .. كلك ذووق

وبدأت الصفقه...
يوكي يتكلم ياباني .. و سام يرد عليه ويترجم لجويل ...
وطبعا اساسا الكلام في وادي والترجمه للنصب تختلف تماما.. الكلام كان عادي بالمره..
يوكي يصب لجويل عصير .. ويتكلم بالياباني ..
جويل : ــ اريقاتو..
سام يرد على يوكي بالياباني .. ويلتفت لجويل : ــ برافو .. حفظتي منيح... هو كان بيأول انو المترجم تبعو .. عندو ظرف لليوم وفرحان لما شافني بعرف ياباني منيح.. وتطمن..
جويل : ــ أيه يخزي العين حولك وحواليك.. بتعرف في كل شي ..
ــ بعجبك ولوو...
ــ طيب .. خبره ..انا بدي اشتري هالمحل بسعر مناسب .. راح افتح فيه بوتيك تياب .. هو أديم شوي فمعليش لا يغلي السعر علي لأني ناويه ارممه من جديد..
سام يتكلم مع يوكي كلام بعيد كل البعد عن الكلام اللي قالته جويل ....
يوكي يرد ايضا بكلام خارج الموضوع تماما..
سام : ــ عم بياول موقع المحل استراتيجي كتير .. والأرض كلفتو كتير .. راح يبيعو للألك بـنص مليون دولار ... شو رايك..؟؟
جويل ابتسمت خصوصا انها توقعت مبلغ اكثر لأن المحل كبير فعلا و الموقع رائع : ــ منيح.. حلو كتير .. موافأه..
جويل تشرب في العصير....
سام : ــ اوووكي..
طلعو اوراق فيها كلام بالأنجليزي.. فهمته جويل انه عقد بيع وشراء.. وصارت توقع و تكمل الأجرائات .. وآخر شي وقع البائع.. يوكي آكوتا... وانتهت الصفقه....
جويل تحس نفسها دايخه.. وماتشوف شي ..
اغمى عليها وسندت راسها على طاولة المطعم..
انسحب يوكي قبل سام بهدوء
سام فتح شنطتها.. واخذ بقايا الفلوس في محفظتها.. وجوالها..
توجه للكاشير .. وترك عنده مبلغ اكثر من سعر العصير بوايد والجوال وقال له.:
ــ سأترك هذه لديك ريثما اذهب للصيدليه واعود.. زوجتي تعاني مرضا عضال لا تستطيع النهوض حاليا ..
الكاشير : ــ هل اتصل على الأسعاف.؟؟
ــ لا.. انا اعرف ما تحتاجه.. تحتاج لدواء... سأجلبه واعود..
الكاشير صدق كلامه.. وبما انه ترك جواله المزعوم وفلوس زياده
خلاه يروح وظلت جويل عالطاوله نايمه...
سام طلع من المطعم.. وبأبتسامه انتصار:
ــ انتهت المهمه...مع السلامه ياغبيه..

حسن بيدخل البيت .. تأجلت المهمه ورجع من بدري قبل الفجر بوايد ...
وهو في الصاله .. يشم ريحة طباخ ورق العنب .. وكان هو يحبه بعد..
دخل المطبخ وهو مروق ما انتبه مين اللي كانت واقفه عند الفرن.. استدار للثلاجه وكانت تقابل الفرن .. بيحط العصير واللبن اللي جايبنه.... : ــ الله حركاااات زين رجعت من بدري.. حق اكل وياكم ...

ازدهار كانت واقفه عند الفرن .. مشمرها على كتفها طايح.. من الخلعه استدارت بلا وعي
وبنفس الوقت حسن استدار ومن شافها شهق وصار يطالع في الأرض وهو يقول:
ــ يالله.. يالله..
وانحاش من المطبخ.. بيدخل غرفتهم الا وداد طالعه من الحمام..
ــ بسم الله.. ويش جيبك... تقول بتتأخر...!!!
حسن شارد ومتلخبط .. دخل غرفتهم وسكر الباب.. وتسند عليه وقلبه يصافق :
ــ دي منهي ...!!
وداد انتبهت انه جاي من المطبخ.. فتحت عواينها :
ــ ياعلي .. ازدهاروو..
ولا راحت ليها في المطبخ الا هي قاعده ومتسنده عالفرن ومغطيه روحها بالمشمر..
وداد قعدت جنبها: ــ ويش صار؟؟ ويش فيش
ازدهار تصيح بصمت وتشاهق ...
وداد بلا وعي : ــ حسن.. ويش سوى حسن..؟؟
ازدهار بقهر تصرخ فيها : ــ غبيه انتين.. اختلعت من جيته.. تقولي بيجي الفجر .. روحي شوفيه هو اختلع بعد ... اني باروح بيتنا..

حسن يسمع كلام ازدهار... وعرف انها صديقة وداد..اللي دايما تتكلم عنها..
وداد : ــ لالا.. اسفه غناتي.. والله ماتطلعي..
ازدهار : ــ لا تحلفي وروحي قابلي رجلش..
لبست ازدهار عباتها.. اتصلت في سواقها.. 10 دقايق وصل وراحت..
دخلت وداد على حسن لقته قاعد على السرير من شافها ارتبك..
وداد بدون أي مقدمات: ــ شفتها؟؟
حسن : ــ هاا..
ــ اللي في المطبخ كانت.. شفتها؟؟
حسن وهو يبولع : ــ لا كنت احط في الثلاجه اغراض وهي دايره وانا داير من سمعت صوتي اختلعت مسكينه.. خلعتها هااا؟؟؟..
ــ تشه قصرت.. خلعت الكل .. مو عن حساب عندك شغل؟
حسن بأستياء : ــ تأجل لوقت ثاني.. ويش .. ماتبغيني ارجع البيت ,, اعود اطلع...؟؟
ــ لا بس .. كانت هي وياي عن حساب بنسهر .. و انت فاجأتنا..
حسن عصب : ــ بعــــــــــــــد.. قولي قوم اطلع برى خربت سهرتنا..
ــ وفففففففف منك كل تفسر على كيفك..
ــ الا انتين اللي ماعندش اسلوب في الكلام.. الوحده تقول خير اللهم اجعله خير.. الحمدلله على سلامتك.. تعبان.. جوعان... وانتين لا وراي سهره و ويش جابك...!!
ــ اووووه.. راجع من سفر على شان اتحمد لك بالسلامه..
ــ انا لويش اتعب قلبي وانفخ في قربه مفقوعه
ــ أني .. قربه.. ومفقوعه بعد..!! رحم الله والديك
ــ ووالديش .. احسن حاجه تقوليها الرحمه لوالديني .. بعد مايندرى يمكن تسبيهم في قلبش..
وطلع عنها وراح المطبخ يشرب ماي..
انتبه لصفرية ورق العنب .. وفتحها...
اخذ وحده وصار ياكل .. صار يطالع الورق و يعرف هو طباخ وداد :
ــ شكله من صاحبتها مو منها هي.. خوش ورق والله..
وجى على باله شكل ازدهار وهي واقفه عند الفرن..
ــ خزاك الله يابليس ..
سكر الصفريه و طلع من المطبخ..

وصلو القطيف .. مصطفى يصحي في شفيق...
ــ شفيق .. قوم.. وصلنا..
شفيق ابد مايحرك ساكن..
ــ شفيق .. شفيق...
انتبه مصطفى لشفيق وجهه كان معرق بالمره..
لمسه لقاه مولع ..
مصطفى : ــ انا لله...قوم .. قوم تسند علي باوديك وياي المستشفى مره وحده..
وشال مصطفى شفيق ونزل به..
وصلو المستشفى.. دخله قسم الطوارئ .. وراح يشوف اهله..
امه من شافته بالأحضان .. وتصيح:
ــ ويش حالك غناتي..؟؟
ــ اماه انا زين.. انتين ويش حالش ولويه تهملي صحتش.. ويش فيش الحين
ابو مصطفى : ــ هبوط حاد في ضغط الدم.. ما تهتم بصحتها امك ابدا..

وبين ما مصطفى قاعد مع اهله.. جت له ممرضه تطلب منه يروح لعند شفيق ضروري ...
الى الملتقى...

حركتاااااااااات هذااا البارت أحلى بعد ..~

كل بارت أحلى من اللي قبله ..~

بس بقول لك شغله أمور من كثر ما أندمجت خلص شحن لابتوبي وأنطفى ولا حسيت له هع ..~

ماريا ربي يعطف قلبها ع عبد الستار ..~

أحمد بالتوفيق له أحسه مررره طموح وله مستقبل مشرق ..~

بصراحه أشوه ماكان عنده سلندر يوم قال له أبو مجتبى الله يفتحها في وجهك ~>ضررريفه ..~

شفيق بصراحه بديت أعذره وأحس أني ظالمته ..~

مصطفى ربي يشافي أمه ..~

عاااشت يدك غلآتو ..~

وأدعو لي بكره أول يوم دوام~>بتروح تخمد

///

خخخ كأني مربوشه وميته ع النوم ما أنتبهت أن البارات ماخلص توني بس قريت الباقي ..~

عندي أحساس أن حسن بياخد إزدهار والله أعلم !!

شفيق أنبني ضميري عليه أكثر ..~

جويل عفر كسرت خاااطرري حسيتها قرعه في الزفه ..~

ننتظر جديدك بشوق خيتووو

///

حلوو البارت اموره ..

::

اش فيه هللشفيق مسكين طلعت حالته حاله الله يعينه >> ماخده الدور عدل

::

ننتظر البارت الجديد غاليتي

موفقينـ

اللهم صل وسلم على محمد وآل محمد وعجل فرجهم وفرجنا بهم ياكريم...

اوهايووو :bigsmile:>بتطبق الدرس:toung:

اي اي خية صح.......أما اني صحيح ههه.......... الحين عدلت موجتي :toung: عبد الاله هو اللي يحبها ههههه >> تو النااس :wacko:

اريقاتوو غناتي ع التوضييح :) >>درينا حفظتي هالكلمتين ..

ماشاء الله أحداث كثيرة بهالبااارت....اتوقع حسن ينجذب لشخصية ازدهاار والله اعلم...لأنها عكس مرته تماااماً......>على طول حكمت على النااس :huh:

عبد الاله ضحكني ههههههه وأما ماريا من جد عفوية بشكل......

شفيق طلع عنده حالة نفسية من صغره ....ياكافي الشر.....

بدأت تظهر مواااهب لأمير ماشاء الله عليه...بالعادة اللي عندهم توحد عندهم طاقات عجيبة سبحان الله ياخذ شي ويعطي اشياء...

سام الله يغربله قهرني بقوووة ...وش هاااالناس ...!! هذا اللي اقول شكله طيييب اساساً....

يعطيك العافية أمووور ع البااارت الغير شكل من جد ابدااع ماشاء الله...

سلمتِ وسلم فكركِ من كل مكروه..

موفقة في دراستك وفي كل شؤونكِ الحياتية...

دمتي بعين المولى الجليل

بااارت روعه ..!
بلأنتظار...!!
اتوقع انووو:
حسن بطلق البومه ودادوو وبيتزوج ازدهار...

اني شوي وباروح المدرسة .. يمكن اكتب تعليقي اذا جيت ..
هههههه يمكن!! ..بعد اليوم اول يوم ..تعرفي تجليد كتب وحالة خخخ
يللا ..( سايو نارا )>> يقولها عن مع السلامة
وباقول حاجة الحين قبل لا انسى
العصير اللي شربته جويل كان بيه مخدر
سامي .. هذا شي من الأشياء اللي بيندم عليها وبينفعل اكتر ازا تذكر
واحمد ان شا الله يلتقي بسام وقيصر لين راح امريكا..
خلاص.. الباقي لين فضيت
سايونارا مرة ثانية

مشكورة أختي
ننتظر الجديد

صلح بر شما

سلام
خوشبختانه غناتي
خدا و پزشک
یک بار شیرین و
شفیق که پیش آمد ، ذهن من برای شکستن روانی ایالتی معاه خدا و همچنین به صفحه نمایش پاپ احمق ها رایگان
يالله منتظر کارهای جدید
بس که؟

الترجمة
سلام عليكم
هلو
مشكورة غناتي ماتقصرين
ويعطيش الله العافية
البارت مرة حلو ويجنن
كسر خاطري شفيق طلع معاه حالة نفسية الله يغربل الابهات إلي كذا يخلو الجهال يتعقدون
يالله ننتظر جديدك
بس متى؟

تحياتي {تبریکات}

يسلمو خيتو امووره
بارت روووووووعه
وطبعا لا تعليقاااات
لان كلهم نفس الي انكتبو
بانتظاركـ
تحياتيـ ..

يآآعلي اميره

ويش نآآويه تقتلي شفيق ؟؟

بس صرآآحه عجبني موقف ماريا وعبد الإله

صحيح لآيكون حسن في النهآآيه بيطلق ودآد وبيعرس على ازدهآآر

اممم لآ لآ مآآ أعتقد يمكن تتوب ودآآدووه ؟؟

^^

ننتظرش بالبارت القادم:bigsmile:

:nuts::nuts:...~!!

وآآآآو جزء ولآ آروع ،، ونشـآلله امير يتعافى من مرضه ~

... وأإحس كـأإنه هالسـآم هو ناجي اخو يوسف المفقود وانطق وفقد الذآكره >> ركبت احذآث هع

... يسلمك ربي على هالابدآع ومـآننحرم ،، ~!!

تحيتي ^.*

اموله

واو ابداع
بس بخلنه علينا بالبارتات

مشكورة على كل حال

حمـآأإس ..
هذا عفر شفيق بيوصي ويلي عليييييه
ويمكن أن وداد بيعرس عليهـآ ريلهـآ <~ عجبتها الفكره
ومـآريـآأإ خبله ..
بـآأإرت روعه أموره
ننتظرك

في ذمتش اذا شفيق وياه فلونزا خنازير>> كفانا الله شرها
نور ياربي لو تدري ويدري اخوها كان تقوم القيامة >> ويش دراش يمكن يقدروا يسددوا المبلغ
ماريو من جد خبلة ماتدري انها تعذب الرجال بعفويتها
صادق احسه يعاني من مشكلة نفسية وشعور بالوحدة
فج علينا عبد الستار ..اتوقع هو اللي بياخذ ازدهار
جويل .. متشوقة اشوف وجها وهي مصدومة خخخ>> شريرة !!
ان شالله يجي اخوها ليها يساعدها
ساميو بصماته بتكون على الجوال

الصراحة اميرة هالجزء فاق تخميناتي ..
يعني الجزء الجاي شكله فنتكة زي اسلافه
تحياتي..
واصلي:icon30:

طبعآ كتبت رد طويل عريض من الصبح

وكل الكلام طار من لما انطفأ الكمبيوتر وتأزمت نفسيتي خخخخخ

خلني أذكر اللي علقت عليه وشو

اتوقع حسن بيطلق ودادوووا العلة وبياخذ أزدهار

وعبدالإله واحد مفهي خالص ياحليله العاشق الولهان

وماريا ياختي عليها وعلى عفويتها مو بجراءة بذوق وأدب

وأمير أتوقع مع الأيام راح ينال الشهرة وتتحسن نفسيته ويمكن هو اللي يغير حال أهله لأحسن حال

وشفيق عور قلبي على سالفة أمه المسكينة عسى أبوه خناقة تخنقه ان شاءالله

بس هو لو يهون عن هالهلوسة الزايدة يصير خوووش رجال

والشباب ماشاءالله عليهم روح التعاون والأخوة قمة في الروعة اللي بينهم

الله لايغير عليهم

وحاليآ هذا اللي أذكره

ننتظر البارت الجديد على عجل وخروف خخخخخخخخخخخخخخخخ

هههههههههههه اميروه يعني لازم تاكدي على معلومة طعم السمك دست

< مدري منو يبغى له دست



عور بقلبي شفيق مسكينه امه وهو منادي على مصطفى شكله بيفضفض له


لاتقولي بيموت وبيوصيه:weird:اتوقع شفيق بيفضفض وامه اللي بتفلظ انفاسها الاخيره


وعلى قلبي نور لايكون مايسددون وتاخذ رمزي :wacko:


وامير ماشاء الله عليه دوم ذوي الاحتياجات الخاصة مميزين بشيء


ربي يوفقك ويحقق اللي في بالك ودوم هيكه تكتبي قصص وروايات احلى واحلى

مرحبا
مأجورين حبايبي بفقد منارة الهدى امام الجعفرية الصادق عليه السلام
:) ركزو وياي شوي عبدالستار ماله شغل في ماريا
ماريا وعبدالأله ..
:) تعاليق وتخامين ولا اروع ترقبو لتعرفو مدى صحتها..
على شان البارحه ما حطيت والليله الوفاه.. راح يكون التعويض خميس وجمعه بدلهم.....
الى ان التقي بكم..
تحية و دعاء ..
دمتم بخير
وبحفظ الرحمن

يعطيش العافية خيتوو

البارت جنآأآإأآإأآإأآأإآأإآأإآن
وبأنتظار البقية بفارغ الصبر
تحياتوو
نور البدور

يلا أميرة لاتطولي علينا

بانتظار البارت التالي ...

وشكرااا

وااااااااااااو ,)
البااارت روووووووووعة ,.
بنتظار التكملة ..
دمتِ بود

ننتظرش

تأخرتي وااااااايد

عايزين بارت


:rocket:


عايزين بارت

:rocket:


عايزين بارت

:rocket:

مرررحبــــــا
هههههههههههه يمه يمه منش يا امول.. هذا ومافتحت الماسنجر ومنهمكه في الكتابه حدي .. مره دخت ماشوف الكي بورد الحين..
تسلمو ياحلوين عالأنتظار
ماعليه الليله جمعه وخبركم لويش اني قلت الخميس والجمعه مافيه
:p لأنهم اهلات الطلعات و البيت يتطلق في هاليومين
بس على شان تأخيري عليكم بيصير التعويض
وكل مره كذا اذا ما نزلت بارت في ايام الأسبوع تأكدوا التعويض بيكون خميس وجمعه..

تفضلوو الجديد

وبين ما مصطفى قاعد مع اهله.. جت له ممرضه تطلب منه يروح لعند شفيق ضروري ...
راح مصطفى له .. لقى الدكتور مع ممرضات عنده..
الدكتور : ــ انت من اقاربه؟
مصطفى : ــ لا صديقه.. خير ان شالله
الدكتور : ــ بس نبغاك تكلم احد من قرايبه .. ما تدري عنه يتعالج عن شي ؟؟ او يعاني من شي ... باين شي غريب معانا في تحاليله..
مصطفى خاف : ــ ويش ؟؟
الدكتور : ــ ما نبغى نتعمق الا لما نعرف هل يتعالج هو عن أي شي .. هل هو فعلا مريض من قبل ؟؟؟ في هالحاله علاجه ما راح يكون عندنا في المسشفى.. اتمنى تكون فاهم علي وتكلم لي احد قرايبه الحين..
مصطفى يحس روحه مرتبك مو عارف ويش يسوي .. اخذ جوال شفيق .. فتح الأسماء واستغرب لقى بس اسم واحد.. كان كاتبنه : الوالد...
اتصل مصطفى عليه ....


ازدهار في غرفتها.. تحاول تنام بس مو جاينها نوم .. تفكر بموقفها اللي صار ليها عند وداد...
وتسب في روحها : ــ غبيه اني غبيه.. لو ماشلت عباتي احسن.. ويش بيقول الرجال بيفكرني متعمده.. وماخذه راحتي مره كأن البيت بيتي.. اففف..
وصارت تفكر : ــ وداد شكلها ظالمتنه واجد.. اذا دخلته وهو مروق ومبسوط و يمدح في ريحة الأكل وهو مايدري إن اني اللي في المطبخ عن حساب هي.. الله يهديش ياوداد وتحافظي عليه...

شوي الا جوالها يولع ويطفي في الظلمه.. كانت حاطتنه صامت عن حساب بتنام.. وكان المتصل وداد..
ازدهار حقرت تحس نفسها ماليها خلق تكلم احد..
وداد تسكر الجوال وهي محمقه في حسن:
ــ خلعت البنيه .. ما ترد علي ..
حسن : ــ شدعوه .. بعبع ... مافيني شي يخلع
وداد تطالعه على جنب بقهر: ــ ايه.. مو ويش حلاتك..
حسن : ــ عندش شك؟
ــ اهووو عني.. ياعلي كان ما زعلت ..
ــ ويش اللي يزعل.. انا ماكنت ادري .. وماكنت اقصد اخلعها.. ولا تعمدت اني افاجئها بهالطريقه... افا بس اذا بتزعل ماعندها سالفه.. تعتبرني واحد من اخوانها..
وداد : ــ اف .. بكره ارد اتصل واشوف...
حسن في باله : ــ الله جاب هالآدميه شوي موقفها غيّر هدرة هالحنانه على خواتي وولاد اختي...
طبعا وداد مواقفها طوال اليوم مانستهم بس تحاول تتناساهم لأن صدمة علاء بالنسبه ليها مو شويه..


في امريكا..
سام يعطي جون الفلوس ...
جون : ــ كعادتك.. كم انت رائع..
ويرمي عليه نصيبه منهم...
مارك يهمس لستيف : ــ اراهن انه يمتلك الكثير .. لا أدري ماذا يفعل بهم..؟؟
ستيف بأبتسامه : ــ لن تكف عن الحسد ابدا..
ــ وحتى الموت..
ــ يالك من لئيم...
ــ هو من يجبرني على ذلك...

جويل لما طول عليها سام .. شك الكاشير في السالفه فراح جنبها يصحيها...
فتحت بعد جهد جهيد وهي مابين النوم والصحوه...
ــ أنا وين..؟؟
الكاشير يبتسم ليها وبالأنجليزي: ــ هل انتي بخير ؟؟؟
ماشافها الا فزت على طولها و تطالع حواليها وتسأله:
ــ اين الرجال .. الذين .. كانو معي ؟؟
الكاشير تعجب من سؤالها:
ــ صديق زوجك رحل قبل ساعتين من الآن .. اما زوجك فقبل ساعه تقريبا .. ذهب للصيدليه
قاطعته جويل وهي مره مختلعه: ــ زوجي ..!!! صيدليه...!!!
التفت حواليها لقت شنطة الفلوس مختفيه و شنطتها مفتوحه..
صرخت : ــ سرقت.. لقد سرررررررقت
الكاشير يهدي فيها..: ــ ما الأمر .. كيف سرقتي .. لقد ترك هاتفه النقال لدي و نقودا اكثر من الفاتوره !!
ويروح يجيبهم لجويل اللي من شافتهم في ايده فهمت السالفه.. خذت الجوال تركض .. دقت على رقم سام.. لقته مقفل ... دقت على رقم يوكي .. لقته ايضا مقفل ... فهمت الموضوع نسبيا.. واغمى عليها من الصدمه..

في بيت ابو مجتبى...
في غرفة أحمد باقر نام مع امير و ايثار سوت مناحه تبغى تنام وياهم هي تحب امير وايد و تبغى دايما تقعد وياه...
فأخذوها ترضيه لين تنام بعدين تشيلها امها وياها..
.. صارت اماني مع نور

هدوء في غرفة احمد.. شوي يقطع الصمت سؤال من ايثار:
ــ عمي ... متى بتعرس؟؟
ضحك احمد : ــ بس يصير عندي فلوس وااااجد وبيت ...
ــ بتعرس على مين ؟؟؟
ــ الله العالم يا غناتي.... مايندرى وين نصيبنا...
باقر ينقلب الجهه الثانيه وهو منزعج من اسأله ايثار:
ــ وانتين ويش عليش .. اسكتي لا بنطلعش برى
ايثار : ــ مالك شغل اني اسأل عمي ..
ــ افففف منش هداااره
ايثار : ــ عمي انت نبغاك بعد ايام شويه تعرس .. اني باقول لك مين العروس....
أحمد بتساؤل وفيه ضحكه على بنت اخوه:
ــ منهي ..؟؟؟
ايثار وهي مره متفاعله : ــ خالتي مااااريااا
احمد صار يضحك عليها...
باقر : ــ على كيفش هو.؟؟؟
أحمد ماحب يسأل ايثار لويه قالت ماريا .. يخاف انها تبدي تخور و تصير فضيحه
ومع انه تجاهل السؤال الا ان ايثار صارت تكمل كلامها:
ــ خالتي حليوه .. بيضا وشعرها ناعم وطويل
أحمد بحرج يقاطعها : ــ عيب غناتي.. مايقولو كذا
ايثار بأستغراب : ــ والله ما اشدب .. لويه عيب؟؟؟
ماشافت ايثار الا باقر قايم ليها ويصرخ فيها :
ــ ما تستحي انتين باقول لخالتي اذا رجعنا... قومي روحي لأمش ... قووومي
احمد : ــ هدي حبيبي لا تصارخ في اختك..
ايثار ودمعتها في عيونها : ــ فيك جنون البقر .. لا تصارخ فيني... باروح لأمي مالت عليك..
باقر : ــ جنون في عينش يا ام لسااانين.. اطلعي برااا
ماشافو الا امير يضحك ويصفق..
ايثار بقهر : ـ حتى انت مستانس .. مااالت عليكم كلكم..
احمد : ــ افا .. حتى انا..
ايثار : ــ ايه لأنك ما تدافع عني..
احمد يسوي ليها بوسه من بعيد : ــ امواااه.. ياعمري اللي يزعلو.. نامي بس قموره نامي لا ماباعرس طول عمري
ايثار وبرطمها ممدود قدامها شبر : ــ زين باروح ويا امي..
وطلعت من الغرفه..
احمد : ــ شوي شوي على اختك .. لا تصارخ فيها على اقل شي حافظ عليها في غياب ابوك..
باقر : ــ ماتفهم هي وكل تهدر كذا .. تكبر وهي ماتفهم الصح من الغلط
ابتسم أحمد من كلام ولد اخوه : ــ الله يكملك بعقلك ويخليك ليها... مجتبى صغيرون..

ام مجتبى تتقلب على فراشها وتحاتي سالفة ابو رمزي .. لو صار ماصار ولا قدرت تدبر المبلغ ويش بيسوو؟؟
وكيف بتواجه بنتها بالسالفه.. !!
تتذكر كلام ابو رمزي ليها لما سكتت وبين عليها الأرتباك من شرطه الغريب:
ــ انتون اهلنا وقرايب .. واللحمه اذا ماحبتك رحمتك..
بمعنى ان رمزي بيكون شخصيه ثانيه غير مع قريبته....
صارت تفكر اذا مرت سنه وحسو نفسهم مابيقدرو ترجع تتنازل عن الشرط و يحاولو يغطو الزياده على المبلغ المدفوع..
شوي ترجع تفكر لو خلال هالسنتين جى نصيب بنتها ويش بيكون الوضع ...؟؟؟

افكار تروح وتجي في راسها وهي مره مقهوره من ابو مجتبى لويه متسلف هالكثر .. ومن عند ابو رمزي بالذات.. !!

في اعمدة السرير مربوطه.. والألم ماكل جسمها من كل ناحيه.. كانت تصيح صياح يقطع القلب تقطيع...
تقرب منها شفيق .. وعمره بالكاد 7 سنوات.. وهي تناديه بأنكسار..
يسمعها تهمس بصوت متقطع : ــ عطشانه.. ابغى مااي...
يركض يلبي ليها طلبها...
يرجع يحاول يشربها وهي كلما جت تشرب الكاس يصير فيه دم... من الضرب الشديد على وجهها...

يقعد في حضنها ويصير يصيح مابيده حيله ...
تغفى عيونه وهو قاعد على ذاك الحضن اللي لا حول له ولا قوه..
يصحى .. يناجيها عل وعسى ترد عليه..
يلاقيها ... تركته ورحلت عنه الى الأبد.....

بالمستشفى..

وصل اللي اتصل فيه مصطفى عن حساب هو ابو شفيق...

كان رجال كبير في السن .. يبين عليه السماحه و الطيبه... مثل مايقولو.. سيماهم في وجوههم..
سلم على مصطفى و شكره على الأتصال .. ودخل يشوف حال شفيق ..
اللي كان متعرق بالمره و يون .. ويتقطع ما بين وناته ندائه لأمه...
مسك الرجال ايده وصار يضغط عليها ويمسح على راسه و مبين عليه التأثر شوي ويصيح وياه...
مصطفى يراقبهم من بعيد...
تركهم شوي راح يشوف امه لقاها نامت وابوه بيرجع البيت..
فقرر يظل شوي يتطمن على شفيق قبل لا يلحق ابوه...

وبعد ما تكلم الرجال مع الدكتور طلع لقى مصطفى على كراسي الأنتظار..
جلس جنبه وصار بحزن يتكلم:
ــ تعبناك ويانا ياولدي.. ماقصرت رحم الله والديك..
مصطفى : ــ ووالديك حجي .. شدعوه شفيق واحد من الأصحاب و ماسوينا شي .. عساه بخير الحين..
الرجال : ــ الله كريم... من زمان ماجت له هالحاله.. الله يعديها على خير
مصطفى سكت مو عارف ويش يقول ..
الرجال : ــ ما تدري بحالة شفيق ؟؟ ماقال ليكم ويش فيه؟؟
مصطفى : ــ لا .. تونا بالكاد متعرفين عليه...
الرجال .. : ــ من عرفتوه مالاحظت شي غريب منه؟
مصطفى : ــ انا مو ساكن وياه بنفس الشقه .. فلذلك ماعرفه عدل بس لفت نظري ان لما جيت اتصل عليك مالقيت الا اسمك في جواله.. ماله غيرك ؟!
تنهد الرجال من قلب : ــ آآآه ويلي عليه هالشفيق ... ما عمره احتك في احد من تركوه اهله..
مصطفى بتساؤل مبين على وجهه ...:ــ اهله؟؟ ليش حضرتك مين ؟؟...
الرجال : ــ لا يابوك.. انا جارهم ... قوم ياولدي برى احكي لك عن شفيق حق لو صار من طرفه أي تصرف غريب تعذروه.. .. الجو بالمستشفى يخنق ..

طلعو برى وصار الرجال يتكلم:
ــ انا اسمي مهدي آل ... جار اهل شفيق من سنين.... الله يسامحه ابو شفيق كان والعياذ بالله رجال مو زين.. مع ان كان وحيد امه و ابوه .. الا انه من تصرفاته الشينه مات ابوه بالجلطه و امه ما رحمها ارسلها دار العجزه بعد وفاة ابوه.. لين وافتها المنيه من القهر....
مصطفى بحزن :ــ انا لله...
مهدي يكمل:
كان مشهور في الفريق بالمجاهره بفسوقه.. فلذلك ماحد كان راضي يقبل فيه زوج لبنته ابدا..
لين ماشفناه في يوم الا جايب بنيه صغيره عمرها مايجي ساعتها 16 سنه وهو حزتها ابو 35 سنه... اللي عرفناه بعدين انها زوجته .. اخذها من ملجأ الأيتام....
مصطفى يبين على ملامحه الذهول ... وينتظر التكمله..
مهدي يكمل بهدوء....
كانت خوش مرأه.. طيبه وحنونه.. الله مارزقنا انا ومرتي بالذريه من سنين .. فصارت حسبة بنتنا.. نحبها و تزورها مرتي بين فتره وفتره تستفقد امورها.. كانت خايفه عليها من ابو شفيق لأنها داريه به مايرحم...
مرت السنين و مرتي تلاحظها كلما جى ليها تتغير حالتها الصحيه للأسوء .. كانت كتومه ما تشتكي من سوء معاملة ابو شفيق ليها ومسلمه امرها لله..
يمسح مهدي وجهه ويجمع هواء ويطلقه زفره قويه.. ويكمل..:
و في ليله من الليالي قريب الفجر .. جتنا البنيه تستغيث و تصيح صياح يقطع القلب .. كانت منحاشه من البيت .. وبعد ما هديناها عرفنا انه سهران مع جماعة سكرانين وكذا واحد منهم دخلو عليها ... ولما حاولت تستنجد به لقته هو اساسا اللي حدهم بعد ما استلم الثمن...
مصطفى فتح عيونه : ــ يــــــــــــــــالله... يــــــــــــــا ستااار
مهدي يكمل بقهر و ألم:
حاولنا نحميها وظلت ويانا هذيك الليله وحالتها مايعلم فيها الا الله.. كنا نصيح وياها من قلب ..
ما اصبح الصبح الا جاي حضرته و يحلف انه بيجيب لينا الشرطه ومالينا علاقه وما يحق لينا..
المسكينه سلمت امرها لله ورجعت له...

وبعد كم شهر .. وبين مامرتي في زياره ليها لفتت نظرها ان حالتها فعلا للأسوء .. الحت عليها تروح وياها الطبيب واكتشفت بعد هالزياره انها حامل ...

عدت الشهور بضيم و ألم.. كان ابوه يضربها ليل ونهار .. يبغاها تجهض اللي في بطنها..
مصطفى بذهول : ــ لوووويش بعد....!!
مهدي بحزن شديد : ــ الحيوان شاك انه مو ولده.. ويحلف عليها انه بيرميها بالشارع اذا خلفته.. و مصر انه مو ولده .. وهي تترجاه وتحلف له انها هربت ليلتها وما لمسها أي مخلوق غيره... بس ماكان يفيد...
سكت مهدي شوي..
مصطفى بهدوء :ــ وبعدين.!؟
ــ إيييييه... الله حمى هالجنين في بطنها رغم كل اللي تعرضت له.. ولما انولد كان يعاني من فقر دم شديد ..
شائت الرحمه الألهيه انه يعيش وحالته الصحيه مستقره .. وكبر شفيق و كبر مع أمه الألم والمعاناه..
كان يتعمد يعذبها قدامه.. ويضربه هو الآخر... تعذيبه هالرجال مو طبيعي.. كذا مره شفيق يهرب من البيت ويلجأ لينا يستنجدنا.. بلغنا عن هالمجرم الشرطه .. ابوه كان رافض يطلق امه .. فقررت امه انها تخلعه و تفتك من هالعذاب...
شاورت زوجتي .. ماعرفنا ويش نعطيها من راي .. خصوصا ان الناس صارت تتكلم فيها وفي شرفها و نسبها الغير معروف.. والكل صار يتكلم عن شفيق و اصله من ام مجهولة النسب و ابو فاسق .. عذاب مو طبيعي كلام الناس ذيك الفتره ونظرتهم و نبذهم ليها ولشفيق الطفل اشد قسوه من عذاب ابوه..
صارت محتاره لو خلعته وين تولي على عمرها... الملجأ ما بتقدر ترجع له بعد كل هالفتره ومعاها طفل .. ما بيقبلو به وهو مو يتيم ابوه وامه حيين وقادرين يرعوه... كان شفيق كل همها.. فعلى شانه بلعت الضيم وظلت مع ابوه... وطبعا زاد جرعة التعذيب جزاء لتفكيرها انها تخلعه ...

مصطفى :ــ ويش كان يسوي فيها !!!!
ــ قول ويش كان ما يسوي ..!! وصلت فيه ما يأكلها ولا يشربها.. يربطها في السرير. وهي جالسه.. تظل باليومين وتنام وهي على هالوضع وشفيق المسكين ماله حيله الا انه يقعد في حضنها ...
مره زارتها مرتي و زوجها المجنون ماكان موجود.. كان ابدا مايخاف عليها ويترك الأبواب مفتوحه بلا اقفال .. وهي اللي يربطها بحديد واقفال في هالسرير وكأنها من الحيوانات..
فطرت قلبي مرتي لما رجعت لي في يوم وهي تصيح وتشتكي من هالظالم لما شافت شفيق نايم من جلوس في حضن امه وحالتهم لله...
ماكننا نتجرأ نفك الحديد لا يرفع علينا قضيه بما انا في بيته بدون اذنه.. وحنا على باب الله مالينا في المصايب...

يسكت شوي و يكمل بنبره متضايقه ومخنوقه

وفي يوم مشؤوم... ودعت امه الدنيا.. جانا وهو يصيح يقول امه نايمه من امس ما قعدت ولا كلمته.. طفل على نياته.. ولما رحنا نستفقد الموضوع لقيناها ميته...
وابوه اختفى بعدها ,, ومادرينا به وين راح.. حي هو والا ميت؟؟
اخذنا شفيق .. وتعاهدنا انا ومرتي نربيه بما ان الله حرمنا من هالنعمه اللي ما قدرها هالظالم..
والمسكين كل هالأحداث الأليمه عاشها وهو يفهم.. ويذكرها بالتفصيل..
صارت تلازمه كوابيس.. كان انطوائي و دايما يعزل روحه.. عجزنا نحاول فيه يكون اجتماعي اكثر ... تعود على العذاب اللي عيشه في ابوه طيله 7 سنوات.. تعود ياكل الأكل المتعفن ومايضره.. تعود ينام وهو جالس ومسند جسمه للجدار.. كل هالأشياء وغيرها كانت تذكره بأمه ... ماقدرنا نغيرها .. لين الله بلاه بأكتئاب شديد ووسواس قهري.... ويتعالج منه بمضادات وادويه ...
انسلت دمعه من عيون حجي مهدي.. وهو يتأمل وجه مصطفى المتفاعل وعيونه الغرقانه دموع..
وتنهد من قلب : ــ اييييه.. مانزل الا لأنه بياخذ ادويته...... الله يهديه توقعته لما نساهم انه يشتريهم من الرياض بس شكله طول هالسنين ماحفظ الوصفه وويش اسامي الأدويه !!
مصطفى ما تحمل ... صار يحاول يمسح دموعه..
ــ الله كريم.. يقومه بالسلامه وماعليه شر ان شالله..
وفي باله : ــ يالله شقد الواحد اذا شاف مصايب الناس تهون عليه مصيبته .. الحمدلله على كل حال...

حجي مهدي : ــ مشكور ياولدي مره فانيه ما قصرت .. دوشنا راسك بالسالفه.. بس ماقلت لك الا لأن شكلك طيب واجودي وولد حلال .. وحق تفهم شفيق لو صار منه أي شي و ما تخافو منه ومن تصرفاته... الله العالم انه طيب وحساس و شاطر في دراسته.. انا وافقت اخليه يروح الرياض حق يغير جو ويطلع ويتعرف على الناس.. ويكون علاقات... حسبي الله على من وصله لهالمواصيل..
ابتسم مصطفى : ــ تطمن حجي .. شفيق ويانا ماعليه أي شر ان شالله
ــ عساك سالم.. ربي يجعل لك في كل خطوه خير ورزق ..

ودع مصطفى حجي مهدي .. متوجه لبيته و في قلبه اسى على حال شفيق ..
وبين ماهو في الطريق .. جى له مسج .. فتحه لقاه من عند يوسف ..
ــ هلا خيوو.. اخباركم ..؟ وصلتو بالسلامه؟ واخبار اهلك و شفيق .. عساكم بخير

يوسف كان منسدح على سريره .. ومراد اخذ سرير شفيق مؤقتا..
مراد عنده لاب توب وجايب معاه موبايلي كونكت.. وشابك انترنت و مبسط في الشات دق سوالف و خذ وهات..
صادق يحاول ينام ومتنرفز من صوت طقطقة الاب توب..
ــ اففففففففف ما ننام حنا يعني
مراد ببرود : ــ بكره الخميس مايضر .. ماوراك دوام
صادق : ــ ايه ويش عليك من قاصر .. تنام طول نهارك انت .. الكلام للي يقعدو من صباحة الله خير..
مراد وفي بوزه علك ويطقطق فيه: ــ قوم ارشح وجهك..
صادق عصب ..: ــ لا تعليق ...
حمل منامه ومخدته وبطانيته وطلع الصاله
يوسف بهدوء يكلم مراد: ــ عاد اخوك كان انت دام مابتنام شبكت هالنت في الصاله لين تنعس مو حلوه يطلع هو بمنامه للصاله
مراد : ــ والله ماحد جبره .. هههههههههههههههه غربلها الله هالخبله اشك والله انه رجال .. تعال تعال ابو يعقوب شوف هالبنيه العربجيه .. كلامها يفطس ضحك.. ماصدق فيه بنات كذا
يوسف كشر حواجبه : ــ الله يكون بالعون.. ابانام انا..
الا مصطفى يتصل ...
رد عليه يوسف ..
مصطفى بصوت متألم : ــ هلا يوسف
يوسف حس عليه : ــ هلا مصطفى وصلتو ان شالله بالسلامه..اخبارك واخبار الأهل
مصطفى و بتعب باين : ــ الحمدلله بخير
ــ .. خير ان شالله .. ويش فيه صوتك؟؟
مصطفى : ــ شفيق .. شفيق مسكين سالفته سالفه..
يوسف يقعد من بعد ماكان منسدح: ــ ويش فيه؟؟
مصطفى مامداه بيتكلم.. الا .. طوط طوط طوط
يوسف يطالع في جواله.. ومستغرب : ــ ويش صااار!!!
ويدق على مصطفى ..
ان الهاتف المطلوب لا يمكن الأتصال به الآن..
يوسف : ــ الله يستر.. ما يندرى ويش صار.. ان شالله البطاريه تكون فضت مو شي ثاني..
مصطفى يطالع في جواله .: ــ افففففففف هذا وقته..
دخل البيت لقى ابوه ينتظره...
قعد ويا ابوه وكان الحزن مبين عليه...
مصطفى : ــ يبا؟؟ انت مخبي عني شي؟؟ ويش فيها امي؟؟؟
ابو مصطفى : ــ لا ياولدي.. مافيها الا العافيه ان شالله.. بس التعب زايد عليها هالمره والضغط مو راحمنها..
ــ عاد امي لويش ما تنتبه لروحها ؟؟
ــ انت ادرى بها.. المهم ياولدي اسمح لي ولو انك واحشني بس باقوم انام تعبان من الصبح ويا امك في المستشفى
مصطفى : ــ ريح يبا.. نوم العوافي .. انا بعد باقوم اريح جسمي متكسر من قعدة الباص نتلاقي الصباح .. تصبح على خير

دخل مصطفى غرفته... وكان حاط فيها صورة دانه على التسريحه..
قعد وركب في جواله الشاحن بيكلم يوسف ...
صار يتأمل في ملامح دانه البريئه.. ويتذكرها وهي تقول له والحزن باين عليها بعد ما خلص فلم كرتون كانت تتابعه :
ــ ماتت امه اهئ .. مسكين اهئ اهئ.. لويه تموت ما تعيش وياه...!!
مصطفى وهو يحاول يهديها : ــ مسكين ... غناتي لا تصيحي...كلنا بنموت في يوم من الأيام......
ــ ... لويه الناس تموت؟؟
ــ ما احد يعيش على طول الله يخلقه و يحدد له عمر وبس يخلص عمره يموت ويدفنوه واذا هو واحد زين و يحب الله وما يغضبه بيروح الجنه.. بس اذا يسوي اشياء مو زينه الله يحرقه بالنار...
ــ اذا كبرت وصرت زينه وتالي متت باروح الجنه؟
ــ بتروحي ياعمري بعد عمر طويل .. بس صيري بنيه حليوه و طاوعي البابا والماما وحبي اخوش مصطفى وطاوعيه وبتروحي الجنه..
ــ الله .. وباشوفك هناك انت والماما والبابا..
ــ ايه ان شالله ..
ــ وباشوف امه اللي ماتت...
مصطفى يضحك عليها: ــ اذا هي وحده زينه بتشوفيها..

بأبتسامه مليانه أسى .. : ــ ايه .. في الجنه رحمه ياالغاليه.. ما انتظرتي لين تكبري .. افتكيتي من هالدنيا و مصايبها..
ويتذكر شفيق و حكايته...
الا بيوسف يتصل عليه..
رد مصطفى : ــ هلا يوسف...

وصار يسولف وياه تقريبا ربع ساعه..
مراد يأشر على يوسف : ــ اسأله اذا عنده انترنت يشبك اوفر ليكم .. اخذ ايميله وخذ لاب توبي انا بانام...

يوسف سأل مصطفى... و اتفقو يكملو سالفة شفيق على الماسنجر...
سكر يوسف ورسل لمصطفى ايميله..
مراد عطى يوسف لاب توبه.. و انسدح بينام...
يوسف شبك مع مصطفى ... كان مصطفى حاط صورة اخته في الماسنجر
يوسف : ــ ايه كمل .. عورت قلبي على هالشفيق ... وبعدين..!!
صار مصطفى يكمل الحكايه الى شفيق ...

الفجر ..تلفون بيت ابو مجتبى يرن .. ولا احد يجيب الأتصال.. مره ومرتين وثلاث ..
ابدا الكل نايم ولا يسمع....

في امريكا .. بالمستشفى..
جويل فتحت عيونها.. لقت محقق من الشرطه جالس ينتظرها متى تصحى...
وبدأ فتح معاها التحقيق باللي صار بعد مابلغ الكاشير تبع المطعم عن الحادثه..
جويل وهي ماهي قادره تستوعب اللي صار ليها ولا حتى تصدقه.. صارت تحكي السالفه..
المحقق : ــ إذن لم تكوني على علم بأن هذه الماركه كانت لشخص منذ وقت ليس بقليل وتعرض لخسارة فادحه لهبوط اسهم البورصه فأغلق المحل و قرر بيعه ..
جويل : ــ لا .. كنت اظنها للسيد سام.. و يوكي هو من اتصلت به لأجل اتمام البيع .. رقمه هو الذي كان مدونا في لوحه على باب المحل..
المحقق : ــ سحقا. كيف لك ان تثقين بهم هكذا. لقد وضعوا لوحة مؤقته ليخدعوك بها.. ان المحل تعرض للبيع منذ سنه تقريبا والى الآن مالكه لم يبدأ مشروعه فيه نظرا لكونه مسافرا بالخارج..
جويل تحس نفسها ماهي في الدنيا : ــ وماذا بعد ذلك؟
المحقق : ــ حاولنا ان نأخذ بصمات من أي شيء قد يدلنا على الفاعلين الا انه كان محنكا ذلك الخبيث .. عندما سلمهم هاتفك النقال والنقود لفت نظر الكاشير بعد ان استجوبناه وطلبنا منه التذكر جيدا انه سلمهم اياه بمناديل ظلت في يده اثناء خروجه..لم يتسائل الكاشير حينها عن سبب ذلك اعتقادا منه ان يديه رطبتين والمناديل لتجفيفهما لئلا يضرر الهاتف بالرطوبه..

جويل : ــ إذن؟
ــ لا شيء حتى الآن.. سنبقى نراقب الوضع الا ان يظهر أي شيء يدلنا عليه.. حاولي فقط ان تتذكري ملامحه لنا ..
صارت جويل توصفه وهي متوتره وتصيح صياح...
والمحقق يكتب الأوصاف على شان رجعته للمركز يبحث عنها بين قائمة المجرمين و يراويها عل وعسى يكون واحد منهم...

يوسف عورت بقلبه سالفة شفيق بالمره .. صار يطالع في سريره اللي تعود يلقاه عليه نايم من جلوس ...
ــ الله يعينه هالشفيق .. ظلمناه واجد.. وهو ويش قد عانى .. وحالته ماكان يعلم بها الا رب العالمين.. يقوم بالسلامه ان شالله..

يوسف انتبه لصورة مصطفى .. وحب يغير هالسالفه المحزنه.. فحط له سمايل اللي يبحلس :
ــ مين هالحلوه... ؟؟
مصطفى : ــ اختي ..
يوسف : ــ مو باينه ملامحها ... في الصوره عدل شكلها تشبه بنت اختي
ورجع حط سمايل اللي يبحلس وكتب لمصطفى :
ــ ممكن ترسلها لي صورتها بااشوفها عدل..
مصطفى رسلها له...
يوسف : ــ تسلم اخوك .. شكلها حبابه وقموره زي اخوها.. الله يحفظها
مصطفى حط ابتسامه : ــ يرحمها و يحسن اليها
يوسف نبض قلبه بالقوه . كان بغير سالفة شفيق المحزنه مادرى انه بيدخل في سالفه ثانيه أليمه.... حط رمز الخجول : ــ آسف اخوك ماكنت ادري .. الله يجعلها رحمه و نور واحسان لوالديك...
ــ ماقصرت يالغالي...
وصلت الصوره... و ودع كل واحد منهم الثاني
وقبل لا يقوم يوسف فتح مجلد الصور بيشوف صورة دانه الصغيرونه
الا يلاقي في مجلد الصور ..
الى الملتقى..

إبداع أموره
يعطيش العافيه هالبارت يعور القلب :sad2: بس من جد تسلسل الأحداث تشد
ننتظر التكمله على أحر من الجمر
سلامي لكِ:amuse:

يوووووووووووووووووووووووووووووووووه


تعور قلبي بهالفجريه على ام شفيق تذكرت موقف ربعه وهو ياكل الخبز المعفن مدري البريد :sad2:


وهم متحمقين عليه :embarrest:


خخخ طلعت ايثار مو هينه شكله بيحطها في باله عدل مدل


بس ياويلها من خالتها بتذبحها اذا وصل باقر الكلام


وازدهار اووووووه بدء القلب يدق شكله



وهاليوسف بدل مايكحلها عماها ربي يهداه


ها ويش شاف في مجلد الصور لايكون حاجه توطي الراس

ووووووووبسسسسسسسس تقريبا


بارت بقدر مايعور القلب الا انه يفرح القلب بابداعاتك :embarrest:

صيحتينا امورة بهللبارت ..>>دموع اربع اربع واني اكتب

::

مسكين هللشفيق عور بقلبي الله يعينه

::

وش شاف يوسف بمجلد الصور اكيد بلاوي

ننتظر الباقي على احر من الجمر

تسلم ايدك غاليتي

السلاآأآأم عليكم ..:bigsmile:
هلااا خيوووتي اميره ..:amuse:
بصراحه صار اليي مده اقرأ رواياتش وكانت مرره تشدني بس من ورا الكواليس:rolleyes:
بس بهذه الروايه وهذه الأحداث مااقدرت امنع نفسي اكثر :embarrest:
ماشاء الله عليش كاتبه بااااهره اللهم صلي على محمد وآل محمد:icon30:
تجسدي المواقف وتشوقينا عدل للأحداث ..:seif:
هذه الروايه احس مرررره عجبتني وااجد كل شخص من الاشخاص صار اليه مكانه في عقلي:kaseh:
والاحداث اليوم مررره تعور بالقلب مسكين شفيق والله انه مايستاهل الله يشفيه:closedeyes:
وحتى مصطفى موت اخته وهي صغيره يعور القلب ويقطعه :sad2:
وكل الشباب يجننوا وضحك وياهم:clap:
وكاظم وشبقاته ويا ولد عمه دكرني بشبقاتي ويا بنت خالتي :nosweat:
ومراد للحين امبى اعرف وش سالفته ووش في المجلد:wondering:
وهذه جويل والله تستاهل مسويه نفسها عدله :deh:
وووو بس ان شااء الله اقدر كل مره ارد عليش :in_love:
بس عااااااااد لاتطولي اكتبي واااجد الينا ترى تعذيب اسمه :walla:
يلااا وااصلي للأمام :wink:
يعطيش ربي العافيه
سي يو ..ْ~}
:amuse:

http://www.al3assi.com/foto/msn/smil...ups/1/4/37.gif http://www.al3assi.com/foto/msn/smil...ups/1/4/37.gif

يـآويليً عليكَـ يآشفيقوهـٍَ مسسسكينَ

طلعت ورآهـآ قصصَ!!

ويييعَ اصلآَ الشقهَ بدونه مـِـآفيهَ لوعة شبدً
http://www.al3assi.com/foto/msn/smil...ups/1/4/29.gif

ان موتيً شفيق يـآآميروهًٍـ يآآآآآآآآآويلكًـ ان ص ـآًر بهً شي

http://www.al3assi.com/foto/msn/smiles-groups/1/4/1.gif

اآيثـآرووً مسكينه على نيــآآآآتهـًـًآ ضحكتني هههههً
وعـآد آخوهـًآ بآقرً مسوي فيهًـآ هو العـًآقل >> عصبهـًآhttp://www.al3assi.com/foto/msn/smil...ups/1/1/14.gif

http://www.al3assi.com/foto/msn/smiles-groups/1/3/8.gifhttp://www.al3assi.com/foto/msn/smiles-groups/1/3/8.gif

ويليَ عليكً يبو صطيفً ،،

كسـر خ ـِآطري زيآدةً الهمَ همييينً !!

وآلله شقة نوري وشلته مـآتسوى اللحينً !!

وخيرته بيعرسً وبيجيب دآنهَ

http://www.al3assi.com/foto/msn/smil...ups/1/2/10.gif

انلعب على جويلوووه ام الخلاجين

تستـآهل هووع

وانـآ عندي شككك كبيرررر

انه سام اخو يوسسسف المفقووود
http://www.al3assi.com/foto/msn/smil...ups/1/3/34.gif

اتوقع انه ورآ مرآد كوآليس زيي شفيق

"" اميره ""

جزء روعه بجد يجنن
http://www.al3assi.com/foto/msn/smil...ups/1/3/28.gif

آبدآع × آبدآع يسلمووو غلآتووو

مااننحرم من هيك ابدآآع

موفقه نشآلله

دمتي بخير

http://www.al3assi.com/foto/msn/smil...ups/1/4/36.gif

يعطيش العافية خيتوو

عور قلبي هالشفيق

من البداية حسيت انه وراه شئ مو طبيعي

الله يشافيه ويعافيه يارب

بس بجد بجد عور قلبي هالمسكين :(

يسلمو خيتو اموره ع البارت الروووووووعه
تعليــــــــــــــــــــق
شفيق توقعت قصته اليمه
عور قلبي مسكين مايستاهل
ويوسف اكيد بيشووف في الاب توب
صور بنات ولا شي كذا
ومصطفى اكيـــد بيتزوج وبيجيب دانه
وهذا سام متى بيهون عن فعايله ؟؟
وبـــــــــــــــــــس
بانتظار البارت القادم على احر من الجمر
تحياتيـ ..

البااررت رووعه

وشفيق قصته تكسر بالخااطررر ظلمنهاا:closedeyes: الله ينتقم من الاعمل به كذاا

بس ان شاء الله الشبااب يسااعدوه

ومرااد شكله ورراه بلوووه جديده

وايثاار ياغنااتي الطفووله فيها

تسلمي اموورره على البارت

نتظررك على احر من جمر

مشكورو خيتو
ننتظر الجديد

آئهي آئهي آئهي

عوري قلبي شفوق مسكين صارت عنده مناعة من الاكل المتعفن ... الله يغربل ابليس ابوه ان شاء الله مات بس مو يطلع لينا في الاجزاء القادمة الله يقوم شفيق بالسلامة

وجويل تستاهل الخبلة ماحد قاليها تثق في سام هالائد خاخاخاخاخاخا
وأحمد خوفتي يحط ماريا في راسة وعبد إلاله يتازم بعدين
امور شكلك تحطي البارت اخر الليل ههه امس انتظرتك غلى الساعة 11 ماشفتك حطيتي
بانتظارك يالغلا

تحياتي

يآآعلي شفيق عور بقلبي صرآآحه الله يسآآعده

^^

الله يستر وش بيشوف يوسف في لاب توب مراد .. لآآيكون صور ممثلآآت ومغنيآآت أجنبيآت ولآآ يمكن صور البنات إللي يكلمهم .. الله أعلم

^^

ننتظر البارت القادم