اموت واحيــــا بك... " قصة اماراتيه منقولة "

لا تعقد حياتك...
ادري انك تحبني ..وما تشوف غيرري... ترا حتى انا احبك وماشووف غيرك اووكي؟
هممممممم بغيت اقولك ان نفسيه حصه تحسنت وايد اكثر عن قبل...قامت على الاقل تظحك وتسووولف
وسالفه الشغل عاطتنها حماس شوي...عل وعسى اللي فبالي يتحقق..صح انته توأم روحي على قولتهم بس لا تسالني عن هالشي لاني ماقدر اقولك..اخاف اقوله ومايتحقق..بس اذا صار بقولك تراه صار..بس ادعى انته...
ولا تنساني بالهدايا لوووووول...لالا صدق لاتخسر عمرك ولا شي..
بخليك الحين..متى ماشفت ايميلي رد عليه خبر...

دير بالك على نفسك وهالله هالله بالرزااااااانه..

خطيبتك..
نووووووره..."

ابتسم سعيد وعلى طول رد عليها برسااااااله طويييله يخبرها بمكانه وشوو يسوون وشكثر متوله عليها..وبانه فعلا مانساها بالهدايا ...ولو كانت بسيطه...بس قيمتها كبيره في النفس...ونازعها شوي على سالفه البنات اللي تحسب عمره خلص منها.. بس تساهل وياها شوي لانه يدري بانها تغاااااار مثل ماهو يغاار عليها.... وخبرها بعد وين بيسيرون في الايام اليايه...ووصاها ماتقطع بالرسايل وبانه متى ماشاف مقهى انترنيت بيدخل وبيشيك وبيطرشلها رساله..

بعد يومين عنود كانت فبيت عمها وبالتحديد يالسه بين عمتها ام خالد وحصه....
عنود: عموووووه دخييييلج..والله اني ماعرف اشتري بلاها..
ام خالد: يابنتي انا والله ماعندي مانع..لكن عمج مابيرخصها تروح لين دبي وياج تحوط في الاسواق...
عنود: عموووه مابترمسينه عشاني يعني..؟؟؟
ام خالد: بعد شوي بييي وبنرمسه لكن بس انتي بعد رمسيه خليه يسمعها منج...
عنود: عموه اتروع اخافه يعصب ...
ام خالد: ههههههه انتي شاوريه وشوفي رايه...
التفتت عنود لحصه وهي مب متفائله بخير...اكيد عمها مابيطيع...
ويوم يا بو خالد وكانت ساعتها نوره يالسه معاهن..شاورووه في السالفه...
بو خالد: لالالالالالالالالالالالا....
ام خالد: ليش ياحمد...؟... ماعليها جان ويا حرمه عمها وبنت عمها ...
بو خالد: لا قتلج...البنت بدون امها والا حد من اخوانها والا نا ماتطلع من البيت...يالله يالله نحن خليناها تشتغل...
برطمن حصه وعنود...
نورة: انزين امايه انتي شلي حصه وعنود وسيروووا...ترا عنود حرمه ولدج بعد...وقوم عمي عادي عندهم بيخلوونها تسير وياج...
بو خالد كان مشغول ويتابع الاخبار فما سمع نوره وهي ترمس... ام خالد فكرت في السالفه شوي..
ام خالد: وين اسير انا بنتي واخلي البيت ..!!!..
نورة: وابوي انا وحريم اخواني هني ما نسد..؟؟؟...الا يوم واحد بتسيرن وبتردن..
عنود: هي عموووه دخيلج دخيييييييييلج ....
ام خالد: انزين مايخالف...
صدت ام خالد على بو خالد بتشاوره....
ام خالد: حمد...انا بسير ويا البنات دبي...
عقد بو خالد حياته معصب..
بو خالد: انتي شو يسيرج بعد ومالج حااايه..؟؟؟
ام خالد: ترا بنت اخووك ما تعرف تشتري الا ويا حصه..من طاحن وهن رباعه مايتفارقن.. وانته مب طايع ترخص بنتك...انا وام سلطان واحد..انا بشل البنات وبوديهن دبي...
بو خالد: تراج الا رابطه راسج بلا ويع...وشكلج الا انتي ارووحج تبين تحوطين...
ظحكن البنات والعيوز وياهن..وكان بو خالد رافض الفكره..وكان بيستمر برفضه هذا لولا انه شاف عنود شكلها زعلان وحاطه فخاطرها وهي ماتهون عليه...اخر شي وافق....عشان عنود بس..

الاربعاء وبعد مارجعت حصه من الدوام تغدوا كلهم وعلى طول ركبت حصه وام خالد السياره ومودنهم الدريول.. طبعا بعد ماصدعت راس نوره بالتوصيات على البيت...كانوا بيباتون ليله لانه مايعتقدون ان عنود بتخلص كل اغراضها في يوم واحد...ركبت ام خالد وحصه السياره وساروا بيت محمد... وشلوا عنود وياهم وهذيج نفس الحاله امها توصي بنتها على الركاده والعقل...وبعد ماخلصوا روحوا دبي وكانت الساعه تقريبا 3 ونص....
يوم وصلوا الشارجه كانت ام خالد تعبانه ومافيها على السوق...طبعا ساروا بيت اخوها هلال وهناك عرضت عليها بنتها عليا انهاهي تروح معاهن السوق وام خالد ترتاح في البيت...ووافقت ام خالد لان عليا لها بارض اكثر وادل اكثر بعد عن ام خالد...
فبالتالي بعد المغرب راحن البنات مع عليا دبي ووداهن الدريول... واسميهن هناك طيحن في كل شي...ماخلن شي ماخذنه.. ورجعن المسا هلكانات...تعشوا ورقدوا وبالباجر الصبح بعد نشن وسارن السوووق ..وهلال مسكين مفرور ياعند فطيم او شيخه... رجعن الظهر وهن محملات باكياس باكثر مما كانن يتوقعن...عنود خسرت واااايد بس الاشياء اللي ماخذتنها كلها تستاهل...وتقريبا خذت كل شي ناقصنها.. ومب لازم تكثر وايد لانها اكيد بتاخذ لها سوالف وايده بعد العرس...
تغدوا فبيت هلال وفطيم تتحرقص خاطرها ترجع معاهم العين بس طبعا ماتروم تنطق...بيحتشرون عليها اهلها... على هالحال رجعوا هل العين للبيت بعد الغدا..ووصلوا العصر.. عنود نزلت معاهم البيت..ونزلوا الاكياس كلهن وحطوهن فحجرة فطيم .. وقعدن يبطلن الاكياس ويراون نووره شو خذت عنود... الصراحه كل الاغراض كانت فنانه وكاشخه...واهم شي الراحه اللي حست بها عنود لانها خلصت اغراضها اخيرا...
بعد ماتعشت عنود في بيت عمها ياها حمدان وشلها هي واكياسها اللي ترسبهن السياره...وروح بها البيت...


-------------------------

الجزء الثالث والاربعون.



على مدى الايام اللي كانت حصة اداوم فيها لاحظت تردد راشد من الحسابات على قسمهم ونظراته اللي ماتخلص... وحصه كل ما تشوفه تتافف لانها تعرف انه بيسوي حركه من حركاته البايخه...حتى انه احرجها في القسم كله البنات كلهن انتبهن لنظراته صوب حصه وقامن يعلقن ويمزحن في السالفه...طبعا ولا وحده منهن تدري ان حصه "ارمله" كلهن يتحسبنها بنت توها متخرجه وعزبا...وحصه ماخبرت حد لانها ماشافت انه له داعي...
كانت شاله كم ملف بتوديهن لاقسامهن المخصصة.. وتلاقت ويا صاحبنا في الممر..يوم شافها وقف وعيونه تلمع...
راشد: السلام عليج..
كانت حصه بتتخطاه وبتروح فطريجها بس يوم سلم مشت شوي بهداوه عشان ماتكون فظة..
حصه: وعليكم السلام والرحمه...
بغت تمشي لكنه قال مره ثانيه..
راشد: شحالج حصه...؟؟
حصه فخاطرها تقول اللهم طولك ياروح...وقفت ..
حصه: بخير الله يسلمك...
ويوم شافته سكت تحركت عشان تكمل طريجها... بس عقبها بغت تذبحه يوم رد رمس..
راشد: آآآ,,حصه...!! صبري...
تراجعت حصه ووقفت جدامه..وهي ماسكه الملفات بعصبيه..
حصه: آمر..؟
كان راشد شكله متوتر...ويبغي يقول سالفه...
راشد: مايامر عليج ظالم...حصه انا ابغي اسالج سؤال بس منحرج منج الصراحه...
حصه: ليش الاحراج ..تفضل...
راشد: آآآ.... بس توعديني ماتعصبين عليه ولا تفهميني غلط لانه نيتي سليمه صدقيني...
تمت حصه ساكته ومستغربه...احين انا ناقصتنك انته؟..شو سالفتك؟؟..
راشد: اوعيديني...
حصه: اوكي اوعدك...
ابتسم راشد ابتسامه خفيفه وبسرعه طارت...
راشد: همممم...ابا اعرف وضعج..يعني..همممممممم... مخطوبه..معرسه..!!...
بطلت حصه عيونها مستغربه.....
حصه: وشو تبابه وضعي انته..!!!!..
راشد: آآآآآآآآ,,,, بصراحه انا طالب القرب منج ...اذا ماعندج مانع....
انصدمت حصه ...ودار راسها لكنها تماسكت...وعلى طول حزت فخاطرها ذكرى سيف... نزلت عيونها وقالت بعصبيه...
حصه: اخوي انا لا متزوجه ولا مخطوبه ...وضعي في المجتمع يسمونها "ارمله"...رجاءا طلعني من بالك لاني ما افكر بالزواج...اسمحلي..
وراحت عنه صوب الاقسام تودي الملفات اللي تبا توديهن وهي بالها مب عندها... مب قادره تصدق بان الشباب بعدهم يفكرون فيها...بوضعها هذا...بس هذا شي طبيعي لانه محد يعرف وضعها...اوففف ياربي ...خلني انسى هالسالفه ابركلي...
راشد تم واقف مكانه ..منصدم...مب قادر يصدق ان هالبنت كانت معرسه ومات عنها ريلها... كان متخيل ان الامور بتتسهل ..مجرد تعطيه جواب لسؤاله اذا كانت مش مرتبطه يقدر يطلع معلومات عنها وعن اهلها ووين ساكنه بدون مايحرجها بالاسئله...وعقب بيخبر هله بالموضوع وبيسيرون بيخطبوونها..لانها عايبتنه من ا لخاطر..صح ما شاف من شكلها غير عيونها..بس مب مهم وايد...المهم حشمتها واحترامها لنفسها....آآخ ياخساااره...كمل طريجه وهو متحسف من كل خاطره...

يوم ردت حصه البيت شافت امها ونوره مرتبشات...شافت نوره شاله المدخن وتحط فيه لبان وهي سايره فوق.. وامها يالسه متوتره في الصاله...ابتسمت حصه وتذكرت ان اليوم موعد وصول اخوها عبدالله...واختفت ابتسامتها يوم ذكرت ان خليفه بعد ياي... يالله ياخليفه..!!!..كم حطيت عليك آمال..!!...صرفت هالموضوع من بالها..سلمت على امها وسولفت وياها شوي ..عقب سارت فوق تتسبح وترتاح ...يوم وصلت الطابق الفوقاني شافت نوره طالعه من غرفه عبدالله...
حصه: متى بيوصلون..؟!
نورة: في أي لحظه...
حصه: منو ساير اييبهم.؟؟
نورة: حمدااان...واكيد بيخطفون هني اول عشان ينزلون عبدالله...
حصه: انا بنسدح شوي..دخيلج يوم بيوون خبريني...
نورة: اوكي..
تحركت نوره وتحركت حصه...عقب ردت حصه تصد صوب نوره وتقول..
حصه: ..آآآ نوره...اقصد زقرييني يوم بيسيرون قوم حمدان بيتهم وبيتم عبدالله اوكي.؟؟
نورة: ليش ؟..ماتبين تسلمين على خليفه..؟؟؟؟
حصه: آآآ...لا مب جي السالفه...بس عقب بسلم عليه ..ماريد اسلم على اخويه جدام خليفه ...المهم انتي يوم بيسيرون زقريني...
نورة: على راحتج..
وسارت كل وحده فطريجها..

الشباب في سياره حمدان كانوا ميتين من الوناسه..يسولفون ويظحكون..وكل حد منهم يفكر بنتايجه الحلوه في هالسنه...خليفه بما انه كان همه في هالسنه الدراسه وبس حصل امتياز في علاماته ماعدى في ماده وحده خذ جيد جدا...اماعبدالله فكان معدله جيد جدا في كل المواد تقريبا...وحصل شهادته وماباقي غير رخصه الممارسه ياخذها من الامارات ويشتغل في مستشفى توام...قسم الاشعة...ن
كان المفروض وصولهم يكون قبل اسبوع لكنهم تاخروا شوي عشان يحضرون حفل التخرج... تذكر خليفه وهو يبتسم..هند يوم عطاها هديتها وودعها وداع نهائي هالمره.. كان يوم سار السوق عشان ياخذلها هدية احتار وماعرف شو المناسب..لين ما لفت نظره محل انتيكات..دخل يشوف وعيبته تحفه صغيره منحوت فيها اثنينه يهال وشكلهم وايد طفولي ومثل اللافته مكتوب عليها كلام عن الفرندشب "الصداقة" وتحت مكتوب Good Luck وشافها مناسبه وخذها وغلفها ..عقب قعد يدور لعمره ساعة...مسكينه هند..كان شكلها متاثر يوم ادركت انها مابتشوفه بعد اليوم...لانها سفرها بيتاخر شوي اكثر عنهم...المهم انه افتك من هالسالفه نهائيا ..اسميه مابيرد امريكا بعد اليوم لو شوووو ماصار...لاعت جبده منها من الخاطر...
اما عبدالله فكانت سالفه العرس داقة فباله..خلاص ماصدق يتخرج ويفتك..وبيبدا من هالاسبوع يرتب لزواجه...آآآيه فديتج يالعنوود..صبرتي وايد..واناصبرت وايد...بس خلاص ماتم شي...
حمدان كان مستانس باخوه وولد عمه..على الاقل بينشغل وياهم وبينسى غياب فطيم اللي استمر اسبوعين ونص الحين..زين انه بعده متحمل وصابر...اووف متى بيبدا الدوام وبترد الطويله...!!!..

وصلوا الشباب بيت حمد الكتبي...دخل حمدان بسيارته ووقفها في الغراج.. وعبد الله شاق الحلج..وخليفه قلبه مثل الطبل من دخلوا اللفه براا البيت...مايصدق انه بيشوف حصه اخيرا....وهو مب عارف لين الحين كيف يتصرف تجاه مشاعره...حصه الحين مب بنت عمه الاوليه...حصه صارت حرمه المرحوم سيف...سيف اعز ربعه...الله يرحمك ياسيف...
نزلوا كلهم من السياره وكان الوقت 3 ونص الظهر..الشايب لاول مره في التاريخ مارقد..يتريا ولده ايي...متوله عليه من الخاطر...اما خالد فكان فبوظبي وناصر واقف براا هو وامه يوم شافوا السياره دشت...
ياهم عبدالله ولوا على امه على طول..
عبدالله: فديـــــــــــــــتج يا امااااايااا....
والعيوز لاويه على ولدها وتصيح...وكل شوي تحب جتفه وتحبه على غزه ...وتتفدا وحالتها حاله..خليفه سلم على ناصر لين ماتخلص العيوز سلامها ...
ناصر: الحمد لله عالسلاااااااااااااااامه...ياحيالله خليفه والله..
خليفه: الله يحيييك ويسلمك يارب...شحالك ياناصر..؟
ناصر: بخير الله يعافيك...افتكييتووووا مبروك التخرج..
خليفه: الله يبارك فيك يارب...
عبدالله: شووو وانا مالي سلااام..؟؟
صد ناصر صوبه وهو يظحك...
ناصر: قلنا لين تفرج عنك العيوز ...هلا والله
وتلاوا هو واخوووه وسلموا على بعض....والعيوز من وناستها مسكت خليفه ولوت عليه بعد...تراه مثل ولدها ومربتنه ... وخليفه استانس وايد من هالحركه وحس بغلاته في هالبيت...حبها على راسها ورد على ورا شوي وهو قافط.. وبعد ماخلصوا سلامات قال ناصر..
ناصر: هااا بتدخلون البيت والا الميلس..؟؟
عبدالله: لالا بنسير البيت بسلم على خواتي....
ساروا كلهم البيت وكانت نوره في الصاله متحمسه وتترياهم يدشووون..اول مادخل عبدالله من بعد امه وهو يظحك طارت صوبه وطاحت فظنه...
نورة: فديييييييييييييييتك ياربي والله اني افتقدتك هالسنه اكثر عن قبل...
ظحك عبدالله وهو ماسكنها...
عبدالله: قسم بالله حتى انا..شحالج ويا هالراس...؟
نورة: بخيييييييير..الحمد لله عالسلامه...
عبدالله: الله يسلمج...
دخل عبدالله الصاله اكثر عشان يخلي قوم خليفه يدشون وراه... تحنحن خليفه عشان ينبه نوره انه بيدش...بس نوره مسويه حسابها ومتحجبه من قبل...
عرف خليفه من الاصوات انه حصه محد...وحمد ربه على هالشي لانه مب مستعد يشوفها الحين جدام الكل..
خليفه: السلام عليكم...
نورة: هلا خليفه وعليكم السلاااااااااام..الحمد لله عالسلامه..
خليفه: الله يسلمج يارب..شحالج نوره..؟؟
نورة: بخير الله يسلمك شحالك انته خليفه...
خليفه: الحمد لله ..
دخل خليفه ورا عبدالله وقعد على كرسي بعيد شوي لانه يعرف انه اهله يبون يقعدون عداله اكيد... دش حمدان وويهه معتفس..
حمدان: اشوف الكل مطقعني اليوم مسويلي طاف...
عبدالله: عن البخل ياحمدان.. طول غيابنا وانته عاطينك ويه ..
نورة: هههههههه شحالك حمدان..؟
حمدان: بخير بخير..روحي لصقي في خوج...
نورة: هههههه عيل تتحسب مابلصق...اسميني الا بلصق..
ظحك عبدالله ويت نوره وقعدت عداله.. والعيوز من الطرف الثاني.. وعدالها ناصر.. وخليفه وحمدان يالسين عدال بعض مجابلين.. يسولفون وياخذون علوم بعض...بعد شوي نش خليفه وحمدان ومروا على ميره فبيتها يسلمون عليها عقب روحوا بيتهم... واول ما طلعوا صد عبدالله صوب نوره وقال..
عبدالله: وين حصيص مايت تسلم..؟؟؟؟
نورة: احين بزقرها..
نقزت عنود وركضت فوق...ودقت على حصه اللي كانت منسدحه عالشبريه ودخلت عليها..
نورة: انزلي يالله...عبود تحت...
اعتدلت حصه في قعدتها ..
حصه: راح خليفه..!!!..
نورة: هي روح...يالله انزلي عبدالله يتخبر عنج...؟
خلتها نوره وردت تحجز مكانها عدال اخوووها... نشت حصه وبدلت ثيابها ولمت شعرها... ولبست شيله بيظا..ونزلت.. دخلت الصاله..
حصه: السسسلام عليكم...هلا والله بالغالي...
نش عبدالله ...
عبدالله: مرحباااا ملايييين بحصيص...تتغلين علينا تترييين زقره عشان تين تسلمين..؟؟
ابتسمت حصه ووايهت اخووها ..
حصه: حرام عليك كنت تعبانه يايه من الدوام...حمدلله عالسلامه عبادي...
عبدالله: الله يسلمج..شحالج حصيص...
حصه: بخير الله يعافيك والله تولهنا عليك...
عبدالله: قسم بالله انا اكثر...بس خلاص ماشي سفر توووووبه اسافر مره ثانيه...
ام خالد: شحقه مانزلتي تسلمين على ولد عمج.؟؟؟ تلقينه حط فخاطره...
تشتت تفكير حصه يوم ذكرت امها خليفه... وخصوصا بانه يمكن انه حط فخاطره...مهما كان شعورها تجاه خليفه والعصبيه اللي تحسبها صوبه..ماتباه يحط فخاطره عليها...
حصه: ماعليه امايه بسلم عليه غير المره...عبدالله راوني شهادتك...
نوره: هي والله...وينها...
عبدالله: في الملف والله والملف في الشنطه..عقب براويكن اياها...
صد صوب امه وقال..
عبدالله: اماااايه خلص قسمي.؟
ام خالد: هي نعم خلص بس باقي المكتب قلنا ما بناثثه لين ما تي انته وتشوف اللي تبغيه...
عبدالله: زين زين قومي راويني...
نشوا كلهم وركبوا ويا عبدالله فوق لقسمه.. ودخلوا الصاله وغرفة النوم والحمام وشاف كل شي وعيبه واااااااايد.. والمكتب قال ارووحه بياثثه مع عنود...وبيشوف شو مناسب..

في بيت محمد الكتبي... كانت ام سلطان وعنود يترين خليفه يوصل...واول ماوصل سون انقضاض عليه... خصوصا عنود وهي تدري باخوها الفتره الاخيره انظرب ظربتين قواااي...اولهم خطوبه حصه..وثاني شي وفاة سيف فغيابه...وان شاء الله انه بينسى كل شي الحين وبيرجع خليفه الاولي... وصلوا اخوانه وابوه بعد شوي وسلموا عليه ويلسوا معاه ساعه ساعتين ..عقب راح يتسبح ويرتاح في غرفته... وهو يفكر من الحين بالوقت اللي بيسير فيه بيت عمه وبيشوف حصه... شو بيقولها؟؟ كيف بيتصرف..؟؟ كان مرتبك وهو يدرك انه بعده يحبها ويمووت فيها بعد.. بس كان متردد من كل شي...لين الحين هو مب عارف كيف كانت طبيعه علاقة حصه بسيف..وكيف حالها الحين...تغيرت او لا.... الله يستر بس...
حمدان بعد صلاة العصر اتصل بربيعه اللي يسموونه الشبيه..راشد..
راشد: آلووو مرحبا...
حمدان: هلاااا والله رشووود...شحالك.؟
راشد: بخير الحمد لله....علوومك ؟
حمدان: تمام...وين انته..؟؟
راشد: في البيت توني ناش من الرقاد...
حمدان: فاظي.؟؟؟
راشد: هي ماعندي شي...بتي.؟؟
حمدان: انا عدال بيتكم احين...
راشد: حياك الله...
سكر عنه حمدان وبعد خمس دقايق وصل بيت راشد...دخل الميلس اللي كان له باب من برااا...وسلم على راشد اللي كان يالس اروحه...
وبعد ماقعدوا..اطالع حمدان راشد باستغراب..
حمدان: بلاك مويم..؟؟؟
راشد: مااااشي..وانته بلاك مستانس.؟؟
حمدان: قبل شوي يايب خلوف وعبدالله ولد عمي من المطااااار..واحين هو في البيت..
راشد: لا والله..؟؟؟ تستاهل سلامتهم..بنسير نسلم عليه عيل عقب في الليل..
حمدان: تمام... بس قولي انته شفيك مب عوايدك تكون هادي جذي.؟
راشد: مايحق للواحد يظايق شوي يعني..؟؟؟
حمدان: شو مستوي عليك تظايق..؟ ارمس..!!!
راشد: ماااااااااشي...قم خلنا نطلع...
حمدان: مابطلع اول ارمس..
تم راشد ساكت...مب عارف يخبره بسالفه الموظفه اللي عايبتنه واللي حطمت آماله اليوم او لا...؟!..
حمدان: حلفت عليك ياترمس....
راشد: ماحلفت...
حمدان: والله ترمس...احين حلفت...
راشد: اووففف.. انزين انزين...همممم..كانت بنت عايبتني في الدوام من فتره كم اسبوع..هي تتنقب..وانا فكرت جديا اني اخطبها.. ويوم تعصصصرت وبالعافيه سالتها عن وضعها كيف مخطوبه والا لا..تخيل شو قالت لي..؟؟
حمدان: شو قالت..؟؟
راشد: قالت انا ارمله .وطلعني من بالك لاني مافكر بالزواج...
تم حمدان ساكت يتفكر بهالحظ النحس....
راشد: الواحد مايتخيل ولو للحظه بانها كانت متزوجه لانها صغيره..يمكن كبري او اصغر بسنه جي..
كان راشد اكبر من حمدان بسنتين... بس وايد متعلقين ببعض..
حمدان: هذا حظك بعد شو تسوي..انته ماحبيتها..
راشد: ماحبيتها لكن كانت فخاطري صدق... يعني يكفي اني فكرت فيها بشكل جدي وبغيت اخطبها...
حمدان: ربك كريم...البنات وايد والله....انزين انته عندك بنات وايد من هلك ليش ماتاخذ وحده منهن..؟؟
راشد: ماااريد اخذ من هلي...كل حد بيزعل بيقول شحقه ماخطب من عندنا...بطقع فيهم كلهم وبخذ من برااا خلهم يتظاربون رواحهم...
عايله راشد مافيها شباب وايد..اكثر شي فيها بنات.. حتى هو نفسه عنده خوات وايد... واخو واحد متزوج.. وفي هاللحظه كانت مريم اخت راشد اللي اصغر منه بسنتين لاصقه في الدريشه... مريم هذي تدرس في الجامعه... وتعرف حمدان بحكم انه ربيع اخوها العزيز...ودايما ايي بيتهم...واليوم بالصدفه سمعت اخوها يرمس وياه وفهمت من كلامه انه حمداان بييهم...ومريم يعيبها تراقب حمدان...ما تنكر انه يجنن طويل وعريض ورحيييم...وكان لافت انتباهها من سنين...بس هو مايدري حتى بوجوودها...وتموت من الظحك يوم يدخل حمدان يسلم على ام راشد ويقعد ينكت ويسولف وياها وكانت دخلاته ناادره......وايد كانت تستانس عليه...والحين واقفه عند الدريشه تترياه يطلع عشان تشوفه.... ويوم شافته قعدت تناقز وعيونها بتطلع من الدريشه...ويوم ركب سيارته الرنج وروح سكرت الستاره وصدت على وراها وتساندت على الدريشه وعلى ويهها نظرات حالمه..يتها اختها حنان اللي اصغر منها في ثاني ثانوي تقولها..
حنان: والله لو تشوفج امايه بتكفخج..انتي ماتيوزين.؟
مريم: آآآآآخ يخبلبي شكله وحركاته ياحنون... لو شفتيه توه وهو يظحك ويعطي رشود طراق..
وعظت على شفايفها مستانسه من الذكرى...
حنان: والله هو مب داري حتى انج موجوده في هالدنيا...
مريم: ادري..بس مصيره بيدري صدقيني...
حنان: والله انج خبله...

في بيت حمد الكتبي...الساعه 8 في الليل..اتصل عبدالله بخليفه بعد ما بدلوا بطاقاتهم مال التيلفون ببطاقاتهم الاولية مالت الامارات...وتخبره وين هوو...طلع خليفه في البيت وتوه قايم من الرقاد... قاله عبدالله انه بيييه البيت وبيسلم على الاهل وعنود....وسكر عنه... دخل تسبح وتلبس وتكشخ وشل اغراضه وطلع من الغرفه..يوم نزل تحت شاف ابوه يالس وماد ريله وتهمزه نوره وحصه يالسه عداله وحرمه ناصر حمده وعيالها...
سلم عليهم بشكل خطاااافي وقالهم انه بيسير بيت عمه...وطلع...يوم وصل بيت عمه حصل حمدان وربيعه راشد وخليفه وحميد يالسين في الميلس..
عبدالله: السسسسلام عليكم ...
الكل: وعليكم السلااااام والرحمه..
سلم عبدالله على حميد وعلى الباقين..ويلس...
حميد: هاااااااا ولد العم...شو الهبّااااات...
عبدالله: رقيييييييص الحمد لله...علومكم انتوا.؟
حميد: بخييييييير وسهاله...
راشد: شحالك عبدالله...؟؟؟
عبدالله: بخير الله يعافيك راشد شخبارك...؟؟
راشد: بنعمه...مبرووك التخرج..افتكيييتووا والله..
عبدالله: الله يبارك فيك..والله ياريال لاعت جبوودنا من بلاد الغربه...ماصدقنا نرد...
راشد: ومتى ناوي تعرس...؟؟
عبدالله: الود ودي باجر انا ههههههههه بس بعدنا بنتشاور ..مب مطول قريب...ان شاء الله..
خليفه: تبا تدخل تسلم عليهم انته..؟
عبدالله: هي والله..خبرتهم؟...
خليفه: هي قايللهم..يتريوونك..قم بوديك داخل لانه بنظهر عقب...تولهت عالحواطه...
نش خليفه مع عبدالله عشان يوديه يسلم عليهم داخل ..وقف عبدالله برا لين مايسويله خليفه درب ..لانه يخاف وحده من حريم العيال داخل...وعقب ردله ودخله على عمه وحرمته وسلم عليهم..ويلس وياهم ياخذ علومهم..عقب دخلوووه الميلس الصغير مال الحريم وخلوه ارووحه يتريا عنووود...وماطولت ..وبسبب غيابه الطويل كانت مستحيه مووووت منه...ويالله يالله تجدمت صوووبه ومدت ايدها تسلم عليه...
عبدالله: هلا والله بعنوووووودي انا....
عنود: هلا عبدالله...الحمد لله عالسلامه...
عبدالله: الله يسلمج غناتي..استريحي...
كان بعده ماسك ايدها ومب طايع يفجها..وهي منزله راسها ومبتسمه..يلست عالكرسي ويلس عدالها يتامل فويهها..
عبدالله: احلويتي والا هذا المستحى والا يتراوالي..؟!
عنود: يتراوالك....
عبدالله: الا حلويتي...شخبارج عنودي..؟
عنود: الحمد لله عبدالله شحالك انته.؟؟
عبدالله: متوله عشووفتج والله...
عنود: ههههههه والله حتى انا...
عبدالله: مبين تراه...اشوفج اطالعين ريووولج وايد معجبه فيها....
عنود: هههههههه حرام عليك..(رفعت عينها له)..بيظييت ويا راسك..
عبدالله: بس بعدني اسمر عنج..
عنود: رد اسمر مثل قبل...احلى...
عبدالله: ههههههه اظمني هالشي لاني متوله عالبر والقنص..وبسود مب الا بسمر..بييج صخامه...

وكملوا سوالفهم لين نص ساعه...وبعدها حشره خليفه عشان يبا يطلع..وطلعوا هو وخليفه وحمدان وراشد وياهم يتحوطوووون في الاماكن المعتاده.... في سياره عبدالله كان خليفه راكب وياه وقاله..
خليفه: تراني ماسلمت لا على عمي ولا على خالد..
ابتسم عبدالله ابتسامه شيطانيه...
عبدالله: ولا على حصه بعد...
التفت له خليفه بسرعه منصدم من اللي قاله عبدالله...وكالعاده فز قلبه بطاري حصه... رد صد خليفه صوب الدريشه وتم ساكت....
عبدالله: خلوف...قولي الصدق انا اخوك...انته بعدك تباها؟..
سكت خليفه شوي...
خليفه: ليش متى وقفت عن هالشي.؟؟...بس ماظني ترظى فيني احين عبود..
عبدالله: الحين لا... لكن عقب فتره..... يوم بتتعود عليك من اول ويديد... والله ياخلوف بعدني اذكر شكلها يوم كنت ابا اراويها شكل سيف الله يرحمه...في كيمره الفيديو..كنت انته عدال سيف...قتلها هذا هو..صدت عليه وفعيونها تعبير غريب..قالت لي هذا خليفه..!!!.. مادري حسيت صدق انها مب شايفه غيرك ساعتها..وما تنلام تراك ولد عمها وطول عمرها تسمع انك بتاخذها.. وحصه مب من النوع اللي بيبين مشاعره..

خليفه كان مب في حاله وقت ماكان عبدالله يتكلم...تنفسه سريع وقلبه بيطلع من حلجه...لاول مره حد يقوله بان حصه كانت تفكر فيه قبل ماتنخطب...مب الا تفكر فيه..كانت تكن له مشاعر وتتوقعه هو ..خليفه..زوج المستقبل...ياربي..بموت...عيل ليش وافقت على سيف الله يرحمه..ليش مريت بكل هالعذاب..؟؟؟
خليفه: عبدالله..دخيلك لا تعطيني امل عشان ما انحبط عقب...خل الامور على حالها واللي يصير يصير..
عبدالله: لا تفكر باني بخليها تاخذ حد غيرك... غصبن عليها مابتاخذ الا ولد عمها...
خليفه: تخسي انك تغصبها علي انته بعد..قصووورك...لا ابوي.. اذا ما اقتنعت هي نفسها فيني يعني ماشي عرس...بعدين لحظه..انا اليوم واصل وانته ترمسني عن العرس..!! خلني اشتغل اول عقب يصير خير..
ضحك عليه عبدالله ومسح على لحيته وهو يقول..
عبدالله:هاااا..وعلى هاللحيه ياولد عمي... حصيص مابتاخذ غيرك...
ابتسم خليفه وارتفعت معنوياته للسما وهو يفكر بحصه وبانها بتوافق عليه... بس يوم ذكر سيف...اختفت الابتسامه عن ويهه....مهما كانت نيته طيبه وسليمه يتم يحس نفسه يخون ربيعه...شو الحل...شو الحل انزين...بنت عمي..احبها واباها على سنه الله ورسوله انا ماغلطت..ومب ذنبي انه ربيعي خطبها قبلي وتوفى...
قاطعة عبدالله وهو يقوله..
عبدالله: يالله وصلنا انزل...
نزلوا كلهم القهوة الشعبيه مع قوم حمدان ويلسوا يسولفون لين 11..وعقب رد كل حد بيته...

بالباجر الضحى نش خليفه من الرقاد...تسبح ونزل تحت ماحصل غير عنود يالسه تقرا الجريده..
عنود: هلا وغلاا باخوووويه الغالي..تعال استريح تريق...
تجدم خليفه وهو يحج راسه...ويلس عدالها...
خليفه: اشوفج يالسه ارووحج..!!
عنود: هي..ابويه من الصبح سار الشركه ويا سلطان..حميد في الدوام..وامي سارت العزبه تقول بتيب ذبايح.. وحريم العيال كل وحده فبيتها...وحمدان راقد...
خليفه: صبيلي شاهي.. اووف والله تولهت على شاهي البيت...والبلاليط...
صبت له عنود شاهي وقربت له الريوق..
عنود: تريق انزين..فيه العافيه...
خليفه: الله يعافيج..
قعد خليفه يتريق وهو من مب قادر يشل من باله فكره ان حصه كانت تفكر فيه هو قبل ما تنخطب...اسميك ماعينت خير ياعبدالله يوم خبرتني بهالشي... حتى الرقاد ما رمت اتهنى فيه...رفع عينه من طرف الكوب صوب عنود يفكر يسالها عن حصه..عقب تردد...عقب رد فكر فيها مره ثانيه..شوفيها اذا سالت عن بنت عمي..؟؟ ترا عنود تدري اني ابغيها من قبل...احم..حط الكوب من ايده..
خليفه: عنوود...
رفعت راسها عن الجريده...
عنود: عيون عنووود ...
خليفه: ياسلااام هالتدليع الا حتى اني توني ياي من السفر والاعقب اسبوع بيطقعون فيني..
عنود: هههههههههه افا عليك والله ...حرااام اني طول سفرتك اتفداك ودومك اغلى واحد عندي..
ابتسم خليفه وحمد ربه انه عنده اخت مثل عنود..
خليفه: تسلمين والله..اقول عنود اباج فكلمه راس..
بان على ويه عنود الاهتمام...
عنود: اسمعك...
خليفه: بس ما تطلع هالرمسه عند حد...
عنود: اكييييييييييد.....
خليفه: احم..ابا اسالج عن حصه...
ابتسمت عنود...
عنود: شو بلاها بنت العم..؟؟
خليفه: ابا اعرف كيف كانت علاقتها بسيف..
خفت ابتسامه عنود شوي...

انشالله اكمل فيوم ثاني

السلام عليكم .........
الحين بكمل.......

عنود: اهااا... الله يسلمك اول شي رفضته..كانت يعني رافضه أي اتصال لها وياه..ماكانت تباتملج..لكن اعتقد غصبوها عالملجه ووافقت..عقب رفضت تشوفه او تكلمه..تمت قافله تيلفونها اللي طرشه لها المرحوم اسبوع رافضه تكلمه..عقب الكل اجبرها تكلمه حتى انها اتصلت بعبدالله في امريكا تشاوره وقال نفس الكلام..واستسلمت وكلمته ..عقب فتره قالولها بيي يسلم عليج ورفضت بعد..لكنهم نفس الشي ضغطوا عليها..يعني كانت ترفض في كل مرحله وهم يضغطون عليها وتستلم... بس عقب ما تم اييها ويكلمها شوي شوي تعودت عليه..ومثلها مثل أي بنت اعتبرته زوجها وتعلقت به..يعني باختصار وبحكم انه ريلها حبته... كثرة الدق تفج اللحام ياخوي..
تاثر خليفه باللي سمعه...يالله ياحبه لهالبنت...كانت رافضه سيف من البدايه ..والله يسامحهم قوم عمي يوم انهم ضغطوا عليها...وما تنلام يوم حبت سيف...سيف ينحب ريال محترم وحشيم وشخصيته حلوه..
خليفه: كيف كانت ردت فعلها يوم توفى سيف .؟!
هزت حصه راسها باسف ماتبا تذكر هذيج الفتره من حياة حصه...
عنود: وصلها الخبر عن طريق اخته الصغيره..قالت لها بس سوا حادث..وطاحت حصه مغمى عليها في نفس ليلة خطبة نوره لسعيد ولد خالها...المهم يوم حصلتها نوره وفاطمه نششنها وحصه تمت تصيح وايد..وغصبتهم يودونها المستشفى تشوفه..وكان في العنايه ساعتها...المهم سارت هي وناصر وامها..ودخلت عليه وشافته..تقولي كان وايد متعور..وقالت لي بعد انه مارمسها..بس ابتسم لها ابتسامه صغيره ودمعت عيونه...
سكتت عنود ماسكتنها العبره...حتى خليفه حرقته عيونه وهو يتخيل الموقف...ليش دمعت عيون سيف..!! كان حاس انه بيموت..؟؟؟ وبيخلي حصه بروحها ..!!
عقد حياته يبا يطلع الشعور اللي يحس فيه من قلبه...
خليفه: وبعدين.؟؟
عنود:.....تمت في المستشفى ..دخلوا سيف العمليات ويوم طلع الدكتور قالهم انه توفى...كانت ردة فعل حصه غريبه...الكل يصيح حتى اللي ماله خص في سيف صاح...ماعدى حصه..نشت وقالت لاهلها ابا اشوف عمتي..ام سيف اللي هي كانت بعد مرقده في المستشفى من سمعت بخبر الحادث لانها طاحت عليهم بعد...المهم سارت ويلست عندها ساعه ساعتين عقب ردت البيت محبوسه في حجرتها..ماتسوي شي غير الصلاة والقرايه...وخذتلها شهر يمكن او اكثر مانزلت ولا دمعه عليه...الكل حاول وياها انها اطلع الحزن والكبت بس هي تقول مب قادره...
عقد خليفه حياته زياده...مب مصدق بان حصه تقدر تحب شخص لهالدرجه..لدرجه انها يوم فقدته من خسارتها الكبيره وبالالم اللي تحس فيه ماقدرت تصيحه...!!!..معقوووله..؟
خليفه: لهالدرجه..؟!
عنود: كلنا ما توقعنا ان حصه تكون تعلقت بسيف لهالدرجه...لكن هذا اللي صار..وما انفجت هالعقده الا يوم صحت ام سيف ويت زارتها في البيت وقعدت وياها في الغرفه حوالي ساعه..والحمد لله قدرت اطلع حصه من الحاله اللي هي فيها..لكن عاد من عقب ذاك اليوم وهي كل ليله تصيح..بس الحين احسن بوااااااايد عن قبل...خصوصا يوم اشتغلت بدت تشغل بالها باشياء ثانيه...
خليفه: شوووووووووووو..؟.؟؟؟
استغربت عنود...
عنود: شوو؟..
خليفه: حصه اشتغلت..؟؟؟ وييين ومتىى..؟؟
عنود: تقريبا من بدت الاجازه..شهر جي...اشتغلت في الاتصالات...
خليفه: في الاتصالات عاااد..؟؟؟
عنود: ليش شوفيها..؟؟
خليفه: كيف خلوها قوم عمي...؟؟ الاتصالات معروفه فيها اختلاط بين الموظفين...
كان خليفه مشتط مب راضي بان حصه حبيبته وبنت عمه تشتغل في هالمكان...
عنود: خلوها عشان تغير نفسيتها شوي وترتاح..وفعلا الشغل اثر على نفسيتها بشكل ايجابي...على الاقل احين حصه تظحك وتسووولف ويانا ..
سكت خليفه وماقال شي ..يفكر بالاشياء الواايده اللي عرفها ...وطلع بشي واحد مهم اكثر من غيره... حصه كانت تحب سيف وااايد...والدرب جدام خليفه متروس شوك وعثرات...مستحيل حصه تتقبله بهالسهوله..
عنود: خليفه.... بتخطب حصه.؟
خليفه: ماعرف...شكلها تحب المرحوم وايد ماظني ترظى فيني...
عقدت عنود حياتها...
عنود: البنت مهما كانت ظروفها مصيرها فبيت ريلها..وانته ياخلوف ان خليت حد ياخذ حصه عنك ياويلك تسمعني...لا تقعد بليد جذي ماعرف وماعرف ..تحرك...اكسبها اذا كنت تباها صدق...
صدت عنه عنود معصبه وفتحت الجريده وكملت قرايه وتقوله بشكل غير مباشر ان النقاش انتهى وما بترمس وياه...ابتسم خليفه على عنود...هي وريلها نفس الشي ..مايتفاهمون...سكت عنها وكمل ريوقه وهو يفكر جديا بانه يقدم اوراقه للشغل في الاتصالات...لغرض في نفس يعقوب...

في بيت حمد الكتبي...وبعد الغدا..كلهم متيمعين ويالسين ويسولفون وعبدالله بينهم مستوي نجم الحفل...وفي نص السوالف صد عبدالله صوب نوره وقالها فجاه..
عبدالله: انتي وين ريلج..؟؟
نورة: احم..حاليا في لبنان..
عبدالله: اوه اوه..الحبيب مطيح فلبنان...؟؟؟
نورة: وشو معناة هالنظرة..؟؟
عبدالله: معناتها ان انتي واايد واثقه يعني..؟!
وظحك عليها...وانقهرت نوره..كلهم يبون يمشكلون بينها وبين سعيد..كلهم يغايظونها..شو سالفتهم يعني..؟!
نورة: انته ساير امريكا عيل مره وحده وقاعد هناك سنين ماشكينا فيك..!!!
عبدالله: انا ساير دراسه وبعدين عندي عرب هني ...
نورة: وحتى هو عنده عرب هني انزين...بعدين بيرجع بعد يومين ان شاء الله...
خالد: وانتي شدراج بهالعلوم كلها..؟!..
زاغت نوووره..
نورة: توصلني الاخبار...
خالد: من عند منو.؟
نورة: من عند فطيم...
خالد: اهاااا...
حصه: اخبرك اخوويه صبع ريلي الصغير مكسور اباك تسويله اشعه...
عبدالله: ههههههههه عنلااااتج يالحماره..احين دارس 5 سنين وتعبان اخر شي ايي افحص صبعج الصغير...مايرزى...
ام خالد: احين عاد الكل بيطلع فيه عوق وبييك يباك تفحصه...
عبدالله: شوشعورج امايه وولدج دكتور...
ناصر: يالخقاق..عندها ولد مهندس بعد شو يعني..!!!
خالد: افااااااااااا يعني حتى اني ماكملت دراستي ما ارفع راس حد..؟ ماسك منصب تراني...
عبدالله: محد قالك شي بروحك ترمس...
ام خالد: والله كلكم ترفعون الراس عيالي..
تقرب عبدالله وباس امه على خدها..
عبدالله: نرفع الراس لانج انتي امنا..والشايب ابووونا..
ام خالد: فديتك يالغالي...حبتك العافيه..
عبدالله: حصيص صدق صبعج يعورج.؟؟
حصه: هي والله ظربت به على حد الكرسي...
عبدالله: اووف...هاتي اشوف...
مدت ريلها وهو مد ايده وهوس على صبعها الصغير شوي شوي...
حصه: آآآآي...اقولك يعورني...
عبدالله: هممم...مب مكسور الا ظربتي عالعظم وانفج...مع الوقت بيصح..
ام خالد: قلت لها بحط لها بحط لج كركم وملح ماطاااااااعت....
عبدالله: سمعي كلام العيوز....
حصه: مااااابا...صبعي بيتم مصفر من الكركم..
نورة: واااابوي عليج...
خالد: انا بقوم اسير ارقد عنكم....
ام خالد: وانا بعد بسير...

شوي شوي انسحبوا كلهم لحجرهم ..ماعدى حصه ونوره تمن قاعدات في الصاله...


-------------------------

الجزء الرابع والاربعين..

العصر قرر خليفه انه يمر على بيت عمه ..وما اتصل بعبدالله عشان مايسير ويقول لحصه تندس..لانه يبا يسلم عليها خلاص مايقدر يصبر...تلبس وتسفر وتعطر وخذ بوكه ونظاراته الشمسيه والمفاتيح والتيلفون ونزل تحت..حصل حمدان يتعلج و يتسفر جدام المنظرة اللي عدال الباب الرئيسي....
حمدان: وين بتسير.؟؟
خليفه: بسير اسلم على عمي..وانته.؟؟
حمدان: انا بسير الشركه...
خليفه: شعندك فيها.؟
حمدان: اداوم فيها مسائي تراني...
خليفه: لا والله.؟؟...لالا زين زين...يالله فمان الله
خطف عنه خليفه وركب سيارته وسار بيت عمه...ويوم وصل لاحظ ان سيايير الكل موجوده الا ناصر..اللي على الارجح انه في طريقه للشركه الحين...وقف سيارته ونزل.. ساير صوب البيت على طول...
حصه ونوره وبو خالد وام خالد كانوا كلهم في الصاله يالسين يتقهويوون...
ام خالد: حصه امايه قومي قطعي فواكه من المطبخ وهاتيهن لابوج...
حصه: ان شاء الله...
نشت حصه وشلت الصحن اللي كان موجود وياها..ويوم خطفت عدال الدريشه صوب المطبخ التفتت بشكل لا ارادي لبرااا...بطلت عيونها...وشافت خليفه يمشي صوب البيت ولابس نظاراته الشمسيه.. تم قلبها يدق بقوو ..وطاح الصحن من ايدها..وهي واقفه مكانها..وهالشي خلا الكل يصد صوبها..
بو خالد: وابوي..!!..شو بلاج.؟
صدت حصه بسرعه صوبهم وهي تتظاهر بالهدوء..
حصه: هااا..!!..لالا ماشي.. ظربتني دوره بس...
نزلت وشلت الصحن وطلعت من الصاله وسكرت الباب وراها... وعدلت حجابها..ياويلي..احين خليفه بيدش...ياويلي...وليش انا متوتره هالكثر...؟!!..الا خليفه....
هدت نفسها ولبست نعالها وطلعت من البيت....وتجابلت وجها لوجه مع خليفه....
خليفه كان يمشي ببطء صوب بيت عمه..متردد..وخايف من اللي بيي...كان همّه يشوف حصه اكثر عن انه يشوف عمه وخالد عشان يسلم عليهم....ياترى شو بتسوي يوم بتشوفني..؟؟ لا يكون بتتذكر سيف لاني كنت ربيعه..؟!!..والا بتكرهني لاني ماييت اخطبها قبل سيف...؟؟؟...اوووف ياربي شو هالافكار...
ويوم رفع راسه وقف مكانه....يالله يا قوة تفكيري..مادريت انها بتيبها لين عندي....!!..نقز قلبه ومسكته رجفه من راسه لين ريوله...وكان مستانس انه بعده لابس النظارات عشان ماتشوف تعبير عيونه والا بتخاف وبتشرد...كانت اطالعه بفضول..وبتعبير غريب..خوف..والا اهتمام..والا تردد..مب عارف بالضبط..

نورة ما مرت عليها جذبه حصه بانها مسكتها دوره...راحت للدريشه اطالع شو شافت برااا..وشافت حصه وخليفه متجابلين ولا واحد منهم يرمس...وقعدت تراقب الوضع باهتمام....

حصه ماعرفت ليش لسانها انشل مره وحده ..ماقدرت تحركه ولا ترمس...بس ليش هي اللي ترمس.؟!..هو اللي ياي وهو المفروض يتكلم اول....لاحظت انه ماسك سويجه بعصبيه...كل شوي يهوس عالمفاتيح بقووو..كأنه يتعمد يعور نفسه...
خليفه حس انه مصخها بهالوقفه بلا رمسه...تحرك وهو واقف في مكانه وتلفت شوي وتحنحن..
خليفه: احمم..السلام عليج حصه...
يالله ياحصه..سنه...سنه مرت وسوت فينا العجب...اخر مره شفتج كنتي تظحكين مستانسه بتوديعي..والحين حتى ما ابتسمتيلي يوم رديت..؟!!..
حصه: وعليك السلام خليفه....الحمد لله عالسلامه...ومبروك التخرج..
مسك خليفه نظاراته وعقهن...خلها تشوف تعبير عيونه يمكن تحس شوي...ردة الفعل كانت ابتسامه واسعه من حصه...شو يعني..؟!..ما ارتحتي وظحكتي الا يوم شفتي عيوني.؟!..والا عيبها التعبير اللي فيهن...؟!
خليفه: الله يسلمج ويبارك فيج حصه...شخبارج؟
وابتسم لها...وحصه بهتت شوي...طول عمرها هالابتسامه تيبلها اضطراب معوي...ولين الحين..
حصه: الحمد لله بخير..شحالك انته؟
خليفه: بنعمه ... همممم...عمي داخل؟
حصه: هي نعم يالس في الصاله ويا امايه ونوره..اقرب..
وشافها تتحرك صوب المطبخ...
خليفه: قريب..بس انتي وين سايره؟
حصه: بسير المطبخ وبرد...
مشت حصه صوب المطبخ..وخليفه يتبعها بنظره..عقب دخل داخل البيت...وهو يهوّد ..
ابتعدت نوره عن الدريشه بسرعه وهي تبتسم....نوره عندها خبره واسعه في الحب والكلام بالعيون...وخليفه منعفس فوق تحت بحب حصيص.وهي متاكده من هالشي... ردت مكانها ويلست...
خليفه: هووووووود...
نقزت ام خالد..
ام خالد: هدااااا...يامرحبااا اقرب ابووويه...
دخل خليفه الصاله ..ونش بو خالد وام خالد يسلمون عليه..ونوره تمت يالسه مكانها بعيد..
خليفه: السسسسسلام عليكم...
بو خالد: وعليكم السلام والرحمه ..حيالله خلييييييفه...
خليفه: الله يحييك عمي... (وسلم عليه وباسه على راسه) ..وشحاااااالك؟
بو خالد: بخييير يعلك الخير شحالك انته؟
خليفه: بخير وعاااافيه..استريح عمي.... شحالج عموه.؟
ام خالد: بخير ابوويه ..ومن صووبك..؟
خليفه: مانشكي بااس... نوروه منزربه بعيد..شحالج.؟
نورة: بخيييير الحمد لله شحالك انته وشحال هلك ولد عمي..؟
عقد خليفه حياته...نوره تتبسم له بشكل غريب تقولون ماسكه عليه شي...
خليفه: بخير الحمد لله..
يلسوا كلهم عالارض ونوره نشت ولحقت اختها في المطبخ..وتم خليفه يشرب شاهي ويا عمه ويسولف وياه...
في المطبخ كان حصه مخليه الخدامه تقطع فواكه وهي قاعده تسوي كوكتيل على مزاجها...ومن صوت الخلاط ماسمعت نوره وهي يايه وراها...
نورة: بوووووووووووو...!!
نقزت حصه وصدت على ورا مبطله عيونها...
حصه: بسم الله منج.....روعتيني نورووه مافيج سنع...
ردت على الخلاط مشغوله بالكوكتيل... ولاحظت من طرف عينها نوره تتساند عدالها وتبتسم واطالع فويهها..
نورة: خليفه يا...
حصه: ادري تلاقيت وياه عند الباب...
نورة: اهاااا...عشان جي تسوين كوكتيل..؟!
حصه: هي وبعد لاني انا مشتهيتنه...
نورة: زين زين...
حصه: شو عندج انتي..؟؟؟ رمسي...
ظحكت نوره...
نورة: مااشي انتي ليش معصبه.؟!
حصه: اشوفج اطالعيني بنظرات..
نورة: الشي الحلو الناس تقعد اطالعه حبيبتي....
حصه: همممم..الحلوه عيونج ولو اني ادري ان هذا مب السبب...
نورة: بسالج سؤال...
حصه: تفضلي...
نورة: ليش طاح عنج الصحن في الصاله..
حصه: قتلكم مسكتني دووره فراسي...
نورة: مسكتج دوره والا لانج شفتي خليفه ياي من الدريشه..؟؟
التفتت حصه بسرعه صوب نوره....هذي ساحره ما تفوت عليها حركه...عقدت حياتها..
حصه: نوروه يوزي عن هالخريط...سيري ساعدي ليزا وقطعي وياها...الريال بيسير ونحن بعدنا مايبنا الفواله...
نورة: ان شاء الله عموه...

نزل عبدالله بعد ماصلى العصر فغرفته..والسفره معلقه على جتفه..دخل الصاله وحصل خليفه يالس ويا الشواب..
عبدالله: انته هنيي..؟؟؟؟
نش خليفه ووايه عبدالله...
عبدالله: يااااامرحبا...عيل ماخبرتني...
خليفه: ماكنت ادري انه لازم اخذ موعد منك...بيت عمي متى مابغيت ايي..والا شو رايج عموه.؟!
ام خالد: هي نعم... اكوووه حمدان متى مادقت فراسه يانا مايقطعنا فديته...
خليفه: سمعت.؟
عبدالله: انزين كلتوني...وين بتسير عقب.؟
ويلس عدال ولد عمه...
خليفه: ماقررت والله قلت بيي اسلم على عمي ...وعقب يصير خير..
في هاللحظه دخلت حصه شاله صينية العصير ووراها نوره شاله صحن الفواكه... عبدالله تحسف لانه باين ان السلام بين حصه وخليفه فااااااته...يالله ماعليه... تقربت حصه من خوها وحطت الصينيه عداله وصبت الكواب وخلت عبدالله يوزعهن ..ونوره حطت صحن الفواكه وطلعت من الصاله.... ولحقتها حصه لانها استحت تقعد وياهم اروحها....وسارن وقعدن في البلكونه جدام البيت...لانه الجو كان يشجع...يابن لهن كوكتيل من اللي مسوينه وقعدن يسولفن ويشربن...

في الصاله..عبدالله فتح موضوع عرسه... لانه صوت عنود لين الحين في باله يوم وعته من الرقاد من شوي...خبلتبه وهي ادلعه وكان وده يذبحها ساعتها...
عبدالله: ابويه متى بتسووون عرسي...؟!
بو خالد: اشتغل اول...
عبدالله: بسير بقدم بالسبت ان شاء الله...ويخسوون مايشغلوني...
بو خالد: انزين.. شهر 2 بنسوي عرسك....
عبدالله: يعني بعدنا شهر...
ام خالد: وابوي عليك...هبابنا نخلص في شهر...
عبدالله: احين انا مخلنكم من سنه شحقه ماتحركتوا وجهزتوا...
ام خالد: يابويه جهزنا ترانا ..الا الاشياء الظروريه للعرس يبالها وقت ..الخيام والمطابخ والفرق والمعازيم وباقي التجهيزات... جي اتحسب العرس لعبه..؟!!
خليفه: وانته ليش مستلغث جي عالعرس يمكن البنت ماخلصت تجهيزاتها...
عبدالله: امس اتخبرها قالت خلصت كل شي وماباقي غير فستان العرس وحجز الصالون والحنى...
خليفه: مظبط اموورك ويا هالراس....
عبدالله: الله واكبر من عينك يالحسود....
بو خالد: المهم انته لا تيس تسويلنا قرقره .. خلاص ان شاء الله بنشوف الموضوع وبعد شهر بنسوي عرسك ان شاء الله...
عبدالله: ان شااااااء الله... خلوف قم نطلع..بسسسسك من هالعصير ...
ام خالد: وابوي خل الريال يكمل عصيره صدق مافيك معنى...
عبدالله: مايبا مايبا.....قــــــــــــم....!!
خليفه: وين تبا؟؟
عبدالله: بعدين بقولك...
خليفه: لاحول ولا قوه الا بالله....شي فخاطرك عمي.؟؟
بو خالد: سلامتك...سلم على هلك..
خليفه: يوصل ان شاء الله...وانتي عموه؟
ام خالد: سلامتك يابويه ولا تقطعنا...
خليفه: من عيوني الثنتين...فمان الله...
طلع مع عبدالله اللي قاعد يتسفر بدون مايشوف المنظره...طلعوا برا البيت وسمعوا اصوات..صد عبدالله وخليفه صوب البلكونه وحصلوا البنات...سار عبدالله صوبهن وتبعه خليفه....وهن يوم شافوهم سكتوا..
عبدالله: شو ميلسنكن هني.؟؟
حصه: نشم هواااا...
عبدالله: تشمن هواا وانتن مجابلات الميلس..؟؟

نورة: روح عند الميلس وسو عمرك ظيف وداخل الميلس ..وصد صوبنا...ان شفتنا والا سمعتنا اعطيك اللي تبغيه..
تلفت عبدالله وفكر بكلامها وسكت...صدقها ماينشافن..لانه الزراعه مغطيه البلكونه وهن يالسات مب واقفات...وبعدين ربعهم كلهم يحشمون وما يتصددون يوم بيدخلون البيت...
عبدالله: عرسي عقب شهر ان شاء الله...
كانت حصه متوتره بسبب وقفة خليفه اللي قاعد يراقب والمشكله انها ماتعرفه وين يطالع..لانه تعمد يلبس نظاراته...
نورة: شووووووو عقب شهر مافصلنا شي... ولا ظبطنا امورنا...
عبدالله: هذا عرسي وعرس عنوودي مب عرسكن انتن تظبطن اموركن..
حصه: اوكي مشكور يعني ماتبانا نحظر عرسك..؟؟
عبدالله: والله كيفكن عاد المهم اعرس...
خليفه: افاااااااااا يا عبوود...اذا ماحظرن بنات عمي العرس تراه مب عرس...
نورة: اووه اوووه....امريكا تعلم الرومانسيه والكلام الحلو والله....تسلم ولد عمي..انا بحظر عرسك ومابحظر عرس عبدالله...
ظحك خليفه وحصه..
عبدالله: غصبن عنج بتحظرين عرس خليفه...
حصه: ليش يعني.؟؟
عبدالله: لانه بيكون وااجب عليها تحظر عرس خليفه عسب حرمته......
نورة فهمت ونقعت من الظحك...وخليفه توتر ويبا يدز عبدالله عشان يمشي ويروحوون قبل مايفظحه زياده...وحصه عقدت حياتها مب فاهمه...
حصه: شحقه اظحكين.؟
نورة:ههههههههههههاي..ماااااااااااااشي...
خليفه اطالع نوره بخوف...شكلها الا تدري باللي فخاطره....هالنوره هذي ساحره...
خليفه: يالله عبووود توك مستعيل عالطلعه...
عبدالله: انزين انزين...
ركب عبدالله مع خليفه وطلعوا...ونوره وحصه من الحين بدن النقاش كيف يسون فساتينهن وووين وشو الالوان ومن وين ياخذن القطع...بنات..شو وراهن..؟!

خليفه وعبدالله اول ماركبوا السياره...مد خليفه ايده وكفخ عبدالله...
خليفه: شو هالحركات انته..؟!..
عبدالله: شو سويت؟
خليفه: لا حاشاك ماسويت شي.... مفضوح...لو فهمت عليك احين؟
عبدالله: هههههه خلها تفهم وتحطه فبالها بعد ..احسن..
خليفه: غلطان..مب احسن...ممكن تخليني اتصرف بطريقتي وما تدخل في هالسالفه..؟!
عبدالله: جب...شفناها طريقتك من قبل...تميت فاج حلجك ولا سويت شي...
خليفه: قبل ماكان شي وقت..وما ادركت اني اباها الا قبل ما اسافر باسبوعين يمكن بس...
عبدالله: المهم وين تبانا نسير...
خليفه: ابا اسير بيت المرحوم..
استغرب عبدالله ..
عبدالله: ليش.؟!
خليفه: مادري..بس ابا اسير هناك اشوف البيت واسلم على خوانه وامه...الوصل زين..
عبدالله: على راحتك...
ساق عبدالله سيارته صوب بيت سيف المرحوم وهو ساكت.. ويوم وصلوا نزلوا ودخلوا الميلس..حصلوا اخو سيف اللي اصغر عنه ويا ربيعه..سلموا عليه وهم رحبوا بقوم خليفه وايد واستانسوا فيهم..وعقب يت العيووز ومن شافت خليفه دمعت عينها..لكنها مسكت نفسها وسلمت على خليفه وعبدالله شوي وراحت...وقوم خليفه اصلا ماطولوا...يلسوا حوالي ثلث ساعه ونشوا ...بس المهم ان خليفه ارتاح يوم سلم عليهم...كان يحس ان هالشي واجب عليه... ومب لانه سيف توفى يقطعهم كلهم...وهم ناس طيبين ويستحقون الوصل دوووم...

حصه ونوره تحاوطن بامهن بعد ماسار الشايب العزبه...
حصه: امااايه...صدق عرس عبدالله بعد شهر...
ام خالد: اخوكن محتشر يبا يعرس شو اسويبه..!!!
نورة: بس نحن ماجهزنا شي...
ام خالد: انزين...عندكن شهر اجهزن...
حصه: امايه..انتي فاهمه علينا...يبالنا سيره للشمال وباجر الاربعاء... خلينا نسير الشارجه بنشتري قطع وبنفصل مره وحده وبنرد...
ام خالد: ابا افهم انا ليش يعني لازم دبي..؟؟؟؟ شحقه ما تريحني وتفصلن في العين.؟
نورة: انزين امايه انتي ارتاحي هني نحن بنسير ويا عبدالله...
ام خالد: لا... جان بتسيرن بقعه انا بوديكن..
نورة: عيل باجر ..ماشي امايه السبت بيبدا الكورس ومافينا عقب على سيرات الشارجه ونحن نداوم..
ام خالد: لاااااااااااحول ولا قوة الا بالله.....بنشوف ابوكن شو بيقول...
تبسمن نوره وحصه وتبادلن النظرات الماكره...نشت حصه وراحت للتيلفون واتصلت بعنود..
عنود: مرحباااااااا الساع ببيت العم..
حصه: هلا والله عنوووود..شحالج؟
عنود: بخيييييييير وعافيه حبيبتي شحالج انتي؟
حصه: مرتبشين...شو شعورج وانتي عرسج بعد شهر؟
عنود: هههههههههههههه سواهاعباااادي...؟!..
حصه: سواها ونص..ونحن مرتبشين عسب الفساتين..وانتي؟؟ شو بتسوين؟
عنود: انا بعد بتلاحق عمري وبسير دبي والا بوظبي بشوف...
حصه: نحن يمكن باجر بنسير الشارجه.... مابتين؟
عنود: مب كل يوم العيد حبيبتي..مابيطيعون.. انا بشل امايه وبقول حق ميره تي ويانا..عندها خبره اختي بالاعراس هههههاي...
حصه: زين والله..انا ونوره قررنا نطقم....مايندرى بعليا بطقم ويانا والا لا..
عنود: حلوووو بتتميزن...فديتكن والله ما اتخيل اني انا ايلس على كرسي وانتن تحوطن حواليه...متعوده احوط وياكن في هالمناسبات...
حصه: هههههههههههههههه اتخيلج تنشين عن الكوشه وتوقفين عدالنا ههههههههه...
وتمن عنود وحصه يتخيلن الموقف ويظحكن سااااعه وكل شوي يزيدن موقف ويظحكن عليه...
عنود: اييييييييه...بسج عاد ياكثر ما نكتي على عرسي..بنشوفج عاد فعرسج شو بتسوين..؟!..
اختفت الظحكه عن ويه حصه فلحظه....عرسي..؟؟!!.. اي عرس ترا ريلي توفى..!!!..بس عرفت ان عنود قالت الكلمه بعفويه وماتقصد...فتصنعت المرح..
حصه: ههههه الله كريم... سمعي يبالنا يلسه جذي عشان نشوف اي فرقه نيب...وشو نسوي عالكوشه واي اغنية نزفج بها وسوالف وايده....
عنود: هي والله وايد اشياء يبالها تظبيط...مابيخلووني اييكم حصوووه انتي تعرفين...
حصه: خلاص بحاول اقنع امايه انها تودينا صوبكم...
عنود: ياريت والله...حاولي فيها...
حصه: ماعليج بقردنها..بخليج احينه وبدقلج عقب
عنود:اوكي حياتي...باي باي

اول ماسكرت دخلن ميره وحمده ويلسن عدال العيوز..وسارت حصه تقعد معاهم.. ونوره نشت ومسكت التيلفون وسارت شوي بعيد عنهم.. واتصلت على تيلفون فطيم...
فطوم: آلوو ؟!
نورة: سلاااااااااااااااااااااام...
فطوم: هلا والله وغلااااااااااااا وعليج السلام والرحمه..امممممممممممواح والله تولهت عليج...
نوره: ههههههههههه شو هذا خذتينا بمشراع وميداف...حتى انا والله تولهت عليج فطوم..شخبارج؟
فطوم: بخير فديتج شحالج انتي؟ وشحال اهلج كلهم.. مني ومنااااااااك.. قصار وطواااااااااال..شخبارهم كلهم؟
نورة: ههههههههههههههههههههه ملعونة الصير ادريبج شو تقصدين..لا تحاتين بخير وسهاله وما عليهم شر...
فطوم: هههههههه ياحيهم والله.....
نورة: عندي لج بشاااره...
فطووم: انا بعد...انا 2 مب وحده...
نورة: قولي انتي اول..
فطوم: رووحي لاه...انتي قولي...
نورة: عيل حتى انا عندي بشارتين... الاولى الله يسلمج ان عبدالله وخليفه يوا من السفر امس..
فطوم: والللللللله؟؟.. تستحقون سلامتهم..
نورة: الله يسلمج..هاتي انتي بشاره يالله قولي..
فطوم: الله يسلمج سعيد بعد بييي من السفر باجر ان شاء الله..
نورة: ادري..ماقلتي خبر يديد...
فطوم: اووووووه نسينا نحن سالفه الايميلات...توصلها العلوم قبلنا...
نورة: هههههه عيل شو اتحسبين..انا وريلي نواكب العصر...
فطوم: ههههههه مالت عليكم...انزين وشو البشاره الثانيه؟
نورة: عرس عبدالله بعد شهر...
فطوم: والله..؟؟؟ شوووووووفي الصدف عرس شويخ بعد 3 اسابيع...سابقينكم يعني..
نورة: والله..؟؟؟؟ ونااااااااااسه...
فطوم: هي بس يخساره مابكون موجوده اساعد في التجهيزات...
نورة: بتكونين عندنا تساعدينا في التجهيزات...
فطوم: هي والله صدقج اعوض فعرسكم ههههههههههاي....
نورة: ههههه..سمعي..احتمال نيكم باجر...وترانا في الرده بنشلج ويانا...خلاص الدوام بالسبت ..
فطوم: تمااااااااااااااام...اكيد يعني انكم بتون؟
نورة: لا مب اكيد..برد أأكد لج عقب..بس اعطيج خبر مسبق عشان تستعدون لاستقبالنا...
فطوم: والله مب قاعدين نستعد لاستقبال الشيخ زايد فديته ..الا نوره طويله اللسان...
نورة: عنلاااااااتج يالهرمه...بسير اقول لامي بننزل ففندق مابنيكم...
فطوم: هههههههه افا عليج والله...انتي واهلج كلهم فعيووووني...
نورة: هي هي..ماخووذ خيره هالكلام...المهم انتي فصلتي لعرس اختج؟
فطوم: هي من اول مايييت الشارجه فصلت...
نورة: عندج كاتلوجات يديده؟
فطوم: هممممممممم... هي يايبه 2 من عند خوله...
حاست نوره بوزها من طاري خوله....
نورة: متى بتعرس بنت خالتج؟
فطوم: ههههههههه آآخ يالكره ..يصل الينا عبر اسلاك الهاتف ياسبحان الله يالتكنولوجيا...ههههههههههه..الله يسلمج مطوله شوي...يمكن في الصيف...
نورة: المهم تكون كاتلوجات حلوه..
فطوم: الا اجنن..تعالي وشوفي بس...
نورة: تمام لا تردينهن..ولا تقوليلها بعد ان نحن اللي نبغيهن...انزين؟؟
فطوم: امبوني مابردهن الحين اطمني...
نورة: حلو... خلاص بخليج احينه ولا تنسين ادخنين حجره سعوودي وتبدلين الفراش وتعطرينه قبل ما ايي تسمعين.؟؟

فطوم: يالله يالله يالله....لا توصين حريص...
نورة: تمام عيل فطامي...تبيني اسلم على حد معين؟؟
فطوم: هههههههههه لا...روحي ولّي انتي وهم...
نورة: ههههههههههه بقولهم ترا..
فطوم: بزواااااااااالج...
نورة: هههههههه ياويلي عليهم انا اثرهم يخوفوووووون...طلعوا مب هينين عيل..
فطوم: لا يخوفون ولا شي بس حفاظا على المشاعر...
نورة: ياويلي انا...يحافظون على مشاعرهم بعد.؟؟!
فطوم: يووووووه انتي ماينعرفلج راس من ساس....روحي روحي..
نورة: هههههههههههههههه الا انتي اللي مب عارفه تغطين على عمرج.. خلاص بخليج الحينه واذا بنيكم بتصلج وبخبرج..
فطوم: حلوو ياحلو..سلمي..
نورة: يوصل..فمان الله
فطوم: مع السلامه...

سكرت نوره عن فطوم وردت تقعد مع باقي الحريم...

في الليل واول ماخلص حمدان دوامه ..طلع وراح على طووول لبيت عمه...وقف سيارته وسار الميلس...ماحصل حد يالس ..رد طلع وراح البيت على طول.. هـوّد ودخل الصاله حصل عمه يالس ووياه حصه..
حمدان: السسسسسسسلام عليكم...
بو خالد: مرررررحبا الساع...وعليكم السلام..
سلم حمدان على عمه...ويلس عداله..
حمدان: شحااااالك عمي..شو امسيت.؟!..
بو خالد: بخيير شحالك انته؟
حمدان: الحمد لله...بنعمه...شحالج حصيص...
حصه: الحمد لله زيييينه...توك طالع من الدوام؟
حمدان: هي والله..وين نوروه عيل؟
حصه: سارت تحط لابويه عشاه...
حمدان: ما عليج امر سيري قوليلها تاخر وتزيد العشا لانه توني متصل بعبدالله ..وقال انه ياي هو وخليفه بيتعشون هني..
حصه: اووكي..
نشت حصه وهي تفكيرها شااارد...خليفه بيي وبيتعشى هني...خليفه بيي بعد شوي... يوووه انا شو ابابه يا والا سار..برايه.... سارت المطبخ عند نوره وقالت لها على اللي صار...وزيدن العشا ورتبنه ...ووصلوا خليفه وعبدالله ودخلوا البيت...ونوره وحصه دخلن وراهم ويلسن فالصاله الصغيره الثانيه..وخلن الباب مفتوح..والبشكاره دخلت العشا وتعشوا الرياييل وخلصت ام خالد سبوحها ويت قعدت عندهم..
..وبعد ساعه سار الشايب يرقد عنهم وتموا هم الثلاث
البنات ملن من القعده بروحهن وبعد تشاور طويل نشن ودخلن الصاله ويلسن عدال امهن...
نورة: شحالك حمدااااااااان....
حمدان: بخير بنت عمي...شحالج انتي..
نورة: تماااااااااام ...
حصه: امايه شاورتي ابووويه..؟
ام خالد: هي..باجر بيودينا عبدالله...
نقز عبدالله من يلسته...
عبدالله: شووووو..؟ انتي ماقلتي من قبل ان انا اللي بوديكم اتحسب الدريول...
ام خالد: لو نحن بنسير وبنرد رواحنا ماعليه بنسير ويا الدريول..لكن بنيب بنت خالك ويانا (هني حمدان اللي فز وانتبه بكل حواسه لكلام حرمه عمه).. وانا ما بفر حد من البنات ورا في الدبه وانا والباقيات يالسات في السيت الوراني عسب الدريول مركب جدام...
عبدالله: مافهمت...
نورة: فديت امي مستويه عبقرينوو ....امي قصدها ان يوم انته بتسوقبنا بنوفر كرسي ..هي بتقعد عدالك ونحن الثلاث ورا..اما اذا ساقبنا الدريول محد منا يروم يقعد جدام عداله.. وبنحتاج كرسي زياده عشان فطيم والا عشان وحده منا ادوور ورا.. يعني باختصار ماشي مكان...

عبدالله: هممممممممممممم...انزين ماعليه لاني ماسلمت على عليا لين الحين..
حصه: عنود بعد تبا تسير دبي..
عبدالله: والله.؟؟...
وصد صوب خليفه يطالعه بنظره....
خليفه: لا اطالعني..مابوديها انا...
عبدالله: بتخليني ارووحي ويا الحرمات.؟؟
نوره: سعيد بيكون موجوود... بيرد باجر من السفر...
عقد عبدالله حياته واطالعها باستغراب..
عبدالله: وكااااله سي ان ان ..مب نوره...!!..
نورة: اهب ..الله واكبر من عينك...
حمدان: انا بودي عنود دبي جان تبا...
الكل اطالع حمدان باستغراب من هالعرض الكريم... ماعدى نوره وحصه اطالعنه بمكر وماسكات ظحكتهن...يدرن هالرحله والتعب مب بلاش...يبا يسير يشوف فطيم...
حصه: مايندرابها عاد تبا تسير دبي والا بوظبي..
حمدان: لالالالالالالالا ماشي بوظبي..دبي...تبا تسير بوديها باجر والا كيفها عاد...
نورة: امااايه صدق...كلمت فطيييم اليوم...هي تسلم عليكم كلكم..(وسوت حركه خفيفه بايدها تقصد بها حمدان اللي ابتسم مستااانس ومتشقق)..انزين وتقول انه عرس شيخه بعد ثلاث اسابيع..
ام خالد: ماشاء الله...
عبدالله: يالله يسابقونا هل دبي.... مالجين وراي وبيعرسون قبلي...
ام خالد: الله يوفقهم ويوفقك ياولدي...
الكل: آمين...
حصه: حليلها شيخه..عيل بتم فطيم فويه المدفع...( واطالعت حمدان بنص عين).. مايندرابها يخلونها المعاريس تكمل دراسه والا لا...؟!
عقد حمدان حياته ..وتم يطالع فويه حصه كانه مايطالعها..يفكر بكلامها...ومستهم....وعلى طوول ياه صداع... وشكله كسر خاطر نوره...
نوره: لالالا فطيم قايله لي بتكمل دراسه ..ومابتعرس الا جان ياها معرس من العين وخلاها تكمل..
تعمدت تقول هالكلام عشان تريح حمدان شوي..وفعلا تحركت شفايف حمدان بابتسامه مكبوته وهو يسمع كلام نوره ويطالع الارض تحته...
ام خالد: امايه نوره..قومي قولي للبشكاره تحط عشا الحريم..ماتعشينا نحن...
نورة: ان شاء الله..
سارت نوره المطبخ من صوب..ونشوا حمدان وخليفه وعبدالله من صوب ثاني عشان يسيرون الميلس ويخلون الحريم براحتهن...

------------------------------------

الجزء الخامس والاربعون

يوم الاربعاء وبعد الغدا على طول..ركب عبدالله سيارته الستيشن السودا وركبت العيوز عداله والبنات ورا...ومسكوا خط دبي... وعبدالله ملعوز امه.كل شوي يحط لها شريط "ام علايه" ..وكل ماتسمعه اطلع الشريط وتفره من الدريشه... وهم ميتين من الظحك عليها..لين ماوصلوا الشارجه كانت فاره 4 او 5 اشرطه... وهو في الدرب اتصل بحمدان...
حمدان: مررررررحبا...
عبدالله: هلا حمدان...شحالك؟
حمدان: بخير ولد عمي شحالك انت.؟
عبدالله: منيييييييح....هااا متى بتطلعون؟؟
حمدان: باجر الصبح ان شاء الله...
عبدالله: ليش مب اليوووم؟؟؟
حمدان: انتوا بتسيرون السوق اليوم؟؟؟؟
عبدالله: مادريبهن والله.... (صد على امه) امايه متى بتسيرون السوق انتوا؟
ام خالد: باجر الصبح...
رد عبدالله يتكلم في التيلفون..
عبدالله: خلاص ترتوب تعالوا باجر..اتصلبي يوم بتوصلون عشان نوديهن رباعه السوق...
حمدان: يصير خير...
عبدالله: لا مب يصير خير اتصلبي ...
حمدان: ان شاء الله عمي...
عبدالله: يالله برااااايك نحن وصلنا البيت..فمان الله
حمدان: الله يحفظك...

سكر عنه حمدان وهو حاااااااااااااسدنه من الخااااااااااطر لانه في بيت فطيم....
هل عبدالله دخلوا البيت ..ودخل هو الميلس.. وبعد شوي يت عليا اللي مارامت تصبر عن تشوف اخوها..وراحت على طول الميلس..ويوم دخلت..
عليا: وااااي فدييييييييييييت هالشوووووف انا يعلني ماخلى...
نش عبدالله يوم شافها وهو يظحك...
عبدالله: مرحبااااااا ملاااااااااايييييييين ولا يسدن في ذمتيه...
لوت عليا على اخووها وباسته على خده..وقفط عبدالله من هالحركه ...بس ظحك بعد..
عبدالله: حبتج العاااااااافيه الغاليه...شحالج؟
عليا: بخير فديتك ..استريح...(ويلسوا)..شحالك انته وشو علووومك..؟
عبدالله: بخير وعافيه الغاليه..شحاله فيصل؟
عليا: يناخر...
عبدالله: هههههه حليله.. سيري وعييه الحين بيأذن العصر..
عليا: احين بسير اوعيه...وبرجع لا تتحرك..
طلعت عليا ودخلت البيت خمس دقايق وردت لعبدالله وهي ماسكه علبه صغيره..يلست عداله وابتسمت..
عليا: هذي هدية تخرجك...
عبدالله: ياسلاااااااااااااااام...ليش عبلتي على عمرج..؟؟
عليا: افا عليك بس...شي بسيط والله..
عبدالله: تسلمييين اختااااااااااااه انتي الوحيده اللي افتكرت تيبلي هدية تخرج..
عليا: عشان تعرف انا غير..
عبدالله: هههههههه من يوم يومج غير....
فتح العلبه وشاف قلم...صغير حجما بس شكله والنقوش اللي عليه روعه..وكان واضح انه مطلي بذهب...قعد عبدالله يجلبه بين صبوعه يفصفص فيه...
عبدالله: صصصصصراحه فنان....مشكووووره والله....
عليا: العفوو..عاد يوم تشتغل دكتور..وتلبس اللاب كووت هذا..اباك تحطه هني في جيبك تتخقق به..احيدهم الدكاتره ما ايوزون عن قلامتهم....
عبدالله: ههههههههههههههه متخيله الموقف انتي هااااا...ان شاء الله من عيووووني ومابتسخدم قلم غيره بعد...

دخل فيصل في هاللحظه.. وسلم على عبدالله ويلس وياه لين ما أذن العصر..طلعوا ثنيناتهم وتلاقوا ويا الشايب هلال في الدرب وسلم عليه عبدالله..وساروا رباعه المسيد...وردت عليا داخل البيت عند باقي الحريم...ماعدى نوره وفطيم ماكانن موجوداات...
في غرفه فطيم...
نورة: ايييييييه فطوم...متى بيي سعووودي؟؟؟
فطوم: طيارته توصل المغرب ان شاء الله....
نورة: واااي فديته متولهه عليه..
فطوم: ياوييييييلي انا...بيستانس يوم بيي وبيحصلج جدامه تصدقين..؟!..
نورة: هههههههه هي بينصدم....تعااااااااالي..قولي منو بيلحقنا هني باجر..؟؟؟
وغمزت لفطوم...وفطوم فجت حلجها..
فطوم: لاااااااااااااااااه..؟!!
نورة: هيييي نعم...
فطوم: شوو ايييبه..؟؟؟؟
نورة: ياختي قال ماروم اصبر عن فطيم ماشووفها الا اخر الاسبوع..بسير هناك بشوفها...
ظربتها فطيم على ايدها ...
فطوم: يالله عاد قولي الصدق...
نورة: هههههه...بييب عنوود..ويمكن امه بعد..عشان ادور لها فستان للعرس....
فطوم: وناااااااااسه عيل....
نورة: مسكين حمدان يكسر الخاطر..امس غلست عليه حصه..قالت احين شيخه بتعرس وبتم فطيم فويه المدفع...والخطاطيب مابيخلونها تكمل دراسه....لو شفتي كيف ويهه اعتفس وتم موييييييييييييم...كسر خااااااااااطري قتله لالا فطيم بتكمل دراااسه ومابتعرس هههههههه...
ابتسمت فطيم بشكل غريب...
فطيم: الله كريم...
انصدمت نوره..
نورة: بلاج؟؟..بذبحج ان قلتيلي حد ياي يخطب من الحين....
فطوم: لالالالالا...محد يا...بس اخافه يصير صدق...وتعرفين انا بعيده عن البيت هالفتره..ولا ادري باللي يستوي..اخافهم يتفقون رواحهم واخر شي يخبروني ويحطوني في الامر الواقع..
نورة: لاااااااالالالالالا..خالي صح مايتفاهم بس متحضر ومابيغصبج على شي ومستحيل يجرب بناااس مايشاورج فيهم اول...اطمني..
فطوم: ان شاااء الله يا نوووره...بعدين انا بعدني صغيره عالعرس..مافيني..
نورة: فطيم بسالج سؤال صريح...اجاوبيني بهي او لا..
فطوم: سالي..
نورة: انتي احين تحبين حمدان والا لا..؟؟؟؟
سكتت فطيم وهي قافطه..
فطوم: ياختي مادري..ولد عمج هذا يربكني...مره ودّي اذبحه من الخاطر واحس اني اكره كره...واحيانا...غير... احن عليه... اتأثر من اي شي يسويه...انتبه لوجووده بشكل غريب..ولا تفكرين انه شكله الخارجي هذا اللي متخبلات عليه انتن ماثر عليه..لاني شفت رياييل احلى ..انا الشكل مب هامني... اللي مخبلبي حركاته وتصرفاته...خصوصا نظراته اللي ماتعرفين لها شو تبا....
ظحكت نوره..
نورة: هههههههههه انا قلت هي والا لا... مب خطاب..
ابتسمت فطيم بعد...
فطوم: هو شو يقولكم..؟؟
نورة: حمدان يحبج وايد بس ما يبا يعترف و ياخذ الموضوع بجدية الحين لانه يشوف نفسه صغير عالعرس والالتزام..على الاقل يبا يتخرج وتستقر اموووره بعدين ياخذ المووضوع بجديه ويخطبج على طول..
فطوم: اووف..قالج كل هذا.؟؟؟
نورة: لا بس انا اعرفه... ومتاكده انه هذا اللي يفكر فيه...
فطوم: وبشو تنصحيني ؟ كيف اتصرف..
نورة: خلي الامور على حالها...اتصرفي بطبيعيه وياه...يعني لا انج ادسين مشاعرج ولا اطلعينها وتخلينها واضحه...يعني مثل ماهو يربكج انتي بعد خربطيله امووره ههههههههه...
فطوم: ههههههههههه والله انج انتي خرااااااااااااااب... اصلا المفروض ما اطلع جدامه حمدان هذا..
نورة: يووووه دخيلج لا تردين على هالموضوع... احين انتي غبتي 3 اسابيع تام هو مب في حاله شقايل لو ماتظهرين له موليه ..بيتخبل علينا...
فطوم: ههههههه عاد لا تبالغين..اللي يقول متولع فيني... احس به دوم يستخف بي اصلا...
نورة: ههههههههههههههههه هذي طريقه حمدان في الحب...
فطوم: امحق طريييييييقه...امممره لا تخلونه يحب دام جي...
نورة: حليله والله..المهم قومي خلينا نصلي وننزل تحت...احين بيطرشون الدوريه تييبنا...

في الصاله... كان ام خالد تخبر ام فيصل وعليا بانه ام سلطان وبنتها وحمدان..بيووون باجر الشارجه عشان يدورون فستان عرس لعنووود...
ام فيصل: لا والله..؟؟ عيل ماشي تراهم معزومين عندنا باجر عالغدا...
ام خالد: والله مايندرابهم اخافهم يخلصون اشغالهم ويردون سيده العين..!!
ام فيصل: لالالا..مااااااشي.. خبروهم وقولولهم تراهم معزومين..يالله بالستر من زمان ماشفناهم ...بعد مايخلصون اشغالهم بييون بيتغدون وبيرتاحون...وعقب على راحتهم عاده...يبون يباتون حياهم الله ..
ام خالد: ان شاء الله بنقولهم..لكن ماظني يباتون...ام سلطان ماتصبر عن بيتها...
ام فيصل: هي وحليلها..والا ماشاء الله عرسهم عقب عرس شيخه بشوي؟؟
ام خالد: باذن الله..باسبوع والا اسبوعين ...
ام فيصل: ماشاء الله... الله يوفقهم ان شاء الله...
كانت ام فيصل خاطرها تسال متى بيسوون عرس ولدها سعيد..لكن بما ان نوره باقلها اربع شهووور لين تتخرج..فبتصبر لين ما تخلص يمكن الله اييسر امورهم...وبعدين تخاف تحرج حصه بالكلام بدون قصد..فاحسن لها اتم ساكته...
الساعه خمس العصر ..طلعت ام خالد مع ام فيصل وعليا يسلمون على عرب يقربون لهم في الشارجه...وعبدالله وفيصل طلعوا يتحوطون في دبي شوي. اما الشايب هلال راح يقضي كم شغله..والبنات شيخه وحصه وفطوم ونوره ومنى ومنال تيمعن في الحوش ويلسن يسولفن ويخربطن..لين ما اذن المغرب..وحزت ماكانن بينشن يصلن..انفتح الباب مال البيت ودخل منه سعيد شال شنطته وياه..نوره على طول وقف قلبها ورفعت ايدها تغطي بها حلجها...متفاجأه بانه يا الحين..جنها الا طيارته جدمت شوي... سعيد رفع عينه ويوم شاف لمه بنات وايد نزل راسه على طول...ما انتبه انهن بنات عمته...تحسبهن بنات غرب... ترابعن منى ومنال يسلمن على اخوهن وعقبهن فطوم وشويخ..
شيخه: الحمد لله عالسلاااااامه...
سعيد: الله يسلمج يارب شحالكم؟
شيخه: بخير وعافيه والله شحالك انته؟
سعيد: بخير وعافيه ارقص...
فطوم: ههههههههههه لا لا تفضح عمرك وترقص...
سعيد: منو عندكن..؟؟
فطوم: وابوي؟؟ خطيبتك واختها المصون...بنات عمتك هذيلا...
تغيرت ملامح سعيد وعلى طول رفع راسه صوب نوره..كان مستانس من الخاطر...سحب نفس طوييييييييييل وعقب ابتسم ابتسامه شاقه الويه..
سعيد: نواااااااااااااااري....!!!
كان متوله عليها من الخاطر.... ابتسمت له نوره ابتسامه حلللوه..وغمازاتها اللي تخبلبه طلعت كالعاده..
نورة: هلااااااا سعيييييييييد..الحمد لله عالسلامه...
مشى صوبها ولابس كل اللي حواليه...
سعيد: الله يسلمك من الشر يارب...شحالج؟
قال الكلمه الاخيره بصوت واطي مثل الهمس وتعبير ويهه رهييييييييب... كانه قاعد يدلع ياهل..
قفطت نوره وحمر ويهها...
نورة: بخير شحالك انته؟ وشوووو لبنان؟؟؟
سعيد: هههههههههه.زينه... (صد صوب حصه)..شحالج حصه؟؟؟
حصه: بخير الله يعافيك سعيد شحالك؟
سعيد: بخير وعافيه والله...ياحيالله البناااااااااات...روحن روحن صلن...
سوا حركه بايده كانه يروغ الهوش....
فطوم: وانته بعد سير صل...
سعيد: مصلي جمع انا....
فطوم: انزين نوره بعد بتسير تصلي...
سعيد: نوره بتقعد شوي...ذلفي فطووووووووم....
تظاحكن البنات عليه وخلنه بروحه شوي ويا نوره...
سعيد: شحالج غناتي؟؟ قسم بالله تولهت عليج من الخااااااااااطر....
نورة: احم...حتى انا...
ابتسم سعيد...وهو يتامل فويه نوره شوي...
سعيد: منو يابكم؟؟
نورة: ماجيكت الايميل من يومين؟
سعيد: لا والله ماشفته...
نورة: ترا عبدالله وخليفه ردوا من السفر..وهو يايبنا....وعرسه بعد عرس اختك باسبوع او اسبوع ونص جي...
سعيد: والله..؟؟؟؟ ماشاء الله تطورات...عيل وينه هو؟
نورة: طلع هو وفيصل...
سعيد: اهااا... وانتي يايه الشارجه تستقبليني؟؟
نورة: هذا السبب الخفي..السبب الظاهري انه يايين نشتري ونفصل حق عرس عبدالله...
سعيد: خلي عنج...هذا السبب الوحيد اصلا...
نورة: حرااااااااام عليك والله اني احاسب على وصولك من متى تخبر فطيم حتى...
سعيد: مابتخبر حد...
نورة: سعوووووووووود...
سعيد: اول سلمي علي مثل الناس....
نورة: وابوي عليك..سلمت تراني..
سعيد: امحق...شفتي خواتي كيف سلمن عليه؟؟ اللي تلوي واللي تبوس واللي توايه...
نورة: ههههههههه هذيلا خواتك...
سعيد: وانتي حرمتي...يالله وايهيني....
نورة: ههههههههههههههههههه روح عني..والله ماوايهتك... بسير اصلي انا عن هالمنكر..
سعيد: هههههههه ماعليه انزين جان ماطفرتبج عقب العرس...
مشى وياها داخل البيت..
نورة: يعني شو بتسوي..؟؟؟
سعيد: بخليج تسلمين عليه كل ما اسير وارد.. ومب مواااايه يكون فعلمج..سلااااااام غيييييييييييير....
ماتت نوره من الظحك...
نورة: ييييييييييييه...!!!..اشوفك اطييفست يوم سرت لبنان...!!
سعيد: يالله عاد مايخصها لبنان...هالافكار من سنين...
ظحكت نوره وسكتت..ويوم وصلوا الطابق الفوقاني...
سعيد: نواري...
نورة: عنونها...
سعيد: تسلملي هالعيون والله..بتمون لين الجمعه؟؟؟
نورة: ان شاء الله...
سعيد: حلوو...يايبلج هدايا بسيطه بعطيج اياهن...
ابتسمت نوره..
نورة: انا قايلتلك لا تخسر عمرك..
سعيد: ماخسرت عمري انزين....بس قتلج اشياء بسيطه تذكارات من كل مكان يعني..
نورة: مشكوووووووووور سعيد..
سعيد: العفو... برايج سيري صلي انا بدخل حجرتي اتسبح...
نورة: تمااااااام...

تفارقوا في الممر دخلت نوره حجره فطوم اللي كانت تصلي..ودخل سعيد حجرته ...
بعد صلاة المغرب رجعن البنات ويلسن في الصاله.. وسعيد رز بويهه وياهن.. بس بعد شوي اتصل بعبدالله يسلم عليه ويشوفه وين..وبعد ماخلص طلع من البيت وسار صوب قوم عبدالله وفيصل.. وقبل مايطلع تلاقى ويا قوم امه يايااات..سلم عليهن وطلع وهن دخلن.... مر الوقت وخذتهم السوالف..بس بعد العشا ..يابت فطوم الكاتلوجات وقعدن كلهن يطالعن ويتناقشن عالموديلات...وبما انهن بيطقمن...تلعوزن وايد عشان يتفقن على موديل ..يعني عليا انسانه متزوجه وماينفعلها اي موديل...وفنفس الوقت البنات ماتنفعلهن موديلات رسمية وايد ماتظهر شبابهن...واخر شي اتفقن على موديل بسيط مش رسمي لكن بدون تكلف كان ناعم جدا ويناسب كل الاعمار...احين ماشي تام غير يحصلن قطعه ناعمه ومناسبه...

الصبح الساعه 8 وعوا البنات كلهن لانهن كانن سهرانات... نشت نوره وتسبحت وصلت الصبح ولبست عباتها والشيله ونزلت تحت...ووقفت عند الباب متردده..شافت في الصاله امها وام فيصل..وعبدالله وسعيد يالسين يتريقون وحصه وعليا يالسات عالكراسي متجهزات للطلعه..
شافتها امها متردده عسب سعيد موجود..هي اصلا ماتمانع لكن تخاف تحصل لها هزبه...بس امها قالت..
ام خالد: تعالي تعالي...لا تستحين.. تعالي تريقي..
استغربت نوره...شو هالتغييييير والتطور..؟!... يالله ..بركه...
دخلت نوره وهي قافطه من عيونها الميفنه...اكيد سعيد يظحك عليها..وفعلا يوم رفعت عينها اطالعه بدون قصد شافت عيونه اطالعها بنظره تظحك.....
نورة: صباح الخير...
وايهت امها وام فيصل..
الكل: صباح النوووور....
نورة: وين خالي فديته...؟
ام فيصل: خالج سار البحر...
نورة: حافظ عليه...
ام خالد: يلسي تريقي عشان تروحن السوق وتخلصن اشغالكن..
نورة: جي انتي مابتسيرين ويانا؟؟
ام خالد: لا بتسير وياكن عليا..انا بظهر ويا عمتج ام فيصل..
نورة: ترتيب...
يلست نوره عدال اخوها عشان تتريق.. وكانت الدلال محطوطه عدال سعيد.. وهي اطالعهن مستحيه تطلب منه يصب لها...بس هو من نفسه قال..
سعيد: تبين حليب.. والا نسكافي؟؟
ابتسمت نوره على طريقه سعيد في الكلام... عاد اونه يتصرف بطبيعيه...
نورة: ابا حليب بس حطلي فيه شووووووويه نسكافي...
سعيد:افا عليج بس...كم نوره عندنا ..؟ من عيوني...
كان يتكلم بصوت واطي محد يسمعه غير نوره وعبدالله... عبدالله عقد حياته ومد ايده وكفخ سعيد علىجتفه...
عبدالله: لا اطيح الميانه وايد....!!
ظحك سعيد وصب لنوره الحليب..
ام خالد: شعندك على ولد خالك..؟!
عبدالله: يااااا ألله تحطم عاد هو يوم انا كفخته هالكفخه... لقطوا لقطوا قطع الغيار ماله ...
سكتت عنه العيوز..طويل لسان ماتروم عليه.... سعيد مسك كووب نوره بكل صبوعه..ومد ايده بالكوب صوبها...اي حركه ممكن تسويها نوره عشان تمسك الكووب شي اكيد 100% انه بتلمس ايد سعيد.. وهو متعمد يسوي هالحركه...ويوم مدت ايدها تاخذ الكوب..سبقها عبدالله اللي انتبه...وخذ الكوب من ايده..
عبدالله: هات هات.... مب علينا هالحركات....مسوينها قبلك...
خذ الكوب وعطاه اخته...الي قفط ويهها وسعيد نقع من الظحك...
سعيد: هههههههههههههههههههه عنلات بليسك واقف فحلجي اشوفك...
ظحك عبدالله..
عبدالله: مابتقص عليه انا....

المهم الجماعه كملوا ريوقهم وطلعوا..وسعيد طلع بعد يقضي كم شغله اهملها في غيابه..
وبعد ساعتين من الدواره في المحلات ..اتفقن كلهن على قطعه ورديه فاتحه...كانت منااااسبه وايد للموديل اللي اختارنه..ويوم خلصن من القطع راحن يدورن نعلان مناسبه للون..وطبعا خذن كلهن نفس الشكل...بس بمقاسات مختلفه...يلسهن عبدالله فمقهى فاظي...واتصل بحمدان..
حمدان: آلوو....
عبدالله: هلا حمدان..وين انتووووا؟؟؟؟ احين الساعه 11....
حمدان: تونا واصلين دبي...انته وين؟
عبدالله: انا في السيتي سنتر ويا البنات...
حمدان: احين بنمر عليكم..اذا كنتوا فوق انزلوا عيوزنا ماتروم عالدري المتحرك...
عبدالله: هههههههه انزين بننزل بعد شوي..انته يوم توصل اتصل..
حمدان: تمام...باي
سكر حمدان ..وسار صوب السيتي... يوم وصل ماطاعت العيوز تنزل..لانه عنود قالت انهم مالهم حاااايه في السيتي سنتر هي بتروح مكان مختلف..قالت لهم ينزلون يسلمون عليهم ويشوفون شو بيسوون احين ويردون..
حمدان: خلاص بنزل انا وانتن تريني..
عنود: لالا بنزل انابعد...
حمدان: ويـــــــــــــن تبــيـــــــــــــن؟؟؟؟؟؟ مالج حايه..
عنود: لي حاايه... بنزل وياك...
حمدان: خراااااطه انتي....
نزل حمدان ويا عنود...ودخلوا السيتي وبعد شوي تلاقوا ويا قوم عبدالله..وبعد السلامات....
عبدالله: احين وين بتسيرون... نحن خلصنا...
عنود: انا ميييره وربيعاتي عطني اسماء مخازن تاجر الفساتين وكتبتهن فورقه....بس عاد ما ادلهن وين...
عليا: اشوف عطيني....
فتشن عنود فشنطتها وطلعت ورقه صغيره وعطتها عليا...
وقعدت عليا ادلي حمدان اماكن المخازن ...وهو يحفظ...وعنود تحفظ وياه..
حمدان: خلاص عيل تمام...
عليا: تراكم كلكم معزومين عالغدا عندنا اليوم..خبر خالوه انزين...
حمدان: بطيع هزرج؟؟
عليا: وابوي؟ حد يرد العزيمه..؟؟ بعدين انتوا اصلامابتخلصون شغلكم قبل الغدا..مستحيل تحصلون فستان مناسب بهالسرعه..
حمدان: همممم..خلاص تمام بنقوولها...
عبدالله: ادل البيت انته؟؟ تعرف تي بروحك..
حمدان قال بحماااااس...
حمدان: نعاااااااااااااام اني ادله... بنيكم اول مانخلص ان شاء الله..
عبدالله: حلوو... عنوودي ماتبيني انا اوديج تنقين الفستان...؟!
وظحك..
عنود: انته الوحيد اللي ماباك تشوفه اصلا.....
عبدالله: افااااااا....ليش؟
عنود: ماشي..تشوفه في ليله العرس بس....
عبدالله: هههههههه انزين... بس ياويلج ان عقيتي الغشوه.... مقلّع وااايد ترا هني....
عنود: لا توصي حريص....اقول عبدالله ممكن طلب...؟
عبدالله: بس طلب..؟؟ آآآآآآآمري...
عنود: مايامر عليك عدووو...احم...أبا حصه...
عبدالله: شو تبينها..؟؟
عنود: اباها تسير وياي....اناماعرف اختار شي بدونها...
نورة: ياويلي عالحب انا...
حصه: هههههههههههه...اخاف امي تعصب...
عبدالله: صدقها امي بتعصب...
عنود: يالله انا قايله لعموووه قبل اني ماعرف اختار شي بلا حصيص....مابتعصب بردها لكم...
عبدالله: هممممممممممم...اوكي...
عنود: حلوووووووو..(وسحبت حصه لعداالها) ...مشكووور والله...
حمدان: احين هذي حايتج اللي نازله عشانها.؟؟؟
عنود: ههههههههههههه هي هذي حايتي...
عليا: خلاص عيل سيروا انتوا..ولا تبطون عالغدا..بنترياكم في البيت...
حمدان: اووكي..يالله جدامي...الله يعيني عليكن...
ظحكن البنات حصه وعنود وطلعن للسياره..وعليا ونوره طلعن مع عبدالله وروحوا البيت...

وبعد ساعتين من الدواره في هالمخازن والتفصفيص في فساتين الاعراس..ماحصلت عنود شي يعيبها..كانت تبا شي غريب .شي ماكد شافوه الناس..اللي شافته لين الحين كله تقليدي.. المهم ياسوا من المحاوله الحين وقرروا يروحون بيت هلال السويدي يتغدون ويرتاحون والعصر بيرجعون للسوق مره ثانيه...حمدان كان متحمس لهاللحظه...مع انه يدري صعب انه يشوفها..الاجان صدفه.. بس ماعليه على الاقل بيكون قريب منها..في بيتها..ويااااسلاااااااااااام بترد العين باجر...متى بييي باجر.؟؟؟؟

----------------------------

الجزء السادس والاربعون

وصلوا قوم حمدان بيت هلال السويدي... وتموا مترددين بالنزله ومستحين...لين ما حشرهم حمدان وحصه...ونزلوا... دخلت حصه تشوف اذا فيه حد قاعد في الحوش من البنات وبغا حمدان يكفخها على هالحركه..ويقول في خاطره خليهن في الحوش برااااااااايهن....انتي شو خصج..؟!..
المهم يوم تاكدت من انه محد في الحوش دخلت ودخلوا الباقي وراها دخل حمدان الميلس على طول وحصل هناك الشباب كلهم والشايب وياهم...وسلم عليهم ويلس عندهم..اما حصه وعنود وام سلطان رحبت بهم ام فيصل من عند الباب ووياها عليا...وقربوبهم في الصاله وين كانن يالسات باقي الحريم.. ولان ام فيصل كانت مشغوله بالسوالف مع ام سلطان وام خالد..قالت للبنات يرتبن الغدا في المطعم اللي عدال الميلس للرياييل.. نشت فطيم ونشت نوره معاها بعد مااصرت على شيخه تقعد .. وان نوره مب غريبه... سارن المطبخ وشلت فطيم سماط..(فراش) للاكل وقالت للخدامه تغرف الغدا وقعدت نوره تخلط السلطه وتتبلها.. راحت فطوم تتاكد من نظافة المطعم وترتيبه..وشاله السماط وياها..فجت باب وتسمرت مكانها..واول شي سوته تراجعت..لانها شافت ريال قاعد يصلي في المطعم....وعاطنها ظهره.. لكنها تمت واقفه لانها شكت بالطووول. .بالتسفيره...بالكتوووف.. ياويلي....!!!...حمدان...!!!... ياويلي عليك من متىىىىىىى ماشفتك.. تمت فطيم مبتسمه وواقفه مكانها وخايفه حد يشوفها..بس يالله دام انه يصلي مابيشوفني ولا بينتبه...دخلت تتختـّــل... وفرشت السماط... وطلعت سايره صوب المطبخ...
فطوم: نورووه...نورووووووووه....!!!
نورة: هاااااااااااا..؟!
فطوم: ياويلي...حمدان يصلي في المطعم...
ابتسمت نوره..
نورة: واللــــــــــه..؟!!!..ياحليله ولد عمي.. شافج؟؟
فطوم: لا اقوولج كان يصلي....
نورة: انزين شوفيها عادي سلمي عليه....
فطوم: مارووووم...
نورة: انتي احين بتاخرينا وبتسويلنا سالفه...شلي صينية الماي والعصير يالله وديهن هناك..
فطيم: ليش انتي ماتودينهن؟؟
نورة: انا في ايدي السلطه تشوفيني.. والبشكاره تغرف...رووووحي خلصينا...
فطوم: يووووه...
نورة: تلقينه خلص صلاة وروح وانتي يالسه تتحرقصين هني...
شلت فطوم صينية الماي والعصير والاكواب وراحت... ويوم كانت بتدخل طلع حمدان فويهها...شهقت وتراجعت على ورا واهتزت الصينية في ايدها...وكانت بطيح..لولا ان حمدان مد ايده ومسك الصينية وثبتها بين ايدها لين ما تتوازن...
حمدان: ايه الخبله.....اثقلي شوي مب شايفه ملك الموت انتي جدامج...
فطوم: وانته الصادق...شايفه حمدان..
حمدان: شيخج حمداااااااان...ولا تخليني اجب جيك العصير هذا كله فوق راسج..
ظحكت فطيم وهي تجدم جدام عشان تدخل بشكل جريء خلا حمدان يتراجع على ورا عشان يبتعد...
فطيم: فبيتنا... وتبااجب علي عصير؟؟؟... اهلي بييبون آخرتك..
ابتسم حمدان بسخريه...
حمدان: مع احترامي لاهلج..لكن انا ماعليه من حد..
لبسته فطيم وراحت وحطت الصينية على الطاوله وهو يراقبها...ياسلااام..شو هالرشاقه هاي...ماجنها ظعفت عن آخر مره شفتها؟!... فطيم حطت الصينيه واعتدلت في وقفتها تعدل شيلتها وتتحجب بشكل احسن.. رفعت عيونها العسليه الفاتحه صوبه بشكل خلى قلب حمدان يفقد دقه من دقاااته... بس تمالك نفسه وهو يقول بعدها ماطلعت البنت اللي تربكني... وابتسم لها ابتسامه من ابتساماته اللي تذوب..
وهي اطالعه بشكل كانها كاشفه حركاته ..بسخريه ومن قمه راسه لين ريوله..كانها مش مهتمه...
حمدان: احم...شحالج فطيم...
هزت راسها وهي تجدم عشان تطلع من المطعم..
فطيم: بخير...
يوم يت بتطلع وقف حمدان بينها وبين الباب..وقف فطيم وهي تتنفس بسرعه...وردت على ورا...يوم رفعت عينها لحمدان شافته معقد حياته وعلى ويهه تعبير حييره..
حمدان: فطيم بلاج؟؟
فطيم: ماشي...
حمدان: بلى فيج شي...ليش تتصرفين بهالطريقه مب عوايدج..
عقدت فطيم يديها جدام صدرها..
فطيم: شو هي عوايدي حمدان؟؟
تم حمدان يطالعها بفضول...وعقب قال بتعبير بريييييييء ..
حمدان: انا سويت شي؟؟..سمعتي عني شي؟؟
بغت فطيم تظحك بس مسكت عمرها..
فطيم: انته تحيد عمرك مسوي شي..؟!..
حمدان: لا والله...
فطيم: خلك واثق من نفسك عيل...
عقد حمدان حياته اكثر....
حمدان: فطييييييم...!!..بلاج؟؟
فطيم: ههههههههههههههه...
تم حمدان مستغرب في نفس الوقت اللي دخلت فيه نوره عليهم شاله صحنين سلطه...
نورة: اهلين حمدااااااان...بعدك هني؟
التفت حمدان لنوره..
حمدان: نوروه تعالي.... شو بلاها بنت خالج..؟؟؟
ظحكت نوره واطالعت فطيم..وحبت تغلس عليهم شوي ..هالثنينه ..شو بتقول بس.؟!..هي بقره وهو ثوور.. مب فاهمين على بعض...
نورة: منوو فطووم؟؟... ماشي بس متولهه...
فجت فطوم حلجها وعيونها....وبحلقت فنووره منصدمه من هالخيانه العظمى... وحمدان انصدم بعد وعلى طول بحلق في فطيم يطالعها مستغرب...وفرحان..وتعبير ثاني ماينعرفله شووو... سالها بصوت واطي وهو مب مصدق..
حمدان: صدق؟!!
حطت نوره السلطه عشان تشرد من عيون فطوم اللي تبا تاكلها... وحمدان يطالع في فطوم مب مصدق...ويوم ماردت عليه تساند عالباب وهو مبتسم..
حمدان: ياوييييييييييييييلي... ماتحمل..
غمضت فطوم عيونها ميته غصه ..وطلعت برا المطعم طيرااااااااااااان... نشت نوره تظحك بعد ماحطت السلطه وسارت عند حمدان..
نورة: اقول حمدان.. انا ماقلت انها متولهه عليك انته..!!!
على طول اختفت الابتسامه عن ويهه...واطالعها بعصبيه...
حمدان: ذلفي عن ويهي انتي...مفسده الملذاااااااات....اصلا مبين انها متولهه عليه...
نورة: يازين الثقه...روح روح الميلس عشان نخلص شغلنا...
حمدان: اووكي...
راح حمدان الميلس وهو يفكر هل فطوم صدق متولهه عليه والا مزحه ثقيله من نوره.؟!!.. اما نوره راحت المطبخ وهي تظحك..شافت فطوم تحط الصحون والمغارف بعصبيه.. وويهها معتفس...
نورة: اوف اوف اوف...وينها هذي اللي مالت المطااافي...عندنا حريجه...
فطوم: تدرين انج سخيفه..؟!..
نورة: ههههههههههههههههههههههه...لا..
فطوم: انتي كيف تجرأين وتقوليله هالكلمه عني..؟؟
اطالعتها نوره بمكر...
نورة: ليش صدق انتي متولهه عليه.؟؟!!
ارتبكت فطوم...
فطوم: لا طبعا...
نورة: لاااااااه؟؟...عيل ارتاحي لاني فشلته وقلت له انتي متولهه صدق بس مب عليه هوو...
اطالعتها فطوم بفظول وبردت ظيجتها شوي..
فطوم: وشو قال؟
نورة: انحبط مسكين بعد شو بيقول...
بربشت فطوم بعيونها...
فطوم: انحبط؟؟؟
نورة: هي زعل وحليله...
التفتت فطوم عنها وهي سرحانه... مب عارفه ليش تحس بالظيج بانه حمدان منحبط وزعلان لاي سبب كان... ونوره تراقب وتبتسم..
نورة: ياويييييييلي انا عاللي ما ايووزلهم زعل بعض الناس..!!!
فطوم: قسم بالله يبالج ظرب..سيري شلي ويا البشكاره صينية العيش..
ظحكت نوره وسارت تساعد الخدامه.. وبعد ماخلصوا كل شي دخلت فطوم البيت ..وسارت نورة دقت باب الميلس.. وطلع لها سعيد...اول ماشافها ابتسم..
سعيد: هلا وغلااا....آمري..
ابتسمت نوره..
نورة: مايامر عليك عدوو...غدا..
سعيد: ان شاء الله بقولهم احين...
نورة: تمام...باي..

العصر ردوا الجماعه اشتلوا عشان يسيرون السوق... عليا ونوره وحصه وعنود..مودنهن عبدالله.. وحمدان طلع مع سعيد... اول شي راحن المشغل اللي تعرفه عليا وخذوا مقاساتهن والقطع عشان يفصلون لهن الفساتين وبعدين قاموا يدورون على باقي المخازن لتاجير الفساتين...عشان عنود.. وكل ماينزلن مكان مايخلن عبدالله ينزل...عشان بس مايشوف الفستان... لين ماشافت عنود فستان دش مزاجها على طوووووووووول...وكان فعلا رووعه وحركته حللوه...وشي طبيعي انه مدخل معاه تدرجات لالوان ثانيه...وبعد الاتفاق على كل الترتيبات والقياسات ردوا البيت حوالي 7 المغرب.. واول ماوصلوا اتصلوا بحمدان عشان يرجع البيت لانهم على طوول بيردون العين مابيتريوون..حتى انهم رفضوا بادب العشااا...لانه ماشي وقت وهم تعبانين... على هالحال ردوا حمدان وعنود وامهم ام سلطان العين ...

المساا نص الليل ..كانن البنات متيمعات في الصاله اللي فوق...يشوفن التلفزيون ويخربطن... مر عليهن سعيد وعبدالله... وحصلن هزبه صغيره من سعيد..عقبها ترابعن كل وحده حجرتها ترقد عن يطلع مره ثانيه بالعقال...
بالجمعه الصبح نوره طفرت بعبدالله..الا تودووونا البحر... واليوم اخر يوم اجازه عندي انا وفطيم...خلونا نستمتع... وسوت لهم مناحه...لين ما عورتهم روسهم وودوهن عبدالله وسعيد مع البنات كلهن اللي في البيت حتى عليا راحت..ماعدى العيايز... ويلسوا عالبحر لين الضحى وردوا.... وبعد صلاة الجمعه تغدوا.. وجهزت فطيم شنطتها واغراضها... وسارت لابوها تمد ايدها...
فطوم: ايييييييدك عالمصروف يابو فيصل...

خش بو فيصل ايده فمخباه وطلع البوك... وعطا فطيم مصروفها...
بو فيصل: هالله الله بالعقل عاد... لا اطفرين بعمتج...
فطوم: ولا يهمك بنتك حررررررمه متسنعه...
بوفيصل: والنعم فيج ..بس عاد ركزي بدراستج...
كانت فطوم عنده في حجرته وامها تصلي... يلست عداله..
فطوم: ابوويه..اذا ياني معرس...بتردونه صح..
بوفيصل: وابوي عليج شو هالرمسات بعد.؟!..
فطوم: ابوويه..دخييلك.. ماريد اعرس الا يوم اتخرج...انا بعدني صغيره ...ومب لانه شويخ بتعرس احين بتروحون تيوزوني اناوراها على طول...
بوفيصل: انتي ركزي بدراستج ولا عليج من سوالف العرس...
فطوم: انا بركز فدراستي وانتوا ركزوا بانكم تردون كل المعاريس...ماريد اعرس انزين ابويه؟؟
ظحك عليها ابوها...
بوفيصل: يابنتي يوم ايي النصيب محد يروم يرده...
فطوم: ابوويه كلامك مايطمن....شكلكم الا بتقربون باي حد عشان تفتكون مني...
بوفيصل: افاااا يابنتي..احين انا ابا الفكه منج؟؟ لا والله ماكان ...انا ابالج ريال زين يصونج..وانا ادري انج بعدج صغيره..بس انتي وكلي ربج...لاتحاتين هالسوالف وخلج في دراستج..واذا كنتي خايفه اني اقرب بحد بدون مااشاورج اول اطمني انا ريال فاهم الدين ..ومابغصبج على شي ماتبغينه...سمعتي؟
ابتسمت فطيم.. وهوت على راس ابوووها تبووسه..
فطيم: فديتك يابووويه الله لايحرمني منك يارب...

بعدها طلعوا هل العين شالين معاهم فطوم اللي تمت ساكته وقافطه من وجود عبدالله...تتخيل كيف الحين البيت بيكون يوم عبدالله فيه..؟؟؟ يالله ماعليه هو لاهي عنها بعرب ثانييين مابيهتم ...في الطريج مسك عبدالله تيلفونه واتصل بخليفه... وهو متوله عليه بانه من يومين ماشافه...مب متعود انه يتفارق عنه يوم على بعضه..
خليفه: مررررررحبا...
عبدالله: هلااا والله خلوووووووووف...
حصه من سمعت طاري فزت..بس تظاهرت بالهدوء.. لكن نوره اللي كاانت يالسه عدالها حست بها.. واطالعتها بطرف عينها وطنشت الموضوع..
خليفه: هلا عبدالله...شحالك؟؟
عبدالله: بخير والله انته شو علومك؟؟؟
خليفه: علووم الخير...رديت العين؟
عبدالله: احين في نص الدرب.. وانته وين؟؟
خليفه: انا الله يسلمك فبوظبي...
عبدالله: هاااااا..؟؟؟ بوظبي شو تسوي؟
خليفه: ساير الله يسلمك ادورلي سياره..
عبدالله: آآآآآآآآخ يالخاين...منو ساير وياك؟
خليفه: ارووحي...
عبدالله: حصلت سياره عاد...
خليفه: والله انا حصلت وحده فنانه..لكن قلت بحوط بعدني بشوف...
عبدالله: شو بتاخذ؟؟
خليفه: مورسيدس كوبي....
عبدالله: هذي ماتنفع في البر...
خليفه: ومنو قالك اني بكسر سيارتي في البر...تسد سيارتك وسياره حمدان وحميد..
عبدالله: همممممممممم اذا خذت الكوبي بخذهاعنك في العرس... كاشخه..
خليفه: ههههههههه روح لاه مابعطيك اياها...
عبدالله: ههههههه اشوفك تغيرت علي يالهرم من ينا الامارات...
خليفه: قبل مجبوور اعاملك زين واجابل ويهك شو اسوي بعد...؟!..الحين لا خلاص افراااااااااااج...
عبدالله: آآآآآه يالنذل....احين تقول هالرمسه ماعليك انزين...
خليفه: هههههههههههههه اذا كنت ثور صدق هالرمسه..والا تعرف انته اني اسولف عليك.. ياخي مليت ارووحي والله وانته مودي اهلك.. قلت بروح ادورلي سياره...
عبدالله: هممممممممممم ماعليه ...انته بترد اليوم؟
خليفه: هي برد ببات في العين ان شاء الله..
عبدالله: حلوو..اتصلبي يوم بتوصل...
خليفه: تــم...
عبدالله: يالله برايك..فمان الله...
سكر عبدالله عن خليفه...
ام خالد: خليفه ساير يدورله سياره ؟؟؟
عبدالله: هييي والله..ساير بوظبي..
ام خالد: جي سيارته الستيشن زينه..
عبدالله: مال اول..بيبيعها وبياخذ كوبي يقول..
نورة: والله؟؟؟ كاااااااااااااااااشخه الكوبي...
عبدالله: هي..وعلى شو انتي مستانسه مابتركبينها...
نورة: يمكن اركبها في المستقبل مع "حرمه" خليفه شو دراك بعد...
وتناقعوا نوره وعبدالله من الظحك بصوت عالي...والكل يطالعهم باستغراب...ويوم سالوهم ماطاعوا يرمسون... وحصه محتااااره وشاكه في الموضوع...شو سالفتها هذي حرمه خليفه اللي كل مايطرونها يتناقعون من الظحك...؟!....السالفه فيها انّ...
وصلوا البيت وكل حد سار حجرته يرتاح شوي.. ورجعت فطوم تفرغ اغراضها في الغرفه وهي تحس وبشكل غريب جدا انها رجعت بيتها...كانه هذا بيتها مب بيت ابوها اللي في الشارجه..!!...حتى مابغت ترتاح..على طول خلصت ترتيب وطلعت للصاله..وحصلت الشايب يالس هناك مع عيوزه يتقهويوون...
فطوم: السسسسلام عليكم...
بو خالد وام خالد: وعليكم السلام والرحمه..
فطوم: شحالك عمي؟؟ عساك طيب؟
بو خالد: بخير بنتي شحالج انتي وشحال هلج كلهم؟؟
فطوم: بخيير ويسلمون عليك عمي..
ام خالد: يبناها ويانا بنت هلال خلاص استوت بنتها مانصبر عنها...
فطوم: هههههههه فديتج عمووه والله تصدقين اني يوم رديت هني احس بالراحه جني رديت بيتي..
ام خالد: تراااه بيتج امااايه...
فطوم: تسلميين عمووه.. عيل وين البنات مانزلن؟
ام خالد: لا وصلن وانزربن في حجرهن..يمكن تعبانات ويرتاحن...
فطوم: يمكن..
نشت فطوم وسارت المطبخ وهي تحس باليووع فجاه.. بطلت الثلاجه حصلت كيكه كاكاو..ماعرفت منو مسونها.؟!..اكيد حصه هذي ام الكيك ..قطعت لها قطعه وحطتها في صحن مع شوكه ..وغرشة بيبسي..والجو كان فنان العصر قراب المغرب في العين....براااااااااد والجو مغيم...قعدت برا عالشرفه ..تشرب بيبسي اكثر عن ما تاكل كيك...وتتامل كل شي حواليها..بس يوم شافت سياره حمدان تدخل البوابه بغت تشرق بالبيبسي وتمت تسعل.. نزل حمدان وسمع المساعل..عقد حياته..ماعرف من وين ياي الصوت...ركب الدري وصد عاليمين...شاف فطوم موخيه تسعل وهي يالسه على طاوله البلكونه... على طول راح صووبها...
حمدان: حلال حلال.....( ورفع ايده فوق) ...ادحج؟؟؟
زاغت فطوم...يسويها... حاولت تتمالك السعله شوي ..وتحنحن..
فطوم: احممممممم... لا دخيلك بتكسرلي العمود الفقري..
وردت تسعل مره ثانيه...
قعد يراقبها وهي كاسره خاطره تحاول تتمالك السعله وتخففها... مهما يغلس على فطيم ماتهون عليه يشوفها تتويع او تتلعوز باي شي...ويوم خازت عنها الشرقه...يلست مرتاحه...وعيونها كله دمووع...ابتسم حمدان بعفويه وهو يطالعها...
حمدان: متى وصلتوا؟؟
فطيم: قبل شوي...وانته مممره توقت لنا....؟
رفع حمدان حواجبه وانقهر.خقاقه بعد استوت..!!!.... مد ايده وكسر غصن صغير طري ومتروس ورق من الشيره اللي عدال البلكونه...وقعد يكفخ فطوم على راسها وجتفها بهالغصن...طبعا هو مايعور بس يلعوز...
فطيم: ايييييييييييه...؟!.. طالع..!!..لا تظرب يالطويل...
حمدان: ايه فعينج...يكون فعلمج الشيخه فاطمه الطويله..ان عمي متصللي وطالبني مخصوص... والا مب ياي عشان سواد عيونج...تفهمين؟؟
فطوم: انا عيوني مب سوود...
قال حمدان بمكر... وفر الغصن بعيد..وتساند بايده على الطاوله..
حمدان: وكأني انا مالاحظت هالشي يعني.؟!.. ادريبهن مب سود...
قفطت فطوم وسكتت.. مد حمدان ايده وخذ الشوكه اللي في الصحن وكل من الكيكه...ويوم اطعمها عيبته وشل الصحن بكبره.. وصد عنها بيدخل داخل البيت...
فطوم: ايييييييييه مالتي هذي....
حمدان: الحين استوت مالتي... بعدين مب زين لج الكيك بتمتنين...
فطوم: والله مايخصك....
حمدان: جــــــــــــب...
دخل عنها البيت عند عمه وهو يبتسم وياكل كيك.. ويدري انها تسبه من ورا ظهره.. سلم على عمه وحرمته ويلس..وقعد يسولف وياه وبو خالد عطى حمدان اوراق لابوه..تخص فيلا جديمه يبا يهشها ويبني بدالها فلل صغيره وياجرها..ويبا يسلم المشروع لشركه اخووه...وبعد مافهمت حمدان كل السالفه وخلص مناقشات ويا عمه..شل الاوراق وطلع براا..وعلى طول التفت لفطوم اللي كانت سرحانه..مسانده راسها على ايدها وتراقب نحله تحوط...كان شكلها وايد حلوو..ومبيضه ..والشمس عاشيه عيونها ومخلتنها تنعسهن غصب..والرموش طوال وواضحااات...والشفايف ورديه...شياها حلوت مره وحده؟؟؟؟!!!.. استغل حمدان فرصه انها سرحانه وقعد يراقبها شوي...يحفظ هالشكل الهادي والرزين والحلووو في باله...عشان اذا شافها معصبه وقشرااااا ومكشره عن انيابها بسبب غلاسته عليها.. يتذكر شكلها الحلو هذا ...ويوم شبع من الشوف...مشى صوبها وعلى ويهه ابتسامه هادية...وهي ما انتبهت له...
حمدان: احمممممممم احم احم...
نقزت فطيم واطالعت صوبه..وعدلت قعدتها وحجابها.. سحب حمدان الكرسي المجابل ويلس عليه وحط الاوراق عالطاوله..
حمدان: هااا فطيم...!!... اللي ماخذ بالج يتهنى به...
وابتسم بثقه..وبغت تكفخه بغرشه البيبسي... يعرف زين انها كانت تفكر فيه ...سكتت عنه..
حمدان: فطيم.. احم...اسالج شي اجاوبيني بصراحه...
فطوم: ..................بفكر...
حمدان: هممم... صدق اللي قالته نوره امس..؟؟؟
عرفت فطوم على طول شو يقصد وحمر ويهها...
فطوم: شو قالت نوروه امس؟؟
حمدان: انج متولهه...
فطوم: على منوو..؟؟
برطم حمدان...
حمدان: ماعرف... انتي قولي...
فطوم: اوكي بقولك....الصدق الصدق..؟!
حمدان: اكيييد...
فطوم: الصراحه..تولهت على هالبيت...وعلى حياتي في هالبيت...واهل هالبيت...
حط حمدان فخاطره... فطيم مطلعتنه من الحسبه..يعني مب متولهه عليه....!!
فطيم: بلاك..؟!
ولانه صريح قال..
حمدان: ماشي بس اشوفج اممره طلعتيني من الحسبه...!!!
ابتسمت فطوم ومسكت غرشتها وقامت وهي تقول...
فطيم: انا قلت...اهل هالبيت..مب اللي ساكنين هالبيت...واللي عرفته من ييت وسكنت هني....انك من اهل هالبيت غصب طيب ياحمدان...!.. يعني انا ماطلعتك من الحسبه... تشاو
ظحكت ودخلت البيت...وتم حمدان مبهت مكانه..يفكر بكلامها....وشوي شوي شقت الابتسامه الحلج.. ياسلاااااااااااام يعني الكلام اللي انقال امس صدق..فطيم متولهه عليه...طبعا هو من بين امور ثانيه...لكن المهم تولهت عليه...آآآآآآآآه ياعمري عليها.. مسك اوراقه ونش وركب سيارته وروح .... وكلام فطيم يدور في باله ..والابتسامه مافارقت ويهه...

------------------------------------

الجزء السابع والاربعون


بدى الكورس الثاني ..وردن نوره وفطوم للدوام وهن لايعه جبودهن من اول يوم... كلهن كانت دواماتهن خايسه.. نوره اخر كورس لها وماخذه خمس مساقات..تاخذ اربعه منهن السبت والاثنين.. ودوامها لين الساعه خمس العصر... ومساق واحد تاخذه الاحد والثلاثاء بعد الغدا يكون موعده...
اما فطيم بما انها عدت الانجليزي.. استوى عندها بريك يومين في الاسبوع..وبريك طويل..وهذا اللي كان قاهرنها....
حمدان بعد بدا دوامه في التقنية... وكان كالعاده صباحي... واستمر في الشغل مسائي... واستوى ماعنده وقت وايد يفظى فيه...بالتالي سيراته لبيت عمه قلت.. وشوقه للسوالف مع فطيم يزيد..
عبدالله قدم على وظيفه في مستشفى توام..وطبعا عينوووه..دكتور متخصص في قسم الاشعة... وبدا دوامه وهو وايد مستانس...كان الدوام حلووو..بالنسبه له على الاقل.. وكونه مواطن كان يلفت الانتباه وايد بسبب تمسكه بسفرته وكندورته ..لانهم الكل نصحوه انه يلبس بنطلون وقميص عشان يتاقلم مع الاجواء والدكاتره لكنه رفض.. وتم على سفرته وكندورته...ويلبس فوقها اللاب كوت... ووين مايمشي في المستشفى يحس بنظرات فضوليه تبصبص له.. صغير ودكتور ومواطن.؟؟؟ ما تستوي وايد في العين...!!.. وفوق هذا كان يعيش فتره ترقب حلللوه..بسبب تجهيزات عرسه اللي كانت مثل مايقولون شغااله على قدم وساق...

خليفه بعد قدم اوراقه في الاتصالات... وكونه شهادته امتياز في انظمة الكمبيوتر والشبكات وشهاده امريكية بعد..كان مكسب كبير وطبيعي يوظفونه.. واشتغل في قسم الانترنيت...وكانت شغلته حيويه وايد وحلوه.. مب شغله مكاتب... واحلى شي في الموضوع..انه يوميا (تقريبا) يشوف حصه وهي داخله المبنى وطالعه منه... وكم مره سلم عليها ..بس يوم يتاكد انه محد موجود عشان مايبغيلها الرمسه..لانه محد يعرف انه ولد عمها.. وكان يحس بعد انها ترتبك من تشوفه حتى المشي ماتعرف تمشي.. وبما انه شديد الملاحظه..لاحظ بعد انها تتهرب تطالع صوبه..لكن خليفه قرر يغير كل شي في حياته.. علاقاته...تحفظه الزايد...شخصيته..حتى سيارته غيرها وخذ الكوبي الفضية اللي شافها في بوظبي.... وحصه بنت عمه..وهو احق بها من الغير.. وقرر انه ياخذها لو شو ما استوا...غصب طيب..حصه بتكون له... مب على كيفها..

حصه... كانت مب في حاله... عندها تضارب بالمشاعر.. من رد خليفه من السفر وهي تحس انها تخون ذكرى سيف بمشاعرها... اهتمامها بكل تصرفات خليفه يزيد يوم عن يووم...وهي تكره شعورها هذا...ماتبا تحس تجاهه باي شي...ما تبا تتعلق بامل يورطها في النهاية...يكفي انها تاملت فيه من قبل وخذلها... انا شو سويت به خليفه هذا..؟؟ ليش يعاملني بكل اهتمام..نظراته لي تفظح اللي في خاطره ...بس اخر شي يحبطني.. !!!.. ..ليش؟؟.. والقهر انه اشتغل في نفس المكان اللي تشتغل هي فيه...وكل ما تشوف سيارته تحس بريولها بتخذلها..كم مره مسكت نفسها عن تركظ عشان بس تشرد عنه...واللي يزيد الطين بله..راشد هذا.. لمح لها مره انه شافها تسلم على واحد اسمه خليفه... كانه ناقد عليها هالشي... وسالها اذا كانت تعرفه... لكن هي من عصبيتها قالت له مايخصك وراحت عنه..وبالتالي تعمقت شكوكه فيها..لو قالت له ولد عمي وانهت الموضوع كان بيسكت وبينطم... اما الحين كل ماتشوفه يطالعها بنظرات غريبه ... هاللي ناقصني انا ترا...!! مب ساد خليفه ونظراته طالع لي راشد بعد...اففف....!!!


كانت حصه توها نازله للصاله يوم شافت خليفه تدخل البوابه..على طول توترت.. ودخلت الصاله.. حصلت هناك عبدالله وام خالد ونوره ومحتشرين..
حصه: السلام عليكم...
ردوا عليها السلام في نفس الوقت اللي نش فيه عبدالله يوم سمع صوت سياره ووايج من الدريشه... يلست حصه عدال امها.. وهي تتوقع شو بيقول عبدالله بعد شوي...وفعلا..
عبدالله: تحجبن...خليفه ياي..
ابتسمت حصه يوم صحت توقعاتها وتحجبت.. ونوره فسرت ابتسامتها شي ثاني.. وتحجبت هي الثانيه بعد..
ام خالد: ياااااامرحبابه... خله يقرب عندنا..
عبدالله: بيدش اروحه..
وبعد شوي...
خليفه: هووووووووووود..
عبدالله: اقــــــــرب ولد عمي.. يامرحبااا الساع..
دخل خليفه الصاله وهو يدور بعيونه عالموجودين ..ويوم وصلت عينه لعين حصه بسرعه كسر عينه والتفت لعبدالله...
خليفه: السلام عليكم...
ردوا السلام عليه.. توايهوا الشباب ويلسوا عدال بعض تت عالارض.. وحصه عالكرسي عدال امها اللي يالسها بعد عالارض.. ونوره في كرسي حمدان المفضل قاعده اطالع التلفزيون.. بس لو يا حمدان هالوقت بيجحوتها عن الكرسي وبيقعد مكانه..لكن هوغايب عشان جي متفيزره الحبيبه براحه...
خليفه: شحالج عموووه؟
ام خالد: بخييييير ابويه شحالك انته وشحال هلك؟
خليفه: بخير وعافيه... شحااااالكن يابناااااات..؟!
سكتت حصه...ونوره تولت الرد...
نورة: منييح ابن عمّي....كيفاااك انتاااه وكيف الشغل معاااااااك؟؟؟؟
رفع خليفه حاجب ونزل حاجب ثاني..ويطالعها باستنكار ويبتسم... ومثل ماقلت خليفه متغير ... وقرر انه يتخلى عن هالتحفظ اللي مبعدنه عن معظم الاهل..خصوصا بنات عمه... ونوره كثر السوالف وياها الفتره الاخيره لانه يحس وعرف من ملاحظاتها الفظيعه اللي تعقها بويهه احيانا انها تدري بمشاعره صوب اختها... ويحس انها بتساعده في اللي يبا يوصله...
خليفه: مابرد عليج يوم انج حايسه هاللسان الطويل...
نورة: ههههههههه كلكم حاطين علساني مادري ليش...
ام خالد: اميييه حصه..صبي لولد عمج جاهي...
نزلت حصه بتصب له...
خليفه: لالالالا عمووه ..مشكوره مابغي...
بس حصه لبسته وصبت له كوب جاهي.. وهو يراقب..وعبدالله يراقب بعد.. ونوره لاهيه بالتلفزيون...مدت حصه ايدها بالكوب.. وعلى ويهها نظره هاديه ..وناعمه.. كان خليفه مشغول بويهها يطالعه.. وطولت حصه وهي ماده ايدها بالكوب لخليفه..وهو مب منتبه...لولا انه حس بركبه عبدالله ادز ريله شوي شوي وتنبهه..مسك الكوب عنها..
خليفه: مااابردج بنت حمد..
وابتسم لها... ومره ثانيه كالعاده تحرك الاضطراب المعوي في بطن حصه بسبب هالابتسامه...وردت قعدت مكانها.. وخليفه من طرف عينه انتبه لعبدالله وهو ينزل راسه وكاتم ابتسامه.... كل هالامور تصير في لحظات بسيطه.. لكنها تركز في البال... ردت ام خالد اللي لاهيه عن هالامور كلها للموضوع اللي كانوا يرمسون فيه قبل ما يدخل خليفه عليهم...
ام خالد: احين شو قلت ابويه.. نسير وياك والا ويا الدريول..؟!
عبدالله: والله مادري امايه.. انا ما اريد ابات وانتوا تبون تباتون...
خليفه: وين بتسيرون؟
عبدالله: تطري عرس بنت خالي بعد ثلاث ايام.. بتسير؟
خليفه: تبا الصدق اتصلبي سعيد وعزمني... بس ماظني اسير...شو يسيرني؟؟
عبدالله: وليش ماتسير؟؟ تعال وياي انته وحمدان ...
خليفه: حمدان قايلي انه بيسير عشان يجامل سعيد...بس انا مافيني..
عبدالله: افاااااااا..حمدان يطلع احسن عنك؟؟؟
خليفه: حمدان اقرب لسعيد مني انا.... انته ود هلك العرس لا تخليهن يسيرن ويا الدريول...!!
عبدالله: بشوف حسب دوامي في المستشفى... ولو اني ماريد ابات الصراحه..ابا احظر العرس وارد العين على طول...
ام خالد: بنشوف يمكن نرد وياك بعد..
نطت نووره..
نورة: لاااااااه..شووووووه...؟!.. اسمينا بنبااااااااااات هناك مب راده نص الليل هني العين..
عبدالله: ليش بعد تباتين..؟؟؟
نورة: مافيني اكون تعبانه وحالتي حاله توني طالعه من عرس وامسك خط؟؟؟
خليفه: هههههههه اسمع..امسك خط اون.... !!..اللي يقول انتي اللي بتسوقين بنت عمي..
نورة: المهم اني في الخط في السياره وتعب...لالالالالالالا..تبون تردون ردوا برايكم انا ببات وبرد ويا فطيم ويا سعيد...!!
ام خالد: بس بس....بس.... قطعيها الرمسه..!!
عبدالله: بترد ويا سعيد اون... اقول نوره...ادلينه درام الهير وين.؟؟ والا ادليج..؟!
نورة: عيل ماااااااااشي...نبااااااات..ماتردوني هني نص الليل..مابا...تعب امايه والله... حد يمسك خط نص الليل.؟!! نسير نسويلنا حادث والا شي...لا سمح الله يعني...
ام خالد: شوف هالبنت كيف تفاول علينا حسبي الله على بليسج.... بقوم اصلي العشا انا احسلي عن خريطج..
نشت ام خالد ودخلت حجرتها.. ونوره تظحك عليها عقب ماطفرتبها..
خليفه: انزين ليش عمي ما يوديكن..؟؟
عبدالله: ابويه بيكون قبل العرس بيوم في بوظبي.. ومن هناك بيسير الشارجه مابيمر العين..
خليفه: انزين انته ودهن.. ورد عقب العرس العين..وفي الرده هو بيردهن وياه...
عبدالله: همممممممم فكره...بقوله بعدني بشوفه اذا بيطيع...
حصه: نوره وين فطيم..؟؟؟
التفت لها خليفه اللي ماصدق انها نطقت اخيرا..من الصبح يترياها ترمس وهي ساكته...واخر شي يوم رمست سالت عن حد ثاني..؟!!!.. مب جنه قــــــــــــهـــــــــــــر..!!!!!....
نورة: فطوم فحجرتها تدرس عليها امتحان سعي باجر...
ردت حصه تسكت..ورد عبدالله على الموضوع نفسه..
عبدالله: انزين خلوف تعال.. احظر العرس ويانا ياخي والله بنستانس...
خليفه: هممممممممم بشوف...
عبدالله: لا ما بتشوف...انته يوم تقول جي معناته رافض...خلوف عااد...!! ..
خليفه: عبوود والله احس شكلي رزه... تخيل حد يسالني شو تقرب للعروس والا المعرس اقولهم ماشي..انا ولد عم ولد عمة العروس.....!!!!!
ظحكت حصه على كلام خليفه غصبن عنها... وخصوصا الطريقه اللي قالها فيها...
نورة: واااااااااااال مطولها ههههههههه صدق شكلها مالها خص هالقرابه ههههههههاي..
عبدالله: نوروه انطمي...انا اشجعه وانتي تحبطينه..
خليفه: صدقها ياخي....مالها خص صدق...
عبدالله: عيل حمدان تراه نفس الشي..
خليفه: ههههه صح..بس زياده عليه انه ربيع اخو العرووس واااااايد....
تنهدت نوره وابتسمت وهي تقول في خاطرها فديت اخو العروس "الصغير" انا...
عبدالله: ياخي جاااااااامله عشان يجاملك فعرسك...بلاك جي بليد...!!
خليفه: اجامله فعرسه مب في عرس اخته...!!
التفتت نوره يوم طروا عرس سعيد..اللي هو عرسها..وبدون قصد ظحكت وقالت لخليفه...
نورة: سعيد وحرمته مابيعرسون الا يوم حظرت جنابك تعرس...يعني سعيد بيجاملك فعرسك قبل ما انته اجامله فعرسه ان شاء الله....
التفتوا كلهم صوبها وهم بعدهم مب مستوعبين الملاحظه المازحه هذي..
خليفه: ليش يعني...
نورة: لاني انا ما بعرس الا يوم تعرس انته...وحرمتك...
خليفه: الود ودي باجر انا...بس اخاف اتريين وايد يانوره...

ظحك عبدالله على التعليق وسكت.. خليفه لا اراديا انتقلت عينه لحصه.. اللي كانت اطالع اختها بنظره غريبه...وحس بخوف..بانها الحين بتعرف انها المقصوده لا محاله...!! وتم يراقبها من طرف عيونه..
حصه شكت بالسالفه...نوره وايد تدخل بعرس خليفه وخصوصا حرمه خليفه...شو خصها؟؟؟...وليش كلهم يتظاحكون يوم يطرونها...؟!...وليش انا بالذات اللي ما افهم النكته وما اعرف على شويظحكون.؟؟؟... والله اني غبيه وعلى نياتي... مافهمت اللي يدور حواليه لاني انا المقصوده...!!!..معقووووله..؟!.. التفتت نظراتها لا اراديه واشتبكت بعيون خليفه.. وتاكدت ان هي المقصوده....نظرته كلها خوف وامل وترقّـب ..!!...شو يتريا يعني؟؟ اقوله هي موافقه..؟!...حست حصه بظيج فصدرها ...وقامت عن الكرسي والكل يطالعها..
نورة: وين بتسيرين؟
حصه: بسير حجرتي ...
مشت حصه وطلعت من الصاله وركبت لحجرتها.. واول ماطلعت من الصاله التفت خليفه وهو معقد حياته صوب عبدالله...
خليفه: والله انها عرفت....
عبدالله: عرفت شوو؟؟
خليفه: عرفت اني اباها هي تكون حرمتي...انا متاكد...
عبدالله: انزين برايها خلها تعرف...
هز خليفه راسه...

خليفه: انا ماريدها تعرف بهالطريقه...كنت مخطط لشي ثاني لكن انتوا الثنينه ماتحفظون لسانكم عنها شوي..
نورة: احم... انا اعرف اختي.. الحين هي انصدمت.. وبترفض كرد مبدئي بسبب ظروفها والمرحوم سيف..لكن يوم بتفكر اكثر بالسالفه بترد توافق...يعني لين بعد عرس عبدالله بتكون مقتنعه ..وعقب تعال واخطبها..بس..
خليفه: وايد مسهله الامور انتي....
نورة: لا...انته اللي تصعب الامور... لا تحاتي كل اللي قلت لك عليه بيصير ان شاء الله...
تم خليفه متوتر.... يخاف الرفض مايكون مبدئي...ويكون قاطع..
خليفه: مابتسيرين تشوفينها..؟؟
نورة: لا..بخليها اجلب الفكره فراسها...
عبدالله: انته احين طب هالسالفه عنك خلنا نسير...
خليفه: وين نذلف بعد..؟!
عبدالله: قبل ما تي انته متصلبي الرميثي عازمنا عالعشا..امبوني بخطف عليك بس انته يييت قبل.. نسير...
خليفه: اوووه..مافيني على مجابلهم...
عبدالله: عيل على شوو فيك...؟؟؟ تبا تروح حجرتك وتصك على عمرك شرا البنات...
خليفه: احسن لي والله تصدق..؟!..
عبدالله: قم قم....قــــــــــــــــم لا اعطيك بهالكوب...وابوي عليك انا...
خليفه: قسم بالله محد متفيج غيرك انته وحمدان في هالدنيا...
نش خليفه مع عبدالله وطلعوا بسياره خليفه الكوبي... وفي السياره.. قال عبدالله بعصبيه...
عبدالله: شحالها اختك..؟!...
التفت خليفه مستغرب..
خليفه: عنود..؟!.. ليش ماتعرف حالها انته؟؟
عبدالله: خيبه شو مستوي عليها..؟!!!!...
خليفه: هههههه اقصد ليش ما تتصلبها انته وتسالها عن حالها...
عبدالله: ثرها طايعه هي..؟؟؟ من حددنا موعد العرس وهي مانعه عني الشووفه.. ومن اخر الاسبوع اللي طاف وهي مانعه الرمسه عالتيلفون بعد..اون شووو.؟!.. عشان تتوله عليه...عنلاااااااااتها زاد...
خليفه: ههههههههههههههههه تستاهل والله....حررررررمه...
عبدالله: مالت عليك انته واختك انزين...!!... المهم شحالها..؟!
خليفه: هههه تشقح...بخير...ذابحه امي كل اسبوع طايره دبي عسب الفستان والبروفات في الصالون..!!..وهالخرابيط..
عبدالله: ياسلااااااااااااام ياخلوف...باقي اسبوع واربع ايام بالضبط عن عرسي....وناسه..!!
خليفه: ههههههه الله يكمل عليك...وين بتسير عقب العرس.؟ والا مابتسير مكان؟ ..
عبدالله: بوديها ماليزيا...ان شاء الله..
خليفه: حلوه عاد هالوقت من السنه؟؟..
عبدالله: الله اعلم...لكن بسير هناك في كل الحالاات..خاطري اشوفها..بس لاتخبر عنووودي بهالسالفه...
خليفه: انزين يابوك... مابخبر عنوودك.

حصه في الغرفه قافله على نفسها...ومنسدحه عالشبريه...تفكر بكل المواقف اللي مرت بها مع خليفه وبين لها انه يباها..ولو بشكل طفيف...بس اللي قهرها ..عبدالله ونوره شو دراهم..؟!.. معقوله يكون مخبرنهم..؟؟..اوكي عبدالله ربيعه وطبيعي يعرف..لكن نورووه شو دراها...؟؟!!.. يوووه..هذي نوره تعرف بالسوالف من كثر ما تراقب ما تحتاي حد يقولها شي...ياربي...شو اسوي..؟!!..بشووو افكر..؟؟؟؟ طول عمري كنت اتوقع خليفه ياخذني...لكن الوضع تغير الحين..لاني تزوجت من شخص ثاني..وترملت...مب المفروض اصوون ذكراه واتم عليها..؟؟؟ مب المفروض اني ما افكر حتى بشخص ثاني؟!... عيل ليش احس اني متقبله الفكره..؟!..نشت ويابت الصندوق الصغير اللي حاطه فيه كل ذكريات سيف... وفتحته..طلعت الصوره منه وحطتها جدامها...وقعدت اطالع في ويهه الحبيب...شوي وعيونها انترست كلها دموع..
حصه: قولي شو اسوي...؟؟ شو اسوي سيف..؟!...
تذكرت كلام نوره..بانها مابتعرس الايوم يعرس خليفه وحرمته اللي هي المفروض تكون حصه...!!..يعني نوره بتاجل زواجها من سعيد بسبب حصه...!!..ومابتعرس الايوم تعرس هي قبل...لين متى بتتريا يعني؟.. وانا..؟؟ اخليها تستمر بهالتفكير وهالقرار والا لا..؟!..مايصير تقعد تترياني يمكن انا ما اييني نصيبي او يمكن يطول وايد...مايستوي تخلي سعيد يتريا اكثر...ماله ذنب...
ردت انسدحت عالشبريه...وبشكل لا ارادي..تذكرت كلام سيف...بانه لو صارله شي..ما يامن حد عليها غير خليفه.... غمضت عينها قهر...خليفه خليفه خليفه...وين ما اسير احصل خليفه...!!!..يوم هو يباني ليش مااعترض من البدايه على خطبتي....؟!...ليش يا يباركلي وهو يبتسم ولا عليه ...مع انه في هذيج الفتره كان وايد يبين لي...وصار اللي صار وانخطبت...والحين شو ناوي يسوي..؟؟ يلمح لي لين ما انخطب مره ثانيه وعقب ايي يبارك لي..؟؟ احسن لي اسكت عن السالفه لين اشوف شو بيصير..وشو بيسوي حظرة جناب خليفه ولد عمي..!!!

حمدان كان في هالوقت في ميلس ربيعه راشد... اللي دخل الحمام من دقايق.... وتم حمدان اروحه يطالع التلفزيون..فجاه رن تيلفون راشد اللي مخلنه عالطاوله.. اطالعه حمدان بدون اهتمام ورد يتابع...بس التيلفون ماوقف من الصياح... زعج حمدان..
حمدان: رشوووووووووود...تيلفووونك...!
صرخ هذاك من الحمام..
راشد: شششششله انزييييين شحقه اطالعه....؟!..
حاس حمدان بوزه ومد ايده ياخذ التيلفون..وابتسم يوم شاف "البيت" مكتوب عالشاشه.. لو ارد عليهم بيلعن خيري راشد..بس ماعليه خله يتادب...
حمدان: آآلووو..
مريم: رشوووووود...!!..
كتم حمدان ظحكته يوم سمع صوت بنت...لالالا ..اليوم ذابح ومذبوح ويا راشد...الله يستر..
حمدان: هااا شو تبين.؟!..
قالت مريم بلهفه..
مريم: حمدان عندك؟؟
رفع حمدان حواجبه...يعرفووني بعد..!!
حمدان: هي نعم عندي...
مريم: متى بيسير...؟!..
حمدان: شخصج انتي..؟!...
حمدان كان شوي وبينقع من الظحك....
مريم: اسمع... البشكاره مريضه ولا سوت لنا عشا..ونحن ماندريبها انها مريضه..المهم احين نبا عشا...
حمدان: يااسلام عليكن...!!
مريم: شو ياسلام بتخلينا باليوع..!!
حمدان: شو تبن انزين..؟؟
مريم: هممممممم هاتلنا تويستر حااار من كنتاكي بس....يسدنا...
حمدان: هممممم ان شاء الله..يوم بنظهر بيبلكم..
مريم: فديتك والله ادري مابتقول لا اممممممممممواح...باي..
بطل حمدان عيونه وهو يسمع السماعه تنرقع من الطرف الثاني.... انحرج من الخاطر من الجمله الاخيره اللي سمعها... فديتك واموااح بعد..؟؟؟؟.... لاااااااااااه احسن لي اروح احفر قبري بروحي ...خيبه كيف احترق ويهي...مسكينه البنت لو تدري بتنتحر....!!!...
فر التيلفون عالطاوله ويلس يتظاهر بالهدوووء...منااك هو مرتبش من داخل مب عارف كيف يخبر راشد بالسالفه هذي... ويوم طلع راشد من الحمام فزز حمدان من الزيغه...تم ساكت وهو يشوف راشد ايي ويقعد عنده..شل تيلفونه وقال..
راشد: منو متصل..؟؟
حمدان في خاطره..الله يستر.. الله يستر... الله يستر.... بسم الله الرحمن الرحيم ..اشهد ان لا اله الا الله وان محمد رسول الله....يالله الشهاااااده اذا كان بيذبحني...
حمدان: احمم...البيت...
تم حمدان يطالع في نقوش السيراميك والزوليه كانه مصمم ديكور داخلي مهتم وايد بالديكور... ومن طرف عينه يشوف راشد يلتفت له بسرعه...
راشد: البيت..؟؟؟؟...رديت عليهم؟؟
حمدان: انته قلت لي رد على التيلفون شو اسويبك...
راشد: عنلاااااااااتك...رد اذا شفت حد من الربع مب البيت..!!!!...
حمدان: مادري عاد مافكرت..رديت وماعرفووني...وسكرت..ماصار شي..
عقد راشد حياته وهو معصب...
راشد: منو كان متصل..؟؟؟
حمدان: اظني وحده من خواتك...
راشد: شووووووووووو..؟!!... منوو منهن؟؟
حمدان: شو عرفني بعد منو منهن مادقيت وياها سوالف انا....قلت لك ماعرفتني تحسبتني انته قالت اللي فخاطرها ورقعت بالسماعه....اييزيي اييزي..ماصار شي...
راشد: اييزي فعينك....تباني اذبحك ويا هالراس....؟!..انته متى بتيوز عن هالحركات..؟!..
حمدان: افاااااااا يارشوود... خواتك خواتي .. واناماغلطت عليها ولا شي...لا تكبر المساله..
سكت راشد وهو يهدي اعصابه شوي....وعقب شوي..
راشد: شو كانت تبا.؟؟
كان عارف راشد فخاطره ان حمدان مايقصد الغلط.. وعرف بعد انها مريوم..دومها تاذييه يوم تشوفه ويا ربعه..
حمدان: ههههههه تبا تويستر من كنتاكي حقها وحق خواتها..اون البشكاره مريضه ولا سوت عشا لهم...
راشد: لا والله..؟!... وانته شو قلت؟؟
حمدان: قلت لها ان شاء الله... لاني ماحيدك بخيل على خواتك.... شفت كيف احسن صوورتك جدامهن..
راشد: انته سبال... قم نطلع...
نش راشد بعصبيه وطلع من الميلس قبل حمدان..وحمدان من وراه يرفع ايده للسما ويقول الحمد لله بصوت واطي... لانه عمره ماخلص على ايد رشود اليوم....
طلعواتحوطوا في سياره حمدان.. وعقب خطف حمدان على كنتاكي وطلب لعمره وحق راشد وخواته بعد..طبعا بعد ما ساله كم وحده هن.؟؟..وحلف انه هو اللي يدفع...وعقبها خطف راشد بيته وخطف على بيت عمه لانه قريب من طريجه...متوله عليهم...يبا يشوفهم ويسولف وياهم شوي عقب بيسير بيتهم بيدرس وبيرقد...وكل سندويجته وهو في الدرب..اول مادخل بسيارته بيت عمه لاحظ سياره عبدالله هني... وتحسبه في البيت..ماكان يدري انه طلع مع خليفه في سيارته..وقف سيارته ونزل الميلس...ماحصل حد.. قال فخاطره الحمد لله احسن..راح البيت ودق باب الصاله... اللي كان فيها ونوره وفطيم يتعشن رواحهن..
حمدان: هوووووووود...
نقزت فطيم وعدلت شيلتها بسرعه...كانت عاطيه باب الصاله ظهرها عشان جي نشت وعدلت قعدتها وجابلت...
نورة: هدااااا..اقرب ولد عمي...
دخل حمدان الصاله وابتسم...
حمدان: السسسسسسسسسلام عليكم....
نورة وفطيم: وعليكم السلام...
نورة: تعشيت حمدان..؟؟
حمدان: الحمد لله..توني متعشي في السياره...كملن عشاكن انتن...
فطيم: ومنو قالك انه بنودر عشانا عشانك انته شرفتنا بالزياره..!!!
فطيم تعودت تغايظ حمدان في الفتره الاخيره وتتنقرشبه...اطالعها بنص عين..
حمدان: زطي زطي انتي... جان تعوضين الوزن المفقوود اللي خسرتيه يوم رديتي بيتكم...!!!
فطيم: انا خسرت وزن يوم رديت بيتنا..؟؟
نورة: هي صدقه...ظعفتي زياده يوم سرتي هناك....
فطيم: لا ماظعفت...
حمدان: تعرفين ليش ظعفتي..؟... من الوله...من زود الغياااااب...
قالها بطريقه ناعمه ماكره ...تكفي الطريقه اللي كان يطالع بها...احترق ويه فطوم..لانه كلامه صحيح....
فطيم:على شو بتوله ياحسره..!!!...ماعندي سالفه...
حمدان: هههههههههه ترا هذا الللي قاهرنج انتي... ودج تكرهين..ودج انتي ما تهتمين...لكن كل هذا غصبن عنج...مب قادره تتحكمين... خلاص مشاعرج استوت آوت اوف كونترول...
نورة: ههههههههههههههههههههههه يالملعون ماتنغلب في الرمسه انته... بسك خلاص قطعت البنت...
سكتت فطيم وهي منحرجه ...ومنقهره في نفس الوقت..
حمدان: افااا.. انا اقطع فطيم برمستي..؟؟ حشىى... بس اقولها ان الاقرار بالواقع..زين بعد.... يعني الشي موجود شحقه تنكر...!!!.
رصصت فطيم عيونها....
فطيم: طالع منو يتكلم عن الاقرار بالواقع....ليش ماتقول لنفسك هالكلام...؟؟ ... انته تراك اللي دومك تنكر حتى لو بينك وبين نفسك...ومب طايع تعترف....
عرف حمدان شو تقصد وابتسم... بشكل غريب يحس انه مستعد يقولها هالكلمه الحين... قالها بصوت هادي.. والابتسامه مافارقت ويهه...
حمدان: خلاص انا استسلمت.... اقول..؟!..
بطلت فطيم عيونها ونوره تحمست وهي يالسه مكانها وسكتت..
فطوم: شو تقول..؟!!!!....
توسعت ابتسامه حمدان اكثر يوم شاف الخوف على ويه فطيم....
حمدان: .. اعترف بالواقع....
فطوم: لا عين خير....لا تقول شي...
ظحكت نوره لانها تذكرت موقفها مع سعيد يوم كانت تقوله لا تقول وهو يبغي يقولها احبج..وهي مب طايعه...
حمدان: توج تقولين اني لازم اقر بالواقع....بقول....