ضعنا يا صبرنا...

مرحبا
يعطيكم الف عافيه ولا خلا ولا عدم..
قربنـــــــــا نودعكم خلاص...
الناري..
مسموح خيو ,, خذها وخليه يعطينا رايه وانقله لينا :) وتسلم من ذوقك والله ..

اليكم الجديد

الحلقة 49 ..

ابو مالك رجع جهة الرسبشن.. ويحس روحه مايسمع شي غير صوت مرت ابوه.. صوت صياحها وهي تترجاه يرفق بحالهم.. وشكل امجد وهو صغير والبؤس اللي عيشه فيه.. يذكر الحريق اللي كان سببه في بيتهم.. عجلة الماضي تسير به وهو راجع الى بته..
بهدوء .. سأل الرسبشن:
ــ سمعتك تقول الساعه 10 فيه زياره
الرسبشن : ــ ايه نعم..
ابو مالك:
ــ علا.. اذا تعبانه روحي انتظار النساء.. بظل هنا للساعه 10
علا مهي فاهمه ويش صاير .. وليش غير رايه.. ماليها الا تسمع كلامه.. وتروح تقعد هناك...
وظل ابو مالك ينتظر متى تجي الساعه 10 على كل دقيقه يحسها ساعه ومتوتر وحالته حاله ..
هشام لاحظ توتر ابو مالك.. جلس جنبه..:
ــ ويش فيك ياخوي على حساب بترجع البيت..
ابو مالك بتوتر:
ــ شفت مريض اعرفه.. قلت انتظر وقت الزياره وازوره ..
ــ اهاا .. عطاك الله العافيه..
ــ الله يعافيك..

جت الساعه 10 .. ابو مالك قام ودقات قلبه تتسارع.. وصل جهة غرفة حميد.. لقى الممرضه طالعه شايله فطوره توه مخلص.. سألها..اذا هي فعلا غرفة امجد عبدالكريم آل .. والا لا..
وقف عالباب مو عارف كيف يدخل وويش يسوي اصلا...

طق الباب ودخل..
لقى حميد منسدح وشحوب مو طبيعي فيه.. التفت حميد عليه ومن شافه.. قعد وهو مذهول..
ابو مالك بهداوه وبصوت متقطع..
ــ السلام.. عليكم..
حميد بخوف ودقات قلبه تتسارع..
ــ عليكم السلام..
ــ اخبارك ..؟؟
حميد سكت ومارد .. وعيونه تحكي حكايه وتسأل مليون الف سؤال..
حميد مذهول ... وساااكت ولا كلمه... وصار يتذكر سوايا ابو مالك فيه وفي امه
ابو مالك تعبان من هالسكوت يبغى حميد يتكلم يقول أي شي..
ابو مالك مو داري ويش يقول.. جى بيكحلها بسؤال:
ــ امك.. اخبارها؟؟
ابتسم حميد ابتسامه صفرا:
ــ امي .. امي الله يرحمها من سنين..
ابو مالك حس روحه عماها:
ــ الله يرحمها... وانت.. ويش اخبارك.. والله كبرت وتغيرت
رجع حميد وسكت..
ابو مالك: ــ تكفى لا تسكت..
حميد بهدوء :
ــ هه ويش تبغاني اقول..!!
ــ قول أي شي ريحني..
ــ الله يابو مالك.. توك تبغى ترتاح.. بعد 15 سنه.. تشريد وتغريب وتعذيب ذقتهم في حياتي..
بعد 15 سنه لاقيت فيهم الشقى.. كم سنه في العراق لا ليلي ليل ولا نهاري نهار .. امي وودعت واحس روحي فيهم بلا ارض ولا وطن.. رجعت البلد بالموت.. ويالتني مارجعت.. يالتني ظليت في العراق ومتت هناك.. عشت مثل الحياوين في صندقه.. على الله وعلى البحر.. صرت حرامي .. صرت شخص عديم الأنسانيه... تمرمرت وتعذبت.. تنكرني وانا اخوك؟؟ تطلعني ميت وتاكل حقي..؟؟ ليش ويش جرمي اذا ابوي الله يرحمه تزوج على امك و جابني للدنيا..؟؟
سكت حميد
ابو مالك مو قادر يتنفس .. وبتعب:
ــ كمل كلامك.. قول كل اللي عندك ..
ــ ماعندي كلام لك.. ليش جاي.. جاي تتشمت وتتأكد من موتي.. ابشرك ايامي معدوده.. وخلاص مرضي اكل جسمي كله.. وافرح بموتي ساعتها.. مع انك ذبحتني ,, من زمان...

ابو مالك ..
ــ ياخوي.. مو جاي اتشمت فيك والله يعلم.. جاي اطلب منك السماح.. سامحني ياخوي .. اعترف لك ظلمتك وعذبتك.. سامحني وكل حقك بيرجع لك..
ــ هه.. اسامحك.. على ويه لو على ويه... وحقي .. حقي ويش اسوي فيه...
ــ تكفى.. انا تعبان نفسيا مو قادر اتحمل ولا اعيش ,, اعز الناس من اهلي خايف افقدهم ,, ياليت العذاب جاني انا.. ياليت حوبة كل مظلوم طلعت علي ولا فيهم..
ــ هههههههههههههههههههههههههههههه
ابو مالك بأستنكار:
ــ على ويه... تضحك؟؟؟؟
ــ عليك.. وعلى ضميرك الحي..
ابو مالك وجهه يعاود الأستفسار..
حميد تنهد من قلب..
ــ ايييه.. يعني لو ماصابتك مصيبه.. ماكنت افتكرت تعتذر ولا طقيت خبر..
ابو مالك سكووت ويحس بأحراج من نفسه..
حميد.. ــ كيف دريت بي اني هنا...
ــ مادري .. واحد سمعته في الرسبشن يسأل عنك..
ابتسم حميد.
ــ ومين يسأل عني ياحسره.. ماعندي بهالدنيا احد غير علي...بس ويش جيبه هالحزه..!!
ــ امجد.. ارجوك لا تغير السالفه ..
ــ ليش بيننا سالفه..؟؟
ابو مالك..ومو عارف ويش يقول..
ــ انا ... مادري
وانفجر صياح.. اعظم من طفل .. انهار وشيبته بللها الدمع...
حميد وبهداوه :
ــ ليش تصيح الحين؟؟
ــ ابغاك تسامحني ,, هذا اللي ابغاه من دنياي وتاخذ حقك لأني تعبت..
ــ وويش حقي؟؟
ــ نصف املاكي ...
حميد بتعب وعيونه طاغيه فيها دموع يحاول قد مايقدر يداريها..
ــ نصف املاكك.. بعد ويه ياخوي .. بعد ويه.. بس يللا .. الله كريم.. سامحتك..
ابو مالك قام وباس راس اخوه..
حميد انحرج من حركة اخوه الكبير...
ابو مالك وعلامات الفرح مرسومه في وجهه:
ــ الله يقومك بالسلامه.. و ان شالله على طول ازورك ...
ــ ان شالله.. جيب معاك مالك وعلا..
ابو مالك ابتسم:
ــ ولا يهمك ان شالله مالك الفجر بكره بينزل البلد
حميد بأبتسامه:
ــ يدرس برى يعني
ــ ايه...
ــ يالله وحشوني هالصغار .. صار رجال مالك وعلا كبرت وصارت مره..
ابو مالك يحس روحه انسان جديد.. انسان توه منولد..
شقد المصايب صحته من غفلته...

وطلع ابو مالك ..حميد انسدح ودموعه بعفويه تنسل ... تنهد من قلب:
ــ عساه خير..


العصر .. اتصل ناصر على اشرف:
ــ هلااااا روميو
اشرف بقهر:
ــ وففف منك ومن تعيلفك ويش تبغى..؟؟
ــ افاا خوش رد .. لا بس باجيك بعد شوي باجيب لاب توب ولد عمي ابغاك تفرمته..
ــ وهذي شغلتك..
ــ اوهووو بتمننا عاد انت...
ــ هههههههههههههههه امزح وياك مالت عليك..
ــ مره اللي يسمع ويش اجيب لك غير الفرمته.. المفروض اسميك اشرف فرمته...
ــ كركر .. باايخ..
ــ مسامح.. ياروميووو..
ــ صبرا جميل..
ــ وبالله المستعان..
ــ يللا اجل انتظرك جيبه ولا تنسى الشاحن سالفة جهاز ولد عمك هذاك..
ــ هههههههههههههههه نفس الجهاز اصلا
ــ بل ماخذ شهر من تفرمت..
ــ ويش مدريني عنه.. من صارت مصيبه قال فرمتووه.
ــ والله ما يبغى له تفرمت الا مخك
ــ ههههههههههههههه فرمته يـــــــــا.. روميو
ــ باي بس باي
ــ هههههههههه جاي.. باي..

5 دقايق الا ناصر موصل لأشرف..
ودخل وياه بيتهم..
ناصر منتبه على اشرف العاده ما ينزل شعره على جبهته.. فصار يتعيلف:
ــ يلعن يوم القصات.. يلعن يوم الحركتاااااااات استررررر عليه..
اشرف يحوس في اللاب توب رفع عيونه على ناصر وعطاه نظره..
ناصر:
ــ يمه يماااه خفت .. اقول ويش سالفة هالقصه الجديده..
اشرف يرفع شعره:
ــ وففففف منك ومن تعيلفك .. جبهتي مضروبه .. ومغطنها..
ــ اف اف ويش هالضربه من ويش .؟؟ شكلها شاايده؟
ــ طايح من درج بيتنا
ــ بل .. أي درج..؟؟
ــ الخارجي...
ــ من ويه؟؟
ــ تحقيق هو.. طحت وبس ,, بعد من ويه .. تعثرت وطحت,.,
ــ مممممممم اييييه.. اللي ماخذ عقلك..
اشرف ببرود وسخريه:
ــ يتهناااا به...
وفي باله:
ــ ياساااتر لو يدري لويه ويش يفكني من تعيلفه...

علا تكلم امل..
امل : ــ هدي غناتي وماعلى سوسن الا الخير ..
ــ ان شالله.. واللي متعبني زياده قلت لليلى عن سالفة صالح..
ــ أي صالح...
ــ اللي عالج ولدش,,
ــ وخير لو قلتي ..
ــ آآآه بلاش ماتدري ..
وصارت تقص على امل السالفه..
امل : ــ ياااربي مسكينه ليلى .. ويش حالها الحين؟؟؟
ــ للحين ماتصلت فيها اعصابي تلفانه واحاتي سوسن.. شوي اذا سكرت من عندش باجرب اتصل.. ولو اني مالي جرأه..
ــ ليش عاد .. اتصلي واسالي عنها.. مايصير تتركيها في هالموقف..
ــ مو كل المصايب تتحذف عليهم مني..
ــ استغفري ربش ويش دخلش انتين..
ــ وجه نحس..
ــ علا.. انتين متوتره وماتدري ويش تقولي .. فهدي بالش وان شالله خير..
ــ ان شالله..

بعد كم ساعه.. جت تريزا لعلا.. وبهداوه:
ــ علا حبيبي.. خلاص اخر هذا اسبوع انا سفر..
علا :
ــ هااا.,,, ياربي كل المصايب تجي في مره وحده.. ليش مابتطولي .؟؟
ــ خلاص خلص الوقت لازم يرجع..
ــ باقي بس 3 ايام ويخلص هالأسبوع.. مو متصوره البيت من دونش..
ابتسمت تريزا:
ــ الله كريم..
علا : ــ بتوحشينا..
ــ ما ينساكم على طول ..
ــ ولا بننساش.. لويه عاد تقولي لي من اليوم كان قلتي لي قبل سفرش بيوم..
ابتسمت تريزا..
ــ تبغي شي علا ..؟؟
ــ لا سلامتش..
ودخلت غرفتها..
تابع<<

سميره رجعت من المستشفى راحت ساعه تشوف وضع سوسن واخبارها..
سميره:
ــ توقعتش نمتي!!
ــ وين انام .. مو جايني نوم لو دريت رحت وياش
ــ شدعوه لو رحتي .. بعدها في الغيبوبه ماصحت..
ــ ياربي .. يالله تقومها بالسلامه وتعدي كل شر..
ــ يالله.. وين اخوي؟؟ ماشفت الا هشام هناك..
ــ بعده!!
ــ ايه ليش ..؟؟ من متى؟؟
ــ من الفجر مو هو اللي ودانا المستشفى..
ــ شلوون؟؟
ــ ويشو شلون..
ــ شلون تصرفتي..؟؟
ــ اتصلت عليه.. ولما جا حمل سوسن وسدحها في السيت اللي ورى..
سميره رفعت حاجب وحاجب..
ــ اتصلتي... زين ووين قعدتي وسوسن ورى..
علا بأرتباك:
ــ قدام..
ــ حلو حلو.. مطيحين الميانه!!
علا عصبت:
ــ طوارئ وللضروره وما طلعنا نمتشى حنا لو رحنا نلعب .. رايحين المستشفى..
ــ زين شوي شوي اكلتيني..
ــ مو لأنش ضنانه وشكاكه وما تعيشي بدون فتن ..
سميره اثر فيها الكلام..
ــ اني.. الله يسامحش..
ودخلت غرفتها..

علا ..
ــ ياااربي ويش فيني اني .. افففف تجبرني لكن..
راحت ليها وطقت الباب..
ماترد عليها..
ــ عمه.. افتحي..
ماترد..
ــ عمه اني آسفه افتحي..
فتحت الباب..
ــ اسمحي لي عمه والله ماقصد
سميره ولأول مره.. تحضن علا..
وبحزن:
ــ حتى اني ماقصد بس والله من خوفي عليش..
علا ماتحملت الموقف وصارت تصيح تحس يالله لقت حضن ترتمي عليه وتفضي فيه همها...


الليل تلفون بيت ابو علي يرن.. وكانت علا المتصله..
ماكان احد حول التلفون الا رزان جايه تشوف ليلى اللي طلعت بالسلامه ورجعوها البيت..
ريما كانت تسبح حنين راسها ومليون سيف الا هي اللي تسبحها.. والرجال في المجلس وام علي بعيده تحوس..
ردت عليها..
علا مستغربه من الصوت اول مره تسمع رزان في التلفون فما عرفتها..
علا :
ــ السلام عليكم.. هذا مو بيت حسين آل ...
ــ عليكم السلام.. امبلى هو..
ــ بغيت ليلى..
ــ ليلى نايمه نقول لها مين..؟؟
ــ علا.. طيب اخبارها صارت احسن؟؟
ــ ايه الحمدلله،، خذت لها يوم في المستشفى وصارت تمام..
ــ اهاا.. ماتشوف شر .. سلمي عليها.
ــ ان شالله يوصل
علا جاها فضول تسالها:
ــ عفوا يعني .. مين انتين؟؟ << ماتعرفها علا ولا مره شافتها..
ــ انا زوجة صديق علي..
ــ اهاا.. طيب سلمي لي على ليلى مع السلامه..
ــ ربي يسلمك...


وفي فجر اليوم الثاني .. نزل مالك البلد بعد ماسمع الخبر عن سوسن...
علا مابغت تشوف اخوها تحس روحها ضايعه وتعبانه...
نام له كم ساعه وعلى طول الصباح راحو المستشفى من وصلو لقو هشام..
وكان تعبان وحالته حاله..
ابو مالك:
ــ ياساتر مارجعت شقتك الى الحين؟؟
علا لاحظت ثيابه متغيره لابس ثوب..
ابتسم هشام:
ــ لا رجعت سبحت وارتحت شوي ورديت المستشفى..
ــ اخبارها .. ويش ماسألت عنها الدكتوره؟؟
هشام والكلام يرتجف على شفايفه..:
ــ الا سألت.. تقول وضعها حرج .. الله كريم...
ابو مالك : ــ يارب لطفك ورحمتك..
طل عليها وقلبه متفطر ..
شوي :
ــ طيب عن اذنك هشام.. واصل مشوار شوي مع علا ومالك..
علا مستغربه..
ــ وين بنروح..؟؟
ابو مالك...ــ امشي زياره لمريض تعرفيه
مالك جنب علا يسالها:
ــ مين؟
علا : ــ مادري..؟؟؟
وصلو غرفة حميد ... ودخلو..
ابو مالك : ــ صباح الخير ياخوي
حميد ماتوقع ابو مالك يرجع له .. وهالمره دخلو وراه علا ومالك..
ابتسم حميد يحس روحه اسعد انسان في هاللحظه..
حميد : ــ مالك.. هلا حبيبي ..

مالك كان قليله قعداته في الفريق ومايعرف احد فيه .. وكل مسافر لدراسته...
اول ماشاف حميد.. يحس قلبه انقبض.. يحس روحه شاف هالمخلوق بس متغير عليه..
لما حميد ترك البلد ويا امه كان عمر مالك 10 سنين.. يتذكر ويفهم..
مالك مو مستوعب.. ويتأمل في حميد..
حميد ابتسم:
ــ افا عليك ماتذكرتني..
تابع<<

مالك والخوف طاغي على حواسه:
ــ ع... عمي !!
ابتسم حميد:
ــ ايه عمك..
علا مهي مستوعبه..
ابو مالك: ــ لا تتغطي يابتي هذا عمش..
علا شالت غطاها وصارت تتأمله.. تذكرته.. هو عمها الصغير اللي كان يلعب وياهم ويشتري ليها حلويات...
دموعها بعفويه طغت.. وابتسمت ابتسامه عريضه..
مالك تقدم لعمه سلم عليه..
حميد:
ــ ولو يا الغاليه مابتسلمي علي..
علا بخجل سلمت عليه..وسالت دموع على خفيف
حميد مسك خدها ومصعه ..
ــ فديتش من يوم يومش حساسه ..
ابو مالك مأثر فيه وضع حميد وحالته.. خلاص تعبان ومنتهي والمرض مو راحمنه.. ومتأثر من موقف حميد مع ولاده وفرحته بشوفتهم..

مالك: ـ مانى لكن مستوعب شي .. يبا .. تقول عمي مات بعيد الشر عنه.. هذا هو.. وينهو زين طول هالسنين..
ابو مالك بتعب .. سحب كرسي .. وقعد..
ــ قعدو باقص ليكم الحكايه من اولها قدام حميد.. من لما توفى جدهم.. وسواياه كلها..
علا تحس بأنهيار.. معقوله !! ابوها قدوتها في الحياه يطلع منه هالشي !! مصدومه ..
مالك مو اقل منها انصدام.. بس شكل ابو مالك و نبرة صوته كافيه .. تدل على الندم والحسره على اللي فات..
حميد : ــ بس ياخوي خلاص .. يكفي مال داعي تتعب نفسك وتعيد القصه .. اللي فات مات والمسامح كريم..
ابو مالك :
ــ الله يقومك بالسلامه وترجع بيننا ان شالله..

وطلع من جيبه ورقه ..
ــ وقدام ولادي هذاني اعطيك حقك.. والله يشهد علي اني مانقصت منه ريال واحد..
فتح حميد الصك لقاه مختوم من المحكمه و موقع عليه ابو مالك .. ونصف ثروته ومقدارها 3 مليون ريال من نصيبه..
حميد يبلع ريقه.. مو عارف ويش يسوي وويش يقول...
ــ بس...
ابو مالك :: ــ لا تقول شي ياخوي.. هذيلا فلوسك .. ابغى ارتاااح من عذابي .. اتمنى تريحني وتاخذهم تسوي فيهم اللي تبغى....

حميد : ــ طيب عندي طلب ..
ابو مالك : ــ أأمر..
ــ ما يأمر عليك عدو.. باخذهم .. و عسى الله يريح بالك.. بس بشرط..
ــ ويش شرطك..؟؟؟

وقال حميد شرطه.. ووافق ابو مالك انه يلبيه له...



و بعد ثلاثة ايام..
تريزا في المطار مودعه... ومعاها سميره.. ابو عدنان مستعجل بيسافر .. فعقدو بس وباركو ليها.. ومالك بيرجع لدراسته..
علا في المطار بس دموع..
ــ بتخلوني كلكم.. حرام عليكم..
مالك: ــ ليش وين راح ابوي .. الله الله في روحش وبينا تلفون وماسنجر لا تقطعيني..
ــ لا افاا عليك.. مستحيل اقطعك.. انتبه لروحك بس ياخوي والله يوفقك..

تريزا .. مدت على علا علبه مغلفه..
علا مهي قادره.. وهي تسلم على تريزا شدت على ايدها..
وكان على علا سلسال ذهب فصخته وعطته تريزا..
تريزا: ــ لاااا علا مااا ياخذه..
علا : ــ بتاخذيه.. حق تذكريني.. تريزا هذه سلسال كل علي .. على شان لا تنسيني..
تريزا تصيح : ــ مافي ينسى..
ومدت على علا علبه مغلفه..
علا اثر فيها موقف تريزا.. العلبه مجهزه من قبل لا تعطيها السلسال يعني ناويه تعطيها اياها قبل لا تفكر هي تهديها..
خذتها وصارت تحرص على تريزا تنتبه لروحها وما تنساهم..
والتفتت لسميره اللي كان ابو مالك يوصيها على ابو عدنان..
سلمت عليها .. وسميره تترجاها تسامحها و ما تشيل على خاطرها من تصرفاتها..
علا : ــ غناتي انتين عمتي مهما كان.. الله يسعدش ويهنيش وانتبهي لروحش..
سميره : ــ انتين بعد ربي يوفقش وانتبهي لروحش ولأبوش وسوسن طمنيني عليها زين..
ــ ان شالله...


ورحلو... جميعا..
ركبت علا السياره .وكانو جايين بسيارة مالك لأنها جيب وتكفيهم كلهم.... وطول الطريق صمت..
مد ابو مالك ايده على المسجل بيقطع الصمت
تعال معي انا احتاج ان تبقى رفيقا لي ...
تؤازرني تواسيني تخفف من عذاباتي ...
وحين اموت .. تبكيني .. فأن بكائك في موتي يعزيني ..
ويشعرني .. بأني كنت شيئا ما سوى الأوجاع والطين...

ومع الموسيقى لهالأنشوده.. ماسمع ابو مالك الا علا تشاهق صياح...
طفاها:
ــ ويش فيش عاد يابتي...؟؟
ــ فضى البيت.. كلهم راحو..
ــ مابخليش انا.. الحين عندي مشوار باروح وبرجع لش نروح لسوسن..

وصلها بيت خالتها تقعد وياها لين يخلص مشواره..


باب بيت ابو جاسم يطق..
ابو جاسم فتح الباب .. ووقف مذهول..
ابو مالك :
ــ السلام عليكم..
ابو جاسم مو عارف شلون يرد..
ـ .. عليكم.. السلام.. تفضل ..
ــ لا ياخوك انا مستعجل جاي بس ابغاك بسالفه..
ابو جاسم فيه غل وقهر من ابو مالك.. بس صار يهدي روحه.. ويحاول ينسى الماضي ويسمعه ويش يبغى.. وبدون نفس..
ــ خير ..
ــ ان شالله كل خير..
ومد عليه صك..
ابو جاسم وكأنه عرف:
ــ ويش ... هـــذاا؟؟؟
ابو مالك :
ــ حقك ياخوي.. واطلب منك تسامحني..
ابو جاسم يفتح الصك وايده تتنافض فتحه وصار يقرا.. وبتوتر:
ــ كبيره.. ضعف.. ضعف ارضي ...!!
ابتسم ابو مالك وحط ايده على كتف ابو جاسم:
ــ مهي كبيره قدام اللي سويته فيك..
ابو جاسم انربط لسانه.. مو عارف ويش يقول.. وبهدوء:
ــ الله يجازيك كل خير .. الله يعطيك الصحه والعافيه
ــ الله يعافيك.. ياخوي داخل عليك بالله تسامحني وتنسى اللي سويته فيك..
ابو جاسم:
ــ ياخوي روح الله كريم .. والله يسامحك ..

ابو مالك مشى عن ابو جاسم ويحس روحه طاير من الفرحه... وباله مرتاح .. رجع كل الحقوق باقي الله يقوم له سوسن بالسلامه وتكمل افراحه...

ابو جاسم دخل البيت وهو مذهول ويكلم روحه..
ام جاسم:
ــ هااا..
ابو جاسم : ــ هااا.. ماعنيش..
ــ يؤ .. يابتي عفر ابوش خرف وقام يكلم روحه..
ابو جاسم عصب:
ــ ولعنه لا حشيمه ولا مستحى وما تبغى احد يعصب عليها.. ماتقومي تنامي احسن؟؟
زينب : ــ يباه.. صك ويه اللي في ايدك..
ابو جاسم مده على بته..
ــ اقريه..
صارت زينب تقرا
ام جاسم فاتحه عيونها..
ــ يؤ..يؤيؤ.. ماصدق .. الحمـــــــــــــدلله رب العـــــــــــالمين .. الله مايضيع الحق ... يااااعلي نذر علي ليلة الجمعه اقرا حلال المشاكل واوزع حلاوه بركة هالخبر..
زينب:
ــ والله كبيره وايد.. يمدينا نبني فيها قصر
ابو جاسم:
ــ وين ياابوش نبني حنا خلاص الشيب لاح والضرس طاح والعقل ولى وراح..
ــ ههههههههه سلامتك يبا بعدك شباب..
ابو جاسم يحك لحيته..
ــ صدق.. انا افكر ابيعها..
ام جاسم طقت صدرها:
ــ تبيعها.. وتعرس علي..!!!!!!!!
ابو جاسم فتح عيونه:
ــ من قال باعرررررس..
ــ ايه مفكرني مافهم .. تشققت على عمرك يوم قالت لك بتك شباب..
ــ يامره اعقلي..
ــ ويش بتسوي بفلوسها اذا بعتها..
ابو جاسم بحمق:
ــ صايره نكديه علينا من متى وانتين عافسه احوالنا على ولدش الحين نسيتيه.. صحيح الفلوس تغير النفوس
ام جاسم غرقت عيونها دموع:
ــ وي الله لا يخلينا منك ومن حنانك.
ــ ايه مفكره بس الحنان لش.. بندفع الحقوق للناس حق تقل المده للنص ويرجع لينا بالسلامه.,. وباسوي مشروع صغير وباخليه يشتغل فيه ويكون مستقبله....
زينب الفرحه مهي سايعتنها .. وام جاسم اكثر واكثر..
ابو جاسم ابتسم:
ــ قرب ينفش لحامك ياقفل.. << تذكر حلمته..
ام جاسم : ــ هااا!!
ابو جاسم : ــ ولا شي داوويه كل شي تبغى تعرفه..
ــ لاااااااتفكر بصوت عالي..
ــ اقول.. انفبرري ولا تتحكمي .. وقومي بكري لي القدو..
ــ وففففف هذا اللي فالح فيه..
ــ حررركي...

وفي المستشفى...
ابو مالك : ــ ها هشام بشر؟؟
هشام اللي مره خلاص منتهي وحاله مهي حال..:
ــ مادري .. كلمت الدكتوره تقول وضعها مو راضي يستقر .. خايف عليها وايد انا..
علا متوتره قعدت على الكراسي لا تطيح..
ابو مالك في باله : ــ يارب تفرجها.. يارب سامحني وغير سوء حالي..
علا:
ــ يباا.. باروح اشوف عمي..
ــ صبري باروح وياش..

دخلو غرفته.. لقوها.. فاضيه !!!
ابو مالك مذهول....
وعلى طول للرسبشن..
ــ ياخوي الغرفه رقم 25 المريض امجد عبدالكريم آل .. وينه...

الرسبشن.. بهدوء:
ــ عطاك عمره اليوم الفجر !!!!!!





الى ان التقيكم و الحلقه الأخيره

يو

حميد المسسككين مات


وما نمبى الجزء الاخير

اقتباس:

---

المشاركة الأصلية كتبت بواسطة اميرة المرح

ــ افاا خوش رد .. لا بس باجيك بعد شوي باجيب لاب توب ولد عمي ابغاك تفرمته..
ــ وهذي شغلتك..
ــ اوهووو بتمننا عاد انت...
ــ هههههههههههههههه امزح وياك مالت عليك..

---

اما هالحركة كل تصير معاي اذا قلت للاستاذ شبكة يسوي لي لابتوبي هههه عاد تطلع روحي وياه وما يوافق إلا اول يعايرني ههههههه

لا شكلي اليوم بيصير اسمي بالاسود...uot

ايه وقربت نهاية المسلسل

خسااااااااااااااااااارة

كان بودي يطول وتطول احداثة

بس يالله

ان ادري ان اميرة كريمة وما بتقصر علينا بقصة غيرها

بس لازم تريحي اميرة لك كم يوم

يعطيك ربي الف عافية

تانكيوووووووووو

ياعلي مااااااااااااااااااااااااات

المهم مات بعد ماقلبه ارتاح..
بس بصراحه تعرفينا أميرة مانبغى احد يموت>>بكيفك هو استغفري ربك بس

والحلقة الأخيرة بعد ؟؟

مانبغى القصة تنتهي ...

بالانتظار..يعطيك العافية خية..
موفقة يارب..
دمتي بعين المولى الجليل..

مآآآآآآآآآت حمييييييييد ...!!!!!
لآتقووووووووووووووووولوووووووووووووووووووووووآآآآ ....!!!!
مآآآآآآآآآآآآآآآآآآآآآآآآآآآآنـآآآ ...

أميروووه مآتسويهآآآ عـآآآد أهئ <<-- من جدها البنت ..
ويلييييي على حميد ...

البطل ما يموت هههههههع
يسـلمو على الجزء القاتولي ..!
ذبحتيني بقتله هع
بانتظآر الجديد
كبريآء

يوووووو حميد ماااااااااات الله يرحمه ( هذا اللي ما تشتهييه هع بس اذكروا محاسن موتاكم هع هع )

اهم شي ماات وهو مرتاح على الاقل اخوه حس به وشاف اولاد اخوه

اسأله واستفسارات في ذهني هع هع ....... << ايووه يم ذهن خخخ >>
* الحين ويش بسوي ابو مالك باللي عطاهم حميد ؟ ( اكيد بياخذهم مره ثانيه هع )
* ويش اخباااار ليلى الحين ؟
* ويش خبر صالح صحيح لو لا ؟
* وبتعرس ليلى على مؤيد لو لا ؟
* وعادلوووه بيطلع من السجن لو لا ؟
* وجاسمووه بيطلع من السجن لو لا ؟

والسموحة خيتو
يلاااا ننتظر البارت وبنعرف كل شي بيطلع في الحلقة الاخيرة هع هع
يسلمووو امووور على البارت كله فيه اكشن حزين حلووو روووعه
وننتظر البارت الجديد
قصدي الحلقة الاخيرة
واااال
لا تقولي عورتي قلبي بالحلقة الاخيرة
والله يعطيش العافية
ما قصرتي خيتو
وتستاهلي كل خير وسعادة

يوووووووو مات حميد الوه ميتيه دبوه مافيي

قلنا بلا موت لاصيحينا عاد اميروة

فرحينا في الجزء الأخير

اني متوقعه شي بس مابقوله اخاف يطلع خطاء اذا طلع صح بقول

عن 3 ملايين الي عطاهم حميد وحميد وصاه اياخدهم بشرط

يالله ننتظر امور

الله يعطيك الف عافيه

موفقين

,,,

لآلآلآلآلآلآلآلآلآلآلآلآلآلآلآلآلآلآلآلآلآلآلآلآلآ لآلآلآلآلآلآلآلآلآلآلآلآلآلآلآلآلآلآ حراآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآم
بعد ماشاف أخووه واولاده يموت ................ وه علي حراام
بس والله أستانست ليه من قلبي ........................ وحزنت له من قلبي

ياآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآربي بتخلص القصة

ننتظرك أمور لالاتأآآآآآآآآآآآآآآآآآآآآآآآآآآآآآآآآآآآآآآآآآآآآ آآآخري علينا

خساره مات حميد بعد ما عطاه أبو مالك الفلوس... اسسسسسستغفر الله

ما نمبى القصه تنتهي خليها تطول أزيد :(

يعطيك الف عافيه خيه على المجهود واتمنى لك المزيد من التقدم وراح اكون من المتابعين للقصه
تحياتي لك

حرام حميد مات انصدمت

اتوقع حميد بيعطي فلوسه علي

وحرام تخلص القصه

ونبي قصة جديده

تسلمي على البارت

بسم الله الرحمن الرحيم

اللهم صل علىمحمد وآل محمد

وعجل فرجهم

يااااااااي الجزء يجنن ما شاء الله

وشوشف يجننوهو يعاير ناصر مع قصته الجديدة هع هع

وأبومااااااالك يرفع الرأس على الي سواه

بس ضيقتي خلقي يوم مات حميد

والله يقوم سوسن بالسلامة

ونفرح في علا وهشام

وليلى ومؤيد

ونبغى نعرف شيءعن صالح

وموفقة بالقمر

بالانتظار