غربة الأوطــــــــــــــــــان...

اموورره

تسلمي حبيبتي على الاجزااء

والله يعطيك العافيه ويقضي حاجتك

وكااظم معور قلبي يكسر بالخااطرر

وشفيق وصاادق هم الا مخرربين على الشقه

ودااد الله ينتقم منهااا

والباقي ماعليهم كلااام :bigsmile:

الله يجنن هـ البارت

بس موو كنه قصير ؟!

****

ويش بصير في علاء ؟

وحضرتهآآ هالوداد كله تفهم الأمور بالعكس ... وليش تسحب أمآني من شعرهآآ وتمشي بهآآ على كبر الصاله ويشو هي بقره ؟

****

الشله إللي في الريآآض << شلة يوسف

لو ما هالشفيق كآآن إحترقت عليهم الشقه زين طلع حآآسة شمه قويه

****

ننتظر البارت القادم

أموووور

مررره روعه البارت

لوع كبدي هالشفيق

والشباب أحيي تعاونهم ماشاء الله عليهم

ومراد الله يهديه احسه طيوووب

ووداد الله ينتقم منها

شفيق كالعاده كاسر خاطري

بس ابي اعرف علآء وش فييييييييييييه ؟!!!

دمت بتميز

///

يؤ يؤ
ويش صار بهالجاهل:huh::wacko:
حماس هالبارات
يعطيش العافيه أموره الحلوه
بنتظار التكمله
تحياتي

قامت الهوشه عظيمه ...!
بـآرت حلوو ..~
تسسلم الإنـآمل أمور ..
مسكين مرادو بس يستآهل ..}
وهذا صادقو يطلع برآ أحسن ..~
عبداله لا يصدق روحه واجد بس .. < نصيحه
مآننح ـرم

اتوقع علاء مارضي امه تحمله وراح لاماني 21%
دوادو الحقيرة لما ضربت ماريا جتني الفوحة كيف متحملتنها صاحبتها مادري .. وحشششششششش
ومحمدوا شكله طالع على امه الـ.............. تشفير
باقر عاقل وصبور والله يفرجها عليهم ويرجع وليهم بالسلامة ..مع اني ما توقع بيرجع بالسلامة >> تفاول على الرجال
ابو رمزي ان شاااااء الله مايرد ام مجتبى خايبة يارب
عساه طاعون داك اللي مايصلي!! عفر وين عايش؟!! احس السبب في حالته انه امه وابوه ماربوه عدل ولا انتبهوا له ومشغولين بالفلوس حسبالهم انها كل شي .. احس بيظل يشعر بذاك الشعور من زملاءه وبيكتم وبعدين بينفجر في واحد منهم وبيفضفض له والله يكثر خير يوزر سيف98,7%.. اعتقد انه بيوعيه ومراد شكله احساسه مرهف واحس انه وحيد اعتقد لما يصحى بيحس وبيعقل .. و الله يهديه
كاظم حاسه فيه .. لكن خوش رجال ..زين منه متحمل ما طلع من الشقة..لو اني مكانه كان نمت في الشارع
لكن صادق بعد احسه خوش
شقيقو ان شاء الله تنزل عليه فلونزا حقيقية >>لكن مو للحيوانات ههه هالجني.. اموت واعرف وش ماضيه هو..وحبيب والسيد
ساميو الله يعينه .. من جد صعبه محنته ..حاسه فيه
الله يجزي قيصر زمانه كل خير ان شاء الله ويعوض عليه دنيا واخرة
ياعلي ..ردي بلحاله بيصير قصة اذا مو رواية بعد هههههههه
والله اميرة مادري ويش اقول
احتمال ايام المدارس ما ادخل اللا اربعاء وخميس اهييييييء اهييييء
المهم تسلم يدينش على الجزء الــــ......... >>مو تشفير مادري ويش اقول خلص الكلام لحليو عفر هه
ربي يعطيش العافية ويسلمش من كل مكروه ..
تحياتيــــــــــــ لك استاذتي

توقع علاء مابيبغى أمه

بيروح لعمته وبيقهر أمه هههههههههههه

استمتعت بالبارت يجننننننننن

وننتظر التكملة بسرعة عاجلة


ماأدري ليش على قرايتي لرواياتش مازالت ضعنا ياصبرنا مأثرة فينا بقووووووووووة
مميزة جدآ وماأمل من تكرار قرائتها

موفقة ومقضية الحاجات بحق محمد وآل محمد

رررررررررررررررررروعة البارت يعطيش العافية غناتي

قريت الردود وتقريبا تصهم زي توقعاتي فمابعيد وأزد علشان لاتملي خخخ

ننتظر البارت بفارغ الصبر بس خسارة مافيه لا اليوم ولا بكرة

تحياتي لك عزيزتي

وتحملي بروحك
وراح أقول لك عبارة أعز صديقة لي "" لاتنسي دوماً أن تبتسمي ""

هللشفيق وش قصته زول شبدنا وياهم

::

شكلها العزومه بصير فيها اكشن ومصطفي بطيح على احدههههه


::

ننتظر الجاي وربي يوفقك غاليتي اموره

موفقينـ

بارت اكثير حلووووو

وش هشفيق الي لوع كبدنا

اتوقع انو علاء بيروح الى عمته وامة بتنصدم


ومراد شكلة حساس ويمكن يتعدل ويصير يصلي

ننتظر البارت الجاي

اللهم صل وسلم على محمد وآل محمد وعجل فرجهم وفرجنا بهم ياكريم...

سلامتش غناتي ماتشوفي شر ان شاءالله....


البااارت كله شبقااات هههههههه ......الله يستر بسس..

أما وداد مي آدمية حشى الله يغربل ابلييس


تسلم الأيادي أمور ....بانتظار البااارت الجديد :) والله يستر ..


موفقة لكل خير إن شاء الله تعالى

دمتي بعين المولى الجليل

دآدو هآذي مو متحملتهآ هآلنحيسه << عآشت الدور ..

تحمد ربهآ بعد أنقذت ولدهآ
جزآت الخير سوآد الوجــه << هــّدي ..

يعطيش العآفيه أمووره غنآتي ...

عسآش عآلقوه ..

وااو بارت رووعه
التـــــــــعليق
ودادووه مااشتهيها تجيب العله
وهذا شفيق لوع جبدي بحركته
بس زين طلع ينفع شوي
وهالعزيمه شكلها حركتات
وعلاء مسكين وش بيصير فيه
وسام 100%هو ناجي
والي كلمته اخته ماريا
وعبد الاله يحلم وااجد شكله
وبـــــــــــــــــــس
بانتظارش امووره
والله يصبرنا على الاجزاء القصيره
تحياتيـ ..

وش بيقول علاء اكيد بقول لها شي بيصدمها وبخليها تفكر بالي تسوية بالناس
والله بارت حده جنإأآإأآإأآن
با أنتظار القااااادم
تحياتي
نور البدور

عن جد روووووووووووعة

انتظر بشوووق


تحياتي

في لانتظاااااار القادم:nuts::nuts::nuts:

مرحبا
الله يحيي الحلوين
وتعاليقهم الكشخات والحركتات..
الهي لا يحرمني منكم ويخليكم لي دايم دوم...
تسلمو من كل مكروه..
تخمينات رهيبه من البعض.. تجبرني اضحك .. واحيانا اصفق ليهم بالعشره...
من البارت الحين بيعرفو روحهم..
الف شكر .. وعوافي ليكم
تفضلو...

شوي علاء زاد صياح..
وداد : ــ امي .. امي بسم الله عليك تعال تعال...

ولا تتفاجأ وداد الا علاء قايم ورايح لعمته و ماسكنها بالقوه..
اماني حملته وصارت تمسح عليه وهو مستمر في الصياح..
وداد واقفه وهي مره مندهشه..:
ــ علاء .. تعال للماما...
علاء يصرخ : ــ لاااا..
تحاول اماني تنزله عالأرض شان يروح لأمه..
هو ابدا متعلق فيها ولا راضي يتركها ..
وداد تمسكه تحاول تسحبه ..
علاء مصر وكلما سحبته وداد زاد صريخ..
بهدوء .. وببطأ و القهر يملاها.. تركت وداد علاء عند اماني ودخلت غرفتها وسكرت الباب..
اماني صارت تهدي فيه وتفكر في وداد.. كسرت خاطرها حركتها وهي تنسحب...

شوي الا بدخلة محمد و هو ملطخ تلطيخ ووراه باقر اللي راح على طول للمجلس << محل قعدتهم هو وامه واخته..
محمد يسأل ايثار وهو مره واصل حده : ــ وين امي .. وينهي...؟؟؟
ايثار خافت منه : ــ ويش فيك ؟؟
صرخ عليها : ــ من اخوووووووووووش المعفن..
ايثار فتحت عواينها : ــ اخووووي مو معفففن..
محمد يدفها..: ــ وخررري زين.. امااااااااااه.. امااااااااه
طلعت فرات من الغرفه شافت شكله مكفخ .. شهقت شهقه: ــ ويش صاير؟؟
محمد : ــ وين امي؟؟
فرات على علم بالشبقه واللي صار .. كانت متفرجه : ــ اكي .. في غرفتهم..
ويفتح محمد باب الغرفه ... الا يلاقي امه على سريرهم وعاطيتنه ظهرها..
محمد بغضب : ــ اماااه..
ما التفتت له ولا ردت عليه..
محمد : ــ اماااااااااااه...
ماردت..
دخل محمد ليها وصل لنص الغرفه ..
وداد بصوت مخنوق : ــ اطلع برى الحين ..
محمد : ــ امااه شوفي باقرووه ويش سوى فيني اليوم ضر....
قاطعته وداد بصرخه: ــ قلت لك اطلع برررررررررى الحين.. مالي خلقك ...
محمد خاف من امه طلع وسكر الباب..
وداد ودموعها تصب على خدها .. و تمسحهم بقهر ..
ــ اماني.. هين .. اراويش... يا اني يا انتين في هالبيت ..
محمد راح غرفتهم لفرات:
ــ ويش صاير ؟؟
علمته فرات بالسالفه....
محمد : ــ اففففففففف منهم.. عله على الشبد..
فرات : ــ حرام عليك لويش تقول كذا..
ــ انطمي بس..
محمد مره مزاجي.. يوم وياهم و عشره عليهم.. حسب مصالحه.. وبما انه متشابق ويا باقر للتو... فصاير مره حاقد...

في المجلس .. اماني تهدر على باقر على اللي سواه..
باقر ماتحمل .. ولأول مره يصيح بهالشكل قدام امه .. دموعه بعفويه تتناثر ..
ما يشاهق ولا يصيح مثل باقي الأطفال .. مع انه صغير 9 سنوات فقط..
صار يفضفض ...
ــ محمد ما يحبني.. وكل يفشلني قدام الصبيان.. ودايما يعايرني ان حنا ساكنين عندهم.. و كل يبغاني احل واجباته. .. و يتصدق علي بفلوسه .... معتبرني عبد عنده .. وكل يضربني .. وانا كل ساكت عنه.. امه كل توقف بصفه وهو الغلطان.. وانا كل تهزأيني وانا المظلوم... متى بيرجع ابوي .. نبغى نطلع من هالبيت...

اماني ماقدرت عور بقلبها ولدها.. ,,, وكثر كلمة "كل" في كلامه.. حسته شايل ضيم و قهر وايد في قلبه وساكت... حضنته وهي تمسح على راسه :
ــ اصبر غناتي.. اني ويش بيدي.. اني على مدرستك.. لو فيه مدرسه قريبه من بيت ابوك ابو مجتبى.. لو اقدر على تكلفة باصات.. لو احس نفسي ماباضايقهم بوجودي في البيت كان ماعليه رحنا وياهم.. ياولدي ما اقدر ارجع شقتنا وحنا لحالنا مالينا والي .. ومانقدر على دفع الأيجارات الحين.. اصبر غناتي .. اصبر والله يفرجها ...
باقر شابح بعيونه اللي وقفت دمعاتها.. وساكت ....

سام فتح عيونه...
لقاها الساعه 4 الفجر تقريبا.. وانتبه لروحه انه نايم في غرفة قيصر ..
رفع راسه وكان مره يعوره يحسه شوي وينفجر .. قام يدور على قيصر وين راح.. لقاه في ممر الأنتظار نايم على كنب ..
جى بيطلع من العياده.. شوي رجع يدور على دفتر وقلم بيترك لقيصر رساله..
فتح بهدوء دروج المكتب لقى قدامه دفتر.. فتحه بيكتب في احد اوراقه.. لقى قيصر كاتب فيه..
طلعت منك ياعراق وماعاد يلفيني بيت..
افكر واقول ليش ياربي آني شنو سويت ..؟؟؟
حياه كريمه بهذا الوطن كل اللي اتمنيت ...
وهسا على بعدك حتى الثواني عديت ..!!

المن اشكي ياربي؟؟ بس الك اشتكيت ...
وعلى كلمه الغربه اني إشقد بكيت ...
للّمه وهلي وناسي آني حنيت....
وحدي بهالغربه اني وهمومي ظليت....
اعيش بكابوس البعد عنك و الي هسا ماصحيت....

سام عوره قلبه,,, يحس نبضاته تتسارع...
فر الصفحه الثانيه لقى فيها اشعار غزل كاتبنها قيصر لزوجته المرحومه..
وينچ انتي ..؟؟
ادور عليج..!!
ماخليت طيرٍ ما نشدته عليـچ... !!
ادور عليـچ..
من اول يوم لفقدچ .. صار الشتا في حياتي صيف..
صرت اشوفـچ حلم سرمد و تصحيني طيف ..
حاير...
داير بهالدنيا دوختني الدواير..
شايل ذكراچ مثل راية حزن..
چني مركب بنص بحر ثاير...
طويت إشراعي .. لنه اشواطيك بعيده..
ولآني برايح .. لنك منت راجع..
و لاني اقدر اشتريك هالسا .. ولآني بايع..
ذابل بهمي مثل نخلة كسيرة على الشرايع..
ليلي طاااال .. وجرحي يتناسل حزن..
ابـچي و تنزل دموعي خناجر
ومن كثر حزني غدت روحي مقابر ..
وينـچ انتي ؟؟

سام ماتحمل .. صار يطالع في قيصر و معور قلبه مره..
فتح الدفتر من ورى لقى صفحه فاضيه..
وكتب له..

وقبل لا يطلع اخذ الشرشف من على السرير .. وغطاه ..
تركه وطلع..
قيصر ودمعه تنسل من عيونه وهو نايم...
يحلم... حلم حصل له بالواقع...
يصارخ ويصيح وهو ماسك ايد مرته بعد ما طاحت و حالتها خطيره .. وعلى السرير المتحرك الممرضات يركضو فيها لغرفة العمليات ... :
ــ لا تخليني .. لا تتركيني دخيلچ مالي احد غيرچ بهالدنيا...
تنفلت بهدوء ايدها من ايده..

يفتح قيصر عيونه... وينتبه انه مغطى بشرشفه...
يقوم ويدخل الغرفه بالسرعه.. يلقى السرير فاضي ..
يطالع الساعه:
ــ وين راح هالسا..
انتبه للدفتر على مكتبه مفتوح وسام كاتب..
ــ اشكرك على كل شيء ...
على فكره .. كتاباتك رائعه.. آسف على تطفلي ..
قيصر بأبتسامه حزينه.. : ــ ياااااااه.. شكثر انت قاسي يا سامي.. ولك هذا اللي إقدرت عليه.. دخيل الله رقم موبايلك.. الظاهر ما رايدني اساعده... الله يوفقك ...

سام في طريقه للمكان اللي ساكن فيه مع العصابه.. طول الطريق يتنفس بصعوبه... الين وصل لقى مارك على الباب توه راجع من سهرته.. وسكران...
مارك: ــ هيه انت .... اتعرف .. لا شيء يستحق العناء .. لا شيء .. فأنت لست سوى مجرد صعلوك صغير .. وفي أي لحظه ستسحق على يد جون..
ويضرب كتف سام : ــ صدقني .. ستنتهي.. لا محال
سام واقف و ماله خلق مارك ولا حقده الدايم..
دخل الغرفه وكان ستيف نايم.. قعد على سريره.. وصار يعيد كلام مارك بهدوء:
ـــ فعلا .. لا شيء يستحق العناء.. اليس كذلك يا ستيف .. فمن انا بينكم.. سوى صعلوك صغير .. سينتهي أمره اولا و اخيرا..

ماريا رجعت من المدرسه.. وهي على الباب بتدخل وتحس قلبها يراقع ما هي مشتهيه تشوف رقعة وجه وداد...
دخلت الصاله لقتها فاضيه.. وهدوووء ماهو معتاد البيت يصير كذا..
ــ خير اللهم اجعله خير .. مايندرى ويش صاير..
دخلت على اماني المجلس .. لقتها قاعده تخيط ازرار قميص باقر .. و علاء وباقر نايمين على جنب.. وايثار قاعده قاعده تلعب في العابها..
اماني : ــ هلا ماريا.. اكو غداش عالفرن روحي تغدي .. تغدو الصغار ونامو..
ماريا ..: ــ ويش صاير ..؟؟ ويش فيش وجهش متغير..
قعدت ماريا .. و اماني صارت تحكي ليها اللي صار ...

في المطعم.. حبيب يكلم الهندي ويسخر :
ــ حط دجاج عدل وشوية لحم .. وشوية سمك... مع الرز..و ليش هذا دجاج كذا ابيض .. هذا لحم دجاج لو ضب
الهندي : ــ دجااج.... انت يبي ضب؟؟
حبيب : ــ لااااااع.. قال ويش ضب .. مو ناقصني الا آكل الأم العوده للوزغ..
كان في المطعم بدو .. دخل واحد منهم عرض وهو يضحك:
ــ وش من وزغه.؟.. الأخ من وين؟؟؟
حبيب قال في باله.. : ــ اووووه تدبسنا عفر ..
فغير اللهجه : ــ من الدمام الله يسلمك..
ابتسم البدوي ومستنكر اللهجه دي من الدمام : ــ الله يحيي الدمام و أهلها.. ياخي وش بلاك قارف الضب .. والله انك لو تاكله يعجبك.. ترى طعمه لذيذ ..
حبيب متنرفز..: ــ لا .. فيه العافيه..
البدوي ينغز حبيب بكوعه ويغمز له : ــ جربه ماراح تندم.. ترى طعمه مثل هذا .. بس الحبيب برّي .. هههههههههه
ويأشر براسه على السمك ..
حبيب فتح عواينه ويحس روحه بيرجع:
ــ هاااااا..
البدوي : ــ هههههههه والله ان كان انت تحب السمك.. ماراح تعاف الضبان من تذوقها..
حبيب خلاص حامت شبده.. وبأبتسامه عريضه :
ــ هه.. دام انه زي السمك.. ليش ماتخليه بحاله... لا مشكور..
وفي باله: ــ يلعن ابو بليسك...اشوى على حالي ماحب السمش اساسا ..
حمل اكياس الغدا وطلع يركض وهو يسب ويتذكر الوصف :
ــ ويييع يلعن شكلك كأن احد سالك ويش طعمه...

السيد ويوسف قاعدين يسوو سلطه .. جاب ليهم حبيب الأغراض قبل لا يطلع للغدا..
كاظم قاعد يقطع الجحه..
وقف مراد على باب المطبخ:
ــ كح..
ماحد انتبه عليه الكل مشغول..
مراد : ــ فيه شي اسويه وياكم..
يوسف التفت بأبتسامه لشيمة مراد .. : ــ ممممممم.. تعال اخوك.. غسل فواكه..
ابتسم مراااد وشلح قميصه:
ــ حاضررين..

شفيق طردوه الشباب بطريقة لبقه برى المطبخ لا يجيب ليهم انهيار عصبي ..
صادق ماكلف على عمره حتى يجي يشوف ويش يسوو....

خلص مراد من تغسيل الفواكه.. وتوقل جنب كاظم على الأرض واخذ من التبسي فلح جح.. وصار ياكل فيه.. :
ــ اللله .. خوووش يحه.. بس لوو كانت بارده شوي..
مراد بيطلع الطعامه من بوزه وهو يتكلم طفرت وضربت قريب عيون كاظم..
كاظم التفت لمراد.. مراد بكل عفويه مسك كم قميصه وصار يمسح فيه وهو مره مرتبك :
ــ مسامح اخوك ما اقصد..
كاظم ابتسم ..: ــ لا عادي شدعوه .. هي الا طعامة جح.. مو رصاصه..
ضحك مراد..
يوسف ابتسم.. وفي باله:
ــ هالمراد بداخله اشياء واجد حليوه بس يبغى له مين يكتشفها..

الا بوصول حبيب .. وهو مره ميت تعب..
يوسف يشيل الأكياس من ايده:
ــ عوافي ابو الحب ..
حبيب يرمي روحه جنب كاظم على الأرض :
ــ والله خوش جحه .. اهوو عطني فلح بس..
وصار ياكل .. واحد.. اثنين .. ثلاثه..
كاظم ضرب ايد حبيب : ــ ويش فيك بتخلصها قبل الغدا.. بينترس بطنك ماي و ما بتاكل بعدين...
حبيب وفي بوزه جح:
ــ افففف منك..
ويطفر ماي جح على وجه كاظم..
كاظم ... فيه ضحكه : ــ ويش فيكم اليوم علي ..
حبيب قام عنه : ــ تستاهل .. هاك بعد..
ويطفر زياده..
كاظم يمسح وجهه: ــ ويييييييييع يلعن شكلك..
حبيب وهو ميت ضحك : ــ اشوى سبه عربيه .. لو هندي دست فبطنك..
كاظم وهو يطالع حبيب على جنب : آب هَوْلْناك << إنت فظيع او مو طبيعي.. ((صيغة استنكار لقباحة أمر ما ))
حبيب : ــ أه.. ويش قلت .؟؟ ويش قلت؟؟
كاظم فيه ضحكه : ــ قلت ياخفافة دمك بعد شبدي ..
حبيب يحك راسه : ــ بل كل هذا في هالكلمه... يللا باحاول اصدق .. شويات وبنزل اشوف الجماعه لويه مابين ولا نفر فيهم.. الظاهر مستحيين .. إلا وين صادق ..؟؟
كاظم : ــ ويش تبغى فيه..؟؟
ــ شان يفرش السفره ويوزع الأكل عليها..
مراد : ــ انا.. انا بافرش ..
وقام مراد يعاونهم في التحضير ..

حبيب نزل وطق الباب على الجماعه اللي تحت.. فتح له محسن ...
حبيب : ــ سلااام عليكم
محسن: ــ عليكم السلام.. هلا حبووب .. اخبارك واخبار فلعتك..
حبيب : ــ هاا شوفها خفت شوي.. أزمتني يلعن شكلها.. لو بعد شعري ناعم غطيتها به.. الا فلافل .. هاا وين الشباب .. ما بتركبو غدى..؟؟ ماباقي شي على المغرب ..
محسن : ــ والله كلناخالصين بس قلنا ننتظر مصطفى يرجع من الكليه ونجيكم جميع..
حبيب : ــ اركبو وهو تالي يجي ..
محسن : ــ بلاك ماتعرف صطيف وخجله.. اقول اخوك تفضل داخل عن الحر على ما يجي مصطفى..
حبيب : ــ زاد الله فضلك .. خلاص ننتظركم فوق ..
ــ على خير..

نور تعقم جروح ابوها وهي تحايل فيه:
ــ يبه .. المستشفى قالو هم يعقموه لك.. لويش مصر ماتروح.. ""؟؟
ــ اهووو يابتي هو تعقيم تعقيم.. هذانا استخدم معقم و تلفيهم لي ويش فرقت...؟؟
ــ بس يا يبا..
ــ لا تبسبسي ولا شي .. آآه ويلي ... قاع رجولي تعورني..
ــ هنا.؟؟
ــ ايه .. آآه.. كل من هالتنك العله .. شقها شق..
ــ ياعلي صاير حوالينها اسود..
ــ ويش تبغي في رجول شايب .. نظيفه تلق .. اكيد مقحلفه وحالتها لله..
ويهمس لبنته : ــ إلا ماقالت لش امش وين كانت بتروح الصبح ؟؟
نور بأستغراب : ــ لا... لويش..
ابو مجتبى : ــ طلعت من غبشة الغباش هي و امير .. على قولتها بتروح تمرخ وحده.. خذت ليها فلاف ساعات وعودت تالي.. بس انا مو داشه مخي .. بالعاده لو ويش ماتاخذ امير وياها..
ــ يمكن خافت لا يأذيك و انت رجولك متعوره..
ابو مجتبى وهو لسا مو مقتنع: ــ شدعوه امير كل قاعد لحاله .. و ساكت.. واذا مره بيزعجني يا بيقعد يون يا بيعيد كلامي.. بس طول ما انا ساكت.. بيظل هو في زاويه ما بيتحرك...
<< معروف عن المصابين بمرض التوحد .. الأنطوائيه الشديده والميل للعزله.. الا في حالات نادره..
ــ مادري.. تبغى اسألها لك.؟
ــ لا تالي بتقول ويش دراش .. وبتقعد تهدر.. انا حارق روحي على ويه.. على ماميش.. خلها وين راحت يعني..

ابو مجتبى كان خايف من شي واحد.. ويدري ام مجتبى تسويها.. انها ممكن تروح الشؤون او لأي احد تستعطف بأمير على شان يعطوهم اعانات.. سوتها قبل هالمره و عصب عليها وشابقها ..و كان رد الشؤون ان عندهم مجتبى ومحمد.. شباب في اتم الصحه والعافيه وقادرين على الأعانه..و الأبو لسا عايش وله معاش تقاعد من الحكومه..

نور : ــ يبا.. عاد اتصل على مرت اخوي اماني.. شوف احوالهم.. اكي ودادو مرت اخوها اسمع مأذتنهم اذيه اليوم ضاربه ماريا اخت اماني.. وكل يوم ماريا تشتكي تقول انها مو مخليه اماني وولادها في حالهم ..

ابو مجتبى : ــالله يكون بعونها.. والله حسبة بتي وغاليه وما تنسى .. بس ويش اقول .. إييه.. هالدنيا ومصايبها تلهي الواحد.. لويه ماتخلي امش تكلم..
نور : ــ نسيت؟؟
ــ نسيت ويه؟؟
ــ ان وداد هي اللي كل ترفع التلفون .. نسيتها يوم تفشل امي وتحرجها قدام اماني.. تسوي حالها كأنها راعي كبينه.. تحسب بالدقيقه ..وتقعد على راس الواحد طول ماهو يكلم.. جلفه حدها.. ما يكسر راسها الا الرجال ..
ــ انا لله.. انا مانى داري شيفا صابر عليها هالحسن.. الظاهر انه مكسر راسها ..
ام مجتبى تطلع من المطبخ :
ــ مين ,؟؟؟, ام الدود الراعيه..
نور : ــ هههههههههههه بل..
ام مجتبى تمسك التلفون وتقعد جنب ابو مجتبى :
ــ الله يكون بالعون ويساعد.. هاك..
وتعطي ابو مجتبى السماعه بعد مادقت الرقم..
رفعت ايثار : ــ الوووه..
ابو مجتبى : ــ هلا ابوي .. هلا ياغناتي
ايثار بفرحه : ــ بابا ابو مجتبى..
ــ ياعمري .. شحوالش ..ويش مسويه...
ــ زينه اني .. بابا ابغى اجي ليكم خل عمي محمد يمر علينااا اليوم الأربعا عادي مافي بكره مدرسه على باقر ..
ــ هههه ان شالله يبه .. وين امش..
ــ دقيقه..

وراحت ركض لأمها ..
ابو مجتبى .. ــ ههههههه غريبه مو وداد اللي ردت ..
شوي اماني ردت عليه: ــ هلا عمي ...

وصل مصطفى وركبو الشباب.. صارو يسلمو وبعدها يوزعو روحهم على السفره..
محسن : ــ بل .. جايبين اكل وايد
نوري يفلص محسن ويبتسم : ــ ما شاء الله.. لا تواخذوه .. هالبل كل على لسانه...
محسن بخجل : ــ اه.. ماقصدي احسد انا.. لا تخافو...
مصطفى يبغى يشوف له محل .. أشر له يوسف في الجهه المقابله لمكان وقفته يجي هنا ويقعد جنبه.. كان يوسف واقف ..
مصطفى وهو بيعبر .. داس بالغلط على طرف صحن من صحون الجح و تنفر شوي منه على السفره ..
ايمن يطالع محسن على جنب ويهمس له : ــ من عيونك الحاره ياحسود
محسن عصب فيه وبقهر يهمس له : ــ حسابك بعدين..

مصطفى انحرج حده.. كندس بيلمه في الصحن في نفس الوقت كندس مراد وياه .. وصقعت روسهم ببعض ..
مصطفى : ــ آسف ..
مراد : ــ شدعوه.. حصل خير.. استريح حبيبي خلك منه انا باعدله..
السيد ابتسم وفي باله :ــ والله اليوم مراد خوش واحد مبيضنها.. اخ بس لو يحافظ على صلاته ويبطل هالأغاني..
ونفس التفكير كان يجول في راس يوسف ..

مصطفى خلاص تلون .. اشارة مرور من الخجل ...
محسن يهمس لهاني : ــ خخخخ مسكين صافيوه كم موقف وموقف له ويا هالجماعه احسه بينكمش من الفشيله..
هاني : ــ خخخخخ الله يعينه عاد هو يرحم روحه من هالخجل شوي ؟؟!!.. سحارة طماط الله يسلمه..

اماني : ــ بس .... لا مو على شان شي .... على اختي اني .. مابقدر عمي..
ماريا عرفت ان ابو مجتبى يبغاها تروح ليهم بس هي ما تبغى تخليها لحالها.. صارت تأشر على اماني وهي منقهره منها.. ان ماعليها منها...
ابو مجتبى : ــ جيبيها وياش يا بتي .. بناتي كلكم ولا تقعد ويا هالجنيه وداد...
اماني : ــ اباشوف .. خلاص شوي وبارد عليكم .. حياك عمي..
سكرت اماني وصارت تقنع في ماريا تروح وياها..
ماريا : ــ مجنوووووووونه.. اروح وياش .. ماني..واليوم اربعاء واحتمال كبير يخليش عمي تباتي وياهم.. ماني صاحيه مصفوقه على راسي..
ــ هههههههه بل بل حشا كل هذا لأن فيه عزوبي في بيت عمي..
ــ وهل عندك شك...!!؟
ــ مسكين أحمد.. هادئ و مؤدب ..
ــ كل الناس مؤدبه.. ماقصدي شي .. بس حطي روحش محلي .. ماني رايحه.. روحي ولا تربطي روحش فيني لا انتفش..
ــ بل صايره فك مفترس .. متأكده ما بتتضايقي لحالش ..
ــ ويش علي شهربان الباب بالباب.. الو شهروبه تعالي قعدي وياي .. اكل باكل لحالي ماينخاف علي.. ونومه اسكر علي الباب ويادار مادخلش شر..
ــ براحتش غناتي.. المهم احقري ولا تحطي لسانش في لسانها.. خل باقر مسكين يغير جو شوي..
ــ ان شـــــــــــــــالله .. مسكين يستاهل خليه يستانس..

واتصلت اماني بيت عمها حق يمر عليها احمد...
ايثار الدنيا مو سايعتنها من الفرحه.. بتروح بيت ابوها .. بتستانس في الزراعه.. وبتلعب ويا امير...

في الرياض .. في شقة يوسف والشباب
قعدو على السفره ونظمو روحهم..
حبيب : ــ بسم الله.. عليكم بالعافيه
الكل : ــ الله يعافيك..
وبدو ياكلو وهم يسولفو..
السيد : ــ ياجماعه .. سمك هنا.. مين من انصار الأسماك.. تفضلو..
نوري : ــ انا.. ماعليك امر .. ابغى..
محسن : ــ وفي احد يعوف السمك.. انا بعد..
هاني : ــ زعيم الودامات مستر فش .. انا بعد..
السيد : ــ ههههههه ما شالله عليكم انصار وبالقوه.. ها مصطفى .. ايمن؟؟
ايمن بالعاده مايحب الأجتماعات فيظل طول الوقت ساكت...
بهدوء : ــ لا بس ..
مصطفى بعده منحرج فصاير مو في الدنيا..
يوسف اخذ سمكه وحطها جهة مصطفى وابتسم له: ــ اكل اخوك.. اكل ولا تفكر ..

حبيب يطالع في صحن السمك.. ويحس شبده تحوم.. تحوم.. يتذكر كلام البدوي ..
يطالع في الشباب وهم ياكلو والغالبيه يحبو السمك..
صار ياكل في السلطه .. يلهي روحه بأي طريقه.. فجأه صمت صار المكان..
شوي الا شفيق يقطع الهدوء : ــ اقول ليكم شي شباب..
كلهم التفتو عليه.. شفيق يجيب ريبه اذا قرر يتكلم .. اكيد السالفه خطيره..
شفيق : ــ بس لا تسبوني ..
حبيب : ــ خير ان شالله..!!
هاني وهو ياكل في السمك : ــ قول اخوك ولا تستحي..
شفيق والأبتسامه تزيد وببرود :
ــ يقولو اهل الرياض ان طعم الضب مثل طعم السمك
هو ما قال كذا ..
كاظم كان ياكل جحه.. شرق بها..
حبيب خلاص قام الحمام يركض .. يحس روحه بيرجع خصوصا انه كان ماسك نفسه طول الوقت..
هاني ماسك السمكه .. حطها على جنب..
محسن يبلع اللقمه بصعوبة و ببطأ..
نوري .. : ــ هه..هههههه..ههههههههههه غربل الله شرك.. قرفتنااااا..
صادق : ــ عن جد لا تعليق .. ليش ما تحترم النعمه و تحترم الناس اللي قاعده.. ليش تنرفزهم كذا..
يوسف يطق على ظهر كاظم ويشربه ماي ..
ــ حلو حلو..
كاظم دموعه اربع اربع : ــ إي خُدااا ... إي خُدااا ... << يالله او يا الهي ..
حبيب طلع من الحمام .. >> مارجع بس شبده شوي حامت
ــ شباب .. اخزوا بليس و طنشو الموضوع..
هاني : ــ اهووو.. مره عاد فاضين ندق خبر لكلام.. اكلو بس..
نوري يبغى يغير السالفه فصار يسال كاظم : ــ تدخن اخوووك؟؟
كاظم بأستغراب : ــ ايه.. كح كح.. شدراك..
نوري ابتسم : ــ من كحتك عرفت..
محسن يساسر هاني : ــ بووووووم دف دف دف صاروخ ارض جو .. اساسا يوم نسلم على كاظم ريحته دخان قال ويه من كحته.. استر عالخبير..
هاني : ــ خخخخ خله يتفلسف ماعطاه الا ربه..
مصطفى يطالع في جواله كل شوي..
انتبه يوسف عليه ...
ــ وراك شي اخوك..؟؟
ابتسم مصطفى: ــ ايه بانزل البلد اليوم..
والتفت للشباب : ــ شباب بانزل اليوم البلد .. احد بينزل ويايي..؟؟
يوسف : ــ انا ماتوقع بعدني ما ارتب اموري عدل ..
الكل هز راسه لا .. ماعدا شفيق : ــ انا بنزل .....
كاظم في باله : ــ اووه.. ابتلش المسكين اما قرر يصاحبه طول الطريق..
مصطفى : ــ متى؟
شفيق : ــ بعد ساعتين بيمشي الباص .. شوي ساعه بس وباروح...
ــ زين اجل انا وياك ان شالله..

في امريكا.. 8 الصباح..
جويل تتصل على سام ..
رفع سام : ــ مرحبااا
جويل : ــ مراحب .. ها.. انت وين.. بالفندق؟
ــ لا .. طلعت مشوار.. جايك هاللأ..
ــ اوكي بإنتظارك ...

سام تحت مع توم في غرفته ...: ــ توم.. اتصل بيوكي وتطمن على الأوضاع.. هل رتب اموره ام لا..
ــ حسنا...

سام بأبتسامه بارده : ــ اقتربت النهايه...

الى الملتقى...

واللهي كشته باللشقه اشواا ماحب السمك >> زالت شبدي هههههههه ..

::

يسلمو اموره عللبارت الحلو

ننتظر الباقي

موفقينـ

يعطيش العافية
البارت طبعآ ماعليه كلام

وننتظر البارت الجديد بسرعة

موفقة لكل خير

الله يلوع شبدة ها البدوي مووتي السمك
مادري كيف باكله الحين <<خلاص نفسيتي لاعت :weird:
تسلمي اموررره على البارت الجنأآإآإأآإأآإأآإأآن
وبا انتظار القادم
تحياتوو
نور البدور

رووعة بجد

بس بصراحة الله يغربل البدوي وشفيقوه وياه
على التشبيه اللي شبهوه

اماني الله يعينها على طايحت الاخلاق ودادوه
عاد من اسمها ثقيلة دم


بانتظار البااارت اليديد

بـل!!
أول مرة اشوف عقربة تصيح !! :weird:
باقر ............ ( مادري ويش اقول اهئ اهئ اهئ)
يتراوالي ابو محمد بيصير فيه شي مؤسف .. مثلا ..حادث >> ما تقدر ما تفاول على الناس
ماريو في احتمال اتصير من نصيب أحمد 71% طبعا هالاحتمال من قبل هالبارت بس كان 5%
هالسمش مسكين مظلوم على حساب الضبيان شكلي بافكر في اني احبه 0,1%
اما حركة ابو الفلاليع حبيبو ويا الجح .. صبي أصلي خخخ:toung:
كاظم عجبني احسه بدا يتعود
مراد قلبه أبيض .. عاجبني >>طراق!!.. واهله شكلهم اهملوه و ما هيأوا له أجواء روحانية ولا علموه :notrust::suspicious:.. والله يستر من صاحبه اللي كلمه في الجوال (راجع الحلقة الثالثة ) كان مو يطلع رفيق سوء.>> ان بعض الظن اثم .. احم
السيد ..احسه غامض شوي ومتحمسة اعرف ماضيه>> استر عاللقافة
شقيقوه .. ماله الا مراد يعلمه الذوق والاساليب العدله
مصطفى يمبى اله يعرس على قوية عيون كان يتعلم هههههههه
ساميو .. العملية ماشكلها بتنتهي على خير " تجري الرياح بما لا تشتهي السفن "
ستيف شكله فلة وبيوقف ويا سامي
*يوكي
نور.. الله يديم الصبر ليها
عبد الستار يمكن ياخذ صاحبة اخته 97%
تحياتي لاغلى استاذة ...
و.....تابعي:icon30:

مشكورة أختي
تسلم الأيادي

يسلمو اموره بارت روووووعه
تعاليقي خلصت
بس حرام اني احب السمك
بانتظار البارت الجاي مو تطولي علينا
تحياتيـ ..

يسلموا على الجززء

اممم الوصف اعوذ بالله

كل شي حلوووو اموره

لاهنتي

صرآآحه أميره بآآرت روووعه

مآآآعندي تعليقآآت

ننتظر البارت القادم

يعطيش ألف عافيه قلبوه
من جد رووعه
بتظار البقيه

:embarrest::embarrest::embarrest::embarrest::embar rest::embarrest:اخيرا وصلت



والله كانت نفسي بالسمك بقوه اوفففففففففففف كرهته


عاد ماشبهه هالبدوي الا بهالعدو


وهالشفيق ضروري يكرهه على الشباب ويذكر الموقف


مااقول الا ربي يعين مصطفى الخجول عليه طووووووووول الطريق شكله بيطفره تطفير بيخلي


مصطفى ينزل مشي ولا يصاحبه هذا اذا رجع صحيح بس ساعه وماتاخر عليه


والجح سالفته سالفه واخر شيء ينداس عليه لااحول


واخيرا بيت ابو مجتبى حسوا في المسكينه وبياخذونها تغير جو عندهم جات بوقتها تبعد عن

ودادوه النسره


وسام شكلها مابتمر بسلام


ربي يعطيك العافيه مرمش <سطار من زمان ماقالتها


قصة تجنن تسلم ايدك

اللهم صل وسلم على محمد وآل محمد وعجل فرجهم وفرجنا بهم ياكريم...

ههههههه غربااال ..لوعة شببد.....:wacko: >كانت تاكل وهي تقرا بس الحمد لله خلصت قبل سالفة الضب :huh:
شفيق ساكت ساكت ويوم تكلم طلع بـــ درر بــ تحفة من تحف الزمن....:weird:

توقعت إن ماريا تروووح ويطييير أحمد من الفرح.....>بس طلعت ذكية وتفهم.....

خوفي تعلقه يزيييد وينصدم إنها ماتفكر فيييه


أماني عاقلة عجبتني شخصيتها بقوووة...

وزين إن مراد دخل روحه وياهم ...احسه شوي شوي بيندمج وراح يتغير للأفضل إن شاء الله..

امممم كلما يجي طاري أمير...اجلس افكر...ليش اهله ماودوه مركز خاص ... ولا على الأقل يجلسوه وياهم يحدوا من أزمة العزلة والانطواء اللي عنده...>>والناس وش دخلهم قالوا لك هذيي قصة:noworry:

أمور تدري وأني اقرأ..اتخيل كل بيت واتخيل الشقة بالرياض كيف تفصيلها ....وكل شخص صارت له ملامح بمخيلتي.....

كل هذا من أسلوبك العمييق......
تسلم الأيادي حبوبة ....ع الفكر الراقي ...

بانتظار كل جديد...موفقة لكل خير إن شاء الله تعالى

دمتي بعين المولى الجليل

ما في بارت اليوم ؟

ليـــــــــــــــــــــــــــــــــش
مافـــــــــــــــــــــــــــــــي
بااااااااااااااااااااااااااااااااارت
؟؟؟؟؟؟؟؟؟؟؟؟؟؟؟؟؟؟

لوع شبدي هالشفيق الله يغربل بليسه >>>>>>> أشو ماحب السمك لذيك الدرجة
مسكين مصطفى لو يقدع جنبة شفيق كان يرمية من النافذة << الله يعينه على بلواه

ننتظرك حبيبتي لاتتأخري علينا

تحياتي

يللا يللا

مرحبا
الف شكر حبايبي .. الود ودي افرد لكل وحده فيكم رد منفصل بس الوقت مايسعني
مسامحه .. والا انتون على عيني وراسي من فوق.. الهي لا يحرمني منكم..
ماعليه .. اعذروني امس ماحطيت . النومه شويه معتفسه من رجعنا للدراسه.... وهذاني اليوم رجعت اعتفست و جيت..:amuse:
هههههههههههه واعذروني على مقطع السمك .:embarrest:. زيكم اني اول ما عرفت هالمعلومه انسدت نفسي كم مره عن اكله :nosweat: وبعدين صرت ما ادق خبر .. فاضييه اني لهالكلامات.. :noworry:

بس اوضح لغناتي دمعة على السطور.. اللي يحب ماريا مو احمد اخو نور .. عبدالإله جارهم اخو شهربان .. هو العاشق الولهان.. احمد حمي اختها و اخو صديقتها فقط... :shiny:
ماريا مع عبدالأله عفويه بالمره وتعامله معاملة الأخت لأخوها.. بتشوفي اليوم موقفها وياه.. :rolleyes:

يللا تفضلو الجديد

في الطريق من الرياض الى القطيف .. و شفيق جالس جنب مصطفى..
شفيق عند النافذه ومسند راسه .. ومره ساكت ولا نفس
كلما قلبني الهم سأشكو ياعلي ..
حينما يهزمني الدمع سأبكي ياعلي ..
مصطفى : ــ هلا يبا.... انا في الطريق جاي.. عسى امي صارت احسن...
مصطفى ويبين عليه الأسى : ــ يالله.. خير ان شالله... كم ساعه و نوصل ... باجي على طول .. زين .. حياك الله...
شفيق التفت الى مصطفى وانتبه لملامحه المشدوده والمتوتره.. وبهدوء :
ــ خير ... ويش فيهم الأهل..؟
مصطفى : ــ امي تعبانه..
شفيق سكت..
وملامحه بين عليها هو الآخر الحزن... وبعد كم دقيقه وبهدوء: ــ سلامتها ما تشوف شر ..
مصطفى يطالع في شفيق و مستغرب من تجاوبه البطيء ...

في شقة يوسف والشباب لسا متجمعين .. نوري ماسك كف مراد يلعبو ضغط مين االأقوى... و تصفيق الشباب تشجيع مين بيسدح كف الثاني قبل ..
محسن : ــ بل طالعو عضلات نوري كنهم نفافيخ بيفقعو..
يوسف : ــ هههههه صلينا على محمد وآل محمد
نوري يلتفت لمحسن وهو يشد : ــ والله... ان عورتني ... الليله.. ومانمت منها... باجيك .. وانت نايم.. وباخبق ... عواينك... تفهم...
ايمن : ــ اجل محسن لا تنام الا بنظارات...
هاني صار يضحك : ــ اكو مراد بعد ما شالله مقاوم شكله مو هين....
شويات ...
وانتصر نوري ...
كاظم وهو يصفق متفاعل : ــ كِتْنا خُوووب صُورَت هي .. << ياللرووعه.. رائع جدا..
محسن : ــ هاااااا... ويش يطلع دا..!
حبيب ميت ضحك : ــ سبه هنديه من العيار الفقيل ..
هاني : ــ لا صحيح يعني ويه ؟؟
صادق كان قريب منهم ماسك كتاب ويقرى فيه.. ضحك وبهدوء :
ــ هه.. ولد عمي مادري متى بيتكلم عربي كامل.. يعني ياللروعه..
كاظم بأستياء التفت ناحية صادق : ــ مو شغلك..
حبيب يصفق .. : ــ هيه.. هوو.. هاا.. خزاك الله يا بليس...
السيد يبغى يخليهم يرجعو يلتهو في اللعبه: ــ ما شالله عليك نوري جسم رياضي ...
حبيب وفي باله : ــ اخ لو اصير زيه بس حركات.. ما انفلعت الا بسبته.. خخخخ
مراد : ــ برافوو عليك.. يللا يبغى لي اشد روحي اكثر حق اوصل مستواك..
نوري : ــ تلعب كمال اجسام انت؟
مراد : ــ لا..
نوري : ــ ما شالله عليك اجل.. بنيتك بعد ماعليها كلام وانت مو رياضي .. صراحه بذلت مجهود يالله غلبتك..

في الباص .. شفيق يسأل مصطفى اللي كان متوتر و بهدوء:
ــ لهالدرجه مريضه..؟؟
مصطفى بعفويه: ــ امي.. صار ليها سنوات تتعب بس اول مره تتعب لهالدرجه...
ــ الله يقومها بالسلامه...
سكت شفيق ورجع سند راسه بالنافذه.. وغفت عيونه...
صار يشوف روحه وهو صغير..
يشوف أمه عند رجول ابوه تتوسل انه يرحمها شوي..
وابوه يضربها بالحزام... وشوي يشدها من شعرها ويرميها على السرير ويربطها فيه وهي قاعده وهو يسبها ويطعن في شرفها.. ويصرخ فيها .. ياللقيطه..!!

يشوفه وهو يحمي سكين حاره على النار ويجي يشوي فيها بدن امه..
يطفي السجاير في جسمها...
بصوت مخنوق يطقع القلب .. كانت تون...
ــ ارحمني.. والله اني بريئه...
بس ابدا لا حياة لمن تنادي ..

شوي مصطفى يسمع شفيق وهو يون :
ــ اماااه.... اماااه...
صار يتأمل فيه.. معور بقلبه شكله التعبان و ندائه لأمه وفي باله:
ــ شفيق .. شكلك وراك حكايه..
عيون مصطفى امتلت دموع.. هو يحاتي امه و هذا يهلوس ويناديها.....


في بيت ابو مجتبى....
اماني و باقر وايثار جابهم أحمد...
اماني من شافت عمها ضربت صدرها:
ــ ويش فيك عمي.. ويش فيها رجولك؟
ام مجتبى صارت تقص ليها السالفه :
ــ وهذا اللي صار يابتي.. وهذا حنا في فلك عظيم.. لا ليلنا ليل ولا نهارنا نهار.. زين يوم طاوعتي وجيتينا .. شوي نغير جو ويا الجهال فجو علينا..
ماقالت ليها عن ابو رمزي ... انها كلمته يأجل الدفع خلال سنتين عالأقل .. بس ماوافق الا لما شرط عليها...

وتتذكر ام مجتبى ابو رمزي وهي تترجاه.. وتطلب منه دخيل الله يعطف بحالهم و يعور بقلبه امير ولدها اللي ما استفاد من هالفلوس شي ..
تذكره وهو يقول ليها.. موافق بس بشرط.. بعد سنتين اذا ما سددتو المبلغ.. راح ادفع عليه زياده شوي لين يوصل مهر .. لبنتكم وتصير لولدي رمزي
رمزي .. كثير سفر و معروف بين شباب القطيف بأنه راعي بطاله و عليه حركات مش ولا بد .. تزوج وطلق مرتين.. ماوحده تقدر تتحمل العيش وياه ساعه...
ام مجتبى وافقت وكلها امل انهم اكيد بيقدرو يدبرو المبلغ في خلال هالمده.. خصوصا ان مجتبى مو مقصر وياهم ويرسل كل شهر ليهم مبلغ ... و هي بتشد عمرها وتشتغل زياده..


ايثار في الغرفه تحاول تلعب ويا امير .. بس امير كان منزوي ومعاند مو راضي يتحرك.. وكلما سحبته من ايده صرخ فيها..
طلعت ايثار من شنطتها كراسه و الوان فتحت الكراسه و انبطحت على بطنها وهي تبحلس بقهر :
ــ كيفك مابتلعب وياي بارسم وباخليك.. اقعد لحالك
صارت تشخبط شخابيط...
امير يراقبها.. ويش تسوي.. ولافته نظره الألوان..
انسدح جنبها وعلى الورقه المقابله في الكراسه... وصار يتأمل سجادة بيتهم... لقى الزخرفه فيها الوان مثل اللي تلون فيهم ايثار..
مسك لون زي لون احد وردات السجاده..
ابتسمت ايثار: ــ بترسم وياي.. !!؟؟
وقربت منه الألوان..
صار يتأمل الزخرفه اكثر و اكثر ويحاول يحاكيها على الكراسه... كل ورده وكل غصن بنفس اللون...
لين خلص غصن كامل بوروده وبزخارفه بطريقه روعه.. مره كأنه نسخها من السجاده.. وهو فرحان و يضحك بصوت عالي ...

انتبهت ايثار للورود وفتحت عواينها :
ــ الله عميم حليييييييييوييييييييين ورداتك زي الزوليه عدل...
وقامت تركض بالكراسه.. وراحت لعمتها نور...
كانت نور تجهز مع اماني وام مجتبى العشا..
ــ عمه عمه.. شوفي حليوين مو..؟؟؟
نور: ــ الله. الله... ما شالله .. ايثار انتين راسمتنها دي؟؟ تجننن..
ايثار وهي شالقة البوز شبرين : ــ لاااا مو اني..
اماني انتبهت ليهم وصارت تطالع في الرسمه وسألتها:
ــ الله مره حليوه... مين اجل .. باقر ؟؟
نور وابتسامتها تزيد : ــ لالالا.. باقر طلع ويا عمي أحمد يجيبو خبز نسيتو..
اماني .. وبتردد. تسالها.. . : ــ مين..؟؟ امير ؟؟.. امير !!!
ايثار : ــ صححححححححح
نور : ــ حللللللللللللللفي..
ايثار : ــ والله العظيم قسم بالله..
اماني تمصع خد ايثار وهي معصبه فيها : ــ كم مره قلت لش مايحلفو ويقسمو بأسم الله على كل شي..
ايثار : ــ من عميمه قالت لي حلفي .. آآي . خلاااص مابحلف آخر مره...
اماني : ــ وانتين على طول والله ووالله.. امير دي راسمنها؟؟؟!!
ايثار : ــ صدقوني ما اشدب..
وراحت تركض لأبو مجتبى :
ــ يباااا.. شوف امير ويش راااسم...
ابو مجتبى لفتت نظره شخابيط ايثار اللي بالورقه المقابله فمسكها وصار يطالع فيها :
ــ يعني ويش راسم.. بالله عليش .. شخابيط .. ويش عرفه هو..
ايثار برطمت : ــ مو حليوه يعني ... << تقصد الشخابيط..
ابو مجتبى ياكل خياره : ــ لا .. ويش الحلاه فيها.. الوان على بعض
ايثار مدت برطمها شبر .... وبهدوء : ــ هذي رسمتي .. دي رسمة امير
واشرت على الورود..
ابو مجتبى : ــ كح.. كحححححححح كح..
شرق بالخياره...

ام مجتبى : ــ الحقوو عليه لا يموت من خياره..
ابو مجتبى بعصبيه : ــ فال الله ولا فالش يالعجوزز.. ماااي .. جيبو كح كح.. ماااي..
جت نور بالماي بالسرعه..

ابو مجتبى : ــ الحمدلله.. ويلي .. ايثار متأكده دي من امير لو تشدبي
ــ والله ما اشدب
اماني : ــ والآخير ويا الحلف !!
ايثار وبقهر وشوي تصيح : ــ مو لأنكم ماتصدقوني.. ها شوفو بعد..
فتحت الكراسه على صفحه جديده وراحت سحبت امير .. وقعدته ...
واشرت على منام اللي منسدح عليه ابو مجتبى وكان مرسوم فيه ايضا زخارف وبألوان ثانيه..
وقالت لأمير : ــ عميم .. ارسم هذي .. سوي زي هذي..
امير صار يتأملها.. و رفع لون مثل لون الرسمه بالضبط..
ام مجتبى بأبتسامه وعيونها مليانه حزن..
صار امير يحاكي زخرفة المنام بهدوء وبسهوله .. من دون ما تنحرف ايده ولا يخربها ...
الا بدخلة أحمد مع باقر وهو حامل الخبز وينادي :
ــ اماااه.. يبااا.. عندي خبر...
نور تأشر على احمد:
ــ اشششش...
وتأشر على امير اللي كان يرسم... والكل يتأمله..
وقف احمد وباقر يراقبو هم بعد..
في دقايق واكتملت الزخرفه...
ابو مجتبى ماقدر .. ماشافوه الا رفع غترته و غطى عيونه.. وتنهد :
ــ لا اله الا الله... لا شيء فوق قدرتك يااارب..
ام مجتبى ماتحملت حضنت امير وصارت تصيح..

امير عارف انهم فرحانين باللي سواه.. فصار يضحك .. بصوت عالي ..

أحمد صار يصفق .. وتبعه باقر .. ونور.. واماني صارت تصلي على محمد وآل محمد..
احمد قعد جنب امير :
ــ حبيبي امير .. خلاص بعد العشا باجيب لك الوان واااجد وكراسات واااجد وارسم اللي تبغاه لين تتعب ..
امير مستانس حده والفرحه مو سايعتنه..
لأول مره يشوفو امير بهالسعاده.. واضحه بلمعان في عيونه ...

وبين ماهم يتعشو...
نور : ــ الا اخوك.. ويش الخبر اللي كنت جاي بتقوله لينا..؟؟
احمد : ــ اوو صح.. نساني سيد امير بأبداعاته.. احم... باروح اخذ دوره في امريكا...
ابو مجتبى وقف عن الأكل وصار يطالع في احمد..
احمد : ــ المدرسه بعد ماشافو كفائاتي قالو ينقصني خبره في شي معين شي معين تبع المسار اللي راح استلمه هناك.. يبغى له دوره.. واحسن الدورات في امريكا.. فبيرسلوني على حسابهم..
ام مجتبى : ــ كم يعني؟ اسبوع.؟
احمد : ــ لا شهر..
ابو مجتبى بهدوء : ــ الله يوفقك ياولدي ويفتحها في وجهك..
نور : ــ متى بتروح.؟
احمد : يوم السبت ان شالله الرحله..
ام مجتبى ومبين عليها الحزن : ــ داويش ياولدي مامدانا نشبع منك.. الا بتروح شهر الحين بعد
احمد : ــ شهر اماه.. شهر وبرجع...
اماني : ــ تروح وترجع بالسلامه << قالتها وهي تشعر بالأسى على ام مجتبى وابو مجتبى.. ولادهم الأثنين دايما في غربه ومو حواليهم ..

في بيت يوسف ..
التلفون يرن..
ردت فرات .. وكان ابوها يخبرهم انه حصل ظرف في العمل فما بيرجع الا الفجر..
حسن يشتغل في الجبيل ومشواره بعيد..
فرات راحت خبرت امها... اللي من سمعت ان حسن بيتأخر للفجر وحالتها النفسيه كانت زفت.. على طول اتصلت في ازدهار .. وترجتها تجي تسهر وياها الليله...
ازدهار مامانعت.. وراحت ليها تشوف ويش فيها ...
ماريا انتهزت الفرصه .. دقت تلفون هي بعد على شهربان:
ــ شهروبه .. ويش تسوي؟؟؟
ــ ابد توي طالعه من الحمام والكشه منشوره . زهقاااانه استشور..
ــ مابتطلعي ؟؟
ــ لا ويش يطلعني ..
ــ اباجي لش ..
ــ هههههههههه تشوفي كشتي .. ماني..
ــ مالت عليش .. اباستشورش..
ــ اجل تعالي..
ــ اصقعش .. مصلحجيه..
لبست ماريا عباتها...
وبدون ما تسألها وداد قالت ليها : ــ اني باروح لشهربان.. تبغي تتأكدي اتصلي بيتهم كل دقيقه وباكلمش ..
وداد انقهرت من كلام ماريا..وما ردت عليها..
طلعت ماريا... وهي طالعه صادفت عبدالأله راجع من برى وكان نازل من الباص..
بيدخل بيتهم..
ماريا مره عفويه.. وعادي عندها الوضع.. ويعني ولد جيرانهم اللي حسبة اخوها بيدخل بيتهم ويش فيها..؟؟
بتدخل وياه مره وحده خصوصا انها عاطيه صديقتها خبر ...
عبدالأله انتبه ليها.. وارتبك على عوايده..

ماريا متجهه ناحيته..
عبدالأله لا شعوريا وقف .. وصار قلبه يراقع...

شوي تحرك بيدخل البيت.. وصار هو وماريا ثنينهم واقفين على الباب...
عبدالأله ناسي روحه و ماريا تفكر الباب مقفل وبيفتحه بالمفتاح..
كم دقيقه مرت على هالوضع..
ماريا بتساؤل : ــ ماعندك مفتاح..!! ادق الجرس ..؟؟
عبدالأله : ــ هاا..
ودف الباب ..
ماريا بأستغراب : ــ طالع مفتوح واني افكره مقفل ..
ودخلت..
تسكر الباب وراها وعبدالأله ظل برى مفهي ..وفي خاطره :
ــ ويش فيني انا.. لمتى هذا حالي .. احس نفسي بهيم مره.. مفهي .. افففففف .....
شوي عفويا يصفع روحه: ــ استخفيت انا.. استخفيت..
ماريا ركبت لغرفة شهربان :
ــ اووووووووه ياام كشه..
شهربان : ــ يمااااااااه .. خلعتيني..
ــ وين امش ماشفتها في الصاله..
ــ طلعت تخلف على مادري مين ميت عندهم مادري مين..
ــ خوش.. الله يرحمه مادري مين..
شهربان تمد الأستشوار على ماريا : ــ يللا اشتغلي..
ــ بل عليش .. توي مامداني.. خلني اخذ نفس
شهربان تقعد على كرسي التسريحه: ــ الله والمشوار عاد.. يللا بس .. قفتي ترى كبيره .. ويبغى ليها ساعتين يالله تخلص..
ــ مو لازم تستشوري
شهربان تطالع في ماريا على جنب :
ــ ايه مو شفتي حالش حرير ويش وراش..
ماريا : ــ انا لله.. اهوو.. ويش شباصاتش..

وبين ما ماريا تستشور شهربان :
ــ ماقلت الش ...
ماريا : ــ ويه..؟؟
ــ باقو عباتي امس ...
ــ هههههههه يؤ حلفي..
ــ مادري كيف اختفت من الدرج .. عفر في الفسحه انباقت..
ــ وتالي ويش سويتي حظي ..؟؟
وصارت شهربان تقص على ماريا السالفه

يانااااااسي البآآرت مره كيوووت ..~

عوافي خيتوو ع الطرح ..~

يعجبني كلامهم خخخ غبشة الغباش قعدت يوم كامل أتدرب عليها عشان أتفلسف ع البنات يوم الثلاثاء~>بكره أول يوم دوااااام وباقولها لهم ..~

ممممـ عشت الجو صح حسيت أنا البارت مره صغنتوت ..~

شيفيق يبي له دروس في الإتيكيت ..~

مراد أحسه خووووش ريال وبيعتدل ..~

حبيب هالبارت مدري وش فيه غير عن كل بارت ما سوى لنا جو~>عسى المانع خير !!

ودادوووو إن شاء الله تتعدل ~>أحلام اليقضه

ماريا متحمسه أبي أعرف بتاخد مين !!

ولد أماني ياقلبي هو قتلني وهو يفضفض لأمه ..~

مصطفى الصراحه خجله ذووووب مهجتي خليهم يكشفو عليه يمكن يطلع بنت ع غفله !!

لا هنتي خيووو

مودتي