بسم الله الرحمن الرحيم
وما توفيقي إلا بالله
السلام عليكم ورحمة الله وبركاته
بليز لاتضحكوا عليا طيب يعني هذه تجربه اتاثرت منها
طلبتم مني كتابة تجربة بحياتي
وأنا أكتب لكم الآن عن تجربة مررت بها
بالمناسبة أنا مدري يعني هي لازم التجارب تكون حزينه
بحياتنا هناك تجارب سارة وسعيدة كذلك
وأنا أتفجر مرح وأحب أبتسم
حتى والدي الله يرحمه اللي ذكرته بالأمس
لما أتذكره أبتسم لأنه هو بالذات اللي علمني البسمه
ومو أي بسمه .. في انواع من البسمه تزيد أصحابها شقاء
أنا اقصد البسمه الصافيه التي ترتسم على وجوهنا
وتنطلق لتعانق بلا استئذان قلوب الآخرين
حتى ماما تحب تشوفني لما ابتسم
عشانني ابتسم بنفس تماما ً الطريقه اللي ابويه كان يبتسم
========
مدري ليش كتبت الكلام اللي فوق
امكن عشان اقوللكم انو أنا ابتكلم عن تجربه غير
جربتوا تتعلقوا بشخص
الين صار صعب عليكم تتخيلوا تعيشوا ومايكون هذا الشخص
جزء من حياتكم ؟.؟.؟
مدري انا مارجعت ولا حتى صفحه للوراء في هذا الموضوع
امكن في ناس كتبت تجاربها وكانت من هذا النوع
وامكن حتى تجاربهم كانت أقسى
التجربه التي أتحدث عنها وقعت لي
أثناء دراستي بالمرحلة المتوسطة
العجيب فيها
أن تأثيرها علي الآن بنفس قوة تأثيرها لما صارت
عشان كذا بحقد شويا على اخويه ابتسام
بسببوا انا اكتب عن التجربه واحس بتعب حقيقي
تصدقوا الآن توني أبدأ
" كانت مرحلة المتوسطة هي المرحلة الدراسية الذهبية
لتفوقي فيها بشكل دائم
وبعد أول فصل دراسي بالمتوسطه
جاءت لمدرستنا معلمه جديده
وبجانب انها معلمه للمادة التي كنت أعشقها بشكل خاص
فهي أيضا ً كانت ذات شخصية سحرررتني وجذبتني مره مره
والله مقدر أوصفها في صفاتها وماراح حتى أحاول
لاني راح أفشل وما راح اقدر أوصفها
وهكذا فإن حبي لمادتي المفضله إزداد أضعاف وأضعاف
مع اني كنت أتخيل انو حبي للمادة كانت في قمته
أبقوللكم بعض أحاسيسي وأقسم بالله العلي العظيم على صدق كلامي
فقدت كل احساسي بالمواد الاخرى حتى مع تفوقي فيها
ما اشعر بطعم للإقبال عليها
يااااااااااه !
تعرفوا احساس لما نكون نتلهف على شيء بنحبوا
ونحس بالوقت يمر بطييييء
ووقت ما يقبل علينا الشيء اللي نترقبه بكل شوق فالوقت مايرحم
وقاسي يمر بسرررعه
كنت انا كذا احس بالحصه اللي قبل حصتها
احسها ثقيله ومقرفه واحس بأني تعيسه
بس أول ما تخلص الحصه وتبدأ حصة أبلتي المحبوبه
على طول تتغير حالتي حتى احس اشياء تتغير حتى في جسمي
أحس بالنشاط فجأه ويكون انتباهي وتركيزي عالي وشديد
حتى انا مدري ليش كذا يصير ولا عندي تحكم فيه
ونفس الحال لما تنتهي حصتها احس فجأه بالكآبه والخمول
وصحيح ان المنطقه اللي كنت بدرس فيها
يعيش بها ناس هم من المخالفين لنا بالمذهب
لكن هذا ما كان أبد أبد يفرق عندي
ولأن المعلمه كانت طيبه وصفاتها جدا ً جدا ً رائعه
فأنا أحبتتها بشدة وتعلقت فيها
وبعدين مذهبنا مايعلمنا على الكراهية للآخر العكس صحيح
وكنت أجيب العلامه الكامله بالمادة
وأحب أسولف عنها مع صحباتي
وأسال عنها واي خبر عنها يثير انتباهي طوالي
وراح اختصر اشياء كتيره
والمهم انو جاء يوم وحان موعد حصتها
وكالعادة بعد شعور بالضيق شديد أحس بنشاط غريب
وأنتظرها تدخل من باب الفصل
ولا اعرف لماذا دائما نفس الشعور بالنشاط مايتغير كل مره هو نفسه نفسه
صابتني خيبه كبيره لأن دخلت علينا أبلة لنفس المادة غيرها
وصار عندي قلق كبير من شدته كنت أرتجف
والأبلة الجديده خبرتنا انو أبلتنا أخذت إجازة إضطرارية
وأنها راجعة بعد فترة ماراح تطول
كنت أسمع كلامها ومو مصدقه
ما ابغى ما ابغى مابغى
ما ابغاكي انتي تدرسينا .. ما ابغى ادرس خلاص
ما ابغى المدرسه أصلا ً
كذا كنت اقول في نفسي
وانتظرت زي انتظار سنين عشان تخلص الحصه
وطوالي روحت للمديرة وسالتها عن أبلتي المحبوبه
قالتللي انها اضطرت لاخذ اجازة للذهاب الى أهلها
وهي من منطقه ثانيه لكن قريبه نسبيا
والمهم فهمت انو اخوها اتوفى فهي اخذت الاجازة
وقالتللي المديرة انها كلمت هاتفيا ً هذا الصباح وأخبرتهم بهذا
وأنها في هذا الصباح متوجهة لأهلها
ومرت يومين صعبين صعبين
وكل يوم ارجع أسال المديره إذا كانت هي كلمتهم مره ثانيه
والمديرة تقوللي ماكلمت
بس الخبر وصلني في نفس هذا اليوم
انها اتوفت في حادث بنفس اليوم اللي هي روحت لأهلها
يعني اثناء هذا المشوار صابها الحادث
وتوفيت الله يرحمها
انا طوالي فتحت عيني ولقيتني في المستشفى وماما بجنبي
أغمي علي طبعا وماحسيت
الشيء المؤلم
لو أنها مجرد ابتعدت للتدريس في منطقه ثانيه كنت اقدر على الأقل افكر ألحقها عشان أدرس عندها " هذا اللي قلته لنفسي ايامها "
بس انو اتعلق فيها وافقدها وترحل ورحيلها ماله رجعه ؟.؟
بس مابقوللكم ايش صار لي انا عشان اكره يعني اقول
بس اذا قلتللكم انو حتى في كتابة هذه التجربه
حسيت بتعب كثير
حسيت بدوخه وبأن الدنيا تدور
حسيت برجفة ماقدرت أخليها تهدأ وبصعوبه في أنو اتنفس
هذي روحي تفرفر من الوجع
كل هذا حسيته الآن بس لأني كتبت عنها
ابتسام بيوم راح انتقم منك
خلاص مابكمل
بس احب اقول شيء اخير
من بعدها طول الوقت انا اعيش خايفه
خايفه انو بيوم من الايام اتعلق بشيء او بحد
وافقد اللي اتعلق فيه
عندي خوف كبير من هذا الشيء
ويلا خلاص
" المنتدى يقوللي انو انا أدخلت نص كبير
وأنا مسحت كثير من الكلام
وخلاص ابكمل كتابة الخاتمة والشكر بالرد الجاي"
