ضعنا يا صبرنا...

البارت صحيح قصير بس حلو
مشكورة ماقصرتي خيتو
ونحن بنتظار بقية القصة
تروحين العمل وترجعين بالسلامة << ش مسافرة ههه
موفقة خيتو لكل خير
ربي يقويك ووفقك لمايحب ويرضى
تمنياتي لك بالتوفيق

يووو كانها القصة على انتهاء بتوحشنا كفارييييييييي امورة

ربي يوفقش امور

موفقين

بالأنتظار

كل عام وانتم بالف صحة وسلامة وينعاد علينا وعليكم بالخير والبركة

هلا وغلا خيتو ميررررررررررررو من زماااااااااااااان ماسيرة ع المنتدى ويوم جيت قريت القصص بشكل متسلسل ونااسة كان لانها مو متقطعه ولااانتظرت يوم علشان اقراها ومن جد ابدااع في ابداع والله لايحرمنا من افكارش وخيالش الوااسع.
مسكين حميد يكسر الخااطر بس الله يعينه
وليلى ومؤيد لايقين ع بعض وان شاءالله تواافق بس عجبتني وقفت النافذة وفتحت البوز هع هع هع
مسكين اشرف فضحه هالعادل مع ذكائه وهو يشق الشرشف وبيستلمه شكله نااصرو عساه ماادري ويش
زينب تكسر الخاطر علشان علي مايبغاها بس ان شاءالله يتقدم شررفو وتتم الفرحة
الله يغربلها سميرو ياعساها الماحي هالشكاكه ان شالله ماتعرس زين
وهشام ان شالله ياخذ علا وتقوم سوسن بالسلامة

((اي خيتو الحق كل اليش عجبتني انها زعلانه وهي الغلطانه شين وقوي عين بس ردش كل حكم غناتي والعادة الناس تنقل المواضيع مو القصص ولا اتصير باسمها حلوة دي ان شالله موفقة بكل دربش ياارب ياكريم))

تقبلي مروري وتحياتي لك ولكل الاعضاء
دمتم سالمين

وش هالإبـــداع أختي اميرة

الله يعطيكـ العافية بصراحة الأحداث مره شيء

وننتظر نهاية القصه وأتأمل من النهايه خير

موفقه أختي ...

البارت مرةة روعة على قصرة لكن جميل
يعطيك ربي العافي والصحة وزيارت علي ووالده<<<< قلبتي ضبعة

بعد سبدي عادل مايستاهل إلي يصير ليه حرام أمورة عفيه طلعية علشان أمه مسكينة ماليها أحد غيرة ايهي ايهي:sad2::sad2::sad2:

ومؤيد وليلي يارب انك تحنن قلبها وتوافق عليه :wavetowel2::wavetowel2:

وشريف زين مانشلخت سيارته من عدوله :deh::deh::deh:

ننتظر جديدك

الببارت البارت البارت قصير

وبانتظار البارت الى طوله صفحه كامله:wink::wink::wink:

بسم الله الرحمن الرحيم
اختي اميره..حبيت اهنيك عالابداع
الصراحه انا ماخلصت القصه للحين..بس كل اللي قريته ابداع في ابداع..
ماحبيت تنتهي القصه وانا..ماعلقت عليها..ان شاء الله اوصل للاخير..قبل نهاية القصه..
تحياتي لك..وسلمت الايادي

بالإنتظــــــــــــار

مرحبا

توت توت وصلت اميره..
الله يعافيكم ويخليكم.. ونظرا لظروف الشبكه الصحيه لدي والأنقطاع المتواصل والمفاجأ...:sad2:

اقول ليكم واعذاري تسبقني..


مافي جزء...


















امززززح:wink:
عسى مادعيتو علي بس ..:toung:
طويل اليوم.. :shiny:
بس مو ملون..
خفت اقعد الحين الون فيه..
ولا اشوف الا الواير لس افلس وقال ماميش شبكه.. :nosweat:

تفضلوو..

الحلقة 45

ابو مالك .. لازال الكابوس يرافقه.. وكلما شافه قعد مختلع يقرأ الأدعيه والسور ويرجع ينام.. بس يحس مو فايدنه شي .. لأن نيته اساسا مهي صافيه.. والحق بعده في ذمته خانقنه لين يرجعه لأصحابه...

ابو مالك ظل يتقلب على فراشه ويتذكر المظالم اللي مسجله عليه...


تنهد..


ــ لازم اضيقش ياذمتي الوسيعه....

بعد كم يوم..


ــ الو.. هلا بتي قواكم الله..


ريما : ــ هلا خالتي ام مؤيد الله يقوييش..


ــ وين امش ..


نادت ريما على امها.. وخبرتها انها ام مؤيد...


ام علي متوقعه الأتصال سؤال عن الثوب اللي خلصته من فتره ... واتصلت عليهم ياخذوه...


ــ هلا ام مؤيد..


ــ هلا ام علي ويش حالكم..


ــ حياش الله .. اخباركم انتون..


ــ الحمدلله بخير ...

وبعد سؤال عن الأحوال والقيل والقال من النسوان...


ام مؤيد:


ــ ايه يا ام علي .. بغينا نزوركم كلنا اني وبناتي وولدي وحماي الكبير ..ليلة الخميس هالأسبوع اذا ماعندكم شي ..


ام علي:


ــ لا.. هلا فيكم ما عندنا شي .. حياكم البيت بيتكم..


ــ بيتكم عامر فيكم .. تسلمي على الموعد ان شالله نشوفكم..


ــ خير ان شالله...

وودعو.. وسكرو..


ام علي تضرب فكر وقلبها يطق.. وفي بالها هالزياره مهي طبيعيه.. اكييد فيها إن..


الكل كان بالصاله يتابعو مسلسل ...


ابو علي :


ــ داا مين اللي في التلفون..


ام علي سرحانه تفكر ..


ريما: ــ ام مؤيد..


ابو علي : ــ ويش تبغى..؟؟


ام علي ماردت.. بالها مو وياهم..


ريما: ــ مادري تبغى امي هي .. اسألها


..


الا التلفون رجع يرن.. وكانت المتصله رزان حنين تصيح طول اليوم وتبغى تكلم ريما .... ردت عليها وصارت تسولف وياها...


ام علي انتبهت لأسئله ابو علي ..


وقالت له سبب اتصال ام مؤيد...


ابو علي : ــ ومؤيد بجي بعد؟؟


ــ ايه..وياه عمه الكبير


ــ خير اللهم اجعله خير... عمه بعد..؟؟ مايندرى ويش السالفه..


ام علي ابتسمت وصارت تطالع في ريما وهي تهدر في التلفون..


ــ كني.. فهمت..


ابو علي :


ــ ويش فهمتي..؟؟؟


ــ مادري على هوى كلامها كنهم جايين خطاب...


ابو علي : ــ لا على هوا ولا على ريح.. لا تقعدي تفسري الأمور على كيفش ..


ام علي: ــ بسم الله على عمري ويش فيك عصبت..


ــ لا بس .. هالأمور مايقولو فيها كنه وما كنه..


ليلى حس قلبها وفهمت على امها .. شكلهم جايين يخطبو ريما.. ورجع موقف ام مؤيد مع ريما في بيتهم لما خذتها وتمدح في ذوقها..


ابتسمت:


ــ الله يوفقش ياخيه ويفتحها في وجهش...


ام علي :


ــ امي ليلى قومي ابغاش...

ابو علي : ــ انا لله.. وحده تهدر في التلفون .. وفنتين بيقومو عندهم اسرار .. وانا زي القطو منفلت لحالي..


ليلى جتها ضحكه على كلام ابوها بس دارتها..


ام علي :


ــ ياااااااابوووووووي منك رجال... ويش فيك كل محمق وبصلتك محروقه.. سالفة نسوان ابغى بتي فيها.. طلع التلفزيون ولا تتعيلف..


ابو علي يرفع العكازه ويشدخها عالأرض:


ــ اشووف طووووولااااااان لسااانش اليوم..


ام علي تصروعت: ــ يؤيؤ.. مسامحه حقك علي خلاص..


ــ ايه هاللون خوش مره.. مانى متعود عليش ملتعنه.. خلش آدميه..


ام علي ماسكه بتها بتروح وياها الغرفه.وهي تتحمق على هداوه.


ــ ادميه وآدميه.. منت متعود يبغى لك تتعود..


ابو علي سمعها:


ــ على عدال على عدال تحمقي ..


ام علي ماقدرت صارت تضحك.. ودخلو غرفة الخياطه...


قعدت ليلى قدام امها اللي كانت مرتبكه ومهي عارفه ويش تقول..


ــ ايه يابتي ... هالأتصال مثل ماقلت حاسه وراه شي ... واتمنى اذا ماكان لش ماتزعلي ولا تتضايقي ولاا..


ليلى بأبتسامه قاطعت امها:


ــ اماه.. اللي فيه الخير بيصير .. واني اتمنى لأختي كل خير .. ولا تحطو في بالكم ان بضايق لو بزعل .. اني اللي اضايق وازعل على شانه.. خلاص مات.. وماتت سعادتي وياه..


ام علي بأسى:


ــ يابتي لا تقولي كذا .. على شان خاطري..

خلصت ريما من حنين وهجوم على الغرفه.. فتحت الباب:


ــ ويش عنددددددددددكم اسرااااااااااار..


ليلى ضحكت..


ام علي : ــ كبرتي هااا.. بتصيري مره.. عن هالحركات الخبله..


ريما بأستغراب: ــ مرة ويه بعد.. لاحقين على قولة مره..


ام علي بأبتسامه: ــ بالغه فيش وفي اختش..


ريما رفعت ايدها فووق:


ــ يااااااااااارب


ام علي وهي تضحك رمت عليها قوطية النشاف:


ــ البنات يستحو عادة مو يصرخو حد ماعندهم ويدعو في هالسوالف..


ريما : ــ هههههههههههه لووول ولول تحول..


ــ الله يهديش ويغير حالش..


ــ انالله..


ام علي رجعت تضحك :


ــ عساش السعاده.. عساني بالغه فيش صرختي حد ماعندش يااارب والله يهديش تحمقتي انا لله..


ريما : ــ احم.. بس احم..


ام علي: ــ دي ويه بعد احم...


ريما بأبتسامه شبرين: ــ ولا شي ....

تابع>>

ابو مالك حالته النفسيه صعبه.. رجع كذا حق من حقوق الناس.... وقاعد في مكتبه يحوس في مخططات الأراضي اللي عنده ناوي يعطي ابو جاسم ارض بدل ارضه اللي غصبها منه تكون قريبه له ...

الا بدخلة واحد من اصحابه .. ( ابو عدنان ) عليه..

ابو عدنان:

ــ السلااام عليكم..

ابو مالك : ــ هلا وعليكم السلام هلا بالقااطع..

ــ ويش اسوي احوال الدنيا والمشاغل.. اخبارك انت عساك طيب..

ــ والله.. الحمدلله على كل حال..

ــ ويش فيك ياخوك منتحل ومصوفر..

ــ لا بس هههههههه خبرك شيبنا ومشاغلنا كثرت وماعدنا حمل تعب..

ــ الله يكون بالعون.. بعدنا شباب بعدنا..

ــ ههههههههه أي شباب خل الشباب لأهله بس .. خلاص انتهينا..

ــ افاا عليك هذا وانت تنتظر ولد جديد .. اقول عن الدلاعه..

ــ ما شالله قاطع و تعرف كل الأخبار اجل لو توصل..

ــ ههههههههههه بعرف ويش ماكل وويش تفكر بعد..

ــ ماقدر عليك..

ــ لا بتقدر ان شالله.. وبتقدر تقدر ماتردني في هالطلب..

ــ آمرني .. ان شالله اقول لك لبيك..

ــ ان شالله.. ااااااا..

ــ ويش فيك مرتبك؟؟

ــ خبرك ياخوك انا ماقدر اعيش بدون مره.. وخبرك بي الله حارمني الذريه والعيب فيني .. والحمدلله على كل حال...

ابو مالك بريبه: ــ ايه .. الحمدلله..

ــ وخبرك كم مره تزوجت وماتوفقت اخر شي الحين بت الذين لبنانيه ماتحملت البعد عن اهلها واذتني .. بدي روح عأهلي وشو متى بدك تاخد لي بيت بالضيعه.. فقعت راسي بطلايبها.. ويش لي اتحمل وحده ماخذتني لفلوسي .. سرحتها لبيت اهلها..

ــ هههههههههه انالله انت ويا هالتسريح.. حتى الطلاق اسمه عندك غير شكل,.,

ــ ههههههههههههههه ويش اسوي ياخوك.. خلنا بس نضحك والهم في القلب..

ابو مالك تنهد:

ــ ايييه.. الله كريم..

ابو عدنان ابتسم:

ــ ايه.. انا عاد هالمره قلت مالي الا بت بلدي تداريني وتخاف علي وتكون بت خير ونعمه فقصدتك لهالشي ..

ابو مالك فتح عيونه وعلى طول جت في باله بته علا..

ــ هاااااااا.. ويش قصدك..

ــ يعني اذا ما فيها احراج ولا مانع يشرفني اناسبك

ابو مالك شدخ ايده عالطاوله..

ــ ويش تقوول انت.. ويش تخررف .. لو الله عطاك كان هي قد بناتك وبناتك اكبر بعد..

ابو عدنان انصرع وصار يهدي في ابو مالك..

ــ هوو.. هييي.. خفف هدي.. ويش بك.. ليش من قال ابغى بتك..؟؟

ــ اجل؟؟

ابو عدنان رفع حاجبه بأستنكار:

ــ افا.. ليش اختك تزوجت...

ابو مالك هدت اعصابه وصار يضحك من قلب .. يضحك يضحك .. دموعه نزلت من الضحك..

ابو عدنان مبتسم بريبه:

ــ خير .. لا جد اتكلم.. تزوجت.. ؟؟ افلست يعني؟؟

ابو مالك يسمح دموعه:

ــ غربال يابو عدنانوو.. بطني عورني منك.. ويش جيبها على بالك..

ابو عدنان.. ــ لا بس مره اتصلت بيتكم وردت هي علي ماصوتها صوت بتك .. اعرف بتك افا عليك حسبة بتي.. فقلت هي اختك اكيد وبعدها الله مارفع حظها..

ابو مالك والضحك يهدأ:

ــ ايه .. ايه... ويلي منك ومن سوالفك.. لا تطمن.. بعدها وياي ما تيسرت..

ابو عدنان بأبتسامه:

ــ بشرررررك الله بالخييرررر...

ــ هههههههههههههههههههه عساك ويش اقول ضحكتني..

ــ ليش لا سمح الله؟

ــ لا .. بس صراحه.. نسيت امرها انا..

ــ افاا.. هذا وهي اختك..

ــ ويش تقول .. المخ ماعاد يجمع..

ــ ساعدك الله.. المهم.. خذ وقتك شاورها وشوف ويش رايها ورد لي خبر..

ــ عساه خير ان شالله...

ام عادل ماخلت احد الا لجأت له لجل ولدها.. لين بالأخير راحت هي الجمعيه وقابلت مديرها.. وبصياح:

ــ ولدي ياخوي مالي غيره شلون تخلوه عندكم..

المدير: ــ يااختي الله يكون بعونش بس هالأجراء لازم للي مثل حالته.. مأذي العالم كل يوم تروح شكاوي عليه عند الشرطه والشرطه يجو لينا ليش ما ناخذه مع اقرانه.. ياخيه كذا مره رسلنا لش ناس يطلبو منش تنتبهي له ولا تخليه يتصرف أي تصرف فيه اذيه لو خطر على ألأخرين.. ماخلا احد الا ضربه وماخلى احد الا خرب سيارته والبنات ماخلاهم في حالهم

ام عادل بعفويه: ــ أي بنات.. مافي بنات الا زينب اشتكت عليه هي بعد؟؟

ــ أي زينب .. ماعلينا من احد .. ارجوش اسمحي لينا.. ولدش هنا اصلح له.. بينتبهو له.. وبيعلموه.. و بيداروه.. وبس تتحسن حالته وتخف حالة العدوانيه فيه .. ان شالله بيرجع لش..

ام عادل مهي قادره وتصيح.

ــ حسبي الله على اللي كان السبب .. ماقدر اشوفه..

ــ تقدري خيه على أي وقت واي يوم..

راحت بتشوفه.. لقته في حديقة الجمعيه يلعب ويا الصبيان و مستانس..

صارت تتامله وهي مبتسمه و دموعها على خدودها..

نادو عليه ليها..

وصل :: وهو فرحان:

ــ هلااا اماااه بتسككككني وييييااااي هنا..

ــ لا ياولدي .. هنا كل صبيان .. باجي ازورك كل يوم..

ــ حققققققق ويييييييه كل يييييوووم؟؟

ــ ماتبغاني...؟؟

ــ لاااا تعاالي كل يووم عاااددددي .. بسسس الحييين باااررررووح العععب خلللصوو الدووور عنننني...

وراح يركض..

ام عادل تحس روحها وحيده.. كنها لحالها في هالمكان.. ماتسمع شي الا صوت عادل وهو يصرخ وهو يلعب ويصفق .. وشوي يسب سبه من سباته القويه لواحد من الصبيان غلط في اللعبه وخرب عليهم..

تذكر معاملتها له في البيت وتقليلها الدايم لعقليته وفهمه وكيف كل تسكته لما يتكلم وماتعطيه فرصه..

تتذكر ضرب عباس له على الفاضي والمليان..

تتذكره وهو يعبر عن مشاعر حبه لزينب .. و شلون يتمنى الرضا لترضى عليه..

دموع مع كل صفحة ذكريات ليها مع ولدها...

مع كل سالفه عفويه ضحكها فيها..

تنهدت من قلب ومع الزفره ..

ابتسمت..وتنهدت من قلب..

ــ في حياتي ماشفتك مستانس هالكثر .. الله كريم..

علي والحمدلله.. قايم شغله على المشاوير الخاصه في هالفتره.. خصوصا مع بداية ربيع والأعراس والعطله الصيفيه والدورات.. فحاط في باله اعتماده راح يكون عليهم طول فترة الأجازه..

كان يوصل حميد بين فتره وفتره .. ومايخليه...

جوال علا يرن المتصله كانت امل..

ردت علا الا تسمع امل بحماس :

ــ غناااتي رجعناااا البيت..

ــ الله.. الحمدلله عالسلاااامه.. اخبار سجاد..

امل ودموعها تنسل:

ــ الحمدلله صار يخطي .. مشى يا علا .. مشى..

علا بعفويه صرخت:

ــ الحمـــــــــــــــــــد لله.... يااااااااااااااااااااارب .. خلااااص سكري سكري باااجييييييكم..

سكرت وكانت معاها سوسن’’ سوسن بفرح:

ــ خير .. خير اللهم اجعله خير..

علا مهي عارفه ويش تسوي صارت تصفق وتتنطط..

ــ سجااد.. سجااد ياااسوسن..

سوسن تهلل وجهها وفهمت وبحماس:

ــ مشى؟؟؟

ــ اييييييييه

ــ هييييييييييه ... هههههههههههههههه الحمدلله ..

علا ودموع الفرح على خدها ..

ــ بتصل على ابوي يجي يوديني لخالتي...

اتصلت .. الا جواله مقفل..

تابع>>

سكرت بالخيبه:

ــ افففففف مقفل جواله والحين مابيرجع الا اخر الليل من عمله ياربي ويش يصبرني..

سوسن ابتسمت:

ــ بتصل على اخوووي..

علا فتحت عيونها::

ــ لالالا..

ــ ويش فيش .. ويش يصير يعني لو اتصلت..

علا بخجل وارتباك:

ــ لالا غناتي .. وايد مشاوير .. كلفت عليه وايد .. ماني..

ــ افااا.. افاا بس يا علووشه.. ماهقيتها منش .. بالعكس اخوي مايمانع ويفرح اصلا اذا طلعنا وياه..

ــ ويش اللي يفرحه.. اخته انتين ماعليه.. خله يفرح.. اني خلاص بديت احس بأحراج..

ــ علا..

ــ هلا..

ــ انطمي..

ــ بل..

ــ تقهري زين..

ــ سوسن ويش فيش..

ــ ولا شي .. سكتي عني..

ــ ياعلي سوسنوو لا تزعلي مني بس والله احرااج..

ــ فارقي..

ــ سوسنوووووو يا نحيسه..

ــ ويه.

ــ عن اللعانه..

سوسن تقوم:

ــ وباروح غرفتي بعد.. صرنا اغراب وتنحرجي منا..

ــ سوسنوو خلاص.. بلا نحاسه..

ــ مابرضى لين تطاوعي..

ـ ياربي عليه اشغال يمكن..

ــ ماعليه.. واسطااات هو يشتغل ويا ابوش محامي الشركه >> قالتها وهي تحرك حواجبها..

علا انربط لسانها وهي عارفه ويش تقول..

ــ كيفش .. اللي تشوفيه..

سوسن بفرح:

ــ الحيييييين اتصل..

جت بتتصل الا جوالها مافيه رصيد..

علا كانت ماسكه جوالها في ايدها.. حست احراج لو قالت لسوسن عندش التلفون..

علا : ــ هاش اتصلي من جوالي..

سوسن : ــ تسلمي..

سوسن استحت تسأل علا اذا مخزنه رقم اخوها لو لا..

قامت كتبت الرقم وسوت اتصال واذا مخزن بينكشف الأسم..

طلع مو مخزن..

سوسن في بالها: ــ افااا...

على الطرف الثاني هشام.. من شاف اسم علا يولع ويطفي .. وكان مسجلنه بأسم: ( مناي)

انصرع.. وارتبك.. ومو عارف ويش صاير.. ومختلع غررريبه .. وعلى طول جت في باله اخته اكيد فيها شي بس بالعاده علا ترسل له اذا فيه شي مو تتصل

رد بأرتباك:

ــ هلا..

سوسن بصرخه:

ــ اهلييييييين ساعه يالله ترد

هشام وقلبه طاح في بطنه:

ــ هذا انتين.!!

سوسن تتعيلف :

ــ ليش اجل فكرررت ميييييين..

ــ اهووو عني..

ــ احم.. بس احم..

ــ غربال.. ويش صاير ولويه مو من جوالش..

ــ ماعندي رصيد..

ــ ايه وخسري البنيه..

ــ احم خااايف عليها << قالتها وهي تطالع في علا

علا ارتبكت وراحت المطبخ..

هشام محمق:

ــ استحي هاا استحي..

ــ يوو الا كيف دريت ان هذا رقم جوال علا ..؟ ليش؟ مخزننه..

ــ ايه.. حق الطوارئ..

ــ مممممم حق الطوارئ

ــ ههههههههه سوسنو عن التعيلف واللعانه..

ــ ويش الأسم..

هشام فهم عليها وقام يستظرف :

ــ هشام ال...

ــ ههههههههههههه كف ويا وجهك.

ــ كفيين.. ويش صاير ؟؟

ــ هاا,,انسيتني لويه متصله اني عساك سعاده.. ايه.. ويش عندك الحين..

ــ ابد من ساعه خلصت شغلي .. خير؟؟

ــ لا بس ابغاك تمر علينا بنروح بيت خالة علا

ــ اللي سافرت امريكا؟؟ رجعو..

سوسن بفرح: ــ ايييه وابشررررك نجحت العمليه ومشى ولدها..

ــ الحمدلله رب العالمين.. اللهم صل على محمد وآل محمد..

ــ اللهم صل على محمد وآل محمد.. ويش الحين؟؟ نجهز..

ــ ايه افا عليكم .. اجهزو.. مسافة الطريق بس..

علا طلعت من المطبخ..

سوسن: ــ ايييه اني قايله مافي زيك بالدنيا ولا بتردنا .. امواااااااااه..

هشام استحى: ــ ههههههههههه عساش ويش اقول .. تأدبي عني..

علا ولعت حمرا.. وابتسمت..

سوسن بعفويه:

ــ هههههههههههههه استحو ثنينهم.. عساكم السعاده..

هشام:: ــ اقول باي..

ــ هههههههههههههه باي ..

سكرت سوسن:

ــ مسامحه طيرنا نص رصيدش..

علا ابتسمت:

ــ شدعوه.. يفداش الخير وايد..

ــ ايييه يبغى لي طلعتي اقول لخوي يشتري لي بطاقه ذكريني ..

ــ ان شالله..

ابو اشرف يكلم ابو جاسم في التلفون:

ــ ايه يابو جاسم انا المشكله حاولت اني اتكفل بتخفيف الحكم عن ولدك.. بس للأسف ما رضيو الا لازم حضور ولي الأمر دام انه موجود الله يطول بعمرك والا باسوي من وراك.. حسبي الله على بليس.. فأبغاك تجهز بنمرك انا واشرف وبنروح

ابو جاسم حاس بأحراج:

ــ لا ياخوك مانى رايح.. ولدي مهو مظلوم .. وانا اعرفه.. ماتتجارمو وتدفعو لجله ولا ريال والله ما ارضاها..

ــ لا تزعلني منك يابو جاسم..

ــ حلفت عليك بالله ومحمد وعلي .. والله ماتدفع ولا ريال ..

ــ يابو جاسم..

ــ يابو اشرف ماقصرتو عساكم سالمين وعساك بالغ في ولدك .. الله يوسع عليك.. بس هالطلب فوق طاقتي اسمح لي ماقدر عليه.. ماقدر اكلف عليكم وانا ايدي تصفر مااقدر اسوي شي..

ابو اشرف صار يفكر في كلام ابو جاسم لقاه في محله.. عزة النفس تغلب كل العواطف الأنسانيه..

ابو اشرف بهداوه:

ــ على راحتك ياخوك.. المهم حنا حسبة اهلكم أي شي تعوزوه مايردكم الا لسانكم..

ــ عساك سالم..

سكر ابو اشرف والتفت لولده.. وبهداوه:

ــ عزيز نفس وقوي مهجه هالرجال.. زيه قليل في هالزمن.. الله يهدي ولده ماطلع عليه

اشرف بحزن:

ــ الله يهديه..

وبفرح داخلي:

ــ ويحببك فيهم اكثر واكثر..

بالطرف الثاني ام جاسم صارت تصيح وتحن على ابو جاسم لويه ماقبل من ابو اشرف هالخدمه..

ابو جاسم في الحوش يشرب قدو...

الابصرخته: ــ شيفاااااااا.. شيفاااااااااا هاااااااااااا.. ترضيها علييي.. احس روووحي مديييووون طووول عمررري .. حتى لو قال لله فلله.. يامره محنا محتاجين احد .. الله لا يعوزنا.. وولدش خليه يتأدب .. لا تعوري راسي ولا تطوليها وهي قصيره..

ام جاسم بحمق:

ــ ماكنه ولدك.. مادري لويه تكرهه.. كني جايبتنه من الشاااارع..

ابو جاسم حمق ازيد منها ويشيل القلم من دبة القدو ويشدخ به عالأرض...

ــ وتاااااااااليتهااااااااااا

ام جاسم تركت له الحوش ودخلت غرفتها...

زينب تسمع صريخهم.. وتصيح.. مهي عارفه ويش تسوي...

ابو جاسم رجع القلم محله.. بيشفط نفس الا يحس مايوصل ...

شال القلم يقلب فيه وبقهر:

ــ شلخ الله راسش يا زهرو يالحنانه.. انشلخ قلم القدوو..

قام :

ــ ايه.. يالله.. ويلي ويلي .. يا ضلوعي..

وطلع من البيت...

تابع>>

وصلو بيت حسين.. ونزلت علا بالسرعه وياها سوسن...

طقو الباب .. مهلو شوي.. وهم ينتظرو..

وداخل .. امل بأبتسامه كلها سعاده.. تطالع سجاد اللي يخطو خطوه خطوه رايح للباب بيفتحه..

تحس قلبها مع كل خطوه يقفز من الفرح.

سوسن:

ــ يووو.. توش مكلمتنها.. ماحد يرد ولا يفتح.. عساه خير..

هشام واقف ينتظرهم يدخلو..

الا سجاد فاتح الباب وهو واقف على رجوله..

بعفويه وبلا شعور .. علا نزلت له وضمته..

هشام يطالع فيهم ومبتسم .. الموقف اثر فيه وايد ...

سوسن تصلي على محمد وآل محمد..

ودخلو البيت.. علا ماسكه بأيد سجاد.. ومن اقبلت على خالتها.. حضنتها .. واشتغلو صياح ..

سوسن:

ــ اوهوووعلى ويه الصياح.. الحمدلله على سلامته..

امل :

ــ الله يسلمش غناتي .. من الفرح والله من الفرح.. عقبالش ربي يسهل عليش ويفرحنا فيش..

سوسن : ــ يارب..

ويوم ثاني الصباح.. على طاولة الفطور..

ابو مالك:

ــ ايه ياخيه.. ويش اخبارش..

سميره مستغربه من هالسؤال.. وعلا وسوسن مستغربين اكثر واكثر..

سميره بأرتياب :

ــ الحمدلله بخير..

ابو مالك :

ــ ايه.. عندي وياش سالفه وابغى علا وسوسن يسمعوها ويشاركوني الراي..

الكل ساكت منتظر السالفه..

ابو مالك:

ــ ابو عدنان صديقي تعرفيه..؟؟

سميره بتوتر:

ــ ايه.. اللي عرس على بت عمه وتوفت تالي مصريه واخر شي لبنانيه.. وهو مايجيب ولاد..

ــ ايووواا وصلتي خير... المهم ياخيه.. بالمختصر وبدون مقدمات.. طالب القرب مني ومتقدم لش..

علا شرقت بالعصير .. سوسن صارت تطق في ظهرها..

سميره شدخت الملعقه عالصحن.. وقامت غرفتها..

الى الملتقى

هههههههههههههههه
استتتتتحت العمه هالضبببببعه هههههههههههههههههههههههههه
والله شكلك يا اميروه بتختمي القصه بفررح <<--- كانت تبغاها مأسآآه هع ..
خااطري اصيح هع هع <--- بتتكفخ
يسلموو على الجززء الرووعه
لاعدم
بالانتظااار
كبرياااء