ماعرفتوني .. كثر .. ما عرفني ..

ههههههه يسلموو حبايبي كالعاده تفرحني تعاليقكم وتواجدكم الأكثر من رائع

اعذروني على التأخر .. بس اشتراك النت حقي خلص.. والليله شحنت خخخ

حباابي .. هالجزء استعنت فيه بإنساانه غاليه على قلبي مره. جدتي .. ام امي . الله يحفظها ويخليها لي يارب.. ويحفظ ليكم حبايبكم.. عطتني كم حاجه.. بتعرفوا من الجزء.. ويش عطتني..
:)

اتمنى لكم قراءه ممتعه ومسليه
تفضلوا

وبعد ثلاثة ايام... عبدالله قرقر يطلع مع فارس ورائد يغيروا جو.. رائد طلب من عبدالله اذا ما فيها كلافة ياخذوا وياهم حيدر.. عبدالله ما مانع ..
رائد راح لحيدر .. وخبره عن الطلعه .. طبعا حيدر طار من الفرحه...
رائد:
ــ بس انتبه هااا.. اخذ احتياطك قبل لا نطلع .. لا تسوي لينا سالفة داك اليوم..
ــ لا ماشربت شي ولا بشرب..
ــ هههههه مع وجهك.. يللا مشينا..

طلعوا لعبدالله اللي كان ينتظرهم في السياره مع فارس.. كان رائد قاعد قدام.. وفارس ورى.. ركب حيدر وسلم عليهم ...
مشوا .. فارس يطالع في حيدر بنظرات << ياللي تطالع وكنك ما تطالعني خخخ..
متعجب .. هو سمع من رائد ان حيدر عمره 11 سنه يعني اصغر منه بس بسنتين.. شكله كنه اصغر منه بــ 5 او 7 سنوات ..<< ياحليله الطشونه..

عبدالله:
ــ انا ما فبالي مكان .. وين تبغونا نروح...
حيدر :
ــ المرجحانات على البحر .. افادي اتمرجح..
رائد:
ــ ههههههههههه ولا بتكبر .. حقة يهال المرجحانات..
ــ مانى حليو لكن..
عبدالله ..ابتسم..
ــ زين بنروح .. وانا بعد عندي حاجه حليوه تعلبوا بها هناك...

وصلوا البحر.. نزلوا .. حيدر حجز له مرجحانه .. رائد ميت عليه ضحك.. وفارس مستغرب منه..!!

فتح عبدالله دبة السياره.. وطلع منها سيكل..
رائد فتح عيونه ....
ــ سيكل مين هادااا..
عبدالله :
ــ هههههههه سيكل اخوي مهند .. من زمان حطيته بدبة السيارة كل يوم اقول ابابيعه ولا يدعيني قلبي واهون... يللا مين بيسووقه...
رائد :
ــ انااا.. << ولا مره ركب سيكل..
ــ تعرف له..؟؟؟
ــ أيــه .. ويش مفكرني... << احم .. كل شي يعرف له..
ركب رائد السيكل .. يبغى يتوازن..
طراااخ..
ــ ههههههههههههههه توووك تعرف له..
ــ من الأرضيه مهي مسفلته عدل..
ــ ههههههههههه حججك صواريخ يا رائد.. زين روح مناك قريب الرصيف مسفلت عدل...
رجع .. وطااااخ..
ــ ههههههههههه رائد قووم بس ما فينا شدتك.. ما بغينا ايدك تعتدل ويشيلوا الجبيره .. ترجع تكسرها.. ويش تبغى اهلك يقولوا عني .. كل طايح في ولدهم تكسير..
ــ مانى مانى.. ابغى اسوقه... علمني ..
ــ ههههه تووك تعرف...
ــ هااه.. فكرته سهل ...
ــ زين انا ودي اعلمك بس السيكل صغير علي ههههههه اخاف اركبه والرايح والجاي يتمسخر علي.. ولا بعرف بعد من الدراعه.. ويش اسوي لك .. كيفا اعلمك؟؟
فارس من بعد سكوووت طويل من اول ما طلع :
ــ انا اعلمه...
عبدالله :
ــ ايه والله صدق نسيت انك تسوق سيكل..
ــ يللا اعلمك رائد...؟؟!!
عبدالله خايف من ردة فعل رائد.. قال كان ما يشب بس في فارس حريقه... ما يدري بهم صاروا حليوين ...
رائد فرد بزوه شبرين :
ــ أيـــــــــــــــــــه..
عبدالله :
ــ صلوااات على محمد .. وال محمد...
وصار يصفق ..
رائد وفارس طالعوا في بعض وفقعوها ضحكه...
عبدالله :
ــ ويش فيكم تضحكو...
رائد حط ذراعه على كتف فارس:
ــ سرررر..
ــ هههههههههه.. ولاااا بعد صار بينكم اسرار ...
وحط صبعه في فمه .. وصفر ...
ــ عاااشوا.. ايوااا.. احلى .. من متى .. وانا اخر من يعلم..؟؟
رائد:
ــ ههههههههه مو من زمان.. بس صرنا اخويا.. خلاص..
ــ عسااه دووم يارب .. فرحتوا قلبي والله بهالسالفه ...

صار فارس يعلم رائد كيف يسوق.. وعبدالله متسند على سيارته .. متكتف ويتأملهم.. وعيونه مليانه فرح.. مستانس بهم فرحوا قلبه ونسوه همه شويه..


احلى شي مر بهالأيام على عبدالله هالصداقه المفاجأه بين رائد وفارس.. صار يفكر ويبتسم.. شلون المصايب خلفت وراها اشيا حلوه والحمدلله.. يتذكر اول تعارف له مع رائد كان بعد مصيبه.. لا اله الا الله .. والحين هالصداقه بعد نفس الحاله .. وصدق مثل ما يقول المثل :ما بعد العداوة الا محبه..

شوي الا رائد عرف يسوق ..
ــ هييييييييييييييييييييه هههههههههههه
وفارس يصفق ويصفر له.. حيدر مهو وياهم.. ملتهي بالمرجحانه..
انتبه عبدالله لرائد قاعد يساسر فارس.. وفارس يطالع في حيدر بخبث..
عبدالله فباله..
ــ اوووه صدق السالفه.. صار بينهم اسرار .. حلو حلو .. ماشالله.. وشكلهم ناويين على نية قشرى..

وفعلا.. غافلوا حيدر اللي كان يتمرجح وهو مغمض عيونه << خاش جوو يعني
ومسكوا المرجحانه كل واحد من جهه.. وهوووووب .. حد ما عندهم صاروا يمرجحوه.. خلوه يتصروع ...
_ اااااااااااااااااااااااااه.. هههههههههههه.. وقفووووا .. شوي شوووووووووووي..
وما ينشاف الا شعره يهبهب كنه بنوته << خوش داعيه لشامبو
وهم كلما صراخ زادوا السرعه والقوه.. وعبدالله فارط من الضحك:
ــ ههههههه حراام عليكم.. طشونه بينكم .. خففوا عليه.. رائدووه انت ادري بك راعي سوابق .. هههههههه ويا ويلي طلع فارس زيك بعد ..
فارس يكركر ضحك..
شوي الا حيدر الطشونه طااااير من المرجحاانه وطراااخ على الرمل على وجهه..
ويقوم الركيض عبدالله صار يصارخ:
ــ كسرتوووه هو نااقص ؟؟
شالوه وقلبوه على ظهره لقوا خشمه انفشخ وطلع شوية دم وجبهته متورمه.. نظارته الحمدلله بس اعوجاج بسيط..
صار عبدالله يسطر فيه على خفيف .. بس حيدر مغمى عليه.. عبدالله عصب:
ــ يــــاربي.. انا ناقص انا... هاا اغمى عليه...
فارس خاف:
ــ والله ما كنا نقصد ويش درانا انه بيفلت ويطير..
رائد وهو مو داق خبر.. :
ــ اهووووو ما عليكم منه.. هذا قطو بسبعة ارواح .. اسألوني بس عن الخال .. لا يغركم حجمه..
عبدالله حط حيدر بحضنه بيحمله :
ــ وانا ما شغلتي الا اناقل فيكم لهالمستشفى .. خلفتكم ونسيتكم.. والله بلشه.. لكن الشرهه علي يوم اطلعكم...
فارس تضايق.. اما رائد ولا عنده فيها...
ومامداه بيقوم .. الا حيدر :
ــ اووووووو...وووووووووه... << كان يسوي حاله مغمى عليه..
عبدالله انقهر منه ويمسكه من راسه ويهزه :
ــ ووجع.. خوفتنا .. طلعت انت بعد العن منهم.. الله يساعدني عليكم بس..
حيدر يعدل نظارته بعد الهزه.. وهو يضحك:
ــ بس اعرف امثل موو..
رائد :
ــ قايل ليكم قطوو... ما صدقتوني ....خالي وانا ادرى فيه...
فارس ميت من الضحك...

تابع >>>

ام حسين كانت في بيت فاضل.. عازمتنها زهراء على شاي العصريه.. وجايه بعد وياهم مريم.. وبنتها حنين..
حنين:
ــ رؤوووه .. حليو الرازقي " الفل" اللي بزراعتكم ..
رؤى:
ــ ايه توه طالع.. صايل حليو ويا الليحان.. << الريحان
ــ اول ما دخلنا بيتكم الريحه خنينه ..
زهراء:
ــ يؤ.. طلع الرازقي صدق..؟؟
مريم:
ــ هههههههه الله يهديش هذا وبيتكم وما تدري به..
ـــ هههههه ويش دراني به.. اني ما طلعت من زمان.. ويا رائد يا فاضل يسقو الزراعه ويش يدريني قام لو ما قام.... رؤى غناتي اخذي سله وروحي انتين ويا حنين لموه ويا شوية ريحان.. خلونا نوزعه ونستانس..

قاموا الثنيتن زي المربووشين.. خذوا السله ويللا تجميع... قبعوا اللي قدروا عليه.. غسلوه ونشفوه.. ورجعوا به للحريم..
زهراء صارت تقسمه عطت مريم شوي ويوم جت بتعطي ام حسين .. فردت ام حسين شيلتها وصارت زهراء تنفر فيها وام حسين..
ــ احححح صلواات على محمد...
كلهم بنفس واحد..
ــ اللهم صلي على محمد وال محمد
صارت ام حسين تشمه..
ــ اححح ذكرتوني بأبو حسين.. رحمت الله عليه << قالتها وهي تضحك مستحيه ورافعه جزء من الشيله ومغطية وجهها به..

قروا له الفاتحه...

نزلت الشيلة وهي مبتسمه..:
ــ رؤى امي.. قومي جيبي لي خيط وابراه...
ــ ان شالله اماه..
زهراء ومريم يطالعوا في بعض مستانسين عرفوا لويش تبغاهم ام حسين..
رجعت رؤى بالخيط والإبره.. وقعدت ويا حنين قبال ام حسين.. يطالعوها ويش تسوي...
شكت الخيط بالإبره.. وصارت تشك الريحان والرازقي تسوي قلاده.. وهي تغني :

ابو الزين يامالي هوا الزين يا مال
البارحه بيتوني تحت غرفتها هوا الزين يا مال ..
انا نايم وانا اتحرق بيمرتها <<"جمرتها" هوا الزين يامال..
يا لايمة لا تلوميني في محبتها هوا الزين يا مال..
هي بنت خالي وانا ولد عمتها هوا الزين يا مال..
البارحه بيتوني برى في البري << " البر" هوا الزين يامال..
ولعوابقلبي صوابٍ بالحشا ما بري هوا الزين يا مال..
البارحه بيتوني والمطر يمطر هوا الزين يامال..
وريحة فيابش "ثيابش" يا حبيبة تعطر هوا الزين يامال ..

ورؤى وحنين .. هلا هلا .. ما شغلتهم الا يصفقوا .. ويردوا ورى ام حسين .. هوا الزين يا مال..

خلصت ام حسين القلاده الأوليه..
ــ كلووووش... تعالي عروستنا رؤى هلا ..
رؤى متشققه ولبستها ام حسين اياها.. وسوت وحده ثانيه لحنين ..
ــ كلووووش والثااانيه للعروس لحنين.. عاشوا...
حنين ولعت الوان..
زهراء ومريم مستانسين ومره ميتين ضحك...
رؤى تطالع في حنين وهي تضحك:
ــ حنينوه تخيلي نعلس هالكبل هههههههه
ــ ههههههه لااا صغار بعدنا في المدرسه
ام حسين ..:
ــ يؤ. لا صغار ولا شي... اني يوم اني قدش يا رؤى.. عرست .. اكبر منش بس بسنه ام 10
رؤى فتحت عيونها وطقت صدرها
ــ يؤ هههههههه كيفااا؟؟
ام حسين :
ــ ههههههه ذكرتيني بأول.. يقولوا : البت "البنت" في هالوقت يسوى من يربيها .. احسب اليها عشر واخذ ربابيها " روبيات..فلوس.. المهر" لاجيت تخطبها من عند اهاليها .. امها كما النار عسى ربي يجازيها ...
زهراء ومريم لطموا صدرهم وفاتحيين عيوونهم :
ــ ههههههههه وييييش .. حرااام ..
ام حسين :
ــ هههههههههههه ويش اسوي هذا قول اهل لول ..خلوني اكمل ليكم ..
ــ ايه وتالي هههههه
ــ ايه امها كما النار عسى ربي يجازيها .. والأبو يشرط بندله ومنين قهوتا.. "قهوتها"
رؤى:
ــ ويشوو يعني بندلة..
ام حسين :
ــ هههههه يعني تتن حق القدو.. ويش يعرفكم انتون..
ــ هههههههههههه
ام حسين تكمل كلامها.. ونبرة صوتها غيرتها الى نبرة المختلع على مسخره :
ــ الــــــلــــــــــه يعينك .. لمن شفت حالتها.. تشبه القنفذ اللي لسانه مفل "مثل" النار .. وسلامتكم

كلهم ماتوا من الضحك على هالسالفه ...
وبنفس واحد:
ــ الله يسلمش..

بالسياره.. رجعتهم.. عبدالله وحيدر ورائد وفارس... وصل حيدر اول واحد.. نزل بغبرته وحالته .. وجبهته المتورمه.. وما يحتاج .. ردة فعل ام حيدر معروووفه ..

صار رائد يحايل في فارس ينزل وياه بيتهم.. لأن فارس في نيته بس يوصلوا بيت رائد ياخذ جدته ويرجع معاها بيتهم .. يوصلهم عبدالله.. بس فارس مهو راضي.. وقاعد يقنعه يخليها مرة ثانيه.. ورائد راكب راسه عناد الا اليووم..
عبدالله مستانس بهالألحاح من رائد.. وصار يحايل في فارس بعد.. بس فارس مهو راضي..
وصلوا بيت رائد.. نزل رائد ماد البرطم شبر.. دخل ونادى على ام حسين.. بس زهراء ما رضت تخليها ترووح:
ــ اهووو خالتي قعدي مستانسين وياش .. لا تردينا عاد..
ــ ويي .. والله كلفت عليكم خلوها لمره ثانيه .. قولي لي كم مره خلال هالأسبوع اني وياكم
ــ حشاا هذي المره الثانيه.. يللا عاد خالتي لا كلافه ولا شي.. وربي متونسين معاش..
ــ خليها مره فانيه .. باروح فارس بالسياره.,.والرجال ما قصر بيوصلنا لا اخليه يتانيني وايد..
زهراء وقفت عند بابهم.. وقفلت الباب وشالت المفتاح في مخباها..
ــ واذا قلت لش مافي روحه...
ــ يؤ.. هههههه.. يـــــــــــاعلي...
رائد مسك ام حسين من ايد.. ورؤى من ايد وصاروا يسحبوا فيها .. الا تقعد.. ومريم وحنين ضحك عليهم...
ورضت تقعد اخيرا.. رائد طاار من الفرحه.. ونننننن طياري لفارس برى.. ويفتح الباب .. ويفرك بأصابيعه وهو يهز ..:
ــ حره حره.. بتقعد امي ام حسين ويانا.. يعني تنزل .. حره حره..
عبدالله فطس من الضحك على رائد .. مره شافه فرحاان ..
فارس مره مات من الضحك.. ونزل :
ــ امري لله.. يللا مع السلامه عبدالله ..
ــ الله يسلمك...

تابع >>>

رائد:
ــ عبدالله اقعد ويانا..
ــ هههههههه لا مره ثانيه اخاف اصير عذول..
ــ على راحتك ..
عبدالله يمزح ويا رائد:
ــ بل بل على راحتي مافي محايل لي انا يعني صدق خوفي..!!.. صدق من قال من شاف احبابه نسى اصحابه..
رائد تلون :
ــ ههههههه والله ما اقصد حياك.. بس قلت عطلناك طول اليوم مداور وتعبناك..
ـــ هههههههه امزح وياك .. صدق انا تعبان وباروح البيت اريح.. يللا اشوفكم على خير
ــ مع السلامه..
مشى عبدالله وهو مره مستانس وفرحان والدنيا مهي سايعتنه بسبب هالتطور الجديد..
دخل فارس بيت رائد.. اول ما دخل ..
حنين تساسر رؤى:
ــ هذا هو فارس...
ــ ايه هذا هو..
ــ احليوو.. << بل من صغرها تغازل خخ
رؤى تطالع في حنين..مستغربه..
ــ بل قليلة ادب .. ههههه.. ما تستحي.. عيب يا دبه..
ــ ماقلت شي خلقة الله كلنا حليوين..
ــ عيب يا بنيه تسمعش امش تقص لسانش هادا صبي..
ــ خلاص بل بل ماصارت هدي كلمه خلاص اقرع مو حليو..
ــ اقلع.. اقلع..


شوي قاموا حنين ويا رؤى.. راحوا غرفة رؤى.. كانت قبال غرفة رائد.. وباب رؤى كان مردود .. مفتوح شووي ما نطبق عدل.. فارس ورائد لسا تحت ما ركبوا..


دائق معدودات و ارتفع صوت المسجل.. ودقت الحاله ..
رؤى ويا حنين طايحين حالة هباله ورقص مستانين بقلايد الريحان..
هلا هلا هلا ...
غرفة رؤى فوق غرفة جلوس الحريم على طول .. زهراء من سمعت الأهتزاز وزلازل السقف .. طالعت في مريم وهي تضحك:
ــ دقت الحاله .. دقت ..
وصاروا يضحكوا..
ام حسين :
ــ يا ساتر هادويش ويش اللي فوق..
زهراء :
ــ معاريس .. رؤى وحنين داقينها عرس..
ــ ههههههههه حلاوتهم.. وي بلغني الله فيهم عرايس بليلة وحده..
مريم وزهراء:
ــ يارب وبلغش الله بفارس ..
ــ الله يسلمكم وبلغكم بكل حبايبكم


رائد ركب ويا فارس.. وصلوا عند الغرف.. فارس بيدخل غرفة رائد الا رائد يسحبه .. ويحط صبعه على خشمه ويهمس :
ــ ششششششش.. تعال شوف الخبلان.. خخخ.. اذا دقت حالتهم.. ويش يسواا ..
فارس:
ــ ههههههه عيب عليك..
ــ خخ ما حد قال ليهم ما يسكروا الباب عدل .. تعال بس لا يفوتك يموتوا من الضحك..
وصاروا يطالعوا فيهم ,, وميتين ضحك ,,
الثنتين طبعا بالمشامر كالعاده .. وكملت قلادة ريحان.. وجههم بس مغطى والقلادة طالعه تهتز وهو يناقزوا.. ضبيعات عدلات.. ولا يدروا انهم صايرين مضحكه ..

وبالغلط فقد فارس توازنه وحط كل ثقله على رائد اللي فتح الباب بالقوه .. وطرااخ شدخه بالجدار..
ووقفوا الثنتين مختلعين.. وشالوا المشمر من على وجوههم يطالعوا ويش هالشدخه..
رؤى حمقت:
ــ قليلن ادب تطالعوا فينا.. لكن باقول لأمي ..
رائد ولا كنه مسوي شي:
ــ قولي... ويش مسويين احنا .. ما سوينا شي..
فارس مستحي حده .. هذي اول جيه له لبيت رائد ويسوي مشكله وفي باله
: ــ بــــــــــــــل غربل الله بليسي يوم اطاوعك يا رائدوه .. افف ويش هالفشله..
حنين صارت تهدي فيها :
ــ خلاص ما عليه .. لا تعصبي و لا تسووا شبقه..
رائد فاقعها ضحكه..
ــ امبااااع.. ويش هالحشيش اللي على رقابكم..
حنين ضحكت ..
رؤى حمقت زياده:
ــ حشيش دبتك.. هذي قلادة ليحان ولازقي ويش عرفك
فارس مهو قادر وفي باله :
ــ ليحان ولازقي . يا حليلها.!!!
دار بوجهه على جنب وهو يضحك..
رؤى انتبهت له يضحك.. وحمقت زياده:
ــ وانت على ويش تضحك.. ما قلت شي يضحك.. ما تستحوا.. لكن ما عليه..
فارس :
ــ لالالا.. ولا شي .. اضحك على رائد..
وفي باله :
ــ بل بل فارسووه ويش هالفشايل اول جيه وهذي سواياك..
رؤى انقهرت في رائد وفارس:
ــ اطلعوا بللا .. من غيل مطلود..
رائد حمق .. هادي شلون تكلمه كذا قدام فارس .. مافي احترام مافي حشيمه << كنه محترمها لو محشمها خخ
ويرد عليها بمسخره:
ــ اطلعوا بللا .. من غيل مطلود.. .. شلون من غيل مطلووود وانتين قلتي اطلعوا بللا...
رؤى خلاص عيونها صارت بحر .. هذا قاعد يتمسخر عليها قدام حنين وفارس.. بعد حنين متعوده عليها .. قاهرنها وجود فارس .. حاسه بفشيله.. وتشيل مخده من سريرها وطراااخ ترميها.. رائد وخر بسرعه.. وطااخ تصفق بفارس..
رؤى خلاص انحرجت.. رائد انقهر فيها :
ــ ما تستحي.. كل هالشباق عشان تمسخرت على هالحشيش.تصفينا بمخدتاش
ويمسك القلاده بيهزها ليها عن مسخره.. وترجع رؤى على ورى بسرعه فكرته بيصفقها .. وتنقطع القلاده وتطيح على الأرض...
رؤى:
ــ اااه.. تهي تهي ... انت ويشوو انت.. ما كنت اقصد فالس يوم المي المخده .. حق ويش قطعت قلادتي .. ماني ماني ..تهي تهي ..
فارس كسرت خاطره .. ابتسم:
ــ رائد حق ويش كذا حرام عليك.. عادي الا مخده ما تعور
ــ اهوو ويش عرفك انت بالبنات .. دلااااليع ما عليك منها .. امش بس غرفتي ..
ــ دقيقه..

شال فارس القلادة من على الأرض.. وربطها.. ولبسها رؤى اللي كانت قاعده على سريها ومغطيه وجهها تصيح..:
ــ خلاص لا تصيحي .. هاا سويتها ربطتها بالقوه بعد.. ما بتنقطع مره ثانيه.. خلاص...
رؤى وايدها بعدها على وجهها..
ــ خلاص.. لكن رائدوه عند ابوي خله بس يرجع من العمل..
رائد ولا عنده فيها :
ــ قولي .. كل يوم هذا شريطش وينعاد.. يبه رائد سوى .. يبه رائد قال..

وطلع هو ويا فارس من غرفة رؤى.. حنين صارت تهدي في رؤى ..
ــ يعني ما تعرفي اخوش صدق نحيس بس طيب شوي وبيراضيش..
رؤى تدري به فسكتت..
وبغرفة رائد... فارس يكلم رائد:
ــ انت كذا على طول ويا اختك؟؟
ــ شلون يعني ؟؟
ــ يعني شباق ونحاسه وكله تصيحها..
ــ ايه البنات ما يجوا الا بالعين الحمرا.. تعلمني عنهم .. ويش دراك انت..
ــ حرام عليك.. كان زين لو عندي اخت لو اخو.. كان ما سويت زيك..
ــ اهووو.. فارسوه يللا عاد لا تقعد تعور راسي بهالبنات.. وبعدين انا وين رحت؟؟
ــ وين رحت .. يعني ويش؟؟
ــ يعني انا اخوك.. والا ما تبغاني ..
فارس ضرب كتف رائد:
ــ افااا وانا احصل اخو زيك واعيفه ..
ــ هههههههه .. زين.. بس ويش يعني اعيفه..
ــ ههههههه يعني اخليه.. ويش يعرفك هذا كلام امي ام حسين..
ــ ههههه ايه احبها امك ام حسين طيبه
فارس تنهد:
ــ ايييه .. والله طيبه الله لا يحرمني منها لولا الله راحم حالي بها .. كان ضعت انا بهالدنيا..
رائد كسر خاطره فارس:
ــ الله يخليها لك ولا يحرمك منها يارب ..
ــ يارب...

وهم قاعدين يسولفوا الا بصوت
ــ ااااااااااااااااااااااااااااااااااااااااااه
بغرفة البنات

والى اللقاء في الحلقه القاادمه :bleh:

يلا عاد نمبي الأجزاء الباقية بسرررررررعة ننظرش ومرة حلو هالجزء كله فرح ورقص وحلوو
مافيه كرب ييجنننننننن وعرفت ساعدج جدتج الله يخليها لج في الأنشودة صح
ويلا قاعدين ننتظر باحر من الجمر وبعد نخلينا نتشوق امبى اعرف وشصاير ويالبنات

يووووووووووووووووووووووه عجلي امورشة بسررررررررررعة ماني قادرة انتظر تراني ماني قادرة اصبر
مشكووووووووووورة ع القصة الروعة احلى قصة صراحة بس اشفوها اشقق فرح

هوا الزين يامال http://www.moq3.com/img/uploads/klJ12417.gifhttp://www.moq3.com/img/uploads/klJ12417.gifhttp://www.moq3.com/img/uploads/klJ12417.gif

هوا الزين يامال http://www.moq3.com/img/uploads/HwG12658.gifhttp://www.moq3.com/img/uploads/HwG12658.gifhttp://www.moq3.com/img/uploads/HwG12658.gif

ياااربي امووووووور وربي الاحداث قطعتني هالمره من الضـحك

اقتباس:

---

ــ امبااااع.. ويش هالحشيش اللي على رقابكم..

---

ويلي امرووشه بموت ضحك ماني قادره:deh:

دمعت عيوني من الضحك

وعلى حيدلوه على الملجيحه <<علمتها لؤى :toung:

وهذا لائدوه يعني مالاح يتوب ويتلك اخته على حالها

لازم بكل حلقه يضلبها ويكسل بخاطلها :evil:

الله يهديه بس

حلقه وجزء مميز بعيد عن التوترات والالام ..

بس لايكون الهدوء الذي يسبق العاصفه

اقول امرووش لايكون بتنزلي بكره حلقه

لاتنزلي شيء سامعه لا انتفك

اصبري موب تطير القصه نزليها يوم الجمعه

ولا السبت الفجر يعني على الراحه

علشان ماتتعبي وتتجمع الافكار

وتصير احداث رهيبه

سامعه ولا :weird:

ننتظر الحلقه الجديد على اقل من مهلك :noworry:

هو الزين يامال
هلا هلا عاشووووووا
ههههههههه
مشكوورة امورة
انتظر التكملهـ..

اقتباس:

---

احليوو.. << بل من صغرها تغازل خخ

---

حلوووووو من صغرها وتغازل موتتني من الضحك :kaseh: وعاد كل يوم عرس بعدهم صغار ع العرس عقلهم فوين الله يستر عليهم خخخخخخخ:deh: ههههه:ongue::ongue::ongue:لامورة
والله هذا احلى الاجزاء روعة والخوف من الجاي
تحياااااتي

جزء يهوووس


روووعه وحركااات


وهوا الزين يااامااال




وترى الليله عدنا عرس بنت عمي ولد عمتي


بس قلت لازم اجي اقراها

خخخخخ


ما قدر متحمسة مرة مرة

وهم بكرة عدم عرس بنت عمي لا تنزلي الجزء


في العجلة الندامه



ومن تأنى نال ما تمنى

خخخخخخ

<<<< قامت تقول حكم بس عشااان لا يفوتها الجديد


وعلى فكرة
ــ خلاص.. لكن رائدوه عند ابوي خله بس يرجع من العمل..

يمبالك تصحيحيها

لائدوه


افوتك بعااافيه




دمتـــ بود

لا لا لا لاتسمعي سحورة تقدر تقراه مابطير القصة
احنا الي بنطير من الشوق للقصة
ان سمعتي كلامها نوريش نخليش تكتبي جزئين بدال واحد
نعكس المثل
في التأني الندامة
وفي العجلة السلامة
خخخخخخخخ ههههههه
ننتظر بكل شوق
تحيااااتي

بجد وناااااسه واكتير حلووو
حركاااااات
امـــــــــوووره
وصح السان جدك عرفت تساعدك اكتير
في الاغنيه لانها حقت الاول >>ربي يحفظها لك ولايحرمك منها <<
جــــــــاااااري الانتظاااار ..

الجزء

مرررررررره مرررررررررررره


حليو ويجنن

هي بنت خالي وانا ولد عمتها هوا الزين يا مال..
>> عجبتني .. لغاية في نفس يعقوب


بالصراحه موتيني ضحك


ضحكت ضحك واستانست مررره


غناتي ان شاء البسمه ماتفارقش

تسلمي يالغاليه

ننتظر الجزء الجديد

يسلموا خيتو وبانتظاااااار الجديد

أموووره الحلقه مرررره تهبل وتموت من الضحك
بس على فكره عندش أخطاء في كلام روئ
خخخخخخخخخخخخـ
المهم مشكووووره يالغلا على الحلقه اللي تهبل
أووووووه نسيت
سلمي على جدتش وقولي ليها مشكووووووره على المساعده<<<<اللي يقول تعرفها من زمان
خخخخخخخخخـ
الله يخليها ليكم
يسلموووو يالغلا ونحن يإنتظار الحلقه الجديد..

ــ حشيش دبتك.. هذي قلادة ليحان ولازقي ويش عرفك

ــ خلاص.. لكن رائدوه عند ابوي خله بس يرجع من العمل..


أميره ملاحظاتي ههههههه

ترا ما بتحقلي الشهاده

انتبهي مره ثانيه زين

رائد يعني لائد زين

ويرجع يعني يلجع زين

وعرفك يعني علفك

ترا بتنقثصي علامات واجد ولا بتعدي الماده زين

والله هيبات القصه ميه ميه

كملي اميوووره خلينا نكملها كلها طلبتش

السلام عليكم
اول بعلق وبعدين هداك :toung:

اقتباس:

---

ــ المرجحانات على البحر .. افادي اتمرجح..

---

مع فيسك حيدلوه فتحت نفسيتي ابغى اروح اتمرجح<<نرجع لايام الطفووله نيهههههههههاي

اقتباس:

---

ــ أيــه .. ويش مفكرني... << احم .. كل شي يعرف له..

---

اقتباس:

---

---

ماشاء الله عليه مافي حاجه مايعرفها بس الصرصور مايعرف يطقه نيهههههههههههاااي جبان صحيح<<عدال عليش ياللي ماتخافي

اقتباس:

---

ابو الزين يامالي هوا الزين يا مال

---

اقتباس:

---

---

..ألخ

عجبتني يبغى ليي احفظها نيههههههههههههاااي

اقتباس:

---

ــ حشيش دبتك.. هذي قلادة ليحان ولازقي ويش عرفك

---

هههههههههههههههههههههاااي عجبتني حشيش دبتك والله انها فلته لؤى

اقتباس:

---

ــ خلاص لا تصيحي .. هاا سويتها ربطتها بالقوه بعد.. ما بتنقطع مره ثانيه.. خلاص...

---

وييييه هدا طيب طالع عليي ايه اصير بنت عمه له:wacko:<<خرفت الاخت ويش جيبش انتينا ليه
عفر احساسي الاخير بيصدق اني عندي احساس ادا صدق قولو البطه صدقت بس ادا ماصدق لا تقولو سوو روحكم نسيتو
خيوووه امووروه عليش حلقه شفاريات كشوخيات فلته وتزحف زحيف
سلمي على جدتي اقصد جدتش وقولي ليها مشكوورة كفاري وماقصرتي
والله يعطيكم ربي الف عافيه
بانتظار الجزء هداك هوه
تحياتي
ضحكوه البطه

الله يعطيك الف عافيه امورة يالغلا
علقصه الروعه
موفقه

:) :) :) ^_^ :) :) :)

منوريييين حبايبي ويسلمووعالتعاليق الكشووخه.. :bigsmile:

على فكره للي ما يدري.. ترى اميرووة تكتب الحلقات اولبأول يعني مهي مكتوبه عندها من قبل ...

المهم... اعلااااان...

اميـــــــــــروووة قررت تاخذ اجازه من الكتابه ليلتين الأربعا والخميس من كل اسبووع.. خلها تشم هواا تاخذ نفس :) .. والليله ان شاء الله تكمل ... http://www.allams.net/vb/images/smilies/smilies/58.gif

راح يصير تعويض وزيادة الجزء في حالة الغياب خااارج نطاق هالليلتين.. خخ .. اما بهالليلتين... اجازه رسميه << حالها حالكم^_^

دمتم بحفظ الرحمن

هههههههه نعطيك أجازة بس يالله عطينا اجزاء له

مشكوره خيه بس وين التكمله ترى اني متشوقه اعرف
ويش بيصير وبصراحه عجبتني فلطة رؤى احب الي يغلطوا اني
يلا عاد بلا دلاعه كملي لا انتفش ترى هذي القصه احلى بزود
عن الي قبلها هذيك كلها مأسي ونياحه اما هذي كركرتني ضحك
على حيدر وعبد الله لكن عجبني هالعبد الله خخخ <<< شجاع
يلا بس كملي واني متابعه لش اني مابترك المنتدى على شانش بقعد بس
على قصصش الحليوه واني بصراحه اموووره حاولت االف قصه بس مادري عنها
عدله لو مو عدله لان اول محاوله ليي في تأليف القصص
فا اني ابغا افعل عضويتي بس مارسلو لي رابط التفعيل ياريت احد يساعدني ويطلب منهم
على شان اقدر اسوي شي جدي احس انه رجايلي واياديي مربطه
تحياتو الى اميررررروه الحليوه
شموعة

يسلمووو كل الحكايه احبك :bigsmile: الليله بيبتدي دوامي خخ

شمووعه ياهلا وغلا .. منوره عزيزتي ودوم هالضحكه يارب
وحلو ورينا اول تجاربش وان شالله راح اتباعها لش على خير .. لا تخبي اي موهبه عندش ولا تنتقصيها مع الوقت تطلع الإبداع.. :bigsmile:

وحساااااابش الغير مفعل .. عندش خيي امير . متابع القصه وان شالله ما يردش
وهاا لعيونش بسوي له نداء ويش كبره .. :wink:

خيي اميـــــــــــــــــــــــــر العاااشقيييين..

اقتباس:

---

اني ابغا افعل عضويتي بس مارسلو لي رابط التفعيل ياريت احد يساعدني ويطلب منهم
على شان اقدر اسوي شي جدي احس انه رجايلي واياديي مربطه

---

هذاا كلام خيتناا الشمعه... :bigsmile: تصرف ويعطيك الف عاااافيه....



والحين تفضلوا الجزء الجديد.. :cool:

سبق الأاااه صوت شدخه قوويه شلخت الأرض .. وسقف غرفة جلوس الحريم ارتج رج شوي ويطيح..
زهراء كانت تحوس بالمطبخ..بتجيب ضيفة ..
ام حسين رفعت راسها.. :
ــ سمت على اعمارنا الزهرا ام الحسن وحسين .. هااداا ويش ..
مريم :
ــ ههههههه... الله يستر . بنادي زهرا تشوف ... زهراااا .. يا زهراااا

فارس ورائد راحوا ركيض بيشوفوا هالشدخه .. ويوم دخلوا.. لقوا سرير رؤى منشلخ وحنين ورؤى في وسطه بمشامرتهم وضلوعهم متكسره..
رائد:
ــ هههههههههههههه ويش صااير؟؟
حنين وهي تمسك حواف السرير تحاول تقوم:
ــ اااه.. آآآآييي.. قايله اني لرؤوه لا نناقز على هالسرير.. اخاف ينكسر ..
وتقلد رؤى بمسخره: "سليلي.. كل يوم اناقز عليه .. قوي وما ينكسل"
رؤى:
ــ آآآآييييي.. انكسل منش انتين يادبه و لا تتمسخلي.... وويش دلاني اني انه بينكسل..
رائد:
ــ ههههههههههههه فيله ودينصورة بيناقزوا على سرير خشب.. وما تبغوه ينكسر.. ويش يقدره هالمسكين..
فارس قام يضحك...
رؤى انقهرت وصارت تطالعهم على جنب:
ــ فيل انت مع وجهك..
حنين:
ــ طااالع اخذت الفيل وخلت لي الدينصور..
ــ أيـــه .. انتين امتن مني ..
حنين تصفق رؤى:
ــ ما احد غيرش الدينصور..
ــ ماني دينصول ولا فيل .. لكن ما عليه اوليكم..
رائد:
ــ قوومواااا يــادبب..
زهراء ركبت:
ــ ويش اللي انشدخ .. ويش صاير؟؟؟
ويوم شافت السريراللي منشلخ .. تنهدت..
ــ اشواا .. يعني السرير بس .. ما صابكم انتون شر..
حنين ورؤى:
ــ لااا..
زهراء:
ــ قوموا اجل عنه وخلوه تالي فاضل يصلحه..
نزلت زهراء تحت... وما مداه رائد بيرجع غرفته ويا فارس.. الا فارس ماسك ايد رائد:
ــ رائد.. انا ابغى اصلحه .. عادي؟؟
ــ ههههههه .. حركات.. تعرف له..
ــ ودي اصلحه اجرب.. عادي؟؟
ــ ايه عادي.. يللا وانا باعاونك..
شالوا المنام والبطانيات.. الا بطيحة ورقه على الأرض..
رؤى من شافتها قامت تركض وخطفتها وحطتها بالدرج..
رائد بحمق:
ــ ويــــــــــــــــش هالورقه..؟؟
ــ مـــــــــــــــــالك شغل...
رائد فتح الدرج وهو معصب وخطف الورقه... ورؤى تصارخ عليه ., وفارس وحنين يتفرجوا مستغربين..
رائد:
ــ هههههههههههههه .. ولوويش خاشتنها تحت البطانيه..
ــ اصلا ما ادلي بها من داك اليوم ضاعت لحنا بيت جدي بسلعه ولا دليت وين لاحت.. وهي اندعست في منامي..
رائد يكفسها :
ــ ماليها داعي الحين ..
رؤى :
ــ لااااااااااااااااااااااء..
وتخطفها من ايده وهي تعدلها..:
ــ بكلة اذا كبلنا تدكلك بفعايلك فيني يوم كنا صغال..
ــ خخخ والله ما عندش سالفه..

حنين وفارس يطالعوا في بعض مهم فاهمين ويش السالفه..
رائد:
ــ يللا ابو الفوارس.. ويش العدة اللي تبغاها للتصليح..
ــ بس مطرقه..
رائد راح لأمه:
ــ امااه .. وين المطرقه..؟؟
ــ يؤه .. حق ويش..
ــ بنصلح السرير..
ــ خلوه .. ابوك يصلحه تالي..
ــ لا بنصلحه انا وفارس,,
ام حسين:
ــ على عمري فارس ما يقدر يشوف شي منكسر لو مخترب وما يحط ايده فيه.. خليهم زهرا .. لا تخافي فارس شاطر..
زهراء:
ــ لا بس اني قلت لا يتعب عمره لو يصيبه شي من ضرب المطرقه..
ــ لا ان شالله ما يصيبهم شر.. ودام انه اشتهى ..جربوه عن افاده..
زهرا ابتسمت:
ــ وليش لا.. رائدي .. المطرقه في الصندوق في الدولاب اللي على يمين الثلاجه .. خذها وانتبوا لعمركم لا تضربوا اياديكم الله الله بروحكم..

عشر دقايق وقام الطق..
طراخ .. طراخ.. طرخ.. طرااخ .. طرخ..
ورؤى وحنين كالعاده مع الطق ما شغلتهم الا صفقه ورقصه ودق رقاب << يصلحوا يسووا فرقة .. خخ
رائد يتمسخر عليهم وقاعد يتفرج على فارس اللي ينجز المهمه.. << شقال قال باعونك ..

خلصوا تصليحه .. وعدلت حنين ورؤى المنام..
فارس
ــ يللا جربوا يطيح لو لا..
رؤى انربشت وقامت تناقز عليه.. نقزه نقزتين ثلاث الا هو .. طراااخ مره ثانيه..
فارس :
ــ لااااااااااااااااااااا..
رائد:
ــ ههههههههههههه قايل لش فيله... وبعدين تجربي جربي القعده النومه .. لويش تناقزي .. هههههههههههه
رؤى حمقت .. وقامت وهي منقهره:
ــ اني ماني فيله.. وماليكم شغل خلاص لا تعدلوه ما احد قال ليكم .. خلوه يعدله ابوي عدل..
فارس جت له حالة احباط,, ساعه يطقطق .. وتالي تناقز وتشلخه ولا بعد مو عاجبنها الوضع.. وخلوه وما احد طلب منكم بدل كلمه شكرا .. يعطيك العافيه...
فارس:
ــ رائد مشينا غرفتك
رائد حس على فارس من نبرته انه تضايق..
ــ يللا مشينا...

حنين صارت تعاتب في رؤى:
ــ الحين بدل لا تشكريه تقولي ما احد طلب منك...
رؤى حاسه بتأنيب الضمير بس من النوع اللي ما تبين هالشي وتظهر عكس ما تخفي:
ــ ما احد قال له .. ويولي .. اصلا ما اطيقه.. هادي تاني مله اشوفه.. وهو من اتكلم كله يضحك على كلامي من حلاته هوو..
ــ يمكن ما يضحك عليش.. ويش فيش..
ــ لا تدافعي عنه ولا تطليه والا فالقي لوحي ليهم وخليني.. تهي تهي
ــ بل بل.. تبغي اقل حاجه حق تصيحي..

تابع >>

بعد شهرين ...

ــ امااااه .. زهقت واني ضامه ايدي.. متى اغسلها..
ــ اذا تبغيه برتقالي وعع.. ومو حليو قومي غسليها.. حلاته احمرر ..
ــ افففف اني قلت لش ما ابغى .. ويش هاادي بقعه حملا.. لازم حنى..
ــ رؤووه.. عرس بنت خالتش زنووب ولازم تصيري حليوه كل البنات بيتحنوا الا انتين .. ما يصير شوفي حنين اكي ساكته..
ــ الا مفهيه شوفيها فتحت بوزها من التعب .. زهقت.. مو لازم هالبقعه من حلاتها ..
ــ رؤووه لا تقعدي تحني على راسي .. وسكتي...
شويات نشف الحنى .. وقاموا غسلوا.. ووقفوا قدام المرايا يستهبلوا.. فردوا اياديهم.. وصاروا يلوحوا بهم كنهم يودعوا باي باي .. هلا هلا هلا ..
حنين بنبرة تلحين كنها تغني :
ــ حنااي غمق.. احسن منش.. يعني يحبني ريلي..
ــ هههههههه .. ليلش في عينش .. مين اللي قال لش..
حنين تكمل بنفس النغمه:
ــ من قول امي.. اذا غمق حناش.. يعني يحبششش... واللي ما يغمق ما يحبهاااا..
ــ هههههههه واني اقول مفهيه وساكته .. و لا تكلمتي.. عشاان يغمق .. حق يحبش ليلش.. ههههههه خبله حنينووه وما تستحي..
حنين عدلت صوتها :
ـ اهووو انتين كل حاجه ما تستحي...

وبعد يومين ...

جت ليلة الزفه...
حنين متكشخه لابسه ثوب نعووم ,, ورؤى بحكم ان زينب بنت خالتها فلبست ثوب مفرفش ابيض ومستانسه به.. قاعده تدور وفرحانه بالثوب وهو يكبر مع دورانها..

زهرا ومريم يحطوا ليهم روج وكحله عند المرايا ويتعدلوا << قبل 10 سنين كل شي بسيط تعديل في البيت والعرس في البيت كل شي عادي..

ــ امااه اني ما ابغى حنى.. بس حطيتي لي .. اني ابغى حاجه حملا في مكان تاني..حطيها لي..
زهرا:
ــ وين يعني..
رؤى مدت برطمها :
ــ بلطمي..
ــ تبغي الطمش عليه .. عيييب البنيات ما يحطوا << رحم الله ايام لول خخ يوم كنا صغار.. عظيمه وقوويه اذا بنت مهي متزوجه حطت خخخ..
رؤى مدت برطمها حمسانه:
ــ لاااا.. هونت خلاص ...
ــ لا عاد اني اللي باحط لش عشان هونتي ..

حنين ساكته وسرحانه و شوي فتحت عيونها << حركه واحد لقى فكره جهنميه ومستعد لطرحها..
رؤى بتملل وحمسانه :
ــ قولي .. ويش عندش
حنين :
ــ بسم الله الرحمن الرحيم .. جنيه ويش دراش اني باقول حاجه..
رؤى ترفع حواجبها بخبث:
ــ دلـــيـــــــــــــــــــــــت.. قووولي..
ــ ههههههه .. زين ... عندكم فيمتو..؟؟
ــ فيمتو ؟؟ اللي يشلبوه ..؟؟
ــ لا اللي يتسبحوا به.. ايه عصير.. ويش فيش مفهيه..
ــ لااا بس توش شالبة عصيل بلتقال .. مسلع عطشتي وتبغي فيمتو..
ــ بــــــــــــــل رؤوووه بخيله يصقععععششش..
رؤى حمقت :
ــ مااني بخيله انتين اللي ما تشبعي يا دينصووله..
ــ دينصووره انتين .. جزاتي ابغى اسوي براطمش حمراا..
رؤى فتحت عيونها ..
ــ صدق ؟؟ كيفااا..
ــ امشي وياي المطبخ واعلمش..
راحوا المطبخ.. طلعت رؤى غرشة الفيمتو... صبت حنينوه قطرة في كاس.. وغمست صبعها.. ومدته على برطم رؤى..
رؤى:
ــ وييييع .. لا تقولي امص صبعش.. ما ابغى فيمتوو كذاا اني .. صبي فيه مااي ..
ــ خبله انتين اذا سويته عصير بتشربيه ويصير لش براطم حمرا وشنب .. ما نبغى الشنب نبغى بس البرطم.. اسكتي بس .. ما قلت لش مصيه.. ابمسحه على برطمش مالش شغل..
وتصير حنين تمسح برطم رؤى .. مره ومرتين بالفيمتو المركز.. وبالغلط طاحت
نقطتين فيمتو على الثوب الأبيض..
رؤى :
ــ ااااااااااااااااااااه... لا لا لا
وراحت تغسلهم بسرعه ... وللأسف انتشروا وصارت بقعتين ورديتين كبيرتين..
رؤى غرقت عيونها دموع... وتسندت على كبت المطبخ..
ــ تهي تهي.. مالت عليش وعلى فكلتش.. اختلب ثوبي.. تهي تهي
حنين مفهيه .. ماده صبعها واثر الفيمتو عليه .. وواقفه تطالع الموقف ...
ــ اسفه ما كنت اقصد..
ــ الحين امي بتعصب ويش اسوي.. تهي تهي..

راحت حنين لزهرا.. و بخووف وارتباك وتردد علمتها بالفعله العظيمه.. مريم انقهرت من حنين ومصعتها من اذونها وصرخت عليها..

اما زهراا توجهت للمطبخ لترى نتيجة الفعله... ويال هووول المفاجأة ووقعها على زهراا.. ابنتها وااقفه وتفرك ثوبها بصابون غسيل الصحون.. تريد البقعه الورديه ان تتلاشى << احم كحح اميرووة كنش قلبتي اللهجه ..
خخ باااك..
زهراا عصبت ..
ــ رؤوووووووه...
وراحت تركض ليها .. وضربتها على ظهرها على خفيف.. << ما يطاوعها قلبها بالقوه..
بس رؤى مهي معوده الا على الدل والدلال وتجيها صرخه وضربه :
ــ تهي تهي .. ما ندلي طاحت نقطتين .. اختلب ثوبي تهي تهي..
زهراا كسرت خاطرها بنتها.. بس ويش تسوي.. ان غسلته الحين ما بيمديه ينشف ..
جت ليها مريم..
ــ ويش بيدي عليش .. على عمري كل من هالنحيسه حنينوه .. اني لو عندي ليها ثوب ابيض كان جبته .. انا لله ويش بتسوي..
زهرا ترفع كتوفها وهي ماليها خلق:
ــ ما ادري والله.. شكلي بطلع ليها أي لبسه ناعمه وخلاص .. ما بيمديه ينشف وحتى لو نشف هذا مفرفش يبغى له حوسه وكواي واحنا مستعجلين.. حسبي الله على بليسكم من بنات..

راحت زهرا ودبرت لرؤى لبسه ناعمه.. لبست رؤى وهي مادة البرطم وعيونها حمرا .. مقهوره الحين كل البنات هناك .. متكشخين وعرايس الا هي.. << تعرفوا غيرة البنيات ما يحبوا يصير احد احلى واحسن منهم خخ

وطلعوا متوجهين لبيت ابو كرار .. لأنه واسع فبيصير فيه العرس...
وصلوا.. ودخلوا

زهراا شافت وحده وصرخت من الفرحه يوم شافتها لأنها ما توقعتها تجي .. وراحت ركض ليها وبالأحضاان ...

والى اللقاء بالحلقه القادمه.. :cool:

تسلمي خيتو
وبانتظاار الجديد

قصه رائعه من كاتبه اروع
مشكوره حبيبتي الله يعطيش العافيه
وبنتظار الاثاره والتشويق
تحياتي
رهوفه التوفه

حلقة رائعة بس لويش وقفتي وقت الحماس اف كمليها
منهي المرة لحضنتها
ياعلي كل تشوقينا اهئ اهئ
مشكورة ع القصة الروعة
جاري الأنتظار >>>

حلقة عحيبه

بس مسكين فااارس كسر خاطري


جزات الخير سواد الوجه


ودكرتيني بايام لجنون مع اني ما سويتها بس الي حولي سواها


الاسكريم الاحمر والحلاوه والفيمتو عشااان بس الروج


خخخخخخخخخخخ




جااااري الانتظار






دمتـــــــــ بود

يسلموو امــــــــــوووره
يعطيك العاافيه
جـــــــــااااري الانتظااااار :wacko:

:rolleyes:يسلموووووووووووو
شاطره في القصص توقف عند الأحداث المثيره
جاااااااااااااااااري الأنتظار :cool:

خخخخخخخخخخخخخخخخخخخ دكرتيني بايام لول كل شي عيب اجل احين اتحداش تفرقي بين
اللي مومتزوجه واللي متزوجه لاوفي متزوجات يستحوا اكثر من اللي مومتزوجين
تسلم ايدش ولا تتاخري واجد

يسلمووو جميعا على التفاعل الأكثر من روعه

اعذروني البارح على التقصير
بس صارت مشكله بجهازي .. طق مخه وما رضى يشبك واير لس..
وما عندي واير عادي.. اليوم عدلته.. وليكم الحين جزء البارحه.. وجزءالليله احطه الليله او الفجريه على خير

تفضلوا .. :)

زهرا:
ــ هـــــــــــــــــدىىىى ..
هدى:
ــ بعد عمري زهرااا..
ويتحاضنوا بلهفة وشووق..
زهرا:
ــ الله يقطع شرش.. تقولي منتين جايه منتظر ما عنده اجازه,,
ــ ويش اسوي في حميش.. تعرفيه يحب المفاجئات.. اخبارش خيتي .. واحشيني عدل انتين وتهانيووه..
ــ والله انتين واحشتنا اكثر... لا تقولي ما بتطولي
ــ اااخخ.. أي والله زين قدر ياخذ له اجازه اسبوع.. والله لخاطر اختي وبنتها .. والا مهم راضيين..
ــ حسبي الله عليهم.. ما يحسوا.. كفايه مودينكم جده.. اااخر الدنيا.. الله يعينش غناتي..
ــ الله يعين.. ويش اخباركم ... واخبار اولادش ..
ــ الحمدلله.. بخير الله يخليش اخبار مرام.. القمر.. اجل مشت الحلوه..
ــ الحمدلله كبرت ومشت.. سنتين صار ليها ..
ــ الله يخليها ليكم وما يحرمكم منها

هدى.. شبيهة امها المرحومه .. اكثر بنات ابو كرار صبر .. واكثرهم ضبط لنفسها وقت الغضب.. مع انها اصغرهم.. تحملت اشيا وايد.. يوم تتوفى ام كرار كانت هدى بالكليه.. تأزمت نفسيتها وما كملت.. وتالي خطبها حمي زهرا .. منتظر .. منتظر انسان حباب.. خدوم.. وطيب بزياده.. والكثير يستغلوا طيبته وحسن نواياه.. لدرجه انه يقدم راحة غيره على راحته.. يتنازل عن اجازاته لأجل زميل بالعمل محتاج لأجازه .. فيقضي شغل غيره .. طيييب بزياده.. الله انعم عليه بهدى.. اللي كانت تصبر على الغربه .. ولا تعارضه على فعل الخير.. مرام ملت عليهم الدنيا فرحة وبهجه وهي املهم الوحيد.. هدى بعد سنه من ولادتها .. اكتشفوا بداية ورم خبيث يا دافع البلا في رحمها.. فأجرت له عمليه..

لا اله الا الله.. زهراا كان الأمل ضعيف والله حقق مناها.. هدى فقدت الأمل وما عندها الا شمعه وحده تنور حياتها .. مرام...

اللي يشوف هدى يقول هي اكبر خواتها من ملامحها الذابله واللي اكساها الزمن شحوب شديد..

ــ رؤوووى يا حلووه.. ويش هالحيااا.. ابدا مافي سلام لخالة هداووي..
رؤى بحيا مدت ايدها:
ــ قوه خاله..
ــ يقوويش غناتي.. كبرتي وصرتي عروس..
رؤى تلون وجهها واكتفت بإبتسامه..
زهرا:
ــ الا وين هي مرام..
ــ نايمه .. ما نامت في السياره على عمري خلعوها قروود الطايف مرينا مناك وشافتهم وقعدت تصيح.. كل مره انيمها بالطريق هالمره عاندتني.. ويوم وصلنا سبحتها وداخت على عمري بس لا تتحلم ..
ــ وي على عمري خلعوها .. ومتى وصلتوا....؟؟
ــ من ساعتين على ما بدلنا وجهزنا..
ــ يـــاعلي من طلعتكم الفجر .. الله يعينكم حتى ما ريحتوا ويلي ..
ــ يللا هي ليله وتقضي على خير ان شالله..
ــ على خير..

متباركين عرس الأثنين ليلة ربيع ليلة قمراا
واللي جمع بين قلبين الله يطول في عمره..

حنين ورؤى طبعا فالينها فل وما يحتاج وصفهم... بس رؤى متضايقه شوي على فستانها .. ومع الطق والهيصه تحاول تنسي روحها شويات..

كللووووش جابوا العرووس.. ويللا عاد اليهال زحمه عليها الكل يبغى يصور وياها << خخ مو مثل الحين الله يخلف على العروس حدها لما تدخل يطالعوها دقيقه وتالي ينسوها ويتفرجوا على البنات والخبال خخخ..


عبدالله منسدح على منامه.. ينتظر بعد ربع ساعه بيطلع من بيتهم بيروح لفارس مواعدنه بيوصل جدته للمعاريس.. وبيروح هو معاه يباركوا لزوج خالة رائد..

وبظرف دقايق غفت عينه...



ــ عبدالله ..امي.. تعال شوف هالباب.. قفله خربان..
ــ ان شالله اماه..
ويدخل عبدالله مع امه للغرفه...
ــ ويش فيه القفل...
ــ ما ادري .. قفل علي من متى ويالله فتحته.. ابغاك تصلحه لا يرجع ويقفل..
ــ امااه.. انا مشتاق لش.. قبل لا اصلحه .. احضنيني..
ــ وي على عمري تعال يا عمري ..
حضنت ام عبدالله عبدالله.. وهي تحضنه.. صووت صرير للباب.. ومن حاله تسكر.. وقفل عليهم داخل الغرفه..

انتبه عبدالله من نومه..
ــ بسم الله الرحمن الرحيم.. اللهم صلي على محمد وال محمد... خير اللهم اجعله خير..
قرى الفاتحه لأمه... وقام بيطلع بيروح لفارس وجدته... وصلهم .. وراح مع فارس لرائد.. بحسينيه في حيهم .. بيباركوا للمعاريس...


في بيت ابو كرار.. الحاله قايمه.. ام حيدر تحاول تبتسم مهي قادره.. هي لمة بناوتها واولادهم ليلة الجمعه وهي ما تقدر عليها,,, شلون معاريس..

تهاني مطنشتنها ومهي داقه ليها خبر.. بيت ابووها وهي حره دام ابوها اللي فتحه ليها ولبنتها .. خلاص تنطق ام حيدر وعشرة من امثالها ..

ام حيدر تطالع في اليهال وهم يلعبوا.. وطالعين وداخلين .. بالها بال الفرش ويش ينظفه الحين..

وبين ما الطق قايم.. والناس تهني وتبارك.. كانت هدى مع زهراء في زاويه من الغرفه.. زهراء تحب هدى ومشتاقه ليها .. ونفس الشي هدى.. فسوالف ومره رايحين فيها وناسين ختهم تهاني في المعمعه ..


تابع>>

جتهم تهاني معصبه..
ــ حلاتكم .. بدل لا تعانوني قوموا جيبوا ضيفه للمعازيم ووزعوا المرطبات .. والفاكهه بنحط العشا..
زهراء:
ــ ويي على عمري تهوونه نسينا لهينا بالسوالف يللا جايين وراش للمطبخ..
ــ ايه حركوا.. خلكم وياي ..
وتغمز بعيونها على جنب وهي تساسرهم..
ــ لا تخلوني لحالي وياي ام حيدر تعاون وهي تحن وتهدر عورت راسي .. اذا قمتواباقول ليها ترتاح.. كان ارتاح من حنتها .. كفايه بعد برطمها الممدود
على هالحووسه الصايرة في بيتها..
هدى :
ــ هههههههههههههه .. ياعلي تهاني.. بعدش على هالحال وياها..
تهاني تغمز لهدى وتشبر بيدها .. حركوا قوموا..
قاموا هدى وزهرا يعونوا تهاني... وقعدت ام حيدر .. و فبالها :
ــ ما بغوا يقوموا .. فكه .. استرحت ..

وبين ما هم يحوسوا.. جت رؤى تركض لخالتها هدى :
ــ خاالتي الحقي .. ملام قعدت وتصيح .. وام حيدل معصبه وتصالخ عليها ..
زهراء :
ــ وي..,و لويش تصارخ عليها..؟؟
رؤى :
ــ ما ادلي بس الظاهل ملام بالت في ثيابها...
هدى دقت صدرها :
ــ وي على عمري من الخلعه .. ما قصروا عليها هالقرود..
وراحت تركض لبنتها .. وراحت وياها زهرا...
وتهاني واقفه حامل كرتون الموز .. وتطالع في رؤى.. وهي تضحك..
ــ انا لله.. الله يعين .. بتقوم حرب الحين..
رؤى :
ــ ياااي بلووح اشوووفهم..
تهاني :
ــ غربلش الله من فتينه..



هدى :
ــ لويش تصارخي عليها.. ياهله ما تفهم.. غصبن عليها..
مرام حاضنه امها وترتجف المسكينه...
ام حيدر :
ــ دام انها ياهله وما تفهم.. لويش ما تلبسيها حفاظ .. شوفي هالحاله..
ــ بنتي شاطره من يوم عمرها سنه ونص شلته وتعلمت.. بس من الخلعه سوتها غصبن عليها.. تلاقيها حلمانه .. حرام عليش..
ــ من الخلعه لويش .. اني اللي خلعتها بصراخي.. هي سوتها قبل لا اصارخ.. لا تتحججي لي...
ــ من القروود...
ــ أي قروود .. اني الحين ما فيني شدة عوار راس وحاله.. بسرعه نظفي هالبلوى..
ــ اني ما قلت لش نظفيه اني بانظفه.. ورجاء بلا صريخ..
ــ والله حاله.. يغيبوا يغيبوا .. وما يعودوا الا ببلاوي.. الله يعين بس ..


زهراء تدخلت..
ــ بلاوي ويش .. اختي تعبانه وتوها جايه من جده من طلعتهم من فجر الله ..
وبنتها مختلعه.. ويش فيش انتين..
ــ يللا عاد نطقت محامي الدفاع.. اني بروح اقعد والمكان يتنظف.. سامعين..


هدى انقهرت.. راحت بتنظف المكان.. زهراء مسكت ايدها تهديها..

ــ مشكوورة خيه .. ما تقصري...


وانتهى العرس على خير .. وزفوا زينب على ريلها.. وتهاني دموعها اربع اربع,, بنيتها الوحيده.. وزهرا وهدى صياح وياها وكلما تذكروا انه ممكني يجي يوم ويصيروا رؤى ومرام بالموقف زادوا بصياحهم..

نظفوا بيت ام حيدر زين ما زين لا تحجج.. وكل راح لبيته... هدى حمدت ربها عند ريلها في بيت اهله غرفة يباتو فيها لا تضطر تبات في بيت ابوها وتقابل ام حيدرووه ..

ومرت الأيام .. تسابق بعضها.. عبدالله ورائد وفارس دوم ويا بعض.. عبدالله حبهم وتعود عليهم.. وهم حبوه وتعلقوا فيه...

وفي احد الخميسات.. وفارس بسوق الخميس كعادته.. ورائد معاه مبسط ..
عبدالله تركهم شوي راح يشتري غرض لأبوه...

الا بجية امين.. وعلي.. مقبلين من بعيد..
فارس من شافهم يبس ريقه.. وقام يتأتأ لرائد:
ــ هم.. هم..
رائد مستغرب :
ــ مين هم..؟؟
ــ اللي... طقوني .. داك.. اليوم
رائد فتح عيونه:
ــ مييين...؟؟
فارس اشر عليهم ...
رائد اختلع :
ــ هااديلااا ؟؟
ــ أيــــــه.. هم اللي طقوني وربطوني ووصلوني لأبو مصيبه..
راائد:
ــ متأكد معاهم هادااا..؟؟؟ << يقصد علي..
ــ أيــــه...
ــ يا ويلاااه..
ــ ويش فيك .. لويش..تعرفهم..
ــ ايه واحد ولد جيرانا.. والثاني ..ااا
ــ الثاني مين..
ــ ولد عمي..
ــ هااااه.. احلف
ــ ولويش اشلخ
فارس سكت مو عارف ويش يقول ..
رائد حس بصخونه.. ونار في قلبه.. ولد عمي ويسوي هالفاعيل << في ظنة باله بس طق.. شلون لو يدري ويفهم الأشيا الثانيه اللي صارت..


علي:
ــ اووه ولد العم هنا . هلاااا... رائدوه ويش تسوي..
رائد مو مشتهي يطالع يطالع في وجهه..
امين:
ــ انا كني اعرف هالصبي.. هيه انت اللـي...
رائد يقاطعه وبحده:
ــ ضربتني برصاص ذاك اليوم..
امين:
ــ والله زين اجل ما تخونك الذاكره <<< شلوون تخونه وهو اللي خرب سيارته خخ ما يدري امين بعده مفكر من عبدالله..
رائد عطاهم نظره .. وكفخ وجهه
امين:
ــ بعد بعد.. ويعرف يطالع بنظرات..
ومد ايده على خد رائد عن مسخره:
ــ حبيبي مو ناقصني الا ياهل .. زيك..
رائد طق ايد امين.. ورفع بلوزته ومسح خده مكان اللمس..
امين :
ــ بعـــــــــــــــــد.. عدال .. والله انك خطير..
علي ميت من الضحك على امين وولد عمه..
فارس بلا شعور ضم رائد اله وبنبرة خوف:
ــ ويش تبغوا فينا .. وخروا عنا..
رائد مستغرب ليش هالخوف كله..!!!

شوي جاهم عبدالله ومن شاف امين وعلي .. هجم هجووم..
ــ ويش عندكم خير ويش تبغوا فيهم..
امين:
ــ مـــــــــــاااالك شغل .. عبدووه وخر بعيد لا تتدخل في اللي مالك خص فيه لا يجيك شي ما يسرك..
عبدالله حمق :
ــ نعـــــم...
شوي الا جوال امين يدق .. رد عليه .. طلع ابو مصيبه.. ويوم درى انهم بالسوق وان عبدالله معاهم.. طلب من امين يعطي عبدالله الجوال بيكلمه..
عبدالله:
ــ ما بيني وبينه أي كلام..
امين رد على ابو مصيبة كلام عبدالله ..
ابو مصيبة طلب من امين يحط الميكرفون..
ابو مصيبه:
ــ اسمع يا عبدووه.. يا جبان.. اذا فيك وفي امك وفي طوايفك كل ابوها خييير.. تعال لي المزرعه .. يا..... يا.... ... والله ما تجي منت رجال تخساا ..
عبدالله شب حريقه... ويش يقول هذا...؟؟؟؟!!!
قال لفارس ورائد ينتظروه بالسوق .. بيروح وبيرجع..
فارس صار يترجى عبدالله يهدي ويحقره.. وعبدالله محمق:
ــ لااااااا ما سمعته ويش يقول .. مستحيييييل اخليه واعديها...
رائد وده يروح معاه بس عبدالله مو راضي ..
ــ رائد ابقى هنا مع فارس انا برجع ليكم...

فارس خايف ... رائد مو قادر ميت على الروحه..
عبدالله قبل لا يركب سيارته.. طالع في رائد وفارس .. ابتسم... :
ــ لا تخافوا.. وانتبهوا لنفسكم,,, مع السلامه..

رائد وفارس بلا وعي مسكوا كفوف بعض.. وابتسموا:
ــ مع السلامه...


وصل عبدالله المزرعه.. دخل ولقى ابو مصيبه رايح فيها ومهو في وعيه...

ــ خير ويش تبغى فيني..
ابو مصيبة:
ــ والله خاطري العب فيك..
ــ نعم.. احترم نفسك.. انت اللي مو رجال .. احترم سنك..
ــ ههههههاااااي.. انت اللي بتعلمني كيف تكون الرجوله ..كخ بس كخ.. وانت مخاوي يهااال..
ــ يهاال عقلهم احسن من عقل مليون من امثالك..تفكيرهم طاهر برئ عفووين تتشرف وترتاح بمجالستهم..
ــ ههاااااي يا عيني عالطهر .. اسكت بس لا انسيك الحين معنى الطهر .. لا قسما بالله لـ............
عبدالله ارتجت تحت رجوله الأرض .. رجعه هالقسم لماساته.. نفس القسم صار يتردد صداه في اذونه .. في الصندقه وهو يصيح ويصارخ:
ــ بتسكت لا تفضحنا لا قسما بالله لـ ......
بلا شعور هجم على ابو مصيبه اللي كان ابدا مو في وعيه .. وطاح فيه ضرب ,,
امين وعلي يتفرجوا .. مستحيل يتدخلو..
ابو مصيبه صار يدافع عن عمره ..
وبسرعه مهي متوقعه ووعي مفقوود للغايه .. طلع سكين من جيبه .. و ضرب عبدالله...


الى اللقااء بالجزء الجديد :rolleyes:

يا علي يا علي

مسكين عبووووود


لا تقولي صابه شي خطير


اميروووه



ترى هو الي محل القصه





تسلم يدك جزء حلوو

والله يخلي جهازك ويعطيه الصحه والعافية

خخخخخخخخخخخ


دمتـــ بود

ياااااارب
اميره
لاتقولين ان اصابته عبد الله قويه:wacko: وخطيره
دليل انه شاف امه في الحلم
جـــــــــااااري الانتظاااار على شـــــــوووق

يسلمو خيتو اميره وبانتظاار الجديد

ياااااااااااااااااااااي شفاري وناسه
فاتتني حلقتين جخه والله يبغى لينا مره فانيه نسويهم عشر
نيههههههههههههههههاي
ماني عارفه اعلق من الوناسه
بكتفي بــ
شوكرن خيووه ع الحلقتين
يعطيش ربي العافيه
توحياتي
ضحكوه البطه

ياعلي ياعلي ياساتر
لاتقولي اصابة خطيرة ارجوك مو حليوة القصة بدونه
مشكورة القصة تجنن والله يخلي لك جهازك خخخخخ عشان تكتبي لينا كل الأجزاء
وناسة بس هالجزء يخوف يمه
سي يو

ياعلي

ويلي على عبد الله

وابو مصيبه الله يلعنه واصلا شكله هو نفسه

الي صار بينه وبين عبد الله الموقف الي في الصندقه

وزي مايقولون ابو طبيع مايجوز عن طبعه

الله يحرق قلبه ان شاء الله هالنحيس >> مي قادره متأثره بالقصه وومنقهره مررره


تسلمي غناتي

والله يعطيش الف عافيه

دمتي لنا