نزل عبدالله .. فتح الكبوت .. وطلع الدخان .. حمت السيارة من الحر والمداور .. وما فيها ماي ... راح عبدالله لدبة السياره بيطلع الغرشه ..
فتح الدبه .. ويضرب ايده بجبهته..
ــ اففففف.. ما في ماي ..خخ .. خلصها حيدر ...
رائد فتح النافذه وطلع راسه :
ــ ويش صاير ..؟؟
عبدالله وهو يضحك :
ــ اقووول .. انزلوا بس ...
.. والسيارة وقفت بالشارع العام.. والحمدلله كان عبدالله يسوق بالجهه اليمين .. فوقفت بهم على جنب ومو بنص الشارع .. كان ويش حالتهم..
رائد :
ــ ويش صاير ..؟؟ ويش فيها ؟؟؟
عبدالله :
ــ يابس ريقها.. عطشانه تبغى ماي ..
حيدر :
ــ ههههههه شربوها...
رائد يطالع على جنب في حيدر :
ــ هع هع هع .. نشربها هاا.. ليش خليت انت قطرة..
حيدر خخ تفشل وسكت.. المسكين...
عبدالله :
ــ .. يللا حصل خير .. ثاني شي في محطه قريبه .. يللا ندف السياره...
وصاروا يدفوها ...
-----------------
ــ اماااه .. بروح لرؤى بلعب وياها ...
ــ حنين .. العبي مع خواتش.. اليوم خميس ولا تروحي بيت عمش .." فاضل.. تسميه عمها " ..
ــ تهي تهي .. ماني .. سمروه .. قاعده عند المرايا .. تقولي اول مره تشوف عمرها .. كل شوي عفست تسريحه .. واذا دخلت عليها غرفتها طردتني..
شذيووه حاطه المسجل ومرفعه حده وزي الخبله كنها تطلع جنانوه .. كوثروه ماسكه هالمجلات وتقلب .. وما ليها خلقي .. تهي تهي .. مااني .. بناتش كبار ما يلعبوا وياي .. ابغى اروح لرؤى..
ــ هههههههه .. ملسونه يبغى له لسانش قص.. بشوف بتصل على زهراء اذا ما طلعوا ولا معاهم ضيوف بخليش تروحي...
ــ هيه هيه .. يللا بسرعه ..
ــ زين ..
ترررررن ... << ما مداه يرن الا رنه وحده..
ــ الووووو..
ــ هههههه هلا رؤى .. اخبارش غناتي..
ــ هلا خالتي.. الحمدلله ..
ــ هاا سنترال عند التلفون على طول رفعتيه .. ما وياكم احد..
ــ افف لا لحالي .. ولائدوه طلع ويا واحد وامي تحوس في المطبخ.. وابوي ويا واحد في المجلس.. واني قاعده عند التلفون ادعي الله احد يتصل ..
ــ ههههههه .. عليش سوالف عجب .. المهم غناتي .. لا تزهقي ولا شي.. هذا هي حنين بتجيش تسليش..
ــ صدق .. هيــــــه.. يللا خليها بسرعه تجي ,, استناها..
ــ هههه يللا زين.. دقايق وتجيش . سلمي على امش ... يللا مع السلامه
ــ الله يسلمش...
وراحت رؤى لأمها وصلت السلام وخبرتها بجية حنين..
ــ يللا انسه حنين .. روحي بدلي ثيابش وخلي وحده من خواتش تعدل شعرش وروحي لرؤى..
قامت حنين طايره من الفرحه..
راحت بدلت ..
ــ ممم اروح لمين من الخبلات الثلاث تمشطني.. خلني ابدي الكوافيره.. سمرووه...
طقت الباب ودخلت على سمر اللي كانت تستشور شعرها ...
ـــ مشطيني..
طفت سمر الإستشوار..
ــ نعم..؟؟
ــ مشطيني..!!
رجعت سمر ولعت الإستشوار :
ــ ماني فاضيه.. ما تشوفيني مشغوله...
ــ شعري ناعم ما يبغى له شي ..
طفت سمر الإستشوار ,, وطالعت في حنين على جنب ..
ــ خخ دبه ويش قصدش ..
ــ هههههه .. ما قصدي شي .. ظنانة ...
ــ ايه افتكرت ...
مشطتها على السريع .. واستحلت حنين من سمر كم شبيصه عاجبتنها بالموت يالله رضت سمر تعطيهم اياها ...
طلعت حنين من عند سمر .. مممم يبغى لي عطر .. اروح للمحطه الثانيه .. لكوثرووه.. و اشحت من عندها ..
طق طق طق ..
ــ هااااا...
فتحت حنين الباب .. لقت كوثر راميه المجلات .. وداقه بها نومه... قالت ليها بصوت مليان نوم.. طالع من خشمها خخ
ــ ويش عندش ...
ــ ابغى عطر ...
ــ ايه اخذي من الورديه .. وخلي الزرقا لا تلمسيها..
ــ لويش اني ابغى الزرقا..
ــ حنينوه لا تطوليها وياي .. رشي لش من الورديه وفارقي..
ــ دبه بخيله لكن ما عليه ..
وتاخذ حنين الورديه وتعبي نفسها عدل .. وتالي ترش بالغرفه يمين ويسار وبكل مكان,,
ــ كحححححححح ..كح ..كح .. حنينووه يالصاقعه .. لويش كذا..
ــ ما تبغيها انتين .. تبغي الزرقا ..
ــ يا نحيسه .. كح كح .. انقلعي ..
وترش حنين زياده .. وتقوم كوثر وتشيل مجله من الأرض وتكفخ بها حنين .. اللي طلعت بسرعه وكفخت الباب وما صادتها ..
كوثر عودت لنومها وهي تهلوس ..
ــ خبال اخر زمن .. اقرع ومتشيرط..
حنين تفكر .. ويش باقي بعد .. خلني اخذه من شذيووه.. خخ.. ايووه بابوق من عندها كم شريط خلني اتخبل اني ويا رؤووه...
طق طق طق ..
لا حياة لمن تنادي .. ما تسمعها من الصوت العالي...
وتدخل حنين الغرفه اقتحاام.. هجووم...
وتصرخ شذى..
ــ هااادااااويييش... ويش فيش خبله .. ما تستأذني خلعتيني ..
ــ طقيت الباب وما سمعتي ويش اسوي لش...
خفضت شذى صوت المسجل ..
ــ هاا .. ويش تبغي..
ــ ابغى كم شريط من عندش سلف وبارجعهم..
ــ خخ .. صدق ما عندش سالفه.. اكي العلبه اخذي اللي تبغي..
ــ خخ اجل باخذ العلبه بكبرها .. وهناك بنختار..
ــ لويش وين بتروحي..
ــ باروح بيت عمي فاضل.. تروحي وياي ؟؟
ــ خخ لااا.. لويش اروح.. اقعد ويا مين... تيسري امانة الله..
وترجع ترفع صوت المسجل ...وطلعت حنين من بيتهم .. لرؤى...
دخلت شافت زهراء بالمطبخ .. سلمت عليها .. وركبت غرفة رؤى...
دخلت ما لقت رؤى بالغرفه.. قالت تنخش وتخلعها... جت بتنخش ورا الباب الا رؤى :
ــ واااااااااه.. ههههههههههه..
ــ يماااااااااااه,,, ههههههه.. اني جايه بنخش بخلعش طلعتي ناويه تخلعيني يا دبه..
ــ ههههههه سبقتش... ويو ويو.. ويش تسوي من اتصلت امش كل هذا تكشخ وتدل .. بتلوحي معاليس...
ــ ههههه لا كان زين ودي بمعاريس والله.. متى بس يعرسوا خواتي ..
ــ يارب .. انتين عندش خوات .. اني مين بيعلس عندي..
ــ خخ اخووش ..
ــ لااا .. لائد.. بيعلس وياي..
ــ لويش ,,ههههههه..
ــ لأننا توأم.. كله زي بعض.. بنعلس ويا بعض.. خخ
ــ خخ .. ان شالله.. تعالي عندش مسجل...؟؟
ــ عند لائد... لويش؟؟
هزت حنين العلبه اللي في ايدها
ــ بنسوي معاااريس .... بنرررقص..
ــ هههههههه .. خبله ويش بتلقصي..
ــ بنحط موالد حليوين واشرطه معاريس اخذتهم من عند شذيووه اختي .. كل اشرطتها كذا زي الطقاقات في العرس .. وهي زي الخبله فقعت راسنا وشلخصت الأرض .. الحمدلله غرفتها فوق كان طلعوا الجنانوه .. << لا اشرطتها وتحش فيها بعد خخخ
ــ ههههههه.. يمكن تبغى تصيل طقاقه ..
ــ ههههههه يمكن.. خخ .. عشان يدبحها ابوي..
ــ زين بالوح اجيب المسجل...
--------------------------
ــ يللا رائد... يللا حيدر ..دفففوا .. دففففوا ..
حيدر ورائد يدفوا السيارة من ورا .. وعبدالله فاتح بابه وقاعد يدف .. وحد ما عندهم.. شوي الا حيدر كافخ راسه بدبة السياره..وموقف..
ــ اااه.. اااه.. تعبت.. مانا قادر...
رائد حمق عليه .. ويصكه كف على رقبته..
ــ قووم.. مو كفايه خلصت الماي .. ما باقي الا شوي ونوصل..
ــ اااي .. تعبت ويش يقدرني ...
ــ انت صدق هفة هوا وتطيرك .. بس قووم ..
ــ مانى .. تعبت ... ااه...
ــ حيدرووووووووه..
ــ هاا ..هاا .. خلاص .. يللا .. دففف.. دففففف..
شوي ثانيه الا رائد موقف ...
ـــ ااااه .. وصاقعه ..
عبدالله اختلع .. وراح ليهم ورا ..
ــ ويش صاير .. ؟؟
ــ النعال انقص ...
الا حيدر يشهق شهقه.. شوي وتطلع روحه...
ــ جديـــــــــــــــــــــــد.. ما لبسته الا مره... :weird:
رائد يطالع حيدر على جنب..
ــ بلللل.. يصقعك بدل لا تقول يفداني .. << ويقلد على حيدر بمسخره ...
جديــــــــــــــــــــــــد.. ما لبسته الا مره ,, مالت عليك وعلى نعالك.. هذا استخدام مره وانقطع بالثانيه...
ــ تهي تهي.. خساره...
ــ بتسكت لا بالطبقه الثانيه على راسك .
ــ لااا خلاص بسكت لا تقصني انا بكبري..
ويفصخ رائد النعال..الا عبدالله يطلع من دبة سيارته .. نعال زنوبه اللي حق الهنود وهو يضحك...
ــ نعال المهمات الصعبه...
ــ هههههههه .. صدق والله.. بس لويش بسيارتك..
ــ بايقنه من هندي هههههههه
ــ هههههههه صدق..
ــ ههههههه,,, لا لا تصدق شدعوه .. هذا مره رحت هافمون ويا الشباب وواحد يستخدم نعول كذا اذا رحنا البحر يبدل نعاله بهم ... جايبنه وياه وتركه بسيارتي ..
ــ هههههه بس من جد نفعنا...
ولبس رائد الزنوبة.. ويللا كملوا الطريق ... لين وصلوا المحطه... " الشيشه"
عبوا السياره ماي... رائد من الحر ... والتعب صب على راسه ماي.. ودار بالغرشه لحيدر وسبحه هو الثاني وببلل شعره ولزق على وجهه.. وثايبه تبللت وحاله... الا حيدر يصررخ:
ــ لااااااااا,,, لويش كذا...
رائد:
ــ حرر.. حرر.. الا ماي...هوو .. عاادي ..!!
ــ الحين امي بتحمق علي.. وما بتدخلني البيت الا اذا نشفت..
عبدالله استغرب... :
ــ ليش؟؟
ــ ما تحب .. وصاخه...
ــ وصاخه.. ؟؟ الا ماي هو.؟؟؟
رائد يقطع الحديث والتساؤلات::
ــ ما ترتاح هي...تهوس ..
عبدالله فهم :
ــ اهااا... طيب بينشف الحين بسرعه من الحر...
وركبوا السياره بيرجعوا البيت.. وصلوا حيدر ... امحق طلعه طلعها ..خخ نزل وزي ما توقع .. لاقى له صريخ من امه,,, اللي على طول :
ــ روووووووووووووووووووووووح الحمــــــــــاااااااااام ..
ويللا ابتدت المعركه... :wacko:
ووصل عبدالله رائد لبيتهم.. ونزل وياه عشان يسلم على فاضل .. ويرجع ابوه معاه...
وطلعوا... رائد صعد فوق بيسبح .. الا الطابق الفوقي.. زلزال.. معاريس وطق..
والصوت جاي من غرفة رؤى..
رائد ما يدري ان حنين معاها.. ومتعود اقتحام على اخته .. لاطق باب ولا هم يحزنون.. ولااا .. بعد صوت ازعاج ... طق وفرقة... وهو جاي من شموس .. وحرر...
ويقتحم الغرفه .. طااااااااااخ,,,,:weird:
