انا اكتب الكلمه و انتم عليكم شرحها على حسب مفهومكم ؟؟ اتمنى التفاعل

المصطلح عندي هالمرة

( اذا جت مكالمة من شخص لا تود مكالمته )

اترك التلفون يرن ومارد عليه

سواء كان الشخص ثقيل دم او ملقوف <<<اجل ليش مابرفع

اذا مالي مزاج اكلم اي شخص<<<< اسباب واجد تغير المزاج


هذا الي عندي خخخخخــ

يسلم لي هالمرور خيه صوفيا

اذا اتصل علي واحد و ما ودي ارد عليه اشوف اي احد جنبي و اعطيه الجوال و خليه يرد عليه

و خلص نفسي حتى لو حس اني متضايق منه

بس ما تصير لي واجد و يمكن نادر ما تصير لي


يسلموااااااا عفاف

يسلم لي هالمرور احوي لوكي

ساعات اقطعه في وجه ع اني مشغوله ..



او اتصل الى احد و اخليه ويتنق ..


او سايلنت لين ما يتملل ..


عاد ما يتصلون الا لين نمت اووف يمللوني ..


يسلمووو

الله يعنيش عليهم يالعنيدة

ننتظر المصطلح اليديد

يالله انا راح اضع مصطلح

الاعداد للسفر

اتلاقي الي يبي يسافر كأنه جاهل في تفكيره وين انروح ومتى ووو

واذا قرروا الذها وحجزوا يلا ينتظر ديك اللحظة بلهفة عجيبة

ويلايم في ديك الثياب والأغراض من متى ولازم ينسى اشوية اغراض

ويوم السفر تختلجه مشاعر الفرح والحماس ويلا مستعجل الى الذهاب وفي نفس الوقت اتلوداع مو هين عنده

اتلاقي الدموع مختلطة مالى حزن ومالت فرح

واتلاقيه اول ما يمشي الباص بالدقيقة يتصل احنا مشينا واحنا وقفنا واحنا واحنا

وكأنه اول مرة يسافر
الله يرزقنا وياكم زيارة رسول الله وعترته الأطهار يا كريم

مصطلح حلو اخوي
يعطيك العافية

يسلموا عفاف على الكلام الرااااااااااائع

و الله يرزفنا و اياكِ زيارة محمد و ال محمد

تحياتي

الإعداد للسفر

كلما يخطر على بالي جاجه ماحطيتها في الشنطه أحطها
وكلما خطر على بالي أحد اكلمه أكلمه قبل السفر وأشوفه
وأحس اني باروح بدون رجع ههههه
لاإله الا الله

أقرأ دعاء الحفظ ودعاء السفر ،،،،

مشكورين
يعطيكم العافية

الله يحفظ و جميع المؤمنين و المؤمنات


يسلمواااااا اختي سيناريو على الطله الحلوووووووه

تحياتي

اليوم بذات رحنا حجزنا حق السفر الى سوريااا


يعني المصطلح جاء في وقته ..





او شي انكون مستانسين حدنا ان احنا بنسافر ..
وكل حين تعد الايام اللي بقوا عشان السفره ..
وتبرز الشنطه من قبل شهر والحجز بعد من قبل شهر ..
وتتصل ع اللي تعرفهم كااامل ..
عشان تقول ليهم انك بتسافر ..
تقول لي امي لا تحطين غير خمس ست بدلات ..
اقول ليها اوووك ..
وكل يوم احط لي بدله في الشنطه ..
وقبل يومين من السفر اروح الجمعيه واشتري كل شي ..
كاني رايحه مجاعه ..
وفي ليه السفر ما اصدق اني بروح وما انااام ..
واقعد احارس لما الموذن ياذن ع طوول اقومهم كاامل ..
واتصير الربشه ..
لكن وناسه ..



مشكوور ع المصطلح الحلووو ..

تحياتي

ننتظر مصطلح حلو

من كلامك اختي عنيده واضح انك مستانسه الله يدوم عليك الوناسه ان شاء الله

اتمنى لك سفره موفقه و تروحي و ترجعي بالسلامه

و لا تنسينا من الدعاء عند السيده زينب ع ام المصائب

لوكي


افا عليك اخوي ..


حاضرين وما راح اانسى احد في الدعاء من المنتدى كامل ..


ان شاء الله ..


ننتظر المصطلح الجديد ..

يالله ننتظر المصطلح الجديد

المصطلح

يوم استلام الخرجية

او الراتب

عفاف حطيتي ايدك على الجرح

الراتب

طبعاً اول ما ينزل الراتب تجيني رساله من البنك
و على طول افتح صفحه الاكسل و اوزع الراااتب هذا حق قرض السياره هذا حق الجمعيه و هذا حق مصروفي و هذا حق مصروف البيت و على هذة الحاله الين يطير الراتب و و اجلس احسب كيف راح ارتب نفسي على شان اجمع فلوس العرس و اقتصد قدر الامكان بس ما في فايده تعرفوا الدنيا تجيك مصاريف ما تدري من وين بس تحس انك جمعت شوي تطير بس بعد ما طلعت الخُمس قبل كم يوم و الله احس ان الراتب صار فيه خير فنصيحه لكم لا تتركوا الخُمس فوالله يطرح البركه في الفلوس

يسلموا على المصطلح الرااااااااائع

اي والله الخمس ثم الخمس

والله يسهل عليك اخوي وتتزوج

والمصاري تجي وتروج

والعوض بيد الله

يوم المصروف :



او شي اسويه اشيل مبلغ الى الكردت ..
واصرف البقايه ..
او عشره ايام اووكي امشي حالي لكن بعدين اتوهق اطر اخذ من عند ابوي ..


يسلمووو

الله يعينش يالعنود

يلا شباب ننتظر المصطلح اليديد

ههههههههههه مشكوره عفاف الهدى ..



ويلا ننتظر المصطلج الجديد ..

يالله اليوم مني لكم مصطلح جديد

المصطلح هو

كيف تقنع شخص بان يترك الاغاني

اممممم مصطلح حلوو اخوي ..



امممم لما ابي احد يترك اغاني اناقشه ليش يسمع اغاني ؟؟ ..

بعدها اسمعه اشياء احسن من الاغاني يا قران او عزاء او مواليد ..

واعطيه سي دي للقران او العزاء او المواليد ..

واخليه يفكر بروحه ..

وطبعا قبل لا اروح اقول ليه يفكر بالقبر و يوم القيامه ..

لانه ما رلح تاخذ شي في القبر غير الكفن و اعمالك الزينه ..

ان اقتنع اووكي ..

ام اذا لا اضغط عليه بشي اكبر الا هو صداقتنا ..

فاكيد ما راح يخسر صداقتنا عشان اغاني ..

وحتى لو اختار الاغاني ما راح يقدر يوم يومين وبيرجع ..

وهذا ع حسب كل واحد وشخصيته وتفكيره ..


تحياتي

بصراحة حلو وصعب هالمصطلح

لأن الي بيسمع اغاني خلاص هو مقتنع بيها وصعب يفك عنها

احاول معاه بذكر ان هالأغاني حرام

والي بيسمع اغاني الدنيا ينحرم من اغاني الآخرة الي بيلقيها نبي الله داوود عليه السلام

وهو المفروض عارف بأنها حرام وان عقاب سامعها شو

يعني لو تبيه هو الي يقولهم تراه حافظنهم ما يحتاج اتعيدهم معاه

بس في المقابل لازم اعطيه البديل

اتوقع فورتين مو مقصرة 24 ساعة بس يتعود على انه يضغط الزر ويحط هالقناة

والله اليها تأثير وايد حلو

لما يسمعها على الأقل بتنظف قلبه وعقله الي حافظ داك الكلام والخرابيط بشيء

يصب في محور اهل البيت عليهم السلام

والله يعطيك العافية على هيك مصطلح

ردود رااااااائعه

عنيده اسلوب جيد في الاقناع
و تقريباً نفس تفكيري

عفاف صراحه مو شرط ان اللي يسمع اغاني يكون مقتنع يمكن يكون تقليد لمن هم في البيت اوو غير ذالك

يسلموا على المرور الرااااائع

بنتظار المصطلح الجديد

اخوي لوكي . .




ممكن تحط لينا مصطلح جديد ..


وشكراا

اقتباس:

---

المشاركة الأصلية كتبت بواسطة عنيده

اخوي لوكي . .

ممكن تحط لينا مصطلح جديد ..

وشكراا

---

ممكن ليش لا
يالله المصطلح هو
كيف تحتفل بعيد ميلادك ؟

سلااام ..




لما احتقل بعيد ميلادي احب اني اعزم الناس اللي يحبوني من قلبهم ..

مو عشان مصلحه او اي شي ..

اول شي اخلي ابوي يحجز مطعم او فندق ..

ابرز الدعوات من اسبوع ..

اعطيهم ربعي و اهلي ..

لما يجي اليوم العيد ميلاد ..

اصحى من بدري عشان الهدايا ههههههههههه ..

وطبعا يكون يوم مميز ..

راحه و كلام حلو و هدايا و غزل ..

يعني يووم حلوو ..

بعدها اروح المكان الحجوز واستنى المعزومين ..

وتلفوني كله مسجات للعيد ميلاد ..

احب هاليوم ...


يسلموو ..

وااااو يوم عيد ميلاد رائع


ان شاء الله تتهني السنه و كل سنه بعيد ميلادك

بالنسبه لي و لا مررره سويت عيد ميلاد يوم ميلادي مثل اي يوم
لا و احيان ماذكر ان عيد ميلادي مر الابعد 3 او 4 ايام ههههههه

لوكي :


شكرا ..



اخوي عاد لازم اتسوي السنه عيد ميلادك وتفرح فيه ..


مو هو بيمر مره في السنه مب كل يوم ..

واعزمنا عاد ..

تحياتي

اما اني احب هاليوم كمان
لأني بجمع فيه حبايبي ونجلس انسولف وكم مرة اشتريت طرطايات
واذكر مرة وحدة عزمت صاحباتي

بس بجد يوم مميز بالنسبة ليي
اكون بجد فرحانة
بس ايام الطفولة العيد ميلاد احلى واحلى وله مذاق مميز عندي

لأن هاديك السنوات كنا جهال ومكونين لينا شلة اني وبنات خواتي وولد اخويي
فاتفقنا على احياء هالمناسبة بينا
ولأن بيتنا الكبير راح انسوي الأعياد ميلاد فيه
نجمع فلوسنا ونشتري ربايين وبساكيت وحلاوة ووو
ونفرش الينا سفرة واحيانا انسوي مثل البوفيه بهالخرابيط
وانقول النشيدة المعروفة هيبير ذي
وانكون متشققين
والله الله حزة الهدايا الي بجد افتخر فيها ليما الحين
كنت دايما اهدي ربيان نسمة وعصير سنتوب

ها ها ها ها ها ها
لا واغلفهم بعد
والله ايام ما تنسي
الى ان صارت طورطايات وبعدين صواني كيك وبعدين كيك من اتسوينا
الا مجرد جلسة حلوة بس فيها بعض الفعاليات

بس احب احياء هالمناسبة
لأنها حلوة مرة عندي

مصطلح حلو مرة

ومثل ما قالت العنيدة
اخوي لوكي
هالسنة العيد ميلاد تبعك اله طعم خاص مع ام العيال صح

ننتظر مصطلح حلو

عفاف الهدى ..


اشتقت لج خيوو ..



يلا يالغلا حطي مصطلح جديد مناسبه رجوعج لينا ..


تحياتي

اهلين بالعنيدة

والله اني كمان اشتقت ليكم واااااااااااااااااجد واااااااااااااااااجد
وعلى امرش المصطلح جاهز

( الغياب المفاجئ)

الغياب المفاجى ..




تحس بان احد اخذ من شي ..

او حرمك من شي ..

خصوصا اذا كان عزيز عليك ..

وتقعد تفكر فيه بشكل كبير ..

امممممممم ..

حتى اذا كان الشخص بالنسبه ليك عدوو .

تشتاق الى تصرافته معاك ..

او تصرفاتك معاه ..

واذا شخص عزيز ..

تسال عنه ومن يرجع تقول له انك اشتقت ليه ..

عشان ما يفكر يغيب واجد ..

وبعدين تعرف انك تحبه واجد او تعزه واجد ..

يمكن كنت تفكر ان عادي يروح ..

لكن بعد الغياب تكتشف انك كنت تحبه اكثر مما تتصور ..

طولت عليكم ..


تحياتي

حلو كلامش يالعنيدة

وان شاء الله ما في غياب ولا هجرة لأحد يا رب

المصطلح هالمرة عندي

(اذا شفت قطعة شوكلاة تبيها بس مو عارف اتاخذها خجلا من الجماعه الحاضرين)

وينكم ما عجبكم المصطلح ولا وشو؟؟؟؟؟؟؟
:closedeyes:

اين انتم؟؟؟؟؟؟؟؟؟؟؟؟
من يضع لنا مصطلح جديد