عرض للطباعة
اقتباس:
المشاركة الأصلية كتبت بواسطة لحن الخلود
اقتباس:
المشاركة الأصلية كتبت بواسطة لحن الخلود
هلا بخيتي لحن الخلود
تواجدش خيتي هو الروعه
وآآآآسف على التأخير لظروف خارجه على الإراده
ولا تقعدي أمش لا ..........أصلاً بتستحرق عليش هههههههههههه
مو مشكله خيتي بالعكس نتشرف والله بالخدمه
رحم الله والديش والمؤمنين والمؤمنات أجمعين
تحياتي
اقتباس:
المشاركة الأصلية كتبت بواسطة وردة البنفسج
هلا بيش خيتي وردة البنفسج
الله يرحم المؤمنين والمؤمنات يااااارب
ان شاء الله تستمر هالسوالف ونجيب اليكم سوالف مغبره مررررررررررره هههههههه
تقبلي تحياتي
اقتباس:
المشاركة الأصلية كتبت بواسطة ســحرالقوافي
مشكوووووووووررررررررررره خيتي على التواجد الرائع خيتي
تقبلي تحياتي
بسم الله الرحمن الرحيم
اللهم صل على محمد وآل محمد الطيبين الطاهرين
فيه يوم من أيام الله جيت من الورشه وحالتي حاله
ودخلت البيت وشافتني يدتي الله يرحمها
قامت تضحك على حالتي
يدتي:- هاااه ويش فيك حالتك حاله ....كلك -قريييز -
أنا:- ويش أسوي سيارتي في الورشه
يدتي:- ويش فيها ...خربانه
أنا:- ما هيه راضيه تشتغل
يدتي:- ان شاء الله تشتغل وتروح وتيي بها
أنا:- يا الله
يدتي:- يالله روح اتسبح وتالي روح وييب ليي حاجه
أنا:- ان شاء الله
ورحت وسبحت وأنا طالع من -اعزكم الله- الحمام تزحلقت على الباب والتوت ريولي
وقمت وأنا اعري الى الغرفه ورحت الى يدتي وقلت اليها
قامت الله يرحمها وخلتني اييب غرشة بيبسي وزيت الزيتون
وحطت عليي زيت الزيتون ووقفت على غرشة البيبسي
وقمت أحرّك ريولي عليها لين صارت زينه
( وصفه طبيه من زماااان يعني مغبره وسهله )
يدتي:- هااااه صارت ريولك زينه
أنا:- الحمد لله زينه
يدتي:- الحين روح اشتر لي زيت الورد
وغرشة بيرندا وغرشة تيم .
أنا :- شااا وين غرشة زيت الورد اللي قبل يومين شارينها ؟
يدتي:- والله غميضه علىذيك الغرشه ، انكسرت على باب الأدب
أنا:- آآآآآه عشان كده زحلقت على باب الأدب
يدتي:- الله يغربل هاليهال أخذوها وأني ما أدري
أنا:- خلاص أماه بعد شوي اييب الش وحده ولا يهمش
وخلي بيزاتش عندش
يدتي:- لكن هالمرّه با أخشها ولاني عاطيتنها أحد
أنا:- واللي يبغى صبي له في كاس ههههههههه
يدتي:- هههههههه
أنا :- الحين ويش بتقولي لي اليوم
يدتي:- اليوم يا......ياولد...... با أقول لك سالفه بس كلها شعر ، يالله روح ييب أوراقك وقلمك
أنا:- ان شاء الله
ورحت ويبت الأوراق والقلم وقعدت أكتب....
يدتي:- هذا بالصلاة على محمد وآل محمد
فيه ريّال تاجر معرس على أربع حريم
يقولوا إن واحد تاجر
عنده أربع حراير
لا جنّه يشرحون الخاطر
....كل وحده كالحوريه
*****
وحده بيضا زي الدر
مثل القمر اذا أزهر
في ليلة أرباطعشر
...وكالشمس المضية
*****
وحده حمره كالرمان
زي الورد في البستان
تترك العاقل حيران
...بأنوارها السحريه
وفيه يوم قاعدين أربعهم ويا بعض
قاموا يقولوا وكل وحده تعاير الفانيه.........
الحمره اتقول للبيضا:-
لا ترمطيني بنفسش
تدري المرض لا(اذا)مسّش
ما تنفعي قطعيه
يا زوعة الواويه
قومي انروح البساتين
تشوفي الورد واتعرفين
ياهو الحلو وأيهو الزين
...والحسن كله ليّه
***
البيضا ترد على الحمره:-
لونش زي لون الدم
لون الخمر لمحرّم
والحمره نار جهنّم
لون الحمره واويه
***
الحين الصفره اتقول:-
لوني أنا أحسن لون
لون الليره ولون البون
لا عاين لي المغبون
.....يفترج همه بيّا
***
الحمره تقول للبيضا:-
والله بياضش ما يفيدش
لازم اتحني أيدش
وتحمرين خدودش
....ياماشقه الحدريه
***
وسمعت السوده القول
ظلّت اتنادي لاحّول
كل الحسن ليكم مول
....وكل المذمه بيّه
***
لوني أنا أحسن لون
لون الكحل بالعيون
والخال جمب لجفون
والحسن كلّه ليّا
***
بعدين أربعهم قالوا مرّه وحده
سكتوا وحاكمنا أيينا
نفرض عليه حشينا(حكينا)
ونسأله ياهيه الزينه
....عنده وياهيه المرضيّه
*********
ساعة ولن ياي للبيت
التاجر ملتف ببشيت
حفّوه والوا له ييت
....يالله أحكم بهالقضيه
***
ياهي اللي تحبها أكثر
وياهي اللي بيها تفخر
قلهم وبعد ما اتفكّر
دوروا فكركم ليّا
البيضه شمس بدري
والحمره منها عطري
والصفره تشرح صدري
والسوده عمبر ليّا
***
لمّن سمعوا كلامه
كلمن ضحكت قدامه
وما حدا قالت آنا
....وكلهم قاعدين بقصيره
****
(..............
............)
- هذا مقطع مشفر علشان الرقابه هههههههههه
أنا:- الله الله بصراحه هالشعر وهالسالفه حليووووه مررررره
يدتي:- أي والله حليوه ، هذي يقولوها اذا الواحد عنده أكفر من وحده معرس عليها
أنا:- يالله الواحد في هالزمن وحده ويا الله
يدتي:- الله يعين
أنا :- رحم الله والديش أماه ، خووووش سالفه اليوم
و.......و........طق طق طق
جائت حلوة اللبن وشافتني وقامت تسألني عن ريولي
ويش فيها ، وقلت اليها
وسكتت يدتي عن الكلام المباح
عندما غرشة البيبسي عادت للإنسداح ههههههه
ان شاء الله في أقرب وقت سالفه يديده من
سوالف يدتي
وسلام
عندما غرشة البيبسي عادت للإنسداح ههههههه
http://www.5aial.net/big/6.gif http://www.5aial.net/big/31.gif http://www.5aial.net/big/6.gif
اما عليك سوالف
زين طلعة لها فايده غرشه البيبسي
صراحه شعر غير شكل
عجبني
ولو اني كنت متحيزه الى لون الكحل
كسرت خاطري اخر وحده تكلمت
بس لو كنت وياهم دافعة عنها http://www.5aial.net/big/77.gif
ونفسي اعرف الجزء المحذوف .......... http://www.5aial.net/big/38.gif
ما اقدر على حاجه سمها شوقه ولا تضوقه (تذوقه ) http://www.5aial.net/big/40.gif
يلا ماعليه سماح ها المرة
وسلامة رجولك حق داك اليوم انشاء الله الحين احسن
هههههههه
دمتــ بود
والله تسلم اخوي
افى راحت علينا ابويي اتوفى كان خليت نسوانه الثلاث يقولوا شعر زي هذا
ترى الوالد ما خد ثلاث لا وكلنا في بيت واحد
بس ما قط مرة سمعتهم يشعرون كدا
تسلم وعافاك الله ان شاء الله الحين احسن
مشكور اخوي واحد فاضي على السالفة الحلوة
بس على غرشة البيبسي جربناها والله يحفظش يا يمة ذوقتيني المر منها خليتني احلف ما اولي ريول مثل ما قال اخوي واحد فاضي
اذا اتنوا زيت الورد احنا فوكس
رحم الله والديك اخوي ورحم الله جدتك وجميع المؤمنين والمؤمنات
وننتظر السالفة الجديدة على احر من الجمر
حياش الله خيتي سحر القوافي
اقتباس:
المشاركة الأصلية كتبت بواسطة ســحرالقوافي
اقتباس:
المشاركة الأصلية كتبت بواسطة ســحرالقوافي
الله يسلمش خيتي
والله من ذاك اليوم على طول طابت
مو زي الحين أبر ههههههه وجبس
وعمليات
تقبلي تحياتي للتواجد اللطيف
سلام
اقتباس:
المشاركة الأصلية كتبت بواسطة عفاف الهدى
اقتباس:
المشاركة الأصلية كتبت بواسطة عفاف الهدى
الله يسلمش خيتي عفاف الهدى
الله يرحم الوالد ويغمده الجنه بجوار محمد وآل محمد عليهم السلام
والله يطيب اليكم العيشه ان شاء الله
وتجتمعون على الخير
يااااارب
والله يعافيش ويسلمش ان شاء الله
تقبلي تحياتي
اقتباس:
المشاركة الأصلية كتبت بواسطة لحن الخلود
اقتباس:
المشاركة الأصلية كتبت بواسطة لحن الخلود
هلا بيش خيتي لحن الخلود
لا شكر على واجب خيتي
والله يذكر غرشة البيبسي كانت دوا للمكسور
والله يحفظ الوالده الكريمه والف سلام اليها
أووووووه فكس هذي الريول تصير ضو
الله يرحم المؤمنين والمؤمنات أجمعين
وان شاء الله السوالف تستمر
تقبلي تحياتي
* الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين .
رحمة الله عليها .
ويرحم اموات المؤمنين والمؤمنات.....و مافي أحلى من سوالف الجدات و ما تمل من سوالفهم
و شكراً بنتظار كل ما هو جديد . . .
و نسألكم الدعاء
بسم الله الرحمن الرحيم
السلام عليكم ورحمة الله وبركاته
هذا يا محفوظين السلامه اليوم مجتمعين في بيت أبويي
وقاعدين كل الشباب والفتايا في البيت
تعرفوا ليلة الجمعه الكل يروح بيت أبوه واللي
فيه يصير التجمع
وفرصه الواحد يسأل عن أهله وويش صار طول الإسبوع
وبعد ما خلصت القعده العامه بقينا
أنا وحلوة اللبن ويدتي الله يرحمها
سهرانين ونسولف
ومرّه وحده ما شافوني الا قايل ليهم
أنا :- أماه ، لول المره اذا بتدلع بنتها ويش تقول ليها
يدتي :- (توجه الكلام لأمي ) :- شفتي ولدش عن ويش يسأل
حلوة اللبن :- ويش فيها ، غير يكتب ويعرف ويش لول نسوي ويش نقول
يدتي:- يالله على قولت أمك يالله قوم روح ييب أوراقك وقلمك
أنا:- ان شاء الله
يدتي:-( تنادي) :- ييب وياك السرود داكوه عدال البغله اللي في الروزنه
أنا:- ان شاء الله
ويبت اليها السرود وطلعت منه كم تمره وحطتهم في المشكاب
وطلبت مني أصب قهوه
وبعد ما صبينا القهوه وأكلنا فردة التمره بدأت يدتي بالكلام المباح
يدتي :- هذا يا......يا ولد........ لول إذا الوحده وصلت عمرها
فلطعشر سنه ولا أرباطعشر سنه أمها تدّلع بها وتقول بنيتي بتعرس يا اليوم لو باشر ( بكره)
أنا :- ويش تقول ، يعني تقول شعر ولا ويش
يدتي :- تقول شعر ، وهيه قاعده ويا بتها
وتقعد تشكّل اللي في بالها من أفكار
وتبغى الخير والسعادة لبتها
وتقول في ما يقولوا
فاطمه خطبها الجبري
ومندوبه الباشا
نص الحسا دزتها
والهير ويا قماشه
وبغداد إصباحتها
وانقول دزة اللاشا
وعمها قال هاتوها
وأبوها خضض راسه
( للتوضيح :- الجبري :- أحد الأغنياء ويمكن تغييره الى أي إسم
دزتها :- اللي يجيبه المعرس اليها
قماشه :- اللؤلؤة
إصباحتها :- الثباحيه وما يحضر لها من الهدايا
اللاشا:- لا شيء)
أنا:- يعني يبغوا اليها نص الحسا ونص بغداد
حلوة اللبن :- تضحك....... أيه هذي بت السلطان
يدتي :- تضحك ....... راس مالها قلتين تمر وخمسة حصره
وروحي بيت ريلش
فضحكنا كلنا
وأيضاً قلت اليها :- يمه الحين فيه شعر يقولوه
إذا عرسوا بس ما يقولوا منه الا بيتين ولا فلافه
يدتي :- ويشهوه بعد
أنا :- شي لله يا با الحسن شي لله
الشمس ردت لعلي بعد الصلاه
يدتي :- أنا ماني حافظتنه بس أمك حافظتنه
حلوة اللبن :- ان شاء الله ما نسيته
يدتي :- يالله لا تدّلعي علينا يستاهل ولدش
أنا:- يالله يمه قوليه
يدتي :- يالله علشان نسوي زفه الليله
أنا :- خلاص بنسوي زفه الش أماه
يدتي:- خلاص سووا اليي بس بشرط
أنا:- آمري أمر
يدتي:- تييب ليي حنّا
أنا :- بكره أييب اليكم فنتينكم تآمروا أمر
حلوة اللبن :- خلاص يالله أكتب ....
شي لله يبو الحسن شي لله
والشمس ردت لعلي عقب الصلاه
( فبدأنا نصفق ونردد معاها )
الشمس ردت ردها المولى علي
أبو اليمه ياخلايق ما حلآه
ردت الشمس اليه عقب الأفول
ان شاء الله يوم الحشر كلنا معاه
وحين ردت لعلي جاه السرور
والخلايق بو الحسن تخضع وراه
خصه بالإكرام من دون الأنام
فارس الفرسان متى عيني ترآه
لو ينوزن حيدر بالخلق رجح
فاز من حبه وخابت عداه
من رقى كتف النبي محمدِ
وكسّر الأصنام والعالم تراه
من خصه ربه إبفاطم التقى
وخصه الله في سابع سماه
صلى عليه الله ما سارٍ سرى
أبو الحسنين فوق ما نقدر صفاه
قاتل المرحب ولا خفت بعد
هام الراس كل من سيفه علاه
التجي بك يا حبيبي ومهجتي
كان تشفي كل مريض من بلاه
الف صلى الله عليك يا با الحسن
كل شيعي يرتجيك أنته رجاه
أنا:- الله الله ......الله يعطيش العافيه ويسلمكم الينا ياااااارب
حلوة اللبن :- خلاص دحنا زفيناش أماه ، نبغى الحلاوه
يدتي:- وهي تضحك .... الحلاوه عليكم مو أني العروس
وخلصت سهرتنا ذيك الليله
وأذن الصباح فسكتنا عن الكلام المباح
ان شاء الله عجبتكم
سلاااامووو
صح النومه اميرووه.. قوه شحالش ...http://smilesgate.com/smiles/7/026.gif << حياني الله :toung:
ايه.. وخلصت سالفة نتيف نتيفان.. << توو الناس توش تدري
ايه وصبعبلي السالفه فيها.. ابغى على فيمتو.. هههههه .. http://smilesgate.com/smiles/5/025.gif
دقيقه بس.. لحظه .. هووووب.. ايوااا .. وصلت للسالفه الثانيه.. ايه يللا هدوء ابقراها..
===========================
هلاااا باااك...
بداية السالفه ويا المطر ودخلتك على يدتك وخالتك الله يرحمهم.. وقصيدة يدتك.. والحليب و الموقف ككل..حسيت روحي اشوفه ... وخشيت جو.. كل شي ولا عاد مفتحه بهالفجريه نافذة قرقوري http://smilesgate.com/smiles/13/121.gifخخ ومشغله المروحه .. ههههههههههههههاقتباس:
طاح المطر على قطر وتيمعوا في العشه
سووا ليهم خبيصه ما خلوا حتى تشه
اني سمعت اللي حولي يقولو ..
طاح المطر على قطر وتبللت الكشه.. سوو عصيده ما عطونا طشه...
امي عطيتني طشة حلوى..وديتها لسلوى..
سلوى في المدرسه.. تكتب كتابه وهندسه ..
ابوها يبيع سمبوسه.. سلوى صارت عرووسه...
اقتباس:
يدتي :- والله من يزل المطر ما تسمع الا طق المواعين فوق لبيوت وكل واحد امع له شوية مطر بركه عن الحسد
هههههههههه عجبتني قولة يدتك المرحومه يطق المواعين طق.. هههههههه والله وناسه
مو الحين ماي المطر اللهم يا كافي الشر من هالتلوث لونه يجيب الهم.. يا مجير... وعجبتني سالفة الحسد وماي المطر .. يللا ماي مطر ولا
كسار بيض وزفر <<< خوب كسار البيض حق المختلع مو المحسود .. هادااويش اميرووه... << هيهي خذ لك خرفت وقعدت.. http://smilesgate.com/smiles/13/081.gif
اقتباس:
أنا:- خلاص با أيمع لي شوي حق اذا عرست
ههههههههههه هااا ابو زين ..:wink: ارجع للخلف باك باك.. سويتها لو لااا.. يمعت ورشيت لو لااا.. << صدق نحاسه ولقافه.. :toung:
===========================
يللا للي بعدوو... اه.. خذ لك في صفحه ثانيه.. ويلي ... بعيد.. يللا بسم الله... اي .. اي اي .. عفر تغصغصت...:nosweat:
دقيقه... لحظه... هيييي.. اوباا... وصلت,,, زين... <<< انتين مو لو تقومي تكملي نومش احسن.:noworry:.>>>.ماااني .. :huh:.
شوي زين بقرى وباعوود..
===========================
عدناااااا..
ههههههههههههههه ماني قادره... يوم تقول لك يدتك ييب غرشة بيبسي وزيت زيتون.. اقول في بالي الزيت بتمرخه ,,, الغرشه لويه..؟؟ عفر بطق ريوله بها... !!http://smilesgate.com/smiles/6/062.gif
ههههههههههه ياربي .. والله خووش وصفه,,, رحمة الله على يدتك..
هههههههههههههههههههههههههههههههههههه لالاااا قعدوا بيتنا.. الا الجيرااان... << ما عليكم منها صامت بس هزاز :embarrest:
احم..اقتباس:
(..............
............)
- هذا مقطع مشفر علشان الرقابه هههههههههه
هههههههههههههههه عجبني.. عاد اهل لول احيانا .. ولويش بعد.. خخ يدتي الله يطول بعمرها.. احيانا تجيب اناشيد من لول فيهم كلاااام.. يا ساااتر .. اني افقق عيوني.. وتضحك علي خالتي وتقول: اهل لول عادي عالنيات,,واني مره ههههههه باموت ويش هالأناشيد..؟؟ ويلي عالنيات وجهي اللي على النيات..
شان كتبته هالمشفر بلون ابيض .. ههههههه عن الرقابه..:wink: ابغى احدد واشوف ويش هالمشفر <<< يبغى لش دست سنه بساعه..
اقتباس:
وسكتت يدتي عن الكلام المباح
عندما غرشة البيبسي عادت للإنسداح ههههههه
ههههههههههههههههههههههههه http://smilesgate.com/smiles/13/072.gif
===========================
اللي بعدوووو....
سرود.. مشكااب... ..؟؟
اقتباس:
إصباحتها :- الثباحيه وما يحضر لها من الهدايا
الثبااحيه .. http://smilesgate.com/smiles/6/136.gif يعني ويه http://smilesgate.com/smiles/6/119.gif<<< انحس منش مافي في تصيد الأغلاط.:evil:. سلط الله عليش من يتصيد هههههههه ... <<<خلاص خلاص بتأدب http://smilesgate.com/smiles/6/103.gif
ههههههههههههههههه خووش راس مال لش ياعرووس عالبركه كلووش ...
اقتباس:
شي لله يبو الحسن شي لله
والشمس ردت لعلي عقب الصلاه
هههههههههههه وناااسه والله... احبها هالقصيده..
بس حدي هالبيتين.. حافظه زي يدتك المرحومه.. ورحم الله والدين امك على تكملتها ..
===========================
ابو زين..
خيووو .. تسلم مليوون
جدا روعه.. يعطيك الف عافيه
ويحرسك الله من كل عدو ويحفظك من شر الأشرار يا كريم
ويوفقك ويبلغك كل مراد...
عفر صار قرقر وايد :rolleyes:احم..
دمت بحفظ الرحمن
بسم الله
روووووووووووعه هالقصص والأحداث خيوووووو الفاضي:shiny:
يسلمووووووووو وننتظر الجديد دوم ـاً:ongue:
وااااااااااااااااااااااااااااصل:coool:
اميرة المرح
ههههههههههههه موتتيني ضحك على تعليقاتش ال:lol:
يسلموا اخوي
والله هالأغنية مرة حلوة
والسوالف الي اتقولها ما تنمل
الله يعطيك العافية
ويرحم الجدة برحمته الواسعة
رحم الله والديك أخي عاشق الحريةاقتباس:
المشاركة الأصلية كتبت بواسطة عاشق الحرية
الله يرحم أموات المؤمنين والمؤمنات أجمعين
تقبل خالص التحيات
هلاااااااااااااااا وغلاااااااااا بأميرة المرح
وين الناس ....... الله يغربل ابليسش
وأنا أقرأ ردش وأنا فاقع من الضحك
غربل الله ابليسش
سلاااامووو
صح النومه اميرووه.. قوه شحالش ...http://smilesgate.com/smiles/7/026.gif << حياني الله :toung:
حياش الله بعد كفير
ايه.. وخلصت سالفة نتيف نتيفان.. << توو الناس توش تدري
ايه وصبعبلي السالفه فيها.. ابغى على فيمتو.. هههههه .. http://smilesgate.com/smiles/5/025.gif
خلّص اليوم ما فيه الا على لبن <<<نحاسه :toung:
دقيقه بس.. لحظه .. هووووب.. ايوااا .. وصلت للسالفه الثانيه.. ايه يللا هدوء ابقراها..
يالله هذا إحنا بنحارس .......
===========================
هلاااا باااك...
هلا باكين ........
بداية السالفه ويا المطر ودخلتك على يدتك وخالتك الله يرحمهم.. وقصيدة يدتك.. والحليب و الموقف ككل..حسيت روحي اشوفه ... وخشيت جو.. كل شي ولا عاد مفتحه بهالفجريه
انتبهي لا يطب عليش مطر هههههههه
نافذة قرقوري http://smilesgate.com/smiles/13/121.gifخخ ومشغله المروحه .. هههههههههههههه
ههههههههههه حلوه
مشغله البانكهه الله يجيب الش الهواء البارد
على هالصبحيه
اني سمعت اللي حولي يقولو ..
طاح المطر على قطر وتبللت الكشه.. سوو عصيده ما عطونا طشه...
امي عطيتني طشة حلوى..وديتها لسلوى..
سلوى في المدرسه.. تكتب كتابه وهندسه ..
ابوها يبيع سمبوسه.. سلوى صارت عرووسه...
هذه روايه ضعيفة السند
ورواتها كلّهم ضعيفوا السند
ورواية يدتي هيه الصحيحه ههههههههههههه
هههههههههه عجبتني قولة يدتك المرحومه يطق المواعين طق.. هههههههه والله وناسه
الله يخليها الوالده الى الحين ترى تيمع ماي مطر
وما تدعي في العزيه الا ان المطر يطيح في كل وقت
مو الحين ماي المطر اللهم يا كافي الشر من هالتلوث لونه يجيب الهم.. يا مجير... وعجبتني سالفة الحسد وماي المطر .. يللا ماي مطر ولا
كسار بيض وزفر <<< خوب كسار البيض حق المختلع مو المحسود .. هادااويش اميرووه... << هيهي خذ لك خرفت وقعدت.. http://smilesgate.com/smiles/13/081.gif
أي والله الحين ماي المطر
ما ينزل الا لونه أسود وأصفر
ما دري يرشوا عليه خميره ولا ويه ههههه
--- كسار بيض وزفر ...الليله سالفتنا عن كسار البيض
ويش مدريش عفر...هههههههه
ههههههههههه هااا ابو زين ..:wink: ارجع للخلف باك باك.. سويتها لو لااا.. يمعت ورشيت لو لااا.. << صدق نحاسه ولقافه.. :toung:
أكيييييييييييييد لا والحين بعد بين فتره وفتره
أرش الشقه بماي المطر بعد
يالملقوفه هههههههههههههه
===========================
يللا للي بعدوو... اه.. خذ لك في صفحه ثانيه.. ويلي ... بعيد.. يللا بسم الله... اي .. اي اي .. عفر تغصغصت...:nosweat:
ههههههههههههه حلوه تغصغصت :toung:
دقيقه... لحظه... هيييي.. اوباا... وصلت,,, زين... <<< انتين مو لو تقومي تكملي نومش احسن.:noworry:.>>>.ماااني .. :huh:.
شوي زين بقرى وباعوود..
ننتظر الباك ..........
يتبع>>>>>
===========================
عدناااااا..
حمد الله على السلامه
سلامة الأسفار ....
ههههههههههههههه ماني قادره... يوم تقول لك يدتك ييب غرشة بيبسي وزيت زيتون.. اقول في بالي الزيت بتمرخه ,,, الغرشه لويه..؟؟ عفر بطق ريوله بها... !!http://smilesgate.com/smiles/6/062.gif
ههههههههههه ياربي .. والله خووش وصفه,,, رحمة الله على يدتك..
الله يغربل ابليسش خيتي
ويش تطق ريولي بالغرشه
شااااا ريول ديناصور هههههههههههه:toung:
هههههههههههههههههههههههههههههههههههه لالاااا قعدوا بيتنا.. الا الجيرااان... << ما عليكم منها صامت بس هزاز :embarrest:
احم..
إحم إحم........
هههههههههههههههه عجبني.. عاد اهل لول احيانا .. ولويش بعد.. خخ يدتي الله يطول بعمرها.. احيانا تجيب اناشيد من لول فيهم كلاااام.. يا ساااتر .. اني افقق عيوني.. وتضحك علي خالتي وتقول: اهل لول عادي عالنيات,,واني مره ههههههه باموت ويش هالأناشيد..؟؟ ويلي عالنيات وجهي اللي على النيات..
أي والله ويش على النيات
ما يخلّوا شي الا يقولوه
وسلامي على النيات هههههههه
شان كتبته هالمشفر بلون ابيض .. ههههههه عن الرقابه..:wink: ابغى احدد واشوف ويش هالمشفر <<< يبغى لش دست سنه بساعه..
مشفّر يعني مشفّر
مافيه أمل ينكتب
بس للمعرسين وبالحبر السري بعد
ههههههههههههه
شكلش يغى لش هههههههههههه
ههههههههههههههههههههههههه http://smilesgate.com/smiles/13/072.gif
سانكيوات
===========================
اللي بعدوووو....
سرود.. مشكااب... ..؟؟
سرّوووود :- يعني زبيل صغير يحطوا فيه التمر
مشكاب :- صحن
الثبااحيه .. http://smilesgate.com/smiles/6/136.gif يعني ويه http://smilesgate.com/smiles/6/119.gif<<< انحس منش مافي في تصيد الأغلاط.:evil:. سلط الله عليش من يتصيد هههههههه ... <<<خلاص خلاص بتأدب http://smilesgate.com/smiles/6/103.gif
ههههههههههههههههههه
ما عليه لكن بتصيّد عليش في الأغلاط
هذي من تأثير النعس
ههههههههههههههههه خووش راس مال لش ياعرووس عالبركه كلووش ...
هههههههههههه
الله يغربل ابليسش
هههههههههههه وناااسه والله... احبها هالقصيده..
بس حدي هالبيتين.. حافظه زي يدتك المرحومه.. ورحم الله والدين امك على تكملتها ..
الله يرحم والديش ويسلمش
===========================
ابو زين..
خيووو .. تسلم مليوون
جدا روعه.. يعطيك الف عافيه
الله يسلمش ويعافيش ويوفقش ان شاء الله
ويحرسك الله من كل عدو ويحفظك من شر الأشرار يا كريم
ويوفقك ويبلغك كل مراد...
عفر صار قرقر وايد :rolleyes:احم..
دمت بحفظ الرحمن
عفر خلصتي
يسلمش ان شاء الله ويوفقش في دراستش
وتصيري اللي تتمنيه ياااااااااااارب
تقبلي خالص تحياتي
خيتي مياس مرحبتيناقتباس:
المشاركة الأصلية كتبت بواسطة مياس
الروعه تواجدش خيه مياس
ولا يهمش ان شاء الله نواصل بدون مانفاصل
تحياتي
خيتي عفاف الهدى مرحبتيناقتباس:
المشاركة الأصلية كتبت بواسطة عفاف الهدى
تواجدش خيتي ما ينمل والله
شرفتمونا في موضوعنا
الله يعطيش العافيه ويسلمش ان شاء الله
الله يرحم أموات المؤمنين والمؤمنات
تحياتي
بسم الله الرحمن الرحيم
السلام عليكم ورحمة الله وبركاته
هذا يا محفوظين السلامه
ذاك اليوم رجعت من المدرسه وأنا تعبان
ودخلت البيت وحطيت راسي ونمت
وما قعدت الا الساعه عشر الليل وحدي صليت وأكلت ليي
حاجه وشربت كاس شاي وعودت نمت مره فانيه الى آذان الصبح
ويم فاني بعد على نفس النمونه
ويم فالف دخلت البيت والا هذي يدتي وحلوة اللبن يحارسوني
يدتي:- ويش فيك لك كم يوم ما تاكل زي الناس ولا تقعد تسولف ويانا؟؟
أنا:- ما فيه شي بس تعبان .
حلوة اللبن :- ما فيه شي ...الا فيه أشايا ....تعبان ويش اللي متعبنك
قلّة الأكل وزيادة النوم .
أنا:- ما فيه شي بس تعبان شوي في المدرسه.
يدتي:- تعبان في المدرسه .... شا يخلوكم تحملوا رمل ولا سميت( وضحكت)
وضحكنا على ما قالته
ودخلت الى الحجره وحطيت راسي ونمت
ومن صحيت الا حلوة اللبن ويدتي وياها يحارسوني
ومن صليت وقعدت با آكل لي حاجه
يت اليي حلوة اللبن ...
حلوة اللبن :- قوم تبغاك يدتك
أنا:- ان شاء الله
حلوة اللبن :- قوم الحين يالله قوم
أنا:- ان شاء الله
وخرجت من الحجره وشفت يدتي عند الباب تحارسني
وأمسكت يدي وأخذت تتمتم بشيء لم أفهمه الى الآن
وخرجنا الى أمام البيت
وما شفت الا يدتي مطلعه ( المفرقعات ) وراميتنهم على باب البيت
وحده ..........طاخ........الثانيه ...........طاخ........الثالثه.........طااااااااااخ
الظاهر حالتي صعبه وأنا ما أدري خخخخخخخخخخخ
(المفرقعات :- البيض)ههههههههههه
ودخلنا البيت وأكلت المقسوم وقمت ...على العاده با أعود الى النوم
لكن وين تروووووح
يدتي:- وين وين وين على الله
اليوم ما فيه نومه تعال إقعد ويانا انته شبعت نوم
أنا:- ان شاء الله حااااااااااااضرين أماه
وجلسنا نحن الثلاثه في ذيك الليله وإحنا نسولف
أنا:- أماه با أسئلش ........؟
يدتي:- أدري بتسألني عن البيض
أنا:- أيه لاويش تسووا كده
يدتي:- هذا يا ........يا ولد........ نسويه علشان الخلعه وانته شكله واحد خالعنك علشان كده كله تنام وان شاء الله ما عليك باس الحين
أنا:- رحم الله والديش وبعد با أسئلش عن شي فاني
يدتي:- آمر
أنا:- ما يآمر عليش عدو .....ولا أحد ما تحبيه
يدتي :- يارب العالمين
أنا:- زين وماي الحلو والكمشه(الملعقه)والشبّــه
يدتي:- ماي الحلو بعد حق الروعه والحسد بعد
بس أكفر شي للروعه ومن واحد يتروع ولا يختلع يسووا اله ماي ويذوبوا فيه شكر ويقروا عليه قرآن ويكتوه في مكان الخلعه وما يصير فيه شي بأمر الله
أنا:- والكمشه اللي يحمّوها لاويش
يدتي:- الكمشه يحمّوها عدل وبعدين اييبوا ماي باااارد
وهي حق اليهال أكفر شي ويقروا بعد قرآن عليها
ويقولوا الى الياهل
زوعه عن الروعه
زوعه عن الروعه
ويحطوا الكمشه في الماي البااارد ويطّفر الماي منها ويقولوا
اطّفر الشر بحق خير البشر
اطّفر الشر بحق خير البشر
وما يصير في الياهل شي بأمر الله
أنا:- زين والشبّه
يدتي:- الشبّه أكفر شي حق المحسود
وخل أمّك تقول لك لاويش
حلوة اللبن :- أني ....فيش الخير والبركه
يدتي:- الله يسلمش ، بس انتين قولي له أني با أروح الأدب
حلوة اللبن :- هذا الشبّـه ينتقوها نقاي وأحسن شي البيضا مررررّه
ويخلّوا أهل المحسود يعضوها ( ولا يحطوها بين ضروسهم بس مو ياكلوها هههه) وبعدين يحطوها على اليمر في المبخر
ويدوروها على راسه وراس اللي جمبه وهم يقولوا
شبه على الشبّه
شان من الييران إطلعي
شان من الأهل إطلعي
شان من العدوان إطلعي
شان من (فلانه)إطلعي
شان من (فلان) إطلعي
ويقعدوا يرددوا أسامي اللي يعرفوهم واللي ما يعرفوهم بعد
وبعدين يخلوها تبرد الى الصبح ويشوفوا
ساعات تطلع صورة اللي حسده وساعات تطلع صورة مفل العيون
ساعات كبيره لو صغيره
وتال يرموها في البيبسور(المجاري) هيه ويا الفحم بعد
أنا:- زين الواحد يقدر يشبب روحه بروحه
يدتي :-( وقد خرجت من الأدب) :- لا ما يصير تالي ما إييب ولاد ولا بنات يعني يصير عاقر
أنا:- أعوذ بالله ، الله يجيرنا
يدتي :- عيل ويش
وضحكت وضحكنا
يدتي:- هذا بعد إذا الوحد قعدت تاكل في الريحان ما تييب الا بنات ولاتشتمّ ريحة لولاد أبدن
أنا:- زين ، يت لش اليوم وحد أماه .
يدتي -حلوة اللبن:- من هيه
أنا:- تيوده
تعريف( التيوده هي لعبه دليل على الفرح ولعب من بدايه شهر ربيع الى يوم 10 منه وهي دليل على فرحة الزهراء بهلاك الظالم)
يدتي:- أخ يودتنا الله يغربل ابليسك ما عليه .....بكره نعودها الك
وضحكنا وسهرنا ذيك الليله حتى
سمعنا الحجي عبدالله يأذن للصلاة
فعندها سكتنا عن الكلام المباح
عندما طلع الصباح
وتصبحوا على خير
سوالف حلوة اخوي واحد فاضي اني كنت
على قولتهم اقرا من خلف الكواليس
ههههههههههههههههههههههههههه
بس بجد رووووعة سوالف يدتك الله يرحمها
ومن هنا انا اقدم لك دعوة لمنتدى الجوال العام
لأني اخترت جوالك ليكون تحت المجهر
هههههههههههههههههههههه
يالله إذا شفتها روح على طول لمنتدى الجوال العام بسرعة
انتظرك اخوي
والله حلوة هالسالفة
الشبة ليما الحين نستخدمها وانسويها بعد
حتى الماي والشكر ينفع على قولتهم
وان شاء الله ما طلع الي خالعنك سنور بس
والله يرحم الجدة ويطول عمر الوالدة يا رب
السلام عليكم
كيف الحال اخوي ابو زين
والله سوالف ماتنمّل الله يرحم يدتك ويحشرها مع محمد واله
الحمدلله يوم الله رزق يدتك بالذريه الصالحه أمثالك
كان ودي اعقب على كل موضوع بس وصلت متأخرة
يبيلها صفحات على ما تخلص
ما ادري حسيت كأنه يدتك عاداتها زي يدتي الله يطول عمرها
بس يدتك احسن منها في شيء تخليك تكتب >> هذي ما فكرت فيها
انا احب اسجل ويدتي ما ترضى مع انها ضريرة بس لما نجي نسجلها
تدري كيف؟؟! الله اعلم . وتحلفني بعدين تقول خُرافتها(قصتها)
بس ااه لما وصلت الى نتيف نتيفان تشوقت الى الخرافات
لان جدتي اغلبها تقولها في الرمضان الصبح والظهر عشان ما نزعج امي
في المطبخ بس اللحين الى العصر واحنا في الكليه ما نلحق على شيء
بس حا فظينهم كلهم
:
:
والكمشه اللي يحمّوها لاويش
لاعبه دور في اليهال ماني مقصرة عسى ما .. على طول
اما بالنسبه لل ماي الحلو والكمشه(الملعقه)والشبّــه
شبعانين منه خاصه في الامتحانات
تقول امي بسرعه انحسد ويدتي تقوم بالواجب الله يعطيها العافيه
لا ما يصير تالي ما إييب ولاد ولا بنات يعني يصير عاقر
ولل .. اول مرة اسمع بالمعلومه هذي ياكثر ما سويناها
بس بصراحه انا أوؤمن بذي الاشياء
على العموم هدرنا وايد الله يعطيك الف عافيه وتسلم يمناك اخوي
ودمتم بحفظ الله ورعايته
هلا بخيتي دنيا الأحلام ومرحبتيناقتباس:
المشاركة الأصلية كتبت بواسطة دنيا الأحلام
يعني من خلف الكواليس ههههههههه
أهم شي الواحد يستفيد من الموضوع
-خلاص خيتي رحنا الجوال العام وطلعنا الفضايح هههههههه
تحياتي
هلا بخيتي عفاف الهدىاقتباس:
المشاركة الأصلية كتبت بواسطة عفاف الهدى
تواجدش هو الحلو خيتي
اكيييييد الشبه والحلوه ليما الحين وولدي بس يروح لحلوة اللبن لازم
شبه تسوي اله وما تقصر الله يسلمها ان شاء الله
لا لا اللي خلعني واحد ويانا في المدرسه هههههههههههه
أعظم من سنور هههههههههههههههه
الله يسلمش ويرحم والديش خيتي
تحياتي
مرحبتين خيتي توته وبنوته حياش الله
السلام عليكم
عليكم السلام ورحمة الله وبركاته
كيف الحال اخوي ابو زين
حياش الله خيتي
والله سوالف ماتنمّل الله يرحم يدتك ويحشرها مع محمد واله
رحم الله والديش يااااارب
الحمدلله يوم الله رزق يدتك بالذريه الصالحه أمثالك
:embarrest::embarrest:
كان ودي اعقب على كل موضوع بس وصلت متأخرة
يبيلها صفحات على ما تخلص
مو مشكله خيتي أهم شي انش قريتي السوالف
واستفدتي منها ان شاء الله
ما ادري حسيت كأنه يدتك عاداتها زي يدتي الله يطول عمرها
اللهم آمين ويسلمها ان شاء الله من كل شر
بس يدتك احسن منها في شيء تخليك تكتب >> هذي ما فكرت فيها
انا احب اسجل ويدتي ما ترضى مع انها ضريرة بس لما نجي نسجلها
تدري كيف؟؟! الله اعلم . وتحلفني بعدين تقول خُرافتها(قصتها)
عليهم إحساس عجيب في هذي الأشياء
سبحان الله
بس ااه لما وصلت الى نتيف نتيفان تشوقت الى الخرافات
لان جدتي اغلبها تقولها في الرمضان الصبح والظهر عشان ما نزعج امي
في المطبخ بس اللحين الى العصر واحنا في الكليه ما نلحق على شيء
بس حا فظينهم كلهم
والله حلوه السوالف اللي يقولوها
يعني الجلسه والتشويق اللي يسووه
تذكرت برنامج - حبابه - لمريم الغضبان اللي في الكويت لووول
:
:
والكمشه اللي يحمّوها لاويش
لاعبه دور في اليهال ماني مقصرة عسى ما .. على طول
ههههههههههههه
اما بالنسبه لل ماي الحلو والكمشه(الملعقه)والشبّــه
شبعانين منه خاصه في الامتحانات
تقول امي بسرعه انحسد ويدتي تقوم بالواجب الله يعطيها العافيه
تراها زينه مرررره
وخصوصاً الشبّه يعني مو تخاريف بس
فيه أحاديث عن الشبّه صحيحه
لا ما يصير تالي ما إييب ولاد ولا بنات يعني يصير عاقر
ولل .. اول مرة اسمع بالمعلومه هذي ياكثر ما سويناها
هذي تخريفه من أهل أوّل
ولا عليش منها هههههههههه
بس بصراحه انا أوؤمن بذي الاشياء
على العموم هدرنا وايد الله يعطيك الف عافيه وتسلم يمناك اخوي
ودمتم بحفظ الله ورعايته
حياش الله خيتي شرفتمونا في موضوعنا المتواضع خيتي
وما فيه قرقر وايد ولا شي
مرحبتين
فمان الله
السلام عليكم ورحمة الله وبركاته
شحوالكم .....حياكم الله
اليوم وأنا راجع من المدرسه
دخلت البيت الا هذي أختي الكبيره موجوده في البيت ويا يدتي
وسلّمت ورحت حجرتي
وبعد شوي طلعت
ورحت المطبخ وحطيت ليي غداء
الا هذي فراشه بيضاء جايه من جهة الصاله الى المطبخ وأنا أطلّع فيها ودخلت المطبخ وطلعت منّه وراحت الى جهة يدتي ولحقتها بدون شعور الا هيه رايحه واقفه على الجدار وترفف بجنحانها
وقمت أنا أسئل عن الفليت
يدتي:- ويش بتقتل بعد ...وزغه
أنا:- لا هذي فراشه بيضاء واقفه على اليدار
يدتي:- ويشووووه فراشه بيضاء ....لا تقتلها هذي رويحه
...تعال أقعد خلها ما عليك منها
- وشدّني ما سمعته من يدتي
أنا:- وشووه هذي
يدتي:- هذي رويحه
أنا:- وشوه بعد هالرويحه
يدتي:- هذي رويحه يعني اللي ميتين من أنسبانا
الطيبين إيّوا يزوروا البيوت اللي يحبوها
وناسها طيبين ، وتصير رويحتهم زي الفراشه
وشوف هذي ما يطردوها ولا يهشوها ولا يتحشّوا
قدامه بكلام مو زين
أنا:- يعني يحترموها
يدتي:- أيه ولا يسووا اليها ولا حاجه أبداً
أنا:- ورويحة منهوه اللي يايه الينا
يدتي:- ( وسكتت قليلاً تفكر): يعني ما تعرف رويحة منهوه
أكيد رويحة أخوك .......موسى
أنا:- الله يرحمه ان شاء الله
فسالت من عين يدتي دمعة محبوسه عندما نطقت بأسم المرحوم
وسالت مثلها من عيني ....وتذكرته الآن وعمري ما نسيته
والحمد لله
يدتي:- ايه روح قول الى أمّك ذاكيه رويحه في البيت
وذهبت الى حلوة اللبن وقلت اليها
ويوم يت وشافت الرويحه قامت تدعوا بالرحمة والمغفرة لأخوي المرحوم
يدتي :- أيه يا بت....... هذاكوه زاركم ...بعد لا تقولي قصرتي وياه
هذاهوه يقول ليكم رحم الله والديكم
وجلسنا نتحدث شويه وانتبهنا الى ( الفراشه) ولم نجدها
أنا:- راحت الرويحه أماه
يدتي:- تروح للجنّه
أنا:- ما أدري ويش في أذوني اليوم كلّه تزن
يدتي:- سلام الله عليك يا أمير المؤمنين
أنا:- عليه الصلاة والسلام
يدتي:- تعرف لاويش تزن أذونك
أنا:- ما أدري يمكن داخل فيها شي ولا شي
يدتي:- هذي ضربة علي على عمر بن ود
وان شاء الله تروح الصيحه
أنا:- سلام الله على أمير المؤمنين ....بس وشوه يعني
يدتي:- هذا أمير المؤمنين عليه السلام من ضرب
عمر بن ود بقت ضربته تزن في آذاين الشيعه
الى يوم القيامه
وان شاء الله تروح الصيحه
أنا:- ان شاء الله تروح الصيحه
وقمت با أييب كاس ماي
يدتي :- تعال با أقول لك شي
أنا:- نعم آمري أمر
يدتي :- ما تشوف اليي إحلا
أنا:- من وينه ما أحد يسويه الحين
يدتي:- خاطري في إحلا
أختي:- تمبيه مالح لو زين
يدتي:- اللي إيي
أنا:- بتسوو إحلا أمتاه
أختي:- روح اشتري سمك وأني با أسويه
يدتي :- الله يرحم زمان أول ، نشتري من سمك وننشره فوق ونقعد نسفسف في ذاك لحلا لامن يخلّص
أختي :- خلاص دحنا بنسوي بكره فوق الصدح
يدتي:- يعني يبغى له كم يوم
أختي:- فلافة أيام ويستوي
أنا:- فلافة أيام زين
يدتي:- شوف اشتري صافي وشحاديد زين
حلوة اللبن :- الصافي بيستوي بعد فلافة أيام ، أما الشحاديد يمكن ياخذ له اسبوع
يدتي:- إسبوع إسبوع ، أهم شي تضوق لحلا
أنا:- خلاص ونقعد فوق الصدح نسولف وناكل زين
واتفقنا على عمل الحلا
وفعلاً في اليوم التالي اشترينا سمك صافي وشحاديد ونشرناه
ويوم يبس قعدنا وكأنه مكسرات
بس سوته حلوة اللبن ويا أختي بطريقه حلوه ....بدون حشرات
ودبان ههههههههه
وان شاء الله نعلمكم الطريقه
والحين تصبحوا على خير لأننا
بنسكت عن الكلام المباح
حتى يطلع الصباح
تحياتي
يسلموا على هيك سوالف
اول الواصلين اني احم احم
بس اول شي كلامك يدل على انك سنابسي صح ولا
اما لرويحة اذا جتنا ليلة الحمعة والخميس والأثنين بالذات زوجة الوالد الله يرحمهم جميع ما ترضى احد
يقتلها كل مرة كدا بس هالثلاث الليالي متشددة فيهم واجد
واحيانا كانت لما اتشوف ارويحة اتقوم اطلع عيش او تمر او مكتوب الله زي مايقولوا وكنت اسألها ليش
فجاوبت لأن ابوش الله يرحمه زايرنا وهو معروف بالكرم لازم انراويه ان احنا بخير و بيتنا زي ما هو معروف
بالكرم.
اما على سالفة الحلا فزوجة الوالد بعد الله يرحمها هي الي اتسويه واذكر مرة واني صغيرة قعدت وياها اسوية حق وفاة مريم
وين ديك الأيام
اخوي والله ذكرتنا بأيام لولوحلاوتها
الله يرحم والديك وجدتك وابوي وزوجته والمؤمنين والمؤمنات اجمعين
الله يعطيك الف عافيه خيي على هالسوالف الي تشرح الخاطر وتوسع الصدر
والله يرحم يدتك وجميع امواتنا واموات المؤمنين والمؤمنات ياكريم
اقتباس:
زوعه عن الروعه
زوعه عن الروعه
:weird:ههههههههههههههههههههههههههههههههههههه ويع عفر ويعااات ويلي ووويش زوعه بعد ...هذا عن الروعه زوعه.. يا ساااتر... بتجيه زوعه من الروعه ...تطلع الخلعه يعني هههههههههه عفر شبدي لاعت..:wacko:اقتباس:
ساعات تطلع صورة اللي حسده وساعات تطلع صورة مفل العيون
ساعات كبيره لو صغيره
ههههههههههههههههه هذي امي الغاليه لول جت فتره تشببني فيها.. وطلعت عيون كبييره.. واني يماااااه :blink:
تخووف بفقعها.. ههههههه الصراحه اؤمن بفضل الشبه بطرد الحسد.. بس العيون اللي تطلع هههههه ما اعتقد بهالأشياء غير الا تفاعلات وماعت .:notrust:.
اقتباس:
أنا:- زين ، يت لش اليوم وحد أماه .
يدتي -حلوة اللبن:- من هيه
أنا:- تيوده
مممممممم بعد الشرح.. عفر فهمت يعني مقلب صادوه.. ههههه والا ويه..:rolleyes:؟؟؟
يللا اللي بعدوو..
صايره بالجمله هالأيام.. يا ويلي يعلن الضغط والزحمه.. الله المعين.. نسأللكم الدعاء
عجبتني سالفة الرويحه.. بس لونها بيضا..؟؟؟
ولا مره شفت في حياتي اني هيك..:cheesy:
خخ اللي اشوفها فراشة لونها بني ترابي ممم تقدر تقول مايل للرمادي ونسميها فراشة خياس ههههه<< تفشلي انتين انشبي احسن لش..:unsure:
رحمة الله على موتانا وموتاكم.. بس الفكره غريبه.. روح في فراشه.. والله خيال رهيب,:icon30:,
والحلا... عفر بتصير فضيحه.. ؛ وبتتكفخ ... هههههههه
هذي امي .. هاا اعلم.:wink:. زين بعلم واللي فيها فيها,, اكي اشوفها منوره الموضوع.. يعني مو بعيده تطب على هالرد وتوريني شغلي..
احم...
الحلا امي تحبه مرره وتموت فيه.. هههههه وما نحصله الا يالله بالطاعون.. مااافي مين يسوي ..؟؟؟ عاد ابوي مره رجع من العمل بكيس .. والبشااره يا ام الحلوين.:nuts:. طاح على بقاله جهة العمل بالظهران.. يبيعو فيها مكيس زي المتاي :shiny:
هههههههه اني عاد من شفته على طاولة المطبخ.. شلت الكيس اقلب فيه,,
ــ هاداووييه... :worried:
واركز واشوف عفر عواين اركز زياده سمك..
ــ هههههههههههههه ويلي حلا.. ويش هذااا,, ويييييع..
امي محمقه فيني .. شان استحي على وجهي..
ـ احم .. الحمدلله رب العالمين.. كيفا تشتهووه..
ـ مالش شغل حلو.. لو تذوقيه ما عفتيه...:suspicious:
ــ هااع.. الله لا يدوقني اياه. عليكم بالعافيه..
تسلم خيووو.. من كل شر ويعطيك الف عافيه...
والله يرحم يدتك ويرحم موتانا ومواتكم والقارئ يقول امين :bigsmile:
دمت بحفظ الرحمن
وينك اخوي ابو زين
طولت الغيبة
اكيد تشتغل شفتات ولا في الرقوق
اتروح اسبوعين وتجي اسبوع
مشغوووووووول شوي هاليومين
لأني اشتغل من 7:30 الى الساعة 6 المساء
وأرجع مررررره هلكان من الكمبيوتر والتقارير
لكن الليلة ان شاء الله
سالفه حلوووووه يديده
سلام
هلا بخيتي عفاف الهدى
يسلموا على هيك سوالف
الله يسلمش خيتي
اول الواصلين اني احم احم
إحم إحم يالله .......حياش الله :ongue:
بس اول شي كلامك يدل على انك سنابسي صح ولا
لا.... ولا أنا جارودي ولد جارودي
بس المره من سنابس :embarrest:
اما لرويحة اذا جتنا ليلة الحمعة والخميس والأثنين بالذات زوجة الوالد الله يرحمهم جميع ما ترضى احد
يقتلها كل مرة كدا بس هالثلاث الليالي متشددة فيهم واجد واحيانا كانت لما اتشوف ارويحة اتقوم اطلع عيش او تمر او مكتوب الله زي مايقولوا وكنت اسألها ليش
فجاوبت لأن ابوش الله يرحمه زايرنا وهو معروف بالكرم لازم انراويه ان احنا بخير و بيتنا زي ما هو معروف
بالكرم.
الله يرحمه ويرحمها ياااارب بحق محمد وآله الطاهرين
وصحيح الرويحه حتى صديقي يعتقد بهالشي
وليلة الجمعه لازم يقعد عند باب بيتهم ويحارس الرويحه
اما على سالفة الحلا فزوجة الوالد بعد الله يرحمها هي الي اتسويه واذكر مرة واني صغيرة قعدت وياها اسوية حق وفاة مريم
وين ديك الأيام
الله يرحمهم جميع يااااارب
الحين عمي وأنا بعد ترى أسوي الحلا
بطريقه مزبووووووووطه
وبس هالصيفيه مسوي
عشره كيلو صافي
قضيت عليهم أنا والمره وحتى حجي زين علمناه على الحلا:toung:
اخوي والله ذكرتنا بأيام لول وحلاوتها
الله يرحم والديك وجدتك وابوي وزوجته والمؤمنين والمؤمنات اجمعين
أيييييييييه الله يحمها من أيام
ويرحم والديش خيتي والمؤمنين والمؤمنات أجمعين
وآآآآآآآآآآسف على التأخير
بسبب ظروف العمل
تحياتي
اقتباس:
المشاركة الأصلية كتبت بواسطة ام الحلوين
حياش الله خيتنا أم الحلوين
الله يشرح خاطرش بحق محمد وآل محمد يااااااااارب
الله يرحم والديش والمؤمنين والمؤمنات أجمعين
تحياتي
هلا بيش خيتي أميرة كل المرح
:weird:ههههههههههههههههههههههههههههههههههههه ويع عفر ويعااات ويلي ووويش زوعه بعد ...هذا عن الروعه زوعه.. يا ساااتر... بتجيه زوعه من الروعه ...تطلع الخلعه يعني هههههههههه عفر شبدي لاعت..:wacko:
الله يغربل ابليسش
ههههههههههههههههه هذي امي الغاليه لول جت فتره تشببني فيها.. وطلعت عيون كبييره.. واني يماااااه :blink:
تخووف بفقعها.. ههههههه الصراحه اؤمن بفضل الشبه بطرد الحسد.. بس العيون اللي تطلع هههههه ما اعتقد بهالأشياء غير الا تفاعلات وماعت .:notrust:.
أووووووه عيون كبيره مشكله ههههههه
تشببي مره فانيه أحسن الش
خصوصاً هالأيام عندش اختبارات
مممممممم بعد الشرح.. عفر فهمت يعني مقلب صادوه.. ههههه والا ويه..:rolleyes:؟؟؟
مزبوووووووووط
يللا اللي بعدوو..
صايره بالجمله هالأيام.. يا ويلي يعلن الضغط والزحمه.. الله المعين.. نسأللكم الدعاء
الله يوفقش ان شاء الله
عجبتني سالفة الرويحه.. بس لونها بيضا..؟؟؟
ولا مره شفت في حياتي اني هيك..:cheesy:
خخ اللي اشوفها فراشة لونها بني ترابي ممم تقدر تقول مايل للرمادي ونسميها فراشة خياس ههههه<< تفشلي انتين انشبي احسن لش..:unsure:
ههههههههههههه
فراشة اللمبات هههههههههه
فراشة خياااااس هههههههههههههههه
رحمة الله على موتانا وموتاكم.. بس الفكره غريبه.. روح في فراشه.. والله خيال رهيب,:icon30:,
خيال اليدات بعد ......بس موجود على فكره
والحلا... عفر بتصير فضيحه.. ؛ وبتتكفخ ... هههههههه
هذي امي .. هاا اعلم.:wink:. زين بعلم واللي فيها فيها,, اكي اشوفها منوره الموضوع.. يعني مو بعيده تطب على هالرد وتوريني شغلي..
احم...
انتبهي لروحش ههههههههههه
الحلا امي تحبه مرره وتموت فيه.. هههههه وما نحصله الا يالله بالطاعون.. مااافي مين يسوي ..؟؟؟ عاد ابوي مره رجع من العمل بكيس .. والبشااره يا ام الحلوين.:nuts:. طاح على بقاله جهة العمل بالظهران.. يبيعو فيها مكيس زي المتاي :shiny:
هههههههه اني عاد من شفته على طاولة المطبخ.. شلت الكيس اقلب فيه,,
ــ هاداووييه... :worried:
واركز واشوف عفر عواين اركز زياده سمك..
ــ هههههههههههههه ويلي حلا.. ويش هذااا,, ويييييع..
امي محمقه فيني .. شان استحي على وجهي..
ـ احم .. الحمدلله رب العالمين.. كيفا تشتهووه..
ـ مالش شغل حلو.. لو تذوقيه ما عفتيه...:suspicious:
ــ هااع.. الله لا يدوقني اياه. عليكم بالعافيه..
لا لاتغلطي على الحلا
تراني مو بس آكله الا بعد أنا اللي أسويه >>>خبره
ونظييييييييف مرررررررررره بعد
لا تقولي لأمش ههههههههه
صحيح لازم كل صيفيه أسوي على الأقل عشره كيلو سمك صافي
وعمي بعد خبره في الحلا
والحين باقي منّه بس نص كيلو مع الأسف خلّص<<علشان لا يقولوا يبغوا ههههه
صحيح تراني حتى زين علمته ياكل حلا بعد
وحلا ربيان بعد
تسلم خيووو.. من كل شر ويعطيك الف عافيه...
والله يرحم يدتك ويرحم موتانا ومواتكم والقارئ يقول امين :bigsmile:
دمت بحفظ الرحمن
الله يسلمش خيتي ويعافيش
ويوفقش يااااارب
ويرحم موتانا وموتاكم وموتى المؤمنين والمؤمنات أجمعين
تحياتي
بسم الله الرحمن الرحيم
السلام عليكم ورحمة الله وبركاته
هذا يا محفوظين السلامه ذاك اليوم
دخلت على يدتي المرحومه في زي هالايام
مولد الإمام الرضا عليه السلام
وهنيتها بالمولد وحبيت راسها وقعدت وياها شوي
يدتي:- هلا والله
أنا:- الهلا كله بيش أماه عساش بخير
يدتي:- الحمد لله رب العالمين
أنا:- أماه سمعت أمي تقول بتروحي الحج هالسنه
يدتي:- أيه والله عزمنا الحج هالسنه ويا ملا ......
أنا:- الله يوديش واييبش بالسلامه ان شاء الله وقلدناش الدعاء والزياره
يدتي:- علينا الدعاء وعلى الله الاجابه ان شاء الله
أنا:- تآمري على شي ولا شي
يدتي:- ما يامر عليك عدو ولا ظالم ولا واحد ما تحبه ان شاء الله
أنا:- متى بتروحوا ان شاء الله
يدتي:- ان شاء الله يقولوا الخميس الياي بنركب الباص والمقيطعي يقول أول شي بنروح مكه وتالي المدينه ويا شيخ ........
أنا:- على خير
يدتي:- صمايل ، عفر نسيت
أنا:- خير ويش نسيتي عفر
يدتي:- داكوه عند أمك سعنّه (دوخله) وعطيتها فلاف سعنّات ( دوخله) قول ليها ما تنساهم اسقوهم علشان يفلتوهم لينا في عين ام عمار ولا في القشوريه ولا في البحر زين
أنا:- أييييييييه زين با أسئلش عن السعنّه
يدتي:- قول إسئل حاضرين
أنا:- أول شي كيفه تسووا هالسعنّات
يدتي:- أول شي نسويهم من الخوص ونحط فيهم شوية رمل وشوية سماد علشان يكبروا بسرعه ، ومن ايي يوم العيد نرميهم في السد ولا في عين أم عمار ولا القشوريه ولا في البحر
أنا:- ايه أتذكر يوم أنا صغير نروح التوازي ونفلت السعنات حقنا هناك وأنا ما أدري لاويش
يدتي :- الله يرحم التوازي راحت
أنا:- الله يرحمها الحين ما فيه الا مواطير عليها
يدتي:- يالله كل شي رايح الا وجهه الكريم
أنا :- سبحانه
يدتي:- ايه ويوم العيد نروح ونفلتها علشان الحجاج يسلموا وتوصل اليهم سلامنا ويصير دربهم سلامه
أنا:- ويش تقولوا يوم اللي تفلتوا سعنّاتكم ( الدوخله )
يدتي :- نقول يا محفوظ السلامه ......
دوخلتي(اسعنّتي ) حجي بي
حجي بي حجي بي
لامن يجي حبيبي
حبيبي، حبيبي
حبيبي رايح مكة
مكة، مكة
أومكة المعمورة
المعمورة المعمورة
فيها السلاسل والذهب والنوره
النوره، النورة
حجيت بش ييمة
ييمة ييمة
راويتش قبر محمد
محمد محمد
صلوا عليه وآله وآله وآله
ياليتها لومية
مزروعة في البستان
يقشرها عبد الله
وياكلها سلمان
سلمان يابو جوخة
يمراطن العجمان
طلوا خواتي طلوا
شوفوا البحر طميان
شوفوا شراع أبيي
ابيض من القرطاس
شوفوا شراع العدو أسود من الطفو
عندي طويرٍ احمر
وأسكره بالسكر
وسكر على سكر
وغضارتين صيني
يارب تهديني
وأحج بيت الله
وأقرأ الفلافيني
يا ميقعةالمحلب
خليني بتدحلب
بدحلب الصواني
ياسلوقة العيد العيد
ودي أبيي بعيد أبعيد
أو حججية أوزورية
أو جيبيه بالسلامة
سلامة الغنامة
وتالي نفلتها في الماي
أنا:- الله ، الله حليوه
يدتي:- عيل الحين الواحد يروح الحج وايي وكنّه ما راح
أنا:- اي والله هداكوه ولد .......راح ويا اللعام وعوّد
يدتي:- الله يغربله يعني عودت حليمه لعادتها القديمه
أنا:- بعد ويش ، الله يهديه
يدتي:- زين يا ولدي با أوصيك على شي وأني في الحج تسوّيه
أنا:- تآمري أمر أماه
يدتي:- *)&^%$#$%^&*)&^%$#$%^&*<<<مشفّر للسالفه اليديده
أنا:- ان شاء الله
وبعدها سكتت يدتي عن الكلام المباح
بعدما شفّرت الكلام اللي راح
وان شاء الله ظروف العمل تصيرok
ونييب اليكم سوالف يدتي بسرعه
تحياتي
من طول الغيبات جاب الغنايم
مشكور اخوي واحد فاضي ورحم الله والديك
والله يرحم يدتك <<<< بقلد عليك
يدتي:- *)&^%$#$%^&*)&^%$#$%^&*<<<مشفّر للسالفه اليديده
ليييييييييييييييييييييييييييش مشفر
المفروض عناوين السالفة الجاية من شان لا اتحقرص
عموما مشكور اخوي للسالفة وننتظر السالفة الجاية على احر من الجمر وان شاء الله العمل يخف سواء كملت او لا <<لا تصدق بتكملها بتكملها>>
ويسعدني اكون اول من يرد على هاي الثالفة
وعجبتني مرة
يسلموا عالسالفة الحلوة الي يت في وقتها
الحين الكل قاعد يجهز الى مهرجان الدوخلة
ويبدأوا الناس يزرعوا ليهم شي عشان ينبت الى العيد
الله حلوة الفكرة مرة
والنشيدة حلوة مرة اول مرة اسمعها كاملة
الله يرحم يدتك ويعطيك فسحة عشان انكمل السوالف على خير
الله يرحم امواتنا وأمواتكم انشاء الله
والف شكر لك اخي على التراث القيم هذا
وانشاء الله نتابع القصص أول بأول
في امان الله