ضعنا يا صبرنا...

وييييييييييي مسكينه ليلي عورت بفادي عفرررررر

وطلعت ريما مره عاد

ومن الرجال الي جاي الى حميد

ننتظر البقيه

مرحبا
نورتوني لا عدمت هالنور..
حبايبي .. اني بحاول قد ما اقدر .. اكتب الجزء حتى في ايام اجازتي ..:amuse:
شيكو وشوفو يمكن الله يقدرني احط شي..:rolleyes:
لعيونكم والله .. بحاول:embarrest:

اسألكم الدعاء
دمتم بخير
وبحفظ الرحمن

هداااويه على وووو شااايفة حاااااااالها عولاااااايوووووه بنت الصوااااااقع ......على قووولة امي .
مسكينة ليلى كسرت خااطري http://www.alnassrah.com/images/icons/bawling.gif والله اني عشت الجوووو وكأن اني اللي في هذا المووووقف . قهرتني الدووووووبه .http://www.alnassrah.com/images/icons/icon8.gif


يسلموووووووو امووووووووورة على الجهوود .. مباااركة ان شاء الله .
وبانتظــــار الجزء الجديد بفااارغ الصبر.
عساااج ع القوة .

ايه عدل خيوة حطي بكرة ها
بالانتظار..
نسيت اعلق على ليلى لما قامت تقول
قبل ماتروح ودنا وياك ودنا
نريد انزور صحن الزينبية

ياعلي احنا بعد نبغى نروح متى...........
الله يرزقنا وياكم الوصول يارب...
موفقة خيتي إن شاء الله تعالى..
..دمتي بعين المولى الجليل..

انا قريتها الصباح بعد

يعطيك ربي الف الف عافية


ننتظر التكملهـ على احر من الجمر

تحياتي

احب اهنيكي عالرواية

انا بصراحة تحمست للرواية مع اني ماقريها بس شفت ردود الاعضاء وحماسهم خلاني اتحمس للقرائة //// شفيها ماعرفت الا هالكلمة

وانشاء الله بقراها اول ما اخلص من الرواية الي عندي بس انا واثقة انها راح تكون من روائع الروايات

تحياتي

صبــــــــــــــــــــــــــــــــــاح الخير ،،
من حظهـ حميدووو أن علي وياه ،، وإلا كان راح فيها ،،
لكن ،، بـ صراحهـ علا بالغت ،، وين قاعدين يادفع البلا ،، < مرة ما عجبتني تصرافاتها ،،
وليلى ،، بـ صراحهـ عندها كل الحق تنقهر ،، شي يبط القلب ،،
كان لا أكلت ولا سوت هاالسالفهـ ،،
عموما خيوووه ،،
يعطيكـ ربي ألف ألف عاااااافيهـ ،،
على هيكـ روايهـ حمااااااس ،،
بـ إنتظار الجزء القادم بـ فارغ الصبر ،،
تحياااااااااااتي ..
للدموع إحساس ..

مرحبا..
ولا احلى من دخلتي هالمتصفح
وشوفة هالردود منكم..
شي يفرح والله..
الله يخليكم ويبارك فيكم.. ويحقق امانيكم...

هو اليوم اني على حساب اجازه .. ولا رجعت الا متأخره :embarrest: بس قلت اشد على روحي شوي لعيونكم..
وكتبت ليكم الجزء السادس.. وله تتمه .. بس ما اوعدكم تكون بكره..
حسب الظروف .. وان شالله تكوون بكره..

نسألكم الدعاء
و تفضلو الجديد

الحلقة السادسة..

شوي الا بجية واحد لحميد .. وكان غريب على علي ما شافه في حياته.. وشكله ما عجب علي .. يحسه شبهات.. من حلقته ووشم على كتفه.. .. حميد من شافه ..
ــ هلاااا والله هلا فيك..
والتفت لعلي ..
ــ انتبه لصينيتي وبيع عني اذا جى احد.. شوي وباجيك..
علي بريبه : ــ وين رايح..؟؟
حميد وهو ماشي مع الرجال ..
ــ دقايق وراجع...

علي في باله..
ــ الله يستر منك ياحميد.. هذي فتره منت عاجبني ابدا.. مادري ويش اللي وراك وويش ناوي,, ايه ياخبر اليوم بفلوس بكره ببلاش

ام علي : ــ ابو علي تبغى ساقو؟؟
ــ... وهذا سؤال ينسأل ؟؟ ايه ليش مابغى !!

عطت ام علي ابو علي الصحن
ابو علي بأطراف اصابعه يلمسه:
ــ هادوااايش برد..!!!
ــ ايه مفتوح ظل شوية زينه وبرد
ــ حطيه في الفرن يصخن..
ــ الصحن بلاستيك بيميع علينا...
ــ اهووووو حطيه في صحن عدل وحطيه في الفرن
ــ يااااااااعلي ياحبك للشغل والحوسه
ــ ايه .. يا تجيبي شي عدل يا لا تعزمي مره فانيه..
خذت ام علي الصحن .. وراحت تصخنه..

وفي غرفة البنات.. ريما :
ــ زنبوه .. وين اخوش جاسموه؟؟
ــ الويه؟؟
ــ ابغاه في شغله...
ليلى : ــ شغلة ويه.؟؟؟
ــ يحل الي سؤال...
ليلى بسخريه: ــ في الكيمياء لو الفيزياء
ــ لا احياء .. تسخري ويا وجهش .. ابغاه لأاعرابات في النحو << شلاخه تبغاه للتلفزيون
زينب : ــ ويش دعوه حنا نعرف نعرب... هههههههههههه واللي يسمعش عاد جاسموه ابو الأسود الدؤلي ..
ريما : ــ لا انتون علمي ما تعرفو.. ومنهو دا ابو الأسود الدؤلي..؟؟
زينب : ــ ههههههههههه ظررريفه كثري منها.. وافاا ما تعرفي ابو الأسود الدؤلي..؟؟؟
ليلى : ــ تشيه دي تعرف شي .. ينفع... تعرف اسامي مطرربين ممثلين.. خرابيط ايه اسأليها عندها علووم..
ريما بقهر : ــ ذلفو عني .. خلاص هونت.. مابغى شي..
زينب: ــ كيفششش.. وثاني شي جاسموه ماندري وين ارضه كل يوم والثاني ذالف ولا نشوف رقعة وجهه الا بالصاقعه..
ريما بهمس : ــ شااان زين اني زيه...
زينب : ــ هااا .. ويشو تقولي ؟؟
ــ لا ..ولا شي ...

ليلى دارت على زينب بحماس :
ــ مادريتي ياخيه..
زينب ابتسمت : ــ لااا ويشوو..
ــ افكر في شغله دي يومين..
ــ احلفي .. الله تماااام.. ويشوو فكرتش؟؟
ــ حنايه..
ــ حلوووو .. فكره مره حلوه .. ولا هي مكلفه .. بس متعبه.. وانتين ما شالله عليش ايدش خفيفه .. هههههههههه اذكر ايام المدرسه تزخرفي دفاترنا... وفوق هذا الشغله كلها حريم في حريم .. ما بيمانعو اهلش..
ــ ايه على قولتش .. بس بعدني افكر..
ــ الله يوفقش ياليلوه يا بنت عمتوه
ــ الله يسمع منشششش بنت خالوه..

ريما : ــ تالي اجل تحنيني حنى عرسي بلاش
ليلى : ــ هههههههههههه اللي يسمع مخطوبه .. ان شالله .. الله كريم و احنيش..
ريما : ــ هههههههههههههه خلاص اجل بكره بادور ريل
زينب ترمي عليها المخده: ــ ما تستحي هههههههههههههه
ريما تغمز لزينب : ــ ماتبغي ادور لش .. لووو صح صح .. موووجوووود

ليلى كشرت بوجه ريما.. ما تبغى هالسوالف كل شوي.. وهي تدري بأخوها وتفكيره.. و لا تبغى زينب تتعلق اكثر ويصير عشمها فيه..

وصل مالك خالته امل .. اللي مارضيت تنزل وياهم بيتهم... وكانت متضايقه من تصرفات علا بالمره...

ورجعو البيت.. ودخلت علا وعلى طول ركبت غرفتها..
ودخل وراها مالك...
سميره : ــ الا رجعتو بدري .. وويش فيها دي ركض لا سلام ولا كلام
مالك يرفع كتوفه : ــ مادري .. خذناهم من الخياطه وهذي حالتها وقالت على طول تبغى البيت.. ومارحنا السوق.. تعرفيها .. الدمعه الساكبه..
ــ امممم يعني.. واي خياطه؟؟
ــ ما اعرفهم .. بس بيت من البيوت القديمه في الفريق الشمالي .. قريب البحر
ــ اهااا .. وويش وداهم هناك.. قلة خياطين هنا !!!
ــ والله مادري..
وبيطلع مالك من البيت..
ــ وين رايح؟؟
ــ للشباب ...
ــ زين متى بترجع..؟؟
ــ مادري على حسب.. لويش ؟
ــ لا بس ولا شي .. قلت لو اتصل ابوك عالبيت كان تردو عليه .. يمكن يتصل لو شي ..
ــ ايه عادي احيانا هو يكلمني عالجوال
ــ يعني .. اجل تيسر...

علا في غرفتها.. ماقفلت الباب لأنها تدري عمتها ما تسويها وتجي ليها تشوفها ويش مضايقها ..
صارت تتذكر موقف ليلى منها.. صوت ليلى المتسكر والحزين يرن في اذونها.,,
صارت تصيح :
ــ مو قصدي .. وربي مو قصدي.. ياالله سامحني .. ويش اسووي..
وظلت تقلب افكارها والهم مخاويها..

علي قاعد في السوق.. اذان المغرب قريب .. وحميد مارجع .. باع بداله شوي زين لو كان موجود عند صينيته ماباع هالكثر,,,
من كثر ما يتشابق ويرد بلسان طويل على خلق الله..
علي كان صبور.. حتى لو توجهت له اهانه .. كان يمسك روحه.. واذا عصب مو زي حميد.. يحاول يداري عصبيته على حساب رزقه.. لكن من يرجع البيت وهو تعبان ومعصب .. وتسوي ريموه اقل حركه مهي عدله.. يحط حرقته فيها ويقوم الصريخ والتهزأ...
وريما ما شغلتها الا ترد عليه احيانا لو تضحك وتزيده عليها .. واحيانا تخاف و تسكت..
عمرها ماصاحت ولا ذرفت ولا حتى دمعه وحده..

علي خلاص .. زهق مو عارف ويش يسوي ... وحميد ماعنده جوال كان يتصل عليه... سلم امره لله .. شال بقايا سمك حميد وصوانيه .. وصار يرتبهم..
لين يرجع..و المشكله مايقدر يخليهم .. ولا يوديهم الصندقه.. لأن حميد يروح ويجي وياه ..
شوي الا برجعة حميد ..
علي بقهر : ــ وووووووينك يارجال..!!!!!!
حميد بابتسامه عريضه و يمسح على ظهر علي :
ــ مسااااامح ياخوووك,, شغله ضرووريه والله.. تسلم يعطيك العافيه..
ــ الله يعافيك......... وويش هالشغله.. ومنهو دا؟؟
حميد وهو يلم باقي اغراضه..
ــ ايه.. لا بس هذا واحد من الشباب جايب لي خبر عن طراد... مره سولفت وياه قلت ودي اخذ لي طراد سعره اوكيه و يمشي قال بس يحصل بيكلمني.. الحين جى هو ويا واحد من اصحابه .. راعي الطراد هالواحد بيبيعه.. وحاطينه في سيارتهم رحت اشوفه.. و بس ..
علي مو داخل راسه هالكلام : ــ يعني.. وويش نويت تاخذه؟؟
ــ لأ.. ما عجبني.. غالي سعره...
ويحاول حميد يغير الموضوع بمزحه وهو يضحك:
ــ هااااااا ابو علاي .. لايكون مضايقنك انا عالطراد.. اعتررف بس اعترررف
علي : ــ ظرريف .. ويش دعوه بالعكس تونسني خوش طلعات وياك..
ــ ههههههههههههه ايه حسبالي بعد
ــ لا يحس بالك ..
علي مو مرتاح بالمره.. وكلما حاول في حميد .. يلاقيه يلف ويدور...
رجعه الصندقه.. ورجعته لقى جاسم جهة الصندقه توه طالع منها
حميد : ــ وووووووول عليك توك قاعد من النوووم.. فكرتك رحت من الصبح..
جاسم يتثاوب : ــ لأ .. توي قاعد..
ــ ايييه يادنيا ناس تتشحطط في البحور و تتعب وتروح وتجي وناس نايمه ولا همها
علي مستنكر : ــ ليش ..؟؟ الظهر طلعتك من البحر..؟؟ مادخلت الصندقه؟؟ ماشفته فيها..
حميد انربط لسانه : ــ هااا ... لااا .. دخلت بس تدري ياخوك طايح في البحر وداير راسي .. ما انتبهت له ...
علي بأستنكار وابدا كلام حميد مو عاجبنه ولا داخل مخه: ــ ايه.. يعني..
حميد : ــ يللا مع السلامه ياخوك .. اشوفك بكره على خير
ــ على خير .. تعال خذ فلوسك..
ــ أي فلوس ؟؟
ــ فلووس سمشك... بعنا لك شوي زين..
ــ اوه.. ما شالله.. خلهم لك حلالك..
علي حمق فيه : ــ امسسسك يا بن الحلال وخلني اتيسر
حميد اخذهم و بأبتسامه عريضه : ــ يااااااساااااااتر عليك...
وركب جاسم مع علي.. وهم في الطريق اتصلت عليه اخته تبغاه يجيب ليهم خبز قبل لا يأذن... وهي تكلمه جاسم عطس ..
ليلى : ــ يؤ وياك احد..؟؟
ــ ايه جاسموه ولد خالي ...
ــ اهااا يللا اجل ننتظرك لا تنسى الخبز
ــ ان شالله..
وسكرت التلفون..
ام علي : ــ مين اللي وياه ....؟؟
ــ جاسم
ريما فتحت عيونها بتررجي .. وآمالها تخيب.. وفي بالها:
ــ اففففففف حتى لو جى بيتنا من وين اجيب له 10.. صاقعه تصقعه ابو كروه..
زينب : ــ ياعلي عليش .. وياه ولا تقولي
ــ الويه اقوول؟؟
ــ الحين بيرجعه البيت.. كان يرجعني وياه مره وحده..
ام علي : ــ الويه يابتي ..؟؟ قعدي تعشي ويانا..
ــ لا عمتي فيه العافيه مره ثانيه.. اسمه علي بيروح بيتنا كل ولابد .. ياليت يمر هنا قبل وياخذوني لا امشي تالي في الليل ..
ام علي : ــ قعدي تالي علي ويا ليلى يرجعووش..
ليلى : ــ ايه يللا عاد.. من زمان ماقعدتي ويانا..
ــ لا.. خلوها مره ثانيه.. اجيكم ويا اهلي كلنا.. ولا اتعب علي توه راجع من شغله ويرجع يطلع..
ام علي : ــ مافيها تعبه يابتي..
زينب ابتسمت .. ــ مره ثانيه غناتي
ام علي : ــ على راحتش .. وسلمي على اهلش.. و اتصلي امي باخوش قولي له يمر

واتصلت ليلى لعلي .. اللي قال ليها دقيقتين وبيمر عالبيت..
وطلعت زينب لعلي ..

تابع>>

وفي طريقهم لبيت ابو جاسم.....
لفت نظر جاسم شبقه في احد الزرانيق ..
ــ اه .. طلعو.. شباق..
علي وقف وريوس ... الا فعلا شباق والدعسه في البطون قايمه...
صارو يركزو النظر مو مبين مين هذيلا ؟؟؟
وينزل علي ليهم ويفكهم ... ويهرب واحد منهم ويظل الثاني .. اللي عرفه من صوته
ــ عادلوه ويش فييييك...؟؟؟
عادل وهو رافع نعاله المنقطع ...ــ هدددني عليه باااادوووس فبطنه..
علي : ــ ههههههههه امش .. اطلع من هالزرنوق .. خلصني ..
ــ هددددددني بدبحه هالـ .......... << طووط تشفير ,,, سبايب قويه من العيار الثقيل
علي مختلع ... ــ يااللله ويش هالكلام .. من وين لك...!!
عادل يضحك: ــ عببباااسسسوه كللله يقووول لي كذااا..
ــ و لعنه انت و عباسوه.. امش قدامي...
وفتح باب السياره جهة جاسم.. كانت سيارة علي عراوي غمارتين موديلها قديم... وقدام واسع يكفي نفرين غير السواق...
وركب عادل .. ونعاله المقطوع بعده في ايده..
جاسم : ــ هاداااويه نعالك لويه في ايدك.. ارميه انقطع خلاص ..
ــ هههههههه ميييينوووننن انتتت ووويشششو ارررميه .. هاااداا سلالالاح الحرررب,, بكره اراويه صبيان الفرررريق...
وحطه على صندوق السياره .. وصاير شكله وهو من ورى الجامه تحفه..
علي : ــ هههههههههههههههههههههههههههههههههههههه
زينب اختلعت .. اول مره تشوف علي يضحك بهالدرجه .. وابتسمت وفيها فضول على ويه هالضحك معقوله لجملة عادل..
علي مو قادر يضحك...
جاسم : ــ ووويش فيك؟؟؟
علي : ــ ياربي على عادلوه.. ذكرني يوم انا صغير .. اذا انقطع عندي نعال في شبقه .. استانس وافخر واقول قطعته على فلان.. ههههههههههههه الله يخلف على ذاك النعال تعب من كثر ما ترقع.. رحم الله ذيك ايام...

زينب ماقدرت ,, صارت تضحك على خفيف ..
جاسم : ــ بل .. خوش سلاح...

عادل سمع زينب و التفت بالسرعه عليها ..
ــ منههههييي انتين..؟؟؟
جاسم يفلصه ...
ــ استريح وتأدب..
عادل : ــ مييين هييي .. زنببببوووه اختك..؟؟
جاسم : ــ ويش عليك انت ؟؟؟
ــ ههههههههههه لاااا بببس العصصصر لاحقققتها فففي الطررريق
جاسم منقهر : ــ ومستانس ويا وجهك..
علي يهمس لجاسم.. : ــ هدي هدي .. لا شرهه عليه ..
عادل : ــ اححححللليوه اخخختك .. انننااا احببببها ..
علي بعفويه تامه صار يضحك ...
زينب فتحت عيونها مختلعه من جملة عادل .. ومقهوره من ضحك علي ابدا مو هامنه الكلام وقاعد يكركر ضحك.. ..
جاسم ضرب عادل على راسه.. وفتح له باب السياره..
ــ يللا اذلف وصلت بيتكم..
ــ ددددقققيييقه جيييب نعااااالي
جاسم يرميه عليه:
ــ خذه مالت عليك..
ــ ووووعللليييك...

علي يسكت شوي .. وفجأه ما يشوفوه الا يضحك
جاسم يطالعه على جنب : ــ على ويه الضحك؟؟
ــ خخخخخ على خبالة عادلوه..
زينب معصبه .. مصخها علي بالضحك..
وصلو البيت ونزلو ... ودخلت وهي محمقه..

جاسم دخل .. وفي الممر قبل لا يوصل للحوش ..
ــ شششوووفي ابووش هنا..؟؟؟
زينب : ــ اوووه فارقني اكيد هنا... ما تشم ريحة القدو..
ــ ياساااتر اكيد في الحوش مبسط .. استعد يا جويسم للقصف العشوائي...

دخلت زينب للحوش .. كان بيت ابو جاسم من البيوت العربيه القديمه.. الباب تالي ممر يوصل للحوش .. وحوالين الحوش الغرف ..
ــ قواك الله يبا..
ابو جاسم يشرب في القدو :
ــ هلا .. الله يقويش .. مين رجعش؟؟
ــ علي ولد عمتي
ابو جاسم :ــ لحاااالش ؟؟
ــ لا وياي جاسموه
ابو جاسم رمى قلم القدو: ــ جاسمووه .. ووينهوو..؟؟؟؟؟؟
الا بدخلة جاسم للحوش...
ما شاف الا ابوه يحبي بسرعه ويشيل نعاله ويرميه عليه..
ويتحاشى جاسم رمية النعال ..
ويحاول ابو جاسم يقوم بالسرعه .. بس وين يقوم بعد التعب في الزراعه وقاعد الحين ويا القدو.. داخ راسه وقعد ..
وينحاش جاسم غرفته ويقفل الباب
ويصير ابوه يصرخ:
ــ ايييييييييه.. مو هذا اللي ماخذينه منك.. زي البنيه تنحاش وتقفل بيبان .. يا الدلعه.. يا طايح الحظظظ,, عساك ما تربح.. حسسبي الله عليك من ولد قليل طوع و منفعه...
ام جاسم في المطبخ تسوي العشا ببرود ولا كنها تسمع.. متعوده على هالشباق..

ابو جاسم يكمل تهزأ وصريخ..
ــ احمد ربك الحين قرريب يأذن وبطلع المسجد .. يا طايح الحظ والا كان شلخت الباب عليك.... شان فيك خير روح صل صلاة ربك هناك.. لو بس فالح هياته في المزارع ما تأخرها ولا تفوتها..
وقام ابو جاسم وهو يهزأ .. وقومته حط ايده على قلبه .. وصرخ:
ــ آآآآآه قلبي .. قلبييييي..
وقعد...
وجت له ام جاسم تركض .. وزينب راحت بسرعه وهي متصروعه تجيب له ماي..



والى الملتقى :embarrest:.. مع تتمة الجزأ السادس ..

صبــــــــــــــــــــــــــاح الورد والجوري ..
خيوووه حممممممممممممممممممممممماس ،،
عسى ما يصيبهـ مكروه أبو جاسم ،،
أما عادلوه دا فلتهـ ،، ولا يستحي أحرج البنيهـ ،، لا ويقول حليووووه ،،
ويحبها بعد ،، هـ ع هـ ع يقطع إبليسهـ على هاالسوايا ،،
وحميدووو دا ،، شكلهـ داهيهـ اللهـ يستر منهـ ،،
واره شي ،، لا وشي شايد بعد ،، اللهـ يستر على علي منهـ ..
خيتووو ،،
يعطيكـ ربي ألف ألف عااااافيهـ ،،
بـ إنتظار التتمهـ < وف الحين متى بتجي بكرة الصبح ،،
سلام ياالـ غلا ،،
للدموع إحساس ..

حركااااااااااااااااااااااات

يسلمووووووووووووووو أميرووه على الجزززئين الرووووووووووووعهـ ..

ضحكتينآ هع هع

يعطيكـ ربي ألف عـآفيهـ ..

بااااااااااانتظااااااااااااااااار الساااااااااااااااااااااادس تكملته

اما الصراحة شخصية ليلى عاجبتني وااااااايد

وعلا مره مصختها الدلوعة

وريموه بعد اللي ما تستحي بكل وقاحه اتقول ابويي ما يشوف ( انتي وش عليش حتى لو انه ابوش )


يا الله ننتظر دامن اللي جاي لحميدوه اللي فيه وشم بعد يخوف شكله هههه ( لا شفتيه اي قريته هههه)




مشكورة خيتو تسلمي على الرواية روعة مثلك غناتي


نحن في الانتظار الله يصبرنا ان شاء الله

حلوووه جداا
تسلميين اموره ع الطرح
تحياااتي

مبدعة أختي أميرة المرح

حماااس .. حمستيني

يالله ننتظر الجاااي

موفقة أختي ..

_________

مشكوووره اختي اميييييره

وننتظر البقية

ههههههههههههههههههههههه
ههههههههههههههههههههههههههههههههههههههه
ماني قادرة على عادلوووووووووووووووووه موتي من الضحك


بس مسكينة زينب ههه
وعلي بعد يضحك هههههههههههه
يقهر




بس علا بصراحة شكلي ظلمتها..





يعطيك العافية خيتنا الغالية أمورة
بانتظار البارت الجديد..الجميل زي اللي قبله إن شاء الله..
موفقة لكل خير إن شاء الله تعالى..
..دمتي بعين المولى الجليل..

والله هلعادلوو فلته ولا حليوة بعد

الله يغربل شره

عسا اميرة مافيها موت لأبو جاسم اي لازم اصيحينا

ننتظر البقيه

بسم الله الرحمن الرحيم
جزئين روووعه يسلمووو إيديكِ أختييي
بس شو بيصير في أبو جسوووم ؟؟؟
ننتظر الجزء الجديد

اااااااااه .... ااااااااه قلبي:sad2:
اوف انا ماجي الا بالوقت الغلط
الحين ويش يصبرني لبكرة عشان اشوف ابو جسمان ايش صار اله
انا قلت مو قاريتها الا من سبت لسبت بس ويش اسوي فضول ذبحني
والحين بيذبحني اعرف ويش صار
شكلي بعقد صلح مع اختك بالكليه عشان هي تسرق من غرفتك وترسل الي وبكذا
انهي فضولي وفضولها:toung:
بس حسرة الحين مافيه كليه
بس الروايه الجايه مابتتنزل الا العقد موقع:wink:

امور غناتي ابداع زي كل مرة تسلمي على كل هالابداع
ربي يوفقك ويفتحها بوجهك ومن سابع سماه يرزقك
تحياتي وامنياتي لك بالتوفيق<<مدري من وين نزل الادب فجاءة

أني أتوووقع يسخر عليهم ابو جسووم عشان جاسموه يطلع من الغرفه ويطيح فيه ابوه دق
ننتظر الباقي بفارغ الصبر
يعطيك العافيه
تحياتوو

تسلم يدك امور على الروايه الروعه وعقبال ما نشوف لك كتاب في المكاتب
الله يوفقك في كتاباتك وفي حياتك يا رب
بتظار باقي الاجزاء
تحياتي

هلا خيتي أمورة
بانتظار الغد ...
موفقة لكل خير إن شاء الله تعالى..
..دمتي بعين المولى الجليل..

مرحبا
ويعطيكم الف عافيه
وربي يسلم هالطله الحلوه
والتخمينات الأحلى اللي بعضكم جابوها وصادوها << اني قايله ليهم ما قدر على تخميناتكم فلته.. :rolleyes::icon30:

واني كل يوم بيومه اكتب الجزء يعني كبرياؤووه حالها من حالكم:bleh: تنتظر متى ينزل مافي تهررريب :wink:

يعطيكم الف عافيه
نورتوني والله
تفضلو الجديد

ابو جاسم يكمل تهزأ وصريخ..
ــ احمد ربك الحين قرريب يأذن وبطلع المسجد .. يا طايح الحظ والا كان شلخت الباب عليك.... شان فيك خير روح صل صلاة ربك هناك.. لو بس فالح هياته في المزارع ما تأخرها ولا تفوتها..
وقام ابو جاسم وهو يهزأ .. وقومته حط ايده على قلبه .. وصرخ:
ــ آآآآآه قلبي .. قلبييييي..
وقعد...
وجت له ام جاسم تركض .. وزينب راحت بسرعه وهي متصروعه تجيب له ماي..


شرب الماي .. وظل شوي وهو قاعد... ام جاسم حاطه ايدها تحت رقبته .. و زينب عند ركبته قاعده ومتصروعه.. وهم خايفين عليه...

بسم الله الرحمن الرحييم,, اللهم صل على محمد وآل محمد الطيبين الطاهرين
ان الله وملائكـــــــته يصلــــــــون على النبي ......

الا ابو جاسم قايم على طوله.. وهو محمق ..
ــ سود الله وجهك من ولد .. انا قلت بتطلع .. صحيح مالت علي بس مالت على هالخلفه..
ام جاسم ماسكه كاس الماي و مفهيه .. وزينب اعظم منها..
ام جاسم بقهر : ــ ابوش قطو ابو سبعة ارواح.. تسووي حالك طايح علينا حق ووويه!!!
ابو جاسم : ــ احسديني .. انتين بعد .. احسديني .. دقيني عين واسدحيني..
ام جاسم وهي تضحك : ــ اللهم صل على محمد وآل محمد.. ملح وشبه في عين اللي ما يصلي على محمد وآل محمد.. الحين صدق صدق .. انت قلبك لو تمزح ويانا..
ابو جاسم يطلعها على جنب : ــ قلبي.. قلبي انفجر فجأه.. واعتدل ... هادويش انتوون
اهوو بس... اذان الله اذن اتمسح واروح اصلي احسن لي ..
<< شلاخ ابو جسوم ,, لا قلبه ولا شي .. بس يبغى جاسم يطلع ويصيده لكنه ما طلع وقهره زياده...
وفي الطريق للمسجد.. تقابل ويا ابو اشرف ... مع ولده اشرف يتمشو للمسجد..
ابو اشرف : ــ قواك الله ابو جاسم..
ابو جاسم كان معصب من جاسموه وما انتبه لأبو اشرف..
ابو اشرف روحه طيبه انتبه ان ابو جاسم مهو وياه.. قرب منه وكرر عليه التحيه..
ابو جاسم ابتسم : ــ اوه هلاااااا,,, ياخوك اسمح لي ما انتبهت لك..
ــ هههههههه هلا فيك داري والله حسيت عليك
اشرف : ــ قواك الله عمي..
ابو جاسم : ــ هلا .. الله يقويك ياولدي..
وكملو طريقهم للمسجد..
ابو اشرف : ــ اخبارك وعلومك .. واخبار الشغل وياك...
ابو جاسم ومبين عليه الضيق: ــ اييه.. الحمدلله على كل حال .. مستوره الله يسلمك..
ابو اشرف حس ان ابو جاسم وده يتكلم ويفضفض بس مو عارف .. حس عليه من تعابير وجهه...
ابو اشرف: ــ الحمدلله على كل حال .. خير ياخوك .؟؟. ويش فيك كل ما نشوفك الا معصب ومتضايق ؟؟ تعبان من شي ..؟؟ ابو ناصر متضايق منه في شي..؟؟
ــ لاااا ياخوك... ابو ناصر راية البيضا عليه والله....
ــ اجل ويش اللي مضايقك هاللون..؟؟
ــ تبغاها صراحه يابو اشرف.. ولدي .. الله يسلم لك ولدك
ــ خير ان شالله .. ويش فيه؟؟؟
قال له ابو جاسم عن حالة ولده وقهره فيه.. ابو اشرف رجال طيب ويسمع الكل و يسولف ويا الكل و ما يقصر ابدا..
ووصلو للمسجد..
ابو اشرف : ــ الله يكون بعونك ياخوك.. الحين ندش ونصلي على محمد وآل محمد,, وطلعتنا نكمل السالفه و عساه خير
ــ خير ان شالله << قالها ووجهه متهلل ومتأمل ..

صلاة المغرب .. هي الصلاه الوحيده اللي يصليها ابو علي في المسجد.. يروح وياه ولده علي ..

وفي البيت.. ليلى فرشت سجادتها بتصلي غرفتهم ضيقه.. والمساحه الفاضيه الوحيده كانت للصلاه.... ووراها ريما عالسرير منسدحه..
ليلى : ــ خير .. ما تقومي تصلي .. بعد ماعندش عذر..
ريما : ــ زين.. الحين...

وصلت ليلى الفرض الأول ودارت لريما لقتها غافيه عيونها..
ــ ريمووووووه قوووومي صلي ..
ريما : ــ قلنااااا لش زيييييين..
ــ فويل للمصلين.. الذين هم عن صلاتهم ساهون...
ــ ياااااربي .. ما سهيت .. فكيني .. قلت لش الحين.. وثاني شي مافي محل اصلي فيه
ــ الله اكبررر .. اتوقع ماعمرش صليتي في هالغرفه كل تصلي برى الصاله لو في غرفة الخياطه.. تسووي روحش الحين لويه بعد..!! الله عاد متى تصليها عقب ساعه .. اصلا المفروض ما اتكلم كل مره هذي حالتي وياش .. الظهرنايمه و تصليها قريب المغرب.. والمغرب تسدح وتبطح.. مافي الا الصبح في وقتها من السهر .. ياويلش من عذاب ربش..
ــ ويش فيششش انتين.. شاكه في امرش اني .. طالعه لي مصلح ديني واجتماعي.. اهوووو اقووم بس عورتي راسي .. وما خصش
ــ ايه مو النصيحه هاليومين ما يتقبلها احد وعوار راس .. وصحيح ما خصني ..
خذت ريما حرام صلاتها وطلعت برى...

وصلت ليلى فرضها الثاني وقعدت تقرى قرآن.. الا ريما رجعت ..
ليلى : ــ بل .. خلصتي .. ما شالله صاروخ... ويش هالصلاه ما تسوى ثمن
ريما بسخريه : ــ تسوى... تجيب رويد من سوق الخضره..
ــ ههههههههه استغفر الله.. صلاتش لش مو لربش .. الله الغني عن اعمالش.. والله يهديش..
ريما مهي داقه خبر.. وتنسدح على سريرها وتتغطى..
ليلى : ــ ما تبغي عشا؟؟
ــ لا ويش دعوه ويشو عشاكم.. عيش ولبن لو بقايا الغدا لو خبز وفاصوليا لو ..
ــ سكتي .. سكتي ... انثبري ونامي.. الحمدلله رب العالمين..
وطلعت ليلى من الغرفه ,, طفت الليت وسكرت الباب على اختها..

وطلعتها .. مرت على امها في غرفة الخياطه كانت تصلي .. وكانت عاطتنها ظهرها .. (( القبله.. تعطو الباب ظهركم ))
لقتها قاعده عالسجاده ورافعه ايدها.. وبهمس مبحوح.. وكأنها تصيح...
ابتسمت ليلى و عيونها غرقت دموع.. متعوده هالحركه من امها .. صلاتها تختمها بالدعاء والدموع...
راحت المطبخ تحوس.. وتجهز عشاهم...
تابع>>

علا في غرفتها.. بعد ما خلصت صلاه.. اتصلت في خالتها امل ..
امل من شافت علا المتصله.. ماردت عليها.. بعدها متضايقه منها وما تبغى تنفعل و ترجع تفتح السيره و تضايقها ..
علا حست ان امل زعلانه.. هي بكبرها مهي متحمله نفسها وحاسه انها مكتومه وتبغى تفضفض...
عمتها كانت في غرفتها.. وحتى ولو شافتها ما بتفضفض ليها..
نزلت .. راحت المطبخ لتريزا..
دخلت وخذت كاس ماي وصارت تعبيه .. بتشرب ... وبصوت هادي.
ــ تريزا....
تريزا : ــ يس ماما..
ــ اخبار بنتش ؟؟
تريزا ابتسمت: ــ الحمدلله زييين زوج مال هو يتصل ويقول واجد زين..
ــ الحمدلله..
وسكتت علا شوي..
ــ تريزا..
ــ يس ماما..
ــ سوي كيكه بكره زين ..
ــ ان شالله ماما..

وطلعت من المطبخ وفي بالها الف فكره وفكره..


وطلعة المصلين من المسجد,, تلاقى ابو اشرف مع ابو ناصر .. ووقف وياهم حجي عباس .. وصارو يسولفو ..
ابو جاسم استحى يكلم ابو اشرف .. سلم عالجماعه كان يتذكر ابو اشرف السالفه ... بس للأسف السوالف مع الجماعه نسته واشغلته.. وولده اشرف مشى عنه..
ابو جاسم خابت اماله.. و تركهم وراح وهو يضرب فكر...
وهو يمشي ما انتبه لحجر في الطريق .. تعرقل بها وطاح على ركبه...
ماشاف الا واحد يشيله..
ــ سلامات عمي .. تعوورت ؟؟؟
ابو جاسم : ــ الله يسلمك ياولدي ..
وانتبه له انه اشرف....
حاول ابو جاسم يمشي .. بس ركبه تعورت شوي .. و يحس مشيته ثقلت .. غير التفكير اللي ماكل عقله وقلبه..
اشرف حس عليه.. ــ عمي .. رجولك تعورك ؟؟
ــ لأ.. مافيني شي..
وصار ابو جاسم يتسند عالجدار وهو يمشي خطوه خطوه..
اشرف : ــ كيفا دي بعد مافيك شي ..؟؟
مسكه وسنده عليه..
ــ امش عمي .. تسند علي باوصلك بيتكم..
ابو جاسم .. من الطيحه يحس جسمه يعوره..
ــ الله يجزاك خير ياولدي..
وتسند على اشرف وصار يمشي وياه..
و هم يمشو... مر عليهم مالك بسيارته.. وفتح النافذه وبلهجه منفعله وتخفي بين طياتها سخريه:
ــ هااا .. هلااا بأبو شريف.. منهو دا ؟؟
اشرف بملل: ــ هلا فيك.. وهذا عمي ..
ابو جاسم ساكت..
مالك: ــ عمك.. مو هذا اللي يشتغل عند ابو ناصر؟؟ من وينا لوين عمك..
اشرف : ــ دام انك تعرف لويه تسأل ...
ــ استعبببط..
ــ مانى فاضي لأستعباطك.. تيسر الله ييسر لك..
ــ خخخخ لا تفضى.. نشوفك .. باي..
ــ حياك..
سكر نافذة السياره ومشى ...
ابو جاسم بتعب وابدا ما عجبه هالمخلوق : ــ منهو دا؟
ــ مالك خالد الـ....
ابو جاسم من قال له هالأسم.. انتفض جسمه...
ــ لا بارك الله فيه ولا في ابوه..
ابتسم اشرف ولا رد عليه.. لأنه معذور على هالدعوه..

ورجعت بأبو جاسم.. الذكريات للورااااء...

كان ابو جاسم هو ويا ام علي الوحيدين اخوان ما عندهم احد..
بقايا اخوتهم اللي مات من صغره من الأمراض .. واللي مات على كبر .. و ماظل الا هو واخته..

ورثو من ابوهم قطعة ارض صغيره ..
كان مبني فيها صندقه عاشو فيها وهم يهال و زراعه يترزق منها ابوهم المرحوم..
وكانت هالأرض في النص بين ارضين لجد مالك..
كان ابو حجي عبدالرحيم يشتغل في اراضي جد مالك..
و تنازل عن اجر كم سنه مقابل قطعة هالأرض اللي حوطها له جد مالك كأجر لتعبه طوال السنوات..
بنى فيها الصندقه وستر على مرته و عيش ولاده فيها.. ومن شدة ثقة ابو عبدالرحيم بجد مالك ومحبته له ما طلب لا صك للأرض ولا شيء يثبت ملكيته ليها وانها اجر تعبته وشقاه..

ومرت الأيام. 5 سنين ثمن هالأرض .. كانت تعب وشقا في مزرعة جد مالك ... لين الله اخذ امانة ام عبدالرحيم.. توفت بالكوليرا .. انتشر وقتها هالمرض وكانت من ضحاياه.. وظلو في الصندقه.. ابو عبدالرحيم و عبدالرحيم واخته ام علي...

وتقدم بعد كم سنه ابو علي وخطب ام علي .. و حس ابو عبدالرحيم بالأمان على بنته و عقبال ولده ان شالله. ولده كان من نفس جيل ابو مالك.. متقاربين في الأعمار...


لكن تجري الرياح بما لا تشتهي السفن.. توفى جد مالك..
وولده الوحيد ابو مالك ورث كل الأموال...
وفي يوم لا حاسبين ولا كاتبين فيه .. تفاجاو بأبو مالك يطالبهم بالأرض .. وانها في النص بين الأراضي .. و ما يصير كذا .. وليش ؟؟
ابوه خلاص وتوفى .. و هو ما عاد يبغى عماله من البلد .. بجيب هنود للأراضي..!!

ابو عبدالرحيم مرض.. و الهم اعتلاه.. ابو مالك يدري باللي بينه وبين ابوه المرحوم بس ينكر هالشي لأجل مصالحه..

وفي يوم ما ينساه عبدالرحيم طول حياته...
لقى رجعته من شغله ..
ابو مالك... نازل من سيارته جاي ليهم.. وقف وياه وصارو يتناقشو .. وزاد النقاش حده على هالأرض .. ووصلت بينهم للضرب ..
وصريخ .. اجبر ابو عبدالرحيم اللي كان مريض يطلع من الصندقه ويصير يصارخ عليهم يبغاهم يهونو..
ابو مالك صرخ في وجه ابو عبدالرحيم..
ــ امسك ولدك عني وهالأرض تطلعو عنها...
عبدالرحيم : ــ هالأرض ارضنا .. وما يحق لك تطردنا .. تعب ابوي وشقاه.. بتعطينا ثمن هالتعب بنخليها..
ــ أي تعب وأي شقى واي ثمن تتكلم عنه.. ليش تخليني اعيد وازيد في الموضوع..
ابغى دليل.. اثبات.. صك ملكيه ,, وينهوو؟؟
ابو عبدالرحيم وبتعب وبصوت متكسر : ــ رحمة الله على ابوك طيبته و حنيته ومعاملته الزينه كفتنا ووفتنا عن صكوك الدنيا..
ابو مالك بمنتهى الوقاحه : ــ غبي .. والا واحد في هالدنيا يتعامل بدون صكوك.. انا حتى لو المرحوم ابوي تعامل وياي بشي لازم اقيد عليه واسجل ..
ابو عبدالرحيم : ــ الله يهديك ياولدي..
ابو مالك بعصبيه: ــ ليش مجنوون انا.. و يللا برى عن هالأرض بكره باجيب ونش يشيل عفشكم كله..
وتركهم .. وابو عبدالرحيم يوصي ولده يهدي اعصابه ولا يسوي شي ...

وفي اليوم الثاني.. زاد التعب على ابو عبدالرحيم.. والصندقه مافيها اكل .. طلع عبدالرحيم يشوف له شغله.. كان يشتغل حمال بالأجر اليومي .. عند المقاولين ...يحمل اكياس الأسمنت و الخشب والطابوق ..
تابع>>>>

طلع من صباحة الله يشوف مقاول ياخذه وياه للشغل ... ولما رجع العصر .. وهو حامل كيس الخبز وبطاطس في ايده...
لقى منظر.. تفطر له قلبه...

سواها ابو مالك.. الأرض فاضيه مافي الا خشب على بعضه .. وهنود يشيلوهم في ونش...
وابوه.. قاعد و متسند على شجره في الزراعه.. حاط ايده على خده.. و سرحااان.. ولا كنه في الدنيا...

رمى الأكياس من ايده وراح له .. قعد جنبه... مو عارف ويش يقول يحس ما بيده حيله..
ضم راس ابوه لصدره.. ودموعهم بعفويه انسلت على الخدود...

الا بجية ابو مالك ,, عبدالرحيم من شافه قام له وهو حده معصب..
وصار يتهاوش وياه...
ابو مالك رجع واصر على سالفة الصك... وبصرخه منه :
ــ لا تطالبوني بشي .. تسرقو حلالي عيني عينك .... يللا شوفو ليكم محل غير هالمحل
عبدالرحيم بعصبيه :
ــ وتطلعنا حراميه يا عديم الضمير..
ــ ليش ؟؟ وانتون غير كذا.. اذا انتون غير كذا.. جيب لي الدليل ومستعد اعطيك مو بس هالأرض .. واللي جنبها بعد..


عبدالرحيم خلاص حس كل شي ضاع وانتهى ...
وصل حده.. بيهجم على ابو مالك.. بس ابو مالك قبل لا يتصرف عبدالرحيم ويسوي أي شي .. قال له وبنبره تساؤل :
ــ ابوك .. ويش فيه.. روح شوفه بس ...

التفت بسرعه الى ابوه..شافه منسدح..
راح له يركض ... لقاه مغمى عليه من التعب والصدمه.. تحسسه فيه نبض .. شاله بسرعه وين يروح اقرب محل اليهم ساعتها بيت اخته ام علي..

راح ليهم .. اختلعت ام علي .. على طول ماي و بطحو ابوهم.. وراح علي اللي كان عمره ساعتها 5 سنين ,, بيت جيرانهم كانو عندهم سياره .. يستنجدهم على شان يوصلو جده المستشفى...

ما وصل الطفل الصغير الى عتبات باب دارهم..

الا يستقبله الصريخ .. والدموع..

فارقهم جده الغالي .. وودعهم ابو عبدالرحيم..

مات بقهره وحسرته...

مرت الأيام و ام علي تحايل في اخوها يظل وياهم.. ماله احد في هالدنيا غيرها..
وصار ابو علي يعاونها على المحايل والترجي .. لين قبل يسكن عندهم فتره لين يدبر عمره..

ام علي وزوجها كانو دايما يوصو عبدالرحيم انه ينتبه لعمره ولا ياخذ ويعطي مع ابو مالك..
عبدالرحيم خلاص .. سلم امره لصاحب الأمر .. لأن فعلا ما عاد بيده حيله ولا يقدر يسوي شي بدون دليل ....

شد على عمره ومن شغله لشغله.. الى ان اشتغل في زراعة ابو ناصر و كان معاه يشتغل ابو مرته المرحوم .. الله ما عطاه الا زهراء ( ام جاسم ) ,, وكان يحبه بالمره .....و يعامله مثل ولده .. و حس فيه بالرجوله والأخلاق العاليه..

عبدالرحيم ما كان يرتاح لا ليل ولا نهار.. الى ان توفر عنده مبلغ دفعه كعربون اجار لمدة سنه.. لبيت عربي قديم .. عجبه .. وقرر يسكن فيه ويشيل الحمل عن بيت اخته...

ولما عرف عبدالرحيم ان عنده بنت .. ومهي متزوجه.. طمع بالقرب منه.. وابو زهراء ما بيحصل احسن منه رجال والنعم فيه و مافي منه..

ساعده ابو علي في مهرها .. وماطلب ابوها الكثير .. و الله تمم ليهم بخير..

سنتين بالكثير .. وفى عبدالرحيم ديونه و صار البيت ملكه و لما جى بيرجع فلوس زوج اخته اللي ساعده بهم للمهر.. رفض ابو علي وقال له هدية زواجه..

قبلهم عبدالرحيم بالموت.. خشهم و صار يجمع فوقهم كم قرش لمدة سنه.. بعدها قرر يزور بيت الله.. .. اخذ مرته وياه .. كانت لسا لا حملت ولا شي .. بس كان يحبها مره ولا حط باله لهالمووضوع ومتأمل من رب العالمين كل خير..

ورجعتهم من الحج... حملت زهراء بزينب بعدها بجاسم..... واستمرت الحياه معاها بحلوها ومرها الى يومهم هذا...

كل هالأحداث .. كانت تتسارع في خيال ابو جاسم مثل الفلم... و هو متسند على اشرف .. لين وصلو باب البيت..
اشرف : ــ وصلت عمي..
ابو جاسم : ــ يعطيك العافيه ياولدي..
ــ الله يعافيك... الا صحيح. ولو انها لقافه مني... كملتو سوالفكم انت ويا ابوي لو لا ؟؟
ابو جاسم ابتسم .. ورجعت اماله : ــ لا ياولدي .. طلعتنا من المسجد استحيت وياه الجماعه..تفضل حياك
ــ الله يحييك... تسلم برجع البيت مره ثانيه ان شالله..
اشرف يكمل كلامه بخجل من كثرة اسألته ..
ــ حجي انا باذكر ابوي بسالفتك يمكن هااا يمكن مو وعد يقدر يعين ويعاون ويدبر لجاسم شغله... ما عندك ولد غيره.. !!
ابو جاسم ملامح وجهه بان عليها الراحه : ــ تسلم الله يخليك لأهلك ويبلغهم فيك ويحفظ شبابك .. لا يابوك ما عندي الا هالجاسموه .. وزينب بتي اكبر منه..

اشرف : ــ الله يحفظهم ان شالله..

مامداه ابو جاسم بيفتح باب بيتهم..
الا ......
الى الملتقى....

صابت توقعاتكم ..

يالله أختي ننتظر جديدك

ماشاء الله عليك مبدعة

________

صبـــــــــــــــــــــــاح الخير ،،
يا علي أبو جاسم ،، ضحكني ،، أني خفت عليهـ صدق ،،
اللهـ يسامحهـ ،، لكن فكرتهـ جهنميهـ ـ،،
وهذا أبو مالكـ اللهـ لا يسامحهـ ولا يحللهـ ،، < أندمجت ،، خخخخخخخخخ
لكن حرام عليهـ الظالم ،، ما يخاف من ربهـ ،،
جزء اليوم مؤثر ،، بصراحهـ ،، كسر خاطري أبو جاسم ،،
غربل اللهـ ولده جاسموووه ،،
واللهـ يسلم أشرف ،، خوش ولد ،،
هذا إلي يحز في النفس لما تشوف أولاد الناس تحن عليكـ أكثر من ظناكـ ،،
ساعد اللهـ قلبكـ يا عبد الرحيم ..
أممممممم أتوقع أن بيصادف جسوووم ولده طالع ،، شي كدا ،،
خيووه يعطيكـ ربي ألف عااااافيهـ ،،،
وبـ إنتظار البقيهـ ،،
تحيااااااااااااااتي ..
للدموع إحساس ,,

شكله ابو جاسم داهية عليه افكار

اما دا ابو مالك قهرني



يسلموووو اميره
و
ننتظر البقية

تحياتي

بصراحة طلع أبو مالك حرامي ومو هين..
أما أبو جاسم طلع خرااااااااااااااااااااط عدل هههههههههههه ولاحس هالولد بشي ..
ماشاء الله عليك أميرة
عندك قدرة على ربط الأمور مع بعضها..

أما هذي علا شكلها طلبت الكيكة وبتوديها لليلى تراضيها يمكن؟؟؟؟؟؟؟؟؟؟؟؟؟؟؟؟؟؟؟؟؟؟؟؟


موفقة خيتي أميرة لكل خير إن شاءالله تعالى..
..دمتي بعين المولى الجليل..

يسلمو امورة علجزء

واني توقعي بعد علا بتودي الكيكة الي ليلي

ننتظر البقية

تسلمييي امورة ع الاجزاء الحلوة لاعدمنا جديك وبنتظار التكملهـ
..}{..تحيـــــــــــــــاتيـ..}{..

هههههههههههـ .. مآشاء الله عليي اصبت الهدف هلمره ..
توقعي في محله <<مصدقه حالها بقووه
أبو مالك طلع حووومار <<<استغفر الله اسب الرجال <<<يستاااهل
تصقعه الحرامي دويش ده .. ظالم ..
التوقع..
بيطلع في وجهه جاسمووه وبيطيح فيه سب وبيهدر عليه ماشغلتك الا لمداوور ووو....الخ
المهم بس مادري بدقه او لآ واتوقع شريف بيشوف ابو جاسم وهوه طايح سب في ولده..
وبس <<<بحصل كفوف هلمره عفر..
تسلميين قلبووه
ننتظر..
تحياتو

مرحبا

لا عدمت هالنور يارب.. وهالتعليقات اللي تصيب مره وتخيب مره..:rolleyes:
هههههههههههه فديتكم والله.. هالمره تخميناتكم مو كلها صحيحه بعد.. فيها شيء من الصحه..:wink:

تفضلو الجديد

الحلقة السابعه...

مامداه ابو جاسم بيفتح باب بيتهم..
الا بطلعة جسوم...
من شاف ابوه انصرع.. ابو جاسم فيه حره يبغى يصيده .. ويكسر راسه بس استحى من اشرف ..
جاسم بغاها فرصه...
طلع بهدووء سلم على اشرف ومشيو ثنينهم
ابو جاسم دخل وكفخ باب الحديد وراه...
ام جاسم صرخت : ــ وخناقه ..ما يصك الباب بهداوه
ابو جاسم : ــ تخنقني وارتاح من هالهم..
ــ وي هذا انت.. مادريت بك فكرت جاسموه اللي كفخ الباب..
ــ ياليته انكفخ عليه.. ذلف الفاشل مادري وينا راح..
ام جاسم مستغربه : ــ وشلوون ماتدري .. غررريبه خليته يروح ..
ــ كان وياي واحد لأنه.. ماعرفت اتصرف
ــ منهو؟؟
ــ اهووووو تحقيق هو تحقيق.. قومي بس جييبي عشاي و تالي جيبي لي مرهم و امرخي رجولي متكسر تكسر...
ــ ان شالله

جاسموه راح لحميد في صندقته... ودخلته ..
حميد : ــ صك الباب عدل لا يهجم عادلوه ويفضحنا...
وقفل جاسم الصندقه...

وعلى سفرة العشا... ابو علي :
ــ اخبار الحداق وياك ياولدي في هالشتا..
ــ الحمدلله ماشي حاله..
ــ الحمدلله....
ام علي : ــ عساني بالغه فيك معرس يارب ما تخلص هالسنه ويجي ربيع الا خاطبين لك..
علي بعفويه : ــ ههه يارب ..بعد عمر طويل
ام علي بخيبة امل : ــ لويش ياولدي..
علي سكت ..
ام علي : ــ ايييه ياولدي لو تبغى ,, البنيه موجوده مافي منها .. بس انت الله يهديك مره شايل الموضوع من راسك.. ياولدي نبغى نفرح فيك ونشيل ولادك ..
علي صار ينتف في الخبزه قطع صغيره ومهو حاس..

ليلى انتبهت عليه .. عرفت اخوها متوتر .. هذي حالته اذا توتر وفي ايده شي ينتفه تنتيف ..
ليلى همست لأمها : ــ خلاص اماه..
ام علي ردت عليها بصوت مسموع: ــ ويش اللي خلاص انتين بعد.. ولدي وابغى افرح به..
علي قام من السفره..
ــ الحمدلله
ابو علي : ــ وين ياولدي ما مداك..
ــ لا بس خلاص فيه العافيه...
ام علي تضايقت : ــ انا لله.. صاير هالطاري كنه عزرائيل على قلبه.. بسم الله عليه وعساه سالم..
ابو علي : ــ وانتين يا مَرَه ما تدوري تحني عليه وتفتحي له مواضيع تحسيه ما يقدر عليها الا حزة الأكل
ام علي بغصه: ــ لويش متى اشوفه اني .. على شان اكلمه ...
ــ انا لله .. الله كريم ويغير الحال...

عباس ياعيوني.. ترضى يذلوني .. وللشام يهدووني...
عندك يا بو فاضل يا خوي أشتكي حالي
حرمة بلا والي والشمر يبرالي

واليحدي لي الناقةزجر عباس يا عيوني
ترضى يذلوني وللشاميهدوني..

على هذيك اللوحه.. ومع مشاركة باسم الحزن في ذيك القصيده...
لاازالت الفرشاه تمر .. احيانا بخفه .. واحيانا بقوه ..
كانت لوحة علا العاشوريه .. شغلها الشاغل واللي ماخذ اغلب وقتها .. ركزت فيها بالقوه على مصيبة ابي الفضل العباس سلام الله عليه..

الا بدخلة خالتها سميره
علا اختلعت.. ويش جيبها ..؟؟ حست عليها ... انها متضايقه!!!
سميره: ــ ممكن تقصري عالصوت شوي.. ابغى انام... بعد شتا لا مكيفات ولا شي ..
علا بهدوء : ــ ان شالله..
سكرت سميره الباب.. وقصرت علا الصوت.. وبلا شعور عيونها غرقت دموع.. وقعدت تصيح...كانت محتاجه تتكلم وفرحت لما شافت عمتها بس خابت امالها للأسف..

وفي بيت حجي عباس .. حجي عباس ماسك ريموت التلفزيون.. الا ما يشتغل ..
لقاه مافيه بطاريه.. ويصرخ:
ــ عصموووووووووه وين البتري لا بارك الله لا فيش ولا في ولدش
جت ام عادل تركض : ــ مادري به.. وويش دخل ولدي..
ــ ماحد غيره .. شاله وضيعه ..
ــ ما لمسه اصلا..
ــ اهوو لا تجادلي وياي.. بسرعه جيبي لي بتري ..
راحت ام عادل تدور لقت قديمين مستخدمين..
ــ هذا اللي حصلته…
عادلوه طلع من غرفته..
ــ ابغى افففلالالالاام كرررتون .. حطط ليي..
ــ بتقوم لا العن ابو خامسك.. مافي بطاريه الرموت ابغى اشوف اخبار الأسهم... وجاي لي تبغى افلام كرتون.. طس .. انقلع..فَلَمْ الله راسك…

ويحط حجي عباس البطاريات في الرموت .. طلعو ضعيفين وما يصلحو..
طلعهم ويصير يعض فيهم..
عادل قام يضحك : ــ اممااااه ططللعي عببباسسسوه صصااارر ميننوون ييااااككل بتاااري..
عباس حمق عليه : ــ انا مينون ها.. وعباسوه بعد.. ما بتوب..
ويمسك البتري ويرميه عليه.. ويصفقه في عيونه وتتورم ويصير عادل يدحن في الصاله ويصارخ ويصيح..
امه خافت عليه قامت تركض له.. مسكته تهدي فيه وهو يزيد بالصريخ..
عباس حس بالخوف شكل الضربه قويه .. واثرت على عيونه..
ما بين خوفه . وقام :
ــ لا بارك الله فيكم … تقصرو العمر..
دخل غرفته وسكر الباب..
ام عادل صارت تصيح : ــ انتقم الله من الظالم.. والا هذا يشرهوو عليه ويحطو دوبهم من دوبه..
وراحت تجيب ثلج وكمادات ماي بارد حق عيون ولدها..

الساعه 11 الليل ..
علي يتقلب مو جاينه نوم... ويحس روحه مخنوق... قام وطلع من البيت..
صار يتمشى وكان الجو باارد.. نص ساعه وهو يمشي .. وصل للبحر..لقى صندقة حميد ظلمه من برى .. اكيد نايم.. صار يتمشى عالساحل رايح وجاي وظل ساعتين على هالحال …. ووخر عن الصندقه مسافه..
وشوي برقت السما … وانذرت بالمطر… وبدى يطيح قطره .. قطره وشوي زاد .. علي ماكان ماخذ احتياطه طلع بدون وعي اصلا للجو حتى..

رجع يركض لصندقة حميد لا يزيد المطر و يغربله.. وهو راجع تفاجأ بها مضويه .. و لما وصل البحر من شي كم ساعه كانت ظلمه…

تطمن انه مابيقعد حميد وهيك احسن له .. الباب ماكان مسكر عدل بس طقه انفتح على طول ..

ويطفرو حميد وجاسموه بصرخه مختلعين منه .. دقو السقف من قوتها..
علي منصرع وفاتح عيونه حدها :
ــ ووووووووووويييييش تسوووووو!!!!!!!! ولووويه جاسموووه هنااا هالحزززززه…
حميد انخطف لونه و صار كلامه يتقطع.. : ــ و و وو والله م م مااااشششي..
علي خلاص دمه وصل لراسه.. ومسك حميد من كلر ثوبه ويسحبه لدرجة انشق من قوة السحب…
ــ ووووووويش تسوووووو .. توها الصندقه ظلمه .. وانت وياه .. وهالحزه يا كلاب يا يا يا…
حميد ضم اصابع كفه : ــ صبرررر.. صبر.. افهمممك شووي شوووي علينا منت فاهم الممموووضضوع
ــ يبغى ليها فهم بعد.. يبغى ليهاااااا…. !!!!! بتتكلم لو ويش .. جاسموووووه..
جاسم يبلع ريقه : ــ ههااااا.. مممااالي شغل انا.. حميدوو راعي البلاوي
حميد التفت له وهو منذهل :ــ الحين قطيت البلا كله علي .. ليش انت كنت منت محتاج.. !!

تابع>>

علي خلاص ولع حده من القهر .. ويطيح في حميد دست .. وحميد يصرخ ..
ــ والله منت فاهم ولا اللي في بالك..

علي خلاص شياطين الدنيا تراقص فوق راسه..
ويرفع حميد ويشدخ به على رفوف مسونهم في صندقته ومغطنهم بكنبل ..
من شدخه عليهم.. طاحت الرفوف باللي فيها فوقه…
وطلعت بلاوي .. 3 راديوات .. دي في دي.. و جوال ....
علي قعد على ركبه وصار يشيل فيهم واحد واحد ويقلبهم..
ــ ويشوو هذيلا..!!
حميد يوخر الكنبل و يدلك جبهته تورمت.. وبقهر:
ــ هذا اللي كنا نسويه.. !!
علي منذهل ومو فاهم.. وطالع في جاسم اللي استوى كركم من الخوف :
ــ تسوو ويه.. !!
حميد : ــ ياخوك خلاص كشفتنا انت.. هذا حصاد الليله..
علي فتح عيونه: ــ تبووقووو …. حررراااميه!!!!
جاسم يطالع في الأرض…
علي ماسك راديو ويرميه على حميد.. حميد يتلقاه ويصرخ:
ــ كسرتنا حنا....بعد هذا لا تكسرررررره…
ــ كسر الله راسك بلى عساه يتكسر
علي يشيل الجوال من على الأرض ويرميه على جاسم ويقوم له..
حميد يمسكه : ــ خلاص وايد ... لاتكفخ ..
علي : ــ هدني عليه لا اشيلك وارميك عليه.. الله ياخذك من ولد... يا حيوان .. ابوك ناقص هم وبلاوي .. حسبي الله عليك يا فاشل ..
جاسم صرخ : ــ ابووي .. ويشوو ابوووي .. كني ياهل يعاملني .. وكل يطق فيني .. شغل .. تعبت وانا ادور شغل .. ما يبغو جامعيين يبغوني …!! ويش اسوي .. من ادخل البيت ما اسلم منه ومن الهدره.. رجال ورجال و طايح حظ .. وكل مسوني عاله عليه… هذاني الحين بشتغل وبصرف على روحي ..
علي بحمق : ــ تصرف على روحك. والمرجله تبوق ياحمار. من حرام يا زفت.. صحيح انك ما تستحي .. وبقوة عين بعد تقولها اشتغل حالك حالي روح وياي احدق عاون ابوك في الأرض والا هالشغلات مهي على مستواك يا زفت .. سود الله وجهك…
جاسم سكووت ولا رد..
حميد : ــ خلاص لا يجينا احد على هالصرريخ
علي يدور عليه : ــ وسود الله وجهك انت بعد
حميد : بل ناقص هو ..
ــ تستاهل الله ما سوده الا من فعايلك الشينه.. ياحيف معرفتي بك يا فاشل .. من متى وانت كذا..
حميد بحزن : ــ ويش اسوووي .. حالتي مهي حاله.. لمتى وانا عايش بهالصندقه هااا… وبعدين لا تظلمني .. ماصار لي كم شهر.. والله مو من اول ما عرفتني..
ــ كم شهر ها.. كم شهر . وانا اقول منت على بعضك دي كم يوم .. الا من سهر الليالي .. وانا اقووول كلما طق باب هالصندقه تروعت لينا … الا من فعايلك الشينه.. وآخر بوقه قويه ليكم اللي سمعنا عنها والفريق كله يتكلم عليها.. في مزرعة ابو ناصر صح....
حميد ابتسم بأسى : ــ ايه.. بالأشتراك مع جسوم ولد خالك وكم واحد ..خخخخ بس ويش رايك؟؟
علي : ــ آآه يا قليل الحيا يا جاسموه… وكم واحد بعد.. مسوين ليكم جماعه..
خمه وربي .. ولا تقول البعير اللي جانا السوق هذاك اليوم وياكم مجرم..!!
حميد بهمس : ــ هو اللي يشتري مني اللي نبوقهم ..
ويسطر علي حميد كف على وجهه ..
ــ طراد.. طراد يا كذاب .. توني اعرفك .. افا بس ..

حميد : ــ تراك مصختها وياي .. اي حركه ثانيه منك لا تلوم الا حالك..
ــ يعني ويش بتسوي مع هالوجه..
ــ بتصرف تصرف يخليك تندم على كل هاللي سويته فيني..
ــ لا .. احلف عاد.. تشيه مفكرني بسكت عنك .. ما بيطلع الصبح الا مبلغ عنك
ــ بلغ باللي مايردك.. ما بتقدر علي .. اتقي شري احسن لك .. وخلك في حالك وخلني محترم عشرتنا,,, ولا كأنك شفت شي .. ويا دار ما دخلش شر..
ــ لاااا .. ناوي اذبحك الليله وادفنك في صندقتك.. لا بارك الله لا فيك ولا في عشرتي لك..
ــ علوووه.. انا ما ابغى ااذيك.. فخلك في حالك احسن لك..
ــ تهدد ويا وجهك…انا الحين بهدي اعصابي وما بسووي فيك شي .. بس بكره نومتك انت ويا هالكلب اللي وياك في الحجز .. وبتشوف
جاسم صار يصيح: ــ خلاص .. تكفى.. على شان خالك ..
ــ تخلخلت ضلوعك.. انت بتموته اصلا .. اللي يسمع مستفيد منك.. ولي عني ..
حميد بقهر : ــ اطلللع برى… واللي ما توصله بيدك .. اوصله برجولك.. يللا مقفاك فارق..
علي بعصبيه: ــ هين .. اراويكم.. ماعليه..

المطر يطيح بغزاره وبرد شديد.... وعلي طلع وهو حمقان ومعصب .. وابدا مو حاس بالجو وبرودته من شدة القهر …
وصل البيت مع اذان الفجر.. ودخلته .. تلقته ريما اخته كانت سهرانه..
اختلعت.. ويش اللي طلعه في هالجو وليش حالته كذا…
ــ علي ,, ويش فيك ,, و من وين جاي؟؟؟
علي منقهر : ــ مافيني شي ,, مافيني ..
دخل الحمام بدل ثيابه تمسح .... ودخل المجلس كان يفرش فيه منامه.. وسكر الباب..

ريما خافت على اخوها .. فيه شي .. شكله متهاوش .. مو طبيعي…
شوي الا بقعدة ليلى… ركضت ليها بسرعه وعلمتها …
ليلى اختلعت.. وراحت المجلس طقت الباب مارد عليها ولا فتح..
قالت يمكن يصلي .. حركت عروة الباب طلع مقفل…
خافت .. : ــ ويش صاير بالضبط ؟؟
ريما : ــ والله مادري بس شكله مو طبييعي لما شفته…

دقايق انفتح باب غرفة امهم وابوهم قعدو للصلاه.. ليلى تهمس لريما خلها الليله تعدي على خير وما تقول ليهم شي ولا تبين ليهم لا يختلعو ولا ينامو ويصيرو يحاتو ....
علي ما نام طول الوقت يقلب الفكر و يحس مخه متشنج وصداع مو طبيعي..

الساعه 10 الصباح.. جرس بيت ابو علي .. يطق..

الى الملتقى..

واسمحو لي على القصور من اليوم الى يوم الأربعاء .. عندي ظروف طارئه والله وتمنعني اني اطول الأجزاء .. واحتمال أأجل جزء واعوضه يوم الخميس .:embarrest:. دعاكم حبايبي..:amuse:

الجزء مـــــرررره حمــــــاااااس ،، و رووووووعه
الله يعطيش العافيه و يسهل امووووورش يا كريم
ننتظر تكملة الجزء على احرررر من الجمررر

...


... مــشكوره خــيوهـ ..

.. على الجزء الروعــه ..

.. ولا عدمـناكِ ..

.. تـحياتـيــ ..

يسلمو امووور علي الجزء الاكشن

انا اتوقع انه ابو جسم يسأل عن ولده او هده جاسم يترجئ علي لا يبلغ عنه

الله يوفقك وبنتظارك