ضعنا يا صبرنا...

كًأأأنهـ بآآآآآآآقـ ي شـ ـؤوي وأذّن
لحين ماجابو الفلم
<< شكله قيد الانشاء
بالانتظار خيتو على احر من النعس

كيفيش خيتو وكل عام وانت بخير
شكل القصه روعه كاالقصتين السابقتين
ان شاء الله اقراها في اقرب فرصه
وانتي ماغلطتي ولاشي اخذتي حقش بايدش
وموفقه لكل خير
تحياتي
اختك زهرة

مرحبا
يعطيكم الف عافيه
وتسلمو على الراي والوقفه .. لا عدمتكم..
خيو الناري.. كلامك صحيح.. بس مين اللي شفته استأذن..؟؟؟
ولا احد.. !!
تجيني اخبار النقل صفعات.. الحين ذكرو منقول .. اما اول روايه لي صدت واحد ماذكر منقول وعلى انها له يعني سرقه ادبيه بحته.. بس ويش تقول .. بيني وبينهم الصراط يوم القيامه.. والله حسيب..
زهرة القلوب.. ياهلا بهالطله نورتي ان شالله تعجبش مثل اللي سبقوها..
وتركيز اكثر ياجماعه
الجوال اللي يرن كان لعلي لما تضايق من ريما وسكر عليه الباب .. مو لأشرف..

وعذرا على الغلط المطبعي في اخر الجزء تم تعديله مع بداية هالجزء..

تفضلوو.. وعذرا عالتأخير << نامت و توها قاعده :toung::embarrest:..

الحلقة 42



على منامه .. جواله .. كان يولع ويطفي .. يعني مكالمه او رساله
راح له.. لقى مكالمه من رقم غريب .. وشوي رساله فتحها... وقعد يقراها ...
وهو منصرع... وقعد على منامه .... وعلى طول اتصل بالرقم...

رد عليه مصري..
ــ ايوا..
علي بأستغراب:
ــ مين معاي..؟؟
المصري:
ــ اهلا .. معاك الدكتور محمد .. انت علي؟؟
علي : ــ ايه... ويش صاير اشوف رساله عرفت انها من شخص اعرفه ويش السالفه..
ــ تأدر تقي مستشفى الـ... اصل امجد متنوم عندنا وعاوز يشوفك..
ــ خير ان شالله.. عساه خير...

سكر علي وفي باله مليون الف سؤال... ياترى حميد من متى في المستشفى .. والحين ويش فيه هل حالته رجعت .. وويش يبغى منه .. و و...

قطع هالتفكير صوت بابه يطق ... دخلت ليلى....
ــ ويش فيك ياخوي هربت لهالمجلس...
ــ من اختش وهدرتها الفاضيه..
ــ ايه سمعتها اني..
وقعدت جنبه وبهداوه..
ــ صارحني غناتي.. انت ماتبغى زينب.. ما هي في بالك... البنيه مانبغاها تفكر فيك زياده.. علمني ريح روحك وريحها..
علي بتوتر:
ــ بالصراحه.. ايه.. مابغاها.. بس ساكت على شان امي و خالي .. وكل مره اقول الله يحين اليوم اللي ما بسكت فيه وباقول .. بس مانا عارف .. خصوصا انكم مصورين لي انها متعلقه فيني .. والله زينب مافيها عيب .. بنيه اخلاق وذوق و فوق هذا جمال.. بس انا احس نفسي اخوها .. مانا حاطنها في بالي زوجه الله يوفقها ويسعدها مع غيري.. مو عارف ويش اقول .. وخايف لا اجرح مشاعرها ..
ليلى ./
ــ لا ياخوي هذا حقك مافي شي غصب.. وزينب خليها علي اعرف ليها.. والله ان شاء بيوفقها ويا ولد الحلال اللي يسعدها...
ــ يارب ياكريم.
ــ مممممم فيك شي غير سالفة زينب.. اسمح لي يعني قبل لا ادخل سمعتك وانت تكلم جوال .. ويش صاير .. اذا ما يضايقك اعرف ..؟؟
ــ لااا شدعوه غناتي انتين الغاليه و اللي مالي غيرها تسمعني..
وبخوف وقلق..
ــ حميد.. سالفته سالفه..
ليلى بدون شي ما تطيقه بعد من درت به سبب رمية اخوها بالحبوس زادت عليه..
ــ ويش فيه دا بعد..؟؟
علي شارد ذهنه..
ــ اقول لش سااالفته سالفه.. بالمستشفى الحين هو ويبغى يشوفني..
ــ ياساتر ويش فيه..؟؟
ــ تدري انا بنفجر باقول لش سالفته كلها..
ــ سلامتك ياخوي .. فضفض قول..
وصار يقص ليها قصة حميد من اولها....



ام علي ..
ــ وين اختش واخوش..؟؟
ريما :
ــ وينا بعد في المجلس .. مسوين اجتماع مغلق..
ــ هههههههه يالله تحفظهم وتخليهم لبعض
ريما بدلع:
ــ وتخلييني لو بت البطه السودا..؟؟؟
ــ ههههههههه .. استحي مو اني بطه سودا.. ولا يهمش ويخليش ويهديش..
ــ كافره!!
ــ يؤ استغفر الله تشيه الهدايه بس للكفار..
ابو علي قاعد يعض في البطاريه حقت الريموت:
ــ اهوو تركيها عنش وتعالي شوفي لي بتري غير هالبتري تكسرت ضروسي ولا هو راضي يشتغل
ام علي وهي تدور بطاريه :
ــ الا مين المتصل مكحين؟؟
ريما:
ــ ايه صح.. ساره متصله تعزمنا على العشا جلسة بنات ليلة الجمعه.. وتالي علا بتجي الليله بتزورنا..
ام علي:
ــ حلاوتهم هالبنات .. يالله تحرسهم وترفع حظهم..
ريما : ــ تشيه طايح؟؟
ابو علي:
ــ هههههههههه ويش عرفش .. دي للي مو متزوجات هالدعوه..
ريما : ــ يعني الرجل يرفع الحظ...؟؟
ام علي :
ــ ياربي بتقعد تحقق في هالدعوه لبكره.. خلاص اسحبها ..
ريما : ــ ههههههه احسن لأنها مادخلت مزاجي..
ابو علي:
ــ ياساتر على مزاجش... يللاااا يا ام علي وين البطاريه
ام علي في ايدها ثنتين:
ــ حصلت ثنتين جرب
جربهم ما اشتغلو..
ابو علي محمق:
ــ اهوووو روحي اسلقيهم
ريما تسخر:
ــ بجينا تسمم الصفاري كلها بطاريات
ابو علي يضحك وبسخريه اعظم منها:
ــ بلاش ماتدري امش مخصصه صفريه بس لسلاق البتاري
ريما : ــ هههههههههههههههههه ابووو البطررر
ام علي : ــ ويش مفكررره اجل...

تابع>>

عادل :
ــ امماااااه .. نعاااالي
ام عادل تخيط سروال عادل المنشق:
ــ ويش فيه بعد .. ياربي ماني عارفه شيفا ارقع لك هالسروال
عصبت ام عادل وشقته زياده..
ــ خله بيز امش فيه الزيوت في المطبخ..
عادل شهق شهقه..
ــ ووووووووووووووووويلي سررررواااالي .. واااسروااالااااه
ام عادل فتحت عيونها..
ــ وااكفاااه .. وااادستاااه.. استح على وجهك واعقل..
ــ ههههههههههه نعععااالي خيطيييه..
ام عادل بأستياء:
ــ خراز قالو لك اخيطه.. روح لا اساطر بك.. ويش فيه بعد..؟؟؟
ــ شوووفيه فااااتتتح بوووزه..
ــ هههههههههههه غربال... ارميه وبكره اشتري لك جديد..
ــ وووويش يصصصبرررني لبكررره تبغيييني ما اطلللع لا المغرررب ولا اللليييل..
ــ اركد شوي وايد عليك طفرات..
ــ اوووووووف .. اففففااادي بصصصصاااالللوووونه
ام عادل بأستغراب:
ــ ياسااتر .. توك متغدي ويش جيبها على بالك..
ــ افففاااادي فيييهااااااااااا
ــ ياعلي .. اشك في بطنك دود.. بلع بلع ولا انت راضي تتغير..
ــ احسسسديييني
ــ هههههههههههه ويولوموني فيك...
عادل يكمل الجمله بهدوء وانكسار..
ــ ويقققوولوو مينننووون وما افهههم..
ام عادل عورها قلبها على ولدها..
ــ وعلى قلبي امي.. سيد الفاهمين انت .. الله لا يحرمني منك.. الفلاجه فيها صفريه صغيره فيها صالونه اصخنها لك ولا يهمك..

صختها له وحطتها في طاسه ويا الخبز
وهو يطالع تلفزيون... ما سمعته الا يتغزل في الطاسه..
ــ طاااسه.. بطاااااطسه فيها غطااااااسه.. ولححححمتووون .. كوسااايتووون .. امااااااااه مافي ابو العبييييييد << يقصد الباذنجان..
ام عادل تفهم لولدها :
ــ خلص ياولدي..
ــ اووهوووووووو احبه اناااا.. افففففف.. خساااااااره...

شوي رفع الطاسه وصار يشرب..
ام عادل:
ــ خنااقه تشيه شوربه..
ــ اككككككلت ككل الخضررره باقي المرررق ..
ــ ويلي على بطنك ويلي ..
ــ اررروح الحمااام وخلللصصصت السااالفه
ــ ههههههههه غربال..


ليلى :
ــ يالله.. قالت لي زينب ..و ماصدقت.. كل هذا صار له وساكت كل هالسنين.. الله عالظالم.. ماني قادره اتصور..
ــ زينب اكيد جاسموه قال ليها... شفتي ياخيه.. انا كاسر خاطري بنفس الوقت الومه.. مو عارف اوصف مشاعري ناحيته..
ــ دنيا قاسيه.. والأقسى انه يطلع من البذر الخبيث ثمر طيب يعاني ويقاسي دعاوي الناس وكرههم وياخوفي تطلع فيهم الحوبه..
علي مو فاهم..
ــ مين تقصدي؟؟
ــ ايه ياخوي.. ولاد ابو مالك.. مافي منهم.. مالك وعلا وقفو ويانا وقفه وانت غايب مايوقفها أي واحد.. وماقصرو..
ــ والله !!
ــ ايه وربي يشهد.. وحتى الحين مرت ابوهم خوش انسانه.. الله عامي على قلب ابو مالك ياليت لو ينهدي ويتغير حاله..
ــ لو بيتغير تغير ..
ــ انك لا تهدي من احببت ولكن الله يهدي من يشاء..
ــ والنعم بالله.. المهم ياخيه باقوم الحين ببدل وباروح اشوف حميد واخباره وويش فيه بالضبط..
ــ خير ان شالله.. رجعتك لينا جيب وياك عصير بتجي الليله علا..
ــ ان شالله.. ذكريني لكن يمكن انسى..
ــ زين..


علا تكلم امل جوال:
ــ اخباااركم وحشتووووووووني ويش مسوي سجاد..؟؟
امل في امريكا:
ــ الحمدلله انتون اكثر .. هذا احنا نخلص اجراءات وتحاليل وان شالله كم يوم ويقررو موعد العمليه وعساه خير..
ــ ياارب خيرر تسلم عليش سوسن ..
ــ الله يسلمش وياها من الشر سلمي عليها انتين بعد
ــ يووصل .. يللا مع السلامه و سلمي على حسين وعلى سجادي..
ــ يوصل غناتي.. الله يسلمش..

سكرت علا ..
والتفت على سوسن لقتها غافيه.. تنهدت وفي بالها..
ــ ربي مايحرمني منش ويسهل عليش..
الا جوال سوسن يرن .. وكان صامت...
انتبهت علا لقته هشام..
مكالمه.. مكالمتين .. ثلاث..
شوي رن جوالها في ايدها.. طلعت به بالسرعه من الغرفه لا تقعد سوسن.. الا هو هشام..
علا في بالها:
ــ ويش فيه هذا.. لويه متصل .. ياربي كنه مصخها..!!
قفلت في وجهه
..هشام انصرع..
ــ ياربي ويش فيها اختي ودي كل ما تعطيني وجه ويش مسوي ليها..
شوي صار يفكر في باله..
ــ كني مصختها.. بس والله مو قصدي خايف على اختي ومين اللي يطمني عليها..
ابليس يلعب في راسه..
ــ بس بعد تبغى تسمع صوت علا .. وتسأل عن اخبارها.. لا تنكر..
صار يتعوذ من الشيطان.. فتح رساله جديده وكتب..
ــ اسف على الأزعاج خيه بس ويش فيها سوسن ماترد هوستني عليها متصل ابغاها اذا هي وياش..
وارسل الرساله..
علا في الصاله قعدت ويا عمتها سميره.. الا بالرساله جايه..
سميره تطالع في علا انتبهت ليها وهي نازله من الدرج جوالها يرن وتالي سكت شكلها عطت المتصل بزي والحين رساله.. وملامح علا مهي طبيعيه وهي تقراها.. وصارت ترد على الرساله..
ــ ياهلا ياخوي.. سوسن مافيها الا العافيه بس نايمه وجوالها صامت..
ورسلت له...
سميره بدت تضرب شكوك وبليس يلعب في راسها..
ــ الله يستر منش ياعلوه ويش وراش ..؟؟ وويش سر هالمكالمات وهالرسايل..
علا حطت جوالها على الكنب وقامت..
ــ باسوي لي عصير ليمون تبغي اعصر لش وياي..
سميره ماتبغى بس تبغى علا تطول لغايه في نفسها:
ــ ايه سوي لي..
راحت علا المطبخ بتسوي..
سميره خطفت الجوال بتفتحه تشوف ..
الا عليه قفل وكلمة مرور..
سميره بقهر:
ــ لاااااااا السالفه فيها ان.. لويه قفل بعد.. هين ياعلا .. ابوش يبغى له يتصرف وياش قبل لا تكبر السالفه... وتسوي لينا فضايح..

ام مؤيد..
ــ ياولدي فكر.. عندك هالشهر صفر الحرام .. اول ربيع بنروح نخطبها لك..
ــ اماااه مو جاي على بالي وكل مره تجيبو لي وحده ورايي واحد ما اغيره..
ساره:
ــ دي ياخوي غيرهم كلهم.. دي ظروفها زي ظروفك.. انت فقدت مرتك.. هي فقدت خطيبها.. ثنينكم بتفهمو مشاعر بعض ومتأكده بتحبو بعض.. ليلى مافي منها .. بنيه اخلاق وذوق والتزام .. ونعومه وشطاره .. ربة بيت و عقل .. والله ما تتعوض ولا تتلاقى بسهوله..
مؤيد ساكت..
ام مؤيد..
ــ هي بتجي يوم الخميس ويا اختها .. قلنا ليهم عزومة بنات على شان لا يستحو.. بنخلي ليلى في المجلس شوي لحالها ويا اختك وباخذ اختها وياي دقايق .. شوفها من النافذه نظره شرعيه ..
مؤيد فتح عيونه:
ــ تشيه حرااامي..!! مو حراام؟؟
ــ لا ياولدي مو حرام.. اذا نيتك خطوبه مو شي ثاني.. بس طله احسن من تالي ماتعجبك اذا شفتها وهي تدري وتجرحها بتغيير رايك..
مؤيد: ــ مابغى اشوف شي .. ولا شي .. وخلوني بحالي..
ام مؤيد صارت تصيح:
ــ على شان خاطري.. خليني افرح فيك.. ياولدي ماعندي غيرك سند بهالدنيا.. والبنيه مايعيبها شي .. فكر داخله عليك بالله ومحمد وعلي..
ــ يااااااعلي امااه.. تجبريني بهالكلام اسوي شي فوق طاقتي
ساره:
ــ لافوق طاقتك ولا شي.. فكر ياخوي.. هذي مو زي البنات اللي تلاقيهم لك ناديه.. ناديه يهمها الشكل اكثر من الجوهر .. وربي مابتندم .. بس فكر..
مؤيد يبغى يغير السالفه:
ــ الا ويش اخبار ناديه..؟
ساره: ــ ياعلي منك.. متحايل وتعرف كيفا تهرب.. الحمدلله .. الله يعينها على شغل رجلها والبٌعد.. ويساعدها على الثنائي المرح..فكر ياخوي تكفى زين..
مؤيد يرجع يهرب من الموضوع:
ــ وحشتني جوودوو خبري بها من اسبوع ..
ام مؤيد..
ــ ياغناتي .. الله يخلي الباسنجر حقكم ..
ساره : ــ الماسنجر اماااه..
ــ ايه.. حلاوته يخلينا نشوفها ونكلمها... تشنه جني
مؤيد: ــ ههههههههه العلم يسوي الهوايل يمااه..
ساره تطالع في مؤيد على جنب: ــ اقوول.. فكر بس فكر..
مؤيد ابتسم:
ــ عساه خير..

تابع>>

ناصر يفكر في كلام عادل وكل شوي يضحك ويا روحه..
ــ والله منت هين يابو شريف..
ناصر يحوس في جواله وجايتنه الحومه.. ابتسم بخباثه..
ــ خلني اتعيلف..
كتب رساله ورسلها لأشرف..
اشرف منسدح على سريره ويفكر في كلام عادلوه وكيف متغير عليه.. وفي جاسم اللي طلع بهالمصيبه .. وفي زينب اللي لحست مخه.. مو عارف يفكر في ويه لو ويه.. الا بصوت المسج..
فتحه ..
ــ هلااا روميوو... ويش عندك الليله؟؟
اشرف رفع حاجب وحاجب وبأستغراب.. اتصل على ناصر..
ناصر: ــ هلااا روميووووووو
اشرف : ــ هلااا ماعندك رصيد..؟؟ وروميو ويه.. روميو في عينك..
ــ هههههههههه لا عندي .. بس قلت اتعيلف برساله..
ــ وجهك.. ماعندي شي .. ليش ويش ناوي؟؟
ــ بنسهر في المزرعه.. ما بتجي ويانا.؟؟
ــ مادري بس ماتوقع..
ــ ايه يارووميووووو اللي ماخذ عقلك..
ــ ناصروه ووجع.. ويش فيك..
ــ احم.. ولا شي .. الله لينا.. يعطينا مما عطاكم..
ــ لا حول الله.. ما تتكلم عدل؟
ــ ليش مقلووب.. ههااااااااي..
ــ بايخ..
ــ ادري .. مالك خلقي الحين.. اخليك ويا افكارك
اشرف حاس ان ناصر عارف شي من كلامه مبين..
ــ ناصروه.. ويش سالفتك؟؟
ــ خخخخخ اسال عادلوه..
ــ اهاااااااا.. حسبي الله عليه.. لا تصدقه ترى شداب..
ــ ليش ويش قال على شان اقول عنه شداب..!!
ــ هااا...
ــ ههههههههه اقول روح نام واحلم بس ياعنتر
ــ عنتر في عينك ..
ــ هههههههه روميو وما تبغى عنتر وماتبغى ولا يهمك يا قيس بن الملوح
ــ لوح اللي يلوحك فارق بس يللا .
ــ ههههههههههه افااا .. قالوها من شاف احبابه نسى اصحابه..
ــ ناصررررروه..
ــ ههههههههههه يماااااه يالبع بع,, خلاص خلاص .. باي نشوفك على خير..
ــ باي..
سكر اشرف الجوال ورماه على جنب..
ــ هين يا عادلوه.. سويتها فيني.. ماعليه اراويك..



في المستشفى...
دخل علي على حميد اللي كان في وضع شبه حرج..
ــ عطاك الله العافيه..
حميد من شاف علي قام بيقعد..
علي يمسكه ويسدحه..
ــ لالا خليك مرتاح..
حميد بنظرات حزينه تكسرها ابتسامة فرح..
ــ هلا فيك ياخوي.. كنت حاس انك مابتردني وبتجيني..
ــ افا عليك مهما كان.. اخبارك الحين ويش فيك.؟؟
ــ زي ما انت شايف .. رجعت حالتي ..
ــ الله يفرجها.. الله كريم..
ــ يارب..
حميد وبصوت متقطع ..
ــ علي .. طلبتك...
الى الملتقى

صبـــــــــــــــــــاح الخيرآآآآآآآآآآت ،،
ياعلي خيووووهـ ،،
حممممممممممممممممممممممممماس ،،
ما عندي صبر ،،
و اللهـ حلاة بيت أبو علي اللهـ يديم عليهم الراحهـ ،،
أقول مؤيد يااللهـ حيهـ ،، << وأخيراً بـ تنفرج ،،
و مالكـ متى بيرجع ما خلص دراسهـ لهـ ؟؟!
و ناصروهـ ،، تصقع إبليسهـ ،،
بس لو أني و ياهم كان أمسكـ شراشف مسكهـ عددددلهـ ،، هع هع
و حمييييد وش بيطلب من علي ؟؟!
معقولهـ بيقول لهـ يروح يكلم أخوهـ أبو مالكـ ؟؟!
بـ الأنتظار على أحر من الجمر ،،
و يعطيكـ ربي ألف ألف عاااافيهـ ،،
و عســـــــــــــــاكـ عاالقوة ،،
خااالص التحاااياااا ،،
للدموع إحساس ،،

روعة روعة روعة روعة

الجزء رووووووووووووووووووووووووعه

وعادلوه خخخخخخخخخ انعالي فتح بوزه<<<<<<<<<جوعان خخخخخخ

وش صاير ويا حميد<<<<امجد<<<<<ما احبه

ويعطيك العافية

http://m002.maktoob.com/alfrasha/up/...9273237644.gif

گـ نسمةِ ـآلهوآء ـآلطـلقِ
وبحـور هآجت مع ـآنيهـآ
گِتَآبَآتِگِ..]~

أميـــرة المرح//
گــنت أتآبع بهدوٍِوٍِءٍ خ ـلف الگـوآليس
ولگـني لم أستطـع الوٍِقوٍِف في الخ ـلف
ح ـتى قررت أن أسج ـل في هذآ الصرح وأبدي رأيي ,,

گـلمه بسيطـه//
صحيح أن شبكة الناصره لا تدعم خ ـآصية النسخ
ولگـن المتــصفح فآيرفوٍِگـس يفع ـل ,,

//
\\
//
أنتــظرُ الج ـزء الج ـديد
لآ تطوٍِلي ع ـلينآ,,
http://m002.maktoob.com/alfrasha/up/...9273237644.gif

حميييد بيمووووووت ويبغى يوووصي علي آآآآه يآآقلبي عليه
و مؤيدوه خل يآخذ ليلو ثنينهم لآيقين على بعض <<-- نكد × نكد هع هع نحيسه ههههههه
و شرشفووه أنفضح هآآع والله يستر ...
ههههههههه والجزء حلوو مررره
بس عااد لآ تذبحي حميد <-- بتضربها صدمهـ عـآطفيه أن مات
يسـلموو على الجزء الروعهـ ..
يعطيكـ ربي ـألف ـعـآفيهـ ..
لآعدمـ ..
ـكبرـيآء

ووووووووووواو جزاء جدا رائع

الله يديم الفرح على بيت أبو علي
ويغربل ابليس عادل الفضيحة فضح الرجال
وناصر ماتوقعته فكاهي للهدرجة خخخخخ

تحياتي عزيزتي
بالانتظار

جزء حلو وننتظر البقيه

روووووووووووووووووعة ابدااااااااااااااع اميرو

مسكين روميو<< شرشفي >> فضحه الخبلة عدولة
اتوقع مؤيد بواقف على ليلى وبصير من نصيبه
وعلي بياخد علا ومادري ويشو مابغا اسبق الاحداث

خيتو امير زي ماقالت اختي ايقاعات قلب
الفايرفوس يسوي بلاوي << مافي شي ممنوع عنده
وهو ريح في السرقات ودي الحركات الحلوة

يعطيك ربي الف عافية ونتظار البارت اليديد
لاطولي علينا عاد
<< مو تجهزي الجزء وتنامي زي اليوم الفجر
خليتيني انتظر لين فطست وقمت نمت ~_~

ـ،،،ــ ـلآآآآآمــ

جزء حلوه بالمره

ومؤيد يناسب ليلى عجبتني حركه النظره الشرعيه

ومسكين اشرف الله يعينه

وان شاء الله سجاد يمشي

لا هنتي على الجزء

بالانتظار

الجزء عجبني مررررررررررره
بجد مبدعة ماشاء الله..

حميد بيموت شكله..
ومؤيد بيتزوج ليلى ..حركاااااااااات
وأشرف بيتزوج زينب..
وهذا هشام أكيد علا..
>>> احلفي عاد قلتي النهاية تفكري..


بانتظار الغد القريب..
يارب يوفقك أميرة ..
دمتي بعين المولى الجليل..

امورة في اليوم بارت لو مافيه ؟؟

إن شآآء الله فيــــه <~ وش هاللقافه بس :toung:
اموووور حبيبتي حااولي تجيبي لنا بارت اليوووم
<<~ مصالح عفر:blink:
نبي نشوووف حميدوو وش يبي من علي
أتوووقع يبيه يطالب بحقه عند ابو مالك
ومالك وحشني من زمان عن طاريه :smile1:

مرحبا
يعطيكم العافيه
كلامكم قاله لي اخوي اليوم اول مادرى عن نقل القصه
قال الله يخلي الفاير فوكس..

اليوم فيه بارت اعزائي بس مادري متى بانزله
هل الصباح..
الظهر..
العصر ..
المهم بينزل بارت..

يعني بالمختصر النعسان لا يواصل وينام

طلعت لي طلعه مفاجأه البارحه وتوي راجعه من نصف ساعه..
اسألكم الدعاء
دمتم بخير
وبحفظ الرحمن

ويييي ونااااااسه
اني من شفت في رد على القصه ومنش لااا طفرت من مكانتي <<~ يلعن الحمااااااس
نستنااااه
ومشكووورة
الله يوفقش
وعساهااااا خير

انا قوم انام ونشا ءالله الليلة او الظهر نشوف البارتات
والاهم انك ستانستي في الطلعة المفاجئة وروقتي

تمسنو على خير

يا الله خيتو أمووور
ننتظر البااارت
ونعرف ويش عنده حميدوووه يبغى علي

وعليش بالعافية بالطلعة وعساه دووووم بس اهم شي اتكملي القصه
اني عيدي ما طلعت للحين ما شفت باب الشارع هع هع

هع هع شكلي فيي لعانه اشارك الحين عشان اوريش وسام المسابقة هههه

يسلمو اميره ننتظر الوسام اااا اقصد البارت ههههه من لخبطتي وفرحتي به ههه
لا عدمنا جهودش غاليه
والله يعطيش العافية

متابع من بعيد لبعيد

سآئني ما قامت به الأخت من نقل القصة

وبس حبيت أقول ليها كلمة وبالعامية بعد

دام انش ما قدرتي تستأذني من كاتبة القصة بأي طريق كيف تحللين لنفسك نقلها بدون أذن

حتى لو لم تفعل عضويتك في منتدانا فهناك الف طريقة

الاتصال بنا >>>موجود ...وموجود إكسترا بعد

بصراحه ...شين وقوة عين بعد


ترى السرقة سرقة >>>أدبية >>فلوس >>>غيره

خيتي نصيحة بدل ما تعصبي روحش وتكابري على اللي سويتيه

إطلبي السموحه لما فعلتيه

فالأخت أميرة المرح لم تطالب الا بحقها الشرعي

إنتبهي ورائك حساب وعقاب وثواب ...في يوم لا ينفع مال ولا بنون


خيتي أميرة المرح واصلي إبداعك ....واصلي

ترى بنسوي الش مظاهرة في المنتدى لوووول

فمان الكريم

آآآآخيراًأُ وصلت اميرة
يعني بعد اشوي بجي البارت
بس انا بطلع << بروح وبجي سريع عجل ^_^
بنتظارك خيتو

مرحبا..
تسلمو لي من كل مكروه.. ايقاعات قلب.. ربي يحفظش حبابه ودوم هالحمااس ..
والف مبررووك خيه عواميه تستاهلي يالغلا..
خيو واحد فاضي.. شفت ياخوك.. رغم اللي سويناه طلع فاير فوكس اقوى منا.. الله كبيرر وما يضيع حق.. اني مايهمني لأني عرفت اتصرف واخذت حقي والحمدلله انحذفت هناك.. وراح يكون هذا تصرفي مع اي احد يحاول ياخذ شي مو حقه تحت غطاء المنقول .. مادري ويش يستفيدو يعني اني لو ابغى انشرها نشرتها في كل مكان ولا عاد الجوالات مو بس المنتديات..
بس اني هيك ابغاها حصريه في اماكن معينه ولي الحرية في هالتصرف..
تسلم خيو عالوقفه وربي لا يخلينا منك...


يللا وصلنا بالسلامه.. هههههههه لا يحرمنا الله من حركتااتك يالناري وتعليقاتك...
ثواني وينزل الجديد

الحلقة 43

حميد وبصوت متقطع ..


ــ علي .. طلبتك...


علي بأستغراب:


ــ عطيتك...!!


ابتسم حميد ابتسامه حزينه:


ــ احس ايامي خلاص قربت تخلص..


علي يهدي فيه:


ــ بعيد الشر عنك .. ربي يطول عمرك


حميد :


ــ لا فعلا .. مادري متى الله ياخذ امانتي.. باطول على هالحاله ايام .. ويمكن شهور... اللي ابغاه منك.. تكون قريب مني هالفتره... تحسسني بوجودك.. خليني احس ان لي احد في هالدنيا.. واذا متت.. يحضر دفني .. ويوقف على قبري .. يترحم لي ويقرا لي الفاتحه.. مابغى اموت موتة غريب...


علي ملامحه تغيرت وبدا عليها الحزن الشديد.. وبهمس مختنق:


ــ السلام عليك ياغريب كربلاء... خلاص ولا يهمك ياخوك.. لك اللي تبغاه..


حميد مد ايده ومسك كف علي وضمه بالقوه..


ــ لا حرمني ربي طيبك .. سامحني .. من قلبك ابغاك تسامحني..


علي بأبتسامه صادقه ونظرات عيونه تشهد..


ــ سامحتك.. والله كريم ..

سالت دمعه من حميد.. كانت احر دمعه واصدق دمعه يذرفها في حياته.. وهو يحس بهالأحساس.. يحس بحقارة نفسه ودنائته على اللي سواه في صاحبه الوحيد..


بلع ريقه بصعوبه وبصوت متقطع:


ــ ايه استريح .. وقول لي ويش اخبارك ويا الدنيا..


وقعد علي يسولف مع حميد...

في الليل علا مع ليلى.. والفرح عامر..


ليلى : ـــ ماجت وياش سوسن لويه..؟؟


ــ تعبانه هي هالفتره.. وهشام اخوها يبغى يطلع وياها من زمان ما شافها.. وصلوني وراحو.. تسلم عليش واايد.. وتتحمد على سلامة علي..


ــ الله يسلمها.. اهاا هذا هشام اللي رد علي ذاك اليوم..


علا بهداوه و خجل واضح..


ــ ايه..


ريما لاحظت.. وصارت ترقص حواجبها...


ــ ياعيني .. ياااعيني..


ليلى تطالعها على جنب:


ــ استحي عيب..


علا وجهها صار احمر..


ريما:


ــ هههههههه استحي ويه.. الوجه مبين من عنوااانوو.. الله يوفق لنصفق..


علا :


ــ ريموه.. استحي..


ليلى :


ــ باساطر بها..


ريما : ــ هههههههههههههه زين خلاص باقوم عنكم اصلا


ليلى : ــ احسن...


ريما : ــ مالت .. طرده هي يعني ... احمدي ربش مسلسلي الحين وقته.. والا شان ماقمت لو ويه...


وطلعت ريما الا بدخلة ام علي المجلس..


قامت ليها علا.. تسلم عليها وتتحمد ليها بسلامة ولدها..


ام علي :


ــ ياهلا فيش ياغناتي والله يسلمش ويحفظش .. ويبلغنا فيش.. شحوالش وشحوال خالتش امل ..


ــ الحمدلله بخير.. وخالتي تسألكم الدعاء سافرو امريكا بيسوو عملية لسجاد..


رفعت ام علي ايدها:


ــ يالله تبلغهم مرادهم وترجعهم بالسلامه..


ليلى وعلا بنفس واحد.. ــ يـــــــــارب...


ام علي :


ــ اخذي راحتش غناتي.. ويش اخبار مرت ابوش.. ماجت وياش..


ــ الحمدلله تمام.. وياها اخوها,,, تسلم عليكم..


ــ يعني.. الله يسلمش وياها من الشر سلمي عليها انتين بعد ...


ــ ان شالله يوصل ..


ــ خذي راحتش غناتي البيت بيتش..


ــ تسلمي ..

وطلعت ام علي من المجلس...


وصارو علا وليلى يسولفو..


الا بطاري سؤال ..


ليلى : ــ الا صحيييييح ويش اخبار المعرض؟؟ جى وقته مع طلعة علي...ومادرينا..


علا .. صارت تعلمها عن سوسن واللي صار فيها بالضبط....

عادل ...


ــ وووووففففففففففففف ابغى اطططططللللللللع


ام عادل:


ــ ويش اسوي لك ماعندك نعال وطلعه بدون نعال في هالنقعات وهالمستنقعات لا تحلم..


ــ مابدوووس عليهم..


ــ ايه تعلمني عنك..


ــ وففففففففففففف..


ــ اركد هااا..


ــ زهقققااااااااان...


ــ انا لله .. قوم نام..


ــ مافيني نوووووووم.. دجاجنا ماننننام انننااام انااا؟؟


ــ ياربي ويش تبغاني اسوي لك.. طالع التلفزيون..


ــ مااااافففففففي شي..


ــ عاادلووه.. ارركد... صخ.. عورت راسي..


عادل ولأول مره في حياته يسأل هالسؤال وبهداوه:


ــ امااه.. منهوو ابووي؟؟ ووين هوو؟؟


امه انذهلت منه..


ــ هاا...


ــ كككل واحد بالدددنيييا له ام وابوو انا حجي عباااسسسو مو ابووويي ويين ابووويي؟؟


ام عادل صارت تفكر شلون بتجاوب عليه...


ــ ابوك ياولدي.. زي حجي عباس


بعدها ماتكمل كلامها صرخ عادل


ــ وييييييعععععععععععععع هووووووووونت مابغااااااااااه


ام عادل مسحت وجهها ..


ــ يالله ترحمنا برحمتك.. خلي الميت بحاله وخلني اكمل كلامي لا بملاس الهريس اشلخ مخك..


ــ خخخخلااااص خلالالااااص


ــ هذا الماخذينه منك .. خلاص وخلاص.. ماعلينا ابوك مات الله يرحمه زي حجي عباس ..من يوم كنت صغير..


ــ شيفا مااات زيييه.. يعني فتح عيييوونه وقققال قلبي قلللبي وانفلت على ججنب؟؟


ــ هههههههه ياربي الهي سامحه عقله على قده .. يارب ترحم موتانا ياااارب.. عادلوه.. يوز عن اللعانه ها.. مات يعني ... يعني.... اهووو ماات يعني ثننيهم ماااااتووو..


عادل توه مستوعب ..


ــ اهااااااااا قققولي مااات وخلالالاااص شدددخل عببباااسسسو


ام عادل في بالها..


ــ يالله تكملك بعقلك و تغير حالك حسبالي ما بتفهم...


عادل يرجع يسال:


ــ يششششبه من ابببووي .. يشبهش لووو يشبهني.؟؟؟


فتحت عيونها :


ــ هاا.. يشبهني ويه بعد..؟؟. اخته قالو لك مو مرته... ما تشبهه انت.. تشبه المرحوم جدك.. ابوي ..


ــ اهااااااا اجل عرررفت.. اكيد ابوووي يشبه حجي عباااسوو


ــ علي يااااااعلي ادركنا.. لويه يعني قلت يشبهه؟؟


ــ لأنهم ثنييييييينهم عررررسو عليش


ــ هههههههههههههههههه ايه واني لا يتغير علي الوضع راح واحد قلت ابغى الفاني يصير نسخه كربون ..استغفر الله ياربي..


ــ يعععني ويه نسسسخه كررربون..


ــ يعني زيه بالضبط..


ــ اييييييييه يعني سيم سيم..


ــ هههههههههههه وتعرف بعد للهنووود..


ــ ههههههههههههه لاااااااا دي مو هنووود دي اساااسااا عنجليززززززززي


ــ اهااا عنجليييزي ومن وينا تعرررف مين اللي علمك؟؟


عادل ملامحه تغيرت وكنه مو طايق الطاري..


ــ اشررررفووو..


ــ ياساااتر عليك....

تابع>>

ليلى فيها فضول تسال علا عن سالفة حميد.. وياترا تدري به لو لا...

وبهداوه::

ــ علا بسألش سؤال

علا استغربت طريقة ليلى في الكلام.. وبريبة..

ــ تفضلي...

ــ انتين عندش عم اسمه امجد..؟؟

علا بأستغراب ::

ــ ايه.. لويه؟؟

ليلى قلبها يراقع مهي عارفه ويش تقول:

ــ لاا.. بس سمعت من اخوي انه يعرفه.. و ماعمري سمعتش تتكلمي عنه..

علا بأستغراب::

ــ يعرفه؟؟؟ ما شالله يذكره...!!!

ليلى باستغراب اعظم:

ــ لويش يعني..؟؟

علا:

ــ الله يرحمه مات من زمان في العراق خذته امه.. و ماتت هي بعد.. الا عاد اذا شافه ويعرفه وهو ياهل قبل لا يروح ..

ليلى جاها الكلام زي الصاعقه.. وفي بالها..

ــ حتى علا .. ماتدري .. ياربي أي قلب هو قلبك يابو مالك....

علا :

ــ ويش فيش ليلى..؟؟

ــ لا بس .. يجوز وهو يهال .. مادري...

وغيرت ليلى السالفه ...

عادل من الزهق قام يغني..

ــ ططططاااح الفاااار في الطححححين.. سسسسموووه عبدالررررحيم.. قققااالت امه... ويييييه وييييييه .. قال اببببوه عزززي عليه..

ام عادل ماقدرت..

صارت تدحن ضحك .. ضحك..

ــ وااااااااااااال بعدك تذكرررها...

عادل يضحك::

ــ اييييييه قولي مــــــــا شالله اول مررره اشششووف ام تحسد ولللدهااا,,, اذكرررها عدددل ما انااام الا اذذذا قلللتها.. تذكككري اماااه لول وانا صصصغير كل تقووليها لي..

ــ ههههههههههه ما شالله عليك عودت بالرحمن..

شوي اعترض عادل..

ــ بسسس لااااااااااااا ويشووووووو فار عبد الررررررررررررحيم عبدالرررررررررررحيم ابووو زنوووب ماااهوو فااار

ــ هههههههههههههه استغفر الله ربي مو لأنه بعد ابو زينب .. الله يخلف علينا لول نهرربد أي كلام وبس .. نبغاكم تنااامووووووو ... ايييه يالله ترحمنا برحمتك...

عادل:

ــ تدررري...

ــ ويه؟؟

ــ باااقوووم انااام..

ــ احسن لك...نومة العافيه.. غسل رجولك واسنانك.. وتغطى عدل..

ــ ان ششششالله...

انسدح .. وتغطى بالبطانيه.. حس روحه استحر.. قام يدور على شرشف ,, لقى له واحد .. كان عرضه اكبر من طوله..

رجع انسدح وتغطى.. غطى روحه بالعرض .. صار الطول قصير عليه.. ورجوله طالعه.. لكن العرض زاايد واايد من الجوانب...

حاول ينكمش بس مايقدر .. يبغى يمدد رجوله لحدها..

ويش يسوي... ويش يسوي..؟؟؟

طلع من غرفته لقى امه قامت غرفتها..

راح يدور له مقص .. حصله.. رجع غرفته ..

وصار يضحك..

ــ موو عللييي هالحررركااات الحييين اراااويك يااا شرشفووه..

هااا شرشفووه... هههههههههههه شششان زييين اقصصصصصصك...

تشييييييييخ...

قص الشرشف نصين من العرض...!!

انسدح وغطى رجوله بنص والنص الثاني بقايا جسمه....

وغفت عيونه.. ونام..

ام عادل قبل لا تنام لازم تطل عليه تشوفه نايم لو لا ,,,

تخاف يستغفلها ويطلع وهي نايمه..

دخلت شافت البطانيه مرميه.. وانتبهت له متغطي بشرشف وفي شي غلط في الوضع..

تقربت وحطت ايدها على راسها.. وفيها ضحكه بس بالعتنها وفي بالها..

ــ غربااال ياعادلوه ... ويش هالحل بدل لا تتغطى بالطول خربته لي وقصيته من العرض نصين.. عساااك السعاده..

تنهدت وبأبتسامه:

ــ يفداك ياغناتي.. عساني ما انحرم منك..

ليلة الخميس .. مؤيد جاينه ارق يفكر في حاله..

ــ لمتى انا كذا.. ولمتى بتظل امي تحاتيني وتحايل فيني وانا عنيد زي اليهال.. بعد لول جود ماليه علي الدنيا الحين راحت وشافت حياتها.. انا ليش ما افكر.. بتفهمني ليلى.. زي مافقدت انسانه غاليه علي هي فقدت انسان غالي عليها.. بتعذرني وبعذرها.. وممكن مع الأيام ننسى ماضينا و نعيش احلى مستقبل... يارب .. ساعدني..

ام مؤيد مع ساره .. عصر يوم الخميس يجهزو العشا لليلى وريما..

ام مؤيد مبرطمه من ولدها اللي مارد ولا فكر ومطنش الموضوع..

الخميس .. الساعه 8 ونص الليل ..

ساره مع ريما وليلى في مجلس بيت ابو مؤيد..

ريما بأستغراب..

ــ ماجى احد .. حنا اول ناس شكلنا..

ساره تسوي روحها ماتدري وهي ماعزمت احد غيرهم لغايتهم اللي ما حصلوها من مؤيد..

ــ مادري اغلبهم قالو يمكن ومو اكيد لأنهم ليلة الجمعه مرتبطين ..

ليلى : ــ اهاا..

ام مؤيد في صالتهم قاعده ومتأسفه حدها على ليلى ..

الا بطلعة مؤيد ليها من غرفته..

ــ قواش الله اماه..

امه بدون نفس:

ــ هلا..

مؤيد فهم عليها وفي داخله ضحكه:

ــ ويش فيه الحلو زعلان.؟؟!!

ام مؤيد مبرطمه ومهي عاطتنه وجه..

مؤيد ابتسم..

ــ واللي يقول لش قومي اخذي اختها و خلوني باروح اسوي اللي في بالش

ام مؤيد طارت من الفرحه وشوي وترقص .. قامت :

ــ من عيوووني .. احلف .. ماصدق..

مؤيد يمزح..

ــ ههههههههههههه يسلم عيونش .. هااا اهووون؟؟

ــ لالالا.. دقيقه باروح اخذ اختها ..

ــ زين...

راحت ام مؤيد .. ونادت على ريما..

ــ ريما امي .. تعالي ..

ريما مستغربه وليلى اعظم منها..

ساره ارتسمت ابتسامه عريضه على وجهها وفي عيونها فرحه عامره ..... فهمت الموضوع...

تابع<<

قامت ريما مع ام مؤيد.. اللي خذتها وياها غرفه وطلعت كذا قطعة قماش وتسولف وياها ..

ــ ايه يابتي .. سمعت ذوقش حليو قلت اخذ رايش ابغى اخيط لي فوب عند امش الله يخليها ومحتاره أي قطعة خام اخيطها

ريما عاد.. ما شي يفرحها كثر ما احد يمدح ذوقها لو جمالها.. ومره مستناسه تقلب في الأقمشه ومحتاره وتفكر أي واحد..

وبالمقابل ..

مؤيد.. طلع برى الحوش ..

لف لنافذة المجلس..

وصل ليها وقلبه يدق ومو عارف شلون يتصرف..

النافذه كانت مفتوحه بحكم الجو بارد..

وقف عندها و القى نظره..

ظل واقف محله... مبتسم ويطالع..

ــ ما شالله تبارك الله

ساره انتبهت لوجهه ورى الشبك.. جتها ضحكه بس شالت عيونها بالسرعه لا تنتبه ليلى ..

كانو يسولفو وينكتو وليلى تضحك ..

مؤيد بعده واقف تسمر محله.. عجبته نعومه ليلى بشكل .. وضحكتها ماقدر عليها..

و بليس اووووووووه... خلاص خلاه واقف مايتحرك وشوي بتصير مو نظره بتصير تبقق وتبصبص...

ساره مهي قادره على اخوها قامت وفي بالها..

ــ يااااارب .. هههههههه هذا اللي مو راضي .. لصق عند النافذه

وصلت للنافذه وبصوت عالي..

ــ الجو احسه بررد ماليها داعي هالنافذه تظل مفتوحه..

سكرتها ...

مؤيد تسند على جدار المجلس.. وابتسم..

ــ والله وشكلي باوافق...

دخل الصاله.. وتنحنح..

ــ يالله يالله.. امااه

ام مؤيد في بالها..

ــ مااااااابغى خوبلت البنيه كلما اختارت قطعه قلت متأكده مو تشنه دي احلى..

ام مؤيد..

ــ خلاص ياغناتي دي .. اخر كلام..

حطتها في كيس مع ثوب للموديل والقياس..

ــ هاش ويعطي امش العافيه ..

ريما:

ــ الله يعافيش.

ورجعت المجلس...

ام مؤيد قامت تركض لولدها وهي تتعثر..

ــ هااا .. ويش قلت..

مؤيد شالق بوزه من الأذون للأذون..

ام مؤيد بفرحه غامره..

ــ لعن الله يزييييييييد لو ما حرمة هالشهر شان جببت.. ياعساااني بالغه فيك برد الله قلبك وعوض الله عليك يااااااارب..

مؤيد باس راس امه.. ودخل غرفته..

ورجعتهم ليلى و ريما البيت..

ليلى مستغربه من ام مؤيد لويش نادت على ريما يعني..

ريما تدلع:

ــ تقوول ذووقي حليوو ويعجبها وخلتني اختار ليها..

ام علي تضحك..

ــ ايه عليش بالعافيه..

ليلى ساكته.. وفي بالها..

ــ يعني اني اللي ذوقي ويع...!! لويش ماجابت القطع وخذت براينا كلنا.. اسكت لا تفكرني ريمو غيرانه..

طنشت ليلى الموضوع.. وماطقت له خبر..

ويمر هالشهر.. شهر صفر,,

و ابو مالك.. خلاله عايش ازمه نفسيه حقيقيه...الحلمه صارت عاده يشوفها في اغلب الليالي... انتحل جسمه وحالته صارت حاله....

قرر اخيرا يروح لشيخ من الشيوخ...

الشيخ:

ــ اللهم صل على محمد وآل محمد.. يا اخي الكريم... هالحلمه ماليها تفسير الا انها نتاج عملك... في عمل بالأحرى اعمال سيئه حلت عليك بسببها غضب الله فطلعت لك في الأحلام ...

اما عن كونها ليش تأخرت هالأحلام وتوك تحلمها.. فالله العالم انها نذير لك بوقوع مصيبه.. اكثر من الصلاة على محمد وآل محمد.. ومن الصدقات.. وارجع الحق لأصحابه... والله يخفف عنك كل عذاب ويحفظك من كل مصاب...

ابو مالك طول ما الشيخ يتكلم..

وهو يربط بين احداث الحلمه واللي شافهم فيها وبين اللي سواه فيهم في الواقع..

يحس نفسه حرااان رغم برودة الجو.. وعرقه يتصبب من جبهته...

عطاه الشيخ كم دعاء يقراهم قبل النوم.. ووصاه على سورة يس لطرد الأحلام المزعجه و سورة مريم للأمن من الخوف..

طلع ابو مالك من عند الشيخ ودقات قلبه تتسارع.. ومهو عارف ويش يسوي...

وفي بيتهم..

علا قاعده مع سميره في الصاله.. سوسن كانت تسبح...

رن جوال علا .. كانت ليلى متصله بجوال اخوها..

علا خزنت رقم علي بأسم ليلى..

من رن الجوال بعفويه علا .. قامت المطبخ,,,

سميره في بالها..

ــ لاااااا الوضع ما ينسكت عنه... لااازم اقول لأبو مالك..

الا بدخلة ابو مالك وهو متوتر..

سميره لا احم ولا دستور.. على طول قامت له..

ــ الحق ياخوي الحقق..

ابو مالك انصرع توه سامع كلام يخوف من الشيخ على احلامه..

ــ ووووووويششششششش صاااااااااير؟؟؟

ــ روح علا في المطبخ.. اني صرااحه مو عاجبتني المكالمات اللي تجيها.. رووح وشووفها مين تكلم على كل وقت..

ابو مالك بلا وعي راح المطبخ .. دخل الا علا مخلصه المكالمه ومسكره.. كانت ليلى تسألها عن امل ويش صار عليها وعلا ردت عليها انهم سوو العمليه لسجاد وباقي علاج طبيعي لمدة اسبوع وان شالله خير....

ابو مالك من شافها سكرت الجوال عصب فيها وصرخ..

ــ ميييين تكللللللمي؟؟؟؟؟؟؟؟؟؟

علا انصرعت من ابوها .. ومهي فاهمه شي..

الا سميره وراه..تسوي روحها طيبه وخايفه عليها..

ــ علا .. اعترفي حبيبتي مين تكلمي.؟؟. ولويش من يتصل فيش قمتي انخشيتي.. ولويش على جوالش قفل..!!

علا فهمت مقصدهم.. الكلام جاها مثل الرصاص حست نفسها مخنووقه.. ويش هالظليمه...؟؟؟

صمت مافي جوااب.. من الصدمه...

ابو مالك ياخذ الجوال وكان لسا ماقفل ..

صار يقلب في المكالمات..

وصل لرقم هشام.. وكان بدون اسم.. فما عرفه .. ولا هو حافظنه.. وكذا مره كذا مكالمه لم يرد عليها.. حاول يخزي بليس بس مو عارف ..

قلب في الرسايل لقى رسايل هشام.. قعد وهو متوتر.. سميره فوق راسه..

ــ شفت ياخوي.. رسايل بعد..

ابو مالك يقرا كان يتسوعب ..

شوي .. قعد على كرسي و ارتخى جسمه المشدود من التوتر والعصبيه... والتفت على سميره وقال ليها ببرود مقهور..

ــ يلعن شكلش فارقي ... اطلعي برى..

سميره انصرعت.. من كلام اخوها.. اول مره يقول ليها كذا...

وبذهول:

ــ ليش .. ويش سويت..؟؟

ابو مالك يفتح ازرار ثوبه يحس روحه مخنوق..

ــ بتي .. اشرف من الشرف .. حسافه وانتين عمتها تشككيني فيها.. المفروض ما اصدقش لش سوابق ويا سوسن.. بس ما يفيد فيش ولا فيني .. فارقي مابغى اشوف خلقتش لا ما يحصل طيب..

سميره مصره تعرف ويش صاير..

ابو مالك:

ــ هذااااا هشاام اخو مرتي يرسل ليها يسألها عن اخبار سوسن لما كانت مريضه.. لأني ما ارد عليه..

سميره حست روحها قد النمله وكن منكب عليها ماي حااار

بس المكابره والأصرار خلاها ترجع وبمنتهى الوقاحه تسال

ــ واللي منخشه تكلمه من شوي؟؟

علا ماتحملت صارت تصيح..

ابو مالك..

ــ سميره اطلعي دام النفس عليش طيبه .. لا ما يحصل طيب... صديقتها اخر مكالمه مستلمه..

سميره خلاص . ماليها حجه.. تحس روحها تفشلت.. طلعت من المطبخ تركض..

ابو مالك ولأول مره في حياته.. فرد ذراعينه لعلا اللي كانت واقفه تصيح.. وبهدوء وابتسامه اسف..

ــ حقش علي غناتي.. تعالي..

علا ارتمت في حضن ابوها وصارت تصيح.. وهو يمسح عليها..

تريزا حاضره للموقف كله.. ابتسمت وحست بفرحه كبيره.. على تصرف ابو مالك..

علي رجع بيتهم فرحان ومستااانس...

نادى باعلى صوت::

ــ ياااااااا اهل بيتنااااااا تعاااااااالو مفاااجأه

طلعو كلهم وابو علي كان مسندح في الصاله قعد قعود..

ــ خير اللهم اجعله خير....

الى الملتقى

بعد شوي بقرأ الجزء
بس أكييييييييييييد روووعه

يسلمو أميره
بإنتظار الجزء القااادم

الجزء روعه

اتوقع مؤيد خطب ليلى من علي

تسلمي على الجزء

لاهنتي

الله الله الله روعة هالبارت يجنن يأخذ العقل
سميرو الدفشة الكريهه تستاهل إلي صار لها
وعدوله والله حركات عليه أجل شق الشرشف نصين الله يديم علينا عمة العقل
يالله يامؤيد متى يخلص الشهر وابلغ فيك أنت وليلى معاريس

أمورة ماتوقفين إلا على جزء يشوق ونحمس فيه ونقعد على أعصابنا

تحياتي

الله يديم الأفراح لبيت أبوووو علي بس

يااسلام والله رووووووعه الجزء

يمكن علي لقى له شغــل أو على قولته اخذ له الميكروو

يلااا حبيبتي أميره نستنى البارت الجديد

الباررررررررت مرررررررره روعه

واتوقع المفاجأه ان علي شراء الميكرو

يعطيش العافيه خيووووووووووووه

ياي هالجزء جد وناسة


اتوقع ان مؤيد تقدم الى ليلى

كشخة كشخة

بصراحة مادري الابداع يتفجر من قلمك
لو انتي تتفجري من الابداع
لاعدمناك خيتو
بارت قصير بس روعة
يعطيك ربي الف الف عافية
رحم الله والديك ماتقصير
تمنياتي لك باللتوفيق

مســـــــــــــــــــاء الخيرآآآآآت ،،
توني راجعهـ من طيارتي ،،
و طوآآآآآآآآآآآآآآآآلي عاالروايهـ ،،
البااااارت جوووونآآآآآآآآآآآآآآآآن عاالأخر ،،
و أخيراً مؤيد تلحلح ،،
أقول أمور ياالـ غلا ،، وصلي لـ ريم تنام في العسل هع هع ،،
و عادلووووه هههه هههه هههه هههه ،،
غربال ما لقى حل إلا يقص الشرشف ،،
ياللهـ الحين جا دور حينب ،، و يا شرشوف ،،
و عآآآآآشو ،،
خيهـ لا تقلتي حميد ،،
يعني قدرة قادر و يروح المرض ،،
حرام يكسر الخاطر ،،
و علوووووي وراهـ خبر حلووووو يا ســـــــــلام ،،
أن شاء اللهـ مؤيد خطب ليلى ،،
أو أشترى الميكرو ،،
إلا يصير المهم خبر حلو ،،
و عسى الأيام الحلوة ترافقكـ يا أمور ياالـ غلا ،،
و ينولكـ ربي مرادكـ ياللهـ يا كريم ،،
و يعطيكـ ربي العااااافيهـ ،،
و عســـــــــــــــاكـ دووووم عااالقوة ،،
خاااالص التحاااايااااا ،،
للدموع إحساس ،،

ماشاء الله
اللهم صلي وسلم على محمد وآل محمد وعجل فرجهم
رووووووووووعة
ياترى وشو الخبر الحلو اللي عند علي؟؟
مااتوقع بيكون الخطبة .
لأنه يعرف أخته وتعلقها
بولد عمها كان مابيقوله بهذي الطريقة

يمكن الميكرو..
المهم أنه حلو..

بانتظار الغد القريب..
موفقة لكل خير إن شاء الله تعالى..
دمتي بعين المولى الجليل..

خيتو متى عادل بعرس على ريموه

في بارت اليوم لو مافيه ؟؟

مرحبا
لا خلا ولا عدم منكم حبايبي.. وزين عجبكم الجزء ودوم الفرح يارب..

فيه بارت.. بس نفس حزة امس..
عصر او ليل ..
دمتم بخير
وبحفظ الرحمن

توقعآتي لهذآ اليوم هي..
أن علآوي الخبر اللي جآيبنه هوهـ خبر الشغله الجديد
أكيـــــــــــــد حصل ليه شغل عدل<0000 أمآ صآر فيسي قد النمله والتوقع طلع غلط هع
تسلمين يآقلبي ع الجزء الزآآحف<000 وآآل من زمىن مآقلتهآ
ربي يعطيك ألف عآآفيه
لآآآعدم يآرب
تحيآتون
ضحكوهـ البطه