ضعنا يا صبرنا...

هل مسموح بنقل القصة؟

بصراحة وربي شاهد عليي

اني شفت القصه

بمنتدى ثاني فهل مسموح بنقلها

والله شاهد مو انا نقلتها

مرحبا
يعطيكم العافيه
وتسلمو..
خيي اسير الهوى.. ياهلا فيك وبرأيك واستفقادتك..
الروايات السابقه تميل الى الكوميديا الساخره و تكثر فيها المقالب .. فيستدعي هالشي تعليق ساخر جانبي مني.. بعكس هذي تماما.. اللي اعتبرها تراجيديا جديده ومنحى مختلف اتخذته في كتاباتي الروائيه... لا عدمناكم..

المتحير .. لا طبعا غير مسموح ولا احلل ولا ابرأ ذمة اي احد ينقل كتاباتي ...
عجيب !! الحين حاطين حنا خاصية منع النسخ في المنتدى على شان لا تنسرق الكتابات .. ومع هذا تنسرق...؟؟!!
لو سمحت ممكن تترك لي عنوان رابط المنتدى اللي شفت فيه الروايه في قسم الأقتراحات والشكاوي على شان اخذ حقي بنفسي .؟؟ واكون لك شاكره ممتنه......

ابشركم.. :)
خلاص عطلت..
ومن الحين بابدي كتابه للجزء الجديد..
وعساكم من العايدين الفايزين..

اكرر .. المتحير انتظر رابط المنتدى واسمه .. واسم العضو اللي قام بسرقة القصه بدون اذن مني ..

لي عوده .. دعاكم ان تكون قريبه
دمتم بخير
وبحفظ الرحمن

مرحبا
عوده سريعه
الله يخلي قوقل ويبارك فيه
حصلتها ومشكوووور خيو المتحير
لا عدمت هالطيب منكم..

جاري التصرف ........!!!!

يختي ياميرة عن جد ناس فاظييين

وهذي قصتش الثانيه الي ينقلوها اي والله مانعين انتو النسخ كيف انسرقت

ربش كريم وياخد حقك منه

بارك الله فيك اخي المتحير

موفقين جميعا

,,

مرحبا
ويش اسوي يا زهوره
تصرفت وياهم وعساه خير ان شالله

اليكم الجديد..

الحلقة 41

وسوسن رايحه غرفتها.. تذكرت شي.. ودارت لعلا..

ــ الا صحيح.. نسسييييت...... ويش سويتي على المعرض ؟؟؟

علا ابتسمت:

ــ مارحت..

سوسن مختلعه:

ــ يووو لووووويه افااا..

علا بهدوء وابتسامه عريضه:

ــ الحمدلله على سلامتش .. بنفس اليوم كنت وياش اني في المستشفى..

سوسن تلون وجهها وتغيرت ملامحها..

ــ ياعلي.. خربت عليش غناتي .. اسمحي لي .. من متى تنتظريه .. كان لا قعدتي وياي ورحتي

علا :

ــ ههههههه ظريفه سوسنوو عااادي شدعوه ... الجايات اكثر ان شالله

ــ ان شالله اكثر .,,, وبأبتسامه تخفي وراها كلام :

ــ خساره راح على اخوي عاد هو اللي مذكرني .. يللا عاد بس ترجع لش هاللوحه بالذات باراويها اياه..

علا بخجل:

ــ زين ..

ابو جاسم في المطبخ يسوي له جمر للقدو... وقاعد يهف فيه... الا يتطفر شرر على ثوبه

ــ ووووووفففففففف .. نايبه احترقت دراااعتي... انا لله

يشيل الجمر بملقط الفحم الا بدخلة زينب عليه ..

ــ يووو يباااه تسوي لروحك..

ابو جاسم بقهر..

ــ ايه.. ويش تمبيني اسوي.. . هاا طلعي حالتي صرت تشني مشخال.... امش وما تعطي وجه و لا يقدر الواحد يكالمها .. ماقول كلمه الا برطمت و بدت تحن وتون..

ــ اعذرها يبا من ليها غيره ماعندها ولد الا هو..

ــ غربال يغربله لو هو عاقل وحاله حال هالخلق شان ماصار اللي صار,,, بس من ربادته و هياتته وقلة سنعه..

زينب تعرف ابوها غاز يبغى له بس شراره وينفجر .. فسكتت عنه ...

ابو جاسم يشيل راس القدو والحديده حااميه ..

ــ احححح جيبي التتن اكو منقوع في المغطس ..

زينب :

ــ ان شالله

وفي بالها وبقهر :

ــ وفففففف ولا ادري متى بتهون عن هالسم....

قعد في الحوش ...

ــ ويش احوالهم بيت عمتش .. ماكلمتيهم

ــ الحمدلله توي امس مكلمه ليلى اسأل عنهم.. بيتهم ما يخلى من الناس على شان رجعة علي..

ــ الله يديم عليهم الأفراح ..

ــ يارب...

ابو جاسم وهو يشرب في القدو وبدون سابق انذار طرح سؤالا غريبا....:

ــ مو تشنه ولد عمتش اضعف ؟!

زينب انحرجت من سؤال ابوها عجيب غريب..

ــ هاا.. مادري ما انتبهت..

ــ اضعف وايد بعد.. صاير يلده على عظمه... يالله تعوض عليه ..

زينب تغير سالفة علي :

ــ اجل ويش خانة جاسموه من دون شي عصاة مخمه بعد بيلاقي هالحال !!

ــ جاسموه.!!. جاسموه ما بصير فيه شي .. هذاك مظلوم والظليمه هضيمه تخلي الواحد ينسحت و ينتحل غصبن عليه..

تنهدت زينب .. وراحت بتشوف امها...

فتحت عليها باب الغرفه لقتها نايمه...

رجعت لأبوها:

ــ ياعلي امي مهي طبيعيه كل نوم..

ابو جاسم ينفخ دخان القدو..

ــ ويش اسوي ليها غلبت الدبب كل سبات عندها..

زينب فيها ضحكه على هالوصف .. صارت تداريها .. وراحت الصاله تطالع تلفزيون...

علي قاعد ويا امه وابوه.. بعد الحاح منه.. يبغى يعرف ويش صار وويش الأخبار..

صار له اسبوع وهم يقولو له مو وقته... وحده عرف من عادل بالصدفه عن حجي عباس...

هدووووء..

علي :

ــ اماه .. احس في شي خاشينه علي.. !!

ام علي بأرتباك..

ــ مافي الا الخير...

علي : ــ ان شالله .. ولو اني اقول في خبر ما يسر..

ابو علي تعب خلاص من هالحاله وبتوتر:

ــ داويه لمتى بنخش عنه يعني .. خيرته بيعرف .. ياولدي.. كلنا بخير وماصار الا كل خير الشي الوحيد اللي كدرنا مصيبتك وولد عمتك

علي مختلع:

ــ صالح؟؟ ويش فيه؟؟

ابو علي بهدوء متقطع:
ــ عطاك عمره..

علي شهق و حط ايده على راسه..

وبصوت خافت.. والذهول يعتليه:

ـــ هاا.. متى؟؟

ام علي :

ــ بسم الله على عمرك الرحمن ... من بعد ماخذوك بفتره جانا الخبر..

علي يمسح وجهه بكفه.. ويطلع نفس قوي بحرقة قلب. وعيونه تلجم الدمعات وتكسرها..

ــ انــــــــا لله وانا اليه لراجعون.. الله يرحمك يالغالي ... ويش وشلون عرفتو فهموني ..؟؟!!

ابو علي صار يقص لولده تفاصيل الخبر..

ام عادل ملاحظه تغير على ولدها .. صار له فتره ولا هي داريه لويه.. ما يستهبل عليها ولا يسولف ولا ياكل عدل...

ــ عادل امي..

ــ هااه..

ــ قوول نعم مو هاااه..

ــ ويشششووو

ــ مامنك فايده.. ماعلينا...ويش فيك ياغناتي .. منت على بعضك..

ــ ممماااااففففيييني ششششي...

ــ الا فيك.. وشكله شي شايد بعد مو عوايدك ...

ــ مووو ععوووااايييدي ويه..

ــ مو عوايدك ما تطلع ولا شي صار لك اسبوع تقريبا في البيت..

ــ خخخلالالالااااص بباااقققووم اطططلع

ام عادل تمسك ولدها:

ــ هي عناد ياولدي .. ماتقول لأمك ويش فيك حق ويه !!

عادل بحرقة قلب..

ــ زززين بااقووول..

ــ قول امي .. قول..

ــ اماااه.. حققق ويه زززينب ما تحححبني

ــ اهاااااا هذا اللي مغربلنك و مغير حالك.. عساني ويش اقول يوم اتكلم قدامك واقول ياليت لو اخطبها لك..

ــ لييييش اناااا ويششش ناقصصصنني لووويه تحببب اشرررفوو وماااا تحبببني

ام عادل فتحت عيونها..

ــ وويــــــــــه.. ويش دخل اشرف .. ولويه تقول كذا.. ليش ويش مسويه زينب..

ــ مماااسسسسوت شي بسسس اشرررفوو كل يداااافع عنهااا ونااافخ ررروحه على خررراط ودددي افققققعععه من قهرررري

ــ هههههههه عادل غناتي اعقل.. الصبي اجودي ومو معقوله بيشوفك تاذي بنات الناس في الطالعه والنازله ويسكت عنك...

ــ مماااااااااااااا اذذذيت احد انااا بسسس زينب...

ــ خلي هالزينب في حالها .. بس تكبر وتصير رجال باعرسك على اللي احلى منها واحسن منها ..

ــ مااابغى الا زيييينب ولوووووويش تقققولي بس اكبرررر قد البقررره انااا ويش كبررري وفيييني شنب ولحيييه بعد ويشوو باااقققي على شششااان اصيررر رجال

ام عادل في بالها باسى:

ــ باقي العقل خلف الله عليك ياولدي ...

عادل :

ــ باقووم بطلللع بشتغللل وبشتررري سياااره كبيررره حق اطلللع زينب بها احلى من حقت اشرررفووو

ام عادل:

ــ اعقل ياولدي وخلي الصبي والبنيه في حالهم مافينا شدة مشاكل....

ــ مع السلالااااامه

ــ انتبه لروحك زين..

تابع>>

طلع عادل وهو يضرب فكر .. وين يروح يشتغل.. دخل البقاله وسأل الهندي:

ــ مااافي شغغغل؟؟؟

الهندي يهز راسه واستفهامات وتعجبات ..

ـ ايش كلام.. شقل ايش مافي شقل هنا ..

عادل :

ــ اعرررف اعد ريالااات خليني اعدهم لك..

الهندي محمق:

ــ ايش كلام يعد ريالات مافي يللا روه..

ــ رررراااحت ررروحك.. بقالة ابو اللي جااابببك هي .. مانى طااالع زين..

ــ يللا برى رووه ..

عادل رفع علبة حلاوه صغيره من الطاوله اللي قبال الهندي وطراخ صفق الهندي بها..

حمق الهندي وشال مكشة الغبار اللي عنده وبسرعه ورى عادلوه اللي هرب يركض...

وشوي مر على مجموعه يهال يلعبو... وخطرت في باله فكره..

راح ليهم يستعرض عضلات..

ــ اللي يبغاااني احمللله بحمللله وبافر فيييه كل فررره بريال..

اليهال حماس ,, جاله اول واحد عطاه الريال..

حمله عادل ودار حول روحه ونزله..

الصبي اعترض..

ــ تلعب علي انت؟؟,., هذي تسميها فره.. ويشو بس تاخذ ريالي .. باقول لأبوي ..

عادل عصب فيه:

ــ روووه يللا رووووه << متأثر بالهندي..

باقي الصبيان هونو شافو عادل بينصب عليهم..

قام طرح عرض مغري..

ــ اللي بيدددددفع ار ار ارياليييييييييين باااحممللله الحمله المميزه

الصبيان خبلان .. اخبل منه.. واحد ضربه الفضول يشوف كيفا هالحمله المميزه..

ومن حسن حظ عادل ان هالياهل كان امتن واحد وما شالله متعافي..

عادل انصرع بس قال بيسوي حاله كرمال الريالين..

بس قبل لا يشيله اعترض عليه..

ــ اننننت متتتييين لااازم تدفع ررريااال بعد يعني فلاااافه رييييااال على ششششان اقدر اشششيلك عدل ..

الصبي ما مانع دفع الريال الثالث..

عادل ولا مفر من الحمله المميزه..

نزل للأرض وكل ثقله على ساقينه << قعده ماعرف ويش تنقال بس بلهجتنا نقول توقل .. يعني عادل الحين متوقل ..

ــ يلالالالا اررركب ..

الصبي حده وقف ومسك كتوف عادل..

عادل يحس روحه بينقلب .. ويتحامل على روحه.. ووجهه صار سحارة طماط.. يمسك الصبي ويقوم به شوي شوي ..

ولا يسمعو الا تشيييييخخخخخخخخ

عادل فتح عيونه.. ونزل الصبي بسرعه.. ودخل ايده تحت ثوبه يتحسس موضع الصوت وصرخ:

ــ سرواااااااااااااااالي انششششششششق..

الصبيان ماقصرو ضحك عليه..

عادل منحرج..

ــ انشششبببو لا انفرررركم بطررراق

الصبي المتين معترض ..

ــ ماحملتني الحمله المميزه..

عادل بحمق:

ــ مااااااسسسسسسمعت الصصصوت متيييييين انتتت ماقددددددددر

ــ رجع فلوووووووسي..

ــ يلعن شكلللللللك والله للللووو اوديهم للخيييياط يخيط سروااالي ما كفووه.. ياعلي ويششش كبره الشششق..

الصبيان يصفقو ويلعبو عليه..

ــ ابو سروااال مشقوق ابو سروال مشقوق..

واحد من الصبيان لعانه صار يتحرش فيه ويرفع ثوبه..

عادل خلاص وصل حده منهم..

وبدى مشوار المناطح.. ماخلى واحد فيهم الا داس فبطنه .. واليهال صريخ وصياح...

واحد منهم من التبقس طاح ضرسه...

الا بجية ناصر ومعاه اشرف ...

ناصر : ــ عااااااادل خلااااص

عادل مستمر في الطق والتكفخ اللي نجا منهم نجا واللي بين ايده الله يعينه...

اشرف يمسك عادل ويوخره بعيد ويتفالتو اليهال بالسرعه..

ويدور عادل لأشرف ويصرخ فيه صرخه:

ــ ويشششششششش دخلللللللك بعد مو بنااااااااااااااات ماعليييييييك منيييييييي

ناصر مستغرب :

ــ بنات!!

اشرف وجهه تلون..

ــ اشوفك على خير ناصر مع السلامه..

وتركهم بيدخل بيتهم..

ناصر بأستغراب :

ــ الله يسلمك

ومن دخل اشرف .. ناصر مسك عادل على جنب:

ــ ويش سالفتك ؟؟ ويش صاير ؟؟ لويه محمق على ابو شريف..

عادل بقهر:

ــ ويششش دخلللك فيني ؟؟

ــ عدوله انا احبك وبشتري لك اللي تبغاه..

<< عادل ينوكل بعقله حلاوه..

ــ احللللف

ــ والله .. بس ويش فيه اشرف وويش فيك عليه واي بنات؟؟ غريبه انت تحبه..

عادل بقهر :

ــ لوووووووول احبببه الحين لاااااا

ــ بل.. لويه <<< ياحب الأصحاب للتصيد قالوها احذر عدوك مره وصديقك الف مره..

ــ بااااق حبيبتييييي

ــ هاااا... أي حبيبه؟؟؟

ــ ويش عررفك بها انت ما تعرفهااا..

ــ منهي ؟؟ لا ما بشتري ولا شي..

ــ لا خلاص خلااااصصص .. زيييينننب بتتت ابو جااااسسسسم..

ناصر :

ــ اهااااااااا..

وفي باله..

ــ وانا اقول ويش فيه انصرع ذاك اليوم لما درى عن اخوها وتغيرت احواله.. منت هين يا ابو شريف ..

ــ يللالالا قلت لك.. بالسسسسرررعه مابغى تشششتري لي شي .. ابغى طلب ففففاااني

ــ فاني..!! فنى الله بليس .. ويش طلبك الفاااني على قولتك ؟؟

ــ تعطيييني بدل لا تشتررري فلووس اللي بتشتررري بهم..

ناصر مستغرب:

ــ 10 ريال .. عجيب.. ويش بتسوي بها؟؟

ــ باجمممع فلووس..

ــ ههههههههههه ما شالله عليك.. لويه ويش عندك..

ــ باااااااشتررري سياااررره حق اكشششخ فيهااا قداااام زيييينب وتحببببني و تخلي اشرررفووو

ــ ياساااتر منت هين.. ليش هي بعد تحبه على شان تخليه..!!!

ــ ويش مدرررريني عنهاااا كل يدااافع عنننها وهي تسسسستااانس انااا ما اححححبه هو بس هيييي كرهتتهااا ييييووومييين وتاااالي عوودت حبيتهاااا..

ــ غربال.. امشي عنك.. مو انت اللي منت صاحي.. اللي مو صاحي اللي قال عنك مو صاحي وهذي العشره..

عادل اخذ العشره وصار يطالع فيها:/:

ــ هاااا يعني ويه.. مهي صاحححححييه العشررره

ــ هههههههههه انا قلت كذا...الله وكيلك نسيت ويش قلت...مادري خربطه.. مسامح حجي عادل ..

ــ ووووووووييييييييييعععععععع لا تققققووول حجي..

ــ بسم الله لويه عاد..

ــ تذكككررررني بعباااسسسو

ــ هههههههههههههه استغفر الله ربي .. المشكله مالي مزاج اعلمك يعني ويه حجي روح لأمك تعلمك...مع السلامه

ومشى ناصر وهو يفكر في باله..

ــ والله وطلع المستخبي يا سيد اشرف..

تابع<<

تلفون بيت ابو علي يرن .. وكانت ساره المتصله..

ردت ريما..

ــ اهلين ساره.. هلا فيش..

علي كان شارد الذهن يفكر في صالح.. وفي كلام امه وابوه وتحذيرهم له لا يبين شي ما بغو تتحسن حالة ليلى.... فمن سمع رنة التلفون صار يتصوخ.. ومو عارف منهي المتصله.. وريما ضرب سوالف وياها ..

شوي ريما تنادي على ليلى..

ليلى : ــ مين؟؟

ــ ساره..

ليلى ابتسمت بفرح وخذت السماعه :

ــ اهلين سارونه هلا والله

علي مسك ريما على جنب وصار يستفسر منها .. منهي دي اول مره احد يتصل في ليلى غير زينب ..

ريما : ــ اووه فاتك.. الحين عندها علا وساره..

ــ علا وساره.... مين بعد هذيلا..؟؟

ــ علا بنت ابو مالك.. وساره بنت ابو مؤيد..

علي عفس وجهه..

ــ بت ابو مؤيد والنعم والله.. بس ويش عرفها ببت ابو مالك ..؟؟؟

ــ لااااااا .. ترى والله مافي منها احسن من طوايفها كلهم.. وتعرفنا بعد على مرت ابوها طيبه لحدها..

ــ مرت ابوها..؟؟!!!!!!!!

ــ مو طلع ابو مالك متزوج وحده قد ليلو تقريبا..

علي تذكر سالفة حميد.. وكأنه يسمع حميد يسردها عليه من جديد..

صار يفكر في باله..

ــ متزوج بعد.. والله معيش روحه في نعيم هالأبو مالك .. الله عالظالم بجي له يوم...

سكرت ليلى السماعه ودارت على ريما:

ــ الخميس الجاي معزومين اني وياش عالعشا

علي يستظرف :

ــ اه و انا..

ليلى :

ــ هههههههههه عزومة بنات.. انت ياغناتي اللي بتودينا..

علي : ــ على خير.. على طاري التوديه .. ذكرتوني .. تعالو ويا امي وابوي عندي سالفه..

ريما : ــ ياسااااتر

علي : ــ استر على ام لسانين.. الا تعاااااااالي صار لي اسبوع ورايح عن بالي .. ويش اخبار نتيجتش مو المفروووض خلصتي اختبارات من زمان وطلعت ..؟؟

ريما تغطي وجهها بكفينها..

ليلى بسخريه:

ــ امشي ياخوي بس امشي.. لا تسال عن امور ان تبدو لكم تسؤكم..

ــ بل .. اجل انا اللي اقول ياسااااااااتررر.. طايحة النسبه في الحضيض هااا..

ريما تسوي روحها ماتسمع وركض لغرفة امها وابوها..

ليلى وعلي وراها..

علي :

ــ ايه.. مثل ما قلتو لي الطراد انباع.. و عطيتوني فلوسه اتصرف بهم.. وبصراحه خايف لا يضيعو على خرطي .. واقعد لا شغله ولا عمله.. فويش رايكم اشتري ميكرو واترزق الله به..

ابو علي :: ــ اللي تشوفه ياولدي واللي يريحك..

ام علي : ــ هالشغله ياولدي يبغى ليها صبر .. وانت قدها الله يرزقك..

ليلى ابتسمت: ــ عساه خير يعطيك ان شالله خيره ويكافيك شره..

ريما : ــ هههههههه خساره خلصت مدرسه شان استفيد..

علي يمصع اذونها بمزح..:

ــ يصقع المصاااالح..

وطلعو من الغرفه

الا التلفون رجع يرن.. ردت هالمره ليلى

ريما: ــ يوم التلفونات العالمي..

علي : ــ هدارات يالبنات..

ريما : ــ صخ خلني بتصوخ..

ــ يصقع دي لهجه.. صخ واتصوخ.. تصوخي تصوخي..

ريما تضحك:

ــ مكحين ساره الحين علا..

ــ بل عليش ويش دراش..؟؟؟

ــ احسدني احسدني.. سمعتها تسالها عن سوسن

ــ منهي سوسن بعد؟؟؟

ــ تشيه ويش عليك من بنات الفررريق .. ناوي تخطب

ــ استحي على وجهش يا نحووسه..

ــ هههههههه مالك الا زنبوه .. طرت لو طحت..

علي عفس حواجبه وقام عنها..

ــ اقوم بس عن سوالف هالبنات,,..

ريما تفكر :

ــ مادري لويه هالرجال ما يحب طاري هالبنيه.. مسكينه ويش مسويه فيه..

علي راح غرفته وسكر الباب عليه..وفي باله..

ــ ليش مو راضيين يفهموني .. ولازقين فيني هالزينب لزق .. حرام عليهم يوهمو البنيه وحرام يوهقوني وياها.. اف من هالحركات وهالعادات.. يااارب ترفع حظها و تزيحها عن طريقي ...

على سريره .. جواله .. كان يولع ويطفي .. يعني مكالمه او رساله

راح له.. لقى مكالمه من رقم غريب .. وشوي رساله فتحها... وقعد يقراها ...

وهو منصرع... وقعد عالسرير .. وعلى طول اتصل بالرقم...

الى الملتقى

وكل عـــــــــــ:)ـــــــــــام وانتم بخيــــــــــــ ;)ــــــــــــر

هلا اختي

وانتي بخير

عيدك مبارك

تسلمي على البارت الحلو

مسكينه زينب علي مايحبها

لاهنتي على البارت

بس بكره في بارت

ناصر راسل رسالة لأشرف ~ : )

أمور / الله يعطيكـ العافية
وكل عام وانتي بخير وبألف صحة وسلامة
عيد سعيد وينعاد عليكم بخير

صبــآآآآآآآآآح الخيرآآآآآآآآت ،،
خووووش أحداث ،،
بس مسكييين عادلوووووهـ كسر خاطري ،،
عجبتني سالفة الحملهـ المميزة ،،
خلهـ يجي جنب بيتنا يحصل ألاااااااف ،،
من خبالة اليهالووو إلي عندنا و إلي حوالينا ،،
و ناصرووووهـ تصقع إبليس الفضول و أخوانهـ ،،
يعرف يسحب الحشي ،،
و اللهـ أجواء بيت أبو علي صااايرة تسر الخاطر ،، << أن شاء اللهـ دوم موب يوم يارب ،،
و ياللهـ أموووورهـ خلي أم مؤيد تتقدم لـ ليلى لهـ ،،
و شرشف لـ حينب ،، لكن عاااادلوهـ مسكيييييييين ويش بيصير فيهـ ،،
أمممممممم أني متحمسهـ لـ وقت يشوف هشام اللوحهـ ،،
لو اني وياهم كان عددددل أستانس ،،
خيهـ من هو المتصل على علي ؟؟؟!
أبهااااااام الموضوع ،،
ما في توقعات المخ ميييييح عاالأخر ،،
بـ إنتظار البارت الجااااري ،،
يعطيكـ ربي ألف ألف عاااااافيهـ ،،
و سلمت يمينكـ ،،
خااالص التحاااياااا ،،
للدموع إحساس ،،

كل عام وانتي بخير يامور

وجزء كشوخ مسكين عدول

ومسكينه زنوب متعلقه في علي وهو مايحبها

ننتظر الجديد

موفقين

,,,

عيد سعيد
وكل عام وانتم بالف خير

والجزء مره رووووعه
يسلمووووو
وبانتظار البارت القادم

تحياتي

احس نفسي من زماااان ما علقت على الاجزاء والسموحة خيتو
مع اني مديمه على القراءة

بصراحة البارت ابداع ثم ابداااع على الاخر
والله يعطيش العافية ما قصرتي

ههههه ويلي على عدووووله ما قصر في اولاد الفريق هههههه يعرف يلعب على عقولهم خخخ


واحلى شي بيت ابو علي بصراحة ابدااااع رجعتي لهم الفرح وعساه دووم يارب

اهاااااا وعلي طلع ما يبي حينب قصدي زينب هههه وهي كلاااا اتانيه ومستعجله عليه تبي اتعرس ههه

اممممم
توقعي اللي متصل على علي والرسالة اللي قعد يقرأ فيها
هذي اكيد ثم اكيد ( اسمع يا الواثقه هع هع ) ان علا متصله على رقم اخو ليلى( يعني علي ) لانه من فتره اتصلت ليلى على جوال اخوها وكانت علا ما ترفع ارقام غريبه صح

بس علا ويش تبي من ليلى الله اعلم خخخ

ويسلمو خيتو على الباااارت الروووعه مثلك غاليه
لا خلا ولا عدم
والله يعطيش العافية ما تقصري

وتبغي الصراحة اني مرررره انقهرت لما قال اخوي المتحيير انه القصة منسوخه الى منتدى ثاني والله اقوى على الظالم اللي اترووح تعبش هدر بس ويش اقول ؟؟

الله يعطيش العافية
وكل عام وانتِ بألف خير وسعادة
وعساكم من العيدين والسعيدين والفايزين
واتمنى لكِ كل الموفقيه بإذن الله

دعوااااتك خيتو

اختي ابري ذمتي بس اسف ما خزنت الرابط بادوره لك وان شاء الله اشوفه

ويعطيك العافيه

وسموحه

اهلا بك يااااا اميتنا ,, اميره المرح
ابداع xابداع
مايحتاج اقوول
بس حبيت اسجل تووواجدي وحضوري الدائم
ومتبااركه بالعيد انتي وكل الاعضااء
وويعطيك ربي العاافيه غناتي
ووننتظر البارت لنيوو
بس بجد احس عااادل يعطي جو في الباارت شي خخخ صحيح يقهر اوقات بس معور بقلبي ..
حرام اموور زوجيه هههه وفرحي قلب اميمته
: )
وبالتوووفيق

اختك ,,بيسان

متباركين بالعيد جميعاً
وعساكم من عواده
ينعاد عليكم بالخير انشاء الله
اشكرك اختي على جهودك المذولة
وبصراحة البارت حلوة كتير كتير
تسلم دياتك على هيك طرح
لاعدمناكي يارب
<< ودي اشوف الثار الي بتاخديه من الحرامية>>
والله عيب وقلت ادب > يعني لو ماقلتي انه غير مسموح نقلها ماعليه
وياخوفتي الي ناقلنها يقول انه من تاليفه بعد << المصيبة تكمل هنا
>> مابي اهدر
بقوم اصلي
<< عشان نجهز للغدى ^_^

تمنياتي لكي بالتوفيق
خيتو

كــل عآم وأنتـــو بخير يآلغوآلي..
وعيدكم مبآآآرك ..
أمورتي..
جزء فلته أعتبرتهآ عيديه أني هع هع
ومبرووك الأجآزهـ ع الأقل تستريحي شوووي من المشآآوط<~~~أي مشآآوط روحي نآمي
أحـــم بقولك لمآ قآل أخوي المتحير أن في نفرهـ من النفرآت حآطه القصه بمنتدى ثآني
حكتني أيدي ورحت قوقل الجميل وشفتهآ
وشفت ردش ...أبضآآآآآآي تعجبيني
الموهيييم..
أني أتوقع نآآصر رآسل إلى أشرف ألحين بتقولو كيف نآصر والرقم غريب وأشرف أكيد عندهـ رقم نآصر
أني أقوول ليكم ... أخد ليه شريحه ثآنيه يمكن أو هوه عنده رقم ثآني بس شرشوفي مآهو عندهـ هذآ الرقم..
ومكتوب في الرسآآله <~~~خلوهآ على أميرهـ تكتبهآ ليكم هيه حفظتهآ

تسلمين أميره ع الجزء الرووووعه
ربي يعطيك ألف عآآفيه
لآعدمنــــــــآآك يآرب
تحيآتي
ضحكوهـ البطه

ههههههههههههههههههه
عادل موتني ضحك..
خصوصاً لما قال للأطفال حملة مميزة
ههههههههههههههههه
آخرتها طلعت عليه ..
روه روه بس.. ههههههه>> انقلبت اني بعد هندية:toung:

يعطيك العافية حبيبتي أمووووووووووره..
وكل عام وأنتو بكل خير..
وأيامكم سعيدة إن شاء الله..

موفقة لكل خير إن شاء الله تعالى..
دمتي بعين المولى الجليل..

أنا ماقول كل عام وأنتم بخير و لكن أقول أنتم الخير لكل عام
كل عام وأنتم بألف خير
عساكم من عواده عاده الله عليكم وعلينا بالخير والسرور
وتقبل الله طاعتكم

بارت رائع بانتظار الجديد

أعذروني ماعندي تعليق مخي مسكر خخخخ

تحياتي

مـشـكـوـوـرـرهـ

خـ ي ـتـوـو

ههههههههههههههههههههههههههه عادلوو

انـسـانـ ولا اروع

توـوح ـفه

ههههههههههههههههههه

جااريـ الانتظاار

تحياتوـو

اختي اميرةابري ذمتي

وانا اسف لعدم المساعدة

خخخخخخخخخخخ غربال الله عادلوه

مشكورةبانتظار الجديد

ولو تحطي لي رابط المنتدى الذي به الموضوع وتضعي لي تصريح

الجزء أكثر من جنااااااااان
تسلمي أموره
بإنتظار الجزء الجديد

بحثت في القوقل
بس ماشفت الموقع
<< شفت موقوع بس لازم اسجل @!@
>> كان ودي اشوف ردك بس للاسف!!
المهم انك تاخدي حقك من الحرومس ^_^

مرحبا

عساكم من العايدين السعيدين..
ويعطيكم الف عافيه نورتوني
ربي لا يحرمني منكم..
المتحير .. لا تشيل هم خيو ومحلل ومبري ,, وتسلم سويت اللي عليك..
وخلاص اميره قدها وقدود ,, تصرفت لحالي ...:rolleyes:
سجلت بالمنتدى اللي حصله اخونا الناري بعد
ورديت على اللي نقل القصه بدون اذني ....
بعدها انتقلت لقسم الأقتراحات والشكاوي .. و قدمت لأدارتهم شكوى وضعت فيها رابط القصه عندهم ورابط القصه عندنا...
وبعد كم ساعه .. جيت بدخل القصه باشوف ويش صار...
لقيت...

اميرة المرحPrincess.M, لا تملك تصريح بدخول هذه الصفحة. قد يكون هذا أحد الأسباب التالية وربما بسبب آخر:

1. حسابك قد لا يكون فيه إمتيازات كافية لدخول هذه الصفحة. هل تحاول تعديل رسالة عضو آخر, دخول ميزات إدارية أو نظام متميز آخر؟
2. إذا كنت تحاول المشاركة, ربما قامت الإدارة بحظر حسابك, أو لا يزال حسابك بإنتظار موافقة الإدارة.

يعني اخذت حقي .. والحمدلله .:clap:. تم حذفها لديهم.. ولقطع الشك باليقين...
سويت بحث في منتداهم مالقيتها..:shiny:

انتظروني الليله مع الجديد..
لا اعشق شيئا كعشقي للمتابعه معكم.. كلما سنحت لي الفرصه والظروف...:embarrest:
.
.
.
دمتم بخير
وبحفظ الرحمن

هلا امورة اي اني بعد اول ماقال المتحير القصه احد ناقلنه رحت سويت بحث ولقيتها وشفت ردش بعد

ويوم ثاني اروح اشيك ئله حذفوها

يعني تمام ووقفوها

موفقين

مرحبـا
عفر اخبار الساعه.:weird:.. وصلني عبر الأيميل رد من ناقلة الروايه بعد حذفها.. مع ردي ...
اترككم مع ردي على حقي ..وردها علي ...
وكونو حكما هل اخطأت بشيء ؟؟:huh:

اقتباس:

---

مرحبا..
جميل ما اراه هنا..
ولعل الأجمل كونه عيديه من ناقل لروايتي بدون اذن مني ؟؟
وبدون ذكر اسمي حتى...

سؤال يطرح نفسه في هذا المتصفح..
من الأدب ان نستأذن الأخرين قبل ان نأخذ شيئا من حقوقهم
شاكرة للناقل وضع وصف المنقول
ولكني كما سبق وكررت وحذرت بأني لا اسمح ولا احلل ولا ابيح اي احد ينقل رواياتي ..
علما بأن المنتدى المنقول منه.. وهو شبكة الناصرة الثقافيه..
به خاصية منع النسخ ..
وانا من طلبتها من الأداره.. لما لاقيته من اقلام اخذت جهدي ببرود ونشرته بدون اذني ..

_اطالب .. بوقف اكمال الروايه هنا...
و لكم شكري .. على هذا النقل !!!!!_

سأعود .. لأتأكد من حقي..
وحبذا لو قامت الأداره بحذفها..
حينها سأكون شاكره وممتنه...


على فكره تتواجد عضوه اسمها اميرة المرح هنا .. لديكم لا صلة لي بها سوى تشابه الألقاب..
اكتشفت ذلك من تسجيلي فأتخذت لقبي الآخر المتعارف عليه Princess.M

كل عـــــــــــام وانتم بخيـــــــــر
واتمنى ان تبطلو عادة المنقول..
خصوصا اذا كان من دون علم اصحابه !!

اصابع الكف ليست سواسيه..
فهذا المنتدى معروف و له رواده الكبار والمبدعين...
فلا اود ان يكون هذا التصرف مسيئا له..

دمتم بخير
وبحفظ الرحمن

---

تفاجأت بردها هذا علي .. اقولها وبصراحه.. عجيب غريب..:weird::notrust:

اقتباس:

---

انا آســـــــــــفــــــه يا اميره المرح وماراح انقل من عندش مواضيع

وروحي بلغي عني عند المشرفين وقولي لهم يحذفونها

ماني محتاجه لرواياتش خليهم لش تـــــــــــــــــــــــــــــــــــــــــــــــــ ــــــــــــــــأســــــــــــــــــــــــــــــــ ـــــــــــفــــــــــــــــت

يوم نقلت الموضوع

معنى اني كنت من متابعين رواياتش بس اللحين خلاص ماباتااااااااااااااااااااااابع

وآآآآآآآســـــــــــــــــــــــــــــــــــــــــ ــــــــفه مره ثانيه

ملاحضه:
ترى انا ماني قليلة ادب وانا اصلن سجلت في شبكة الناصره الثقافيه بس ماقبلوني عشان كذا ماقدرت اعرف كيف استأذن منش وترى انا زعلت منش
واتمنى انش ماتزعلين وتفهميني غلط من الكلام الي قلته
وبس هذا الكلام الي عندي وسلامتكم

---

هالرد اتمنى تشوفه اللي نقلت القصه

الله يسلمش خيه... وماضاع حق وراه مطالب.. شلون ماقبلوش الناصره ..؟؟
مستحيل المنتدى مايقبل احد الا اذا الأسم متكرر او مافعلتي العضويه هذا اولا..
وثانيا حتى وان كنتي زائره وعذرش انش ماقدرتي تسجلي على شان تستأذني .. فالناصره لا يسمح بالرسائل الخاصه و لا يسمح بالنسخ سوى بالأقتباس وهذا خاص لمن لديهم العضويه...
ثالثا.. اذا كنتي نقلتيها من منتديات اخرى مع العلم اني وضعتها بعضويتي في منتديين اخرين مع اسبقية الناصره في طرح الأجزاء.... فمالش عذر .. لأن المنتديين الأخرين بهم خاصية الرسائل و تقدري تستأذني فيهم..
خيه.. لا تحطي اعذار ولا داعي للأسف...
والله الغني ...
اتوقع ماقلت شي يزعل ولو كنتي في محلي سويتي الكثير
مافهمتش غلط ولا بزعل .. تأكدي من هالشي.. << على فكره عجبتيني زعلتي مني وما تبغيني ازعل .. ياترى مين فينا الغلطان عالثاني و يحق له الزعل ؟؟؟
ولا قلت عنش قليلة ادب الا اذا فهمتي هالشي من كلامي فهذا راجع لش ..
المنقول شيء مو جميل ابدا بالأخص اذا كان جهد وتعب وفوق هذا .. بعده ما يخلص !!

مؤسف .. فعلا ... هاللي يصير .. مؤسف
دمتم بخير
وبحفظ الرحمن

اختي اميرة منتي غلاطانه ولاشي وهذا حقكٍ

اللي سويتيه عين العقل اختي

موفقين لكل خير ويبعد عنك الشر يارب

منتي غلطانه حقك لك

وبألانتظار

هلا أخيه أختي العزيز أبد والله منتي غلطانة الغلط غلطها هي اول لانها أخذت القصة بدون إستاذان مع أنك معلنه ممنوع النقل

بالإنتظار عزيزتي

مســــــــــــــــــاء الخيرااات ،،
خيهـ بـ صراحهـ ،،
حقكـ و إلكـ ،،
و الغلط غلطها ،،
و تتحمل إلي يجيها ،،
و زين سويتي ،،
تصرف حكيم ،،
و بـ إنتظار الجديد ،،
خااالص التحااااياااا ،،
للدموع إحساس ،،

لآآآ والله يآلغلآ منتي غلطآآنه
الغلط غلطهآ ..
وردك كآن بأسلوب لبق
مآنطيتي عليهآ وشتمتيهآ <0000أخلآآآق فديتك..
وكل التبريرآت اللي ذكرتهم مآيدخلو المخ !
هسآلفه دكرتني بسآلفة الخآطرهـ : (
مبروك غنآتو أخذتي حقك
ننتظر جديدك قلبوو
تحيآتون
ضحكوهـ البطه

زين سويتي فيها خيتو اموووره وعين العقل
وتستاهل كل اللي يجيها وخلها تزعل بالطقاق :mesb: هع هع

اسمحي لينا شكلها انقلبت الصفحات الحاليه الى ابراء الذمه وآخذ الثار من اللي ينسخو شي مو تعبهم وينسبوها اليهم دون استئذان بجد الوضع يقهر ويحز بالنفس :angry:
الله يعطيش العافية ما قصرتي صج قدها وقدووود

وما اقول الا الله اقوى على الظالم من هيك عمايل
( انقلبت مصري لو سوري هههههه )

وننتظر البارت بفارغ الصبر
والله يساعدش غاليه

عجبني ردش امورة
وهم شي انك تاخدي حقك

للاسف النقل صاير عادة عن الناس
حتى المواضيع في كل المنتديات نفسها تقريباً
الا مارحم ربي ورزق المنتدى بأقلام ذهبية
تكتب من بنات افكارها

انا مابغا اعقب على الموضوع واجد لان هذا مو كان حل مشاكل او ماشابه
والمهم الحين انك اختي حقك
وزي ماقلتي ماضاق حق وراه مطالب

خيتو اميرة
اتوقع لو احد بيطلب نسخها << انك مابتعارضي صح
وتوقع لو احد نسخها من دون علمك وكتب انها من قول من شبكة الناصرة
او كتب بقلم المبدعة اميرة المرح << ايضاً مابتعارضي
يعني ماحد ليه حجة عليكي
بنتظار البارت خيتو