ماعرفتوني .. كثر .. ما عرفني ..

قررو يرجعو للسعوديه. وغيرو الوقت وصدفه كان سلمان واهله بيرجعو في نفس هاليوم و بنفس الباص.. الكل متأسف على ام حسين ,, ويحسو ايامهم بتمر بثقل وتعب لو ظلو بسوريا.. فرجعو كلهم ما عدا حمزة واهله..

هدووء شاحب في الباص.. ما يتكلم الواحد الا للشديد القوي..
سلمان قعد جنب رائد.. وصار يحاول يخفف عنه همه..
ــ خلاص ياخوك هونها وتهون ولا تكتئب .. هذا يومها رحمة الله عليها..
رائد : ــ الله يرحمها.. انا قهري على اللي انخدعت فيه وطلع من تحت لتحت وفضايحه بالجرايد.. لكن الله رايد اكشفه على حقيقته.. رحمة الله عليك يا عبدالله ياخوي..
سلمان : ــ عاد لا تظلمه ما تدري انت ويش السالفه بالضبط ,, مهما كان خويك هذا وعشرة عمر .. وهو بعيد ما تدري ويش ظروفه وويش مسوي.. وويش بتكون حالته اذا درى عن امه.. بس. اسمح ليي على اللقافه. مين عبدالله؟؟

رائد : ــ لا ابد ياخوك عزيز وغالي ولا لقافه ولا شي .. عبدالله هذا صديقنا يوم احنا صغار .. توفى الله يرحمه.. كان يحبنا ثنينا وهو اللي جمع بيننا ووصاني ادير بالي على فارس ولا اخليه ..
سلمان بهداوه: ــ والوصيه خبري بها لازم تتنفذ
رائد ساكت.. تنهد من قلبه .. ودار للنافذه يطالع الطريق..

فارس ما صرحو له خروج من المستشفى الا بعد 3 ايام.. وزينه صارت تروح وتجي تتطمن عليه.. وهو مو في وعيه مره.. والتعب مسيطر على جسمه..
ويوم طلع وهم ماشيين يشوفو تكسي هو ويا زينه .. تذكر جواله. اللي كان مقفل من فتره قفلته زينه وهم في المستشفى... فتحه لقى رساله من حيدر ,, كاتب فيها عظم الله اجرك ....
فارس اختلع دق على حيدر على طول... كانو في الحمامات نازلين يتمسحو لصلاة المغرب ..
حيدر يمسح كفه عن الماي وهو يسولف ويا رائد وسلمان وحسن..
طلع الجوال من مخباه.. وفتح عيونه..
ــ فااارس .. فارس المتصل.. اخيرا .. قرى الرساله..
رائد بعصبيه .. ــ رد عليه بس حط سبيكر ابغى اسمع ويش بيقول ..
حيدر حط السبيكر : ــ هلا فارس ..
فارس مختلع : ــ ويش صاير .. حيدر ويش فيك تعظم لي الأجر .. حيدر تكلم بسرعه...
حيدر مرتبك ومهو عارف ويش يقول ..
فارس صرخ عليه : ــ حيـــــــــــــــدررر .. الووو..
حيدر وكلامه يتكسر تكسير : ــ امك.. عطتك عمرها...
فارس انصعق مو عارف ولا مستوعب .. شبحت عينه .. وجمد واقف .. كانت زينه جنبه تسمع كل شي .. وخايفه من صريخه.. وبعدين يوم شافته جمد ولا تحرك وظل واقف .. وبلا وعي مد الجوال عليها زينه خذته مهي فاهمه ويش صاير .. بعفويه وبلقافه.. قالت : ــ الوو.؟؟؟
من سمعو كلهم صوتها اختلعو.. وصرخ رائد ..
ــ ويـــــــــــش بعد اكثرررررر من هالدليل ..
فارس يترنح داير راسه من الخبر .. وطاح مغمى عليه,,, زينه صرخت :
ــ لااا فااارس ..
طووط طووط طوووط,,
الكل سكت.. حيدر وسلمان وحسن .. وكلهم انظارهم على رائد.. اللي خلاص شياطين الدنيا تلعب في راسه..
وبقهر شديد .. وبحرقة قلب .. قالها بغضب :
ــ لعنة الله عليك.. اكررهك يا كذااب..
ومشى عنهم وهو مره معصب ..بيروح الإستراحه بيصلي ..
سلمان لحقه ومسكه من كتفه واداره لناحيته..
ــ رائد.. انا يمكن مالي الحق اتكلم ولا ادافع عن فارس لأني ما اعرفكم ثنينكم عدل.. بس اللي عرفته ولمحته ان علاقتكم بالمره حليوه.. واكثر من كلمه حليوه.. صراحه ما توقعت منك هالتصرف المفاجأ .. تحرى زين عن هالخبر .. شوف ويش صاير منهي دي بالضبط. والله يستر ليش ردت علينا وسكتت هو لا يكون صار فيه شي لا سمح الله... مو تصرف سليم منك ..على طول قلبت عليه وابدا ما كنه بينكم عشرة عمر .. المفروض ما احد يعرفه كثر ما تعرفه انت..

يالله .. رجع الزمن بورى برائد.. تذكر هذاك اليوم لما ظن بفارس ظن السوء وانه يتحرش بأخته بالجوال .. جملة سلمان.. ما احد يعرفه كثر ما تعرفه انت...
صار يسمع معاها في قلبه عتب فارس .. ــ وانا كلمن حولي اقول ليهم.. رائد هذا حياتي وخويي وكل شي بدنيتي.. وما عرفتوني كثر ما عرفني....
صراع داخلي عنيف بين طيبة رائد وتسامحه وبين شيطان غضبه وانفعاله..
الا ان شيطانه انتصر وبعصبيه رد على سلمان :
ــ اكثر من الدليل اللي سمعناه ما اظن فيه.. واوضح من الصوره والخبر اللي شفناه ايضا ما فيه.. سلمان.. لو سمحت لا تدافع عنه.. ما عرفته انا ولا عمري عرفته وانا اللي كنت نفسي اقرب اله من نفسه واعرفه زين ما زين .. وخلاص اللي بيننا بنهيه ما يشرفني اعرفه .. خلها تكون اللي تكون خطيبته عشيقته زوجته الطقاق..جعله ما يرجع... بروح اصلي ..
سلمان مو عارف ويش يقول : ــ طيب جايين وياك.. تقبل الله منا ومنك صالح الأعمال ...


حيدر متحسف ومتأسف زي سلمان.. راح لسلمان وبلا شعور حضنه.. وصار يصيح.. سلمان مختلع منه .. صار يمسح على ظهره :
ــ حيدر ياخوك.. ويش فيك .. هدي وصل على محمد وال محمد وامشي نصلي ..
حيدر وبصوت مخنوق..
ــ كانو مضرب المثل .. كنت احب القعده وياهم.. كانو اروع ثنين شفتهم .. غلاتهم لبعضهم حليوه .. عتبهم حليو.. هواشهم وزعلهم حليو.. سوالفهم و مقالبهم فيني تجنن.. سلمان.. ما اتخيلهم يتفارقو.. احس روحي.. حسدتهم

سلمان يهدي فيه..
ــ ويش تقول ياخوك.. لا حسدتهم انت ولا شي كلامك هذا كله مدح في علاقتهم.. واعجاب مو حسد.. هذا قدرهم وهذا اللي كتبه الله.. هدي ياخوك.. ويللا صلاه..

صلو وركبو الباص .. وكملو طريقهم...

وبالمستشفى مره ثانيه.. فارس .. دخل غيبوبه قويه اثر صدمه نفسيه.. زياده على تعبه الجسدي من الضربه.. زينه تصيح.. ولا هي عارفه ويش تسوي.. ماليها احد رجال يجي ويساعدها.. صارت تروح وتجي عليه.. لأن الدكاتره عطوه كم يوم ضروري يظل فيهم بالمستشفى...

وصلو السعوديه بالسلامه.. وكل واحد راح بيته.. دخلو وهم يسحبو الشنطات .. بتعب والم.. فاضل ..
ــ اللهم صل على محمد وال محمد.. الحمدلله على سلامتكم..
زهرا : ــ الله يسلمك .. اااه.. رحمة الله عليش يا امنا.. والله يكون بعون ولدش..
رؤى قامت تصيح ,, وبعفويه :
ــ كاسل خاطلي فالس .. ويش حالته الحين.. لائد ما كلمتوه ما قلتو له..
رائد صار يطالع امه وابوه .. ورؤى.. نظرات مليانه كلام.. وببرود ممزوج بقهر مخفي ..
ــ فارس خلاص انتهى..
زهرا طقت صدرها.. ورؤى اختلعت..
ــ يعني ويه انتهى..؟؟
رائد : ــ ما عاد له لزمه بحياتي..
فاضل منذهل منه..: ــ رائد ويش تقول و ويش صاير .. ويش فيه فارس ..؟؟؟
طلع رائد جواله.. وراواهم اياه. وقال ليهم على السالفه كلها واللي سمعه يوم يكلمه حيدر ... فاضل اندهش و سكتت ولا قال ولا شي ..
زهرا بقهر : ــ حسبي الله ونعم الوكيل .. رحمة الله عليها تعبت وربت وهذي سواياه.. انا لله..
رؤى خذت الجوال من ايد امها.. وصارت تطالع في الصوره.. صورته اللي انطبعت في خيالها رغم انها كانت كل تشوفه من ورى غطاها.. دموع طغت في عينها.. وغصه تليها غصه وهي تبلعهم بقهر.. وبألم...
وفي خاطرها صوت مخنوق يصيح دم و لوعه.:
ــ كان عندي امل انك تكون نصيبي .. وكنت احلم فيك بكل ساعه ودقيقه..
بس للأسف خانتني الأماني .. ومنت لي .. وحسافه.. طحت من عيني...

ركبت غرفتها وقفلت على روحها الباب وصارت تصيح.. وتصيح... لين نامت...

من بعد رجعتهم من سوريا .. قررو سلمان و حوريه وامهم يظلو كم اسبوع ويا جدتهم ام ابراهيم بالسعوديه.. قبل لا يرجعو البحرين.. وام ابراهيم من لهفتها عليهم.. ومن حزنها على فقد جارتها وصديقة عمرها ام حسين.. ترجتهم يقعدو وياها شهر .. اسمها المدارس مسكره .. وسلمان مافي شغل الا مشاوير خاصه وحوريه اجازه صيفيه..

صار سلمان يحاول قد ما يقدر يكون قريب من رائد .. و يواسيه ويحاول يحصل أي فرصه ممكن من خلالها يهديه من ناحية فارس كان ترجع المياه لمجاريها بس اسف مافي فايده..

وبعد اسبوع .. طلع فارس من المستشفى,, وهو ساكت .. ولا نفس ..
ويوم وصل البيت.. وقعد .. طلعت منه جمله وحده:
ــ ابرجع سوريا..
زينه صارت تحاول فيه يكون طبيعي وهذا حال الدنيا نفقد ناس غاليين كل يوم و نشوف ناس نغليهم في يوم ثاني .. وهو ابدا..
فتح شنطته.. وصار يدور فيها.. وشوي زاد التوتر وهو يدور .. وشويات نفر الشنطه كلها.. ولا تسمع زينه الا صرخه منه..
ــ جواااازي وينهوووووووو؟؟؟

باااقي تكمله لهالجزء .. ردين ويخلص لي رجعه قريبا ان شالله..

تسلمي خييه اميره المرح بس والله حرام انشاء الله


ما يفترفوا والله كانت علاقتهم حلوه مره حرام


تحياتي

لاااااااااااااا أموووووووووووووور حراااااام

لااااا يتفاارقوا خلييييهم وياااا بعض

لاااااااااااااا بعدين ما ادري ويش باسوي :weird:

ماشاءالله عليك أمور
قلمك ولا أروع ابداع ما شاء الله
تسلم الايادي
وأني متأكدة انه النهاية حلوة
زي حلاتك
وتسلم الايادي

اههههههههئ الجزء مرررررررره حزين
وين راح جواز فارس؟؟؟!!!

يا الله كاسر خاطري فارس
وزينة ودي أذبحها على لقافتها النحيسه

مشكوره على الجزء الروعه

الله يعطيك العافيه

بس لا يتفرقوا

ابيك تردي علي كلام النوريه صحيح

حراااااام و الله مسكين فارس ما يستاهل طيووب

ليش دائم الطيبين يصير فيهم كذاا << متفاعله حدي

تشكري على الجزء

ننتظر التكمله و يعطيش الف عافيه يارب

موفقه

أميروووووووووووووووووووووه
والله لو أنتين جنبي كان ذبحتش
تدري أكتب ردي هذا وعيوني مليانه دمووع
ذابحه روحي من الصياح
والله مسكين فارس
قاهرني رائدووه ثقيل هالدم
صرت ماأطيقه أبداً
أميرووووه إذا ماعدلت الجزء الجاي باجيش بالعجره
خخخخخـ
يسلمووو بالإنتظار
تحياتي

:sad2::sad2:
http://www.alnassrah.com/images/icons/bawling.gif

http://www.alnassrah.com/images/icons/bawling.gif

مسكين فاارس مايستاهل ينقلب الزمن ضده وحتى صديقه بعد ،،،،
وأم حسين بعد توفت الله يرحمها
الدنيا صايره ماتسوى في نظره أكييييد >>> متفاعله ومتحمسه مرررره

بانتظار الجزء الجديد علاش يكون مايندرى ؟؟؟؟
أهئ أهئ
وااااااء بفجرها صيحه ...

بالانتظار وبجانبي كراتين النشاف تتنظر بعد

الله يعطيش ألف عافية أموووور:sad2:

ما اقسى الظلم.. وما اعظم مرارته على النفس.. هذا حال دنيانا.. ولا نملك فيها الا الصبر...

شكرا على المتابعه.. شكرا على التفاعل..
اترككم مع تتمة الجزء ...

زينه مختلعه :
ــ اشننو وقع.. ؟؟؟ << ويش صاير ..؟؟
فارس مهو عارف ليها وللهجتها ..
ــ جواااازي كان بالشنطه..مادري وينهووو
زينه :
ــ وين كاينة قبل لا تروح عن الدار ..؟؟؟
فارس :
ــ تركتها تحت الكنب خشيتها تحته..
زينه قامت تدور وياه.. تحت الكنبات وفي الأماكن.. ولا حصلو شي
قعد فارس عالكنبه وهو يضرب على فخذه..
ــ امي .. ورااحت.. وانا ... الحين في غربه و جوازي مااا ادري وينهووو.. وشوف عاد متى اذا بلغت عن فقدانه يعطوني بدل فاقد..يالله يااارب ساعدني .. وحط كفه على وجهه وخلاص يحس نفسه مو طايق الدنيا..
شوي الا يسمع صوت صياح.. رفع راسه.. شاف زينه تصيح..
سألها: ــ ليش تصيحي .. زينه .. ليش ؟؟
زينه : ــ انا السبب من طلع لك الخايب في الزنقة وتتدابز معه والمصايب بدت .<< زنقه= زرنوق,,, تتدابز = تتشابق
فارس مع انه ما فهم لكلامها عدل بس فهم مقصدها..:
ــ الذنب مو ذنبش يا زينه.. كذا الظروف صارت.. الله يكون بالعون..
قام بيغسل وجهه.. وقامت زينه :
ــ برجع لدرانا اذا بغيت ايا شي قل لنا ونلبيه ان شاء الله..
فارس ابتسم وهز راسه وهمس : ــ ان شالله,,

وطلعت زينه..
فتح فارس الماي .. وصار يطالع في المرايا.. صوت الماي وهو يصب صاير مزعج بالنسبه له.. حط ايده لفتره طويله تحت الماي ,, رفع كف ماي وغسل وجهه بهداوه رفع كف ثاني وغسل اسرع ثالث اسرع واسرع شوي فقد السيطره ووصل لسابع وثامن و عاشر.وصار يكفخ نفسه بالماي ... وقف غسيل ورجع يسمع صوت الماي .. صار يضرب في الماي ويطشره ودموعه تسيل ..
طلع كل حرته.. بعدها سكر الماي وراح للكنبه.. عجيب امره البيت واسع وفيه من الغرف مليون.. بس ما تحرك من على هالكنبه.. قعد عليها.. ورفع ملفع امه من بين الثياب والأغراض المنفره.. ومسح فيه وجهه.. ويوم وصل لجهة خشمه اخذ نفس عميق وطلع الزفرات اهااات شوي وتطلع وياها روحه...
اخذ نفس ثاني وثالث وبالرابع صار ينوح ويصيح.. انسدح وهو لسا حاط الملفع على خشمه,, وصار يقلب في ذكرياته معاها ودموعه تصب عالخد شلال...
لين غفت عيونه...


عبدالله: ــ مهو ميت الا ميت الضمير .. والكل بيموت ولا بيبقى الا وجهه سبحانه..
رائد: ــ عبدالله .. مانى قادر استوعب هالبلاوي .. ام حسين وراحت وفارس مصدوم فيه وربي مصدوووم
ــ خويك غلاك .. لا تخونه وتتبع هواك..
ــ عبدالله تكلم وياي عدل .. تعبان وربي .. محتاج الك.. فارس خذلني بتصرفه هذا..
ــ ان بعض الظن اثم..
ــ بس كل شي يثبت صحة الكلام اللي ضده..
ــ ما بقى له في الأيام خل ولا صاحب .. رائد.. فارس لا تخليه..
ــ ماني قادر استوعب مانى قادر اتحمل .. احس نفسي مخدوع فيه مو طايقنه افهمني ..
ــ فارس ..لا تخليه ..
ــ عبدالله ارجوك لا تغصب علي
ــ فارس .. لا تخليه ..

انتبه من الحلم.. وهو بحالة خوف شديده .. تنهد وقرى الفاتحه على روح المرحوم .. وشرد في همومه.. وبألم وغصه تساؤلات كثرت في خاطره..ليش يا فارس ..؟؟


المحادثات بالمسنجر صايره تزيد.. وايمان تعلقت بهالسعد وصار كل دنيتها ,, تطور الأمر وما مانعت تكلمه بالمايك.. واستخدم برنامج لتغيير الصوت لا تكتشفه انه مشعل .. خلاص ايمان استولى بليس على عقلها,, لين طلب منها يشووفها فوافقت.. وتم تحديد اليوم والساعه.. بس بعد اتفاق .. كان من سعد اللي هو مشعل ..
ــ حياتي .. انا ما ابي اذيك.. وابيك تثقين فيني وتتطمنين.. وعلى شان تتطمنين اكثر .. ترى عايلتي فري و اختي كل شي اقوله لها .. ومستعد اجيبها معنا تتعرفين عليها..
ايمان طارت من الفرحه.. ما همها أي شي .. بس تبغى تشوف هالسعد وكيف صاير وهل يستاهل تفكيرها هذا فيه والا لا..

وجى اليوم الموعود.. وطلعت متبرجه وحالتها حاله.. ركبت مع بابو سواقها قوي العين واللي ما يستحي . ويويديها وين ما تبغى ويدري عن بلاويها . ووصلها لعند مزرعه كانت مكان اللقاء,,,
وشوي شافو في الظلمه سياره تكبس انوارها.. عرفت انها سيارة سعد..
صارت تطالع من بعيد في السياره وشافت ويا سعد صحيح وحده متغطيه ..
و اكد ليها بابو اللي شافته..
فنزلت وراح بابو عنها.. فتحت الباب الوراني الا واحد قاعد ورى ..
ــ هلا والله بحياتي .. هلا والله بالغلا كله...
ايمان مذهوله ومنصرعه.. راحت قدام للي قاعد مكان السواق .. وحطت ايدها عالنافذه:
ــ سعد .. انت تعرفه هذا ..؟؟
مشعل ورى ميت ضحك عليها :
ــ سعد.. انا سعد. قلت لك وانا مشيعيل بيجيك يوم ,.. اجل انا تهينينني وتخليني انتظرك مثل الحمار .. انا تذليني .. ما عاشت ولا كانت بنت تذلني الا اذلها واكرهها حياتها.. وبعدين هذا خويي .. وهذي اللي معه ترى مهي بخته.. هذا خويي بعد..
ايمان خلاص رجولها مهي شايلتنها.. صارت تسب وتلعن في مشعل .. وراحت تركض .. صرخ مشعل ..
ــ تعااااااااالي وين بترووحين.. ليل ومزراع .. راح نلحقك بالسياره..
وايمان تركض .. طلعو ليها ركض ثلاثتهم.. ومسكوها ودخلوها المزرعه..


لا ادري .. الى اين اسير.. فدربي بات بالعراقيل التي صنعتها بيدي مثقلا.. وشاقا.. وصعب عسير..
دنياي الفانيه.. ارتجي منها حضن يدفئني ويطلق بوحا في قلبي اسير.. تائهه محطمه.. ولا املك في عمري سوى لحاف دموعي وصبري الحصير...

صوت حبات الكي بورد والطق عليهم . ابتدى ينقل هالكلام من الورق لشاشة الكمبيوتر . يقطع سكون الليل .. كان هدووء شاحب .. والكلمات تنكتب مع حركة الأصابع بعفويه ..
تختم خاطرتها مليئه بالحزن .. ينيرها شيء بسيط من الأمل :

على قارعة طريق الأمل .. نثرت عشقك الممزوج بالأماني .. لعلي المح طيفك يأتي يوما ما.. ليحرر قيودي .. و ينسيني مر اهاتي .. ليتني متت قبل ان اولد.. وليتها ماتت معي كلماتي ..

صوت الباب يطق .. ويقطع معاه الإندماج.
ــ مين..
ــ اني ..
ــ تعالي ..
دخلت حنين على سمر ..
سمر : ــ ما نمتي للحين ؟؟
حنين : ــ اكلم حوريه عالمسنجر . عورت راسي كني مو تارسه عينها كل شوي تقول روحي شوفي سمر اذا ما نامت خلها تشبك ابغى ايميلها حق اكلمها واحشتني ... فجيت استأذنش .. عاد انتين منتين شابكه.. تعبتيني مشواااار ..
سمر : ــ ههههههه احسن لا اجل كل شويات ناطه علي تبغي شي ,, وحوريه شابكه من وين ..
حنين : ــ من جهاز خالها ,, سمرووه اخاف صاكتني بلوك من صاقعه ..
سمر : ــ لا .. ديليت مره وحده..
حنين : ــ تسوويهااا
سمر : ــ وجهش .. روحي بس الحين بشبك وضيفيني وياكم في محادثها وخلها تاخذه..

وتمت الإضافه..
نك نيم سمر كان..
ضاع عمري مرتين .. مرة قبل أن ألقاك .. والثانية .. عندما لم أعد ألقاك
وحنين..
يا ليتني في جيبك ريال مشقوق يبقى معك ما يقبله اي دكان
وحوريه..
Ho0r
وصارو يسولفو ويا بعض .. حوريه سألت سمر ويش تسوي وعسى ما ضايقتها ..
جاوبتها سمر ..
ــ لاا.. بس كنت اكتب خاطره..
حوريه طلبت من سمر اذا مافي مضايقه ولا لقافه.. تخليها تقراها سمر ما مانعت بالعكس رحبت .. وقالت لحوريه انها مشتركه في المنتدى الفلاني و بأسم صمت السنين.. اذا حبت تقرى ليها ...
وشوي دخل سلمان . وشافها قاعده عالمسن.. وصار بعفويه يطالع نك نيمات حنين وسمر .. وصار يضحك على نك نيم حنين .. يضحك ويضحك.. وشوي طلع ريال مشقوق من مخباه.. وصارت حوريه تضحك زياده.. وفتنت عليه.. قالت ليهم ان اخوها سلمان شاف نك نيم حنين وطلع الريال .. وماتت حنين ضحك.. شوي سلمان لفت نظره نك نيم سمر .. وجته غصه.. تذكر نك نيم حبيبته اللي ودعت.. كان نقيضه بس بنفس الوقت يشبهه...قعد على الكرسي وتنهد..
ــ مسحتي ايميلها..؟؟
حوريه عرفت مقصده وردت بهداوه:
ــ لا..
سلمان :
ـــ انكتب لي عمر مرتين.. مره يوم اشوفك.. والثانيه وانت نصيبي واحلى ايامي معاك..,,
حوريه : ــ الله يرحمها
سلمان ابتسم: ــ يارب .. مستحيل انسى هالنك .. ما انساه ولا انساها
استأذنت حوريه من سمر وحنين وقفلت المسنجر ...

وطلبت من سلمان يقرى خواطر سمر .. لأنه يكتب بعد وقالت تبغى رايه فيهم..
قراهم وابدى اعجابه الشديد فيهم..
ولما وصل لهالخاطرتين..
لا ادري .. الى اين اسير.. فدربي بات بالعراقيل التي صنعتها بيدي مثقلا.. وشاقا.. وصعب عسير..
دنياي الفانيه.. ارتجي منها حضن يدفئني ويطلق بوحا في قلبي اسير.. تائهه محطمه.. ولا املك في عمري سوى لحاف دموعي وصبري الحصير...

على قارعة طريق الأمل .. نثرت عشقك الممزوج بالأماني .. لعلي المح طيفك يأتي يوما ما.. ليحرر قيودي .. و ينسيني مر اهاتي .. ليتني متت قبل ان اولد.. وليتها ماتت معي كلماتي ..
سلمان ــ دنياي الفانيه.. ارتجي منها حضن يدفئني ويطلق بوحا في قلبي اسير ,,,
ليتني متت قبل ان اولد.. وليتها ماتت معي كلماتي ..
أيــــــــــــــــــــــه والله... روعه ... واكثر من روعه..مين اللي كاتبه هالكلمات..
حوريه بإبتسامه :
ــ سمر ..
سلمان:
ــ أي سمر ..؟؟؟
حوريه :
ــ سمر رضا الـ ... اللي سافرنا اياهم..
سلمان:
ــ اهاا ما شالله روعه ..
حوريه :
ــ هي صاحبة النك اللي ذكرك بالمرحومه..
سلمان:
ــ والله...
حوريه:
ــ ايه.. وعلى فكره .. تراها تشبهها في اشياء وايد..
سلمان كشر حواجبه:
ــ ماليها داعي هالهدره.. تصبحي على خير ..
حوريه مستائه منه : ــ زين.. وانت من اهله..
وفي بالها .. الله يغير حالك يا اخوي
وطلع من عندها وهو يفكر في هدرتها .. ويهلوس ويا روحه .
ــ هه هدره فاضيه..

طلعت من المزرعه.. متحطمه.. نفسيا .. جسديا.. ما قصرو فيها.. دموعها على خدها تسيل .. وتلعن نفسها والساعه اللي طلعت فيها من بيتهم .. تمشي وهي حايره.. خذو منها كل شي .. فلوسها جوالها.. واثمن ما تملكه.. شرفها.. ايه خلاص ضاع وضاعت ايمان..
تمشي وتتعثر الخطا.. شافت سد قريب من المزرعه.. وقفت على الحافه.. تنهدت..
و بحرقه صاحت.. ورمت بروحها فيه...

لفتت نظر مجموعه من الشباب كانو طالعين من مزرعه.. وشافوها رمت روحها..
كلهم خافو لا يبتلشو بها.. الا واحد خذته النخوه .. وراح للسد .. ونزل وطلعها وكانت مغمي عليها .. خذها المستشفى. اللي اكد انها متعرضه لأغتصاب ... ويوم خذو اقواله.. بالتحقيق .. اضطرو يحجزوه عندهم لين تطلع نتايج فحص الـ DNA ولين تصحى من غيبوبتها وتبرأه من أي تهمه ..

والى اللقاء غدا..

اميررررررررررررروه :


موتيني صياااح خلاص يكفي :sad2::sad2:


كفايه انت وبعض الناس بالمسن مستلميني

وساعه صياح وساعه ضحك


حلم رائدوه وطيحة ايمان ذبحتني تجرعت الغصه تلو الغصه :sad2:


ننتظر الاحداث الباقيه وان شاء تتعدل الظروف

مشكورة أميرة على الجزء الرووووووووعه

تسلممممممممممممممممممممممي

السلام عليكم
خيه اميرة هذه اول مشاركة لي المنتدى حبيت انها تكون رد على روايتك الأكثر من روعه هالرواية من جد خلتني اصيح من قلب تاثرت بها مرررة وانتي تكتبيها اقول ياسبحان الله موهبة رائعه وكاتبة يوقف القلم لما يجي يوصفه كتاباتها, صراحة رواية روووعه وتجننن والكلام البحريني ولا احلى خخخخخ
من جد شجعتيني اني اكمل الرواية اللي كتبت فيها 20 صفحة واستمليت خخخخخخخخخخخ
اختي ياريت تكمليها ترى هذه اول مرة اقرأ رواية مو مكملة اموووت اذا ما تتكمل بس وي روايتش صراحة الواحد مايعرف ويش يقووول توديش بعالم ثاني صدقيني صرت انام واحلم بها هههههههه ياليت تكمليها أختي

تقبلي مروري
أختك /
دموع الوحدة

اميروه اذا ما تطلعي جوااااااز فارس بذبحش فاهمه

يالله عااااادي امور صفي النيه بين فارس و رائد

لانه رائد ما ينطاق بدون فارس

وإمانوه الغبيه تستاهل والله ماحد قال لها تروح له والله

وعلى فكره امور احلى نك نيم نك نيم حنينوه جناااااااااااااااااااااااااااااااااااااان

جااااااااااااااري انتظااااااااااااار الجديد

تحياتي

عازفت الاوتار

روعه هالجزء في حزن

الله يعطيك العافيه

مسكين فارس

رائد نحيس

روئ في هالجزء ماليها دور


جاري الانتظار

يسلمووو
أموووووووووووووووور
على الجزء اللي يصيح
والقصييييييييييييييييييييييير
مرررررررررررررررررررررررررره

بالإنتظار

تحياتي

هلووووهاا من وحده فانيه قصدي عضويه فانيه<<<ديك العضويه معجره ويايي مو راضيه تدش
وهني المعركه قايمه ولصياح ومادري ويه واني اقرا وابغى اردد وهوه مو راضي <<<ماعليناا
اميرووووووووه حرااام فويرس مايستاهل كاسر خاطري على قلبي
يعني امه ماتت صحيح مابنتعترض لان ماحد يموت ناقص عمر
بس يعني ارحمي بحاله شويي خليه يشوف جوازه لو طلعي ليه بدل فاقد
وخليه يرد السعوديه ويقول ليهم بالسالفه يعني حراام<<<متأفره وااجد
يالله بطييخ ننتظر جزء جديد
يعطيك العافيه
تحياتي
ضحكوه البطه

هلا والله فيكم
هلا بتعاليقكم وتفاعلكم الرهيب
اللي يثلج صدري ..
منورين هالمتصفح حبايبي ومشكورين وما قصرتو..
هالمره حبيت اخص بشكري خيتي دموع الوحدة .. تسلمي والله و يشرفني تكون اول مشاركه لش تنور عندي .:embarrest:. من ذوقش حبابه .. وكملي روايتش لا توقفي ,, وبنتظارها تنولد عندنا بالناصره .. واكون اول من يقراها ان شالله..
وبعد اشكر من قلبي ضحكوتنا الغلا .. اللي دخلت بعضويه جديده بس على شان ترد علي ..
اسأل الله الفجر القريب لعضويتش حبابه ..:toung:

منورين ويعطيكم جميعا الف عافيه

تفضلو الجديد..

فارس مو عارف ويش يسوي.. والتصرف السليم هو انه يروح لقسم الشرطه في المغرب ويبلغ عن جوازه المفقود..وبعدها يتوجه للسفاره السعوديه ويبلغ عن الفقدان.. ويقدم على طلب بدل فاقد.. وشوف عاد متى يطلع.. هذا غير الغرامه الماليه مابين 1000 _ 4000 ريال سعودي .. واحتمال حرمانه من السفر مدتها تنحسب من تاريخ تبليغه عن الفقدان..
فارس يبغى يتصرف باسرع وقت.. مو هامنه شي وحاسس كل الأبواب مسكره في وجهه,, زينه تحاول معاه قد ما تقدر ..

فتحت عينها... كان الألم يسري بسجمها كله.. نفسيتها تعبانه ومخنوقه.. واللي زايدنها الم واختناق.. انها متأكده ما احد بيسأل عنها.. ابوها لاهي من مرته وشغله وامواله .. و امها بعيده عنها مع زوجها ولا تدري ويش صاير ..
الممرضه تسألها ,, عن حالتها ,, جاوبتها بصوت مبحوح .. انها بخير ..
استأذنتها الممرضه بدخول رجال من الشرطه للتحقيق معاها في وضعها...
دخل عليها ..
الشرطي : ــ السلام عليكم..
ايمان : ــ وعليكم السلام..
ــ كيف الحال اختي عساكي بخير
ــ الحمدلله..
ــ بغينا اختي نسالك كم سؤال اذا ما يضايقك الحين .. واذا انه يضايقك نخليه لوقت ثاني..
ــ لا .. تفضل ..
ــ طيب .. ممكن نعرف ايش اللي حصل لك بالضبط.. ومين اللي عمل فيكي كذا ؟؟
ايمان .. وبصوت مخنوق .. والكلام يتسارع ويتقطع تقطيع..
ــ خدعني .. خاين.. مو لحاله .. معاه اثنين..
صار الشرطي يهدي من روعها وانفعالها.. سألها وين اهلك..
ما شافها الا زادت صياح وصريخ وحاله,,,
جو الممرضات يهدوها ويالله هدت.. الشرطي يبغى يحسم الموضوع عالأقل من ناحية المتهم اللي جابها المستشفى .. هل اله علاقه لو لا ..
طلب من ايمان تهدي .. وسألها لو جى واحد من اللي تعرضو ليها تعرفه شكلا.. اكدت له انها تعرفهم شكلا .. طلب منها اساميهم.. حدها وبصياح و صريخ قالت :
ــ مشعل .. مشعل .. وما ادري بعد اذا هو سعد لو مشعل .. عرفته من زمان بإسم مشعل .. والحين سعد,. ما ادري ويش اسمه...
ــ طيب يا اختي هدي وبشويش .. مشعل ايش ..؟؟
ــ ما ادري .. ما قال لي ولا سألته..
ــ والله مشكله يا اختي .. ما تدرين وش اسمه.. طيب اذا ماهو متورط بأي شي .. ولا مسوي شي من قبل .. ما بنصيده لو ايش ما سوينا .. وراح يضيع حقك..
ايمان صارت تصفع في نفسها وهي تصارخ وتصيح..
ــ ضعت.. ضعت وخلااااص ...
الشرطي قام وطلب من العسكري اللي وياه يدخلو عليهم المتهم تشوفه هل هو منهم لو لا ..
دخل الرجال وهو يطالع في الشرطي ومنقهر .. وقال :
ــ بذمتكم لو انا منهم بجيبها بنفسي .. اسوق رجولي للأعدام..
الشرطي : ــ اجرائتنا كذا يا اخي ..خلصنا بدون أي نقاش ولا اعتراضات..
وسأل ايمان : ــ تعرفينه.؟؟
ايمان صارت تطالع فيه : ــ لاا..
ــ متأكده.. ماهو واحد منهم..
الرجال المتهم : ــ قالت لك لا.. الا تورطوني بالموضوع.. جزاة خيري .. تجبرون الواحد ما يسوي خير بحياته.. يعني لو تاركها تموت احسن لي ولكم..
ايمان وهي تصارخ وتصفع في روحها : ــ ولي .. ولي .. ليش طلعتنيييييييييي ...
الشرطي : ــ استغفري ربك يا بنت .. وانت اسكت لا اضطر ارجعك للحجز..
متأكده .. ما تعرفينه.. مهو معهم,,
ايمان : ــ لااا,, لا لا., لاااااا,,
الشرطي : ــ طيب طيب .. حنا حالتك هذي صعبه.. لا تعرفين اسمه ,, واكثر من واحد .. شكلها بتطول سالفتك.. الله يكون بعونك وما تشوفين شر ..
وطلع من عندها .. والمتهم برائه..
صارت تضرب في نفسها.. وحالتها حاله .. ولا هم عارفين يهدوها.. تجمعو عليها الممرضات يحالو يخلوها توقف عن الضرب .. عطوها ابرة مسكن .. خدرت ونامت..

على مخدتها.. سالت الدمعات.. وتحت بطانيتها حست بحرارة الآهات واللوعات.. جرت الغصه ما بعدها غصه.,.. كانت تتذكر الأيام الحلوه اللي قضوها مع فارس .. تتذكر كم مره شافها.. وكيف كانت حالتها من الفشيلة والرعب.. تذكرت اخر موقف جمعها اياه في الباص يوم تقعد عليه.. كل موقف تذكره والدموع تصب ..
تنهدت بحرة قلب ..
ــ منهو انت .. على شان تحتل حياتي واخسل على شانك دموعي .. انت ولا شي ...
تصادف خواطر .. كان من الهم منسدح على هذيك الكنبه. جت على باله رؤى .. ابتسم.. وتنهد .. يا ترى ويش حالش هالأيام,, شغلتني الظروف عن التفكير فيش يالغاليه...
كان يومه كان مره شاق ومتعب ,, من الشرطه للسفاره السعودية ومن مكان لمكان..
و كلما يدق على رائد ما يرد عليه ..

رائد يسمع نغمة فارس .. كان مخصص له مقطع من مرآة حياتي للأكرف..
ــ لا تلم فيك ثباتي .. انت مهما كنت ذاتي ,, ليس اغراء صديق من صفاتي .. ضحكي في العثراتي .. ليس من معتقداتي .. ما انتصحنا في طريق للشتات ..
انت مرآة حياتي لا ,,.....
وسكت عن الرنين .. رائد اخذ الجوال وقفله مره وحده .. وهو مره متضايق ,, ومصمم خلاص في يوم ثاني بيغير رقمه بس على شان لا يأذيه فارس بإتصالاته...

ان الهاتف المطلوب لا يمكن الإتصال به.....
نزل الجوال من على اذونه بهداوه.. ما سكره .. ظل يسمع الرساله الصوتيه..
نرجو معاودة الإتصال في وقت لاحق ...
وبلا شعور وبعوفيه.. دمعته سالت..
ــ افااا يا اخوي يا رائد.. في الوقت اللي انا بأمس الحاجه لك فيه.. تخليني .. ما هقيتها منك.. توه يرن الحين تقفل .. افاا والله ..للحين زعلان .. ما اصدق هاللي تسويه فيني ..
مسكين فارس .. مفتكر زعل رائد عليه على حساب ما يبغاه يروح المغرب .. ما يدري بالأدهى والأمر .. وقرار الفراق اللي قرره رائد..
دق على حيدر وحسن.. حسن كان نايم.,, حيدر رد على فارس ..
حس فارس كن الروح ردت له في غربته.. اخيرا احد رد عليه..
حيدر مرتبك.. مو عارف .. يبغى ما يصدق اللي صار .. بس الظروف والأحداث مخلتنه يشك وبألم,, مع انه مو مثل رائد معاه.. بس حبه وارتاح له ويحسه مو راعي سوالف بطاله.. بس ويش بيده يسوي ليصلح بينهم..
فارس : ــ الوو حيدر .. اهلين..
حيدر بإرتباك : ــ هلا ,,
ــ ويش فيكم ,, اللي ما يرد واللي يرن وتالي قفله ,, ويش صاير ,, انا حالتي حاله ,,
ــ ويش فيك؟؟ خير ان شالله..

وعلم فارس حيدر بالموضوع.. انه جوزاه ضايع ,, وما تطرق ولا واحد منهم لسالفه زينه والشكوك .. وحيدر ما تجرأ يسأل فارس من هي دي .. وانتهت المكالمه..

تابع >>

وفي اليوم الثاني راح حيدر لرائد ,, وعلمه بسالفة فارس وان جوازه ضاع,,
رائد ببرود لا متناهي :
ــ جعله .. عمره لا رجع.. خله مع حبيبة القلب اللي مسافر على شانها..
حيدر منصدم من ردة فعل رائد... ما توقعه بهالقساوه,,
طلع رائد وركب سيارته.. و هو يحس بإختناق,, يحس مو قادر يستغني عن فارس .. يحسه روحه .. واذا خسره بتطلع وخلاص ما لعيشته لا طعم ولا ذوق ..
صار يداور بالسياره مو عارف وين يروح..
قرر انه يروح لسلمان,, فتح جواله .. ولقى رساله من فارس .. فتحها لقاه كاتب له..
ــ محتاجك في غربتي .. لا تقسى علي ,,
جته غصه ,, خيارات .. مسح.. ومسحها ... واتصل على سلمان,, وقال له انه بيجي يقعد وياه..

سلمان راح قال لأهله بيجي واحد الي .. حوريه وبلقافه.. :
ــ منهوو..
سلمان : ــ وانتين ويش عليش ..
حوريه : ــ ههههه عرفته.. اكيد رائد..
ــ الله وليش بالله. حكمتي ..
ــ ما عندك حدا هنا,, واكثر شي انت ويا رائد لو فارس .. وفارس ماهو هنا بالمغرب ..
ــ عدال عالتحاليل العالميه.. هههههه ايه عدل رائد..
ــ حق تعرف ان اختك ذكيه..
ــ أيــــــــه...... ما شالله عليها ..

وصل رائد لجهة بيت ام ابراهيم.. وكانت جارة بيت ام حسين.. صار يطالع في الزرنوق .. والهم معتلي قلبه..
نزل من السياره .. دخله.. وهو يحس انه يسمع خطوات فارس معاه.. وهي اللي ما فارقت خطواته لحظه.. وظلهم مترافق على طول ..
وقف عند باب بيت ام ابراهيم.. التفت وراه كان بيت فارس .. تنهد من قلب ..
ــ رحمة الله عليش ياا يمه..

دق الباب .. وكان سلمان في الحمام .. وام سلمان تحوس وام ابراهيم نايمه.. مافي الا حوريه..
حوريه وبعفويه لبست عباتها وقامت وقفت على الباب وقالت :
ــ مـــن عند الباب..
رائد من سمع صوتها ., ارتبك ..
ــ هاا .. اناا..
حوريه ما تعرف الأصوات ما سمعت صوته ولا مره..
رجعت سألته:
ــ مين انت ؟؟
رائد : ــ انا.. رائد .. وين سلمان..
حوريه : ــ ايه حياك..دش .. الحين اناديه..
دخل رائد.. وراسه يطالع في الأرض ومستحي حده..
ــ يالله يالله..
ووقف على الباب...
حوريه : ــ ثواني انادي سلمان,,
وراحت .. رائد بعفويه <<<حركات بليس
رفع عينه.. بفضول لقاها قمة الحشمه والعفه .. كلها مغطيه من فوق لتحت ما عدا وجهها اللي كان قمه في البرائه.. وهي نظراتها مهي معاه رايحه بتنادي اخوها..
ــ اعوذ بالله منك يا بليسوه.. صحيح ما استحي .. غض النظررر...

ونزل عينه اللي كانت مجبوره وبدون قصد ترتفع مره ثانيه وثالثه..
حوريه تطق باب الحمام على سلمان..
ــ خيي جالك رائد..
سلمان: ــ ايه هذاني بطلع..
وفتح باب الحمام.. وسألها..
ــ ويش دراش ان رائد ؟؟
ــ فتحت له الباب ,,
سلمان محمق فيها .. وراح للباب لقى رائد واقف ..
ــ هلا هلا رائد تفضل ..
ودخله المجلس ..سلمان : ــ امهلني دقايق بغدي وبرجع لك..
رائد بلا شعور صار يفكر في حوريه ,, خايف عليها لا يكون سلمان راح يشابقها ..
وفعلا سلمان كان رايح المطبخ يهدر على راسها,,, وكانت امه موجوده ..:
ــ انتين حق ويه فاااتحه الباب ...<< قالها بهمس مقهور ..
حوريه بخوف : ــ ما في حدا يفتحه الا اني .. امي في المطبخ وامي العوده نايمه وانت في الحمام.. ويش اسوي ؟؟ لبست عباتي وفتحته .. ما طلعت هدّه
سلمان وهو يصارخ :
ــ والله ما بنام انا في الحمام .. كان مهلتي لين اطلع .. مره ثانيه ان فتحتي بيبان لحدا راويتش شغلش ..
حوريه وشوي بتصيح: ــ ان شالله..
سلمان : ــ سوو شاي وجهزو تبسي شويات وبجي اخذه..

وطلع من المطبخ..
حوريه طاحت دمعتها ,, وصارت تتشكى لأمها..
ــ حق ويه كل يصارخ عليي .. اني ما اطلع الا مستره.. ما يمر عليي في مكان رجال الا شب حريقه .. والحين فتحت الباب لرائد وعصب عليي .. اني ما اطلع احسن ليي ..
ام سلمان : ــ لا تلوميه يا بتي من حبه وخوفه عليش من هالزمن وبلاويه يحمق فيش ويصارخ عليش .. وابوش موصنه علينا.. والله يحبش هو من كل قلبه..
حوريه وهي تمسح دموعها وتبتسم :
ــ اني بعد احبه و ماليي غناة عنه..
ام سلمان : ــ الله يخليكم ليي وما يحرمكم من بعض ..
حوريه : ــ يارب و يخليش لينا يالغاليه ,, اماه اني باصلح الشاي ,,

رائد لاحظ توتر سلمان.. وعرف انه شابقها ,, وحس بالذنب ومو عارف ويش يقول ..
ــ عسى ما جيتك في وقت مو مناسب ,, ياخوك قايل لك بمر عليك ونطلع..
سلمان :
ــ لا ويش دعوه .. وين بنطلع يعني وين ممكن نروح .. خلنا في البيت على رواق احسن..
رائد وهو مرتبك : ــ سلماان..
سلمان : ــ هلا
ــ فارس .. ضاع جوازه..
ــ والله .. لا حووول .. ويش درااك...


رائد علم سلمان بالسالفه..
سلمان : ــ انا لله والله يكون بعونه ,, ويش بيسوي الحين .. على بال ما يبلغ عن الفقدان ويطلع بدل فاقد بتمر عليه شهور وهو هناك.. الا اذا طلع له تاشيرة للرجعه .. والله ساااااالفه..

رائد وهو عابس وجهه .. : ــ ويش دراني عنه..
سلمان : ــ افاا... مصمم يعني ما تكلمه ؟؟
رائد : ــ لاا.. لا .. ولا حتى اعرفه ..
ــ انا لله .. انا بكلمه بعد شوي .. اذا كلمته .. بتكلمه وياي ؟؟
رائد : ــ مادري .. لاا.. لا لا..
سلمان .. طيب شوي وبرجع ..
وراح المطبخ.. لقى حوريه خلصت تجهيز .. شالت التبسي ووصلته له.. ويوم وصلت لقت سلمان يرفع كفه...
خافت .. الا هو يمسح خدها اليمين وبهداوه :
ــ صحتي ..؟؟؟
حورية : ــ لااا..
سلمان وهو يمسح خدها : ــ عليي هالكلام.. مبين على عيونش .. وشامة خدش تشتكي من الملوحه ..<< كانت لحوريه شامه حليوه صغيرونه على خدها اليمين عاطتنها برائه ونعومه..
حوريه ضحكت بهداوه : ــ لا بس من بخار الشاي دمعت عيني ..

سلمان وهو مبتسم : ــ بخار الشاي هاا... عموما .. انا آسف .. تعرفيني انتين بسرعه اعصب من هالسوالف .. ووالله من حرصي وخوفي عليش .. ولأني احبش ..
حوريه : ــ ادري ياخوي . عاد لا تحط في بالك..

اخذ التبسي .. ورجع المجلس .. طلع جواله ودق على فارس ..

فارس كان منسدح لا شغله ولا عمله .. يبغى يخلص حصر الأملاك وبيعها بس جوزاه ضروري وضايع.. فمتعطل على حسابه الا جواله يرن والمتصل سلمان..

فارس حس بفرحه قووويه.. اخيرا اتصل به احد.. اخيرا ذكره في غربته المُره احد
اخيرا حس روحه مهو منسي وفي احد يفكر فيه ومتذكرنه. قام ووقف من شدة الفرح ...و رد على المكالمه وصار يسولف ويا سلمان اللي سأله عن احواله و الجواز ,, وصاير فارس زي الطفل الضايع والخايف مهو عارف كيف يتكلم

لين فااجأة سلمان وقال له ان رائد وياه..
فارس فرح زياده.. : ــ رائد وياك.؟؟؟!!. باكلمه ..

سلمان صار يطالع في رائد اللي كان مبين عليه انه معصب يوم قال سلمان لفارس عنه..
وبنظرات ترجي صار سلمان يتأمل من رائد ياخذ الجوال ويرد على فارس ..
مد الجوال عليه وقال له :
ــ رائد .. صفي قلبك شوي ناحيته .. هو بغربه .. كلمه .. ولو كلمه .. اجبر خاطره بها ..
اخذ رائد الجوال من ايد سلمان.. حطه على اذونه..
سمع فارس :
ــ سلمان .. وينك ...؟؟؟
من سمع صوته حس بنار قهر تشب في قلبه.. حس وده يصرخ في وجهه لييييييييش .. وده يعاتب وده يواجه وده يسوي مليون الف حاجه..
و...
الى اللقاء .. :toung:

.....

مــشكوره ...

اخــتي علـى الجزء الروعــه ..

وانشاء اللهــ تتصفى قلــوبهــم << متحمسه ..

..

مشكوره خيتو عالجزء الروعه

الله يعطيش العافيه

تحياتي

مشكورة على الجزء الجديد و الشيق و

الحلو و في انتظار الجديد تسلم اناملش

تحياتي

مشكوره على الجزء الله يعطيك العافيه

ايييييييييييه وبعديين ويش صاااار ...؟؟
اكيد بيكلمة وبيفهم السالفه ياااارب
قووولو يارب ويايي له..
تسلمين بطيختي ع الجزء
ربي يعطيك العافيه
تحياتي
ضحكوه البطه

يااااااااااااااااااااارب

مشكور خيتو ع الجزء الروووووووووووووووووووووووووووووووووعه

بليز لالا تتاخر زين
جاااااااااااااااري الااااااانتظااااااااااااااااار

تحياتي

يااااااااااااااااااااااااااااااارب يكلمه يااااااااااااارب
ضروري تقطعيه كان كملتي شوي << متحمسة الأخت خخخخخخخخ
يعطيش العافية خيتووو على هالجزء الروووعه تسلمي

تقبلي مروري
دموع الوحدة

لا عاد اميروووه يادبه حنني قلبه على فارسوه مايصير



لاتقولي بيرفض يكلمه هالخبل ذا <<بتتكفخي


يكلمه بس من غير نفس ماعليه اهم شيء يحن عليه ومايقسى زود


بس اقول لك <<تهدد :wink:


لو ماكلمه وقسى قلبه يطلع هو اللي مايستحق فارس يكون صديقه :evil:



مالت عليه لعب عليه ابليس وقام يطالع في بنات خلق الله <<ماتحبه :wacko:



تسلمي امروشه


وبإنتظار المكالمه بينهم ويش بيصير فيها ..

بسم الله وعلى بركة الله<<<<<<<بتفتحي محل ولابتبيعي ادخلي في الموضوع على طول:

اميرررووووووووووه نفسي امسكش من خشمش لان بسببش زكمة وخلص النشاف (كلينكس بالاتكيت:kaseh:)وف زهقت من الاصياح يالله عاد رجعي فاارس الى اهله واذا ماابترجعيه بنسوي حزب ولابنقرء القصه:ranting::mesb::seif:<<<<<اتحداش انت اول وحدة بتخلفي الوعد
وحنني قلب راائدوه ثقيل الدم هذا ولافيه شدة من تحت الى تحت بعد ايطالع:nuts::nuts: <<< ينعل الحب شو بيذل خخخخ على حورية ام شاامة:embarrest::embarrest:<<<<عيب استحي ياابنت ماايقولوا ذاالكلام
اني داايم اقرء القصة بس اول مرة اكتب رد من كل قلبي اتمنى لك الخير
ماشاءلله عليش قلم وانامل مبدعة الله يزيدش ابدااع وافكار بس مفرحة:icon30:......
جااااااااااااااااااااااري الانتضار على قولت عازفت الاوتار موطولي

تحياتي لك: ارجوان

ماني ماني:sad2::sad2:
حرام عليش اموور
اتفاعلنا ووقت النقطة الحاسمة تقولي
الى اللقاء:huh::wacko:
بس ويش هالابداع خيوه ما شاء الله:cool:
:embarrest::embarrest:

بس ها مو لطولي علينا :evil::evil:

ننتظركِ:toung:

تشكري على الجزء

ننتظر جزء الصلحه

يعطيكِ الف عافيه

موفقه

احداث واكشن ولا اروع اميرة..

تغير الاحداث والتفنن فيها ... ابداع ... ابداع ... ابداع

لو قلت شكرا اكيد مقصر..

لك اغلا تحياتي خية

مشكوووووووره
يالغلا
على الجزء الروووعه
والأكششششششششن

يسلمووووووووو

تحياتي

بسمة تعالي

اولا الله يعطيك ربي الف عافيه ياقمر

وثانيا وش هلئحداث مررة حزينه

اصياح مررة فقعتها هههههه بس كذا كنت محتاجة اصيح وجت من الله

مررة روعة وحركتات القصة ننتظر البقية

تسلمو عالمتابعه الحلوه
والله تشجيعكم داعم لأستمراري
يعطيكم الف عافيه
وبكم ارتقي الله لا يحرمني منكم

وتفضلو الجديد... طبعا هذا الجزء مو كامل له تكمله في وقت قريب بإذن الله

اخذ رائد الجوال من ايد سلمان.. حطه على اذونه..
سمع فارس :
ــ سلمان .. وينك ...؟؟؟
من سمع صوته حس بنار قهر تشب في قلبه.. حس وده يصرخ في وجهه لييييييييش .. وده يعاتب وده يواجه وده يسوي مليون الف حاجه..
صار يسمع فارس وهو يقول الوو والوو..
مد الجوال على سلمان .. وسلمان بعيونه يطالعه نظرات متأمل بس للأسف رائد صار يمد الجوال بالقوه.. ومغمض عينه وينافخ يبغى يتمالك اعصابه..
ماحب سلمان يضايقه اكثر .. واخذ الجوال .. وكلم فارس
ــ هلا فارس ..
ــ اهلين وينك ويش صار ؟؟
ــ لا بس الشبكه عفر ضعيفه ..
ــ تقول رائد وياك..!! وينهوو !!؟؟
سلمان ارتبك : ــ هاا لا قلت كان وياي .. قبل لا اكلمك ويوم طلع كلمتك..
فارس : ــ الله يهديك ,, واحشني مره وبعده زعلان علي على حساب جيت المغرب .. يالله ما درى عني وعن حالتي ,, والله يا سلمان نفسي عايفه الدنيا مره كل يوم تتقفل بوجهي اكثر واكثر
ــ افاا يا خوك .. خلك شديد واصبر .. وياجبل ما يهزك ريح.. والله يفرجها عليك يارب .. بقرب فرصه ..
ــ ان شالله نسألكم الدعاء وسلم على رائد .. ما يرد علي قاهرني ..
ــ علينا الدعاء وعلى الله الإجابه..يللا في امان الكريم ...
ــ حياك الله تسلم ياخوي..

انهى المكالمه.. وانسدح على ذيك الكنبه... يطالع بالسقف .. اللي كان قبه زجاجيه تدخل منها اشعة الشمس.. كان البيت اشبه بقصر مهندسه معماري فنان..

شعور بالوحده عنيف اختلج في صدره.. وده يذرف الدمعات بس عينه جفت..
تنهد من قلبه.. حاسس بإختناق ..
قام يبغى يغير جو يبغى يطلع.. طلع .. وهو يقفل الباب .. حس بشي من وراه طاح.. طالع الأرض لقى حمامه صغيره طايحه كانت بعدها ما تطير ..

رعشه صابت بدنه .. مر الموقف عليه من قبل .. اول سوء تفاهم بينه وبين رائد.. لقى فرخ عصفور طايح ورجعه لعشه.. تقرب من الحمامه.. انحنى .. لقاها ما تتحرك.. شوي حس فوقه شي يحوم .. رفع راسه لقى حمامه.. حس انها امها وملهوفه عليها.. انتبه لبيت جيرانهم ( بيت زينه.)فوق السطوح يربو حمام...

شال الحمامه الصغيره.. بس للأسف لقاها ميته من الطيحه ..

بدون استئذان .. طاحت دمعته.. العصفور كان طايح .. كان منتظر فارس يرجعه لعشه ولأمه.. ورجعه .. ورجع الأمل والحياه.. ولما رجعه لقى رائد قدامه ينتظره وبالأحضان.. وتصافت القلوب..

بس الحين هو في غربه.. صعبه وقاسيه.. وحيد .. واعز الخلق عنده ولا سأل عنه.. الحمامه ماتت وضاع الأمل بالرجوع لحضن امها.. ضاع الأمل يلقى حضن يضمه عن تشتته وحيرته.. نوح الحمامه على فرخها قطع قلبه تقطيع.. وهي تحوم وتنوح..

كان قاعد على ركبه وبين كفينه الحمامه.. قام وهو متضايق .. مسح دموعه بكتوفه وهو لسا ماسك فرخ الحمامه في كفينه.. طق باب بيت زينه.. ولما فتحت اختها الباب عطاها الفرخ وهو مبتسم..:
ــ ماتت..
اخت زينه خذت الحمامه وراحت ركض لأمها وهي تصيح:
ــ ماما ماتت..
خذتها ام زينه ودخلت بها داخل.. وسكرت الباب..

ومع تسكيرة الباب عصف بقلب فارس الحزن اصناف واشكال ...

ما اقساك يا زماني .. أي هم قد حمّلته اياي اثقل كاهلي واعياني.. هل هو فراق ..؟؟
ام لوعة اشتياق .؟؟. هل غدر حبيب .؟؟. ام خيانة صديق ؟؟.. لم اعد ادري ..؟؟؟

في دائرة مفرغه والإتساع بها يضيق .. ادور لوحدي يرافقني ظل الضيق..
انفاسي تتلاحق و تطلعي لغدي يزيد بي التشويق ..ويغويني عن الطريق..

.. لا اقسى من تشويه القلب الطيب بالجروح ..
احساس مؤلم .. ان تشعر بغربة الروح وجسدك في الأوطان..
يرافقه شعور لا يوصف حين تشعر انك قابع في الأركان..
تجلي غبارها و بلا هوية.. متمسك بشظايا ماضيك او خائف من حاضرك و مضيعا للعنوان..
امسك قد فات .. وانت اليوم وليد جديد.. فلا تلتفت للماضي وعش حاضرك بحلوه ومره..
ابحث عن ذاتك بذاتك .. ولا تعلق امالك بمن رحل عن حياتك .. وعش ايامك ...

ايا نفسي .. وفري نصائحك لنفسك.. فإني
الومك..
اوبخك..
اعاتبك..
وامقتك....

تنهد من قلب ,,
حوريه: ــ حليوه الكلمات مو..
سلمان : ــ وااايد..
حوريه: ــ صراحه ياخوي اول ما قريتهم قلت لازم اخليك تقراهم ..
سلمان وبإبتسامه : ــ ليش يعني ؟؟
ــ هههههه لأنك زي اللي كتبت الكلام .. كل تحاول تخلي اللي حولك فرحانين ومتفائلين ويفكرو بحاضرهم ومستقبلهم وينسو ماضيهم وانت للحين متمسك بماضيك..
سلمان ساكت ويطالعها..
حوريه : ــ لويش ساكت تكلم قول شي ..
سلمان : ــ من وين هالكلمات.. انتين كاتبتنهم؟؟
حوريه : ــ لاااا .. اني .. ويش يعرفني .. هذي سمر
سلمان : ــ أي سمر ..؟؟
حوريه : ــ هذيك المره قلت لك.. سمر بنت رضا اللي سافرو ويانا..
سلمان : ــ اهاا .. والله كتاباتها شي .. قدش هي ؟؟
ــ لا اكبر مني بوايد
ــ والله ... كم يعني؟؟
ــ 16 لو 17 سنه.. بس اصغر منك خخخخ
سلمان يطالعها على جنب :
ــ ويش المقصد يعني .؟؟
حوريه تطلع لسانها :
ــ ولا شي .. بس كذا..
سلمان وهو يقوم يكفخها بمخده : ــ صدق .. ما تستحي .. قومي بس عن جهاز خالش تلفتيه ولعنتي خيره
ــ اوهوو هو راح يدرس صيفي ما بيستخدمه .. وثاني شي عطاني الإذن,, ويش باسوي فيه اني باكسره .. لو باكله..
طلع سلمان من الغرفه .. وطلعته دار عليها.. :
ــ اقوول حجيه.. اطبعيها ليي و اذا في غيرها كتابات اطبعيهم
حوريه : ــ لسمر لو لغيرها..
سلمان : ــ بلا ظرافه عليي ..
حوريه : ــ هههههه زين...


قاعد على باب البيت .. يحس بخنقه وضيقه.. مهو عارف ويش يسوي ,,من بعيد قدام البيت في مطعم وفيه جلسات خارجيه.. وكانو اثنين جالسين.. رجال ومره..
وشكل الجو بينهم مكهرب .. نقاش حاد مبين من تعابير الوجه..
فارس بدون قصد صار يتأملهم.. لا شغله ولا عمله.. شوي الا البنيه قامت وهي معصبه وشالت شنطتها وراحت..
والرجال ظل مشبك كفوفه و مسند لحيته عليهم .. وتالي قام..
ابتسم فارس .. وفي باله ..
ــ كنت اظن هالمشاهد بس في الأفلام.. تفارقو.. على الله العوض .. اااه.. متى الله يجمعني وياش يا رؤى.. قريييب ان شالله .. برجع وبيصير عندي القدره اجيب مهرش والحمدلله.. واعيش معاش للأبد.. يـــــــــــا الله متى بس متى...

بالمستشفى حالتها مره صعبه.. المهدئات والمسكنات ما تفيد.. ايمان تعيش اصعب اوقات حياتها و قضيتها متوقفه على ذاكرتها والبحث مستمر عن أي مزرعه فيها شبهات جهة السد اللي لقوها فيه طايحه.. بس للأسف السالفه بتطول وهي مهي عارفه الإسم الكامل للي سوو فيها فعلتهم .. ومع كثرة المهدئات فقدو السطيره على حالتها .. صابتها حالة كآبه عنيفه..
اضطروا على اثرها يحولوها للمستشفى النفسي .. ولقسوة االأقدار والزمن..
ما انتبهو اهلها لفقدانها الا بعد يومين.. كل واحد يفكرها مع الثاني .. امها تفكرها في بيت ابوها والعكس .. ما نبهتهم على فقدانها الا ريهام بنت خالتها اتصلت فيها ولقت جوالها مقفل .. وصارو يدورو عليها من وادي لوادي لين سلمو امرهم للشرطه اللي خبرتهم بالحادث واستنكرت تصرفهم هذا واهمالهم وحملتهم مسؤوليه اللي صار فيها,,,

وبخلال هاليومين رجع حمزه.. واهله مخططين على شي ..وبعدها بكم يوم راحو جميعا زياره لبيت فاضل .. زياره الكل استغرب منها .. واولهم فاضل .. اخوه من سنين ما طب بيتهم بحجة الأشغال والإرتباطات ,, رائد يحاول قد ما يقدر يبلع حمزه وتواجده .. ويحاول يعاند روحه ويتغير الحال من ناحيته زي ما تغير من ناحية فارس .. فصار يسولف وياه قد ما يقدر .
وبعد السلام والتراحيب وهدره شويات وسؤال عن الحال والأخبار.
ابو علي : ــ والله ياخوي يابو رائد.. حبينا نكلمكم في موضوع..
فاضل : ــ خير ياخوي ..؟؟ تفضل ..امر
ابو علي : ــ ما يامر عليك عدو.. ولدي حمزه .. حابب القرب منكم.. وده في بنت عمه تكون من نصيبه ..
حمزه متشقق .. رائد منصدم.. ومنصعق .. وسكووت مفاجا صابه ...

والى اللقاء ..

اميرة حرام عليش و الله

يعني كلا النورية كله صدق

ليش والله حرام ما يستاهل

فارس المسكين الله اساعده

جزء حزين واجد جاري الانتظار

تحياتي

...

يؤؤؤ لا حــرام

.. لا ياخذها حــمزه ..

بــصيح اذا اخذها ..

ولا رائد قاعد يحسن العلاقــه ..

لا مــسـتحيل.. مابتوافـــق ..

.. تــحــياتــيـ ..

:sad2::sad2::sad2::sad2::sad2::sad2:لالالالالالالا لالالالا والله حرااااااااااااااااااااااااااااااااااااااام عليش
ترى اذا مااتصلحي الامور الشرطة :help::help:خلاص اتعبت اني من الاصياح
ام حسين ومااتت وايماانوا ورااحت فيها جننتيهها:wink:وحمزوا وبيااخذ روئ على قلبي مااتستاهله ثقيل الدم هذا يالله عاد غنااتي رجعي الماي لمجاارية:wacko::mesb:




جاري الانتضار