بانتظار التكملة على احر من الجمر
يعطيك الف عافية
عرض للطباعة
بانتظار التكملة على احر من الجمر
يعطيك الف عافية
صبحكم الله بالخير
اليوم نحط ليكم خاتمة السالفه
واللي تأخرنا عليكم ابها واااااااااااايد
وإعذرونا
------------
ومن غبشة الغباش فز منصورووه
وطلع من البيت لا شاف أمه وأمه ماشافته
وحتى أم جسوم فزت وطلعت من البيت لا شافت ولدها ولا شي
جسوم راح للأستاذ وجابه حق يبني له الحجره لأخوه جسوم وقال له الاستاذ تنبنى في اسبوعين بس
والقلاطه ميه وعشرين ربيه
وخلاص تم الاتفاق وياه يبدي من يوم فاني
وراح منصورووه وخلا الحماليه يجيبوا الحصى
ويا لسميت والرمل
وقعد يحارسهم على باب البيت
جسوم معروف وين راح
بس أم جسوم وين راحت ؟؟؟؟؟
هذا يا طويلين العمر والسلامة
أم جسوم راحت لشروفه مرت أبو سلمان
طق طق طق
شروفه :- من بالبا من غبشه ، زين زين داني با أفتح الباب
أم جسوم :- بسرعه يا غناتي بسرعه
شروفه:- يوه هذي انتين يالنحيسه ويش تمبي بعد
أم جسوم :-ويش أمبى ، قول عاد تفضلي
شروفه:- تفضلي تفضلي ، وأني لو ما قلت الش تفضلي يعني ما بتدشي له
أم جسوم :-ولللللل عليش وعلى طبايعش انتين
شروفه:- هذي أولها بعد ، أجل ينعاف تاليها
أم جسوم :-خلاص خلاص ، أني جايه الش با اقول لش كلمتين وردي غطاهم وياش
شروفه:- قولي خلينا نسمع
أم جسوم :-أول شي ما سويتي قدو له ، ترى راسي داير على تشونة قدو
شروفه:- أي قدو أي بلا من الصبح ، عاد ما مدانا حتى نكسر ريقنا الا انتين طايحه علينا
أم جسوم :- يوووه طايحه ، ما فيني الا العافيه يوووووه
شروفه:- أهوووووه بلا خربطه علينا الحين ويش عندش
أم جسوم :- خلاص أجل دام ما فيه حتى تشونة قدو
شروفه:- تمبيني أجيب الش ناريلة أبو سلمان
أم جسوم :-لا لا خلييها الش ما أمباها اني
شروفه:- يالله قولي نطقي
أم جسوم :- أني جاية أقول الش وصي أبو سلمان يستسمح من الحجي عباس
شروفه:- الله الله ، ويش هالسماحه اللي عندش ويش هالطيبة اللي هلت عليش مره وحده
أم جسوم :-أني طيبة أصلاً بس ما أحد عارف ليي
شروفه:- أما طيبه الا طيبه وعلى نياتش بعد ، ولا أحد يسوي سواتش البارحيه
أم جسوم :- يالله خلاص بكره يجي جاسم غناتي وتشوفي الطيبه اللي فيي
شروفه:- يووووه بعود جسوم الديره
أم جسوم :- يوه أجل ما دريتي انتين بعد له
شروفه:- دريت بس طالع إسم جسوم مفلات الشكر من بوزش
أم جسوم :- ما إسمه جسوم ...إسمه جاسم
شروفه:- يالله جاسم جاسم ....الله يرحم ذيك الايام اللي كنا نرقصه ونسوي اله كوعي كوعي
أم جسوم :- هذاك يوم كان صغير هالجاسم
شروفه:- اييييه طاح حظك يا منصور ، بكره يجي جاسم وتنساك أمك
أم جسوم :- يوووووه كيفه أنساه غناتي منصور ، هذا ضناي
شروفه:- يالله بنشوف كان ما يطيح حظه
أم جسوم :- لا يطيح ولا يطيح فنينهم عوايني المركبه فيي
شروفه:- بس منصوروووه هذا العيون الحولا
أم جسوم :-لا يا أم سلمان ، فنينهم عوايني العدله
شروفه:- زين ما عليه الحين ويش بتسوي لينا يوم يوصل جاسم
أم جسوم :-با أخلي ملاية فريق شمال تقرأ مولد النبي ( صلى الله عليه وآله )
وبا أسوي اله عرس لا صار ولا استوى
شروفه:- بتعزمينا بعد لو بتنسينا
أم جسوم :-يووووه يا غناتي كيفه ما أعزمش ، داني با أعزمش من الحين يا غناتي
وسمعوا صوت أبو سلمان طالع من حجرته
أبو سلمان :- صبحكم الله بالخير
شروفه:- صبحك بالخير والكرامه
أم جسوم :-صبحك بالخير والكرامه والصحة
أو سلمان:- منهيه دي اللي من الغبشه هنه
شروفه:- هذي أم جسووم عندنا وتمباك تقول لحجي عباس يسمح ليها
أم جسوم :- حجي أبو سلمان لا تنسى ما أوصيك بعد ، استسمح لينا منه
أبو سلمان :-حاضرين حجيه حاضرين
وطلع أبو سلمان وشرب فنجال قهوه وأكل اله فردة تمره
وتالي توجه للنخل
أم جسوم :- يالله يا أم سلمان يا غناتي فمان الله
شروفه:- حيفها الشمس مضحضحه وين بتروحي بعد
أم جسوم :- با أروح بيتنا مسوى اليوم بيجوا الكاوليه يسووا حجره جديدة لجاسم ولدي
شروفه:- الله يعينش على أذاهم ويصبرش
أم جسوم :- يالله فمان الله
شروفه:- وداعة الله يا غناتي
وطلعت أم جسوم وعودت بيتهم وشافت ولدها منصورووه قاعد يحارس الاستاذ
أم جسوم:- قواك يا غناتي
منصوروووه :-الله يقويش يماه
أم جسوم:-ما وصلوا له
منصوروووه :-للحين يماه ، عاد ما اوصيش يماه تراهم بيدشوا البيت اذا تمبي شي من أحين سويه قبل لا يجوا البيت الكاوليه
أم جسوم:-ما امبى شي اني بس الميز اللي في المطبخ جيبه حجرتي الحين
وقاموا شالوا الميز وودوه حجرة ام جسوم
وشوي الا الاستاذ يدق الباب
وفتح جسوم الباب ودشوا وباشروا الشغل
هذا يسوي الكمخه وهذا يكسر الحصى وذاك ينظف مكان الشغل ، والاستاذ قاعد يمزمز في الشاي وهو يأمر عليهم
ومنصوروووه قاعد يطالع فيهم والنوم في عيونه
منصوروووه :-أساذ تمبوا شي بعد لو كل شي زين
الاساذ:-لا ما نمبى شي بس اليوم العصر با اقول الك اذا فيه شي ناقص
منصوروووه:-أجل انا با اروح شغلي وتالي با اعود ليكم على الظهر
وراح منصوروووه لأمه
منصوروووه:-يالله اماه انا با اروح الحفيز الحين
أم جسووم:- يا علي يا علي بتخليني وياهم بروحي
منصوروووه:- ويش اسوي سكري حجرتش زين اما زين بالمزلاج
أم جسووم:- ما ضنتي اصبر اقعد في حجرتي وهيه مسكره بالمزلاج يا ولدي
منصوروووه:- انا لازم اروح الحفيز اليوم ، خوفه حجي عباس يحتاجني له
أم جسووم:- أجل اذا تقدر خذ لك يومين فلافه من عند الحجي عباس شان يخلصوا العمال بسرعه
منصوروووه:- با اشوف الحجي عباس انا ويالله الستيره
أم جسووم:- الله يوفقك يا ولدي
منصوروووه:- فمان الله يماه
أم جسووم:- فمان الكريم يا غناتي
وطلع منصوروووه من البيت قاصد الحفيز
أما زكاي وكظام فالغيره والحسد معبيه قلوبهم
زكاي :- ويش يا غناتي نسوي الحين
كظام:- في ويش ؟؟
زكاي :- الحين ام جسوم بتصير علج بحلوق الناس من سالفتها البارحيهكظام:-الله يساعدها يارب
زكاي :-ويساعدنا عليها يارب
وشوي الا أم جسوم طابه عليهم مفلات الصقر
أم جسوم:- قواكم الله
كظام:-الله يقويش
زكاي:-ويسلمش
أم جسوم:-ماره منه قلت ما يصير أمر وما أشوفكم غناتي
كظام:- حيفنا في سيرتش بالخير
زكاي:-اي والله حيفنا نقول ويش فيها أم جسوم ما مرت علينا
أم جسوم:-بالخير لو ......
كظام:-يوووه بالخير يا غناتي ، ويش شايفتنا
زكاي:- رضينا بالهم والهم ما رضى بنا
أم جسوم:- د...أهوه طولوني القلم با اشرب ليي موشين قدو راسي مفتر عليي
كظام:- ايه قولي ماره على القدو مو عليناأم جسوم:- كرررررررررر عليكم وبالاماره نسلم على القدو هههههه
كظام:- ما تهوني عن سوالفش انتين ابد
وقامت ام جسوم تكرررركر بالقدو لامن خشّق
وفلتت القلم ولا احم ولا دستور قامت وطلعت ولا كأنه صاير شي
أم جسوم:-فمان الله
كظام:- فمان الكريم
زكاي:-يا علي يا علي ، قلتت القلم ولا حتى ..أكرمكم الله
كظام:- حيفش تعرفيها يعني ، عوايدها
زكاي:- اي والله عوايدها
كظام:- تهقي ينشرب وراها من القدو أكيد مخشّق الحين
زكاي:- الله يعيننا على راس فاني
وسكتت كظام وصملت شوين زين
ومررره وحده قالت
كظام:- تهقي حجي عباس يعرس على ام جسوم
زكاي:- يمكن يصير ، داهيه متلايمه عليه هيه وولدها
ويقولوا بعد ما يندرى عاد صدق لو ..
كظام:- ويش يقولوا يا غناتي ، من زمان ما سمعنا أخبارها
زكاي:- يقولوا انها داكيه تسوي ليها حجره فوق الصدح حقها وحق حجي عباس ، ويقولوا بعد ...
كظام:- ويشوه بعد يقولوا
زكاي:- يقولوا ان الحجي عباس هوه اللي متكفل بالعمال وبكل شي علشان يرتاح من منصوروووه ولدها
كظام:- غربلها ربي غربال ، اتاريها ما تهرول عبف هالنسره
زكاي:- غناتي هذي أم جسوم والأجر على الله
العجيب الغريب ان ز.ك.ليميتد ، للحين ما عرفوا عن جية جسوم للديره .
>>>>>> يتبع
>>> تابع
أم جسوم يوم طلعت من عند ك.ز.ليمتد راحت البيت وشافت الدنيا عفسه
السميت في الحوي ، واالحجاره عند الباب والميا مكتكت في كل مكان ، والكاوليه عافسين الدنيا
راحت مطبخها ام جسوم ولا كأنه صاير فيها شي
وهيه تغلي من قلب على حوايجها
ولا شافت الا واحد من العمال يفلت الحجاره الى خويه من تحت الى فوق الصدح وهم يصارخوا
يا الله ....ما بقى صبر عند ام جسوم
وكيف بتستحملهم اسبوعين وهم يعفسوا في بيتها عفاس
طلعت للأستاذ
انت يا أستاذ تعال هنه تعال بسرعه
وراح ليها الاستاذ وهوه يتمشى
الأستاذ:- نعم آمري حجيه
أم جسوم:- ويش مسويين في بيتي هالعفيسه
الأستاذ:- هذا البني وما يسوي
أم جسوم:- اي بني اي عفسه ، شوف اذا أشوف أي شي معفوس في بيتي الا با أعفسكم عفاس
الأستاذ:- ويش الا معفوس الحين دحنا نشتغل وايادينا على قلبنا منش ومن فعايلش
أم جسوم:- وشووووووووووووووووه أني وفعايلي ، ويش سويت ليكم أني ويش سويت لكن صدق راعي المفل اللي يقول ..خير تفعل شر تلقى
الأستاذ:- ما قلنا شي يا حجيه خلاص
أم جسوم:- شوف اني اذا يجي لسلوم وبيتي ما تعدل بتشوفوا شي عمركم ما شفتوه
الأستاذ:- ما يهمش ، يالله تآمري على شي
أم جسوم:-وصيهم على البني يحطوا بالهم على
الحجره زين إما زين
وراح الأستاذ وقعد على الكرفايه وهوه يصرخ على العمال
أما أم جسوم دخلت حجرتها وحطت راسها تمبى تنام
بس وين تنام وصوت العمال وهم يشتغلوا والتفاكير معبى راسها وقامت تفكر وتفكر وتفكر
ومن عادة أم جسوم اذا فكرت واقتنعت في الفكره ... على طول تنفيذ هههههههه
بس من التعب نااااااااااامت أم جسوم
نروح الحين لمنصوروووه ويا الحجي عباس
من وصل منصوروووه للحفيز ولاقى الحجي عباس سوى روحه متفشل وراح لأيد الحجي وحبها واستسمح منه
والحجي عباس ما قال اله شي أبد
حجي عباس :- إقعد يا منصور اقعد خلاص ما صار الا الخير
منصوروووه:- اسمح ليي حجي اسمح لي ، هذي أمي وفعايلها ما تجوز عن هالشي تعبت ياها أنا .......
حجي عباس :- ما حصل الا الخير خلاص دقعد له
منصوروووه:- ان شاء الله حجي ان شاء الله
وقعد منصوروووه على الكرسي
حجي عباس :- نصّور
منصوروووه:- نعم حجي
حجي عباس :- انتون الحين انت ويا أمك عايشين يف هالبيت ما فكرت تعرس امك انت له ، ولا فكرت تعرس انت بعد له
منصوروووه:- انا امي اي حجي منهو اللي يمباها وهذي فعايلها ، وأنا كيفه أعرس وأخويي جاسم ما عرس ما يصير يا حجي ما يصير
حجي عباس :- لا وتعرف الواجب بعد ، ( بلاك ما تدري باللي صاير انت وامك )
منصوروووه:- ايه ما يصير يا حجي
حجي عباس :- خلاص أجل يا منصور ، روح انت لأمك وقول ليها الليلة با أجي أنا ويا الملا علشان نخطبها أهم شي انت موافق
منصوروووه:- ( والابتسامه شاقه وجهه ) تآمر أمر حجي تآمر أمر ، وأنا بعد حجي بغيت شي
حجي عباس :-آمر يا حجي منصور
منصوروووه:-تعرف الحين أخويي جاسم بيعود وما باقي عليه شي والعمال يبنوا اله حجره ويمبى ليهم مجابل
حجي عباس :-ايه فهمت عليك فهمت عليك خلاص روح وجابلهم اسبوع اسبوعين ما ميش مشكله
منصوروووه:-رحم الله والديك يا حجي رحو الله والديك
وقام منصورووه والدنيا مهي شايلتنه من الفرحه
وراح لبيتهم
أما حجي عباس فقعد يفكر
مسيكينة أم جسوم ما تدري عن ولدها جاسم وويش سوى يالله كلها كم يوم ويوصل وتعرف السالفه الحين أنا خلني أدبر عمري وأعرس ويصير خير
يوم راح منصوروووه لبيتهم شاف أمه نايمه قام وطلع وصب لروحه استكانة شاي وقعد يطالع في العمال
ومرت العصريه وراحوا العمال بعد ما نظفوا الحوي من كسار الحجاره ومن السميت
قعدت أم جسوم وقابلها منصوروووه بوجه يضحك
أم جسوم:- جعلها ضحكتك دوم يا غناتي
منصوروووه:- وضحكتش بعد يا أميمتي
أم جسوم:- إسم الله الرحمن الرحيم
منصوروووه:- ويش فيش أميميتي
أم جسوم:-أين أميمتك ويش صاير في لدنيا
منصوروووه:- ايه ونص بعد دام الخطاطيب على بابنا تصيري اميمتي
وكأنها استحت أم جسوم بس ما يصير ...الطبع يغلب التطبع ...
أم جسوم:- ويش صاير يا منصوروووه ويش صاير
منصوروووه:- الحجي عباس ويا الملا جايين الليلة علشان يخطبوش
وهاللمره استحت ...استحت ودشت حجرتها وسكرت الباب بالمزلاج
منصوروووه:- آه منكم يا الحريم لو يوصل عمركم الف سنه لازم تستحوا هههههه
وما أدت الا ساعه وجاء الملا ويا الحجي عباس وياه كم رجال من الفريق وخطبوا أم جسوم للحجي عباس
وحددوا وياها يوم العرس بعد
في هالحاله أم جسوم نسيت جسوم وجيته ومنصوروووه وأموره ، بس تذكرته يوم يحددوا يوم العرس
وحلفت ميه يمين انها ما تعرس الا جسوم ولدها موجود
وتم الاتفاق على هالشي
نروح الحين لوكالة الأنباء العالمية ك.ز.ليميتد، من غبشه طبت كظام
زكاي :- إسم الله الرحمن الرحيم ، ويش صاير
كظام :- اسم الله عليش يا غناتي إختلعتي
زكاي :-كل هذا وما تمبيني أختلع ، كنّش المذكوره بالخير أم جسوم وطبتها
كظام :- سكتي يا وخيتي سكتي ما جابني هنه الا أم جسوم
زكاي :-خير اللهم إجعله خير
كظام :- خير خير خير
زكاي :- ويش فيش كظام ويش فيش
كظام :-ما سمعتي أجل باللي صاير في الديره
زكاي :- لا والله يا وخيتي ، ويش صاير زاغ مري منش ترى ، قولي تجي انطقي له
كظام :- يقول لش هذي أم جسوم وزي ما قلنا ، رسمت رسمت على حجي عباس لامن طيحته ، البارحه خطبها
ومن سمعت زكاي الخبر شهقت وقامت على طولها وفزت وراحت الحب وغرفت ليها قلاص ماي وشربت تشوووونه ورشت الباقي على وجهها وعودت لكظام
زكاي :- ويش هالخبر اللي من الصبح
كظام :- أجل ويش ، هذي اللي تعرف تخطط وترسم
زكاي :- واحنا طايحين الحظ ما لينا أحد
كظام :- تحجي عن نفسش انتين ، أما أني رجلي موجود والحمد لله
زكاي :- ايه خلف الله عليي ، لا رجل ولا ولد ولا تلد
كظام :- قومي أهوه الحين وسوي لينا راس قدو
زكاي :-قومي انتين سوي الش خدمي روحش بروحش ....يا أم رجل موجود
كظام :- هاه ويش فيش ، هذا بس قلت الش ام جسوم بتعرس وسويتي كده أجل ويش بتسوي في العرس
زكاي :-أي عرس اللي با أسوي فيه مفكرتني با اروح عرسهم ، لا با اروح ولا با أوصل هناك
كظام :-لا ما بتوصلي ، داكوه عندي الش ديرمه وكيس حنا من هالزين مو
زكاي :- خليه الش ما امباه
كظام :- افا بس افا ، روحي العرس واستانسي ولا تشيلي هم ، الارزاق بيد الله
وقاموا يقربعوا في القدو كررررررررررررررر
>>>> ومرّت الايام والحجره تنبني
ومنصوروووه مرابط في البيت وأم جسوم تخيط الدواشق وتوصي ليها على أغراض ولولدها جاسم على أغراض بعد
وجاء اليوم المنتظر
قعدت أم جسوم من الفجر
وراحت لولدها منصوروووه وقعدته من نومته
وتجهزوا حق يروحوا البندر
ومر عليهم حجي عباس وياه كم رجال بعد بيروحوا وياهم
وركبوا في السياره وراحوا لستيشن
يحارسوا هناك جيتة جاسم
وبين قعده ووقفه
منصوروووه:- كأنه تأخر أخويي له
أم جسوم :- أني ما با اتحرك من هنه الا وولدي ويايي
منصوروووه:- ان شاء الله ان شاء الله
وشوي الا سياره واصله ووراها سياره فانيه وفالفه
وقامت توصل السيارات شوي شوي
وناس تنزل وناس تركب
وشويه الا سياره وصلت هناك
فيها رجال و..........
وصلوا ..........
وقفوا بعيد شوي عن لستيشن
ونزل الرجال وتوجه ليهم
واحد لابس بنطلون وقميص ولابس نظاره شمسية
...:- هلو ، هاي
رد عليه حجي عباس :- هَلَوْ ويش تمبى آمر حاجه غرض
... :- انا اسأك من وين يروحوا ديرة .....
حجي عباس:- من هنه حجي من هنه ، إحنا من هالديره ، آمر حاجه غرض
....:- أن أسأل عن بيت هناك يمكن تعرفه
حجي عباس:- انت بعد تعرف بيوت من الديره
...:- ايوا أنا من نفس الديره حجي
حجي عباس:- انت من ديرتنا ، ما تشرفنا
...:- انا المهندس جاسم .......
وما شافوا الا حجي عباس طايح على الأرض
وطاح وياه قلب أم جسوم ومنصوروووه
وعلى طول ركظت ام جسوم للحجي ورش عليه قلاص ماي وهجمت على الرجال تشابقه
أم جسوم:- ويش سويت في الرجال انت ، ويش قلت اله لاويش تدزه لاويش ..... ولا سكتت
حجي عباس:- ام جاسم سكتي واستقبلي ولدش
من سمعت هالكلمه هيه طاحت على الأرض
...:-إيش صاير فيكم كل شوي طايح واحد على الأرض
وراح الشاب اللطيف للسياره وكلم وياه وحده لابسه نص عباة ونص حجاب ونزلت من السياره وجت لأم جسوم والحجي عباس ومنصوروووه يحاولوا يقعدوها رشوا عليها ماي ومنصوروووه يمى سياره يوديها سبيتار
جاء المهندس جاسم وياه هالعنقريزيه وهو يقول
المهندس جاسم:-تباعدوا شوي تباعدوا خلو الدكتوره تشوف شغلها
حملوا أم جاسم للسياره وقامت تعاينها الدكتوره لامن قعدتها من الغميه
في هالوقت منصوروووه مو مصدق ان هذا أخوه جاسم
راح اله وسلم عليه وهو يقول :- أخويي انت أخويي
المهندس جاسم:- انته منصور
منصوروووه:- إيه أنا منصور أخوك
المهندس جاسم:-حياك الله ، ويش جابكم هنا كنت أنا با أوصل ليكم للبيت
المهندس جاسم:-من وصلنا المكتوب وإحنا حالتنا حاله يا خوي
وشوي وهم يتكلموا الا أم جسوم نازله من السياره ومقبله لولدها جاسم وما شاف الا وحده حاضنتنه
وهي تصيح ...ولدي ضنايي قطعة كبدي وصلت يا غناتي وصلت ، وصلت يا خلف أبويي وطوايفي وصلت
وهو مستغرب واللي وياه مستغربين
المهم ركبت وياهم في السياره هيه والحجي عباس ومنصوروووه ، أما الباقي فبد ما سلموا عليه ركبوا في السياره ورجعوا الديره
ومعروف الاخبار توصل لــ ك.ز ليميتد قبل الناس
كظام:- سكتي سكتي يا وخيتي ما سمعتي
زكاي:-الا سمعت وعرفت
كظام:- ويش السواة الحين
زكاي:-ويش بنسوي بعد ، بنورح لأم جسوم ونسوي ليها داك القدو الزين وبنخليها تستانس بعد ويش
كظام:- آه آه
زكاي:-ويش فيش انتين بعد
كظام:- يقول لش ولدها فلقة قمر ما يشبه نصور ولا يشبه ابوه
زكاي:- بلا خراط علينا بلا خراط ولا ما شفناه ..أشلح أملح
كظام:- تغير يا غناتي تغير ، يقول لش صار شعره خوصي وحطوا عليه في بلاد برا ما ادري ويش وصار ابيض فقش
زكاي:- يا علي يا علي يا علي ، ما تهوني عن خراطش انتين ما تهوني ، خلاص أجل الليله نروح ونشوف
كظام:- افا أني أخرط
زكاي:- خلاص الليله بنشوف هالكلام ، أني سمعت انه معرس على وحده عنقريزية تطيح الطير من السما إيه أما هوه فقش ما سمعنا
كظام:- قليلة الحيا كاشفة الوجه
زكاي:- وشووووه كاشفه وجهها هاللي ما تستحي
كظام:- شااااااااه تمبيها تتغطى هذي عنقريزيه
زكاي:- عنقريزية لو من وينه ، ما يصير تكشف وجهها في الديره ، تمبي دير الفانيه تتحجى علينا
كظام:- عاد تحجوا ولا سكتوا ، ويش فهمها ههي هالحجي .....نشوف الليلة
زكاي:- نشوف
ووصل ركب اأم جسوم الديره وقبله الاخبار وصلت وتجمعوا الناس عند بيت أم جسوم والنسون يحارسوها توصل علشان يدشوا البيت
وصارت أم جسوم هيه اللي الكل يتحجى عنها وعن مرت ولدها وعن ولدها المهندس جاسم
ونسيت أم جسوم تسأله عن اللي وياه ومنهيه هذي في هاللي صاير والناس والعالم اللي جايه ليها
دشت أم جسوم البيت ودشوا وراها النسوان وقعدت متصدره في المجلس وتآمر وتنهى
جسوم قام يرطن ويا ( زوجته) بالعنقريزي لامن فهمها ويش اللي صاير لامن راح ويا الحجي عباس للحفيز وقعد هناك وجوا الناس تسلم عليه وتتحمد له بالسلامه
ومن أدت الظهر سووا اله غداء
وعود البيت
المهندس جاسم:- يالله يالله
أم جسوم:- تفضل يا غناتي تفضل تفضل يا خلف ابويي تفضل
ومن شافوا النسوان المهندس جاسم قاموا يسلموا عليه ويتحمدوا اله بالسلامه لامن طلعت آخر حرمه من البيت وقعد ويا أمه ويا ( زوجته) ويا أخوه
أم جسوم :- تو ما نورت الديره يا ولدي
جاسم:- الله ينور عليش اماه
منصوروووه:- ما صدقنا يا اخويي ما صدقنا انك عودت الديره
كارين:- ...وت هبن
قام جاسم يرطن وياها بالعنقريزي وام جسوم ومنصوروووه ساكتين
أم جسوم :-ما قلت لينا هذي منهيه
جاسم:- هذي زوجتي كارين
منصوروووه:- مرتك
كارين:- وت هبن
أم جسوم :- يعني عرست حتى ما عزمتنا يعني
جاسم:- عرست ايه عرست
منصوروووه:- حشا ويش هالزمن اللي الاخو يعرس ولا أحد يدري عنه
كارين:- وت هبن
أم جسوم :- هبنوا بش لمهبنين ..تت هبن وتتن هنن ، شايفتنا سنانير عندش كل شوي تت
جاسم:- اماه تقول لش ..ويش صاير يعني
منصوروووه:- ويش صاير ، قول ليها احنا اهلك اجل
كارين:- وت هبن
أم جسوم :- واني اللي مهونه عن العرس علشانك وموقفه عرس اخوك علشانك تسويها وتعرس ، لكن ويش اقول
جاسم:- ويش صار الحين ، سووا ليي عرس فاني هههه
منصوروووه:- ما ليها الا كده بعد ويش
كارين:-...اووووه وت هبن
أم جسوم :- قول ليها تسكت أحسن ليها ، اي والله ما ليها الا نسوي هالشكل ويصير عرسي وعرسك مره وحده
جاسم:- وشوووووووو ، بتعرسي اماه بتعرسي
منصوروووه:- ايه بتعرس وانا بعد امبى اعرس وصل عمري من عمر عيده وانا امبى اعرس
كارين:- ...وت هبن
أم جسوم :- هبنوش لمهبنين
جاسم:- نثنق ....وقام يرطن وياها شوي لامن ضحكت
منصوروووه:- ويش فيها بعد هذي ، قول ليها عاد تتستر في الديره
كارين:- اووووووه وت هبن ، مهندس ايش فيه كلام أربي
أم جسوم :- يووووه داهيه تعرف تتحجى مفلاتنا له
جاسم:- تعرف شوي بس
منصوروووه:- المهم الحين ويش بتسووا
كارين:- انا معلوم أربي شويه
أم جسوم :- انتين في ويش واحنا في ويش
جاسم:- خلاص خلاص انا با اسوي ليكم العرس على حسابي امي
منصوروووه:- وعرسي بعد
جاسم :- وعرسك بعد على حسابي شوفوا انتون كم يكلف وانا حاضر
أم جسوم :- دقوم منصوروووه سوي ليي راس قدو خلني با اقند راسي على هالخبر
منصوروووه:- ان شاء الله اماه ان شاء الله
كارين:- ...وت هبن ....اسمع فيه إرس ...إيش هذا إرس
وقام يرطن جاسم وياها
لامن ضحكت
وقامت شوي ورجعت وهيه حامله في ايدها كاميرا
وتمبى تصور ام جسوم ومنصورووه وجاسم
ام جسوم :- يوووه بتعكسنا هذي بتعكسنا تمبى تفضحنا عند الناس
جاسم :- لا يمه هذي بتصورنا علشان توديها لاهلها يشوفوا
ام جسوم :- يووووه توديها للكاشفين يضحكوا علينا
جاسم :- لا يماه هذولا لازم يصوروا اهرلهم ويحطوهم عندهم
كاترين :- اوووه مهندس ، خلي امك تشيل أباه علشان صورة يجي مزبوط
ام جسوم :- اشيل عباتي ، شاااااه مجنونه انتين تمبى تعكسيني عكسيني كده ولا ما فيه عكس خلاص
جاسم :- خلاص اماه خلاص خليها
وعكستهم كاترين
وما مرت يومين فلافه الا مسويين ليهم ذاك العرس اللي ما صار ولا استوى في الديره
وصار عرس
أم جسوم
وجسوم
ومنصوروووه
في ليلة وحده
خلصت وملصت
وطولنا عليكم واااااااااااااااااااايد بس اعذرونا وانتظرونا مع سالفه يديده بس هالمره ان شاء الله غير
اتمنى ان سالفتي عجبتكم
أسألكم الدعاء
فمان الله
السلام عليكم
مرحبا
اخوي ابو زين
موفق الى كل خير
من زمان عن هذي الصفحه المميزة
ما ننحرم جديدك
دمت بخير
مسـآكم الله بـ الخير <<< كح كح كح :bigsmile:
قوآك الله خيي أبو زيون ،.
يآ حبي لـ هاالصفحه بس << كح كح غبآر من الصوبين
من صوبي :weird: ومن صوب السآلفه :huh: كح كح
ههههههههههههههههههههههههاقتباس:
...:- انا المهندس جاسم .......
وما شافوا الا حجي عباس طايح على الأرض
وطاح وياه قلب أم جسوم ومنصوروووه
وعلى طول ركظت ام جسوم للحجي ورش عليه قلاص ماي وهجمت على الرجال تشابقه
أم جسوم:- ويش سويت في الرجال انت ، ويش قلت اله لاويش تدزه لاويش ..... ولا سكتت
حجي عباس:- ام جاسم سكتي واستقبلي ولدش
من سمعت هالكلمه هيه طاحت على الأرض
...:-إيش صاير فيكم كل شوي طايح واحد على الأرض
ويلي هههههههههههههههه
حلوووة عجبتني سآلفة المهندس جآسم ،.
ههههههههههههه
و كل شوي وآحد طآيح ،.
هههههههههههههههههه
هههههههههههههههههاقتباس:
أم جسوم :- هبنوا بش لمهبنين ..تت هبن وتتن هنن ، شايفتنا سنانير عندش كل شوي تت
يآعلي خيي جبتهآ جيب و ربي ،.
هههههههههههه
ويلي على أم جسوووم عرست كلوووش << يآرب تصير زوينه ويآ الحجي عبآس
و الله أشك أني :huh:
بس يآ الله نتمنى يقولو الدنيآ أمآني :weird: << مدري من وين جآيه ،.
بس ضحكت ليهآ الدنيآ أم جسوم ،.
وآ عليآ زكآي أني قلت يمكن يآخذهآ جسوم هآع
يعطيك ربي ألف عآفيه خيي ،.
و عسآك ع القوة ،.
يآ الله نبي تكلمة خدآج و علوآن ،.
حتى نذآكر عدل :wacko: ،.
و كلمآ ضآق الصدر نجي نوسعه مع سوآلفك الحلوين ،.
ربي يخليك و يحميك ،.
و يعطيك الصحه و العآفيه و طولة العمر ،.
و الله مو عآرفة شقول ،.
بس والله أستآنسنآ مع السآلفة كثير ،.
و بـ إنتظآر تكلمة البآقيين ،.
خدآج و علوآن ،.
و بعد الروآيه ... << نسيت عنوآنهآ :weird::wacko:
سلمت يمينك خيي ،.
و الله يحرسك و يحفظك ،.
لـآع ـــدم يآ أبو زيوووون ،.
للدموع إح ـسآس ،.
اقتباس:
المشاركة الأصلية كتبت بواسطة sweet magic
اقتباس:
المشاركة الأصلية كتبت بواسطة sweet magic
عليكم السلام ورحمة الله
مرحبتين خيتي
ويش نسوي يا خيه الظروف وما تسوي
ان شاء الله نوعدكم بشيء مميز قريباً
خالص التحيات
فمان الله
اللهم صلي على محمدوعلى آله الطيبين الطاهرين
يااااااااااارب الاحدااااااااااث روووعه بجد خيي
ابوزيــــــن
تسلم يدينك ،،ولاحرمنا روووعة ماتقدمه
اممم قرأتها من امس والحين ارد:embarrest::toung:ههههه
نشتاااق الى الجديييييييييد القااااادم
دمت برعاية المولى وحفظه
هههههههههههههههههه
ماضحكتني الا كاترين و هبن ووت هبن ههههههههه
الله يعطيك العافيه خووه واحد فاضي
اني عاد الحين قريت السالفه من البدايه للحين أقوم وأجي :d
ونستنى سالفه جديده مو تطول علينا
خيتي للدموع إحساس حياش الله
اقتباس:
المشاركة الأصلية كتبت بواسطة للدموع إحساس
لك خالص التحيات
وجميل الامنيات
وأعطر الدعوات
فمان الكريم
خيتي فرح مرحبتين
اقتباس:
المشاركة الأصلية كتبت بواسطة فرح
لك خالص التحايا وجميل الامنيات
فمان الكريم
اقتباس:
المشاركة الأصلية كتبت بواسطة إيقآعآت قلب
خيتي ايقاعات قلب مرحبتين
يعني قريتيها مره وحده
الله يعطيش العافيه خيتي
ان شاء اله السالفه اليديده قريباً
وبدون تأخير ان شاء الله
خالص تحياتي
فمان الكريم
ابدعت يا ابو وين
الله يعطيك العافية
موقف وصول ولدها مضحك لدرجة ان خواتي يشوفوني وانا اضحك يقولون علي ويش صايبها هالبنت انجنت
بس يعنو هذا شسمه ليش ماطولتها اكثر
كنا نترجى التكملة
بس الحين ماعدنا نترجى شيء
بس اكيد اكيد افكارك الخلاقة ما تنضب
نترجى قصة جديدة والا تكملة قصة خدوج ورجلها علوان
الى ذلك الحين استودعك الله
هداويه يابوزين هالسالفه ولافيلم أكشن لاوكوميدي بعد ورمانسي:cheesy:
إي والله
أم جسوم الله يغربلش غربال ما خلت نارجيله إلا جربتها:wacko: وإلا زادت حاطه الخشب بدل الفحم على الغليون :idea:
بس طلعت خوش مره وعرست هي وأولادها في ليله وحده:kaseh:
أما ولدها مسوي روحه ما يفهم طلع حيال وداهيه:rolleyes:
(ك.ز ليميتد) كلش مصداقيه في النقل:thumbdown:
حلوه:signthankspin: