رد: تصرقع بلا حدوود ,,,, رواية عجييبة على اجزااء باللهجة البحرانية
اكو وصل البارت
في سيارة حسن
حسن مستانس..طاير من الفرحة... الحبيبة قاعده وراه..وهو ما عنده شغله الا بس يطالعا من المنظرة ويوزع ابتسامات...وطبعا الحبيبة في عالم ثاني تسوي روحها تسولف ويه زينب وهي أصلا تطالعه من تحت الى تحت...ومليحة وفخرية لاهين في سوالفهم الي ما تخلص...أما زينب مشتغلة مراقبة...قاعدة وتراقب الأوضاع...مبطلة عيونها عدل..ومركزة بنظرها على حسن وزهرة..>>>الحشرة الحشورة
الجدة العيارة تسوي روحها تسولف ...لكن هي قاعده تشتغل مثل شغلة زينب...ومو بس جدي...الا كل ما شافت حسن يطالع المنظرة ويبتسم قعدت تتحجج فيه..
الجدة: حسن يا ولدي ويش فيك كل حين تطالع المنظرة ؟؟
حسن منحرج: هاا...لاا..أنا لازم أطالع المنظرة عشان أشوف السيايير الي ورايي
الجدة: والي يشوف السيايير الي وراه يتبسم ليهم بعد!! قوول قاعد تشوف زهرة
حسن تفشل " في خاطره ": بل كشفتني....مو سهله هالجدة
زينب: ههههههههههههههه ههههههههههه صاااااادوه...
الجدة: زهرة بعدين اني بقعد مكانش...بشوفه يطالع ورى او لا!!!
زهرة انقهرت: انزييين
زينب: لا مو زين تخربين عليهم
الجدة: استحي انتين وانجبي
زهرة: زين ليش..جببووش
وصلوا المستشفى...وراحوا الى الغرفة الي مرقدة فيها فاطمة....النسوان دخلوا داخل وحسن وقف بره
وبعد السلامات والسؤالات...
كريم مستانس: حيا الله من جانا
الأم مليحة: الله يحييك
زهرة تساسر زينب: الحبيب متشقق
زينب: انجبي لا يسمعونش
الجدة النحيسة: اكووو حسن بره يحارسك
زينب: طالع هادي.!!
زهرة: هههههههههه اما جدتي خووش فله
كريم: هاا...اي انا توني كنت بسأل عنه...عجل بروح ليه..مع السلامه
طلع كريم الى حسن الي كان مفول حده عليه
حسن: اجووف استحلت ليك القعده اياهم....روح روح ما يحتاج تجي ليي...روح كمل القعده اياهم
كريم: اروح يعني.!!
حسن: أي روح وش فيك قاعد
كريم: يلا عجل بروح
حسن: تعال يا الثووور...مصدق بعد وبيروح
كريم: هههههه..مسامحه نسيتك ترى
حسن: ايي من لقى احبابه نسى اصحابه
كريم: استح على وجهك
بعد يومين من هالأحداث حسن وزهرة وفخرية ومليحة وطبعا زينب رزة الفيس اياهم ورواحو المستشفى يسوون الفحص>>>>عبالهم رايحين معاريس
وبعد جم يوم طلعت نتايج الفحص...وكانت النتيجة سليمة 100%
حسن شق الضحكة من الأدون الى الأدون...وزهرة بعد كانت مستانسه حدها...اما زينب ارتبشت ومن الغيرة قالت الى امها يحددون موعد للمقابلة ...كريم من قالت له امه عن المقابلة اختبص....صار يرقع الطوف من الفرحة..مو مصدق المسكين
وفي يوم المقابلة
في بيت حجي صالح
حسن: يلا يا زينب...دخلي المجلس له
زينب: لحظه...ما ادري جيفه ادخل!!
حسن: دخلي برجولش...بعد جيفه تدخلين
زينب: اففف استحي انيي...تعال ادخل ايايي
حسن: توش داك اليوم تقولين ليي ما تبيني ادخل اياش والحين تبيني ادخل...يلا امشي دخلي قبل لا يستصرع علينا الحجي
ودخلوا اثنينهم المجلس...كريم أول ما شاف زينب داخله وقف على طوله
حسن: هيي وش فيك منزهق!!...استريح استريح
كريم يطالع حسن بعيون حمرة: وانته حقويش داخل بعد
حسن: لا تطالعني جدي...هي الي قالت ليي ادخل اياها
كريم: امممم انزين الحين انته دخلت اياها...يلا تفضل من غير مطرود
حسن يبي يطفش كريم: الخلوة حرااام...ما يجووز...استغفر الله...تبيني اخليك انته واختي بروحكم...لالا...أعوذ بالله...انت ما سمعت حديث الرسول (ص).. ما اجتمع اثنان الا ثالثهما الشيطان.!!
كريم:هيي انته لا تقعد تحرم وتحلل على كيفك...احنا في مقابله وعادي نقعد اثنينا...احنا ما بنسوي شي غلط...
حسن: عيب يا اخي عيب...ما يصير
كريم عصب: حســــــن...خل عنك هالحركات هااا...انا حافظ هالحركات زين...ادري تبي تطفشني
حسن: أنا!!...لا والله...أنا بس أبي أأمن على أختي
كريم: وانا ما باكلها...وعشان اريح...خل الباب مفتوح واقعد بره أحرس...عشان اذا سمعت صوت النجدة تجي ركيض
حسن: خوش اقتراح...انا بروح اوقف عند الباب...وبخلي الباب مفتوح
كريم:لااا...يعني الحين انته سويت شي...!!...اقول ليك ادلف احسن ليك
حسن: هااا...اييي...يعني في كلام تبي تقوله وما تباني اسمعه
كريم: ما يخصك
حسن: لا يخصني...أختي وكيفي...عجل يلا زينب قومي
كريم وصل حده: حســــــــــــــــــــــــن
زينب هني خافت يتهاوشون...فقالت الى اخوها يطلع بالطيب عن المشاكل...وبعد عناء طلع حسن عقب ما طفش كريم وخلاه يعصب
كريم: أخوش ينرفز...
زينب طالعته وقعدت تضحك
كريم يطالعها: وش الي يضحك؟؟
زينب: ههههههههههه ولا شي...بس تذكرتك وانته تعصب وتطرد حسن...شوي وتكفخه
كريم: وش اسوي فيه....حرق أعصابي
المهم....بعد كل هذا ... كريم وزينب كانوا تقريبا متفقين في الأفكار...يعني من شخصياتهم يناسبون بعض...ارتاحت زينب واجد من هالمقابلة....وكريم حسن انه زينب تفهمت الوضع وحس بالإندماج اياها....وبعد يومين من المقابلة
زينب رايحة الى امها تبي تقول ليها انها موافقة على كريم ومو عارفة
زينب: امااه...وش قاعده تسوين؟؟
الأم مليحة: انتين وش قاعده تشوفين؟؟
زينب: تطالعين التلفزيون
الام مليحة: بس سكتي عجل
زينب: انزين اماه خلي عنش هالهرار شوي
الأم مليحة: وش تبين...قولي الي عندش
زينب: يعني ما سألتيني عن سالفتي
الام مليحة: أي سالفة؟؟
زينب: سالفة الخطوبة...اذا كنت موافقة او لا...
الأم مليحة: اييي....توها الناس...من زمان ردينا عليهم
زينب منصدمه: وش تقولين؟؟؟ووش قلتين ليهم ان شاء الله.!!
الأم مليحة: جفتش ما قلتين شي وهم مستعجلين...فقلت ليهم مو موافقة
زينب بتصيح: لااا ومن قال ليش اني مو موافقة...حقويش سويتين جدي
الام مليحة: بعد انتين ما قلتين شي...وش فيش الحين!!
زينب: مافيني شي....بقوم حجرتي انخمد احسن ليي
الأم مليحة: تعالي بقول ليش...يعني انتين تبين كريم؟؟
زينب هزت راسها موافقة ومشت وهي تصيح
الام مليحة: ههههههههههههههه تعالي يا الهبلة...اني ما رديت عليهم ولا شي...الحين بروح ابشرهم
زينب تطالع امها: الا اشوفش قمتين تسوين حركات ابوويي وحسن
الام مليحة: وش اسوي...عدوني
اتصلت مليحة الى ام كريم وبشرتهم....وأخيراً بيتحقق حلم كريم
في هاللحظة دخل حسن عليهم يتحلطم
الأم مليحة: وش فيك انته بعد؟؟
حسن: تسأليني وش فيني..!! من اتفقنا ويه بيت حجي مكي على الخطوبة ما اشوف سوينا شي...الى متى يعني تحارسون...لا وكريم حضرته بعد يبيني احارسه لين ما ترد علينا ست الحسن والجمال
الأم مليحة: زينب وافقت على كريم وردينا عليهم بعد
حسن: والله.!! مبروك مبروك...عجل من باجر نروح كلنا ونشتري الاغراض
زينب: احلف.!! والفحص ما سويناه
حسن: مو لازم...كريم مافيه شي حصان..وانتين بعد مافيش شي خلاص
زينب: رووح ول
الام مليحة: على ويش مستعجل انته
حسن: امااه انا ماليي خص..انا قبلهم رايح وخاطب البنيه...يعني لازم اسوي خطوبتي قبلهم
زينب: سووها...منهو مانعنك
حسن: رجلش الأحول مانعني
زينب: مالت عليك
بعد الموافقة...صار الفحص...وبعد ما طلعت نتايج الفحص...وكان كل شي سليم...تمت الإتفاقات والمشاورات على انهم من الحين كلهم يتجهزون...عشان بيسوون الخطوبة في يوم واحد...شهر 8...بعد رجعتهم من العمرة....ام كريم وكريم قرروا يروحون العمرة وياخدون اياهم حسين لأنه يعرفونه ما بيسكت....والآن حان موعد السفر الجماعي...
في يوم السفر
حسن وكريم مستانسين على انه كل واحد بيسافر ويه خطيبته ...وزهرة وزينب نفس الشعور...
عند الباصات كان الكل واقف...مستعدين للسفر...الي يودع أهله...والي يصيح...والي مستانس...وبعد ما ركبوا جماعتنا الباص...حسن قعد ويه كريم...وزينب ويه زهرة وحسين في الوسطة وكانوا قاعدين قدام حسن وكريم..وفخرية ويه مليحه...وحجي صالح ويه حجي مكي...والجدة ويه أم كريم
الكل في الباص مستانس وطاقينها سوالف وبلع
زينب: زهرة...وينه شنطتي الي فيها اكلي؟؟
زهرة: عندش له
زينب: كانت هني على الكرسي ماادري وينه راحت
زهرة: يووو اختفت!!...دوريها عدل قومي اوقفي
زينب: جيي هي نمله الي ما تنشاف
زهرة دارت ورى تدور...جان تشوف حسن وكريم يضحكون
زهرة: وينه الشنطه؟؟
حسن يستهبل: اي شنطة؟؟
زهرة: لا تسوون روحكم ما تعرفون شي..طلعوا الشنطة بسرعه
كريم يسوي روحه نايم: اوهوو ما يخلون احد يرتااح
زينب: يا السبلان طلعوا شنطتي
كريم: افااا بس افاا...لكن يقولون السبال في عيون امه غزال
زينب: لا يقصون عليك...ترى السبال يظل سبال
زهرة: تدرين خليهم يولون...وامشي اكلي ايايي
زينب: ان أكلتون اكلي براويكم
كريم: بل ....اي طلعتين على حقيقتش مصفعه
زينب: أي مصفعه ما قالوا ليك.!!
كريم يطالع حسن: حقويش ما تقولين ليي انها مصفعه...غشيتوني الصراحه
حسن: انا بروحي ابي افتك منها الا بعد اقول عنها مصفعه...ما عليه اذا انته خديتها بتصير كريمه
زينب: مالت عليكم
الجدة: وش فيهم دلين ؟؟
ام كريم: وش دراني عنهم
الجدة: قولي ليهم يستكون لا يفشلونا
أم كريم: ههههه خليهم على راحتهم....
الجدة : مسكين حسين تعب ونام
أم كريم: أي قاعد من الصبح
طول الطريق زينب وزهرة ما عرفوا ينامون من دفاشة حسن وكريم ولقافتهم
زهرة: اوووو...دلين صراحه واجد دفشين ويقهرون...حتى ماني عارفة انام او اقعد على راحتي...لو مو قاعدين ورانا احسن لينا
حسن نط: ووش تقولين؟؟
زينب: يا طايحين الحظ انجبوا شوي...لكن صبر ليي عند امي....وراحت نطت قدام الى امها
الأم مليحة: ويش فيش؟؟
زينب: تعالي جوفي ولدش ويه رفيقه...ما يخلون أحد في حاله...من قعدنا الى الحين وهم يتحججون فينا
الأم مليحة: حتى في الباص تتهاوشون...اعقلوا عاد...روحي قعدي مكانش وقولي ليه يتأدب..والله اكو عندش ابوش روحي ليه مو تجين ليي...اني تعبانه..ومو كل حين تقعديني
زينب: اففففف...ورجعت مكانها
كريم: رحتين اشتكيتين عند الماما.!!
زينب طالعته بنظرة وقعدت على الكرسي
حسن: شباب صدق صدق....الحين انا اتكلم جد...خلونا نترك هالنحاسه شوي ونقعد نسولف مع بعض
زهرة: نعم أخ حسن.!!
حسن: نقعد نسولف عن الملل..نضحك شوي
كريم: لالا انا عندي فكرة أحلى
زينب: أكرمن بسكوتك
كريم: محد كلمش هاا يا أم برطووم
زينب انقهرت: حسن قول لرفيقك يجوز عني
حسن: انا ماليي خص...هذا الي تقولين عنه رفيقي بيصير خطيبش
زينب: جب جب
زهرة: انزين سكتي شوي خلي يقول الأقتراح الي عنده
كريم: وش رايكم نلعب لعبة الصراحه
حسن: وش هادي بعد؟؟
كريم: الله يسلمك الحين بنقعد تحت وبناخد غرشة ماي وبنفرها...والي يصير عليه راس الغرشة يختار واحد منا ويسأله سؤال حتى لو كان جريء عادي مو مشكله عندي....والثاني لازم يجاوب عليه بصراحه
حسن: خووش لعبه..يلا قوموا
زينب: أي عاد مو تمصخونها في الأسئلة...اسألوا بالمعقول
زهرة: اني ماني لاعبه
حسن: وش المانع؟؟
زهرة: أخاف تسألوني سؤال محرج واتفشل
حسن: هههههه...اذا محرج غطي وجهش وجاوبي ههههه
كريم : هههههههههههه أي صح
زهرة: لا لا
زينب: يلا زهرة قومي خلينا نكسر راسهم شويي
زهرة: وش بتسوين يعني
زينب: انتين قومي الحين وبعدين يصير خير
زهرة: اوكي خلاص
رد: تصرقع بلا حدوود ,,,, رواية عجييبة على اجزااء باللهجة البحرانية
ونزلوا اربعتهم وقعدوا تحت...واخد كريم غرشة الماي وفراها...وقفت الغرشة على حسن
كريم: حسن تختار من تسأله
حسن يطالع زهرة ويبتسم: طبعا زهرة..
زهرة أخذت نفس عميق وطالعت حسن كأنها بتدخل في تحدي: أسأل اني جاهزة
حسن: زهرة.....ونزل راسه ورد رفعه يطالعها....تحبيني؟؟
زهرة صارت طماطية: اني قايله ليكم ماني لاعبه
زينب: قعدي قعدي...صبري انتين بس عليهم
زهرة: سمعتين السؤال....يلا جاوبي عليه له
زينب:يووو انتين الي سائلينش مو اني
زهرة: يفشل اخووش صراحه
حسن: ههههههههههههه يلا له جاوبي
زينب تطالع زهرة وتحرك براسها باتجاه حسن
زهرة فهمت ليها و غمزت ليها بعيونها بمعنى موافقة
زهرة: اوكي بجاوب....بس عيد السؤال
حسن: انتين تحبيني؟؟
كريم يطالع زينب: هههههههههه زهرة خلاص لا تجاوبين يمكن اغار انا
حسن: جب انته
زهرة: احم....طبعاً لا..
حسن بطل عيونه: وش هو لا؟؟
زينب: هيي ما يصير تسأل أكثر من سؤال في دورك...قالت لا يعني لا..افهمها
كريم: حسن بس خلاص...فر الغرشة
حسن: بطيتين جبدي صراحه
زهرة تضحك: هههههه يلا فرها
حسن: فر الله راس الي صوبش
كريم نط: فر الله راسك الا انته..حقويش تدعي على اختك
حسن: قصدك خطيبتك
كريم: يلا خلصنا بسرعه
فر حسن الغرشة وصارت هالمرة على زهرة
كريم: يلا عاد وش هالحظ...الحين أكيد بتسأل حسن
زينب: ههههههههههههههههههه احسن احسن
زهرة: لا وانته الصادق بسألك انته
حسن: وحقويش ما تسأليني انا
زهرة: يوو كيفي
كريم: انزين لا تتهاوشون...تفضلي سألي
زهرة: من متى وانته تفكر في زينب؟؟
زينب: الله يغربلش ما حصلتين الا هالسؤال.!!
زهرة: سكتي انتين الحين
حسن يطالع كريم: وش فيك يا الحجي مفهي؟؟ جاوب له
كريم يبي يرد لهم الصاع صاعين: ههههههههههه ضحكتيني والله...وانتين منهو الي قص عليش وقال ليش اني معجب فيها أو أفكر فيها
زهرة: محد قال ليي بس أني اسأل
حسن: بس خلاص ما يصير تسألين أكثر...مو هذا الي قلتونه.!!
زهرة: اوكي خلاص...وفرت الغرشة...هالمرة صارت على كريم
كريم يطالع زينب: لا تخافين ما بسألش...أنا بسأل حسن
زينب: ومن قال اني خايفة
كريم: لا من شكلش بس
حسن: انزين اسأل
كريم: اذا عرست تفكر تجيبون جم ولد وجم بنت؟؟
حسن: 11 بنية و11 صبي
زينب حطت ايدها على راسها: الله الله...جم وحدة بتتزوج انته الي بتجيب كل دلين
زهرة مبطله عيونها وبوزها وتطالعهم...وكريم يضحك عليهم
حسن: أي عشان اسوي فريقين ...فريق شباب وفريق بنات...ونلعب كورة بعدين..أنا الحكم وزهرة احتياط هههههههههه
زهرة أخدت الغرشة وفلتتها على حسن: سخيييييف حدك
حسن:ما عليه...ضرب الحبيب مثل اكل الزبيب....صبري ليي بس ان ما جننتش
زهرة: قومي قومي دلين أحد يعطيهم وجه..قومي يلا وش تحارسين بعد
زينب: ههههههههههه احارس يجي دوري
كريم: ههههههههههههه فاضيه هادي حدها
زينب: طالعه عليك
كريم: متأكده.!!
زينب: لحظه بسوي عقرة بقرة
كريم: خخخخخخخ...حسن...اكتشفت خطيبتي ظريفة
حسن: ههههه عليك بالعافية
كريم: هههههههه الله يعافيك..وانته خطيبتك من أي نوع
حسن: من نوعي هههههههه
زهرة: يا عليي سخيفين حدكم...انتين اذا ما بتقومين خلش بروحش اياهم...عشان يرفعون ضغطش
زينب: لا وش يقعدني بعد ويه هالوحوش...قومي يلا
وقاموا ثنتينهم وقعدوا على كراسيهم ولحقوهم حسن وكريم قعدوا على كراسيهم
زهرة: افففف ورانا ورانا..
حسن: والزمن طويل
زينب: حسن لو سمحت ادلف خلنا على راحتنا
كريم: ههههههه بس خلهم مساكين في حالهم
وظلوا على هالحال لين ما وصلوا فندق ايلاف السلام الي بيسكنون فيه...وهم ينزلون أغراضهم..كل واحد كان مشغول بروحه وتعبان...يبي بس مخده عشان ينام..وزهرة من النومه الي فيها تعرقلت بحجرة في الشارع وتعورت رجولها...محد جافها الا حسن هو الي جافها وجا يركض اليها
حسن: سلامات سلامات يا الغالية ...عسى ما شر
زهرة متفشله: لا بس تعرقلت بالحجرة
حسن: اعطيني الشنطة بحملها عنش
زهرة: مشكور...بس ما يحتاج
حسن: لالا...انا بحملها عنش...يبين عليش تعبانه
زهرة: كله منكم ما خليتونا ننام
حسن: زهرة...مسامحة اذا ضايقناكم انا وكريم في الباص...بس احنا كنا نمزح اياكم
زهرة: لا عادي...
وبعد ما دخلوا الفندق...عائلة حجي صالح أخذوا ليهم جناح...وحجي مكي اخذ الجناح الي مقابلنهم...وكان بين هالجناحين غرفة...أخدها كريم ليه ولأمه وولده...عشان يبي يصير صوب الحبايب...المهم كل واحد دخل حجرته...ووينك يا المرقد
يوم ثاني الصبح
حسين كان أول واحد قاعد من بين الجماعه كلهم...طبعاً لانه الحبيب نايم في الباص وشابع نووم...وقعد يصرخ يبي يروح الى زينب
كريم: اووهوو...اماه توه الساعه 6 هذا من الي بيقعد ليه هالحزة
أم كريم: وش دراني عنه ولدك..ما يفهم بعد جاهل
حسين: ابيي ارووح الى انوووووووووووب...وراح يركض صوب الباب
كريم: تعال حسبي الله على بليسك..وينه بتروح
حسين: ابي انووب
كريم: صبر انته الحين اقعد شوي...وبعدين بنروح
حسين: لااااا
كريم: اووو انا ماليي خلق دلعك الزايد...بتطلع اطلع وخلك تولي
أم كريم: وينه بتروح حسوون؟؟
حسين: بروح الى انوب
أم كريم: تعال بشغل ليك التلفزيون...تعال جووف الرسووم
حسين: ماانااا
أم كريم: جوف جوف الجاهل يلعب وش حلاوته..ما يصرخ
حسين: انا أحلى منه>>>مغرور هالجاهل
أم كريم:هههههه أي انته أحلى
وسكت شوي وقعد يطالع الرسوم
في جناح بيت حجي صالح....زينب قعدت من وقت عشان تسوي الريوق ويه أمها وتودي الى كريم وامه وحسين..
زينب: الحين من الي بيدوي الصينيه..حسن مو قاعد...ولا ابويي بعد
الأم مليحة: وديه انتين عجل
زينب: وحقويش مو انتين.!!
الام مليحة: ما تشوفيني قاعده اشتغل...يلا روحي وديها وتعالي
زينب: انزين...وراحت لبست شيلتها وعبايتها وطلعت صوب حجرتهم...طقت الباب..وطلع كريم
كريم يفرك عيونه مو مصدق الي قدامه...وزينب مستحيه منه وساكته
كريم: ههههه تفضلي...
زينب: لا بس جايبه ليكم الريوق وبروح
أم كريم: كريم..من الي جاي؟؟
كريم: امااه هادي زينب جايبة الريوق
أم كريم: دخلي يا بتي حقويش واقفة على الباب..تعالي تريقي ايانا
كريم: سمعي الكلام ودخلي
زينب: بس اني ما قلت الى امي
أم كريم : ما عليه بنتصل ليها الحين
كريم متشقق: يلا ما عندش عذر الحين..حسين بعد اكو قاعد يطالع رسوم ولا يدري انه انتين جايه
زينب: ههههه وش مقعدنه من الصبح
كريم : هذا كله جدي...لازم يخرب عليي نومتي...وحسانو اكيد للحين نايم
زينب: ايي
كريم: يا بخته...
أم كريم: خل البنيه تدخل مو قاعد تسولف اياها على الباب
كريم: هههه نسيت روحي انا...تفضلي
دخلت زينب الحجرة واول ما دخلت جافها حسين وارح يركض ليها
حسين مستانس: انوووووووووب
زينب:هههههههههههههههه حسوون شحوالك؟؟
حسين: انا ذين...تعالي تالعي الرثووم
زينب: اووكي
وقعدت اياهم تتريق..وكريم مستانس على عمره...وبعدين طلعت واخدت اياها حسين
دخلوا الجناح الا هم قاعدين يتريقون...قعدوا اياهم وطبعا حسن ما سكت عن حسين قعد يجننه شوي ويطفشه
زينب: اني بروح اسبح ...وانته جووز عن الجاهل
حسن: ما عليش منا...انا وهو كيفنا
راحت زينب عنهم...وحجي صالح طلع ويه حجي مكي...ومليحة بعد راحت الى فخرية...ظل حسن وحسين بروحهم
حسن: حسوون...قوم بنطلع
حسين: وينه بلووح؟؟
حسن: بوديك اشتري ليك حلاوة
حسين: حواوة!!...الاااي يلا دووم
حسن: يلا...وطلعوا اثنينهم
بعد نص ساعه طلعت زينب ما شافت أحد...
زينب: وين راحوا دلين؟؟ ماليي الا اروح الى زهرة
طلعت وراحت جناحهم
زينب: امااه...عجل وينه حسين؟؟
الأم مليحة: يوو مو ايااش...اني طلعت وهو كان ويه حسن...حسن وينه؟؟
زينب: ما ادري ما جفته
الأم مليحة: عجل يمكن وداه الى ابوه وطلع
زينب: زهرة قومي ايايي بروح أتأكد...يمكن حسانو الغبي طلع وخلاه بروح وهو طلع...يمكن يضيع
زهرة: يلا قومي بنروح نسألهم
راحو يطقون عليهم باب الحجرة...وطلعت أم كريم
زينب: خالة اياش حسين؟؟
أم كريم حطت ايدها على قلبها: يوو هو مو اياش؟؟
زينب: لا اني دخلت اسبح وطلعت ما جفت أحد
أم كريم: ويلي على ولدي...كريم كريم تعال جوف وينه حسين راح
كريم جا صوبهم: وينه راح حسين؟؟
زينب شوي وبتصيح على حسين: ما ادري اختفى ما جفته...>>>يا الغبيه تكلمي عدل
كريم خايف: جيفه يعني اختفى؟؟
زينب: طلعت من الحمام وما جفته
زهرة: يمكن نزل تحت....امشوا ندوره لا يروح مكان واحنا ما ندري
كريم: يلا بسرعه
أم كريم: صبروا بجي اياكم.!!
كريم: لا اماه انتين روحي قعدي ويه النسوان انا بروح ويه البنات وبجي
أم كريم: انزين..
راحوا ثلاثتهم يدورون في المكان الي هم فيه...بعدين نزلوا تحت الفندق يدورون
كريم: حسن وينه راح؟؟
زينب: حسن طلع ما ادري وينه راح
كريم: افففف...وقته هذا بعد
زينب تصيح: حسين ضاااع
كريم يهديها: لا تصيحين يا بت الناس...اكيد هو هني يعفس لانه ما بيطلعونه السكورتيه اذا شافوه
زهرة: زينب وش فيش تصيحين...ما تجوفين الرجال متوتر تزيدنه يعني.!!
زينب: خايفه على حسين يصير فيه شي...اذا صار فيه شي كله مني
كريم متوتر: خلاص زينب لا تصيحين...عشاني.!!
زينب تمش دموعها: امشوا ندوره انزين
زهرة: لحظة...هذا شكله حسن الي جاي.!!
كريم: أي هذا هو...امشوا بنروح اليه
مشوا بسرعه اليه لين ما وصلوا صوبه...
كريم خايف: حسن...ما شفت حسين؟؟
حسن: هههههه وش فيك جدي...حتى العرق يصبصب من الخوف
كريم: اووو مو فاضي الى سخافاتك الحين...جفت حسين؟؟
حسن: اكو وارييي هو ما تجوفه.!!
زينب ركضت الى حسن تحضنه
حسن: ههههههههههههههههههههه قومي فضحتينا...وش فيها هالمجنونه..!! حلمانه عفر؟؟
زهرة: مسكينه كانت خايفه عليه ...عبالنا ضاع ما ندري انه هو اياك
كريم: وانته ما تعرف تقول الى احد انك بتطلع وبتاخد اياك هالجني؟؟
حسن: وش دراني انكم بتحاتونه جدي...وانا قلت مافي الا انا وهو بنطلع...افهمومها يعني اذا بطلع باخده اياي...مو مجنون عشان اخليه بروحه
زينب: يلي ما تفهم جان قلت ليي بتطلع...خوفتني بس
حسن: يا ام كشه مافيش مخ هني يفكر
زينب: وش دراني اني كنت خايفه ولا ادري وش اسوي
حسن: من الغباء الي فيش
كريم: بس خلاص امشوا فوق...الحين النسوان قاعدين يحاتون
راحوا فوق وبشروهم بعدين طلعوا راحوا يصلون ....وعقبها راحوا يتشرون...والليل رجعوا الفندق تعبانين ...
زهرة: افففف تعب تعب...
الجدة: تعبتونا انتون من مكان الى مكان..اني ما اقدر على الدوارة...ركبتي تعورني الحين ويش اسويي
زهرة: اني بعد تكسرت رجولي مو بس انتين
الام فخرية: يلا روحي بدلي وتعالي تعشي
زهرة: ما ابي شي اني...بروح انخمد تعبانه حدي
توها بس بتحط راسها وبتنام الا الكهربا منطفيه عليهم
زهرة: يوووو وش هالحاله..جيفه جدي بعد؟؟
على فكره ترى هاي البارت قبل الاخير
يعني اللي بحطه المره الجايه البارت الاخيير
يلاا سلملم وانطر الردود
رد: تصرقع بلا حدوود ,,,, رواية عجييبة على اجزااء باللهجة البحرانية
الجزء الأخير من تصرقع بلا حدود
طلع حجي مكي بره يجوف السالفه هو وحجي صالح....وزهرة طلعت الى امها
زهر: امااه..وينه انتين؟؟
الام فخرية: اني هني..حاسبي لا تدوسين على الأكل...
الجدة: يا عليي خرمس خرمس ما ينجااف شييي...أييييييييييي آيييي حسبي الله عليش يا زهروو دستين على رجولييي
زهرة: ههههههه ما ادري جدتي ما ادري ما اجوف شي اني...بروح افتح الباب بجوف زينبو
الام فخرية: وينه رايحه في هالظلام...بترقعين الطوف الحين
زهرة: ما عليش اعرف اني...فتحت الباب وطلعت...هاللحظه حسن بعد كان طالع من جناحهم..والجناحين متقابلين...هي تمشي الهبله...وهو يمشي على عماه...جان اثنينهم يتراقعون
زهرة: آآآآآآآآآآآآخ منهو الي دعمني؟؟
حسن: ههههههههههه انتين زهرة؟؟ هههههههههههه ويلييييي بالغلط دعمت فيش...ويا محلا هالغلطه
زهرة: استح على وجهك ...وينه زينب؟؟
حسن: اكي زينب الهبله تلحق ورايي...ما ادري هي الحين وينه؟؟
زينب كانت تمشي وتدعم في الطوف...تدور حسن مو محصلتنه...والحبيب طاقنها سوالف ويه زهرة...كريم طلع من حجرتهم...ومشى صوب جناح بيت حسن...طلعت زينب وهو كان جاي صوبها..حست انه احد جاي صوبها وعبالها هذا حسن...الغبية جودت ايده ومشت اياع
زينب: حسانوو من شوي يوم هربت عني رقعت في الطوف...الحين بجود ايدك ولا بهدك
كريم ساكت وفي خاطره يضحك عليها...وفي نفس الوقت مستانس لان زينب مجوده ايده
زينب: حسن وش فيك ساكت؟؟
كريم ارتبك: احم...انا مو حسن
زينب عرفت الصوت وسيده هدت ايده: وا فضيحتااه
كريم: ههههههههههه عادي عادي...وينه هرب حسن عنش
زينب: ما ادري عنه طلع واني كنت وراه..الحين ما ادري وينه...اني اسمع صوت احد يزن هني..قريب الصوت
كريم: أي انا بعد اسمع....لحظه شوي بروح اتقرب...راح كريم يمشي في الظلام...جان يطيح على حسن
حسن: أأأأأخ أأأأأأي...كسروووني...منهو هذا الأعمى
زهرة: ويلي..منهو الي طاح فوقك؟؟ وينه انته حسن ما اشوفك؟؟
كريم فاطس من الضحك:هههههههههههههههههههههههههههههههه اااااااخ اااااااااااخ
الملاعين قاعدين هنيي هااا..وش تسووون؟
حسن: بل هذا انته يا هادم الملذات...قاعدين نسولف وش نسوي بعد
كريم: اييي عليناا...تسولفون في الظلام عاد.!!
حسن: بتتسطر هاا..
كريم:ههههههههههه زينب تعالي جوفي هني فلم هندي
حسن: جيفه تجوف في الظلامه
زينب: اخاف امشي واطيح.!!
كريم: ههههههههههه مشكله بعد...الحين بجي اخدش
حسن: هي هي وش تروح تاخدها بعد...اقعد مكانك...انا بروح اليها
قام حسن بيروح الى زينب...الا الكهربا اشتغلت
حسن: افضل الصلاة والسلام عليك يا حبيب الله محمد وال محمد صلوات ربي عليهم...
كريم: والخضر يا بو محمد الهي عجل فرجه وسهل الله مخرجه ورفع الله رايته بحق علي وولايته
زهرة: ايوواا عاشووا...
زينب: بتقرون لينا ميلاد هني؟؟
حجي مكي: وش عندكم متجمعين؟؟
حسن: تعال عمي بنقرا ميلاد
حجي صالح: أي وملجوا مره وحده ههههههههه
كريم: يلا انا جاهز
حسن: ههههه ما ورانا شي احنا....باقي بس الشيخ يجي ويملج
مرت الأيام على جماعتنا حلوه...وكانت تمر بسرعه..بالنسبة ليهم كانت أجمل الأيام...خلصت ايام السفرة..ورجعوا البحرين...بعد ما رجعوا اتفرغوا كلهم للتجهيز للخطوبة الجاية
زهرة تتكلم ويه زينب في التلفون
زينب: الحين وش باقي علينا؟
زهرة: باقي نروح نحجز لينا فساتين ... واغراض خفيفه بعد...يعني في يوم واحد نخلصهم
زينب: تعالي...فساتينا مال الملجه ما رحنا نجوفهم.!!
زهرة: اوو..تدرين باجر اذا رحنا ندور لينا فساتين..بنمر مره وحده الخياط
زينب: ايي هذا كريم وحسن بيصفقون على راسهم..
زهرة: والله عاد يتحملون ما جاهم
زينب: انزين .. وش رايش كل وحده تاخد فستان لونه مثل لون بدلة رجلها
زهرة: أي والله طقم نصير
زينب: هههههههه روحي سألي حسن وش لون بدلته
زهرة: بل ما ينطرى...اكو يتصل ليي..الحين بينقهر
زينب: عجل عناد قعدي سولفي ايايي
زهرة: يلا يلا اني ابي اكلمه يلا دلفي بعدين بكمل اياش
زينب: مالت عليش...ما اجوف اني الي عندي مفتكر فيني
زهرة: احم...احنا غير
زينب: مالت عليش...هو قايل بيتصل ليي بعدين...يلا دلفي باي
زهرة باي
صكته من عند زينب وقعدت تكلم حسن>>>عاد في ويش تكلمه ما يخصكم.!!
بعد اسبوع
ليلة الجمعة في أحد مواتم البحرين
في فرحةٍِ عامرة...استقبل عائلة العريس حسن صالح والعروس زينب صالح ..عائلة العريس كريم محمد..وعائلة العروس زهرة مكي..الضيوف والمعازيم الكرام...متقدمين لمشاركتهم الفرحة وتقديم التهاني لهم والدعاء لهم بالتوفيق>>>طبعا الليلة الملجة للنسوان وعشى للرجال...حياكم وياهم...ترى انتون معزومين هاا
حسن كاشخ اخر كشخه مرتز على الكرسي بالثوب والغترة والعقال لا ولابس بشت بني بعد...وكريم بعد مثله كاشخ بالثوب والغتره والعقال بس هو لابس بشت اسود..ومرتزين على الكراسي كأنهم شيوخ
حجي صالح: مبرووك يا ولدي مبرووك...الله يوفقك ان شاء الله ويحفظك...ونجوف ولادك
حسن متشقق اليوم يومه: الله يبارك فيك ابوويي
حجي صالح: مبروك كريم تستاهل...الله يوفقكم ان شاء الله
كريم يبتسم: الله يبارك فيك عمي...
حجي مكي: ههههههههه هااا رجل بتي...وش النفسية؟؟
حسن: اوو تمام التمام..راااحه
حجي مكي: ههههههه الله يهنيكم
في ماتم النسوان
زهرة وزينب قاعدين صوب بعض ويسولفون
زهرة: يا عليي اني متفشله من هالاوادم حدي...
زينب: أي اني بعد ماني عارفه اقعد...هذا الملجه وجدي عجل باجر في الخطوبة وش بنسوي؟؟
زهرة: سكتي لا تذكريني بباجر...جيفه بنام الليله قولي؟؟
زينب: اني ما بنام
زهرة: هههههههه قعدي سولفي ويه كريم طول الليل عجل عن الملل
زينب: افكر ابند تلفوني اليوم...بروحي مستحيه منه...ما ادري بعدين جيفه بقابله
زهرة: اني بقول ليهم ما ابي اجوفه اليوم...خلوها لباجر
زينب: ايي جان تبين حسن اليوم يسوي لينا المصرع
زهرة: خايفه ومستحيه منه
زينب: ادري نفس الشعور ههههههههههه
زهرة: ههه سكتي بس اكو يطالعونا
وبعد ما طلعوا النسوان...وخلصوا الرجال من علافهم...كلهم رجعوا الى بيوتهم...الا حسن راح بيت حجي مكي...وكريم راح بيت حجي صالح
في بيت حجي صالح
في المجلس
أول ما دخل كريم المجلس....جاف ملاك قاعد على الكرسي...حس انه روحه رجعت له...كان مرتبك واجد..وخصوصأ انه اول مره بيقعد ويه زينب بروحهم...خلاص صارت حلاله...هدأ من روحه شوي وتقرب منها...زينب أول ما جافته جاي صوبها وقفت احتراما له... سلم عليها وباسها على راسها
كريم: مبرووك يا الغالية
زينب مستحية: الله يبارك في حياتك...وسكتت
كريم يبتسم: مافي كلمة مبروك ليي؟؟
زينب ارتبكت: هههه مبروك...
كريم يطالعها: بس مبروك؟؟
زينب نزلت راسها: اووو لا تسوي ليي احراجات الحين...
كريم: ههههههه بسامحش هالمره...لأن اول مره ومستحيه مني
في بيت حجي مكي
حسن قاعد ويه زهرة وهو في عالم ثاني...مستانس حده...كان عكس كريم....ربشة من أول ما دخل...
حسن: زهرة فلصيني.!
زهرة: يوو حقويش؟؟
حسن: عشان اصدق انتين قاعده اياييي
زهرة: صبر بروح اجيب مطرقة بضربك على راسك احسن
حسن: بل بل خشنة كلش مافيش ذرة رومانسية...تونا الا من ساعات مالجين...وبتضربيني بمطرقة.!!
زهرة: هههههههه وش اسوي فيك....من اول ما قعدت وانته كأنك مزهوق...مو مصدق
حسن: لحظة هذا تأثير الصدمة...يبي ليي فترة على ما استوعب الي يصير ايايي
زهرة تطالع الساعه: بــــــــــل الساعه 2.30 الحين!!!
حسن: وش يعني؟؟؟
زهرة: بقوم انام بعد ويش...باجر لازم اقعد من 6 الصبح عشان اروح الصالون
حسن: وتطرد بعد!!
زهرة: هههههه اني ما اطردك...يلا قوم روح بيتكم
حسن: صدق ما تستحين!!
زهرة: هههههههههه يلا لا تسويها ليي سالفه الحين...اعرفك اني تحب تتحجج...
حسن: تدرين انتين ما تحبيني؟؟
زهرة: حقويش؟؟
حسن: لان من قعدنا للحين ما قلتين ليي كلمه حلوة..ما بينتين ليي انش تحبيني كلش
زهرة: هههههههههههههههه قوم قوم عن الهرار...اني فيني نومه وانته قاعد ليي كلمه حلوه وكلمه مره
حسن: ما عليه باجر ما بدخل اياش الصاله عقاباً ليش
زهرة: أي صدقتك
حسن: المشكلة قلبي ما يطاوعني...يلا بقوم انا عشان تروحين تنامين...ما ابي اتعبش
زهرة: ادري تسهرون على راحتنا هههههههه
حسن: سخيفه...
طلع حسن من بيتهم ...وكل واحد راح ينام يا زعم...لكن ولا واحد فيهم قدر ينام ديك الليله...زينب وزهرة بندوا تلفوناتهم عشان يعرفون ينامون...لأن ما باقي شي على الصبح...وحسن وكريم منبطه جبدهم على هالحركة...ومن قهرهم ناموا غصبأ عنهم
يوم ثاني الصبح
في الصالون
زهرة: زينب...انتين مافي في بالش تسريحه معينه؟؟
زينب: حتى لو في بالي شي بنساه من الحاله الي اني فيها
زهرة: يا دافع البلا...حقويش يعني؟؟
زينب: ما ادري...متخربطه
زهرة: هههههههه الا تعالي..ما قلتين ليي وش صار امس؟
زينب: يو لا تذكريني...اني اكثر شي ساكته مافي الا هو مسكين يهدر بروحه
زهرة: ههههههههههههه عجل لو تجين تشوفينا اني واخوش...
زينب: اكيد طايحين مغازل في بعض
زهرة: ههههههههه لالا....هو مسكين كل ما يبي يسوي روحه رومانسي...اني اخرب عليه...يقول ليي انتين كلش مافيش ذرة رومانسية
زينب: مسكين اخويي..من بدايتها جدي الله يعين بعدين
زهرة: وش اسوي...عشان يروح التوتر الي فيني...قلت اسوي أي شي
زينب: أي اني لو سويت مثلش احسن ليي
زهرة: هههههه لا انتين وكريم شخصياتكم مختلفين عنا كلش
زينب: أي انتون مجانين...اما احنا عقال
زهرة: حلفي!!...قومي قومي خليها تعدلش احسن
~..،،.. حـــــــــــــان مــوعــد الحـفــــل ..،،..~
في صالة مرمريز
الجدة: يلا متى بيوصلون بناتكم؟؟
الام فخرية: هداني توني متصله الى زهرة تقول هي في الاستديو الحين
الأم مليحة: الحين بعد بيتأخرون هناك واجد...انزين الا توها الحين 9.30
الجدة: يعني لازم ما يدخلون الا الساعه 1
الأم فخرية: لا بيخلصون قبل وبيجون
في الاستيديو
حسن وزهرة كانوا يصورون في غرفة وفي الغرفة الثانية كان فيها كريم وزينب يصورون....وكل مصورة ألعن من الثانية...كل وحده تقول ليهم سوو جدي وسوو جدي
عند زهرة وحسن
الفلبينية: يلا سمااايل
زهرة: عساااش ريح...يلا له...عورني بوزي واني شاقة البوز وانتين قاعده على راحتش!!
الفلبينية: لازم يطلع حلووو
زهرة: يلا باقي جم صورة بعد؟؟
الفبينية: باقي 10 صور
زهرة: يا عليي...وكل حين تخترع لينا حركه ما ادري من وينه دي
حسن: وش فيهم الحركات!!..حليوين له
زهرة: اني في ويش وانته في ويش
حسن: انزين يا الدفشه سكتي وخلينا نخلص بسرعه
زهرة: يلا الحين وش نسوي بعد؟؟
الفلبينية: انتي وقف هني..وانته وقف قدامها...ايي جود ايد بعض...تقرب شوي بعد
حسن: تقربي تقول ليش...
زهرة: هذا بفصخ ليها الجوتي الحين وبصفعها...مصختها واجد...حركاتها بايخه مثلها
حسن: ههههههههههههههههههههههههه ههههههههههههههههههههه آآآخ ما اقدر ما اقدر عليش....لا تتهاوشين اياها الحين لا بعدين تحرق صورنا كامل
زهرة: انته بعد صبر ليي..خلنا بس نطلع من هني...مستانس على روحك
رد: تصرقع بلا حدوود ,,,, رواية عجييبة على اجزااء باللهجة البحرانية
عند كريم وزينب
كريم: تعبنا والله العظيم....يا واقفين يا قاعدين...حشى مو حاله دي
زينب: وش دراني عنها!! اقعد شوي بناخد استراحه
الفلبينية: يلا بسرعه عشان يكمل تصوير
كريم: صبري شوي...بنرتااح
الفلبينيه: ما يصير..في كستومر واجد بره....اذا مافي يقوم انا رووح
زينب: تعالي انزين كملي بسرعه
قعدت الفلبينيه تشرح ليهم حركه يسوونها حق التصوير....
زينب: لالا ماني مسويه هالحركه ولا شي....قولي غيرها
الفلبينيه: انتي عرووس يصير حلووو
زينب: مااانييي يووو
كريم: هههههههههه امشي سويها ولا كأنه شي صاير
زينب: روحووا...لاني مسويه ولا شي
كريم: يلا لا نتعطل له....جوفي جت 10
زينب: قول ليها تطلع لينا حركه ثانيه
كريم: تقول خلصوا الحركات الي عندها
زينب: لاااا!! احلف انته بعد!!
المهم بعد ما خلصوا تصوير مشوا في سياييرهم ورى بعض...وشايلين الشوراع بهرناتهم.......وصلوا الصالة...طبعا الحين اول شي بيدخل حسن وزهرة وبيخلصون شغلهم وبعدهم بيدخلون كريم وزينب
لما جا حسن بيدش الصالة رجع على ورى
كريم: ويش فيك الا رجعت؟؟
حسن: استحي ادش داخل...كله نسوان
كريم: ههههه انزين عادي ادخل ولا تطالع ...طالع سيده
حسن: فشيله الحين بيجوفوني وانا ادخل اياها...لا ومجود ايدها بعد...وبعدين اشيل من وجهها الطرحه وابوها على راسها
كريم: اووو حافظ الدرس بعد
حسن: ههههه اسكت امي قاعده تعلمني اليوم...كل حين تعيد وتزيد علييي..تقول لا تنسى تشيل الطرحه من على وجهها
كريم: ههههههههههههه اما هادي امك سوالف...يلا ادخل الناس يحارسونك
حسن: يلا بسم الله..ادعي ليي
فتحوا باب الصالة...ودخلوا زهرة وحسن يمشون بخطوات صغيرة....زهرة كانت قمر يمشي على الأرض>>>تشيبه بليغ ما ادري ويش في العربي خخخخ
كانت لابسة فستان وردي فاتح...وحسن لابس بدلة كان القميص وردي فاتح والكرفته بعد اما البدله لونها ازرق غامق...اشكالهم كانت طايحة على بعض...
مشوا لين ما وصلوا المسرح ... حسن من وصل جاي بيقعد لكن تذكر الدرس الي محفظتنه اياه امه وطبقه وهو منحرج من هالاوادم الي مبحلقه عيونها عليهم..وقعدوا بعدين على الكرسي
الأم مليحة: حسن...قوم الحين بيصورونكم وانته تلبسها الدبله والطقم وتقصون الكيك وتشربون العصير
حسن: بل بل بل ... كل هذا بنسويه قدام هالناس!!!
الام مليحة: أي عجل من وراهم!!
حسن: تفشلون صراحه
الام مليحة: هههههههه قوم قوم بسرعه وراك معاريس غيرك مو بس انته بروحك
حسن: يلا زهرة بيصورونا بعد
زهرة: افففف غربااال يغربل هالمصورات
حسن: يلا بسرعه اخاف اطيح الصحن او اكت العصير عليش من الفشيله
زهرة: ايي حاسب لا تكته علييي وتفشلنا
حسن: الحين انا الي صرت افشل هاا...ما عليه لكن صبري ليي
زهرة: الناس تطالعنا هااا...لا تنفعل واجد خخخخ
قعدوا يصورون وياكلون كيك ويشربون عصير...وبعد ما خلصوا طلعوا...ودخلوا كريم وزينب
كريم كان لابس بدلة..القميص برتقالي فاتح والكرفته لونها برتقالي غامق..والبدله سودة...زينب كانت لابسه فستان برتقالي فاتح...يعني الاثنين مطقمين....
كانوا اثنينهم يمشون وقدامهم حسين مجود جاهله صغيرة من ايدها ويمشون...مسوينهم معاريس صغار<<<يا زعم حركة..
وصلوا المسرح...راح حسين والجاهله بيقعدون على الكرسي
أم كريم: يووو قوم مو انته الي تقعد...صدقت روحك بعد!!
حسين: مانااا انا معلس
أم كريم : قووم لا تفضحنااا...شالته غصبا عنه وودته بعيد عنهم..عشان لا يغربلهم
ما مداهم يقعدون على الكرسي دقيقتين الا حسينو جاي ويصارخ
حسين: انووووب
كريم: حسبي الله على بليسه بيفشلنا هالولد!!
زينب: ههههههه مسكين مستانس
حسين جا وقعد في الوسطه
كريم: لا والله!! من سمح ليك تقعد؟
حسين: اناا معللس
كريم: سمعي وش يقول...هو المعرس
زينب: ايووه عاش المعرس الصغير
كريم: يعني حتى الليله بتلزق فيني!!
حسين: انا ابي انوووب
كريم: انووب ليي اناا مو انته...يلا روح انته ليك ديك الجاهله الي مشيت اياها من شوي
حسين: سيطااانه ديك...دربتييي
كريم: تضربك؟؟؟انته بعد اضربها..وحده بوحده
زينب: ايي علمه على الضرب انته بعد
أم كريم: حسين قوم حبيبي بس خلهم يصورون
حسين: انا بعد ابي اثوور اياكم
زينب: ما عليه حبيبي...بس نخلص بتصور ايانا...يلا روح اقعد صوب الماما شوي
حسين: انذين
كريم: هوو حبيبش هاا...وانا ولا شي...بتقهريني انتين!!
زينب: يووو تغاار!!
كريم: لا ما اغار
بعدين صوروا وخلصوا شغلهم وطلعوا...كل واحد طلع ويه خطيبته في سيارته...الصبيان ما قصروا سووو ليهم زفة محترمة...طول الطريق ضرب هرنات
حجي صالح: البت ووالولد..اثنينهم خطوبتهم في ليلة وحده...الله بيفضى البيت علينا الحين...لكن الله يسعدهم ويهنيهم
الام مليحة شوي وتصيح: اسكت بس...الدمعه واقفة على الباب
الام فخرية: واني بتي الوحيدة راحت ويه رجلها
الجدة تصيح: اييي...والله اني مو متعوده انام الا متهاوشه ويه زهروو..الحين ما عندي احد
حجي مكي: ههههههه اماه..ما فكرتين الا في الهواش!!
الجدة: هههههه لا والله فجت عليي من الحين...الله يهنيهم
حجي صالح: يلا مشينا...
(( the end ))
}انتهينا ولكنهم لم ينتهوا{
رد: تصرقع بلا حدوود ,,,, رواية عجييبة على اجزااء باللهجة البحرانية
يسلموووووو
تحياتي
$$مجنونة&حلوة$$
رد: تصرقع بلا حدوود ,,,, رواية عجييبة على اجزااء باللهجة البحرانية
ابدااااااع ما فوت ولا كلمة حركااااات بجد روعة .....لابعم هع
جزاك الله خيرا
تستاهلين احلى باقة
http://up.arab-x.com/pic/Pxn46238.jpg
رد: تصرقع بلا حدوود ,,,, رواية عجييبة على اجزااء باللهجة البحرانية
اقتباس:
المشاركة الأصلية كتبت بواسطة مجنونة وحلوة
يسلموووووو
تحياتي
$$مجنونة&حلوة$$
يسلموا خيووو على تواجدش في صفحتي
تحياتي
فوفي
رد: تصرقع بلا حدوود ,,,, رواية عجييبة على اجزااء باللهجة البحرانية
اقتباس:
المشاركة الأصلية كتبت بواسطة اعشق ابي
مشكووورة خيوو على هذي الباقة الحلوة
نورتي صفحتي بوجودك
تحياتي
فوفـــي
