ضعنا يا صبرنا...

الله يعطيش العافية خيتو اميرة المرح


قصة مشوقه وكلما ليها تزداد شوق اكثر واكثر


واني اتوقع انه اللي انتبه اليه علي في صندقه حميدووووه شكله ( عادلوه عدوله) رجع ليهم بعد خخخخخ


ننتظر باقي ضعنا يا صبرنا

ويسلم لي الرواياااااااااااات اللي هيك غناتي

الجزء روووووووووعه صراااحه

ابوعلي و اولاده يعورو القلب :sad2:

يعطيش العافيه و ننتظر الجزء القااادم

رووعه
بانتظار التكمله بشووق
تحيااااتي

ياربي جاتني الصيحة على ابو علي وولدهـ

_______

ماقدرت ماأعلق
ماشاء الله عليك بصـراحة مرة شيء القصة

الله يعطيك العافية وننتظر التكملة

موفقة

أختكـ ،،

مشكورة يالغلاآآ رواية رائعة كاخواتها:kaseh:ا


كنت متابعة ع السايلنت :embarrest:


تسلمي مرة ثانيةو ربي يعطيك العافية :bigsmile:


بنتظار البارت بفارغ الصبر :angry:


لاخلا و لا عدم :in_love:

مشكووووووووووورة اميرة

كعادتك مبدعة في كل شي

-----
ننتظر البقية على احر من الجمر

تحياتي

بسم الله الرحمن الرحيم
مرحبا ,,
الله يعطيكِ العافيه خيتووو, قرأت الأجزاء الـ3 وراء
بعض إبداااع صراحةً :amuse:
شوقتيني لأيام المطر والبرد:shiny:
والأحداث حلووووه يسلمووو إيديكِ وننتظر الجزء الجديد
(..أتوقع جسوووم إللي في صندقة حميد :toung:..)

أهلين خيتو أميرة
يعطيك العافية يالغالية على هذي الرواية الروعة
بصراحة مو قادرة اتوقع ويش يكون في صندقة حميد بس اتوقع أنه مو شخص يعني مو انسان ...
وبصراحة مرررررررررررره عاجبتني شخصية ليلى تجنننننننننننننننننننننننننننننننن
تأثرت وياها وياعلي..

أما اللي ضحكوني اليوم هم أبو جاسم وام جاسم..
عدل حركات
ههههههههههههههههههههههه

أخيتي أميرة المرح...
لك خالص دعواتي الصادقة بكل توفيق وسداد وقضاء الحوائج للدنيا والآخرة..
..دمتي بعين المولى الجليل..

اللهم صلي على محمد وآله الطاهرين
القصه واحدااااثها اكتييييييييير حمااااس وروووعه
يسلموووو امووووورتنا الغاااليه
بجد جااايه متأخره :embarrest:
بس الموووهييييييييييييم اني وصلت :wink:ههههه :toung:
ننتظر القااادم بشوووق

يسلمو امورة روعة

ولا عاد القدو أتخيل الوضع والريحة

ولا علي ظريف بعد

ننتظرر باقي القصة ومن الي عند حميد

موفقه

تسلم الأيادي

وعسى راسش سالم ياااااااااارب

ذكرتيني بشباب جمب مزرعتنا يقعدوا

وطول الليل ما فيه الا رقص وطرب

الا ذيك الليله .............شلحوا سبع سيايير من عندهم

ما فيه شي بقى الا البدي

الكفرات ...الروايدو.....كل شي

وشالوا لوحات السيارات وصفوهم على الطريق ....

...كل شوي يشوفوا لوحه ههههههههههه


يعطيش الف عافيه

فمان الله

تسلمييي امورة ع الجزء الحلو

لاعدمنا الجديد وبأنتظارهـ

..}{..تحيـــــــــــــــاتيـ..}{..

ههههههههههههههههآآي
شريف أبو ضلوع .. يذكرني بشيء بس مآبقوول هع
يستآهل مآلكوه أبو الكفرآت كآن يصير عآقل مثل أخته <<<هع مستحيل لا أتوقع ذالك
هههه أبو جسوم ونآسه يشرب قدو خووش ..
أبو علي مسكين حفظ بنته الدلووعه ريموه وحركآتها ..
تسلمين حيآتو ع الجزء
ننتظر الجديد..

والله مشتاق اعرف التكملة كل دقيقة ادخل اشوف نزلت الحلقة4.

ويش بيصير الحين؟؟؟؟؟:angry::mad:

يلا انتظر البقية.

رآآسي يعوورني >> من النعس هع هع
روووعة الجزء ولاعااد البووقه أكلووهآآ الشبآب >> يصير خير هههه
أجل علا تحب شريف :) >> يحبهــا للفضايح
وسالفه ابو جاسم ومرته جخهـ واللهــ >> سوآلف عسل
يسلمووو أمورتنآآ على الجزء
في الإنتظار

روووعه



ياويلي على هالحرامي http://www.al-3ola.com/vb/images/smilies/eek.gif قفل عليهم الباب وطفى الكهرب http://www.al-3ola.com/vb/images/smi...usted_blue.gif


شكله حرامي محترف على مستوى http://www.al-3ola.com/vb/images/smilies/pleasantry.gif



مسكين بو جاسم مع قدوه وسحاراته تلعوز فيهم



ولا .. ماعور قلبي الا ليول على عمري هي وكيكتها خاطرها فيها نست الطحين



يلا بيجيب لها علاوي مابيقصر وبيجوا لها علا وامل وزنوب وبيستانسوا عندها http://www.al-3ola.com/vb/images/smilies/girl_smile.gif



على فكره تعيلف ام جاسم وابو جاسم ذكروني في ام حيدر وابوه

بقصتك (ماعرفتوني كثر ماعرفني ):toung:



وويش في صندقة حميد اميروه http://www.al-3ola.com/vb/images/smilies/girl_cray2.gif



الله يستر



الى الملتقى مرمرش

مرحبا
يعطيكم الف عافيه
ولا عدمت هالتعليقات الحلوه.. والمواقف الأحلى اللي ذكرتكم قصتي بها.. تسلمو لي والله من كل مكروه.
تواجدكم يبرد القلب ويشرح الخاطر... الله يبرد قلوبكم ويحقق امانيكم ياااارب

تفضلو الجديد..

الحلقه الرابعه ..

وصل علي لصندقة حميد.. طق الباب .. ودخل لقى حميد قاعد ياكل حلوى وخبز ..
ــ قوووه
حميد : ــ هلا الله يقويك .. اقعد افطر وياي..
ــ لا فيه العافيه.. باروح اجهز طرادي و قشور ربياني وعفستي ..
وانتبه علي لشي مو غريب عليه في صندقة حميد....
طالع فيه عدل ..
ــ حميدووه ... ويش يسوووي هذااا عندك..؟؟؟؟؟

حميد يحط صبعه على خشمه :
ــ شششششش .. خله نايم...
وطلع وياه برى....
علي مستغرب : ــ لا صدق ولد خالي ويش جيبه وياك هنا؟؟
ــ شدعوه ماعرفه تدري بي اعرفه !!
ــ ايه ادري بك .. بس ينام؟؟؟ غريبه ويش صاير!!
ــ هو خالك متشابق وياه ؟؟؟ هو الشله اللي يسهر وياهم..؟؟ والله مادري ... جاني آخر الليل كنت قاعد عالبحر قعد وياي شوي .. اكلنا ,, سولفنا..و شكله متضايق من شي .. طلب مني يبات وياي اذا مافيها ثقله,, قلت له حياك.. شدعوه بعد صندقه واطرده منها..
علي مستنكر .. ــ هاا.. ايه زين... خير ان شالله...

وبين ماهم يجهزو عفستهم للصيد ,,, الا بجية عادل يركض ليهم والغبره وراه...
حميد تلقاه :
ــ ويش فيييييييك؟؟
عادل : ــ وووووويلللي ههههههههههههههه... كتيت على عببباااسسسوه الحليبه ,, ححااااررره ههههههههه ققققام عصصب علللي وقققال والله لأكت بدنك بدسسست..
ولوووت غترته وصار يشلووووطني .. قمممت قلللبت تبسي الجدوووع عليه و هررربت..

وينفض عادل ايده و يطلع صوت قرطعه قويه بأصابعه..
ويكمل كلامه : ــ شششاااان يقوووم ويلحقني .. انننا حتتتى نعاااالي ما لبببسته جيت لك علللى طوول...
حميد : ــ ههههههههههههه الله يهديك.. وكل هالمشوار والطق و خبزتك بعدها في ايدك..
علي ماقدر قام يضحك..
عادل طلع ايده اليمين : ــ يؤ نسسسسيييتها اصصصلا...
وقعد ياكل فيها.. مدها على حميد:
ــ هااا .. حييياك اكككل ويييايي
ــ ههههههههههه تسلم فيه العافيه تووي ماكل
مدها على علي :
ــ هااااا تففضضضل...
علي ابتسم : ــ انا بعد توي ماكل .. عليك بالعافيه..
عادل : ــ بببااااارروح وييياكم

حميد : ــ وينا ياخوووك..
ــ الحححداااق.. ..بااانيم السمش اللي تصيدووه باااغني له لا ينحاااااش
ــ هههههههههه لا الله يخليك استريح عالساحل من بتغنى بينحاش حتى اللي في البحر.. استريح وخلنا نخلص شغلنا..
عادل : ــ زززين...
وركبو طرادهم.. كان مشترك بينهم.. ودخلو البحر .. وكل واحد قعد في جهه .. ورمى شباكه.. والرزق على الله...


امل تفتح عيونها بصعوبه مع صوت المنبه وتقوم :
ــ حسين.. ياحسين..
حسين بتعب ما نام الا متأخر رجعته من العمل : ــ مممممم
ــ يللا غناتي قوم ورانا موعد لسجاد في المستشفى..
حسين يفرك وجهه: ــ ان شالله يللا قايم..

راحت امل لسجاد.. لقته قاعد ومنسدح في سريره..
ــ صباح الخير غناتي ,, من متى قاعد؟؟
ــ صباح النور .. توني من شوي..
امل تحمله .. وتلعب في شعره..
ــ يللا مشينا الحمام ,, تسبح وتفطر وتجهز .. اليوم بنروح للدكتور مصطفى..
سجاد مد برطمه
امل حست عليه.. وصارت تضرب برطمه بسبابتها على خفيف:
ــ هااا ويش فيه الحلو زعلان..؟؟؟
ــ مابغى دكتور مصطفى..
ــ لوويه ...
ــ ما احبه..
ــ افااا ليش عاد... هو يحبك وكل يعطيك حلويات..
ــ بس كل مره يقول ان شالله امشي .. كل مره كل مره .. ولا يستوي كلامه..
امل عور بقلبها ولدها .. ضمته بالقوه لصدرها ..
ــ امي هالشي مو على كيف دكتور مصطفى.. هو يعطيك دواء ويسوي لك علاج بس الله سبحانه وتعالى هو اللي يخليك تمشي ..
ــ وليش الله ما يخليني امشي ؟؟
ــ الله كذا خلقك .. الله يبغاك ما تمشي.. يمكن اذا مشيت يصير فيك شي مو زين...
وانت كذا احسن لك يمكن.. ما تدري ..الله كل شي يسويه بحكمته و عدله بالوضع اللي يناسبه..
سجاد ابتسم ورفع راسه لأمه : ــ اييييه.. زي هاذاك الكرتون العصفور يبغى يطير وامه قالت له اذا كبرت بتطير.. الله خلاك ما تطيير لأنك بعدك صغير,,, تالي ياكلك الثعلب .. قام ما سمع كلام امه ولما راحت تجيب له دود ,, قام نط من عشه يبغى يطير وطاح واكله الثعلب .. مسكييين
امل ضحكت : ــ فديتك.. شفت ..
ــ الله ,, يعني اذا كبرت بامشي
امل بأبتسامه : ــ إن شالله..


ليلى تحوس ويا امها في المطبخ.. الساعه صارت 10 الصباح...
ام علي : ــ من زمان ما شفنا ام فلاح
ليلى : ــ وييييي ويش تبغي فيها هالهداره
ام علي : ــ هههههههههه وحشتنا اخبار الفريق
ــ ههههههههههههه نصها خرطي وتزيد من عندها...
ــ صدقتي .. بس تسلي
ــ خخخ الا تكسبنا ذنوب يا مجير..
ــ و نحسو فجعو نسرينو .. من متى فوبها طايحة الحظ ناقصنه قماش كلما اتصل عليها ما الاقيها وتالي تجي وتتليسن ما خلصتيه..
ــ اييه يا امي ..مشاغل البيزنيس ما تخلص ويا نسرين كان اخذتي رقم جوالها..
ــ راح عن بالي جوالها يبغى لي ,,,لا بنزيس ولا طزنيس, , اصباغ وجه وعطورات سويتيها بنزيش
ــ ههههههههههههه بزنيس بزنيس .. ايه ياا امي المهم تتحرك وتشوف ليها شغله ..
<< قالتها بطريقه كنها تضرب ضربات
ــ اهوو ويش عرفني بهالسوالف.. وفكينا من هالشغله قلنا لش من زمان ما تنفع لينا..
ــ ايه .. زين .. خلاص
نسرين ,, بنت من الفريق تشتغل مندوبة مبيعات.. تبيع عطورات ومكياجات لشركه فرنسيه..
اللي خلى اهل ليلى يرفضو هالشي . لأن نسرين احيانا تتعامل ويا محلات واصحاب المحلات رجال .. تصير تتفاوض وياهم على البضاعه و تبيعهم وياها..
علي من درى بهالشي قال .. ما عندنا بنات تكلم رجال وتطلع من بيت لبيت اصلا.. محلش ....
فصرفت النظر عن هالشغله..
ام علي تتنهد :
ــ ايه يابتي .. الله يرجع ولد عمتش صالح بالسلامه ونفرح فيكم يارب
ليلى تلون وجهها وابتسمت ..

تابع>>

صالح .. ولد اخت ابو علي وفي عمر ولده علي تماما فرق بينهم شهور .. اخته من سنين ماتت وابو صالح تزوج وحده ثانيه بس ما قصر على صالح.. كان من عايله مستواها فوق المتوسط.. تعلم صالح و شد حيله .. كان جدا ذكي .. جاب نسبه عاليه.. فرسلوه بعثه يدرس برى .. خيروه بين امريكا و استراليا.. فأختار استراليا .. ومن لما عمره 19 سنه راح هناك يدرس .. اخذ الماجستير .. و كمل دراسات عليا والسنه كانت آخر سنه له .. وياخذ الدكتواره..

من صغرهم هو وليلى .. مسميين لبعض .. وهو كل يجي ويقعد وياهم... ومن صغرهم وهو يهتم فيها وهي كذلك.. ما شاف غيرها بنت في حياته وهي ما تعودت على ولد غيره هو ويا اخوها في حياتها..

كبرو و بلغو .. وتغطت عنه.. وهو صار يحترم هالشي ,, ويحصر علاقته فيها بالسلام والسؤال عن الحال...

كان صديق علي بالمره.. وكل وياه.. على الرغم من كون علي ما كمل دراسته الثانويه.. و صالح العكس تماما لين تخرج و بعثوه ..

كان يوم جدا صعب على علي لما تركه صالح وسافر عنه.. يذكره على طول ..

وسافر صالح.. وسافر وياه قلب ليلى.. وسافرت وياه ذكريات علي .. و ظل بينهم المراسيل .. تجي احيانا واحيانا تنقطع... وهذي الدنيا ارزاق والرزاق رب السما...


ابو علي مشغل اخبار العربيه .. والصوت مرفع حده
وكل ما جت موسيقى العربيه الفاصله بين الأخبار .. نقز :
ــ لابوكم لابو مزيقتكم...
صار يتحسس في الأرض جنبه.. يتذكر علي قبل لا يقوم غير القناه وحط العربيه..
.. ظل يتحسس حواليه... لين مسك الريموت...
صار يحوس في الحبات.. يمين وشمال يبغى يقصر عليه.. بالغلط رفع عليه زياده ...
ــ انا لله .. ليلى.. يااااااااااا ليلى...
ما تسمعه في المطبخ ومسكرين عليهم الباب ويسولفو غير ان صوت التلفزيون حده ... صار يحوس .. يمين .. شمال .. لين قدر يقصر عليه.. وتقصر على الصوت..و حط جنبه الريموت ..
و شوي جابو برنامج فيه السيد حسن نصر الله .. الله يحفظه..
ابو علي من سمع صوت سيد حسن :
ــ هلا .. هلا وغلا بالرجال ولد الرجال.. رجال والرجاجيل بهالزمن.. ماميش..
عاد ابو علي يموت في تراب السيد حسن.. يبغى الحين يرفع الصووت حده زي ذاك الحين و يتحمس ويا كلامه وحواره..

اخذ الريموت مره ثانيه.. بس هالمره صار بالمقلوب.. وقعد يحاول يرفع الصوت مره ثانيه .. بس مو عارف يحس ما يتغير شي ..

والسيد حسن يتكلم .. وابو علي داقتنه الحومه.. وفيه حره..
قام يحبي وقرب اذونه من التلفزيون...

الا بطلعة ليلى بتشيل تبسي فطورهم... وشافته وهو ايده ثنتيهم على الأرض وركبه.. كأنه بيحبي.. وقاعد يتصوخ..
ـــ يووو يبه .. قصرت عالصوت وايد..!!
ابو علي : ــ ايه .. ايه يابتي .. عدليه عاد يجزاش خير .. تعبت وانا قاعد هاللون..
مسكت ليلى ابوها وقعدته وسندت وراه مخده.. ورفعت عالصوت
ــ كذا زين..؟؟؟
ابتسم ابو علي : ــ لا ارفع.. ابغى صوته يرن بطيفان الصاله
ليلى ابتسمت وصارت تزيد : ــ هااا كذا
ــ ايوووه... يللا سكتو ولا اسمع منكم حس
ليلى ضحكت وشالت التبسي وراحت المطبخ..
ربع ساعه الا باب غرفة ليلى وريما انفتح
وريما تنادي بتعب : ــ يبااااا... يبااااااااا
ابو علي ولا عنده فيها ... مندمج..
وتروح ريما تشيل الريموت و تقصر عليه..
ابو علي انتبه: ــ مين.. مين نزل عالصووت..!!
ريما : ــ اني .. انفقع راسنا.. نبغى ننام..
ــ نامت عليش طوفه بلى .. نامت عليش طوفه.. تقصري حس السيد حسن.. ارفعي عليه لا بهالعكازه الحين
<< ابو علي يعصب وابدا ما يتفاهم اذا تصرف واحد من عائلته أي تصرف ضد رغباته الشخصيه...
ريما رفعت عليه : ــ اوووه الواحد في هالبيت ما ينام ولا يرتاح..
ابو علي : ــ اهوو.. جيبي الريموت عندي .. ويللا فارقي..

عطته اياه وراحت الغرفه وصفقت الباب..
ابو علي : ــ صفق راسش بليس.. يالحنانه..

وما مداه 10 دقايق بالكثير انتهى البرنامج.. ويللا ويا موسيقى العربيه اللي تشلخ الراس .. ويصير ابو علي يعصص بالحبات.. الا التلفزيون انخرس...
ابو علي فكر طفاه..
شويات طلعت ريما خلاص طارت النومه.. وروحتها للحمام انتبهت للتلفزيون
وراحت تركض : ــ هااداااويه.. يبااا ويش سويت..؟؟؟؟
ابو علي منسدح على المخده وحاط ذراعه على جبهته.. ..
ــ ويش سويت بعد يالهداره
ــ برمجته.. ماني ماني .. انحذفت كم قناه واعتفست الدنيا..
طفته تركض ورجعت شغلته..
ابو علي :
ــ فورتين طارت
ريما تقلب في القنوات : ــ لأ
ــ العربيه طارت ..؟؟
ــ لأااا ..
ــ الأنوار طارت ؟؟
ــ لأ لأ
ــ اجل ويش اللي طار ؟؟
ــ طاااااااارت ام بي سي وشلتها 2 و 3 و 4 و الأكشن وكم وحده من القنوات اللي ورى .. القنوات اللي قدام ماطارو.. يبااااا ويش عصيت << اللي ورى كانو قنوات روتانا ابو علي مايدري بهم
ــ هههههههه باللي مايردهم..
ــ تهي تهي ماني .. ويش عليك انت قنواتك طالعين..
ــ الله عاد .. ذلفي وعن قلالة الحيا.. اذا جى اخوش علي يعدله..
ــ تهي .. ما بيرضى اصلا بيستانس ..
ــ الويه؟؟
ــ و لا شي..
ابو علي ما يدري ان علي شفر كل قنوات الأغاني والقنوات الأجنبيه.. وريما خلت ولد خالها جاسموه يطلعهم ليها مقابل 10 ريال .. وقالت له يخليهم اخر القنوات.. لأن علي اذا جى تعبان .. حده بس يشغل العربيه وهي في البدايه. يشوف الأخبار وينام
ريما راحت الحمام وهي تتحمق :
ــ افففففف الحين من وين اجيب 10 ريال لجاسموه .. ياااااربييييييي...

تابع>>

وفي المزرعه .. ابو جاسم يشتغل .. الا بجية ابو ناصر ومعاه حجي عباس..
ابو ناصر :
ــ قواك الله حجي ابو جاسم..
ابو جاسم قام واقف ومسح ايده في وزاره ..
ــ هلا هلا .. الله يقويك عمي ..
ــ ما يفيد فيك .. كم مره قايل لك لا تقول لي عمي .. انا ابو ناصر..
ابو جاسم بحرج: ــ ولو يا عمي العين ما تعلى عالحاجب..
ــ عساك سالم.. هاا اخبار الشغل اليوم ..
ــ الحمدلله في احسن احواله..
ويكمل كلامه بأستنكار من حجي عباس اللي ما سلم ولا نطق:
ــ قواك الله حجي عباس .. كيف اصبحت..؟؟
حجي عباس : ــ هلا.. يقويك.. زين زين..
ابو جاسم فيه ضحكه.. بس مداريها.. يدري بحجي عباس اذا نفسه في خشمه اكيد عادلوه مسوي فيه شي ..
وفي باله :
ــ تستاهل ياعساه يخوبلك ,,
الا بحجي عباس:
ــ ها ابو جسوم.. صدق ما دفعت اللي عليك..؟؟ متى ان شالله
ابو جاسم تلون وجهه وحس بأحراج.. :
ــ ايه.. هاا.. ان شالله الله يطول عمرك .. يوصل حسابك...
ــ ايه .. لا تتأخر .. قريب يخلص السبوع و ما دفعت ...
ابو ناصر تدخل:
ــ ليش كم عليه...؟؟
حجي عباس يحسب :
ــ مااخذ يونية عيش صغيره... و 3 قواطي حليب ابو علم.. و غرشة زيت
ابو ناصر عصب من حركة حجي عباس .. قاعد يحسب يعدد ويش اخذ ويش ما اخذ..
ــ ياااحجي قلنا لك كم عليه مو ويش اخذ ..
ــ هو دفع فمن قواطي الحليب وغرشة الزيت.. باقي يونية العيش ما دفعها قال السبوع الجاي ..
ابو جاسم مو عارف ويش يقول :
ــ ياحجي .. بعده السبوع ما خلص .. قلت لك باوفيك فلوسك .. واللي خلقني ما باكلهم عليك..
كان آخر الشهر.. باقي اسبوع و يعطي ابو ناصر حجي عبدالرحيم اجره..
ابو ناصر :
ــ ياحجي عباااس.. خاف ربك.. واقف له على 40 مدري 50 ريال ..
حجي عباس : ــ فمانييييييييين.. فمانين يابو ناصر..
ابو ناصر : ــ جعله ميه.. الله موسع عليك و راهي عليك ومتفضل عليك بخيره ونعمه.. تجي تحط بالك بال اللي على باب الله حق ويه..؟؟ خلاص فلوسك بتوصلك ولا عليك..
ابو جاسم انحرج ومو عارف ويش يقول :
ــ لاا .. تالي بعطيهم وياه.. عسى عمرك طويل .. عساك سالم... لا تكلف ..
ابو ناصر يبتسم : ــ ماعليك ..
ابو جاسم : ــ الله يعطيك الصحه والعافيه..اخصمهم علي من اجري ..
ابو ناصر طالع في ابو جاسم : ــ ويش تقول .. باسوي روحي ماسمعت..
ابو جاسم : ــ لا والله ما يصير يابو ناصر .. خيرك مغطينا الله يزيدك من فضله..
ابو ناصر يعرف ابو جاسم نفسه عزيزه وبيسوي سالفه على هالفلوس ولا بيرضى :
ــ خلاص يا بو جاسم.. اعتبرهم من اجرك ..
ابو جاسم ابتسم : ــ الله يبغلك في ذكرك .. الله يوسع لك في دنياك وآخرتك.. الله يطول عمرك ويعطيك الصحه والعافيه.. الله يخليك
ابو ناصر : ــ تسلم بركة دعاك الصالح.. يعطيك العافيه
ــ الله يعافيك..
ومشى ابو ناصر ويا حجي عباس .. وابو جاسم رجع لشغله..
حجي عباس : ــ حق ويه .. ها.. حق ويه.. الحين تعوده على هالحركه.. ولويه ما تخليه يسميك عمي.. تقويه عليك
ابو ناصر طالع في حجي عباس:
ــ افففف الله يهديك..
ــ لا اا.. قالو لك مينون.. قول مينون...
ــ لاااا حاشاك ..
ــ ايه.. حسبالي .. بس والله انك يابو ناصر تعطيهم وجه زياده و..
ابو ناصر يقاطعه:
ــ ياااحجي .. فلوسك وصلتك لو لا ؟؟
ــ ايه..
ــ خلاص اجل .. ماعليك مني عطيتهم وجه ما عطيتهم ..شي راجع لي..
ــ زين ويش فيك حمقت..!!
ــ ما حمقت.. ماعلينا.. ايه .. نشوف شغلنا..


الدكتور مصطفى.. يشوف نتايج الأشعه..
حسين و أمل قاعدين ومتأملين أي خبر يبشرهم يعطيهم الأمل من ورى هالعلاجات..
ابتسم الدكتور.. وطلع من الدرج حلاوه..
من طلع الحلاوه.. عرفت امل .. نفس حركته كل مره.. وتذكرت كلامها ويا ولدها قبل لا يروحو المستشفى..
دكتور مصطفى : ــ خود بأى يا شااااااطر المصاصه دي ..
حسين بنظرات تأمل .. حط كوعه على مكتب الدكتور و سند خده على كفه..
ــ الله كريم..
الدكتور : ــ الله كريم يا باش مهندس .. انا هغير له العلاق هالمره دي .. وان شاء الله مع العلاق القديد يبأى في نتيقه..
حسين : ــ ان شاء الله..
ــ بالسلامه يارب
ــ الله يسلمك..
حمل حسين ولده.. اللي ترك المصاصه على مكتب الدكتور..
يحس ماليها طعم.. ولا حلاه.. ولا عاد يبغاها.. لأنه زهق منها.. ولا عادت تعني له أي شي..

الساعه 11 ونص الظهر ..
علا كانت في الحمام ,, طلعت شافت جوالها رساله من خالتها امل رسلتها ليها الصباح..
ــ صباح الخير غناتي.. المهم اذكرش اليوم بنروح للخياطه.. تجهزي و كلمت مالك ووافق يودينا السوق بس يقول اول شي بيجيب سيارته من الورشه يعني العصر ان شالله نلتقي.. اشوفش على خير..

ابتسمت علا :
ــ على خير.. ممممم ولا اني جايه اتذكر هالليلى...
طلعت لقت عمتها سميره في الصاله قاعده..
ــ صباح الخير..
ــ أي صباح.. قولي مساء الخير..
ــ خخخخ ما نمت الا بعد صلاة الفجر..
ــ وويش مسهرنش .. ؟؟؟
ــ لا بس ما جاني نوم..
ــ ايه اللي ماخذ عقلش..
علا ببرود : ــ ماحد..
ــ ايه .. يتهنى به..
علا سوت روحها ما سمعت.. متعوده هالضربات من عمتها .. دايما تحط دوبها دوب البنات..
من تسمع وحده رفضت واحد متقدم ليها.. قالت اكيد تحب واحد و في بالها واحد.. من تشوف علا ما نامت لو سرحت .. قالت ليها تفكري في مين..؟؟؟

دايما تحسس علا ان كل بنات هالزمن مهم خاليين من هالحركات..
لدرجة انها كل سنه تحسب لعلا كم وصل عمرها...!!!
واذا جى ليها خطيب ورفضه ابوها بدل لا توقف ضده وتقول له شوف حالتي وليش الرفض .. بالعكس تشجعه على تصرفه وانه مهو من ثوبهم ولا يناسبهم...

علا تسكت عنها.. وفي بالها .. ــ مالومش .. من حالتش اللي وصلتي ليها.. وياخوفي الحقش ...

دخلت المطبخ .. لقت تريزا تحوس بس حوستها مو زي العاده.. كانت تفرك المواعين ببطئ وسرحانه وسرحانها يغطيه الحزن..
علا تعمدت تسوي صوت وهي داخله لا تخلعها..
تريزا عفويا اختلعت و رمت الكاس وانكسر ..
سميره برى تصرخ :
ــ ويش كسرررررررتي بعد..
تريزا بخوف :
ــ سوري ماما.. سوري ..
وصارت تلم الزجاج من المجلى وترميه.. ووجهها مكتوم وكأنها بتصيح..
علا تعتذر من تريزا على الخلعه وتكلم عمتها : ــ ويش فيش عمه.. دافعة بلى الكاس .. حصل خير..
ــ ليش مفكره هذا اول واحد,, من قعدت وهي تكافخ بالمواعين.. كم شي كسرت ومن شوي كسرت غرشة مخلل خيستنا..خرفت الظاهر وما عادت تقدر تشتغل .. يبغى لي اقول لأبوش يجيب لينا وحده غيرها..
تريزا ما تحملت..
انسلت دمعه من عيونها..
علا ماقدرت على الموقف .. وراحت ليها..
ــ ويش فيش تريزا..؟؟؟
تريزا ساكته مهي عارفه ويش تقول..
علا حطت ايدها على كتف تريزا.. وقعدتها على الكرسي .. وصارت تواسيها:
ــ ويش فيش .. على ويش تصيحي..؟؟
تريزا بألم وصوت متقطع:
ــ بنت مال اني ..واجد مريض..
علا :
ــ هاا..مين قال لش ..؟؟
ــ زوج مال هو ليل يتصل ويقول .. مريض واجد ونده بيبي صغير..
علا مهي عارفه ويش تقول :
ــ انا لله.. ويش فيها؟؟
ــ مايدري .. انا في خوف
ــ لا ان شالله خير .. اذا تبغي تروحي اندونيسيا روحي اسبوع شوفي بنت وتعالي..
ــ مايقدر يروح.. عقد مافي يخلص وماما سميرا وبابا ابو مالك مافي يرضى..

علا حست انها ماتقدر تقول أي شي .. دام بابا ابو مالك ما يرضى.. ماليها كلام..
مسحت على ظهر تريزا:
ــ لا ان شالله بنت يقوم ويصير اوكي.. لا تيصيحي خلاص..
ابتسمت تريزا: ــ ان شالله..


وفي وسط البحر .. حميد وقف بيشيل الشبك امتلى سمك..
وهو واقف دار راسه وصار يترنح..
علي انتبه عليه:
ــ ويش فيك ؟؟
ــ ها لا بس ما نمت عدل..
ــ ليش عاد.. اشوفك دي كم يوم نومك مو لهناك.؟؟
ــ لا ويش دعوه كل يوم انام عدل .. بس البارحه ولد خالك ما قصر يشاخر
ــ هههههههههههه حق لا تنومه وياك مره ثانيه
ــ خخخخخ ولا يهمك المره الجايه اطرده...

علي التفت الى شبكه لقاه امتلى .. وقف بيسحبه..
حميد كان واقف ..
ولا يسمع علي الا صوت شي طاح في البحر
التفت بسرعه لقى حميد.. مو على الطراد..

الى الملتقى...

ياااااربي

ننتظر الجزء الجاي بفارغ الصبر

.........

منتظرين

ليش بالشيء الجديد عليك أخيتي هذا الأبداع
تعودنا والتمسنا منك ذلك دائما وهو للأفضل وفي تقدم دائم
ليش بمقدوري الا أن أدعي لك بدوام الصحة والعافية
والتوفيق بحق محمد وآل محمد

أختك
أخت مربوووش اذا تذكريني من متابعين قصتك سابقا ماعرفتوني ...

صبــــــــــــــــــــــــــــــــــاح الخير ..
خيوووه حماااااااااااااااااااااس على الأخر ؟!!
ويش بيصير في حميد .. ؟!! زين أن وياه علي .. وإلا كان راح فيها ..
أما أبو علي خوش شي هو ويا التلفزيون ..
يعطيكـ ربي العاااافيهـ خيوووه على هيكـ روايهـ ..
بـ إنتظار التتمهـ ,,
إلى ذالكـ الوقت ..
أستودعكـ اللهـ وأترككـ بـ أمانهـ ..
تحياااااااااااااتي ..
للدموع إحساس ..

هااااااي

الروايهـ جناان

كل شخصيهـ احلى من الثانيهـ

جااااري الانتظاااار

تحياتيـ

بسمهـ تعالى
ماشاء الله جزء ولا اروع وبنتظار وش صار لحميدو ^_^
تسلمي امورة
..}{..تحيــــــــــــاتيـ..}{..

اي وبعدين ويش بيصير ان شاء انقذه بس<< الولد اندمج في السالفة عدل

اميرة المرح

حقا

((الابداع لعبتك))

تستاهلي التقييم

ننتظر الجزء الخامس

تحياتي

الله الراوية كلما لها تستحلي صارت احليوه


ننتظر الابداع خيتو اميرة المرح


تسلمي بالغاليه

هااااااااااااا وش صار في حميد

ناقص اهوو مسكين

يسلموو امورة

رواية حمااااااااااااااااس
شخصيات تنبض بالحياة
فعلا
الابداع لعبتك

ياعلي قاعدة انتظر متى تروح علا وأمل لليلى..
ياالله إن شاء الله بكرة تروح
المهم الحين ويش صار لحميد؟؟؟؟؟؟؟؟؟
بصراحة الأحداث كل يوم تسخن أكثر..
بانتظار البارت الجديد
موفقة لكل خير إن شاء الله تعالى..
..دمتي بعين المولى الجليل..

.. مــرحــبـا ..


القـصه مره روعــهــ ,,:bigsmile:

والله من خلصت قصه ماعرفتوني كثر ماعرفني وانا متحمسه للقـصه للي بعدها بس قالوا لي انك كتبتي قصه جديده جيت اقراها ,:amuse:,


بســ القـصه مرـرـه روعــه ,,:noworry:


وتـعودنا على روعـتك في الكتابــهـ ...


الله يوفقـكك ..


وـو ننتظر الجزء الجديد ..

.. ـتحـياتــيــ ..

الله الله

احداث تشوق

يقهر عباسوه خل الرجال يدفع عن بو جسوم لاخيره ولا كفايه شره بعد

عور بقلبي سجود بكلامه مسكين

تريزا تحاتي في بنتها وسميروه مو هامنها وتهزا فيها بعد على عمري تروزه

وريموه ماتجوز عن سوالفها ولا القهر تعطي جاسم فلوس علشان قنوات وهم حالتهم حاله

ومدري ويش فيه حميدوه الميدوه ان شاء الله يقدر ينقذه :wacko:

الله يستر :amuse:

الى الملتقى :toung:

بسم الله الرحمن الرحيم
اللهم صلي وسلم على محمد وآل محمد وعجل فرجهم وفرجنا بهم ياكريم...
السلام عليكم ورحمة الله وبركاته..
خيتنا الغالية أميرة المرح...
وين البااااااااااااااااااارت؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انتظره .........
اليوم الأربعاء أو الخميس؟؟
لا الأربعاء اليوم..
إن شاء الله يكون المانع خير يارب...ونشوف الجديد الحلو ...
موفقة لكل خير إن شاء الله تعالى..
..دمتي بعين المولى الجليل..

مرحباا


بسم الله على عمرررررررري الرحمن الرحيم http://up3.shia4up.net/images/3pcvrregiy0282rqqan.png
خيه نزلت البارت
ووصل للصفحه السادسه http://up3.shia4up.net/images/t4g1vhorv0n2j3hilc.png
وردو اسوار الألم و جنة الحسين وللدموع احساااااس
وكان في غلط وعدلته الأمل البعيد
الخلل من الشبكه
<< انني مختلعه حددي http://up3.shia4up.net/images/3pcvrregiy0282rqqan.png

باشوف قسم المشرفين واذا ما حصل تعديل
راح ارجع انزل البارت الظهر http://up3.shia4up.net/images/3lshkwtywaetu3x2hce.png

ياساااتر

دمتم بخير
وبحفظ الرحمن

يؤ يؤ يؤ وين الجزء الخآآمس أني عدلتــــه
قبل لا أنام ويوم قعدت اختفى >> اميرووه انني مختلعه أكثر منكــِ
وأتذكر الأحدآآث عدل عدل
وعلآ لاعدت شبدها من بيت أبو علي >> دليل على انه موجود ههههه
اكيد العطل من الشبكه ...

ههههههههههههههههه فديتش
اشوى ماني حلمانه يعني
عموما الحين برجع انزل البارت الخامس
وقومي بالتعديل مره ثانيه

في البارت 3.. زينب بتروح بيت عمتها مو بيت خالها..
والعوض على الله..

ويعطيش الف عافيه غناتي
دمتم بخير
وبحفظ الرحمن

الحلقة الخامسة..



علي التفت الى شبكه لقاه امتلى .. وقف بيسحبه..
حميد كان واقف ..
ولا يسمع علي الا صوت شي طاح في البحر
التفت بسرعه لقى حميد.. مو على الطراد..


ليلى حطت مكونات الكيكه في صفريه.. وحطت ملعقه خشب ونادت على ريما تخلطها...
ريما صارت تخلط .. وشوي وقفت وصارت تتحمق:
ــ اففففففف تعبت ايدي .. متى بتاخذو ليكم خلاط
ليلى تغسل المواعين : ــ ايه مسوى ما ناقصنا شي الا هو..
ريما ترجع تخلط و هي تضرب في الصفريه ومسويه ازعاج..
ام علي : ــ ياااااالله ما تسوى علينا هالكيكه ... شوي شوي..
ريما تركت المعلقه..
ــ تعبت .. ايدي تكسرت...
ليلى تركت المواعين..
ــ خليها اني بخلطها وروحي للمواعين...
ــ لا والله.. واقعد افرك .. ماني ايدي تنشف بسرعه..
ــ الله يالرقه.. ذلفي اصلا مفركين بس غسليهم عن الصابون..
ــ ايه حسبالي بعد..

وحطت ليلى الكيكه في الفرن... و طلعت الصاله ...
شافت الساعه 12 الا ربع.. باقي شوي ويأذن الظهر.. ابوها منسدح غافيه عيونه..
ــ يبه.. يبااا..
ــ هاا.. هلا ..
ــ يعطيك العافيه شوي وبيأذن على ما تتمسح و تجهز للصلاه..
ــ تسلمي يا بتي جعلش الله من المصلين..

وقام ابو علي .. يلتمس خطاه بعكازته والجدار.. ماكان يرضى احد يمسكه في البيت ويدليه مكان أي شي .. كان يشوف كل شي بقلبه.. وكل شي يندل مكانه وكأنه يشوف...
واذن الظهر.. وليلى تتمسح في المطبخ:
ــ اماه مو كنه علي تأخر ..؟؟
ــ ايه يابتي العاده يرجع قبل أذان الظهر بربع ساعه لو نص ساعه... الله يستر مادري ويش فيه هالولد مخلنا نحاتيه...

وعلى الطراد.. علي يضغط على بطن حميد.. و صدره.. لين طلع شوي زين من الماي..وفتح حميد عيونه....
علي : ــ هاااا سلاااامات خلعتني يا ميدووه..
ابتسم حميد ورجع غمض ..
علي يسطر فيه : ــ هيه.. هييييه.. ويش فيك..
فتح حميد : ــ هااااا دااير رااسي ..
ــ الله ستر المكان اللي كنا نحدق فيه مو عميق والا شان رحنا فيها ثنينا.. وبرررد الجو كان ما تصخن بس ...
حميد ابتسم : ــ عالأقل وياي سباح.. ما شالله عليك..
ــ ههههههههه سباح .. اسبح بروحي مو اطلع جثه كلما اشيللك من جهه فلتت من جهه .. شلختني ياخوك هذا وانت عصقل..
ــ هههههههههههه كح كح يعطيك العافيه ..
ــ الله يعافيك .. من قلة النوم .. بس مو لهالدرجه تطيح.. ما تاكل ؟؟
ــ لا ويش دعوه اكلي هو هو.. من عرفتني ..
ــ منت على بعضك اصلا من دي شهر,, احسك منت حميد اللي اعرفه.. كل تعبان و تخاف وايد .. مادري لويه.....
ــ قلت لك ما نمت عدل..
ــ زين .. الله يغربل جاسموه.. ان شالله بس ما رجع بيتهم..
ــ الويه؟؟
ــ بس عندي كلام وياه..
ــ كلام ويه؟؟
ــ ويش فيك تحقق .. سالفه عائليه..
ــ ايه .. زين..
وسكت حميد ..
علي حس روحه فشل صديقه:
ــ جاسموه متعب خالي .. مجننه تجنن.. صاير له صايع ضايع.. وخالي مو حمل تعب .. باكلمه كان الله يهديه..
ــ يعني.. عساه خير
ــ خير ان شالله..
ووصلو للساحل .. وكل واحد شال براد سمكه
السمك بالحسره من الشتا يصير اقل ...
تيسرو بيوتهم... والعصر يروحو به السوق ويبسطو...
رجع علي بيتهم.. دخل .... وعلى طول راح يسبح.. كانت حالته حاله من الجو البارد والحداق ومن طيحته البحر ورى حميد..
ولما طلع تلقته ليلى بإستكانة شاي دافيه
علي :ــ ويش دراااش افادي بشي صاخن..
ــ هههههههه المااي باااارد .. الصخانه ما شغلناها ,,, كيف قدرت تسبح فيه...
ريما : ــ أي والله مكحين صارت ايدي فلجه واني اغسل المواعين..
علي : ــ هههههههه انا بكبري صرت قالب فلج .. ويشو غداكم يوعاااان.. يللا باصلي و انشبو..
ام علي : ــ الله يعطيك العافيه .. صالونه
ريما بسخريه : ــ مرقة بطاطس و لحم خخخخخ
ليلى : ــ احمدي ربش ...في لحم غيرش ما يحصل ..
ابو علي : ــ هالبت ما تستحي .. لا حمدا ولا شكورا..
علي يطالع ريما على جنب : ــ قايل ليكم خلوها علي منتون راضيين..
ريما تنخش ورى امها : ــ يماااه.. ويش بيسوي يعني..
ام علي : ــ يكسر راسش ويسنعش .. تأدبي لا احده عليش ..
ــ زين زين خلاص ..

الساعه 3 العصر .. جوال علا يرن..
ــ اهلييين اموله..
ــ هلا وغلا .. ها جهزتي ؟؟
ــ ايه .. مين بيودينا مالك لو حسين؟؟
ــ لا اخوش مالك.. دقيت عليه من شوي وقال قريب بيجيني .. بس نوصل بيتكم بارن رنه واطلعي..
ــ اووكي انتظر..

زينب : ــ اماااااه .. وين صحن الساقو يللا باروح بيت عمتي ام علي ..
ــ هااش .. وسلمي عليهم..
ــ ما بتروحي وياي ..؟؟
ــ والله ودي .. بس مره فانيه .. الحين حوستي حوسه.. سلمي عليهم...
ــ يوصل .. يللا مع السلامه..
ــ انتبهي في الطريق زين.. لا يطلع لش عادلوه ..
ــ مسكين ما يخوف والله زي الياهل لا تردي عليه انتين بس ولا بيأذيش .. احس ظالمينه بقولة مينون .. يفهم بس اهبل ..
ــ الله يعين امه عليه ... في طريقش اذا شفتي جاسموه اخوش قولي له يعود البيت لا رجعة ابوش المغرب يرد يصارخ ويهزأ كفايه الغدا شفتيه كيفا كنه شارب غرشة الصاص و شراره حرقنا.. صريخ صريخ..
ــ خخخخخ زين .. اذا شفته عاد.. واذا طاوع..

وطلعت زينب .. وهي تمشي صار المتوقع.. ويطفر عادل المينون في وجهها..
زينب : ــ بسم الله على عمري الرحمن الرحيم...
ــ ههههههههههههههه خخخخلعتتتتش..
زينب ما ردت عليه و وصارت تمشي .. وهو وراها..
ــ ووويين بتتتروووحي .. اكككيد بيييت عمممي ابوو علي..
ــ ياااعلي وويش عرفك اني مين ..؟؟؟
ــ انننتين زنبببوه اخت جاااسموووه..
زينب فتحت عيونها ودارت عليه:
ــ قلة حيا.. فارق عني ..
وفي بالها .. يصقعك ويش خليت للعاقلين...
عادل : ــ حسبببااالش مااعععرررفش .. وويييش حااامللله في ايدش..
زينب ساكته ماترد..
الا بطلعة شريف من بيتهم ... وشاف عادل وهو لاحقنها..
شريف : ــ عادلووه.. تعال تعال..
عادل يغطي وجهه بأيده.. : ــ وويييش تبغى فففيني..
ــ تعال ابغاك بسالفه..
زينب تكمل طريقها بسرعه مدة شريف يلهي في عادل..
عادل : ــ مانى .. باروح ويا زنبوه بيت عمي ابو علي..
زينب خلاص صخنت وبداخلها تدعي : ــ عساني حريقه يوم اطلع.. صاقعه تصقع بليسك يا عادلوه فضحتنا حسبي الله عليك ...
وصارت تسرع لين لفت جهة بيت عمتها..
شريف نزل من درج بوابتهم : ــ تعال تعال مافي روحة مكان..
عادل يرفع ثوبه ويعضه وينحاش ركض ..
شريف يموت عليه من الضحك.. :
ــ الله يهديك ويعين امك عليك...
زنبوه.!!. أي زنبوه..!!
صحيح فضيحه هالعادلوه ههههههههههه مسكينه صروعها...

ووصلت زينب بيت عمتها وهي تنافخ من الركيض .. ومامداها بتطق الباب .. الا علي يفتحه ويطلع براد السمك ..
من شافها عرفها .. ووخر على جنب .. ــ يالله.. تفضلي ..
زينب قلبها طاح في بطنها.. دخلت وبهمس بالكاد ينسمع : ــ السلام..
علي ما سمعها .. فما رد عليها وطلع..
زينب تغير وجهها.. هي تميل لعلي و ترتاح له .. وتتمناه اليوم قبل بكره يجي يتقدم ليها .. بس كل تحسه مو فاضي ولا يعطي وجه.. وهو مسكين فعلا مو فاضي لهالموضوع ومافيه شدة لا عرس ولا تحمل مسؤوليه زياده .. وهو شايل هم بيتهم على اكتافه...

كذا مره ليلى حاولت تلفت انتباه اخوها لبنت خاله.. و انها خوش بنيه ومستعده تعيش وياه في البيت وعلى الحلوه والمره وما بيلاقي وحده في هالزمن تتقبل هالشي ..
بس هو ابدا.. شايل فكرة الزواج من راسه.. وكل يقول:
ــ خلني اقدر اكون نفسي .. احس روحي واقف على رجولي .. انا الحين يا خيه ازحف زحف .. واقول يالله على بابك .. اذا حققت اللي في بالي با فكر اعرس..
ليلى : ــ وويش اللي في بالك ياخوي..
ــ اشتري بيت جديد ..و اوسع علينا .. و اغير حالنا للأحسن ان شالله بعدين افكر ..
ــ ياخوي .. يمكن بنت خالك هذيك الحزه الله يسهل عليها..
ــ الله يسهل ويوفقها ويرزقها باللي احسن مني .. ساعتها الديره مليانه بنات..
ــ بس ياخوي هي منك وفيك..و اللحمه اذا ما حبتك رحمتك..
ــ ما يرحمنا الا رب العالمين..
ــ ايه.. ونعم بالله.. خير ان شالله..

ليلى تتمنى زينب تكون لعلي .. بنيه قمه في الأخلاق والأدب وحليوه ومافيها عيب .... وفوق هذا بنت خالهم والحال من بعضه .. لا بتتذمر ولا بتتشكى ولا بتتحمق من المعيشه.. بس ويش تسوي في اخوها .. عنيد وراسه يابس...

تابع>>

زينب دخلت المطبخ .. وحطت الصحن ... شافتها عمتها .. عطتها غمزه وبوسه من بعيد..
زينب تسوي لعمتها من بعيد شششش هدووء..
ناويه تخلع ليلى..
ليلى كانت تقطع الكيكه وهي تنشد :ــ قبل لا تروح ودنا وياك ودنا نريد نزور صحن الزينبيه...
زينب قربت منها وصفقت صفقه : ــ يـــــــــالله يااااااكريم وياااش ,, الله يبلغنا الوصول ..
ليلى رمت السكين في قالب الكيك.. ودارت لزينب :
ــ يييمااااااااااه ههههههههههههههههههه عسااااش ويش اقووول خلعتيييييييينيييي
وحضنتها..
زينب : ــ هههههههههه بسم الله على عمرش .. اخبااارش ويش مسويه..
ليلى فكت الحضن و تسحب خشم زينب :
ــ اسأل عنش يالقاطعه...
ــ هههههههه والله على بالي .. صحيح.. تسلم عليكم امي ..
ام علي وليلى : ــ الله يسلمش وياها من الشر ..
ام علي : ــ ويش احوال ابوش عساه بخير..
ــ الحمدلله تمام..
ــ وجاسموه اخوش..؟؟
ــ خخخخخ لا تسأليني عنه..
ــ الله المعين.. دام لا اسألش عنه.. اجل احوال اخوي مو تمام..
زينب تطلع لسانها : ــ .. الله كريم ..
ريما دخلت المطبخ : ــ هااا زوزو هنا..
ــ اهلين وسهلين هلا بأم الريم اخبارش..؟؟
ــ الحمدلله بخير.. مممم ويش جايبه وياش..
وفتحت الصحن ..
ــ ويع .. ساقو .. خخخخ ما احبه..
ليلى : ــ خذ لك .. قولو تستحي هالبنيه ابدا.. الحمدلله رب العالمين...
زينب تضحك : ــ ههههههههه ماني غريبه اعرفها ...
ريما : ــ يادافع البلا كل تشابق هالأخت.. .. وثاني شي راايي مو مهم
وصارت تحرك حواجبها فوق وتحت :
ــ هالصحن لعليوو..
زينب تلون وجهها ..:
ــ لخالي ..
ليلى : ــ عسى ريمو سعاده استحي يابنيه استحي.... اهو بس ناخذ هالصحن لأبوي بعده صاخن خله يدفيه عن هالبرد شوي ..
مامداها ليلى بتطلع بالصحن لأبوها .. الا جرسهم يطق ...
ورجعت لأمها : ــ امااه.. في احد بيجينا..؟؟
زينب : ــ هههههههه ويش دعوه كنتو تدرو بي..؟؟
ليلى : ــ ههههههههههه على قولتش .. علي طلع .. باروح اني اشوف الباب اجل..

لبست ليلى مشمر ووقفت عند الباب: ــ ميين؟؟
امل : ــ هنا ام علي ..؟؟
ــ ايه تفضلو .. حياكم..
وفتحت الباب..
دخلو امل وعلا ..
امل : ــ قوووه ليلى..
ــ اهلييييين هلا والله بأم سجاد...
ــ اخباركم.. ؟؟
ــ الحمدلله اخبارش انتين .. واخبار سجاد.. وينهو؟؟؟
علا واقفه برى تطلع شكل البيت .. وتنتظر خالتها امل تدخل وبتدخل وراها..
امل : ــ برى في السياره..
ليلى كانت ورى الباب واقفه ومتغطيه بالمشمر ما انتبهت لعلا ... ولما دخلت امل .. كانت ليلى بتسكر الباب.. الا تحسه يندف وتدخل وحده..
ليلى انحرجت: ــ اسمحي لي خيه مادريت بش ..
علا : ــ لا حصل خير..
وشالت علا غطاها..
علا من شافت ليلى .. تذكرتها .. كانت تدرس وياها في المتوسطه.. وصارت وياها في نفس الصف ..
ليلى صارت تطالع في وجه علا..
و ابتسمت و بصوت هادي :
ــ هلا .. ... علا؟!!؟؟
علا ابتسمت : ــ ايه علا... هلا فيش ...
ــ اخبارش ؟؟
ــ الحمدلله تمام..
امل بأستغراب : ــ تعرفو بعض ؟؟!
علا ابتسمت : ــ معرفه سطحيه.. درسنا ويا بعض في صف ..
ــ اهااا.. علا تصير بنت اختي..
ليلى بأبتسامه : ــ ياهلا حياكم..
ودخلو داخل ..

علا عيونها تتحرك بشكل تحاول ما تبينه لليلى وهي داخله البيت..
مستغربه من المكان اللي هم عايشين فيه..
غير ان ريحة الممر سمك توه علي عابر بالبراد و شوي ظلت ريحه..
ام علي طلعت بالمبخر تبخر المحل ..
ــ ليلى .. مين ؟؟
ــ ام سجاد.. ويا بنت اختها..
ابو علي يتحمق على ريحة البخور : ــ كح كح فطست .. ويلي شيليه مانى قادر..
ام علي تهمس بحمق : ــ اسسسكت جايين ناس وريحة البيت زفر ..
حطته فوق التلفزيون ,, وراحت تستقبلهم..
زينب : ــ ريموه .. تعرفيهم..؟؟
ريما : ــ ما عرف الا وحده .. ام سجاد .. كل تجي تخيط عند امي و تغب بين فتره وفتره وتزورنا.. و ريلها يجي احيانا و يقعد ويا ابوي يسولف ..
ــ اهااا .. والثانيه .. وجهها مو غريب علي ..
ــ ويش دراني ماعرفها..

كانت الغرفه اللي فيها المكينه و يجو ليها الزباين .. في آخر البيت .. يمرو اول شي على الصاله بعدين يوصلوها.. وكان ابو علي في الصاله..
دخلو البيت .. علا انتبهت لأبو علي وغطت وجهها بالجهه اللي قاعد فيها ابو علي .. ولا تسمع الا خالتها :
ــ قواك الله ابو علي ..
علا مستغربه .. خالتها مهي متغطيه.. .. ريما انتبهت لعلا وهي متغطيه.. وراحت جنبها وهمست : ــ ترى ابوي ما يشووووف ..
علا صارت تطلع في ريما مستغربه منها ومن هالكلام.. وحتى لو ما يشوف .. ويش هالجرأه اللي عليها لا تعرفها ولا شي وجايه ليها... ترى ما يشوف ..
بنفس الوقت تأثرت على حاله ..
ابو علي : ــ هلا .. هلا الله يقويش يا بتي.. ويش احوالش .. وويش احوال ابو سجاد وسجاد..
ــ بخير الله يسلمك..
ــ حياش الله.. سلمي عليهم
ــ ان شالله يوصل

ليلى انتبهت لريموه ولتصرفها..
ــ ريما.. امشي وياي دقيقه..
ريما عرفت.. السالفه تهزأ..
ــ باروح غرفتي باذاكر قريب يخلص اسبوع الأجازه .. وراي اختبارات النهائيه .. ابغى اجيب مجموع..
ليلى تهمس بقهر : ــ هداره.. ذلفي ..
زينب فيها ضحكه.. : ــ الله يوفقش ..

ودخلو الغرفه .. وقعدو...

تابع>>

طلعت ام علي ثوب امل ..
ــ ها يا بتي ويش رايش .؟؟.
علا عجبها الثوب والخياط مره مرتب ..
امل : ــ ما شالله .. ويش رايي بعد يا خالتي .. شغل مضبوط كعادتش ومرتب يعطيش العافيه..
ــ الله يعافيش ..قيسيه يا بتي .. يمكن فسيح شوي لو يبغى له تعديل لو تقصير ..
ــ زين..
كانت ام علي حاطه في الغرفه ستاره حق التبديل ..
بدلت امل وطلعت..
ــ ممممم ضابط بس شوي يبغى له تضييق حق يصير احسن ..
خذته ام علي تضيقه..
ومدة هي تضيقه.. قامت ليلى تجيب ضيافه ..
صارت تحوس في مطبخهم مهي عارفه ويش تحط..
حطت كيكه في صحن و سوت دلة شاي .. و انتبهت للساقو وحطته .. وراحت بالتبسي ..
صبت شاي .. ومدته على علا ..
علا ابتسمت : ــ بس مابغى.. مشكوره ..
ليلى بأبتسامه: ــ ويش دعوه .. دفي روحش في هالبرد..
علا ردت ليها الأبتسامه: ــ لا بس ما اشرب
<< كذابه .. مهي مشتهيه تشرب اصلا من بعد ما شافت الحاله والبيت .....
مدت ليلى استكانة الشاي على امل .. خذتها وصارت تشرب فيها..
شوي ليلى قربت صحن الكيك ليهم.. امل خذت قطعه..ومدته ليلى على علا .. :
امل : ــ علا .. اخذي لش كيكه..
علا بعفويه خفست وجهها : ــ لا .. بس .. مابغى..
ليلى انحرجت من الحركه و حطت الصحن ..
امل عارفه بنت اختها.. ونفسيتها .. الوضع ما عجبها فمستحيل تاكل شي او تشرب شي ...
غير ان علا كل شوي تتلفت بعفويه يمين وشمال ..
امل حست ان ليلى انحرجت من اسلوب علا ورفضها انها تشرب او تاكل أي شي من عندهم..
زينب كانت طول الوقت تطالع في علا .. وكلما طالعت فيها علا شالت عيونها عنها بالسرعه..
زينب في داخلها : ــ شكلها مغروره.. مابغى مابغى ولا تخفس وجهها بعد.... عدال..
ام علي لاهيه في المكينه تضيق الثوب ..
وشوي الا علا تصرخ وتنفض عباتها وتقوم..
ام علي وقفت عن الخياطه وهي مختلعه..: ــ خير .. ويش صاير..!!!
ليلى قامت تشوف ويش صاير..
علا بخوف : ــ مادري .. حسيت شي يمشي علي ..
ليلى : ــ وينا؟؟ ويشوو؟؟
وراحت مكان علا..
وصارت بأيدها تمسح عالفرش تبغى تشوف شي .. وتطالع بدقه..
شافت نمله.. جابت نشافه وشالتها,, وابتسمت :
ــ نمله..
علا هدأت وقعدت..
امل قامت تضحك:
ــ ما عليكم من علوه تسوي من الحبه قبه.. خوب نمله..
ليلى قامت تجيب لعلا ماي من بعد الخلعه..
جابت ليها الكاس..
علا : ــ لا بس ما ابغى..
ليلى تضايقت و في بالها: ــ ياعلي .. حتى الماي..!!

امل ما عجبها الوضع.. تبغى تسوي أي شي يحرك علا و يغير هالمعامله اللي مبين انها مهي عدله ابدا .. عالأقل تاكل لو شويه..
هي تعرف هالبيت .. صحيح على قد حاله ...
بس نظيفين بالمره وما عمرها اكلت لو شربت شي من عندهم واشتكت بعدين..
فويش تسوووي؟؟؟
.. قامت سوت روحها تحوس في شنطتها وكأنها تدور شي .. وهي كانت اساسا تكتب رساله بالجوال لعلا .. ولما خلصت طلعت نشاف .. على انها كانت تدور عليه وسكرت شنطتها
ليلى ابتسمت.. و قامت وجابت علبه وحطتها
ــ اسمحي لينا .. راح عن بالي اجيب نشاف
امل ابتسمت : ـــ ويش دعوه .. تسلمي غناتي..

الا صوت مسج.. علا طلعت جوالها.. لقت رساله من عند خالتها...
ــ علا غناتي.. عيب الناس نظيفين لا تحرجيهم.. اكلي من عندهم على ضمانتي..
علا حست بأحراج..
والتفت لأمل خالتها.. امل تسوي روحها ما هي منتبهه ليها .. وقاعده تسولف ويا ام علي ..
علا محتاره في عمرها .,, تحس روحها مهي عدله تصرفاتها.. بنفس الوقت ماعندها رغبه وهي مشتهيه..
مدت ايدها و نتفت قطعه صغيره من الكيكه.. وحطتها في بوزها..
وشوي مدت ايدها بعفويه وبسرعه عالنشاف ... خذت نشافه و طلعت الكيكه و لوتتها في ايدها..

ليلى انتبهت عالحركه.. لأنها اسااسا من مدت علا ايدها استانست وصارت تطالعها..
وبعفويه تامه.. وقفت و في قلبها غصه .. وصارت تقول وصوتها متكسر :
ــ نظيفين حنا على فكره..
وطلعت من الغرفه..
ام علي وقفت المكينه .. وطالعت في زينب ..
ــ ويش صاير !!

ليلى دخلت غرفتهم .. وريمو حاطه سماعات المسجل وماسكه كتاب يازعم تذاكر..
سكرت ليلى الباب وراها وراحت سريرها وقعدت ووجهها احمر ومعصبه وكأنها بتصيح..
زينب ما تدري ويش خلى ليلى تفجر هالجمله ... حركت كتوفها لعمتها بمعنى مادري ؟؟
وقامت لليلى..

ريما شالت السماعات: ــ ويش صاير ؟؟
ليلى تتنفس بسرعه.. الا بدخلة زينب ..
ريما : ــ زنبوه ويش صاير ؟؟
ــ سكتي مو وقتش..
ــ اهووووو كل مو وقتي ومو شغلي .. فارقو..
وحطت سماعه وحده في اذونها وانسدحت وعطتهم ظهرها..
زينب حوطت ليلى بذراعها:
ــ ويش فيش غناتي ولويه قلتي كذا..
ليلى ما تحملت.. صارت دموعها بعفويه تطيح وبصوت متكسر::
ــ كل شي بس ما بغى.. و تعابير وجهها تقهر .. كنها قاعده في زريبه .. وقرفانه .. كل هذا واني اسوي روحي ما اشوف شي .. وساكته.. تالي تاكل كيكه وتطلعها في نشافه .. ليش ..؟؟؟
لاعت شبدها.!!!. لو ما دخلت مزاجها..؟؟
عيني عينك.. حركتها تقهر..
زينب عورت قلبها بنت عمتها : ــ بس .. خلاص .. ماعليش منها غناتي.. خليها تولي..
ــ على شان هي بت اغنياء صرنا حنا الفقارى كخه.. لو ما اكلت احسن لينا وليها..
لا يجيها تسمم.. ولا قايمه تناقز لي وتصارخ على حساب نمله..
زينب تمسح على ظهر ليلى تهديها..
الا ريما دايره عليهم .. سمعت من الأذون اللي ماحطت عليها السماعه .. وصارت تضحك .. تضحك..
زينب فتحت عواينها : ــ على ويه تضحكي يالبايخه..!!
ــ هههههههههههه بلاها ما شافت الفار البارحي .. لو تدري به شكلها حتى على الفرشه ما بتقعد ههههههههه
زينب : ــ يؤ تشيه طلع ليكم فار ؟؟
ريما تدحن على سريرها ضحك : ــ ايه ههههههههههههه..
زينب ضحكت : ــ اسبوع الفيران العالمي .. حنا بعد من دي كم يوم طلع لينا .. لاعبه ابوي تليعب .. صغير مره ههههههههه.. لحقه ابوي و رمى عليه قوطي دهنه .. ونادى على امي ..
وصارت تمثل زي ابوها .. : ــ زهرااا .. جيبي خااشوووقه..
ليلى وريما صارو يضحكو..
زينب وهي ميته ضحك..
ــ وياخذ الملعقه ويصير يطق على قوطي الدهنه حد ماعنده .. طاخ طاخ طاخ..
ههههههههههههههههه سدح الفار مسكين خلاه يستجن من الأزعاج .. تالي جاب كيس ورماه .. موتنا ضحك ذاك اليوم..
ليلى وريما خلاص مو قادرين من الضحك..
شوي الا يسمعو صوت امل في الصاله... بيروحو..
وطلعة امل ..
ــ اسمحي لينا خالتي .. وامسحيها في وجهي .. مع السلامه
ام علي بأبتسامه:
ــ لا ويش دعوه.. حصل خير.. الله يسلمش
علا طلعت تركض ركبت السياره.. ورى ويا سجاد
امل ركبت قدام..
مالك : ــ هاا... وين الحين ناويين أي سوق ..؟؟
امل ما تبغى تفتح الموضوع قدام مالك سوت روحها مافي شي .. ودارت على علا :
ــ وين تقترحي نروح..؟؟
علا بهدوء وغصه:
ــ البيت..
امل : ــ ويش فيش .. لويه؟؟
ــ البيييت...
ــ ياساتر عليييش.. البيت البيت..
مالك : ــ ويش صاير ..؟؟
امل : ــ ولا شي .. خل السوق مره ثانيه..
ــ على خير..

وفي سوق السمك..
ــ قرررررب عالمييييييد.. قرقفااااااااااان.. شحااااااااااديييييييييد
علي يضحك : ــ حميدوه عورت راس العالم.. حراج السمك مسوي عمرك..
ــ كحح بح صوتي .. ويالله احد يجي .. كل العالم مسويه حالها .. هوامير و شعري وكنعد .. والصافي سيد السوق .. الله لك يا ميدي
ــ مالت عليك .. حتى سمكنا يبغوه للمشوي تمام.. صبر الحين يجوك شرايين لا تستعجل على رزقك...

شوي .. جى رجال لحميد .. وصار يقلب في السمك.. ويرفعه ويشمه..
حميد استفزته الحركه :
ــ ياخوك ويش تشم.. كله على بعضه سمش وزفر..!!
الرجال بنظره مهي لهناك : ــ فرضا معفن..!!
حميد عصبته النظره والجمله : ــ معفن وجهك.. طااااااازج توي صايدنه الصبح..
علي في باله : ــ اوووووه حميد ولسانه يللا عاد الله يستر
الرجال بقهر : ــ وجهي معفن.. ما معفن الا انت واشكالك..
ويرمي السمكه في الصينيه.. ويمشي
حميد يصفق كنه مصريه محمقه ...
ــ ايييييييه.. ريحتنا.. باللي ماايرد
علي : ــ ههههههههههههههههههه ويش فيك حميدوو .. هدي .. ياساتر عليك.. تالي قول ماحد يشتري..
حميد : ــ قهرني .. قهرني .. شراي كذا مابغى.. يولي .. قال معفن قال..
ــ ههههههههههه الله يهديك..

شوي الا بجية واحد لحميد .. وكان غريب على علي ما شافه في حياته.. وشكله ما عجب علي .. يحسه شبهات.. من حلقته ووشم على كتفه.. .. حميد من شافه ..
ــ هلاااا والله هلا فيك..
والتفت لعلي ..
ــ انتبه لصينيتي وبيع عني اذا جى احد.. شوي وباجيك..
علي بريبه : ــ وين رايح..؟؟
حميد وهو ماشي مع الرجال ..
ــ دقايق وراجع...


والى الملتقى..

ياعلي
بعد عمري ليلى مره كسرت خاطري
ماتوقعت علا لهذي الدرجة هذي الحساسة عن حساب بعد
تقهر مرررررررررررررررررره



وهذا حميدوه وين رايح
ومن هو الرجال المشبوة هذا؟؟؟؟؟؟؟؟؟؟؟؟؟؟؟؟؟؟
ياعلي بكرة الخميس أميرة
مااااااااااااااااااني
هههههههههههههههههههههه



ياالله مالينا إلا ننتظر ونصبر للسبت
يعطيك العافية خيتي أميرة
على هالقصة الروعة اللي تصور أحداث من واقع مجتمعاتنا..
الأحداث بصراحة كل يوم تغلي ويزيد فيها الحماس أكثر

موفقة لكل خير إن شاء الله تعالى..
..دمتي بعين المولى الجليل..