شكرا على مروركم..
إن شاء الله اقدر البي طلبكم..
===================================
:: الجــزء التـاسـع ::
مرت نص ساعه وهي قـاعده بمكانها ماخذها جمـال المنظر والنهـر والطيور اللي فوقه .. راحت طلبت لها ريوق .. الا انوار جايتها وعيونها متنفخه من النوم ..
ديمه : صبـاح الخير
انوار بنفس: هلا صباح النور
ديمه : ترى مالي دخـل شفتج نايمه على الارض غطيتج يعني لا تقولين ليش ماقومتج تنامين على السرير ..
انوار : اي واقوم وضلوعي كلها تطقطق عادي !
ديمه : ههههههههه والله محد قالج نامي على الارض..
انوار: المهم شهالخيانه من صباح الله خير .. تتريقين وتخليني ؟
ديمه : والله توه جاي روحي اطلبي بسرعه ..
انوار: ليش ماعندهم بوفيه ريوق؟
ديمه : في بس مادري ماحبيته حسيته مكشوف
انوار: اوكي بطلب وبجي
ديمه : اقعدي اهو يجي ياخذ الطلب
انوار: انزين قعدنا ... وين جماعه الخير اهلج ؟
ديمه : نايمين وبعدين انا قلت لج نامي بدون حوسه وحب مقطط بكل مكان حشى مو غرفه نوم زريبه
انوار: هههههههههه بعد وحده فيها نوم تجي تنظف غرفتها خلاص الحين بينظفونها السيرفس
وصل طلب انوار وقعدت تتريق وبعد ماخلصت راحت صوب النهر ونزلت رجولها نفس حركه ديمه امس واعطتهم الحريه بالحركه .. كأي انسان يأخذه جمال المنظـر .. وسرحت .. اما ديمه كانت قاعده تشخبط على اللي كتبته وشققت الاوراق وقطتهم بالزبـاله .. كمصير كل خواطرها .. اللي تكتبهـا .. والتفت على انوار الا لقتها سرحانه ولأول مره تسرح انوار بهالشكـل ! استغربت ديمه وراحت قعدت عندها بنفس وضعيتها .. وخلوا نظرهم يسرح بالفراغ بالجو بالنهر بالطيور .. بالمباني الشاهقه اللي ورى النهـر .. بالقوارب اللي كانت تروح وتجي على النهـر بكل حريه .. وفوقها الناس مرتسمه على شفاههم البسمه .. ولكل واحد منهم ملكة تفكير .. تاخذه افكاره وتجيبه .. بعد هدوء دام عشر دقايق ..
ديمه : انوار شفيج ساكته ؟
انوار : هاه .. أي صج سرحت
ديمه : بشنو ؟
انوار: ديموه ماكو غيرج
ديمه : خير خرعتيني شصاير؟
انوار: تحلمت امس حلم مادري شلون افسره لج احس كله على بعضه مخربط بس في اشياء فهمتها ورسخت فبالي لي اللحين احس اني اشوفها قدامي .. من كثر ماتثبت فبالي ..
ديمه : خير ان شاء الله اذا يخرع لا تقولينه
انوار : لالا مايخرع خليني اقوله عفيه عشان ارتاح
ديمه : قولي انا اسمعج
انوار: تحلمت ان مشعل يقولي روحي بيت عمج محسن .. يأشر لي ويقول دشي دشي .. وانا خايفه .. وافتحت لي مها مرت عمي .. ومادري شلون طقيتها طق لين بردت جبدي .. وكنت خايفه احد يشوفني وطلعت من بيتهم بسرعه الا يمسكني مشاري وطالعني بنظر غريبه بس الاغرب انه ماسوالي شي خلاني اطلع .. وبس هذا الحلم
ديمه : صج غريب .. بس شدخل مشعل بعمي محسن ؟
انوار: هذا اللي لازم اعرفه .. وخلي مشعل اللحين بعرف مشاري ليش طالعني بهالنظره .. ! كان المفروض يطقني مثل ما طقيت امه وانتي تعرفينه مغرور على امه
ديمه : شوفي الاحلام تصير فيها اشياء اغرب من الخيال .. ولكل شي تفسير ومغزى .. بس الله اعلم انج يوم طقيتي مها مرت عمي .. هذا اسمه كبت .. يعني انتِ بالحقيقه ودج تطقينهااا .. بس ماتقدرين .. صح ؟
انوار: صحين والله مو صح واحد .. انتِ تعرفين انها تكرهه امي واهي السبب بكل مشاكل عايلتنا .. ومتحكمه بعمي لأقصى درجه لدرجه انه يصدق بأمي أي شي.. لين كرهته بأبوي..
ديمه : ياااااه خليها على الله .. بالاخير ما يصح الا الصحيح ..
انوار: انزين ديمه انا منقهره شمعنه طلع لي مشاري بالذاااااااااات ؟؟ من عيال عمي كلهم..
ديمه : لانه اهو اكبر عيال عمي محسن .. او يمكن لانه مغرور
انوار: بس شكو بالحلم .. اخ يالقهر .. ودي افسر الحلم
ديمه : يبابا انسيه .. سيرتهم تجيب الهم والغم احنا جايين نستانس ..
انوار: بس تدرين .. عماني بكبرهم سرّ ولازم اعرفه .. اجل شاللي فرقهم جذي .. وكل واحد نفسه بخشمه ..!
ديمه : حريمهم ..
انوار: ادري هذا سبب ثانوي بس في اسباب ثانيه ... بس الله يهداه ابوي كلا يمدحلنا اياهم وكأنهم ملاك .. ليش ما يقولنا الحقيقه احنا مو جهال..
ديمه : بعد شيسوي اهله يا انوار .. لازم يذكرهم بالزينه قدام عياله .. الماضي المفروض ما يأثر بعيالهم ..
انوار: أي يأثر انتِ الثانيه !!؟ اثر وخلص اجل بنات عمي ماشوفهم الا من عيد لي عيد واتقولين مااثر !!؟
ديمه : الله يعيـن
انوار: انزين شوفي امي جاااات مع محمد ..
بعد ماقربت منهم امهم ..
ام محمد : هييييه انتوا قوموا أي احد يدزكم تطيحون
ديمه : لا يما خلينا وناسه
انوار: يما وين ابوي ؟
ام محمد : نايم
انوار: يلا عاد متى بنطلع
ام محمد : لاحقه ماراح تطير روما
ديمه : ههههههههههه
انوار غمزت لديمه .. وديمه فهمت لها
ام محمد : شفيكم تناقزون
انوار: آآآ يما ماتتخيلين امس تحلمت بمنو ؟
ام محمد : خير ان شاء الله
انوار : أي عاد قولي منو ؟
ام محمد : منو يا انوار هانم ؟
انوار: بمها مرت عمي
ام محمد فزت من مكانها .. وقعدت تطالع انوار بنظره كلها اشمئزاز ..
ام محمد : شجابها على بالج ؟
انوار : لا اقولج تحلمت حلم يعني مو صج
ام محمد : بس بس لاتقولين الحلم .. اقطعي السيره ..
انوار: ليش يما تراه حلم والله
ام محمد : انواروو فارقي عن وجهي
انوار: انزين يما هدي اعصابج
ام محمد : يعني الا اقولج ان سيرة هالمره تغثني ؟
ديمه ساكته وبقلبها تقول " والله مالومج دام كل هالسوالف طلعتها فيج وانتِ ياغافلين لكم لله ! "
انوار : انزين سوري .. اوعدج ماراح اتحلم فيها مره ثانيه ..
ديمه : هههههههههههههههه أي بكيفحج هو
ام محمد : افففف منكم ديوم روحي شوفي يمكن ميشوو قامت .. وحتى لو نايمه قوميها ولبسيها وجيبيها معاج و هذا كرت الغرفه
ديمه : غرفه منو ؟
ام محمد : غرفه حمود وميشو
ديمه : انزين خلي حمود يروح صغير القوم خادمهم
محمد : لاوالله .. جايين نخدمكم ان شاء الله ؟ خلاص امي قالت لج شي قولي ان شاء الله ولا تناقشين مو هذا كلامج لي ؟
ديمه تذكرت انها دايما تقول هالكلام لمحمد وافتشلت وخذت الكرت وراحت
صعدت فوق وخلت الكاميرا والطير مع انوار .. وفتحت الغرفه .. شافت ميشو نايمه بهدوء .. والرضّاعه طايحه على صوب .. والغرفه مرتبه .. قعدت تفكر " غريبه غرفه حمود وميشو وتكون مرتبه ؟ بس اكيد امي رتبتها قبل لا تنزل .. لانها استحاله اتخلي شي وراها معفس .. !"
قربت منها كانت بتقومها .. بس كسرت خاطرها .. شكلها غرقانه بالنوم .. قعدت تفكر شتسوي .. ! " وانا ان شاء بنطرها لين تقوم .. على جذي محنا طالعين الا المغرب ! .. خلاص مالي دخل امي قالت قوميها بقومها .. "
راحت قومتها .. بهدوء وهي تسمي باسم الرحمن .. عشان ماتتخرع البنت ..
ديمه وهي تقومها : ميشوو حبيبتي قومي .. ماما تحت تنطرج
ميشو قعدت تتقلب خمس دقايق لين قامت .. بس اللي كانت خايفه منه صار ..
ميشووو تصيييييح : وييييين مامااااااااا ؟؟
ديمه "لحووول " : حبيبتي لا تصيحين ماما تحت انا بوديج عندها
ميشوو ببراءه : ماماااااا دااااااااعت (ضاعت)
ديمه : لالالا والله تحت يلا قومي البسج عشان نروح الملاهييييييي أي وناسه يلا قومي حبيبتي
ميشو : مابي انا ابي ماماااااا وين باباااااااا
ديمه : لحوووووووول خلصيني قومي ولا تقعدين تصيحين
ميشوو صاحت زياده من صراخ ديمه
ديمه تندمت : اف خلاص اسفه
قعدت تشيلها لين نامت على ايدينها ..
ديمه : لالالالالالا تناااااامين ميشوووووو قومي
بس ميشوو نامت .. دخلتها ديمه الحمام وغسلت وجها .. وطلعت بتلبسها الا تصيح بصراخ
ديمه : والله اذني انبطت .. بس خلاص حبيبتي افففففف وين جوتيج انتِ بعد ؟
ميشوووو تطق ديمه وتجر شيلتها ..
ميشو : مااااااااااله (حماره)
ديمه : عييييب هالكلام .. والله وقمتي اتسبين ؟
وبسرعه بدلتها .. وسوت لها رضاعه على السريع .. وجنه احد يلحقها من كثر التوتر .. وخاصه مع نغمات سينفونيه الصراخ المشهوره .. على صوت ميشو المنرفز ..
حطتها على السرير وهي تبجي وراحت تغسل ايدينها من حوسه الحليب .. و راحت ترتب الغرفه وراها .. ومازالت ميشو تصيح
ديمه : بـــــــــس خــــــــــــــلاص اسكتي ... اففف شباقي بعد ايي وين جوتيج ؟ افف ودلاغاتج وين .. ياربي
قعدت تدورها .. بس كانت نص اغراض ميشو بغرفه امها وابوها ..
ديمه : اقعدي مكانج .. شوي بروح اجيب جوتيج وبجي .. ولا تبجين .. اوكي ؟؟
قعدت ميشو تهز راسها .. ودموعها مغرقه عيونها .. وبالعه الصيحه ..
طلعت ديمه وخلت الباب مفتوح ثبته طقت على ابوها الباب مره مرتين الظاهرانه نايم .. وبهالحظه ميشو كانت بتفتح الباب بتروح تلحق ديمه .. بدال ما تفتحه صكته .. والمفتاح داخل الغرفه .. وقعدت ميشو تصيح زياده .. ديمه جاها احباط .. " اللحين منو بيفتح لها .. ياربي بتقوم الناس كلهم بازعاجها .. " ديمه توترت حيل .. وخاصه ان البنت صوتها بيروح من البجي .. زادت ديمه ضغطها على جرس غرفه ابوها لين فتح ..
بومحمد : خير ديوم ؟
ديمه : يبا تسمع ... ميشو انصك عليها الباب .. والمفتاح داخل ..
بومحمد: وين السبير .؟
ديمه : مو معاك ؟
بو محمد : لالا بغرفة حمود
ديمه : يوو حتى السبير داخل .. مايصير ..
بومحمد : انزين المفتاح انتِ وين حاطته عشان نخليها تدزه تحت الباب ..
ديمه : على الطاوله .. محطوط .. بس يبا اهي تصيح ماراح تفهم ..
وراحوا بومحمد وديمه ... قبال غرفه ميشوو ويسكتونها .. وعلى هالازعاج طلع مشعـل..
مشعل : خير يابو محمد .. عسى ما شر
بومحمد : ميشو مقفول عليها .. والمفتاح والسبير داخل ..
مشعل: خلاص ولا يهمك دقايق واجيب سبير من الرسبشن ..
بومحمد : جزاك الله خير ..
يروح مشعل .. بعد ماشاف الوضع متكهرب .. وديمه شكلها قمه التوتر .. دقايق والا السبير موجود ..
فتح مشعل الباب الا شي اندفع وتعلق برجله شافها .. رفعت راسها له وكأنها تشوف جبل .. بالنسبه لها .. وطالعته بعيون مليانه دموع ..نزل مشعل لمستوى نظرها .. وشالها وبومحمد يضحك على شكلها .. ميشو اشرت على ديمه .. بحقد
ميشوو : انتِ مــــــــاله
بومحمد : عييييييب ماتقولين لاختج حماره
مشعل : ههههههههه لا ميشوو اختج حلوه تحبج
بومحمد : ديمه انتِ شاللي قردج وخلاج تقومينها هذي مايعرفلها الا انوار ..
ديمه : بعد امي قالت لي .. شسوي !
بومحمد : بتنزلين اللحين ؟
ديمه : أي امي تبيها ..
بومحمد : دقايق بجيب بوكي وبنزل معاكم
ديمه : ايي صح وانا باخذ جوتيها
مشى مشعـل لين الانصنصير .. وهو شايل ميشوو وهي مستانسه اتحس انها اطول وحده بالعالم .. وقاعده تلعب بشعره .. بعد ماطلعوا ديمه وابوها.. نزلوا تحت كلهم .. وصلوا صوب القعدات اللي على النهر ..
ديمه : هذي بنتج الدلوعه لعوزتني ..
ام محمد : اشوفج طولتي ..
انوار قعدت مع ديمه .. لحالهم بطاوله ..
انوار: ايوا ايوا اشوف الاخت طولت نازله مع ميشو و مشعل ؟
ديمه : شوفي ترى صج مالي خلقج .. لو تشوفين شسوت فيني ميشو ماقلتي هالكلام ..
انوار: هدي هدي .. انزين امي قالت قومي ميشو ماقالت قومي الامم المتحده اشوفج نازله مع ابوي ومشعل
ديمه : تدرين شلون قاموا ؟ قاموا من صرااااااخهاا اللي ينرفز كل خليه بجسمي
انوار: ههههههههههههه اتصدقين انا صار عندي مناعه من الصراخ ..
ديمه : جان رحتي قومتيها وفكيتيني من دلعها ..
انوار تطالعها بنظره: مشعل فكج منها بعد شتبين ؟
ديمه : أي مومشعل متكفل بعيال منصور على اخر عمره ؟
انوار: لا انتِ اليوم فيج شي .. قولي شفيج ..
تذكرت ديمه انها كانت اليوم بقمة النشاط والحيويه .. بس من شافت مشعـل حست بغصه .. خلاص بيروح وهي تعودت عليه .. حسته قريب منها .. قعدت تقارن بينه وبين عمها مبارك .. لقت في تشابهه بالصفات .. كلهم يملكون العصبية الفظيعه .. ويملكون الحنان .. يملكون الابتسامه الساحره .. يملكون قلوب اللي حولهم بسرعه فظيعه .. ويشتركون بصفات واجد .. سكتت ديمه بعد ماعرفت الجواب هي كانت تمام بس من شافت مشعل رجعلها الشعور بالخوف .. بدا العد التنازلي وبتوصل طاقيه الاخفاء وبتخفيهم من جديد .. تخفي كل انسان اقترب من ديمة .. و أي انسان حست بقربه بالراحه والامان ..
" حتى لو ما اعنيه له شي .. انا متأكده انه يعني لي .. والا ماكان حسيت بهالاحساس !! "
ديمه : سلامتج .. مافيني شي
انوار : امشي امشي بروح اشوف ابوي
ديمه : أي صج وين بتروحون ؟
انوار : عن اللقافه امشي وبتعرفين
ديمه : طالع بس منو يتكلم عن اللقافه !
وصلوا لطاولة بومحمد وام محمد ومحمد .. وقفت انوار عن راس ابوها .. وديمه قعدت قبال امها ..
انوار تحط نفسها ماتعرف : يبا وين بنروح اليوم ؟
بومحمد يطالعها وعارفها عدل : يعني ماتعرفين !!؟
انوار: امممم اذا انا اعرف في غيري مايعرف
بومحمد : بنروح نافورة تريفي
ديمه: صج يبا وشنو هذي ؟
ام محمد : نافورة بعد شنو
بومحمد : هههههههههه يبا هذا معلم من معالم روما لازم تشوفونه ..
شوي الا وصل مشعل مع ميشو ..
مشعل حط ميشو على الطاوله عند ابوها ..
مشعل : وهذي الباربي شرينالهاااااا ..
ميشوو : شعلها طوييييل
بومحمد : هههههههههههه .. والله يامشعل لو تشوف الجنطه اللي من ديزني كلهاالعابها بس عاد شتقول عن عياره البنات
ديمه " أي مو هو خلقه ابتلش ببنات منصور !"
مشعـل : انا وعدتها اشتري لها .. عشان ماتصيح ..
ميشو: انا ماحب ديوم انا احب مشأل حبيبي ..(مشعل)
مشعل : وانتِ حبيبتي ..
وقعدت ميشو تلبس لعبتها وتمشط شعرها ..
مشعل : ياهي راسها يابس هالبنت قعدنا ساعه عشان اتنقي باربي .. كل مانوريها لعبه تقول لا وتطلع فيها عيب ..
بومحمد : الله بلشني ببنات حبهم للعنـاد ..
مشعل طالع ديمه وابتسم .. ديمه سمعت كلام ابوها وضحكت بصوت واطي ..
بومحمد : يلا متى تبونا نمشي ؟
ام محمد : نتغدى هنـاك
مشعل : ليش بو محمد وين بتروحون ؟
بومحمد : نافورة تريفي
مشعل : أي سامع عنها .. حلوو والله
بومحمد : متى نروح ؟
مشعل : اللحين عشان تستانسون فيها .. هي حلاتها الصبح
بومحمد : بس ودي اشوفها باليتات
مشعل : مومشكله اقعدوا لي المغرب
بومحمد : اجل خلاص شورك وهداية الله
مشعل كان منحرج من قعدته فروما وهو اللي عليه سواه .. ماكان له داعي يقعد .. حس ان العايله جايه سياحه .. هو شكله غلط بينهم .. بس قعد احتراما لبومحمد وخصوصا واهو جارهم من سنين وبينهم عشره عمر .. يعني لو أي احد ثاني طلب منه يقعد جان اعتذر وراح .. بس الا بومحمد ماقدر يرده.. مشعل كل ماطالع ديمه قلبه يعوره .. حاس انها من مسؤولياته المفروض مايروح ويتركها .. وخلاص !! .. حاول يهرب من هالشعور .. ويرجع للواقع ان اللي عليه سواه ولازم يرجع .. بس في شي بداخله يجذبه لهالانسانه .. ولو انها ماتختلف عن غيرها بأي شي غير الهدوء .. بس ترك كل افكاره هذي وقرر يستغل كل ثانيه بأخر يوم له معاها .. وبيأقلم نفسه اذا راح باريس انه ينساها ..
ديمه تشاور انوار : انا وين تلفوني كنت خاشته عندج وين حطيته ؟
انوار : يوووه بعرف ليش جايبته دام ماعندج شريحه ؟
ديمه : بصور يعني حرام ؟
انوار: افففف فوق بجنطتي داخل الدرج ..
ديمه : شحنتيه ؟
انوار : مشحون من زمــــان.. على فكره رتبت الصور خليت صور باريس بمجلد .. وانتِ عاد صور روما خليهم بمجلد ثاني رتبي شغلج
ديمه : لا انا كنت برتبهم لي نزلتهم على الكمبيوتر .. عشان انقي احسن الصور واعرضهم بالمنتدى
انوار : مو من زين تصويرج
ديمه : انتِ ليش تحبطين الواحد ؟
انوار: هههههههههه انزين روحي جيبيه .. ترى شوي ونروح
ديمه : بخلي فوفو بالغرفه لان اذا راح معاي اليوم بيجيه ارتجاج عقلي
انوار: ههههههههههههه زين رحمتيه روحي انزين ولا تتأخرين
راحت ديمه صوب الفندق وناداها بصوت عالي .. ابوها
بومحمد : ديووووووووم وين ؟؟
ديمه : ماراح اطول شوي وبجي
بومحمد : انا وقفت تااااااكسي
ديمه : خلني بالتاكسي الثاني
بومحمد : خلاص اجل انتِ مع حمود بس لاتطووولين
ديمه : انت عطلتني ماكنت بطول
بومحمد .. راح ينادي محمد ويقوله يخلي ديمه معاهم .. ركبت انوار وامها وابوها وميشو وحركوا .. وخلوا مشعل مع محمد .. مع ديمه واتفقوا على المكان
حطت لفوفو الاكل .. ودورت تلفونها .. وخذته .. وشافت ان بدلتها توصخت من حليب ميشوو .. وراحت غيرتها .. حست انها تأخرت عليهم .. مالها خلق نفسية محمد مو ناقصه يجي يقولها انتِ انانيه ومن هالكلام .. طلعت ركض وانزلت اللوبي .. شافت محمد قاعد يلعب بالقيم بوي .. ارتاحت .. شكله مندمج ..
