تصرقع بلا حدوود ,,,, رواية عجييبة على اجزااء باللهجة البحرانية

الجزء الخامس عشر



في بيت حجي مكي
حان الوقت الموعود


العائلة الكريمة قاعدين ويتنتظرون عريس الغفلة ..زهرة متوترة وزينب يا زعم تهديها..الجدة متشققه حدها ..وحجي مكي وفخرية كانو فرحانين لأن بيتهم بتعرس برضاها ..وهذا اللي كانو يبونه عن المشاكل

كسر هالصمت صوت الجرس...زهرة زاد توترها عن قبل..وقبلها يدق مثل الطبوول..تخاف تفشل هالخطة وتورط عمرها..>>>ما حسبت حساب للي جاي...يا خوفي هالنبيه تندم

دخلوو الرجال المجلس والنسوان قعدوو في الصالة..كل وحده تسأل عن أخبار الثانية وضحك وسوالف...بعدين حجي مكي راح ينادي على زهرة عشان تشوف ولد عمها في الصالة الثانية
دخلت زهرة الصالة ..وأول ما دخلت شافت شخص قاعد بهيبته وكشخته ورزته...يمعني بمعنى الكلمة شخص يسحر..أعجبت فيه...سلمت عليه وقعدت في بداية الصالة على الكرسي وهي منزلة راسها>>>تستحي البنيه

علي: شخبارش زهرة؟؟

زهرة مستحية: زينه

علي: وشخبار الإمتحانات اللي طافت؟؟

زهرة: الحمد لله

علي: يعني بتطلعين من المتفوقين؟؟

زهرة: إنشاءالله

علي: أي أنا ابي مرتي تكون شاطرة ودايما تكون من الأوائل

زهرة هني استحت...ما عرفت وين تودي وجهها..تمنت الأرض تنشق وتبلها..ولا تكون مقابلتنه ويسمعها هالكلام>>>هذا وما قال ليها شي وصارت جدي عجل لو يقول ليها من كلام الحب وش يصير فيها..جان الله يستر

علي: وش فيش ساكته جدي..يعني انتين لهدرجة هادئة!!

زهرة: لا بس مو متعودة عليك

علي: انزين ما بتسأليني عن أخباري؟؟

زهرة اتفشلت: مسامحة نسيت..شخبارك؟؟

علي: وهالشي ينسى يعني..انا تمام الحمد لله..زين دامني مقابل الزين

زهرة في خاطرها: ما ادري اقوم افلعه بالقلاس اللي قباله..قاعد ويتغزل فيني بعد..عيني عينك

علي: انزين خلينا ندخل في الموضوع

زهرة تستهبل: أي موضوع؟؟

علي: ليش ما تدرين؟؟

زهرة: وش صاير؟؟

علي في خاطره: هادي تستهبل والا ويش؟؟

علي:عن موضوعنا انا اياش..الخطوبة

زهرة بعدم اهتمام: ايييي عبالي شي ثاني>>>بدت تطبيق الخطة الجهنمية

علي:شي ثاني؟؟مثل شنو؟؟

زهرة: لا ولا شي...

علي: امممم..انزين انا قالوو ليي انش تبين تكملين دراستش

زهرة: طبعا أكييد بكملها ...عجل تبيني أصير متخلفه

علي: أي ما قلنا شي..وانا بعد أبي مرتي تكون متعلمه وفاهمة..وش تفكرين تدرسين في الجامعة

زهرة: أي جامعة؟؟ تقصد مدفنة البحرين؟؟

علي: أي..لو انتين مفكرة تروحين جامعة خاصة؟؟

زهرة: نو نو نو أني ما ابي اروح جامعات في البحرين...البحرين كلها على بعضها فاشلة..أني وحده أفكر أدرس في الخارج..وإنشاءالله بخلي البابا يطرش أوراقي لهم بأسرع وقت

علي: نعم نعم نعم ..تبين تدرسين في الخارج بعد؟

زهرة: أي..عجل حلال عليك وحرام علينا

علي: لا اني ما اقصد جدي..بس تدرين انه خطوبتنا بتصير هالصيف.وأنا شغلي هني في البحرين.شلون أخليش تروحين بروحش بره تدرسين

زهرة: هههههه عادي...اني بروح ادرس ما بروح العب..وبعدين هذا يسمون انفتاح..عجل وين اللي يقولون انك واحد منفتح ومتطور ودارس في امريكا..الحين اللي دارس في أمريكا يكون جدي؟؟

علي: لاا صدق والله ...وتبني أقعد هني وأخليش تروحين هناك بروحش؟؟

زهرة: أي وش المانع!!

علي: اووكيي عجل ملجتنا بخليها اسبوع الجاي وإذا ملجنا بكون انا الوصي عليش..يعني ما تقدرين تسافرين بدون شوري

زهرة: هاهاهاهاها خبرك عتييق....الحين عدلوو القوانين وصرنا مثل أمريكا

علي: هذا عاد في قانوش انتين..وهالكلام ما يمشي عليي>>> بل عصب الرجال..جان ما يصير ضرب البوكس الحين

زهرة:أي وعلى فكرة نسيت أقولك...أني وحده مااادية لأبعد الحدوود...يعني كل صيف لازم أزور على الأقل 10 دول أجنبية..و 6 دول عربية

علي بيموت ضحك عليها: أي بت كانوو وانا ما ادري

زهرة: لا بت حجي مكي

علي: زين بعد عرفتين روحش بت حجي مكي مو بت كانوو..أقول يا الحلوة صورايخش لا تفلتينهم عليي أنا

زهرة انقهرت منه بس حبت تطفشه أزيد: هاهاهاها وش قالو ليك إسرائيل أني

علي: يا ربي عليش انتين من وين طالعه

زهرة: من بطن أمي وااهااا

علي: سخيفة

زهرة: بس مو أسخف منك يا الدب>>> صدق جهال

علي:هادي اللي بتطلعني من طورييي...انا وش ليي اتقدم لوحده جاهله

زهرة: محد جاهل غيرك..واذا اني جاهله على قولتك لا تاخدني

علي: هاااا هذا اللي تبينه انتين..ويوم انش ما تبيني ليش وافقتين عليي عجل

زهرة:اني ما قلت ابيك ولا قلت ما ابيك ... بس قلت بشوفك اول

علي:لا من حقش تشوفيني وتوافقين وترفضين وتطفرين بي

زهرة: أي طبعاً

علي: واثقة من روحش واجد له!!

زهرة تتفلسف: يعني وحده مثلي وش تتوقع تكون..أكيد واثقة من روحي

علي: من حقش

زهرة رافعه خشمها: أدري

علي: أنزين أنا قررت القرار النهائي...تحبين تسمعينه أو لا

زهرة مستناسه في خاطرها: أكيد قرر ما ياخدني

زهرة: أووف كوورس أبي أسمع لأن واجد تهنمي قراراتك

علي: انا قررت بما أني أنا وانتين مو متفقين في شي...وفي كلشي مختلفين..قررت انه من باجر نروح نسوي فحص عشان نبي نسوي الخطوبة في أسرع وقت>>> طااع النذالة

زهرة انصدمت ووقفت: هااا وش قلت!!..أقين اقين ما سمعت

علي: من قال ها سمع

زهرة بتستجن: انته الجين تووك تقول احنا مو متفقين شلون ناخذ بعض؟؟

علي: أي كيفي انتين عاجبتني

زهرة: واني مو موافقة

علي: لا يالحلوة...انتهى وقتش..انتين وافقتين عليي من البداية والكل موافق يعني الحين رفضش ما بيغير شي من الموضوع

زهرة: بس القرار الوحيد يرجع ليي انيي

علي: الحين قرارش صار مو مهم بالنسبة للباقي..ومثل ما قلت ليش من باجر بمر عليش وبنروح نسوي فحص

زهرة: ماني رايحه

علي: مو على كيفش يالحلوة وانا الحين بقول لابووش وخلاص بنحدد كلشي..يلا الحين يالشطوورة روحي نادي على الباباا..يلا عفية عليش

زهرة منقهرة حدها عليه...خاطرها تسدحع في الارض وتطيح في طراقات وبوكسات
طلعت من الصالة وراحت الصالة الثانية وقالت لامها عشان تقول لأبوها..وراحت حجرتها

زهرة: اني وش سويت في روحي..اني غبيه..ما فكرت وش بيصير ليي بعدين...غبيه.غبية ..غبية>>>مسكينه صار اللي ما توقعته

طبعا صار اتفاق بين الجماعه انه على الساعة 9 الصبح يروحون المستشفى عشان الفحص..وزينب من سمعت بالخبر وقفت مكانها مصدوومة...ما تعرف وش تسوي..لكن خلاص صار اللي صار...وحسن من عرف بالخبر انهاار وصار له هبووط وطاح عليهم..نقلوه إلى المستشفى وكان طبعا في العناية لأن حاله ما يبشر بخير...زينب من شافت اللي صار لأخوها في هالفترة شكت انه اخوها يحب زهرة...وهالخبر هو اللي خلاه يوصل الى هالحال...تمنت انه خطوبة زهرة ما تتم




خلاص الحين طلح الفاس في الراس
والخطة ما نجحت
وش بيصير لحسن..بينسى اللي صار لو بيظل يتذكره على طول؟؟
وزينب شلون بتقدر تستمر مع حسن



تحياتي

الجزء السادس عشر



وفي اليوم الثاني
الساعة 8.30 الصبح


علي كان واقف عند باب بيت عمه يحارس زهرة ومرت عمه عشان يروحون المستشفى..
أول ما ركبا زهرة السيارة شدخت بالباب من القهر

الأم فخرية: حسبي الله عليش من بنية...جدي تشدخين بالباب

علي: ما عليه عمتي كله فداها

زهرة بروحها منقهره منه ومن تصرفاته بعد الحين يقول ليها جدي...سكتت عنه لأن أمها أيامهم وما تبي تسوي مشاكل

لما وصلوو المستشفى راحوو يسوون الفحص..

علي: يلا دخلي انتين أول

زهرة: ماني داخله..أخاف

الام فخرية: يلا دخلي لا تفضحينا..هم ما بيسوون ليش شي...بس بيسحبون منش دم

زهرة: لاا بعدين دمي يخلص..اخااف

علي: صدق جاهله..غمضي عيونش وما بتحسين بشي

زهرة: خله يسحبون دم بس منك

علي: يا ربيي هادي الا بتجننيي شلون ياخدون دم بس منيي..لازم انتين بعد

الأم فخرية: زهروو وش فيش صايرة غبية واجد..يلا امشي بدخل ايااش عورتين راسنا

علي: أي عمتي الله يخليش دخلي اياها..شكلنا اليوم بننقع في المستشفى على حسابها

زهرة: والله عاد محد قال ليك تجي ايانا

علي يقلد عليها: والله عاد محد قال ليك تجي ايانا...يلا يا انسة خلصينا

وبعد حنة وعوار راس دخلت زهرة وسوو لها التحليل وعلي بعد سوو ليه ..خبروهم انه بعد عشرة ايام بتطلع النتيجة...وزهرة تتمنى لو النتيجة تطلع بعد عشر سنوات






في اليوم اللي بعده


زهرة كانت قاعده في حجرتها وتحاتي الشهادة..حبت انها تفكر في أي شي ثاني عشان يروح عنها التوتر
جت على بالها المواقف اللي صارت مع حسن اخو زينب وشلون كان يحب يعاندها..ودايما يحاول يقهرها بأي طريقة..وفجأة جا على بالها علي ولد عمها..والموقف اللي حطت نفسها فيه وهو ظل معاند ...شافت انه في تقارب بين اسلوب الاثنين...
شالت من بالها كل هالافكار وتذكرت صديقتها زينب اللي ما سمعت صوتها من يومين..ولا تدري باخبارها..بسرعة شالت تلفونها واتصلت لها..
ظلت تحاول تتصل مرات ومرات..ولكن لا يمكن الاتصال حاليا بالرقم الذي طلبته>>>أكره عبارة عندي هالعبارة
اتصلت على بيتهم وبعد محد يشيله..
زهرة في خاطرها:معقولة مسافرين؟؟ لا لا ما اظن حتى لو بيسافرون بيقولون لينا..يمكن راحوا بيت اهلهم؟؟ بس الحين يومين لا حس ولا خبر..لا يكون فيهم شي..أعوذ بالله من الشيطان الرجيم
راحت تركض لأمها عشان تسألها عن بيت زينب
زهرة: اماااه أماااه

الأم فخرية: ويش فيش تصارخين كأنش بقرة

زهرة: ما عليه بطوفها ليش هالمرة لاني مستعجلة

الأم فخرية: وش وراش مستعجلة؟؟

زهرة: بيت زينب ويش فيهم؟؟

الأم فخرية: يا علي ابن ابي طالب..ويش فيهم بعد؟؟

زهرة: ويش فيش بتسوينها ليي مناحة؟؟اني الحين اسالش!!

الأم فخرية: ما فيهم شي جيه وش صاير؟؟

زهرة: الحين صار لينا يومين لا شفناهم ولا سمعنا ليهم حس..ما ادري وش عندهم

الأم فخرية: أي صدق..روحي اتصلي ليهم بنشوف وش اخبارهم

زهرة: اتصلت محد يرد

الأم فخرية: يوو ويش صاير فيهم عجل؟؟

زهرة: وش دراني..انتين ناسية بيت جيرانش وتفكرين بس في هالمعرس الفاشل

الأم فخرية: استحي على وجهش..وانتين اللي وافقتين عليه..احنا ما غصبناش

زهرة: أي هذا كله من غباءي..اني اروح بيت زينب اشوف وش صاير عندهم احسن ليي

الأم فخرية: يا الغبية تقولين محد يرد..يعني مافي احد في بيتهم

زهرة: ما عليه بحارسهم عند الباب لين ما يجون..ابي اشوف وش صاير فيهم

الأم فخرية: انشاءالله تصيدش ضربة شمس من القعدة بره يا الهبلة

زهرة: ما عليش مني انتين..احسن بعد جان افتك

الأم فخرية: دلاعتش..تفتكين من ويش؟؟

زهرة: ولا شي..

وطلعت زهرة عنها ..راحت حجرتها تلبس عبايتها وشيلتها..وبعدين طارت على بيت جيرانهم..وهي رايحة صوب بيتهم..كانت في سيارتهم جاية..راحت زهرة صوبهم

زهرة: السلام عليكم ..شخباركم .؟؟

زينب ومليحة وحجي صالح: وعليكم السلام ورحمة الله..وسكتوو

زهرة: ويش فيكم جدي أشكالكم؟؟

زينب حضنت زهرة وقعدت تصيح

زهرة مصدومة: زينب..ويش فيش؟؟ قولوو ليي وش صاير؟؟

زينب بصوت متقطع:حـسـ.. ـــن مريض حده

زهرة قلبها وقف: ويش فيه حسن؟؟>>>ما ادري هذا يسمونه خوف لمجرد الأخوة أو شي ثاني!!!

مليحة ما قدرت تتحمل أكثر وقعدت تصيح ويه بتها..وحجي صالح يهديهم..وزهرة للحين منصدمة مو عارفه وش صاير بالضبط!!

حجي صالح:صلووا على النبي يا جماعة واستهدوا بالله..دخلووا داخل لا تقلبون الشارع لينا ماتم

دخلوا داخل البيت وزهرة مجودة قلبها

زهرة: الحين بتقولون ليي وش فيه حسن او لا؟؟
زينب: حسن في العناية وتعبان واجد

زهرة ظلت حاضنة زينب وتصيح ومليحة من شافتنهم يصيحون زادت في الصياح..وحجي صالح ما قدر يجود روحه ..وراح حجرته قبل لا يضعف قدامهم..

زهرة: انزين هو وش فيه بالضبط؟؟

زينب: ما ادري ما شفناه الا طايح علينا

زهرة: يعني من قبل مافيه شي؟؟

زينب: هو اصلا من سمع انش ....وسكتت قبل لا يزل لسانها

زهرة: كملي وش فيش سكتين!!

زينب: لا ولاشي بس هو قام ما ياكل..ما ادري وش فيه وطاح علينا فجأة

زهرة: لا مو جدي السالفة اصلا..انتين قاعده تجدبين عليي..وحسن اكيد فيه شي

زينب:يعني انتين حقويش مهتمة هالكثر

زهرة: هاا بس جدي اسأل..انزين اني الحين بقوم اروح بيتنا..

زينب: لا قعدي ايايي..والله عريس الغفلة ما يرضى بعد

زهرة: يخسي الا هو وش عليي منه ..وبعدين لا تقولين هذا رجلي لاني ما اطيقه خير شر

زينب: عجل حقويش موافقة عليه

زهرة: غصبا عني..وانتين تدرين بعدين وش بيصير لو ما وافقت..واني ما ابي تصير مشاكل بين الاهل واكون اني السبب فيها

زينب: اوو يا المضحية ..يعني نسمي هذا تضحية عشان تنقذين العائلة من الشتات..يا سبحان الله..صايرة قصتش مثل المسلسلات

زهرة: احسش تطنزين عليي..حقويش تقولين ليي هالكلام

زينب وصلت حدها وبطت الجربة: لان لو ما وافقتين على ولد عمش جان الحين اخوي ما طاح في المستشفى جدي

زهرة مصدومة من كلام زينب: انتين وش قاعدة تخربطين

زينب: أي انتين السبب..انتين اللي مرضتينه..كل منش انتين وولد عمش
زهرة تصيح:زينب اني ماليي ذنب..حقويش فاعده تتهميني بأشياء اني ماللي دخل فيها

زينب معصبة: اخويي يحبش وانتين مو مهتمة..انتين ما تفهمين

زهرة فتحت عيونها على الاخر مصدومة من الكلام اللي تسمعه من زينب:زينب انتين اليوم اكيد فيش شي

زينب: لا مافيني شي..صاحية واحسن منش بعد..زهرة بسألش سؤال

زهرة: قولي

زينب: لو الحين أخوي يتقدم ليش بتوافقين عليه؟؟

زهرة:اخوش الحين مرقد وانتين وش فيش قاعده تخربطين في الحجي

زينب: اني سالتش وابي جواب

زهرة بحزن: الضاهر نسيتين اني مخطوبة لولد عمي..وننتظر الفحص يطلع

زينب: لا تقعدين تلفين وتدورين ..قولي ما تحبين اخويي وخلاص..

زهرة عطت زينب سطار من حرتها: وش هالكلام اللي تقولينه..وش احبه وما احبه..انتين غبيه لو مرض اخوش مأثر عليش

سطار زهرة لزينب خلى زينب تصحى من اللي هي فيه..خلاها تنتبه للكلام اللي قاعده تقوله

زينب: زهرة سامحيني اني اسفة والله ما كان قصدي اسوي فيش جدي..بس غصبا عني

زهرة ما عطتها وجه وطلعت عنها..وظلت زينب تناديها وهي تصيح..بس زهرة طلعت من بيت زينب وراسها يفتر من الكلام اللي سمعته..دخلت بيتهم وعلى طول ركبت فوق

الأم فخرية: تعالي زهروو قولي ليي وش صاير في بيت حجي صالح

زهرة ماليها خلق احد .. راحت حجرتها ولا كلمت احد

الأم فخرية: يوو ويش فيها دي بعد..راحت بيت حجي صالح ورجعت لينا صمخة وغتمة

الجدة: ويش فيش فخروو تهدرين بروحش!!

الأم فخرية: هادي زهروو اكلمها وتمشي عني المفهية ولا تدري بالدنيا

الجدة: هههههه مو منها يمكن تفكر في رجلها>>>هو ما صار شي وتسميه رجلها..صدق عجايز

الأم فخرية: أي رجل يا حظي!! ..هادي مو مالت حب ورومانسية..دي مالت شدخ ومشادخ

الجدة: ومن ويش ما تفكر في رجلها..خلي البنيه على راحتها>>>هالجدة على نياتها..والله زهرة في وين وهي في وين..


المهم مر اسبوع وحسن الحمد لله تحسنت حالته عن قبل ورخصوه..والليله طبعا بينزلون نتايج الثانوية على النت..وزهرة وزينب متوترين حدهم..خايفين ما يجيبون علامات زينة..وما ننسى بعد باجر بيطلعون نتايج الفحص مال زهرة وعلي...


على الساعة 9.30 الليل زهرة كانت قاعده على النت فاتحه موقع الوزارة تحارس النتايج وتكلم زينب على المسنجر..

زينب: زهروو الحين وش صار للحين ما نزلوهم يعني؟؟

زهرة: اكو اني فاتحة الموقع ما اشوف شي للحين ما نزلوو شي

زينب: طاح حظهم..اني صاير بطيء عندي

زهرة: أي لأن قاعدين ينزلونهم الحين وصاير ضغط على الموقع

زينب: اذا نزلوهم طلعي نتيجتي عجل..لان شكله ولا بيفتح عندي اذا على هالحالة

زهرة: اووكي..لحظة اكو واصلني مسج بشوف من اللي مطرش؟؟

زينب: شوفي يمكن وحده من الربع

زهرة: ويييييييع وييع لحقي

زينب: ها وش صاير؟؟

زهرة: هذا عليوو مطرش ليي مسج يسألني عن النتيجة طلعت لو لا..يسوي روحه مهتم بعد مالت عليه
زينب: مسكين حقويش تقولين عنه جدي يحبش

زهرة: لا والله حبه برص..وهو وش يدخله يطرش ليي مسج..ما ادري من اللي عاطنه رقمي

زينب: جي انتين ما عندش رقمه؟؟

زهرة: ويه وش اسوي في رقمة احطه في تلفوني جان ينفجر تلفوني
زينب: ههههه حسبي الله على بليسش..هذا بيصير رجلش قريب

زهرة: لا تذكريني بالهم..تدرين باجر بتطلع نتايج الفحص بعد

زينب: حلفي

زهرة: والله..توه اليوم أبويي قايل ليي..باجر هذا اللي ما يتسمى بيروح من الصبح المستشفى بس عشان النتيجة..صدق منزهق..والله لو اني منه انام ولا اروح

زينب: هو لان يحبش ويهمه هالامر بس انتين غير..وصدقيني هو طيب ومافيه شي..ومع الايام بتتعودين عليه

زهرة: ها الا اشوف غيرتين رايش..مو من قبل ما تبيني اخده

زينب: بعد هذا نصيبش

زهرة: اتمنى هالزواج ما يتم

زينب: مو زين تقولين جدي..الله كاتب انكم تكونون من نصيب بعض

زهرة: زنبوو سكتي اكو نزلو النتايج..ويلي بطني يعورني

زينب: صدق..يلا يلا شوفي اني وش جبت..للحين ما فتح عندي بصيح

زهرة كتبت رقمها وطلعت لها النتيجة..وكـــانت...93.4 ...زهرة تشققت على عمرها..من الفرحة طاحت من على الكرسي..وزينب مزلزتنها من اشارات التنبيه في المسنجر

زينب: يالعله ما تقولين وش جبت؟؟

زهرة: هههه حارسي اول باركي ليي ماني مصدقة هههههههه

زينب: ويش بشري؟؟

زهرة: جبت 93.4

زينب: مبروك مبروك مبروك منش المال ومنه العيال

زهرة: وش فيش خرفتين..لا يكون معرسه اني ههههه

زينب: وش دراني بروحي احاتي نتيجتي..روحي شوفي

زهرة: اكو الحين بيطلع

زينب: يلا بسرعه قبل لا امووت

زهرة: بيييه زنبوو وش هالعلامة!! زفت حدها

زينب شوي وبتصيح: ويش جايبة..قولي طيحتين قلبي في بطني

زهرة: لا ما بقول اخاف تموتين من الصدمة

زينب: لاااا بصيح قولي عاد

زهرة: ههههه يا السبالة اشطر مني بعد جايبة 95.1

زينب فاتحة عيونها: هااا وش تقولين..انتين متأكده هالدرجة ليي اني مو لغيري..يمكن غلطانة ومدخلة رقم وحده ثانية بالغلط..حلفي اول عشان اصدقش>>> صدق هبله..لكن مو منها من الزهقة

زهرة: هههههه والله العظيم وش فيش يا الهبلة ..مبروك مبروك..نبي كوارتين حلاوة عاد

زينب: لحظه انتين خليني اول استوعب اللي قاعد يصير

زهرة: هههههههه ويلي ما اقدر جان زين اني الحين اياش جان اسطرش عشان تستوعيبين

زينب: ههههه لا خلاص استوعبت..وقعدت تصارخ الهبلة من فرحتها

سمع حسن صراخها قام راح يشوفها

حسن: وش فيش مستجنه قاعدة تصارخين..حتى اللي اخر فريق اكيد سمعوا صراخش

زينب: مو مصدقة مو مصدقة..اني جبت 95.1

حسن: حلفي!!

زينب: والله والله مو مصدقة...وقعدت تناقز على سريرها واخوها المستجن يناقز اياها ويصارخ>>> صدق مخابيل

سمعت صوتهم أمهم وجت تشوف وش السالفة

الأم مليحة: يا المقاريد قاعدين تناقزون مفل السبلان..الحين ابوكم بيجي يعدمكم

حسن: أماااه لحقيي..بتش الدكتورة نجحت وجابت 95.1

الأم مليجة متشققة: صدق!!

زينب: ايي امااه يلا ابي هديه

حسن يضربها على راسها: صدق مصفعة..الحين المفروض انتين اللي تجيبين لينا حلاوة النجاح

الام فخرية: هيي انته اقعد عن بتي لا تضربها

زينب: ايوه ايوه عاشت امي المدافعه

حسن: ويي مالت عليش..روحي روحي دلوعة الماما...لكن شوفي اللي يجيب ليش الهدية

زينب: عاد انته يا الزطي تجيب شي..اسكت اسكت احسن لا تفشلنا

الأم فخرية: هي انتون قعدوا عاقلين بلا هواش..اني بروح ابشر ابوش

زينب: أي امااه روحي بشريه ولا تنسين الهدية

حسن يقلد عليها : أي امااه روحي بشريه ولا تنسين الهدية..الحين منهو اللي مصفع انا لو انتين..قاعده وتطرين هدايا واهاهاها

زينب: هي هي هي هي بااايخ حدك

حسن: اقول زينب

زينب : هاا

حسن: وهاون يدق راسش دق

زينب: لو سمحت اطلع برى خلني احتفل بمناسبة نجاحي ويه زهرة على المسنجر بروحنا

حسن: الله يكملش بعقلش انتين ورفيقتش

زينب: ويي من الحره

حسن: انزين صدق ما قلتين ليي زهرة جم جابت؟؟

زينب: وااي؟؟

حسن: مجرد سؤال

زينب: ممكن أعرف وش سر هالإهتمام

حسن: قلت ليش سؤال وبس..لا تطولين السالفة وهي قصيرة
زينب: اهااا

حسن: وش اهااا قولي جم جابت لا تقهريني

زينب: يعني مصر انك تعرف!!

حسن: ما ادري اهفش الحين بكف اخليش تنسين جم نسبتش

زينب: انزين لوعت جبدي عااد ..جابت 93.4

حسن: ايوه على الشاطرة..عاشت

زينب: ويي الحمد لله والشكر..وش فيك..ما اشوف اني قلت ليي شاطرة وعاشت

حسن يبحلس عليها: هي غير

زينب: ايواا ايواا ..عاش الحب

حسن: عساش الموت سكتي لا تفضحينا

زينب: هاهاهاها اقول يا الحبيب..لا تنسى البنية مخطوبة لولد عمها

حسن نزل راسه: أدري...وطلع عنها

تحياتي

الجزء السابع عشر





في اليوم الثاني
في الشغل


كريم: وش فيك حسن..تعبان؟؟

حسن: لا بس راسي يعورني..

كريم: جان ما جيت يوم تحس روحك تعبان

حسن: انته وش فيك اقول ليك راسي يعورني

كريم: انزين اعصابك اعصابك اخووي لا تموت علينا

حسن: شوف انا ترى موصل حدي

كريم: أي وبتحط حرتك فيني انا.. شايفني الطوفة الهبيطة انا

حسن شدخ بالكرسي وطلع عنه معصب حده...يفكر في زهرة اللي بتروح من ايده وهو ما بيده حيله>>> لا تنسى يا حسن هذا اللي الله كاتبه لكل واحد... يعني مو نصيبك هالبنيه

كريم من شاف حسن معصب جدي لحق وراه ...ووصلوا عند السيارة

حسن: حقويش لاحقني؟؟

كريم: لا عجل ما تشوف روحك ...تبيني اخليك جدي وبعدين تسوق بسرعه ويصير فيك شي

حسن: جاااان زين ادعم وامووت عشان افتك من هالدنيا

كريم عصب: انته مجنون..مو صاحي تبي تقتل روحك على حساب بنيه..لين راحت هي في بنات واجد غيرها مثلها واحسن بعد

حسن بصوت مبحوح: لااا زهرة مافي مثلها..انته تدري وش هي بالنسبة ليي..صدق انه اناا ما صارحتها بالهشي من قبل..وكنت كله اعاندها بس انا في داخلي احبها..زهرة هي روحي..ولين راحت روحك عنك يعني وش بيصير..اكيييد بتمووت

كريم كاسر خاطره حسن ومو عارف وش يسوي ليه..او وش اللي يرضيه

كريم: حسن انته انسان عاقل وتفهم يعني لين زهرة ما صارت من نصيبك هادي ما يعني نهاية الحياة..بيجي يوم وبتشوف غيرها وبتتزوجها بعد..وبتنسى اللي صار..وبتقول هاده كله طيش شباب..وانا بذكرك بعد

حسن والدمعه في عيونه: هالكلام اللي قاعد تقوله يا كريم مستحيل يصير

كريم: لا تقول مستحيل..لأن مافي شي مستحيل..بإرادتك واصرارك بتقدر تسوي كل شي

حسن يصارخ: واللي يحب صدق تعتقد بينسى هالحب اللي رااااح

كريم: يا حسن الله كريم..((عسى أن تكرهوا شيئاً وهو خيراً لكم))

حسن: والنعم بالله..بس محد يحس بللي في داخلي..محد يحس بللي قاعد اعانيه

كريم: من قال ليك احنا ما نحس..وانا اول واحد أحس فيك

حسن: بس مو مثل اللي احسه..لأنك ما صار لك اللي صار ليي

كريم نزل راسه والدموع متجمعه في عيونه: تقول ليي أنا اللي ما صار ليي مثلك..أنا يا حسن صار ليي اكثر منك..انا اللي حبيت وتزوجت اللي احبها ..لكن الله خداها..وما اعترضت على حكمة ربي...الحين انته اللي ما بينك وبينها كلام ولا شي بتعترض على حكم الله

حسن متلوم: كريم انا ما كان قصدي..بس انفعلت وقلت جدي..والله مو قصدي

كريم: عشان تعرف انه مو بس انته اللي عندك احساس..كلنا عندنا احساس..وكلنا مرينا بتجارب وظروف..بس سلمنا امرنا لله..وما اعترضنا على شي..يا حسن هادي هي الحياة..والله ياخد ويعطي... وخل إيمانك بالله قوي..ولا تخلي هالأمور البسيطة تغير منك..


حسن اقتنع شوي بكلام كريم: الحمد لله على كل حال..يلا قوم خلنا نرجع شغلنا..الحين يروح طايح الحظ وما يشوفنا يخصم منا معاش يومين

كريم: يلا قوم بسرعه ركييض..ما فينا شده يقص من معاشنا



على الساعة 11
في الفريق


زينب وزهرة توهم جايين من مدرستهم.. ماخدين شهاداتهم

زينب: يا عليي واخيرا تخرجنا

زهرة: بس لا تستانسين واجد..بعد باقي عليش تروحين المقصفة ووتخرجين منها..وتقعدين في بيتكم 10 سنين لين ما يوظفونش...عاد بتعرسين وبتصفين ليش درزن جهال وبعدين بيجيش الفرج
زينب: وي اسم الله عليي..والله اني بت حجي صالح بيشغلوني قبل لا اتخرج

زهرة: لا بت الوزير واني ما ادري..اكو قلتينها بت حجي صالح..يعني حالش حالنا

زينب: انزين سكتي وامشي ندخل... عورني راسي من الشمس

زهرة: امشي تعالي بيتنا تغدي ايايي

زينب: لا وحقويش ما تجيبن انتين بيتنا تتغدين..او غدانا ما يعجبش

زهرة: لا والله يعجبني.. بس جدي قلت ليش تجين بيتنا يعني وش صار لين انتين جيتين

زينب: اخر مره اني اللي جيت ليش..يعني هالمره انتين اللي تجين ليي

زهرة: يا عليي حافظة ولا تنسى

زينب: عجل مخش القوطي..

زهرة: عداال يا ام مخ..امشي بروح بيتنا اول وبقول لامي وبعدين بنروح بيتكم

زينب: اوووكي

ودخلوا ثنتينهم البيت وهم يضحكوون

الجدة: هدووويش..حقويش تضحكون هالنمونة..ما يجوز يا بناتي..انتون بنات وما يجوز يسمعون اصواتكم الرجال

زهرة تكلم زينب في اذونها: اففف الحين وش يفكنا منها..فتحنا لينا باب..وش ليش قايله ليي النكتة الحين

زينب: واني وش دراني انا هي عند الباب!!

الجدة: وانتين يا زهرة متى بتتعدلين..ما باقي شي وتنخطبين..وللحين اشوفش مثلات الجهال

زهرة: افففف اففف افف كل ما سويت شي قالو ليي بتنخطبين..لو ادري ما وافقت لوعتون جبدي بهالخطوبة

الجدة: بس انجبي انجبي..قال ليي ولد عمش اليوم بتطلع النتايج مال الفحص..للحين ما رد عليش خبر؟؟

زهرة بملل: لااا ما رد عليي ولا شي..ايي صدق تعالي..من اللي سمح ليكم تعطونه رقمي؟؟

الجدة: اني قلت لابوش يعطيه رقمش..عشان يقدر يكلمش ويتفق ايااش على كل شي
زهرة : لا صدق حلفي عااد ..وش قالت يتفق ايااي.. مو انتين تقولين ما يجوز وحده تكلم واحد غريب الا اذا عقدووا عليهم

الجدة: يا الخروفة هذا ولد عمش

زهرة: ولد عمي لو ولد خالي.. ما يجوز يعني ما يجوز.. لو بتقعدين تحللين وتحرمين على كيفش

الجدة: روحي يا الهبله..لو اقعد افهم فيش من الحين لباجر ما بتفهمين

الأم فخرية: هذا ويش صااير حالة وعفسة عندكم!!

زهرة: تعالي شوفي عمتش المحترمة وش مسويه..عاطيه رقمي الى ولد ولدها

الأم فخرية: انزين وش صار هذا الا خطيبش

زهرة: حلفي انتين بعد..كل وحده قالت خطيبش وخطيبش..للحين ما صار شي وسمووه خطيبي..

الأم فخرية: اني لا اعور راسي ايااش ولا شي خلش تولين

زهرة: اني بعد لا اعور راسي اياكم ولا شي..وبروح بيت زينب احسن ليي من هراركم

الجدة: اول اخدي شور ولد عمش..واذا وافق بعدين روحي

زهرة: لاا .. أشوف وجهش..اخد رايه بعد..والله عاد للحين ما صار رجلي عشان اخد شوره..الشور للحين عند ابوويي..والحين بروح اتصل لابووي وبقول ليه وادري بيوافق

واتصلت زهرة لابوها وخبرته ووافق...

زهرة: شفتيين شفتيين وافق ابووي..يلا خدااافس

الجدة: تعالي يا طايحة الحظ..قولي لولد عمش

زهرة: قولي ليه انتين..اني طالعه

وطلعت زهرة وزينب وراحوو بيت زينب

زهرة: السلام عليكم.. شخباركم؟؟

الأم مليحة وحجي صالح: عليكم السلام الحمد لله حياش الله

حجي صالح: حياش بتي تفضلي..شخبارش وشخبار الشهادة؟؟
زهرة: الحمد لله عمي كل شي تمام

حجي صالح: زين بناتي الله يوفقكم

الأم مليحة: زهرة وش صار على خطوبتش الحين؟؟ طلع الفحص لو بعده؟؟

زهرة مستحية: اليوم بيطلع الفحص

حجي صالح: يعني انتين لازم تحرجين البنيه

زينب: هههههههههههههههههه ه هههههههههههه ويلي بطني عورني من الضحك..زهرة من متى تستحين جدي.؟؟ خخخخخخ

زهرة تفلص زينب وتدوس على رجولها

زينب تعص على اسنانها: آآآآآي يا الدبة ..حارسي ليي لكن اذا رحنا الحجرة اراويش شغلش

الأم مليحة: انزين روحوو بدلووا ثيابكم وتعالوو ساعدوني

زهرة وزينب: انشاءالله

راحوو زينب وزهرة الحجرة>>>زهروو الحين زنبوو بتروايش الشغل العدل

زينب: تعالي يا البقرة بدوس في جبدش..عورتيني

زهرة: لالا بس اخر مرة تووبة تووبة

وزينب طايحة ضرب وتعضض في زهرة

زهرة: آآآآي بس بس خلااص آسفة اخر مرة يا الدبة

زينب: اول تحبين ايدي عشان اغفر ليش

زهرة: احلمي عاد لو تتدحنين صوبي ما احب ايدش

زينب: يلاا بسرعه لا ازيدش

زهرة: لا لا بس بحب راسش مو ايدش

زينب: أي واجد زين.. يلا قومي

زهرة تسوي روحها بتحب راس زينب..وتحط ايدها على راس زينب وتحب ايدها

زينب: يلا حبي راسي

زهرة: حبيت راسش يا الهبله انتين ما تحسين

زينب: انزين قومي نروح لامي

زهرة: ههههههه انزين قومي

زينب: وش فيش تضحكين؟

زهرة: لا مافيني شي هههه

زينب: ولا على الجنون حرج..امشي امشي بس

ونزلوو ثنتينهم المطبخ يساعدون مليحة...وعلى الساعة 2 حسن وصل البيت
دخل المطبخ..وهو مفجووع على الغدى..فما انتبه لوجود زهرة

حسن: أمااااه الحقيني بالغدى جوووع جووع

الأم مليحة: وش فيك جدي مفجوع..الناس تسلم أول

حسن: امااه اقول ليش جوعان..كاه من طايح الحظ ما عطانا بريك اليوم>>>معاقبنهم على يوم ينزلون تحت عند السيارة

زينب: هههههههههههه تستاهلوون عساكم ازيد

حسن يطالع اخته: يا البقرة انا الحين مو فاضي ليش...وقبل لا يكمل كلامه انتبه لوجود زهرة وسكت..ظل يطالع وهو مفهي ..مو مصدق..يغمض عيونه ويرد يفتحها يبي يتأكد
وزينب تغمز له بعينها وتأشر على زهرة...زهرة فهمت الحركة



يلاا البارت 18 تحت


7
7
7
7
7
7

الجزء الثامن عشر




طلع حسن من المطبخ وهو مو عارف وين يروح..يمين لو يسار>>>مسكين دار راسه الصبي

راح حجرته ونسى الجوع ونسى الغدى بعد من شاف زهرة

الأم مليحة: زينب قومي حطي الغدى في الصالة حق أبوش وأخوش..واحنا بنتغدى هني في المطبخ

زينب: انزين

وراحت زينب حطت الغدى..وراحت تنادي على حسن

زينب تطق الباب: حسن حسن قوم اتغدى

وحسن ما يرد

زينب تضرب على الباب بقوة: حساانوو قووم الغدى

حسن فتح الباب بقوة: قولي اسمي عدل لا اشدخش بالضرب الحين

زينب: مالت عليك يا العاشق الولهان..من شاف سندريلا اعتفس وما عرف وينه يروح هههه

حسن: يا الغبية البينه بتنخطب..يعني جيفه افكر فيها

زينب: ايي صح ..شاطر حفظت الدرس يعني

حسن سكت عنها ومشى

نزلت زينب المطبخ وقعدووا يتغدوون وبعد ما خلصووا غدى راحت زينب وزهرة الحجرة عشان يرتاحون يا زعم

زهرة تطالع تلفونها: بـــــل انعل.. 15 مس كوول من علي..شكله طلعت النتيجة..

زينب بحزن: يعني خلااص كل شي بيصير

زهرة: عاااادي مع الأيام بتعود

زينب: وانتين كل شي خلتنه على الأيام..المفروض تكونين مقتنعه بالشي اللي تسوينه

زهرة: الا هالشي..حتى لو ما اقتعنت فيه بيصير غصبا عني..ومثل ما شفتين اني سويت هالشي بس عشان جدتي

زينب: يعني انتين تحبين جدتش؟؟

زهرة: اكيد احبها .. مو تشفويني كله اتهاوش اياها يعني ما احبها..بالعكس معزتها من معزة امي..بس اني تعودت على الهواش اياها..نسوي لينا برنامج هههه

زينب: انزين ما بتتصلين اليه تشوفين وش النتيجة!!

زهرة: ما يحتاج اتصل...مدام في 15 مس كوول يعني خلاص كلشي بيصير

وسكتوو 5 دقايق الا تلفون زهرة يرن..وطبعا علي المتصل

زهرة تطالع التلفون وزينب تطالع زهرة

زينب: ما تردين..يلا ردي

زهرة: لحظه شوي

زينب: وش تحارسين لين ما ينقطع يعني

زهرة: لحظه خليني ارتب افكاري..وشالته

زهرة: ألـــو نعم..

علي : السلام عليكم

زهرة: عليكم السلام

علي: شخبارش زهرة؟؟

زهرة: الحمد لله زينه..وانته شخبارك؟؟

علي: اناا ..الله يعلم بحالي

زهرة:ليش؟؟

علي: زهرة بقول ليش خبر هو بيفرحش..بس انا هالخبر ما يفرحني

زهرة مستغربة من طريقة كلام علي: وش الخبر؟؟

علي: زهرة مسامحة على كل شي بدر مني أو كل خطأ ارتكبته في حقش..وانا ادري انه انتين اصلا مو موافقه عليي من رضا ..ترى حتى انا ما كنت موافق عليش اول ما كلموني في الموضوع..بس عشان جدتي وافقت..وعشان ما تصير مشاكل بينا..بس لما شفتش اقتنعت..الصراحة عجبتيني..احس روحش للحين طفولية..وحرام تضيعين مستقبلش من الحين عشان الزواج..يعني للحين صغيرة على الزواج والمسئولية..كملي دراستش الجامعيه وبعدين فكري في هالشي..وانا الصراحة اعتبرش مثل اختي

زهرة: انزين اني مو قاعده افهم وش تقصد بهالكلام؟؟

علي: زهرة انتين تدرين انه اليوم النتايج طلعت

زهرة: أي ادري

علي: أي بس النتيجة كانت سلبية..يعني ما يصلح نتزوج

زهرة من الصدمة قامت تصيح...وزينب ما تبي تعرف وش السالفة..خدت التلفون من عندها وكلمت علي

زينب: الوو أخوي وش صاير ...زهرة قاعده تصيح
علي: لا اختي كل خير..بس النتيجة طلعت سلبية..وهالشي المفروض يفرحها

زينب: اهااا..الله يوفقك اخوي ..ويعطيك اللي تقدرك

علي: مشكورة أختي..سلمي على زهرة..وقولي ليها هذا الشي ما بيغير من علاقتنا كأخوان وولاد عم..

زينب: اوكي اخوي مع السلامة

وقعدت زينب تهدي في زهرة..وتفهمها الوضع..سكتت زهرة..وما شافتها زينب الا تناقز وتضحك

زينب: يوو رفيقتي استجنت..توش تصيحين..وش صار فيش؟؟

زهرة: الااااي يعني ما باخده الاااي

زينب استجنت: الاااي يعني ما بتخليني بروحي الاااي

وقعدوا ثنتينهم يصارخون ويناقزون..حسن سمع أصواتهم..راح يشوف وش السالفة

حسن يطق الباب: زينب..زينب.. وش صاير عندكم؟؟

زينب تفتح الباب: حسن خلف جبدي اخووي زهروو خلاص ما بتنخطب

حسن مو مستوعب الكلام: وش قلتين ما سمعت؟؟

زينب تصارخ في ادونه: زهروو خلاص ما بتنخطب..يعني افرح واملا الدنيا أغاني انته وزهروو بتاخدون بعض

حسن طاير من الفرحة: تعالي تعالي فهميني السالفة عدل

زينب: زهروو ما عليه بخليش بروحش..بروح اقول السالفة الى حسن وبجي

زهرة منقهرة: تعالي يا طايحة الحظ..لكن بروايش شغلش بعدين..عجل تقولين حساانو اخوي بياخدني

زينب: روحي روحي..بروح الى اخووي بقول ليه السالفة وبعدين راويني شغلي

راحت زينب لحسن وقال تليه السالفة كامل...حسن طبعا شق بوزه شبرين..ومن الفرحة راح طيران الى امه يقول ليها يبي يخطب زهرة

حسن: امااه امااه ابي اخطب

الأم مليحة: بسم الله وش فيك انته اليوم مستجن..وش طاري عليك

حسن: اقول ليش ابي اخطب

الأم مليحة: انزين بندور ليك وحده

حسن: ما يحتاج تدورين يا ام حسن وتعبين روحش..اكو بيت البينه قريب..وملاصق بيتنا..يلا روحي خطبيها ليي قبل لا تطير

الأم مليحة: وش فيك مخرف..البيت اللي تقصدهم ده بيت حجي مكي وبتهم مخطوبه

حسن: لا امااه خلاص ما بتاخد ولد عمها..طلع الفحص انهم ما يناسبون بعض

الأم مليحة: وانته وش دراك؟؟

حسن: توها بتش قايله ليي

الأم مليحة: وديك وش دراها؟؟

حسن: امااه لا تجنيني..زهرة قايله ليها الحين يلا قومي خطبيها ليي

الأم مليحة: بلا جنون عليي..الحين ظهر وتبيني اروح بيت الناس اخطب ليك بتهم!!

حسن: انزين بعدين العصر

الأم مليحة: انته وش فيك مستعجل؟؟ لا يكون كنت حاط عيونك عليها من قبل..ويوم دريت انها انخطبت طحت علينا ومرضت

حسن مستانس على روحه: أي أي اماه

الأم مليحة: مالت عليك ..الحين بنية تسوي فيك جدي..صدق يعني ومن الحب ما قتل..اشوه ما مت

حسن: اماه وانتين وش عرفش بالامثال الخطيرة..

الأم مليحة: لا شايفني هبله ما افهم..قوم انزين عني

حسن: اول متى بتروحين ليهم؟؟

الأم مليحة: يوو ما تستحي..البنيه اكي فوق قاعده روح قول ليها

حسن: صدق..انزين بروح الحين

الأم مليحة: تعال يا اسود الوجه..لا تفشلنا

حسن: انتين تقولين اروح اقول ليها..بروح اعبر ليها عن مشاعري

الأم مليحة: تعال بلا هرار عليي..اني بعدين بروح بيتهم بشوف وش السالفة..وبعدين بكلم ابوك..واذا وافق يصير خير

حسن: بــــــــل كل هذا بتسوينه وانا بس اقعد اصبر لين ما يجي الفرج..الصراحة ما اقدر..وبعدين اخاف تطير مني..كفاي طارت مني المرة الأولى والحمد لله ما صار الشي..بعد تبين الحين احد يجي ويطيرها مني

الأم مليحة: وش قاعد تهر انته تطير وما تطير..جييه هي عصفور لو حمامة

حسن: لا هي زهرة

الأم مليحة: عجل اسكت وانجب وحارس لين ما اقول لابوك

حسن: ومتى بتقولين ليه؟؟

الأم مليحة: وش رايك اروح اقعده الحين من نومته واقول ليه

حسن: أي زين تسوين ..يلا قومي

الأم مليحة: عشان يفلتني اني اياك بره البيت

حسن: افف انزين اذا قعد انا بروح اقول ليه..اعرف انتين ما بتقولين

الام مليحة: والله عاد كيفك..واني وش اسوي فيك





تحياتي

وهالمره بعد راح احط جزئين


الجزء التاسع عشر




في الحجرة عند زينب وزهرة

زهرة: تصدقين بطير من الونااسة..مو مصدقة انه اني ما باخد علووو المغرور

زينب: مسكين..ليش تقولين عنه مغرور...

زهرة: لانه مغرور وكلش ما عجبني

زينب: زين عجل ما خديتينه..جان الحين انتون في مصارعه حره..بعد هذا المكتوب

زهرة: ايي لو اخده جان صراخنا يوصل لاخر الفريق..يمكن الفريق اللي ورانا يسمعون بعد

زينب: أي اصدقش...مو بعديه عليش هالسوالف..ههههههه تذكرين في المجمع

زهرة: ههههههههه لا تذكريني..زين اللي جودتيني جان راح فيها الصبي من التشدخ

زينب: قولي زين جا حسن..جان الصبي بيكفخنا قدام الأوادم

زهرة: الحين لا تسوين اخوش الشجاع واحنا ما نقدر نسوي شي..والله اني كنت مسيطرة على الوضع..يعني حتى لو هو ما جاا جان اني قدرت عليه

زينب: حلفي عااد...لو ما جاا جان الدم سال للركب...بعدين عاد مافي يمه ارحميني

زهرة: انزين لا تعكرين عليي مزاجي الحين اني مستانسه..بروح بيتنا بشوف وش الاوضاع عندهم..

زينب: لا قعدي ايايي شوي

زهرة: لا ما اقدر..اخاف تطوفني اللقطة

زينب: أي لقطة؟؟

زهرة: ههه ما ادري بعدين بقول ليش وش يصير من أحداث!!

زينب: اووكي يلا قومي بوصلش

ونزلووا زهرة وزينب الصالة..وكان حسن قاعد ويه أمه ..مغربلنها الا يبيها تروح وتخطب ليه زهرة>>>لو أني من أمه أعطيه سطار على وجه عشان يفكني من حنته

حسن يساسر امه: أماااه اكي نزلت خطيبتي..قولي ليها الحين عااد قبل لا امووت

الأم مليحة: عسااك المووت مللتني غربلتني جووز عاااد

حسن: افااا يام حسن تدعين عليي بموت وهذا بعد انا ولدش الوحيد البجر

الأم مليحة بصوت عالي: قووم عني قووم...متى تعرس وافتك منك

زينب: ايي احنا بنفتك منه ومرته المسكينه بتبتلش فيه

حسن يرفع روحه: والله أنا اللي بتاخدني ليها الشرف..وتحب ايدها بالمقلوب بعد..ما يحصلوون مثلي

زهرة بصوت واطي: اللي يسمع الحين ملك جمال العالم هوو

زينب: هي انتين حدش على اخووي

زهرة: ويي عدال لا يطيحوون شنوصش علينا..بعدين ما نقدر نلايمهم

زينب: هي هي هي هي سخييفة حدش

زهرة: طالعه عليش

حسن: هيي انتين زنبوو لا تغلطين على رفيقتش..ولا تقولين عنها سخيفة..ترى هي احسن منش..مافي مثلها

زهرة بطلت عيونها مستغربة من الكلام: اخووش يقصدني اني!!!

زينب: جزات الخير يا السباال ادافع عنك

حسن: جب جب..محد يغلط على الشيخة

وجان أمه تعطيه ضربة على ضهره

حسن: آآآآآي أمااه وش سويتين!!

الأم مليحة: استح على وجهك يا اسود الوجه..البنيه واقفه!!

حسن: أي ما عليه..كله منش انتين انا قايل ليش...
وقبل لا يكمل كلامه حطت امه ايدها على بوزه

زينب: أمااه وش فيه ولدش مخرف اليوووم

الأم مليحة : ماعليش منه بالع راديوو..مو منه كله من هذا على قولته طايح الحظ اللي ما خلاهم ياكلون اليوم

زهرة: أمشي امشي بطلع قبل لا استجن

زينب: يلا امشي


وراحت زهرة بيتهم..وهي تفكر في كلام حسن..وليش أمه سدت بوزه!!!>>>جاينها فضول الهبلة..تبي تتأكد من الكلام


الأم فخرية: جان ما جيتين يا طايحة النصبة

زهرة: اعووذ بالله...وش صاير عفر؟؟

الجدة تصيح: تعالي يا بتيي... تعالي خلف جبدي

زهرة تسوي روحها ما تدري بشي: أمااه وش صاير قولوا ليي!!

الجدة: يا خلف ابووي انتين..

زهرة تحضن جدتها: جدتي وش فيش تصيحين؟؟..بس سكتي لا تصيحيني ايااش

الجدة: يا بتي خلااص ما بتاخدين ولد عمش

زهرة: حقوويش امااه؟؟ عفر ما تبوني اعرس؟؟

الجدة: لا يا بتي.. بس يقول انه الفحص مالكم ما تصلحون لبعض..

زهرة: ايي ما عليه جدتي ..خيرها في غيرها..واني الحين مو مستعجلة على العرس..بعدي صغيرة

الجدة تمسح دموعها: لا يا بتيي..اني من زمان ابيكم تاخدون بعض..انتون افنيناتكم طايحين على بعض

زهرة: الحين جدتي خلي عنش هالهرار..الله مو كاتب ناخد بعض

الجدة: لكن خسارة يا بتيي...

زهرة: لا خسارة ولا شي

الجدة: اني كنت اخاف انش تعلقتين فيه!!

زهرة شوي وتفقعها تضحك: حقويش اتعلق بعد...جي هو حبال عشان اتعلق عليه

الجدة: ما تجوزين عن مصاختش

بعدين زهرة راحت حجرتها... وفي بالها يدور ألف سؤال وسؤال...حسن وش كان يقصد بكلامه هذا؟؟؟
طنشت السالفة وقعدت تفكر بالاشياء اللي بتسويهم الحين..الجامعه والليسن>>>يا ربي احنا بنمووت على الليسن




البارت اللي بعده تحت
7
7
7
7

الجزء العشرين




اليوم اللي بعده

في الشغل كالعاده عند حسن وكريم


حسن والطرب ماخذنه من الصبح: بلغ حبيبك وقله باخدك منه..هذا هو الحل وما لي أي حل ثاني..ما اقدر صبر اشوفك بس واستني...

كريم: او او او وش عنده الحبيب من الصبح يغني

حسن: اسكت عني انا اليوم مفرفش حددديي

كريم يحط ايده على جبهة حسن: اشوف...لالا حرارتك طبيعية..مو مسخن!!

حسن: ياخي انا حالتي الصحية والنفسية احسن منك ومن اليي قاعد هناك واليي قاعد مناك واليي قاعد داك الصوب

كريم: سبحان مغير الأحوال؟؟وش اللي قلب الحال؟؟قول ليي وش الدوى اللي خلاك تصير جدي

حسن: لا دوى ولا أعشاب..طبيعي يا حبيبي

كريم: قول قول السالفة شكلها خطيرة

حسن: هههه اسمع..بس لا تعكر مزاجي بصوتك المزعج

كريم: انا لو ما ابي اعرف السالفة جان الحين هفيتك بطراق واحد يسندرك

حسن: ههههه او او هوق هوقن ماشاءالله

كريم: قول وخل عنك الطنااز

حسن: اول جم تعطيني..لأن هالخبر يسوى الملااايين

كريم: اذا عندك فلووس عطني مو انا اعطيك

حسن: بس خلاص ما بحرق اعصابك اكثر..هذا الله يسلمك زهرة خلااص ما بتنخطب من ولد عمها

كريم: جيفه؟؟

حسن: الفحص طلع ...والحمد لله طلعووا ما يناسبون بعض

كريم: خساارة ..يا حراام!!

حسن : هيي انته وش الخسارة الحين انا رفيقك كنت بموت لا سمح الله لو اخدها ولد عمها

كريم: ايي خسارة طافنا الموقف..جان بنشووف وش بتسوي في ليلة خطوبتها!!

حسن يدور على شي يفلع به كريم

كريم: وش تسوي...شي ضايع منك!!

حسن: ادور على مخك يا القوطي...انت غبي..

كريم: هههههههههههههه احب انرفزك ما ادري حقويش؟..ويوم اللي ما انرفزك انا اتضايق وااجد

حسن: قوم عني لا ادبحك

كريم: انزين بس خلاص بسكت عنك

حسن: أي صير عاقل

كريم: انزين الحين انته عجل بتتقدم ليها!!

حسن شاق الحلق: أي

كريم: مستانس..الله لينا

حسن: وش انته بعد..لا يكون تغار مني

كريم: لا تخاف عيوني مو حاارة مثلك

حسن: ما بعكر مزاجي لاني مستانس حدي..بسكت عنك هاليومين

كريم: ايي اللي ايده في الماي مو مثل اللي ايده في الناار..>>ويأشر على روحه

حسن: أي ماي واي ناار صل على النبي

كريم: اللهم صل على محمد وال محمد..انزين ما قلت ليي متى بتروح تتقدم

حسن: انا للحين ما قلت للوالد..احارس الوالده تفاتحه بالموضوع وبعدين نروح

كريم: عجل ما بقيت الا انا

حسن: يا رجاال يلا عرس وش وراك..الحمد لله مو ناقصنك شي

كريم نزل راسه: وحسين؟؟

حسن: حسين وش فيه بعد؟؟

كريم: من اللي بترضى تاخدني وانا عندي ولد..محد بيتحمل فيه..اخاف اخد وحده كله تتعلم تضربه

حسن: اصابعك مو سواا..في بنات ناس ومربين..ويعرفون الأصول

كريم: بس...

حسن: لا بس ولا شي وانته عورت راسي بهالسالفه..حقويش منته راضي تقتنع

كريم: اقتنع بوييش؟؟

حسن: اوو انا اقول لازم تخترب فرحتي..والحين انته بتخربها

كريم: بس خلاص بسكت

حسن: لا صدق كريم...يعني انته الى متى بتظل على هالحال..

كريم: وش فيه حالي!! مو عاجبنك؟؟

حسن: اكيد مو عاجبني....الحين انا اذا خطبت..والربع كل واحد بيخطب..وانته وينه بتروح..بتقعد بروحك

كريم: الحين انته هذا اللي هامنك...عادي ما بضيع بقعد في بيتنا

حسن: انته فكر بالمنطق...الحين انته ما تفكر تكون أسرة...يصير عند زوجة وولاد وتحس بالمسؤولية

كريم: اكوو عندي ولد

حسن: بس مو عندك كله اغلب الاوقات عند امك..وامك يا كريم مرة كبيرة...يعني ما تقدر تهتم في ولدك على طوول..وولدك الحين كبر..يعني يحتاج تكون انته اياه يحتاج احد يدرسه يهتم فيه..ويعلمه الصح من الغلط

كريم: ادري كلامك كله صح

حسن: بس عجل توكل على الله وخل امك تدور لك وحده

كريم: بفكر في الموضوع اول

حسن: وش تفكر بعد..ما يحتاج تفكير الموضوع..يلا قول لامك قبل لا يخلصوون بنات الديرة

كريم: مو مشكله نجيب من بره

حسن: من حلاتهم مال بره..بنات الديرة ذهب..مافي منهم>>> احم احم..يعني احنا فهمتوون

كريم: أي عاد لين جتك وحده تتشرط وتتدلع ترفع ضغطك على ما توافق عليك..دلين لو عليي اخدهم واطيح فيهم تشدخ يقهرووني

حسن: هههههههه لا يكون تقدمت حق وحده وتشرطت عليك

كريم: يخسوون الا هم..اقعد عزابي ولا اخد وحده تطلب ليي لبن العصفوور

حسن: هههههههه أي والله صادق..كأنهم قاعدين في منافسة..كل وحده تاخد أكثر من الثانية مهر..لا واللي تقول ليك ابي اسوي في هالصالة واللي تبي في فندق واللي تبي تجيب ليها فرقة..بلااوي بلااوي..ما تسوى علينا هالليلة ...تطلع البيزات من جبوودنا وتنكسر ضهورنا بعدين..نقعد نسدد في هالقروض لين ما نمووت>>>مساكين يا الشباب..راعووهم شوي يا بنات..والله بتظلوون عوانس كيفكم عاد

كريم: اسكت انا خوفي اروح اتقدم لوحده وتطلع من دلين..جان اطلع واخليها بروحها تتحسر على العرس

حسن: ههههههههه مصدق روحك انته

كريم: الحين انته ضامن انه زهرة مو من دلين اللي يتشرطوون؟؟

حسن: ما اضمن..بس أي شي تطلبه بحاول اوفره ليها..وانا ما اعتقد انها تتشرط او تطلب اشياء خيالية

كريم: وش دراك قاعد اياها؟؟

حسن: لا مو قاعد اياها..بس يبين عليها انها مو منهم

كريم: يعنيي....عجل الحين شوف البينة اللي مناك..يبين عليها تتشرط او لا؟؟

حسن يطالع: رووح يا عميي قاعد تطنز هااا

كريم: ههههه وش دراني عنك..مسوي روحك من دلين اللي يقرون الوجه ما ادري العيون



في بيت حجي مكي

الساعة 10.30


زهرة توها قاعده من النوم..نزلت تحت تدور أبوها
زهرة: أماااه أمااااه

الأم فخرية: وحريقة ..ويش فيش تصارخين!!

زهرة: وينه ابووي

الأم فخرية: الحين كل هالصراخ والحاله تدورين ابووش يا المستجنه

زهرة: اووهوو الحين بتقولين لو امشي

الأم فخرية: ابوش طلع

زهرة: اففف..أمااه السنه ما بنسافر..اني متملله

الأم فخرية: انتين الحين ما قلتين وش بتدرسين..ولا رحتين قدمتين بعد!!

زهرة: اماه اني الحين اسالش عن السفر وانتين تساليني عن الدراسه

الأم فخرية: عرس وما تبين تعرسين..بعد ما تبين تكملين دراستش؟؟

زهرة: بكمل بمكل..باجر بروح اني وزنبوو نقدم في الكلية..انشاءالله يقبلونا عاد..واني ابي اتدرب سياقة صدق..متى بتدربووني

الجدة وهي جايه من بره: ويلي ويلي رجوولي تكسرت من المشي..اااه يا رجولي اااه يا ركبتي

زهرة: وينه رايحه من الصبح؟؟

الجده: صبح عندش مو عندنا..كنت رايحه اتمشى في الفريق اسوي رياضه

زهرة: ههههههههههه ويش قلتين ههههههههههه تسوين رياضه!!

الجده: طيح الله حظش من بنيه..وش اللي يضحك الحين عشان تضحكين

الأم فخرية: زهروو تأدبي

زهرة: انتين مافيش شدة تشيلين روحش بعد رايحه تتمشين في الفريق هههههههه

الجده: سود الله وجهش..عبالش اني عجزت..اني بعدي شباب في العشرين

زهرة: طوووخ طااااخ طيييخ....صورايخ صواريخ تتفلت لينا ....اذا اني الحين 18 انتين 20 ههههههههه عجل ابوي الحين عمره 19 وامي 16 ههههه ويلي ما اقدر

الجدة: قومي قومي بلا بصاقة وجيبي ليي ماي ..نشف ريقي من المشي

زهرة: حشى هذا الضاهر لسانش هو اللي يمشي مو رجايلش

الجدة: قومي يلا

زهرة: انزين




تحياتي

واليكم البارت 21



في بيت حجي صالح


زينب قاعده تساعد امها في شغل البيت

زينب: بس امااه عاد انكسر ضهري من الشغل تعبت..جيبي ليش شغاله

الأم مليحة: تعلمي..باجر بتروحين بيت رجلش ما تعرفين شي..تبين بيتكم يعفن!!

زينب: لين جاا الرجل يصير افرااج الحين مافي رجل

الأم مليحة: اشتغلي اشتغلي وانتين ساكته

زينب: يا عليي..اني باجر بروح الكلية اقدم..جان افتك من شغل البيت

الأم مليحة: روحي محد جودش..

زينب: وابي اخد الليسن ابعد..اكي زهرة بتاخد الليسن

الأم مليحة: بس انتون هذا همكم العرس والطلعه والهيامة

زينب: عجل وش تبينا كله نكرف في البيت

الأم مليحة: انزين اشتغلي وانتين ساكته عورتين راسي

زينب: السنه ما بنسافر؟؟

الأم مليحة: وش دراني ما اشوف ابوش قال شي

زينب: لاا لا تقولون ما بتسافرون..اني وحده منبطه جبدي ومتملله ابي اساافر يعني ابي اساافر..عاد هالمرة مو تودونا سوريا او ايران

الام مليحة: هاا وينه تبين تروحين عجل؟؟

زينب: نبي نسافر دول اوربية..نشوف طبيعتهم ومناظرهم الخلابة...كله نسمع عن هالطبيعه ولا نشوف شي منها

الأم مليحة: روحي بروحش عاد...اني ما اروح دار الكفرة

زينب: لااا جي اذا رحنا بنكفر اياهم..بنروح احنا سياحة نستانس

الأم مليحة: وسوريا وايران وش فيها..بعد نروح نستانس هناك..وفيهم مشاهد بعد

زينب: ادري امااه بس الواحد لازم يغير..يعني احنا كل سنه يا نروح ايران يا سوريا او نروح العمرة..غيروو هالمرة..انزين ما نبي نروح على قولتش دار الكفرة..ودونا مصر نشوف الاهرامات..او ودونا عمان نشوف الجبل الأخضر>>>عندش جبل الدخان في البحرين بعد وش تبين..ما تحمدين ربش!!

الأم مليحة: انتين الحين معورة راسش حقويش..محد قال ليش بنسافر..قاعده تخططين وتقررين على ويش!!

زينب: اففف اني بحارس ابووي لين ما يجي وبقول ليه عن السفرة والليسن..ما يخصني اني

الأم مليحة: قولي ليه وش اسوي فيش


نرجع الى بيت حجي مكي

هالحزة توه واصل حجي مكي البيت..وطبعا زهرة كانت في الاستقبال..تحارس ابوها عشان تكلمه عن الليسن

حجي مكي: السلام عليكم

زهرة: عليكم السلام..شخبارك ابووي..وحشتني من زمان ما اشوفك!!

حجي مكي: آآآآخ منش يا العيارة..انتين ما تسألين عني الا اذا تبين شي

زهرة: ههههه يعني مكشوفة مكشوفة

حجي مكي: يلا قولي وش تبين؟؟ ناقصنش شي؟؟

زهرة: أي ناقصني الليسن..ونبي نسافر ابووي عااد عااد ملل

حجي مكي: والحين انتين يعني ما بتكملين دراستش..بس تبين تاخدين الليسن وتسافرين؟؟

زهرة: لاا باجر بروح اقدم على الكلية... بس بعد نبي نسافر..ملل ابوويي العطله
وابي اتدرب سياقة عشان اطلع واهيم

حجي مكي: وعبالش اذا خديتين الليسن بتدشين وتطلعين على كيفش!!

زهرة: لا ابوويي أكيد بطلع بشورك

حجي مكي: عبالي بعد

زهرة: افا علييك أبووي تربيتك اني..الحين ما قلت ليي بنسافر او لا؟؟وبتخليني اتدرب او لا؟؟

حجي مكي: بل بل عليش..كلشي تبينه مره وحده..سالفة السواقة بنخليش تدربين..اما سالفة السفر ما ادري عنها..بشوف اول بيت حجي صالح بيسافرون او لا..وبنسافر اياهم

زهرة: الااااااااااااي عجل ابوي رووح اقنعه قول ليه يسافرون ايانا عااد عااد

حجي مكي: يا بتي اثقلي شووي..مو زين جدي..خلاص انتين صرتين مرة

زهرة: اوو ابووي الحين مو وقته الثقل...الحين روح قول الى حجي صالح يوافق على السفرة

حجي مكي: اذا شفته يصير خير

زهرة: يا ربييي...لازم يعني تحارس لين ما تشوفه

حجي مكي: الحين بتسكتين عن الحنه او اكنسل السواقة عليش

زهرة: لالالالالا كلشي ولا السواقة..هداني سكتت



نرجع مرة ثانية لبيت حجي صالح



حجي صالح قاعد في الصالة يطالع الأخبار

زينب: أبووييي

حجي صالح مندمج ولا يدري بالدنيا

زينب تتقرب منه: أبوووييي

حجي صالح : هاا وش صاير؟؟ وش عندش؟؟

زينب: ابي اتكلم اياك شوي

حجي صالح: بعدين بعدين ..الحين انا مشغوول ما تشوفيني اطالع الاخبار

زينب: اففف هالاخبار ولا بتخلص.. ابويي انته تقعد تطالع من اخبار الى اخبار

حجي صالح: أني ادري فيش الحين ما بتسكتين عني الا اذا قلتين الي تبينه..قولي اللي عندش بسرعة لا تعطليني

زينب: ما اقدر اقول بسرعة..لازم اول شي أمهد للموضوع وأقول لك مقدماات وبعدين أدش في الموضوع..واخرشي طبعا انته اللي بتختم الموضوع

حجي صالح: تدرين عجل حارسي لين ما تخلص الاخبار وبعدين قولي اللي تبينه

زينب: لا عااد ابووييي الحين الحين ما اقدر اصبر اكثر

حجي صالح: يلا يلا قومي بعدين اقول ليش

زينب طلعت وهي تتحلطم: اففف وش هالحاله اياااه..الحين اني متى اقول ليه يعني

حسن: وش فيش يا المخرفة تكلمين روحش!!

زينب: روح عني انته بعد لا تلوع جبدي

حسن: مالت عليش يا الحولة..الحين انا اسألش قلت يمكن تبين مساعدتي حق اقنع ابووي عشان تدربين سياقة

زينب نطت: صــــــدق أخوويي خلف جبدي بتقول ليه

حسن يتباعد عنها: الحمد لله والشكر...مجنونة مو صاحية هالبنية..انا كنت بقول ليه بس الحين وبعد ما سمعت هالكلام مستحيل اقول ليه

زينب: الله يخلييك عاااااد عاااد بحب راسك بعد..روح كلمه..اخاف ما يرضى اتدرب..ما يصير زهروو تتدرب واني لااء

حسن شق البووز: زهوور بتتدرب بعد ..أأأأأأخ جان زين انا المدرب مالها

زينب: هي هي هي يا الطيب..اصحى لا تحلم وااجد

حسن: بس تعالي جيفه تتدرب بدون موافقتي!!

زينب: وانته وش يدخلك بعد...البنيه عندها ابو وهو ولي أمرها..لا يكون صدقت روحك انك خطيبها!!

حسن: أي له انا الحين بروح اخطبها يعني لازم تاخد رايي بعد

زينب: احلف انته عااد ..تصدق انك واحد تافه وسخيف وما عندك أي هدف في الحياة..اني افكر في الليسن وانت تفكر في زهروو

حسن: مالت عليش وعلى الليسن اللي تحنين عليه..ان شاء الله ما تحصلينه..على الأقل أنا أفكر في مستقبلي..أزوج وأكون أسرة..مو انتين ما تحاتين الا الليسن

زينب: انته شكلك بتخليني اكنسل عليك هالخطوبة كلها

حسن: هاهاهاهاهاهاها دلدغتيني...سوي اللي بيسوينه مو محتاجنش

زينب: أي ماعليه بنشووف..الأيام جاية وبتشوف

حسن: وش بتسووين يعني؟؟

زينب: أقدر أفتح لزهرة ملفك الأسود..واخليها تعرف كل سواياك السابقة لا وازيدهم حبتين بعد..وتكنسل عليك خير شر

حسن: لا اختي العزيزة أرجووش لا تقولين أخاف ترفضني أرجووش..أحب ايدش وارجولش..روحي ولي مناك لا يجيش كف من الزين يدور راسش الحين

زينب: ما اقول الا مالت ومالت ومالت ومالت بعد يا الدفش يا الدب يا السبااال

وتهرب عنه حجرتها..عشان ما يصيدها ويشدخها من الضرب

زينب في حجرتها جايتنها حالة نفسية...تبي تتطلع تروح لأبوها تكلمه بس حسن واقف عند الباب>>>لازم ياخد ثاره


زينب: حســــــــن ابي اطلع

حسن: اطلعي من مجودنش

زينب: انته مجودني..اخاف تضربني

حسن: ويوم تعرفين اللي بتحصلينه حقويش تسوين اللي تسوينه!!

زينب: لأني أحبك من جدي سويت جدي خخخخ

حسن: حبش برص.. يلا طلعي بسرررعه

زينب: تباعد عن الباب أول

حسن: تباعدت يلا طلعي

زينب: روح صوب آخر الممر ولو تنزل تحت بعد يكون أحسن

حسن: ما تبيني أطلع بره البيت بعد!!

زينب: جاان زين

حسن: انا اكو واقف صوب باب حجرتي..بتطلعين طلعي ما بتطلعين بالطقاق..عساش تخيسين في حجرتش

بروووح اصلي والساعة تسع او عشر او احدعش بكمل

يسلمو ..
قصة شيقة
ننتظر

الجزء الثاني والعشرين 22

في بيت حجي مكي



حجي مكي: فخرية...فخرية

زهرة: امي فوق في حجرتها

حجي مكي: تعالي بتي..اليوم بعد الصلاة بيت حجي صالح بيجون يزورونا..يعني تعدلي وتكشخي وبرزي روحش

زهرة: ابرز روحي حق ويش بعد؟؟

حجي مكي: انتين ما تبين الناس تشوفش مرتبه ومتكشخه...اليوم بيجون بيتنا وانتين تجهزي بعد الصلاة..وقولي الى جدتي بعد..وانا بروح اقول لامش

زهرة: انزين

راح حجي صالح يقول الى فخرية وزهرة راحت الى جدتها

زهرة تفتح الباب بقوة: جـــدتي..جــــدتي

الجدة: وصاقعة تصقعش زهقتنيني..ما تعرفين تبطلين الباب مثل الناس

زهرة: خخخخ لا..المشكله ما علموني جيفه ابطل الباب

الجدة: وش عندش الحين لا تعطليني

زهرة: الله يا البزنز

الجدة: وش تقولين يا سوده الوجه..لا يكون تسبيني!!!

زهرة: ههههههههههههههههههههههههههههههه هههههههههههههه سمعي يقول ليش ابووي اليوم بعد الصلاه جهزي روحش عشان بيت حجي صالح بيجون بيتنا


الجدة: اييي حياهم الله...على الاقل احسن من مقابل وجهش

زهرة: والله ناااس يتمنوون يقابلووني..بس من يقدر..

الجدة: يلا اهوو طلعي طلعت روح...

زهرة: روح من..؟؟

الجدة: روح العدوو

زهرة: عبالي بعد....وطلعت عنها



في بيت حجي صالح

الساعه 5 العصر


حسن قاعد ومقابل الساعه..ويحسب الدقايق والثواني

الأم مليحة: وانته اليوم مستخف مقابل الساعه وتحسب...قلنا ليك عقب الصلاة بنروح ..كانك مو شايف خير

زينب: هههههههه خليه في حاله امااااه العاشق الولهاان

حسن: الحين الساعه 5 وابويي للحين ما رجع البيت...المفروض الحين يرجع عشان يبرز روحه من الحين ونروح المسجد نصلي جماعه عشا نلتقي ويه حجي مكي ونروح اياه البيت مره وحده

الأم مليحة: يا عليي مفجووع على العرس هذاا

زينب: ايي يا خوفي تتحطم أحلامك يا اخوي يا ولد امي وابوي

حسن: انتين يا البوومه سكتي...من تدخلين في السالفه تخربينها

زينب: لكن ما عليه...انت ما تدري انه في واحد توه متقدم حق زهرة

حسن كانه احد عاطنه سطار: هاا وش قلتين؟؟

زينب: اللي سمعته..وعلى حسب علمي انه شاب ومؤدب وخلوق وحليو وشكلها بتوافق عليه

حسن: لا لا تقولين...ومتى هالسالفه...شفتين امااه ما قلت ليش من زمان خلينا نروح نخطبها الحين خلاص هالمره مافي رجعه..البنيه طارت

الأم مليحة: وانته تصدقها يا المخرووش...هادي تبي تحرق اعصابك

حسن:ما ادري اقوم اكفخش يا السباااله يا الدبه...لكن الله رحمش..لو ما اليوم بيخطبون ليي زهرة..جان ما رحمتش من الضرب

زينب: الله يساعد قلبك...ما ادري وش مسويه فيك!!


في بيت حجي مكي
في حجرة زهرة

زهرة مقابلة كبتها وتدور ليها ثياب تلبسهم الليلة...

زهرة: البس أي بدلة!!!...هادي حليوه وهادي بعد حليوه..الحين أي وحده اختار!!

الأم فخرية تدخل الحجرة: يووو للحين ما لبستين؟؟

زهرة: وش فيش مستعجله..الحين اني محتارة أي واحد البسه؟؟

الأم فخرية: البسي أي شي وامشي...انتين بتعرضين ازياء يعني.؟؟.والله جايين يشوفون ثيابش ويطلعون!!

زهرة: لا تبيني اقعد للناس بخمايمي...تبين يقولون عني مبهدله

الأم فخرية: يا علييي الله يساعد رجلش عليش

زهرة: وش دخل رجلي الحين في السالفة!!

الأم فخرية: بتعلين جبده حزة الطلعه..هو يحارسش في السيارة وانتين بعدش ما لبستين

زهرة: والله وش وراه خله يحارسني..وبعدين محد ضربه على ايده وقال ليه ياخدني..والله اللي يبيني بتحملني

الأم فخرية: انزين بلا هرار زايد...ولبسي بسرعه وانزلي قبل لا يجون الناس وانتين للحين ما جهزتين

زهرة: انزين

وطلعت عنها امها وظلت هي مقابله الثياب وما تدري وش تختار!!

زهرة: اففف وش البس!! ماليي الا اسوي عقرة بقرة واللي يطلع البسه


في الصالة عند الجدة والأم فخرية

الجدة: فخروو

الأم فخرية: نعم عمتي

الجدة: بيت حجي صالح وش عندهم بيزورونا!!!

الأم فخرية: يوو جيرانا بعد حقويش ما يزورونا..ودي مو اول مره يزورونا

الجدة: لا هالمره السالفة فيها انه

الأم فخرية: لا فيها انه ولا شي..حجي مكي عازمنهم على العشى..يقول من زمان ما تجمعنا

الجدة: ايي عليي هالحجي..هالكلام تقولينه الى زهرة بتش مو ليي اني...اني اعرف الناس عدل

الأم فخرية: والله هذا اللي قاله ليي حجي مكي...قال هو عازمنهم على عشى

الجدة: أي أي اني اعرفكم ما تبوني اعرف شي ولا ادري وش اللي صاير في البيت..كله خايفين اخرب عليكم فرحتكم

الأم فخرية: لا عمتي مو جدي السالفه

الجدة: عجل ويش؟؟ اني اعرفكم عدل كله ما تبوني اعرف شي

وبدخلة حجي مكي الصالة

حجي مكي: السلام عليكم وش صاير عندكم؟؟

الجدة والأم فخرية: عليكم السلام

الجدة: تعال قول ليي وش سالفة بيت حجي صالح وجيتهم الليله عندنا

حجي مكي: مافي شي امااه بس انا عازمنهم على العشى

الجدة: لا يا بوويي مو تقصون عليي بسالفة العشى..هم اكيد جايين حق سالفة غير

حجي مكي: أي سالفه؟؟

الجدة: وش دراني انته اخبر

حجي مكي: انزين الحين انتين سكتي وبعدين بتعرفين كل شي..اكي زهرة نزلت
هلا هلا بتي هلا هلا بالعرووس

زهرة: هلا هلا بالحجي...وحقويش تقول ليي عروس!!

حجي مكي: لأن وانتين متعدله الحين صايره تشبهين العروس

زهرة: احم احم...شكراً شكراً..أخجلت تواضعي يا أبي

حجي مكي: ها جهزتون كل شي..ترى ما باقي شي ويجون بيت حجي صالح

الأم فخرية: أي كلشي جاهز


في بيت حجي صالح

في الصالة


حسن: يلا أمااه بسرعه ما صار بخور اللي تسوينه

الأم مليحة: انزين وش عندك انته كله مستعجل..مو زينه العجلة

حسن: نبي نلحق على الأوادم له قبل لا ينامون

الأم مليحة: هههههههههه ومنهو بينام الحين؟؟ الدجاج اللي هم دجاج ما ينامون هالحزة

حسن: انزين اماااه تدرين انا مستانس حدي يعني لا تخربون عليي فرحتي

الأم مليحة: انزين روح شوف اختك زينب خلصت لو للحين؟؟

حسن: هادي خلها تولي..اذا ما خلصت بنمشي عنها خلها تجي بروحها بعدين..اعرفها انا هادي عناد تبي تأخرنا عن الموعد

الأم مليحة: يا علي ابن ابي طاالب... هالصبي كله منصرع وبس...ما يحاتي الا العرس...ان شاء الله توافق عليك زهرة ونفتك من حنتك

حسن: أي أي امااه زيدي من هالدعواي انا محتاج ليها

حجي صالح: ها تجهزتون لو بعدكم؟؟

الأم مليحة: أي اكو استوى الفحم..حسن روح جيب البخور من الصالة

حسن: ان شاء الله اماه

حجي صالح: صاير مطيع اشوف

حسن: ابوويي انا من زمان مطيع بس من يقدر

حجي صالح: عجل وينه زينب بتش لا يكون للحين ما جهزت

حسن: هادي بلووه كله تأخرنا

حجي صالح: روح شوف اختك بسرعه قول ليها اكو طلعنا احنا

حسن: بروح اطلعها من حجرتها غصب حتى لو ما جهزت

ويروح حسن فوق حق زينب

حسن يصارخ: زنبوو يلا طلعي بسرعه

زينب تسمع صوت حسن وتقعد تطق باب الحمام بقوة عشان يسمعه

حسن: يلا طلعيي

زينب تصارخ: حســــــــــــــن تسمعنيييي

حسن: ايي انتين في وينه عفر؟؟

زينب: اني في الحمام منقفل عليي الباب

حسن: اوهوو حزاتش الحين ويه هالباب..انزين باب الحجرة بعد مقفل الله يغربلش

زينب: أي اني مقفلتنه.

حسن: طيح الله حظش من هبله..والحين جيفه نفتح ليش باب الحمام

زينب: مثل ما بتفتح باب الحجرة افتح باب الحمام يعني ما يبي ليها ذكاء..بسرعه فطست واني قاعده في الحمام صار ليي ساعه ومحد يسمعني

حسن: يا ربي وش اسوي في حظي المنحووس..يوم حبيت البنيه خطبوها ويوم رحت بخطبها انقفل على هالحوله الباب...صبري بروح انادي ابويي يا العله

زينب: رووح بسرعه ..ابي اطلع من الحمااااام

حسن: انزين يا العله برووح..والله العظيم بصيح على حظي النحس...الحين بنتاخر بسبة الباب المقفول

راح حسن ينادي ابوه وكلهم جوو صوب حجرة زينب

حجي صالح: زينب حاولي تفتحين الباب مره ثانيه شوفي يمكن يفتح

زينب: ما يفتح ابووويي مشير ما ادري وش فيه

حسن: انا بروح اجيب مفاتيح السبير وبنفتح باب الحجرة وبعدين خلنا نكسر باب الحمام

حجي صالح: انزين المفتاح محطوط في الباب

حسن: اووهوو هادي متفرغه بعد يوم قفلت عليها الباب...

حجي صالح: حارس بنقعد نحاول نطيح المفتاح وبعدين بنفتح القفل

وقعدوا يحالون ويحالون لين ما طاح المفتاح وفتحوا باب الحجرة...الحين باقي باب الحمام

حسن: ابوييي تباعد بكسر الباب

حجي صالح: اقعد مكانك مسوي روحك كلش وانته عضمين

حسن: يعني لازم تحرجني

زينب: يلا طلعوووونييي بمووت...لا يكون بتخلوني انام في الحمام!!

حسن: زنبوو وش رايش نروح بيت حجي مكي واذا خلصنا نرجع ليش؟

زينب: لاااا احلف عااد..طلعوني الحين الحين.

حسن: اففف تأخرنا على الموعد...طافت نص ساعه الحين

زينب: وان شاء الله يطوف الليل كله بعد...تطلعوني اول بعدين تروحوون

حسن: انتين باطه جبدي والله العظيم...خاطري اشدخ من الضرب...ما دورتين الا اليوم تقفلين عليش الباب

زينب: لا والله واني وش دراني انه بينقفل عليي

حجي صالح: بس بس كله هوااش انتوون اكو شكله بينفتح الباب..زينب جربي تفتحينه الحين

زينب تجرب: ما يفتح ما يفتح

حجي صالح: والحين؟؟

زينب: اكو بيفتح ...هيييييييي فتح فتح

حسن: وه ما بغينا نخلص..يلا نمشي بسرعه

حجي صالح: وش فيك مفجووع..حارس اختك تخلص

حسن: يلا انتين بسرعه...لبسي دفتش وطلعي..ما يحتاج تتعدلين ولا تدلعين

زينب: روح ول منااك...قاعد ويتفلسف علينا..يلا طلعوا بجهز روحي بسرعه وبطلع

حسن: عندش خمس دقايق لا غير...ولا تقفلين عليش الباب بعد..محد بيدخل عليش

زينب: انزين انزين خلصني بسرعه....لوعت جبدي بحنتك

الجزء الثالث والعشرين 23





:
:

في بيت حجي مكي


الجدة: ويش سالفتهم جيرانكم تأخروو

حجي مكي: ما ادري ...حجي صالح قال ليي بس يجهزون بيجون

الأم فخرية: على ويش مستعجلين الحين بيجون

زهرة: اماااه اني جوعاانه ابي اكل

الأم فخرية: حارسي انتين بعد وش فيش الحين بيجون الناس وبنتعشى

ويطق جرس البيت

زهرة: اكو جوو

حجي مكي: انا بروح ادخل الرجال المجلس

الأم فخرية: زهرة قومي دخليهم الصاله

زهرة: وش معنى اني يعني؟؟ لكن ما عليه بقوم

الأم مليحة: السلام عليكم شحوالش بتيي زهرة ان شاء الله زينه

زهرة: عليكم السلام الحمد لله زينه حياش الله تفضلي

الأم مليحة: زاد فضلش

زينب: شحوالش زهروو

زهرة: ها زنبوو تأدبي صيري عاقله

زينب: اني كنت عاقله قبل لا اجي بس من شفتش استجنيت

زهرة: هي هي هي باايخه..يلا دخلي بسرعه..وبعدين تعالي وش فيكم تأخرتون

زينب: هههههههههه ههههههههههههههههههه

زهرة: يوو الحمد لله والشكر

الأم مليحة : هادي هي الي أخرتنا..انقفل عليها باب الحمام وحسن زلزلنا...يلا خلوها تولي ونروح تأخرنا..هو يصارخ من صوب وهي من صوب
زهرة: هههههههههه وجم ساعة قعدتين في الحمام

زينب: ساعة ونص ويمكن زيادة خمس دقايق

الجدة: بل بل عليش الحين مداش تحسبين وانتين ما عندش ساعة

زهرة: لا عندها ساعة في الحمام

الجدة: الله واكبر عليكم

الأم فخرية: هههههههه جوزوا عنها له

وقعدوا النسوان يسولفون وزينب وزهرة يخططون حق باجر عشان بيروحون يقدمون في الكلية..ومره وحده بيطلعون لهم الكجه...يعني الأجواء عندهم كانت مستقرة وعادية



أما الأجواء عند الرجال وبالتحديد عند حسن كانت ممزوجة بالتوتر والخوف..بس كان محتفظ بابتسامته المصطنعه...وأبوه شكله ناسي السالفة ..طاقنها سوالف ويه حجي مكي

حسن في نفسه: يا الله..الى متى يعني بيظلون يسولفون..يلا يا ابوويي قول السالفه وخلصنا

وكلما يمر الوقت كانت السوالف تزيد..وحسن مسكين ضايع في الطوشة..مو عارف شلون يقول لأبوه



ننتقل الى الصالة عند النسوان وسوالفهم الي ما تخلص

الأم فخرية: زهرة...قوومي ايايي المطبخ

الأم مليحة: ما يحتاج يا اختي..احنا مو أول مره انجي

الأم فخرية: لا يحتاج

وراحت زهرة وامها الى المطبخ يجهزون القدوع

الأم فخرية: زهرة..روحي طلعي الكيك والعصير من الثلاجة وحطيهم في صينيه ووديهم لأبوش المجلس

زهرة: والقدوع؟؟ ما بتدوينه ليهم!!

الأم فخرية: وش فيش بوديه الحين اني..يلا امشي
وراحو ثنتينهم عند باب المجلس وعطوا حجي مكي الصواني..وردوا رجعوا المطبخ وأخدوا صينية القدوع الثانية وودوها الى النسوان

وزهرة عاد كانت جوعانه حدها..ما صدقت تشوف اكل قدامها الا هجمت عليه ولا افتكرت بالي قاعدين...أخدت ليها صحن كيك وعصير وقعدت تاكل فيه

الجدة: حشى حشى اللي يشوفش يقول مجوعه مو شايفة خير

زينب: ههههههههههه مسكينه رفيقتي

زهرة متفشلة: وانتين يا طايحة الحظ تضحكين عليي هاا لكن اراويش

الأم مليحة: خليها على راحتها..يمكن البنيه جاعت

الجدة: أي عاد لازم تحارس الضيوف اول يقعدون بعدين هي تعلف

الأم مليحة: كله واحد عمتي وش فيها يعني واحنا مو غرب

الأم فخرية: انزين ما صار شي..صلوا على النبي واقدعوا

الكل: اللهم صل على محمد وال محمد

الام مليحة: فخرية...

الأم فخرية: نعم

الأم مليحة: احنا جايين ياختي عشان موضوع..والحين اني بفاتحكم بالموضوع هذا

الأم فخرية: تفضلي..قولي

الام مليحة: زاد فضلش خيوو..بس احنا نبي بتكم زهرة حق ولدنا حسن

زهرة كانت تاكل كيك..ومن سمعت الكلام غصت بالكيك وقعدت تكح

زينب وهي تضرب ضهر زهرة: ويي اسم الله عليش مرت اخووي لا تموتين وتخلين اخوي بحسرته جودي الماي شربي شربي اسم الله عليش

الجدة: يووو عفر استحت وغصت

زهرة ومو قادرة تتكلم: الله يغربلش يا زينبو..يوم انش تدرين جان قلتين ليي عشان ما اقعد اياكم

زينب: ههههههههههههههههه ويليي تستحين عفر ههههههههه
زهرة فلصت زينب في رجولها عشان تستكت..وصرخت زينب

الجدة: ويش فيكم؟؟

زينب: آآآي...الله يغربلش يا زهروو..لا لا مافينا شي

الأم مليحة: ها خيوو ويش قلتوون؟؟

الأم فخرية: والله هادي الساعة المباركة..وحسن ولدنا مثل ما هو ولدكم ويكفي انه من تربيتكم انتين وحجي صالح..بس انتين تدرين الراي راي زهرة..واكي هي عندش سأليها..

زهرة تلون وجهها أوان قوس قزح: يا ربيي وش هالبلشة..جيفه برد عليها الحين

زينب: وش فيش تهدرين بروحش مثل المجانين!!

زهرة: انتين انجبي..شغلش بعدين

زينب: واني وش يخصني هذا هم اللي قالوا ليي

زهرة: لاا هم الي قالوا لييش هاا..والله انتين لو تبين تقولين جان قلتين من زمان

الأم مليحة: هاا بتي زهرة..وش قلتين؟؟

زهرة مرتبكة: م م مـ ا ماادري

الجدة شافت زهرة مرتبكة قالت بتنقذها المسكينة: البنية ما يصير الحين ترد عليكم..لازم تفكر اول وبعدين نرد عليكم

زهرة من تكلمت جدتها ارتاحت شوي

الأم مليحة: على خير ان شاء الله..خله تاخد وقتها وتفكر عدل..واحنا ننتظر جوابها...بس عاد مو تتاخرين علينا زهرة ترى حسن مغربلنا

زينب: ايي يلا وافقي وفكينا من حنته لوع جبدنا

زهرة تعطيها ضربه على راسها من القهر

زينب: آآآآآآآآيييي الله يغربلش

الأم فخرية: ههههههههههههههههه جزاش..محد قال ليش تغربلين بتي..ما تشوفينها مسكينه مستحية

زهرة: زنبوو..قومي نروح فوق الحجرة قومي

زينب: لا حبيبتي تبين تتوحدين ابي ادري اني بنواياش الخبيثة

زهرة: فيني حرة عليش ماني عارفه اقعد

زينب: ههههه ما عليه يا مرت اخووي هونيها وتهون

زهرة: انجبي..كلمة ثانيه واطلع حرتي فيش الحين قدامهم كلهم

زينب: تسوينها مو بعيده عليش..اسكت احسن ليي


نرجع الى الرجال ونشوف الأوضاع عندهم تغيرت لو للحين نفس الحال!!

حسن قرر الحين يكلم ابوه ويقول ليه يفاتح حجي مكي بالموضوع لان طفش الصبي وهو يحارس

حسن وهو يدز ابوه من ايده : ابوويي..ابويي

حجي صالح: هاا وش فيك يا المفجوع

حسن: ابووي انا تمللت وانا احارسك تفاتح حجي مكي بالموضوع يلا له الى متى يعني بصبر

حجي صالح: انزين انزين الحين بقول ليها أذيتنا

حسن شاق البوز: أي الله يخليك لينا ابووي الله يحفظك قول قول

حجي صالح: اسكت بس اسكت

حجي مكي: وش فيكم عسى ما شر!!

حجي صالح: ههه لا ما عليك منه ..انزين حجي!!

حجي مكي: آمر

حجي صالح: ما يامر عليك عدو...بس احنا ناوين القرب منكم..وجاين طالبين بتك زهرة الى ولدنا حسن

نسيت أقول لكم انه حجي مكي وحجي صالح كانوا متفقين انه يسوون في حسن دقة..يطفرون به شوي المسكين>>>شياب اخر زمن

حجي مكي: والله احنا يشرفنا انه نناسبكم يا حجي صالح...بس ياخوي زهرة بتي محجوزة من فترة حق واحد هو الحين مسافر واذا رجع ان شاء الله بالسلامة بيجي يخطبها رسمي

حسن هني تغيرت ملامح وجهه..ما اعرف وين يودي بوجهه..حس بغصة ..حس بضيق

حجي مكي يكمل كلامه: سامحونا عاد كل واحد ياخد نصيبه من هالدنيا

حجي صالح: مسموح يا اخوي..والله يتمم عليهم على خير

حجي مكي: ان شاء الله

حسن ما قدر يتحمل اكثر..قرر يطلع من عندهم ويورح أي مكان

حسن ومو قادر يوقف على رجوله: اخليكم الحين..رفيقي يبيني اروح ليه ضروري

حجي صالح: مافي تروح اقعد

حسن: ابووي اقول ليك الصبي يبيني ضروري

حجي صالح: مافي طلعه..اقعد

حسن:ماليي لزمة الحين اقعد..البنيه وخلاص مثل ما سمعت الحين محجوزة..تباني اقعد عشان تنبط مرارتي

حجي مكي كسر خاطره حسن..فما حب يواصل: استهدى بالله يا حسن..ما حصل الا الخير...ترى احنا كنا نسولف اياك...وزهرة لا هي محجوزة ولا شي

حجي صالح: افا يا الحجي افا..خربت علينا

حجي مكي: ههههههه انت ما تشوف ولدك يقول بيطلع..ان طلع الحين بيقتل روحه

حسن مو مستوعب: انا مو فاهم شي...الحين زهرة مو محجوزة يعني!!

حجي مكي: ههه لا..هذا كله من ابوك هو اليي قال ليي اسوي فيك جدي

حسن يطالع ابوه: أي ادري ما تحبني وشكلك تبي تفتك مني من جدي سويت فيني جدي

حجي صالح: هههههه انا لو ما احبك جان ما جيت اياك هني

حجي مكي: خلاص يا حسن ارتاح..بس باقي نشوف راي البنيه

حسن بيطير من الفرحة: انزين عمي روح شوفها الحين أسألها

حجي صالح: الحمد لله والشكر الولد رايح فيها

حجي مكي: ههههههههه اصبر شوي ..وش فيك..بعدين ان شافتك زهرة جدي ما بتوافق

حسن: لا لا لا لا نصبر نصبر وامرنا لله..بس عاد قول ليها لا تتأخر..ترى أيامي معدودة

حجي مكي: اسم الله عليك..ههههههههه

حجي صالح: اعقل يا حسن وصير رجال عاد

حسن: ابويي وش تشوفني الحين انا!!..بس المشكله ما تحسون بإحساسي

حجي مكي: انزين يا ابو الاحساس..نسيتنا سالفة العشى..بروح اجيبه وبجي..

حجي صالح: تعال تعال...من قال ليك احنا جايين نتعشى...اقعد لا تكلف على روحك

حجي مكي: ومن قال بخليكم تطلعون من البيت بدون عشى..استريحوا اقول استريحوا..حجي صالح..انت حط بالك على ولدك لا يصير فيه شي الحين وانا رايح اجيب العشى واجي

حجي صالح: ههههههههههه انزين


يتبع
:
:

وراح حجي مكي يجيب ليهم العشى وقعدوا يتعشون...والنسوان مثل الشي..حطوا العشى وقعدوا يتعشون..ما عدا زهرة الي قاعده تطالع الأكل وهي ساكته

الجدة: من ويش ما تاكلين زهرة؟؟ توش مساعه بتموتين علينا من الجوع..والحين ما تاكلين..او صرتين تستحين من خطبوش!!

زهرة خاطرها تتهاوش ويه جدتها بس المشكلة الاوادم قاعدين اياهم

الأم مليحة: وش فيش يا بتيي ما تاكلين؟؟

زهرة: ها..لا مافيني شي بس شبعت من الكيك والعصير

زينب تساسر زهرة: زهروو اكلي اكلي بعدين اخاف تنقرضين وما يشوفش اخويي حسن

زهرة تضرب زينب على راسها: يا البقرة يلي ما تستحين بروح حجرتي ولا ابيش تجين ليي فاهمة..وان جيتين ترحمي على روحش....وقامت عنهم

الجدة: زهروو حقويش قايمه..قعدي مكانش

زهرة: راسي يعورني وبطني يعورني بروح ارتاااح..يصير او لا!!

الأم فخرية: انزين روحي وشربي بندول..شكلش بتمرضين
زينب: واعلى افادي رفيقتي ان مرضت مرض اخويي وراها

كلهم ضحكوا على كلامها

زينب في خاطرها : اشوه زهرو مو هني جان نحرتني بعد


وبعد ما اكلوا وشبعوا وترسوا بطونهم تعبوا...وراحوا بيتهم وطبعا بيت حجي مكي كل واحد راح على حجرته وناموا>>> تصبحون على خير يا أهل البيت خخخخ


زينب أول ما رجعت بيتهم قعدت على النت لعل وعسى تلاقي زهرة وتتكلم معاها شوي...وصلت الساعة 1 ولا شافت زهرة قاعده قالت اكيد نامت..فقررت تروح تنام لأنها تعبانه وتروح لها الصبح تشوفها..ومن التعب نست ايميلها مفتوح

الساعة 1.30 الكل كان نايم بيت حجي مكي وبيت حجي صالح ما عدا اثنين وهم حسن & زهرة
حسن كان يفكر في زهره..وكان خايف انها ما توافق عليه..تعب من التفكير فراح يشوف التلفزيون لكن ما حصل شي يطالعه..وراح قعد على الكمبيوتر..يتصفح في المنتديات

وزهرة بعد ما كان جاينها نوم..كانت تفكرر بالقرار الي بتقرره..كانت متردده ما تعرف تحدد مصيرها...ما حبت تفكر واجد في الموضوع..وراحت قعدت على النت..يمكن تشوف زينب قاعده وتبرد حرتها فيها شوي

وبينما كان حسن يتجول بين أقسام المنتدى..باحثاً عن شيء يبعد عنه الملل وإذا برسالة تنبيه ظاهرة له أمام الشاشة...الا وهي من فتاة أحلامه..من زوجة المستقبل>>> انعل ابو التعبير..كملي كملي القصة يا بنيه

طبعا حسن ما كان يدري من وين طلعت له هالمحادثه..لان ما كان فاتح ايميله...بس بعدين عرف انه هذه ايميل زينب اخته...وقال اكيد هادي وحده من ربعها المجانين..فطنشها وكمل شغله..لكن المسكين ما قدر يقعد على راحته لأن هالبنيه غربلته..طايحه سب في زينب واشارات تنبيه تبي احد يرد عليها..

حسن يرد ع المحادثه: نعم

زهرة: يا طايحة الحظ زينبو يا السبااااله وش سويتين فيني اليوم فشلتيني قدام الكل..حقويش ما تقولين ليي من قبل عن هالسالفه هااا

حسن وشوي فهم من كلامها ان هي زهرة: أي سالفة!!

زهرة: لا تسوين روحش بعد ما تعرفين أي سالفة... سالفة اخوش حسن يا الحلوة

حسن: اييييي ..انزين وش صار يعني!!
زهرة تواصل: لا وتساليني بعد وش صار...ما تدرين اني وجهي احترق قدامهم كلهم..ما عرفت وش اسوي...جان قلتين ليي على الاقل انكم جايين حق هالسالفة جان ما اقعد اياكم اقعد في حجرتي ولا اتفشل

حسن: هههههههههههه يعني تستحين!!

زهرة: ما ادري اطلع ليش من الشاشه واكفخش الحين يا البقرة...فيني حره عليش

حسن ناسي روحه: جان زين تطلعين ليي من الشاشه

زهرة شكت في السالفه: انتين مو زينب...اكيد احد بايق ايميلها!!!

حسن تورط ما عرف وش يرد: لا من يعني بيبوق ايميلي

زهرة: من انتين؟؟

حسن استسلم وقرر يعترف: زهرة انا حسن

زهرة كأن واحد يرش عليها ماي بارد ما عرفت وش تسوي...يعني شاف الكلام الي قالته..
بدون تفكير سوت تسجيل خروج وركيض على سريرها..>>>هههههههههه بتنام غصباً عنها

حسن: يا ربيي وش فيها طلعت..حتى ما ردت عليي..اكيد زعلت..اي من حقها لان انا غبي لو قايل ليها من البدايه احسن ليي..الحين وش بتقول عني..حتى لو من قبل بتوافق عليي الحين خلاص ما اظن توافق..عساني الموووت...غبي وطول عمري بظل غبي

شال هالافكار من راسه واستسلم للنوم..تعبان حده..صار ليه جم يوم ما ينام يحارس هاليوم يجي..>>>الله يعينك


يوم ثاني الصبح


حسن ما عرف ينام عدل..من قعد الساعه 8 الصبح اتصل الى كريم...التلفون يرن ...يرن...تووت تووت..توووت توووت..وينقطع الاتصال
ويعيد الاتصال...توووت توووت..توووت توووت...وينقطع الاتصال
ويعيد الاتصال...توووت توووت..هالمره رد عليه جاهل

حسين: الووو

حسن مستغرب: الوو...هذا مو تلفون كريم؟؟

حسين: أي هذا تلفون البابا..البابا نايم

حسن: البابا؟؟ جي انته من؟؟>>>الأخ نسى انه كريم عنده ولد..مو منه

حسين: انا حسين..وانته من

حسن استوعب الموقف شوي: ايي انته حسين ولد كريم!!

حسين: أي..وانته من؟؟

حسن: هلا حسين حبيبي شحوالك؟؟ انا حسن رفيق البابا

حسين: انا زين..توني قاعد من النوم..بس البابا مو راضي يقعد..يقول ليي روح العب

حسن: هههههههه مو راضي هاا..عجل فيه قلاص ماي صوبك!!

حسين ببراءة: أي في جيك ماي هني

حسن: حلوو..عجل حسوني حبيبي..احمل جيك الماي وافتحه..وصبه كاامل على وجه البابا اووكي..عشان يقعد البابا ويلعب اياك

حسين: هههههههههههههه انزين

أخد حسين جيك الماي وصباااه كامل على وجه ابوه وسبحاه من الماي وهو يضحك...

كريم متخرع: الله يغربل بليسك من ولد..وش سويت فيني..سبحتني بالماي

حسين يضحك ويبي يهرب من ابوه: هههههههههه بابا هذا مو انا..هذا حثن قال ليي اثوي جدي

كريم: حسن؟؟ أي حذن هذا الي ما غسل عيونه؟؟

حسين: اكو في التلفووون

اخذ كريم التلفون ورد

كريم: الوو

حسن يضحك: ههههههههههههههه هااا سبحوك زين!!

كريم: الله ينعلك..وش تبي انته من الصبح..ما عندك ساعه تشوف فيها الوقت..واليوم الجمعه يعني اجازة يعني الناس نايمه

حسن: هذا انته قلتها اليوم الجمعه..يعني اليوم صلاة..قوم لا تفوتك

كريم: صلاة الضهر مو من الصبح يلا انقلع خلني اقوم ابدل ثيابي واكمل نومتي..الله يغربلك خربت عليي حلمتي

حسن: هههههه وش كنت تحلم؟؟

كريم وهو مقعد ولده في حضنه: ما يخصك ويلا اقلب وجهك

حسن: على أي صفحه؟؟

كريم: يا حسن يا حبيبي والله والله تعبااان حس فيني يا اخي..وانته واحد فاضي..وش تبي متصل ليي من الصبح

حسن: افاا افاا يعني اقدر اعتبر هالكلام طرده

كريم: أي طرده أي هرار...بس قول وش عندكوخلصني اقول ليك تعبان

حسن: بس خلاص ما عندي شي

كريم: حسن..لا تسوي روحك زعلان وقول

حسن: انزين ابي اشوفك اليوم

كريم: وش فيك حسن؟؟

حسن: مافيني شي

كريم: انزين العصر اشوفك

حسن: لا الحين ما اقدر العصر..تباني امووت من القهر

كريم: يا صبر ايووب على بلاوااه...انا ما اخلص من حسين في البيت تجي ليي انته ...صار عندي ولد كبير بعد

حسن: ههههههه انزين بابا عقب 10 دقايق بجي ليك بيتكم

كريم: اقعد مكانك..وخلها للعصر..ارحموا من في الأرض يرحمكم من في السماء

حسن: عاد انا ما يخصني..بجي الحين يعني بجي...ما يصير انته تنام وانا للحين ما غمضت عيوني

كريم: وش عندك ما غمضت عيونك...والي تحبها تقدمت ليها..وش صار بعد!!

حسن: مو هني المشكله..انته ما تدري وش صااار من غبائي

كريم: توك تدري انك غبي

حسن: اووهووو الحين ويش يعني!!

كريم يطالع حسين وهو قاعد في حضنه..ويسمع حسن..وهو يحس انه في شي يبلل رجايله

حسن: هاا وينه رحت ما ترد

كريم: صبر صبر بشوف شي...حسينو قوو شوي عني..قوم وقف بشوف

حسين: لاا ما بقوم..ما اقدر اقول

كريم يشيل حسين عنه بالغصب: الله يغربل بليسك وش سوووويت

حسين شوي ويصيح: انا ما سويت شي...انا قلت ليك قوم ابي اروح الحمام انته ما ترضى

كريم: اففف وش هالبلشة...اليوم كلش نحس من الصبح...انته من صوب وحسنو من الصوب الثاني

حسن: الووو ابو حسين وينك؟؟

كريم يشيل التلفون: انته ما خلص الكريدت مالك!!

حسن: لا محولنه gsm هع هع

كريم: أي انته وجهك وجه بيل..يلا بند التلفون خلني اقوم اشوف هالبلوه

حسن: أي بلوة؟؟

كريم: حسين بعد منهو..الله يغربل بليسه سواها عليي

حسن: ههههههههههههههههههههه والله يا رجال انته حالتك حاله..قلت ليك عرس بس ما تطيعني

كريم: رووح يلا انا فاضي ليك والى العرس الحين

حسن: هههه انزين وانا متى اجي ليك يعني

كريم: قلت ليك العصر وفكنا عاااد

حسن: هههههه اليوم انا صاير لزقة...بجي الحين بشوف حسين ولدك الي ما شفته..بنصير ربع انا اياه
كريم: والحين انتون ويش يعني!! من الصبح متآمرين عليي وصبيتون عليي الماي..انته تخطط وهالعفطي ينفذ

حسن: هههههه يلا قوم قوم تسبح الحين بجي ليك

كريم: تعالي ليي بعد ساعه

حسن: خلاص برأف بحالك وبجي ليك الساعه 10..بس ها جهز ليي الريوق

كريم: ما عندنا ريوق في البيت جيب ريوقك اياك

حسن: بل عليك يا اللجه..

كريم: قول الي بتقوله بس يلا فارق

حسن: ههههه بس خلاص كسرت خاطري..يلا باي نشوفك بعدين

كريم: على خير ..باي

في بيت حجي مكي


زهرة تتقلب على سريرها...مو جاينها النوم..تفكر في الموقف الي صار ليها

زهرة: اففففف اني اقوم انزل تحت احسن ليي..وهذا خله يولي هالسبال يطنز عليي يسوي روحه زينب..والله العظيم يقهر


تحت في الصالة عند الجدة وحجي مكي والأم فخرية

الجدة: الحين ويش قالت زهرة على ولد حجي صالح!!

الأم فخرية: عمتي تشوفين امس هي قالت تعبانه وراحت حجرتها ونامت..يعني ما مداني أسألها

حجي مكي: وش فيها زهرة؟؟

الأم فخرية: امس تقول راسها يعورها وراحت تنام

حجي مكي: انزين قومي شوفيها الحين..صارت زينه او لا!!

الأم فخرية تطالع صوب الدرج : اكي نزلت

زهرة: ها اكيد قاعدين تعقرون عليي!!

الجدة: الواحد يقدر يعقر عليش وابوش قاعد

زهرة: الله يخليه تاج راسي ويخليش يا جدتي الغالية ويخليش يا امي الحبيبه

الجدة مبطله عيونها: وش طاري عليش عفر!!

زهرة: ههههههههههه ولا شي ...حرام يعني نقول عنكم هالكلام

حجي مكي: هههههههه لا لا مو حرام..قولي قولي ولا تقصرين

زهرة: افا عليك حجي...بس عندي طلبات

حجي مكي: وانا اقول وش طاري عليها...الا تبي طلبات بعد مو طلب واحد

الجدة: الا انتين اول قولي وش رايش في حسن وبعدين تطلبي على كيفش

زهرة متفشله: اني الحين قلت ابي الطلبات من ابويي مو من احد غيره

الأم فخرية: عمتي هههههههههه فشلتينها عاد

حجي مكي: ما عليش منهم بتي قولي وش طلباتش!!

زهرة: ابوويي شكلك نسيت سالفة الليسن والسفرة..والكليه

حجي مكي: لا ما نسيت متى تبين نروح نطلع ليش الكجه

زهرة: ابي اني وزينب نروح ويه بعض

حجي مكي: حصل خير..انا بكلم حجي صالح عشان نروح جميع

زهرة: أي ابويي ولا تنسى تكلمه بعد عن السفره

حجي مكي: ان شاء الله..ومتى بتروحون الكليه عجل!!

زهرة: اسبوع الجاي التسجيل يوم الاحد

حجي مكي: ما ادري يمكن يصير عندي شغل يوم الاحد..روحي ويه زينب

زهرة: وش عندك يوم الاحد!!
حجي مكي: انا وحجي صالح عندنا شغل ويه رجال..ما نقدر نوديكم..خلوا حسن يوديكم

زهرة: لاا عجل ماني رايحه اقدم

الجدة: تستحين من حسن يعني!!

الأم فخرية: انزين هو وش بيسوي فيش ..بياكلش!!

زهرة: قلت ليكم ما بروح اياهم وخلاص..

حجي مكي: مردش بتروحين اياهم...ما عندش احد غيرهم

زهرة: افففف وش هالبلوه!!

حجي مكي: يلا انا طالع بروح الى حجي صالح..وبتفق اياه

زهرة: أي ولا تنسى السفره بعد

حجي مكي: ان شاء الله..يلا مع السلامه

الكل: الله يسلمك من الشر

زهرة: اني ببقوم اتصل الى زنبو بخليها تجي ليي عشان نتفق على هالاشياء

الأم فخرية: قعدي مكانش شوي بكلمش

زهرة: وش بتقولين؟؟

الجدة: وش فيش انتين مستعجله..قالت ليش امش بتكلمش..يعني قعدي وسمعي

زهرة: قعدنا !!

الأم فخرية: سمعي يا بتي...الصبي شارنش..ويبيش...والدليل انه دخل من الباب..وانتين ما يصير تحكمين عليه من الحين لأنش ما تعرفينه..لازم اول تقعدين اياه..وكل واحد يتعرف على الثاني..وتتشاورون..وبعدين تقررين تبينه او لا..وش قلتين الحين موافقه عليه مبدئياً او لا

الجدة: ومن ويش ما توافق عليه..البينه ما تنستر الا في بيت رجلها..وحسن ولد حجي صالح ما عليه كلام

زهرة: لا حلفي ما عليه كلام..وهو من قبل كان يغازل بنات الناس ويركض وراهم

الأم فخرية: هذا انتين قلتينها كان قبل..يعني الصبي الحين تغير..وما قام يسوي هالسوالف

زهرة: بس اني وش ضمني اذا اخته بعدين ما يرد يعيد هالسوالف

الأم فخرية: يا زهرة الصبي باين عليه تغير..ما تشوفينه قام يشتغل بعد ويعتمد على روحه..وصار يتحمل المسؤوليه بعد

الجدة: ها وش قلتين..لو للحين ما اقتنعتين به؟؟

زهرة: ما ادري

الجدة: وش يعني ما تدرين..قولي موافقه عليه او لا وخلصت السالفه

الأم فخرية: عمتي خلينا نسمع رايها..انتين يا بتي اول شوفيه مثل ما قلت ليش وبعدين حكمي عليه..وانتين اذا قعدتين اياه وقعدتين تسألينه بتعرفينه شوي

زهرة: انزين خلاص الي تشوفونه...يصير الحين اقوم اتصل الى زينب

الجدة: كلللووووووش كللللووووووووش..يلا يلا فخروو قومي اتصلي ليهم قولي البينه وافقت

زهرة: هييي وش تهرين انتين..اني للحين ما وافقت عليه..اني قلت بقعد اياه وبشوفه ما قلت ابيه..وبعدين اني مو مزهوقه على العرس

الأم فخرية: بس بنحدد اياهم يوم حق المقابله

زهرة: اففف واني ماا اشوف الا بس يتقدمون ليي ما اشوف زيبنو احد جاي ليها

الأم فخرية: هذا نصيب

الجدة: انتين طالعه على جدتش..يوم اني كنت اصغر منش..الخطاطيب كانوا طوابير على الباب...بس ما وافقت الا على جدش الله يرحمه

الأم فخرية: الله يرحمه

زهرة: أي أي لا تمدحين روحش واجد...ترى يقولون من مدح نفسه يبي ليه شسمونه نقط نقط

الجدة: ويش تقولين!!

زهرة: ولا شي سلامتش يلا بروح اتصل اني

وراحت زهرة حجرتها واتصلت الى زينب عشان تجي ليها..وبعد نص ساعه وصلت زينب بيت زهرة

زهرة: بل بل بل من متى اني متصله اليش هاا

زينب: بعد على ما بدلت ثيابي وجيت

زهرة: حشى..تبدلين ثيابش في نص ساعه..الله يساعد رجلش عليش عجل

زينب: محصله ليي واحد!!

زهرة: أي عندي درزن بس قولي أي واحد تبين

زينب: هي هي هي ..خلينا من هرارش ..اني مستغربه من شي واحد

زهرة: ويش هو؟

زينب: يعني ما قلتين ليي شي على سالفة امس ولا سويتين شي فيني

زهرة: ههههههه تبين الحين اقوم اكفخش يعني!!

زينب: لالا الله يخليش استريحي مكانش

زهرة: بسوي روحي نسيت السالفه...الا بقول ليش..انتين امس فتحتين ايميلش في الليل!!

زينب: ايي وقعدت احارسش بس ما قعدتين

زهرة: أي يا الغبية..والضاهر من النومه قمتين ونسيتين ايميلش مفتوح

زينب: ما ادري يمكن بعد..جي وش صاير؟؟

زهرة: الله يسلمش هذا اني دخلت وقعدت اسب فيش جان تبرد حرتي شوي..واني اتكلم عن سالفة حسن اخوش ومحد يرد عليي..الا بعدين ردوا عليي واني قعدت اتكلم وهم مواصلين ايايي..بس بعدين شكيت في السالفه..اقول هذا مو كلام زينب..اكيد احد بايق ايميلها

زينب فتحت عيونها: منهو بايق ايميلي؟؟؟؟

زهرة: يا الهبلة سمعي السالفه اول وبعدين تكلمي

زينب مندمجه: انزين كملي!!

زهرة: انزين وبعدين قلت ليهم من الي يتكلم ..قالوا ليي اني زينب..قلت ليهم انتين مو زينب..قولي انتين من..قالوا ليي انا حسن مو زينب

زينب: حلفي!!

زهرة: والله

زينب: انزين وش سويتين بعدين؟؟

زهرة: سكتي ما ادري وش صار فيني...حسيت كانه احد يصب عليي ماي بارد..من الخرعه بندت الكمبيوتر وقمت نمت غصبا عني..وجان زين نمت عدل بعد

زينب:هههههههههههههههههههههههههههههههه هههههههههههههههههههه عجل كلمتين حسن وانتين خبر خير..وقمتين تخورينها بعد ههههههههههههه

زهرة: ضحكي يا طايحة الحظ..لان مو انتين الي صاير اياش هالموقف

زينب: انزين انتين حقويش مخلتني اجي ليش؟؟

زهرة: عشان نتفق يا حظي

زينب: على ويش نتفق على الخطوبه؟؟

زهرة: تنكتين حضرتش...نبي نروح نطلع الليسن ونبي نقدم على الكليه

زينب: أي صح

زهرة: سمعي اني من شوي كلمت ابووي وقال بيكلم ابوش وبنروح جميع عشان نطلع الكجه اني وانتي...والكليه ما بيقدرون يودونا لان يقول ابويي عندهم شغل..فقال مالينا الا اخوش المحتوم يودينا

زينب: ويش شكله مو عاجبنش اخووي؟؟

زهرة: ما قلت شي الحين..بس يعني قولي ليه من الحين..لا بعدين يقول ما يقدر يودينا

زينب: لا ما بقول شي

زهرة: وانتين وش دراش

زينب: ادري..مدام السالفه فيها انتين ما بيقول شي

زهرة: عجل ماني جايه اياكم استحي الصراحه

زينب: لا حلفي انتين بعد..منهو بيوديش عجل

زهرة: بروح في تاكسي

زينب: أي صدقتش




في بيت حجي صالح

في مجلس الرجال


حجي مكي: ها الحين وش قلت باجر نوديهم المرور؟؟

حجي صالح: ان شاء الله..عاد الساعه 8 احنا طالعين

حجي مكي : على خير...انزين وسالفة السفر وش صار عليها الحين؟؟

حجي صالح: والله انا السنه كلش مو ناوي اسافر..بس مدام خاطرهم يسافرون..وش رايك نوديهم العمره 12 يوم ونرجع!!

حجي مكي: انته جدي رياك يعني!!

حجي صالح: أي بعد في شي احسن من زيارة بيت الله

حجي مكي: اكيد لا..عجل انا بخبر الأهل وانته بعد خبرهم...ونروح نحجز لينا من الحين..عاد لازم اول نسال زينب وزهرة عن الكلية تقول بعد يعطونهم امتحان ما ادري ويش..واذا خلصوا من شغلهم بنروح

حجي صالح: أي صحي..ودلين بعد يبون يتدربون من الحين...جيفه عجل نسافر!!

حجي مكي: الحين ما بيحصلون احد يدربهم اصلا..شوف عاد متى يحصلون ليهم..واحنا احتمال شهر 7 نروح..على ما اظن من الحين الى شهر 7 خلصوا شغلهم

حجي صالح: خلاص عجل..نروح عمرة رجب على نهاية شهر 7 ونرجع

حجي مكي: على الله..يلا عجل قوم خلنا نسوي أشغالنا

حجي صالح: يلا سرينا...


يتبع
7
7
7

طاف من الوقت ساعه كامله

على الساعه 10 بالضبط كان حسن واقف قدام بيت كريم...طق الجرس..بس محد رد عليه
لكن كان في صوت يناديه...هذا كريم كان يناديه من دريشة حجرته عشان يدخل...لأن ما كان في أحد في البيت

دخل حسن الصاله..ونزل ليه كريم من فوق وكان وياه ولده حسين

حسن: هلا هلا..هلا والله بالحبيب ....ويروح يحمل حسين

كريم واقف: صدق ما تستحي...عبالي تقول هالكلام ليي

حسن: هههه وانته وش اسوي فيك...خلني اسلم على رفيقي

حسين يعض حسن في ايده: هيييي خلنييي بروح للباابااا

حسن: آآآآآخ الله يغربل بليسك...وش فيك ما عرفتني!! انا حسن الي كلمتك من شوي

كريم: هههههههههههه زين ما يسوي فيك تستاااهل

حسين: اناا ما احبك..انت الي قلت ليي اصب الماي على البابا

حسن: بل بل شكله ابووك شاحننك عليي من الزين

كريم: انا!! هههههه انا لا قلت ليه شي عنك ولا شي

حسن: لكن ما عليه يا حسينوو..هذا وانا قايل بوديك اليوم الحديقه عشان تلعب..لكن الحين احلم

حسين: البابا بيوديني ويييييييوو

حسن: لا الجواب جاهز عندك بعد

كريم: ههههه عبالك..هذا ولد كريم مو أي واحد

حسن: اسكت اسكت احسن...

كريم: انزين خلصنا وقول وش عندك!!

حسن: قلبي

كريم: هههههههههه وش فيه قلبك

حسن: قلبي يعورني

كريم: من ويش بعد!! البنيه ورحت خطبتها وش بعد صاير من جديد!!

حسن: أي انا صح تقدمت لها بس امس في الليل كلمتها ع المسن

كريم: وش تقوول!! بهالسرعه عاد عطتك ايميلها

حسن: يا المخبل ...انا ما كلمتها من ايميلي كلمتها من ايميل اختي

كريم "آآآه يا قلبي": انزين انته قول السالفه عدل وبعدين قول عني مخبل يا المخبل

حسن: اسمع...وقال له السالفة من طأطأ للسلام عليكم

كريم: ههههههههههه مسكينه البنيه ماخده راحتها في الكلام

حسن: كل مني انا الحمار لو اعترفت ليها من البدايه جان ما عصبت عليي يمكن..الحين اكيد بتقول هذا ابو بناات وما بتوافق عليي

كريم:حبيبي اذا هي مقتنعه فيك بتوافق..وبعدين هي تشوف بعيونها انك تغيرت وما عندك سوالف قبل...يعني لا تحاتي

حسن: اففف انته يعني فكرك جدي!!

كريم: أي...والحين بتضحك لا اشوتك بره

حسن: جيي جايفني مجنون!!

كريم: لا بس ما ابيك تقعد قدامي مكشر جدي..لا بعدين ما اتوفق طول يومي...

حسن: عدال يا ابو الوجه الحسن

كريم: أأأأه متى بس بقابل الوجه الحسن..على الاقل احسن من مقابل شيفتك

حسن: مالت عليك...روح عرس وفكنا...انا هداني اقول ليك من الحين من اخطب خلاص ما بتشوف رقعه وجهي

كريم: وفي وجهي بعد تقولها..ما تقول بمر عليك في الاسبوع مره

حسن: قلت ليك عرس مو راضي...على الاقل تقابل زوجتك...والله انا بعدين ما بصير فاضي ليك

كريم: تدري عاد..انا قررت أتزوج...بس عاد لين حصلت البنيه الي تعجبني

حسن: عجل انطر يا حماار لين ما يجيك الربيع

كريم: وانته وش حارنك الحين

حسن: مو حارني شي...بس انته كاسر خاطري..ما تشوف روحك انته وولدك

كريم: الحمد لله حالنا مافي شي

حسن: انته لو بقعد اكلمك من الحين للسنه الجايه ما بيجيب هالكلام نتيجه اياك



الساعه 2 الظهر
في بيت حجي مكي



حجي مكي: يلا له نجبوا الغدى...اليوم بتغدونا يعني الساعه 4

الأم مليحة: هداني بنجبه الحين...زهرة قومي حطي الصمااط

زهرة: انزين اماااه

الجدة: هدووويه بطني لزق في ظهري من الجووع..اني الصراحه مو متعوده اتغدى هالحزة...اذا بتأخر كلش بتغدى 12.30
زهرة: بل بل هدويه..احد يتغدى هالحزة!!

الجدة: أي عبالش انا الاول هادي حزاتنا عجل انتون الحين تجي العصر وانتون للحين ما تريقتون

زهرة: هذا مااال اوول مو الحيين

حجي مكي: انزين يلا سرعوو لا تأخرونا زياده

وحطو الغدى وقعدوا يتغدون...

زهرة: ابوويي..وش صار الحين!!

حجي مكي يستهبل عليها: على ويش!!

زهرة: عن الي قلت ليك عنه الصبح بعد عن ويش

حجي مكي: ما قلتين شي انتين

زهرة: ابوووييي لا تقعد تسوي ليي جدي قول وش صار

حجي مكي: وهو في شي عشان اقول ليش عنه؟؟

زهرة: لا تقول انك نسيت

حجي مكي: الضاهر جدي

زهرة: لاااا انته قبل لا تطلع قلت بتروح الى حجي صالح بتكلمه مداك نسيت!!

حجي مكي: ههههههههه اذا خلصنا الغدى بقول ليش وش صار

زهرة: ابوويي عاد قول الحين ما اقدر اصبر

حجي مكي: قلت ليش عقب الغدى...عاد اول تسوين لينا جاي

زهرة: بعد..!!

حجي مكي: أي والله ما اقول

زهرة: لا بسوي وامري لله



في بيت حجي صالح


الأم مليحة في المطبخ تغسل المواعين...وزينب تسوي الجاي....

حسن جاي المطبخ لأمه يساسرها: امااه..ويش للحين ما ردوا علينا!!

الأم مليحه: يا عليي انته مللتني من الحنه..تونا امي رايحين ليهم ما مداها البنيه حتى تفكر

حسن: وسالفه هالتفكير يعني....تقول تباني او لا

الأم مليحه: عبالك الزواج لعبه يعني الا هي بس تقول ابيه او لا

زينب: وش دراني عنه...خل صديقتي تفكر على راحتها والله...وش الي عاجلنك

الأم مليحه: هذا اني ما بفتك من حنته الا اذا عرس

حسن: ما عليه يا ام حسن مقبوووله منش..انا بروح اقعد ويه ابووي في الصاله

زينب: احسن فكنا من حنتك شوي

حسن: مالت عليش

زينب: وعليك

الأم مليحة: اعقل عااد بتعرس وانته للحين ما عقلت

حسن: اذا عرست بعقل..وطلع عنهم

حجي صالح: وينه الجااي..ما صار جاي الي بيسوونه

حسن: مدام بتك زيبنوو هي الي تسويه...ترحم على روحك

حجي صالح: جي ويش حاطه فيه سم!!

حسن: ههههههه ما يحتاج تحط فيه سم...هي ما تعرف تسويه اصلا بتجرب عليك هالمره

حجي صالح: لالا بتي مره تعرف

حسن: أي ما عليه

الا بدخلة زينب وسمعة كلامهم

زينب: ما اقول الا مالت على البمبر

حسن يقلد عليها: ما اقول الا مالت على البمبر..امشي يلا حطي الجاي...لو غوزي جان من زمان استوى

زينب: ومن قال اني اسوي الجاي اليك..اني اسويه الى ابوويي

حجي صالح: بسكم عاد ...لازم كل يوم تسمعونا هواشكم..ان ما سكتون ما بقول ليكم الحين عن الخبر الي جايبنه ليكم

زينب: وش هو الخبر...اكو احنا سكتنا قول قول ابوي

حجي صالح: اول روحي نادي على امش

حسن: ابووي لا يكون زهرة وافقت عليي!!

زينب: عاد انته ما تفكر الا في زهرة...قال ليك خبر يعني خبر

حسن: لا..وش يطلع يعني هالخبر يعني خبر!!

حجي صالح: سكتوا له...وينش يا ام حسن

الأم مليحة: هادني جاية

حسن: يلا ابويي لا تحرق اعصابي قول قول

حجي صالح: وانته وش فيك..الخبر ما يخصك

حسن: افاا..وانا عبالي وافقت عليي

حجي صالح: احلم..

حسن: حقويش!!

حجي صالح: ولا شي...الحين تبون تعرفون الخبر او لا

زينب: ابوويي ما عليك من هذا وقول الخبر الي عندك

حجي صالح: أول خبر عاد يخص زينب..والثاني يخصنا كلنا

زينب: صدق!!..لا يكون واحد متقدم ليي

حجي صالح: بس بس انجبي....ما تفكر الا في العرس

زينب: عجل ويش الخبر الي يخصني!!

حجي صالح: من باجر بنروح المرور انا وانتين وحجي مكي وبته وبنطلع ليكم الكجه

زينب مستانسه: صدق ابويي!!

حجي صالح: ايي ...

حسن: انزين والخبر الثاني

حجي صالح: الخبر الثاني الله يسلمكم...انه قررنا احنا وبيت حجي مكي نروح العمرة 12 يوم

حسن منزهق: احلف ابوويي

حجي صالح: لا يلي ما تستحي..شايفني طول بعرض واجذب عليك!!

حسن: لا مسامحه ابووي مو قصدي جدي..بس يعني منصدم انا

زينب: ههههههههههههههههههه مو مصدق انه زهرة بتسافر ايانااا

حسن: جب انتين جب

الأم مليحة: هدوويه انتوون..كله هواش ومعايه..انزين حجي صالح متى بنروح العمره ان شاء الله؟؟

حجي صالح: ان شاء الله بنروح على شهر 7



في بيت حجي مكي

بعد الغدى


زهرة ظالعه من المطبخ وحامله اياها الصينية...

زهرة: ابووي يلا قول السالفة..اني اكو سويت ليك الجاي

حجي مكي: انزين حارسي تجي جدتش وامش

زهرة: ابووي جدتي راحت حجرتها يعني بتنام..وامي قاعده تنظف المطبخ يعني بتمهل واااجد

حجي مكي: لا ما يصير لازم هم يجون اول

زهرة: اووهوو ابووي الحين حبكت السالفه فيهم يعني

حجي مكي: ايي..والله مااقول

زهرة: انزين بروح انادي جدتي وامي

حجي مكي: انزين

زهرة راحت تركض صوب حجرة جدتها ونادت عليها عشان تجي تقعد اياهم...وعقب صراخ ونياح من زهرة قامت الجدة وراحت الصاله...وراحت الى امها المطبخ وقالت لها تخلي الشغل الي عندها وتجي تسمع السالفه ووعدتها انه بعد ما تخلص السالفه تكمل اياها الشغل

زهرة: يلا قول ابووي طلعت روحي على ما رضوا يجوون

الجدة: ويش هالسالفه الي ما خليتونا ننام على حسابها

حجي مكي: هههههههههه مو مني امااه هذا كله من زهرة..تحن تبي تعرف السالفه

الأم فخرية: هادي عاد طايحة الحظ ما تخلي احد يكمل شغله...جاية تزن على راسي جنها دباانه

زهرة: اماااااه الحين اني دباانه..لكن ما عليه الله يسامحش

الجدة: يلا قول خلنا نقوم نرتاااح

حجي مكي: ان شاء الله...بس انا كنت ابي اقول ليكم..انه احنا شهر 7بنروح العمرة 12 يوم وبنرجع ويه بيت حجي صالح

زهرة: الاااي ..لكن خساره بس 12 يوم..احنا عقب ما نروح العمره ابووي ودونا ماليزيا..ملل العطله لان نبي نستانس احنا

الجدة: ويش هادي ماليزيا فيها مقام منهو بعد؟؟

الأم فخرية: يووو عمتي هادي مافيها مقام ولا شي...هادي الا بلدة اجانب

الجدة: يا بووي ما نبي نرووح هالبلاد..جان بتودونا بلاد نزور فيها ما عليه

زهرة: وانتين وش فهمش بالهسوالف...حدش سوريا وايران

الجدة: ايي احسن من اروح بلاد الكفار...الي ما بيودونش الا النار يا الغبيه


زهرة: لا والله...وش قالوا ليش احنا بنروح نكفر اياهم...احنا الا بنروح سياحه وبنرجع...نستانش عن خاطرنا شويه

الجدة: بدال ما تسوحين على قولتش..روحي زوري الأئمة

زهرة: والله اكو كل سنه نروح نزور..الواحد عاد يبي يغير..حفظنا الاماكن من زود ما نروحهم

حجي مكي: شكلش يا زهرة ما تبين تسمعين السالفة الي تخصش

زهرة: أي سالفه؟؟

حجي مكي: باجر بنوديكم تطلعون ليكم الكجه

زهرة: الله الله بهالسرعه...مشكور ابووي الله يخليك

الجدة: وهذا ويش الجكجك

حجي مكي: هههههه الكجه اماه الكجه..هادي حق يدربون سياقة

الجدة: ومن ويش تخليها تسوق سيارة بعد..الدنيا ماليها امان..والبينه ما يصلح ليها تداور في الشوارع>>>صدق هالعجوز متخلفة...
حجي مكي: هي ما بتداور..هي بس بتدرب عشان تروح الجامعه..او تروح أي مكان تبي تروحه اذا انا مو موجود...والحين الكل محتاج الى الليسن يعني

زهرة: وش دراني عنها امك بعد.... الناس وصلوا القمر وهي للحين على هالمعتقدات

الجدة: ولو طبوا في النار نطب وراهم يعني!!

زهرة: اففف الحين هادي وش يفهمها

الأم فخرية: عمتي...السواقه مو حرام

الجدة: اني وش عليي منكم..انتون كله تبون تسوون الشي على كيفكم...عاد بعدين استانسوا لين رحتون النار
وقعدت الجدة تهدر بروحها..والكل ساكت عنها...وكل ما تشوفهم ساكتين تجيها حره وتزيد في هدرتها>>>اني اعرفها تبي زهرة ترد عليها عشان تتهاوش اياها...ما يبرد افادها


تحياتي

يوم ثاني الصبح


من الساعه 8 الصبح طلعوا الجماعه من بيوتهم رايحين المرور وأول ما دخلوا طبعاً شافوا طابور هنود....راحوا حجي صالح وحجي مكي صوب واحد من الموظفين واخدوا لهم استمارات عشان يملونها..وهم قاعدين يملون الاستمارات عل الطاوله وقف صوبهم هندي

زهرة: وووفف الله يغربلهم صنان من الصبح

زينب: ويلي دبحنا هالهندي خليه يتباعد عنه وش حاط ليه

زهرة: بياااا تباعد شوي مناك

حجي مكي: ويش ما خلصتون!!

زهرة: الحين بنخلص هالهندي بدحنا الله يغربله

حجي مكي: ما عليش منه الحين وخلصي الي عندش

وبعد ما خلصوا كل وحده اخدت لها رقم عشان ينطرون دورهم لفحص النظر...وكان دور زينب قبل زهرة

طلع رقم زينب..ودخلت تفحص نظرها...وبعد ما خلصت دخلت زهرة وراها
والحين بعد ما خلصوا ثنتينهم من الفحص راحوا اخدوا لهم ارقام مره ثانيه عشان ينطرون دورهم..ما بقى عليهم الا المهمة الاخيرة وهي ادفع واستلم الكجه
وهم قاعدين يحارسون دورهم.....

زهرة: ويع جان ما يطيح في حظي هالوهابي...او هداك الدبوب يقهر بعد..صدق ما عنده اسلوب ع الاقل هالضعيف الكشخه يبين عليه احسن واحد فيهم..ان شاء الله اصير عنده

زينب: هي هي انتين ان شاء الله اروح اقول الى اخوويي

زهرة: مالت عليش يا الهبله...اني ما قلت ابي اعرس عليه الحين

زينب: ان شاء الله يطلع ليش الوهابي واني يطلع ليي هالكشخه..عشان اضحك عليش

زهرة: مالت عليش زيييييييين

حجي صالح: يلاا شوفو هالرقم الي طلع مال أي وحده فيكم

زهرة: مااالييي..وينه طلع عند أي واحد!!

حجي صالح: اكو عند الي في الوسطه

زهرة تطالع: الااااي طلع عند الكشخه

حجي مكي: وش فيش زهرة استخفيتين!!

زهرة: هاا لالا يلا قوم ابويي ايايي

وراحو عنده يخلصون شغلهم....

زينب: افففف يلا له متى بيطلع رقميي

حجي صالح: صبري شوي له..اكو هذا ما ادري وش عنده قاعد بس ويلعب في تلفونه

زينب: ايي ويع ما ابي اصير عنده..ابي اصير عند الي طلع الى زهره

حجي صالح: هالادمي كلش ما بلعته انه هالدبدوب

زينب: ههههههههه جان ما يطلع ليي الوهابي

حجي صالح: ان طلع ليش بخليش بروحش تروحين ليه

زينب: هاا ابوويي اشوفك قمت تتبرى مني!!

حجي صالح: احد يتبرى من بته...يلا عاد لا هالوهابي ولا هالدبدوب متحركين..كل واحد يعلب عل كيفه لأنه من ربعهم دلين لكن لو الي يشتغلون هني من الفقاره المساكين جان حاسبوهم على اقل شي

زينب: أي والله...والله اني هالدبدوب قاهرني..ما اشوفه يشتغل من جينا وهو مجود تلفونه يا يلعب فيه او يتكلم فيه..شكله قاعد يغازل

حجي صالح: بس عيب عيب يا بتيي...هكو حجي مكي شكله بيخلص الحين...يمكن يصير حظش عنده بعد

وبعدين طلع رقمها عند الكشخه على قولتهم وراحوا عنده وخلصوا شغلهم...بعد ما خلصوا طلعوا من المرور وراحوا مدرسة التدريب عشان ياخدون موعد للمحاضرة..وكان موعد محاضرتهم بعد اسبوع وبالتحديد يصير يوم ثاني من موعد روحتهم للكلية....








وبعد يومين
في بيت حجي مكي


الجدة: وانتين يعني بتردين علينا الجواب هااا

زهرة: وانتين الحين وش حارنش....

الجدة: حرارة في جبدش...اني مو حارني شي ...بس كاسر خاطري هالمسكين الي يبيش وينتظر الجواب

الأم فخرية: أي صادقة عمتي صراحه..يلا اني بروح اتصل ليهم بقول ليهم باجر يجون البيت حق المقابله

زهرة تصارخ: لاااااااااااا

الجدة: بسم الله...حسبي الله عليش من بنيه...انتين منتين صاحيه !!!

زهرة: اماه جيفه اقعد اياه باجر وعقب يومين هو بيودينا الكليه

الأم فخرية: يا علييي....غربلتيني والله وش صار يعني بياكلش هو!!

زهرة: لا استحي اني

الجدة: فخروو اهووو قومي اتصلي ليهم...الناس يحارسوون وهادي بتش قاعده تتدلع..قومي قولي ليهم يجون باجر

زهرة: ما عليه قولوا ليهم يجون باجر لكن ماني طالعه من حجرتي وبقفل عليي الباب وبقعد فيها لين ما يطلعون

الأم فخرية: غربلش الله يا طايحة الحظ...بتفشليني قدام الأوادم..والله اني حسن مسكين ماادري وش شايف فيش...بيتغربل ابش هالفقير

زهرة: والله عاد لو ما يحبني جان ما جا خطبني..والي يبيني لازم يتجمل كل شي

الجدة: بس جب جب عن المصاخه...عبالش الرجال يبي ليه جدي...والله ولا يهمهم شي الرجال..ان شافش جدي على طول تسوين ليه بياخد عليش مره ثانيه ولا بيفتكر فيش

زهرة خايفة: هاا..صدق يعني!!

الأم فخرية: ايي عجل عبالش بيقعد يحاسب ليش

زهرة: عجل خلوهم يجون باجر

الجدة: أي الحين خفتين على روحش..اني ادري انش تبينه بس تتدلعين علينا

زهرة تبي تغير الموضوع: انزين وينه ابوويي!!

الأم فخرية: ابوش طالع



في بيت حجي صالح


تلفون البيت يرن....

زينب: اوهووو يعني مافي احد يرد على التلفون غيري...وراحت ترد

زينب: الووو

الأم فخرية: السلام عليكم

زينب: عليكم السلام يا هلا

الأم فخرية: شحوالش بتي؟؟

زينب: الحمد لله حياش الله..وانتين خالتي شحوالش؟؟

الأم فخرية: الحمد لله بخير..زينب وينه امش؟؟

زينب: لحظه بناديها ليش...وراحت تنادي امها

الأم مليحة: يا حيا الله فخوور

الأم فخرية: الله يحيش..وشحوالكم؟؟

الأم مليحة: الحمد لله كلنا زينين وانتين شحوالش وشحوال عمتش وحجي مكي وزهرة؟؟

الأم فخريه: الحمد لله كلهم بخير..انزين ام حسن

الأم مليحة: امري خيوو

الأم فخرية: ما يامر عليش عدو...بس بغيت اقوليش انه زهرة بتي موافقة مبدئيا بس عليكم تجون البيت عشان المقابلة

الأم مليحة: أي ان شاء الله باجر نجيكم

الأم فخرية: حياكم الله..يلا مع السلامة

الأم مليحة: الله يسلمش من الشر...وسكرت عنها

زينب: هاا امااه واخيرا وافقت زهروو

الأم مليحة: قولي اسمها عدل عااد..الحين يسمعش حسن يطيح فيش دست..اي باجر بنروح بيتهم عشان المقابله...الله يتمم عليهم على خير ونفرح فيهم ان شاء الله..ونفرح فيش يا بتي

زينب رفعت ايدها: ان شاااء الله

الأم مليحة: سود الله وجهش ولا تستحين

زينب: وش فيها يعني لين دعيت لروحي...

الأم مليحة: قومي قومي عني اهوو بروح اكمل شغلي

زينب: انزين امااه حسن وينه راح

الأم مليحة: ما ادري عفر طالع ويه رفيقه كريم

زينب: اهاا

وشوي الا حسن دخل الصاله وحامل اياه جاهل

زينب: الااااااااااي حلاوته يجنن..من يونه جايب هالجاهل الحليوو

حسن: أعوذ بالله ..روحي روحي تباعدي عنه لا تخوفينه بكشتش

زينب: مالت عليك روح ول مناك وعطني اياه

حسن: خليه ما يبيش..

زينب: جوف جوف اكو يبي يجي ليي

حسن: حسوون حبيبي..تبي تروح الى هادي البقرة!!

حسين يأشر على زينب: هاتي بكرة!!!

حسن يضحك: هههههههههه أي عرفت الحين البقرة!!

حسين يطالع زينب: بكرة بكرة

زينب: يا السبااااال حساانوو..ما عليك منه حسوون اني اسمي زينب وهذا الي حاملنك الثووور

حسن: بس جب جب...نسيت كريم بره كله منش...وخله حسين ويه زينب وراح الى كريم

زينب تبي تعرف حسين ولد من!: حسوون انته منهو البابا مالك؟؟

حسين: بابا كريم

زينب انصدمت"في خاطرها": كريم متزوج وعنده ولد بعد!!من متى!! بس حسن ولا مره قال انه كريم متزوج


في بعد تحت لاا تخافون
7
7
7
7