سوالف يدتي الله يرحمها......

بسم الله الرحمن الرحيم

السلام عليكم ورحمة الله وبركاته

بنبتدي من سالفتنا اللي راحت علشان نفك التشفير ههههه
>>>>>>>>>
يدتي:- زين يا ولدي با أوصيك على شي وأني في الحج تسوّيه
أنا:- تآمري أمر أماه

يدتي:- *)&^%$#$%^&*)&^%$#$%^&*<<<مشفّر للسالفه اليديده
أنا:- ان شاء الله
وفك التشفير هوووووه >>>
يدتي:- زين يا ولدي با أوصيك على شي وأني في الحج تسوّيه
أنا:- تآمري أمر أماه

يدتي:- شوف شيل اليي بسر مال خنيزي وخلّي أمك تسويه سلوق ووصيها لا تقول لأحد زين
أنا:- ان شاء الله
وبعد كم يوم راحت يدتي الحج ، ورحنا إحنا واليهال الى البحر ويانا حلوة اللبن بعد ما زرعت الينا دوخلات( سعنّات) ووقفنا وقامت حلوة اللبن تقول لينا النشيده وبعدين خلتنا نرميهم في البحر وكان فيه كم واحد هناك ووقفوا يطالعوا فينا وكنهم يشوفوا عجب وواحد منهم كان يبغى يصورنا ويا اليهال بس ما رضينا أبد
- تالي يشهّر بنا - هههههههه
ومضت أيام العيد وبدأ الحجاج بالعودة الى الديره شويه شويه
ورجعت يدتي ويا آخر دفعة من الحجاج
وسوينا ليها استقبال غير شكل واليهال يحارسوا الهدايا وإحنا نحارس صوغاتنا من عندها وخليناها ترتاح وفي يوم فاني من غبشه قعدت يدتي على عادتها ويت اليي وقعدتني من النوم

يدتي:- قوم ، أقعد قوم صلّ
أنا:- ان شاء الله أماه بعد شوي بس
يدتي:- بعد شوي لا ويش ، لا يلعب عليك الشيطان قوووووم
أنا:- ان شاء الله أماه
وقمت فزّيت من النوم واتمسحت وصلّيت وييت الى يدتي وقعدت وياها
يدتي:- صبحك الله بالخير
أنا:- صبحش الله بالخير والسرور وأحلى العطور
يدتي:- الله يقويك بالعافيه غناتي
أنا:- الله يسلمش أماه
يدتي :- هاه ويش قلت الى أمك اللي وصيتك عليه ولا نسيت
أنا:- أفا على غيرش أماه ، شويّه وأييبالش مشكاب متروش سلوق
وقمت وحطيت شوية سلوق في قدر وخليتهم يصخنوا شوي وتالي حطيتهم في مشكاب ويبتهم الى يدتي
يدتي :- الله ، تصدق يا ولدي اني في الحج حنيت الى السلوق وقلت ان شاء الله ما ينسى .....
أنا:- أفا على غيرش بس أفا، معقوله أم ........توصي على شي وأنساه
يدتي :- عشان كده أني وصيتك
أنا :- زين أماه با أسئلش عن السلوق شوي وكيفه يسووه
يدتي:- أيه يا ولدي هذا يا .....يا ولد....... اييبوا بسرة الخنيزي ، عاد يلموها لمام ويشوفوها ما هيه منقطه ولا فيها ولا تشونة تمره ويحطوها في قدر ويصبوا عليها الماي البيدر ويخلوها تغلي ....وتغلي ....وتغلي
لامن تلين البسره وبعدين يخلوها تبرد في مايها ولا يكتوه الماي ....لا تدري لا ويش ؟؟
أنا:- الله العالم أماه
يدتي:- عشان تشرب موها من الماي ولا يروح في البيبسور
أنا:- ايه عشان كده تطلع حليوه ومدلقمه ولذيذه
يدتي:- أيه بعد ويش وبعد با أقول لك ...ذكرتني بأيام لول
أنا:- ايه ويش صار في ذيك لأيام

يدتي:- هذا يا محفوظ السلامه في سنه من لسنين الناس صابهم قفر الله يبعده عنا وعن المؤمنين والمؤمنات أجمعين
أنا:- اللهم آمين يا رب العالمين
يدتي:- واللي يبغوا يعرسوا ما شافوا شي يسووه للناس غير السلوق
أنا:- زين أماه ، ولول يعني كل ناس يسووا ليهم في بيتهم ولا كيفه
يدتي:- لا ياولدي أني أذكر لحقت على زمان النسوان في لنخيل تيمع البسر والريال يطبخوه في قدور كبيره ويقسموه على لبيوت وكل ناس تييب ليهم وهم يطبخوه ويعطوه رعاة البيت ويخلوا ليهم شوي منّه

أنا:- يعني أماه يطبخوه في الشارع ولا وينه
يدتي :- يطبخوا يا ......يا ولد.......في ساحة .......اللي قبال .........
أنا:- ايه الله يرحم زمان أول

يدتي:- ايه يا ولدي لول الناس قلوبها على بعض وأياديها في أيادي بعض مو الحين مافيه الا تيميع في هالفلوس وأكل لا حساب ولا كتاب
أنا :- الله ييب الخير ان شاء الله وتصفى لنفوس
يدتي:- يا الله ياكريم يسمع منّك ربي ...اييب اله مطر ان شاء الله

أنا:- أيه أماه ، اليوم با أروح سوق الخميس تمبي شي من هناك
يدتي:- أمبى من عندك اذا ما عليك كلافه$%^&*)()*&^%^&*) >>بعد مشفر
أنا:- غاليه والطلب رخيص ، ما طلبتي شي أماه
يدتي:- الله يسلمك ويعافيك


وعندها سكتت يدتي عن الكلام المباح
يوم خلّص السلوق من المشكاب

خوش قصة اقصد سالفة يابو زين

طولت علينا وجيتنا بالسلوق خوش غنيمة

تدري كل ما مرينا على شقتكم اقول بنزل اخذ دفتره وبقراه كله

بس تالي اخاف اخلعك ....ها ها ها

يلا تعال المهرجان وصور خلونا انشوفكم

اتفقوا يا شباب والتقوا هناك عشان التعارف وفي مكان عام وايام حلوة كمان

والله يرحم والديك وجدتك ام السوالف الي اتجيب الراس

مشكور اخوي
معذره منك لاني ما انتبهت انك كملت الا ليوم
مشكور وماتقصر ورحم الله والديك
<<<<فرحت من لمن شافت السوالف مكلمة
ويالله ننتظر الجديد :) تقبل مروري

اقتباس:

---

المشاركة الأصلية كتبت بواسطة عفاف الهدى

خوش قصة اقصد سالفة يابو زين

---

اقتباس:

---

المشاركة الأصلية كتبت بواسطة عفاف الهدى

طولت علينا وجيتنا بالسلوق خوش غنيمة

تدري كل ما مرينا على شقتكم اقول بنزل اخذ دفتره وبقراه كله

بس تالي اخاف اخلعك ....ها ها ها

يلا تعال المهرجان وصور خلونا انشوفكم

اتفقوا يا شباب والتقوا هناك عشان التعارف وفي مكان عام وايام حلوة كمان

والله يرحم والديك وجدتك ام السوالف الي اتجيب الراس

---

خيتي عفاف الهدى حياش الله

معليش خيتي الظروف وما تسوي بعد
ان شاء الله ما نطول مره فانيه

وتراني أختلع على طول ههههههههه

ان شاء الله بنحضر المهرجان ويا الحجي زين العابدين
وأمه ان شاء الله
بكاميراتنا حق الاستيديو

والله يرحم والديش والمؤمنين والمؤمنات أجمعين

تحياتي

اقتباس:

---

المشاركة الأصلية كتبت بواسطة لحن الخلود

مشكور اخوي
معذره منك لاني ما انتبهت انك كملت الا ليوم
مشكور وماتقصر ورحم الله والديك
<<<<فرحت من لمن شافت السوالف مكلمة
ويالله ننتظر الجديد :) تقبل مروري

---

خيتي لحن الخلود مرحبتين

ولا يهمش خيتي ان شاء الله نواصل
وسوالف يديده حلوه بعد

وما فيه داعي للإعتذار خيتي

أنا لأني أتأخر في السوالف بسبب الظروف

تقبلي خالص تحياتي

يسلمو على السوالف الرائعه التي تعود بنا الى ايا زمان
يعطيك العافيه
وفي انتظار جديدك

بسم الله الرحمن الرحيم
اللهم صل على محمد وآل محمد الطيبين الطاهرين

بنبتدي من يوم وقفنا آخر مرّه مع فك التشفير

v

أنا:- أيه أماه ، اليوم با أروح سوق الخميس تمبي شي من هناك
يدتي:- أمبى من عندك اذا ما عليك كلافه ، قلادة ريحان
أنا:- غاليه والطلب رخيص ، ما طلبتي شي أماه
يدتي:- الله يسلمك ويعافيك
.....وطلعت رحت سوق الخميس وقعدت أفتر .....أفترّ
وبعدين أخذت قلادتين ريحان مشكوكين بالرازقي وأنا راجع مريت على سوق اللحم واشتريت لحم و.........
ورجعت البيت
أنا:- السلام عليكم
يدتي:- عليكم السلام والرحمه
أنا:- هاش أماه ، هذي قلادة ريحان تفضلي
يدتي:- الله ، محلى ريحتها ويا الرازقي اللي مشكوك فيها
أنا :- دقيقه أماه باروح لأمي أعطيها قلادتها بعد
ورحت الى حلوة اللبن وعلى طول حطيت لقلاده عليها
وعطينها اللي اشتريته (.........) ووصيتها تسويه الينا في المغرب ومن شمت قلادة الريحان
حلوة اللبن :- الله محلا ريحتها وياها الرازقي
وجاء صوت يدتي :- بت........ ويش رايش حليوه له
حلوة اللبن:- أيه الله يرحم ذاك الزمان
أنا:- ويش عودنا ذاكرتكم شويه ورى ، يالله تعالوا
با أسئلكم شوي
حلوة اللبن :- خلاص با أحط اللي يبته على القز وبا أيي
أنا:- يالله
يدتي:- شا ويش عنكم مغبيينه عني
أنا:- ما فيه شي أماه بس هيه تقول بتحط الغداء على القز
يدتي:- زين زين ويش تبغى تسأل عنّه
أنا:- كيفه تسووا القلايد حق الريحان والرازقي
يدتي:- هذا يا ......يا ولد....... نيمع ورق الريحان في حضوننا وناس تيمع الرازقي ونقعد تحت ذاك العريش وناس تصف الورق وناس بأبرها وهيه قاعده تشك في الورق وبين كل شوي وشوي يحطوا رازقي في القلاده وتالي يقايسوها على صدورهم ويشوفوا طول لقلاده ومن قلاده لقلاده لامن يخلصوا من الورق اللي عندهم كله
حلوة اللبن :- أماه ونسيتي قلايد الورد المحمدي
أنا:- الورد المحمدي بعد يسووا له قلايد
حلوة اللبن :- أيه يووا ليهم قلايد من الورد المحمدي ويحطوا فيه رازقي بس عاد الورد المحمدي لازم يسووه من الغبشة
يعني يروحوا النخيل من الفير وايمعوا الورد ويبتدوا يشكوا الورد ومن تطلع الشمس يودوه السوق وتعال شوف الناس
بالحجز وخاصةً اللي عندهم عرس ولا اللي يايبين ليهم ولد
ويسووا بعد طوق عشان البنات يحطوهم فوق راسهم وفي أياديهم
يدتي:- ونسيتي اللي يسووا خرز حق لولاد عشان لا يحسدوهم
حلوة اللبن :- الحين ما أحد يسوي حق اليهال
أنا:- لا الحين اييبوهم من سوريا ، واحد من الشباب اييبهم
يدتي:- ايه راحت ذيك الأيام
حلوة اللبن :- قوم شوف المطبخ وحط شوية ماي في الصفريه لا يحترق
وقمت وطليت على اللي في المطبخ وحطيت ماي زياده
وطلعت الريحه الحلوة حق #$%^&*)*&^%
وقلت للوالده :- أماه با أحط بهارات زياده
حلوة اللبن :- خله الحين بعدين أعدل بهاراته

وعندها دخل أخويي بالخبز العربي
وكملت الأكله

وسكتنا عن الكلام المباح
علشان نكمل أكلنا

سلام

يسلمو واحد فاضي
والله سالفتك اليوم ذكرتني بيام <<<<لاتفكروني كبيرة بس لاني احب اجرب كل شيء
بس لاني شفت امي تسويه بس ببدور الريحان ماجربت رازقي والشغلة حليوه
بس صراحة ابي اعرف شنو" حلوة اللبن" توي اسمع به
مشكور اخوي ويعطيك العافية والتشفير بخليني انقهر
والله يرحم المؤمنين والمؤمنات
وننتظر السالفة اليديدة

سوالف الريحان والقلايد حلوة واحنا اصغار لبسونا منهم

وسووهم لينا في البيت بعد

بس تالي جابوهم من السوق

بس وش هالطبخة الي مع الخبز لا يكون بيض عيون

ترى شهيتنا فيه

ورحم الله والديك وجدتك

اقتباس:

---

المشاركة الأصلية كتبت بواسطة لحن الخلود

يسلمو واحد فاضي
والله سالفتك اليوم ذكرتني بيام <<<<لاتفكروني كبيرة بس لاني احب اجرب كل شيء
بس لاني شفت امي تسويه بس ببدور الريحان ماجربت رازقي والشغلة حليوه
بس صراحة ابي اعرف شنو" حلوة اللبن" توي اسمع به
مشكور اخوي ويعطيك العافية والتشفير بخليني انقهر
والله يرحم المؤمنين والمؤمنات
وننتظر السالفة اليديدة

---

هلا بيش خيتي لحن الخلود ومرحبتين

الحين خيتي ما فيه أحد يسويه الااللي يبيعوه في السوق

وترى بالرازقي مررررره حليووووو

حلوة اللبن يعني === أمّي

التشفير هذا ببلاش .......ولازم منّه علشان تحلى السوالف :wink:

الله يرحم المؤمنين والمؤمنات أجمعين

تقبلي خالص التحيات

اقتباس:

---

المشاركة الأصلية كتبت بواسطة لحـ الوفاء ـن

يسلمو على السوالف الرائعه التي تعود بنا الى ايا زمان
يعطيك العافيه
وفي انتظار جديدك

---

خيتي لحن الوفاء مراحب

الله يسلمش ويعافيش

خالص التحايا

اقتباس:

---

المشاركة الأصلية كتبت بواسطة عفاف الهدى

سوالف الريحان والقلايد حلوة واحنا اصغار لبسونا منهم

---

اقتباس:

---

المشاركة الأصلية كتبت بواسطة عفاف الهدى

وسووهم لينا في البيت بعد

بس تالي جابوهم من السوق

بس وش هالطبخة الي مع الخبز لا يكون بيض عيون

ترى شهيتنا فيه

ورحم الله والديك وجدتك

---

حياش الله خيتي عفاف الهدى

قلايد الريحان لازم الحين كل ما بين اسبوع وفاني أروح السوق
وآخذ للوالده والمدام بعد

الطبخه هيه ............ولا خليها لبعدين هههههه

رحم الله والديش والمؤمنين والمؤمنات أجمعين

تقبلي خالص التحيات

متابعة من البداية
بصمت
الله يعطيك العافية ويرحم الجدة
بجد ذكرتني باحلى ايام

عموابو زين

حلوة السااااااالفة

وياريت اني لحقت على ايام قبل

احم احم
كح كح كح
ادري مغبرة ومن زمن جدي الله يرحمه ماجيت هنا ولا طليت
وكنت اتشوق الى سماع السوالف الزينه
بس تعبت وتعبت عيوني وانا اقرء فيهم ويالله خلصتهم وزين خلصتهم وهالنت عاقل
لانه صاير مجنون من اخذت اجازة ويقفل باليوم ويعطلني

عندي تعليقلاااااااااااااااااااااات واايد على المواضيع بس شنو ارز وشنو اشيل
بس انتيفان هذي عجبتني وحمستني من البدايه واشوى اني قريتها وراء بعض
كان ذاك الوقت لو قريت جزء ومع غيابي كان شنو يصبرني
كان اهرب من المذاكرة بحجه اقراها وانسى حالي بالمنتدى واوة ماخلصت الماده<<تتكلم عن ايام الاختبارات لان منها قطعت

اما عن نومك عجبتني صايرة انام 24 ساعه على 24 ساعه
شكلي بقول الى حلوة اللبن تسويها الي<<اقول ايش فيكم على حلوة اللبن
صايرة اسمعها بكثرة
لان حتى اخوي يسمي امي كذا حتى احنا صرنا مانسميها الا كذا

اماعن السلوق شكلي بسويها
لان صديقتي بتروح تحج وبسوي لها وبخشه الى زين تجي ومن تجي بروح عندها
عشان السلوق وعشان هديتي بشوفتها

تسلم ابو زين على هيك سوالف حلوة
والله يعطيك الف عافيه
ويوفقك في شغلك لانه متعب حييل انا اقصد الرق لان اخوي يشتغل هناك ومايجي الا هلكان
والله يرحك جدتك وجداتنا
موفق