غربة الأوطــــــــــــــــــان...

مرحبا
تسلمو والله يعطيكم الف عافيه على التواصل و التعليقات الحلوه.
مسامحه كنت دايخه شوي في البارت السابق لدرجه قلبت مراد مؤيد << متأثره بروايتي السابقة ضعنا ياصبرنا.. الظاهر صار لمخي عملية استرجاع بيانات .. :toung::embarrest:

و على العكس اصحاب التعليقات الطويله يعجبوني .
. اتمنى مايحرموني من هالحركه منهم..
والود ودي الكل زيهم..
الله يعلم شقد اتعب في كتابة كل بارت.. و تمام انكم تراعوني لو تأخرت
الله وكيلكم بارت اليوم قد ماقدرت كتبت ليكم.. من الساعه 4 العصر للحين توي بس مخلصه تلوين... :wacko:
فويش هالتعليقات الحلوه منكم والتخمينات.. تبرد قلبي .. واعتبرها احلى هديه .. :amuse:

وللي يسألوني متى بتخلص الروايه..
:wacko: مادري والله مادري حسب الأحداث و قدرتي والظروف..
ماعلينا...
هذا البارت الجديد اتمنى ليكم قضاء امتع الأوقات ... :shiny:

بعد العشاء الكل توجه للنوم... في غرفة السيد وحبيب وكاظم ..
السيد : ــ مالاحظتو شي عالعشا.؟
كاظم : ــ صادقوه ساكت ما علق على شي
السيد : ــ هههههه غربلك حاط دوبك ودوبه .. لا .. مراد ويوسف مالاحظتوهم؟
حبيب : ــ مو على بعضهم.. من رجعتهم من برى وخصوصا يوسف شكله صاير له شي..
السيد : ــ حتى مراد ما يضحك من نفس و لا يشاغب عوايده..
حبيب : ــ مايندرى ويش صاير بينهم ..
كاظم قايم من سريره.: ــ مافيه الا الخير ان شالله..

وراح يدور في مخابي بنطلونه المعلق ..
طلع باكيت دخانه و الولاعه وطلع عنهم..
حبيب : ــ نسى حظي ماشرب المرضعه قبل لا ينام..
السيد : ــ الله يهديه مادري متى بيبطل هالعاده ..
طلع كاظم لقى صادق في الصاله منسدح على الجلسه و يقرأ في كتاب..
كاظم في باله : ــ لو دوده لاعت شبدها .. الله يساعدك.. والمشكله كل الكتب اللي يقراها ماليها علاقه بدراسته.. مستر عبقرينو..
دخل الحمام وشغل الهوايه وقعد يدخن..

في غرفة يوسف ومراد.. شفيق كان تعبان مره.. بمجرد انه قعد عالسرير استسلم للنوم..
يوسف يتأمله و يتذكر قصته و المعاناه اللي عاشها ويحس بالحزن على حاله...
التفت لقى مراد غريبه ولأول مره منسدح بدون مايحط السماعات في اذونه..
هدووء..
الا مراد : ــ يوسف..
يوسف مايرد عليه ساكت ..
مراد : ــ ادري بك مو نايم.. بس حبيت اتأسف على الموقف اللي حطيتك فيه اليوم.. تصبح على خير..
يوسف ظل ساكت و ما رد عليه...


عبدالستار في غرفته حاط قدامه كيس فيه ابر جديده فاضيين من الصيدليه ... يتأملهم والأفكار تتزاحم في راسه..
ــ هالأشياء تقطع شكي باليقين.. ليش هالأبر..؟؟ وليش خاشنهم فوق الكبت.. ما يستخدموها الا مرضى السكري وللمستشفيات .. والمدمنين.. يافتحي بتذبحني.. مافيك انت لا سكري ولا غيره.. !!
عبدالستار حاط ايده على راسه ويضرب على خفيف يحس روحه ضايع .. وفتحي حتى وان واجهه متأكد انه راح ينكر..:
ــ مالي الا اسحبك زي الغنمه لمستشفى الأمل و اسوي لك تحاليل ولا هالعذاب..


في شقة نوري و الشله..
محسن : ــ اول مره في حياتي اشوف واحد يسوي رياضه قبل لا ينام
أيمن : ــ لا تنسم عضلاته لازم قبل النوم وبعد النوم..
نوري وهو حامل حديد اثقال في كفه اليمين..يرميها لكفه اليسار:
ــ بتسكتو لا اصك خد واحد واحد فيكم..
محسن : ــ بل .. وحشني مصطفوه ماصار له يومين غايب
نوري : ــ اي والله حلى الشقه فديته..وينهو شان يقعد على ظهري يعورني
ايمن : ــ اففف تزهقو.. .. اقوم انام احسن لي..
نوري : ــ أي والله احسن لك .. مو حاصل لك صطيف تتجاكر وياه..
محسن : ــ إلا وين هانيووه..؟؟
نوري : ــ في الغرفه نايم عفر
محسن طل عليه ورجع يضحك :
ــ منسدح يبربر في الجوال ..
نوري : ــ ايه اعظم من بنيه..
وقفو عند الباب يتصوخو ويش يقول ..
هاني وكان يحش مع اللي يكلمه في واحد بيخطب : ــ ههههههه ايه وتالي ... لا عاد ما اصدق ... عاد هالمجنون مادور يخطب الا بنت هالحسره ... يلعن يوم الحب ياشيخ... وبنت عمته يعني... هههههههههه .. هذا مهرها وهي بنت عمته.. حسباله بيسوي له تخفيض ....... اقول احسن حواجبي شوارع ان قدر ياخذها...... ويه ويبغى ابوها نص راتبها كل شهر.. ويلي اباموت........ هههههههه متأثر بطاش ماطاش.. مسكين شكله بينسحب ...... لا تقول عاد.,.. لا بالله هذا عيشة محقة قشره.. ....... الله لا يبلانا.... وويش الحين حدد متى عقده..... اهاا ما حللو..... خخخ بيشنق روحه ان طلع مافي توافق ....
انا داري..... ايه المهم خبرني التفاصيل بعدين.. ويش بعد صار مِنّيه مناك

محسن فيه ضحكه وكاتمنها ..
نوري يمسح على وجهه بقهر : ــ آآآخ هالمخلوق باشك في رجولته..

ماريا و اماني رجعو البيت ..ووداد وحسن مسوين ليهم استجواب على اللي صار..
حسن : ــ الحمدلله عالسلامه ... انا مافتحت جوالي الا مليون مكالمه من وداد خلعتني .. متأكدين قال بيرجع مايحتاج نروح له...!!؟؟
اماني بهدوء والحزن مبين فيها : ــ هذا قوله والله..
حسن : ــ كثر الله خيره هالعبد الأله رجال وقت الشده ما اخاف عليكم وهو جارنا
ماريا بأبتسامه : ــ ماقصر .. الله يحفظه
وفي بالها: ــ هالأخو يمدح في الكل ويسأل عن الكل الا اخوه..
وداد تطالع في ماريا على جنب : ــ يظل رجال غريب..
حسن : ــ لا انا صراحه ما اعتبره غريب منا وفينا حسبة اخونا.. من ايام المرحومين وهو كل في بيتنا يلعب ويا ماريا ويوسف واخته شهربان .. ما شفنا منه لا عيب ولا مذمه..
ماريا : ــ هههههه تذكر
وفي بالها: ــ يمه زين طراه حس فيني عفر احش فيه في مخي خخخخ
أماني بأبتسامه بارده : ــ مايضحكني شي… كثر شبقاته ويا اخوش يوسف لما يوسف ينقهر منه لويه يمسكش لو يمرجحش ويجي يشتكي عبدالأله عندي.. هالظريفين..
ماريا : ــ جهال ويش فهمنا..
وداد بقهر تضرب ضربات: ــ ايه الجهال تكبر و تكبر الذكريات..
ماريا تطالع وداد على جنب وفي بالها : ــ اووه بدت..
حسن : ــ اقوم انام انا بس .. وراي بكره قعده من الفجر
وداد : ــ اووووف اني مافيني نوووم...
حسن : ــ اسهري ويا خواتي..
ماريا : ــ تصبحووووون على خير وراي مدرسه..
وانسحبت غرفتها..
اماني : ــ بااقر .. باقر حليت واجبك قبل لا تنام..
وانحاشت ورى ماريا ..
وداد بقهر : ــ استرررر .. يعني اني الميته عالسهر وياكم.. رقيه وسبيكه.. مااالت بس
محمد طلع من غرفته : ــ امااااااه
وداد اختلعت ونقزت : ــ أُو صاقعه .. خلعتني ويش تبغى .. مانمت للحين؟؟
ــ قلتي لأبوي عن بكره..؟؟
ــ اوووه نسيت .. غربلك الله ما تذكرني لويه ؟؟
ـ كم مره اذكرش .. بكره الأستاذ مابيدخلني الا اذا جى ابوي..
ــ زين اذلف نام باقوم اقول له..

دخلت وداد لقت حسن منسدح وعلى وشك النوم... ولعت الليت:
ــ بكره مشرف المدرسه يبغاك
ــ أي مدرسه..؟؟ << ماهو في وعيه
ــ مدرسة فرات... اني داريه عنك أي مدرسه.. حمدوه ..
استوعب حسن الموضوع:
ــ تسخري حضرتش .. ويش يبغو...؟
ــ متشابق ويا باقروه و ....
قاطعها بقهر : ــ افففففففففف انا اقدر انام قبل لا يتعكر مزاجي .. هالمنتحس طايح الحظ ما يتعب من الشباق ويا هالفقير المسكين في البيت لاحقنه للمدرسه.. حسبي الله عليه مسود وجهي في كل محل..
ــ لا تسب فيه وباقروه هو اللي مبدي
ــ بذمتش ويش مسوي له ؟
ــ ها.. آآآ << ماقال ليها محمد
تداركت ربكتها:
ــ اهوووه… ولدي مايسوي شي .. ولد اختك متعيلف اكيد
حسن بسخريه: ــ ايه عصفور الجنه وملاك الأرض حمود .. حاشى عليه يسوي شي .. تشه يسوي شي دا!!!...القطوه تاكل عشاه..
ــ اسخر اسخر.. اني اول مره اشوف ابو يسخر على ولده بدل لا يدافع عنه..
ــ والله العدل عدل .. و اللي يمشي سيدا ما احد يتعيلف فيه..
ــ اسكت احسن لي..
ــ وباقر ويش ؟؟.. قالو بعد يبغو ولي امره؟
ــ ويش علي منه اني..
ــ و علّه ان شالله طفي الليت بس...<< وغطى وجهه بالبطانيه...
وداد بتهكم : ــ هذا اللي ماخذينه منك العلايل و السبايب ..




ام مجتبى صار ليها كم يوم هادئه وماتاخذ وتعطي من بعد سالفة بيع البقره مره مفتشله من ابو مجتبى…
وماليها وجه خصوصا بعد ما درت لما وصلت الفلوس لأبو رمزي انه متأسف كان متأمل تكون نور لولده.. و يخبرها ان ابو مجتبى اتصل عليه يخبره انها راح توصل له المبلغ لأنه مايقدر يقوم...
و علمها انه قال لأبو مجتبى عن السالفه و اذا ماعنده مانع دام سدد ديونه يجي ويتقدم ليها رسمي ... بس ابو مجتبى تحجج بدراسة نور بعدها صغيره وفي ثالث ثانوي وراها نسبه ودراسه جامعيه.. ومن هالرد فهم ابو رمزي انه مافيه امل...

حتى لما درت بسالفة مجتبى ولدها …
اماني اللي خبرتها مو هو... مقاطعنها بالمره...
فصارت بينها وبين نفسها تصيح و بنفس الوقت فرحانه انه ماصابه شي ..
حدها بس كل ليله تمرخ رجوله وتلفهم له.. ولا كلمه..

ابو مجتبى قاعد يتأملها وهي تمرخ ... شوي ماشافته
يضحك لحاله ..
ام مجتبى مرتابه منه ودها تساله على ويش الضحك بس لازالت ماليها عين..
ابو مجتبى يرد يضحك بينه وبين نفسه .. ويزفر من قلب :
ــ تذكري ؟؟
ام مجتبى بغت من الله يكلمها.. و بهدوء مرتبك : ــ ويشوو؟؟
ــ يوم انحاش منش ليلة العرس..
ام مجتبى ماقدرت صارت تضحك....:
ــ ايه لما سألك ابوي المرحوم لويه انحشت ويش سوت فيك.. فشلته عن حساب زين ماذبحوني.. الا حضرتك تقول "" >> وتقلد على ابو مجتبى وارتباكه ذيك الليله بطريقه مضحكه:
ــ ويش دراني ويش اسوي وياها يعني ....
ــ ههههههه اصقعش مابغيتي من الله اكلمش قلبتي علي مسخره..فعلا ويش دراني ابو 17 سنه ياهل ديك الحزه اجل الحين ابو 17 كنه ابو 25
ــ يعني اني الضبعه المفتهمه خلف الله علي ام 13 سنه ماعرف كوعي من بوعي...ويش خلاك تذكر؟
ــ مو لأني لما انحشت خبطت في كم ارض و كم محل و انا حافي لين تكسرت عصاقيلي تكسير وتالي مرختيني واول مره احد يمرخني ونفس حالتش الحين مرتبكه وساكته ولا حس
ام مجتبى تضرب ساق ابو مجتبى على خفيف وهي مستحيه : ــ استح عاد...
ابو مجتبى يضحك عليها : ــ ايييه.. رحم الله ديك ايام.. كانت خاليه من الهموم و المشاكل ..
وبهمس : ــ لا تعودي تتصرفي من وراي في شي .. لا بيكون حسابش اعسر من هالشكل..
ام مجتبى وقلبها يصافق : ــ ان شالله .. حاشى علي اعودها..
ــ امرخي اجل عدل.. يللا...

على الماسنجر .. ريماس تسولف مع غاده.. مصادقتنها من فتره ... نور ماكانت عاجبتنها علاقة غاده بريماس .. وغالبا تتهاوش وياها وتشتكي عليها عند ماريا وشهربان.. بس ريماس كان ليها تأثير قوي على غاده.. خصوصا انها في عيد ميلادها شرت ليها لاب توب و بعدها بفتره سوت ليها ايميل وعلمتها عالماسنجر... فغاده معتبره ريماس الصديقه اللي عرفتها على العالم و وفرت ليها كل شي محرومه منه..
ريماس : ــ غدووشه.. باضيف ويانا احد مستعده...؟
غاده : ــ مين؟
ريماس : ــ صديقي.. :bleh:
غاده بأستغراب : ــ صديقش ؟؟؟
ريماس : ــ هههههههه على طول تصدقي .. صدق خبله اخوي..
غاده باستغراب اكثر : ــ اخوووش !! لويش تضيفيه يعني...
ريماس : ــ الصراحه ياغناتي.. من كثر ما اتكلم عنش و امدح فيش .. اخوي انجذب لش وحاب يتعرف عليش .. اني في البدايه مارضيت وقلت البنيه محترمه مابترضى بهالأشياء.. هههههه تخيلي ويش سوى..؟؟
ــ ويش؟
ــ عصب فيني يقول يعني انا اللي مو محترم.. خليني اتعرف عليها اكثر و انتين ويانا بالمحادثه ماباسوي فيها شي هو الا ماسنجر... :weird:
ــ ويش يبغى فيني؟
ــ ويش فيش اقول لش انعجب في شخصيتش .. صراحه تجبري الكل يحبش .. ماتدري يمكن الله يوفق و تصيري من نصيبه...:lol:
ــ ويش قاعده تقولي انتين ... ريماسوو لا تسخري وياي...
ــ والله ما اسخر .. اقول لش منعجب فيش .. لا تخافي اني باصير وياكم في المحادثه..

اضافت ريماس بدون سابق انذار الشخص اللي يازعم انه اخوها... وكان حاط نك نيمه اسم .. حسام..
حسام : مرحباا..:amuse:
ريماس : ــ هلاااا خيووو .. ارحبووو :clap:
غاده ساكته..
ريماس : ــ غادوو ما تسلمي على اخوي ..
حسام : ــ :amuse:

غاده بتوتر : ــ اهلين
حسام : ــ كيف الحال..
ريماس : ــ تمامووو .. غادوه ردي زين
غاده : ــ الحمدلله ..
حسام : ــ طبعا اختي قالت لش سبب حماسي اني اتعرف عليش .. ويشرفني هالشي ..
غاده : ــ مشكور..
شوي طفرت لغاده رسالة اضافه من حسام.. غاده غشيمه بهالسوالف ما تعرف كيف الأضافه وشلون من سوت ليها ريماس الأيميل اضافت روحها فيه وعطتها اياه.... سالت ريماس بنفس المحادثه اللي مع حسام حتى ماتعرف تفتح جديده تسألها فيها
ــ ويش دا اللي طفر لي مكتوب فيه حسام و آد ومدري ويش..
حسام يضحك بينه وبين روحه : ــ صدق غشيمه..
ريماس ماتت ضحك.. وتمالكت نفسها.. وردت عليها..
ريماس : ــ حطي اوكيه هذي على شان لا يطير من المحادثه << كذبت عليها..
غاده على نياتها وحطت اوكي..
حسام صار يدحن ضحك.. فتح محادثه مع ريماس وقال ليها:
ــ يصقعش ياعقربه.. من وين طايحه على هالغنمه..؟؟
ــ هههههههههه افا عليك بس.. اعجبك.. ماعليك هالغنمه بتعجبك بعد…
وشوي طلعت صورة حسام وكان حاط صورته الشخصيه...
لفتت نظر غاده وضغطت عليها.. وفتحتها بنافذه منفصله وصارت تتأمل وفي بالها:
ــ حليووو.. مايشبه ريماسو ابد...
الا ريماس تكلمها في المحادثه المشتركه:
ــ هااا شفتي اخوووي !! يشبهني؟؟؟ :cool:
غاده اختلعت وسكرت نافذة الصورة اللي انفتحت و المحادثه ..
ردت ضافتها ريماس: ــ ويش فيش طرتي ؟؟
غاده : ــ مادري ..
ريماس : ــ ماقلتي لي يشبهني؟؟؟؟
غاده : ــ لا...
ريماس : اني احلى منه صح ؟ :in_love:
غاده : ــ مادري..
حسام : ــ ههههههههههه مادري .,…يعني انا الأحلى.. :atkal:
ريماس : ــ نحيسين..
حسام : ــ :embarrest:
غاده : ــ لالا.. انتين الأحلى..
حسام : ــ كذابه .. الكذاب يروح النار ترى..:wink:
غاده ارتبكت..: ــ باقوم انام...
حسام : ــ بدري عالنومه...مستانسين...:amuse:
غاده قلبها يراقع : ــ بكره مدرسه مع السلامه..
ريماس ماترد ..
غاده : ــ ريماس باقوم...
حسام : ــ نامت شكلها ههههههههه الحين اطل عليها في غرفتها تلاقيها منسدحه عالكي بورد
ريماس :
غاده : ــ ههههههههه يللا تصبحي على خير نشوفش بكره
حسام : ــ تصبحي ..؟؟ نشوفش ؟؟؟ افا.. وانا طوفه..:blink:
غاده : ــ لا ما اقصد.. تصبحو على خير مع السلامه
وسكرت المحادثه والماسنجر بالسرعه..ما انتظرت حتى الرد..
وقلبها يصافق.. و تبتسم بأرتباك...

ريماس ظلت وياه عالماسنجر ..
حسام : ــ ويش جايبه لي .. بارده ابدا مافيه تفاعل.. لا تحلمي ولا حتى بـ 10 ريال :noworry:
ريماس : ــ ويش فيك انت.. لا يغرك ترى عليها جمال عجيب .. شوي شوي تتعود عليك و تالي تدعي لي ..:wink:
حسام : ــ ظنش تتعود؟؟ وتطاوعني بعدين في كل شي.. :huh:
ــ والله انت وشطارتك واتوقعك شاطر...
ــ اخ منش والله عقربه.. وقسم لو انش اختي صدق ذبحتش..
ــ شدعوه اني ميته اكون اختك.. الحمدلله ربي
ــ ها ها .. بدينا في الغلط.. :huh:
ــ انت اللي لا تغلط لا ما بتلاقي مني ولا حاجه..
ــ خلاااص يللا عاد.. تمسكينا من ايدنا اللي تعورنا.. عموما اذا لانت و كانت مثل ما قلتي ابشري باللي تبغيه.. :wink:
ــ اقل من 500 ريال للجلسه ما اقبل..
ــ بل ...:weird:
ــ على ضمانتي تراها مهي هينه.. قطعه جمال..باحاول اجيب لك صوره ليها .. واذا ماقدرت انت تشيطر واطلبها منها بعدين.. :wink:
ــ زين نشوف ...

مراد على منامه قاعد على الشات مابين السوالف وارسال رسائل الحب والغرام... الجوء هدووء والكل نايم .. الوقت قريب الفجر... شوي باب الغرفه يطق .. مراد طفر مختلع...
مو عوايده احد يطق عليهم الباب كذا .. حبيب بالعاده اذا مر يطق طقه ويدخل على طول والكل كذلك .. بس هالمره الطق عنيف ويخوف ..
و الغريب في السالفه ان شفيق ويوسف ماحركو ساكن ولا كأنهم يسمعوه !!
سكر مراد الاب توب وقام وهو يحس روحه شبه خايف .. وبهدوء وقف عند الباب :
ــ مين ؟!
ما احد يرد عليه.. ويرجع وهو واقف قريب منه يطق طق مخيف ومو طبيعي..
مراد خلاص يحس قلبه انشلع.. تماسك نفسه وفتح الباب.. وكله امل يكون حبيب اللي وراه:
ــ حبيبوووو مالي خلق مزحك..
ولا يشوف قدامه الا رجال شكله غريب ويخوف وحامل قطوه سودا.. نفس القطوه اللي كل يشوفها في منامه.. ... فتح مراد عيونه:
ــ مين انت..؟؟ وويش جايبنك شقتنا هالحزه ؟؟ وكيف دخلت..؟؟؟ لايكون حرامي ...!! اول مره اشوف حرامي يطقالباب ؟؟؟
الرجال : ــ شدخلك مين انا.. ابغى ادخل الحين .. دخلني..
مراد بأرتباك : ــ ادخلك؟؟
الرجال بأستياء مستنكر : ــ كذا علموك اهلك كيف تستقبل ضيوفك !!
مراد دخله وقلبه يراقع .. قعد الرجال على منام مراد..
توجه لجهة اللمبات بيشغلهم.. مسك الرجال سرواله وبهدوء:
ــ لا تشغل اللمبات..
مراد بلع ريقه وفي باله: ــ ويش دراه اني باشغلهم.. جايز امر طبيعي مابنقعد بالظلمه..
غير مراد مساره.. وتوجه ليوسف بيقعده.. الرجال رجع مسك سروال مراد:
ــ اششش .. انا جاينك انت لا تزعجهم…
مراد حس بخوف ماحسه من قبل : ــ خير ؟
ــ اول شي جيب لي كاس ماي … ماعليك امر لو سمحت .. انا جاي من مسافه بعيده..

مراد راح المطبخ يجيب له ماي وهو يرتجف .. ولا رجع له الا يشوفه فاتح لاب توبه ويتصفح فيه…
مراد مد عليه كاس الماي وبأيده الثانيه سكر الاب توب:
ــ لو سمحت مو شغلك تتطفل على اغراض الناس..
ابتسم الرجال ابتسامه مريبه.. وبعد ماشرب الماي..:
ــ مراد.. قوم وجهز روحك..
مراد خلاص حس روحه بلا روح… يعرف اسمه !! ويجهز روحه !!؟؟
مراد والكلام يطلع من فمه متقطع :
ــ نعم.. ويش بغيت؟؟؟
ماشاف الا الرجال يصرخ فيه صرخه.. زلزلت كيانه في حياته ماسمع مثل هالصرخه..
التفت مراد وعيونه شابحه خوف ورعب ليوسف وشفيق اللي كانو غاطين في نوم عميق معقوله مايسمعو اللي اسمعه؟؟ مايشوفو اللي اشوفه ؟؟؟

مراد والروح شوي وتطلع : ــ وين بتاخذني وين بنروح ؟؟
ــ قوم الحين انت ولا عليك .. في الطريق باعلمك..
قام مراد يبدل ثيابه .. بلا وعي .. يلبس القميص يبغى يزرره مو عارف اللي فوق تحت واللي تحت فوق .. انتبه للرجال تقرب منه ..
وصار يزرر له قميصه و ابتسامه بارده على شفته…

الرجال : ــ يللا وراي..
مراد وبخطوات متثاقله..

ويطلعو من الشقه.. شوي بلا شعور وصلو لمحل مهجور… واااسع… وفيه جبل رملي ( طعس ) رفيع بالمره..
صار الرجال يركب الطعس بسهوله.. ومراد وراه.. رجوله كل شوي تغرز وخايف من الرجال اللي يتلفت له كل شوي وبنظرات مريبه تجبر مراد يسرع في خطواته..

مراد كلما تقرب من قمة الطعس يحس بحراره تلهب رجوله مع انه لابس جوتي والوقت اول الفجر مافيه شمس !!

وصلو للقمه .. الا الرجال ينادي مراد وبصوت يهتز له البدن:
ــ تعااال.. تعال وشوف ..
ولا يشوف مراد في الجهه الثانيه من الطعس تحت الا منظر مخيف في حياته ماشافه…
ظلااام حالك ونار تسعر وترتفع لهيبها لفوووق السماء .. شكل النار مخيفه بالمره..
وشوي يسمع اصوات,,. وبينهم صوت مو غريب عليه
التفت يمين. يدور مصدر الصوت... لقى ناس في فرح وسرور .. وعلى الطعس بعيد عنه بمسافات بس كان يشوفه..
سيد هادي و كان ينادي :
ــ سَلّم وصل عليهم تسلم..
والناس في ذاك الأتجاه تصرخ :
ــ اللــــــــــــــــــــهم صل على محمــــــــــــــــــد وآل محمد…

مراد يبغى يروح للسيد بس يحس رجوله يابسه وملصقتنه مكانه غير الرجال اللي كان واقف جنبه وساد عليه الطريق … والنار قدامه ترتفع و تنزل ..
شوي يسمع صريخ مخيف من نوع آخر. صريخ يصم الأذان ويرعب النفس... التفت يسار النار …
لقى ناس وايد رجال و حريم وكلهم عرايا وكأنهم غرقانين في بحر يتماجو والصراخ يصرخ ..
الرجال يهمس لمراد : ــ انزل ..
مراد وقلبه منشلع : ــ ويش؟؟
الرجال بلهجه اكثر حزم و أمر : ــ اقول لك انزل ويا هالناس
مراد بخوف ودموعه بدت تسيل : ــ لويش .. ويش عرفني بهم.. ويش سويت حق اروح وياهم ؟؟!!
الرجاال بصرخه : ــ اقول لك انزل ولا تناقشني ..
صار مراد يتوسل له .. طاح بين رجوله يترجاه.. يرجعه الشقه..
بس الرجال هيهات يسمعه..
رمى الرجال على مراد القطوه السودا اللي مسكت فيه وصارت تشمخ ومن خوفه طاح
ويا الناس اللي تلقوه بين اياديهم وهم يصرخو صريخ تقشعر منه الأبدان..

وكل واحد فيهم يرميه على الثاني .. لين قدر يفلت منهم ..
صار يركض مابينهم يبغى يشوف له مكان آمن .. يبغى يرجع الشقه..
ــ يووووسف .. حبييييب .. سيد هاااادي.. شفيق .. صادق .. كااااااظم.. وينكمممم….!!!

شوي التفت مراد لقى امه…
امه اللي خبره فيها من 13 سنه ما زارها ولا كلمها ولا سأل عن احوالها…
ركض ليها وهو ملهوف : ــ اماااااااه
مدت ايدها و دفعته طاح على الأرض صار يزحف ..
ــ اماه .. انا مراد.. ماعرفتيني ؟؟؟

المرأه : ــ كان عندي ولد اسمه مراد.... مانفعني بشي في داك الوقت.. الحين بينفعني ؟؟ مراد مات.. مات من زمان ..

مراد يترجاها بس هي ابدا ما تسمعه.. صارت تمشي بأتجاه اليمين من النار .. واختفت من قدام عيونه…
شوي يسمع مراد صريخ وصوت مألوف له..

يناديه : ــ ولدي يـــــــــــاولدي..

التفت لقى فوق هضبه قريبه من الناس العرايا ابوه مصلوب على جذع نخله .. و ثنين مخيفين طول بعرض و شكلهم يرعب النفس..و يضربو فيه بالحديد ضرب و هو يصيح .. ويناديه..

مراد : ــ يبااا .. ويش فيك…. اتركوو ابوووي …

صرخ فيه واحد من الأثنين : ــ تباعد مو شغلك.. التهي في حالك.. لا نحطك وياه…
الثاني يضرب في ابوه وهو يصرخ فيه:
ــ كم واحد ظلمت…؟؟
كم وحده عذبت …؟؟
كم مال سرقت …؟؟
كم فساد نشرت… ؟؟

وكل ما يعدد له ذنب يضربه بالحديد ضرب حامي..
وابو مراد يصرخ : ــ التوووبه خلااااص..

شوي الناس العرايا صارت تزيد و تتدافع مراد رجع وسطتهم و الحاله قايمه.. وفجأه هدأو كلهم و اعتلت صرخه..
ــ مراااد .. مين نبيــــــــــــــك…؟؟
مراد خاف وبصوت متقطع يحس في راسه الأجابه بس لسانه عاجز عن النطق يبغى يقول محمد بس مو قادر…
ولا يحس الا ضربه مثل المطرقه.. تجيه على راسه
طاح على ركبه وهو يصرخ من الألم.,.,.
اعتلت صرخة ثانيه : ــ مين امـــــــــااامك؟؟
مراد وهو مره ينافخ .. و ايضا في راسه الأجابه.. ولسانه معقود مربوط .. مو قادر يتكلم..
ــ ع.. ع..
و تعاجله ضربه ثانيه.. صرخ على اثرها صرخه هزت الأرض تحته…
دار راسه غاب عن الوعي شوي..
فجأه سمع مراد صوت … يصحيه… كان صوت حبيب يناديه…
ــ مراااد.. مراااد..

رفع مراد راسه.. لقى حبيب فووق قمة الطعس.. يطالع السما ومبتسم ويقول لمراد :
ــ ماشفت القمرين ..؟؟.. انا اشوفهم الحين خمسة اقمار..
و حولهم تسع نجمات تبرررق بشكل .. يــــــــــــــالله يجنن المنظر.. ؟؟

مراد يطالع السما مايشوف الا السنة النيران تلهب و تسعر ..
صار مراد يشيل رمل من الأرض ويكفخ وجهه وهو يصيح بصريخ…

شوي زلزال .. الأرض تهتز تحته.. وتتشقق .. الناس العرايا صارت تتفالت و تطيح في حفره انفتحت في الأرض وتمشي وتكبر في اتجاه مراد..
مراد من الخوف رجوله منشله و مرتعب مو قادر يقوم..
انفتحت الأرض تحت رجوله .. مراد بيطيح في الحفره .. ويصرخ صرخه:
ــ يووووسف
الا ايد تمسكه …

الصلاة خير من النوم …
اذان الفجر اذن… مراد مفتح عيونه فجأه وهو مرتعب .. متعرق وقلبه يصافق..
ويطالع في السقف .. يسمع صوت الأذان ومو مستوعب .. هو وين… وويش كان اللي يشوفه..
تنهد من قلب:
ــ حلم.. الحمدلله حلم..
حاول يقوم.. يحس جسمه كله متخدر.. وثقيل
شد على عمره وقام.. طلع من الغرفه لقى صادق نايم في الصاله راحت عليه نومه وكتابه على وجهه..
دخل الحمام صار يغسل وبين ماهو يغسل وجهه الزفرات تتابع بالقوه و يحس بأختناق..
شوي دموعه صارت تصب بلا شعور…
صار يطالع نفسه في المرايا… .... شكله مكفخ وعيونه حمرا مع انه اخذ كفايته من النوم..
ويون بصوت متقطع : ــ اماااه… اماااه..

ويتذكر كلام يوسف يتردد على مسامعه مثل الصدى..: ــ يوم عن يوم تطيح من عيوني اكثررر..
…..ما تصلي .. تطالع اشياء زفت . تسمع اغاني. والحين بعد ما يهمك احد بتقتلنا وبتقتل غيرنا .. سكتنا عنك واجد بس شكلك عديم احساس...

السيد قعد من النوم بيدخل الحمام لقاه مقفل .. توقع يوسف او شفيق بما ان صادق نايم بالصاله واستبعد يكون مراد …

فتحي توه راجع البيت..
عبدالستار بعد ما صلى الفجر .. انسدح بالصاله ينتظره.. ومن دخل وحالته حاله..
رفع عبدالستار ايده يلقي تحيه : ــ قوووهم << اختصار قواكم الله..
عبدالستار قعد عالكنب : ــ و الآخير وياك؟؟ لمتى وهذا حالك… تبغى ابلغ عنك ..
فتحي وهو يترنح : ــ ويش مسوي حق .. تبلغ عني…
ــ ويش مو مسوووي؟؟؟
ويرفع عبدالستار وحده من الأبر في ايده :
ــ هذي ويش؟؟
فتحي بسخريه : ــ هه.. انها حقنه..
عبدالستار : ــ تتمسخر ويا وجهك… ويش تسوي في غرفتك..؟؟
فتحي بأنكار : ــ غرفتي .. انا…
ــ لا اجل انا..
ــ مادري ههاااي تغير جو عفر
ــ انا اللي باغير احوالك .. تعال تعال..
فتحي يدف عبدالستار : ــ وخررر عني .. مفكر روحك وصي علي.. وموووو شغلك فيني .. جعلني انتحر احترق ما يخصك .. زين..
عبدالستار : ــ لا يخصني ونص ..
فتحي : ــ فااااررق زين لو فيك خير قدرت تحكم ابرارو … تركتك و خذت غيرك.. من عذر منت رجال ... فالح تتمرجل علي بس << ابرار اذا فاكرين طليقته الخاينه.. مع انه فتحي ماكان يدري بحقيقة خيانتها بس كلام يفلته وهو مو في وعيه..

عبدالستار الكلام جاه مثل الكهربه سرت في بدنه.. بلا وعي ضرب فتحي بقس
فتحي : ــ آآآآي… آآه
وطاح عالأرض غايب عن الوعي..
عبدالستار قعد عالكنب ومره معصب يحاول يتمالك نفسه..
وفي باله : ــ ابرار.. و ابرار.. ما عفس حياتي و قلب كياني الا هالأبرار .. يالله تصبرني…

وكالعاده حمل اخوه لغرفته ….

حبيب .. والسيد .. على باب الحمام.. بعد ما شيك على غرفة يوسف وعرف ان مراد اللي بالداخل..
صار يطق الباب..
السيد : ــ مراد.. مراد .. ويش فيك؟؟
مراد مايرد..
حبيب يطق الباب بالقوه:
ــ مراد.. تسمعنا… مراااد…
قعد صادق من الطق والهدره…وصار يراقبهم ويش يسوو
يوسف قعد ايضا وطلع ليهم..:
ــ ويش صاير
حبيب وهو يطق الباب:
ــ مراد من قال الله اكبر وهو بالحمام دي نص ساعه ماطلع…
السيد : ــ انا لله وانا اليه لراجعون.. مراااد رد علينا عالأقل خوفتنا…
يوسف راح وياهم وطق الباب: ــ مراد.. ويش فيك ؟؟ نكسر الباب؟؟
مراد فتح الباب…
حبيب : ــ آخ منك صار لينا ساعه ومن طق يوسف الباب فتحته
ماشافو الا مراد حاضن يوسف بالقوه وهو يرتجف بشكل مو طبيعي…
ــ أنا آسف.. آسف
يوسف منصرع منه.. صار يمسح على ظهره :
ــ خلاص انسى.. حصل خير
حبيب يحك راسه ويهمس للسيد.. :
ــ والله ملاحظتنا في محلها.. فيهم شي هالأفنين مهم خليين..
السيد : ــ عساه خير..
حبيب يأشر عالحمام : ــ تفضل سيدنا..
السيد : ــ لا حاشاي … تفضل انت قبل
حبيب : ــ لااا مايصير انت قاعد قبلي .. تفضل..
السيد : ــ انا ادري بك ما تتحمل ماعليه ادخل انت قبل
ماشافو الا صادق قايم:
ــ تتعازمو على حمام.. اقول تباعدو بس ..
ودخل..
السيد : ــ خخخ زين لك.. روح قعد كاظمو بس..
حبيب : ــ اف يبغى له الساعات حقات لول …اللي رنتهم تفقع الصماخ…

وراح حبيب لكاظم وعيونه منحرفه جهة غرفة يوسف .. تطالع يوسف ومراد اللي كانو ثنينهم على سرير يوسف قاعدين..
يوسف : ــ خلاص انسى ويش فيك ترتجف ..
مراد : ــ تعبان..
يوسف : ــ من ويش .. ويش يعورك..
ــ مادري..
يوسف خاف عليه مو عوايده يشوفه بهالحاله:
ــ اخزي بليس وصل على محمد.. قوم صلي واذكر ربك ومافيك الا العافيه ان شالله
وقام يوسف عنه بيروح الحمام…
توجه مراد للقبله.. وبدى يصلي ..
وفي السجده الأخيره.. ظل ساجد ودموعه تصب..

كل الشباب طلعو من الحمام وصلو في الصاله ,.. وخلصو والكل عود غرفته…
دخل يوسف وصادق الغرفه لقو شفيق متسند عالجدار بعد ما صلى ويتأمل في مراد اللي لازال ساجد..
صادق يهمس : ــ صلاة جعفر >> لأن منامه مسند عالجدار مقابل القبله.. جهة المكان اللي يصلي فيه مراد..
يوسف سمعه .. وصار يطالع فيه..
صادق سوى روحه ماقال شي سحب منامه من قدام مكان صلاة مراد وفرشه في اتجاه ثاني و انسدح..
يوسف يطالع في مراد وانتبه لعيونه مغمضه وتصب دموع..
ابتسم وفي باله:
ــ الله العالم ويش صاير فيك يامراد .. دوم يارب مو يوم..

في امريكا…
المغرب..
مارك وهو يكلم جوال في مكان بعيد..
ــ كنت اخطط لقتله منذ فتره ولكنني لم افلح...
انخش ستيف يسمع المكالمه…

الطرف الآخر بالمكالمه وكان اخو جويل , اسمه فريدريك… اختصاره يسموه فريد.., هالأخو راعي مشاكل وفساد ..
ويعرف اغلب عصابات امريكا من كل عصابه فرد عالأقل…
وفي عصابة جون .. يعرف جون شخصيا … ومارك بما انه كان القريب من جون و ساعده الأيمن.. قبل لا يجي سام..
فعلى طول كلم مارك… بعد ما كلمته اخته و عرف منها السالفه وان الشرطه مشتبهيين بجون وعصابته …
ــ لم اتوقع منكم ذلك ان تصلو بالنصب والأحتيال لأختي
مارك ارتبك خصوصا انه يدري ان جون مايهتم لا بصديق ولا غيره في مسائل النصب.. فظل ساكت..
فريد : ــ عموما .. انا اعلم أن جون ذاك .. شخص خائن و حقير.؟؟ من يكون ميشيل باراك منفذ العمليه.؟ اعطني اوصافه لأتأكد..

طبعا مارك والحقد الدفين على سام لأنه اخذ منصبه و جون صار يحبه اكثر من لما جابه توم..
خلوه على طول يقر ويعترف لفريد ويصرح له بمعلومات عن سام ….
مارك : ــ اسمه سام وهو عربي الأصل طويل و عريض المنكبين.. شعره يصل املس ويصل
قمحي اللون …
يقاطعه فريد: ــ كما وصفته اختي تماما…. تعجبني صراحتك.. حسنا ان فعلت ذلك بأحكام وبسرية تامه لك مني مليون دولار..
ــ واو مليون دولار.. انها صفقة جيده. لم احلم بها طول حياتي . اطمأن نهاية ذلك الفأر ستكون على يدي قريبا….
ــ تأكد ان يكون الأمر بسرية تامه.. والا فأنت تعرف فريد وماذا يمكن ان يفعل بك..
مارك : ــ لا تخف.. سأكون احرص من الحرص نفسه…

ستيف منخش .. بعد مالمحه صدفه في هالمكان…ومنذهل من اللي فهمه من هالمكالمه… وفي باله:
ــ إذن… كنت انت من ضربه بالسكين… !!

ستيف .. خايف لا يبلغ جون بالسالفه وتقوم المعركه خصوصا ان جون لازال يحب مارك .. فإن صدق جون كلام ستيف مابيرحم مارك .. وتعذيب جون الموت ارحم منه.. وفوق هذا راح يعذب سام.. و المصيبه العظمى ان جون يعرف فريدريك و متجاهل جون هالمعرفه في سبيل مصالحه…

و لأن قانون العصابه اي فرد موكل بعمل مهمه يجب ان تكون سريه مابينه وبين جون ولا يعلم اي احد من زملائه..
بس سام وثق في ستيف وكان يقول له ويش سوى مع جويل وستيف بدوره كان يسولف بعفويه قدام مارك.. فالويل ثم الويل ليهم ثلاثتهم ان درى جون بالأمر …

مسك جواله وهو خايف على سام.. بيدق عليه يحذره يخليه يهرب اي مكان…
جوال سام مقفل..
ستيف :
ــ ماذا علي ان افعل !!!

مراد قام من سجوده.. بعد اكثر من نصف ساعه.. وانسدح على منامه…
يوسف همس له:
ــ الله يتقبل
مراد بهدوء : ــ منا ومنك..

هدووء ويوسف يفكر بمراد وويش اللي صاير فيه فجأه .. معقوله من الموقف اللي صار بينهم لهالدرجه اثر فيه ؟؟
ويقطع عليه التفكير مراد بهدوء ..
ــ يوسف … ابغى اسمع شي من عندك…
يوسف استغرب من طلب مراد ومو فاهمنه عدل..:
ــ ويش ؟
ــ اي شي .. عزاء انشوده.. من الأشياء اللي تسمعها..

يوسف ماحب يسأله ويش صاير فيك.. وملاحظنه من البارحه ما حط السماعه في اذونه ..
فتح يوسف جواله وصار يقلب الصوتيات …
لقى انشودة رحلة الموت للمنشد محمود شاهين من فرقة الأسراء…. صار يفكر وفي باله:
.. ارسلها له لو ما ارسلها..
برسلها عل وعسى توصل له الرساله اللي ابغى افهمه وياها …
رسلها بلوتوث..
قبل مراد..
وصلت..
حط السماعات وشغلها…

بدت الأنشوده…
بهدوء.. بعذوبة محمود شاهين و احاسيسه العميقه..
بالكلمات المؤثره..
فصول حلمة مراد صارت تترائى قدام عيونه..
والدموع يصبها شلال…
الرجال والقطوه اللي حاملنها..
الطعس
النار
الناس العرايا
امه
ابوه
الصريخ
الأسئله
الأرض المنشقه
والأقمار … الأقمار.. وصل لنهايتها وفهم ويش هي الأقمار و النجوم…

ماخلصت الأنشوده.. الا مراد يزفر زفره من اعماقه وكأنها شهقه.. ويصيح من قلب….
يوسف هدوووء .. يسمعه بس مخلنه على راحته يفضفض …

مراد يزيد في الصياح بتكتم شديد يحاول ما احد يسمعه الا ان يوسف حاس فيه …
يوسف اعصابه مشدوده … وشوي انفاس مراد المتألمه تخفت..
وبصوت مليان ألم.. مراد :
……

الى الملتقى… الأنشودة لمن اراد سماعها ..
هنا..

ويش هالحلم اميررررررررررررروه يمه يصروع تصريع


بس بهالوصف وهيك كيف لو اشوفه واعيشه


ربي سترك من عذاب النار


يالله وطلع قاطع امه وابوه ويش سالفته شكله بلاوي


وريماسوه وحساموه ووجع يوجعهم بس تستاهل غاديوه هذي الي تقبل يكلمها رجال غريب مهما كان


ويوسفوه كملها وعطاه الانشوده ان شاء الله توبته قريب


فعلا من اروع البارتات متعوب كثيررر عليه ربي يساعدك ويسلم الايادي


يعطيك العافيه كل يوم حبكي مثله <سطار :cool:

شي ولا بالأحلام غاليتي اموره اهي صيحتيناا ياربي مرادعور قلبي ,,

::

تسلم الينا هلأنامل غاليتي

الله يعطيك مليون الف عافيه

اهم شي حطيتي اليناا هلأنشوده عن لانطلبهااا

::

موفقينـ

ياااربي على مراد وربي قلبي تقطع معاه
احس ان هدايته على يد يوسف .. واحس انه بصير موقف معاه ومع السيد هادي
الله يستر من الاحداث الجاية >_<
يسلموا قموره على البارت الجنإأآأآإأآإأآإأآأآن
با انتظار البقيه بفارغ الصبر
تحياتوو
نور البدور

اممم

هالبارت حسيته متعوب عليه واجد وخاصه المقطع الا يحلم فيه مراد
صراحه خفت لما فتح مراد الباب وشاف الاسود
تذكرت في هالمقطع مسلسل ربي إرجعون لما جا الاسود ( الشيطان ) لحسن ويراويه الحفره وهي تشتعل نار وحسن يتعذب بعفل عمله السئ وغيره >>> سكتي
واتوقع ان مراد عاش في بيئه فساد وحالتها حاله
والدليل ابوه وهو يتعذب وينضرب ..
وإن شاء الله الله يهديه قريب
واتوقع بعد هالحلم بيتغير مراد وبيرجع إنسان ثاني






ننتظر التكمله خيوه والله يسهل دربش ^___^

واااااااااو صحيح بارت متعوب عليه
يسلمو يسلمو يسلمو
تعليـــــــــــــق
مسكين مراد يعور القلب لكن يستاهل عشان يصلي
ويوسف عجبني يوم يرسلها ليه
وهانيووووه ههههههه مسخره كنه بنيه صحيح
وبعد هذي غادووه الخبله قهرتني
وبـــــــــــس
اموره في هالجزء ماسمعنا خبر عن سام واحمد ومجتبى ؟؟
بانتظارش من جديد
تحياتيـ ...

اميروووو وش هالحلم يخووف<<<وش دخلها..!!
وهذي خبله اللي تكلم حساموو نسيت اسمها<<مدآآش تنسيه
اموووووور باارت روعه بكل معنى الكلمه
في انتظار البقيه
لا تطولي علينا..

يعطيك ربي العـآفيه اموره

الله يهدي مرآد يآرب ~

أمور ويش ها الحلام بصراحة أثرت فيني واجد وشوي وعيني تدمع

الله يهدية مراد إن شاء الله

وريمسوا أول ماعرفتها بعدين تذكرت انها إلي باقت عباية شهربان

تحياتي أمورتنا يعطيك ربي العافية

ياحرآآآم مراد مسكين والله الحلم يخوف مرررره....
من جد صادقوووو مصفع وشوو هل اخلاق الي عنده....
اتوقع انووو ابو مراد وااحد نصاب ونحيس ومراد ما صار صايع الا لأنوو ابوه مااهتم به ...
يسلموو اميره بارت مآآآآآره جنآآآآن...

شردة أبو مجتبى ليلة عرسهم ذكرتني بمهندوووو ..~
وغاده خفت عليها عسى يارب تصحى لروحها قبل تنحرف أكثر ..~
والحلم اللي شافه مراد شي رهيييييييييييييب خيااااااالي خيالك واااسع خيتووو وأفاكرك مررره حلوه أرتعش كل جسمي وأنا أقرأها دخلت جوووو بقوووه .. بس أبوه أحسه هو سبب ضياعه وهو اللي خلاه ينحرف .. والله يهدي الجميع ويوفقك لكل خير ..~
بصراحه أحس هذا أحلى وأطول بارت ..~
هههههههههههه ياويلي هلكني صادقوه ماعنده فيهااا مايعرف يجامل كله أحسه واحد مكشر وكأنة مشتم شي خايس .. والله ياليت البارت الجاي تخلي مراد يصلي صلآة جعفر~>دخلت مزاجي الفكره ..ّ
ياعلي حراااام لايسوي فريدو شي في سام خله يروح لأهله ..~
وأبو بقور ماسولفتي عنه في هالبارت !!
ودا شسمه ودادووو زين سوو فيها وحسن عجبني بقوه أحسن مما يقوم علها ضد خواته ..~
ياربي هالبارت حبيته حبيته من قلبي ..~
أميره تقول تحب الردود الطويله~>راح تندم ع هالكلمه هع ..~
لاهنتي ياااارب أستخبلت ع البارت ..~
دمت بتميز ..~

بسم الله ..
بـــــــــــــــــل هداويش هالبارت << تقليد على محسن
صراحة .. بارت فيه حزن وضحك وصياح وسعادة ومتعة ورعب وحمااااااااااس
عاد ومن الحماس شغلت الأنشودة من صوت الشيعة قبل لا أكمل القراءة خخخخخ وبعدين انتبهت انش حطيتيها <<:toung:
عاد في البداية في سالفة حسام.. المقطع اللي بعده كان مراد قاعد عاللابتوب .. خفت من قمة راسي
لكن ان شاء الله مو هو ..يمكن فتحيوووه ..يتراوالي ابو مراد مطلق امه ومراد مايزورها وعايش عند ابوه وغرقانين بالحرام ..
كاظموه متى بيتخلص من هالحقد !!
اوووووووو اني قلت المفروض اخوها يساعدها لكن مو شديه << اقصد جويل
ننتظر قضية السيد وقضية كاظم وصادق وقضية عبد الستار وفتحي وقضايا امريكا وسام وقيصر واحمد وستيف على أحر من الفحم << اممممم مانسيت احد ؟؟
عطاش الله العافية وبارك جهودش ويوفقش ويسدد خطاش على كل خير..
والله هالبارت مرررة يجنن ..
وعندي اقتراح ..
ليش ما تجمعي الاجزاء وتحطيهم يوم الاربعاء << هجوووووووووم من المتابعين ههههه أمزح على فكرة
الى اللقاء..

يسلمووو اميره

صرآآحه بآآرت متعوووب عليه

صرآآحه الحلم يخووووف

<< ترىآ أني جبآآنه يعني مآآبآآنآآم الليله

*<

ننتظرش

اللهم صل وسلم على محمد وآل محمد وعجل فرجهم وفرجنا بهم ياكريم...

ياعلييي...تخوووف هالحلمة ....جسمي اقشعر بقوووة.....االله ينجينا وياكم من النار...

طلعت الأقمار اهل البيت سلام الله عليهم.....>>وحدة من ضمن التوقعات اللي حطتهم...

بس الحمد لله مراد الله هداه ان شاء الله........

أما هذي غادة شكلها ماتفهم لمثل هالحركات على نياتها... بس مو لهدرجة عااد

خوفي نياتها توصل للغباء وتحبه .......شكلها كذا وبتصدقه....والله ورسوله اعلم....

هي اصلاً بدون شي ماتفهم كيف تقبل تكلم رجال غريب.وش فيها ديي.......!!>شا بتسكت ...!

أما عبد الستار يكسر الخاطر....هم أخوه وهمه.....وهالفتحي المفروض اسمه غمضي مو فتحي....هذا مفتح هذا...!!!

ماشاء الله جنااااااان بقووة البارت شمل أحداث واااجد...وتغيرااات بعد....

مرررة حمااس وعشنا الأجواء وياه عددل..

تسلم الأيادي المبدعة يااااارب...

متباركة بالمولد مقدماً غناتي وايامك سعيدة يارب...

موفقة بحق الرضا صلوات الله وسلامه عليه..

دمتي بعين المولى الجليل

مشكورة على الجزء
ننتظر الجديد

متابعه بشغف
يسلموو أمووره
تحياتي

---> متابعه من خلف الكوووواليس ..

اميروو يالدبه ويش هالحلممم من امه بصرااااحه يخووووووف عددددددددددددددددل

ويلييي شكله بيتوب مراد الله يهديه يااارب ..

ريماسووو هاااي عقربه استغفر الله الله يحرقها --> معصبه ..

بس الي يتابعها يستاهل الي يصير فيه .. --> شريره خخخ

متشووووووقه اشوف البارت الي جاااي ..

بارت من جد متعووووب علييييييه ..

الله يعطيش الف ع ــــــآ‘فيه ياغناتي ..

ماقصرتي بارت ولا اروع ..

تقبلي م ــروري

الله يتوب علينـآ ..
أإميروه جزء روعه
بس مافيه شباقات ودادوه المنتحسسسسسسسه
أنا ماأدعي الا عليها بس مامن شيء ضدها اليوم سلمت من شراري هع هع
مادري وش بيصير لسام الله ينجي عمره .. < قلبت ضبعه
أن شالله يرجع مجتبى ويكفي هم مسكين باقر ..
ننظرتك

هااا اميره تأخرتي علينا
وهالبارت كان من اروع البارتات الله يعطيش العافيه
ننتظرش بأحر من جمر
تحيتي ..ْ~}

أميرة غناتي بتتأخري ؟

متى بيكون البارت الجديد تقريبا ؟

متابعة

يعطيش العافية

موفقة لكل خير

يلللللللللللللللللللللللا

وين البآآآآآت اموررر....؟
ننتظر...

ردددددددددد ياليل مااطولك :noworry:

قربنا على الااسبوع ومانزل الجديد

معذورة بزنس ويمن:embarrest:

<<معصبه وتدافع بنفس الوقت <<تخاف تكفخها بالمسن

بالانتظار على احر من الجمر

عاااااااااااااااااااااااااااااااااااجل


وصلني مسج من امور ووصتني ابلغكم فيه <<كأن قلبها حسها اني هددتها خخخ


امور تبلغكم سلامها وتعتذر منكم مابتقدر تكمل الروايه خلاص بتعتزل عن المنتدى


مدري ويش الاسباب ولاذكرتها بس حللوها وابروا ذمتها


مع السلامه :sad2:<<تصيح
































































ههههههههههه ريي لايقولها خخخ <بتنذبحي الحين قولي الحقيقه لا ينحفر قبرك :wacko:



خخخ امور تبلغكم سلامها وتعتذر لكم لان هاليومين عندها اختبارات دوريه
وتسليم اجابات برمجه
وتوعدكم الجزء اللي جاي
بيكون مثل اللي قبله


كان ودها هي اللي تشبك وتبلغكم بنفسها بس ان شبكت بيضيع وقتها ومابتقوم :huh:


وتسألكم الدعاء

لاتنسوها من دعواتكم

وعذرا على التخويف:embarrest:<<ايش عقبه طلعي برا هربي بسسسس

صلوات على محمد وآل محمد


علي علي علي طاح قلبيييي أمووول........أقول معقووول وش السبب..وش صاااير...!!!


هههههه الله يغربل ابليييسش....


والله يوفقها ويوفقك يااارب....ويسهل أموركم إن شاء الله....


يلا اهم شي دراستها ومستقبلها ..والبارت لاحقين عليه>مع انها بتموت تبغى تعرف وش بيصييير في الباارت الجاي .....!!


ربي يسهل أمورها بحق أهل البيت سلام الله عليهم...


موفقين ومقضية حوائجكم..

دمتم بعين المولى الجليل

اهي بغيت اصيح الله يغربل سوالفش اموله خبطتي قلبي بصراحه

::

وي الحمدلله ,, الله يوفقهاا يارب

موفقينـ

ياربي اموووووووووووول وربي قلبي طااااااااااح
بغيت امووت من الصدمة >_<

بس لا لاتخوفينا مرة ثانية وربي انصدمت
بغيت اصيح من الصدمة
معذوره امورة والله يوفقها يارب وبلغيها اموول سلامنا
وبا انتظار القادم بفارغ الصبر
تحياتوو
نور البدور

الله يوفقها يارب

وييييييييييييه املووووه خلعتيني
الله لا يقوله اا.. >>>> هدي هدي مابتطير اموره
عذرها مقبول وخليها تدرس زين اهم شي الدراسه
والروايه لاحقين عليها حتى لو نبغى البارت سريع
بانتظارها ..
تحياتيـ ..

علي يآآآ علي

أموولووه ويش هالخبر خلعتووني :weird:

انتين و فرووشووه :wacko:

):

الحمدلله إنه موو صحيح :rolleyes:

(:

الله يوفقهآآ ان شاء الله :amuse:


سلآآمي يوصلهآآ :embarrest: (:)

بففففههههاهاهاها
اشوى اني قريت الاعتراف قبل ما استوعب الخبر
يعني اني ما انصدمت لللا لللا << هذي فائدة الاستيعاب البطيئ خخخخ
مادام الجزء اللي بجي زي اللي راح
خلها تمهل قد ما تبى
ونسأل الله التوفيق لها ولنا

غربل الله شرك أموله طيحتي قلوبنا على مزحتك

الله يوفقها إن شاء الله بلغيها السلام

تحياتي

امورة غناتي ذاكري بسرعة وخلصي وتعالي نزلي لنا بارت جديد

كل تأخيرة فيها خيرة يا أميرة .. ننتظر قضية التضبيط اللي تكلم عنها مراد بفارغ الصبر << طلابة
*