ضعنا يا صبرنا...

سبحان الله كل ظالم له يوم

الله لايبلينا .. الله يعطيكـ العافية أختي

جزء مرة روعة عورت قلبي علا شكل مرت أبوهم بتأذيهم

موفقة أختي وننتظر الجديد ،،

امورة جزء روعه تسلمي عللطرح

مو قادرة ارد عليش ذكرتيني بشي بهللمرض الله يكفينا شره :closedeyes:

موفقين لكل خير

ماابغى حميد يموت باهالسهولة
ابغاه يلتقي ويا علي أول
ابغى اسمع نقاشه
تبريراته
كلامه
اشوف وش يقول له؟؟؟؟


وهذا أبو مالك رجع بعد هالعمر..ومتزوج
إنا لله...
لاوعلى شينه قواة عينه بعد..


روعة...مبدعة دائماً...
هي انتي غاليتي...
دمتي ودام الإبداع لكِ رفيقاً..
موفقة لكل خير إن شاء الله تعالى..
..دمتي بعين المولى الجليل..

مسكينه ام علي من شي لشي الله يعينها
وهالمحامي جعل صاعقه تنزل عليه وتدمرة طلع نذل وخبيث ومايستحي بعد باقهم وانحاش
وحميدوة التهاب كبدي جعله المحامي بس لايموت الحين خليه يتعذب
اتوقع مايموت الابعد مايعرف ابو مالك وجسوم يعرف سالفته وبياخذ حقوقه
وبيكلم علي وبتسامح منه واذا ماتغلب عليه الشيطان وهو وجسوم بيروحوا القسم وبيعترفوا
وبيتبرا علي
بس سين سؤال ليش امجد مدري حميد اذا عنده كل هالشهادات يعني يعرف ان اخوة ابو مالك ورجل اعمال
ليش ماحاول يرجع حقه او يحاول بدل البوق وتهم خلق الله بس ننتظر ونشوف شنو تجيب امور في حلقاتها الممتعه
ايه صح نسيت نقطه بالقصه قال انه مات وهو صغير يعني لو جاب وثائق ابو مالك ظالم
وقادر فبيطلع وثائق الوفاة<<كأنها قلبت الموضوع وعفست الدنيا وماخلت شي <<ماعليكم منها حابه تهربد مع نفسها شوي ولو كانت كتابه

عوافي عليك امور غناتي وموفقه

ياعلي ياعلي اميرة ويعلش السعادة وزيارة علي واولاده قولي امين <<< خوفتي البنية خخخخ :wink: حق واى بتموتي حميدوا:seif: عساه ماادري ويش لالاا خليه بس اشوي مثل مااقالت خيتو دمعة على السطور وياخذ حقه وحق ابو جاسم من ابو مالكوا >>>>>> ويش هالحقد على الرجال يستاهل لكن مصدق حاله هالعيوز وان شالله تطلع زوجتةخوش وحدة و تعوض علا حنان الام والصديقة لانها من سنهاااا

ومسكينه هالزينب لو انا منها ما طلعت وين شروف عنها<<<<مخرطش مااتطلعي :wink:
...جزءوااجد وااجد هلو خيتو تسلمى ايدك...
... تقبلي مروري على صفحتك وجاري الانتظار ...

هالجزء روووعة

انتظر البارت القادم على احر من اليمر

تحياتي

مشكورة غاليتي
روووووووووووووووووووعة يمكن الكلمة قليلة
تعجز حروفي عن التعبير
فلا يسعني إلا الدعاء لك بالتوفيق
ومبارك عليكم مولد الاطهار عليهم السلام
تحياتي: الجعفرية

بسم الله الرحمن الرحيم

اللهم صل على محمد وآل محمد

وعجل فرجهم

ما شاء الله

جزء أبداااااااااااااااع
:wink::rolleyes::wink:
تسلم الايادي أمووور

بالانتظار

سامحينا على التقصير بس هاليومين مشغولين:noworry:

بانتظار الجديد

موفقة حبيبتي..لكل خير إن شاء الله تعالى..
..دمتي بعين المولى الجليل..

يآآآآآآآآآي أجزاء روووعه تجنن
بس عفر ماتراكمت عليي واجد<<<هع بس عيوني راحت فيها
والله وناسه تتراكم عليي اجزاء هاع
تسلمين قلبي ع الاجزاء الكشووخيه
يعطيك ربي العافيه
تحياتو

مرحبا

والله احلى مشاعر احس فيها لما اقرى ردودكم وتعاليقكم
احسكم معاي تشاركوني اللحظه
و تقرو افكاري احيانات وايدات..
تسلمو لي والله من كل مكروه

ضحككككوووووووه بطيخووه هلا وغلا والله يتقبل غناتي .. << ماشبكت المسن اليوم كله ولا دريت بش ولا قالت لي ام الخونه كبرياؤوو.. :lol:
نورت ياحلاها الناصره برجعتش.. قرة عين حبايبش والسنه وكل سنه..:clap::wavetowel2:

.
.
.
مع الدنيا .. نظل نمشي..ولا ندري وش المكتوب..
شلون نترجى باكر .. وحنا متعلقين بماضينا..
نتقاسم همومنا ونتعب و نتسامر مَعْ حكي القلوب..
حكي.. يشتت الهوجاس و تتزايد به امانينا..

اليكم الجديد..

الحلقة العشرون..

جاسم يتأمل حميد... دموعه بدت تصب ... شوي صار ينحب..
مسك كف حميد وضغط عليها.. وصار يهمس بصوت مبحوح:
ــ يارب .. تقوم بالسلامه.. يارب تفرجها على ولد عمتي.. يارب ارحم حميد وادفع عنه البلا..

مالك رجع البيت.. حس في شي متغير...
استقبلته عمته:
ــ هلاااا.. هااا رجعت..
مالك يستظرف : ــ خخخخخ لا بعدني..
ــ عن الظرافه.. قرة عينك..
ابتسم مالك : ــ اوه اوه.. سلم الله عمررش .. انا قااايل البيت متغير فيه شي صاير.. وانتين بعد قرة عينش.. وينهو ابو الشباااب مانا شايفنه؟؟؟
ــ ههههههههههههه اما ابو الشباب .. ميه ميه.. نايم الحين..
ــ افا.. وين علا اجل؟؟
ــ في غرفتها اكي .. روح ليها وشوفها بس ..
ــ ليش ؟؟ ويش صاير؟؟
ــ بس تزاعلت ويا ابووك..
ــ بل .. توه وااصل .. على ويش تزاعلو؟؟
ــ روح ليها وهي تعلمك..
ــ خاااطري يوم تعطيني وجه هههههههههه مافي امل
سميره تداري ابتسامتها : ــ اهوو روح يللا عني..
ــ هههههههههه زين زين..

طق باب علا .. مره.. مرتين.. ثلاث..
ما ترد..
قرب بوزه من الباب..
ــ علا.. علووه.. افتحي .. جايب لش حاجه بتفرحش..
علا تمسح دموعها:
ــ ويش تبغى؟؟
ــ افتححححححي ما يصلح كذا..
ــ مالكوه .. تالي .. مالي خلق الحين..
ــ ياربي .. اقول لش شي بيفرررررحش افتحي لا اشلخ الباب..
ــ مافي شي يفرح بعد اللي سمعته..
ــ ويشو.. ويش سمعتي.؟؟؟. افتحي لا كف..

فتحت علا الباب.. دخل مالك لقاها حالتها حاله..

ــ ويش صاير..؟؟
بلا شعور ضمت علا اخوها وصارت تصيح...
مالك منصرع ويش فيها.. صار يهديها ..
ــ علا .. غناتي خوفتيني .. ويش فيه ابوي؟؟ وويش قايل لش؟؟
ــ تخيل.. عرس ..!!
مالك مندهش:
ــ هااا.. مين؟؟؟ ابووي؟؟
ــ ايه.. ووحده من جيلي اكبر مني بس بكم سنه..
ــ يالله ... صحيح عاد..
ــ والله .. وبجيبها تسكن ويانا..
ــ مستحييييييييل اقبل ..
ــ ويشو مستحيل.. نسيت انت كلها اسبوع بالكثير وبتروح استراليا.. وعمتي يمكن تروح وياك اسمعها تقول حق مشروعها اللي هناك مدري ويه... عاد كنها اذا ظلت باحس فيها..
ببقى اني و الهم.. مرته بقابلها..
مالك صار يهدي في اخته:
ــ ريحي بالش .. وكان علي أأجل انا هالكورس للسنه الجايه لاحق..
ــ لااااا ويش تأجل .. خلصه بس وافتك.. تتعطل على حسابي..
وتمسح علا دموعها وتبتسم..
ــ هااا ما قلت لي ويش الخبر اللي يفرح؟؟
ــ اووه.. ههههههههه نسيتيني بدموعش يقطع شرش وبهالخبر اللي يسد النفس.. خمنننني ويشوو؟؟
ــ ويشوو مافيني مخ والله
ــ ههههههههههه اما مافيش .. صدقتي.. قوطي..
ــ ههههههههههه مالكووه عن اللعانه..
ــ مكينة بيت ابو علي ...
علا ابتسمت حد ماعدنها وصفقت :
ــ اصطلحت خلاااص
ــ هههههههههههههه اييه..
ــ هييييييه.. ما شالله بالسرعه.. شقد متشوقه افرح هالبيت بأي شي اقدر عليه..

مالك يغمز ليها..
ــ اتصلي يللا .. ومشينا نوديها ليهم...

واتصلت علا لليلى وخبرتها...
ليلى فرحت وراحت لأهلها تبغى تطلعهم من جو الكآبه اللي هم فيه..
ــ اماااه المكينه استوت وبتجيبها علا بعد شوي..
ابو جاسم مستغرب:
ــ المكينه.. ليش وديتوها مصلح؟؟
زينب : ــ لا .. صديقة ليلى اخوها يعرف يصلح وصلحها وبيجيبوها..
ابو جاسم : ــ خير ان شالله..

ربع ساعه بالكثير وصلو مالك وعلا بيت ابو علي.. بنفس الوقت ابو جاسم و زينب قايمين بيرجعو البيت ..
ابو جاسم بيفتح الباب الا في وجهه علا ..
علا شهقت من الخلعه..
تنحت علا على جنب .. طلع ابو جاسم :
ــ يالله .. يالله..
زينب طلعت .. وسلمت على علا ...
مالك نزل من السياره بيطلع المكينه.. سلم على ابو جاسم...
مالك ابتسم : ــ كني شايفنك من قبل ؟؟
ابو جاسم عرفه وبدون شعور حس قلبه تغلي فيه نيران.. حاول يداري اللي فيه.. ابتسم ابتسامه صفرا : ــ عفر شفتني ... في مزرعة ابو ناصر
ــ اييييييه صح صح.. تذكرت..
ابو جاسم : ــ ويش عندك هنا؟؟
مالك مستغرب من سؤال ابو جاسم .. طلع المكينه من السياره:
ــ جايب دي..
ابو جاسم : ــ اهااا يعني انت اللي ماخذنها تصلحهااا
مالك ابتسم : ــ ايه..
وفي باله: ــ يازعم انا خخخخ..
ابو جاسم راح له:
ــ جيبها عنك جيبها..
مالك : ــ خلها عنك حجي ثقييله..
ــ جييييبها بس قال ثقيله قال.. شغل في هالأراضي لين قلنا بس ما استثقلنا شي ..
واخذها ابو جاسم.. ومالك مستغرب منه ..
ابو جاسم يكلم زينب.. : ــ افتحي الباب
ودخلها وهو يتحمق بهداوه ..
ــ مو قاصرنا الا انت ندخلك بيوتنا..
علا سمعته.. وهزت بدنها الجمله..

وتجرأت و سألت زينب: ــ ويش فيه ابوش علينا؟
زينب انحرجت : ــ هاا.. مادري .. هههه.. هو كل كذا ترى متحمق ..
علا طنشت الموضوع فرحانه بالمكينه وتبغى تفرح ام علي ..
مالك : ــ بتمشي .. لو بتدخلي؟؟ وانتظرش لو ويش؟؟
علا : ــ انتظرني بدخل دقيقه باسلم وبرجع..
ــ زين..
دخلت علا .... وظلت زينب واقفه برى.. الباب تسكر دخلة علا ... ومالك واقف فاتح باب السياره ومتكي عليه..
زينب مهي منتبهه لعمرها وتفكر في كلام ابوها لا يكون حز في نفس علا لو تقول لليلى الحين لو شي.... << مسكينه كل مفهيه هالبنيه..
مالك يطالع في البيوت وسرحان..

ابو جاسم يزحف زحيف بالمكينه .. يمشي وهو مفوشح رجوله.. ويصرخ وصوته مضغوط:
ــ خيييييه.. بطلي باب دارش ..بطليييه..
ام علي قامت تركض .. فتحت باب غرفة الخياطه..
حطها ابو جاسم .. وهو ينزلها .. طق ظهره:
ــ آآآآه ...آآه آآه ويلي ..
مسكه بيده وصار يدلك فيه:
ــ غربله الله غربال من ظهر اغبر..
ام علي خافت عليه: ــ ويش فيك ياخوي.. سلامتك.. حق ويه شايلنها عاااد .. ثقيله..
ابو جاسم بقهر يعض شفايفه من الألم:
ــ لا اجل اخلي ولد الذين يدخلها..
ــ أي ولد لذين؟؟
ــ ولد خالدو آل ..
ام علي حست على اخوها وعاذرتنه مو قادر ينسى الماضي:
ــ ياخوي ما يتجارمو بذنوب ابوهم.. والله ماشفنا من هالعلا واخوها الا كل خير...
ابو جاسم : ــ خير.. ايه .. عساه خير.. يللا مع السلامه..
ــ الله يسلمك..

تابع>>

علا ويا ريما وليلى في غرفتهم..
ليلى : ــ تسلمي والله مو عارفين شلون نرد ليكم جمايلكم..
علا : ــ حشا.. شدعوه لا تقولي كذا .. لا ازعل ترى..
ريما : ــ والله ما قصرتي ويانا .. خوش وقفه وقفتيها..
علا : ــ تستاهلو كل خير ...

ابو جاسم مفكر بته دخلت..وقف في الصاله ونادى.
ــ زينب .. زييييينب..
طلعت ريما من الغرفه :
ــ مهي هنا.. طلعت..
ــ يعني.. اجل اشوفكم على خير ,, و لا تفكرو وتحاتو .. تنحل ان شالله وتتدبر .. ريح بالك ابو علي .. وان شالله خير..
ابو علي :
ــ اييييييه .. الله كريم .. يسمع منك ان شالله..

ابو جاسم يحاول يفتح باب الحديد .. صاير ثقيل عليه من ظهره مره مأثر...
ويسحبه حد ما عنده .. وطرااخ يصفق الجدار..
وتتصروع زينب وتشهق شهقه..
ومالك ينتبه من سرحانه ويطفر.. وبلا شعوور يدخل السياره ويسكر الباب عليه

ابو جاسم باله بال ظهره ومفكر زينب سبقته للبيت .. مايدري بها واقفه برى ومفهيه..
من شافهم ثنينهم اختلعو من صوت الباب وطلعته.. ومن شاف مالك اندعس في السياره..
ــ اححححااااااااا .. ويش تسووي كنتي وياه.؟؟؟.
زينب منصرعه: ــ هااااا.. منهووو
ــ هاللي اندعس تشنه فار خاف على عمره..
مالك ما يسمعه مشغل المسجل ومسكر النوافذ .. يشوفه بس يشبر و يهدر ولا يدري به ويش يقوول..
زينب : ــ وووو اني ويش درااني .. ما سوينا شي .. بيني وبينه عشرة امتاار..
ــ هااا.. لا يكون تعيلف فيش لو قال شي ..
زينب ترفع سبابة يمينها لين خشمها .
ــ وقسسم بالله حتى نفسه ما سمعته..
ابو جاسم يعدل غترته..
ــ ايه.. حسبالي.. امشي قدامي.. خبله.. ماتعرفي تدخلي يعني..
زينب تمشي وهي تتعثر من الخوف..
ابو جاسم يمسكها :
ــ اررررفعي عباتش خبابوووه..
زينب تمسكها شوي .. وتحاول تضبط عمرها..
وهم يمشو ما سمعت الا ابوها وراها:
ــ اوووو.. افففففففففف..
دارت له الا ماسك ظهره ورافع راسه فوق..
مسكته : ــ يباا ويش فيك..
ــ اهو اهو.. بس ظهري تقرطع شوي.. الحين ان شالله اشوف جاسموه يمرخه لي .. ويعتدل..
ــ امسكك؟؟
ــ امسكي عمرش بس لا تطيحي علينا بهالطريق.. وارفعي عباتش شوي خميتي الطرقات صايره جرفليه..
ــ يااعلي .. ويشوو ارفعها..
ــ اجل تخمي الطرقات.. ؟؟
زينب بخوف : ــ ماا علي دلاغ.. << شراب ..
ابو جاسم : ــ اهاااااا.. قووولي كدا من الصبح.. وحق ويش بالله ماعليش .؟؟ ويش مطلعنش وضاااربه لي مشواااار لين الزراعه ومن الزرااعه لبيت عمتش وانتين كذا..
زينب ترجع ترفع سبابتها لخشمها:
ــ والله والله عباتي طويله ولا رفعتها ولا حتى سانتي واحد.. دنت تشوفها مغبره وحالتها عدم.. لأني طلعت بسرعه ومالي باله .. ما انتبهت..
ــ اييه.. لا تعوديها هالحركه نوبه فانيه لا اكسر كراعينش ... وويش سالفتش كل دقيقه رفعتي لي هالصبع ..
زينب جتها ضحكه: ــ كراعيني .. تشيه خروفه.. هههههههه خخخخخخ
ــ شب .. فضحتينا.. امشييييي .. لا بارك الله في بليس.. يللااا
زينب متصروعه :: ــ هه.. زين زين..

ام علي تركب الواير في الكهرب..
تجربها بالصلاة على محمد وآل محمد..
اشتغلت..
ام علي حطت ايدها على راسها وصارت تضحك وتحمد الله وتشكره.. وتدعي لعلا ومالك بطولة العمر والصحه...
ليلى فرحانه.. وريما تصفق وترقص ..
ابو علي برى الصاله من سمع صوت المكينه تشقق من الفرح..

وعلا الدنيا مهي سايعتنها وهي تشوف فرحتهم .. ولا هي عارفه شلون تشاركهم هالفرحه.. بس واقفه ومبتسمه ..
علا : ــ يللا الحمدلله .. اصطلحت وصارت زينه.. الحين باخليكم اخوي واقف برى من زمان..
ام علي : ــ قعدي ويانا يابتي .. مو بس جايه تجيبي المكينه.. ريحي وبعدين خله يرجع لش..
علا : ــ لا مره ثانيه خالتي .. ابوي رجع من السفر وباروح البيت ما شفناه من زمان..
ــ يعني .. قرة عينش غناتي..
علا مهي عارفه ويش يردو على هالجمله !!
ريما واقفه جنبها .. صارت تغششها:
ــ سلم الله عمرش ..
علا تلونت من الخجل .. ايتسمت :
ــ سلم الله عمرش..
ريما : ــ خخخخخخخخخ.. ويلي .. احم..
علا تطلع في ريما على جنب وتهدد فيها .. صبري علي ..

وطلعت علا ..
من طلعت علا .. ام علي فرغت كل العواطف اللي بداخلها.. صارت تصيح.. صياحها هالمره بأبتسامه.. فطر قلب بناتها عليها.. وهي تدعي ..:
ــ ياربي يا حبيبي .. زي ما رجعت رزق هالبنيات ترجع سندهم واخوهم.. ترجع ضناي ياااارب .. سالم معافى ..عاجل غير آجل..

جوال ابو مالك يرن..
ــ هلا حياتي..
سوسن : ــ هلا عمري .. وينك؟؟ ويش فيك ماترد علي من متى واني ادق ..
ابو مالك يتثاوب : ــ كنت نايم.. ها اخبارش ويش مسويه؟؟
ــ نوم العافيه يااارب.. زهقت.. ما صار لي كم ساعه.. اشتقت لك..
ابو مالك مصدق روحه ..
ــ الله.. اشتقتي لي.. انا بعد اشتقت.. خلاص الليله ما انام قبل لا اجيبش..
ــ صج.. انتظرك اجل ..

ابو مالك طلع من غرفته الا علا راكبه بعباتها توها راجعه..
ابومالك: ــ من وين راجعه؟؟
علا : ــ بيت صديقتي...
ــ وانتين كذا تطلعي على طول ؟؟
علا استغربت من ابوها : ــ مالك موصلني وعمتي سميره تدري ..
ــ ايه حسبالي تطلعي كذا وبس .. لا حسيب ولا رقيب ..
علا وجهها تغيرت الوانه .: ــ لا ما اطلع وبس .. مالك يوصلني كل مكان ابغاه وعمتي تدري..
ومشت عن ابوها بتروح غرفتها..
ابو مالك : ــ الليله استعدو ترحبو بخالتكم سوسن باجيبها..

تابع>>

علا وقفت وهي مختلعه ودارت لأبوها:
ــ انت ما قلت اليوووم قلت كم ييوم وبتجيبها !!
ابو مالك : ــ أأأصصصصص.. انا اللي احدد متى اجيبها و في أي وقت..
علا عيونها غرقت دموع..
دخلت غرفتها وقفلت على روحها الباب..
الا بركبة مالك ..
ــ هلاااا يبااا.. قووه .. الحمدلله عالسلامه...
ويحب راس ابوه..
ــ الله يسلمك.. هاا.. سمعت الكلام اللي قلته من شوي لو لا
مالك مختلع وفي باله:
ــ بل ما قال ويش احوالك ولا ويش مسوي على طول سمعت لو لا..ما كأنه ما شافني من سنتين
مالك : ــ ها.. ايه.. سمعت..
ــ وويش بعد عندك اعتراض زي اختك..
مالك بأبتسامه عريضه..
ــ لا .. اعتراض ويه.. لا اعتراض على حكمك يارب..
ــ تستظرف ..؟؟!!
ــ لا تشيه ويش قلت..؟؟
ــ زين.. عقّل اختك بس .. وقول ليها لا تتصرف أي تصرف مو لصالحها الليله.. وخلكم خوش ولاد ..
مالك بأبتسامه مصطنعه:
ــ ان شاااالله يبا..

وراح غرفته وهو في باله مخطط يطلع الليله ولا يرجع الا الفجر..
وفي الليل ...
ناديه في بيت اهلها..
ــ امااه والله البنيه ملتزمه وادميه وحليووه خووش بنيه ما تتعوض..
ام مؤيد : ــ ويش اسوووي في اخووش ها.. شبدي فوحت من كثر الحنه عليه.. مو راااااااااضي .. والله مناي الله يهديه.. لا سند ولا ولد.. قاعد لي وشايل الهم في القلب..

ناديه: ــ افففففف منه زهقت كل مره يطلع حجه في اللي اختارهم له واذا ما لقى حجه يقول مابغى ومو مهيأ انا للزواج حاليا و ماهي من مستواي الفكري ومادري ويه.. من كلماته الجهنميه ..
ساره تضحك : ــ هههههههههههه استااذ عربي بعد ويه .. فديته..
ناديه : ــ اف وهذا اللي ماخذينه منش انتين الضحك بس ..
ــ ووويش تبغيني اسوي ..!!
ــ حاولي فيه وياي .. اقنعيه... هو يحبش و يدلع فيش يمكن يسمع منش..
ساره بسخريه : ــ انا لله .. ههههههههههههه تبغاني احن عليه ويكرهني تالي..
ــ ويش قصدش هاا .. ويش قصدش .. يعني يكرهني ..

شوي الا بجية جود وهي تصيح : ــ آآآآآآآآآآآآه..
ساره : ــ وي على قلبي العسل قلبوو.. من مين... اكيد يا منتظروه يا كراروه..
جود وهي تصيح : ــ مادري أي واحد فيهم شوفي ..
ومدت ذراعها وفيه شمخ طول بعرض..
ساره تمسحه ليها بنشاف.. ــ توتوتو ..بسم الله عليش .. ناديوه قومي لولادش الخوبال .. كفايه ما تفرق بينهم هالفقيره,,, خوبلوها .. الا بعد كل جيه ليهم ينتفو ليها من لحمها شوي..

ناديه : ــ اوهوو.. عساش تجيبي زيهم يااارب
ساره : ــ وي وي بسم الله علي لا .. مابغى توائم .. الخاصيه التوأميه مهي لآل ... ...,,, هالخاصيه لآل..... <<< تقصد بيت رجل ناديه...
ناديه : ــ ههههههههههههههه بتجيبي ياعيني .. << قالتها وهي تحرك حواجبها..
ساره فهمت عليها : ــ انا لله.. ندري .. ملتزم .. واخلاق .. ويدورو له على عرووس.. ناديوه بجيش طرااااااق .. قلت لش لا تحَرْجي علي ..
وقامت جود من حضن خالتها ساره ورجعت تلعب ويا ولاد خالتها ناديه..

ناديه..: ــ ياعلي جزاتي اللي ابغى الخير لش ولأخووش..
ساره تلعب في خصلات شعرها:
ــ والله تشني البخت .. شحلاوتي قمر .. ورزقي مو لحميش ...
ــ استحي هااا.. استحي..
ام مؤيد : ــ وبتي الصادقه.. وعمتش نيتها تنوع .. ما تبغى من بيت واحد .. فلا تحرجي على بتي..
ناديه بعتب : ــ حتى انتين اماااه...
الا برجعة جود تصيح...
ساره : ــ والآآآآآآآآآآآخييرررررر ويا ولادش
ناديه تصرخ حد ما عندهاا..
ــ منتظرررررررررررررررررووووووووووه.. كررررررررااااااارووووووه وخناااااااااقه..
ام مؤيد تحط ايدها على راسها:
ــ علي علي .. ارتجت طيفان بيوت الفريق الغربي ..
ساره صارت تدحن من الضحك..
ناديه: ــ بلاكم ما تحسو فيني ..
ام مؤيد : ــ وعلى قلبي.. الله يعينش ويساعدش .. يكبرو وتنسي..
ساره تبحلس : ــ خخخخ ماحد قال لش جيبيهم..
ناديه تشيل قوطية النشاف وتصفق بها ساره:
ــ ذلفي بس.. ياعساااش 7 في بطن..
ــ ويلييييي بسم الله علي ,, ههههههههههههه عساااش انتين في الجايه..
ام مؤيد تمسح شعرها : ــ لمسنا الصووف والشر عن بتي مصرووف بالصلاة على محمد وآل محمد.. لوييه.. تبغي تدبحيها انتين.. هي فنين ومهي قادره ومتغربلين وياها بهم .. مو 7 بعد..

شوي الا بجية مؤيد.. وناديه طالعه للحوش بتجيب ولادها عن الصفقه والبرد..
من شافها قال : ــ هلاااااا.. هلاااااااا بالخطااابه
ناديه حمقت: ــ اهووووو..
ــ هههههههههههههههههههههه انا داري .. لازم كل جيه لش سالفه .. اتحداش الحين خَلِيّه وما عندش شي..
ــ لا تتحدى ولا تتحدى .. تعال اسحب وياي واحد منهم..
ــ من هم.؟؟
ــ مين بعد.. ولادي ...
مؤيد يسخر : ــ كرار اسحب لو منتظر.؟.؟؟
ناديه بقهر : ــ اللي هو .. حظك نصيبك .. شدعوه تفرق بينهم انت
ــ هههههههههههههههه ياعلي .. تجنني ندووشه وانتين محمقه...
ناديه تبتسم وتداري ابتسامتها بعصبيه: ــ اهووو...

في صندقة حميد..
جاسم ينبش في الأوراق .. عل وعسى يشوف شي غريب وله قيمه.. لو خيط يوصله لهالأسرار اللي بحياة حميد..
الا بطيحة الذيب عليه..
ــ جاسموه.. ويش تسوي؟؟؟

والى الملتقى..

يؤؤؤؤؤؤؤؤؤؤؤؤؤؤؤؤؤؤؤؤؤ

يؤؤؤؤؤؤؤؤؤؤؤؤؤؤؤؤؤ

وش بيصيرررررررر ..؟؟

هااااااااه << شهقه ..

ان شآلله ألحين أقوم لك هااا << مرره بتقولي لي اووف

بتذبحي جاسمو بعدددددددددددددد ..؟؟؟؟؟؟؟؟؟؟

أميرووه بذببحك ..

ماانااا وش بيصير في حميد ما قلتي << خايفه عليه هااااع

جززززء رهيب بس دوخني سالفه ناديه وسآره يبغى لي أقرآآ مرره ثآنيه ..

أييييييييييي كأن بعض الناس اللي يقروآ ويآآي فهمووني هااااع ..

<< مضيعه

بآنتظآر الجززء الجديد ..

قهررني أبو ماالك داااااااا النحيسسسسسسس

وابو جاسمو بعد شرير ..

ووووو بس

تشكراااات ..

ننتظر بشوووق لا يحتمل المتابعه خلف الكواليس هع هع هع


تحياتي

كبري ـآء

أموورتي هلا والله هلا حيااش
منوره النآصره بأهلها غنآتو
سلم الله عمرش غناتي وان شاء الله السنه الجايه نروح وتروحي ويانا :bigsmile:
...
..
.
أما جزء فله مع زنبووه المفهيه وأبوها النكته
مو طبيعيين يضحكو بالقووووه
تسلمين حيآتو ع الجزء
ننتظر الجديد
تحياتونا

جميل أختي أميرة

عجبني الجزء مررررة

الله يعطيكـ العافية أختي

وعساكـ ع القوة ....

يؤؤؤؤؤؤ

ويش بيصير ؟؟؟؟؟

الله يصبرني ليوم السبت

هلللووو

:amazed:اميره شنو هد الكلم شنو هدى الجزء فــــــــــــله :cheesy:


اميره امتى تكمله:seif:بفقع راسش :seif:

:in_love:امزح معش :in_love:

الله يعطيكِ العافيه

جـــــــــــــــــــــاري الانتطار

تحياتي

روعة

الجزء مرة روعة

بس مسكينة علا ما تستاهل اللي يصير معاها

الجزء ممتاز جداً..
صدقيني ماادري ويش أقول كل مرة حاجة أقول يمكن توفي تعبش في هالقصة..
الله يقويك يارب.
ويوفقك الكريم..
بحق محمد وآله الطاهرين..


بانتظار السبت..
أو يمكن الغد..
إن شاء الله..

موفقة لكل خير إن شاء الله تعالى..
..دمتي بعين المولى الجليل..

كأني من زمان مااقرأ في القصة..
ما كأن بس اليوم...
جاري انتظار الغد...
موفقة غاليتي..
..دمتي بعين المولى الجليل..

شكلها مافي جزء الا السبت
<رايح جاي كل اشوي يدور جزء جديد ضايع:weird:
قلت مابرد الا بعد ماقرأ جزئين بس الظاهر لازم بعد كل جزء
شكر وعرفان:cool:
يعطيك العافية خيتي
ومانبي نكلف عليك زيادة
خليك على راحتك
ويامطول صبرنا> ضعنا ياصبرنا:wink:
تمنياتي لك بالتوفي
والف الف مبروك على الـ20%:blink1:
ادري لقافية مني كل مرة ادقق خخخ

يلا باقوم انام:sleep: وبكرى انشاء الله خير > يقولون الشياب الصباح رباح

اسمحو ليي على الهدرة الزايدة بس هذي آثار النعس :sleep:
دمتم بود

مرحبا

تسلمو لي والله من كل مكروه لا خلا ولا عدم..

كبريااؤوو.. تشتغلي جزار على غفله؟؟ بتذبحيني .:weird:. ياساتر.. سني سكاكينش عدل بس.:wink:. ورفقا بي ,, هههههههههه والله يخلي بعض الناس اللي يفهمو عدل ويفهموش .. :icon30:
ضحووكه.. يؤ يؤ السنه الجايه وياش خوش .. الله يتقبل اجل من الحين :nuts:<< كف .. هههههههه :toung:تسلمي لي والله
روعة الدنيا هههههههههه بحط على راسي صفريه تجنبا للفلعه اللي بتصيبني منش .:silal:. نورتي حبابه :bigsmile:
دمعه عالسطور دوم هالحماس حبابه تسلمي على هالتفاعل الأكثر من رائع..:in_love: يعطيش الف عافيه
اسوار ,,شبل ,, جوان.. لا تحرموني هالنور..يعطيكم الف عافيه جميعا على التواصل والتواجد الجميل ..:clap:
الناري .. هههههههههههههه :deh:غربل الله شرك.. خوش هلوسه ماقبل النوم.. تسلم من كل شر من ذوقك.
وما شالله عليك وعلى ملاحظاتك.. لا لقافه ولا شي .:rolleyes:. سبحان الله كنك من انتبهت هذيك المره.. وزاد التحميل في احلامي :embarrest:

اليكم الجديد..

الحلقة 21

في صندقة حميد..
جاسم ينبش في الأوراق .. عل وعسى يشوف شي غريب وله قيمه.. لو خيط يوصله لهالأسرار اللي بحياة حميد..
الا بطيحة الذيب عليه..
ــ جاسموه.. ويش تسوي؟؟؟

جاسم تصروع :
ــ بسم الله الرحمن.. ادور ورق لحميد ضروري
ــ ورق ويه؟؟
ــ مريض هو في المستشفى .. ورق لتحاليل له من زمان..
ــ اهااا.. ما يشوف شر .. من متى مريض؟؟
ــ الشر ما يجيك... من فتره هو تعبان والحين ترقد.... خير تبغى منه شي ؟؟ اقول لك أي مستشفى وتروح له؟؟
ــ لاا.. بس خبرك حصلنا لينا طلعه جديده .. و هالمره مزرعه في الـ..... ,, ما مره طبينا هالديره.. وهالمره ناويين نشوف رزقنا فيها..هاا.. بتروح ويانا لو ما تمشي الا بحميد؟؟
جاسم صار يفكر...
ــ لا .. بروح وياكم..
ــ اووووكيه .. الليله امرك هنا.. و نروح لبقايا الشله..

وطلع الذيب..
جاسم قلبه يصافق .. وفي باله مليون الف فكر..
تعب من التدوير كلها اوراق دراسه وكلها من مدارس عراقيه.. وكلهم بأسم امجد..
اخيرا لقى جواز سفر .. فتحه وصار يقلب اوراقه.. الا صورة قديمه لحميد وايضا بأسم امجد..
واختام البلدان اللي سافر ليها..
مافي الا العراق..!!
والجواز قديم.. من لما كان تقريبا عمر حميد 17 سنه بالكثير ,, ومنتهيه مدته..

جاسم يحس قلبه يطق.. وهو يكشف هالحقائق.. وزادت التعقيدات في راسه.. ماهو فاهم ليش امجد صار حميد.. وليش عايش في هالصندقه دام هو ولد خالد آل ...
اخذ الجواز وطلع..


على باب بيت مؤيد..
ام عادل : ــ متأكد هذا هو البيت..اني شاكه مو اللي جنبه. تغير وايد كأنه,,. اني مازرتها الا مره وحده اني الله لا يعود ذاك يوم ما اطيق ذكراه..
عادل : ــ ايييييييه متأكد... حققق ويييه ما تطييقي ذككررراه...؟؟
ــ اهووو عني..

و تطق الجرس..
فتح ليها مؤيد.. من شاف عادل ابتسم له:
ــ هلاااا.. هلااا بعادل..
عادل شق البوز شبرين:
ــ تذذذذككككككرررني !!
ــ ههههههههههههه مامداني انساك غربل الله شرك كلها كم يوم من شفتك..
ــ هاااادي امممي جت تبغغغى تشششوووف امممك..
مؤيد : ــ هلا خيه.. تفضلي حياش..
مؤيد دخل البيت ونادى :
ــ يـــــــالله دخلو داخل .. رجال بيدخل...
دخلهم المجلس وراح ينادي على امه..

ام عادل قلبها يطق.. وترجع بها الذكريات..
ــ اني تعبت من حياتي .. لا ابو ولا ام ولا اهل ما عندي الا انتون وخوالي وصايرين تتعازمو علي كل اسبوع عند واحد وكل واحد يعاملني شكل واحد زي الشغاله وواحد ما شغلته الا يأذي في ولدي ويسخر ويآمر عليه... وواحد اولاده لاعبين بنا كنا حياوين.. ليش ماتحسو فينا.. محنا اوادم حنا..
خالها : ــ بسس.. لا بارك الله فيش ..
ام عادل تصيح : ــ اني ويش ذنبي اتجارم بجرم اهلي.. اذا امي وابوي خذو بعض غصبن عن اهاليهم .. اصير اني الضحيه..
ــ امش حطت روسنا بالطين لما هربت وياه هاللي ما يتسمى.. على ويش يعني .. غني .. ؟؟ اهله من درو به بياخذ امش قومو الدنيا وطربقوها فوق راسه.. كفايه ابوه تبرى منه لما انحاش وياها.. أي حب واي بطيخ.. شوفي حوبتنا طلعت في ولدش..الله العالم بعد حملت فيش متى قبل لا تنحاش وياه وتعرس عليه لو بعد النحشه...
ام عادل مهي قادره : ــ استغفر ربك.. لا ترتكب ذنوب.. ترحم عليهم بدل هالكلام..
ــ استغفر الله ربي منش ومن بلااويش..
ــ وين ارووح ..؟؟؟ قلت ليكم بقعد في بيتي.. قلتو لي بيعيه..
ـــ ايه ,, مافي حريم عندنا تقعد لحالها في بيوت.. تبغي يخلى لش الجو.. وتعيدي سالفة امش .. العرق دساس..
ــ الله يسامحك.. انتون ومنتون طايقيني.. اعمامي نفس الشي .. ماعندهم سالفه الا ابوي اللي كسر كلمتهم وشوه سمعة العايله.. و اني حالتي لله ويا هالولد... ماعندك رحمه ما تحسو .. ابغى فلوس بيتي بدبر عمري ولا عليكم مني
ــ مافي لش عندنا فلووس
ــ ويش تقوووول..!!! انتون قلتو لي ابيع البيت واسلمكم المبلغ يازعم بتبنو لي شقه في بيت امي ,, وللحين ماني شايفه شي..
ــ بيت امش .. هه.. اقول انسي .. هالمبلغ ما يساوي سمعتنا .. صار بيت آل ... علج في حلوق اللي يسوى واللي ما يسوى.. .. كل من طرانا قالو ايه هذيلاك اللي بنتهم انحاشت ويا حبيبها.. سودت وجهنا..
ــ ما اقول الا سود الله وجه الظالم .. واللي ياكلو اموال اليتامي
ــ وييييييييش قصدش؟؟
ــ قصدي اللي اقصده..
خالها ضربها بالعقال .. ضرب ... وهي تستنجد بخوالها الباقي بس ماليهم كلمه اذا حكم الكبير خلاص ..
طلعت من البيت وحالتها حاله... وما لقت ليها مأوى الا بيت ام مؤيد.. اللي لمتها كم يوم و كانت ليها مثل الأم و ازيد..
ام مؤيد اللي بكلامها وحنانها عوضتها عن شقى الأيام والحرمان...

ــ هلا امي .. هلا .. هلا .. هلا بعد ابوي..
قطعت السرحان ام مؤيد بهالترحيب الحار..
وبلا شعور ام عادل قامت ليها وحضنتها وصارت تصييح..
ام مؤيد تمسح على ظهرها:
ــ وي .. الصلاة على محمد وآل محمد.. ويش بش يا بتي؟؟
ــ وحشتووني..
ام مؤيد ابتسمت:
ــ لا توحشتي على حبيب يا غناتي.. بسم الله عليش قعدي قعدي.. شحوالش وشحوال الدنيا وياش.. شدعوه من عرستي ما شفناش
ام عادل ومبين عليها قساوة الظروف والشحوب طاغي على ملامحها ومخلتنه اكبر من عمرها:
ــ ايييه ياخاله.. ويش اقول لش .. ما اعظم من الخوال والأعمام الا هالريل .. الحمدلله على كلحال.. اهم شي ساتر علي ولامني في بيته..
الا بصوت مؤيد يتنحنح:
ــ يالله يالله.. عادل .. ياا عادل..
عادل طفر من جنب امه : ــ هاا..
ام عادل تفلصه وبحمق : ــ كم مره قلت لك قول نعم..
عادل : ــ آآآي... مؤؤؤؤؤؤؤؤؤؤييييد عوووود نااادي علييي..
مؤيد برى مستغرب : ــ حق ويه؟؟
ــ نااااااااااادي..
ــ عاااادل..
ــ نعـــــــــــــم..
ــ تعال برى الحوش نقعد..
ــ مانا .. ابغى امي.
ــ تعال لا تصير زي اليهال .. الرجال ما يقعدو ويا الحريمات..
ــ ززززززين...

وطلع له..

ام مؤيد صارت تضحك عليه..:
ــ غربل الله شره.. سنين ما تلحق .. كان ابو 12 سنه عفر لو 13 سنه يوم تعرسي..
ام عادل ابتسمت.. وتنهدت من قلب:
ــ ايييه يا خالتي سنين ما تلحق الحين ابو 22 سنه.. الله يغير حاله... اما احوالي الحمدلله.. ولو انها ما تسر لا عدو ولا صديق..
ام مؤيد حطت ايدها على فخذ ام عادل :
ــ الصبر يابتي.. الله يعينش على هالريل صراحه.. من قَبَلنا عليه وهو مكشر ما يعبر ..
ــ اسمحو لي والله.. فشلني وياكم..
ــ شدعوه غناتي.. عرفناه وعرفنا اطباعه .. وانتين اجوديه وبت حلال .. وتستحملي .. لله صبرش..والله يعوض عليش ان مو في هالدنيا في الآخره ان شالله..
ــ يارب ياكريم ,,.. اخبارش انتين واخبار بناتش ومؤيد..
ــ .. يابتي من عرستي وتركتي عالفريق من دي 9 سنين عفر تقريبا .. صارت سوالف شي يفرح وشي يذبح من الحزن.. وهااادي حال الدنيا...

وصارت ام مؤيد تقص على ام عادل اللي صار فيهم و في الفريق من تركته ..

جاسم دخل البيت بسرعه قبل لا احد يشوفه.. ودخل غرفته.. طلع كرتون اللي فيه الحوايج المبيوقه اللي خاشنهم.. وحط فيه الجواز ورجع دعسه.. بدل ثيابه وراح الصاله..
زينب تطلع مسلسل .. كانت منسدحه من دخل جاسم
اختلعت وقعدت قعاد :
ــ بسم الله الرحمن على عمررررررري .. من متى جيت..؟؟
ــ ليش طلعت انا؟؟؟
ــ عن الظرااااااااافه.. من الصبح انت منت هنا... والحين قريب يأذن المغرب .. تستهبل علي..
ــ فكينا واللي يرحم والديش عن الحنه والهدره الزايده..
ــ زييييين بافكك..

شوي..
.. ــ يوعان.. وين امي؟؟
ــ طلعت..
ــ وين راحت..؟؟؟
ــ وانت ما تسأل عنها الا لبطنك.. صحيح همي دبتي..
ــ عن التعيلف زين..
ــ وين راحت... بعد
وتغيرت نبرة صوتها ... صارت هاديه وكسيره..:
ــ راحت تتسلف من فلانه وعلانه. هي ويا ابوي ... حق علي ..
جاسم من سمع طاري علي ,, حس بطنه يعوره وتذكر حميد وحالته..
ــ وويش صاير؟؟
زينب تطلعه على جنب:
ــ قول ويش اللي مو صاير .. ليش انت تدري عن دنياك ووين الله حاطنك..
ــ زينبوه عن ثقالة الدم وويش صاير..

علمته زينب بالسالفه...

جاسم مو عارف يميز مشاعره.. هي خوف ؟؟ تأنيب ضمير..؟؟
خاطره منكسر على بيت عمته وحالتهم.. وعلى ولد عمته المرمي في الحبوس ظلم..
من تحت راس حميد السوسه.. ومن تحت راسه الجبان اللي سكت عن الحق..

زفر زفره قويه.. وقام راح غرفته.. وقفل عليه الباب..
زينب : ــ ايييه.. هذا اللي ماخذينه منك..
الا برجعة ابو جاسم ..
تابع>>

رمى روحه وبتعب:
ــ قومي بس سوي لي راس قدو.. راااسي يدْوِي .. احسه بيفقع..
زينب بعفويه : ــ بيفقع من هالقدو..
ابو جاسم بحمق : ــ هااااااا,,, قوووووومي..

راحت زينب تركض .. تسويه لأبوها... شويات ورجعت له .. لقته يمسح دموعه بغترته.. اول مره في حياتها تشوف ابوها كذا.. ماحبت تخليه ينتبه ليها ويكابر و يخفي حزنه..

رجعت المطبخ عنه..وصارت هي الثانيه تصيح.... الا برجعة امها.. دخلت المطبخ وهي مره تعبانه وهواها غايب .. شالت عباتها وصارت تشرب ماي.. انتبهت لزينب انها كانت تصيح... تنهدت:
ــ انا لله.. هونيها وتهون يابتي..
ــ صابره يماه.. بس ابوي
ــ ويش فيه..؟؟
ــ يصيح...
ام جاسم كنها مهي مصدقه حطت ايدها على قلبها:
ــ احلفي... فوين؟؟
ــ في الصاله..
ام جاسم بتروح له مسكتها زينب...
ودموعها تسيل:
ــ خليه.. خليه يطلع حرته ان رحتي له الحين بيوقف..
ام جاسم .. سالت دموعها ..
ــ الله كريم...

جاسم طلع من غرفته يحس روحه مخنووق وان حبس روحه الأفكار بتروح وبتجي .. فخله ويا اهله ويتهزأ ويلعن خيره ولا يتعب قلبه من التفكير..

كانت غرفة جاسم بابها بين باب غرفة زينب وباب صالتهم.. والحوش في النص .. والمطبخ قبال غرفة جاسم..

مامداه بيدخل الصاله انتبه لأبوه .. يمسح في دموعه..
رجع بالخطوات للورا وتسند عالجدار.. حس قلبه مقبووض.. ابووه يصييح!!!

ابو جاسم فرغ كل مشاعره.. تنحنح.. ونادى حد ما عنده:
ــ زيييييييييييينب.. وين القدووو... والله لو لحمة جمل استوت..
زينب بسرعه طلعت القدو من المطبخ للحوش..
قام ابو جاسم وهو يتثاقل الخطوه.. وقعد يشرب فيه..
ام جاسم طلعت من المطبخ.. ومدت عليه فلوس..
ابو جاسم رفع راسه وعيونه كانت حمرا من الصياح وبصوت تعبان:
ــ كم هذيلا؟؟ ومن عند مين؟؟
ــ من عند نسرين المندوبه .. الله يجزاها خير .. ثلاثة الاف وقالت على سعتنا وقت ما نقدر نرجعهم ليها..
ابو جاسم اخذهم.. وتنهد من قلب:
ــ اييه.. الله يعطيني الصحه وطولة العمر و اوفيهم ليها..
زينب : ــ ياارب ياكريم.. بسرع وقت.. يااارب ما نحتاجهم ..
ابو جاسم : ــ انا اليوم رحت اسوم الطراد كم يسوى له.. وصل لـ 15 الف .. والله مو مطاوعني قلبي ابيعه وهو رزق ولد اختي... اييييييه حيره وربي ..
هدووء.. صمت... وملامح الوجه كفيله تشرح الحال..
حتى جاسم اللي كان خايف على عمره يتهزأ ماكلمه ابوه ولا انتبه له اصلا...

الساعه 9 في الليل..
دخلت سوسن بيت ابو مالك...
استقبلتها سميره..
ــ هلااا.. بمرت اخوي .. هلا والله..
سوسن بأبتسامه عريضه: ــ هلا بيش ..
ــ بسم الله ما شالله.. ذوق اخوي وايد حليو..
سوسن بخجل : ــ تسلمي عيونش الحليوه..

ابو مالك يدخل الأشناط... وقعد عالكنبه..
ــ ايييه افففف كبرنا والله.. ثقيلين.. وين مالك ؟؟ خله يصعدهم فوق

سوسن بهداوه تدلك كتوف ابو مالك: ــ لا كبرت ولا شي حياتي .. بعدك في عز شبابك..
سميره رفعت حاجب وحاجب ,, وفي بالها..
ــ هيه.. احترمي وجودي .. عزوبيه اني... هذا اولها ... ياسااتر..
ابو مالك : ــ سميره.. وين مالك؟؟
ــ هلا.. طلع ..
ــ ويييييين رااح بعد,, انا قايل له الليله ابغاه يطلع؟
ــ مادري ياخوي اتصل عليه وشوفه..
ابو مالك يطلع جواله. ــ اف منه هالولد..

ان الهاتف المطلوب لا يمكن.......
ابو مالك : ــ ولعنه.. مقفلنه بعد.. هين يامالكوه..
سميره: ــ يمكن في محل مافي ابراج..
ــ مافي ابراج الطل في عينه.. اراويه اللي يكسر كلامي ولا يطاوع.. ووين علا..؟؟؟

سميره بأبتسامه قلقه: ــ نامت..
ابو مالك: ــ لا بالله خووش.. ولاد.. واحد طاير.. ووحده نامت.. عناد فيني يعني .. لكن ماعليه .. هين.. اوريهم..

سوسن تهدي فيه وتحط ايدها على شعره وتمسح عليه..
ــ هدي غناتي هدي.. الشناط مو ضروري تصعدهم الحين.. بس وحده الخفيفه والباقي لبعدين.. ومالك وعلا .. الأيام جايه ان شالله ما شفتهم الليله اشوفهم بكره... انت بس لا تعصب..
..
سميره تنرفزت ما تحملت الوضع..!!
شلقت بوزها شبرين بابتسامه مصطنعه:
ــ نورتي سوسن... ودي اقعد وياكم بس تعبانه باروح انام.. تصبحو على خير.. واكي تريزا تعاونكم على الشنط اذا تقدر ..
ابو مالك : ــ حتى حنا بنام اصلا.. تصبحي على نور ..
سميره وهي رايحه غرفتها..
ــ صاااقعه مافي مجامله بغى الفكه..
ابو مالك نادى على تريزا., تشيل الأشناط..
تريزا من جت بتشيل وحده منهم.. حست ايدها بتقبع.. صارت تسحبها... سحب لين وصلت للدرج...
سوسن كسرت بخاطرها تريزا.. وصارت تحاول تعاونها...
ابو مالك قام وياهم وصارو ثلاثتهم يصعدو في الأشناط..

ويوم خلصو..
تريزا: ــ ماما يبي اسوي شي؟؟
سوسن بأبتسامه : ــ لا خلاص يعطيش العافيه روحي نامي...
تريزا ابتسمت : ــ الله يعافيك..

وراحت غرفتها وهي تفكر .. من اول لقاء سوت وياها كذا.. عمرها ما احد عاونها على شي ثقيل لو على شغله.. حتى علا اللي هي قريبه منها.. وهي نادرا اذا حركت وياها شي...
صارت تفكر يمكن لأن الأشناط ليها وخايفه على اللي فيها لا ينكسر لو شي ..
مصير الأيام تكشف سوسن وطبايعها....


سميرة على سريرها تضرب فكر..
ــ اييييه يالدنيا.. الأخو شيب وهو ماخذ له هالشباب.. حلاوه ودلع .. وويش وراه.. و وولاده شوي ويتخرج مالك ويتوظف ويعرس.. وعلا كم واحد تقدم ليها.. مافي الا انتين يا سميره عمرش يمضي هدر.. .. بتقابلي تريزا طول حياتش .. هذا اذا ما طفشت تريزا منش.. اييييييييه .. الله كريم يغير الحال..


الفجر.. طلع جاسم على الموعد مع الذيب .. رايح للصندقه... وجلس ينتظره..

تابع>>

علي فتح عيونه فجأه.. قعد من النوم.... ولا يسمع الا عبدالرحمن قريب منه على سريره بس عاطنه ظهره..
صوت انفاسه مو واحد نايم.. واحد كأنه يصيح..
علي مو مستوعب الموضوع..
حاول يركز وياه.. الا فعلا يصيح..
وعلى شان مايزعج الباقي.. قام له على سريره.. وقرب منه..
عبدالرحمن حس عليه ومسح دموعه بسرعه.. وبدون ما يلتفت له.. بصوت هادي:
ــ صحيت؟؟
علي ابتسم : ــ انت اللي ويش فيك ياخوك..؟ مانمت للحين ..!! وويش فيك متضايق..؟؟!!
عبدالرحمن ساكت..
علي حط ايده على ذراع عبدالرحمن..
ــ ياخوي .. انت دايم تصبرني و تقول لي اهونها وتهون.. ورب ضارة نافعه على قولتك.. وكلام وايد هههههههه صراحه ماقدرت احفظه .. من عقليتك الجباره.. والله ما صادفت واحد يخفف عني ويفهمني كثرك.. الحين ويش فيك انت؟؟

عبدالرحمن ابتسم وسالت منه دمعه..وبهدوء شجي:
ــ ولهان على الغاليه.. وعلى بنتي اللي ماشفتها..
علي كسر بخاطره عبدالرحمن .. ووضعه... حس ان بيته ارحم.. خواته حول امه وابوه وكل واحد يواسي الثاني ويتأملو رجعته بفارغ الصبر ,, غير عبدالرحمن اللي ماعنده في هالدنيا الا مرته ومرته ماليها غيره.. وبنتهم اللي ما كحل عيونه بشوفتها..
علي:
ــ بعدين يا اخوي كل شهر فيه زياره ليش ما تخليها تجي ..
عبدالرحمن بقهر :
ــ ومين اللي يجببها.. ابوها اللاهي .. والا اخوانها اللي من ابوها اللي مايدرون عن هوى دارهم.. وانا حرمتي ما ابيها تطلع وتشحطط في هالأماكن لحالها.. ايييييييه خليها على الله بس..
ــ ونعم بالله..

صار يمسح على ذراعه و يقويه ويواسيه لعل وعسى يخفف عليه.. وفي باله..
ــ من شاف مصايب الناس هانت عليه مصيبته..

وصلو الذيب وجاسم وثنين وياهم للديره اللي ناويين على كم مزرعه فيها..

وصارو يحاولو في السيارات يفتحو قفول ابوابها..
انفتحت وحده .. قعد الذيب عالسيت وصار يفك في الراديو .. ومدة هو يفك..
جاسم مكلفينه يراقب .. لا احد يجيهم... وقف قريب السياره اللي الذيب يحوس فيها...
وانتبه لمحفظته طالعه شوي من البنطلون..

صارت عيونه تروح وتجي عليها..
وبحركه سريعه مرتبكه وتخلع.. ضرب الذيب بخفه وخطف المحفظه ..
وبتخويف:
ــ في وااحد اشووفه طالع من الأستراحه..
الذيب انصرع وقام يركض ..
جاسم خش المحفظه عنده.. و تراكضو كلهم ورى الشجر .. الا من حظ جاسم طلع كلامه صحيح.. كم دقيقه ودخلت سياره الأستراحه نزلو منها شباب وصارو يضحكو على راعي السياره المفتوحه.. ويسخرو عليه .. مفكرينه نساها ..
اللي يقول تنفه عن عمرها..
واللي يقول مخلنها تتهوى..
واللي يقول للحشرات والفيران .. فاتح فندق ..
سكروها ودخلو الأستراحه..

جاسم يبغى يغافل اللي وياه:
ــ ابغى حماام.. بروح أي محل ظلمه بخلص وبجي ..
الذيب محمق : ــ وقتك ويا وجهك..
جاسم : ــ وهوووووو على كيفي..
ــ فارق فارق بالسرعه..

بعد عنهم جاسم شوي زين.. وفتح المحفظه صار ينبش فيها.. لين طاح على بطاقة الأحوال تبع الذيب .. حطها في مخباه.. و رجع ليهم...

مهلو نص ساعه يراقبو الوضع.. لما حسو بالأمان رجعو لشغلهم...
جاسم بخفه رمى المحفظه على باب السياره اللي كان يحوس فيها الذيب..
ولما قريب يخلصو انتبه عليها الذيب:
ــ افففف يااساااتر.. محفظتي طاحت.. عمري ماجبتها معاي في طلعات على هالحظ اجيبها اليوم بالغلط وتطيح.. كان ياويلك يالذيب ياسواد ليلك..
شالها وحطها في مخباه..
وجاسم قلبه يطق طق مو طبيعي..
خلصو شغلهم و انحاشو من الزراعه...


ولما طلعو.. جو بيقسمو اتعابهم.. جاسم قال ما يبغى شي الحين.. متنازل .. وهم مهم مصدقينه ويش فيه ودام ما يبغى شي ليش طلع وياهم..
صار يمزح ويقول دافعة بلا عن عمر حميد المريض << خوش دفع بلا..
الذيب عاد ما يحتاج.. ما تبغى باللي مايردك,, توفر..


ورجع جاسم البيت.. قلبه وروحه يحسهم يسبقو خطاويه..
وطول الطريق وهو يتذكر كلام حميد اول ما اخذو ولد عمته وهو يهدد فيه بالذيب وجماعة الذيب وانهم كلهم مجهولين الأسامي والهويه ..
وما احد يعرفهم الا بألقابهم.. واذا واحد منا خانهم يروح بستين داهيه.. يتشهد على روحه..
وصل جاسم البيت دخل وعرقه يصب مع ان الجو كان برد مو طبيعي..
سكر على روحه الباب..
طلع بطاقة الأحوال من مخباه..
وصار يقرأ الأسم .. فلان ولد فلان.. ويقرا بقية المعلومات..
بدا يهستر .. شوي يضحك وشوي يصيح..
سحب كرتونه السري.. وفتح جواز حميد.. وحط البطاقه داخله..
واغمى عليه على سريره من التعب والخلعه..

الى الملتقى..

..

...


.. مشكوره خيووه على الجزء الروعـهـ..

.. ونستنى الاجزاء الباقيـهـ ..

.. تـحـياتــيــ..

...

..

لآتقولي الديب يصير إلى حميد أو جآسم <<<كل شي جآيز
وادا مآيصير ليه فهوه يعرفه معرفه قديمه أو شي مآشيات
يالله نشووف ويش يصير
يعطيك العافيه ع الجزء
يعطيك ربي العافيه
تحياتو

يؤؤؤؤؤ

ان شاء الله ما ينتبه الذيب

×شكله جاسم مابيتحمل الهموم اللي في قلبه وبيعترف للشرطة×

ننتظر الجزء القادم على أحر من الجمر

تحياتي

عوافي عليك اميررررة...

وما نقول الا تسلم يدك على الحلقة الحلوة..

متابعين ان شاء الله

حرامي و يبوق الحرامي :weird:
و فكرة جاسموووه كشخه
ان شاء الله يعترف
جزء روووووعه ،، ننتظر الجزء بكـــرى
يعطيش العافيه

متشوق الى معرفه ماذا سيحدث

اهو اترك عنك الفصحى واتكلم عامي

زين

ابغى اعرف ويش بيصير بسرعة مانا قادر اتحمل

مرحبا

:embarrest: تسلمو عالتفاعل
وعلى الحماس
مو عارفه ويش اقول ليكم

بس اقدم اعتذاري
الجزء 21 اخر جزء انزله
الى ان التقي بكم رجعتي من المدينه

بسافر

التفاصيل

هنا

الى ان التقيكم
اترككم بحفظ الله ورعايته

وشوووووووووووووو بعد
ليكون الذيب يصير لأبو مالك...
ليكون أخوي حميد..




وهذي سوسن شكلها طيبة ترى..
إن شاء الله تطلع طيبة ولاتطفش علا



بصراحة البارت ولا أحلى....
روعة بجد..
بس إذا بتتيسرو بعد كم يوم
10 أيام مابنقرأ القصة ...
بنفتقدها..


على العموم..تروحو وترجعو بالسلامة يارب..
ويعطيك العافية أمورة الحلوة..
موفقة لكل خير إن شاء الله تعالى..
..دمتي بعين المولى الجليل..

ليكون جسوم بيعترف عليهم انبه ضميره عفرر

اميروة بتوحشينا تروحي وتجي بالسلامة يارب

وبتوحشنا القصة كفاري

ها ماوصيش ادعي لييييييييي

موفقه لكل خير

صبـــــــــــــــــــاح الخيراااات ،،
خيوووه ويش هاالخيانهـ تنتظروني أرجع ،،
و تسافرووو ،،
كان قلتو أنكم بتروحو كان أقعد هناكـ و ألتقي فيكم لهـ ،، هع هع
المووووهيييييييييم ،،
خلني في الروايهـ الحين ،،
بـ صراحهـ ،،
روووووعهـ ،،
كل هاالأحداث صارت في غيااااابي ،،
يعطيكـ ربي ألف عااااافيهـ ،،
على هيكـ إبدااااع ،،
ما ننحرم منكـ يااااارب ،،
و تروحو و ترجعووو بـ السلامهـ ،،
و قلدناكم الدعاء والزيارة ،،
و عليكم بـ ألف ألف عاااااافيهـ ،،
بـ إنتظااااااركم ،،
خاااالص التحاااايااا ،،
للدموع إحساس ،،

:ongue:يسلمو خيتو ع الطرح الحلو والمميز:icon30:

وتروحي وترجعي بالسلامة ان شاءالله ونبسطي وتهني عيني

ولاتحاتينا ابدا ماراح ندخل كل يوم ونشوف في جزء جديد ولا لا والله يعينا على الانتظار :closedeyes::closedeyes::closedeyes:

اما جااسموا زين اسوي بالذيب يااعسى الذيب ياكله ويشتكي عليهم بالشرطة<<<<صحيح حاميها حراميها خخخخ

وسوسن شكلها بتصير خوش وحدة وياعيني على الدلع وسميروا ان شالله تعرس علشان لاتنبط من الدلع الي بيصير

تقبلي تحياتي لك:signthankspin:

اعتقد اني انتظر هديتي:toung:
تروحين وجي بالسلامة >> عشان الهدية بس:rocket::silal:
والله يعين ننتظر القصة لبعد الناصفة
مادري ليلة الناصفة اول مارجع تعبان ويش اسوي :wacko:

تروحون وترجعون بالسلامة إن شاء الله

والله يوفقكم .. ولا تنسونا من الدعاء

موفقين إن شاء الله

.........

والله يعطيك العافية أختي على الجزءمررررررررة شيء

نفسي أعرف مين يكون الذيب

موفقه أختي ....