اموت واحيــــا بك... " قصة اماراتيه منقولة "

.....+++++++++++.....
الصباحية
.....+++++++++++.....
عقد عبدالله حياته ورص على عيونه زياده....شو هالصوت المزعج...؟؟؟ يووووووووه انا ليش ما اغلقته هذا بعد...؟!!... بطل عيونه يطالع التليفون اللي عالطاوله بكره شديد.... خلوووني ارقد.... بس التيلفون ما طاع يسكت..منو هالغلس اللي يتصل بي الحين.؟؟.. مد ايده ومسك التيلفون... " حمدان" ... سبه في خاطره وسكر في ويهه ...خله يتادب هالماصخ..حد يتصل الفجر على معاريس..؟؟؟ يوم اطالع الساعه انصدم.... 11..؟؟؟؟؟؟؟؟؟؟؟؟؟؟؟؟؟؟؟؟....كييييييييف الساعه 11... افاااااااا هالكثر رقاد...ماينلام حمدان يوم متصل .. التفت على عنود في الصوب الثاني من الشبريه حصلها متكوده على عمرها...ظحك فخاطره عليها..ردت على هالرقده هالقطوة..!!!.. مد ايده يمسح على راسها وتقرب عشان يبوسها بس قطع عليه التيلفون مره ثانيه... الله يخسك ياحمدان مغلسك... نش عبدالله لبس ثيابه على عيله وشل التيلفون وطلع من الغرفه للصاله الصغيره في الجناح...عشان عنود ماتقوم من الحشره والحسوس...
عبدالله: آآلووووو..
حمدان: صباااااحيه مباااااااااااركه يامعرس...
عبدالله: الله يبارك فيك..
حمدان: لو عندك مسجبة بتنقع فيني صح..؟؟
عبدالله: وانته الصادق والله...
حمدان: ههههههههههههههههههههههههاي...
عبدالله: شو تبا حمدان..؟؟؟
حمدان: متصل لانه الكل مستحي يتصل.... عاد انا قلت بسوي لهم خدمه...يتريوونك هني متى بتوووون.؟؟؟..
عبدالله: قسم بالله ماحسينا بالوقت انا توني ناش بس وعنود بعدها راقده...
حمدان: اهاااااااااااااااا ماحسيتوووا..زين زين همممممممم...
مات عبدالله من القهر....
عبدالله: حمدانووووه...اجلب ويهك ...
حمدان: ههههههههههههههه يقفط بعد...
عبدالله: لاني احس على دمي مب انته ماتحس على دمك ويهك لووح.. احين انا اتصبح على صوتك في صباحية عرسي والله مصخره...
حمدان: الا ياحظك انزين....احين مستقوي والا امس تتنافض من الزيغه...
عبدالله: ههههههههههههههههههه عنبو هالويه لك والله اني ماكنت اتنافض ولا شي بس شوية توتر ..المهم اجلب ويهك بسير اوعيها وان شاء الله مابنطول..
حمدان: تمام...ويالله باااي..
عبدالله: فمان الله..
سكر عبدالله واغلق التيلفون مره وحده...وظحك على خبال ولد عمه... رجع للغرفه وشاف عنود اللي غيرت رقدتها شوي وصدت لصوب ثاني..آآآخ فديتها....حط تيلفونه عالطاوله ودخل الحمام يتسبح...يوم طلع...والفوطه على جتفه..نشف شعره عالسريع وفرها عالكرسي..ويلس عالارض عدال الشبريه وتساند بايده عدال عنود... وطاحبها يغلس عليها يقرقطها وينغزها وهو يظحك...لين مابطلت عيونها... ظحك لها...
عبدالله: هااا...!!.. صح النووووووووم ياقمر...
بطلت عنود عيونها ومدت ايدها للحاف وغطت ويهها عنه,...
عبدالله: ههههههههههه بلاج..ردينا عالمستحى ..؟؟ قلتي امس بس..
عنود:..................
مد ايد ومسك اللحاف وحاول يمطه بس هي ماسكتنه بالقو...احتار عبدالله شو يسوي بهالبنت... مسك اللحاف من طرف جانبي مب ماسكتنه هي ..رفعه وخش راسه عندها داخل بغلاسه..يوم شافته صرخت وبطلت اللحاف..
عنود: عبووووووووووووود لا تسويبي جي...
عبدالله: ههههههههههه ياروووح عبود انتي... صباحية مباركه عنودي...
غمضت عنود عيونها ميته من المستحى...
عنود: الله يبارك فيك..ولك انته بعد مبروك..
عبدالله: الله يبارك فيج عمري...قومي..تاخرنا على هلج...
عنود: ليش كم الساعه.؟؟؟
عبدالله: 11وربع ...
عنود: خيبه... رقدت وايد...
ابتسم عبدالله..
عبدالله: كلنا رقدنا وايد....
تموا يطالعون فويوه بعض فتره...عقب ظحكوا على عمارهم...

قبل صلاة الجمعة بشوي وصل عبدالله وعنود لبيت العم...استقبلوهم استقبال حار بس ماكان شي وقت وايد بسبب الصلاة.. طلعوا الرياييلي للمسيد ودخلت عنود مع امها وحريم اخوانها للبيت..طبعا تحملت فضولهن وتنغيزاتهن لفتره..لين الغدا...
في الميلس بعد الصلاة وفي انتظار تجهيز الغدا..قعد عبدالله عدال خليفه ... ويوم التفت له لاحظ نظرة خليفه له... وابتسامته الخبيثه..
عبدالله: باااااااااااااعطيك بكس بين عيونك والا خوز هالنظرة...
خليفه: ههههههههههههههههههههههههههههههههههههههههههههه ....
بو سلطان: بلاكم تظاحكون...؟!!
عبدالله: ماااشي عمي عيالك غلسين شوي...
ظحك بو سلطان..
بو سلطان: هههههههههههه ماعليه..معرس...تحمل شوي التعليقات..
خليفه: خبرتها عن السفره..؟؟
عبدالله: لين الحين لا...
قاله حمدان بمكر..
حمدان: ماحصلت وقت هاااااااااااااااااااااا..؟!!!
صد عبدالله صوب حمدان بنرفزه وبنظرة معصبه..
حمدان: بس بس بس خلاااص توبه ههههههههههههه حشى مايتحمل المزح...
عبدالله: كافي اني متصبح على صوتك....ماريد اسمعه طول شهر تسمعني..؟؟
مسح حمدان على لحيته...
حمدان: على هاللحية...بدقلك يومين هههههههههههه...
حميد: جي وين بتسيربها..؟؟؟
عبدالله: ماليزيا ان شاء الله...
سلطان: شهر كامل فماليزيا..؟؟؟ بتملووون....!!
عبدالله: لا مب كامل... اول اسبوع في ماليزيا عقب بنشوف بنحوط عالجزر اللي عدالها واندونيسيا وغيرهااا.. الشله اللي هناك كلها يعني...ان شاء الله...
خليفه: هي جذي ترتيب حلووو...
حمدان: شلني وياك....بتمل من عنود...
سكت عنه عبدالله مايبا يرد عليه. يحاول قد مايقدر يتجاهله..بس حمدان نقع من الظحك وهو يكفخ عبدالله على جتفه....
حمدان: اممممممممره مستوي جاااااااااامد ... عاد قلنا عرست مب تستوي جدي لهالدرجه وتودر سوالف الشباب...
خليفه: اغسل ايدك منه خلاص استوا شايب...
عبدالله: شاب راسك ياخلوووف ماعليه ان ماذليتك فيوم قريب ان شاء الله...
ظحك خليفه وتقرب من عبدالله يصاصره...
خليفه: مابتكون موجود وقت المذله....بتكون ويا عنوودك فماليزيا مادري وين...
اطالعه عبدالله بنص عين...
عبدالله: احسن بسير اقول حق حصه فكري شهر كامل بالموضوع ...عشان يوم ترد عليك بتكون اقرع...من كثر ما تنتف شعرك من القهر..
ابتسم خليفه...عبدالله مايدري ان خليفه مشاور حصه من قبل وماخذ موافقتها....وظامن من هالناحيه انه مابينتف شعره من التوتر على قولة عبدالله...
حط ايده على ركبه عبدالله وهوس عليها..
خليفه: بنشوف ياولد عمي...

تموا يسولفون ويظحكون لين ماحطوا الغدا..تغدوا رباعه وتغدن الحريم في البيت..وبعد الغدا وشرب الشاي سلمت عنود على اهلها والحريم وطلعت مع امها عند اخوانها وابوها ...وريلها ..في الحوش...سلمت على ابوها واخوانها واحد واحد... ووقفت عدال عبدالله اللي قالها...
عبدالله: سلمي عليهم عدل تراج مابتشوفينهم شهر...
التفتت عنود مستغربه اطالع عبدالله...
حمدان: بتسافرين يالعرووس...شهر بصلج...اوه قصدي عسلج...
عنود: بنسااافر..؟؟؟؟؟ ويييييييين..؟؟
عبدالله: بتعرفين عقب...يالله يا جماعه... السموحه منكم نترخص نحن..
ام سلطان: يابوويه دير بالك على عنووود حطها بعيووونك...
عبدالله: لا تخافين عموووه عنود من اول في عيوني...
سلموا عالكل وحملوا اغراض عنود وشنطها في السياره وروحوا بيت عبدالله... هناك الفرحه كانت اكبر والاستقبال كان غيير عن بيت محمد... لانه هني وايد ناس ساكنين في هالبيت... والكل كان يظحك مستانس بهم... جنهم هم اللي معرسين مب عبدالله وعنود بس....دخلت عنود مع نوره وفطيم قسمها اليديد بعد ماحطوا الشنط كلهن فيه...حصه ماركبت معاها لانها ماتقدر تركب الدري وايد بسبب العمليه.. القسم كان احلى من ما تذكره عنووود..يمكن لانها حست ان هذي غرفتها هي وعبدالله لفتره طويييله وسنين لجدام... لاحظت اللمسات والزينه اللي محلية الغرفه..عنود ماحطتها...!...اكيد هذي سوايا حصه.... بس وايد عيبتها الغرفه ..يلست عالشبريه تتلفت حواليها وتتامل كل شي...يلست نوره عدالها وفطيم على كرسي..
نورة: هاا العروس...فشو تفكرين...
عنود: مادري... بفتقد بيتنا.وغرفتي... لكن بستانس هني اكثر....
فطيم: آمين...الله يوفقج ان شاء الله وعقبال نوره وحصه...
عنود: وعقبالج انتي بعد هههههههه....
فطيم: عقب سنين يمكن...
نورة: مايندرى... جان مايستعيلون عرب ويخطبون بسرعه...
قفطت فطيم...
عنود: منوووو العرب..؟؟؟؟
نورة: هههههههههه مااااشي... قومي ننزل تحت عند الحريم والا تعبانه.؟؟
عنود: لالا مب تعبانه...نسير...
عقت عنود عباتها وعلقتها ...ونزلت مع البنات وقعدوا رباعه يسولفون ويخربطون...
الساعه خمس ركبت عنود مره ثانيه مع حصه عشان تساعدها بتجهيز شنطتها لشهر وشنطة عبدالله بعد...دخل عبدالله الغرفه يشوفهن مبتلشات...
عبدالله: هاااااااا... عنود ظبطي امورج على شنطتين بس مافينا نشل اكثر...
عنود: ان شاء الله عبدالله...
التفت لحصة..
عبدالله: وانتي شحقه تشتغلين..؟؟ شخبار بطنج..
حصه: عبدالله انا بخير لا تحاتي...
عبدالله: تاكلين دواج.؟؟
حصه: يووووووووووه بيبدا الحين...!!...بسير عنكم انا ههههههه...
عنود: هههههه وين سايره يالخاينه...
حصه: ههههههه سوري عنود..بس ريلج من يشوفني يتذكر الطب ويفتحلي تحقيق..
طلعت حصه من القسم ونزلت تحت عندهم.. وعبدالله تم مع عنود يساعدها شوي ويطفربها شويااااات...لين المغرب وعقب طلع عنها عشان يصلي في المسيد...
بعد المغرب صار لازم يطلعون لدبي...عشان من هناك يسافرون .... عرض سعيد انه يوصلهم بطريجه لكن عبدالله قال انه هو نفسه ماعنده مانع لكن عشان عنود تاخذ راحتها بيسير مع خليفه... وهذا اللي صار طلعوا هل الشارجه بو فيصل وام فيصل معاهم منى ومنال.. وفيصل شل حرمته عليا وعياله وراح...وسعيد بروحه... وخليفه خطف على عبدالله وعنود وبعد السلامات الطوييله حملوا الشنط وراحوا لدبي..

بعد ماطلعوا قوم عبدالله مسكت نورة التيلفون واتصلت بحمدان....
حمدان: آآآآآآلو....
نورة: هلا حمدان..
حمدان: عاوزة اييه يابت..؟!!!..
نورة: هههههههههههههههاي لايق عليك..
حمدان: انتي بقرة..
نورة: وانته ثور... وين اللي واعدني به...؟!!
حمدان: ويــــش ياااامــــــره.؟!!..
نورة: ييييييييييه كل ساعه لهجة.... وين فلم الرزفة مال امس قايل بتيبه....
حمدان: يووووووووووه قسم بالله متفيجه باي باي...
نورة: حمدااااااااان والله حرام عليك مايخصني انته واعدني....
حمدان: تعبان ويا هالويه ابا اتعشى وارقد مافيني اييكم البيت..
برطمت نوره وسكتت...
حمدان: باجر نوروه والله باجر وعد...
نورة: هممممم مع انه كان خاطري اشوفه اليوم بس ماعليه عشانك تعبان بصبر...
حمدان: سوري والله...منو عندج..؟؟
تلفتت نوره وشافت امها يالسه وابوها وفطيم...
نورة: الشواب والشيخه فاطمة الطويله..
ابتسم حمدان..
حمدان: سلمي عليها....عليهم كلهم..
نورة: ان شاء الله..هههههههههه والله انك.....ذايب ممممره...
سمعت فطيم رمسة نوره وابتسمت وحست بشعور غريب...تحس به كل مره يتكلم حمدان عنها مع حد ثاني...
حمدان: عدال يعني هي مب ملصقه اذنها تتسمع احين..
نورة: ههههههههههه والله لا..يالسه بعيد..
حمدان: عيل ماتدري انج ترمسيني...
نورة: هممممممممم انا ماخبرتها لكن ذكرت اسمك تراني كذا مره يعني تعرف..
حمدان: اكرهج...ليش تحبين تحبطيني خقيني شوي رفعي معنوياتي...
نورة: انته ناقص خقه بالله عليك...؟؟
حمدان: دومج ظالمتني انتي... المهم بييكم باجر ان شاء الله..
نورة: تعال بعد المغرب لانه عندنا دوامات لين العصر...
حمدان: حتى انا عندي دوام العصر..عقب ماخلص بييكم ان شاء الله..
نورة: تمام .يالله باااااااي
حمدان: فداعة الله...

بالباجر يوم ياهم حمدان في الليل ياهم متاخر شوي وبالتالي حصل الشواب رقووود..لكن البنات كانن يترين..عطى نوره الفلم ويلس يشرب شاهي... ارتبشن البنات عليه ..اما هو مطالعنه ليلة العرس... فما كان يركز عدل فيه... حصه بعد ماكانت مركزة عدل..يوم شافت الرزفة تذكرت رزفة الملجه ..وسيف. الله يرحمك ياسيف... حمدان كان يطالع حصه بطرف عينه...يفكر...فيها ..وتذكر رفض امه لها في بداية الموضوع...وتذكر كلام راشد فجاه..وتظايق ان حصه تشتغل مع ربيعه..صح هي تشتغل مع اخوه بعد بس الموضوع مختلف...ربيعه يشتغل مع بنت عمه والمصيبه هذاك يعرف ان حصه هي بنت عمه... ويعرف حمدان ان راشد كان يباها....التفت لحصه يقولها بصوت واطي..
حمدان: حصه...
التفتت حصه اللي كان بالها مشغول..
حصه: لبيه...
حمدان: لبيتي حايه...حصه انا ...عمري ماطلبت منج شي...بس هالمره بطلب منج شي واتمنى صدق ماترديني..
حصه: افا عليك حمدان.. آمر...
حمدان: ........ فنشي...
حصه: افنش.؟؟؟؟؟؟
حمدان: اطلب منج هالشي لاسباب ماروم اقولها..بس مب مرتاح من شغلج انا..فنشي..
ابتسمت حصه...كانت متاكده ان خليفه بيطلب منها هالشي في يوم... بس حمدان سبقه... وهي اصلا عايفة الشغل وكانت مقرره جزئيا انها تفنش قريب..
حصه: فالك طيب...اول ماقدر بروح وبنفش من الشغل...
ابتسم حمدان برااحه..
حصه: فااااااالج مايخيب...بترتاحين صدق...
سكتت عنه حصه وكملوا مطالع هالفلم اللي حمدان ماخذ فيه نص الفلم من كثر مايطلع ويركزون عليه...


--------------------------------

الجزء الثالث والخمسين

وصلوا قوم عبدالله كوالالمبور الصبح...كان هوغافي بعد مانامت عنود في الطياره من التعب... نش وهو معقد حياته ويسمع الاصوات ..التفت على يساره حصل راس عنود متساند على جتفه...ولاويه على ايده اليسرى كانه بيشرد عنها...ابتسم ..
عبدالله: عنووودي...حياتي قومي وصلنا..
مانشت...مد ايده ومسك ايدها يهزها..
عبدالله: عنوووووووود...
فزت عنود من رقدتها واستغربت مكانها شوي..
عنود: هااااا...
سكت عبدالله عنها لين ماتستوعب وين هي وهوقاعد يراقبها...فركت عنود ويهها بايدها والتفتت له..
عبدالله: وصلنا عيوني..
عنود: ابا اسير الحمام... ابا اتغسل..
عبدالله: سيري انزين..
عنود: تعال وياي...
نش عبدالله معاها ووداها الحمام اللي في الطايره..تغسلت وهو بعد تغسل عشان يصحصحون شوي..عقب رجعوا خذوا اغراضهم ونزلوا من الطياره..وعنود متمسكه في ايد عبدالله بقوو.. كانه بيطير عنها..اطالع حواليها باعجاب ممزوج باستغراب...
التقوا عبدالله وعنود مع المرشد اللي عبدالله متفق معاه من الاول.. ووداهم فندق حجزوا فيه .. وخذوا رقم المرشد عساس يتصلوبه يوم بيجهزون ويبون يطلعون...المرشد كان مصري.. يسمونه ابو محمدود...والظاهر روحه مرحه من اول ماشافهم قام ينكت ويسولف...
اول ماوصلوا الغرفه قامت عنود تفتش... بس كان كل شي تمام..بالمقابل عبدالله اول ماوصل عق بعمره عالشبريه وعلى ويهه...وهو يتنهد بتعب... طلعت عنود من الحمام بعد ماتفحصته.. وشافت عبدالله وابتسمت..راحت صوب الكبت تعلق شيلتها وعباتها..
عنود: تعبان عبادي..؟؟
عبدالله: همممممممم ...وايد...ظهري بينكسر من يلسة الطياره ولا رقدت بعد...
عنود: حتى انا مارقدت عدل...
ظحك عبدالله ظحكة مخنوقة..واعتدل وانسدح على ظهره ويديه ورا راسه..
عبدالله: مارقدتي..؟؟ متشبصة بايدي ومتسانده عجتفي ونخيرج واصل اخر الطياره ...ومارقدتي..؟؟؟
انصدمت عنود.. ووقفت وهي تبحلق في ويه عبدالله..
عنود: احـــــــــــــلـــــف اني كنت اناخر..؟؟
عبدالله: ههههههههههههههه ...
ارتاحت عنوود...ويت يلست عداله عالشبريه...
عنود: روعتني...احيد عمري انا بعد ماناخر...بس والله ما ارتحت برقادي...
ابتسم عبدالله ومد ايده ومسك ايدها يتفحص الدبله ويلعب بها بصبعه...
عبدالله: حلوة ماليزيا..؟!!..
عنود: ماشفنا غير المطار...ههههههه بس المناطق اللي مرينا بها حلوه كلها خضرة.. وفي اماكن متطوره بعد توقعت انهم عايشين حياة اول..
عبدالله: وايد مدحوها لي الصراحه وقمت ماشي الا هي بسيرلها ويا عنود ان شا ءالله...بس على فكره مابنقعد هني طول الشهر..بنتحوط في الدول المجاورة والجزر...
عنود: احلى شي الجزء.... مشكووور الغالي لانك يبتني هني .. زييييييين انه يبنا الكاميرا ويانا عشان نصور نراويهم...
عبدالله: تراوينهم اسرارنا ويا هالويه...؟!!
عنود: ههههههههههه حرام اكيد يبن يشوفن المناطق اللي رحنالها...عادي بيستانسن...
عبدالله: امي موصتني اتصلبها يوم اوصل...وانا مافيني..
عنود: هات انا بتصلها وبطمنها..
عبدالله: بتطلب انها ترمسني وانا مافيني احين ابا اتسبح وارقد بسسسسسسس...
عنود: انزين بقولها انك راقد...حرام عليك شحقه مافيك تكلمها؟؟؟
عبدالله: خليها الحين الوقت مايندرا عندهم كم...بعدين بتصلبها يوم بنش...
عنود: اطلع لك ثيابك..؟؟
عبدالله: بتسوين زين...انا بدش اتسبح....
يلس عالشبريه وعطى عنود بوسه عالسريع على خدها ودخل الحمام.. عنود حطت ايدها على مكان البوسه وهي تبتسم بحيااا.. هزت راسها وهي تظحك..عبدالله شيطان... نشت وفتحت شنطته اطلع له ملابسه الي يباهن...وبعد ماخلصت قامت تفتح الشنط وتحط بعض الملابس في غرفة الملابس وترتبهن..ماحطت كل الملابس لانهم مابيكملون شهر هني..بس اسبوع.. طلع عبدالله من الحمام ولبس ملابسه وانسدح عالشبريه...
عبدالله: عنووووووووود...تعالي همزيني...
ظحكت عنود هالشي...كانت تتوقع انه بيطلب منها هموز...لانها تدريبه من اول انه يموت وحد يهمزه قبل مايرقد او اول ماينش...يتفجج ويكيف...

خليفه كان محتار..متى يرد يكلم ابوه في الموضوع..مايحب يكون لجوج... بس خاف انه حد غير معروف يسبقة مره ثانيه...حصه كانت وايد حلوه في العرس...واكيد وايد حريم حطن العين عليها بما ان نوره مخطوووبه اوووريدي...طلع من غرفته وسفرته على جتفه... خير البر عاجله...
كان الوقت بعد صلاة المغرب...نزل تحت حصل ابوه وامه وحرمه حميد وعيالها..سلم عليهم ويلس...
خليفه: ابوويه... احم..متى تبانا نسير عند قوم عمي..؟؟ عشان الموضوع اللي خبرتك عنه...
فكر شوي بو سلطان..وام سلطان هالمره ما ادخلت ابدا...
بو سلطان: عزمت ابويه..؟؟
خليفه: ان شاء الله...
بو سلطان: باجر بنتغدى عندهم..
خليفه: شقا نتغدى ابويه عندي دوام انا..
بو سلطان: عيل عقب المغرب بنسيرله ...
خليفه: على خير ان شاء الله...
نش خليفه لانه يستحي يقعد مع حريم خوانه... وطلع برا البيت ..كان مظايق بانه مايقدر يسير بيت عمه لانه عبدالله مب هناك...ويستحي صراحه يسير...يوم طلع برا البيت شاف حمدان ماسك فوز الزراعه ويغسسل سيارته...يلس خليفه على الدري الجدامي للبيت وهو يطالع اخوه..
خليفه: اعتقد فيه مغاسل في العين... اقرب وحدة عدال الشيشه اخر الشارع هذا...
حمدان: حرام الواحد يتسلى...
خليفه: عاد خيست البيت كله مياهه...
حمدان: ههههههههه..احين امك بتي تربع مستانسه اتحسبه مطر ...
ابتسم خليفه وسكت... وحمدان خلص من تغسيل السياره وسحب الفوز لين تحت النخله وحطه..وزعج..
حمدان: علوووووووووووه... اطالع عالماااي هاااا..!!!...
ورد للسياره وبطل البيبان وقعد ينظفها من داخل ويطلع الزباله ويفرها..وكل مايطلع زباله يرفع نظرة لخليفه بتفحص...
حمدان: بلاك مويم..؟؟!!!...
خليفه: ماشي... رمست ابويه...باجر بنسير عند عمي نرمسه عشان حصه...بتي ويانا.؟؟
حمدان: والله.؟... اكيــــــــــــــــــد ان شاء الله بسير وياكم ...
سكر حمدان بيبان السياره ونفض ايده .. يا صوب خليفه وقعد عداله...
حمدان: على فكره...يوم السبت رمست حصه...طلبت منها تفنش...ووافقت..
عقد خليفه حياته والتفت لحمدان بحدة...
خليفه: ليش.؟!!!...
حمدان: احم... راشد ذاك اليوم تخبرني...اون شفت اخوك يشل موظفة ويوديها المستشفى ..ويوم سال عرف ان حصه بنت عمنا... (هز راسه حمدان).. ماحقيتها لحصه الصراحه انهاتشتغل ويا واحد من ربعي..قتلها فنشي ..ووافقت...
هز خليفه راسه..موافق على تصرف اخوه...فعلا هو بنفسه كان بيطلب منها هالشي لكن بعد مايخطبها ...لكن ماعليه دام انها وافقت وبتفنش هذا هو المطلوب... فجاه خطر فبال خليفه شي...سهى عنه من قبل...نش عن الدري وسار صوب سيارته .. وحمدان يطالعه ومافكر يساله وين ساير....يطالعه بحسد وهو يريوس بسيارته ويطلع...
ياحظك طلعت.. الا انا قاعد اتعلث بالتغسيل والتنظيف عشان اشرد من الدراسه...وراي امتحان ولازم ادرسله.. اوووووووفف... نش من الدري ودخل البيت وعلى طول لغرفته ...وفرش كتبه واوراقه عالشبرية مثل ماتعود يوم يدرس...
مسك خليفه تيلفونه وقعد يدور رقم سالم اخو المرحوم سيف...واتصلبه وقاله انه يبا يشوفه هو وامه اذا ماكانوا مشغولين او مرتبطين...ورحب به سالم وقاله انه موجود في البيت وحيالله في أي وقت ... سكر خليفه عن سالم وهو متاكد من ان اللي بيسويه هو عين الصواب... وصل بيت المرحوم...وتسرّط وهو يركز عالمنطقة الفاظيه جدام البيت اللي سيف متعود يوقف سيارته فيها....غمض عيونه يحاول يتمالك الشعور اللي تملكه للذكرى...نزل من السياره ودخل البيت.. سالم كان يترياه.. سالم وسيف يتشابهون..ولاول وهله تراواله سيف يظحك له..بعد على طول تلاشت الصورة من نظرة وشاف ويه اخشن واكبر من ويه المرحوم... سلم عليه ورحب به سالم للميلس اللي كان فاظي.. وقعد يسولف وياه ويتخبره عن عرس عبدالله واحواله كلها.. وبعد ربع ساعه من السوالف..
خليفه: عيل وين الوالده..؟؟
سالم: دقيقه بزقرها ..
طلع سالم شوي ورجع دخل ويلس..
سالم: احين بتي...
خليفه: اخاف ييتكم فوقت مب مناسب سالم..
سالم: لالالالالالالا افا عليك ياخليفه البيت بيتك متى ييت حياك الله والله...
دخلت العيوز متبرقعة ومتحجبه بشيله سودا عووده..مالت عيايز...
ام سالم: يااااامرحبا ..يااامرحبا بمن يااانا...هلا بخلييفه...
نش خليفه احتراما لها..
خليفه: مرحبابج اكثر خالوووه شحالج عساج طيبه..؟؟
ام سالم: بخيييييير ياولدي بخير وعافيه انته شحالك وشحال امك واهلك..؟؟ وبيت عمك.؟؟
خليفه: كلهم بخير وسهاله..عسى ماازعجناج خالوه..
ام سالم: افا عليك ياخليفه انته مثل ولدي وماصدقنا نشوفك ...
خليفه: اله يخليج ويبقيج خالوه...استريحي ابغيج انتي وسالم فرمسه...
يسلت ام سالم عدال ولدها ويلسوا هم من بعدها...
ام سالم: خير ياولدي..

خليفه: خير ان شاء الله... خالووه انا... احم...صراحه مستحي منج ومب عارف شو اقول...
ام سالم: خذ راحتك ابويه شوفيك خوفتني..؟!
خليفه: مافي داعي للخوف...بس..آآآ,,,,انا بدخل بالموضوع سيده.... احم..
كان خليفه مرتبك حده وقافط ..ومب عارف كيف يتكلم بالسالفه...
خليفه: انا ياي اقولكم شي..وماحبيت تسمعونه من غيري..مثل ماتعرفون..حصة ..ارملة المرحوم سيف...هي بنت عمي...وووو... باذن الله انا..ناوي اني اروح ..مع الوالد واخطبها باجر ان شاء الله...
ابتسم سالم بحزن وهداوة.. والعيوز بحلقت بخليفه...
خليفه: انا ماحبيت اخطب و بعدين اخبركم..وبنفس الوقت مابغيت تسمعون هالشي من غيري...لا تحطون بخاطركم علي... مثل ماتعرفون حصه مازالت بنت.. ومحتاجه ريال حالها حال أي بنت...عشان يحفظها ويصونها...
ام سالم: منو قالك ياولدي انه نحن حاطين بخواطرنا عليك...بالعكس..فرحتني وطمنتني على مستقبل هالبنت.. من عقب ما غاب ولدي وانا احاتيها ..واحاتي مستقبلها...
سكتت شوي وعيونها ادمع...شكلها بتفتح مناحه...مسكينه..ذكرتها بولدها بس شو اسوي...حسيت اني لازم ابلغهم.. من باب الادب والعشره يعني..
ردت العيوز تكمل.. وهي تحاول تتمالك دموعها..وتمشهن بشيلتها.. هالشي بروحه خلا خليفه يعورة حلجه من العبره اللي خانقتنه...
ام سالم: الله يوفقك ياولدي وتقدر تسعدها .... الله يوفقك..
نشت العيوز وطلعت وهي امره خلاص تصيح... نزل خليفه راسه وهو يتمالك نفسه.. وحاول يبتسم..
خليفه: زعلنا عيوزك ياسالم.. اسمحلي..
سالم: ماعليك.. هي من تسمع طاريه صاحت..بس ابا اسالك سؤال...
خليفه: اسال..
سالم: كنت تبا حصه من قبل مايخطبها المرحوم.؟؟؟
ارتبك خليفه..ابدا ما توقع هالسؤال...وهو مايروم يجذب..... ابتسم ابتسامه صغيره..
خليفه: هممم.... ماكنت متاكد وايد من رغبتي... بس الحين تاكدت..وحصه ماتتعوض...وفوق هذا بنت عمي..
سالم: ولد اصول يا خليفه...الله يوفقك فحياتك وياها...وان شاء الله تسعدك وتسعدها...
خليفه: آمين...تسلم ياسااالم... ماقصرت.. عيل اترخص انا عنكم..
سالم: لا وين.؟؟ والله العشا عندنا...امرره حلفت لا تناقشني...
خليفه: ياريااااال والله ماله داعي..
سالم: خلاص عاد حلفت ولا تردني..تعشا عندنا الليله من زمان ماخذنا علومك..
وافق خليفه ويلس معاه وعقب شوي يا اخو سالم اللي اصغر من سيف هو وربيعه وقعدوا كلهم رباعه..

في بيت حمد..سكرت ام خالد السماعة وهي تبتسم...
ام خالد: يعلني ماخلا منه ...مستانس...
نورة: انا اغااااار...
حصة: عشان قالت يعلني ماخلا...؟
نورة: لا...ابا اسافر...ابا اسير عندهم مالي خص...
فطيم: ناسيه الدراسه.؟؟ وين تبين ترزين بالفيس.؟!!
ام خالد: تريي لين ماتعرسين يمكن يتكرم عليج ولد هلال يوديج مكان...
حصه: ههههههههههههاي...حلوه امايه...
نورة: شحقه يتكرم عليه.؟؟ غصبن عنه بيسفرني..
فطيم: وييييييييه الله يعينك ياخويه...وين تبين تسيرين نورة خانوم.؟
نورة: اول شي ابا اسير اسبانيا...
حصه: هي ..عند الغلا واليلا....
نورة: مالي خص...وعقب ابا اسير الهند....
فطيم: اول شي تبا تعبر فلوسه فاسبانيا ويوم يتم شوي فلوس بتروح الهند لانها رخيصه... مكاره بنتج عمووه...
ام خالد: جان ريتي...!!..مب زد عن ناصر وعبدالله مشابهتنهم بالمكر..ومن قبلهم حمد...
نورة: عيل وين تبيني ادق براسي امايه..؟؟ بلاد عربية ماريد...
ام خالد: والله انتي وسعيد تشاوروا انا مايخصني...

في ماليزيا عبدالله وعنود كانوا عايشين احلى ايااااام.... الحب اللي كانوا يحسون فيه ايام الملجه مايسوى شي جدام الحب اليديد هذا ...شخصياتهم المختلفه كانت متناسبه وايد ... يفهمون على بعض بسرعه..يراعون مشاعر بعض... ولهم حركه غريبه..اشتروا دفتر صغير.. معاه قلم... كل مايظاربون مهما كانت ظرابه صغيره يسجلونها في الدفتر.. عبدالله 1 – عنود 0 ... ويظحكون بعدها عالظرابه هاي...
طلعاتهم لين الحين كانت للاماكن القديمه وللطبيعة.. اماكن مافيها شوارع وعماير وحشره... كل المناطق كانت من اروع مايمكن..تحبس الانفاس من جمالها..كانها الجنه عالارض..سبحان الله... المرشد كان يوديهم المناطق ومن بعدها يخليهم بروحهم ياخذون راحتهم...ويوم يشبعون يسيرون له ويوديهم مكان ثاني ... الكاميرا مافارقتهم.. يصورون كل شي تقريبا..مره عند عنود ومره عند عبدالله... ومره عطوها المرشد يصور يوم دخلوا في الماي يلعبون...جنهم يهال...بس كانوا وايد مستانسين...
في ليله قبل مايرقدون كانوا يطالعون في كيمره الفيديو الفلم اللي صوروه... فجاه طلعت لقطة عنود وهي راقده...عقدت حياتها وشهقت...بينما عبدالله نقطع من الظحك يوم انكشف...كان ناسي انه صور هاللقطة..بس ماقدر يقاوم وهو يشوفها متكوده علىعمرها...ياب الكيمره وقعد يصورها... تمت عنود اطالع الفلم باهتمام..
عنود: قسسسسسسسسم بالله مردووووووده ياعبود...
عبدالله: هههههههههههه عادي انا رقدتي عادية مب انتي..!!!
عنود: انته رقدتك عادية.؟؟؟... ماعليه بتشووفها قريب وبتغير رايك فيها...
تم عبدالله يظحك عليها.... خلصت اللقطة وطلعت لقطة ثانيه كان سبال صغيرون متعلق فرقبة عبدالله وشكله كيووووووووووت ....عنود وهي تصور كانت ميته من الظحك....فجاه السبال نزل عن عبدالله وطار صوبها... صرخت عنود صرخه طرت الدنيا وركظت وهي بعدها مشغله الكيمره وكل الاصوات طالعه ...اللحظة كانت تذبح من الظحك ..خص اللي كان يشوفها وهي شارده عن السبال...صدق كان شكلها تحفه وتمنى عبدالله انه تكون الكاميرا عنده عشان يصورها...

الاثنين بعد المغرب سار خليفه مع حمدان وابوه لبيت عمه... يوم دخلوا البيت بسيارة خليفه كانوا هل البيت متيمعين خاري...فارشين وحاطين الكوار والظو واريه وهم حواليها.. بو خالد وام خالد...البنات حصه ونورة وفطيم... وخالد وميره وعيالهم...
فزولهم الكل يوم شافوهم دخلوا... وتبادلوا السلامات..من بعدها دخل بو خالد وخالد مع محمد وعياله الميلس... حصه لاحظت نظرة خليفه لها بالسلام الخطافي... وحمر ويهها...ييتهم هذي الجماعية ماتعني الا شي واحد....خليفه ماظيع وقته...كملت قعدتها معاهم لكن العقل ماكان موجوود...
في الميلس قعدوا يسولفوون ويتبادلون الاخبار...لين عقب...
بو سلطان: ياخوويه..نحن يايينك اليوم نسلم.. وعندنا شي نبغي نقوله لك..
بو خالد: خير يابو سلطان.؟؟

بو سلطان: الخير بويهك.... وانا بدخل بالمووضوع سيده لانه مابينا رسميات... نحن اليوم يايينك نخطب بنتك حصه...لخليفه...
ابتسم خالد..بينما بو خالد توتر...وتلوم على طول... بو خالد مايطوف عليه شي...وحس وقتها انه غلط يوم ماشاور خليفه من الاول بخطبة حصه... وقتها كان على باله انه خليفه مايبا بنته..بس الحين.... !!..
بو خالد: هيي ماشاء الله..هاي الساعه المباركه ياخوي...وخليفه ولدنا...وحصه بنتك... ونحن القرابه بينا قرابه دم وعقب صارت قرابه نسب... ومايصير خاطرك الا طيب ان شاء الله... بنشاور البنت وبنرد عليكم خبر باسرع وقت ان شاء الله...اما من ناحيتي انا ما اظني تحتاجه لاني موافق اكيد...لكن انته تعرف ان بناتي انا ماغصبنهن على شي..ولاازم اشاورها واخذ موافقتها...
بو سلطان: والنعم فيك يابو خالد ونحن ماقلنا غير هالكلام... ولو ماشاورتها انت انا بنفسي بشاورها...ولا تضغطون عالبنت...امممره على هواها...والله يكتب اللي فيه الخير ان شاء الله..
بو خالد: آآمين يامحمد..بس انا عندي شي ابا اتنشد عنه خليفه...
خليفه: خير عمي... آمر..
بو خالد: مايامر عليك عدو ياولدي.... انا ابا اسالك عشان يطمن قلبي... انته تخطب حصه بسبب الواجب..؟ والا لانك تباها..؟؟ .. جاوبني بصراحه...
ابتسم خليفه..
خليفه: عمي... انا من الاول حصه فبالي...واباها على سنة الله ورسوله... ومابحصل اخير عن بنتك زوجة لي...ولو شاورتوني من البداية بخطبة حصه كنت بقولك اني ابغيها..لكن ماعليه ياعمي اللي صار نصيب.. ومكتوب يصير... ونحن مب في ذيج الايام احين نحن عيال اليوم .. وتاكد اني ما خطبت حصه بسبب الواجب... اطمن انا مب غاصب عمري عليها ... انا اخطبها لاني ابغيها...
هز بو خالد راسه..
بو خالد: عدل كلامك....والنعم فيك ياخليفه... وان شاء الله نتنشد البنت وبنرد عليكم باسرع فرصه... يااااااااحياكم الله ....
وخذتهم السوالف لين ماحطوا العشا....
قبل مايطلعون الرياييل..حصه تعلثت وقالت انها مب مشتهيه عشى وبتروح ترقد...بس الصدق كانت خايفه ... متوتره...مب عارفه كيف بتكون ردة فعل اهلها تجاه هالخطبة...حبست نفسها في الغرفه وهي كلها توتر وترقب..
طلعوا الرياييل من الميلس.. لا اراديا التفت خليفه على للمكان اللي كانت قاعده فيه حصه..بس حصله خالي..ابتسم في خاطره.. شردت...وتلاشت الابتسامه بعدها...لا يكون تراجعت بس..!!!...ياويلها بذبحها... انتبه لحمدان عداله وهو يرفع ايده يسلم من بعيد ويظحك...
حمدان: ادري متولهين علي ...بيلس وياكم لو ياي بسيارتي بس الشواب احين بيردون البيت ولازم ارد وياهم...
خليفه: منو شواب..؟؟؟
حمدان: انته وابويه...شو اسويبكم... واحد اصلا شايب والثاني عرس واستوى جدي..وانتي احين بتلحقه...مامنكم فايده...
قال كلامه بصوت واطي لانه الحريم بعدهم مايعرفن بموضوع الخطوبه... ورد يزاعج يرمس نوره..
حمدان: نوروه ربعي هاتي الفلم مال الرزفه...
رفعت نورة راسها بترد عليه..وحست بنغزه من صبع فطيم...عشان ماترد الفلم الحين..
نورة: لااااااااااااااااااا بعدنا ماشبعنا منه حمدان..
حمدان: شوو ماشبعتي منه سيري هاتيييه ربعي يبون يشوفونه...
نورة: خله لين باجر..... بسجل نسخه منه....
حمدان: انتي محد يعطيج شي...
ظحكت نوره عليه ..وسلموا عليهم بو سلطا ن وعياله وركبوا سيارة خليفه وطلعوا...
الساعه عشر في غرفة الشواب..بو خالد كان يعق كندورته ويعلقها... وام خالد تسحي راسها...
ام خالد: ماقلت لي ياحمد... بو سلطان زيارته اليوم هو وعياله مب بدون سبب... شو علومه.؟؟
يلس بو خالد عالشبريه..
بو خالد: علومه تسرج... ياي يبا يخطب حصه لخليفه...
خلت العيوز اللي فايدها والتفتت لشيبتها... سالته وهي فرحانه.
ام خالد: بالله عليك..؟؟؟؟
بو خالد: هي والله.... الظاهر اني ظلمت الولد من البداية يام خالد... كان يبا حصه من زمان ونحن قربنا بربيعه المرحوم..
ام خالد: كل شي نصيب ياحمد... انزين وانته شو رديت عليهم...؟
بو خالد: شو بعد برد عليهم...خليفه حد يفكر يناسبه او لا..؟؟ قتلهم موافق بلا تفكير بس انتي تدرين اني ماروم اغصب بنتي ولازم اشاورها ..وهي احين حرمه ..وتفهم هالامور...
ام خالد: عاد بتكون خبله بنتك ان رفضته...
بو خالد: الله يهديها وتوافق... الله يعلم اني مرتاح من هالخطبه واحس فيها توفيق بنتي وراحتها... محد بيحشمها كثر خليفه...
ام خالد: والله انك صادق ياحمد... ارمس حصه انا والا ترمسها انته..؟؟
بو خالد: انتي رمسيها لكن اخافج تظغطين عليها يا ام خالد...
ام خالد: لا لا تحاتي مابضغط عليها ولا شي...
بو خالد: تاكدي انج ماتضغطين عليها... ورمسيها بالموضوع باجر بمعرفتج..
ام خالد: ان شاء الله يابو خالد..مايصير خاطرك الا طيب... والله يهدي هالبنت وتوافق...

في ماليزيا عبدالله كان منسدح عالشبريه... وعنود توايج من الدريشه وتوها طالعه متسبحه وشعرها منشوول على ظهرها...خرسان شوي.. عبدالله توه مسكر عن حمدان..ويتبسم...عقب ظحك شوي بصوت عالي...
عبدالله: سواها مسود الويه...وفغيابي...ماعليك انزين...!!
التفتت له عنود وهي ترجع الستاره مكانها..
عنود: بلاك تتقحطن روحك..؟؟ منو اللي سواها..؟
يلست عداله عالشبريه...
عبدالله: خوج...خلوووف...
نش عبدالله من تسديحته وتقرب من عنود وحط راسه عريوولها... قعدت عنود تلعب بشعره وهي تساله..
عنود: شو بلاه اخوويه...شو مسوي.؟؟
عبدالله: امس ساحب عمي وسار وخطب حصيص....
صرخت عنود من الفرحه وخوزت راس عبدالله عنها ونشت تناقز وادور عدال الشبريه وانواع الصرييييييخ والتحرطيمه...
عبدالله: عافااااان الله الحمد لله والشكر....بلاج بوي ينيتي... عقب ماخذتج عاد تتخبلين علي.؟؟
عنود: فال الله ولا فاااااااااااالك...فدييييييييييييييته اخووويه واخيييييييييييييييرا....تلقاة ميت من وناسته..
عبدالله: تعالي يلسي ورديلي تسديحتي الحين...يالله..
ظحكت عنود وردت يلست وحط هو راسه عريوولها وكمل..
عبدالله: يستانس بعد ماترد حصه عليهم بموافقه....لين الحين ماردت عليهم ..مادريبهم رمسوها والا لا...
عنود: بتوافق بتوافق.....انا متاكده...واي فديتك ياخووويه وفديتج ياحصه...لايقين على بعض...
عبدالله: وشدراج عاد انها بتوافق...؟؟؟
سكتت عنود وهي تتذكر نفسها يوم تتسمع كلام خليفه مع حصه..وكلمه حصه "موافقة ياولد عمي".. مستحيل تقول لعبدالله انه خليفه ماخذ موافقه حصه من اول...تتستر على اخوها ابرك...
عنود: احساااااااااااااس..بتوافق ان شاء الله...والله فرحتني بهالخبر...
رفع عبدالله ايده ومسك خصله من قصة عنوود الطويله...وسحب راسها بالخصله لتحت عدال ويهه...يتبسم لها باغراء..
عبدالله: تبينا نطلع نتحوط والا نقعد...؟؟؟
عنود: هممممممممممممم........نطلع...
عبدالله: مالت عليج...
عنود: هههههههههههههههههههه..والله يايين ننحبس هني..؟؟
عبدالله: المهم نكون رباعه...
عنود: بنكون رباعه برع....يالله قوم تلبس..وهالمره لا تتصل بابو محمود..خلنا ناخذ راحتنا رواحنا...
عبدالله: من عيوني الثنتين..

في البلاد...حصه كانت تقرا رساله خليفه للمره 100.... تتامل في المعاني اللي بين السطور...وتفكر...مارمسووني في السالفه لين الحين..يمكن ماكانوا ياييين يخطبون..!!!..لالا .. اكيد يايين يخطبون ييتهم متيمعين جذي مب طبيعية وراهم شي...بس ليش محد رمسني لين الحين..؟؟؟ معقووله يفكرون بخليفه يوافقون او لا..؟؟ ردت الرساله مكانها في العلبه وسكرت العلبه ودستها مكانها في الكبرت ..سحبت شيلتها البيظا ونزلت وهي ماسكه مكان العمليه اللي احيانا تحس بويع خفيف...الحمد لله بدا يخف ويختفي الالم... لولا توصيات عبدالله يوم يتصل اللي ماتخلص كانت بتكون نست سالفة العمليه ..لكن عبدالله مايخلي حد ينسى... حتى وهو بعيد يوصي عليها..حليلك ياخووي...حنون..ان شاء الله يكون مستانس مع عنود في ماليزيا...
دخلت الصاله وحصلت حمدان يالس مع نوره وفطيم وهو ميت من الظحك...ونوره تظحك وتسكت...تبا تظحك لكن خايفه شكلها من فطيم...كالعاده اكيد حمدان معلق على فطيم بشي لانه ويهها منتفخ قهر...
حصه: السلام عليكم...
سكت حمدان وهو يمش دموعه من الظحك..
حمدان: هلا هلا حصه...حياج..
حطت ايدها على خصرها...
حصه: حمدان بسك تعليقات على فطيم والله بطفربها..
فطيم: فديتج والله انتي اللي تحسين فيهم...
نورة: من الصبح طايحبها حليلها..
حمدان: قوليلها لا تحط راسها براسي...
فطيم: انته اللي تحط راسك براسي من شفتني وعرفت اني موجودة بهالدنيا وانته مطفربي ...مادري شو مكتوب على يبهتي "هدف للتعليقات والتغليسات"..!!!..
حمدان: لا يالطويله... شفت بويهج كلام ثاني...
نورة: ياعيني ياعيني... شو شفت بالله...
حمدان: يوووووووووم غايته..بقولها..
فطيم: ماريد اعرف وفره لنفسك...
حصه: ومتى غايته يا حمدان...؟
حمدان: يوم الله بيقول كلمته ...فضوليات تراكن وايد...
قفطت فطوم رغم ظيجتها...
نورة: خلاص فهمنا...هههههههههه...مبروك فطوم....
فطوم: ماعندج سالفه نوروه...
نشت فطوم ميته من القفطة وطلعت وراحت غرفتها... وهم يظحكون عليها ماعدا حمدان اللي يبتسم ببساطه بس نظرته غريبه وهو يطالع فطيم وهي رايحه...
حمدان: قومي نوروه هاتي الفلم...
نورة: هذووه في المكتبه...
نشت نوره وطلعت له الفلم وحطته في الباكيت وعطته حمدان... في هاللحظة دخلت ام خالد .. ووقفت عند الباب...
ام خالد: هلا ابويه حمدان...شحالك الغالي..؟؟
نش حمدان ووقف...
حمداان: مررررررررررحبا الساع... بخير الله يعافيج عمووه شحالج انتي..؟؟
ام خالد: الحمد لله ابويه شحالك اهلك..؟
حمدان: كلهم بخير وسهاله يسلمون عليكم..
ام خالد: الله يسلمك وياهم من الشر ..رد السلام عليهم ابويه..
حمدان: يوصل ان شاء الله...
ام خالد: استريح استريح....حصه امايه...تعالي ابغيج شوي...
طلعت ام خالد من الصاله وراحت للصالة الصغيره..وحمدان ابتسم وعرف بالموضوع...نورة استغربت..وحصه جسمها قام يهتز كله بدقات قلبها القوية... ياويلي..اكيد بترمسني في السالفه شو بقولها..؟!..قالت بصوت بالكاد ينسمع...
حصه: ان شاء الله امايه...
تبعت امها وهي تسحب ريولها سحب...سكرت الباب وراها بعد مادخلت الصاله الصغيره...يلست عدال امها..
حصه: خير اماايه.؟؟
ام خالد: خير يابنتي... انا برمسج بمووضووع.. وماباج تردين عليه الا يوم تفكرين عدل... في النهايه هذي حياتج ومستقبلج..وانتي حرمه وتعرفين مصلحتج...وفاهمة الدنيا...
نزلت حصه راسها وركزت بعيونها لحظنها....
مدت العيوز ايدها ومسكت ايد بنتها تشد عليها...وقالت بلهجة حنونه..
ام خالد: خليفة ولد عمج... يا وخطبج من ابوج..
حاولت حصه تثبت ملامح ويهها ...وما تتاثر وايد..لكن غصبن عنها..تاثرت.. ودرت توها بس انها من سنين..وهي تتريا هالجمله تنقال لها... "خليفه يا وخطبج"...ياللـــــه..!!... من متى وانا احب خليفه وانا ماعندي علم بالموضوع...؟!!!!...من متى..؟؟؟
ام خالد: ها بنتي..؟؟ شو رايج..؟؟
سكتت حصه مب عارفه شو تقول...لسانها مشلول...مثله مثل باقي جسمها... ادراكها بحبها اخيرا شل حركتها ولخبطها فوق تحت... خليفه والا سيف....؟؟؟ سيف والا خليفه..؟؟ منو اللي احبه فعلا؟؟...كلهم.؟!...منو اكثر من الثاني..؟؟؟... والا ولا واحد..؟؟..شو هو الحب اصلا وكيف اعرف اني احب.؟؟؟.. ياربي ...بموت...
ام خالد: حصه.؟؟ بلاج امايه ساكته عني..؟؟ انا مابقولج معلومات عن ولد عمج ولا بمدحه لج لانج تعرفينه زين مازين ومب محتايه حد يخبرج عنه...
حصه: امايه...كيف اعطيج رايي بدون ما اشاور ربي..؟!...(والتفتت لامها)... بصلي استخاره...وان شاء الله خير...اللي كاتبنه الله بيصير...
ام خالد: بارك الله فيج يابنتي... والله يثبتج على دينج وعقلج..ويوفقج فحياتج مع الانسان اللي يسعدج... وصدقيني خليفه مول مايتعوض...ابوج قالي ماضغط عليج وانا ماريد اضغط عليج ولا شي...خذي راحتج بالتفكير ومحد بيغصبج على شي ...لانج بروحج تعرفين مصلحتج وين...وبتختارين بنفسج اللي يصلح لج...
نشت حصه وباست راس امها...

حصه: لا تحاتين يامايه..ان شاء الله مابيصير الا كل خير..اعرف انج شايله همي وتحاتيني... بس صدقيني ماله داعي..نصيبي في هالدنيا بخذه... انابسير احين..تامريني بشي..؟؟
ام خالد: سلامتج يامايه...
طلعت حصه من الصاله الصغيره وراحت للصاله...نورة كانت بروحها مع فطوم..
حصه: حمدان روح..؟؟
نورة: هي استحى يقعد معاي بروحنا... شو تباج امايه..؟؟
حصه: بخبرج عقب... بسير ارقد انا...
ركبت حصه الغرفه وسكرت على نفسها الباب ودخلت تتسبح...

---------------------------
----------------------------
الجزء الرابع والخمسين

نورة وفطيم اطالعن بعض من بعد ماركبت حصه عنهن.... باستغراب..ياترا شو سالفتها ؟ شو قالت العيوز؟؟ ويوم طلعت ام خالد من الصاله وقعدت معاهن شوي قبل ماترقد...كانت تبتسم...سالت نورة بفضول..
نورة: امااايه... شو قلتي لحصه..؟؟
ام خالد: وليش الفضول..؟؟
نورة: اختي حبيبتي وابااعرف شو السالفه...!!
ام خالد: الله يسلمج خليفه ولد عمج خطبها من ابوج...
نورة وفطوم فجن ثاميتهن مستغربات من هالسرعه بالتصرف... فعلا خليفه ماظيع وقته....وبعدها شقن الحلووج..
نورة: واللـــــــــــــــــه.؟؟؟ وشو ردت عليج؟
ام خالد: قالت بتصلي استخاره وبتفكر...الله يهديها وتوافق...
رفعت نورة ايدها للسما..
نورة: آآآآآآآآآآآآآآآآمين....
فطوم: خليفه هذا يعني وايد اووكي يناسب حصه.؟؟
فطيم مااحتكت بخليفه ولد عمهن ولا تعرفه عدل ولا اهتمت به زود....حمدان الوحيد اللي كانت تظهر له..
نورة: يناسب حصه..؟؟؟... قوليلي النعال يصلح فرده وحده.؟؟؟!!!!..
ام خالد: عنلاااااااااااااااااتج ويا تشبيه جان خليفه وحصه نعلان خليتيهم...
نورة: ههههههههههه لا بس مثال امايه ريلاكس... بس والله فرحتيني..مسكين خليفه... احسهم وايد متناسبين هو وحصه...
ام خالد: انا احساسي يقول بتوافق...
نورة: انا بعد...
نشت ام خالد...
ام خالد: قومن رقدن يالله بلا هالسهر اللي بلا فايده...
ودخلت عنهن حجرتها.. التفتت فطيم بفضول صوب نورة...
فطيم: خبريني عن خليفه هذا...ماعرفه عدل..
نورة: شو تبين تعرفين عنه.؟؟
فطيم: كل شي تعرفينه...ابا احكم بنفسي اذا يناسب حصه او لا...صح مالي خص بس بعد...ههههاي...
نورة: الله يسلمج خليفه..متربي مع عبدالله اخوي...ربع وايد...كتوم...واحس انه حساس وطيب وايد...لكن مع ذلك حاااااار ..يعني فيه حراره مب بارد...همممممم حشيم.... يعني ماتخالط معانا نحن بنات عمه الا من بعد ماتخرج ورجع من امريكا....كان بس يعق علينا سلام خطافي ومايطالع فويوهنا بعد..يعني يستحي شكله مادري...متدين وخلوق...بصراحه ريال بمعنى الكلمه يعني....وفوق هذا يحب حصه ويتمناها...
فطيم: وش دراج انه يحب حصه..؟؟؟؟ ماخبرتيني من قبل..!!!
نورة: شفتي قرون الاستشعار..؟؟؟ هي اللي خبرتني..لاحظت عليه وعلى نظراته واهتمامه.. وارتجاف ايده يوم يشوف حصه...يعني يتلخبط وحليله...
فطيم: يازيييييييييييييينه والله... مب مثل اخوه المصرقع... عافان الله لا ارتباك ولا مستحى ولا مداراة مشاعر...
نورة: ههههههههههههههههههههههههههههههههه لو يسمعج بيعطيج بالمخده عراسج...
فطيم: هذا اللي اطريه انا.... معقدبي ماعرفه شو يبا بالضبط وشو فخاطره....
نورة: تلقينه هو بروحه مب عارف كيف يتصرف....يعزج وايد لكن اطبااعه مايروم يغيرها بعد...
فطيم: الله يعين.... ايه سمعي.... متى بنحول حجرتي فوق.؟؟ متحمسه انا ابا اتحول عدالكم...
نورة: صبري احين ماعندنا وقت بسبب الدراسه..خلي اجازة العيد العود تي... وبنرتب الموضوع..
فطيم: شو ترتبين انا مابكون هني ....اجازة العيد بسير عند اهلي...
نورة: انزين ماعليه قوليلي كيف تبين الحجره ونحن بنرتبها لج..
فطيم: لا مايخصني ابا اكون موجووده وياكن...
نورة: تعاييينابج...
فطيم: اخر الاسبوع هذا... شرايج..؟؟
نورة: عندي امتحان سعي السبت...
فطيم: عنبوو بدرسين له اربعاء وخميس وجمعه نورووه.؟؟؟
نورة: ههههههههههه لا... بس كان عندي تخطيط ثاني لنهاية هالاسبوع.
فطيم: شوووووو..؟؟؟
مالت نوره وربت راسها من راس فطوم بتآآمر...
نورة: تذكرين وعد حمدان لنا يوم كنا في البر ؟ مب قايل بيودينا السينما..؟؟
فطيم: هي...
نورة: بخليه يوديينا..بس كيف..؟؟ قوم امي مابيطيعون موليه...
فطيم: وانا بعد مابكون موجوده اخاف سعيد ايي ويشلني...
نورة: آآآآآآآآآآخ فديت هالطاري انا....قوليله انج عندج امتحان وواجبات للسبت ومابترجعين هالاسبوع الشارجه...
فطيم: ولو....عموه مابطيع عسالفة السينما..نسير رواحنا مع حمدان؟؟؟؟؟ مستحيل اطيع..والطامة الكبرى اذا درى ابوج...
نورة: مب شرط ابويه يدري...بنسير العصر وهو مابيكون هني..
فطيم: بيسال...وبعدين عيب عليج تطلعين من دون شور ابوج...
برطمت نورة..
نورة: صعبتي الامور يافطيم....
فطيم: هي اصلا صعبه..انا اقول انسي السالفه..
نورة: مستحيل... فلم شاروخ نازل يديد وابا اشوووفه في السينما مابفوت....بدبرلي صرفه...
فطيم: انتي تحبين تيبين المشاكل لعمرج....بس كل مره تسلمين...كيييييييييييف الله اعلم...
نورة: هبي يالحسوود....الحمد لله حظي عدل...وبدبرها سيرة السينما... بتشوفين..

طلعت حصه من الحمام وخلت شعرها مفتووح..ماكان لها مزاج تسحيه وتتعبل منه....مع انها ماتعرف ترقد وهو مفتوح....لكن فعلا متعايزه ومافيها عليه...انسدحت عالشبريه... مرهقه من التفكير...اكثر منه ارهاق جسماني...اخيرا صار اللي كنت اترياه... كلموني في السالفه... وابويه الظاهر عاطي موافقته....كيف مايوافق واللي ياييني خليفه..!!!!..اكيد انه طار من فرحته.....خليفه....!!..آآآآآآآآه ياولد عمي.... شعوري غريب اليوم يوم قالت امي انه يا وخطبني...مثل حلم قديم..نسيته..لكنه رجع تحقق...وسبب لي سعادة ماتنوصف...صدق ان الدنيا احيانا تظحك لك وقت ما تتوقعه.... وتكشر عن انيابها في وقت بعد ما تتوقعه...مستحيل اتم على حال... خسارة امالي مع خليفه من اول سبب لي جرح نزف شوي ووقف...لكنه كان مثل اليمر اللي مغطاي برماد...الرماد كان سيف....حبيته فعلا..وعزيته وتخيلت حياتي معاه باحلى مايكون..وخسارته سبب لي جرح ثاني اقوى...وماظني يبرا.... لكن رجعة خليفه كان مثل الهوا اللي طيرت الرماد...وبين تحته اليمر احمر ومشتعل ...!!...بس انا خايفه..!!..اخاف انه اللي صار معاي يتكرر...ساعتها فعلا مابتحمل...لا ان شاء الله انا ليش افاول عالريال.!!... بس اذا كنت بكون زوجته مكتوب علي انسى سيف...وانسى كل حبي له...لانه خليفه مايستاهل ابدا الخيانه حتى لو بالمشاعر او التفكير...صحيح كان اعز ربعه تقريبا بس بعد هي بتكون زوجته وبنت عمه والبنت اللي حبها وتمناها....مابيقدر يتحمل تقرنه مع شخص ثاني....حتى لو كان ميت... ياترى انا اسوي شي زين بموافقتي..؟؟؟ اخافه بسببي يعيش في جحيم بدال السعادة اللي متوقعنها...يارب ساعدني... اقوم اصلي استخاره ابرك لي...
قامت ولفت شعرها اي كلام وربطته وفرشت سيادتها وصلت استخاره ومن بعدها نامت بعد ماهدت اعصابها شوي...

الاربعاء نورة ماكان عليها دوام...بالمقابل فطوم من 8 وهي في الجامعه... وردت الظهر ودخلت ترقد على طول وماطاعت تتغدى... وحصه بعد رفضت الغدا ومب مشتهية والكل تقبل موقفها اكيد تفكر بعدها في الموضوع.... بالتالي نورة من بعد الغدا... وهي مبحلقه في اخوها ناصر... تفكر تقردنه...بس الشواب يالسين..وحريم العيال يالسات..وخالد بعد موجود..اذا نطقت بكلمة سينما بيفرها بكوب الشاهي على راسها..وهذا اقل شي يسويه...خالد مثل ابوي....اوففف... ظروري يعني هالسوالف بعد الغدا..؟؟؟ يالله روحوا.... ماعدا ناصر يقعد....اباه فسالفه...
زحفت عدال اخوها ناصر وخشت عمرها بينه وبين حمده حرمته....اللي خلا حمده تظحك عليها وتلز عنها شوي عشان تسوي وسع... ناصر رفع عينه للسما وقال الله يستر من طلباتها هذي... ما اطلع هالحب الا اذا بغت شي... التفت صوبها وهو رافع حاجب واحد ..
ناصر: امري الشيخه نورة بنت حمد...!! طلباتج..
نورة: فديت اللي يفهمها وهي طايره...ياخي احبك...
ناصر: عنبو هالويه لج.... مكاره..
نورة: هههههههههههههههههاي... (وتقربت منه تصاصره) .... خبروك ان خليفه يا يخطب حصه.؟؟
ناصر: اكيد بيخبروني يعني بيغبون عليه انا...!!
نورة: شو رايك؟؟ انا موافقه عليه..
ناصر: منو طلب رايج انتي.؟؟
نورة: وشمعنى يعني ياخذون راي اخوانها وابوها وماياخذون راي اختها..انا اعرفها اكثر عنكم كلكم..
ناصر: والهلاااا... جان بعدنا بناخذ براي الحريم....وليتج خذتي من عقلها ورزانتها شي دامج تعرفينها هالكثر..
نورة: اذا انا وحصه استوينا نفس الشي بيتنا هذا بيطيح عروسنا من الكآبة...
ناصر: افهم من كلامج انج انتي مثبته بيتنا فوق روسنا..؟؟
نورة: هي نعم...
ناصر: الحمد لله عيل ان بيتي انا برع هالبيت مب نفس السقف...
نورة: انته ليش تكرهني... انا اختك....واحبك..وطالعه عليك..
ناصر: دخيلج لا تقولينها بنتحر....حمده كيف مستحملتني انتي دام انه نورة مثلي..؟؟
حمده: ههههههههه ناصر ماجنك شرشحتها اليوم...حرام عليك خف عليها...
نورة: فديت حرمه اخويه انا.... عاد تدري انها تحبك بس لاني انا مثلك....
ناصر: حشى عليه انتي مب مثلي لا اتلصقين....
نورة: غصبن عليك...المهم.. ابا ارمسك فسالفه ظروريه... لاتروح ترقد الا يوم ارمسك...
ناصر: رمسي انزين بسالفتج الظرورية...
نورة: ماري ارمس جدام قوم ابويه وخالد... اباك انته بس في الصاله..
استهم ناصر...البنت سالفتها سالفه شي عندها اليوم..
ناصر: تراج روعتيني...شو بلاج..؟؟
نورة: لالالالالالالالالا لا تتروع...السالفه ماتخص حد وماشي صار...بس سالفه ابغيك فيها وعادية جدا..بس قوم ابويه وخالد مابيتفهمون..وانته تعرف كيف هم..عرفت..؟؟ عشان جي عقب مايسيرون يرقدون اقعد انت شوي
ناصر: مب مشكله...
نورة: تدري انك وسيم..؟!!
حمده: هههههههههههههههههههههه....
ناصر: قولي بعد اني وسيم لانج طالعة علي...
نورة: شفت اني طالعة عليك..نفس الافكار سبحان الله... هههههههههههههه..
ناصر: هههههههه نوروه جلبي ويهج عني...
نورة: هههههههه ان شاء الله.... بجلبه شوي وبرجع لكم...

نشت نورة وركبت فوق تشوف حصه....دقت الباب عليها ودخلت...حصلتها حاطه كرتون ويالسه عدال مكتبها اطلع كتبها الجامعية وتحطهن في الصندوق..
حصه: هلا نورة...
انسدحت نورة عالشبريه على بطنها...ورافعه ريولها فوق بدلع..
نورة: اهلين....شحقه ماتبغين غدا؟
حصه: ماشتهي والله.... الساعه 11 ناشه وكلت لي سندويجه..
نورة: سندويجة تترس بطنج..؟؟؟ ماعطيتج عيل شوي...
حصه: هههههه شو اسوي...مافيني اكل عيوش الحين...بس اشوفني مشتهية عصير رماااان من المطعم اللي عدالنا...
نورة: يالله وياج انا وفطوم اذا بطرشين...
حصه: امبونج انتي...حشر مع الناس عيد...
نورة: هههههه ..هممممممم...اقول حصه.... امايه خبرتني عن خليفه...
اطالعتها حصه بنظرة هادية لفتره وكملت شغلها في الكتب...
نورة: ادري انج ماطلبتي نصيحتي....بس بعطيج اياها على كل حال.... انا اعرف ان خليفه يحبج وايد...بس بغض النظر... صدقيني انه مايتعوض...ومايتفوت...وبيسعدج وايد...
ابتسمت حصه..
حصه: ماعندي شك بالموضوع هذا يانورة...بس اخاف انا اللي ما اسعده...
نورة: حرام عليج لا تقولين هالشي عن عمرج....اكيد بتسعدينه ان شاء الله... مابيي يخطبج اذا عنده شك انه بيكون مرتاح ومستانس معاج...
حصه: هذا زواج...والواحد مايظمن فيه شي لين مايجربه فعلا...ان نجح توفيق من رب العالمين..وان فشل..طاح الفاس في الراس....
عقدت نورة حياتها متكدره..شكلها حصه بترفض..!!!..الله يستر...لا اتخبلين ياحصه بليز...
نورة: انتي من شو خايفه بالضبط..؟؟؟
حصه: قتلج...اخاف اني ماسعده... اخاف اييه يوم يندم انه خذني.....ويعايرني باني كنت متزوجه من قبل...
شهقت نورة...
نورة: مسسسسسسسسستحــيــــــــــــــــــــل خليفه يسويها مستحيل...شلي هالفكره من بالج نهائيا....خليفه ريال فاهم الدين الدنيا وعايش حياته وعمره ماغلط لين الحين ماشاء الله عليه.... مستحيل يتردى تفكيره لهالسخف والخبال ويسوي هالشي فيج...
حصه: الريال الغيور يسوي اي شي.....فكري نورة... نحن شعرفنا بخليفه وباللي يفكر به..؟؟ منو منا كانت قريبه منه لدرجه انه نعرف رداة فعله...؟؟ انتي تدرين انه مب مثل حمدان دوم عندنا.... عبدالله الوحيد اللي خابزنه وعايننه عدل... نحن مااختلطنا معاه عدل الا من فتره قصيره وبمواقف بسيطه ماتعطينا الحق انه نحكم على شخصيته .... اللي يظهر جدامنا انه شخصيته حلوه ريال عاقل وحشيم ومتدين ويعزني ويباني... لكن منو يعرف هو كيف يعيش ويفكر..؟؟؟؟؟
فكرت نورة بكلام اختها....
نورة: انزين سالي عبدالله....عبدالله مابيغشج..وبيقولج اي شي تحتاجين تعرفينه....
حاست حصه بوزها..
حصه: عبدالله في شهر عسل ومستانس احين مع عنود ماريد ازعجه بمشاكلي..
نورة: انتي صليتي استخاره...
هزت حصه راسها " هي" ...
نورة: وشو حسيتي من عقبها...؟؟
حصه: عادي... ماطلع لي شي... ولا اني ارتحت من الخطوبه مثل ماصارلي مع سيف...ولا اني حسيت بظيج...مادري... ما طلع لي شي كحلم بعد...
نورة: افكارج هي اللي ماثره عليج.....
حصه: يمكن.... بتريا بعدني يوم ثاني قبل ما ارد على امي....والله اني خايفه....ابا زواجي هذا ينجح...ابا حد ياكد لي بانه مابيندم....وبيكون مرتاح معاي...
نورة: محد يعلم بالغيب ياحصه...بس نحن نرمس بحكم انه نعرفج ونعرف خليفه...وايد شخصياتكم متناسبه...وانتوا الثنينه متدينين..واي مشكله تواجهكم ترومون تحلونها بالعقل... ان شاء الله بتعيشون مرتاحين محد منكم بيندم ولا شي....هذا الشيطان يوسوس لج بس...
حصه: ان شاء الله خير...
نورة: بخليج احين انا عندي موعد مع الاخ ناصر...
حصه: شو عندكم..؟
نورة: ههههههههه بخبرج عقب بنتيجة الاجتماع....باي
طلعت نورة ونزلت تحت حصلت ناصر مع حرمته يالسين مع عيالهم لطيفة وسهيل...وهو كان يقرا الجريده ويسولف معاهم شوي... يت نوره وقعدت حذاله....
ناصر: الله يستر منج....
نورة: ييييييييييه بدينا عاد انا حتى ماقلت حرف...
حمده: هههههههههههههههه..الله يعينج عليه ناوي عليج اليوم... احين انا اسير بعد والا عادي..؟؟
نورة: لالا انتي عادي لج تصريح... بس خلج ايجابيه وسانديني اوكي..
حمده: ولا يهمج...
ناصر: يوم اقولج مكاره...غسلت مخج بسهوله...
نورة: اخي العزيز ناصر.......
ناصر بسخريه وهو مبتسم..
ناصر: .....نعم....
نورة: نتقدم لك برجاااء خالص كي تقبل عرض المساعده وتقديم خدمة بسيطه جدا باسم الاخوة.....
ناصر:...اهااااااااا السالفه فيها طلبات...واللي هي..؟؟؟
نورة: همممممممممممم الصراحه توه طلب صغير بعد طرا على بالي...
ناصر: اهلاااا.....
نورة: اولا: وهو الاهم...توني كلمت حصه.... مرتبكه...وتخاف من الموافقه لانها ماتعرف خليفه عدل ..فياريت تكلمها شوي...مب تقنعها...تكلمها عشان بس تعرف خليفه اكثر..انته ولد عمه واكيد تعرفه على الاقل احسن منا...
ناصر: هي قالت لج موافقه..؟؟
نورة: قالت انها متاكده انها بتكون مرتاحه معاه...بس تخاف هو اون يندم بسبب.... انته تعرف...المهم انها متردده بسبب خليفه مب بسبب انها هي ماتبغي....هي تبغي لكن خايفه منه هو..من شخصيته وتفكيره..تقول اخاف اني ماسعده...
فكر ناصر شوي بالموضوع...وهز راسه موافق...
ناصر: بكلمها.... هاتي طلبج الثاني...
اعتدلت نورة فقعدتها وسمت بسم الله.... وتحنحنت...
نورة: احمممم.... نحيطكم علمااا....بان ابن العم المدعو حمدان... وفي وقت سابق..بالتحديد في رحلة البر...قد قدم تحدي..لنا نحن شلة البنات...ان فزنا به ...يودينا مكان...ونحن فزنا.....
نقع ناصر من الظحك....
ناصر: وراج جلبتي اللغة للعامي اخر شي....
نورة: مارمت اكمل متحمسه اكمل لك السالفه...
وحمده من اول القعده وهي تظحك على نورة وخبالها...وتلتهي شوي بعيالها. بين فتره وفتره...
ناصر: ههههههههههههه...انزين ..وبشو وعدكن حمدان..؟؟
نورة: احم... حط لنا صلب زقاره ..ان صبناه بيودينا....السينما... وانا صبته...
عقد ناصر حياته...وسكت...
نورة: لا تخاف..نحن مانبا سينما اللي يلتمون فيها الشباب... ربعي خبرني عن سينما نادي العين..يحظرونها بس هنود...وتعرف افلام هندية.. .. بنسير هناك...
ناصر: تدرين ان ماعندج سالفه..؟؟ وانا اللي مودر رقدتي وقاعدلج قلت عندج شي مهم....
وكان توه بينش عنها...تشبصت فيه...
نورة: فديتك ...فدييييييييييييتك..فديتك اصبر شوي بس خلنا نتفاهم...
يلس...
ناصر: سينما ماشي...حمدانوه هذا بيخرب روسكن..
نورة: مره وحده بس...انزين شو الاعتراض انته تعال معانا...
ناصر: لا والله تبيني اقعد اربع ساعات اطالع فلم هندي ..دشووم ودشووم وصب...
كان يقصد الظرايب اللي في الافلام الهندية....
نورة: يالله عشانا ياناصر..بليييييييييييييييييييييييييز.... عمري ماطحت السينما خااااااااااطري اروح...
ناصر: اقنعي ريلج عقب ماتعرسين....
نورة: ناصر انا ماريد اكون وقحه..... لكن انته كذا مررره مودي حمده السينما...وفي دبي بعد...
ناصر: في دبي ...مب العين....كلها شباب...الواحد مايروم يظهر مع اهله...عيونهم بتطلع من ويوههم...بعدين سايرين وحظرنا فلم مصري مال هنيدي مب فلم هندي.....في فرق...
نورة: تحذر من التفرقه ياخوي....لا تقصر فينا ... انا والله مب قصدي يعني اني اقول انك مبدي حمده علينا لا بالعكس انته مب مقصر... بس الحق ينقال...حمده لا تزعلين... بس اخواني وايد يتساهلون مع حريمهم ويصعبون الامور علينا نحن...كله لا لا.... بس يوم ويا حرمته يسوي اللي يبغيه...
طالعها ناصر وهو معصب من كلامها... اشر على صدره بصبعه..
ناصر: انا مبدي حمده عليكن..؟؟ الله يسامحج...
نورة: اخويه حبيبي... لا تجلب الرمسه...انا ادري انك مب مبدنها علينا...وفاهمه منطقكم هذا... بانكم تبون تستانسون مع حريمكم..ولانهن حريمكن يعني حريم متزوجات مب بنات مثلنا....الحرمه المتزوجه تسوي اي شي تباه مع ريلها لكن البنات كل شي ممنوع عليهن عسب الرمسه.... لكن خلونا نستانس معاكم عالاقل..
ناصر: يابنت النااااااااس بييبلج الافلام اللي تبغينها اطالعيها هني في البيت طبي سيرة السينما عنج...
نورة: يعني بالله عليك منو يشتريلي انا الافلام طول هالسنين....؟ اروحي اشتريهن... ماريد افلام انا...ابا اسير السينما...مره وحده فحياتي ابا اروح السينما..واشوف فلم حلو...
ناصر: فلم هندي عااااااااد..؟؟؟
نورة: احب الهنود..
ناصر: مالت عليج انتي وياهم....
نورة: احين شو قلت....
ناصر: قلت لا اله الا الله...
حمده: ناصر لا تصعب الامور... اختي بعد مودنها عمر اخويه مره سينما نادي العين....تقول كلها هنود واحيانا فاظيه ... ودهن عن خواطرهن مره ....
ناصر: حمده...تحقينها علي انا اقعد بين لهنود..؟؟؟؟
نورة: محد يدري عن حد حرام عليك ناصر دخيييييييييلك..وبعدين حمدان هو اللي واعدنا هو بيودينا..طبعا معاك...
ناصر: اهلا....حمدان وبيطالع معاكن فلم هندي..؟؟؟ بتنجلب السينما كلها مصخره عيل...
حمده: ههههههههههه ليش..؟؟؟
ناصر: بيتم يتمصخر وينكت.... ومصيبه يوم يسوي عمره يصيح يذبحك من الظحك صدق... ويعق سفرته وحالته حاله يعني يتحمس..ويمش دموعه بالسفره ويسوي عمره مررره منتهي ومتاثر...وكله تمثيل اصلا..
حمده: ههههههههههههههههههههه حليله..
نورة: شوقتني احظروياه عشان نظحك....احين شو قلت....
ناصر: اوفففففففففف اذيتيني... خلاص يابوج مايسوى عليج... بوديج..
نورة: انا وحصه وفطيم...
ناصر: على راسي...
نورة: مشكور ياخويه...ماتقصر..
ناصر: فهمتي غلط....حبيني على راسي اول عشان اوديج....
نورة: ههههههههه كم وحده تبا....؟؟
ماتريت رده مسكت راسها وباسته اربع بوسات... الشي اللي خلا عيال ناصر يتظاحكون..وحمده بعد...
ناصر: يعني نتواعد مع حمدان ؟
نورة: هي حمدان هو اللي متكفل بالوعد هذا..بس تدري انته انهم مابيخلونا نسير معاه ارواحنا...
ناصر: اهااااااااا يعني انا تغطية لكن...
نورة: واحلى تغطية وحياتك....
ناصر: قردني انتي...
نورة: عندي من هالكلام وايد...مستعد تسمع .؟؟
ناصر: لا يابوج مافيني عليج بقوم ارقد لي ساعه قبل صلاة العصر... ويوم بتتفقون خبروني بشلكم...
نورة: نووووووووووووووم العوافي يارب....مشكور يالغالي انته...
ناصر: قلنا بس من التقردين...
نورة: لا والله انته صدق غالي فديتك..
ظحك عليها ناصر وروح بيته وتبعته حمده...ورجعت نوره لحصه تخبرها باللي صار بالتفصيل...

خليفه كان مستهم من هالتاخير بالرد.... صح انه مامر الا يوم واحد لكن حصه قايله له انها موافقه...معقوله غيرت رايها...؟؟ بذبحها... ماقدر اتحمل هالصدمة عاد....كان فسيارته ساير صوب عزبة ابوه يوم وصلة اتصال خارجي...ظحك وعرف انه عبدالله...
خليفه: مرحباااااا....
عبدالله: يالخااااااااااااااااين....
خليفه: ههههههههههههه هلا بالمعرس....ها شو الاخبار وشو العرس؟ حلو؟
عبدالله: اكيد تسال متحمس تبا تعرف لانك ناوي هاااااااااا.... عنبوو ياخلووف..اسبوع اسافر عنك ولا تتصلبي..
خليفه: اولا..والله مابغيت ازعج المعاريس...ثانيا...غلطان بالحساب انته مسافر السبت واليوم الثلاثاء... اربع ايام بس

عبدالله: ياخي ياغلاستك اليوم....المهم شخبارك؟
خليفه: بخير الحمد لله مانشكي باس... شحالك انته وشحال عنود...؟ مستانسين؟
عبدالله: وااااااااااايد والله وكلنا بخير... هااا خبرني..ردوا عليك قوم بويه.؟؟
خليفه: والله انا توني افكر بانهم تاخروا بالرد..
عبدالله: انته الا امس ساير تخطب وين تاخروا بعد..!!!
خليفه: بالنسبه لي انا تاخروا وايد....لا اتهنى لا برقاد ولا بعيشه...قاعد على اعصابي..
عبدالله: ياعيني عليك يالمغرم....
خليفه: جب.... ارتحت انته احين شو عليك لازم بتتشمت....
عبدالله: هههههههه تذكر..؟؟؟ تذكـــــــــــــر ياخلووووف شماتك علي....بس والله بعدك ماشفت شي مني اصبر بس وتحمل عاد هههههههه...
خليفه: هههههههههههه قسم بالله اتحمل اي شي المهم توااااافق...ادعي عبود دخيلك..احس انها بترفض دامها تاخرت هالكثر...
عبدالله: لا ان شاء الله الله بيهديها وتوافق..بدعيلك..بس بعدماتخطب رسمي بطفربك...على فكره ملجه مافي..
خليفه: نعمم؟؟؟؟؟؟؟؟؟؟؟؟ شخصك انته..؟؟ لا تدخل تم في ماليزيا....
عبدالله: ههههههههههههههه بتشوف....
خليفه: حرام عليك والله.....
عبدالله: ماشي حرام...المهم بخليك احين صرفت وايد فلوس عليك..هههههه
خليفه: ماستاهل يعني..؟؟
عبدالله: ماتستاهل لانك ماتسال عني... ولا عن اختك..
خليفه: ههههههههههههههههههه ادري انك تمزح بس ماعليه السموحه ..خلاص كل يومين بتصلك لين ماتطفر...
عبدالله: بنشوف اتصالاتك بنشوف...
خليفه: خلاص عيل سلم على اختي..وهالله هالله فيها....
عبدالله: قسم بالله فعيوني لاتحاتي...
خليفه: ادري انها فعيونك.. يالله عيل برايك مابطول عليك...
عبدالله: تمام..سلم عالاهل...فمان الله
خليفه: يوصل ان شاء الله...مع السلامه

سكر خليفه وهويبتسم.... ماتوقع ان مكالمه عبدالله بتريحه جي...مع انه ماقاله اشياء تريح زود بس تكلم كانه خطوبته من حصه امر واقع وبتصير لامحاله...يعني متفائل...وتفائل عبدالله يخليه هو بعد يتفائل.... ان شاء الله يكون صادق...وشعوره صحيح....يمكن حصه تتغلى علي قاعده عشان جي طولت... تبا توترني بس...

بعد مارجع ناصر من الدوام كان ياي ومعاه حمدان طالعين مع بعض من الشركه... دخل حمدان عند اخته ميره ويلس عندها شوي بينما ناصر على طول ركب عند حصه فوق وقعد معاها قعده مطولة شوي...وكلمها عن خليفه وعن رايه فيه وبالزواج هذا.. وطمنها من ناحية خليفه وعقلانيته....وبانه ريال وبيحشمها وما يتوقع انه بيي يوم وبيقولها كلمه شينه تظرها... اطمنت حصه شوي...عرفت ان نورة هي اللي خبرت ناصر عشان يكلمها.. وفعلا كلام ناصر ريحها شوي...وقبل مايطلع عنها قالها تنزل عندهم تحت...
نزل ناصر للصاله وشاف هناك نورة يالسه بروحها اجلب القنوات...يلس عندها ومسك تيلفونه واتصل بحمدان..وقاله ايي داخل...
اول مادخل حمدان كانت حصه نازله... ويلسوا كلهم في الصاله..
ناصر: البنات يقولن انته واعدنهن بسيرة سينما...
بطل حمدان عيونه واستغرب من هالهجوم المباغت.... وبحلق في نوره...سواياها محد غيرها مفضوحه...خيبه احين شو بيقول ناصر عني..؟؟؟؟
كمل ناصر كلامه...
ناصر: وعزرن علي اوديهن وياك.... يبن سينما نادي العين...
حمدان: هااااااااااااا..؟؟؟ هههههههههههههههههههههاي...عند لهنود عاد..؟!!
نورة: هي ابا اشوف فلم هندي...
حمدان: هههههههه مب مشكله...وانته شرايك ناصر؟
ناصر: بوديهن يابوك بس شوفلنا وقت عدل... يوم رفضت مدت لي لسان يرضفها بالطول هالقصيره..
اطالعته نورة بنص عين على التعليق لكن خطفت....عشان مايغيرون رايهم بسيرة السينما..
حمدان: مب مشكله...شو من الافلام انتي تبين تشوفين؟؟؟
نورة: بعطيك اسمه وانته اتصل وشوف متى بيعرضونه...
حمدان: خلاص..

وخذ حمدان اسم الفلم وقال انه بيتصلبهم وبيشوف متى عرضه..وقعد معاهم شوي بس استحى من ناصر وطلع لبيتهم...

-----------------------------------

الجزء الخامس والخمسون



في الليل يوم الاربعاء..رجعت حصه تصلي صلاة الاستخاره للمرة الثانيه..عل وعسى عالصبح يطلع معاها شي…وبعد ماصلتها نامت..وسبحان الله…حلمت في نومها انها بفستان الزفاف وكانت تبتسم بسعاده…لمحة بسيطه كانها ذكرى ماره عالخط السريع…لكنها تثبت في البال…واول ماقامت حصه من النوم وتذكرتها..ابتسمت…اللمحه او الرؤيا البسيطه هاي مهما كانت صغيره لكنها مفرحه…قامت من الشبريه حتى بدون ما اطالع الساعه كم..ودخلت الحمام تتسبح…خلاص..هذا نصيبي…بنزل اقول لامي رايي بدون تفكير يديد في الموضوع…بتقول لامها انها موافقه…يكفي الحلم اللي حلمته… مب هذي علامة من ربي عشان ترشدني باني بكون سعيده بالزواج..؟؟؟.. بتوكل على ربي على كل حال….
كانت الساعه 11 يوم الخميس …. نزلت حصه وحصلت نورة وفطيم مشتطات… يفرغن غرفة فطيم ويرتبن الاغراض..شكلهن من الحين يبن ينقلنها فوق…
حصه: شووو تسون من صباح الله خير…
نورة: الناس الضحى… ماعندنا وقت نبا نخلص حجرة فطيم اليوم …عالاقل الاشياء الاساسية…
حصه: وين اماية؟
فطيم: سارت العزبه…
حصه: لااااااااااه.؟؟…هممممممم اساعدكن..؟؟
نورة: لالالالالالالالالالالالالا….تبين عبدالله يذبحنا..!!
حصه: ليش عاده…انا بخير الحين….بساعدكن باشياء بسيطه مابشل ثقيل انزين….وين الخدامه عنكن؟
نورة: تطبخ الغداا…
حصه: احين شو بخصوص الاثاث..؟؟ فطيم عايبنج اثاث عبدالله..؟؟
فطيم: هي شو بلاه..؟؟
حصه: ماجنه ولادي شوي..؟؟
فطيم: ماعليج بلمساتي السحرية بخليه بناااتي غصب…
نورة: ماعليج منها البنت خبيرة ديكور..
قعدن البنات ينقلن الاغراض ويرتبنها في غرفة عبدالله الفاضية…وبعد ما نقلن الاغراض كلها..خلنها مكوده في الغرفه بلا ترتيب لانهن تعبن…وبيني وبينكم…. كان دبدوب فطيم العوود اللي هو هدية حمدان اول شي انتقل من الغرفه ودخل الغرفه اليديده….بعد ماكودن الاغراض في الغرفة اليديده نزلن تحت..عن الباقين اللي كانوا متيمعين عشان الغدا…
بعد الغدا دخلت ام خالد وبو خالد الغرفة يرقدون.. واستحت حصه تتبع امها عند ابوها ..ماعليه بتقولها عقب...يلسن البنات في الصاله بعد ماراحوا الكل ...وتوهن كانن بينشن عشان يكملن ترتيب الغرفه فوق الا والتيلفون يرن ..ربعت نوره الملقوفه وشافت رقم ناصر عالكاشف..متصل من بيته..
نورة: مرحباااااااااا...
ناصر: نوروه... حمدان متصل قبل شوي يقول عرض الفلم الساعه اربع يبدا... يعني من الحين روحن اجهزن...
نورة: والله..؟؟ ونااااااااااااااااااااسه...
ناصر: ان تاخرتن دقيقه بكنسل..
نورة: وانا مابعطيك سبب صدقني....يالله باااااااي..
وسكر ناصر من دون مايقول باي...ماينلام منقهر انه بيطالع فلم هندي ومع هنود بعد...وخبرت نورة البنات بالخبر وفرحن ...واختبصت فطيم المسكينه اللي اغراضها كلها متلعوزه ..المهم اربع الا ثلث وكلهن مصطفات في الصاله جاهزات للسيرة...ياهن ناصر وكان متسفر على غير العاده...متعوود هو يلبس سفرة وعقال دوم... واطنز عليهن يوم انهن جاهزات للسيره..لو طالب منهن شي ثاني مابيتنشطن جي...شلهن ووداهن لسينما نادي العين...اللي موقعها غريب ومخشوش...وتلاقوا هناك مع حمدان فسيارته..كان ناصر والبنات بعدهم في السياره..نزل حمدان من سيارته وهو لابس نظاراته الشمسيه وعلى ويه ابتسامه حلوه...وتقرب من سيارة ناصر ووقف عداله..
حمدان: هااااااااااه..؟!...شو الاخبار.؟!..
ناصر: بخير والله....هاا احين شو الترتيب..
حمدان: ماشي ترتيب...انا قصيت التذاكر...خمس دقايق وبندخل القاعه..
ناصر: زحمه.؟؟؟
حمدان: لالا....ماشفت وايدين..هذيل اللي تشوفهم انته طالعين من العرض الاولي..
ناصر: اهاااااااا زين...لانه الصراحه انا مافيني عالريحه....
حمدان: ههههههههههههههه ياريال انته وايد مبالغ ترا....اللي ايون هني متطورين غير..مب هنودنا العادييين...
ناصر: والله كلهم والهلا.....نفس الشي...
حمدان: لا بس جد يقولون الفلم شييييييييي... قصة يعني...
نطت نورة من ورا..
نورة: طبعااااااا شي هذا ذوووووقي...
قعد حمدان يسولف معاهم شوي..والبنات كانن متحمسات حدهن....اول مره يحظرن سينما...شي عجيب....ويسجلن كل شي يصير في الذاكره..بعد ما مرن الخمس دقايق نزلوا كلهم مع حمدان...ودخلوا القاعه المظلمة...البنات فجن حلوجهن...الله مثل الافلااااااااام...!!!...ويشوفن كبر الشاشه...كانت فعلا ضخمه...ناصر اختار لهن سيد مافيه ولا هندي قاعد... كان السيد كله فاظي...القاعه تقريبا ربعها بس مليانه اما الباقي كله فاظي...الهنود متجمعين في منطقة وحده بس ...يتلايمون على بعض اونهم....اما الباقي كله فاظي... قعدن البنات بهالترتيب... (فاطمة،نورة،حصة،ناصر) ... وعقن غشوتهن وتحجبن.. حمدان كان يحوص...مني ومنييي مايقر..يوم يا صوبهم ماقعد عدالهم...راقبه حمدان وهو يجدم شوي جدام...مب السيد اللي جدام قوم ناصر..لا..اللي قبله..كان عليه هندي واحد بس قاعد...يعني هندي اصل..الكشه مدهنه ومسحاايه على جنب.. والقميص الكحلي المخطط بابيض..والبنطلون الاسود..ناقص بس زنوبه لكن احترم نفسه ولبس جوتي...سار حمدان وقعد عداااااااااااله امره... فاطمه انتبهت له..اما البنات فكانن يشوفن الاعلانات اللي تسبق عرض الفلم...قال ناصر بصوت واطي لحصه...
ناصر: شوفي...بدينا المصخره ويا حمدان...هني الفلم الاصلي...
صدت بعينها حصه لحمدان ..اللي كان قاعد عدال الهندي ويهز راسه هزة هنود...وكل شوي يلتفت عالهندي اللي عداله ويكلمه بالهندي بكلمات متعارف عليها عند شعب الامارات كافه...والهندي فاج حلجه ويظحك ويطالع حمدان باستغراب...يقول فخاطره شياه هالمخرف يا ولصق فيني..قلت الكراسي.؟!... ونقعت حصه من الظحك... وفاطمه من اول تراقبه وكاتمه ظحكتها...نورة يوم سمعت حصه تظحك هي بعد صدت لحمدان ويوم شافت خدمته ظحكت هي بعد ...بس يوم بدا الفلم طنشن حمدان وقعدن يتابعن... ناصر انسدح في كرسيه...من اول الفلم تململ..معقوله بيقعد كذا ساعه يشوف هالفلم..؟؟؟...البنات كانت منبهرات من كبر الصورة...مبطلات عيونهن يستوعبن كل شي يطلع.. ويشوفن ادق التفاصيل...وكل شوي وحده منهن تلفت انتباه الثانيه على شي معين...بعد ربع ساعه من الفلم نش ناصر...خلاص طفر...اشر لحصه بايده تقعد مكانها ...سار لحمدان اللي داق سوالف مع الهندي ويسوي بايده حركات مع هز راس امممره مثل الهنود...اشر له ناصر عشان اييه...
نش حمدان وسار لناصر..
ناصر: احلف انته بس؟؟ مخلني متململ وانته يالس عدال الهنيدي؟؟..
ظحك حمدان..
حمدان: كسر خاطري يالس ارووحه في سيد كامل فاظي....
ناصر: اسمع..انته بلشتني بوعدك هذا...انته تحمل مسؤولية البنات لين اخر الفلم انا بيي وبشلهن...لاني ماروم اتحمل بسير احوط...
حمدان: بتخليني اروحي..؟؟؟
ناصر: محد قالك توعدهن...بس اقعد مع البنات لاتخليهن روحهن...وقبل مايخلص الفلم بشوي اتصلي وبييكم على طول عشان اشلهن..
حمدان: همممممممممم شحقه خلهن انا بوصلهن..
ناصر: لا ماريد الاهل يدروون انهن وياك..بقولهم انامطلعنهن...
حمدان: اهااااااا فهمتك ..مب مشكله ...مسموح..
ناصر: تمام....يالله فمان الله...
حمدان: الله وياك...
مشى ناصر للباب وطلع وحمدان سار وقعد عدال حصه...الطرف الثاني قاعده فطيم اخر وحده ومايقدر يقعد عدالها ..صح هو جريئ لكن الكراسي متلاصقه ومافيه على لسانها الطويل...يقعد عدال حرمة اخوي المستقبلية ابرك...
حصه: وين سار ناصر..؟؟
حمدان: سار يحوط وبيرد قبل مايخلص الفلم بيشلكن...مايروم يتحمل يشوف فلم هندي ...
حصه: اهاااااا...
ونقلت حصه الكلام اللي صار لنورة ونوره قالت لفطيم....كل الرمسه بالهمس...وبعدها سكتوا يتابعون الفلم..
وقت ماوصل الفلم للوسط...قطعوا العرض للاستراحه... وتشغلت الليتات.... بحلقت نورة بعيونها والتفتت لحمدان..
نورة: شوووووووووه؟؟؟ مابيكملون الفلم؟؟ ماخلص الفلم....
حمدان: يالبقره هذي استرااااااااحه....حد منكن يبا يسير الحمام..؟؟؟
قفطن البنات وهزن روسهن "لا"...
حمدان: بسير اخذ بيبسي وفراخ...لا اتحركن... وبعدين تغشن لو سمحتن لان الليتات شغاااله....
تغشن البنات ونش حمدان وطلع براا...بعد خمس دقايق رجع ووزع البيبسي ..وعلبتين فراخ..وحده لنورة وفطيم والثانيه لحصه وحمدان....قبل نهاية الفلم..في الجزء الاخير...كانت اللقطات محزنه....كلهن قامن يعصرن عيونهن يمنعن الصيحه...والدموع عن تنزل...حمدان كان يظحك ويوايج على ويوههن...يدري انه وحده منهن اخر شي بتبقها بصيحه...بس عمره ماتوقع ان هالوحده تكون فطيم...نزلت دمعتها وعلى طول مشتها..والبوز مبرطم والحاله لله...حمدان بغا يموت من الظحك عليها..خش ايده فمخباه يدور كلينكس حاطنه من قبل فيه...كان يايبنه مع الفراخ والبيبسي...وطلع وحده..ومد ايده لها...
حمدان: اندوج...لا تفحمين عاد فطيم...ههههههههههههههههههههههههههاي..
دزت ايده بالكلينكس اللي فيها ...
فطيم: ويا ويهك...ماتشوف شاروخ بيموت جدام بيت حبيبته..!!... مسكين والله...
حمدان: طالع والله مصدقه...!!!.
كملت فطيم مطالع وهي كل شوي تمش دموعها....ومسك حمدان تيلفونه واتصل بناصر عشان ايي...
وبعد ماخلص الفلم تمن البنات يالسات وهن مب مصدقات ان الفلم خلص...الود ودهن يعيدن العرض من اول ويديد.... صح الفلم قصته محزنه بالاخير بس واايد استانسن عليه...وحمدان ما نششهن يتريا الناس كلهم يظهرون من القاعه..واخر شي ظهروا هم..وكان ناصر يتريا برااا...جدام السيايير.
نورة: مشكوووووووووووووووووور ياحمدان على هالسيرة الممتعة ..وناصر بعد على طولة البال ولو انك خونت فينا وطلعت...
ناصر: عيل تبيني اتحمل هالفلم الطويل..
حصه: فاتك الصراحه رهيب..
حمدان: وعرب صاحوا بعد....
ناصر: لا والله....؟؟ ههههههههه
تحركت فطيم وهي فمكانها بشكل يبين انها انقهرت... وحمدان مكيف عليها ويظحك...ركبوا السيايير وساروا كل حد فدربه...المهم انهن خذن حقهن وسارن السينما...وكانت سيره ولا اروع....تمن يتكلمن عن السيره والفلم طول اليوم...
يوم ردوا المغرب للبيت...ام خالد كانت موجوده....
ام خالد: يالهياتات.... وين تحوطن هااا...؟؟
ناصر: وديتهن امشيهن شوي امايه...
ام خالد: انزين مايخالف لكن ماخبرن حد ولا استاذنن...
ناصر: تراهن وياي حق شو الاذن بعد...
ام خالد: المهم...حصه تعالي ابغيج...
نورة: نحن بنسير فوق نكمل ترتيب حجرة فطوم اليديده...
ام خالد: برايكن....
يلس ناصر وحصه وبينهم ام خالد...
ام خالد: بنتي حصه... صارلج يومين تفكرين واليوم الثالث...وتاخرنا عالعرب....ما وصلتي لراي بعدج...
قفطت حصه ونزلت عيونها للارض..
حصه: بلى امايه...

ام خالد: خبريني يابنتي بنرد عالعرب فضيييحه...
حصه: ..................... اللي تشوفونه...
ام خالد: شقايل يعني...
ناصر: يعني على بركة الله يا امايه....
ام خالد: ابا اسمعها من عندها عشان ماتقول فرضنا عليها راينا...
ابتسمت حصه بخجل..
حصه: ....موافقة يامايه...
مدت ايدها العيوز وهي تبتسم بفرح...وخذت حصه بحضنها..
ام خالد: فديييييييييييييتج يابنتي...مبروك الغاليه..الله بيوفقج ان شاء الله وبيسعدج..
ابتسم ناصر عالمشهد...
حصه: آمين...
نشت حصه وركبت فوق بدلت ثيابها وعقبها طلعت لقوم نورة وفطيم تساعدهن...
ناصر سال امه اذا بترد عليهم الحين...والعيوز رفضت وقالت انها بتخبر الشايب اول وبتبشره وهو اللي بيرد على اخوه بالخبر...
البنات وهن في وسط الترتيبات....
حصه: اقولكن....بخبركن شي..
وقفن البنات شغلهن وتمن يطالعن حصه بفضول....
حصه كانت قافطه بس اذا ماقالت لهن بيحتشرن...
حصه:..وافقت على خليفه...
ارتفعت صرخات الفرح وكل وحده فرت اللي في ايدها وين صوب حصه يبوسنها ويباركلها...كان فرحانات فعلا عشانها...لانهن حاسات انها بتتوفق هالمره...

نفس الليله بس بوقفت متاخر اكثر...الساعه 12..خليفه راجع من برا وهو مزاجة متعكر...ويحس ان الدنيا مسكره بويهه.... وطبعا بسبب تاخير قوم عمه بالرد....شو المعنى يعني..؟؟ في المستشفى تقولي موافقه وتاخذ لها اربع ايام بالتفكير..؟؟؟ طبعا هو ماكان يدري انهم ماخبروها الا بالثلاثاء..بينما هو خاطب بالاثنين..... وكل مايمر يوم عليه تزيد حالته انفعال...اكيد رافضه الفكره..اكيد تراجعت....والا ليش هالتاخير هذا...؟؟...بس والله ان رفضت ياراويها شغل الله كيف...دخل حجرته وهو يرقع بالباب وراه..اللي خلا ام سلطان تنتبه...وعرفت ان هذا خليفه لانه حمدان ياي من وقت...نشت من رقادها ولبست شيلتها البيظا وركبت فوق لخليفه.. وفتحت عليه الباب حصلته يالس عالشبريه وراسه بين ايديه في وضع انسان يائس من هالدنيا وغاسل ايده منها... رفع راسه واطالعها باستغراب انها واعية الحين..عقد حياته..
خليفه: هلا امايه..
يت ام سلطان وقعدت عداله..
ام سلطان: شو بلاك ابويه..؟؟
خليفه: مااااااشي بس راسي يعورني...انتي ليش واعيه لين الحين..؟؟
ابتسمت ام سلطان..
ام سلطان: راسك يعورك والا تحاتي رد قوم عمك...؟؟
خليفه: ترا هذا اللي يابلي ويع الراس امايه... ماردوا عليكم..؟؟
ام سلطان: بلى....
اعتدل خليفه فقعدته...وملامح ويهه كلها تغيرت...وتحمس...
خليفه: بشري...!!
ابتسمت ام سلطان...
ام سلطان: ليش حد يروم يرد ولدي انا...؟؟؟؟..
مارام خليفه يصدق... ماستوعب....مايستوعب غير كلمه وحده...
خليفه: امايه شو يعني..؟؟
ام سلطان: ردي علينا بالموافقه ياولدي...مبروك...
شقت البسمه طريجها لويه خليفه...حس بسعاده لا توصف...الصداع طاااار...والحين يحس كانه شارب خمر من خفة راسه...مستانس وفرحان...من قده...خلاص جدام الاهل وكل الناس ..حصه صارت لي...امل كنت اتريا احققه شهوووووووور....وتحقق..ياااااااااااااااااااالل ه ياحلاوة هاللحظة.... ماقدر يتحمل وتقرب من امه وحظنها بقوووو من وناسته... والعيوز تظحك...
ام سلطان: ههههههههههههه فديتك ياولدي... ربي يوفقك ويسعدك وياها..
خليفه: بموووت امايه بموووت من الوناسه مب قادر.... مب قادر اصدق...
ام سلطان: اسم الله عليك ياولدي ابعد هالطاري عنك... عمرك طويل ان شاء الله..
ابتعد خليفه عن امه وهو شاق حلجه...
خليفه: وعمرج ان شاء الله يامايا...بتشوفين عيالي جريب ان شاء الله..
ام سلطان: آآآآآآآآآآآآمين الله يسمع منك....باقي اخوك المصرقع حمدان ..ابا ادورله حرمه سنعه..
خليفه: خليه يعقل اول عقب يصير خير...احين بيخبلبج...بعدين ماخلص دراسته بعده..
ام سلطان: مب الحينه..عقب بدورله... برايك ولدي انا بس بغيت ابشرك..وثاني وديه لا ترقع ببيبان البيت نص الليل...
ابتسم خليفه باسف..
خليفه: سمحيلي كنت مظيج...
ام سلطان: ماتنلام...يالله ابويه تصبح علىخير..
طلعت العيوز عن خليفه وسكرت الباب وراها..بينما خليفه انسدح عالشبريه وعقد يديه ورا راسه وهو مستاااااااااااانس حده... ماجذبت علي....ماجذبت يوم قالت انها موافقه...بس اكيد انها خذت وقتها بالتفكير...وترددت يمكن...ماتنلام..لانها مرت بهالشي من قبل وتخاف تكرره...لكن ان شاء الله اني بعيش مع حصه حياتي باحلى مايكون....الحمد لله يارب...قام يتسبح وبعدها صلى سجدتين شكر لربه ورقد وهو مرتاح... لانه ماكان يرقد عدل في الايام الاخيره..

الجمعة وفي ماليزيا....عبدالله وعنود كانوا يتمشون في الشوارع...يوقفون على بعض المحلات...ويتحوطون...
عنود: عبادي..
عبدالله: نعم...
عنود: كم باقي عن العيد..؟؟؟
عبدالله: اسبوع ويومين تقريبا...
عنود: هممممممممم بنعيد هني..؟؟؟
عبدالله: هذا المتفق عليه...
عنود: عبدالله... خلنا نقضي الاسبوع الياي في حواطه بشكل مكثف..وبعدها نرجع الامارات عشان نعيد عندهم...
عبدالله: افااااااا...زهقتي ونحن ماكملنا اسبوع..؟؟
عنود: لا والله لا زهقت ولا شي بالعكسسس...بس السالفه ان نحن بروحنا هني...ومب حلو العيد الا ويا الاهل...مابنحس انه عيد...
عبدالله: يعني تبينا نتم اسبوع ونرد..؟؟
عنود: انته شو رايك..؟؟
عبدالله: همممممممممممم...عادي...بنرد وبنكمل حواطه هناك...
عنود: يعني موافق..؟؟
عبدالله: واروم اقولج لا..؟؟
عنود: فديتك والله ياعبادي...
عبدالله: لا تصدقين عمرج وايد...تراني اروم اقولج لا...
عنود: ههههههههههههههههههههه انزين ادري انك مب تحت شوووري يالس...
كملوا حواطتهم في ظحك وسوالف...وبدوا من الحين يخططون للاسبوع الياي عشان يشوفون اغلب المناطق اللي كانوا مخططين لزيارتها من اول...ماتم لهم غير اسبوع والمفروض يكثفون النشاطات...

خليفه من الخاطر الحين قام يستحي يسير بيت عمه...احين اذا سار هناك بيقولون هيييييييي ياي عشان حصه..!!... احسن له يمتنع الحين لين ما ايي عبدالله ويصير خير....بس ثلاث اسابيع لين ما ايي عبدالله ماشوف فيهم حصه..؟؟؟ صراحه وقت طويل....وطويل وايد بعد...لازم يحصل عذر عشان يروح... وكان من الخاطر يحسد حمدان اللي متى مادقت فراسه يروح لهم ويقعد معاهن بعد ولا عليه من حد....ليش انا مب مثله..؟؟؟ ماقدر اسوي اللي يسويه...هو غير عني... يمكن لانه اصغر عنهن عشان جي ياخذ راحته... هممممم يالله..بصبر وبشوف..

السبت يا بو سلطان مع سلطان وخليفه وحمدان لبيت حمد الكتبي عشان يتفقون على باقي التفاصيل ...وتاخذ الخطبة طابع الرسمية... وكان توه الوقت المغرب... حمدان ماقعد معاهم وسار داخل يغلس على حصه شوي.. وطبعا فاطمه كانت قاعده معاهم ....فجاه رن تيلفون حمدان طلعه من مخباه واطالع الرقم باستغراب وهو معقد حياته..
حمدان: آلوووو...!!
المتصل: .......................
حمدان: آآلووووووووو..؟!!
المتصل: ....................

سكر حمدان التليفون واطالع الرقم مره ثانيه...رد اتصل عليه واستغرب يوم حصل الرقم مقطوع...كيف مقطوع..؟!..توهم مستخدمين هالرقم عشان يدقوون...
فاطمه كانت اطالعه بفضول....قلبها نغزها....
حصه: شو بلاك.؟؟
حمدان: مادري...محد رد علي ويوم اتصلت حصلت الرقم مقطوع..!!!..
فطوم: ممكن اشوفه.؟؟؟
حمدان: ليش؟؟
فطوم: مجرد احساس....
مد ايده حمدان بالتيلفون لويه فطيم وهو حايس بوزه بابتسامه صغيره...حصه وفطيم تقربن من التيلفون يطالعن الرقم... .. فطيم تراجعت بعد ماتاكد احساسها وهي تحس بحريجه فصدرها....وحصه قالت بفضول..
حصه: حمدانووه..؟؟؟ منو عندك فجامعتنا..؟؟؟؟
رفع حمدان حواجبه.....
حمدان: فجامعتكن؟...عندي نورة وفطيم...منو عندي بعد..
حصة: فطيم هذيه يالسه...ونورة عليها امتحان احين مب متفيجه اظني تتصلبك واصلا مابتسوي هالحركه فيك...
حمدان: شدراني عاد انا...
رن التيلفون مره ثانيه...ونفس الرقم.رفع حمدان نظره لهن ورد عالتيلفون...
حمدان: آآآآآآآآلوووو....
المتصل:.............
حمدان: وبعدين يعني....رمسي جان فخاطرج رمسه...
سمع شهقة عل الطرف الثاني من الخط....مما اكد شكوكه فعلا بان المتصل بنت...
حمدان: هي دريت انج بنت ...لا تشاهقين رمسي خلصيني...منو انتي وشو تبين.؟؟؟...
تشجعت المتصله وحاولت تتكلم... وكانت مريم...اخت راشد..يايبة رقم حمدان من تيلفون اخوها..
مريم: آآ.... انا...وحده ..و ابا اسالك سؤال صريح...
عقد حمدان حياته...سامع هالصوت من قبل...بس وين....؟؟..لا مب صوت نورة مستحيل صوت نورة مختلف...هذا الصوت فيه بحة...سامعنه من قبل انا متاكد...
حمدان: ومنو انتي اصلا وباي حق تساليني هالسؤال الصريح..؟؟
مريم: انا وحده تعزك وايد...
انصدم حمدان...عرف هالصوت...وانعفس ويهه...ياربي هالبنت مصررره تسويلي مشاكل ويا اخوها..؟؟؟ نش عن الكرسي وطلع براا للبلكونه.... هالحركه خلت فطيم تطلع ينوونها...اكيد عرف البنت....والا عيبه صوتها..وحب يتعرف عليها ويشوف شو عندها....اصلا هذا حمدان لعااااب...والله اني مينونه يوم اني حبيته جي....وتمت تطحن وتحر وتبرد وهي يالسه مكانها... حست بالخيانه.. يخونها وهو يالس عندها ...مايحاول يغبي بعد...آآخ يالقهر...

في البلكون رجع حمدان يكلمها وهو متغيظ....
حمدان: سالي سؤالج....
مريم: ابا اعرف..اذا فيه وحده بحياتك او لا...؟؟
حمدان: وايدات فحياتي....
مريم: اقصد...وحده تحبها...
حمدان: موجوده الحمد لله....
تاخر الرد من عند مريم...احسن..خلها تنصدم وتتادب...مالها حق تشوه سمعتها وخصوصا سمعة اخوها حتى لو كانت معاي...الله يستر بس...
مريم: تقرب لك؟؟
حمدان: لا...
مريم:عيل؟
حمدان: اعتقد مالج خص...منو انتي؟؟
مريم: قلت لك...وحده تعزك...
حمدان: همممممم...شوفي ياخت راشد....عيب اللي تسووييينه... انا اقدر لج مشاعرج لكن انا ما احس بشي صووبج ولا اعرفج ولا شي... بس ذاكرتي قوية وتذكرت صوتج...وانا ماجذبت عليج...فعلا فيه وحده فحياتي احبها وابغيها على سنة الله ورسوله ...ياريت تودرين هاللعب هذا.. وتصونين اهلج واخوانج ممكن؟؟..
مريم:............
حمدان: الله يوفقج فحياتج ومع السلامه....
سكر التيلفون بويهها ومسح الرقم الاخير...هاللي كان ناقصني انا بعد...ماحصلت تتصل الا يوم فطيم يالسه..؟؟ احين شو بتفكر هالثانيه فيني..؟؟..لو رديت ادخل بيسوون لي تحقيق.. وانا مافيني عالاسئله لاني ماعرف اجذب...خلني اروح عند قوم بويه ابرك...
نزل الدري الامامي وراح للميلس....
بعد عشر دقايق اتصلت نورة على تيلفون البيت عشان يطرشون لها الدريول..لانها خلصت امتحانها... ويوم وصل الدريول كانت العيوز راكبه بعد...
نورة: اهلييييين امايه... من وين يايه؟؟
ام خالد: ييايه من الخيااااط... يبت لكن ثيابكن مال العيد....
نورة: هذيلا الجلاليب اللي مفصلتنهن انتي على ذوقج هااا..
ام خالد: هي نعم...شسويتي بامتحانج؟
نورة: الحمد لله زييييييين....

اول ماوصلت نورة للبيت ماقعدت معاهن ركبت على طول غرفتها..بدلت ثايبها وصلت العشا وفتحت الكمبيوتر..ارسلت رساله لسعيد..
" عيوني سعيد..
شحالك؟؟ ان شاء الله بخير وعافيه...
ادريبك زعلان عليه صارلي كم يوم مارسلت....بس انا عندي خبر اليوم لك فلللللللللته..

تذكر الشي اللي قلت لك اترياه يصير بس ماخبرتك عنه..؟؟

صااااااااااااار...
تعرف عاد شو الخبر..؟؟

خليفه ولد عمي خطب حصه...والرياييل حاليا في الميلس يتفقون على باقي التفاصيل...
انا وايد مستانسه...شو رايك نسوي عرسنا وعرسهم رباعه..؟؟؟
ههههههههاي..
اتريا رسالتك
وانته دير بالك على نفسك..
باي باي"

مر الاسبوع هذا سريع.... عند الكل... نورة وفطيم كانن مشغولات بالدراسه...حصه مشغوله بالتفكير... خليفه شاغل نفسه عشان مايفكر وايد في حصه وبشوووقه لها... عبدالله وعنود شاغلين نفسهم بعد بالحواطه والوناسه.. حمدان كان مرتبك... فطيم تصرفاتها غريبه صوبه.... اكيد ماخذه بخاطرها بسبب سالفة التيلفون...احين كيف اشرحلها هذي بعد..بدون ماقول ان هذي اخت ربيعي..؟؟ شو اسوي..؟؟؟ مايهون عليه زعلها....
يوم الخميس كانوا قوم عبدالله في المطار..يسلمون على بو محمود اللي مستحملنهم طول اسبوعين...ويشكرونه على صبره عليهم...ركبوا الطياره وهم مستانسين انهم بيردون البلاد...صدق ان العيد مب شي يوم تكون بعيد عن هلك...
---------------------------------

الجزء السادس والخمسون

الجمعة كان بيت حمد كله معزوم عالغدا فبيت العم محمد..بمناسبه الخطبه طبعا...يعني بشكل عائلي بحت...ومن بعد صلاة الجمعة ساروا كلهم هناك..فطيم ماكانت تبغي تسير بس عشان خواطر بنات عمتها راحت...ماكانت تبغي تشوف حمدان..ولا تحتك فيه...يكفي اللي صار منه..خلاص قررت انها تنسى هالخبل الصايع...صدق مينونه يوم فكرت فيه بجديه...!!...نورة كانت مب عارفه شو الموضوع وشو اللي صار فغيابها.. مع انها سالت فطيم لكن ماردت عليها...حصه كانت ملاحظة التغيير اللي على فطيم وانها عصبت وانقهرت..لكن بما انها حصه...مابغت تدخل بالموضوع...
وصلوا بيت العم والرياييل طلعوا يستقبلون بو خالد وعياله...وام سلطان بعد طلعت تقرب بام خالد وحريمها وبناتها... حصه ونوره اول شي سارن يسلمن على عمهن محمد طبعا مع ميره حرمة خالد..بما انه ابوها..... خليفه تم مييييييييييييييييت محله يوم شاف حصه تقربت...صح كانت متغشيه بس المهم شافها... حتى يوم سلمن سلام جماعي عليه وعلى خوانه ماعرف يرد عليها...من متى ماشفتها..اوووووووووووف...اسميني متووووووووووله....بس اذا بينعقد لساني كل مره اتوله فيها ابرك لي ما اتوله ممررررررررره عيل...دخلن الحريم داخل البيت والرياييل للميلس...
في نفس الوقت اللي طلعوا قوم حمد من بيتهم سايرين صوب بيت محمد... وصلوا قوم عبدالله بتكسي الغزال يايييين من مطار دبي... اونهم بيسوون مفاجأه.. بس المفاجأه كانت لهم يوم وصلوا البيت ودخلوا ماحصلوا حد فيه... وقعدوا يظاحكون عالسالفه.... بس كان فيهم فضول فظيع يبون يعرفون وين ساروا هالجماعه كلهم..؟؟؟.. ان شاء الله مناسبه حلوه مب محزنه....دخلوا قسمهم وريحوا شوي...
في بيت محمد..البنات كانن مستغربات القعده بدون عنووود... صح باقي الحريم سوالف وظحك بس عنود غير..بس كملن القعده بدون تذمر مع باقي الحريم...وخلص الغدا.. وصار وقت الرجعة للبيت احين...
يوم رجعوا البيت... وكل حد سار غرفته يرتاح شوي.. بعد الغدا الدسم هذا... مرت حصه اللي غرفتها اقرب شي لقسم عبدالله اليديد..وشافت الباب مفتوح.. انقهرت من اهمال البشكاره.. وراحت عشان تسكر الباب..بس يوم تقربت شافت شنطتين كبار محطوطات في صالة القسم عدال الباب... وشهقت يوم فتحت الباب حصلت الغرف مسكره...مسود الويه ياعبووود.. مسوي مفاجاه اونه...انخش هو وحرمته ورقدوا اكييييييييييييد... بروح ابشر اماااااااااايه... سكرت الباب وبدلت ثيابها في الغرفه وطلعت تخبر امها..بس هذي الثانيه رقدت ..ماصدقت توصل عشان ترقد شكلها ...بعدين بو خالد داخل واستحت تدخل عليهم...خلتهم وسارت عند نورة تخبرها بالخبر..
فيصل اللي يشتغل بالجمارك..شاف عبدالله في المطار بالصدفه... وعرف انه رد البلاد..بالتالي خبر عليا وعليا خبرت سعيد.... اللي قرر يروح العين يسلم عليهم كلهم لانه اصلا اشتاق لنوره...ويبا عذر عشان يسير هناك ..وشي ثاني انه يبا يودي حق فطوم مصروووفها...لانها مايت البيت هالاسبوع...
العصر نشوا المعاريس وسلموا على كل الاهل.. وطبعا قعدوا معاهم يخبرونهم عن كل شي صار وياهم في ماليزيا... وشي اكيد ان خبر وصولهم انتشر حتى عند خليفه وحمدان..اللي ماصدقوا يحصلون سبب عشان يسيرون بيت عمهم حمد... وسعيد اللي اصلا من الساعه خمس العصر طالع من الشارجه ياي للعين... المهم انه بعد المغرب تقريبا كلهم وصلوا لبيت حمد...خليفه وعبدالله كانوا في الميلس..وحمدان من بعد ماسلم على عبدالله وقعد معاه شوي راح للبيت... ظروري يكلمها هالطويله..مايصير اتم فاهمتنه غلط جي....
سعيد اللي وصل توه وقف سيارته ورا سياره حمدان... يعني من صوب البيت.اللي بيطلع وبيشوف الحوش مابيشوف سياره سعيد لانه سيارة حمدان مغطية عليها... راح سعيد الميلس يشوف منو فيه موجود...
في هاللحظات.. فطوم من سمعت صوت حمدان شردت غرفتها...دخل حمدان الصاله وسلم على اخته عنود والبنات...ماقعد عندهن وايد ..لانه كان متوتر ومب على طبيعته... طلع لبرا الصاله وزقر نورة..
نورة: خير حمدان..؟؟
حمدان: الخير بويهج...نوروه...انا بسير البلكونه..زقريلي فطيم..
نورة: نعمممم..؟؟؟؟؟
تململ حمدان بوقفته وبان عليه الضيج...
حمدان: نوروه فطيم زعلانه مني لسبب هي فاهمتنه غلط..ابا اشرح لها الموضوع بليز...ترومين تيبينها البلكونه بدون ماتدري اني طالبنها...لاانها مابطيع تي...
فكرت نورة بالموضوع... وبسبب تهورها وافقت..طلع حمدان للبلكونه ويلس عالكرسي...بعد شوي يت فاطمه وهي اطالع ويه نوره عدالها بفضول مستغرب...
فطوم: انزين ووصلنا البلكونه وبعدين..؟؟؟
وقف حمدان يوم شافها وصلت...وفطيم انصدمت وفجت ثمها... دزتها نورة دزة خفيفه..
نورة: ايا كان الموضوع بينكم.... حلّــوووه رجاءا لان شكلكم يلوع بالجبد جي....
خلتهم نوره ودخلت عند البنات... وفطوم فكرت تدخل مره ثانيه بس بعد كان فيها فضول تبا تعرف شو يبا حمدان بشكله المتوتر اللي ناااااااااااااادرمايظهربه.. قالت وهي تتصنع اللا مبالاة...
فطوم: نعم ..؟!!
رفع حمدان ايده بتوتر ونزل راسه وهو يحك بصبعه حاجب واحد..بارتباك...
حمدان: آآآ....فطوم انتي...معصبه علي من شي..؟؟
فطوم: وليش اعصب..ومنو اكون انا عشان اعصب...ليش انته سويت شي..؟؟؟
ماحب حمدان هالطريقه بالكلام....
حمدان: لا تكلمييني جي...
فطوم: كيف تباني اكلمك..؟؟
حمدان: مثل قبل...
فطوم: قبل كيف..؟؟
تافف حمدان..
حمدان: باهتمام ..عالاقل....
فطوم: اهاااا..ذاك اول..يوم كنت احس انك جدير بالاهتمام...
ابتسم حمدان بالم وهو منصدم من كلامها....
حمدان: افاااا....يعني احين مب جدير بالاهتمام...؟!!!..
سكتت فطيم وهي اطالع الارض....
حمدان: فطيم..انتي فاهمه شي غلط..انتي زعلانه بسبب البنت اللي كلمتها..انا مابغيت اخبرج عنها لان الله يستر على عباده فليش نحن مانستر عليهم بعد..؟؟... لكن بما انج على موقفج بخبرج..البنت ذيج هي اخت ربيعي...وانا ماعرفها ولا شي..مادري من وين يابت رقمي...تبا تسالني اذا كانت فيه وحده فحياتي.. قتلها موجوده واباها على سنه الله ورسوله وكنت اقصدج انتي... وسكرت بويهها بعد...والله على ما اقول شهيد اذا كنتي مب مصدقه... لا تخلين امور تافهه تاثر على رايج فيني...انا صدق اطفربج واغايظج لكن صدقيني افكر فيج بجدية وعمري مابلعب بمشاعر وحده اعتبرها من الاهل...
تمت فطيم اطالع فويه حمدان ..متاثره بكلامه ومشاعرها متناقضه....معصبه لانه كلم بنت جدامها..بس ماتشك بصدق كلامه في الحقيقه....حمدان مايجذب...اصلا مايعرف يجذب وهو غالبا صريح بمشاعره...فرحانه باللي قاله بانه يفكر فيها بجدية...اخيرا قررت تسامحه....البنت اللي متصله مب العكس عشان هي تعصب... واكيد انه طلع بسبب انه عرف انها اخت ربيعه وخاف يفضح اي شي جدامهن... مسكين حمدان..ليش حكمت عليه بسرعه جي...؟؟...
ابتسمت له
فطيم: حصل خير...
حمدان: يعني مصدقتني...
فطيم: انته تقول الصدق..؟؟
حمدان: هي وقسم بالله.....
فطيم: خلاص عيل مصدقتنك....
ابتسم حمدان....
حمدان: ..... اقولها..؟؟ شكلها وقتها مناسب احين...
ظحكت فطيم...تدري انه يقصد كلمه " احبج"...
فطيم: هههههههههههه لا لا تقولها...
تساند حمدان عالايدار اللي عداله....وهو يطالع ويهها بتسليه.. لاهي عن كل شي..مايشوف حواليه الا فطيم...
حمدان: مب على كيفج.....فطيم....اطالعيني...
اول ما رفعت نظرها له..
حمدان: احبج...
شهقت فطيم...ماواحت تستمتع بسماعها هالكلمه.. غطت ثمها بايدها وهي اطالع ورا كتف حمدان.... عقد حمدان حياته وصد وراه.... وتلاقا مع عيون سعيد اللي اطلع شرااااار...
انصدم حمدان...واستوعب الموقف في ثانيه.....
حمدان: سعيد..!!!!!!!...
لو النظرة تذبح.... جان حمدان وفطيم ثنيناتهم مدفونين حاليا.... سعيد فعلا كان وده يذبحهم..بس عقب مايشرشحهم.... كيف فطيم وبعد كل التوصيات والثقه والدفاع عنها ولصالحها عند الوالد..تخون هالثقه.... وكيف حمدان ربيعي يطعني فعرضي...؟!!!...
ثبت سعيد نظرته على فطيم ... نظرة احتقار وغضب.... فطيم حست انها بتموت لا محاله...دخلت داخل البيت وهي تناهي كانها راكظة ميل.. وركبت فوق على طول لغرفتها وسكرت على عمرها الباب وهي تصيح من الخوف والاحباط والندم....
سعيد كان شاد ايدينه على جنبه...يحاول يمنعهن قد مايقدر انهن مايمتدن لويه حمدان ويكسرن خشمه.... مع انه خاااااااطره يسوي هالشي في هاللحظه....
حمدان كان متوتر حده...مب عارف كيف يشرح الموضوع..
حمدان: سعيد...الموضوع مب مثل ما انته تفكر....
قال سعيد بصوت واطي وهادي...وخطير..
سعيد: صار بينكم موضوع ينرمس فيه بعد ياحمدان..؟!!!..
حمدان: سعيد...امانه لا تفكر غلط.... نحن ماسوينا شي نندم عليه ولا غلطنا...عمري ماغلطت فحقها انا...
سعيد: كل شي اتصوره ياحمدان.....الا انك انته ربيعي تطعني فعرضي... صح الغلط راكبنها هي لكن يركبك انته بعد....هذي اختي....تعرف شو يعني اختي..؟؟؟
حمدان: اعرف بس سعيد اللي صار غصبن عنا ...
سعيد: انته اصلا ماتعرف الحشمه اشوووو....
نورة استغربت التاخير بين حمدان وفطيم وطلعت تشوف شو الموضوع....وشافت سعيد..وانصدمت..ماقالها انه بيي..بس لاحظت الوضع متوتر بينه وبين حمدان ..شكلهم يتنازعوون.....وشهقت..خيييييييبه جان ماشاف فطيم وياه....طلعت برا ..
نورة: سعيييد..هلااا... شو بلاكم...؟
لبسها سعيد وهو مثبت نظرة على ويه حمدان...
حمدان: سعيد بلاك.... انته بنفسك مريت بهالشي من قبل...انا احبها...ماغلطت عليها ..واباها على سنه الله ورسوووله مب العب عليها....

اظيج سعيد بزياااده ومسك حمدان من كندورته ...وحمدان متحمل بس عشان سعيد يخفف ظيجته على فطيم... عصبيته شي متوقع...زين منه انه ماسك نفسه للحين وما مد ايده عليه..
سعيد: لا تيبها على لسانك..تسمع.... لا تيب طاريها علسااانك ترا ماشي بيمنعني اني اذبحك احين حمدان...
بس حمدان ماكان خايف على نفسه ...كان خايف على فطيم...
نورة: سعيييييييييييييد بلاك شو صااااااااار.. لا تسوي جي دخييييلك...
حمدان: هذي نوره واقفه... كم مره قلت لها وبينت لها انك تحبها...كم مره تلاقيتوا بالدس. من قبل ماتخطبها...
شد سعيد ايده على حمدان...
سعيد: لا تقارن مسود الويه.....نوره بنت عمتي وانا خطبتها.... اختي انا ماتقرب لك شي....ومالك اي حق عليها...كيف تجرأ انته تسوي هالشي فيني هااااااااااا...كيف..؟؟ عنبو مافكرت باعراض الناس...لكن الشرهه مب عليك الشرهه عليها هي ملعونة الصير...
نزل ايده عن حمدان وتقرب من نوره كانه بيظربها...
سعيد: حجرتها فوق..؟؟
قالت نورة بارتباك..
نورة:...هــ ... هــي...
مشى سعيد وكان بيدخل البيت لولا ان حمدان مسكه من ايده وسحبه براا مره ثانيه ودقبه عالايدار وهو ماسكنه...
حمدان: سعيـــــــــــــــــد..... لا تمد ايدك عليها....ياويلك...اذا في خاطرك ظرب جدامك انا بس فطيم لا تمد ايدك عليها....
دزه سعيد بعيد عنه...
سعيد: ابتعد عن هالموضوع ....احسن لك..ابتعد عنه نهائيا...لسلامتك الشخصية والا ترا ما بمسك عمري عنك عقب صدقني... بس حشمة اهلك ساكت عنك للحين...
دخل البيت وركب فوق بسرعه وشكله مب ناوي الا عالشر... تخبل حمدان... فطيم بتنظرب اليوم...مسك نورة من ايدها بقو...
حمدان: سيريله هالخبل... لا تخلينه يمد ايده عليها نوره دخيلج... ركظي...
نورة كانت بروحها في حاله.... تحس انها هي سبب هذا كله.... هي بعد شو...هي السبب...مب هي اللي شجعت فطيم من البدايه انها تظهر لحمدان..وشجعت مشاعرهم لبعض....غبية...ملكة الغباء بعد... ركظت ورا سعيد اللي وصل غرفة عبدالله السابقه ودق الباب...
فطيم فزت من داخل...هذا سعيد..ياويلي...هذا سعيد....شو اسوي ؟؟؟...بيظربني والله بيظربني...بس اذا تاخرت بيكسر الباب عليه..وبيسويلنا فظايح...ياويلي... بس شو اسوي..مافي مفر..خبز خبزتيه يافطيم كليه...نشت وهي ترتجف من فوق لتحت...وفتحت القف في الباب اللي اول ما انفتح دزه سعيد بقو... اول ماشافها كانت نوره وراه...تحاول قد ماتقدر تمنع اي شي يصير...بس ماكانت بسرعه ايد سعيد اللي ارتفعت فوق ولمت ويه فطيم بطرااااااااااااااااااااق طيرها للشبرية....
نورة: سعيييييييييييد لااااااااااااااااااااااا......
ركظت نورة وحظنت فطيم الي تصيح من الالم النفسي اكثر منه من الالم الجسدي... قالت نورة بعصبية..
نورة: ماله داعي الظرب سعيد.... الظرب مايحل اي شي..
سعيد طول الوقت من وصل مب شايف نوره ولا يسمع هي شو تقول.... ماكان يشوف غير حمدان وفطيم...شكل فطيم الخجول والفرحان...ووقفه حمدان المايله وكلمه احبج....ويزيد البركان اللي في داخله حرااره...
سعيد: هذا...عشان تعرفين تحشمين اهلج وتحفظين سمعتهم وسمتعج في غيابهم مسودة الويه....
نورة: سعييييييد انته فاهم الموضوع غلط....
سعيد: كيف..؟؟؟ كيف تسوين فيني جذي...؟؟؟ انا متوسطلج عند ابويه وسايم ويهي عليه وعاطنج الثقه عشان تين هني تدرسين والا تسويلي قصه حب ويا حمدانووووووووه....هاااااااااااااااااه..؟؟؟؟
قالت فطيم وهي تشاهق ومن ورا دموعها...
فطيم: الموضوع مب جذي سعيد....عمره ماقال هالكلمه الا توه بس...
سعيد: جـــــــــــــــــــــب...انتي اصلا كيف اطلعين جدامه كييييييييييف..؟؟؟ ماعليج من نورة وحصه هذيلا بنات عمه ومتربيات معاه لكن انتي....فطيم انتي باي حق تظهرين له وتاخذين وتعطين معاه....؟؟؟...
نورة: سعيد...انا السبب..انا اللي اقنعتها....
سعيد: شوووووووووووووووووووه...؟؟؟ انتي..؟؟
نورة: هي انا اللي اقنعتها تطلع جدام حمدان..عشان هي تعيش مثل ما نحن عايشين وترتاح مب كل ما ايينا حمدان ربعت تنخش... لانه حمدان مايروم يودر بيتنا فترات طويله متعود يطب علينا جي فجاه....
سعيد: هذا مب عذر....عنده الميلس...ويوم يبغي يدش بيتصل اول لو طلبتن منه ...
نورة: هي بس لين متى... هو بيحس انه منبووذ وفطيم بتحس انها ثقيله بوجودها... اذا طلعت جدامه حالها حالنا بيتم الوضع مثل ماهو مريح للطرفين... سعيد لا تفهم الموضوع غلط بليز...والله ماصار بينهم شي غلط يشوه سمعة اي واحد فيهم....لا تكبر المساله....
سعيد: نقدر نحل هالاشكال.... سمعيني يافطوم... من باجر...تشوفين الاجراءات اللازمه عشان تحولين وضعج من بنات العين لبنات السكن... وتسكنين في السكن.... لين ما تتخرجين....
رفعن نورة وفطيم روسهم مستغربات...
فطيم: السكن..؟؟
سعيد: هي نعم.... تحولين السكن...
نورة: بس سعيد...
سعيد: لا بس ولا شي...انا احس اني ماعرف اي وحده فيكن ومب قادر اثق فيكن الصراحه...ماتوقعت انكن تسون هالشي من وراي....تعرفن انه غلط ومع ذلك سويتنه...
فطوم: شو بنقول حق قوم بويه...
سعيد: زايغه هااا..... اقولهم الصدق وادبج..؟؟؟.... بس ماعليه يافطيم انا بتساهل معاج هالمره... بنقولهم انج ما ارتحتي ..نورة اخر كورس لها وبتعرس وحصه بعد بتعرس ومايصير اتمين اروحج في البيت بلالزمه... تروحين السكن تسمعين..؟
نزلت فطوم راسها بانكسار.. وهي تشاهق بعبراتها.. شو بتقوله يعني..؟؟ مالها اي خيار ثاني..
نورة: السكن مب مناسب لبنت مثل فطوم ياسعيد... خلها عندنا ..
سعيد: وجودها فبيتكم وحواليها حمدان بيخربها اكثر يانوره...
نورة: بس هو يحبها وناوي يخطبها الا حتى انه ماخلص دراسته عشان جي مارمس للحين..
سعيد: انا ما اثق الا باللي اشوفه بعيني واسمعه باذني... يوم بيي يخطبها حمدان...لكل حادث حديث...اما حاليا..فطوم تحول السكن وهذا كلام نهائي والا تراني يافطوم بمنعج عن الدراسه وشوفي اذا حد يقدر يعارضني في البيت.....
فطيم: لا ..دخيلك خلني اكمل....بروح السكن بس خلوني اكمل دراستي...
سكت سعيد وهو عينه على اخته....يحبها صح...اكثر من خواته الباقيات..وعشان جي الجرح اقوى.... عمره ماتوقع هالحركه منها ...كيف غسلووا مخها بهالطريقه عن تربيتها اللي هي متعودة عليها الله اعلم.... اما نورة...فحسابها عسير.. بخصوص فطيم..صح هو معصب حاليا بشكل يفوق التصور... لكن منظر فطيم بدموعها وعلامات التحطيم على ويهها... وشكل الكف الحمر اللي معلم على غزها الابيض...كله عورله قلبه....حس انه بيلين...بس المفروض مايلين.. خش ايده فمخباه وطلع بووكه ومنه مصروف فطيم وفرة عالشبرية...صد وراه وطلع من الغرفه ونزل تحت..بينما فطيم كملت صياحها فحظن نورة اللي تلعن نفسها كل لحظة ..كله من تحت راسي انا....
حمدان كان مب في حاله....خايف موووت على فطيم... وده يركب يشوف بنفسه شو صاير فوق لكن يدري ان بهالطريقه يزيد النار حطب... بالتالي قعد في البلكونه يتريا سعيد لين ماينزل... وتزامن نزل سعيد مع وصول عبدالله وخليفه من الميلس للبيت..وتلاقوا كلهم عند المدخل.سعيد حاول يطلع ملامحها طبيعية بس كان يبين ان شكله معتفس..
عبدالله: هاااااااا بو عسكور وين بها..؟؟
سعيد: برد البيت والله وراي دوام...
عبدالله: عنبوو تعشا عندنا...
سعيد: تسلم والله بس ماشتهي عشا..انا ياي الا اسلم عليك واشوف علومكم...
حمدان تم واقف مب ياسر يرمس بسبب وجود خليفه وعبدالله... ونفس الشي سعيد...
عبدالله: سلمت على العيوز..؟؟؟
سعيد: آآآ...كانت تصلي..يالله شي فخواطركم..
عبدالله + خليفه: سلاااامتك...
سعيد: الله يسلمكم...فمان الله...
مر سعيد عنهم مسرع وسار سيارته..حمدان قرر يخلي سعيد لين مايهدا..مستحيل يتفاهم معاه الحين...
عبدالله: شو بلاه ؟؟ معتفس ويهه....
ابتسم خليفه..
خليفه: يمكن اظارب ويا نوره...
عبدالله: لالا ماظن...يالله ندخل..
حمدان: آآ برايكم انا متواعد ويا ربيعي وبسير... يالله باي..
خطف حمدان بعد مسرع وركب سيارته وطرق....
عبدالله: شوووووووو بلاه هذا بعد..؟؟؟
خليفه: يا هالثنينه فيهم شي...يا نحن الي سكرانين....
عبدالله: انا يجوز اني معرس وسكران ومستانس انته شو بعد..؟؟
خليفه: اناتوني خاطب ومستانس بعد...
عبدالله: اهاااااااااا..والا مستانس هااا... احين براويك كيف وناسه الخطبه...
ظحك خليفه عليه ودخلوا وين عنود وحصه كانن قاعدات في الصاله..سلموا وقعدوا..حصه كانت قافطه من شوفة خليفه... وكانت بتنش لولا ان عنود مسكت ايدها عشان تقعدها مكانها...
بعد مايلسوا..
عبدالله: وين امي؟؟؟
حصه: تصلي..
عبدالله: وابويه.؟؟
حصه: سار بوظبي تراه وبيبات هناك....شو نسيت...؟
عبدالله: اهاااااااااا صح...حصووه...قومي يالله طلعي برا الصاله...والا ماتشوفين ولد عمج متفيزر..؟؟؟
بطلت حصه عيونها وحسن بانواااااااااااع الاحراج....شلت عمرها وطلعت....عنود وخليفه عصبووا...
عنود: حليلها جان خليتها قاعده...؟؟؟
عبدالله: جب انتي.... اخوج كان يحاسب علينا بالدقيقه وماتبيني انتقم يعني..؟؟ خليه يذوووق شوي...
عنود: ههههههههههههههه هيييي عشان جي عيل برايه..
خليفه: يالخاينه انتي....حرام عليك ياخي جاني مصبر عمري على رجعتك من السفر وماييت الا يوم انته يييت... ثرك جي بتسوي فيني ؟؟
وعبدالله: واككككككككككككككثر بعد.... تعيش وتشوف وتنقهر ان شاء الله هههههههههههههه...
عنود: ههههههههه حرام عليك شو هالدعوى على اخويه... لا ان شاء الله يعيش ويشوف ويستانس مب ينقهر...
خليفه: خليه عند هو امبونه متحلفلي من الاول...
عبدالله: خليه ينقهر اول عقب يستانس.... انا مب خبيث كليا... وين نوروه عيل..؟؟
عنود: اظني مع فاطمه فوق...
عبدالله: هييي...
دخلت العيوز في هاللحظة ورحبت بخليفه وقعدت معاهم تسولف وياهم...
حصه ركبت فوق وهي تبتسم على منظر خليفه ونظرته... فرحان...واضح انه فرحان بها..... دورت نوره بس ماحصلتها...دخلت حجرة فطيم وانصدمت... فطيم تصيح وشكلها منفعله ونورة تهديها...
حصه: شو مستوي..؟؟؟؟
فطيم ماقدرت تتكلم.... تولت نورة هالمهمه..وهي كلها ذنب..
نورة: سعيد شاف حمدان مع فطيم....وسعيد سمع حمدان يوم يقول لفطيم احبج...تصوري انتي الباقي...
حطت حصه ايدها على صدرها من الصدمه...وتقربت وشافت ويه فطيم وخدها المحمر والمنتفخ... واطالعت نوره بنظرة..
حصه: لا تقولين...؟!!....
كانت تقصد انها مب مصدقه ان سعيد مد ايده علىاخته.... جاوبتها نوره بان هزرت راسها بالايجاب بكل اسسسسف.... منقهره بان سعيد حبيب روحها انفعالي لهالدرجه.....وصل لدرجه انه يمد ايده على اخته.. معقوول...!!.. .اووففف وايد عصبي هالانسان كل الامور بصريخ عنده.... ومن يحط فباله فكره خلاص تثبت في راسه ولا يشلها.... الله يهديك ياسعيد...
قعدت حصه معاهم تحاول تهدي فطيم المنهاااره من هالموقف.... وحاولن البنات يتكتمن عالموضوع ومايخبرن عنود...لانه اذا خبرن عنود يخافنهاتخبر عبدالله وبالتالي تستويلهم سالفه لا لها اول ولا اخر...
بعد ماهدت فطيم نامت وهي ماتعشت حتى...خلنها البنات وطلعن... سعيد في الدرب كانت ايده تون عليه...تعوره.. متندم من الخاطر انه مد ايده على فطيم...بس شو يسوي...انقهر...كان لازم يفج ظيجته... صدقها نورة الظرب مايحل اي مشكله...لكن هذي اروحها يبالها طراقين مب واحد...باي حق تقعد توس وس في بال اختي مثل الشيطان وتشجعها انها تطلع جدام حمدان..؟؟!!! باي حق.... عشان ترتاح اكثر..؟؟؟ ترتاح يوم تخون اهلها وثقتهم فيها..؟؟؟....افا يانوره.... وحمداااان...؟؟؟ حمدان اللي صار في فتره بسيطه اعز ربعي.... يسوي فيني جذي...؟؟.. ياربي من وين بلقاها....من ربيعي ..والا من اختي...والا من حبيبتي...مسودة الويه هذي بعد ..مدخله عمرها في الموضوع مادري ليش...لو ماقالت ان هي اللي مقنعه فطيم كان احسن...الا زادت عليه ...بدال الجرحين صاروا ثلاثه.....

حمدان كان شبه منهار.. يسوق سيارته بانفعاااال وتهور.. فعلا ماكان يشوف الدرب... كل اللي يشوفه ويه سعيد.. وويه فطيم المصدوم... والباقي خيالات عن سعيد وفطيم في الغرفه..الله يستر شو صار بينهم... حس انه بيمووت من القهر... بس صبر نفسه بامل ..انه بيروح الشارجه قريب..في العيد تحديدا ..بيسلم على سعيد وبيستسمح منه وبيفهمه كل السالفه ...وان شاء الله بيتفهم...مستحيل مايفهمه لانه بنفسه مار بهالامور من قبل.... من زود ما باله كان مشغول...وباله شاااااااارد عن سواقته.... خالف قوانين السواقه.. وماوقف بالاشاره لاانه ما انتبه..بالتالي يت سياره مطيره حاولت توقف بريك لكن كان الوقت فات...دعمت في السياره من جهة حمدان..وكان الحادث...


الساعه عشر في المستشفى..يلس حمدان على شبريه الفحص وهو محتشر..
حمدان: انا بخيييييير.... ماشي الا ايدي تعورني بس...
الممرضة: ازا بتريد استاز هدي بالك شوي..خلي الدكتور يشوف حالتك...
حمدان: حالتي مافيها شي انا بخير....
الدكتور: ايدك اليسار مكسووره...وعندك رضوض بالكتف وجروح بالوجه.... ماتحس بدوخه..
حمدان: لا والله ماشي دوخه....
الدكتور: ماشاء الله اللي ساعدك بنيتك القويه...انا بستدعي دكتور العظام مشان يجبر لك ايدك..والممرضه بتهتم بالبائي....
حمدان: شو حاله الريال اللي دعمني..؟؟
الدكتور: الضربي ايجت في راسوو...بسيطه ان شاء الله مافيه شي خطير...رضوض مافي شي كتير..مع ذلك هوييي في قسم الاشعة هلأ ... بس من التشخيص الاولي هو بخير..
طلع الدكتور عنه وتمت الممرضه تعالج الجروح وتعقمها .. ويا دكتور العظام والتجبير عشان يجبر ايد حمدان المكسووره...وكان فعلا يتالم لكن المه الداخلي اقوى.... فطيم..شو صار ياترى بفطيم..؟؟؟ مسكينه ..بلشت البنت وهي مالها خص بهالاموور كلها....
بعد ماخلصوا من تجبير ايده طلع حمدان للشرطه اللي كانت واقفه برا عشان تحقق معاه.... وقالهم انه هو الغلطان...وانه مر بظرف مب زين خلى تفكيره يغيب شوي وتسبب بهالحادث...وسار اطمن بنفسه على الريال الثاني وطلع بخير ومافيه شي.. وخلص الاجراءات اللازمه في مركز الشرطه ورجع للبيت...وحمد ربه انه امه ماشافته ..سار حجرته على طول وبعد ظراااااااااااااااااااابه قدر يعق كندورته بسبب ايده المجبسه... عق بعمره عالشبريه وحاول يرقد... بس ماقدر طبعا بسبب التفكير...

يوم رجع خليفه البيت...لاحظ غياب سيارة حمدان... معقوله.. الساعه الحين 12 وينه..؟؟ مسك تيلفونه قبل مايدش البيت واتصل به...
حمدان: آآلووووووو...
خليفه: وين انته..؟؟
حمدان: في حجرتي حاليا...
خليفه: سيارتك وين..؟؟؟
حمدان: هممممممممممممم يادقيق الملاحظة انته....لازم ادقق في كل شي...تعال حجرتي بخبرك...
خليفه: اووكي...
سكر خليفه عن حمدان ودخل البيت وركب فوق..فتح الباب ودخل حجرة حمدان...وانصدم يوم شافه بايده المجبسه وويهه المشمخ....
خليفه: شو صار..؟؟
من كم ساعه مخلنا مافيه شي ... متى صار له هذا كله..؟؟
خليفه: مظارب ويا حد اشووو..؟؟؟
حمدان: حادث بسيط سلمنا منه كلنا انا وراعي السياره الثانيه....
يا خليفه وقعد عداله يطالع ويهه..ويدقق على كل جرح.. وكل رضه...
خليفه: حادث..؟؟؟؟؟؟؟؟؟؟؟؟؟...
حمدان: هي...انا كنت سرحان وما انتبهت للاشاره.. انا السبب في الحادث...
خليفه: يالثووووور....
حمدان: كــــــــــثـــــر منها....
مد ايده خليفه ومسك ايد حمدان المجبسه....
خليفه: شو غير هذا..؟؟
حمدان: ماشي بس ايدي مكسوره واللي تشوفه على ويهي...لا غير...قلت لك بسيط ماشي خطير....

تم خليفه يتامل باخوه..السالفه فيها ان.... حمدان طول عمره سواقته فنانه... احين بيسرح بدون سبب وبيسوي لعمره حادث زييييييييييين ان الله سلمه منه..؟؟؟؟؟
خليفه: الحمد لله عالسلامه...
حمدان: الله يسلمك...عاد باذيك احين توصلني كل مكان....هههههههه...
خليفه: ياريال زين ان الله سلمك والله..... وليش سرحت جي ..؟؟ مب عوايدك..
مال حمدان براسه على جنب ...
حمدان: همممم... كان شي..شاغل بالي ....وقعدت افكر فيه زياده عن اللزوم...
خليفه: وشو هو هالشي..
حمدان: بخبرك عقب عنه...
خليفه: عقب يعني never.....
حمدان: ههههههههه u can say that….....
هز خليفه راسه ونش..
خليفه: برايك عيل ارقد احين.. بتسير باجر دوامك.؟؟
حمدان: هي بسير...
خليفه: طبه يوم انته جي تعبان..
حمدان: انا مب تعبان ومب طاب دوامي..عندي محاظرات مهمه....
خليفه: على راحتك...تصبح علىخير..
حمدان: وانته من هله...
سكر خليفه الليت والباب وراه وخلا حمدان يرقد...ولو انه الرقاد بعيد عن عين حمدان...كان يعد اللحظات والدقايق والساعات عشان يلتقي بنورة ويستفسر منها عن اللي صار فوق... الظاهر انه مايقدر يشوف فطيم بعد اللي صار اليوم....
-----------------------------------

الجزء السابع والخمسين

وصل سعيد البيت حوالي الساعه تسع ونص ..كان متنرفز حده..بس متلوم اكثر لانه ظرب اخته هالظربه الشينه...عمره مامد ايده ولا فكر يمد ايده على وحده منهن...وحمدان...!!..ياترى انا غلطان بربعتي لواحد مثله..؟!!.. والله اني مب مصدق اللي صار للحين...كيف يسوون فيني جي...ونوره...نووره اقرب انسان لي... تعرف اني اعارض هالشي ومايرضيني تقوم تشجع اختي على شي غلط..؟؟؟؟ معقوووووله..؟؟ ..آآآخ...
حط سعيد ايده على ويهه وفركه شوي عشان يصحصح.. طلع السويج من السياره وطلع..قفل سيارته ودخل البيت.. في الصاله حصل امه وعليا وفيصل يالسين ..كان بيتخطاهم وبيسير غرفته سيده... بس زقروه...
ام فيصل: يييت ابوويه...تعال انزين وين ساير...؟!
وقف سعيد ويا صوبهم بتكاسل ...
سعيد: السلام عليكم...
الكل: وعليكم السلام..
ام فيصل: وين اختك مايبتها..؟؟؟
ارتفعت الحراره فصدر سعيد مره ثانيه....
سعيد: ليش اييبها ..؟؟
ام فيصل: وابوي العيد ورا باجر ولديه جان يبتها....
سعيد: انزين عليها دوام باجر...
عليا: يوم واحد ماعليها بتغيب...احين منو بييبها..
سعيد: انا سرت اليوم...مافيني اسير باجر بعد...فيصل بيسير اييبها..
فيصل: لالا عين خير....مب انته اللي متكفل فيها..؟؟؟ بسيراتها وييياااتها..؟؟..انته سر هاتها بعدين انا باجر مشغول ماروم...
تم سعيد يطالعهم يائس...انا وغبائي اللي ما تريييت شوي ترتب اغراضها ويبتها وياي...احين لازم سيره مره ثانيه...
سعيد: يصير خير باجر...
ام فيصل: شحالهم بيت عمتك..؟؟
تنهد سعيد بتعب..وقال وهو ينش من مكانه...
سعيد: كلهم بخير.....يشقحون...
ام فيصل: ماتبانا نحط لك عشا ابويه..؟!!..
سعيد: ماشتهي امايه بسير ارقد...تصبحون على خير..
الكل: وانته من اهل الخير...
ركب سعيد الدري وراح حجرته...
فيصل: شوفيه ولدج مب طبيعي..؟؟
ام فيصل: مادريبه والله ياولديه...احيده بخير ومستانس يوم ساير...
عليا: يمكن تعبان بس...الخط يتعب..

فوق في الغرفه..دخل سعيد الحمام وتسبح وعقب ماطلع انسدح عشبريته.... التفكير بالموضوع يايبله صداع... شو الحل...؟ شو الحل شو اسوي..؟؟؟ كيف ابعد اختي عن الغلط..؟؟؟ مايصير اتم في بيت عموه مايصير...من وراي بتسوي امور وايده ولا عليها مني.... والسكن من جهة ثانيه مايمدحووونه....... امنعها عن الدراسه؟ .. لالا حرام.... ليش ماقولها انا تحول من جامعة الامارات للتقنية... والا جامعة الشارجه..ظرووري يعني جامعة الامارات..؟؟؟؟؟ ... برايها تتحمل..اذا جامعة الامارات تسكن في السكن..مافي غيره...بيت عموه مستحيل....حمدان ماينقطع عنهم هناك..دوم عندهم...
قعد على الشبريه من بعد التسديحه وهو ظايج...متلوم من الطراق اللي عطاه فطيم... هي بروحها يابسه والهوا يطيرها...كيف ذاك الطراق اللي حطيت فيه من القوه مايعلم به الا الله....!!!..زين ما انكسر فجها البنت...بس تستاهل...شحقه تغلط هالغلطه.... معقووله عمووه بعد غافله عن طلعات فطوم جدام حمدان..؟؟؟ اكيد شافتها ودرت بس سكتت لانها ماتباتحرجها وهي فبيتها....!!..والا عموه مابتسكت...
مسك تيلفونه واتصل على تيلفون فطيم...يدري انه المفروض مايتصل .. عشان ما يبين انه متلوم...بس يبا يطمن...ماتهون عليه...وبعد بيخبرها عشان تجهز لباجر...طول التيلفون وهو يرن...سكر سعيد...اكيد ماتبا ترد عليه... رد يتصل مره ثانيه...وهالمره ردت...بس مش فطوم...
نورة: مرحباا...
سعيد:................ اهلين...
مالت نورة وهي في غرفة فطيم..يالسه عدالها عالشبريه.. حطت كيس الثلج على غزها الوارم... المسكينه باجر عليها امتحان سعي مضطره تروح الجامعه ماتروم تغيب بسبب غز وارم...تظايقت فطيم من البروده بس بعدين هدت..
نورة: وصلت بالسلامه..؟؟!!..
سعيد مب عارف شو يقول...زعلان عليها...لانها ادخلت بموضوع حرج مثل هذا... في نفس الوقت....هذي نوره..!!.... يحس بالتناقض...
سعيد: هي الحمد لله.... وين فطيم.؟
نورة: هذي راقده...اوعيها لك.؟؟
سعيد:...............لا.... شو حالها؟؟!!..
نورة: شو حالها بعد ياسعيد..؟!!!.. منهاره والله....
سعيد:...........................
نورة: سعيد ليش ظربتها جي..؟؟ ماحيدك تمد ايدك...
سعيد: محد قالها تخون الثقه اوكي....حتى انتي خنتي الثقه...
ارتبكت نوره... ماتعرف كيف بتحل وبتشرح مشكلتها هذي مع سعيد...
نورة: نحن احين مب فيني انا...
سعيد: غلطانه...نحن فيج انتي وفي فطيم وحمدان....كلكم والله خنتوا الثقه..ماتوقعت هالشي منكم الصراحه...
حست نورة انها بتصيح...حاولت تتلهى بكيس الثلج وهي تثبته على ويه فطيم...
نورة: سعيد .. عبدالله والا واحد من اخواني.. لو يدري اني طلعت معاك البحر وقلنا كل اللي قلناه ذاك اليوم..بيدفني انا وانت...
سعيد: لا تقارنين.... الوضع مختلف...
نورة: امبلى بقارن... لانه الوضع هو نفسه..بس انته دريت عن اختك ومارضيت عليها وهذا شي طبيعي لكن خلك متفهم شوي... حمدان من شاف فطيم انصعق بها... يحبها من الخاطر... والله مرت مواقف وايده وانا الشاهده عليها انه يخاف عليها اكثر من نفسه...وانا ادري انه يتريا يخلص دراسته ويشتغل عسب يخطب.. السالفه عنده مافيها لعب... مثل ما انته مفكر...
سعيد: لو كان يحشم حد ولد عمج هذا جان ياااني انا ربيعه وقالي جي جي السالفه ..خاطري في اختك واباها على سنه الله ورسوله.. جان ماقلت شي ..بالعكس بحس بجديته بالموضوع...مب يمسكها ويقولها احبج... هذا مب اسلوب.... ومافيه حشمه لحد...
نورة: سعيــــــد.... من متى حمدان يتصرف ويفكر مثلكم.؟؟؟...تدري انته انه حمدان غير..مايحط حواجز...ومنقود وغيره...يتصرف بطبيعته معظم الوقت...تلقاه مافكر بهالشي زين...
سعيد: ياكثر ما ادافعين عنه....!!!!!!!...
نورة: لاني ادري انك ظلمتهم... انا اكثر وحده اعرف شو مبينهم... على فكره مب مثلنا....هالثنينه من يتلاقون تغايظون ويظاربون..ديج وديايه... والمرات اللي لمح لها انه خاطره فيها ينعدن عالاصاابع... والا معظم الوقت يطفربها مب مثل ما انته متصور..
سعيد: لا والله..؟؟ واضح تراه من اخر مره كانوا رباعه....!!!...
نورة: اليوم السالفه بينهم كانت غير.. فطيم ماسكه شي على حمدان وفاهمتنه غلط وحمدان ماتحمل وحب يوضح الموقف...ويشرح لها سوء الفهم...وطبيت انته عليهم...
سعيد: وغلطان انا يوم طبيت عليهم لاه.؟؟ كان المفروض اخليلهم الجوو ...يقولون اللي فخواطرهم..
نورة: سعيد..والله انا مالووومك...هذي اختك وماترضى عليها... انا متظيجه لانك بس مديت ايدك عليها...مسكينه والله اني حاطه الثلج على غزها الحين لانه وارم..وباجر عليها امتحان سعي وماتروم تغيب...
اطالع سعيد الارض باحراج...وهو متلوم من الخاطر على هالحركه...بس ماجنها تستاهل..؟؟؟ تستاهل... محد قالها انا ياما وصيتها بالحشمه ... تقوم تسوي جي من وراي..؟؟...
سعيد: كنت معصب ولا حسيت بعمري....
ابتسمت نورة بتعاطف مع سعيد... تدري انه حنون وماتهوون عليه فطيم والدليل انه متصل الحين يطمن عليها.. بس مشكلته عصبي...يتصرف قبل ما يفكر....
نورة: عيل الله يعيني انا على الطراقات يوم بنعرس....
سكت سعيد... مايتخيل نفسه يعطي نورة طراقات.. احين عاد بيمسكوونه هالطراق وصمه عاااار عليه...
سعيد: وانتي ويا ويهج كيف تدخلين بموضوع مثل هذا...كيف تقنعين اختي تطلع جدام حمدانووه... ؟؟ امبونها زينه شحقه تخربينها..؟؟
نورة: اهااا احين يا دوري..؟؟
سعيد: هي نعم...وحسابج عسير...
نورة: انا شرحت لك ليش اقنعتها... قبل ما ارمسها بالموضوع كان حمدان يدخل البيت ودايما تصادفه مواقف محرجه مع فطيم...وكان كل مايشوفها يطفربها بشكل...وتيني مسكينه تشتكي.. قتلها انتي بروحج لساااان...عطيه من الحاااااااامي... وماعليج منه اعتبريه مثل اخوج مثلنا كلنا..نحن متعودين على غلاسه حمدان حتى ما نزعل عليه لو قال لنا شي يزعل... بس هي بتم متلعوزه منه..فاحسلها تتعود عليه..شوي شوي تاقلمت مع الوضع...وصار وجوده شي عادي بالنسبه لها...
سعيد: شي عادي يانوره..؟؟؟
نورة: اوكي... مب شي عادي.. بس انته تعرف حمدان.. وتعرف انه يغسل مخ اي حد..واي شخص ينعجب فيه بسهووله...
حس سعيد بالغيره..
سعيد: جـــــــــــــــــــــــــــــــــب..... مسودة الويه....
نورة: لا والله انا بيظا...
سعيد: نوروه جب...
ظحكت نورة..
نورة: شوفيك سعيد..؟؟
سعيد: والله اني مظيج منج....
نورة: ليش عااااده...؟؟؟
سعيد: انا مطرش اختي لكم اماااااانه..تقومين تخربينها..؟!!!..
نورة:..... اوكي انا آسفه... سعيد...غير رايك بخصوص السكن..اوعدك اني ماا اخلي لهم فرصه يتلاقون هني..
سعيد: لا...
نورة: سعيد دخيلك...
سعيد: قتلج لا....قوليلها..سعيد يقولج... يا اما ..تحول التقنية او جامعة الشارجه... يا انها تتحمل وتسكن في السكن....كيفها...
نورة: مافي امل يعني تغير رايك..؟؟؟ حرام عليك...السكن عاد الله يعلم عند منو اطيح من البنات..؟!!!.
سعيد: مابغير راي...وماعليها شر...كل البنات يسكنن في السكنات واختها من قبلها وماياهن شي... اللي حافظه نفسها من الغلط مابتخترب... لكنها عندكم خذت راحتها بزياده...
نورة: ........................................
سعيد: وقوليلها بعد.. اني باجر بمر اشلها الشارجه عسب خلاص العيد ورا باجر...خليها اجهز عمرها لاني بمرها المغرب ....
نورة: ان شاء الله...
سكت سعيد وهو يدري بنوره زعلت...بس هو معصب وزعلان اكثر وخلهم يتادبون شوي..
سعيد: يالله برايج..
نورة: اوكي..
سعيد: فمان الله..
نورة: الله وياك سعيد...
سكر سعيد قبل مايزل لسانه ويبدا يراضيها....خلها تزعل...محد قالها تدخل....
سكرت نورة التيلفون وحطته مكانه عالطاوله... خوزت كيس الثلج....مسكينه غزها كله محمر...مادري من الثلج والا من الطراق... بس الورم شكله قرب يخف...استمرت نوره تحط الثلج على خد فطوم لين ماتعبت وخلتها ترقد وطلعت عنها...

السبت الصبح...
نش حمدان من النوم...ويالله يالله تغسل وتلبس...الحمد لله ان اليسار اللي مكسوره مب اليمين..لو اليمين مابيعرف يسوي شي باليسار...كان متظايق من الخاطر بسبب الموقف الامساني...مب الحادث..اللي قبله...الحادث مايعنيله شي...مسكينه يافطوم...ياترا شو صار فيج..؟!!..
وقف عند مكتبه ورتب كتبه ودفتر الملاحظات..زين انه لاب توبه في اللوكر...مافيه يشله...حط سفرته على جتفه وشل كتبه وتيلفونه واغراضه الثانيه وطلع وسار غرفة خليفه...وعقب عباله بايد وحده..دق الباب.. بطل خليفه الباب ...