(أنا وأم علي الخطابة) قصة من أجزاء باللهجة البحرانية

[align=center] السلام عليكم ورحمة الله وبركاته

أحببت أن أكتب لكم هذه القصة الطريفة وأتمنى ان تنال اعجابكم وتحوز على رضاكم ونبتدأ بالجزاء الأول

.................................................. ...................

الجزء الأول

أم محمد: ربيع وإحنا فيه، بعد ما عندك حجه الحين؟

محمد : وش هست ؟؟ على شنو عاد؟


أم محمد: يو يو سوى روحه ما يدري ... أبغي أفرح فيك له، لمتى بعد وأني أحارس ؟ لما أموت؟

محمد : بعد عمر طويل إن شاء الله.

أم محمد: حاط عيونك على وحده ومستحي تقول؟

محمد : الله يهداش تعرفيني من البيت للشغل وين لي بال أشوف وحده أو أحط في بالي وحده؟

أم محمد: انزين بخلي أم علي اتدور لك.

محمد : منهي أم علي؟؟

أم محمد: شهربان الخطابة،هذي نص رجال فريقنا هي خاطبه لهم.

محمد : أنا أفتكرت إن عندش وحده وتبين بس أقول يالله عشان تروحين تخطبينها؟؟!!

أم محمد: أني يا ولدي وش عرفني ..أني لو عندي وحده چان من زمان قلت لك عنها، ولا صبرت لما تقول لي بتخطب.. على بالك أقدر أصبر؟

محمد : انزين بس اشلون؟ يعني وش تبي هي حق هالسالفة؟

أم محمد: انت ما عليك، بكره بخليها تجي البيت وتقعد وياك وتسألها على هواك.

محمد : بل يحتاج أقعد وياها؟؟

أم محمد: يو يو عجل چيف تبيها تخطب ليك ؟ لازم تقعد وياها وتقول لها وش تبي، وش ما تبي .. تقول لها مواصفات اللي تبيها لا.

محمد : أها.

أم محمد: خلف أبويي وأمي قفل الباب ها قبل لا تنام.

محمد : وين؟ مو العادة تنامين هالحزة؟

أم محمد:عشان باجر أقعد من وقت وأروح حق أم علي، وبخم صوب البيت، خربت هالجهال من يلعبون يكسفون المكان.

محمد : الله يهداش يا مي تشتغلين شغل البلدية ... ليش تخمين الطريق؟؟

أم محمد: عجل أخليه سماده الناس ما أطيق اطوف فيه لا؟ وأني قلوفه بالبلدية أحارسها لما تجي وتخم المكان؟؟

محمد : على راحتش.. وأنا أقول ليش عمال البلدية مرتاحين!!

أم محمد: عن لطنازه يالله.

محمد : هاهاهاهاهه ..أمزح وياش حجية فطوم .. الله يعطيش الصحة والعافية ان شاء الله.

أم محمد: يالله تصبح على خير.

محمد : وإنتي من أهل الخير أم محمد.

أم محمد: حياش أم علي .. تفضلي البيت بيتش.

أم علي : عفر بابكم صغير واجد.. أم محمد رحم الله والديش بطلي الصفقة الثانية من الباب

محمد كان جالس بالغرفة وفي نفسه: الباب وش كبره وهي تقول مو قادرة تدخل!!

أم محمد: خلف أبويي محمد، أكي جت أم علي.

تجلس أم علي في صدر الغرفة..

أم علي : شحوالك محمد؟

محمد: زين .. الحمد لله ، شخبارك إنتي ؟

أم علي : الحمد لله .. شوف محمد الزاوج تكوين أسرة وتحمل مسؤولية ومصاريف وأي وحده لازم عندها شروط وحتى لو ما كان عندها شروط معينة فشروطها إن اللي يتزوجها يكون زوج صالح ومتدين ويحترم المرأة.

محمد: إن شاء الله نكون قد المسؤولية.

أم علي : بيتكم ما شاء الله وسيع وفيه حجر واجد بس بابكم صغير يبغي ليه توسعونه اشوي.

محمد في نفسه: نسوي لينا باب طبيله!!

أم محمد: البيت كبير مغربلني في الخمام ما يتنظف بسهالة

أم علي : إنزين يا محمد أني ما بثقل عليك واجد .. أني مهري ألفين دينار مع الضيفة

يحدق محمد في وجه أم علي مدهوشا مما سمعه

محمد: أماااه .. سمعتي؟؟

ثم تقفز أم علي في أحضان محمد .. ويصرخ محمد مستنجدا أمه..

محمد: أعوذ بالله من الشيطان الرجيم ..الله يغربل ابليس على هالحلم .. باقي شوي وتذبحني هالدبدوبة.

محمد في دوامه بالعمل

محمد: ها صادق وش فيك جاي متأخر اليوم؟

صادق: زوجتي البارح تعبت فاضطريت أوديها المستشفى ..

محمد: عسى ما شر، وإش حالها الحين؟

صادق: الحمد لله ، هي الحين أحسن؛ وديتها بيت أبوها.

محمد: هاااا .. ليش عاد؟

صادق: لأن لو قعدت في البيت بتقوم تشتغل وتنظف وتشيل وتحط ومو محاسبه للي في بطنها وإنها أول حمل لها.

محمد: أها ..هو العاده إن أول حمل لازم تدلل وتدلع عليك ..لكن زين سويت، عجل غداك اليوم عند بيت العم؟

صادق: الغدا والعشا ...ههههه

بعد رجوع محمد من عمله

أم محمد: قوة خلف أبويي .. أكو الغدا برزته.

محمد: انزين بس ببدل اثيابي وبجي.

على مائدة الغداء


أم محمد: محمد.. الساعة 7 لا تطلع

محمد: ليش .. وش فيه؟

أم محمد: بتجي أم علي البيت وتبي تقعد وياك.


محمد: اوووه ما صدقتي رحتي قلتي لها وحجزتي موعد عندها؟

أم محمد: چيفة؟؟ غيرت رايك بعد؟

محمد: لا .. بس قلت بلا خطابة مو شغلة دلالة هي!!

أم محمد: قلت ليك يا ولدي أني ما أعرف في هالسوالف وبعدين أم علي أخبر مني وتعرف بنات واجد وإنت يا ولدي ما بتاخذ وحده إلا لما تشوفها وتقعد وياها وتسولف وياها.

محمد: يالله ... إن شاء الله خير.

أم محمد: انت تغدى ولا عليك ولما تجي أم علي وتقعد وياها يصير خير.

موعد اللقاء مع أم علي

تدق الساعة السابعة..

.................................................. .......................

ترقبوا الجزاء الثاني

مع تحياتي [/align]

ويسلمو الأيادي اللي كتبت القصه ياالله بسرررررررررررررعه نبغى البقيه

اهلا اختي حلوه القصة

ونبي التكملة

اهلا اختي حلوه القصة

الى المام دومن

اخوك دموع الشوق

ياالله خيه بسرعه كملي القصه مو تتأخري علينا

[align=center] سلام قول من رب رحيم

شكراً لكم أخوتي على مروركم الكريم على قصتي واتمنى ان تكون قد حازت على رضاكم ونالت اعجابكم وان شاء الله لن أتأخر عليكم كثيراً ..

تقبلوا مني خالص الشكر والامتنان ..

تحياتي[/align]

اني دشيت قلت يمكن كتبت الينا جزء أو جزئين أو ثلاثه

ياالله خيه غناتي مو تتأخري زين شاطره انتين وممتازة واااااجد

[align=center]السلام عليكم ورحمة الله وبركاته

ههههههههههههههههههه

حسناً أختاه ولكن دعيني أفطر أولاً ومن ثم أنزل الجزء الثاني فأنا لا أعرف أن أعمل ومعدتي فاضية ..

عذراً على التأخير والتقصير ..

تحياتي[/align]

أنزين هو الى متى استنى وااااااااااجد لو قليل يعني

بس بسال حاجه بنت لو ولد :s

[align=center]

السلام عليكم ورحمة الله وبركاته

أنا فتاة أختاه فتــــــــــــاة ولست بفتى .. |310|

مسامحة .. |71|

عذراً على التأخير أخواني .. سأطرح التكملة من غير مقدمات ..

تفضلوا الجزء الثاني ..

.................................................. .............................

الجزء الثاني

لساعة 7.45 مساءا

يدق الباب فتذهب أم محمد لتفتحه..

أم محمد: أهلا وسهلا حيالله أم علي

أم علي : شحوالش أم محمد، ان شاء الله بخير؟

أم محمد: الحمد لله نسأل عنش؟

أم علي : سألت عنش العافية

في الغرفة..

أم علي : أم محمد.. جاركم حجي عيسى ولده خاطب وحده عيونها خضران؟!

أم محمد: ايه .. رباب، صار له 3 أشهر الحين.

أم علي : ايه قالت لي!

أم محمد: منهي ؟؟ رباب؟؟

أم علي : ايه.. توني شايفتنها .. رحت أسألها بنت منهو لأني ما عرفتها فقالت ليي إنها خطيبة عبود .. چيفه ما سوى حفلة خطوبة؟

أم محمد: توفت أم حجي عيسى فأجلوه وسووه بس حق العائلة أصلا ناس واجد من الفريق ما يدرون إن عبود خاطب.

أم علي : أني أقول بعد ما يصير ما أعرف عن السالفة؟؟ بس لبنية تبين عليها واجد حليوة ..

أم محمد: إيه .. جت البيت هي ويا أم عبود ..واجد طيبة..

أم علي : إنزين وين محمد؟

أم محمد: الحين بقوم أناديه..

تنادي أم محمد ولدها فيدخلان الغرفة بعد أن يحيي محمد أم علي ..

محمد في نفسه: في الحلم كلش غير .. هذي عصاية؟؟!!

أم علي : ما بغيت تفرح أمك؟؟

أم محمد: أي والله يام علي تعبت وأني أحن عليه..

أم علي : إنت مقتنع من الزواج لو تبي تفتك من حنّة أمك عليك؟

محمد: أكيد مقتنع..وأصلا الزواج كان في بالي بس هالتأخير اللي صار حق أكوّن نفسي وأكون مستعد للزواج..

أم علي : طيب، خوووش كلام .. بقول لك شنو اللي راح اسويه علشان تعرف شلون أخطب ليك وعلى أي أساس؟ أني عندي بنات بكل الأعمار الصغيرة والكبيرة واللي تشتغل واللي تدرس واللي في الجامعه واللي في البيت ..

محمد مقاطعا أم علي: انا ما أبي كل هذا إللي أبيه تكون خلوقة ومتدينة ..سواء تشتغل أو تدرس هذا ما يهمني كثير!!

أم علي : بارك الله فيك .. بس هالأمور لازم بتدخل فيها بعدين .. المهم كم تبي عمرها؟

محمد: أنا عمري 25 يعني أبي وحده تكون أصغر مني ..

أم علي : خووووش .. تبغي أرتب لك مقابلة مع البنت قبل ما يصير أي شي رسمي؟

محمد: ما أدري .بس إذا بموافقة البنت وأهلها ليش لا؟

أم علي : أكيد بموافقة أهلها.. بعد ما يصير أخليك تقابل بنات الناس مني والطريق..

محمد : تمام ..

أم علي : عجل بكرة بقول لكم متى تروحون حق لبنية..

بعد خروج أم علي

أم محمد موجهة سؤالها لولدها: ها وش رايك؟

محمد: شكلها خوووش مرأة بس الله يستر... من البنات اللي بتخطبهم لي!!

أم محمد: وإنت ما تجوز من هوسك هذا لا..

محمد : يامي مو هوس هذا بس لأني مقبل على شي يحدد مصير حياتي..

أم محمد: بكرة إن شاء الله يصير كل خير..

في العمل وأثناء أداء عمله

محمد فيه حومه يبي يسأل صادق بس مو عارف اشلون يبتدي السؤال .. فقرر ان يسأل صادق بشكل غير مباشر..

محمد: في برنامج حليو خلوه عن اشلون تعرفت على زوجتك وكيف كانت أول مرة تقابلها ولما شفتها شنو حسيت؟

صادق: انزين ... شنو صار فيه؟

محمد: أول أنا بسألك شلون تعرفت على زوجتك؟

صادق يحدق في محمد ويبتسم

صادق: زوجتي صديقة إختي، شفتها أول مرة لما كنت راجع البيت وهي كانت طالعه..

محمد: اشلون إخترتها مع إنك مرة وحده شفتها؟

صادق: لا .. هالمرة اللي شفتها فيها صارت بلاوي بعدها..

محمد متحمس لمعرفة شنو صار

محمد: شلون يعني؟

صادق: عجبتني أولا .. وبعدين قمت أتحين فرصة توصيل إختي حق نمر عليها ونوصلها معانا..

محمد: يا عيني .. طلعت منت سهل!!

صادق: ههههه .. لحظه لحظه ..تبي تخطب؟

محمد متحير في الرد

صادق: أفا بتخبي عن صديقك ؟؟

محمد: لا .. في نية للخطوبة بس للحين ما صار شي..

صادق: المهم إنك نويت؟

محمد: ايه ..نوينا..

في هذه الأثناء يرن موبايل محمد

محمد: مرحبا..

المتصل: شحوالك محمد؟

محمد باستغراب: هلا بخير ولله الحمد ، من؟

المتصل: أم علي وياك..

محمد: أهلا أم علي شخبارك؟

أم علي : الحمد لله ..بغيت أعرف عندك شي الليلة؟

محمد: لا ما عندي شي .. خير؟

أم علي : بنروح مدينة حمد..

محمد: ليش ؟؟ وش فيه هناك؟

أم علي : يو يو قلت لك بسوي موعد مع لبنية لا !

محمد: أهاا .. خير عجل.. متى أمر عليش؟

أم علي : الساعة 8 واجد زين..

محمد: مو مشكله ..

تنتهي المكالمة.. صادق بابتسامه عريضة ومحمد محاولاً التملص من نظرات صادق له فجعل نفسه منهمكا في عمله..

صادق ممازحا: أيا أم علي إشسويتي ... حمرتي وجه صاحبنا وهجيتي ...

محمد: جوز وبلا هرار..

صادق: منهي أم علي؟؟

محمد: رفيقة الوالده..

صادق: اها ...

محمد يجاهد في إبقاء نفسه متوازنا نفسيا وغير مرتبك ولكن محال أن تبقى أعصابة هادئة دون أن تضيع فكره وتوجهه حينا بعد حين وهما – مع أم علي – متوجهان للفتاة المرتقبة.

أم علي : إسمها سلمى في الثاني ثانوي ..أبوها حجي عباس يشتغل في وزارة الصحة .. هي الفانية .. الأولى متزوجه واحد من القدم ..

.................................................. .........

أنتهى الجزء الثاني ترقبوا الجزء الثالث على منتديات الناصرة ..

تحياتي[/align]

مشكوره خيه ع التكمله بس مو تتأخري في حطوط الجزا الثالث عليش نور زين غناتي
يعني مو تنزلي الأجزاء زي القطاره :)

شدعوه اختي

الى متى واحنى نستني

ماصارت خيه

المهم

مشكور على القصه الحلو والله يستر من ام علي والله يستر

تحياتي
أمير العاشقين

[align=center]
السلام علــيكم ورحمــــــة الله وبـــركــــــاته

العفو أختي الولاء الفاطمي وشكراً لكِ على التعقيب ..

شكراً لك أخي أمير العاشقين ويسرني اعجابك بالقصة وهذا ما كنت اتمناه وعذراً على التقصير والتأخير ..

تحياتي[/align]

خيه دخلت قلت حطيتي جزء غناتي الى متى واحنا نستنى يعني طولتي وااااااااااااااايد

[align=center]الســلام عليكم ورحمــة الله وبركاته

من عيوني خيتو الولاء الفاطمي ماراح أتأخر عليكم وما يصير خاطرج الا طيب .. |68|

جم ولاء فاطمي عندنا ما عندنا الا وحدة الي هي انتي ما نقدر نزعلها .. |11|

الحين راح انزل الجزء الثالث ومسامحة للجميع .. |32|

تحياتي[/align]

[align=center]السلام عليكم ورحمة الله وبركاته

تفضلوا الجزء الثالث ..

.................................................. .......

الجزء الثالث

أم محمد كانت تترقب وصول ولدها كي تعرف عما كان هناك وما حدث، لما دخل محمد غرفته جاءته وهي فرحة ..

أم محمد: هلا بالمعرس هلا..

محمد: أهلا أم محمد..

أم محمد رأت ملامح وجهه غير مبتهجة فهي ملامح مشتت الفكر المتحير في أمره

أم محمد: ويش صار هناك؟ شفت لبنية ؟ عجبتك؟

محمد: إيه شفتها ، لبنية زينة ..

أم محمد: إنزين وش السالفه عجل ليش مو مستانس أو فرحان صار شي يعني؟

محمد: لا ما صار شي قعدنا في المقابلة تقريبا نص ساعة..

أم محمد: انزين شنو رايك فيها؟

محمد: لبنية خجولة واجد وكأنها تبي تخلص المقابلة بسرعة يعني ما أحسها مدركة لذا الشي!!

أم محمد: إنت تقول إنها خجوله يعني هذا اللي خلاها تصير هالشكل يا ولدي مو انها مو مدركة على قولتك.

محمد: هذا الشعور حسيته من تصرفها حتى أسئلتها ما كانت عني أصلا.. كانت عن الزواج وعن الحفلة!!

أم محمد: الحين إنت وش رايك؟ تبي تفكر أو تقول لأم علي قرارك علشان توصله للجماعة ؟؟

محمد: خبرت أم علي خلاص..

أم محمد: خبرتها شنو؟

محمد: ما تناسبني ..

أم محمد: ما يخالف إن شاء الله تحصل اللي تناسبك واللي تقتنع فيها .. بس خبرتها ان تدور لك وحده ثانية؟

محمد: قلت لها تصبر شوي ..على الاقل أسبوع.

أم محمد: إلاااا وااااااا بعد؟

محمد: بقول لها مواصفات بدل ما تدور لي أي وحده بس لأنها متدينة وخلوقة ..

أم محمد: زين ..زين .. أول مرة ما تدري ويش يصير ..بس هالمقابلة خلتك تعرف شنو اللي تبيه.

محمد: أعرف اللي أبغيه على حساب وحده يعني؟؟

أم محمد: يا ولدي لا تقول هالشكل .. بعد الواحد لازم يشوف ويسأل ويدور ..هذي حياة بتعيشونها.. يعني عمر مو يوم أو يومين..

محمد: إن شاء الله خير..

يستلقي محمد على سريره ويزفر وكأنما المتعب المجهد بعد أن خرجت أمه .. كان يحمل عبءً ثقيلا في نفسه اللوامة بعد هذه المقابلة .. إن شعوره بالذنب غير المبرر وقساوة النفس عليه حبسته بين طبقات الإتهام .. وهو في تقلباته على سريره يبحث عن البراءة ... محمد عاش ليلته في حوار داخلي لتنتهي ببراءته .. وبعد ان تنفس الصعداء ... وأراد أن يرخي جفنيه علت أصوات المؤذنين .. حي على الصلاة .. فقام من على سريره متوجها للصلاة..

محمد: السلام عليكم ..

صادق: عليكم السلام .. صح النوم ، إشفيك متأخر؟

محمد: البارح ما نمت إلا بعد صلاة الصبح .. هذا زين قعدتني الوالدة والله جان راحت علي نوومه..

صادق: خير ..ويش اللي مسهرنك؟

محمد: ما جاني نوم ..

صادق: اوووه اووووه بدا الرجال يفكر في البنات ..

محمد: اترك عنك هالحجي واشتغل..

صادق: ههههااي ...انزين ..نسيت أقول لك..

محمد: شنو؟

صادق: الليلة بنروح بيت حبيب نطالع المبارة ونتعشا هناك، يعني الليلة سهرة .. معظم الشباب بيروحون ..

محمد: تمام ..صار لي مدة ما شفتهم..

صادق، حبيب، جاسم، علي، خليل هم أصدقاء محمد الذين ربطتهم الدراسة بعضهم البعض وكوّنوا رفقة جميلة وإندماج روحي عميق.

يصل محمد لمنزل حبيب فيستأذن ويدخل ليستقبله حبيب الذي عاتبه أولاً

حبيب: يالهيس وش فيه تلفونك مقفلنه البارح؟

محمد: منعاً للإزعاج..

حبيب: الله يبراك .. اللي يسمعك يقول الاتصالات ما توقف عنك!

علي: محمد .. حياك ذا الصوب عندي وياك سالفة..

جاسم: هلا هلا طلعت في سوالف من ورانا بعد .. شباب إش هالحچي ...دافعوا عن حقوقكم وإلا فلنقلبها حرباً ضروس..

صادق: ثكلتك أمك يا أبو لهب ماذا تريد أن نفعل بهم؟

جاسم: ويحك يا عكرمة ألم تسمع المثل القائل ((اللي في القدر يطلعه الملاّس)) ..

خليل: سكتوا أكي بدأت المباراة..

جميلة أحاديثهم وإندماجهم وحلو تسامرهم وبساطة الحياة مع بعضهم..

أثناء مشاهدتهم للمباراة كان جدال ونقاش وتعصب يتخلله المزاح والمرح ..

خليل: قوم لا ... تحارس شنو .... موتنا جوع .. ما بتعشينا؟؟

علي: الرجال يحارس متى العشا .. فرحم الله والديك قوم حط العشا لا يطيح علينا ..

حبيب: إن شاء الله ..

جاسم: صادق .. وليّ العهد للحين ما بيّن؟

صادق: Coming Soon

محمد: وش قالوا لك ؟؟ فلم على Channel 2

علي: شباب ما في واحد منكم بيخطب؟؟ عاجبتنكم حياة لعزوبية .. ما في إلا صادق بس؟؟

خليل: إنت مو ويانا يعني؟

حبيب: سلمان يمكن قريب بيخطب..

علي: أي سلمان ؟

حبيب: سلمان رسول ،، لدرام ..

علي: إيه .. هذا لو أشوف اللي بيخطبها أقول لها تخلي شرط أساسي في الزواج إنه يسوي رجيم أول..

صادق: ناوي عليه شنو، أما سلمان يسوي رجيم جان يهلك..

حبيب: لعلمكم اللي بيتزوجها ضعيفة..

محمد: تعال .. وإنت ويش دراك إنها ضعيفة؟

حبيب: لأنها جارتنا..

خليل: انزين .. سلمان من وين له .. إللي أعرفه إنه توه صار له 3 أشهر مشتغل..

حبيب: يمكن من عند أبوه..

خليل: أنا إذا أفكر أتزوج لازم يكون المهر والحفلة من فلوسي مو من عند أبوي..

صادق: صبري يا حريقة سار عجل ..

محمد: ليش عاد .. أكو أنا جمعت حق مصاريف الزواج كلها..

علي: صادق .. إنت كم كلفت في زواجك ؟

صادق: تقريبا 4000 دينار .. بس هذا يعتمد على لبنية وأهلها..أنا سويت الحفلة في البيت ، بس لو كانت في صالة فأكيد بيكون أكثر من جذيه..

علي: حقها لو طلبت في صالة .. هي ليلة في العمر وما راح تتكرر..

خليل: ليلة تخليني أفسفس فلوسي .. المبلغ اللي بخليه في الصالة ؛أشتري فيه شي ينفعني وينفعها .. أو أكمل أثاث البيت مثلا..

محمد: أنا مع خليل... حتى مو شرط يكون في صالة أفراح أو فندق أو مسرح .. ليش ما يصير في ماتم نسوان ..يسوون جذيه لا .. في أفراح تصير في ماتم نسوان والمبلغ اللي يدفع للماتم كلش بسيط..


حبيب: تصير بس هل الحفلة اللي في صالة نفسها بتكون في الماتم؟


علي: أكيد لا .. المعازيم رايحين يستانسون لو بس يطالعون العروس .. في الصالة بيخلون لك DJ شغال مدري وش اسمه اللي يبطط الأذاين ..اما في الماتم بيخلون لك ملاية.

صادق: أكو الرجال يقرون مولد.. وش فيه يعني إذا جا ليك حجي أحمد ومسك لك ذاك الموال ما تدري هذا مولد لو قراية؟؟

جاسم: أكو سالفة جديدة بعد...يسوون سفرة عجم ....يعني خساير زيادة ولا تدري شنو الغرض منها .

صادق: هذي أمور كلها تكريم المعازيم وتطويل مدة الحفل مثل سالفة الحناء..

خليل: صدق أما النسوان يحبون هالسوالف ...

حبيب: إحنا الرجال غير النسوان .. ذلاك مع كل هالسوالف اللي يسوونها لا يعجبهم العجب ولا صيام رجب ...حتى لما يطلعون من العرس ومحملين وشايلين الأكو و الماكو يتكلمون على العروس وعلى المعرس بالزين والشين..


للمرة الأولى يحس محمد في نفسه أنه منشد لهذه الأحاديث ويستمع لها بشغف وحسن إنصات كانت عيناه تتأملان كل حديث و تنظر إنفاعلهم وحركاتهم ولا سيما صادق .. حديث صادق.. فهو الحكيم بينهم وصاحب التجربة الفعلية..

يستأذن الجميع معلنين نهاية السهرة .. يشكرون حبيب ويودعونه بالتتالي وهو – حبيب- يتمناهم بأن يكررونها في القريب العاجل..

يوم الجمعه

محمد: حجية فطوم ... ليش ما قعدتيني؟؟

أم محمد: إجازة اليوم بعد أقعدك إلاوا ؟

محمد: إجازة يعني تخليني أنام للظهر؟

أم محمد: إنت البارح راجع متأخر فخليتك ما بغيت أقعدك من وقت..

محمد: اليوم بتروحين بيت خالي؟

أم محمد: ايه .. بتروح؟؟ .. تعال وياي كل مرة خالك يسألني عنك..

محمد: إن شاء الله ... بس لا يقعد يشلخ علي عن الجن..

أم محمد: استح ...خالك يشلخ ..يووو عليك ..

.................................................. ..........

يتبع الجزء الـــــــرابــــــــع ..

تحياتي |83|

[/align]

اهلاً اختي حباً والف كرامه

اشدعوه اختي

بسرعه خلص الجزء

اقول يالله حطيس لينا الجزء الي بعده

ترى حمستينا بزياده والي حمسن لايقعد يشلخ علي عن الجن

ههههههه

والا كلمت استح يووووو عليك فقعتني ضحك

يالله خيه حظي الجزء علشاني خيه

[align=center]

هههههههههههههههههههههههههههههههههه

أمير العاشق اصبر بتييك المواقف الي بتخليك تتسدح على الارض من الضحك .. :d

مع حباً والف كرامة انسى الهم واستعد للفكاهة .. |93|


واصبر بعد خل الاعضاء يقرأون القصة وبعدين بنزل الباقي لا تصير عجول .. |72|

كل تأخيرة وفيها خيرة .. |86|

[/align]

[align=center]

هههههههههههههههههههههههههههههههههه

أمير العاشق اصبر بتييك المواقف الي بتخليك تتسدح على الارض من الضحك .. :d

مع حباً والف كرامة انسى الهم واستعد للفكاهة .. |93|


واصبر بعد خل الاعضاء يقرأون القصة وبعدين بنزل الباقي لا تصير عجول .. |72|

كل تأخيرة وفيها خيرة .. |86|

[/align]

مشكوره خيه بس بسررررررررررررررررررررررررررررعه حطي الجزء الرابع

مو تتأخري علينا غناتي زين

[align=center]

http://www.rmooosh.net/up-pic/uploads/b914d07f43.gif

شوووووووووكران خيتو الولاء الفاطمي على المتابعة الشديدة للقصة وان شاء الله ماراح أتأخر ..

تحياتي [/align]

ياالله خيه غناتي عمري حياتي بسرررررررررررررررررررعه كلملي القصه بعدين ننسى الأجزاء ونرد انعيد نقراها من البدايه
انتي شطوره ما بتتأخري صح

خيه ما صارت من الحماس اقرى الاجزاء علشان لا انساهم

داويييييييييه بسرعه له خيه

يالله خيه علشني له

طورة اختي بتحط الجزء

هداويه خيه الى متى ان شاء الله يعني هي ياالله كمليها طلبتش ياالله

بسررررررررررررررررررررررررررررررررعه زين

[align=center]السلام عليكم ورحمة الله وبركاته

مسامحة اخواني الانترنت عندي وايد ضعيف وكل ما جيت انزل البقية ما ينزلون ..


تفضلوا الجزء الرابـــــــــــع ..

.................................................

الجز الرابع

تمر 4 أيام .. كانت أم محمد على وجل وفي إنتظار لأن ينتهي محمد من المدة التي قررها لوضع مواصفات فتاة أحلامه .. لم تكد تصبر أو تطيق ذلك .. فذهبت إليه ..

أم محمد: بعد روحي محمد. .. أمك لما قرر ولدها إنه يتزوج الدنيا ما وسعت فرحتها .. بس الحين قامت اتضيق عليها .. فبرضاي عليك ما أتحمل اتضيق أزيد من جذيه .. والصبر مني خلص ..

محمد: يالغالية خل ياكلني لتراب إذا ما بكون تحت رضاش.. إش لزمة حياتي من غير رضاش؟ بس أنا ما أخذت هالمدة إلا لأني محتاج أفكر فيها ..وإن شاء الله ما يصير إلا اللي يرضيش.

أم محمد: الله يخليك ويحفظك ..


إزداد تشتت الفكر لدى محمد فزيارته لخاله وجلوسه معه عقد من مسألة الزواج لديه واختياره لشريكة حياته .. فكان منه أن اتصل لصديقه صادق وواعده على مكان يكون فيه منظر إن مددت كل بصرك فيه تجد الجمال والروعه... فاتفقا على الشاطئ قبيل الغروب..

صادق: هلا محمد.. اش فيك ؟؟ وش صاير؟

محمد: تعرف إني أبي أتزوج!؟

صادق: وخوش خبر سمعته .. شنو المشكله؟

محمد: المشكلة في خالي ..

صادق: وش فيه خالك؟

محمد: فتح لي باب ما كنت أدري عنه..

صادق: شنو هالباب؟

محمد: طبعا اللي بتزوجها بتعيش في البيت مع أمي فخالي يقول "أمك أعز ما تملك فاللي بتاخذها لازم أمك تكون بمثابة أمها وأنا أعرف إن أختي محبتها لك من محبة اللي تحبه بس هذا ما يمنع إني أقول لك ربما يجيك يوم تختار ما بين أمك أو زوجتك وهذا يعتمد على إختيارك لزوجتك".

صادق: كلام خالك صحيح ..

محمد: أدري انه صح ..

صادق: بقول لك .. بصراحة الزوجة تحب ان يكون لها كيانها الخاص فيها يعني محد يشاركها فيه ..بيت تتصرف فيه علي كيفها .. بس بقول لك شغله أم محمد ما اعتقد ان أي وحده ترفض عشرتها .. ام محمد حنونه والعشرة معاها حلوة ..

محمد: انا مو خوفي من الوالده خوفي من اللي بتزوجها..

صادق: انت كون صريح مع اللي بتاخذها .. اشرح لها في المقابلة وين تسكن ومع من ..والامور كلها بتصير خوووووش .. و بدون وساوس واجد ..

محمد: الله يستر ..


يودعان بعضهما .. فيرحل صادق، بينما محمد جالس ويخط بإصبعه التراب خطوط متشابكة .. لازال يفكر ... أخرج موبايله وبدأ يبحث في قائمة الاسماء حتى توقف عند اسم أم علي...

محمد: السلام عليكم ..

أم علي : عليكم السلام .. هلا محمد ..

محمد: هلا فيش .. قلت إني باخذ وقت حتى أعطيش مواصفات اللي بخطبها ..

أم علي : صح .. حددت مواصفاتك الحين؟

محمد: ايه..

أم علي : زين .. زين .. قول شنهو مواصفاتك؟

محمد: على التلفون؟

أم علي : ايه ..لأني ما بقدر أمر عليكم ..

محمد: أها ... ابي وحده مخلصة الثانوية ...في العشرين وأصغر مني ..


أحست أم علي في حديثها مع محمد تشتت الفكر لديه فمواصفاته وأسلوبه في الكلام يوحي بذلك ... ثم أنها بعد أنهى كلامه..

أم علي : ما في مشكله ... خلاص فهمت مواصفاتك وبرد عليك خبر في أقرب فرصة..

محمد: خير عجل ..

في العمل..

رقية (سكرتيرة في الشركة التي يعمل بها محمد) تدخل مكتب محمد وصادق..

صادق: شوف ... شوف .. لين غاب السنور إلعب يا فار!!

محمد: أنا ما أرضي يسميش فار .. سنور ما على..

رقية: بلا هرار عليّ يالله ..ما عندي شي أسويه، وبصراحة جوعانه.. فقلت أجي عند أهل الكرم علشان يشترون لي شي ..

صادق: أفا عليش برزي خريداتش وأنا تحت الطلب .. بس ريوقي على حسابش بعد ..

رقية: إنت ولا مرة شريت من جيسك يالبخيل؟

صادق: أصرف عليش؟

محمد: بسكم نجره ... قولي إش تبين؟

رقية: شوف الكرم وإتعلم يالبخيل ..

صادق: ايه ..هيّن ..

رقية: أبغي سندويش قيمة وكاكاو وعصير مانجو فرش ..

صادق: وأنا أبغي جيكن فيليه وعصير برتقال ..

رقية: هي هي قال لي أني شنو أبغي .. إنت ليش تحشر روحك؟

محمد: لا .. لكم إثنينكم ..

صادق: نياهاهاها ... ولا كلمه ..

رقية: وي ..عشتو ..

يذهب محمد ليحضر ما طلبه زملاؤه ويدور حديث بين صادق ورقية

صادق: اسمعي الخبر الطازج ..

رقية: شنو يا بو الأخبار الطازجة..

صادق: محمد قرر يخطب..

رقية: أووووه.. صج؟

صادق: هذي اللي بفلعها بالقلم الحين ..

رقية: يالشرير .. على شنو؟

صادق: عجل تقولين صج؟؟ قاعد أجذب عليش الحين؟

رقية: إنزين لا تاكلنا ... غلطنا.

صادق: ايه ..على بالي بعد ... انزين؛ عندش إخت اسمها سبيجة حق نخطبها له؟

رقية: يا ريت عندي إخت .. محمد خوش رجال .. أحسن من بعض الناس..

صادق: أشوف عطيناش وجه وقمتي تتفلسفين!! روحي مكتبش لا أسوي جريمة الحين..

رقية: لا والله ...ايه .. نسيت أسألك؟

صادق: شنو؟

رقية: شخبار حميده؟

صادق: زوينه ..

رقية: ليش مخلنها في بيت أهلها؟

صادق: كيفي ... وبعدين انا وزوجتي ، إنتي ما لج شغل..

رقية: يا علي ..ترفع الضغط .. أروح مكتبي أبرك لي.

واثناء ما كان محمد ينتظر السندويشات يرن موبايله

محمد : مرحبا .. أم علي

أم علي : هلا محمد ..

محمد: شخبارك؟

أم علي : الحمد لله .. اسمع.. يوم الأربعاء العصر رتبت لك مقابله مع وحده من المنامه ..جامعية وعمرها 21 سنه ..جميلة ما شاء الله ، هذي حسب المواصفات اللي قلتها.

محمد: يجزيش الخير أم علي.. ما قصرتي ..

وفي رجوعه للشركه في الممر بالتحديد، متوجها لمكتبه..

محمد: وصل .. وصل .. وصل .. الريوق وصل ..رقية تعالي مكتبنا ..

رقية بعد أن خرجت من مكتبها

رقية: وين قاعد .. فضحتنا.

صادق: كأنك مصري مال الفول والطعمية.

محمد: رقية ما في عصير ما نجو .. جبت ليش عصير خرمالو ..

صادق: نياهاهاها .. عجيب ..

رقية: روح ول ..عصير خرمالو !! اشربه إنت عاد ..

محمد: عندي عصير جزر.. تبينه؟

رقية: وع ما أحبه...صادق عطني عصيرك عاااااااد!!

صادق: ما في أمل ..

محمد: جربي العصير يمكن يعجبش ..

رقية تحاول أن ترشف شيئا من عصير الخرمالو

رقية: يالجذاب .. عصير مانجو دا.

صادق: وين الكافي مالي؟

رقية: مو إليك .. الكاكو حقي ..

محمد: هذا الكاكو حقش ..

رقية: شوووكراً ..

محمد: عااافواً ..

رقية: محمدووو .. سمعنا عنك أخبار ..

محمد: اشاعه مغرضة ..

رقية: حارس بالأول إسمع الخبر؟

محمد: إذا الخبر من صادق فأكيد هرار ..

رقية: اهو من صادق بس هالمرة مو هرار ..

محمد ينظر لصادق ..صادق يغص بالسندويش وبصوت ضعيف ..

صادق: الله يغربل ابليسك خليتني أغص ..

رقية: يعني صدق الخبر؟

محمد: ايه .. صدق ..

رقية: وليش أني آخر من يعلم؟

صادق: أهو قال بيستقيل الشهر الجاي..

رقية: يا علي .. هرّار ..ما أقدر على هرارك ..

محمد: للحين ما صار شي ..

رقية: تبغاني أدور لك وحده؟

محمد: لا ما يحتاج ..

رقية: يعني عندك وحده؟

صادق: ما عليك منها تبي تعرف ... بنت اللذينه بتهريك أسئلة ..

رقية: إنت ولا تسكت .. ايه ابغي أعرف وأتعرف عليها ..عندك مانع؟

صادق: لا .. عندي دواس .. نياهاهاها ..

محمد: أنا اللي بسألش ..

رقية: قول؟


يتبع ..[/align]

[align=center]تابع ..

تفضلوا ..

محمد: شنو مواصفات لبنية اللي تناسبني؟

رقية: امممم ..إنت تناسبك وحده هادئه .. قنوعه لأنك مو من النوع اللي تحب الكماليات مو مسرفة وتنظر حق آخر الصرعات والموضات ... خدومه ..إجتماعية .. طيبه ..

محمد: إنزين هذي كلها صفات .. غير هالشي شنو؟

رقية: تقصد العمر والشكل يعني؟

محمد: ايه ..

رقية: يعني عمرها في العشرين واجد تمام .. جامعية مثلا أو تكون حوزوية ... اممممم .. بطولك تصيرون كشخه .. بس هالشي يعتمد عليك.

صادق: هذي في يجي منها بارز أو لازم يروح الخياط؟

رقية: هيء هيء بايخه.

محمد: ول عليكم ما يصير نتكلم في سالفه وإنتو اثنينكم موجودين ..

رقية: يالله قول لا... شنو اسمها ومن وينه ..قول كل شي عنها؟

محمد: أقول لج للحين ما صار شي ..

رقية: يالله عااااااااااد ..

محمد: ما في شي للحين تفهمين أو لا؟

رقية: بل ..ما يطلع منه شي دا؟

صادق: قال لج ما صار شي للحين.

رقية: ممكن تسكت ..

محمد: أروح أشوف شغلي أحسن لي ..

رقية: تعال لا تشرد

.................................................. .

ترقبوا الجزء الخامس

تحياتي[/align]

مشكوره خيه ع التكمله بس اتمنى ما طولي علينا في تكملتها زين

[align=center]
ان شاء الله من عيوني اختي بس عذروني شوي الانترنت تعبان عندي هالشهر ..

وان شاء الله يصير زين وانزل لكم البقية بدون تأخير وبشكل يومي .. [/align]

اني دخلت قلت حطيتي جزء الا ما في شي

ياالله ان شاء الله يصير الأنترنت زين وما يشوف شر

السلام عليكم

شكراً أختي (حباً وألف كرامة) على القصة بس تراك طولتي وين الباقي ;) ;) ;)

بانتظار ;)جديدك ;)

والسلام

أختك شجووون آل البيت (ع)

ياالله خيه بسرعه كمليها صرت انسى الأجزاء

خيه موطولي واااااااااجد زين

خيه تبي تحمسينا بس

يالله استنى القصه

هدااوووويه سنه على ماتحطيها

انزين خدلك دي بعد يالله له

خيه ياالله بسررررررررررررررررررررررررررررررررعه اني استمليت شدي حطي الأجزاء مثل القطاره ماصارت

ياالله غناتي مو تتأخري واجد

[align=center] هههههههههههههههههههههههههههههههه



ان شاء الله خيتو .. [/align]

[align=center]

الجزء الخــــــــــامس

يبحث عن والدته في كل الغرف .. المطبخ، غرفة النوم .. لم يجدها، تدخل فينتبه لها محمد؛

محمد: ها .. أم محمد من وين جاية؟

أم محمد: كنت في بيت أم جميل .. ضايعه بنتها الصغيرة من الظهر للحين ما شافوها.

محمد: أوه... ما اتصلوا بالشرطة لا؟

أم محمد: راحوا الشرطة بس قالوا لهم بعد 24 ساعة ندور ونسوي بلاغ لكل الدوريات بالبحث.

محمد: يعني لو صادها شي لاسمح الله يكون مخلص ومقضي!

أم محمد: الله يستر

يطرق الباب ..فتذهب أم محمد

أم محمد: هلا جميل ..شافوا إختك؟

جميل: ايه..

أم محمد: وين شافوها؟

جميل: نايمة في الحجرة مالت الطيور.

أم محمد: محد دور هناك؟

جميل: بلى ، بس كانت مغطية روحها بكارتون.

أم محمد: الشرية .. قول لأمك مو تضربها..مسكينه ، جاهلة بعدها.

جميل: من زمان شبعتها ضرب ..لولا ابويي ما شالها من ايدها ..وبعدين راحت حضنتها وقامت تمسّح عليها وهم يصيحون.

ترجع أم محمد وتخبر محمد بما حدث ثم يباشر محمد ..

محمد: سمعي الخبر السار

أم محمد: قول .. خلف أبويي

محمد: اليوم إتصلت فيني أم علي ورتبت مقابلة مع وحده من المنامة يوم الأربعاء العصر.

أم محمد: زين .. زين .. فرحتني عسى ربي يفرحك دنيا وآخرة.

محمد: أنا متفائل من هالمقابلة .. وإن شاء الله يكون خير.

أم محمد: ايه يا ولدي .. تفائلوا بالخير تجدوه ..شحلاوتك وانت مستانس ..فرحتك تسوى دنيتي وما فيها!


>>> المقابلة >> رجاء ومحمد

وبعد مرور وقت بسيط

محمد: شنو الكتب اللي تقرينها ؟

رجاء: بصراحة ما أقرأ كتب، بس

محمد: وبخصوص الكتب الدينية والثقافة الدينية بشكل عام؟

رجاء: لمّن أحتاج شي أروح أبحث أو أسأل Daddy

محمد: لج مشاركات وتفاعل في منطقتج ، أقصد مهام تسوينها مثلا في المأتم اللي تنتسبون له أو جمعية معينة أو مهام تطوعية في خدمة المنطقة؟

رجاء: No

محمد: شنو اللي يمنع؟

رجاء: Study & I don't have time to do that

محمد: رجاء .. كلميني مثل ما أكلمك

رجاء: Sorry,

محمد: تكلمي بالعربي

رجاء: أها .. Sorry

محمد: بالعربي .. عذراً

رجاء: آنا متعودة إني أتكلم باللغتين

محمد: أعتقد دمج اللغتين إذا هناك مصطلحات بس إذا مجرد للتظاهر بالثقافة أو لأنك متعودة فهذا يذكرني بقصة.

رجاء: وشنو هالقصة؟

محمد: الغراب لما شاف طير يمشي وينط عجبته مشيته فقام يتعلمها ولما تعب وما عرف ..اراد أن يرجع لمشيته الطبيعية فاختلطت عليه وصار من أقبح الطيور الآن في مشيه...

رجاء: يعني تشبهني بالغراب؟

محمد: لك الكرامة ..أنا ضربت لك مثل بس

رجاء: موب مشكلة ... بس أحب أعطيك فكرة إن طبيعة الحياة ومكان التربية والجو اللي نعيشه سبب هذي الطباع اللي فيني ... يمكن mammy ركزت علي إني أهتم باللغة الإنجليزية وخلتني أتعلمها وأمارسها حتى مع الأهل.

محمد: أمك مولودة من اصل في البحرين أو في إيران؟

رجاء: لأ ... في البحرين مولودة..


بدا واضحا أنهما لا يتناسبان فكريا ولكن كان محمد يجتهد في أن يحلل شخصية رجاء وكذلك رجاء كانت مصرة على فرز العقلية التي يختزنها محمد فخرجا الإثنان من المقابلة وفي لقاء أم علي برجاء..

أم علي : ها يا بنيتي ؟

رجاء: very Traditionamemberlist, I don’t want him

أم علي : ويشو ... ما فهمت شي؟؟

رجاء: ما عجبني .. ما أبيه

حبيب: الووووووووه ..بو جاسم

محمد: هلا حبيب..

حبيب: ويش فيك؟ صوتك يبين كأنك تعبان؟

محمد: لا ما في شي ..قول ، آمر؟

حبيب: الليلة خطوبة سلمان في مأتم الديه الكبير .. خبرت صادق وقال بيمر عليك.

محمد: أوكي .. الساعة كم عاد؟

حبيب: ع الساعة 8 تقريبا

تنتهي المكالمة ويصفن محمد على سريره مقلبا فكره ويبحث عن الخلل الذي يعرقل خطواته في الزواج فاطمة ذات القلب الحنون لما رأت كبدها مهموما ..ضاقت بها الدنيا وأسرت في نفسها قلبا يتقطع من رؤية ولدها ملقيا على فراشه واضعا يديه تحت رأسه ممدد الرجلين يحرك طرفه يمينا شمالا فتدخل عليه غرفته ..

أم محمد: خلف أمي من أمس للحين وإنت على هالحال.. أني ما اقدر اشوفك جذيه ..أني لو أدري بيصير فيك جذيه ان خليتك على راحتك ولا جاني اليوم إللي أشوفك فيه متضايق وكل مهموم.

محمد: حجية فطوم .. وش لزمة هالكلام؟

أم محمد: شوف روحك وبتعرف!

محمد: ما فيني شي ..بس قاعد افكر فاللي يصير

أم محمد: أم علي ما عرفت تختار ليك لبنية اللي تبيها ؟

محمد: لا .. أم علي ما قصرت بس يصير إن واحد منا ما يتناسب مع فكرالثاني أو يختلف في وجهة النظر.

أم محمد: قوم غناتي وياي .. بدل قعدتك في الحجرة بروحك.


.................................................. ..........

تابعوا احداث قصة أنا وام علي الخطابة على منتدى الناصرة ..

http://www.rmooosh.net/up-pic/uploads/6586c62ba1.gif

تحياتي[/align]

واااااااااال الحين مابتحطي الجزء الي بعده بعد سنه صح

يالله خيه ابي اطلع واذخل اشوف الجزء زين شاطره اختي

[align=center]ههههههههههههههههه


لا ما بحطه بعد سنة ..

بحطه بعد سنتين خخخخخخخخخخخخخخ ..

لا خيو بحاول اني احطهم بسرعة بس النت تعبان عندي مسكين يبي لي اوديه المستشفى .. [/align]

تسلمي خيه ع التكمله بس يالله بسرررررررررررعه غناتي مو تتأخري زين

يعني عالجي النت بسررررررررررررعه خيتو زوين

[align=center][grade="800080 00BFFF FF1493 800080"] وين وصلنا في القصة نسيت ؟؟؟ [/grade][/align]

[align=center]

تفضلوا

.................................................. ...

الجزء الســــــــــادس

في مأتم الديه الكبير

محمد مع صادق وهما خلف طابور المهنئين

صادق: محمد ..لا يفوتك !!

محمد: شنو؟

صادق: خليل

محمد: وينه؟

صادق: اكو هناك .... هف الصينية كلها

محمد: جووووز عااااد ... خله في حاله.

صادق: انا أشك إنها الصينية الأولى اللي يخلونها له؟؟!!

محمد: وصلت يالله سلم على سلمان .. وبلا هدرة

وبعد أن باركا لسلمان توجها لخليل

صادق: مرحبا الخلي

خليل: هلا هلا ..شخبارك صادق ..شخبارك محمد؟

محمد: الحمد لله تمام

خليل: لحظه بطلب لكم صينية.

صادق يضرب كتف محمد في إشارة لما كان يتكلم عنه قبل قليل

صادق: لا ما نبي شي تونا متعشين ...

((كان يريد أن يعرف ردة فعل خليل ..ومحمد في ابتسامة وترقب لرد خليل))

خليل: ما يصير الخير واجد ..

صادق: لاهوفه (أكول) إنت ما تشبع؟

خليل: على شنو ؟؟ ما أكلت شي

صادق: لا تشلخ وتوك مطير صينية والله العالم كم صينية قبل؟

خليل: هي هي إذا إنت ما تبغي محمد يبغي .. وخلك تمس شي منها

محمد: خليل، ماجو الشباب؟

خليل: أكو علي توه واصل بس البقية للحين ما شفتهم

صادق: وين تشوف أحد وإنت من صينية لصينية

خليل: إن صار فيني شي ما برحمك

صادق: إنت يصير فيك شي؟؟ معدتك قوطي من غير قاع كل ما تحط فيها ما يبين شي

محمد: غربل الله ابليسك .. إنت ناوي تتسبب فيه!

صادق: ما عليك منه

محمد: شوفوا علي..

بعد ان جلس بجانبهم

علي: مرحووووووووبا

محمد: هلا علي ... وش قلت لسلمان!

علي: نسيت وش أقول ..فجا على بالي .. كل سنة وإنت سالم ! فقال لي "وين جاي حفلة عيد ميلاد"؟؟ فضحنا !!

محمد: صدق ما تدري وش تقول؟

علي: طالع هذا .. أعرف بس وصلت وتخسبقت ونسيت شنو يقولون.

صادق: إللي وراك ما قال طفوا لشموع؟

علي: شباب .. محد عنده تلفون فيه كاميرا؟؟ عشان نصور مع سلمان؟

صادق: وليش ما تكون كاميرا؟

علي: لأن محد بيفكر يجيب معاه كاميرا لكن التلفون مثل السهاية مالته في كل مكان موجود وياه.

محمد: أنا سمعت إن صارت بلاوي والسبه هالتلفونات!

علي: شلون ؟

محمد: إذا مثلا مريض الأخلاق صار عنده هالتلفون وقام يصور في خلق الله واستخدمهم في الانترنت ..وعلى فكرة صارت هالسالفة

صادق: هذا ولا شي ... إذا صار إن وحده صورت حفل زفاف وكانت حاقده مثلا وش راح يصير لو نشرت الصور؟؟

علي: كل شي له سلبياته وإيجابياته... مثل الدش والانترنت .. يعني يعتمد على ضمير صاحبها أو مستخدمها ..

محمد: الله يستر على الجميع

خليل يلمح حبيب في طرف الماتم فيناديه ويأتي لهم

صادق: أنا بقوم عنكم .. مالي شغل فيكم

حبيب: إذا حضرت الشياطين ذهبت الملائكة يعني؟

صادق: لا بالعكس حبيب.. إنت عسل على قلبي

محمد: عيل شنو؟

صادق: أنا خايف واحد من المنظمين يشعوتنا بره.

علي: ليش يطردنا وش سوينا ؟

صادق: خليل طير له خمس صواني وبيطلب لحبيب الحين ..فأكيد بيشكون فينا

محمد: جوز عاد.. الله يغربل ابليسك

خليل: الشره مو عليكم ... الشره على اللي يقعد وياكم

علي: أفا خليل!!

صادق: خليل .. زعلت.

محمد: تعال وين بتروح..

خليل: خلني أهووووووو .. بروح اجيب صينية..


في طريق العودة طلب محمد أن يخفف السرعة ..


صادق: وش صاير؟ لا تقول نسيت شي.. ما برجع

محمد: لا ما نسيت شي .. بس شوف السيارة اللي موقفه على جنب!

صادق: ايه .. شفتها.

محمد: كأن بنية .. وقف صوبها يمكن محتاجه شي.

صادق: لا ... الليلة رجعنا البيت عجل.

محمد: حرام عليك، تبي ترجع بيتكم وهالفقيرة واقفة في الشارع محد لها؟

صادق: انزين .. كأن ما في إلا إحنا.


يقفان بالقرب منها وينزل محمد

محمد: عسى ما شر الشيخة؟

الفتاة بصوت منخفض وبشيء من الخوف: بنشر عليّ الويل.

محمد: عندج سبير؟

الفتاة: ايه موجود.

يذهب محمد ليخبر صادق بما كان واخبره ان يبقى حتى ينتهي من تصليح السيارة

ارتعبت الفتاة اكثر عندما ذهب محمد لصادق فلما عاد لها...

الفتاة: بيجي خالي الحين.

محمد: مدام بالامكان إني أسوي البنشر وحتى لا تظلين قاعده في الشارع والوقت ليل بسوية وتقدرين تتصلين في خالش بعدين حتى ما يتعب ويجي ليش .. بس إذا ما عليش أمر تفتحين الصندوق.

أحست الفتاة بشيء من الإرتياح وخاصة أن محمد كان يكلمها دون أن ينظر إليها .. كان يعرف أنها خائفة .. وعندما إنتهى..

محمد: يالله ..في أمان الله

الفتاة: مشكور، ما قصرت .. رحم الله والديك

ثم انطلقا...

صادق: غربل الله ابليسك ..ثلث ساعة تسوي بنشر؟

محمد: اسكت، فصخ إيدي الجيك مالها، تشوفني دايخ وياه فتقول" اهو يبي له شوي آيل" أقول في خاطري "مشترتنه من الحراج!!"

صادق: كنت جيت تاخذ الجيك اللي في السيارة؟

محمد: حتى ما أسلم من لسانك مو؟

صادق: لويه ، وش قالوا لك عني؟

محمد: سلامتك ...


.................................................. ...

انتظروا الحلقة السابعة غداً

تحياتي[/align]