سوالف يدتي الله يرحمها......

في هذا الموضوع ان شاء الله راح احط سوالفي مع يدتي الله يرحمها ويغفر اليها
بحق محمد وآل محمد الطيبين الطاهرين
والموضوع هو من خلال مجاستي ليدتي -جدتي - عليه الرحمه وسردها لبعض الوقائع التي جرت في زمانها -حيث ان عمرها وصل لأكثر من 100 سنه
وبصراحه عندها تجربه في الحياة وكنت أجلس معاها لفترات متباعدة صحيح لكن ما كانت تبخل عني بشي اذا سألتها عنه وتكونت عندي مجموعة من التجارب والقصص التراثيه وحبيت انكم تعرفوها
فغالباً نحن نأخذ التراث من بعض الأشخاص الذين عرفوا عنه من خلال أشخاص آخرين وهنا التجربه من خلال شخصية عاشت التراث وحملته لجيل آخر من أجيالنا
إنشاء الله هالموضوع يحوز على رضاكم ويقدم اليكم شيء من التراث
وان شاء الله راح أحط الكلام بالعامية - يعني زي ما نتكلم به مع بعضنا البعض، وهو على فترات يعني كل ما رجعت الذاكرة شوي بنحط اليكم جزء من الكلام والأحداث والتي يتخللها بعد بعض المواقف الطريفه وسرد لبعض الأشياء التي حصلت في الماضي

اتمنى الإفادة للجميع

أول شي صلوا على محمد وآل محمد وأقروا الفاتحة لروح المرحومة يدتي الله يرحمها
-------------------------------------------
قبل كم سنه وأنا رايح أعايد على الأهل - يعني قبل ما أتزوج
رحت أكيد الى يدتي العزيزه - مو علشان العيديه -
رحت أزورها
أنا:- السلام عليكوووووووم
يدتي:- عليكم السلاااااااام
أنا :- هلا وغلا ، هلا بيش
يدتي :- يا هلا بالمهلي يا مرحبا ، تعال أقعد تعال
أنا :- ( بعد ما حبيت راسها وعايدت أبها ) :- هااه كيف حالش الحين ، ان شاء الله زينه
يدتي :- الحمد لله ، يوم الله عطاني الصحه
أنا :- يدتي با أسئلش لول يوم انتين بعدش بنيه وقبل ما تعرسي ويش تسووا في العيد
يدتي :- الله يغربل ابليسك ، ذكرتني
أنا :- أهم شي ما تتضايقي مني ولا با أقوم
يدتي :- لا لا بس ذكرتني بلووول
أنا :- يالله دانا طلعت قلمي والأوراق
يدتي :- ( بعد ما جلست فتره لتسترجع الأحداث ):- شوف يا ......يا ولد ....( وكانت كا تسميني الا بإسم أمي )
شوف فيه سنه من لسنين اللي راحت كنا في بيتنا اللي في الديره وأني ويا أبويي الله يرحمه قاعدين وجت أمي الله يرحمها وقالت الى ابويي
ويش يا أبو فلانه ما بتروح الى الشيخ حق الفطره ترى بكره العيد
قال اليها ابويي ...خلاص با أروح الحين برزي اليي البيزات علشان الفطره
ولا تنسي تطلعي الى ......( اسم يدتي) فياب يديده حق تعيد
وكان ابويي يحبني مرره وكل مره يروح محل لازم أييب اليي شي

ويم يا الصبح طلعنا ويا بيت .....ورحنا نعايد على قرايبنا
واللي يعطينا آنه واللي يعطينا قرشين واللي يعطينا فلافة قروش
هذا الغني مررره وفيه واحد من قرايبنا يخش اليي والى بت عمي كل وحده فلافة قروش للعيد ويعطينا وياها
أنا :- يمه وكم عمرش ذاك الوقت
يدتي :- يعني حول الست حول السبع
أنا:- زين ويش كنتو تلبسوا في العيد
يدتي :- ويش نلبس يعني ، نلبس يا طويل العمر بخنق ونلبس فوب مكشكش ونلبس نعال يديد لازم ونتحنى ويحطوا الينا ابهاتنا وامهاتنا مشموم ولازم نتبخر أما الريال يلبسوا فوب ابيض يديد ويلبسوا غتره بعد يديده ولازم يحطو اليهم خنه حق يصيروا خنينيين
أنا:- زين ويش تقولوا ..ويش تلعبوا في العيد
يدتي :- نلعب وإحنا نقول أناشيد
أنا :- زي ويش أمي
يدتي :- أني با أقول لك شوي لكن اذا يا أحد ما ني مكمله زين
أنا :- ما عليه أماه
يدتي :- نلعب لعية حليوه ، وهي اذا قرب أذان الظهر
نوقف على يدار من اليدران كلنا البنيات
ونقول نشيده علشان يأذن بسرعه ونروح نتغدى
والنشيده تقول :-
أمايي أبغى لقمة
واللقمة من البرمة
والبرمة تبغي حطب
والحطب من النخله
والنخله تبغي قدوم
والقدوم عند الحداد
والحداد يبغي فلوس
والفلوس عند العروس
والعروس تبغي رجل
والرجل يبغي ولاد
والولاد يبغوا حليب
والحليب من البقر
والبقر يبغوا حشيش
والحشيش من اليبل
واليبل يبغى مطر
والمطر من عند الله
لا إله إلا الله
محمد رسول الله
علياً ولي الله
لا اله الا الله

وبعد كذه دخلوا أولاد خالتي وقاموا يعايدوا بيدتي
وسكتت يدتي عن الكلام المباح بعدما طلع الصباح
-----------------------
ان شاء الله عجبتكم سالفة يدتي

والتكمله قريباً

الف رحمة عليها وعلى المؤمنين والمؤمنات ,,,

(بسم الله الرحمن الرحيم ** الحمدلله رب العالمين **الرحمن الرحيم **مالك يوم الدين **

إياك نعبد وإياك نستعين **إهدنا الصراط المستقيم **صراط الذين أنعمت عليهم **غير المغضوب عليهم **

ولا الضـالين **)

سالفتها حـلوة ..

الله يعطيك العافية اخوي ..

بالانتظار ..

[ بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين ]

الله يرحمــها ويرحم جميع المؤمنين



مررره حليوة القصــه


والفــكره جدا رائـــــعه

ننتظر قصـه جديده

يعطيك ربي الف عـافيه

بالتوفيق ..

تحياتي

الف رحمة عليها وعلى المؤمنين والمؤمنات ,,,

(بسم الله الرحمن الرحيم ** الحمدلله رب العالمين **الرحمن الرحيم **مالك يوم الدين **

إياك نعبد وإياك نستعين **إهدنا الصراط المستقيم **صراط الذين أنعمت عليهم **غير المغضوب عليهم **

ولا الضـالين **)

سالفة مرة حلوة وعجبتني
الأنشودة واني اشوف جدتي كل تقولها لينا ولاني دارية عن حاجة ههه
يسلموووو ابو زين بارك اله فيك
وننتظر التكمله
تحياتي

(( بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين ))

الله يرحمها ويرحم امواتنا جميعا

الله يعطيك العافية اخوي واحد فاضي
والله سوالف لكبار والأجداد حلوة
ماتمل منها لما تقعد تسمعهم ،،
شكرا لك و بانتظار التكملة ..

تحيتي العطرة
حزن العمر

بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين .
رحمة الله عليها .
يالله أبوزين ننتظر باقي سوالف الجده

مشكورين ورحم الله والديكم وأثابكم الله
ورحم الله المؤمنين والمؤمنات أجمعين
وان شاء الله بعد شوي نجيب اليكم جزء ثاني

سوااااااااالف حلوه مره

تقبلوا تحياتي

(( بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * صراط الذين انعمت عليهم * غير المغضوب عليهم * ولا الضالين ))

الله يرحمها ويرحم امواتنا جميعا

الله يعطيك العافية اخوي واحد فاضي
سوالف يدتك حليووووووه

اقتباس:

---

يدتي :- أني با أقول لك شوي لكن اذا يا أحد ما ني مكمله زين

---

خخخخخ >>> لزوم التشويق

بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين .
رحمة الله أموات المؤمنين أجمعين

مشكوووور
يسلموووو والله سوالف الجدود ما تنمل

السلام عليكم ورحمة الله وبركاته

اليوم بنجيب سالفه يديده
هذا الله يسلمكم ويطول أعماركم ويخليكم لأهاليكم
ببركة الصلاة على محمد وآل محمد الطيبين الطاهرين

كانت يدتي الله يرحمها في بيتنا ودخلت عليها في المجلس اللي تقعد فيه
وشفتها قاعده جنب الدريشه .....( وجدتي كانت ضريره
- جاها الضرر على كبر )
وسألتها عن سر جلستها عند الدريشه .................
فقالت لي :- هذا يا ..........يا ولد.............. قاعده اتذكر ايام لووول يوم كنت أقعد عند دريشة بيت أبويي وأطالع الصبيان وهم يلعبوا
أنا:- ويش كانوا يلعبوا أماه
يدتي :- العاب وااايد يا ولدي
أنا :- زي ويش أماه
يدتي :- خلاص زين با أقول لك بس بسرعه
روح ييب أوراقك وقلمك لا تينني
أنا:- ان شاء الله أماه
ورحت جبيت الأوراق والقلم وبديت بالكتابه
يدتي :- لول كانوا يلعبوا العاب واااايد زي ما قلت اله
واليوم باقول لك وحده منهم وهي لعبه حليوه ....لعبة ( يدي وين رايح )
ومو ناس وايد يلعبوها حتى من زمان وهيه يا محفوظ السلامه
يتيمعوا شوية يهال ويخلوا واحد منهم هوه يدهم
ويعطوه عصاه ويتحزم ويقولوا اله :
- يدي وين رايح
فيرد عليهم
- رايح النخل
فيقولوا له
- خذنا وياك
فيقول لهم
- في وين أحطكم
فيقولوا له
- حطنا في مخباك
فيقول لهم
- مخباي .. مخباي......فيه قمل وصيبان

فيبدوا يعايرونه ويقولوا له :- يا بو القمل والصيبان ...يا بو القمل والصيبان

وبعد فلاف مرات يقولوا له يا بو القمل والصيبان

يغضب ويلاحقهم ويضربهم بعصاته لين ايود( يمسك) واحد منهم علشان هوه اللي يصير يدهم اليديد

أنا :- الله حلوه هاللعبة
يدتي :- ايه حلوه بس فيه يهال الله يغربل ابليسهم يسووا شباق على هاللعبة
وتوصل الى الأهل
أنا:- يالله بس بعدهيه لعبه حليوه
يدتي :- اي والله حليوه مو زي الحين ما فيه الا سيسيشن (بلاي ستيشن) ، وبو بوي ( قيم بوي) ، وهالخرابيط
أنا :- يالله يداه كل زمن واله لعباته
يدتي :- بس لعبات لول ما فيها لا بيع ولا مشترى

طق طق طق طق ............وطرق الأهل الباب
وجائهم الجواب
وسكتت يدتي عن الكلام المباح
عندما طلع الصباح

(( بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * صراط الذين انعمت عليهم * غير المغضوب عليهم * ولا الضالين ))

الله يرحمها ويرحم امواتنا جميعا


والله سوالف جدتك كثيييييييييييييير حلووووة

شوقتني أسمع قصصها الثانيه

الله لا يحرمنا من جديدك

واصل >>>> إبداعك

اقتباس:

---

المشاركة الأصلية كتبت بواسطة واحد فاضي

روح ييب أوراقك وقلمك لا تينني
أنا:- ان شاء الله أماه
ورحت جبيت الأوراق والقلم وبديت بالكتابه

---

الف رحمه عليها ويسكنها فسيح جناته ...

ماشاء الله عليها عارفة انك تبغى تكتب حليوة عجبتني روح ييب اوراقك ...

فاهمه عليك ,,,,

الله يعطيك العافية وبانتظار المزيد ..

هههههههههههه
ماشاالله
والله ونــاااسه,.,, الله يرحم جدتك خيي ويسكنها فسيح جناته مجاورة محمد وال محمد يارب..

والله كنت مسجله خروج..:sleep:. وراي بكره دوام..
يقطع الكليه والدراسه فيها .. :noworry:.. مو كليه مراره..
ورحت الرئيسيه كالعاده اطل واشوف قبل لا اشطب الدنيا ... الا ..
سوالف يدتي الله يرحمها...
ايبـــــااااا :nuts: خوش قصه ..
وادخل.. واصير اقرى.. واني اقول في بالي .. بكره بعقب ...
وناسه السوالف بالمره .. وصلت هنا وضحكت..
أمايي أبغى لقمة
واللقمة من البرمة
والبرمة تبغي حطب
.... الخ...

استخدمت هالإنشوده في روايتي :embarrest:... والله حركتات...
ولا بعد لعبه حليوه( يدي وين رايح) .. هههههه ما تصلح للبنات احس من طاري العصاه مع الملاحق بيصير فيها شدخ و مشادخ.. :seif:
تخيلت روحي تصدق اشوف هالسوالف كن البيت العود لو حزاوي الدار هالشكل يعنوو..

ما شفت روحي الا مسجله دخول مره ثانيه.. الا اعقب ..
<<<لكن ان ما طلعت من المنتدى وظليت سهرانه.. كل منك :bleh:....

الله يرحمها ويرحم موتانا وموتاكم..

<<< هالهدره كلها وهي نعسانه.. والبطاريه .. مخلصه.. اجل لو فلل ويش
بتسوووي .. :wacko:

يعطيك الف عافيه خيي..

دمت بحفظ الرحمن

وااااااااااااو سوالف مرة حلوه
وحتى هاللعبة لحين موجودة اتذكر كنت اللعبها
سوالف مرة حلوة
كمل اخوي
اسجل من المتابعين
تحياتي

* الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين .
رحمة الله عليها .
ويرحم اموات المؤمنين والمؤمنات.....

خيتي سيناريو مرحبتين

أي والله خيتي لازم التشويق عن يدتي

والله خليتيني اتذكرها وهي تقول هالكلمه - الله يرحمها

تسلمي على التواجد اللطيف

------------------------------------
زهور الريف حياش الله خيتي

أي والله ما تنمل ...وهالجلسات اللي ويا يدتي ما انساها أبد
كأنها صايره أمس

تحياتي
---------------------------------
خيت نور قلبي حياش الله

ما يهمش خيتي كل فتره بنحط اليكم سالفه تحكي عن التراث
عن المرحومه يدتي

تحياتي
----------------------------------
خيت شذى الزهراء مرااااحب

أي والله كم مره أنسى القلم والورقه وبعدين أخليها تقول السالفه مره ثانيه

بعدين ما فيه هيه اللي تسألني عندك أوراقك ؟؟؟هههههههههه

تحياتي
-------------------------
الأمل البعيد حياش الله

زين والله خيتي لحقتي على هاللعبة
بصراحه أنا ما لعبتها بس من شكلها حلوووووه

تسلمي خيت على التواجد اللطيف
وسجلناش خلاص ههههههههه

تحياتي
-----------------------
خيتي منحوسه مرحبا

الله يرحم والديش خيتي

تحياتي

هههههههههههه

ماشاالله
والله ونــاااسه,.,, الله يرحم جدتك خيي ويسكنها فسيح جناته مجاورة محمد وال محمد يارب..

الله يرحم والديش ويرحم أمواتكم وأموات المؤمنين والمؤمنات أجمعين

والله كنت مسجله خروج..:sleep:. وراي بكره دوام..
يقطع الكليه والدراسه فيها .. :noworry:.. مو كليه مراره..

الله يعطيش العافيه وإن شاء الله تتخرجي وتبئي
متخرجه أد الدنيا ههههههه>> يعني ويش بتصير أكيد متخرجه ههههه


ورحت الرئيسيه كالعاده اطل واشوف قبل لا اشطب الدنيا ... الا ..
سوالف يدتي الله يرحمها...
ايبـــــااااا :nuts: خوش قصه ..

توشكري خيتي


وادخل.. واصير اقرى.. واني اقول في بالي .. بكره بعقب ...
وناسه السوالف بالمره .. وصلت هنا وضحكت..
أمايي أبغى لقمة
واللقمة من البرمة
والبرمة تبغي حطب
.... الخ...

استخدمت هالإنشوده في روايتي :embarrest:... والله حركتات...

حقوق الحفظ منسوخه ....نسوخ الحفظ مطبوعه
ما أدري ويش يقولوا ههههههه

حركتات والله

ولا بعد لعبه حليوه( يدي وين رايح) .. هههههه ما تصلح للبنات احس من طاري العصاه مع الملاحق بيصير فيها شدخ و مشادخ.. :seif:

إسئلي خيتي الأمل البعيد ويش رايها في اللعبه
ترى لعبتها ...وما يندرى تدخ ولا شدخوها هههههههههه
بس أعتقد انها ذيبه في هالألعاب



تخيلت روحي تصدق اشوف هالسوالف كن البيت العود لو حزاوي الدار هالشكل يعنوو..

إخراج أحمد يعقوب المقلى هههههه
على قولت أخويي الصغير

ما شفت روحي الا مسجله دخول مره ثانيه.. الا اعقب ..
<<<لكن ان ما طلعت من المنتدى وظليت سهرانه.. كل منك :bleh:....

مالي شغل أنا
تتهميني لا ويش ......خلاص أجل ما بنكمل
أهيء أهيء أهيء

علشان لا تتهميني بعدين :wink::wink:

الله يرحمها ويرحم موتانا وموتاكم..

<<< هالهدره كلها وهي نعسانه.. والبطاريه .. مخلصه.. اجل لو فلل ويش
بتسوووي .. :wacko:

كان بيقول لش الكمبيوتر ......إعتقييييييييييييييييني ههههههههههههه

يعطيش العافيه ويسلمش خيتي

يعطيك الف عافيه خيي..

دمت بحفظ الرحمن

الله يسلمش ويعافيش خيتي وان شاء الله تتوفقي في دراستش ياااااااااااارب

الله يرحمها ويسكنها بجوار شفيع الامه
محمد صلى الله عليه واله وسلم



هذي السوالف الي تقند الراس >>> ما ادري الكلمة عدله لو لاء

وتعدل المزاج

<<<< مفتقده شي اسمه جده ومشتاقه تسمع سوالف الاول

الله يرحم جدتك وجداتي
ويسكنهم وسيع جناته

دمتــ بود

اقتباس:

---

إسئلي خيتي الأمل البعيد ويش رايها في اللعبه
ترى لعبتها ...وما يندرى تدخ ولا شدخوها هههههههههه

---

اقتباس:

---

بس أعتقد انها ذيبه في هالألعاب

---

هههههههههه ياخوي اني اشلخهم بالملاس هه يروحوا يشتكوا
زي ماقالت جدتك كل تصير هوشات في هاللعبة
بس اني احسها وناسة لأني اضارب واشدخ بالناس هع هع
وياحبي للألعاب الشباقية مادري ويش يسموها الي فيها ضرب خخ
واي شبقة او هوشة لازم اتدخل

(بسم الله الرحمن الرحيم ** الحمدلله رب العالمين **الرحمن الرحيم **مالك يوم الدين **

إياك نعبد وإياك نستعين **إهدنا الصراط المستقيم **صراط الذين أنعمت عليهم **غير المغضوب عليهم **

ولا الضـالين **)

الله يرحمها ويرحم امواتنا وامواتكم برحمته الواسعه


الله يعطيك العافية ابو زين

وتسلم الايادي

اخوي مليان

حلو منك هذا الموضوع ( سوالف يدتي الله يرحمها ) وسوالفها واجد حليوة:toung:

وهذي اللعبة كنا نلعبها واجد ونستانس وعصايتنا هي قلم القدو:wink::wink:

الله يرحم جدتك يا ابو زين وغمد روحها الجنة يا رب

الله يرحمها ويسكنها بجوار شفيع الامه

محمد صلى الله عليه واله وسلم

موانا وموتاكم يا أرحم الراحمين

هذي السوالف الي تقند الراس >>> ما ادري الكلمة عدله لو لاء

وتعدل المزاج

مزبوووووط كلمتش ميه الميه وحلوه >>تقند الراس هههه
زي القهوه العربيه .....صح

<<<< مفتقده شي اسمه جده ومشتاقه تسمع سوالف الاول

الله يرحم جدتك وجداتي
ويسكنهم وسيع جناته

الله يرحمهم ويسكنهم بجوار محمد وآل محمد الطيبين الطاهرين

دمتــ بود

اقتباس:

---

المشاركة الأصلية كتبت بواسطة الأمل البعيد

هههههههههه ياخوي اني اشلخهم بالملاس هه يروحوا يشتكوا
زي ماقالت جدتك كل تصير هوشات في هاللعبة
بس اني احسها وناسة لأني اضارب واشدخ بالناس هع هع
وياحبي للألعاب الشباقية مادري ويش يسموها الي فيها ضرب خخ
واي شبقة او هوشة لازم اتدخل

---

طلعتي منتي هينه خيتي

شباااااقه الأخت ههههههههههههههه

ما يهمش خيتي بنجيب - بنييب - العاب اللي فيها شباق وضرب بعد ههههههه

تحياتي

اقتباس:

---

المشاركة الأصلية كتبت بواسطة ام محمد

(بسم الله الرحمن الرحيم ** الحمدلله رب العالمين **الرحمن الرحيم **مالك يوم الدين **

إياك نعبد وإياك نستعين **إهدنا الصراط المستقيم **صراط الذين أنعمت عليهم **غير المغضوب عليهم **

ولا الضـالين **)

الله يرحمها ويرحم امواتنا وامواتكم برحمته الواسعه

الله يعطيك العافية ابو زين

وتسلم الايادي

---

الله يسلمش خيتي أم محمد

وتستانسي بسوالف يدتي الله يرحمها ان شاء الله

تحياتي

اقتباس:

---

المشاركة الأصلية كتبت بواسطة عفاف الهدى

اخوي مليان

حلو منك هذا الموضوع ( سوالف يدتي الله يرحمها ) وسوالفها واجد حليوة:toung:

وهذي اللعبة كنا نلعبها واجد ونستانس وعصايتنا هي قلم القدو:wink::wink:

الله يرحم جدتك يا ابو زين وغمد روحها الجنة يا رب

---

تسلمي خيتي عفاف الهدى على التواجد الكريم

أيه أيه طلعت الابداعات ...وحده بالملاسووحده بقلم القدو ........طلعتوا منتو هينين أبد ههههههههه

الله يسلمش خيتي ويرحم أموات المؤمنين والمؤمنات أجمعين
ويعافي يدتش ان شاء الله ويسلمها يارب يا كريم


تحياتي

اليوم عندي اليكم سالفه حلوه

هذا يا محفوظين السلامه والبقاء
مره رحت الى يدتي في بيتهم
وشفتها قاعده وبأيدها صره
وتليقفت وسألتها :..........

أنا :- أماه ويش هذا

يدتي :- عاد قول السلام عليكم

أنا :- السلام عليكم ورحمة الله وبركاته
يدتي :- وعليكم السلام ورحمة الله وبركاته ....وان شان عندك شي هاته هههههههه
وضحكت وهي تنتظر مني شيء وعدته أياه
أنا :- يعني ما تنسي أماه
يدتي :- لا ما أنسى ....قوم ييبه أول شي
وقمت لأحضر لها ما وعدتها به وأنا خارج صاحت علي :- لا تنسى أوراقك بعد زين ..........

وذهبت ورجعت وبيدي (.........) في النهاية بتعرفوه وبتشوفوا هالشي اللي الى الحين
الجدات والأمهات الكبار يحبوووووه:toung: ؟؟؟؟

أنا:- تفضلي أماه
يدتي :- قوم حطه تحت الكرفايه
وقمت ووضعته وفي داخلي شوق لمعرفة ما كان في صرتها

أنا :- أماه الحين بتقولي لي ويش اللي كان عندش؟
يدتي :- أيه با أقول الك الحين
أنا :- دانا قعدت وبا أسمع منش
يدتي :- هذا يا......يا ولد........... صرتي يوم كنت أروح ويا البنيات الملعلم
أنا :- وويش كنتوا تدرسوا
يدتي :- ( بلهجة التهكم ) :- ويش ندرس يعني ندرس حساب هههههههه

أنا :- لا يعني أماه كيفه يدرسوكم يعني
يدتي :- يايتنك في الحشي( الحكي ) ....نروح العصر للمعلمه ونسلم عليها ونقعد في صفين
الاولاد قدام والبنات وراء ...وندرس القرآن
أنا:- كيفه يعني
يدتي :- لمعلمه تقول وإحنا نردد وراها ..............- وقبل لا أسئل )
يعني هي تقول :-...أ أِ أُ ( أأأأ أي ....أو ) بالفتح والكسر والضم
باء بي بو
تاء تي تو

.............الخ

وإحنا نردد وراها الين نعرف المكسور من المركوب من المسحوب

أنا :- وشوه وشوه وشوه

يدتي:- أيه كده يسموهم ، يعني اللي تحته كسره >>مكسور
اللي فوقه ضمه مسحوب
اللي فوقه فتحه مركوب

أنا :- أيه وبعدين

يدتي :- وبعدين نتعلم القريه من جز عم وبعدين الفاتحه وبعديم المعوذات وبعدين باقي السور

وضحكت يدتي وتذكرت كأنها تذكرت شي في خاطرها
وسألتها :- ويش أماه ويش جاء في بالش
يدتي :- بعد شوي با أقول الك وان شاء الله اتذكره

أنا:- الله يعطيش الصحة والعافيه أماه
يدتي :- الله يسمع منك يا ولدي ، الحين يعني يعلمونا حاجات واااايد يا ولدي
ما أتذكرها الحين بس اتذكرها با أقول الك

وسكتت قليلاً

أنا :- ويش أماه تعبتي ...........فأشارت لي بأن أسكت ...........فسكت

وبعد فترة تكلمت

يدتي :- هذا يا ولدي إذا طلعنا من المعلم نقول نشيده .
أنا :- ايه أماه ويش تقول هالنشيده

يدتي :- اذا طلعنا من المعلم نقول :-

رحنا في سرابه
ويينا في سرابه
لقينا عبدالله اللومي
ذبح لينا ديايه
على طول السماده
تفو تفو يا شايبوه
يا مكسر العتايبوه

وكان الأولاد يقولوها من يشوفوا الشياب اللي ما يقدروا يركضوا
بس كم واحد منهم مسكوه ورنووووه دست
ولا فاني يوم ضربوه فلكه عند الملعمه ولا الشيخ

و..............طق طق طق طق جاء أبن بنتها يسألها

فسكتت اليده عن الكلام المباح
عندما طلع الصباح

--تعرفوا ويش هوي الحاجه اللي يجبوها الجدات والأمهات الكبار في السن
ونصيحه جربوا تشتروا اليهم كم واحد منها وأعطوهم ايها وقولوا اليهم على الأقل
والله يا يمه تنغصت الش على واحد منه

انه .....



أنه ............











:wink::wink::wink::wink:

















عصير الطماطم ............ في أيت V8

[ بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين ]
اللهـ يرحمها برحمتهـ
سوالف الجدات ماتنمل ابد
ننتظر جديدكـ اخوي الكريمـ

..
.
.

وربي انك خطييييييييير

والله يرحم جدتك ويسكن روحها الجنه..

حلووووه عصير الطماط بصراحه جبتها بس ودي اعرف السر اللي مخليهم يتعلقوا فيه


وننتظ التكمله لا تبخل علينا ..

عجبني المركوب والمسحوب والمكسور مرة خفيفين دم

ويسلم لي ها في ايت والله ايام
حتى جدتي الله يطول عمرها ما نروح ليها الا والفي ايت في ايدها وتحت كرفايتها
والله يرحم جدتك برحمته الواسعه

على فكرة ليلة الاربعاء كلمت زوجتك ابغى اصور وللأسف ما كان في مجال

يلا مرة ثانية

بسم الله
ههههههههههههههه ضحكتني يابو زيوووووون القمرررررر:embarrest:
إي والله, الله يرحمها كانت سوالفها كشششششخه:clap:
وأنته أكشخ وأكشخ يالمبدع:ongue:
وااااااااصل من غير ما تفاصل :shiny:
ننتظر المزيد والمزيد ..
سلامي للكل:icon30:

اقتباس:

---

رحنا في سرابه
ويينا في سرابه
لقينا عبدالله اللومي
ذبح لينا ديايه
على طول السماده
تفو تفو يا شايبوه
يا مكسر العتايبوه

---

أحنا نقولها غير
وهي :
شوربة موربة
راحت خسارة
لقينا عبدالله اللومي
ذبح لينا ديايه
على طول السماده
تفو تفو يا شايب
يا مكسر العتايب
الله على هالأنشودة ما انساها
والله يخوي سوالف جدتك مرة حلوة عسل يم يم >> جوعانه البنية
ايي والله يحبوا عصير الطماطة قصدي الطماطم هع
يلا اخوي استمر ترى شوقتنا
ومن راي ان يثبت الموضوع لأن حلو وحقيقي يعني ابداع
تحياتي

اقتباس:

---

المشاركة الأصلية كتبت بواسطة أميرة العشق

[ بسم الله الرحمن الرحيم * الحمد لله رب العالمين * الرحمن الرحيم * مالك يوم الدين * اياك نعبد واياك نستعين * اهدنا السراط المستقيم * سراط الذين انعمت عليهم * غير المغضوب عليهم * ولا الضالين ]
اللهـ يرحمها برحمتهـ
سوالف الجدات ماتنمل ابد
ننتظر جديدكـ اخوي الكريمـ

---

خيتي أميرة العشق مرحبتين
الله يرحم والديش خيتي

أكييييد وفيه أحد يمل من سوالف الجدات

تقبلي تحياتي على التواجد اللطيف

اقتباس:

---

المشاركة الأصلية كتبت بواسطة ليالي الخبر

..
.
.

وربي انك خطييييييييير

والله يرحم جدتك ويسكن روحها الجنه..

حلووووه عصير الطماط بصراحه جبتها بس ودي اعرف السر اللي مخليهم يتعلقوا فيه


وننتظ التكمله لا تبخل علينا ..

---

هلا بيش خيتي ليالي الخبر

تواجدش هو الخطييييير خيتي

ويرحم والديش خيتي

السر اللي يخليهم يتعلقوا فيه خااااااااااص بهم ههههههههه

تقبلي تحياتي

اقتباس:

---

المشاركة الأصلية كتبت بواسطة عفاف الهدى

عجبني المركوب والمسحوب والمكسور مرة خفيفين دم

ويسلم لي ها في ايت والله ايام
حتى جدتي الله يطول عمرها ما نروح ليها الا والفي ايت في ايدها وتحت كرفايتها
والله يرحم جدتك برحمته الواسعه

على فكرة ليلة الاربعاء كلمت زوجتك ابغى اصور وللأسف ما كان في مجال

يلا مرة ثانية

---

خيتي عفاف الهدى حياش الله

أيه هذي دراستهم بعد ..........والفي أيت اله ذكريات

وهي عاده عند الجدات والامهات لااااااااااااازم في أيت تقولي إدماااااااااان ههههههههه
الله يسلمش ويعافيها يدتش ياااااااااااارب

ما عليش خيتي سألت المدام وقالت لي انها كانت نايمه وبعدين كان عندها تصوير
واااااااااايد ذيك الليله :embarrest::embarrest:خطوبه وتصوير 3 أزواج في الاستيديو

ان شاء الله في الجايات

الله يوفقش ياااارب

تحياتي

اقتباس:

---

المشاركة الأصلية كتبت بواسطة مياس

بسم الله

ههههههههههههههه ضحكتني يابو زيوووووون القمرررررر:embarrest:
إي والله, الله يرحمها كانت سوالفها كشششششخه:clap:
وأنته أكشخ وأكشخ يالمبدع:ongue:
وااااااااصل من غير ما تفاصل :shiny:
ننتظر المزيد والمزيد ..

سلامي للكل:icon30:

---

هلو بيش خيتي مياااس
الله يدوووووم الضحكه يااااارب

الله يرحمها ويغفر اليها ياااااااارب

تواجدك هو الكششششششششششششخه خيتي

حاااااااااااضرين بس فاصل ونواااااااااااصل :wink:

الله يسلمش خيه ميااااااااااس

تحياتي

حياش الله خيتي الأمل البعيد

أحنا نقولها غير
وهي :
شوربة موربة
راحت خسارة
لقينا عبدالله اللومي
ذبح لينا ديايه
على طول السماده
تفو تفو يا شايب
يا مكسر العتايب
الله على هالأنشودة ما انساها
حلووووووه منش خيتي الامل
وبالصراحه التراث القطيفي خصوصاً
والخليجي عموماً متشابه الى حد كبييير
والله يخوي سوالف جدتك مرة حلوة عسل يم يم >> جوعانه البنية

مرورش هو العسل خيتي .....
انتبهي لا تشربي عصير يدتي هههههههه
ايي والله يحبوا عصير الطماطة قصدي الطماطم هع

عندهم إدمااااااااان على هالعصير وما يندرى عن السبب هههههههه
يلا اخوي استمر ترى شوقتنا
ان شاء الله خيتي
خلينا نتذكر ونرجع للأوراق
اللي الى الحين ما لقينا منهم الا شوي بس
الله المعين

ومن راي ان يثبت الموضوع لأن حلو وحقيقي يعني ابداع
تحياتي

الرأي الأول والأخير لأخونا شبكه

تحياتي لتواجدك العطر خيتي

ههههههههههههههههههههههههههههههههههههههههههههههههه
اسعدك الله خيي,,, وربي سوالف يدتك تونس
واسلوبك مره حلو هههههههههههههه
ويش يسكتني الحين,,, يااربي هههههههههه

أيه كده يسموهم ، يعني اللي تحته كسره >>مكسور
اللي فوقه ضمه مسحوب
اللي فوقه فتحه مركوب

هههههههههههه حشاا ولا حررب ... ركب وانكسر وانسحب ههههههههههههههه يا مجيير

لوووو
تفو تفو يا شايبوه
يا مكسر العتايبوه

وكان الأولاد يقولوها من يشوفوا الشياب اللي ما يقدروا يركضوا
بس كم واحد منهم مسكوه ورنووووه دست

هههههههههههههههههه مااني قادره على المصطلحات هنا :wink:
عجيييبه ولا عاد رنووه دست هههههههه عجبتني رنووه.. واحم الفوقيه الحمرا ههههه المكرره مرتين.. هاا وصلت .. ايه مناك يمين يمين ههههههههه
وي وي ابغى اكسجين خلاص بحح

روووح يااا رجاال
الله ينولك كل مراد ويعطيك دايم الدوم صحة وقوة الشباب ويفتح لك الرزق من كل باب يا ابو زين يا ... ولد ....
يا واحدٍ فااضي .. قادر يا كريم <<< اعظم من ضبعه.. احح ويش احسن من هالدعا بعد
يعطيك الف عافيه خيووو
والله حيوو هالسوالف الزينه
رحمة الله على يدتك
دمت بحفظ الرحمن

ههههههههههههههههههههههههههههههههههههههههههههههههه

اسعدك الله خيي,,, وربي سوالف يدتك تونس
واسلوبك مره حلو هههههههههههههه
ويش يسكتني الحين,,, يااربي هههههههههه

الله يسعد أيامش ان شاء الله ودووووووم هالضحكه يااارب

أيه كده يسموهم ، يعني اللي تحته كسره >>مكسور
اللي فوقه ضمه مسحوب
اللي فوقه فتحه مركوب

هههههههههههه حشاا ولا حررب ... ركب وانكسر وانسحب ههههههههههههههه يا مجيير

هذي مصطلحاتهم بعد ويش نسوي ههههههه

لوووو
تفو تفو يا شايبوه
يا مكسر العتايبوه

وكان الأولاد يقولوها من يشوفوا الشياب اللي ما يقدروا يركضوا
بس كم واحد منهم مسكوه ورنووووه دست

هههههههههههههههههه مااني قادره على المصطلحات هنا :wink:
عجيييبه ولا عاد رنووه دست هههههههه عجبتني رنووه.. واحم الفوقيه الحمرا ههههه المكرره مرتين.. هاا وصلت .. ايه مناك يمين يمين ههههههههه
وي وي ابغى اكسجين خلاص بحح

ههههههههههه الله يغربل ابليسش أميرووووووه
ذكرتيني بالمرحومه وتعابير وجهها وهي تقول السالفه
خلاص بنحط الش اوكسجين مع الموضوع ههههههههه

روووح يااا رجاال
الله ينولك كل مراد ويعطيك دايم الدوم صحة وقوة الشباب ويفتح لك الرزق من كل باب يا ابو زين يا ... ولد ....
يا واحدٍ فااضي .. قادر يا كريم <<< اعظم من ضبعه.. احح ويش احسن من هالدعا بعد

الله يرحم والديش على هالدعاء يالضبعه هههههههههه

وتبغي دعاء ضبعه إسمعي :-
روحي يا أميرووه يا اللي إسمش فيه المرح
الله يسعد أيامش وينولش اللي تمبيه
ويبعد عنش النار والحديد وكل شي ما هو يدييد
ويسخر الش العبيد في ليلش ونهارش
بجاه من هو فارق النار والجنه
أبو الحسن علي


يعطيك الف عافيه خيووو

الله يعافيش ويسلمش خيتي

والله حيوو هالسوالف الزينه
الله حيها أم المرح

رحمة الله على يدتك

دمت بحفظ الرحمن

الله يسلمش ويرحم والديش خيتي

تحياتي

مساكم الله بالخير

وقواكم الله بالعافيه

هذا اليوم سالفتي ويا يدتي غير

فيه يوم من أيام الله الفضيله

دخلت على يدتي الله يرحمها في بيتنا
وهيه قاعده تفكر وتبتسم

أنا :- سلام علاااااك أماه

يدتي :- علااااك السلام ...مرحبوووووووووووااااااااااااااااااااا

أنا :- يا هلا ويا مرحبا ، ويش عندهم اليوم

يدتي :- أول شي صك الباب >>>ولا تنسى أوراقك يالله

أنا :- ان شاء الله أماه ، أمرش ولا يهمش

وبعد ما صكيت الباب جيت اليها وجلست عندها
زي الطالب اللي ينتظر أستاذه يملي عليه درس

يدتي :- ما يحتاي تسألني اليوم أني با أقول لك حاجة
أنا :- ما با أسئلش وخدي راحتش
يدتي :- هذا يا محفوظ السلامة يا ......يا ولد ............
با أسولف لك اليوم عن عرس صاحبتي ،

وهي بنية من ربعنا تدرس ويانا في المعلم ، ما شفتها ذاك اليوم الا يايه وهي تضحك
قلت ليها :- هاااه خير ويش فيش ؟؟ أهلش يو من السفر ولا ويش ؟؟يابوا الش هديه ؟يابوا اليي بعد ولا نسيوني ؟؟
قالت لي صاحبتي :- لا هذا ولاذاك ، با أعرس بعد اسبوع حيفه أبويي قايل اليي

قلت اليها :- ومنهوه طايح هالسنيه اللي بياخدش
قالت لي:- ولد يارتنا أم ........
قلت اليها :- ويش أتحنى وياش لو ما تبغيني
قالت لي :- يوووه ما ابغاش .......الا انتين ، ومنهو ليي يقعد ويايي
قلت اليها :- شوفي أني ما ابغى الا اتحنى من حناش مو يحطوا اليي حنا مال الناس
قالت لي :- ولا يهمش ، ما با اتحنى الا بعد ما تتحني

أنا :- ويش خلتش تتحني ولا لا
يدتي :- تقول ما بتفتح بوزك ، عودنا على اللقافه يعني
أنا :- خلاص خلاص <<<<بعد ويش ...بعد ما زفتك ههههههههه

يدتي :- يوم يا العرس لبست بخنقي وعطتني أمي كيس ورحت اليها وقعدت وياها وسولفنا لين ( وقاطعتها )
أنا :- بس سؤال أماه بس سؤال ..........
يدتي :- ابو طبيع ما ييوز عن طبعه ، ويش تبغى بعد
أنا :- قبل كم ليله يحنوا العروس
يدتي :- يحنوها يا محفوظ السلامه قبل ليلتين لو فلاف

أنا :- خلاص أماه ما بسأل شي فاني
يدتي:- بنشوف ......( يبين من خرخاش السعف )<<<<<تعرفوا ويش معناها ؟؟؟؟؟؟

يدتي :- ذيك الليلة قعدنا زي ما قلت الك ويوم قالوا النسوان يالله يا وقت التحني ، قالت اليهم خويتي ماني متحنيه الا أول شي تحنوا ...........
قالت اليها أمها :- خلاص خلاص بتتحنوا يميع
قالت خويتي :- أيه لانها شارطه عليي
أمها :- والنعم ابكم الله يخليكم الى بعض

وبعدين لبسوها داك الفوب العجمي ، أخصر على قهواجي وفيه الزري من كل مكان تقول خويتي
هذا الفوب يايبينه من الهند
وبعدين دخلوا عليها المحنيات وحطوا تحت ارايلها مخدتين وعند ظهرها مخدتين وحطوا ليي مفلاتها
وقاموا يحنوها ويحنوني وياها ، وأول شي النحيسين ما رضيوا يحنوني الا طرق واحد
ما شفتها الا بتقوم وقالت اليهم شوفوا اذا بتحنوها طرق واحد أني بعد طرق واحد ، شوفوا أني زيها مو هيه زيي حتى استغربوا من كلامها ............

بعد شوي حست أم العروسه ان فيه وحده نظرت بتها قامت يابت الشبه وشببتها وشببتني وياها

يدتي :- أدري أدري قلت الك ما يحتاج تسئل

عندها صار ويهي أحمر وأخضر وأزرق من الفشيله

يدتي :- ويش فيك ....وقامت تضحك عليي ههههههههههه

يدتي :- في ليلة الحنا وقبل ما تيي العروس تتحنى تقول :-

أمي تناديني

تبغي تحنيني

في غضارة الصيني

صيني على صيني

يارب تهديني

وأمي تناديني

تبغى تحنيني

دشت إغريفتها ( يعني أم العروش دخلت غرفتها )

تسحي قصيصتها ( يعني تمشط شعرها )

تغمض إعديوتها( تغمض :- يعني :-.........اللي يعرف

يقول ) يالله هذا سؤال جاوبوا عليه

وأمي تناديني

يارب تهديني

يدتي :- بعدين تدخل العروس وتتحنى

أنا :- عيل حنوش طرقين

يدتي:- خرخش السعف

أنا :- ويش نسوي خرخشنا

يدتي :- أيه حنوني طرقين وغصبن عنهم بعد

أنا :- وعودتي بيتكم ذيك الليلة

يدتي :- ويش أعود ...وأنا محنية ...تبغاه يتفتف الحنا ، لا والله نمت عندهم والصبح يابوا

اليدوع وحطوه الينا وقمنا غسلنا الحنا وصلينا على محمد وآل محمد وأكلنا داك اليدوع

أنا :- ويش يابوا اليكم ؟؟

يدتي :- يابوا كبده وبيش عيون وبيض شكشوكه ويابوا ديك الحليبه اللي ترد الروح

و

و

و

طق طق طق طق طق

دخل علينا الوالدة الكريمه

فسكتت يدتي عن الكلام المباح

عندما طلع الصباح

ان شاء الله عجبتكم

هلا والله بخيوة ابو زين
هلا بابو السوالف الحليوة
والسوالف اللي ماتخلص وماتنمل
بس يبي الي اقراها قبل لاانام تصلح الى قصه قبل النوم
ولو ادري عنها كان قريتها قبل البارح لان النوم عايفني
قاكيد بقراها ومع هلوستي مع املوة بنخمد وفي سابع نومه بس يلا اخرى مرة

والله الله على عصير الطماطم ذكرتني بجدتي الله يرحمها
على قولتها شربها المفضل ويرجع الدم لان لونه زي لون الدم
ويخلي خدودها حمررررا

اما موال الحنا الى الحين امي تقوله اذا عرس واحد من اخواني وتحنينا تجي وتقولها
ومع كم دعوة لنا عشان الفكه منا اللي يقول قاعدين على قلبها <<ربي يسلمها ويحفظها من كل شر

وتغمض اعديوتها موب هذا سؤالك عندي فضول شنو يعني
بس اتوقع تكحل عيونها بما انه فيه تسحي وتدش اغريفتها

والله يرحم يدتك ويغمدها بروح رحمته ويسكنها فسيح جنته
والله يسلمك ويحفظك من كل شر وكل عين
وتعيش وتجيب لنا اشياء حلوة زي سوالف يدتك<<هالكلمه علقت بلساني الحين شنو يفكني من لسان خواتي اذا رحنا الى جدتي وسلمت عليها
خوب هاللسان زي الكناسه كل شي يلقطه وصار كلامي اعوج على عدل على مدري كيف

في انتظار سوالف جديده