ما بغينا نلتقي ونشوف بعض ،،،،
تصدقي عاد ، إني دي مدة المستمدة،،،
نوبه أقول خلاص مافيه أمل نقعد إيا بعض ،،،
لكن كلما بققت عوايني مصوب النجوم ،،،
أقعد أبحلق في نجمة سهيل ،،، وأتخيلش مكانها ،،،
وأقول في نفسي ،،، حامض على بوزي أوصل إليها وانا عطالي ،،،
حتى فيه مره من المرات عبرت كم غيمه على سطحنا ،،،
وقلت في قلبي جان زين لو توديني عد بيتكم ،،،
آه مصعب الانتظار ،،، يملّل ويبط القلب ،،،
جبدي معلولة يابعدها ،،، وما يداوي علتها غيرش ياخلف أبويي ،،،
والحين الحمد لله يوم اشتغلت ،،، وخلاص قربت تخلص الشقه اللي في الملحق مال بيتنا ،،،
أمبا أسويها أحلى شقه في الديرة ،،،
باحط لش فيها كرفايه تجنن ،،،
وباحط لينا في مجلس النسوان دواشق ومساند من النوع الليّن،،،
وباشتري اليش قز أبو خمس شولات ،،، حق تقدري تقلي بطاطس وتسوي سمبوسه في وقت واحد ،،،
وباشتري مسجل أبو شريطين ،،،
حق إذا لطشت شريط من عد واحد من الصبيان وعجبش ،،، أسجله الش ،،،
ان الصبغ باسوي فيه زخارف غير شكل ،،،
يعني تقدري تقولي مفلات شبكة العنكبوت ،،، وفيه مستطيلات بعد ،،،
حق اذا جو لش خواتش ... ينقهروا من رجالهم ليش ماسووا ليهم مفلنا ،،،
والا عاد الستاير اللي باركبهم ،،، كشخه لحد دينهم ،،،
تعرفي شكل خيشة العيش تشيفه ،،، زيها بس مطرزه بورد أصفر وأخضر،،،
مفلات فوب الحفله اللي باجيبه لش ،،،
وترى عادي قولي اذا تمبي أسوي فيها أي حركات زيادة ،،،،
المهم ما أمبا أطول عليش في رسالتي،،،
بس لاتنسي غناتي تعطيني شوي من مهرش ،،، حق نخلص شقتنا بسرعه ،،،
والا مافيه عرس الا بعد خمس سنين على هالحاله ،،،،
