ماذا تخرج ( مدارسنا) للمجتمع..؟؟‏

مدراسنا هل تخرج طلبة علم أم شخصيات محبطة..؟؟

السلام عليكم ورحمة الله وبركاته ..

اتمنى من كل يقراء موضوعي "إبداء رأيه بصراحة"
أنا ماأبي مجاملات ولا أبي أحد يوافقني عشان يرضيني أنا أبي "الصراحه وبس"
أبي أعرف كم نسبة اللي حاسين مثل إحساسي

سؤال يطرح نفسه ..
مدارسنا وش تخرج بالظبط ..؟؟
أنا أبي اعرف وش هدفهم من بناء المدارس وتوظيف المعلمات والمعلمين ..؟؟
أبي الهدف الحقيقي ..

طبعاً كل وحده بتقولي "التعليم"
طيب صراحة بالنسبه للتعليم عندنا أشوف أن الوحده تكتفي بالابتدائيه وتقعد بالبيت وتعتبر مثلها مثل اللي درست المتوسطه والثانوي لأن المواد بعد كذا تكرار xتكرار
هذي مشكلة كبيره اكيد والمفروض أن "وزارة التعليم"تعالجها وتطور كتبها "بالمعلومات اللي فيها " أهم من أنها تطورها "خارجياً بالغلاف فقط"
حنا وش نبي بالغلاف ولا الالوان ..؟؟
ليش حنا نتعلم نرسم ..؟؟
أنا أحس صراحه تطوير الكتاب هذا تسكتيه شكلوه من برا بالالوان ومن جوا طلع تحفه فنيه بس للأسف "معلوماته"مازالت مثل ماهي وكلها أخطأ ...!!
هذي مثل ماقلنا مشكله كبيره ماأدري متى بيصحون ويحلونها ..بس الحمدالله ممكن نعديها بدون خسائر تذكر ..!
بس الأدهى والأمر ..
أن مدارسنا للأسف تنتج "طلاب وطالبات" محبطين نفسياً ...
وعشان ماتقولون ابالغ نبداء مرحله مرحلة

الابتدائية:
كانت بنت المدرسه او المديره مقدمه على كل الطلبات حتى لو كانت في الدراسه "كسره" <<يعني داجه ..!!
هذا وش يزرع في نفوس البنات ..؟؟
أنها هي لازم تعتمد على غيرها عشان يصير لها مكانه ..؟؟
وست سنوات كفيله أنها تخرجها وهي متشربه ومقتنعه بهالشي ..!!
والله أتذكر يوم كنا بالابتدائي في الطابور بنت المديره وصديقاتها هم أول شي ولاأحد يتعدى عليهم ولا يشوف شي عمره ماشافه بحياته مثل ماصار لوحده من صديقاتي ..
والمديره كانت بداية كل سنه تجي وتحجز الصف الأول في الفصل لبنتها وصديقتها وهم نايمين في البيت ..!!
والبنات الباقين ولاكلمة ...!!
وهالمواقف والله مازالت راسخه في بالي رغم مرور سنين عليها ..!!
في الانشطه المدرسيه ..بنات المدرسات وبنت المديره هم صاحبات المواهب حتى لو كانت "ماعندها ماعند جدتي " يكفي أنها بنت المديره أو المدرسه عشان تصير موهوبه ..!
والموهوبات فعلاً "مسكرين عليهم داخل الفصول".!

في المتوسطه :
هذي مرحلة خاصه البنت والولد ياناس يحتاج فيها لمعاملة خاصه ..يحتاج يفهم كيف يتأقلم مع التغيرات اللي يمر فيها ..
وبكل بساطه تجيك مدرسة تقول "يامراهقات"..!! صرنا نحس أن هاللفظه "بذيئه" وتعتبر "سبة" وهي مرحلة عمريه عاديه ..!
طبعاً الشكوك دايم تدور حولك .. لأنك "مراهقه" <<يعني مجنونه..!!
لو تطلعين لدورة المياة قالوا تدخن ..!!
ولو تتأخرين بالحمام قالوا "تكلم "..؟؟!
ولو تطلعين وماتلقين سيارتك وترجيعن للمدرسه ثانيه فتحوا معك ملف تحقيق ..؟؟
يعني وش تبون أجلس برا في الشارع ..يعني كذا ماراح أكون مثار للشك أكثر.؟؟
هذا غير "التحقير" من قبل المدرسات وأنا صراحه لاحظت أنه في هالمرحلة أكثر من أي مرحله ثانيه بعتبارك أنتي بحاجة "لمعاملة خاصه" فهم يقلبون المفاهيم ..؟؟!
أنا بقولكم موقف صار لي مع استاذة الجغرافيا :
قالت لنا أفتحوا كتب الخرايط وحددوا المدينه الفلانيه وهي أبد مو واضحه وساعه تشرح لنا وين موقعها بالظبط ..<<طبعاً ماكلفت على عمرها ودارت على البنات توريهم ولاحطت خريطه مصوره على السبوره
وفوق هذا شوفوا وشو سوت
أنا كنت ادور وومتحمسه ولقيتها أخيراً ومع الحماس قلت "ايووووووووووووووه" بصوت عالي
وفجأه صرخت علي وطبعاً "وابل من التهزيء..!
وأنا مدري وش غلطي ..؟؟ أبي افهم ولاخلتني اتكلم ...بعد ماأستوعبت الموضوع صارت فاهمتني غلط تحسبني اقول "ايوه" يعني خلاص اسكتي ازعجتينا ..؟؟
ورغم أنها حست انها غلطت علي لكنها مافكرت تعتذر ..!! تعرفون معلمة ماتخطي أبداً "ملاك"..!
أنا ماأنكر أن فيه بنات فعلاً يطلعون الشيب في الراس ويستاهلون أن أحد يقسى معهم بالمعامله ..بس
ترا مو كل البنات ..وبعدين هالبنات اللي يصير عندهم عناد ومحاولة للخروج عن قوانين المدرسه
شي أكيد أنهم يعانون من ضغووط في الحياة يحاولون يفرغونها بهالطريقة
بس للأسف مدارسنا لو كانت عندك ضغوط بسيطه تنهي عليك مره وحده أتوقع انهم يشوفون هالحل أسرع من أي شي ثاني ..؟؟!

في المرحلة الثانويه :
لا الحق يقال المعامله تكون أرقى ..يعني تهزئك لحالك بدل ماتهزئك عند كل البنات خخخخخخخخخخخخخ
بعد الجد والجهد والكرف
يجون "الطلاب" و"الطالبات" كلهم أمل أنهم يدخلون أقسام يرغبونها
والنتيجه محسومه:
أبوك أخوك جدك عمك خالك ....عضو من أعضاء الجامعه
ندخلك لو تبي "طب" بنسبة 70%
والطلاب والطالبات اللي ماوراهم "ظهر" لو كان شاد حيله طول السنه وطالعه روحه من الحفظ في الكتب السقيمه مايدخل القسم اللي يبيه لأنه ماعنده أحد يسنده ...
ونسبته ماتكفي
ويمكن العدد اللي بعد الفاصله يحدد مستقبله ..!!
وطبعاً مايحتاج أزيد على اللي قلته أتوقع مافيه وحده ماتعرف "عدالة جامعاتنا".!

وفي كل مرحله نخرج بالاتي :
أصحاب السلطه هم الصح ولو كانوا كلهم أخطأ
رأيك ماله أهميه ولايمكن يتنفذ الا اذا أستندتي "لسلطه أقوى منك"
إبداء الرأي والمناقشه تعني "قلة الأدب" وأهلك ماربوك ..!!
إذا كونتي نفسك مثل مايرغب الاخرون فأنتي صح ..حتى لو مارضيتي عن نفسك ...!
العدل يعني "كل ماهو صحيح في نظر أصحاب السلطه"

إذا تقيديتي بالنقاط السابقة وأقتنعتي بها فأنتي خريجة "مدارس السعودية" بنسبة 100%"

والنتائج:
كم هائل من الشباب المحبط نفسياً
لايستطيع حتى المناقشه
لايستطيع إبداء وإثبات وجهة نظره
لايستطيع التمييز بين الصواب والخطأ
لايستطيع الدفاع عن أبسط حقوقه
والبعض منهم ينحرف في محاولة لتفريغ "الكبت" وأكيد المدرسه مو هي العامل الوحيد بس ماننكر أنها العامل الرئيسي
16سنة مو بسيطة
بس عشان مانظلمهم يعطونا شهادة في نهاية كل مرحله عشان نصور معها لأن حتى وظايف مافيه ..!!

عفواً أختي الكريمة

قوانين منتدى النقاش تمنع المواضيع المنقولة

الرجاء الاطلاع على القوانين قبل إدراج المواضيع

فمان الله

بسمه تعالى
أعتقد أن شرطي المنتدى يفرمل مشاركاتنا فلقد كانت لدي نية تتحرك في نفسي بغية المشاركة ولكن حين رأيت شرطة التحري يؤكد إن هناك مخالفة ولو كانت حتى مخالفة بيضاء إلا أنها تجعل المار يفكر بالفرجة والمشاهدة في طبيعة هذا الحادث العرضي !! وبالفعل لقد أوقفت قلمي جانباً وترجلت عن صهوة نيتي لأرى ما جرى ولم أطل المشاهدة فلقد اكتفيت بالقاء نظرة سريعة على الموضوع وحقنت قلمي لكي يستكين وصادرت نيتي لأعيرها ناحية موضوعاً آخر !!
شكراً لهذا التنبيه وعذراً لإن هناك ما يتعارض فيا حبّذا لو تشرفنا بمحاولة أخرى تتلائم مع تقتضيه التعليمات !!
بقلم الأستاذ : أنا