محسن يحچي ويعاتب أُمـه ودلاّلـه ذايب
ياذيني امصابچ ياذيني يصبّحني الهم ويمسّيني
* * *
عتاب الـمحسن لأُمّه لـون تتـأمّله اتنظره
صعب هذا العتب واصعب لون ايصير للزهره
يجيها بليلة احـزانـه ويعاتبها ويـجر حسره
يجر ونـه اعلى ضلع امه الزچيه ولازم اتعذره
وادموع لُـمّه يـهلها ويبچي محسن يگلها
حاچيني وضلعچ راويني يصبحني الهم ويمسيني
* * *
محسن يحچي وَيْ أٌمـه يعاتبها ويـزيد اهموم
يگلها والعتب يجرح خواطر كل گلب مالوم
حيف الباب يـالزهره ينفّذ مـا جنتهُ الگوم
يريته الباب مايبگه وتشوفه اعيون كل مظلوم
هالباب محسن يگلها ياحيف گرّب اجلها
مارادچ يُّمه اتشوفيني يصبحني الهم ويمسيني
* * *
ييمـه حسرتي حسـره وألم بـالروح يـاذيني
ربيع ايـامي ماتـمّت يزهره واغلى مـن عيني
حسافه اعلى الارض طايح خضيب انتي تشوفيني
تـلوج بعينچ الـدمعه عليّه بـحرگه تبْچينـي
واصوات اسمع تنادي بالباب تقرح فؤادي
طايح ماردتي اتعوفيني يصبحني الهم ويمسيني
* * *
سمعت اشچم كسر صابچ ييمه وصوّبچ جرحه
ولا همّيت آنه بروحي وعذابـي لهمّچ يفضحه
ألم من خاطري شحدّه دليلي ايطيّبه ايـمسحه
غريبـه والـدهر بُـمّي عليها ايضيّج الفسحه
بياحال انطي جوابـي بالنـار مشعوله بابي
واسمع صوت امي يناديني يصبحني الهم ويمسيني
* * *
الطاغي مـن اجه لدارچ ييمه ومـن وصل بابه
خفت يـالزهره من عنده وروحي بهمها مرتابه
وهالباب اليرض صدرچ يـحره شمصعب اصوابه
وصحت احّاه يـمظلومه ليچ الهم واليّ اشجابه
وايـّام عمري هضمتها ياحـيف ما تـممتها
احّا صحتي طاح جنيني يصبحني الهم ويمسيني
* * *
رحت اشكو هظم حـالچ ييمه وحالتي لجدي
اطلبه بثـار اريـدنه الـي وليچ وألم وجدي
عتب گلبي وصعب يجرح يجدي وهالعتب عندي
يجدي شلون هـالبضعه تـحس من الالم بعدي
يـاجد امـي شفتها بـالدار تبچي عفتها
وين امي بحبها تغذيني يصبحني الهم ويمسيني
* * *
يايـمه چنت احسب واعـد ايـامي اگضيها
وأماني بروحي يـوم الطف تحقق روحي امانيها
واراوي حسين ابو اليمه نصرتي وروحي افدّيها
اخـوه وأصـغر اخـوانـه لنـداءاتـه الّبيها
افديه من اجله روحي وانطيه دمعاتي ونوحي
حيف الماكمّلت اسنيني يصبحني الهم ويمسيني
* * *
لوّن مافعلة الـجاني التصير وينـتهي عمري
تشوفيني من ارض طيبه اروح ويالضعن يسري
الى وادي الالم والدم منايـا تعايـن لنحري
وتـجين لكربلا يُـمّه تشوفينـي نفذ صبري
لو ما الباب العصرني ياحيف دهري وغدرني
ويّه حسين ابنچ تلگيني يصبحني الهم ويـمسيني
* * *
