هلل وكبر ونفسه تذكر اللي راح راح ...

السلام عليكم ورحمة الله وبركاته

هذي القصه انتشرت كثير بين الناس واكيد سمعتوا
فيها بس حبيت انقلها لكم
وانشاء الله تعجبكم ...

هذي قصيدة للشاااعر جزااء البقمي

قصتها :

سلطان بن رباح كان له صديق اسمه محمد بن عقيل .. جامعتهم أخوة الدنيا

من وهم صغار على عز ومعزه .. كبروا وتزوج سلطان وجاه ولد وسماه محمد

على اسم خويه من كثر ما يغليه ..

وكانوا يحبون المقناص وطلعو مره اثنين مامعهم ثالث للمقناص .. وقعد محمد

يسوي الغدا وسلطان كان ينظف السلاح .. فكانت هناك طلقه بالمخزن ما درى

عنها سلطان وضغط على الزناد فثارت الطلقه واصابت محمد فمات ..

أخذ سلطان خويه وسلم نفسه .. وبدأو المشايخ وفاعلي الخير بالتوافد على

ابو محمد حتى يتنازل لكنه رفض مع ان الدية وصلت عشرة مليون ..

صدر الحكم بالقصاص وقصوا سلطان لكن الصدفه في الموضوع ان قبر سلطان

بجنب قبر محمد فكانو اخوان بالدنيا جيران بالقبور 00


يا فلاح الهم خيم فوق قلبي يافلاح .. كيف تبغاني اسولف وانت خابرني عليل

ويش قولك في عليل في حياته ما استراح .. تنتثر دمعة عيونه لأظلم الليل الطويل

حالته لا ماتباعد حال سلطان الرباح .. بالخطا راحت حياته والخطا ما له مثيل

كان ويا صاحبه اثنين في أرض براح .. يطردون الصيد دايم من صبح لين المقيل

اجمعتهم صحبة الدنيا على جد ومزاح .. ما يهابون الليالي والحمول اللي تميل


ما قتل عامد ولكن ثوّر ابليس السلاح .. بالخطا ثار السلاح ووين يلقى له دليل

وانعقد سجنه وربعه تنتظر فك السراح .. والأكيد إنه سجين وما رضوا ربع القتيل

هلّ دمعه يوم صلى ركعتين في الصباح .. في نهار الجمعة اللي من ثقيلٍ في ثقيل

هلل وكبر ونفسه تذكر اللي راح راح .. كان في ربعه عزيز وذلّه الوقت الذليل

لا محمد لا تهاني لا سعود ولا صلاح .. كلهم كانوا على باله وهمه في هديل

طفلة ما كملت عامين صايبها كساح .. وانتثر دمعه وحاله من سبايبها نحيل

حان تنفيذ القصاص وغطوا الراس بوشاح .. وجاء سيافه يشيل السيف أبو حدٍ صقيل

ارتخى راسه وزاد الموقف الحامي صياح .. بين نوح وبين دمعٍ وبين صيحات وعويل

وارتفع صوت الحشود وزاده محمد وصاح .. يا يبه تكفى دخيلك تستمع قول الدخيل

يا يبه وشلون نصبر كيف نهجع بارتياح .. وأنت من دنيا عيالك ماخذك مر الرحيل

يا محمد هاك علمي واحفظه قبل المراح .. انتبه لإخوانك و بالك عليهم لا تعيل

والله الله في الصلاة وفي الصيام وفي الصلاح .. والله الله في أمكم والله لكم بعدي كفيل

وغمض عيونه ونفسه تطلب الله السماح .. رافع سبابته مظلوم والله الوكيل

وسل سياف الصفا سيفه وطقه ثم طاح .. راس سلطان المراجل وانتثر دمه يسيل

وغسلوه وكفنوه وفاح طيب السدر فاح .. وبالمصادف صار قبره جنب قبر ابن العقيل

يا فلاح الكارثه ما هي بسوالف يا فلاح .. خلني ساكت ودوّر غير هاالقصة بديل


(( ..... اللهم ارحم سلطان ومحمد ونور لهما في قبريهما ..... ))