قصة الشايب والفتات

السلام عليكم ورحمة الله وبركاته

بدايه القصه عن شايب اسمه حمدان ..هواوي و((قلبه خضر)) ما يشوف بنت
الا ينفتن... ومشهور بانه حبّيّب,,

وفيه بنت صاحبة مقالب قالت في نفسها انا ليه ما اروح للشايب وامزح
معه واضحكه شوي واشوف ردة فعله كيف تكون,,,

راحت له وسلمت عليه : كيف حالك يا شايب .. رد السلام والله بخير الله يعافيك
وفجأه مشت بدون إستئذان ولا شي,,

عجب الشايب جمالها وقال فيها كم بيت يستعطفها فيها ويقول انها ذكرته
الماضي .. واذا ما عطيتيني وجه لحقت باخوي حمود اللي في قبره ويذكر
التاريخ واليوم اللي قابلها فيه
يقول الشايب :

يا بنت اخذي خاطري وارحمينـي لا تجرحين العود بعيونك السـود
غضي نظرك وغطي الوجنتينـي لعل يومٍ جدد الجرح مـا يعـود
يوم انتهى مع مرمسات السنيني جتني صواديفه على غير مقصود
باول شهر عشره نهار الثنينـي حمدان مروا به على جنازة حمود

البنت كانت تقصد من استفزازه انها تجاريه في الشعر وترد عليه والمسكين
ما كان يدري انها شاعره وعلى باله ما خذ راحته في التغزل
ردت عليه رد قوي تقول :

يا شايب الرحمن وينـك ووينـي عزي لحالك قدمك الباب مسـدود
قلبك عطوف وجاه قلـبٍ متينـي والبنت ما تشفق على مغازل العود
حبل الرجا مقطوع بينـك وبينـي مثل الغليث اللي رعا قلبه الـدود
اقفى شبابـك والعـرب مقبلينـي يا عود ما يرجع من العمر مفقود

حطمته يوم قالت له انك عود وان الشباب ما يرجع وان ما فيه امل تعطيه
وجه حس العود انه تورط وقال كم بيت يقول لها صدي عني اي انه ما يبي
الغزل بعد ما وصل عمره ثمانين سنه ..
يقول حمدان :

يا بنت صـدي بالعيـون الظليلـه لا صد عنـك الله نهـار القيامـه
مالي ومالك يالفـروع الطويلـه لو فيك من رسم البداوه علامـه
يابنت ما لـي بالثمانيـن حيلـه اهدف كما تهدف على البير قامـه
اقفى شبابي والدهر شفـت ميلـه يالله حسـن الخاتمـه والسلامـه
اعطيك موجز والبضاعـه قليلـه واخذت لك من صافي الماء سنامه

راحت الايام والشايب مسكين اخذله معها سنه وهي تقول له
كيف اعطي شايب وجه ..
بعد فتره مرته مره ثانيه وسلمت عليه وراحت ..

الشايب قال ليه ما ابين لها في كم بيت انها بتشيب مثلي واني رجال طيب
وان الناس تنصاني ومعروف بالكرم واني ما ابي منها غير التحيه والترحيب

يقول حمدان :

يا بنت ما جاك الكبـر والخشونـه وعادت شباب اليوم يجفل من الشيب
ياسرع ما وبلـك تمـزع مزونـه يالفاتنه يـا ام الثمـان الرعابيـب
يا بنت مـا بينـي وبينـك مهونـه كلمة شرف نبـي تحيـه وترحيـب
الله مـن عـودٍ ثقيلـه طنـونـه ينصاه راع المشكلـه والمواجيـب
على الكرم والدين نفسـه حنونـه تلقاه بالاجـواد شـرق وتغاريـب

جهز الابيات وارسلها مع عجوز ووعد العجوز بهديه اذا وصلت الرساله لها
راحت العجوز وعطت البنت الابيات شافتها البنت وقفلت على العجوز في
غرفه وقالت مثل ما جيتي بابياته ترجعين بأبياتي ..

العجوز مسكينه قالت طلعيني ولا ابي منكم شي "الله لا يعودكم انتم واوراقكم"
ردت البنت ابيات اقوى من الاولى ردا على انها بتشيب ويزول جمالها ..

تقول البنت :

العود عود وطايحـاتٍ سنونـه من كثر ما يرقد على جرة الذيب
عودٍ مهرقل والعرب ما يبونـه ياعود ما لك في طويل المراقيب
اقفى شباب العود راحت حتونـه مثل اليتيم اللي بكا ما له مجيب
جداه ينثر دمعة ٍ مـن عيونـه غريق موجٍ ما لقا له مقاضيب

* بصراحه اصطدم الشايب بشاعره من العيار الثقيل ..

وسلامتكم وأتمنى أن تنال على اعجابكم

م ن ق و ل