هرطقه رقـــم 6: رســاله لفرعون ص.ب
سلام ..
قبل أن أسرد رسالتي إلى فرعون .. أسمحو لي أن أسرد قصة عنه..
هذه القصة لم أستطع توثيقها .. ولذلك، سأسردها لكم كما أذكر:
الزور ابن الزرزور اللي عمره ما كذب ولا حلف زور...ذبح بقة وترس سبع قدور ...وخلا الشحوم واللحوم على الصواني تدور...ويا حبيب النبي صل على النبي ... اللهم صلي على محمد وآل محمد..
يقولكم .. يوم من الأيام .. في واحد من قوم فرعون .. فقير ..فقير جدا ومنتف..والمسكين هو من الؤمنين (بفرعون أنه إله طبعا)..
المهم، داك اليوم طب فى أيد هالفقير عنقود عنب .. ستانس فيه وقال بياخذه البيت لعياله ياكلوه .. بس فكر بفكره أحسن..
راح لقصر فرعون (إلي أهوه ربه كما يعتقد) .. ونشب بحلق السكورتي اللي على الباب..إلا أدخل بهالعنقود على فرعون .. يبن الحلال بدل غير ..مافي ..إلا يدخل .. وماعنده في الطشت ماي ولا في الطاسه لبن..إلا يدخل ..
المهم فرعون سمع بالسالفه ..وقال ليهم دخلوه هالمومن المسكين (عمباله بقدم له أغلى ما يملك .. عنقود العنب) ..
دخل هلفقير على فرعون .. وباس القدم ولزبيري طبعا .. وفرعون مستانس..
المهم..الفقير قال لفرعون: شوف عاد الزايد ناقص والواحد أثنين..مو أنت ربي؟ .. قال فرعون: أا ربك ..أيه ..ويش تمبه؟ قال له الفقير شوف: أنت ربي .. عاد خذ هالعنقود هالمنتفخ وحولي أياه الى جواهر .. أنا فقير ومسكين .. ونت يزعط قادر على كل شي..ونا مومن بك .. يالله حوله..
عاد فرعون صار رينبو ساعتها .. يعني قوس قزرح .. مو عارف ويش يقول ..أن ماقدر بيشنعه بين الله وخلقه .. وشلون بيحول له هالعنب من طاعون لجواهر؟؟
المهم .. فرعون قال أفا عليك .. أزهلها ..غالي والطلب رخيص..لأشوف جيب العنقود وبدخل الغرفه دقيقيه..الفقير رد عليه ما تقصر .. بس ها..مو تغير لي شكله .. أنا أبغى العنقود زي ما هوه بس جواهر .. عاجبني شكله..
ولييه..ويش هالوهقه بلزقة الريح دا؟؟ فرعون وهو يداور فالغرفه لحاله محتار..ويش أسوي بنفسي ألحين..
ويجيلك منهو...
أقوى من الشدة ... أطول من المدة....أحد من السين .....أسرع من لمح العين إنه الرجل الخطيررر. ...انه أبليس..
طلع أبليس لفرعون وقاله .. أهوه جيب أحولك أياه لجواهر خناقه تخنقك ..طاح حظك .. أنا أقدر أحوله عن صحيح ولا قلت أني أله أعبدوني يا ناس..وأنت ثور معمعم.. جاهل وخبل ..متفرعن وشايف نفسك رب..وحوله لفرعون..وطبعا فرعون طلع للفقير وقاله .. نحن بمجهوداتنا قد قمنا بتحويله..
وخلّصت وملّصت ويات الدياية وعنفصت
ويش رايكم..
(القصه السابقه حقيقيه، طُرحت بطريقه هزليه، لعدم معرفة المصدر)
الآن..رســالتي لفرعون..وفرعون كل عصر:
تلذذ بكأس الخمر يا فرعون واشرب ..... فلا دين تدين به ولا رب
تلذذ وانتشي وغدا ستسـأل ..... وتشهد عيناك ما أذنبت من ذنب
ستُضغط في حفير القبر حتي ..... تذوق ماقترفت يداك وسوف تجلب
لمعبود لا يغيّب عنه شىء ..... وتلقى وبال أمرك وبه تعذب
ظننت بأنه لا معبود غيرك ..... وأن الجاه مخلد ولن يسلب
تبجلت تعاليت بغير حق ..... وأنت نخب هواء بغير لب
ورغم كونك هذا ملكت كونا .... وظننت بأمرك أن الريح قد هب
ظننت أن الكون ملك أمرك ..... وبكون كنك أن احببت يذهب
تلاعبت بأرواح الناس حتي ..... ماسلمت نساء ولا شيب ولا شب
أكلت حقوق الآخرين بغير حق ..... ولم يردعك نقد ولانهي ولا سب
ستترك كل ما خزنت خلفك ..... لقاتلك وفوق ذلك سوف تصلب
ودمتم.
بانتظار آرائك
رد: هرطقه خمسه: رســاله لفرعون ص.ب
ههههههههههههه
الصراحة القصة عجبتني
لو مو ابليس جان فرعون راح فيه
وصح اللسانك على الشعر
يسلمووو
رد: هرطقه خمسه: رســاله لفرعون ص.ب
الله والله حلوة
مشكور ما قصرت والى الامام
دمت بحفظ الرحمن
رد: هرطقه خمسه: رســاله لفرعون ص.ب
صح ألسانك يأخوي
هالهرطقه شعريه المواهب قامت تطلع
!!!!!!!!!!
يعطيك ألأف عافية
أختك
رد: هرطقه خمسه: رســاله لفرعون ص.ب
الله يلعن إبليس
وينها هالمواهب من زمااااااااااااان :wink:
يسلموو خيووو
تأبط بودره
الله يعطيك الف عافيه
تحياتي
رد: هرطقه خمسه: رســاله لفرعون ص.ب
عاشق الزهراء
صح الله بدنك خيي..لا عدمناكم.
توته
تسلمون مليون..أسعدني تواجدكم
بائعة الورد
هالمواهب موجوده...بس لو أنتي ما تحطمي فيني بتعقيبك..كان من زمان ترقيت وصرت بمرتبة تأبط عطرن..
((( والله أمزح...بالعكس))) تسلمون غفصه
غرام العاشقين
لا عدمانك أختي..
مواهب ويش؟!؟! ... شوي وصدق!
أسعدني تواجدكم.
تسلموووووووون مليوووووووووون
رد: هرطقه خمسه: رســاله لفرعون ص.ب
بنبوق الابيات وبكنتبهم على لافتات وبنحملهم وقت المسيرات :bigsmile:
خاصة بعد الاحداث الاخيرة يصلحوا :amuse:
عشان تبط مرارتهم بط :wink:
بس اذا مسكوني بقول هذا من تأبط وبحدهم عليك ما لي شغل :toung:
يسلمو خيو على القصة والابيات
صح الله لسانك
رد: هرطقه خمسه: رســاله لفرعون ص.ب
اعجبتني القصه وخاصه الأسلوب التي تناولة فيها القصه
تسلم وعساك على القوه
وش المواهب المدفونه
خلها تطلع
ننتظر جديدك ولا عدمناك
رد: هرطقه خمسه: رســاله لفرعون ص.ب
هذي الهرقطة نمبر 6
مو 5
الخامسة هنا
http://www.alnassrah.com/showthread.php?t=41068
وكأنك تبي تقول
ان ابليس اللعين هو الي يسهل للفراعين الحاليين عملهم
قصتك لها مداليل كثيرة
تسلم ايدك يا مبدع
رد: هرطقه خمسه: رســاله لفرعون ص.ب
نور الهدى
أقول...وديني بيت أهلي...مالي قعده هنا ...خلاص...
ووين يصح لساني ونتي ناويه على الشر...!!
لا وقالت أيش...يسلم خييو...خييو من؟؟ ..أنا ما أعرفش... (أمزح)
تسلمين أختي ...
بس صحيح ... أنا مالي شغل...
اقتباس:
اعجبتني القصه وخاصه الأسلوب التي تناولة فيها القصه
تسلم وعساك على القوه
وش المواهب المدفونه
خلها تطلع
ننتظر جديدك ولا عدمناك
أي موهبه يخيه عاد ..والله ما قصرتو..
تسلمون مليون..
رد: هرطقه خمسه: رســاله لفرعون ص.ب
نوارة الدنيا
نوارة الدنيا
نوارة الدنيا
نوارة الدنيا
والله أثلجت صدري...الله يبرد قلبكم ..
اقتباس:
هذي الهرقطة نمبر 6
أحترامي التام والخالص لك ولمتابعتك أختي..كنت أظن أنها بتمر مر السحاب..
تسلمووون مليووون وترليووون وقيقا ...وكل شي..
وعلى فكره..بالأضافه لتحليلك الرائع .. أقصد أن فرعون ما يستاهل يكون كما كان .. والمصيبه أنه مصدق ..
وفي ناس مصدقه ..(الله يستر من نور الهدى)
رد: هرطقه خمسه: رســاله لفرعون ص.ب
صح الله لسانك
الله يعطيك ألف عافية على الهرطقه الرائعة ..
رد: هرطقه خمسه: رســاله لفرعون ص.ب
اسلوب متميز بالفعل أخي تأبط
جمع بين الذكاء المفرط في تبطين الاحداث
وسردها بإسلوب قصصي أقرب للهزلي الهادف
أأمل أن يكون مصير كل فرعون على الأرض ونهايته
كمن تشبه به وحاكاه بجبروته وغيه
مووفق أخي ننتظر جديدك .
ملاحظه :
بخصوص ...
اقتباس:
هذي الهرقطة نمبر 6
إن رغبت في تعديل عنوان الموضوع فنحنا على استعداد لذلك
رد: هرطقه خمسه: رســاله لفرعون ص.ب
رد: هرطقه خمسه: رســاله لفرعون ص.ب
