وش مصيري..انتظر ..ولا..لا

فعلا قالتها ليي وقدامي واني بنفسي سامعتها ما أحد قال ليي :wacko:

في عرس واحد من العيلة كنت اباشر صاحباتي:bigsmile: اجت صديقتي وامها وكل خواتها تقريبا وجت وسلمت عليي وقفت اسولف معها اشوي اجت صاحبتنا الثانية وقفت معانا ومع السوالف الهي اتقول الأولى امي تبغى اتسلم عليش وخواتي بعد وكانوا قريبين منا فسلمت على الأم وجت معانا صاحبتي الثانية وختها كنا واقفين جنب الأم لسه ما اتحركنا الا الأم اتقول والله هي حليوة وجميلة لكن تلبس نظارة :cool:وضعيفة اشوي طبعا اني بدوري انحرجت حزتها :embarrest:وكنت اتصبب عرق لأن الأم ما شاء الله عليها صوتها من النوع الرفيع وغير كدا صاحبتي والناس الي جنبي و... كملت العرس واني واقفة على باب الصالة عشان اشوي انسى

لكن هل هذا صحيح ان الي عليها النظارة فعلا ما تنخطب ولا احد يتقدم اليها :cool:؟؟
وش رايكم ترى العرس صار تقريبا اربع سنوات وما احد دق الباب هل تنشال فكرة العرس من بالي عشان النظارة ؟؟

خيووو من قال تنشال فكرة العرس لاتنشال ولا شي

خيه انتي تدري في اوقات النظاره تكون احلى على البنت واجمل

احسن من العدسات بواجد

طيب انا البس نظاره يعني ما في بنت بتقبل بي

خيو الي يبي يتزوج بيتزوج مو عشانالمظهر لان هالمظهر بيجي له يوم وبيختفي

الي بيتزوج ينزوج عشان النيه الي ذاخل

اذا كانت صافيه وحلوة ماحد راح يرفضها

والنظاره ما هي عيب

واسمحي ليي الي يعتبره عيب

فهذا غـــبي

لان والله البنت بالنظاره حلوة

صحيح ولله خيه مثل ما قال أمير ..
ومن قال تشيل الفكرة كم وكم بنت تلبس نظارة وخطبوها مثل اختي داهيه تلبس نظارة وهي اللحين مخطوبه ...
خيه الله ما خلق وترك خلق كل واحد ومعاه رزقه ورزقش ان شاء الله جاي ..
بس تعودي من إبليس وشيلي هالفكرة من راسش ..
والله يوفقش ان شاء الله ويسعدش ..
أختش ..
أسرار الليل

السلام عليكم ورحمة الله وبركاته
ماادري خيه لما قرات موضوعش
حسيت انه جدااااااااا عادي ولا تتحسسين
من هالسالفة اني اعرف بنااااااااات واجد
انخطبوا وهم يلبسون نظارة وفعلا مثل ماقال
اخوي أمير بعض الاحيان النظارة على البنت
تكون احلى من بدون نظارة ،، اني بصراحه
ماالبس بس من قبل فترة لبست مؤقت فقط لما
اجلس على الكمبيوتر لان دراستي اغلبها على
الكمبيوتر وتحتاج قوة نظر بصراحة تعب لذلك البسها
وقت المحاضرات الي احتاجها وحفاظا على عيني ،،
ولا تحطين في بالش فكرة ان الا عليها نظارة محد يخطبها
الله يرزقش بولد الحلال الا يسعدش ولا تفكرين
بهالأمر أبدااااااا ولاتربطي تأخر الزواج أو محد طرق
الباب سببها النظارة او الضعف الله سبحانه وتعالى
له حكمة من هالأمر سواء تأخير الزواج او غيرها
فاصبري خيه فالصبر مفتاح الفرج وعليك
بزيارة عاشوراء اربعين ليلة مع دعاء علقمه
وايضا للتيسير صلي صلاة جعفر الطيار بخشوع تام
خصوصا ليالي القدر والله سبحانه راح يرزقك
بالرجل الصالح او الحاجة التي تريدينها بإذن الله والله يرزقك
بولد الحلال الا يسعدش وتحسين وقتها ان لا النظارة
ولا الضعف سبب مقنع لهذي الأمور اصبري فقط
وخلي نيتش بالله قوية ولا تدخلين هالافكار في بالك
والله يوفقك ،،

ونسألكم الدعاء

تحيتي العطرة لك
حزن العمر

بشكل عام لبس النظاره لايعتبر عائقاً في مختلف الأمور الحياتيه
كالدراسه مثلاً هناك الكثير من الأطفال كبرووووووووا وأخذو الماجستير والدكتوراه وهم يلبسون النظاره طوال تلك السنين في دراستهم حتى في أصعب المجالات وأدقها مثلاً في الأحياء الدقيقه والمجاهر التي تتطلب دقة النظر
في التقدم لوظيفه مثلاً لايعتبرعائق أبداً .....................

أما بالنسبه لموضوع الزواج فإذا اشترط الزوج فتاه بدون نظاره واشترطت الزوجه زوج بدون نظاره لم يتزوج أحد إذن ..
لبس النظاره ليس عيباً وإن كان البعض يتحسس من أصحاب النظر الضعييييف جداً الذي يؤثر مستقبلاً بحالات العمى لاسمح الله
وإن أمكن إجراء عملية الليزك فقد تطور العلم في هذا المجال كثيييراً إن رأى البعض أنها مشكله

هناك الكثير من صديقاتي المتزوجات كانوا يرتدون النظاره و أجروا عملية الليزك بعد الزواج ونجحت
صديقتي الحين تعاني ضعف نظر وانحراف خفيف و تزوجت والحين هي عروس
كل هذا يرجع للمكتوب والرزق في النهايه مهما كانت الأسباب كل واحد يأخذ رزقه
الرزق يلف ويدور ويلصق في صاحبه
أشكرك عفاف الهدى على طرح الموضوع الحساس في بعض الأسر
وفقك الله
ومن الله عليكِ بالزوج الصالح

السلام عليكم
اختي الكريمة لبس النظاره ليس بعيبا او عائقا للزواج
فهناك فتيات لايحلون بدون النظاره لانها تناسبهم بالرغم من تعودهم على لبس النظاره دائما للنظر
وابدا هذا ليس بتفكير عقلاني شخص لايتزوج بفتاة تلبس نظاره في اي عصر كان هذا التخلف؟
وان قلنا الناس اذواق والمزاج يلعب دوره لكن لايعني ان النظاره تصبح عائقا في الزواج
فهناك عمليات تجعل لبس النظاره يتخلص منها
وهذا كما قال الاخوات والاخ امير العاشقين فانا لا اختلف معهم في الراي ابدا
وياما ناس تزوجو وهم لابسين نظاره وحتى ازواجهم لابسين نظاره لكن ل يعني ان الاولاد نفس الشئ راح يكونو؟ مو شرط هذا الامر بيد الله سبحانه وتعالى
ومثل الاغتم يتزوج ببنت تتكلم فيها شئ؟ فيه عائق يمنع زواجهم؟ حتى الاغتم مايمنع من الزواج ابدا
اخيرا اختي الكريمة لا تاخدي مثل هذه الامور بحساسيه والا الله كاتبه من نصيب راح يرزقك ان شاء الله
تحياتي للجميع بالتوفيق

خيتو لا تحطين في بالك هالشي

ان شاء الله انتي تستاهلين رجال بكل معنى الكلمة

والرجال العاقل ما بينظر الى هالمسئلة وما راح يهتم اليها قد ما راح يهتم باخلاق ودين البنت


كا انا البس نظارة من الثانوية للحين بس الحين من اهمالي صرت ما البسها على طول لاني تمللت منها لا غير



الله يوفقك يا رب

وكل تأخيرة فيها خيرة وان شاء الله الله بيرزقك بخوش رجال وبيسعدش ان شاء الله وينسيش كل شي

بسم الله الرحمن الرحيم
اللهم صلى على محمد وآل محمد

أحب أشكر عفاف الهدى على طرح هذه الموضوع الرائع

أحب أقول اليك البنت إلي تلبس نظار سواء كانت في الشرق أو الغرب
لابد انا ياتي اليهاا المكتوب و هو النصيب يعني حبيت اقول اليك
اذا كان أحد من الشباب متقدم إلى خطبة فتاة مايسأل هل الفتاة تلبس نظار
أم لا يسأل عن أخلاقهاا عند موب الكل يسأل عن الأخلاق القليلين
الحين الشباب يسالون عن الجمال بأختصار انا عندي أخت تلبس نظار
و نخطبة و زوجة وشي لي من راسك هذه التفكير هذه على الكتبه
و المكتوب مامنا هروب . . .

و شكراً بنتظار الجديد . . .

و نسالكم الدعاء

هههههههههههههه >> عفاااااافووووووه عن جد ضحكتيني ..
يؤيؤيؤيؤيؤ عفر من الخوف اني بعد البس نظارة :sad2:
ولا يهمش حبابــــــــــــه ينخطبووووووووا الي يلبسوا نظارة >> انا كل الي اعرفهم لا بسين نظارة وكلهم جاهم النصيب .. والحمد لله ..
بس الي حبيت اقوله يمكن الأم كلمت ولدها أو أي شخص تبغى تخطب له وهو عطى المواصفات المطلوبة >> ثانــــــــــي شي يمكن الرجال اللي ما يبغاها تلبس نظارة هو يعاني من قصر في النظر فآآآآآآآآآآ ما يبغى تصير وراثة لطفاله بعد ... شديه يدور إلى وحده صاحيه ..
وعفر مو من النظارة من الضعف والعسقلة الي فيش هههههههههه :toung:
ماشاء الله عندش وعندنا خيرررررررررر خيووه .. >> ضعف ونظارة تعالــــــــــــي لا تكوني بس اني خخخخخخخخ ..
مشكورة حبابه على طرح الموضوع >> بس خلي في بالش الوقت الي بجي النصيب فيه بجي لا عشان انتين تلبسي نظارة ولا لأنش عسقوله .. أوكيه ..

وإذا تبغي الصراحة انتي عجبتني من اول مرة رديت عليش فيها .. وابغى بجد اشوفش على الحقيقة :embarrest: بس الظاهر الخجل يمنعني ههههههههههههه ..

يسلموووووووووووووووووووا عيوني

خيتي عفاف الهدى مأجوره أولاً بهذه الليلة

وثانياً اسمحي لي اذا قلت الش ان اللي تعتقديه
هذي بس أوهام ما ليها داعي تخليها عندش
بصراحه اللي يلبسوا نظارات في هالزمن ناااااااااااس وااااااااااااااااايد

واللي يشترط ان المره ما تلبس نظاره هذا ما عنده سالفه أبد
لأن فيه طرق واااااايد الحين علشان تصحيح النظر وغيره

وأقول لش هالام اللي قالت هالكلمه هي بعد فيها عيب
وانتين بعد قلتيه ان صوتها قوي ...يعني لسانها يلعلع ههههههه

ويمكن خيره من رب العالمين انه يأخر هالشي علشان مصلحتك

فكل تأخيره وفيها خيره من رب العالمين ....ان شاء الله تعالى

تقبلي تحياتي

اقولج يا عفاف شيلي فكرة انج تفسخي النظارة ومو عيب اذا وحدة تحتاجها وتلبسها يعني مافي عقليه ترفض بنت علشان نظارة يعني لاتهتمي ونصيبج إن شاء الله بيجي لج وكله خير ورضا فيج ولاتنسي كل شي قسمة ونصيب بهالدنيا ..الله يكتب لج الي فيه الخير ..

تقبلي خالص تحياتي ..شذى ..

السلام ... اشكر كل أخ واخت مر على صفحتي المتواضعة وزينها بتعليقاته الجميلة والواعية..

أني اخترت هذا الموضوع بناءا على أن الكثير يعاني من هذه المشكلة ( النظارة ) ومعتبرنها عائق اني ولله الحمد مقتنعه بشكلي ومو صحيح الي يفكر بإن النظارة عائق للزواج.
يمكن ابليس اجاني على غفلة مني وزين ليي ان كل صاحباتي تزوجوا وانخطبوا وكل وحدة صار عندها طفل وطفلين وجت على بالي هالقضية.
وبصراحة من كلامكم وردودكم رجع ليي الأمل في الزواج الي ما فقدت الى 5 % من الأمل وموفقد بس افكار سوده وانزالت .
امير العاشقين : كلامك صح الي بيتزوج عشان النية مو عشان المظهر.
اسرار الليل : أعوذ بالله منك يابليس ـــــ والله يوفقنا وياش الى كل خير .
حزن العمر : فعلا الصبر مفتاح الفرج.
سيناريو : صدقتي ــــ الرزق يلف ويدور ويلصق بصاحبه.
القلب المرح : ولا يهمك راح انشيل الحساسية لأنها تسبب اعاقات كثيرة وتشل حركة التفكير .
ام محمد : شخصية مميزة عندي ـــــ فعلا كل تأخيرة وفيها خيرة.
عاشق الحرية : هذا عند العاقلين ... بس في فئة من هالنوع اخوي.
بسمة : أهلين اخت بسمة اني كمان حابة اتعرف عليشواتمنى الفرصة اتكون قريبة وزي ما قلت كل الي عليهم نظارات انخطبوا ان شاء الله نسمع عنش قريب يا رب.
واحد فاضي : زي ما قلت اخوي مليان الي يشترط انها ما تلبس النظارة ما عنده سالفة أبد .. وفعلا هاي أوهام واتخليت عنها .
شذى الزهراء : مفتقدتنش واجد اختي ـــــ كل شي قسمة ونصيب والتأخير مو عيب .
والله يزوج العزاب يا رب