قصيدة ....العباس (ع ) الشاعر الفارس... شعر شعبي عراقي

قصيده الماي خطهه بجربته العباس
وحلف يسگي العطش بحروف مطلعهه

قروله شگد شعر رادو يعوف حسين
ياصوره التمر يصيح سامعهه

مو بس المعسكر شالعه العباس
تره الدنيه بكبرهه الگمر شالعهه

شتحسب رايته؟ بس رايته عن جيش
على خشم النهر دگت طلايعهه

شاعر من صدگ مو بالقلم بالسيف
يكتب عالركب ويطيح رافعهه

بمتن سيفه صور ماترّسم عالبال
عله روس الزلم من يقره يطبعهه

قره برگابهم نايل قصيدة سيف
وقصايد من ورق طيّح براگعهه

مواضيعه غريبه وشعره مامطروق
وقوافي مسودنه وبالسيف طوعهه

المنصه عله المهر والمسرح الميدان
وبطل جمهوره جيش تعض باصابعهه

نعم يقره حلو بس مايحب تصفيگ
جماهيره عله قبلة موت ركّعهه

يصيحوله اعد بس مايعيد البيت
موت المن يعيده الموت شبعهه

طرق والجربه تسمع صفگت للموت
ولطمت عينهه وصبت مدامعهه

حط روحه بجربته وصاح يخسه الماي
لسكينه ورباب الروح ارجعهه

الفواطم فرفحن چي مارجع عباس
جام گلوبهن والعطش صدعهه


استحه العباس غيره وحلف بالعباس
چفوف الماسگتهن كون اگطّعهه
چفوف الماسگتهن كون اگطّعهه

شعر " ميثاق الهلالي "

الله يعطيك العافيه
يا اخوي على القصيده