http://www.youtube.com/watch?v=toauaYu1fMM
فهد المساعد شاعر مميز تألقت قصائده في سماء الشعر واحبه جمهوره وهذه هي احد روائعه
قصيده تحمل ذكريات من شقاوة الطفوله وبراءة الحب
ياغايبه وان كان فيها جماله \ تجمّـلي ياام الحلا والظفاير
بالله شوفي صاحبك كيف حاله \ شوفيه في غيبتك وشلون صاير ؟!
صارت حياته ضيق خلق وبطاله \ هم وسهر واوراق شعر وزقاير !!
يعني حبيبك صار حالته حاله \ ماباقي الا انه يدن العباير
الله لامنه ذكر مامضاله \ قبل الدواير ماتجر الدواير
يوم الطفوله والشقا والجهاله \ يوم الصغاير في عيونه كباير
ايام كان معانده راس ماله \ ويسوق لهبال الشقاوه بشاير
ياما امتلى بالحب والطيش باله \ وياما امتلت من شخبطته العواير
يكتب عليها : ( عااااشقك للثماله ) \ ويخط توقيعه : ( جريح الضماير )
ياما اشتكاه ابوك في بيت خاله \ وياما تحصّل من هواك العزاير
مره حلف بأنه يبّطل هباله \ وقبل يكمّل .. فك اخوه الستاير
ثم طالع الشباك.. لينك قباله \ وفي اقل من لمح البصر جاك طاير
على صغر سنه ممّيل عقاله \ كااااشخ وناسي لايصك الزراير
لاشافك يتمتم لحاله بحاله : \ لعيون هالشوفه تهون الخساير
ولاشاف زول ابوك حذّف نعاله \ الحب جاير .. لكن العود جاير
طفلٍ يتيم ورغم الاحزان داله \ مايدري ان حظه مع الوقت باير
كنتي طموحه كنت اغلى حلاله \ كنتي وصرتي بس ياام الظفاير
طفلٍ زرع من ضحكتك في خياله \ لين اثمرت شعرٍ هزاله حراير
لاتتركينه في غيابك لحاله \ بالله شوفي كيف هالطفل صاير
ووحده بوحده كان عندك عداله \ اتبّطلي غيبه و ابطّل زقاير
