اللحين اللحين ابغى.......... اتزوج

[عفاف الهدى]

حبيت اطرح مشكلة منتشرة وبكثرة هالأيام للنقاش:rolleyes:

بنات هالأيام تلاقيهم ملاهيف عالزواج اغلب بنات الثانوية الحين بالذات عند بعضهم انهم دخلوا سن اليأس وفاتهم القطار عشان ما تزوجزا ليما الحين
في نظركم ليش البنات الحين متلهفين عزواج؟؟:huh:
عن نفسي اقول:

ان حنا من يوم كنا اصغار وامهاتنا بتقول لنا بتسافري مع زوجش زوجش بيجيب لش زوجش بيعطيش هو الي بطلعش مطاعم ومنتزهات ووو يعني الزوج هو الفرج للبنت (ما يدروا ان شبابنا الحين ما يقدر يفتح شقة مو بيت ) :weird:
والبنت في هالسن سن المراهقة تعاني من اختلاط مشاعر واتحس ببعد الأسرة ومن حواليها توصل في بعض الأ[حيان الى ان البنت تشعر بأنها منبوذة وغير مرغوب فيهااو اسباب ثانية فارق السن بين الأخوات وظيفة الام او خروجها المستمر تفكك عائلي ربما وغيرها من الأسباب الي اتخلي البنت تحلم وتحلم بهالفارس الي بيتزوجها( واتلاقيها اول وحدة في الأعراس وما مخلية مكياج واكسسوارات واحلى الفساتين الا ولابستنه وغير كدا الرقص الي تمسك اليها زاوية وما تتركها الا وهي متكسرة بس اهمشي الكل يشوفها عشان تحضى بزوج من الي قاعدين من الأمهات الي بدوروا على عروسات لأولادهم):wink:

الأدهى اذا رسمت البنت على شخص معين بذاته يعني فلان بن فلان لأنو بالنهاية يمكن توقع في الخطأ او انو بأدي الى اشياء نفسية هي في غنى عنها

يعني البنت هالأيام محتاجة الى الجو العائلي القلب والحضن الدافي لأن هاي الأمور مستحيل توصل الى احد من الأهل فمن البداية الأهل لا يعطوا الى هالأمور انها تنغرس وتثمر لأن حصادها جدا متعب وسيء :wacko:

انتظر نقاشكم معاي في انتشار هالظاهرة الي فعلا هي خطيرة:noworry:
مرة قريت خاطرة في منتدى الأشعار في شبكتنا هني
وحده بتقول فاتها القطار لأن نزار اختار ركابه من الأطفال في يمكن يأست بأن فاتها قطار الزواج واني رديت عليها ومرة ثانية كمان اقول مثل ما رديت عليها اذا فاتنا قطار نزار فأن هناك سيارة لا تلوموني الى صلاح لا وسيارتين بعدمو وحدة :toung:

واحب اقول قبل خمس سنوات تقريبا كان سن فوات القطار 30 الحين مددوه الى 40 لا تخافوا بنات :wink:
جاينكم رزقكم بإذن الله واحنا لسة في بداية عمرنا ولا تشغلوا بالكم بهاي السالفة

ولتعجيل الزواج سو استغفار على المسباح بنية الرزق للزواج وبإذن الله كلنا عرايس بحق هذا العيد الأغر

[خادمة المهدي]

تشكري اختي عفاف على هذا الطرح الحلو

وان شاء الله ببركات الصلاة على محمد وآل محمد
يتزوج كل العزاب ويخلفوا اولاد وبنات ويستر علينا
وعليكم اجمعين قوا آمين رب العالمين

[لحـ الوفاء ـن]

يسلمو على الطرح

[عاشقه ال محمد]

مشكوره اختي على الطرح الرائع

[عفاف الهدى]

اهلين

اشكر كل الي مروا في صفحتي
خادمة المهدي
لحن الوفاء
عاشقة ال محمد

والله يعرسنا جميع

بس المطلوب المناقشة في الموضوع

[كبرياء]

يسلمووو على الموضوع

<<< عن نفسي آخر شي أفكر فيه الزواج حالياا

أهم شي دراستي

عن بقية الموضوع فلا أملكـ تعليقاا

يعطيكـ العافيهـ على الطرح

تحيـــااتي

][ كبريـــــاااء ][

[الـمـشـاكـسـه]

صح حتى صديزتي صغيرررررره وتزوجت مادري شفيهم

[شذى الزهراء]

معاج ياعفاف بكل كلمة قلتيها ...


اعرف وحدة تصغرني بسنة وحدة بس يعني الحين عمرها 20 تقول عنست والله انصدمت منها طيب اني 21 عنست بعد والا كيف ...؟


بنات الحين بس ابغى اتزوج اشوفهم ياكثر من 20 ونازل طيب اللي فوق 20 يقتلوا حالهم


عندي وحده اعرفها تخلي نفسها مميزة في اعراسهم علشان اني حلوة واستاهل اكون زوجة


لكن جاءها نصيبها وتزوجت وعندها بنوتة الله يوفقها ...


بس بعد الؤم بعض الحريم اللي اولادهم في 25 وفوق ويدوروا اليهم بنات 15 وفوق بسنتين


بعد هذا ظلم للبنات الكبار الوااعيين ..بس الله كريم وهو يفرج الحال ...


عقبال مااسمع عنج عروس ياعفاف بحق هالعيد الشريف وكل عام وانتي بخير ..


عفوا على الاطاله ,,وتسلمي على الطرح الراائع ...


ونسألج الدعاء لاتنسينا عفاف ..

[الملاك]

السلام عليكم 00000

صحيح البنات ما يعرسون الا لين ام الولد شافتهم بعرس او نسيبهااااا شايفهااااااااااا24 سااااااااعه في وجهه 000000000000000

تحيااااااااااااااتي 000000000

[وردة البستان]

صحيح خيتو مادر ويش فيهم بنات الحين مستعجلين على الزواج ومايدروويش هو الزواج وتسلمين على هذا الطرح الحلو

[shosh]

انا عن نفسي اسا اهم اشي عندي
دراستي وبس بعدين لسا عمري 15 سنة:embarrest:
يعني بتتجوز كل صبايا المنتدى وانا لسا قاعدة بالمدرسة عم بدرس خخخ

[عفاف الهدى]

تسلموا ليي يالغاليات

بس ما ني شايفة تفاعل

وين الجماعةوين النقاش

[الفراشه الحائرة]

اهلين خيتو
عفاف
ابغي اناقش بس ويش اقول على العموم اني براي ان البنات الا بالمدرسة الحين ويبغو يتزوجوا لان ما في بالهم شيء اسمة دراسة ومستقبل لا يفكرو الزواج وتكوين الاسرة هو كل المستقبل وشيء اسمة رجل كانة هذا الرجل بيخلق اليهم المعجزات وبيعيشو في نعيم طبعا مو كل الرجال بس نادرا من الا يمتازوا بالمثالية ومعنى الرجولة
صحيح ان البنت في يوم تفكر في الاستقرار ولكن مثل انت شايفة احنا مومثل بلدان برة هم الا يختارو ازواجهم ويدفعوا المهر احنا عاداتنا وتقاليدنا تحتم على الرجل هو الا يختار شريكة حياتة وصاير اغلب الشباب خواتهم او امهاتهم يختارو اليهم ويعتمد بعد على حسب المواصفات الا يختارها
ونادرا ها الايام ما يختار شخص الانسانة الا بيغاها تكون شريكة حياته ويتمسك فيها على فكرة احنا البنات يمكن ما نختلط بكل الناس ونتزاور بكثرة يمكن حتى الاهل ما يشوفونا الا في المناسبات
بس اكيد كل بنت بيجي اليها نصيبها الا مقدر ومكتوب اليها بس الصبر مفتاح الفرج
وعلى قولة المثل كل تاخيرة فيها خيرة والا يحبة ربة بيعطية الشيي الا يستحقة ويستاهلة
لا يقول انا ما اللي نصيب نصيبة محفوظ بين ايدا امينة
جلكم انشاء اللة من السعداء وسدد دروبكم بكل خير
وانشاء اللة اللة يزوج كل عازب وعازبة وبالرفاء والبنين والسعادة لنا ولكم اجمعين
انشاء اللة يعجبك تعليقي خيتو ادري هدرت واجد بس يكون فية فايدة كلامي
تحياااتي

[عفاف الهدى]

اهلا بالفراشة

اني وياش بكل كلمة قلتيها
واشكر تواجدش الحلو

وكلامش الأحلى في صفحتي

[ملاك الورد ..~]

هلووووووو عفاف
مو دايما البنت ترغب في الزواج لهدف الزواج ذاته
بعطي مثل عني
تزوجت بالثانوية بس لاني كان عندي رغبة قوية اني اصير أم
كان ودي في جاهل العب به واحممه وانيمه واكون مسؤلة عنه

مو عيب ان البنت ترغب بالزواج وهي صغيرة
بس السؤال هل هي مؤهلة لهذي المسؤليه
وهذا الشيء يعتمد بالدور الاول على الأم
الي من واجبها تهيئة بنتها لمسؤلية الزواج
صدقيني فيه بنات عمرهم 17 سنة وقادرة انها تشيل عايلة
وبرضو فيه بنات كبار مو قد هالمسؤلية


تعالي نفرض ان فيه بنت بالثانوية وجاها واحد يشتغل وعنده بيت واخلاقه ممتازة ومحافظ على دينه ......بالذمة هذا ليش ترفضه ...اعتقد حرام يضيع من ايدها

فيه بنات في عوائل اهلهم مو مقصرين في حقهم
طلعات وكشتات واسواق بس برضو هذي غريزة في البنت
من وهي صغيرة تحلم يكون عندها بيت واولاد
حتى العابنا واحنا صغار عبارة عن دمى على شكل اطفال
يعني هذي غريزة مالنا يد فيها
مشكورة عفاف على الموضوع

[عفاف الهدى]

اهلين بالنوارة
فعلا كلامش صح وهاي غريزة الأمومة ما حد يقدر يطفيها
بس اني ما اتكلم عن الطبيعي الي ذكرتيه شي جميل
وهو المفروض الي يصير بس اني اقصد الشاذ من البنات
الي همها من الزواج انها تلقى الفارس وتطلع من كدر البيت
او انها تغفل عن ان البيت والزواج مسؤليات وحاطة الزواج
في المقدمة لأنو بيطلعها من اجواء الهم الي هي بتحسها
كمان الروحات والجيات وو...هاي الي قصدتو ا
ويسلم لي هالمرور الحلو

[مناجاة الصابرين]

السلام عليكم
الموضوع روعة
والاخوات اللي تكلموا ما قصروا
احب اقول ليكم شي...
وقت كنت بالثانوية ونسمع انه وحدة من المدرسة انخطبت هالبنت تصير مشهورة
وين ما راحت الاصابع تتاشر عليها ما ادري ليش؟؟؟؟
لا واللي متزوجة مشهورة اكثر من المديرة...
بس ما كانت البنات تصرح عن رغبتها في الزواج
يوم رحت الكلية.......... انصفعت
البنت علنا وفي الممر قدام الرايح والجاي ..
" يا الله تعرسني........" " فلانة انتين وياها.. اللي تعرفني واللي ما تعرفني تدعي لي .."
ليش احنا كم وصل عمرنا ! خمسين؟؟
ما كنت اعلق بس ما كان يعجبني
بصراحة
كنت انظر للبنت اللي تقول كدة انها قليلة حيا
ما ادري ليش؟؟؟؟
مع ان في وسط العايلة الناس اللي انخطبوا يوم كانوا في العشرين واني في 18 يقولوا لي اني عنست!!!!!
بصراحة بعد ما تزوجت ما اعرف ويش اقول للبنات اللي هلون
خااااااااااااصة ان الحين النظرة للزواج صارت غير
البنت ما تبي تستقر في البيت تبي تطلع وتكشخ ووووووو .......
طلبات البنات ما تخلص
وجيب الرجال ما يكفي الحين
هالزمن مو طبيعي .........
يا علي.... كأني هدرت وايد وطلعت عن الموضوع وزهقتكم..
آآآآآآآآآآآآآسفة
تقبلوا مروري

[عفاف الهدى]

اخت ايول بالعكس

لطفت الجو باسلوبش الحلو

وكلامش الأحلى

فعلا البنت الحين بدون حيا تطلب من الكل يدعي اليها تنخطب على ويش ما ادري؟؟؟

ما تدري ان الزواج وراه هموم منتظرتها

[يوم سعيد]

بسمه تعالى
هي جراءة مني أن أخط بمشاعري حيال هذا الموضوع الجرئ وقد تراجعت أكثر من مرة وعدلت عن خوض مثل هذا النقاش الحساس الذي يشغل بال كل إنسان ذكر/أنثى وربما الشغل الشاغل والذي يشغل حيز أكبر هو المرأة والتي تتفوق على الرجل عددياً كماً وكيفاً ، وربما هناك حكمة وغاية وراء هذا التفوق العددي ، والمثير للغرابة إن العنوسة في مجتمعنا في تزايد يكاد يتضاعف سنوياً وهذا يعزوا لعدة أسباب أتمنى أن نتناولها كلا على حدة ...!!! ولكن ليس الآن ، بعد أن أفرغ ما بجعبتي وأبدي برأيي المتواضع ، فلا يختلف إثنان على أهمية الزواج كهدف نفسي وعامل أمني وحالة استقرارية لإن الله سبحانه وتعالى خلق من كل شيء زوجين إثنين الذكر والأنثى حتى ينسجمان ويتحدان ويتكاملان فالذكر للأنثى والأنثى للذكر وقد وضع في كل واحداً منهما الحاجة إلى الآخر فلسنا كما قوم لوط الذي خسف الله بهم الأرض وجعلهم أذلة خاسئون ..!! إننا في عصر التوتر والإضطراب والرغبة الى الأمن والاستقرار فالجبهات تغزو الشباب وتثير غرائزهم وتحرك فيهم الدخول في المحظور وكل بيت يحمل في غرفه بنت أو بنتان وربما يلقي الحظ بظلاله على بعض العوائل فيكون نصيب الأنثى في عدد الأفراد هم الغالبية العظمى فيزداد التوتر والخوف من المستقبل ...!!!
لا أريد أن أطيل عليكم فالزواج هو هاجس كل إنسان وعلينا أن نسيطر على هذا الهاجس ونصوبه في الاتجاه الحكيم ، فلا ننظر إليه على أنه هدف رئيسي يجب اللحاق بقطاره والتنافس من أجل اقتناص فرصة العثور على زوج بأي شكل من الأشكال دونما تمحيص ودونما تدقيق فليس الزواج رغبة يجب أن نقتنصها وإلا فات الفوت ولا يمكن التفريط بها ..!! إن الإقدام على الزواج مبني على أساس من الفكر السليم فالزواج مشروع لبناء مؤسسة إنسانية هي في حد ذاتها لبنة من لبنات المجتمع وليس أية رغبة عابرة أو شهوة جارفة نسعى إلى لجمها فقط بل الزواج هو سكن ..!! وعلينا أن لا نأسف لإننا لم نحظى بزوجة أو نحظى بزوج ..!! يجب الإيمان بالقضاء والقدر وإن كان حظوظ الذكر أوفر حظاً من حظوظ الأنثى فالأعداد المترامية في زوايا البيوت تسبب قلقاً يقض مضجع الفتاة فتبقى قطعة أثاث تزين بيت والدها ..!! فتخور قواها وتنهار عواطفها فتعتقد إنها كلما مضى عليها الزمان تبلى وتذبل وتصبح نسياً منسياً ..لآلآلآ وألف لا فالإنسان كيان قبل كل شئ والإنسان عنصر نفيس وقادر على العطاء والبناء والانجاز وليس من الضرورة الدخول من باب الزواج حتى يحقق الانسان أكبر نجاحاته ، وإن كنت أتمنى أن تكتمل وتكلل نجاحات الانسان بالزواج ولكن قضاء الله وقدره فوق كل شئ فليس موضوع الزواج بأيدينا حتى نحققه على أرض الواقع ، إنه الحظ والنصيب فإن جاء إلينا فأهلاً ومرحباً وإن لم يأتي فلم تنتهي الدنيا ولا يكون ذلك آخر المطاف ، ويفترض أن نتعاطى مع الزواج على أنه فرصة جميلة فإن حظينا بها سعدنا بها وإن لم نحظى بها فلا نأسى عليها وعلينا أن نستكمل مشوارنا في هذه الحياة فهناك عدة نواحي يمكن للفتاة أن تتوسع وتتيح لنفسها التوهج وإثبات الذات وتطور من قدراتها كجهاز قادر على الانتاج في كل الميادين وليس عدم الزواج عائقاً يحد من انطلاقة الفتاة ، فالفتاة تبقى قوة فعّالة ومنتجة حتى ولو لم تتأهل إلى الزواج فلا ييأسن أخواتي الفتيات وينظر إلى الزواج على أنه مصير يجب أن تصل إليه وإن لم تصل إليه فذلك يعني الفشل الذريع والنهاية المأساوية والخاتمة المرّة ..!!! لا فلا نجعل نظرتنا للزواج نظرة قاتمة وداكنة ، وإن كان ذلك شئ يهوّن علينا بعض الأشياء إلا أننا يجب أن نفكر بعقلية أكبر وأوسع وأكثر رحابة من تلك النظرة الضيقة التي تدل على ضيق الأفق الفكري ..!!!
أكتفي بهذا القدر لعلي أتمكن من المشاركة في أقرب فرصة ممكنة ..!!!
تحياتي
يوم سعيد

[w_alwaheed]

يسلموو على الطرح

[عفاف الهدى]

اهلا باليوم السعيد

اشكر لك تواجدك المبارك في صفحتي
وانتظر عودنك بفارغ الصبر

الوحيد
يسلم لي مرورك
بس وين تعليقك على الموضوع؟؟؟

[الليل الممزق]

عفاف الهدى

موضوعك شيق ومهم جداً
انا في نظري ان الوضع الحالي اصبح على ما هو عليه بسبب المجتمع
ونظراته المعقدة

انا لم اتزوج بعد ولكن لدي الكثير من الاصدقاء المتزوجون
وهل تعلمون ماذا يقول من منهم تزوج بفتاة صغيرة جداً
" انصحك يا بو محمد "اللي اهو انا" اذا بتزوج خذ وحدة كبيرة في السن اترك 15 و 16 عنك اللي فوق الـــ 20 اكبر عقل"

طبعا ما اقول ان كل البنات الصغار مو عاقلين بالعكس في بنات عقولهم اكبر من عمرهم بعشرات المرات
بس هذا اللي صاير والله المستعان

واعتقد ان حتى اللي في الـــ 30 ما فاتها القطار
ألاحظ هاليومين عندنا في البلد صاروا اللي في هذا العمر يتزوجون بشكل متزايد

اللهم بحق الزهراء وابيها وبعلها وبنيها
زوج كل اعزب وعزباء

اعتذر على الاطالة

تقبلوا تحياتي
الليل الممزق

[عفاف الهدى]

الليل الممزق

نورت صفحتي بتعليقك الجميل

واضم صوتي لصوتك بنت 30 لسة ما فاتها القطار

والله يعطيك العافية

[حور الجنان]

مشكورة اختي عفاف على الطرح والله يعطيك العافية
واني بالنسبة اليي اني أأيد اختي نوارة الدنيااا بكلامهاااااا
واقووول اليهااا صح لساااانك والله يعطيك العافية

وعلى فكرررة البنت الشااطرة ماتأثر عليها لا خطوووبة ولا غيرررهااا
وبعدين البنت ماينحكم عليها من عمرهااا لان في بنااات في سن 20 وفوووق كأنهم مراااهقااات بس طبعاااا مو الكل "اصااابع اليد مو سووووى" اني اتكلم عن بعض البناااات.

[عفاف الهدى]

حور الجنان

يسلم لي مرورش

وحنا كمان نتكلم عن فئة من البنات

وزي ما قلت اصابع اليد ميسوى

[أمير العاشقين]

ماعليه خيتووو عفاف تسمحي ليي اذخل في الموضوع ولو انه بناتي

تسمحي لي احط رااي فيه لاني بصراحه وودي اكتب راي هنا

لان فيني حرره بجد

اذا مسموح راح احط

أمير العاشقين

[عفاف الهدى]

اكيد مسموح اخوي

والبيت بيتك

لا تستأذن ابد الساحة مفتوحة للصبايا والشباب

انتظر عودتك

[أمير العاشقين]

ماعليه بناقش بحراره شوي اوكي
شذى الزهراء كلامك ممتاز
الفراشه الحائره كلام جميل والله
نوارة الدنيا كلامك بعد اايد منه شوي
بس ممكن اطرح رايي

دقايق بس اخلص شغله حق الوالده وارجع

اوكي

I will come back

[عفاف الهدى]

ننتظرك اخوي

وخذ راحتك في النقاش

والوالده اهم سلم عليها

[أمير العاشقين]

هلا خيتوو عفاف تسلمي والله
وشاكر لش انتظارش واسف على التاخير
الله يسلمك وصل السلام خيتووو
ونجي الى النقاااش وكل واحد له رااايه وانا رااي هذا
******
لنفرض البنت ما تزوجت في السن الي تبيه
يمكن هالشي راحه ليها او من صالحها
لا اخفي عليكم والله بنات هالزمن اذا وصلت عشرين واحد وعشرين
تقعد تدعي حسبي الله على الخطيب الي ماجا للحين والي والي
ومن هالقبيل
هذا مو كلام مو لازم البنت تتزوج وهي صغيرة ومو لازم وهي كبيره
انا عندي ومن راي والراي لا يفسد في الود قضيه
البنت الي تقول متى اتزوج لو تقول الى صديقتها وما ادري ايش
ماعليه السمووحه للبنات ومقامهم عااالي بنت فاصخه الحيا فصاخ
يسمحوا ليي اقصد نوعيه من البنات مو البنات كلهم
في بنات يتمنووا يتزووج لاجل الامومه وهذا شي افتخر فيه والله
اتمنى البنت تقول ابي اتزوج عشان يكون عندي ولد هذا البنت ما تنلام ليش
لانها عندها امنيه وتبي هالامنيه بس مو معناتها كل ساعه وكل دقيقه ابي اتزوج
هاالامنيه تحقلها بس كيف
انا اقول ليكم كيف في ادعيه خاصه في تقرب لله سبحانه
مو بنت تعرض نفسها لكل من صديقاتها وتقول ابي اتزوج
هاذي حتى لو بجيها الرزق ما بجيها
لا واسمع الموضه الجديد
البنت تبي تتزوج ليش
حق تروح مجمع ترووح سووق ترووح تطلع تسافر
على قولتهم تاخد الحريه
هاذي مو حريه الصراحه
هاذي صيااااعه وضياع نفس
يعني تتزوج وتحمل وتجي مولود سوا بنت لو ولد ما تعرف حتى تغير له
ويش هالام هاذي
بالله هاذي الي تقول ابي اتزوج ورزقها ربها بهالجوهره تستاهل تتوقع تكون ام لو زوجه
لو حتى ربة منزل
اقسم بالله هاذي مو زوجه ولا هي ام
شنو ذا المولود عند امها بحكم ما تعرف الي تغير له لو تلبسه
طيب تتعلم مو هي تبي تتزوج
ليش اجل تصرخ ابغى وابغى وبعدين ماهي قد
نجي للبنت الي عمرها 31 او في الثلاثين
ما تزوجت ليش
يمكن امها تقول مسوا ليه عمل والي والي والي ومن هالقبيل
هذا مو كلام البنت الي رزقها مكتوب بجيها بجيها
لو كانت في وين بجيها
يعني الحين انا استغرب ما تزوجت ولمتى ومن هالكلام
يمكن ربك ماخر زواج لسبب معين
في بنات مشاء الله عمرهم في الثلاثين وقسم بالله يتمنوا ما يتزووجوا
ليش
لانهم مو قد هالحمل زوواج
وفعلاً هاذي البنت العاقله
الي تفكر لما تتزوج
تقول بكرا لما يصير عندي ولد بعدل بين الزوج بعدل بين الولد
قبل ما تفكر في الزواج تحسب الف حساب وهاذي البنت الي تستاهل والله
والله العظيم احس هالموضوع مثل البنت الي تبي تضعف
تحقلها في صغرها لاتاكلي لاتاكلي ولما تكبر وتشوف اجسام صديقاتها تقول ابي اضعف
ويش هالمسخره دي يعني ما تدري ويش تسووي
سالفة البنت الي تحط في بالها شخص وتبي تتزوج
اولاً هذا الموضوع ناقشته من قبل
وهاذا مو سبب البنت
هاذا سبب الاهل نفسهم
الاهل هم الي يقولوا فلانه لفلان ولعلان
يعني فتحوووا عقل البنت الى الزواج
وهم ما يعرفووا ويشو يعني زواج
بنات هالايام يفكروا الزواج لعبه لو بس مهر وحفله وعرس
وبس ما يفكرووا يعني ويشو زواج
زي هالايام الخطوبه تفاهم وتعارف بين الزوج والزوجه
هم لا يفكرووها تمشيه وحوامه بالسياره وعشيات في مطاعم وضحك ومسخره
هاذا مو كلام
قسم باالله الناس تغيرت واااجد يعني ما تدري ويش تسوي
لو يعني مدرسه حق دراسه هالمدرسه
مو حق قرقر وسوالف واني احب معلمه فلانه واحب هالطالبه وشوفي دي ويش لابسه ويش ماكله
ويش ذخلكم انتووا انتو جايين تدرسووا لو تقرقروو وتحشووا وابي اتزوج ابي اطلع ابي افتك من الحبسه
طيب ولو تزوجتي وزوجك صار اعظم من اهلش ما يخليش حتى ترووحي بيت اهلك الا في السبووع مره
ويش بتسووي
بتقولي ليه طلقني
طيب ليش تقولي من البدايه بتزوووج ها ابي اعرف ليش
لو لما تتزوج وتفلت ولادها وهي من محل لمحل
طيب وزوجش وولادش ويش تسوي فيهم
ليش تتزوجي اجل
لو لما تتزوج وزوجها على قد حاله ويالله يعيشوووا وهي تبي كذا وكذا
مو قادر ليش تتزوجني طيب انتي ليش تثرخي ابي اتزوج
الزواج والله مسؤاليه وحمل
تتحمله البنت وقبل ما تفكر في الزواج وتقول طافها القطار وما طافها
تفكر هالقطار قبل ما يطوفها تقدر تركب فيه وتتحمل مطباته وحمله
اذا تقدر ديك الحزة تفكر طافها لو لا
مو فالحه بس ابي اتزوج وابي اتزوج وتعرض روحها لفلان وعلااان
هذا مو كلام ابي اتزوج
الكلام لما اتزوج اقدر على الزواج لو لا هذا الكلام
مو على قولتهم ذيل يطرطق وذيل ما يطرطق
الله يستر على بنات الناس ويستر على المؤمنين وادري فجرت راسكم
وذخلت الف موضوع الا موضوع
بس والله شي يقهر ابي اتزوج وابي اتزوج ولما تتزوج وتجي الاولاد تفلتهم على امها
طيب ما تقدري تعدلي بين ولدش وبين زوجش ليش تصرخي
هاذا الي ابي اعرف عشان الطلعات والهيات والمجمعات ومن فلانه لعلانه
ومن كوافير الى مادري ويش
الله كريم ومتى بس هالزمن يعتدل متى
وتسلمي خيتووو عفاف على الموضوع هذا
عساكي على القوة يارب
أخوك
أمير العاشقين

[عفاف الهدى]

انت الي عساك عالقوة اخ امير العاشقين

وهذا بالضبط الي قصدته

بس يمكن احنا متحاملين عالبنت اشوي وما ذكرنا الصبي

بس فعلا قلت الي ابي اني اقوله

يعطيك العافية اخوي