مشاهدة النسخة كاملة : مسلسل (فارس وريم ) لشاعر التتان استمتعوا بهذا المسلسل الجميل
ساقي العطاشا
11-18-2007, 03:47 PM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
بالفعل مسلسل يستحق المتابعه وله كبير الفائدة والمتعه ايضاً
اتمنى اليكم قضاء وقت ممتع ان شاء الله اليكم ..........
...................
حيث ستكون القصيدة حلقات متواصلة
بعنوان
( ريم وفارس )
نبدأ على بركة الله
كاظم حزيـــن ومستمل ما عنده شغله !
في الحجرة قاعد چنه فاقد أمه واهله
قال ادخل الشات شوي اتهنى واتسله
يمكن احصل رزقي والقى ابنية سهله
دش وكتب نك نيمه ( فارس قلبه تعبان )
واختـار صورة وحطها _ عن يــازعم فنان
يتوهم انــــه صاحـــــــب الصورة وفرحان
ويتخيـــــل انــــه اجمـــل وأحلى لصبيان
ضل يفتــــر الرومــــــات قاعه ورى قاعه
چنه سفيـــــن مضيِّع وطايـــــــر اشراعه
لصبي معزم على شي والخجل بــــاعه
الساتر الله من افكـــــاره في هالساعه
ما شــــاف قـــــــاعة تعجبه كلهم مملين
( قاعة المحبوبين ) ( قـــــــاعة المُحبين )
كل نوع موجود ومهو عــــارف يضل وين !
استغفر الله ناقص ( قـــــــاعة المُصلِّين )
خبرك بعد والشـــــات كله هرار في هرار
ماتدري نـــــاس اصغــــار لو شيَّاب واكبار !
وماتدري نفيه لو ضكر غشَّـــاش وعيَّـــــار
الكل مزيف في الأسامي وفي الأعمـــار
كاظم على الأسمــــــاء ضل يتفحص يشوف
شوق البراري_ رشا_ وردة _ حايرة _ نوف
ريم الفلا _غزلان _ نانسي عجرم _ اطيوف
اسمـــــــــاء حلــــــوة والصور خلتـــه ملهوف
الى اللقاء في الحلقة القادمة..........
بالتوفيق .........
ساقي
نور الولاية
11-19-2007, 12:30 PM
كلمات مغلفة بصدق المشاعر والاحاسيس ...
كتبتيها بسلاسة وتلقائية ...
فاسرتينا لمعانيها ...
اسجل اعجابى وانتظر جديدك بشوق ..
ساقي العطاشا
11-22-2007, 03:41 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
مشكوره على التواجد في صفحتى
ونواصل معكم مسلسل الشاعر القدير .............
عرَّج على ريــــــــم الفلا في الخاص وسلَّم
هاي .. الصراحة .. ودي نص ساعه نتكــلَّم
ردت عليه بـ هاي .. رد .. صـــورة تتبسَّــــم
قالت: اتفضل .. سكـــــت شويــــــه واتبلعم
قال: الصراحة انا تابعتـــــــش من العـــــــــام
وانتي عجبتيني باسلوبش والعقل هـــــــام
كل كلمة منش في خيـــــالي طبعت اوهام
قلت ادخل الخــــــــاص واشوف آخر الأحلام
طرشت صورة اختصــــــــار ( اخدود حمران )
عن يازعم هي مستحيــــــة من الولهـــــــان
وهو طرش الوردة اختصــــار – تقول هبلان
وسئلته ليش الإسم فـــــارس قلبه تعبان؟
قال الله يلعـن الدنـــيا قبل شيبي بلتــــني
الناس تحسدني بجمـــــــالي وما درتــــني
مهموم وما عندي حبيـــــــــبة قدَّرتـــــــــني
وانتي الصراحـــــــــة نسمة جت وحركتني
استــانست لبنيـــــــه مسكينــــــــــة بكلامه
طارت من اللي يقولـــــــــــه مثلات الحمامه
قالت له افتح قلبــــــــــك وعطني ابتسامه
لا تفتكر واختــــــــــــــك معك ... طار بغرامه
كالعادة ( خيووو ) هذي بس حق البــدايه
تالي ( حبيبي ) و(عمري ) وشوف النـهاية
المهم كــــــــــــاظم ابتشر رافـــــــــع الرايه
بس ينتظر ايميلــــــها وتبــــــــــدي الحكايه
وانتظروا الحلقة الثالثة ...........
دنيا الأحلام
11-24-2007, 05:02 AM
حلوة القصة بصراحة وننتظر التكملة
اخوي ساقي العطاشا بسرعة
يعطيك الف عافية...
يسلموووووووووووووووو
ساقي العطاشا
11-27-2007, 03:15 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين .............
المواقف جميله جداً واتمنى ان يتفاعل الاخوة مع الموضوع لجماله وفائدته وقيمته بالفعل الطيبة .............
مشكوره على التواجد والتواصل
وكالعاده قالت لالا لا ايمـــــيــــــــــــــــــل صعبه
وهو يحلــــــــــف بكل غـــــــــــالي ويقسم بربه
صدقيني ما العب عليـــــش ومــــــــاهي طربة
أول ابنيـــــــــــه انتــــــــــي أكلمها والكعـــــــبه
قبلت وقالــــــــت إنـــــــــت اول شخص اضيفه
قال ادري اصلن من اسلوبش صـــدق شريفه
ومبين انش فــــــــــــاهمة وزينــــــــــه وعفيفة
واطمني فـــــــــايلاتي مضمـــــــــــونه ونظيفة
وانتقلت القصـــــــــــة لصفحـــــــــات المسنجر
وابتدى حب عبــــــــــلة وغــــــــرام البطل عنتر
مغتـــــــرة باسلوبه الحلــــــــــــو وهو بعد مغتر
واليوم بعد اليـــــــــــوم والشلخـــــــــــات تكبـــر
قال: انتي صدق اسمــش الأصلي ريــم يا ريم؟
لو هو مجرد إســــم يعني فقـــــــط نك نيــــــــم؟
قالت: نعم اسمي .. واخواني – كرم – تسنيم
وعندي خت وحده _ رهـــام_ كلنا ننتهي بميم
قــــال: انــــــــا اسمي بعد صدق الأصلي فارس
واخواني .. محمود ولــــــــــؤي واختي (نوارس)
وامي جمـــــــــــــانة والأبـــــــــــــو أحمد الفارس
وكلنــــــــــــــا بَـ مريكا رحنا كملنـــــــــــــا مدارس
انزين ما قلتــــي لي ياريــــــــــــم انتي من وين؟
من قطر لو لكويــــــــت لو ديـــــــــــرتي البحرين؟
قالـــــت من البحريـــــــــن واستــــــــانسو لثنين
عن يازعم فــــــــــن والبـــــــــــلد جمعت القلبين !!
الى اللقاء في الحلقة الرابعة
ساقي العطاشا
11-30-2007, 10:38 AM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين .........
الحلقة الرابعة .. شوفو حل ليهم صار الصدق
كـــاظــــم مـع الأيــــــام حـــــس الملــل ينــزاح
وريـــم بسوالفـــــــــها بعـــد خلتــــــــــه مرتــاح
الضيقــــــة راحــت بالصـــدر وابليـــــــس ماراح
بس عسى الضحكة ما تمـــوت وتنتهي اصياح
زاد الوصل والمعـــنويـــــــات اعتــــلــــــــت فوق
وصار الحچي كلــه أحاســـيــس وهوى وشوق
( هلا وغلا ) ( من طيب قلبك ) .. لهجـة السوق
وبرب وتيــــت وبــــاك ويـــــلكم .. يسلم الــذوق
بس خبـــــرك الكـَظمي طموحـه بعـــــد أكبـــــــر
ما تكفي هـــــــدرة ورى شاشـــــــات المسنجــر
كل ما عرف شي يبغي يعـرف أكثـــــــر اكثــــــــر
چنــــــــه متخــرع يعنـــي عمــــــــره ما اتبخـــــــر
وهي بعد يدفــــــع البــــــــلا انزهقــــــــت شويـــه
وعقب الخجــــــــــالة اعيونــــهـــــــا صارت قويــــه
چنهــــــا زلاطــــة روب تـــــوهـــــــــا مستويـــــــــه
كل ما روتها القعــــــــده مــــــــاهي مرتــويـــــــــه
زادت الجــــــرأة وكــــــاظم يــــــــذوب بخيـــــــــــاله
عن الشكـل يستفـــــــسر اموجِّـــــــــــه ســـــــؤاله:
وصفي لي شكلش وادري مزيـــــــونــــــــة وغزاله
قالت: اسألنـــــــي واني بوصف لـــــــــك ..( خجاله )
قال: أسمحي لي تـــــــرى ما أهتــــم بالاشكـــــــــال
والناس مــــــاهي بالجمــــــــــال وكثـــــــرة المـــــــال
قالت: أفـــــــا لا تعـــــــتـــــــــذر محشوم ورجَّــــــــــال
اسأل ولا اتحــــــــاتي اظنــــــــــوني ( ماكـــو جنجال )
الحلقة الخامسة في الجمرك قريب تخليصها
حكاية حب
11-30-2007, 12:47 PM
مُتابِعة بـ صمت
ساقي العطاشا
12-01-2007, 03:09 PM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
كاظمو اتدحن الحقو عليه
قال: انتي بيضة مثلي لو حنطية سمرة؟
قالت: يقولون الأهـــــــــل صبغتي شقرة
قال: وقصيـــــــرة لو وسط لو طولي مرَّه؟
قالت: وسط .. لاني زرافـــــة ولاني هُرَّة
استانس الملعوص واتشقــــق بالاوصاف
والبوز واصل للأذون .. اشلــــون لو شاف!
مركب نوايـــــــــاه انطلق والچذبة مجداف
بس جم سؤال الباقي ويوصل الأهـــداف
قال: انتي دفشة شوية لو مثلي رشيقة؟
قالت: شقول لك! تبغي تعــرف الحقيقـــة؟
أكثر بنــــــــات الصف يسموني الأنيقــــــة
بس ما أحب يمدحني شخــص بهالطريقة
إتدحن الكظمي والسانـه چنـــــه مسموت
كل ما سمع منها وصفها قــــال ( بااااموت )
قالت: عليك اسم الله قبـــلك أجرع الموت
رد قال: لا .. واثنينه ان شاء الله في تابوت
والله هبــــــــــــــالة ومسخـــرة والله بلاوي
وياما عن النــــــــــت نسمع اسرار وحچاوي
طاعــــون يسري و ( الشعر ) يمكن يداوي
وانتظر باقي القصة في عهـــــــدة الراوي
انتظرو الحلقة السادسة
نور الهدى
12-01-2007, 07:09 PM
ساقي العطاشا
سرع شوي
بنتظارك خيو موتغيب كثير
ساقي العطاشا
12-02-2007, 05:46 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ...........
وليييييينه .. صار مغني الكظمي
ضلوا ثلاث اشهـــــور يمكن على هالحال
كثرة سوالفهم يدافـــــع البــــلا ( إسهال ) !
الحچي كله انقـــــال ما ضل حچي ينقال
وصفو بعض حبـــَّـو بعض وانبنـــــت آمال
كظُّوم مو مقتنــــع بس كيبــورد واحروف
يبغي يتقرب يبغي يسمع صوت ملقــوف
الدودة تلعب في حواسه وباله مخطـوف
معقولة بس يكتفي بالشاشة ولا يشوف!
فكر في خطة اشلون يسمع صوتها اشلون؟!؟!
واشلون يقنعهـا في السمـــــــاعه يتحچون
حيَّــــــــال والتمثيــــــل عنده افنون وافنون
ثعبـــــــــان جلد افكــــــــــاره ما يتورط بلون
وليـــــلة من الليــــــلات في نص السوالف
قال: العمر يا ريم أحــــــــداث ومواقـــــــــف
بذكر إلش طرفــــــــــــه بسيطه من طرايف
صادتنـــي مرة وانا صوب السيــــــف طايف
أتمشى ويَ الربـــــع .. هم يـــــــدرون عني
لازم ازنزن ليـــــــــــهم , الزنــــزنـــــــــة فني
ومن أستمــــــــت يتقربـــــــــون شويه مني
يستانسون بصوتي ها هـا من أغنـــــي
انتظرو الحلقة السابعة
حكاية حب
12-02-2007, 07:05 PM
بليــز المقطع اللي بعدووو شكله حلووو
يااريت ماتتإخر ^ـ^
نور الهدى
12-03-2007, 10:36 AM
صدق داهية هالكاظم هذا
خيو بنتظار التكمله
أمير العاشقين
12-03-2007, 12:10 PM
Iam waiting
ok
ساقي العطاشا
12-03-2007, 11:02 PM
شكرا على متابعتكم
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
إي عاد أقول لش وانا كنت شويــــــه طربان
وكلهم يقولون إنته چيفــــــه اتصيـــد الالحان
من يمـــــــــدحــــون يغربــــــــلوني هالصبيان
صدق انا صوتي حليو بس مو عــــــــاد فنــان
إي عاد اقول لش والا جــــم ابنــــية طافــــو
سمعوني ماشفـنــــــــاهم إلا فجــــــأة وقفو
لفينــــــا عنهــــم والا نفــــــــــــس اللفــة لفو
صفينــــــا صوب بسرعه نفس المحــــل صفو
إي عاد اقول لش والا نسمعــــهم يقـــــــولون
هالمطرب انشوفـــــه ترى في التلفـــــــــزيون
والثانية اتقول أني لاحظتـــه في سبيس تون
والثالثـــه اتقـــــول اشحلاتـــــــه صوتــه مزيون
إي عاد اقـــــول لش هالمـــــواقــــف بلوة بلوة
لا في مجــــــمــع لا فـي شـــــــــــارع ولا قهوة
ما أنوَس ارفـــــــع صوتي في موَّال وغنـــــــوة
إلا وعليـــي إلتــــــــمـــــــــو اتقوليــــــــــن ندوة
إي عاد اقول لش أنا مو قصـــدي ترى افشـــار
بــــــس تعرفيــــــن النـــــــــاس يا حبــــها للهرار
إللي سمعتــــــــــه يقــــول صوتي عود واوتـــار
واللي كمنگه .. حشى فــارس والا قيـــتـــــــــار
الحلقة الثامنة والتاسعة يتمشون وي بعض في الطريق
وشوفو آخر هلشلخ والصواريخ
نور الهدى
12-04-2007, 06:16 PM
الله يستر من لشلخ كاظموه وصواريخه
بنتظار التكملة
حكاية حب
12-04-2007, 07:07 PM
يالله المقطع الحلوو تقطعه
بليز كمل كل يوم حلقتين
^ـ^
ساقي العطاشا
12-05-2007, 07:40 PM
مشكورين على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
الحلقة الثامنة
يازعم متواضع كاظموو
افشار وافشار واخر شي يتواضع
وطافت عليهـــــا الخبلة بالراحة هالشلخه
قالت: عجل مو سهل صوتك يعني كشخه
تصلح لحفـــــلات وبعد ليــــــوات ودبخـــــه
والكظمي نافـــــخ صدره يا حبـــه للنفخـه
قال: انا لا إسمي مغـــني ولانـــــــه منشد
والناس واحــــد ينزهــــق واحــــــــــد يمجِّد
بس الكنـــــاري قبــــــــــــل لا نسمعه يغرِّد
ما نحكم انـــــه يسوى صعــبـــة ترى انحدد
قالت: احســك مقتــــــدر وانســـــــان لامع
تعجبــني شخصيتك ويعجبــــــني التواضع
كل يوم ايزيــد اعجــــــابي واتخيَّلك ساطع
والله وكلامـــــك للأمــــــــــل يعطيني دافع
قال: المواهـــــــب نعـــمة من رب السماوات
ناس الله يعطيهم جمال وحِسن لمحـــــــــات
ناس الله يعطيهم خفافة دم وبسمـــــــــــــات
وناس الله يعطيهم حــــــلاوة نبــــره واصوات
قالت: كلامـــــــك صح وكــــله فـــن وحِكمة
صــدق المواهـــــــب والتمكـــن أحلى نعمة
ساعات افكــــر فيـــــــك احسها والله حلمة
واتمنــى ما أقعــــــد ولا اتصحيـــني صدمة
حكاية حب
12-06-2007, 12:52 AM
حلووووووووووووو المقطع
مع الشلاخاات من كااظموو
هههه
يسلمووو
ساقي العطاشا
12-07-2007, 01:46 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
قالت وقال وآخرتها هالمواصيل !.. لا خُربت
ريــــــم بحچيها واصلت: فــــارس فديتـــــــك
عنــــــــدي طلــــــب ماترفضــــه ليي رجيتك
واذا صعــــب إنسى الطلـــب يعني عفيـــتك
والطلـــــب هــذا ( ممكـــن اتسمعني صوتك؟)
قال: انتي أغلى والطلب أرخص من المــاي
قالت: عجل بتغـــني ليي شويه؟ ألاااااااااي
قال: اطلبي موبـس أغـــــــني طلبي عيناي
قالت: عسى اعيونـــــــك تضــــــل للأبد وياي
قالت: بدز لك دعـــــوة من صوبي واقبلهــــــا
بالمايـــــك بس لحظـــــة هالحجــــرة بقفلهـــا
قال: انـــــا سمَّاعـــــتي خربـــــــانـــــه شكلها
وايرها راحــــــت روحــــــه مثــــل اللي قبلها
ما ودي أرفـض لش طلـــــــب مو راس رجَّال
بس ويش اسوي المايك عنــدي ماهو شغَّال
إلا بقول لش: عندش انتي شسمه .... نقَّال؟
يتراوى ليي أسهل بــــس اذا ما أكو إشكــال
سكتت اشويـــــــــه وبالفـــكر تتـــــراود اشياء
عقب اللي قالـــت واللي قال اشتعلت اهواء
وابليـــــــس ثـــــالثـــــــــهم بدوره هيــــأ اجواء
وانتظر قصتهـــــــم بعــــــد موجز الأنــــــــــــباء
وانتظرو العاشرة قبل العاشرة
حكاية حب
12-07-2007, 01:56 PM
باااصيح
كملهاا
أرجووك
نور الهدى
12-08-2007, 06:10 AM
متابعه بصمت
يالله له
ساقي العطاشا حط حلقتين مو حلقة وحدة
ساقي العطاشا
12-09-2007, 11:04 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ...........
الحلقة 10 والحلقة 11 في خطوة وحدة
شوف يعني اشلون
عقب السكوت اللي استمر يمكن ثواني
قالت: رقم نقــــــالي تبغي؟ ماني ماني
راحـــــت عليـــــــي لو درو عني أخواني
غير الموبايل ارجوك إطلب أي شي ثاني
وبعدين حتى انتــــه بتـــــــاخذ عني فكرة
بتقول هــــاذي ابنيه سهلة ماهي عسرة
وبتقــــول لازم كلَّمـــــت من قبلي عشرة
أرجــوك سامحـــــني ترى المسألة خطرة
إتكلم الكظمي: أفــــــــا ياريــــــم حاشاش
من قال سهلة! والله والله والله مــــاعاش
واللي يجيب اسمـــش بكلمه والا طرواش
أجيبــــــه بالسچيــــــن بطنــــه والا رشاش
بس انتي هَــــــدِّي ولا يروح البـــــــــال أبعد
أعصابنــــــا لازم في كل شي اتكــــون أبرد
سِمعي كلامي وتالي عقبــــه قولي أي رد
وكل كلمــــة مِن قلبـــي عليهـــــا ألله يشهد
ما طَلَبـــــت النقَّــــــــــال قصدي بس تسالي
واللي قلتينـــــــه من قبـــــــل كله في بالي
وعَرضش تــرى يا ريـــــــم عندي غالي غالي
إنتي طلبتيـــــــــني ورضـــــــــاش اول وتالي
واكبر دليل انش عظيمـــــة ومَـنتي لعبــــــــه
من طلبــــــــت النَّقــــــــــال هَب الحمق هَبــه
ومتأكــــــــد إنش مؤمنــــــــــة واجـــد وصعبـه
ومثلي تـــــــرى لو عــــــــرف مثلش حَمَد ربه
بس اللي كنت ابغي أضيـفه في هالموضوع
إنَّ احنه بالتفـكيـــــــــــر لازم نـــــوري لشموع
يمكن الحــــــــال انشوفه في لحظــات مزروع
ليش احنه نقطع الأمـــــل وانقــــــــول مقطوع
وش فيهـــــــا لو في التيلفون انسولف أوقات؟!
وماحــد عن الموضــــــــوع يدري يعني بِسكات
وانحـــدد الوقــــــــــت بمسـج والا بالرنــــــــــات
لا مِن درى ولا مِن سمع .. والدنيـــــــا حسبات
خلَّص الكظمي من خِطـابــــــــاتــــــــــه ومقاله
غَسَّل عقلهــــــــا وعقـــــــــب ما خلص غساله
طمَّنهـــــــا واقتنعت تمــــــامـــــــــــاً باللي قاله
لَف بسبــــــــع لفــــــــــــــات واتحقـــــــق مناله
قالت: عجل خذ رقمي بس اكتبـــــــــه بسرعه
فلافـــــه خمسه افنينـــه فمانيـــــة سبعه
سته صفر اربعـه واحــد تسعه تسعه
مو ناقص الا الهــــــاش والنجمة ! صدق روعه
انتظروا الحلقة 12
حكاية حب
12-10-2007, 12:20 PM
حلووه
والله خطير هالكااظم
بليز أخووي لاتغيب كل يوم حط جزئين جزئين
اووك
ووموفق
ساقي العطاشا
12-10-2007, 10:32 PM
مشكوره على المتابعه
السلام عليكم ورحمة الله وبركاته .
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
الحلقة 12 و 13 .. فلها الكظمي بالفوچرات .........
سيَّف رقمها وضرب رنة يعني ( مسكول )
سيَّفت رقمـــه وردت الرنَّــــــة على طول
قالت: أني للساعه وحـــــــدة ترى مقفول
بس عقب وحدة إنته فاضي والا مشغول؟
قال: انا فـــــــاضي بس إذا إنتــي فضيتين
خبرينـــــــــي بالمسكول يعنـــي لو قدرتين
قالت: خــــــلاص إعتمـــد دام احنه متفقين
والساعه وحده جت وشوف اشصار ألحين!
ضربت له رنــــــه واتصل وبسرعه شـــــالت
يا هــــلا قـــــال ويا هــــلا ويا غــــلا قـــــالت
وتالــــي السوالــــف للفجــــر طالت وطالت
وروح الغــــــزل مـــــا بينـــــهم صالت وجالت
قالت: اسمــح لي صوتي بايــــح فيي نومه
قال: انتي صوتش بايـــــــــح بهاذي النعومه؟
إشلون لو مو بايـــــح اشنوعـــه ريُّووووومه؟
لا غـــــــاب هالصوت الله يرعـــــــــاه ويدومه
قالت: تعـــــــــال انزيـــــن ما بتغــــــني ليي؟
لو بس حچي وما كو فعــــل واتقص عليي؟
قال: انـــــــا عمري مـــــــا طلع دخنة حچيي
طلبي لغنيـــــة؟ قــالت: يلا غن لي أي شي
غــــــرَّد الكــــــظـــــمي: دان دان ودان وا دان
هيله يرمـــــــان الهـــــــوى .... هيـــــــله يرمان
عنــــدي حبيــــــه چنها بستگ .. كازو .. بيدان
(( ماتدري هـــــاذي اغنية لو گراشي جوعان! ))
رد قـــــــال: سمعــــي الثانيـــــــة ... يالبرتقاله
ريم السبــــــاله .. ويش!!! لا sorry الغزالة
تفـــــــاح خدهــــــــا والخشـــــــم چنـــــه خلاله
فارس عَشقهــــــــا وبالعشق حالتـــــــــه حاله
خلَّص وقـــــــال: اشرايــــش أصلــــح لو أفشِّل؟
قالت: عجيــــــــب وربي صوتــــــك مـــوت يهبل
تصلح ونــــــــص ياريـــــــــت ليـــــك اقدر أوصِّل
لو أني منــــــــــك چـــــــــــان كاسيتيـــــــن أنزِّل
شوف النفــــــــاق اشلون بــــس! .. ألله أكبر
هِي تدري صوتـــــــه مُجــــرش ويشبه الوَروَر
بس ما بغـــــت تِحرجــــــــه لا يهـــــرب وتِخسر
مِحتـــــــاجــــــــه يشحن ليها فوچر ورى فوچر
واستمر هـــــذا الإتصـــــــــــال أيَّــــــــام وطوَّل
كل ليلة يشحن ليهـــا چم فوچــــــر ... إتخيَّل !!
وأدنــــــــــات ليله اقتـــــــــرح فكرة .. لكن أوَّل
فاصل اعـــلاني وانتظر بــــاقــــــــي المسلسل
ساقي العطاشا
12-11-2007, 03:18 PM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
الحلقة 14
يلا ورا الكظمي انشوف سالفته
عقب الخسايـــر والمصاريـــف اللي فلهـــا
خلتـــــــه ينــــزف اكرِيـــــدِت ( عدل شغلها)
حامت في چبده وقال: ( وش هاذي بُخلها؟)
بـــس عــــاد فلَّسنـــــا تــرى ( يلعن شكلها )
خلاَّهــــا ليــــن اتعلَّـــقـــــت في حبـــــه أكثر
وصارت أسيرة صوته ( مشكل ! ويلي مگدر)
فكَّــــر الكظــــمــــي وفـــكَّـــــر ودبَّـــر وقـــرَّر
لازم مثـــــل مـــا خسرتـــــني بعـــــــد تخسر
وأدنات ليــــــلة ما شحــــــن ليهـــــــا ولا شي
وقال: انـــــــا باشوف الرزالة اشــــلون تمشي
مفتكرتـــــني طيــــب ..لا .. بنقــــلــب وحشي
وهاذانه باطـــــنش واذا من قـــــدهــا طنشي
والا الفجــــر متصـلة ليـــــه برقــم البيـــــــــت
وينك يافــــــــارس؟ لا مسج لا رنــــــــة دقيت!
ماهي عوايدك! خوفي بس من صوتي مليـت
لو تدري حالي اشلون من شفتك اتبـــاطيـــت
قال: اسمحي لي تــرى هالچـــــم يوم مُفـلِس
قالت: أفــــــا لا تفتكـــــر .. ليـــــك انـــي بترِس
بـــــس لا تغيــــــــب ولا اتخليـــــــــني أوسوس
إتمغَّط الكظمي اوتنعنــــــــش چنـــــــه سِترِس
الحلقات الأخرى مزدحمة
( تنتظر الكيبورد يفضى ليها )
حكاية حب
12-11-2007, 03:43 PM
هههه والله مسخره مع هالكااظم
بس خوووش مع الصووت وريم السبااله ضحكني
عالعموم
لاتخلي لوحة المفااتيح . الكيبورد . مزحووومه فضيهاا شووي
ههه
ولا تنسى كل يوم حلقتين
ومووفق
ساقي العطاشا
12-12-2007, 10:20 PM
مشكوره على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
الحلقة 15 .. الكظمي يلعب نص ملعب
وانقلــــب الموضــوع من خـــاسر لربحـــــان
خلاَّها مثـــل الخاتـــــــم بصبعتـــه الشيطان
علَّقها .. فلَّسها .. عَدَمها .. ومـــا هو عدمان
إي يبه هذا الكظمي ... ( ما تغلبه النسوان)
ولو ليــــلة ما يتصــــل ليــــهــــا اتصير تونـــة
زفرتها زفــرة تــــنـــــتـــــظر بـــــــس تيلفونه
هذا إذا مـــــــا مرضــــت وشبعـــــت اصخونه
إي يبـــه هــــذا الكظمي .. لا .. ( ما تغلبونه )
ميت ضميره ولا اتقـــــــول يصيــــده تأنيـــــب
واذا بغى يعـــــاقــــــــبها مـــــا يتصل وايغيب
يقدر يشيِّبهـــــا في چــــــــم كلمه ولايشيب
إي يبه هذا الكظمي .. ( ياكم ياكم الذيـــــب )
خلاهــا مثـــــل الجاهــــــــــلة تسمع كلامـــه
ومن تعصي أمره قال: بــس .. مع السـلامه
تتــرجى .. تتوســـل .. اتبهدلهــــــــا النــدامه
إي يبه هذا الكظمي .. لا .. (هوها .. منامـه )
يجرحها يـــــوم ويـــــوم يتفـــــلسف ويداوي
يجبرها خطــــوة وتنكسر عشرة خطــــــاوي
جننها .. طفشها .. ولا تـــــــــدري وش ناوي
إي يبه هذا الكظمي .. ( والعب يــــالاهلاوي )
الحلقة 16
اتصخن في حجرة التبديل
حكاية حب
12-13-2007, 12:36 AM
يالله بصرااحه كرهت هالكظمي
ماالت عليه شكله عن جد يبي يتسلى
لوو سمحت ممكن تبدل الحلقه اللي بعدوو بسرعه
لاطووول
خلناا نشوف نهااية هالكظمي
فيـ الإنتظاار
حكاية حب
ساقي العطاشا
12-14-2007, 12:11 AM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ....
الله يـ دنيا .. هذا الكظمي لو حسين فهمي؟
بين المساعي والهدف بس عدة أشبار
ماقصًّر الهتلي باسلوبه وقلَّـــص أمتــار
طيَّر المسكينة بغرامه .. خوش طيَّـــــار
عيَّـــار نمبر ون الكظمي .. والله عيَّـــــار
يعني عقب ما كـــان ذبـــــانـــة عنيــــدة
صار اللي يتحكم! عسى الله لايزيـــــده
هو من قبل لين استغر ماحـــــد يصيده
إشلون اذا علَّقهــــــا والسِكَّــــــان بيده!
عشرين مرة اتدز مسج .. يقــرا ويحقــره
ستيــــن مـــــرة تتـــــــــصل يرفعــــه مره
ها ريم؟ قالت: عمري وحشتني هالنبره
قال: انـــا وي ربعي ما أقــــدر .. بسكره
ألله يـ دنيـا الكظمي صار انسان معشوق؟
هذا اللي دش الشات متخــــرع ومزهوق؟!
هذا اللي مخه يدفع الله البـلـــه مسلوق؟
الله يـ دنيا وما بيطيــح الكظمي من فوق؟
صدق اللي قال الحظ يرز وابلا مساميــــــر
هذا اللي ما عنده شغل .. ختَّن سنانيــــــر
لكن بعد رغم اللي صـــار انتـــــظر شيصير!
والعبرة في الخاتمة لايخونـــــــــك التقدير
الحلقة القادمة تتمكيج
نور الهدى
12-14-2007, 07:55 AM
ساقي العطاشى
اذا عندك الحلقت حطها له
متابعه من بعد
الله يغربله هالكظمي تراني انسخها وادزها بالايميل للعبرة :wink:
حكاية حب
12-14-2007, 09:49 AM
يااعلي عورت بفاادي هالريم
والله يغربل بليس هالكظمي فارس هههه
أخووي ننتظر المدموزيلا تخلص المكيااج
خلهاا تخلص عالسريع
في الإنتظاار
حكاية
حكاية حب
12-15-2007, 02:31 PM
لسه ماخلصت
تراني قااعده على نااري مغليه
ساقي العطاشا
12-16-2007, 02:23 AM
مشكوره على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين .........
چذبــة ابريل قبل لا ينتهي نفذها الكظمي
كل هاللي سوَّاه بغرامه الكظمي تمهيد
والهدف شوفتهـــــا عقب خطوة بالتحديد
فكَّر وفكَّر وصل حق شي شكـــله بيفيد
يجبرهـــــا ترضــــى بلا رجـــــوة ولا تهديد
يدري بها صــــــــارت تكره الدنيــــــا بدونه
تعبـــــــــد الرنــــــــة والمسج من تيلفونه
يعني خـــــــــلاص اتمكَّن وشمَّـــر اقرونه
واسمع الخطة الجايــــــــة ( والله ملعونة )
إتصل ليهــا وصوتـــــــه عن يازعــــــــم بايح
سِئلته: عمري اشفيك؟ قال: اشويه صايح
قالت عسى ماشر حبيــــبي؟ قول؟ صارح؟
قال: انا مو بيـــــــدي خـــلاص .. ايام ورايح
قالت: حبيبــــــي ما فهمتـــــك وضُّـــح اكثر!
قال: الصراحة .. مانــــه عــــــــارف لچ اتعذَّر
بس الحياه تبغي كفـــــــــاح اطول وأكبــــــر
فرصة سفر للخارج .. وعذرينـــــي .. مضطَّر
قالت: يـ فــــــــارس چان مزحــــة قول مزحة
ناوي على قلبـــــي من امزاحــــــــك اتذبحه؟
أرجــــوك اذا تتقشمر .. القشمــــــــرة چلحة
خرَّبت مزاجـــي يـــــــلا عمري بسرعه صلحه
قال: انا مــــــا أتقشمـر وصـــــــدق اللي قلته
عَـــرض بفرنســـــــا وانـــــــــا فكَّـــــرت وقبلته
راتـــــب حلو .. وتغيــــــير جو .. والفرصة فلته
وهذا جوازي وكل شي في الجنـــطة حملته
ماتت اصيـــــــاح التلحــــــة ولدمـــوع اربع اربع
وقالت: يـ فـــــــارس عن قـرارك جــــوز وارجع
ماتدري لو تتركنــــي موتـــي يصيــــــــر أسرع؟
ترضى على اللي اتحبــــــــك بلحظــــة تتقطَّع؟!
ويلي على الحب والله طرطنقـــــــة وشخابيط
ما شافته وبتمــــوت وش هالحـــــــب ؟ بلاليط؟!
ألعـــــــن ابو اهـــــــرار العلاقــــــــــات الخرابـيط
بس يلا خلنــا انشـــــــــوف قصـــــة هالزعاطيط
على ما تصيح ريموووو شوي والكظمي يضحك من ورى التلفون
انسرح الحلقة اللي عقبها تسريحة حلوة
واندزها ليكم قمر 14
حكاية حب
12-16-2007, 02:31 AM
ناري > نار تعديل
هههه
ننتظر التكمله بفااارغ الصبر
ساقي العطاشا
12-16-2007, 11:27 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
لا بيقطعونه فودا فون اذا ما كان ايزي
واصــــــل الكظمــي بفتقــــته وهد الصواريخ
وكل چذبـــــة من سرعتها توصل إلى المريخ
يعني مثـــــل كظُّــــــوم ما تلقى في التاريخ
شليـــــخ قبله وبعده ماحــــــد كفــــــو شليخ
قال: انـــا ياريــــــــم ادري فاجئتـــــش بأمـري
بس ويش اسوي ضاق من هالعيشة صـدري
مو مسألـــــة حاجـــــــه ولا أشكي من فقـري
لكن الوحـــــــــدة قاتلـــــــة وتاكل في عمـري
رغم إني حبيتـــــش وحبيتيــــــــني صگ موت
بس ما أحس حبــــــــنا يتحرك متـــــــــر لو فوت
يعني اسمحــي لي هالعلاقـــــــة زمن موقوت
دام انها مختصرة على الشاشه وعلى الصوت
قلبــــــي مثل قلبـــــش ترى بالشـــــوق ينبض
ما ودي أطلـــــب منــــش اكثــــــــــــر ولا أفرض
بس شــــوق ومابعــــده لقـــــــــاء شوي يعوُّض
هذا عــــــــذاب وصبـــــــره مايســــــوى ويمرُّض
من صغري كنــــت اتمنى وحدة طيبــــة مثلش
وصدقيني ماشفـــت انا شمس اخلاص قبلش
والى الأبـــــــد وسط القــــــــــلب يبقى محلش
بس الله مو كاتــــــــــب لي أتهنى في وصلش
إنتي أصيـــــله ومخلصة ومـــا منـــــش اقصور
وكل فعل منش طيـــــــــب ومن قلبي مشكور
ومالي ترى حق شوفتـــش أطلبهـــــــــا بالزور
كل واحــــــــد بنفسه يضل حر ماهـــــــو مجبور
ويمكن أنـــــا لو شفتــــــــش اتغيـــــــــــر قراري
واختلف رايي شويــــــــة واتبـــــــــدل ومساري
وعفت السفر والطلعـــة من ديرتــــــــي وداري
يمكـــــــــن ويمكــــــــــن يحلى صبري وانتظاري
( ياعلي .. موعادي ترى الكظمي في التمثيل! )
إسمعه يحچي اتقول دارس چــــــذب وتحليــل؟!
لوعلى الجذبة تمشي فاتــــــورة بالتأجيـــــــــل
قطعو الكظمي فودا فـــــون ... اشيدفع البيل
ما بغى يسكت شوي
وريموووو ! ... إي يـ ريموووو
الزمن خاش لش حفرة طيحي فيها
فترة بسيطة واتكون الحلقة الجاية فريسة لنواظركم
حكاية حب
12-17-2007, 12:36 AM
ههه خطير
أنتظر البااااااااااااااقي
ساقي العطاشا
12-18-2007, 08:09 PM
شكرا على المتابعه
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين .......
وافقت عيشلون عيل
خلَّص الكظمي اهــــــــرار وما خلَّص مراده
ولازم عقب كل كلمــــة حلفة على العــادة
وامَّا الفقيــــــــرة انعدمت وصارت سمــــادة
طيَّحها في الحفـــــرة وسلب منهـــا الإرادة
شبعت اصيــــــــاح وضلت اتكحكح .. اتعاطس
چنها قطــــــو محتـــــرق بتيـــــــــزاب وفاطس
وكظّــــوم كل مــــــا سمع ونَّتـــــــها مستانس
هدأت وقــــالت: انــــــت صدق اتحبني فارس؟
قال: اسمع! اتفضَّل! المجنونـــة وش اتقول!
من صدقش انتي تسألينـي؟! يعني معقول!
تدرين رفقـــــــاني اذا شافــــوني معلــــــول
قالو يـ فــــــارس إنسى ريم وشـــدة واتزول
تدريــــن مــــــــا قـــــــررت أســـــــافر لفرنسه
إلا عقـــــــــب ماعفسني التفكيـــــــر عفســة
انتي يـ ريــــــــم بقلبي ريحـــــــــانة منغـرسة
بس ويش يسوي اللي حياته كلها نحســــة
قالت: خـــــلاص ارجــــــوك مافيي ترى ادموع
والكظمي في قلبه يقول ( ان شاء الله اتزوع )
قال: ادري تعبتــش ارتاحي باقــــــــي إسبوع
وابتعد عنـــــــش يالعزيـــــزة ومالي ارجــــــوع
قالت: عسانـــــــي المـــوت ولا تبتعد عنـــــي
فـــــارس قبل لا تربـــــط اشناطـــك اسمعني
ماحـــــــد بيسقي الروح غيـــــــر اللي زرعني
ومافي شي عنك ترى في الدنيــــــا يمنعني
مو مشكلة خــــــــــل نلتقي لو حتى بكـــــــرة
بس عطني كلمــــــة عهد تتكنــــسل السفرة
وللأبد مـــا نفتــــرق في الحلــــــــــــوة والمرة
واللي يخون الثـــــــاني ما يهنــــى في عمره
شوف انت شوف الحين صدق الكظمي شيطان
هذا اللي يبغيـــــــه وبعـــــد يا زعم حمســـــــان
إمسوي روحه ماهــــــو قابـــــــل ولا فرحـــــــان
ومن داخل اتحصله بيطـــــيــــر ابدون جنحــــــان
قال: انا مــــــــــا أقبــــل تشوفيــــني مجبــــورة
تركينـــــي وادري لــــــــــو تركتــــــيني معذورة
بقنع وبرســــــــــم ذكريــــــاتـــــــش ليي صورة
ألله كريم .. وعلى كل لحظــــــــة مشكــــــــورة
ردت اتبنبـــــــــــع چنها صخلة امفارقة الـتيــس
وبين المدامـــــــــــــــع والمــدامع ما أكو space
وهو بعد مثَّل صيحتــــــــه وابتدى في الـريــس
والظاهر الملتقــــــــــــــى بكرة (face to face)
والحلقة القادمة بتكونون كلكم وياهم في الطلعة
واللي يتأخر بيفوته لقاء الكظمي وريموووو
حكاية حب
12-19-2007, 01:08 AM
هههه ياحراام هالريم
بس تستااهل محد قااال له تركض ورى القلب وتترك العقل
يسلموو أخووي
ونحنُ في الأنتظاار
ساقي العطاشا
12-19-2007, 02:04 PM
مشكوره على المتابعه المستمره
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ........
يلا ركيض كلكم الساعه أربع مرمريز
تالي التوســـل والترجي وساعــــــة اصيـاح
والكظمي ماقصَّــــــر بعــــد بـ دموع تمسـاح
وافق وقال: الدنيــــــــا ماتسوى ترى انيــاح
بس ما بسافر .. بس أهم شي قلبـچ ارتاح؟
وابتسمت شوية ابتسامة انخلطت بنــــــوح
مثل اللي مـــــات وعقب موتــــه ردَّت الروح
وقالت: محد غيــــــــرك ترى يعــــرف للجروح
انت الطبيـــب اشلون عن مرضـــــــاك بتروح!
قال : الله لا يحرمني من هـــــــذي المشاعر
شيلي الحزن وانسي خـــــلاص إني بسافر
دام انش اتشوفيــــــــني روحش ما بغــــادر
بس عاد باچــــــــر نلتقي؟ لو عقــــــــب باچر؟
قالت: بكيفــــــــــك إنتــه قــــرر وأني بسمع
وحدد الساعــــه والمكـــــــــــان انته وبنطلع
قال: الهوى مل الصبـــــر ماعـــــــــــاد يوسع
بكرة نتـــلاقى بمرمريـــــز الساعــــــــــه أربع
ويلي على الكظمــي وألاعيــــــــبه والافكار
أي قيس وعنتر أي جميل أي حب وأشعـــار
ماحد على الكظمي في قصة حبه .. إعصار
لعبها صح والباقي ( بص وشوف ) وش صار!
الحين بالضبط
الكظمي يطالع روحه في المنظرة كاشخ
وريم تتعدل وتتمكيج وتتسرح
والساعه في العد التنازلي
تابع الله يخليك
حكاية حب
12-19-2007, 05:47 PM
يالله أنت بصرااحه الموقف الحلوو تقطعه
بليز كل يوم حلقتين حلقتين حلقتين
اووك
شوووكرن
نور الهدى
12-20-2007, 08:35 AM
حكاية حب محروقة تبي تعرف القصة كلها مرة وحدة
يالله الله يعطيك العافية كملها لنا
ساقي العطاشا
12-20-2007, 11:48 AM
شكرا على المتابعه المستمره
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين ..........
شافو بعض أخيراً .. صدق تعبونا وياهم
ثـــلاث ونص رن تيلفــــون الكظمي رنـة
واتصل ليها .. ياهــلا .. قـالــــت: سبقنـه
قال: اتفـــــقنا على الأربع نلتـــقي احنه
يعني نص ساعه وجـاي ياريـــم اتفـقنه؟
قالت: انتظرك فوق ( تيــبل رقــم عشرة)
سيده تعال ادخــــل اني بروحي منتظرة
ولاتسرع السرعـــــة ترى موزيــنة خطرة
وصك الموبايـــل وصكته والشوق جمرة
نص ساعه لكن ريم تتخيلــها ساعـــــات
تفكير وخوف وشوق والقلـب بمتاهـــات
ماتدري تعجب فـــــارس بكل المـقاسات
لو ماتِـعـِجْـبه .. ألله يستر .. كلها لحظات
والكظمي في السيارة ضرب افكار عنده
يصدق وصفهـــــا! إن صدق ما أحد گــــدَّه
لو بالغت! مو حلــوة! لا مـــافيــــــي شدَّه
وبين المخـــاوف والأمـــــاني لحظة وحدة
وصَّل الكظمي وقلبه بم بم من الربشــــه
وريمو بعد حسَّت خطاوي وجتهــــا رعشة
ويوم الستارة اتحركَّــــت عرفــــــت الدشة
وفجأة دخل كاظم .. وصاده شوط دهشة!!!!!
عاد من شنو اندهش!!!
امردك بتعرف بس اصبر
حكاية حب
12-20-2007, 01:31 PM
القطه شكلهاا وااو
ممكن تكملهاا اليووم
؟؟
ساقي العطاشا
12-24-2007, 11:31 PM
مشكورين على المتابعه
يا ريم إني أتيت فـي ولـهٍ
يا ليتكِ تدركين ما الولـهُ؟
أحببتكِ والعيون لـم تـركِ
وذلك الحـب ذلـك السفـهُ
لك الفـؤاد وكـل جارحـةٍ
تفيضُ بالحبِ والعنـاءُ لـه
فساد ذا الحب بـان آخـره
لأنـه بالفـسـاد أولــه
ما ذاك من فارسٍ سوى عتهٍ
وليس يجدي هوى به عتـهُ
ساقي العطاشا
12-24-2007, 11:32 PM
چنها يشاعـر قصتـك هـذي إلحبيبيـن
إشلك ينادر يالـس إتـلاحگ هالإثنيـن
بسك ترى خايف أنا مـن موعـدٍ شيـن
وياهي مواقف أستـوت ياخـوك گشـره
أرجوك لا تذكر سوالـف مثـل هـادي
إسئل مجرب وأرتجـي تحقـق مـرادي
خل القصص هاللي تفتـت لـي إفـادي
وآنه ترى منهـا صـرت چنـي لوميـة
حامض ترى ما أنبلـع ياخويـه إشفيـك
حس بمشاعر الزعيم ومني إلـك شيـك
أگرا، أطالع، وأصبحت آنه أشـك فيـك
لا يكون تدخل لي المسنجر بإسم وحدة ؟!
خليـت آنـه الدردشـة ويــا أهلـهـا
حسيت أنها لعبـة الحـرگة بحدهـا(1)
وآنـه بعـد هاليـوم لا مـاراح أردهـا
لو تستوي هالدردشـة جلسـة رسميـة
الچات يـا نـادر مثـل زرع الميانيـن
تاخـذ وتعطـي ويـا وحـدة ولا ثنتيـن
ما توتعـي للصبـح إلا صـاروا أثنيـن
والوگت ياكـل فـي چبـد مستخدمينـه
ريم الفلا وكاظم الفـارس مـن أبطالـه
ترسم لنا بهـم چم مثـل يحـزن أمثالـه
ويسعد من النظرة الأولى من سعـى لـه
لكن حسافة يـا هـي أحلامـه كسيفـة
كاظم ترى يحلم وهو ضايـع إحيابـه(2)
وريـم الفـلا بنيـه تحبـه وتحيـا بـه
وكل من يتابع قال نـادر مـا حيـا بـه
وأنـا متفائـل بنهـايـة صومعـيـة(3)
ساقي العطاشا
12-24-2007, 11:35 PM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين .........
شوف هاللحظة أطول لو عمر كاظمو؟
لحظة عصيبة وماهي سهلـــة على لِـثنين
لحظة وكأنها اسنيــــن شــردت بالحبيبيـــن
لحظة والكلمــــــة تبـتدي وتنتـهي من وين!؟
لحظة وسوالفــــها فقــــط بالعيــــن والعين
لحظة بعظمها اختصـــرت اظنــــــون ومسافات
لحظة في صوب وصوب كل اللي مضى وفات
لحظة وعلى قولة الشـــــــــاعر ذاك ( چلفات )
لحظة مثل شمـــــــس وبعد ما فيهــــــا حلفات
لحظة ومخاوف ريــــــــــم في النظرة مجتمعة
لحظة ونوايا الكظمـــــــــي مذهــولة منصدعة
لحظة وحديـــــــــث يطول بس ماحـــد يسمعه
لحظة والواقــــــــــع والحقايـــــــق مثل صفعة
لحظة وبعــــــد ماكــــــو احتمـــــالات وهواجس
لحظة وبدايتـــــها انتهــــــــــت نصف الوساوس
لحظة الخنيــــن ايـــــبــــــــــان فيها مع الخايس
لحظة مثل زبـــــــــدة لقصــــة ريــــــــم وفارس
لحظة واظن اثنيــــــــــنهم من عقــب الاشواق
صارو في حيـــرة وخوفــــــــــــهم للروح معلاق
وما يندرى يبـــــــــــــدأ وصل لو يبـــــــــدأ افراق
خلك امتابــــــــع قرَّبــــــــت تنـــــــــكشف لوراق
والله وانصدت يكاظمو
قال: السلام .. وردَّتــــــــه والصـــــوت خجلان
حيَّاك فـــــارس .. قال: سوري شكلي غلطان
قالت: اتفضل .. أبد .. موخاطي في العنـــوان
قال: انتي ريم؟! وجاوبت: اوفكورس يس مان
خذ نَفَس وش طولــــــه وقعـــــــد مذهول ايفكٌّر
تدرون شاللي خلى كـــــاظم بلحظـــــــــة متغيُّر؟
ألحيــــــن هــــــــو منصــــــــدم بريـــــــــم ومتحيُّر
ماهي في باله بهــــــالشكـــــــــل! ما كان يخطُر
ضل فيهــــــــا يتمعَّـــــــــن ويتـــــــذكر حچيهــــا
كل شي يشوفه مختلف .. الله يخزيهـــــــــــــا!
ولا شي من اللي قالتـــــــه وذكرتـــــــــه فيها!
وين الحـــــلاوة والمـــــــــــــلامح؟ .. ماكو بيها!
بيضة تقــــــــول! اشلون صــارت يعــــني سودة!
والطول قالـــــــــــت وسط! طـــــول امي العودة!
وين الرشاقة! امكرشــــــة! والدبــــــــــة ممدودة!
وين الأناقـــة؟! الوجِـــــــــــه چنـــــه اكريم صودة!
معقولة يعني هــــــــاذي هي؟ مو أحــــــــد ثاني!
قصت عليــي! وبهدلـــــــــــت قلــــــبي وكيــــاني
آه يالقصيــــرة العبـــــــدة .. يا چــــذبـــــــــة زماني
يلعن الشـــــــــات اللي على شكلــــــــــش رماني
شوفو كاظمو .. بدا يغلط ..
على باله بس هو اللي انصدم
يكون يعني هو اللي قاله مافيه جذب
وقت اللي كان الكظمي في حسبات وتفكيـــــــــر
هي بعد كانت عنــــدها حسبة وعندهــا تذكيــــــــر
ماصدق وصفه وشكــــله كلـــــش في الوصف غير
الحچي وردة وفي الحقـــيقـــــــــة شكله .. جرجير
لكن الفـــــــارق بيـــــــــنهـــــــا وبيــــــنه القنـــــــاعة
هو مات شوقــــه والشكــــــــــل غسَّـــــــل اشراعه
وهي ما لقــــــت في شكــــــــــله عــــن حبه مناعه
قالت اهم شـــي عقـــــــله .. وقلبـــــه .. واطبـــاعه
وعقــــب اللي دار ودار من فكــــــــر وخواطـــــــــــر
نطقت وقالت: ليــش ساكـــــــــــت؟ في شي صاير؟
قال: ابـداً .. بـــــس راســـــــــي متسودن ودايـــــــر
قالت: اظـــــن مو راقـــــــــــد انــــــــــت وجيت ساهر
المهم .. وش تشرب؟ طبيــــــــــعي؟ والا مِلك شيك؟
جاوب في قلبه: حـــــدش انتــــــــــي ماي في جيك
قالـــــــت: يفـــــــــــارس ويـــــــــن سارح؟ الطلب ليك
قال: اي شي .. قالــت: انتـــــــــه تامر واني لبيـــــك
طلبو عصيـــــــــــــر وعلى مـــــا تجهـــــــــــز الطلبه
قالت: يـ فارس عنــــــــدي شــــــــــي ولازم اقر به
وارجـــــوك لا تعتقـــــــد كنـــــــــت ابغيــــــــــك لعبة
ولا تعتبــــر هاللي بقولــــــــــــــــه كــــــــــــان چذبة
ادري خاطركم تعرفون وش كانت بتقول له
اذا دريت انا نفسي بخبركم
ساقي العطاشا
12-24-2007, 11:36 PM
السلام عليكم ورحمة الله وبركاته
الحمد لله رب العالمين الصلاة والسلام على أشرف الخلق والمرسلين نبينا محمد أبن عبدالله وعلى آل بيته الطيبين الطاهرين
مو طايقنها خير شر ولا يبغيها تتكلم
شوف يعني اشلون انقلب 180 درجة
كاظم في باله يقول يعني شاللي عِدها!
وش هالفــقــاله يعني ما حسَّـت بعــدها!
بهالشكل بطت چبـــــدي بـــط الله چبدها
واشلون احيــــن اتصرف بسرعة واهدها!
مو مكتفية انصَدَمت ابهـــا وتــــبغي تهـدر
لو تسوى قلنــــا ماعلــيــــــه تلغي واتبربر
بس آه يـ حظي الخشم وش كبره ويضجُّر
چنه حصالة .. امحبـــب .. امجعد .. امخنفر
لا والحواجب شوفهــا! امخمَّة سوريـَّــــــة؟!
ولعيون منصكة أخـــــس من الكوريَّـــــــــة
هاذي تستاهل ريم؟ هــاذي ســنُّوريـــــة
غلطان من سمـــــاها ريم .. الخنفُّوريـــــة
لا والقهر في التيــــلفون الصوت يخـــــدع
تتكلم برقـــــــــة واتاريـــــــهـــا تــــــــــتميَّع
هاذي شكلـــها وي هالجبهـــــــة تـــــتدلع؟!
حدها في مطبخ يمكن المقرودة تنفـــــع
الصوت خذ عقلي وشكلــها رد لي عقلي
والمشكلة بعدها تـــــــــبغي تعتــــرف لي
لا .. ألله يستر هاذي بنصم ابهــــا شكلي!
خلني قبل لـَتقـــــــول اصارحهــــــا وأوَلـِّي
خلك مواصل اذا كنت متابع لأنها ثواني
ساقي العطاشا
12-24-2007, 11:40 PM
--------------------------------------------------------------------------------
كلما اعترف بشي أصرت عليه
وش يفكه منها !!
جابو اقلاصات العصيـــر وفيهــــــا أعــــواد
قالت: اتفضَّل .. قال: دايم فضلـــش وزاد
لكن في قلبه يقول: كلش يا زعم عــــــــاد
مالت اعوادة انتين ؟ لو هو هوز ما فـــــاد
رفـّع الراس وقــــــال: ياريــــــم اسمعيني
أول بصارحش بحقـــــــيقه واعــــــذرينــــي
إحنه التـــــقـــــينــــــه وانتي لازم تعرفيني
ويا تقبلــــــــيني بحالـــــــــتي ويا تقطعيني
مو فارس اسمي وأصلي ما أقدر أهـــــدّه
أسمي الحقيقي كـــــاظم امحمَّد العبــــدة
قالت: واني مكيــَّــة بنت جـــــاسم الخردة
يعني خلصلنا .. چذبة وحدة بـچذبة وحـدة
حط ايده من قالـــــت إسمها على راســــه
مصدوم واللي قالته طلـّــــع اخياســــــــه
وش جاب مكيّة لـ ريم! اشهــــالنحـــــاسه
قصَّت عليه ويا زعــم عــنده سياســــــــة
رد قال مو مشكـــــــلة يا مكـيـــّــة عـــادي
بس انا مو في امريكا دارس ( على افادي )
ما أدري وين امريكــــا أصلن في أي وادي
انا الصراحـــــة طـــــــالع من أول اعدادي
قالت: أبد مو عيب من لعــــدادي مفصول
يكفي شهادة اتقـــــول بالأخلاق مقبــــول
ياما شباب بجامعـــــــات ومخها مقفــــــول
وانت يـ كاظم عقلك اتصفق له اعـقـــــول
رد بلع ريــقــــه ولو سمعتــــه نِگعة مو ريق
وقال: أي شهادة أي عَـقـِل أي مخ وتصفيق!
تراني من عيلة فقــــيــــرة تشتكي الضــيق
إفلاس ومتوهق تـــرى بافـــــــلاسي توهيق
قالت: البيــــــزات اتجي واتروح بسهــولة
ويا كاظم الرجـــــــال رهــــــن اللي يقوله
والغني مــــــــو بفلوسه لو عرضه وطوله
الغني كلمــــــــن راس مــــــال الرجـــولة
هز راسه والدنيا على اعيونـــــه مصطكة
ماظل محل في جسمه ماجـــت فيه حكة
كل ماوصف حالتـــه والبــــــلوة والضنكة
چنها بحچيها اتقول: ماكو ماكو فكــَّـــــــة
فكــَّر في حيلة اشلون يمشي بسرعة عنـها
واشلون ايفارقهــا ويفرصخ روحــــــــه منهــــا
لقاااااها .. رنــَّة بتــــيلفــــــونه بس ايـــرنهــــا
حيلة ذكيـــــــة مــنّــه والشــــــردة ضمــــــنها
يازعم متصلين له وشوف وش سوىَّ
ساقي العطاشا
12-24-2007, 11:42 PM
سوَّاها وراح
خيره في غيره
عن يا زعم جاه اتصــــــال بخبــر مو زيـــــــن
أمه في المستشفى مريضة اتنازع البيــن
نزَّل النقـــــــال بمدامـــع على الخــــــــديــــن
قال: امي .. بمشي .. أعتذر .. بتصل بعدين
قالت : عسى امك سالمـة من كل أذى وشَــر
مو مشكلــــــــة اتفضل وحاســـــب لـَ تـــــتهور
وانتظر بعــــــــديــــــن اتصالــــــك من الدخـــتر
واتمنى ما تـــــنسى حبــــيــــبـــــتـــــك وتتأخر
راح ودمع مكيــَّــــــة بالخــــديـــــن ســچــــاب
إحساسها يقـــــــــول اتصــــاله اهرار وچذاب
والمثل ايقول: إلحق الچــــــــذاب للــــبــــــاب
إي والله مو چـــــذاب بس .. ما دفع لحساب
راح وبقـــــت تـــــنــــدب كرامتها وشرفهـــــــا
ورحم الله مِن دمعة نــــدم توبـــــــــه ذرفهــا
تتمـــــنى لاعرفتــــــــه يـــــــــوم ولا عرفهــــا
كانت ( زلال ) وبــــــــــيـــــده لوَّثــــها وغرفها
راح وألم مكيّــة وســــــط الروح ضــــارب
كاظم هرب بس اللي فيــــها ماهو هارب
رد الضمير اصحى بعـــد ما كـــــان شارب
وبيّن وعيهـــــــــا من بعد ما كــــان غارب
وهو من طلع شال البطاقــــــة من النقــَّـــال
قطــَّاها في الشارع بلوعـــه مثل تـــــفـــــال
إلاَّ رقم .. بيطلع أحسن منــــــــه في الحال
بس المهم يقطعهــــــــا وتشيـــــــله من البال
وصَّل البيــــت ويحمــــد الله وصَّــل البيـــــــت
قال: انا بالله اشلون في هالحفـــــرة طبيـبت!
والله ستـــــــر مو على وجهـــي من انچبيـــت
وشقد عرق من قابـــــــلتـــــــني اليوم صبيت!
رد قعد كاظم مستمل ما عنــــــــده شغـــــله
معفوس وجهه چنــــــه فاقــــــــــد أمه واهله
قال أدخل الشـــــــات اشوي اتهنى واتسـله
برد احــــــــاول يمكن القى ابنــــــــــيّه سهلة
عرج على ( فوفو القمر ) في الخاص وسلم
هاي .. الصراحة .. ودي نص ساعـــة نــتكلم
ردت عليه بـ هـــــاي .. رد .. صورة تــتبـــسم
بس عاد هالمرة كلَّمهــــا ولا اتــــــــبلعـــــــــم
وابتــــدت للكظمى البطل قصة جديــــــــدة
واللي جرى وصار الزمن يفتــــــر ويعيــــــده
وچم كاظم بهالشـــــات شهواته عنيــــــــدة!
وبالدنيا چم مكيــــــــــــة عفتها شهيــــــــدة!
آخر حلقة في الطريق
وما بعدها حلقة
بسكم ضحك
( حان وقت التفكير والعبرة حسب توقيت أحداث فارس وريم )
ساقي العطاشا
12-24-2007, 11:43 PM
قصة عقب قصة والكظمي بنزوته ايذوب
ونعش الضمـــــاير مرتفــــع ما بين لذنوب
والحجة: ( وش دراك بالله بهوى لقـــلوب )
أجيــــــــال غرقت واحنه نصرخ يابحر توب
النت مثل لســــــــلاح بس في حـــدَّه حدين
وشوفو الدول بالتكنلوجيـــــــــــا وصَّلت وين
واحنه .. مسنجر .. شات .. نتنقل في لثنين!
هــــــذا التطـــــور؟! ياحسافة .. تدمع العين
كلمة أخيـــــــرة وما انقـــــول الخير فاتـــــــك
ياللي تحب الطمــــــــأنيــــــنة في حياتـــــــك
راقب اخوانــــــك زين وهم راقب خواتـــــــــك
وتيِّـــــــــــت على اولادك ولا تهمل بنـــــــــاتك
شاشة الأنترنـــــــت ترى تحوي مضاميـــــــن
لكن بعد ما تظمن اسمـــــوم الثعــــــــابيـــــن
وخذ من مئات القصص آيـــــــــات وبراهيــــن
وبين العدل والغلــــط خل عندك موازيـــــــــن
شبعنا ضحكات بمسلسل فــــــارس وريم
وعقب الصلاة اعلى النبي وآله والتسليم
ألله علينا بلطفه و واسع رحمته ايديــــــم
من كل مُحب للخيــــــر نتــــــــرقب التقييم
وفي ختام هذا المسلسل الذي رأى الدنيا بمتابعتكم ومشاركتكم
أشكر الجميع دون استثناء على حُسن المتابعة
والإطراءات الطيبة
نور الهدى
12-25-2007, 06:36 AM
الله يعطيك العافية
وتسلم يمينك على هالجيبات
والله جابها الشاعر عدله
الله يستر على الجميع
حكاية حب
12-25-2007, 01:44 PM
مشكور أخووي عالقصه الراائعه والمفيده كماانو
بس صج أنقهرت لم كنت تعبانه نزلت الجزء كله
ههه
بس عالعموم
قوااك الله والله يعطيك ألف عاافيه
دمت بود
حكاية حب